ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿಕಾಣಿ: ತುಜೆಂ ಜಿಣೆಂ ಮ್ಹಜೆಂ ನ್ಹಯ್... ಮ್ಹಜೆಂ ತೆಂ ಮ್ಹಜೆಂಚ್ಚ್....
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ, ಖೊವ್ಳಾಂ, ಮರುಭುಂಯ್ಂತ್ಲೆಂ ವಾದಾಳ್, ಮರಿ ಘರಾ ಆಯ್ಲಿ.
ಕ್ಲೆರೆನ್ಸ್, ಕೈಕಂಬ
ಆಜ್ ವ್ಹಡ್ ಆರ್ಸ್ಯಾ ಮುಕಾರ್ ಉಭೊ ರಾವೊನ್ ತೊಂಡಾಕ್ ಆನಿಕ್ಯೀ ಪೌಡರ್ ಮಾಖುಯಾಂ ಮ್ಹಣ್ ಜಾಲೆಂ ಮ್ಹಾಕಾ. ಯೆದೊಳ್ ಕೆದಾಳಾಯ್ ಯೆಂವ್ಕ್ ನಾತ್ಲ್ಲಿ ಆಶಾ, ಆಜ್ ಮತಿ-ಕಾಳ್ಜಾಂತ್ ಭಳಾಚೆ ಫಾಂಟೆ ಪುಟೊನ್ ಉದೆವ್ನ್ ಆಯಿಲ್ಲಿ. ಪೌಡರ್ ಘಾಲ್ಚ್ಯಾ ಪಯ್ಲೆಂ, ಮ್ಹಜಿ ಧನಿನ್, ಬಾಯೆಚ್ಯಾ ಕಬಾಟಾಂತ್ಲೊ ಚೊರುನ್ ಹಾಡ್ಲ್ಲೊ ಪೌಂಡೆಶನ್ಯ್ ಮಾಖ್ಲೊ ತೆದ್ನಾಂ ಹ್ಯಾ ಗೊರ್ಶ್ಯಾ ತೊಂಡಾರ್ ಸೊಭಾಯ್ ಚಡ್ಲಿ ತಸೆಂ ಮ್ಹಾಕಾ ಭಗ್ಲೆಂ. ವೊಂಟಾಚೆರ್ ತಾಂಬ್ಡೆಂ ಇಲ್ಲೆಂ ಲಿಪ್-ಸ್ಟಿಕ್ ಲಾಯ್ಲೆಂ. ಹಾಂವ್ ಜಾಣಾ ಬಾಯ್ ಹ್ಯಾ ವೆಳಿಂ ಮ್ಹಾಕಾ ಪಳಯ್ತ್ ತರ್ ಖಂಡಿತ್ ಜಾವ್ನ್ ಉಡೊನ್ ಪಡೊಂಕ್ ಆಸಾ. ಕಾಮಾಚ್ಯಾ ಬಾಯ್ಲೆನ್ ಅಸಲೆ ಆಟ್ನೆಟ್ ಕರ್ಚೆಂ ತಿಕಾ ಬಿಲ್ಕುಲ್ ಪಸಂಧ್ ನಾತ್ಲ್ಲೆಂ. ಅಸಲೆಂ ಕಿತೆಂಯ್ ಕರ್ಚೆಂ ತರ್ ತಿಚ್ಯಾ ತಸಲ್ಯಾ ಘನೆಸ್ತ್ ಸ್ತ್ರಿಯಾಂನಿ ಮಾತ್ ಕರಿಯೆತ್ ಮ್ಹಣ್ ತಿಚೆ ಚಿಂತಾಪ್. ಮ್ಹಜ್ಯಾ ತಸಲ್ಯಾ ಕಾಮಾಚ್ಯಾ ಮ್ಹನ್ಶಾಂಕ್ಯೀ ಕಾಳ್ಜಾಂತ್ ಮನ್ಶಾ-ಸಹಜ್ ಆಶಾ ಮ್ಹಣ್ ತಿಕಾ ಕಳಿತ್ ನಾತ್ಲ್ಲೆಂ. ಪುಣ್, ಹ್ಯಾ ವೆಳಿಂ ಮಾತ್ ಕಿತ್ಯಾಕ್ಗೀ ತಿಚೆಂಯೀ ಗಣ್ಣೆ ಕರಿಜಾಯ್ ಮ್ಹಣ್ ಮ್ಹಾಕಾ ಭಗ್ಲೆಂ ನಾ.
ಸುಕ್ರಾರಾಚೊ ದೀಸ್ ಸುಟಿಯೆಚೊ ಜಾಲ್ಲ್ಯಾನ್ ಫಾಂತ್ಯಾರ್ಚ್ಚ್ ಉಟೊನ್ ಘರ್ಚೆಂ ಥೊಡೆಂ ಕಾಮ್ ಕರುನ್ ಮೀಸಾಕ್ ವೆಚ್ಯಾ ಖಾತಿರ್ ಬಾಯ್ರ್ ಸರ್ಲಿಂ. ಸುಮಾರ್ ಪಾಂಚ್ ವರ್ಸಾಂ ಪಯ್ಲೆಂ ಮಸ್ಕತ್ ಆಯಿಲ್ಲ್ಯಾ ದಿಸಾ ಥಾವ್ನ್ ಮ್ಹಾಕಾ ಮಹಿನ್ಯಾಂತ್ ದೋನ್ ಸುಕ್ರಾರಾನಿಂ ರಜಾ. ಮಹಿನ್ಯಾಚೊ ಪಯ್ಲೊ ಸುಕ್ರಾರ್ - ಕೊಂಕ್ಣಿ ಮೀಸ್ ಆಸಾ ಮ್ಹಣ್ ಆನಿಂ ತಿಸ್ರ್ಯಾ ಸುಕ್ರಾರಾ ಆನ್ಯೇಕ್ ರಜಾ. ಪುಣ್, ಆದ್ಲ್ಯಾ ಮಹಿನ್ಯಾ ಥಾವ್ನ್ ಝಗ್ಡೊನ್ ಮ್ಹಳ್ಳ್ಯಾ ಬರಿ ಹರ್ಏಕಾ ಸುಕ್ರಾರಾ ಹಾಂವೆಂ ರಜಾ ಘೆತ್ಲ್ಲಿ ಆನಿಂ ಅಸೆಂ ಮಹಿನ್ಯಾಚ್ಯಾ ಸರ್ವ್ ಸುಕ್ರಾರಾನಿಂ ಮ್ಹಾಕಾ ರಜಾ ಮೆಳ್ಲ್ಲಿ.
ಸುಕ್ರಾರಾ ದೀಸ್, ಸಕಾಳಿಂಚ್ಚ್ ರುವಿ ಇಗರ್ಜೆಕ್ ವಚೊನ್, ಮೀಸ್ ಜಾಲ್ಯಾ ಉಪ್ರಾಂತ್ ಆಸ್ಲ್ಲ್ಯಾ ಯಾ ಆಯ್ಲೆವಾರ್ ಜಾಲ್ಲ್ಯಾ ಥೊಡ್ಯಾ ಮಿತ್ರಿಣ್ಯಾಂಕ್ ಮೆಳೊನ್ ಉಪ್ರಾಂತ್ ಸಾಂಜೆರ್ ಪಾಟಿಂ ಘರಾ ವೆಚೆಂ. ತೊ ದೀಸ್ ರಜೆಚೊ ಮ್ಹಣ್ಚ್ಯಾಕೀ ಸುಟ್ಕೆಚೊ ಮ್ಹಳ್ಯಾರ್ ಚಡ್ ಬರೆಂ ದಿಸಾತ್ ಕೊಣ್ಣಾ. ಹಪ್ತೊಭರ್ ಘರಾಂತ್ ಆಸೊನ್ ಬಿತರ್ಲ್ಯಾ ಕೂಡಾಂತ್ ಚಾಟ್ಟೊ ಕಾಡ್ಚ್ಯಾಂತ್ ಇಲ್ಲಿಶಿ ಸುಟ್ಕಾ. ಇಲ್ಲೆಶೆಂ ಥಂಡ್ ವಾರೆಂ ಜೀವಾಕ್ ಲಾಗ್ಚೊ ಆವ್ಕಾಸ್.
ದಾರ್ಸೈತ್ ಮ್ಹಜ್ಯಾ ಧನಿಯಾಚೆಂ ಘರ್. ಧನಿಯಾಕ್ ಹಾಂವೆಂ ಮಾನಾನ್ ದಾಟ್ಟುಚ್ಚ್ ಮ್ಹಣ್ಚೆಂ. ಇಸ್ಕೊಲಾಚ್ಯಾ ಪಾಟ್ಲ್ಯಾ ಕುಶಿನ್ ಗುಡ್ಯಾಕ್ ಲಾಗ್ಗಿಂ ತಾಂಚೆಂ ಘರ್. ಕೊಡ್ಯಾಳ್ಗಾರಾಂಚ್ಚ್ ಜಾಲ್ಲ್ಯಾನ್ ಪಾಂಚ್ ವರ್ಸಾಂ ಪಯ್ಲೆಂ ಫೆರಾರ್ ಆಮ್ಚೆಂ ಘರ್ಧಾರ್ ಸಾಂಡುನ್ ಮ್ಹಳ್ಳ್ಯಾಬರಿ ಯೆತಾನಾ ’ಆಮ್ಚಿಂ ವಳ್ಕಿಚಿಂ ಮ್ಹನ್ಶಾಂ’ ಮ್ಹಣ್ ಹಾಂವ್ ಸಮಧಾನೆನ್ ಆಯಿಲ್ಲಿಂ. ಮ್ಹನ್ಶಾಂ ತರೀ ಬರಿಂಚ್ಚ್. ಬಾಯೆಚ್ಯಾಕೀ ದಾಟ್ಟು ಭಾರಿ ಬರೊ. ದಾಟ್ಟುಚೆಂ ಕಾಳಿಜ್ ದರ್ಯಾ ಬರಿ ಆನಿಂ ಮನ್ ಲೊಣಿಯೆ ಬರಿ ಮೋವ್. ಪುಣ್, ಉತ್ರಾನಿಂ ಕಡಕ್ಕ್, ಏಕ್ ಮಾರ್ ದೋನ್ ಕುಡ್ಕೆ. ಭಾಯ್ರ್ ಲೊಕಾ ಮುಕಾರ್ ವಾಗಾಬರಿ ತರ್ ಘರಾಂತ್ ಬಾಯೆ ಮುಕಾರ್ ಮಾಜ್ರಾಕ್ ಆಸ್ಲ್ಲೆಂ ಧಯ್ರ್ಯೀ ತಾಕಾ ನಾ. ಬಾಯ್ ಊಟ್ ಮ್ಹಳ್ಯಾರ್ ಉಟ್ತಾ ಆನಿಂ ಬಸ್ ಮ್ಹಳ್ಯಾರ್ ಬಸ್ಲೊಚ್ಚ್. ದಾಟ್ಟುಚೆಂ ಹೆಂ ರೂಪ್ ಮಾತ್ ಪಳವ್ನ್ ಹಾಂವ್ ಕೆದ್ನಾಂಯ್ ಹಾಸ್ಲ್ಲಿಂ ಆಸಾಂ. ಥೊಡ್ಯಾ ಪಾವ್ಟಿಂ ಹಾಂವೆಂಯ್ ಚಿಂತ್ಚೆಂ ಆಸಾ - ಹ್ಯಾ ಗಲ್ಫಾಚ್ಯಾ ಮಾತಿಯೆಚೊ ಗೂಣ್೦ಗೀ ಯಾ ಖಾಣಾಚೊ ಆವ್ಗುಣ್, ಹಾಂಗಾಚೆ ಚಡಾವತ್ ದಾದ್ಲೆ ಹ್ಯಾಚ್ಚ್ ಖಾಸ್ತಾಚೆ. ಬಾಯ್ರ್ ವಾಗ್ ಬಾಯ್ಲೆ ಮುಕಾರ್ ಉಂದಿರ್ಚ್ಚ್.
ಹಾಂವ್ ಮಸ್ಕತಾಕ್ ಯೆಂವ್ಕ್ ಕಾರಣ್ಂಚ್ಚ್ ದಾಟ್ಟು. ತಾಂಕಾಂ ಬರ್ಯಾ ಕಾಮಾಚ್ಯಾ ಮನ್ಶಾಚಿ ಗರ್ಜ್ ಆಸ್ಲ್ಲಿ ತರ್ ಮ್ಹಾಕಾ ಹ್ಯಾ ಭಾಂಗಾರ್ ಪಿಕ್ಚ್ಯಾ ಗಾವಾಕ್ ಯೇವ್ನ್ ಪಯ್ಶೆ ಖಮಾಂವ್ಚಿ ಆನಿಂ ಘರ್ದಾರ್ ಕರ್ಚಿ. ಮಸ್ಕತಾಕ್ ಯೆತಾನಾ ಮ್ಹಾಕಾ ಕಾಜಾರ್ ಜಾವ್ನ್ ಧಾ ವರ್ಸಾಂ ಜಾಲ್ಲಿಂ. ಫೆರಾರ್ ಮ್ಹಾಕಾ ಕಾಜಾರ್ ಕರ್ನ್ ದಿಲ್ಲೆಂ ಯಾ ಕಾಜಾರ್ ಕರುನ್ ಹಾಡ್ಲ್ಲೆಂ. ಮಡಿಕೆರಿ ಕಾಫಿಯೆ ತೋಟಾಂತ್ ಕಾಮ್ ಕರ್ಚ್ಯಾ ಮ್ಹಾಕಾ, ವೀಸ್ ವರ್ಸಾಂ ಉತ್ರಾತಾನಾಂಚ್ಚ್ ಮಿಂಗೆಲಿಚಿ ಸೈರಿಕ್ ಆಯಿಲ್ಲಿ ದೆವಾಚೆಂ ದೆಣೆಂ ಮ್ಹಣ್ ಮ್ಹಜ್ಯಾ ಆವಯ್ ಬಾಪಾಯ್ನ್ ಚಿಂತ್ಲ್ಲೆಂ ಜಾವ್ಯೆತ್. ಗೊರಿ ಕಾತ್, ಕಾಳೆ ಕೇಸ್, ಕಾಜುಲೆ ದೊಳೆ ಆಸ್ಲ್ಲ್ಯಾನ್ ಕಾಫಿಯೆ ತೋಟಾಂತ್ ವೊತಾಕ್ ಪಡ್ಲ್ಲಿಂ ತರ್ಯ್ ಮ್ಹಜಿ ಸೊಭಾಯ್ ಉಣಿ ಜಾಲ್ಲಿ ನಾ. ಚೆಡುಂ ಕಿತ್ಲೆಂಯ್ ಸೊಭಿತ್ ಆಸೊಂ ಕೆದ್ನಾಂಯ್ ದುಬ್ಳ್ಯಾ ಕುಟ್ಮಾಂತ್ ಜಲ್ಮೊಂಕ್ ನ್ಹಜೊ ಮ್ಹಣ್ ಮ್ಹಣ್ಚ್ಯಾಕ್ ಹಾಂವ್ಚ್ಚ್ ಬರಿ ಸಾಕ್ಸ್. ದೋತ್ ದೆಣೆಂ ನಾಸ್ತಾನಾ ಕಾಜಾರ್ ಜಾಂವ್ಕ್ ವೊಪ್ವಾಲ್ಲ್ಯಾ ಮಿಂಗೆಲಿಚೊ ಏಕ್ ಪಾಯ್ ಮಾತ್ ಮಟ್ವೊ ಮಾತ್ ನ್ಹಯ್ ಎಕಾ ಚೆಡ್ವಾಕ್ ಕಿತೆಂ ಜಾಯ್ ತೆಂ ದಿಂವ್ಕ್ ಸಕಾನಾತ್ಲ್ಲೊ ತಸಲೊ ಅವ್ಗುಣ್ಂಯೀ ತಾಕಾ ಆಸ್ಲ್ಲೊ. ಪುಣ್, ಗುಣಾಂನಿ ಬರೊಚ್ಚ್ ಮ್ಹಣ್ ಮ್ಹಜ್ಯಾ ವ್ಹಡಿಲಾಂಕ್ ತೊ ಮಾನ್ವೊಂಕ್ ಕಾರಣ್. ಮಾಂ ಬಾಬಾನ್ ’ಹಾಂ’ ಮ್ಹಣ್ತಾನಾ ಹಾಂವೆಂ ’ನಾ’ ಮ್ಹಳ್ಳೆಂ ನಾ. ಕಾಜಾರ್ ಜಾವ್ನ್ ಫೆರಾರ್ ಯೇವ್ನ್ ಮಿಂಗೆಲಿಚ್ಯಾ ಆವಯ್ ಬಾಪಾಯ್ ಸಾಂಗಾತಾ ರಾವ್ಲಿಂ. ಲೊಕಾನ್ ಮ್ಹಳ್ಳೆಂಯ್ ಹಾಂವೆಂ ಆಯ್ಕಾಲ್ಲೆಂ - ಅಸಲೆಂ ಮಾಣ್ಕಾ ತಸಲೆಂ ಚೆಡುಂ ಮಿಂಗೆಲಿ ತಸಲ್ಯಾ ಥೊಂಟ್ಯಾಕ್ ಕಸೆಂ ದಿಲೆಂಗಾಯ್? ಲೊಕಾಚೆಂ ಸವಾಲ್ ಬರೆಂಚ್ಚ್ ಪುಣ್ ತಾಂಕಾ ಜವಾಬ್ ಮಾತ್ ದಿಂವ್ಕ್ ಮ್ಹಾಕಾ ಜಾಲ್ಲೆಂ ನಾ. ಕಾಜಾರ್ ಜಾವ್ನ್ ಧಾ ವರ್ಸಾಂ ಮ್ಹಣಾಸರ್ ಆಮ್ಕಾಂ ಭುರ್ಗಿಂ ಜಾಲಿಂ ನಾಂತ್. ಮಿಂಗೆಲಿ ವರ್ವಿಂ ಜಾಂವ್ಕ್ಯೀ ಸಾಧ್ಯ್ ನಾತ್ಲ್ಲೆಂ.
ಆಮ್ಕಾಂ ಆಸ್ಲ್ಲೆ ಕಷ್ಟ್ ಪಳವ್ನ್ ನ್ಹಯ್ ಬಗರ್ ಏಕ್ ಬರಿ ಕಾಮಾಚಿ ಜಾಯ್ ಮ್ಹಣ್ ಸೊಧುನ್ ದಾಟ್ಟುನ್ ಮ್ಹಜ್ಯಾ ಕರ್ನಾ ಪಾಸ್ಪೋರ್ಟ್ ಕರವ್ನ್, ಥೊಡ್ಯಾಚ್ಚ್ ದಿಸಾನಿಂ ವೀಸಾ ದಾಡುನ್ ಹಾಂವ್ ಮಸ್ಕತ್ ಪಾವ್ಲ್ಲಿಂ.
ಮಿಂಗೆಲಿಚಿ ಮಾಂಯ್ ಆನಿಂ ಹಾಂವ್, ಗಂಜಿಮಠಾಚ್ಯಾ ವಠಾರಾಂತ್ ಹೆಣೆ ತೆಣೆಂ ಕೂಲಿಚೆಂ ಕಾಮ್ ಕರುನ್ ಜಿಯೆತೆಲ್ಯಾಂವ್ ತರ್ಯ್ ದಿಸ್ಪಡ್ತೊ ಗ್ರಾಸ್ ವಚೊಂಕ್ ಕಷ್ಟ್ ಜಾತಲೆಚ್ಚ್. ಮಿಂಗೆಲಿಕ್ ತೆಗಾಂ ಭಯ್ಣಿಂ ತರ್ ಭಾವ್ ನಾತ್ಲ್ಲೆ. ಎಕಾ ಭಯ್ಣಿಕ್ ಮಿಜಾರ್ ದಿಲ್ಲೆಂ, ದುಸ್ರ್ಯಾಕ್ ಸಕ್ಲೆಶ್ಪುರ್ ಆನಿಂ ತಿಸ್ರ್ಯಾಕ್ ಕಿನ್ನಿಗೋಳಿ ಲಾಗ್ಸಿಲ್ಯಾ ಮೂರುಕಾವೇರಿ. ತೆಗಾಂಯ್ಕಿ ದೊಗಾಂ ತೆಗಾಂ ಲೆಕಾನ್ ಭುರ್ಗಿಂ ಆಸ್ಲ್ಲಿಂ ಆನಿಂ ತವಳ್ ತವಳ್ ಘರಾ ಯೇವ್ನ್ ವೆತಾಲಿಂ. ಮಿಂಗೆಲಿಚ್ಯಾ ಬಾಬಾಕ್ ಕಾನುನ್ ಬಾಬ್ಯಾಮ್ ಮ್ಹಣ್ ಲೊಕಾನ್ ಉಲೊ ಕರ್ಚೆಂ. ಕಿತೆಂ ಉಲಯ್ಲ್ಯಾರ್ಯ್ ತಾಚೆಲಾಗಿಂ ಜವಾಬಿ ಕೊಡ್ಯಾಳ್ಚ್ಯಾ ಲೋಬೊ ವಕೀಲಾಬರಿಚ್ಚ್ ಆಸ್ಲ್ಲ್ಯೊ ಮ್ಹಣ್ ಸರ್ವಾಂಕ್ ಕಳಿತ್. ಕರ್ಚೆಂ ಕಾಮ್ ಕಾಂಯ್ ನಾ ತರ್ಯ್ ಉಲಂವ್ಚ್ಯಾಕ್ ಇಂದಿರಾ ಗಾಂಧಿಕ್ ಪಾಟಿಂ ಘಾಲ್ತಲೊ ಕೊಣ್ಣಾ. ತಾಂಕಾಂ ಜಾಗೊ ಕಾಂಯ್ ಆರ್ಧೊ ಎಕ್ರೊ ಆಸ್ಲ್ಲೊ ತರ್ಯ್ ತಾಂತು ಜಾಂವ್ಚಿ ಹುಳ್ವಳ್ ಕಾಂಯ್ ಭರ್ಕತಾಯೆಚಿ ನ್ಹಯ್. ಆಸ್ಲ್ಲೆ ಮ್ಹಾತಾರೆ ಜಾಲ್ಲೆ ಚಾರ್ ಮಾಡ್, ದೊರ್ಯಾ ದೆಗೆನ್ ದೋನ್ ತೀನ್ ಕಾಜು ಆಂಬ್ಯಾಚೆ ರೂಕ್ ಆನಿಂ ತಾಂಚ್ಯಾ ಮಧೆಂ ಪಾವ್ಸಾಂತ್ ಆಲ್ಸಂಡೆ, ಬೆಂಡಾಂ ಯಾ ಇಲ್ಲಿ ಕಣ್ಗಿ ಕರ್ತಾಲಿಂ. ಮಸ್ಕತ್ ಥಾವ್ನ್ ರಜೆರ್ ಗೆಲ್ಲ್ಯಾ ವೆಳಿಂ, ಆಸ್ಲ್ಲ್ಯಾ ಜಾಗ್ಯಾರ್ ಇಲ್ಲಿಂ ಆಬೊಲಿಂ, ಜಾಯೊ ಯಾ ಹೆರ್ ಪುಲಾಂ ಝಾಡಾಂ ಲಾವ್ನ್ ಘರ್ಚ್ಯಾ ಖರ್ಚಾಕ್ ಕಾಂಯ್ ವಾಟ್ ಕರ್ಯಾ ಮ್ಹಳ್ಯಾರ್ ಕಾನೂನ್ ಕೋಟಿಚೊ ಜವಾಬಿ ಮಾತ್ ಮ್ಹಾಕಾ ವಿರ್ಯಾರ್ ಕರ್ತಾಲ್ಯೊ.
ದಾರ್ಸೈತ್ ಥಾವ್ನ್ ಇಗರ್ಜೆಕ್ ವಚಾಜಯ್ ತರ್ ಚಲೊನ್ ವಚೊಂಕ್ ಕಾಂಯ್ ವೀಸ್ ಮಿನುಟಾಂಚಿ ವಾಟ್. ದಾರ್ಸೈತ್ ಇಸ್ಕಾಲಾಚ್ಯಾ ಮುಕ್ಲ್ಯಾ ವಾಟೆನ್ ವಚೊನ್ ಮುನ್ಸಿಪಾಲಿಟಿಚೆಂ ಭಾಂದಾಪ್ ಉತ್ರೊನ್ ಮುಕಾರ್ ಗೆಲ್ಯಾರ್ ಉಪ್ರಾಂತ್ ಶೀದಾ ವಾಟ್. ದಾಟ್ಟು, ಬಾಯ್ ಭುರ್ಗ್ಯಾಂನಿಂ ಸುಕ್ರಾರಾಚ್ಯಾ ದಿಸಾಂನಿಂ ಉಟ್ಚೆಂ ಇಕ್ರಾ ವೊರಾ ಉಪ್ರಾಂತ್ಚ್ಚ್ ಆನಿಂ ತ್ಯಾ ದೆಕುನ್ ಹಾಂವೆಂ ಮಾತ್ ಚಲೊನ್೦ಚ್ಚ್ ಇಗರ್ಜೆಕ್ ವೆಚಿ ಸವಯ್ ಕೆಲ್ಲಿ.
ಮಸ್ಕತಾಕ್ ಆಯಿಲ್ಲ್ಯಾ ಸುರ್ವೆರ್ಚ್ಚ್ ಬಾಯೆನ್ ಮ್ಹಾಕಾ ಸಾಂಗ್ಲ್ಲೆಂ - "ಹ್ಯಾ ಗಲ್ಫಾಂತ್ ಭಾಂಗಾರ್ ಪಿಕ್ತಾ ಮ್ಹಣ್ ಗಾವಾಂತ್ ಲೋಕ್ ಚಿಂತ್ತಾ ತರ್ಯ್ ತಸೆಂ ಜಾಯ್ನಾ.... ಹಾಂವ್ ಆನಿಂ ದಾಟ್ಟು ಸಕಾಳಿಂ ಥಾವ್ನ್ ರಾತ್ ಮ್ಹಣಾಸರ್ ಸುಣ್ಯಾಂ ಬರಿ ಕಾಮ್ ಕರ್ತಾಂವ್... ಘಾಮ್ ರಗತ್ ಕೆಲೆಂ ತರ್ ಮಾತ್ ಇತ್ಲೆ ಪಯ್ಶೆ ಜಾತಾತ್.... ಅನ್ಯೇಕ್ ವಿಶಯ್, ಹಾಂವೆಂ ಜಾಯ್ತ್ಯಾಂಕರ್ ಪಳಯ್ಲಾಂ..... ಆನಿಂ ಆಮ್ಚೆಂ ಪಯ್ಲೆಂಚ್ಯಾ ಕಾಮಾಚ್ಯಾ ಥಂಯ್ ಜಾಲ್ಲೆಂ ತರ್ಯ್ ತಸೆಂಚ್ಚ್.... ದೆಕುನ್ ತುಜ್ಯಾ ಬರ್ಯಾಪಣಾಕ್ ಮ್ಹಣ್೦ಚ್ಚ್ ಹಾಂವೆಂ ಸಾಂಗ್ಚೆಂ, ಗಾವಾಂತ್ ಜೆಂವ್ಕ್ ಖಾಂವ್ಕ್ ನಾತ್ಲ್ಲಿಂ ಕಾಮಾಚಿಂ ಚೆಡ್ವಾಂ ಹಾಂಗಾ ಯೆತಾತ್ ಆನಿಂ ಆಯಿಲ್ಲೆಂಚ್ಚ್ ಹಾಂಗಾಚೆಂ ಬರೆಂ ಖಾಣ್ ಖಾವ್ನ್೦ಗೀ ಕಿತೆಂ ಸಮ್ಜಾನಾ, ತಾಂಕಾ ಚರಭ್ ಮಾಂಡ್ತಾ.... ಜೀವಾನ್ ಚಿಕ್ಕೆ ಪುಲ್ತಾತ್.... ಸೊಭಾಯ್ ವಾಡ್ತಾ.... ಆನಿಂ ತೆದ್ನಾಂ ತಿಂ ಆಟಿಚ್ಯಾ ಕೊಲ್ಗ್ಯಾಂ ಬರಿ ಜಾತಾತ್..... ಕಾಂಯ್ ಚಡುಣೆಂ ಜಾಲೆಂ, ಆಸ್ಲ್ಲೆಂ ಬರೆಂ ಕಾಮ್ ಹೊಗ್ಡಾವ್ನ್ ಗಾವಾಕ್ ಪಾಟಿಂ..... ಜಿವಿತ್ಚ್ಚ್ ಸತ್ತ್ಯಾನಾಸ್ ಕರ್ತಾತ್....."
ಮಸ್ಕತಾಕ್ ಆಯಿಲ್ಲ್ಯಾ ಸುರ್ವೆರ್ ಬಾಯೆನ್ ಮ್ಹಾಕಾ ದಿಲ್ಲಿ ಜಾಗ್ರುತ್ಕಾಯ್ ಹಾಂವೆಂ ಮತಿಂತ್ ಬರಿ ಕರ್ನ್ ಧರ್ಲ್ಲಿ. ಮಸ್ಕತಾಕ್ ಹಾಂವ್ ಆಯ್ಲ್ಯಾಂ ಕಾಮ್ ಕರುಂಕ್ ತರ್ ಹೆಣೆಂ ತೆಣೆಂ ಆಮ್ಕಾಂ ಕಿತ್ಯಾಕ್ ಪಳಯ್ಜಯ್? ಪಯ್ಶೆ ಇಲ್ಲೆ ಜಾಲ್ಲೆಚ್ಚ್ ಏಕ್ ಬರೆಂ ಘರ್ ಭಾಂದುನ್ ಉಪ್ರಾಂತ್ ಪಾಟಿಂ ಗೆಲ್ಯಾರ್ ವ್ಹಡ್ ನ್ಹಯ್.
ಖರೆಂ ಸಾಂಗ್ಚೆಂ ತರ್ ದೀಸ್ ವೆತಾಂ ವೆತಾಂ ಮ್ಹಜ್ಯಾ ಥಂಯ್ ಬದ್ಲಾವಣ್ ಜಾಲ್ಲಿ. ಆಯಿಲ್ಲ್ಯಾ ಸುರ್ವೆರ್ ಸೊಸೆಜ್ ಆನಿಂ ಪ್ರಿಡ್ಜ್ ಉಗ್ತೊ ಕರುಂಕ್, ಗ್ಯಾಸ್ ಪೆಟಂವ್ಕ್ ಶಿಕ್ಲ್ಲಿಂ ತರ್ ಉಪ್ರಾಂತ್ ಹರ್ಏಕ್ ಕಳಿತ್ ಜಾಂವ್ಚ್ಯಾ ಬರಿ ಹ್ಯಾ ಜಿಣಿಯೆಂತ್ ಹರ್ಏಕ್ ಬದ್ಲಾತಾ ತಸೆಂ ಮ್ಹಾಕಾ ಭಗ್ಲ್ಲೆಂ......
ಮಸ್ಕತಾಂತ್ ಮ್ಹಜ್ಯಾ ಜಿಣಿಯೆಂತ್ ಎಕಾಚ್ಚ್ಫರಾ ಬದ್ಲಾವಣ್ ಆಯಿಲ್ಲಿ ಸುಮಾರ್ ಸ ಮಹಿನ್ಯಾಂ ಪಯ್ಲೆಂ - ತೆಂಯ್ ಲಿಗೊರಿಚ್ಯಾ ಭೆಟೆ ಉಪ್ರಾಂತ್. ಲಿಗೊರಿಯ್ ಮೂರು ಕಾವೇರಿಚೊ, ಮಿಂಗೆಲಿಚ್ಯಾ ನಿಮಾಣ್ಯಾ ಭಯ್ಣಿಚ್ಯಾ ಘರಾ ಕಡ್ಚೊ. ಸ ಮಹಿನ್ಯಾಂ ಪಯ್ಲೆಂ ಮಿಂಗೆಲಿನ್ ದಾಡುನ್ ದಿಲ್ಲ್ಯೊ ಖಾಣಾ ವಸ್ತು ಘೆವ್ನ್ ಮ್ಹಾಕಾ ಇಗರ್ಜೆಂತ್ ಮೆಳ್ಲ್ಲೊ. ಬರ್ಕಾ ಎಕಾ ಶೇಖಾ ಕರ್ ಕಾಮ್ ಕರ್ಚೊ ಲಿಗೊರ್ ಕಾಜಾರ್ ಜಾಲ್ಲೊ ಆನಿಂ ತೆಗಾಂ ಭುರ್ಗಿಂ ಆಸ್ಲ್ಲಿಂ. ಟೀಚರ್ ಬಾಯ್ಲ್ ಆನಿಂ ಭುರ್ಗಿಂ ಗಾವಾಂತ್ ಆಸ್ಲ್ಲಿಂ. ವಸ್ತು ಹಾಡುನ್ ಯೆತಾನಾ ಜಾಲ್ಲಿ ವಳೊಕ್ ತಿತ್ಲ್ಯಾರ್ ರಾವ್ಲಿ ನಾ. ದೋನ್ ಹಪ್ತ್ಯಾಂ ಉಪ್ರಾಂತ್ ಮೆಳ್ತಾನಾ ಲಿಗೊರಿನ್ ಮ್ಹಾಕಾ ರೂವಿ ಆಪವ್ನ್ ವ್ಹೆಲೆಂ. ಸಕಾಳಿಂಚೊ ನಾಸ್ಟೊ ಆನಿಂ ಧನ್ಪಾರಾಂಚೆಂ ಜೆವಾಣ್ ಆಮಿಂ ಸಾಂಗಾತಾ ಕೆಲೆಂ ಆನಿಂ ಸಾಂಜ್ ಜಾತಾನಾ ಹಾಂವ್ ಪಾಟಿಂ ಆಯ್ಲಿಂ. ಜಿವಿತಾಂತ್ ಪಯ್ಲೆಂ ಪಾವ್ಟಿಂ ಅಪರಿಚಿತ್ ಚಲ್ಯಾ ಸಾಂಗಾತಾ ಖರ್ಚಿಲ್ಲೊ ವೇಳ್ ಕಸಲೊಗೀ ಅಪರಿಮಿತ್ ಸಂತೊಸಾಚೊ ಆನ್ಭೋಗ್ ದೀಂವ್ಕ್ ಲಾಗ್ಲೊ ಮ್ಹಾಕಾ.
ಲಿಗೊರಿಚಿ ವಳಕ್ ಚಿಕ್ಕೆ ದಾಟ್ ಜಾವ್ನ್ ಆಯ್ಲಿ. ತೊ ಬರ್ಕಾ ಕಾಮ್ ಕರ್ತಾಲೊ ಜಾಲ್ಲ್ಯಾನ್ ಹಪ್ತ್ಯಾಚ್ಯಾ ದೀಸಾಂನಿ ರೂವಿ ಯೇಂವ್ಕ್ ಕಷ್ಟಾಚೆಂ ಮ್ಹಣ್ ತಾಣೆಂ ಮ್ಹಾಕಾ ಕಳಯಿಲ್ಲೆಂ. ಪುಣ್, ಪುರ್ಸತ್ ಮೆಳ್ತಾನಾ ತೊ ಮ್ಹಾಕಾ ಫೋನ್ ಕರ್ತಾಲೊ. ಲಿಗೊರಿನ್ ಗಾವಾ ಥಾವ್ನ್ ಯೆತಾನಾ ಮ್ಹಜ್ಯಾ ಖಾತಿರ್ ಪೊಟ್ಲಿ ಹಾಡ್ಲ್ಲಿ ಮ್ಹಣ್ ಬಾಯೆಕ್ ಕಳಿತ್ ಆಸ್ಲ್ಲೆಂ ಜಾಲ್ಲ್ಯಾನ್ ಏಕ್ ದೋನ್ ಪಾವ್ಟಿಂ ಫೋನ್ ಯೆತಾನಾ ಬಾಯೆನ್ ವಿಚಾರ್ಲ್ಲ್ಯಾ ವೆಳಿಂ - ತೊ ಗಾಂವ್ಚೊ, ಮೂರುಕಾವೇರಿಚೊ, ಮಿಂಗೆಲಿಚ್ಯಾ ಭಯ್ಣಿಚ್ಯಾ ಘರಾ ಕಡ್ಚೊ ಮ್ಹಣ್ತಾನಾ ತಿ ವೊಗೊ ರಾವ್ಲ್ಲಿ.
ಬಾಯೆನ್ ಹರ್ಯೇಕ್ ಪಾವ್ಟಿಂ ಸಾಂಗ್ಚೆಂ ಹೆಂಚ್ಚ್ - ಹಾಂಗಾಸರ್ ಹೆಣೆಂ ತೆಣೆಂ ವೆತಾನಾ ಜಾಯ್ತೆ ಮೆಳ್ತಾತ್.... ಮತ್ ಆನಿಂ ಕೂಡ್ ಸಾಂಬಾಳ್.. ನಾ ತರ್ ತುಜೆಂ ಜಿವಿತ್ ಬಲಿ ದಿತೆಲೆಂಯ್...
ಉತ್ರಾಂ ಉಲಂವ್ಕ್ ಸುಲಭ್.... ಬಾಯೆಕ್ ಕಿತೆಂ ಕುಡಿಚಿ ಆಶಾ ನಾ? ಆಮ್ಕಾಂ ಕಾಮಾಚ್ಯಾಂಕ್ ಮಾತ್ ತಿ ಶಿಕವ್ಣ್? ತಿಣೆಂ ಕಿತ್ಲೆಂ ಆನಿಂ ಕೆದ್ನಾಂಯ್ ಬಾಯ್ರ್ ವಚ್ಯೆತ್? ಇಗರ್ಜೆಂತ್ ಯಾ ದಫ್ತರಾಂತ್ಲ್ಯಾ ದಾದ್ಲ್ಯಾ ಸಂಗಿಂ ದಿಸಾಕ್ ಆನಿಂ ರಾತಿಕ್ ಎಕ್ಸುರೆಂಚ್ಚ್ ವಚ್ಯೆತ್ ಆನಿಂ ಯೆವ್ಯೆತ್? ತೆದ್ನಾಂ ಕಾಂಯ್ ಜಾಯ್ನಾ.... ಪುಣ್ ಆಮಿಂ ಮಾತ್.... ಬಂಧಡೆಂತ್ಲಿ ಸುಕ್ಣಿಂ..... ಆಮ್ಕಾಂ ಆಶಾ ನಾ.... ಆಮ್ಕಾಂ ಕಾಂಯ್ ದಾದ್ಲ್ಯಾಂ ಲಾಗಿಂ ಉಲಂವ್ಕ್ ಬಂಧಡ್.....??? ಕಾಳಿಜ್ ಫುಮಾರ್ತಾಲೆಂ ಪುಣ್ ಕಿತೆಂ ಕರ್ಯೆತಾ??
ಥೊಂಟ್ಯಾ ಮಿಂಗೆಲಿನ್ ಮ್ಹಾಕಾ ದಿಲ್ಲೆಂ ಕಿತೆಂ? ಅಸಲ್ಯಾ ಲಾಗಿಂ ಚಲಿಯೆಕ್ ಕಾಜಾರ್ ಕರ್ನ್ ದೀವ್ನ್ ಚಲಿಯೆಚೊ ಬೊಂಗೊಸ್ತಳ್ ಕಿತ್ಯಾಕ್ ಕರ್ತಾತ್ ತೆಂ ಮ್ಹಾಕಾ ಕೆದ್ನಾಂಯ್ ಸಮ್ಜನಾತ್ಲ್ಲೆಂ. ಲಾಗ್ಗಿಂ ಗೆಲ್ಯಾರ್ ಲಜೆನ್ ಮುರ್ಡೊಂಚೊ ದಳ್ಧಿರೊ ತೊ.... ಥೊಂಟೊ ಪಾಯ್ ಜಾಲ್ಯಾರ್ ಕಿತೆಂ ಉರ್ಲ್ಲೊ ಜೀವ್ ನಾ..... ಹ್ಯಾ ಮ್ಹಜ್ಯಾ ಜೀವಾಕ್ ಧರ್ನ್ ಮೊಗಾನ್ ಫಾಪ್ಸಿಲೆಂ ತರ್ ಕಿತೆಂ ಬರೆಂ ಜಾತೆಂ? ಹ್ಯಾ ವಿಶಿಂ ಮಿಂಗೆಲಿಲಾಗಿಂ ಕರ್ನ್ಯಾಂನಿಂ ಸೊಡ್ ಉತ್ರಾಂನಿ ಸಯ್ತ್ ಹಾಂವೆಂ ಸಾಂಗ್ಲ್ಲೆಂ ನಾ? ಹರ್ಏಕ್ ಪಾವ್ಟಿಂ ಮಾಲುಂಡಾ ಬರಿ ತಕ್ಲಿ ಹಾಲಯ್ತಾಲೊ ಸೊಡ್ನ್ ಹೆರ್ ಕಿತೆಂಚ್ಚ್ ಕರಿನಾತ್ಲ್ಲೊ. ತಾಚ್ಯಾ ಕಾತಿ ಪಂದ್ಲ್ಯಾ ಮಾಸಾಂತ್ ಕೋಣೆಂ ಥಂಡ್ ಬರ್ಫಾಚೆಂ ಉದಾಕ್ ವೊತ್ಲಾಂ ತೆಂ ಮ್ಹಾಕಾ ಪುಣೀ ಕಳಿತ್ ನಾತ್ಲ್ಲೆಂ.
ಮಸ್ಕತ್ ಯೆಂವ್ಚ್ಯಾ ಪಯ್ಲೆಂ ಏಕ್ ದೋನ್ ಪಾವ್ಟಿಂ ನೀರುಡೆ ಗೆಲ್ಲ್ಯಾ ವೆಳಿಂ ಬಸ್ಸಾರ್ ಎಕಾ ನಾಯ್ತ್ಯಾನ್ ಬರೆಂ ಕರ್ನ್ ಮ್ಹಾಕಾ ಪೊಸೆಲ್ಲೆಂ ಆನಿಕ್ಯ್ ಉಡಾಸ್ ಯೆತಾ ಮಾತ್ ನ್ಹಯ್ ಜೀವಾಂತ್ ಉಮಾಳೆಯ್ ಭರ್ತಾತ್. ದೆಗೆನ್ ಬಸೊನ್ ಆಸ್ಲ್ಲೊ ತೊ ಥೊಡ್ಯೊಚ್ಚ್ ಘಡಿಯ್ಯೊ ತರ್ಯೀ ಹ್ಯಾ ಜಿವಾಂತ್ ತುಫಾನ್ ಉಟೊನ್ ಮಾತ್ ಗೆಲ್ಲೊ ತೊ ಪುನೆಗೆಲ್ಲೊ. ಏಕ್ ಪಾವ್ಟಿಂ ಚಿಂತ್ಲ್ಲೆಂ ಆಸಾ - ಹ್ಯಾಚ್ಚ್ ತರ್ನ್ಯಾ ಫೊರಾನ್ ಜೀವಾಕ್ ಜೀವ್ ಲಾಗಯಿಲ್ಲೊ ತರ್ ಸರ್ಗ್ ದಿಸ್ತೊ ಕೊಣ್ಣಾ... ತಾಕಾಯ್ ನಶೀಬ್ ಜಾಯ್ಜಯ್ ನ್ಹಯ್???
ಕಿತೆಂ ಮ್ಹಳ್ಯಾರ್ಯೀ ಲಿಗೊರಿನ್ ಮ್ಹಜ್ಯಾ ಜಿವಿತಾಂತ್ ಸುಡಾಳಾಯ್ ಹಾಡ್ಲ್ಲಿ. ಮ್ಹಜಿ ಸೊಭಾಯ್ ತಾಣೆಂ ವರ್ಣಿಲ್ಲಿ. ಧವ್ಯಾ ತೊಂಡಾರ್ ಆಸ್ಚೆ ಕಾಜುಳೆ ದೊಳೆಚ್ಚ್ ಪಳವ್ನ್ ತೊ ಮ್ಹಜ್ಯಾ ಲಾಗಿಂ ಉಲಯಿಲ್ಲೊ. ಡ್ರೈವರ್ ತರ್ಯ್ ತಾಕಾ ಮಾಹೆತ್ ಬರಿ ಆಸ್ಲ್ಲಿ. ತಾಣೆಂ ಮ್ಹಜ್ಯಾ ವಿಶಿಂ ಬರೆಂ ಉಲಯ್ತಾನಾ ಹಾಂವ್ ಮಾತ್ ಸರ್ಗಾರ್ ವೆತಾಲಿಂ. ಟ್ಯಾಕ್ಸಿ ಧರುನ್ ಆಮಿಂ ರುವಿ ಯೆತಾನಾ ಆನಿಂ ಹೊಟೆಲಾಂತ್ ಬಸ್ಲ್ಲ್ಯಾ ವೆಳಿಂ ತಾಣೆಂ ಮಾಕಾ ಕೆದ್ನಾಂಯ್ ಆಪಡ್ಚೆಂ ಆಸ್ಲ್ಲೆಂ. ತ್ಯಾ ಆಪಡ್ಣ್ಯಾಂತ್ ಆಸ್ಲ್ಲೆಂ ಸುಖ್ ಕಿತೆಂ ಮ್ಹಣ್ ಕಳಯ್ಲ್ಯಾರ್ ಕೊಣಾಯ್ಕಿ ಕಳ್ಚೆಂ ನಾ... ಭಗ್ಲ್ಲ್ಯಾಕ್ ಮಾತ್ ತೆಂ ಕಳಿತ್..
ಬಾಯೆನ್ ದಿಲ್ಲಿ ಜಾಗ್ರುತ್ಕಾಯ್ ಕೆದ್ನಾಂ ಏಕ್ ಪಾವ್ಟಿಂ ಪರತ್ ಸಾಂಗ್ತಾಲಿ. ಆಮ್ಕಾಂ ಘರ್ ಕಾಮೆಲ್ಯಾಂಕ್ ಹ್ಯಾ ಗಲ್ಪಾಂತ್ ಆಯ್ಲ್ಯಾ ಉಪ್ರಾಂತ್ ಕುಡಿಚಿ ಉಂಚಾಂಬಳಾಯ್ ಚಡ್. ಹಾಂವ್ ಬಾಯೆಚ್ಯಾ ಉತ್ರಾಂಕ್ ವೊಪ್ವಾತಾಂ. ಕುಡಿಚಿ ಆಶಾ ಕೊಣಾಕ್ ನಾ? ಘರ್ ಖಾತ್ಯಾಚ್ಯಾ ಬಾಯ್ಲಾಂಕ್ ಮಾತ್ ಪಾತ್ಯೆನಾ ಜಾಂವ್ಚೆಂ ಸಾರ್ಕೆಂ ಗೀ ಯಾ ಖಂಚಾಯ್ ಬಾಯ್ಲಾಂಕ್ ಪಾತ್ಯೆನಾ ಜಾಂವ್ಚೆಂ ಸಾರ್ಕೆಂ? ಹಾಂವೆಂ ಮ್ಹಣ್ಚೆಂ ತರ್ ಖಂಚಾಯ್ ಬಾಯ್ಲಾಂಕ್ ಪಾತ್ಯೆಂವ್ಚೆಂಚ್ಚ್ ಸಾರ್ಕೆಂ ನ್ಹಯ್..... ಚೆಡ್ಯಾ ಲಾಗಿಂ ಎಕ್ಸುರ್ಪಣಾಂತ್ ದೀಸಾಕ್ ಯಾ ರಾತಿಕ್ ಸಳ್ಗೆನ್ ಉಲಯ್ತಾತ್ ತರ್ ತಾಂತು ಮಿಸ್ತೆರ್ ಆಸ್ತಾತ್... ಆಸಾಜಯ್ಚ್ಚ್....
ಆನಿ ಏಕ್ ವಿಷಯ್. ದುಸ್ರ್ಯಾಂಕ್ ಸಾಂಗೊಂಕ್ ಸಲೀಸ್. ಬಾಯೆಕ್ ಕಿತೆಂಯ್ ಉಲಂವ್ಕ್ ಸುಲಭ್. ದಾಟ್ಟು ತಿಚ್ಯೆ ಸಾಂಗಾತಾಚ್ ಅಸಾ. ಜಾಯ್ ಜಾತಾನಾ ತಾಕಾ ವ್ಹಡ್ಲೊ ಆನಿಂ ಜಾಯ್ ತೆಂ ಜೊಡ್ಲೆಂ. ಬ್ರೆಸ್ತಾರಾಚ್ಯಾ ರಾತಿಂ ತಾಂಚೊ ಖೆಳ್ ಹಾಂವೆಂ ವ್ಹಳೂ ತರ್ಯೀ ಆಯ್ಕಾಲಾ.... ತ್ಯಾ ರಾತಿಂ ಫಾಂತೆಂ ಜಾಲ್ಯಾರ್ಯ್ ತಿಂ ನಿದಾನಾಂತ್.... ತೊಚ್ಚ್ ಪುಸ್ಸುಸೊ.... ತೊಚ್ಚ್ ಕಿಡ್ಕಿಡೊ... ಲಿಗೊರ್ ಮೆಳ್ಳ್ಯಾ ಉಪ್ರಾಂತ್ ಬಾಯೆ ದಾಟ್ಟುಚೊ ಕಿಡ್ಕಿಡೊ ಆಯ್ಕೊನ್ ಹ್ಯಾ ಜೀವಾಂತ್ಯ್ ಉಜೊ ಪೆಟ್ತಾಲೊ.... ತಾಂಚ್ಯಾ ಕೂಡಾಚ್ಯಾ ಬಾಗ್ಲಾರ್ ರಾವೊನ್, ಚೊರ್ಯಾಂ ತರ್ಯೀ ತಾಂಚೆಂ ಉಲವ್ಣೆಂ ಆಯ್ಕೊನ್ ಮತಿಂತ್ ಸುಖಾಚಿಂ ಲ್ಹಾರಾಂ ಹಾಡ್ಚಿಂ ಆಸ್ಲ್ಲಿಂ ಹಾಂವೆಂ...
ಇಗರ್ಜೆಚ್ಯಾ ಬಾಗ್ಲಾರ್ ಪಾವ್ತಾನಾಂಚ್ಚ್ ಲಿಗೊರ್ ಮುಕಾರ್ ಅಸ್ತಲೊ ಮ್ಹಣ್ ಹಾಂವೆಂ ಚಿಂತ್ಲ್ಲೆಂ. ಕೆದಾಳಾಯ್ ರಾಂವ್ಚ್ಯಾ ಜಾಗ್ಯಾರ್ ವಚೊನ್ ಪಳಯ್ತಾನಾ, ತೊ ದಿಸಾನಾತ್ಲ್ಲೊ. ಇಗರ್ಜೆಚ್ಯಾ ಸಗ್ಳ್ಯಾ ವಠಾರಾಂತ್ ಸೊಧ್ಲೊ ತರ್ಯೀ ತಾಚಿ ಝಳಕ್ ನಾತ್ಲ್ಲಿ. ಆದ್ಲ್ಯಾ ಸುಕ್ರಾರಾ ತಾಣೆಂ ಮ್ಹಾಕಾ ತಾಚ್ಯಾ ಕುಡಾಕ್ ಆಪವ್ನ್ ವೆಲ್ಲೆಂ. ಬರ್ಕಾ ಎಕಾ ವ್ಹಡಾ ಶೇಖಾಚೊ ಬಂಗ್ಲೊ. ತಾಚ್ಯಾ ದೆಗೆನ್೦ಚ್ಚ್ ಕಾಮಾಗಾರಾಂಕ್ ರಾವೊಂಕ್. ಎಕೇಕಾ ಕೂಡಾಂತ್ ದೊಗಾಂ ಜಣಾಂಕ್ ರಾವೊಂಕ್. ಲಿಗೊರ್ ಆಸ್ಚ್ಯಾ ಕೂಡಾಂತ್ ಆನಿ ಏಕ್ ಮಲ್ಭಾರಿ ಆಸ್ಲ್ಲೊ. ಹ್ಯಾ ಸುಕ್ರಾರಾ, ತಾಚೊ ಮಲ್ಭಾರಿ ದೊಸ್ತ್ ಸೊಹಾರ್ ಗೆಲಾ ಆನಿಂ ಶೇಖ್ ಕುಟ್ಮಾ ಸಮೇತ್ ದುಬಾಯ್ ವೆತಾ ಜಾಲ್ಲ್ಯಾನ್ ತಾಣೆಂ ಮ್ಹಾಕಾ ತಾಚ್ಯಾ ಕೂಡಾಕ್ ವರ್ತಾಂ ಮ್ಹಳ್ಳೆಂ. ಲಿಗೊರಿ ಸಾಂಗಾತಾ ಎಕ್ಸುರ್ಪಣಾಂತ್ ದೀಸ್ ಪಾಶಾರ್ ಕರ್ಚಿಂ ಸ್ವಪ್ಣಾಂ ಹಾಂವೆಂ ದೆಖ್ಲ್ಲಿಂ. ಕಾಲ್ಚ್ಯಾ ರಾತಿಂ, ಬಾಯೆನ್ ಆನಿಂ ದಾಟ್ಟುನ್ ಫಾಂತೆಂ ಮ್ಹಣಾಸರ್ ಕಿಡ್ಕಿಡ್ತಾತಾನಾ, ಹಾಂವೆಂಯೀ ತ್ಯೊಚ್ಚ್ ಕಿಡ್ಕಿಡೊ ಹಾಸೊ ಹಾಸೊಂಕ್ ಚಿಂತ್ಲ್ಲೆಂ, ಲಿಗೊರಿಚ್ಯಾ ಗೊಪಾಂತ್..... ಬಾಯೆನ್ ಕೆದ್ನಾಂ ಏಕ್ ಪಾವ್ಟಿಂ ಕಾಡ್ಚಿಂ ಖಿಳಂಚ್ಚ್ .... ದಾಟ್ಟುಚೊ ಮೊಗಾಚೊ ಕುಸ್ಕುಸೊ, ಆಮ್ಕಾಂಯ್ ಮೆಳ್ತಲೊ..... ಮಿಂಗೆಲ್ ದಿಂವ್ಕ್ ಸಕಾನಾತ್ಲ್ಲೆಂ ಲಿಗೊರಿ ಕಡ್ಚೆಂ ಹಾಂವ್ ಘೆತೆಲಿಂ ಮ್ಹಣ್ ಚಿಂತ್ಲ್ಲೆಂ....
ಸಗ್ಳೊ ದೀಸ್ ಲಿಗೊರಿ ಖಾತಿರ್ ರಾಕೊನ್ ರಾವ್ಲಿಂ ತರ್ಯ್ ತೊ ಆಯ್ಲೊ ನಾ. ಧನ್ಪಾರಾಂಚೆಂ ಜೆವಾಣ್ ಹಾಂವ್ ಜೆವ್ಲಿಂ ನಾ. ದೊಳ್ಯಾಂನಿಂ ದುಖಾಂ ಉದೆಲಿಂ. ಆಶೆಲ್ಲಿ ಆಶಾ ಮಾತ್ಯೆಂತ್ ಪುರೊನ್ ವೆಚಿಯ್ ದಿಸ್ಲಿ.... ಹರ್ಏಕ್ ನಶಿಬಾಚೊ ಖೆಳ್... ಎಕಾ ಬರ್ಯಾ ದಾದ್ಲ್ಯಾಚಿ ವೇಂಗ್ ಮೆಳಾಜಯ್ ತರ್ಯ್ ತಾಕಾ ನಶೀಬ್ ಜಾಯ್ಜಯ್... ತೆಂಯ್ ನಶೀಬ್ ಮ್ಹಾಕಾ ನಾ ಮ್ಹಣ್ ಖರೋಕರ್ ಜಾಲೆಂ.....
ಸಾಂಜೆರ್ ಪಾಟಿಂ ಘರಾ ಯೆತಾನಾ, ದಾಟ್ಟು ಆನಿಂ ಬಾಯ್ ಮಜ್ಯಾಚ್ಚ್ ಯೆಣ್ಯಾಕ್ ರಾಕೊನ್ ಆಸ್ಲ್ಲ್ಯಾ ರಾವ್ಲ್ಲಿಂ. ಚಡಾವತ್ ಸುಕ್ರಾರಾನಿಂ ಭುರ್ಯಾಂಕ್ ಘೆವ್ನ್ ಗಾರ್ಡನಾಕ್ ವೆತಾಲಿಂ ತರ್ ಆಜ್ ಭುರ್ಗಿಂ ಭಾಂದ್ಪಾ ಭಾಯ್ರ್ ಖೆಳೊನ್ ಆಸ್ಲ್ಲಿಂ ಮ್ಹಾಕಾ ಮೆಳ್ಳಿಂ.
"ಮೂರು ಕಾವೇರಿಚೊ ಲಿಗೋರಿ ಮೆಳ್ಳೊಗೀ?"
ಬಾಯೆಚೊ ದೆಂಕ್ಣೊ ಆಯ್ಕೊನ್ ಹಾಂವ್ ಕಾಂಪ್ಲಿಂ. ಉಲಂವ್ಕ್ ಮ್ಹಾಕಾ ಜಾಲೆಂ ನಾ.
"ಪೋರ್ ಸುಕ್ರಾರಾ ತಾಚ್ಯಾ ಕುಡಾಕ್ ಗೆಲ್ಲೆಂಯ್ಮೂ?" ಬಾಯ್ ಮುಕಾರ್ಸುನ್ ಉಲಯ್ಲಿ. "ತಾಚ್ಯಾ ಸಾಂಗಾತಿ ಮಲ್ಭರ್ಯಾನ್ ಶೇಖಾಕ್ ಉಜೊ ದಿಲಾ.... ಖಂಚ್ಯಾ ಮನ್ಶಾಂಕ್ ಜಾಲ್ಯಾರ್ಯೀ ಪಾತ್ಯೆವ್ಯೆತ್ ಮಲ್ಭಾರ್ಯಾಂಕ್ ನ್ಹಯ್.... ಶೇಖ್ ಸಗ್ಳೊ ತಾಪೊನ್, ಲಿಗೊರಿಕ್ ಚಾರ್ ದೀಸ್ ಜಯ್ಲಾಂತ್ ದವರ್ನ್ ಕಾಲ್ ಗಾವಾಕ್ ಆಂಬುಡ್ಲಾ.... ಆತ್ತಾಂ ತ್ಯಾ ತೀನ್ ಕಾಸಾಂಚ್ಯಾ ಮಲ್ಭಾರ್ಯಾಚೆಂ ಪೋನ್ ಆಯಿಲ್ಲೆಂ....."
ಘಡ್ಗಡೊ ಪುಟ್ಲೊ.... ಜೀವ್ ಕಾಂಪ್ಲೊ..... ಹಾಂವ್ ಉಭೊ ರಾವ್ಲ್ಲ್ಯಾ ಕಡೆ ಕಾಣ್ಸಿರೊಂಕ್ ಲಾಗ್ಲಿಂ....
"ದುಬ್ಳೆಂ ಮ್ಹಣ್ ಭರ್ವಸೊ ದವರ್ಲ್ಲ್ಯಾಕ್ ತುಂವೆಂಯೀ ಆಮ್ಕಾಂ ಘಾತ್ ಕೆಲೊಯ್..... ತುಂವೆಂಯೀ ಫಾಲ್ಯಾಂ ರಾತಿಂ ಪಾಟಿಂ ವೆಚಿ ವಿಲೆವಾರಿ ಕರ್ಯೆತ್.... ಗಾಂವಾಂತ್ ವಚೊನ್ ಸೆಣ್ಕುಟಾಂ ವಿಂಚ್ತಾನಾ ಮಾಂಡ್ಲ್ಲಿ ಚರಭ್ ಪುರಾ ಜಿರ್ತಾ....."
ಬಾಯ್ ಆನಿಕ್ಯೀ ಉಲಯ್ತಾಲಿ... ಪುಣ್ ಮ್ಹಾಕಾ ತಿಂ ಉತ್ರಾಂ ಮಾತ್ ಆಯ್ಕಾಲಿನಾಂತ್....
ಹಾಂವ್ ಉಭೊ ರಾವ್ಲ್ಲ್ಯಾ ಕಡೆ ಕಾಂಪ್ತಾಲಿಂ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
