ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 25. ಮಾಡ್ತಿರ್ ಜಿಣಿ!
ಸಿರಿವಂತ್: ಕೊಂಕ್ಣಿ ಮಟ್ವ್ಯೊ ಕಾಣ್ಯಾಂನಿ ಮಟ್ಟ್ ನಾ ಮ್ಹಣ್ಚಾ ಪಂಡಿತಾಂಕ್ ಹಾವೆಂ ಪಯ್ಲೆಂ ವಿಚಾರ್ಚೆಂ ಸವಾಲ್ ಇತ್ಲೆಂಚ್ - ತುವೆಂ ಸಿರಿವಂತಾಚ್ಯೊ ಮಟ್ವ್ಯೊ ಕಾಣ್ಯೊ ವಾಚ್ಲ್ಯಾತ್? ಜಶೆಂ ಹಾಂವ್ ಭುರ್ಗ್ಯಾಪಣಾ ಥಾವ್ನ್ ಸಿರಿವಂತಾಚ್ಯೊ ಕಾಣ್ಯೊ ವಾಚುನ್ ಆಯ್ಲಾಂ ಆನಿ ತಾಚಾ ಮಟ್ವ್ಯಾ ಕಾಣ್ಯಾಂನಿ ಆಸ್ಚಿ ಸೊಭಾಯ್, ಆನಿ ತಾಚ್ಯಾ ಕಾಣ್ಯಾಂತ್ಲೊ ಸಂಸಾರ್ ಅಥ್ವೊಚ್ಚ್!. ಹೆಂ ಹಾಂವ್ ಮಾತ್ರ್ ನ್ಹಂಯ್ - ಕೊಂಕ್ಣಿ ಕಾಣ್ಯಾಂಚೆ ಉಸ್ತಾದ್ ಸಯ್ತ್ ವೊಪ್ತಾತ್. ಹಿ ತಾಚಾ ಸರ್ವ್ ಕಾಣ್ಯಾಂಪಯ್ಕಿ ಉತ್ತೀಮ್ ಕಾಣಿ ಮ್ಹಣ್ ಸಿರಿವಂತ್ ಖುದ್ದ್ ಸಾಂಗ್ತಾನಾ ಹ್ಯಾ ಕಾಣ್ಯೆಚಿ ಶ್ಯಾಥಿ ಪಾರ್ಕುಂಕ್ ತುಕಾಚ್ ಸೊಡ್ತಾಂ.
[ಹಿ ಕಾಣಿ ಅಜೀಕ್ ತೀಸ್-ಪಾಂತೀಸ್ ವರ್ಸಾಂ ಆಧಿಂ ಬರಯಿಲ್ಲಿ ಜಾವ್ನಾಸಾ]
ಸಿರಿವಂತ್
ತೊ ಮನಿಸ್ ಯಾ ಮನ್ಜಾತ್?
ತ್ಯಾ ಸವಾಲಾಂಕ್ ಜವಾಬ್ ದೀಂವ್ಕ್ ತಿ ಸಕ್ಲಿನಾ!
ತಿಚ್ಯಾ ಆಸ್ಡೆರ್ ಉದೆಲ್ಲೆ ದೋನ್ ದುಃಖಾಂ ಥೆಂಬೆ
ಮುಖಾರ್ ಜಳ್ಚ್ಯೆ ಚಿಮ್ಣೆಚ್ಯಾ ಮಸ್ಕ್ ಉಜ್ವಾಡಾಂತ್,
ತಿಚಾ ಕೋಮಲ್ ಅತ್ಮ್ಯಾಚ್ಯೆ ನಿತಳಾಯೆಚೆಂ ಪ್ರತಿರೂಪ್ ಜಾವ್ನ್
ಮೊತಿಯಾಂಚಾ ಝಳಕಾನ್ ಉಜಳೊನ್ ಸಕಯ್ಲ್ ಗಳ್ಳೆ!
ತರಿ, ತ್ಯಾ ಮನ್ಶಾ ಥಂಯ್ ಕಸಲೊಚ್ ಪರಿಣಾಮ್ ಜಾಲೊನಾ.
ತೆಂ ರೋದ್ ಘುಂವ್ತಾಲೆಂ, ಆಪ್ಲ್ಯೆಚ್ ’ಗತಿ’ನ್.
ತಿ ಸುತ್ ರೆವ್ಡಾಯ್ತಾಲಿ.
ಉದೆವ್ನ್ ಯೆಂವ್ಚಾ ಸುರ್ಯಾಚಾ ಕೀರ್ಣಾಂನಿ ಆತಾಂ ಊಬ್ ಚರೊನ್ ಆಯಿಲ್ಲಿ ಆನಿಂ ಭಾಯ್ಲ್ಯಾ ವಾತವರಣಾಂತ್, ವಾವ್ರಾ ಖಾತಿರ್ ಆಪಾಪ್ಲ್ಯಾ ಘರಾಂತ್ಲೊ ಭಾಯ್ರ್ ಪಡ್ಲ್ಲೊ ಲೋಕ್, ಸರಾರಾಂ ಮೆಟಾಂ ಕಾಡ್ತಾಲೊ.
ತಶೆಂಚ್ ತಿಚೊ ಪತಿ.ತಿತ್ಲ್ಯಾರ್ ತಿಚೆಂ ಭರ್ಗೆಂ ರಡೊಂಕ್ ಲಾಗ್ಲೆಂ - ದೂದಾ ಖಾತಿರ್.
ಪುಣ್ ದೂದ್?
ತಿಚಿ ಕೂಡ್ ಭಾಗೊನಾಯಿಲ್ಲ್ಯಾಬರಿ ತೆಂಯಿ ಮಾಯಕ್ ಜಾಲ್ಲೆಂ!
ಸಕಾಳಿಂಚಿ ಉರ್ಲ್ಲಿ ಇಲ್ಲಿ ಪುಟಿ ಕಾಫಿ ಆಪ್ಲ್ಯಾ ಬಾಳಾಕ್ ಭರಯ್ಲಿ ತಿಣೆಂ. ಬಾಳ್ಶ್ಯಾಚಾ ನಿಸ್ತೇಜ್ ದೊಳ್ಯಾಂಚ್ಯೊ ಆಸ್ಡ್ಯೊ ಉಗ್ತ್ಯೊ ಆಸೊಂಕ್ ತ್ರಾಣ್ ನಾಸ್ತಾನಾ ಸವ್ಕಾಸ್ ಧಾಂಪ್ಲ್ಯೊ ಆನಿಂ ಥಂಯ್ಚ್ ಪಾಡ್ ಜಾವ್ನ್ ಆಯಿಲ್ಲ್ಯಾ ಭಲಾಯ್ಕೆಚಿ, ಪಿಡೆಸ್ತ್ ನೀದ್ ಪಡ್ಲಿ ತಾಕಾ.
ತಿಚ್ಯಾ ಪೊಟಾಕ್ಯಿ ತಿಚ್ ಏಕ್ ಕೊಪ್ ಫುಟಿ ಕಾಫಿ ಮಾತ್ರ್ ಪಡ್ಲ್ಲಿ.
ತಿ ಭಾಯ್ರ್ ಆಯ್ಲಿ.
ಸೊಪ್ಯಾರ್ ಅರ್ಧಿ ಮಾತಿ ಖೆಲ್ಲ್ಯೆ ಸರಿಯೆರ್ ಉಮ್ಕಾಳೊನ್ ಆಸ್ಚೆಂ ಕಾಪಾಡ್ ಬಿತರ್ ವ್ಹರುನ್ ತಿಣೆಂ ವಸ್ತುರ್ ಬದ್ಲಿಲೆಂ.
ಆದ್ಲ್ಯಾ ದಿಸಾ ಮಧ್ಯಾನ್ ರಾತ್ ಪರ್ಯಾಂತ್ ಝೆಮ್ಚ್ಯಾ ದೊಳ್ಯಾಂನಿ ದಾಂಬುನ್ ದವರ್ಲೆಲ್ಯಾ ನಿದೆಂತ್ ರೆವ್ಡಾಯಿಲ್ಲೆಂ ತೆರಾ ಲಟ್ಟಿ ಸುತ್ ಘೆವ್ನ್ ತಿ ಭಾಯ್ರ್ ಸರ್ಲಿ.
ದಾರ್ ಆಡ್ ಕರುನ್ ಮಾರ್ಗಾರ್ ಪಾಯ್ ದವರ್ಲೊ. ತೆರಾ ಲಟ್ಟಿ!
ಮಾಗಾಗಾರಾನ್ ತಿಕಾ ಏಕ್ ರುಪಯ್ ತೀಸ್ ಪೈಸೆ ದಿಲೆಂ.
ತೃಪ್ತೆಚೊ ಬಾರೀಕ್ ಹಾಸೊ ಉದೆಲೊ ತಿಚಾ ವೊಂಠಾರ್. ದುಸ್ರ್ಯಾ ದಿಸಾಕ್ ಸುತ್ ಘೆವ್ನ್ ಥಂಯ್ಚಿ ತಿ ಭಾಯ್ರ್ ಪಡ್ಲಿ.
ಇಲ್ಲೆಂ ಮುಖಾರ್ ಆಸ್ಚಾ ಜಿನ್ಸಾಚ್ಯೆ ಅಂಗ್ಡಿಕ್ ರಿಗೊನ್ ಅರ್ಧೊ ಕಿಲೊ ತಾಂದುಳ್, ಇಲ್ಲಿ ಮೀಟ್-ಮಿರ್ಸಾಂಗ್, ಆನಿಂ ಕಿತೆಂ ಭೋವ್ ಗರ್ಜೆಚೆಂ ತಿಣೆ ಘೆತ್ಲೆಂ.
ಏಕ್ ರುಪಯ್ ತೀಸ್ ಪೈಸೆ ತಿಣೆಂ ದಿಲೆಂ.
"ಅನಿಕಿ ತೀಸ್ ಪೈಸೆ ಜಾಯ್ಜಾಯ್. ತ್ಯಾ ಶಿವಾಯ್, ಪಯ್ಲೆಂಚೊ ಏಕ್ ರುಪಯ್, ಆಶೆಂ ಜುಮ್ಲಾ ದೋನ್ ರುಪಯ್ ಸಾಟ್ ಪೈಸೆ". ಅಂಗ್ಡಿಗಾರ್ ಸಾಂಗೊನ್ಚ್ ಗೆಲೊ.
"ಬಾಕಿಚೆ ಫಾಲ್ಯಾಂ ದಿತಾಂ", ತಗ್ಸಲ್ಲ್ಯಾ ತಾಳ್ಯಾನ್ ತಿ ಮ್ಹಣಾಲಿ.
"ತೆಂ ಜಾಯ್ನಾ".
"ಫಾಲ್ಯಾಂ಼ಚ್ ದಿತಾಂ......"
ತೆಂ ಜಾಯ್ನಾ ಮ್ಹಳೆಂ ನಹಿಂವೆ......!" ಅಂಗ್ಡಿಗಾರ್ ತಾಪೊನ್ ಉಲಯ್ಲೊ. "ಆದ್ಲ್ಯಾ ಪಾವ್ಟಿಂ ಬಾಕಿ ಕರುನ್ ಗೆಲ್ಲಿಯ್ ಆಜ್
ಆಯ್ಲಿಯ್".
"ಹಾಂವ್ ಬರಿಂ ನಾತ್ಲ್ಲಿಂ....."
"ತುಂ ಬರಿ ಆಸಾಯ್ ಕೆದಾಳಾ? ಏಕ್ ರುಪಯ್ ಆದ್ಲೊ ಕಾಡ್ತಾಂ; ಉರ್ಲ್ಲ್ಯಾ ತೀಸ್ ಪೈಸ್ಯಾಂಚಿ ಮಿರ್ಸಾಂಗ್ ವ್ಹರ್".
"ತೆ ತೀಸ್ ಪೈಸೆ ಪಾಟಿಂ ದಿ", ತಿಚ್ಯಾ ಆಸ್ಡೆಂರ್ ದುಃಖಾ ಉದೆಲಿ.
"ಧರ್, ವ್ಹರ್," ಆಂಗ್ಡಿಗಾರಾನ್ ಧಾ ಪೈಸ್ಯಾಂಚೊ ತೀನ್ ಪಾವ್ಲ್ಯೊ ತಿಚಾ ಹಾತಾ ಘಾಲ್ಯೊ.
ಮಾರೊಗ್ ಉತ್ರೊನ್ ವಿರೋಧ್ ಕುಸಿಕ್ ಗೆಲಿ ತಿ. ಥಂಯ್ ಆಸ್ಚಾ ಹೋಟೆಲಾಂತ್ ತ್ಯಾ ಪೈಸ್ಯಾಂಚೆ ಗೋಳಿಬಜೆ ಕಾಣ್ಘೆಲೆ ತಿಣೆಂ ಆನಿಂ ಘರ್ಚ್ಯೆ ವಾಟೆಕ್ ಲಾಗ್ಲಿ.
ಘರಾಕ್ ಲಾಗಿಂ ಪಾವ್ತಾನಾ, ಬಾಳ್ಶ್ಯಾಂಚಿ ಬೊಬ್ ಆಯ್ಕಾತಾಲಿ!
ಉಣ್ಯಾ ಭಾಡ್ಯಾಚಾ ತಿಚಾ ಫುಟ್ಕರ್ ಬಿಡಾರಾಂತ್ ಲಾಂಬ್ ಜಿವಾಚಿ ತಿ ಇಲ್ಲಿ ಬಾಗ್ವೊನ್ಂಚ್ ಬಿತರ್ ಸರ್ಲಿ. ತಾಳೊ ಸುಕೊನ್ ಬಾಳ್ಶ್ಯಾಚೆಂ ರಡ್ಣೆಂ ಆತಾಂ, ಕಿಡಿಂಚಾ ಕೀಂಭರಾಬರಿ ಕರ್ಕಶ್ ಜಾಲ್ಲೆಂ.
ತಿಣೆಂ ತಾಕಾ ಉಕಲ್ಲೆಂ.
’ಬಾಳ್ಶ್ಯಾಕ್ ಆಜ್ ಇಲ್ಲೊ ನೀಸ್ ಭರಯ್ತೆಲಿಂ,’ ಮ್ಹಣ್ ತಿಣೆಂ ಚಿಂತ್ಲ್ಲೆಂ; ಪುಣ್.........
ಆಂಗ್ಡಿಗಾರಾನ್ ಪಯ್ಲೆಂಚೆ ರೀಣ್ ವಜಾ ಕರುನ್ ತಿಕಾ ಪಾಟಿಂ ಧಾಡ್ಲ್ಲೆಂ.
ತಿಚೆಂ ಕಾಳಿಚ್ ಕ್ಷಣಾನ್ ಧಾರುಣ್ ಜಾಲೆಂ; ಭುರ್ಗ್ಯಾಂಚೊ ಮೋಗ್ ತಾಂತ್ಲೊ ಘಡ್ಯೆನ್ ಲಿಪ್ಲೊ.
ಭುರ್ಗ್ಯಾಕ್ ತಿಣೆಂ ಪಾಟಿಂ ಧರ್ಣಿರ್ ಉಡಯ್ಲೆಂ. ತಾಚ್ಯಾ ರಡ್ಣ್ಯಾಚೊ ಆವಾಜ್ ಘರ್ ಭರೊನ್ ಭಾಯ್ಲ್ಯಾ ಆಸ್ಪಾಸಾಂತ್
ಭರ್ಸಾಲೊ. ಪಾಲ್ವಾಂತ್ ತೊಂಡ್ ಪುಸುನ್ ತಿ ಬಸ್ಲಿ. ತೆಂ ರೊದ್ ಘುಂವೊಂಕ್ ಲಾಗ್ಲೆಂ; ಆನಿಂ ಸುತ್ ಏಕ್ ಸಾರ್ಕೆಂ ರೆವ್ಡೊಂಕ್ ಲಾಗ್ಲೆಂ.
ಬಾರಾ ವೊರಾಂಚೊ ನಾದ್ ಆಯ್ಕಾಲೊ ಬಾವ್ಟ್ಯಾ ಗುಡ್ಯಾ ಥಾವ್ನ್.
ಭುರ್ಗ್ಯಾಂಚೆಂ ರಡ್ಣೆಂ ಆತಾಂ ರಾವ್ಲ್ಲೆಂ; ತಾಕಾ ನೀದ್ ಪಡ್ಲ್ಲಿ.
ತಿಣೆಂ ಪೊಟ್ಲಿ ಉಗ್ತಿ ಕೆಲಿ. ತಾಂತುಂ ಆಸ್ಲ್ಲೆ ಬಜೆ ತೊಂಡಾಂತ್ ಘಾಲ್ನ್, ಏಕ್ ಗೊಬ್ಳೊ ಉದಾಕ್ ಪಿಯೆಲಿ ತಿ.
ಹಿ ನೀರಸ್ ಆನಿಂ ಆರ್ಧ್ಯಾ ಪೊಟಾಚಿ ಜಿಣಿ ಸದಾಂಚಿ! ಕಾಜಾರಿ ಬಾಂಧಾಂತ್ ಆವಯ್ಚೊ ಮೋಗ್ ಸಾಂಡುನ್ ಯೆತಾನಾ ಎಕ್ಲೊ ದಯಾ ನಾತ್ಲ್ಲೊ ಮನಿಸ್ ತಿಚೊ ಪತಿ ಜಾಲ್ಲೊ.
ಸಕಾಳಿಂ ತೊ ವೆತಾಲೊ; ಸಾಂಜೆರ್ ಪಾಟಿಂ ಯೆತಾಲೊ.
ಸಬಾರ್ ಪಾವ್ಟಿಂ ಬೆಬ್ದೊ ಜಾವ್ನ್!
ಥಂಯ್ ಧರ್ಣಿರ್ ಪಡ್ಲ್ಲ್ಯಾ ಭುರ್ಗ್ಯಾಕ್ ಪಳೆಲೆಂ ತಿಣೆಂ.
ದಿಮ್ಕುರೆ ಪಾಯ್ ಆನಿಂ ತಾಚಿ ತಕ್ಲಿ ಥಂಯ್ ಥಂಯ್ ಸಿಮೆಂಟ್ ವಚೊನ್ ಶೆಣ್ ಕಾಡ್ಲ್ಲ್ಯಾ ಧರ್ಣಿರ್ ವಿಶೆವ್ ಗೆತಾಲಿ.
ಚವ್ತೆಂ ತೆಂ. ಆದ್ಲಿಂ ಮರಣ್ ಪಾವ್ಲ್ಲಿಂ! ಫಾವೊತೆಂ ಆನಿಂ ಪುರ್ತೆಂ ಖಾಣ್ ಮೆಳಾನಾತ್ಲ್ಲ್ಯಾ ಆವಯ್ಚೆಂ ದೂಧ್, ಪ್ರಸೂತ್ ಜಾಲ್ಲ್ಯಾ ತೊಡ್ಯಾಚ್ಚ್ ದಿಸಾಂನಿ ಸುಕ್ತಾಲೆಂ!
ಪತಿಚಿ ಕುಮಕ್?
ತಾಚಿ ಕುಮಕ್, ಘರಾಂತ್ಲಿ ವಿರರಾಯ್ ಮಾತ್ರ್! ಪತಿಣೆನ್ ಉಲಯ್ಲ್ಯಾರ್, ತಿಣೆಂ ಕಸಲೆಂಯ್ ವಿಚಾರ್ಲ್ಯಾರ್, ತಿಕಾ ಮಾರ್!
ದೆಕುನ್ ತಿ ಮೌನ್ ರಾವ್ತಾಲಿ; ಆನಿಂ ತಾಕಾಯಿ ಮೌನ್ ರಾವೊಂಕ್ ಪಡ್ತಾಲೆಂ.
ರಾತ್ ಪಾಶಾರ್ ಜಾತಾಲಿ......ದೀಸ್ ಉದೆತಾಲೊ......
ತೊ ಉಠೊನ್ ಚಲ್ತಾಲೊ.
ಆನಿಂ ತಿ?
ಪೊಟಾ ಖಾತಿರ್ ಸುತ್ ರೆವ್ಡಾಯ್ತಾಲಿ ಆನಿಂ ಹೆಂ ಪಾಂಚ್ ವರ್ಸಾಂ ಥಾವ್ನ್!
ಭುರ್ಗೆಂ ರಡೊಂಕ್ ಲಾಗ್ಲೆಂ. ಭಾಯ್ರ್ ತಿಳ್ಳೆಂ; ಸಾಂಜ್ ಜಾವ್ನ್ ಯೆತಾಲಿ.
ಉಠೊನ್ ಇಲ್ಲಿ ಕಾಫಿ ಕೆಲಿ. ಸೆಜಾರ್ಚಾ ಘರಾ ವಚೊನ್ ಇಲ್ಲೆಂ ದೋಧ್ ಹಾಡ್ಲೆಂ.
ಕಾಫಿ ಪಿಯೆತಚ್ ಭುರ್ಗೆಂ ಇಲ್ಲೆಂ ಚುರುಕ್ ಜಾಲೆಂ; ಮಂದ್ ಹಾಸೊ ತಾಚಾ ಗುಲಿ ಜಾಲ್ಲ್ಯಾ ಮುಖಮಳಾರ್ ಉದೆಲೊ.
ಆವಯ್ನ್ ಏಕ್ ಉಮೊ ದಾಂಬ್ಲೊಂ ತ್ಯಾ ರಗ್ತಾಚಿ ಸಾಯ್ ನಾತ್ಲ್ಲ್ಯಾ ಹಳ್ದುವ್ಯಾ ಪೊಲ್ಯಾರ್.
ಇಲ್ಲೆಂ ಖೆಳ್ಳಿ ತಿ ತಾಚೆಲಾಗಿಂ. ತೊಚ್ಚ್ ತಿಚೊ ಸಂತೊಸ್; ತೆಂಚ್ ತಿಚೆಂ ಮನೋರಂಜನ್, ಸಿನೆಮಾ, ನಾಟಕ್, ಕ್ಲಬ್, ಭಂವ್ಡಿ, ಟ್ರಿಪ್ಪಾಂ ಆನಿಂ ನಾಚ್!
ಕಾಳೊಕ್ ಪಡೋನ್ ಆಯ್ಲೊ. ಜಳಾರಿಂಚೊ ’ರುಂಯ್ ರುಂಯ್’ ಆವಾಜ್ ಆಯ್ಕಾಲೊ ಆನಿಂ ತಾಂಚ್ಯೊ ಸುವ್ಯೊ ತೊಪುಂಕ್ ಲಾಗ್ಲ್ಯೊ.
ಬಾಳ್ಶೆಂ ಪರ್ತ್ಯಾನ್ ರಡ್ಲೆಂ. ಚಿಮ್ಣಿಂ ಜಳಯ್ಲಿ ತಿಣೆಂ. ಕುಡಾಂತ್ ಮಸ್ಕ್ ಉಜ್ವಾಡ್ ಫಾಂಕ್ಲೊಂ.
ಪೊಟ್ ಬೊಬ್ ಮಾರ್ತಾಲೆಂ; ಪುಣ್......ಕಸಲೆಂ ರಾಂದ್ಚೆಂ?
ಫಾಲ್ಯಾಂ ಖಂಡಿತ್ ತಾಂದುಳ್ ಹಾಡಿಜಾಯ್. ಪಯ್ಲೆಂಚೆಂ ರೀಣ್ ಎದೊಳ್ಚ್ಚ್ ಫಾರಿಕ್ ಕೆಲಾಂ. ಆಜ್ ರಾತಿಂ ಉಪಾಶಿಂ ನಿದ್ಚೆಂ!
ತಾಕಾ?
ತೊ ಜೆವಿನಾ! ರಾತಿಂ ತಾಕಾ ಜೆವಾಣ್ ನಾಕಾ.
ಸಕಾಳಿಂ ತೊ ಹೊಟೆಲಾಂತ್ ಕಾಫಿ ಪಿಯೆತಾ; ದೊನ್ಪರಾಂ ಹೊಟೆಲಾಂತ್ ಜೆವ್ತಾ; ಸಾಂಜೆರ್ ಸೊರೊ ಪಿಯೆತಾ!
ಬಾಳ್ಶ್ಯಾಕ್ ಥಾಂಬವ್ನ್ ನಿದಾಯ್ಲೆಂ ತಿಣೆಂ.
ಉಪ್ರಾಂತ್? ದುಸ್ರ್ಯಾ ದಿಸಾಚೊ ಭರ್ವಸೊ ಜಾವ್ನ್ ತೆಂ ರೊದ್ ಪರ್ತ್ಯಾನ್ ವಿಶೆವ್ ನಾಸ್ತಾನಾ ಘುಂವೊಂಕ್ ಲಾಗ್ಲೆಂ.
ಸುಮಾರ್ ಇಕ್ರಾ ಜಾತನಾ ತೊ ಆಯ್ಲೊ. ಏಕ್ ಪಾವ್ಟಿಂ ಲಕ್ಲೊ ಆನಿಂ ಬಿತರ್ ಸರ್ಲೊ.
ಪರ್ತ್ಯಾನ್ ಭಾಯ್ರ್ ವಚೊನ್ ವ್ಹಾಣೊಂ ಸೊಪ್ಯಾರ್ ಸೊಡುನ್ ಬಿತರ್ ರಿಗ್ಲೊ.
"ಭುರ್ಗೆಂ ಖಂಯ್ ಆಸಾ?"
"ನಿದ್ಲಾಂ............"
"ಹಾಂಗಾ ಹಾಡ್!"
"ನಿ............."ಇದ್ಲಾಂ ಮ್ಹಣ್ ಪರ್ತ್ಯಾನ್ ಸಾಂಗೊಂಕ್ ಉಗ್ತೆಂ ಕೆಲ್ಲೆಂ ತಿಚೆಂ ತೊಂಡ್, ಆದ್ಲ್ಯಾ ಮಾರಾಂಚಾ ಆಡುಕ್ ಅನುಭವಾನ್, ಅರ್ಧೆಂ ಉಗ್ತೆಂಚ್ ಉರ್ಲೆಂ.
ತಿ ಸವ್ಕಾಸ್ ಉಠೊನ್ ಭುರ್ಗ್ಯಾಕ್ ಹಾಡ್ನ್ ಆಯ್ಲಿ ಆನಿಂ ತಾಚಾ ಹಾತಾಂತ್ ತಾಕಾ ದಿಲೆಂ.
ತಿಯಿ ಲಾಗಿಂಚ್ ಬಸ್ಲಿ; ಏಕ್ ಪಾವ್ಟಿಂ ತಾಣೆಂ ಭುರ್ಗ್ಯಾಕ್ ಸಕಯ್ಲ್ ಘಾಲ್ಲೊ ಉಗ್ಡಾಸ್ ಯೇವ್ನ್!
"ಜ...ಯ್ ಬಾ....ಳಾಳಾ ಜಯ್", ದೊರಗ್ ತಾಳ್ಯಾನ್ ಗಾಣಾಂ ಘಾಲುನ್ ಭುರ್ಗ್ಯಾಕ್ ಧಲಯ್ಲೆಂ ತಾಣೆಂ.
ಭುರ್ಗ್ಯಾಕ್ ಪುನ್ಯಾನ್ ಬರಿ ನೀದ್ ಪಡ್ಲ್ಲಿ. ತಿಣೆಂ ತಾಕಾ ಪಳೆಲೆಂ.
ತಾಚೆ ದೊಳೆ ತಾಂಬ್ಡೆ ದಿಸ್ಲೆ ತಿಕಾ; ಸಾಂಗಾತಾಚ್ ಭರೊನ್ ನಿಲೆಂವ್ಚಿ ಕಠಿಣಾಯ್! ಏಕಾ ದಿಸಾಚೊ ಮೋಗ್ ಸಹಿತ್ ತಾಚೆಂ ಥಾವ್ನ್ ತಿಕಾ ಮೆಳೊಂಕ್ ನಾತ್ಲೊ.
"ಭುರ್ಗ್ಯಾಕ್ ಕಾ.....ಣ್ಘೆ...."
ತಾಣೆಂ ತೆಂ ಪುರ್ತೆಂ ಮ್ಹಣ್ಚಾ ಆದಿಂಚ್ ತಿಣೆಂ ಹಾತ್ ವಿಸ್ತಾರ್ನ್ ವೆಗಿಂ ಭುರ್ಗ್ಯಾಕ್ ಹತಾಗತ್ ಕೆಲೆಂ ಆನಿಂ ವಚೊಂಕ್ ಉಠ್ಲಿ.
"ರಾವ್.......ಗೊ’ ತಾಣೆಂ ತಿಚೆ ಬಾವ್ಳೆ ದಾಂಬ್ಲೆ. ತಿ ಥಂಯ್ಚ್ ಬಸ್ಲಿ.
"ಹಾಂವ್ ......ಆಜ್ ಸೊ......ರೊ.....ಪಿ.....ಯೆಲಾಂ......."
ತಿ ವೊಗೆಂ ರಾವ್ಲಿ.
"ಹಾಂವ್ ........ಆ....ಜ್ ಸ್....ರೊ...ಪಿಯೆಲ್ಲಾಂ.....ತುಜೊ ಕಾ.......ಕಾಂಯ್ ಸೆರ್ಮಾಂವ್ ಆಸಾ...ಗಿ ಸಾಗಿ?
ತಿಚ್ಯೆ ಆಸ್ಡೆರ್ ಉದೆಲ್ಲೆ ದೋನ್ ದುಃಖಾಂ ಥೆಂಬೆ ಮುಖಾರ್ ಜಳ್ಚ್ಯೆ ಚಿಮ್ಣೆಚಾ ಉಜ್ವಾಡಾಕ್ ಮೊತಿಯಾಂಚಾ ಝಳಕಾನ್ ಸಕಯ್ಲ್ ಗಳ್ಳೆ; ತಿಚ್ಯಾ ಕೋಮಲ್ ಆತ್ಯ್ಮಾಂಚೆ ನಿತಳಾಯೆಚೆಂ ಪ್ರತಿರೂಪ್ ಜಾವ್ನ್!
ತರಿ......
"ಸೆರ್ಮಾಂವ್.......ಆಸಾ....ಗಿ?" ತಾಚೊ ದೆಂಕ್ಣೊ ಆಯ್ಕಾಲೊ.
"ನಾ"
"ಹಾಂ ......ಚ....ಲ್"
ತಿ ಗೆಲಿ.
ಭುರ್ಗ್ಯಾಕ್ ನಿದಾಯ್ಲೆಂ.
ಉಮಾಳೊನ್ ಯೆಂವ್ಚೆಂ ದುಃಖ್ ದಾಂಬುನ್ ಧರುಂಕ್ ಆಪ್ಲ್ಯಾ ವೊಂಠಾರ್ ಜೀಬ್ ಘಳಯ್ಲಿ ತಿಣೆ.
ಇಲ್ಲ್ಯಾ ವೆಳಾನ್ ತೊ ಆಡ್ ಪಡ್ತಚ್ ತಿಣೆಂ ಚಿಮ್ಣಿ ಪಾಲ್ವಯ್ಲಿ.
ಕಾಳೊಕ್ ಭರ್ಲೊ. ಪುರಾಸಣ್ ಜಾಲ್ಲಿ ತರಿ, ತಿಕಾ ನೀದ್ ಪಡ್ಲಿನಾ.
ತಿಚ್ಯೆ ಮತಿಂತ್, "ಆಪ್ಲೊ ಫುಡಾರ್ ಕಸಲೊ? ಮ್ಹಳ್ಳೆಂ ಸವಾಲ್ ಉದೆಲೆಂ
ವ್ಹಯ್, ತಿಚಿ ಮುಖ್ಲಿ ಜಿಣಿ? ಎದೊಳ್ ಪಾಶಾರ್ ಜಾಲ್ಲ್ಯಾಬರಿ ನಹಿಂ ಜಾಲ್ಯಾರ್ ಆನಿಂ ಕಸಲಿ?
"ಕಾಂಯ್ ಬದ್ಲಾವಣ್ ಆಸ್ಚಿ ನಾ’, ನಿರಾಶೆಚ್ಯೆ ತಡಿರ್ ಆಸ್ಲ್ಲ್ಯೆ ತಿಚ್ಯೆ ಮತಿಚಿ ನಿರ್ಧಾರಿ ಜವಾಬ್.
ಆಪ್ಲೊ ಸಾಂತಿಪಣ್ ವಾಡಂವ್ಚೆ ಸಂದರ್ಭಚ್ಚ್ ತಿಕಾ ಮೆಳ್ತಾಲೆ.
ತಿಚೊ ದೆವಾ ಮುಖಾರ್ ಹಿಮಾಬರಿ ಧೊವೊ ಕರ್ಚೆ ಕಷ್ಟ್ ಮಾತ್ರ್ ಚಡ್ತಾಲೆ.
ಚಿಲಿಪಿಲಿ ಸುಕ್ಣ್ಯಾಂಚೊ ಆವಾಜ್. ತಿಕಾ ಲಾಂಬ್ ನೀದ್ ಪಡ್ಲ್ಲಿ ಜಾಯ್ಜಾಯ್.
ದೊಳೆ ಗಸ್ಟುನ್ ಆಂವ್ಸರಿ ಉಠ್ಲಿ ತಿ.
ಹೊಟೆಲಾಚೊ ಉಗ್ಡಾಸ್ ಆಯಿಲ್ಲೊ ತಿಚೊ ಪತಿ, ಎದೊಳ್ಚ್ ಮಾಯಾಕ್ ಜಾಲ್ಲೊ.
ತಿಣೆಂ ತೊಂಡ್ ಧುಲೆಂ, ಉಜೊ ಕರುನ್ ಕಾಫಿ ಕೆಲಿ.
"ಆಜ್ ತುಂಮ್ಚೆ ಪೈಸೆ ಖಂಡಿತ್ ದಿತಾಂ.......ಸುತಾಚೆ ಮೆಳ್ತಾತ್....
ಆರ್ಧೆಂ ಕುಡ್ತೆ ದೂದ್ ಚಡ್ ಜಾಯ್...." ದೂಧಾಕ್ ಗೆಲ್ಲೆ ಕಡೆ ಪರಾತ್ಲೆಂ ತಿಣೆಂ.
"ಆಜ್ಚ್ ದೀಜಾಯ್"
"ಖಂಡಿತ್ ದಿತಾಂ". ಸಂತೊಸಾನ್ ತಿ ಪಾಟಿಂ ಆಯ್ಲಿ.
ಭುರ್ಗೆಂ ಉಠ್ಲ್ಲೆಂ. ಜೀವ್ ಕಳಾ ದೀಸ್ ವೆತಾಂ ವೆತಾಂ ಉಣಿಂ ಜಾವ್ನ್ ಯೆಂವ್ಚೆ ತಾಚೆಂ ನಿಸ್ತೇಜ್ ತೊಂಡ್ ಪಳೆತಾನಾ ತಿಕಾ ಸರ್ಲ್ಲ್ಯಾ ಭುರ್ಗ್ಯಾಂಚೊ ಉಗ್ಡಾಸ್ ಆಯ್ಲೊ.
ಕಾಳ್ಜಾಕ್ ಸುರಿ ರೊಂಬ್ಲ್ಲೆ ಪರಿ ಭೊಗ್ಣಾಂ ಉದೆಲಿಂ. ದಾಕ್ತೆರಾ ಸರ್ಶಿಂ ಗೆಲ್ಯಾರ್, ಪಾಂಚ್ - ಸ ರುಪಯ್ ಪುಣಿ ಜಾಯ್.
ಪತಿಲಾಗಿಂ ವಿಚಾರ್ಲ್ಯಾರ್ ತಿಕಾ ಮೆಳ್ಚೆ ಸೊವೆ ಆನಿಂ ಶಿರಾಪ್ ಮಾತ್ರ್!
ಭಾಂಗಾರ್.....?
ಆಸ್ಲ್ಲೆಂ ಇಲ್ಲೆಂ ಸೊರೊ ಪಿಯೆಲ್ಲ್ಯಾ ಖಾತಿರ್ ತವೊಳ್ ತವೊಳ್ ಧರ್ಲ್ಲ್ಯಾ ತಾಕಾ ಸೊಡವ್ನ್ ಹಾಡುಂಕ್ ಆಡ್ವಾರ್ ಆಸ್ಲ್ಲೆಂ.
ತೊ ಮನಿಸ್ ಯಾ ಮನ್ಜಾತ್? ತ್ಯಾ ಸವಲಾಂಕ್ ಜವಾಬ್ ದೀಂವ್ಕ್ ತಿ ಸಕ್ಲಿನಾ!
ಭುರ್ಗ್ಯಾಂಕ್ ತಿಣೆಂ ಕಾಫಿ ದಿಲಿ.
ರೊದ್ ಘುಂವ್ಡಾಯ್ಲೆಂ; ಉರ್ಲ್ಲೆಂ ಇಲ್ಲೆಂ ಸುತ್ ರೆವ್ಡಾವ್ನ್ ಬಾಳ್ಶಾಕ್ ನಿದಾವ್ನ್ ತಿ ಚಲ್ಲಿ.
ತೆಂ ರೊದ್ ಘುಂವ್ತಾಲೆಂ ದೆಕುನ್ ತಿಚೆ ದೀಸ್ ಧಾಂವ್ತಾಲೆ.
ತೊ ಮಾತ್ರ್ ಸುಶೆಗಾತ್ ಆಸ್ತಾಲೊ.
’ಆಸಲೆ ಮನಿಸ್ಯಿ ಆಸಾತ್ಗಿ? ವಿಚಾರ್ಲೆಂ ತಿಣೆಂ ತಿಕಾಚ್/ಖಂಡಿತ್! ತಿಚೊ ಪತಿಚ್ ತಾಂಚೆಂ ಮದ್ಲೊ ಎಕ್ಲೊ.
ತ್ಯೊಯಿ ಆಸಾತ್! ದರಬಸ್ತ್ ಆಸಾತ್!!
"ದೇವ್ಚ್ ತಾಂಕಾಂ ರಾಕೊಂದಿ" ಸುಸ್ಕಾರ್ಲಿ ತಿ. ದೀಸ್ ಧಾಂವ್ತಾಲೆ ಆಪ್ಲ್ಯಾಚ್ ನಿಯಮಾನ್.
ಎಕಾ ಆಯ್ತಾರಾ......
ಇಲ್ಲೆಂ ಹಿಂವ್ ಖಾವ್ನ್ ತಿಕಾ ತಾಪ್ ಆಯ್ಲೊ. ಆಸ್ಪತ್ರೆಕ್ ವಚೊನ್ ತಿಣೆಂ ಇಲ್ಲೆಂ ’ಮಿಕ್ಸ್ಚರ್’ ಹಾಡ್ಲೆಂ.ತಾಪ್ ರಾವ್ಲೊ; ಪುಣ್.....
ಖೊಂಕ್ಲಿ ಸುರು ಜಾಲಿ; ಪೊಟಾಂತ್ ದೂಖ್ ಉದೆಲಿ!
ಧರ್ಮಾಚೆಂ ಇಂಜೆಕ್ಶನಾಂ ಮೆಳ್ತಾಲಿಂ ತರೀ, ದೂಖ್ ಚಡೊನ್ಂಚ್ ಗೆಲಿ.
ಪತಿಲಾಗಿಂ ಸಾಂಗ್ಲೆಂ ತಿಣೆಂ.
"ತುಕಾ ಕೆದಾಳಾಯಿ ಸಂಕಡ್ ಚುಕ್ಲೆಂನಾ; ತುಂ ಮೊರನಾಂಯ್ ಕಿತ್ಯಾ?!"
"ಮೊರನಾಂಯ್ ಕಿತ್ಯಾ?"
ವ್ಹಯ್ ತೆಂಚ್ ಬರೆಂ; ತೆಂಚ್ ಸುಖ್!"
’ಪುಣ್ ಬಾಳ್ಶೆಂ?’
’ತಾಚ್ಯಾ ಖಾತಿರ್ ಹಾಂವೆಂ ವಾಂಚಾಜಾಯ್; ತೆಂ ಜೀವ್ ಆಸ್ತಾ ಪರ್ಯಾಂತ್ ಪುಣಿಂ, ಹಾಂವೆಂ ಮ್ಹಜೊ ಪ್ರಾಣ್ ಸಾಂಬಾಳಿಜಾಯ್!’
ತರಿ, ತೆಂ ’ಮಿಕ್ಸ್ಚರ್’ ತಿಕಾ ವೊಕೊಂಕ್ ಕರ್ತಾಲೆಂ ಶಿವಾಯ್, ಕಸಲಿಚ್ ಸವ್ಕಾಸಾಯ್ ದೀನಾತ್ಲೆಂ.
ಆತಾಂ ರೊದ್ ರಾವೊನ್.......ರಾವೊನ್.....ಘುಂವ್ತಾಲೆಂ ಆನಿಂ ತೆಂ ಘುಂವ್ಡಾಂವ್ಚ್ಯೆ ಹಾತ್ ಘಡ್ಯೆ......ಘಡ್ಯೆ.......ಸಕ್ಲಾ ಪಡ್ತಾಲೆ!
ಪಯ್ಶೆ ಉಣೆಂ ಮೆಳ್ತಾಲೆ ಜಾಲ್ಲ್ಯಾನ್, ಫುಟಿ ಕಾಫಿ ಮಾತ್ರ್ ತಿಕಾ ಪಿಯೆಂವ್ಕ್ ಮೆಳ್ತಾಲಿ ಆನಿಂ ದೊನ್ಪಾರ್ ಯೆತಾನಾ ಸಗ್ಳ್ಯಾ ದಿಸಾಚೆಂ ತೆಂ ಏಕ್ ಪೆಜೆಚೆಂ ಜೆವಾಣ್ ತಿಚ್ಯಾ ಪೊಟಾಂತ್ ಸೆರ್ವಾತಾಲೆಂ.
ತಾಂತುಂ ಪೇಜ್ ಉಣಿಂ; ನೀಸ್ ಚಡ್!
ಸಾಂಜೆರ್ ಪರ್ತ್ಯಾನ್ ಫುಟಿ ಕಾಫಿ!
ಕಾಳೊಕ್ ಪಡೊನ್ ಜಳಾರಿಂಚೊ ತೊ ಸದಾಂಚೊ ಆವಾಜ್ ಆಯ್ಕಾತಾನಾ ಚಿಮ್ಣಿ ಹಾಲಯ್ಲಿ ತಿಣೆ; ತೇಲ್ಯಿ ಮುಗ್ದೊನ್ ಆಯಿಲ್ಲೆಂ.
ಸೆಜಾರಾ ಕೊಣಾಚೊಗಿ ಜನ್ಮಾ ದಿವಸ್.
ನಾಚ್, ಪದಾಂ, ಆನಿಂ ಕಿತೆಂ ಗಮ್ಮತ್; ಮಝಾ!
ತೊ ಆನಿಕಿ ಯೇಂವ್ಕ್ ನಾತ್ಲೊ; ತಿ ತಾಕಾ ರಾಕ್ತಾಲಿ.
ಪುಣ್..... ಸೊಸ್ಣಿಕಾಯೆಚಿ ಗಡ್ ಮಿರ್ವಾಲ್ಲಿ ಕಷ್ಟಾಂಚೊ ಹಾತ್ ವಯ್ರ್ ಜಾಲ್ಲೊ!
ತರಿ, ದೆವಾಚೆ ಕಾಕ್ಳುತ್ ತ್ಯಾ ಮಸ್ಕ್ ಉಜ್ವಾಡಾಂತ್ ಝಗ್ಲಾಭ್ಯಾಕ್ ಝಳ್ಕೊಂಚೆಬರಿ ದಿಸ್ಲಿ ತಿಕಾ.
ತಿತ್ಲ್ಯಾರ್.......
ಕಾಳೀಜ್ ಭೆದುನ್ ಮುಖಾರ್ ಸರ್ಚೆಂ ಭುರ್ಗ್ಯಾಚೆಂ ರಡ್ಣೆಂ!
ತೀನ್ ಚಾರ್ ದೀಸ್ ಥಾವ್ನ್ ಕಠಿಣ್ ಅಸ್ವಸ್ಥ್ಯ್ ಜಾವ್ನ್ ಆಸ್ಲ್ಲ್ಯಾ ಭುರ್ಗ್ಯಾಕ್ ತಿಣೆಂ ಉಕಲ್ಲೆಂ.
"ಕಿತೆಂ ಜಾಲೆಂ ಬಾಳಾ ಮ್ಹಜಾ?" ಗದ್ಗದಿತ್ ತಾಳ್ಯಾನ್ ವಿಚಾರ್ಲೆಂ ತಿಣೆಂ.
ಭುರ್ಗ್ಯಾಚೆ ದೊಳೆ ಏಕ್ ಪಾವ್ಟಿಂ ಉಗ್ತೆ ಜಾವ್ನ್ ಧಾಂಪ್ಲೆ!
"ಬಾಳಾ, ಬಾಳಾ.....ಮ್ಹಜಾ ರಾಯಾ....." ತಾಕಾ ಹರ್ದ್ಯಾಕ್ ದಾಂಬುನ್ ಧರುನ್ ತಿ ರಡ್ಲಿ! "ಜೆಜು ಮ್ಹಜಿ ಬಿರ್ಮೊತ್ ಪಾವ್!"
ಉಪ್ರಾಂತ್ ?
ಮೌನ್!
ತೊ ರಿಗ್ತಾನಾ ಕುಡಾಂತ್ ಪಸರುನ್ ಆಸ್ಚಾ ಆರ್ಧ್ಯಾ ಅಂಧ್ಕಾರಾಂತ್ ಪಿಂಜ್ಕರ್ ಕಾಪ್ಡಾರ್ ಆಸ್ಚಿ ತಿ ದಿಸನಾತ್ಲ್ಯಾರಿ, ತೆಂ ರೊದ್ ಘುಂವ್ಚೆಂ ತಾಕಾ ದಿಸ್ತಾಲೆಂ.
ಆಜ್ ತೆಂ ರಾವ್ಲ್ಲೆಂ!
ದೊಳೆ ಗಸ್ಟಿಲೆ ತಾಣೆಂ.
ವ್ಹಾಣೋ ನಿಕ್ಳಾವ್ನ್ ತೊ ಎಕಾ ಕದಮಾನ್ ಬಿತರ್ ಸರ್ಲೊ.
ತಾಚಿ ಪತಿಣ್ ಆಡ್ ನಿದ್ಲ್ಲಿ. ತೊ ಲಾಗಿಂ ಗೆಲೊ. ಬಾಗ್ವಾಲೊ. ಕಾಳಿಜ್ ತಾಚೆಂ ಧಡ್ದಡ್ಲೆಂ.
ಚಿಮ್ಣಿಂ ಲಾಗಿಂ ವೊಡುನ್, ತಿಚೆಂ ಮುಖಮಳ್ ತಾಣೆಂ ದೋನ್ಯಿ ಹಾತಾಂನಿ ಫುಲ್ ಆಪಡ್ಚಾ ಜಿನ್ಸಾರ್ ಲೋವ್ ಉಜ್ವಾಡಾಕ್ ಲಾಗಿಂ ಕೆಲೆಂ.
ತಿತ್ಲ್ಯಾ ಮೈಪಸಾನ್ ಆನಿಂ ನಾಜೂಕಾಯೆನ್ ತಾಣೆಂ ತಿಕಾ ಎದೊಳ್ ಅಪ್ಡುಂಕ್ ನಾ! ತಾಚಿ ದೀಷ್ಟ್ ತಿಚಾ ಮುಖಮಳಾರ್ ಚರ್ಲಿಂ.
ಆಜ್ ತೊ ಸೊರೊ ಪಿಯೆಂವ್ಕ್ ನಾತ್ಲೊ; ತಾಚಿ ಮತ್ ನಿತಳ್ ಆಸ್ಲಿ.
ತಿಚೆ ದೊಳೆ ಫೊಂಡಾಂತ್ ದೆಂವೊನ್ ಭಂವ್ತಣಿಂ ಕಾಳ್ಬಾಣ್ ಚರ್ಲ್ಲಿ. ಪೊಲೆ ಪಡೊನ್ ತಾಚೆ ವಯ್ಲಿಂ ಕುಸಿಚಿಂ ಹಾಡಾಂ, ಪರ್ವತಾಂ ಭಾಷೆನ್ ವಯ್ರ್ ಚಡ್ಲ್ಲಿಂ.
ಕೇಸ್ ಸುಕೊನ್ ಝಾಂಟಾಂ ಜಾಲ್ಲೆ! ಹ್ಯೆ ಸ್ಥಿತೆರ್ ಇತ್ಲೊ ತೇಂಪ್ ತಿ ವಾಂಚೊನ್ ಉರ್ಲ್ಲಿ ವ್ಹಡ್ ಮ್ಹಣ್ ದಿಸ್ಲೆಂ ತಾಕಾ.
ತ್ಯಾ ನಿರ್ಜೀವ್ ಮುಖಮಳಾಚೊ, ಕಿತ್ಯಾಗಿ, ತಾಣೆಂ ಏಕ್ ಉಮೊ ಘೆತ್ಲೊ ಆನಿಂ ತಿಚೆಂ ನಾಂವ್ ಪಯಿಲ್ಲೆ ಪಾವ್ಟಿಂ ಮೊಗಾನ್ ಆಪಯ್ತಾನಾ, ತಾಚೊ ತಾಳೊ ಭರೊನ್ ಆಯ್ಲೊ.
ಆನಿಂ ಬಾಳ್ಶೆಂ?
ತಿಚಿ ತಕ್ಲಿ ಸಕಯ್ಲ್ ದವ್ರುನ್ ತಾಣೆಂ ಚಿಮ್ಣಿಂ ಲಾಗಿಂ ವ್ಹೆಲಿ. ಆನಿಂ ಆಪ್ಲೊ ಆನ್ಯೇಕ್ ಹಾತ್ ತ್ಯೆ ಲ್ಹಾನ್ ಕುಡಿರ್ ಚರಯ್ಲೊ.
ಥಂಡ್ ಐಸ್ ಆಪಡ್ಳ್ಯಾಬರಿ ಜಾಲೆಂ ತಾಕಾ!
ಜೀವ್ಕಳಾ ಉಡೊನ್ ಗೆಲ್ಲೊ ರಂಗ್; ಸಗ್ಳಿ ಕೂಡ್ ಧೊವಿ....ಧೊವಿ....!
ವ್ಹಡ್ ತೊಂದ್ಯಾ ಸಾರ್ಕೆಂ ಪೊಟ್;
ಗುಡ್ ಬಾಂಧ್ಲ್ಲೆಂ ಹರ್ದೆಂ;
ಉದಾಕ್ ಆಯಿಲ್ಲೆ ಹಾತ್-ಪಾಯ್ ಆನಿಂ ಪೊಲೆ!
"ಬಾ...ಳಾ...." ತಿತ್ಲ್ಯಾರ್ ತಾಚೊ ತಾಳೊ ಬಂಧ್ ಪಡ್ಳೊ.
ಕಾಂಪ್ಚ್ಯಾ ಪಾಯಾಂಚೆರ್ ತೊ ಉಬೊ ರಾವ್ಲೊ.
ಏಕ್ ಕಾಣಿ ತಾಚಾ ದೊಳ್ಯಾಂ ಮುಖಾರ್ ಪಾಶಾರ್ ಜಾಲಿ!
ಎಕ್ಯೆ ಸ್ತ್ರೀಯೆಚಿ ಹ್ರದಯಂಗಮ್. ಕರುಣ್ ರಸಾಭರಿತ್ ಕಾಣಿ!
ಮರಣ್ ಪರ್ಯಾಂತ್ ಮಾಡ್ತಿರ್ ಜಿಣಿಯೆಚಿ ದುಃಖಾಭರಿತ್ ಕಥಾ!!
ತ್ಯಾ ದೀಸ್, ತೊ ಎಕಾ ನಾಟಕಾಕ್ ಗೆಲ್ಲೊ; ಕಾಜಾರ್ ಜಾಲ್ಯಾ ಉಪ್ರಾಂತ್ ಪಯಿಲ್ಲೆ ಪಾವ್ಟಿಂ.
ಥಂಯ್ ಏಕ್ ಬಿರ್ಮತಿಚಿ ಕಥಾ ಪಳೆವ್ನ್, ತೊ ಮೊವಾಳ್ಲ್ಲೊ. ತಿ ಕಥಾ ಆಪ್ಲ್ಯೆಚ್ ಸ್ತ್ರೀಯೆಚಿಯಿ ಮ್ಹಣ್ ತಾಕಾ ಕಳೊಂಕ್ ವೇಳ್ ಗೆಲೊನಾ.
ತಿಚೆಂ ಲಾಗಿಂ ಮೊಗಾನ್ ಏಕ್ ಉತಾರ್ ಉಲಂವ್ಕ್ ನಾಟಕ್ ಮಗ್ದತಾಚ್ ತಾಣೆಂ ಸರಾರಾಂ ಮೆಟಾಂ ಕಾಡ್ಲ್ಲಿಂ.
ಆಪ್ಲ್ಯಾ ಸಾಂಬಾಳಾಚೆಂ ಪಯ್ಶೆ ಜೊಗಾಸಾಣೆನ್ ಸಾಂಬಾಳುನ್, ಸೊರೊ ಪಿಯೆಂವ್ಚಿ ವತ್ತಾಯೆಚಿ ವೊಡ್ಣಿ ದಾಂಬುನ್ ಧರುನ್, ಧಾಂವಾಂ ಧಾಂವಿಂ ತೊ ಆಯಿಲ್ಲೊ..
ಪುಣ್......
ತಾಣೆಂ ಬೊಲ್ಸಾಕ್ ಹಾತ್ ಘಾಲೊ.
ತಿಕಾ ವಕ್ತಾಕ್ ದೀಂವ್ಕ್ ಮ್ಹಣ್ ಚಿಂತುನ್ ತಾಣೆಂ ಹಾಡ್ಲ್ಲೆ ತೆ ನೋಟ್ ಥಂಯ್ಚ್ ವಿಶೆವ್ ಘೆತಾಲೆ.
ತಿತ್ಲ್ಯಾರ್ .......
ತಾಚಾ ದೊಳ್ಯಾಂನಿ ದುಃಖಾಂ ಭರೊನ್ ಸಾತ್ ಆಟ್ ಚಿಮ್ಣ್ಯೊ ಪೆಟಯಿಲ್ಲ್ಯಾಬರಿ ತಾಕಾ ದಿಸ್ಲೆಂ.
ತಿಂ ಸಕಯ್ಲ್ ಗಳ್ತಚ್.....
ಧರ್ಣಿರ್ ಏಕ್ ಕಾಳೆಂಚ್ ಆನಿಂ ತಾಚೆ ಬಗ್ಲೆಕ್ ಏಕ್ ಧೊವೆಂ ರೂಪ್ ಸಾಸ್ಣಾಚೊ ವಿಶೆವ್ ಘೆಂವ್ಚೆ ದಿಸ್ಲೆಂ ತಾಕಾ.
ತಾಚಿ ಪತಿಣ್ ಆನಿಂ ತಾಚೆಂ ಭುರ್ಗೆಂ!
ತೊ ಯೆತಾನಾ ಘುಂವೊನ್ ಆಸ್ಚೆಂ ತೆಂ ರೊದ್ ರಾವ್ಲ್ಲೆಂ.
ತಾಕಾ ವಿರಾರ್ ಕರ್ಚೆಂ ಬಾಳ್ಶ್ಯಾಚೆಂ ತೆಂ ರಡ್ಣೆಂ ಬಂಧ್ ಪಡ್ಲ್ಲೆಂ.
ಹಾತಾಂನಿ ಆಪ್ಲೆಂ ಮುಸ್ಕರ್ ಧಾಂಪುನ್ ವ್ಹಡ್ಲ್ಯಾನ್ ರಡ್ಲೊ ತೊ,
ಹಾಂವ್ ಧಾರುಣ್ ಜಾಲ್ಲೊಂ; ಮ್ಹಜ್ಯಾ ಕಾಳ್ಜಾಂತ್ ಸೈತಾನಿ ಕಠೋರಾಯ್ ರಾಜ್ ಕರ್ತಾಲಿ - ಕುಡ್ಕ್ಯಾ ಉತ್ರಾಂನಿ ವಿಳಾಪ್ ಕೆಲೊ ತಾಣೆಂ.
ಆನಿಂ ತವಳ್.......
ತೇಲ್ ಮುಗ್ದೊನ್ ಆಯಿಲ್ಲಿ ಚಿಮ್ಣಿ ಏಕ್ಚ್ ಪಾವ್ಟಿಂ ವಿಶೇಷ್ ಪ್ರಕಾಸ್ ದೀವ್ನ್ ಪಾಲ್ವಲಿ.
ಆಂಧ್ಕಾರ್ ಪಾಸಾರ್ಲೊ.
ಪುಣ್.....
ತಾಚಾಬರಿ ಆಸ್ಲ್ಲ್ಯಾ ಇತರ್ ಸಬಾರ್ ಘರಾಂನಿ ತಿ ಆನಿಕಿ ಪೆಟ್ತಾಲಿ ಆನಿಂ ತಾಂತುಂ ಮಾಡ್ತಿರ್ ಜಿಣಿ ಜಿಯೆಂವ್ಚ್ಯೊ ಸ್ತ್ರೀಯೊ, ಬೆಬ್ದೊ ಜಾವ್ನ್ ಯೆಂವ್ಚಾ ಆಪಾಪ್ಲ್ಯಾ ಪತಿಕ್ ರಾಕೊನ್ ರಾವ್ಲ್ಲಿಂ!
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
