ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಎಲ್ಯೆರ್ ತಾಕೊಡೆ
ಸಾಹಿತಿವಿಶಿಂ ದೋನ್ ಉತ್ರಾಂ:
ಕೊಂಕ್ಣೆಂತ್ ಎದೊಳ್ ಪರ್ಯಾಂತ್ ಕಿತ್ಲೆಶ್ಯಾಕೀ ’ಜಾಯ್ನಾ’ ಮ್ಹಣ್ಚಾ ಸಂಗ್ತ್ಯಾಂಕ್ ’ಜಾತಾ’ ಮ್ಹಣ್ ಕರ್ನ್ ಧಾಖವ್ನ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ನವೊ ಅಧ್ಯಾಯ್ ಸುರು ಕೆಲ್ಲ್ಯಾಂ ಪಯ್ಕಿ ಮ್ಹಾಕಾ ಕಿತ್ಯಾಕ್ಗಿ ಉಟೊನ್ ದಿಸ್ತಾ ’ಮಿತ್ರ್’ - ನ್ಹಂಯ್ ಫಕತ್ತ್ ಹೆ ಮ್ಹಜೆ ಮಿತ್ರ್ ಮ್ಹಳ್ಳ್ಯಾಕ್, ಹಾಂವ್ ದುದಾಕ್ ದೀಕ್ ಮ್ಹಣಾನಾ, ತಶೆಂಚ್ ದಿಕಾಕ್ ದೂದ್ಯ್ ಮ್ಹಣ್ಚಾಂತ್ಲೊ ನ್ಹಂಯ್. ಫಕತ್ತ್ ’ಕೊಂಕ್ಣಿ ಸೆವಾ’ ಮ್ಹಳ್ಳೊ ಸಬ್ಧ್ ಆಯ್ಕೊನ್ ಆಯ್ಕೊನ್ ಮ್ಹಜೆ ಕಾನ್ ದಾಟ್ ಜಾಲ್ಲೆ. ಆತಾಂ ಹೆ ತೆಂಚ್ ಕಾಮ್ ಕರ್ನ್ ತಾಕಾ ’ಕೊಂಕ್ಣಿ ವಾವ್ರ್’ ಮ್ಹಣ್ತಾತ್ ಆನಿ ಖರೆಂಪಣಿಂ ಲೋಕ್ ಹೆಂ ಮಾಂಧ್ತಾ ಮ್ಹಣ್ಚಾಕ್ ಜಾಯ್ತಿ ಗೊವಾಯ್ ಆಸಾ. ಹೆ ತೆಗೀ ಪ್ರಾಯೆನ್ ಲ್ಹಾನ್ ತರ್ಯ್ ಕೊಂಕ್ಣಿ ಮಿಸಾಂವಾಚೆಂ ವ್ಹೊಜೆಂ ಭೋವ್ಶಾ ಚಡ್ ಮೊಗಾನ್, ಗೌರವಾನ್ ಆನಿ ಸ್ವಾಭಿಮಾನಾನ್ ವ್ಹಾವಯ್ತಾತ್ ಆನಿ ಮ್ಹಜೆ ತಸಲ್ಯಾ ಅಭಿಮಾನಿಂಕ್ ಸದಾಂಚ್ ಎಕಾ ನ್ಹಂಯ್ ಎಕಾ ರಿತಿಚೆಂ ಪ್ರೇರಣ್ ದಿತೇಚ್ ಆಸಾತ್. ಹಾಂತ್ಲೊ ಪಯ್ಲೊ ರಿಚ್ಚಿ ಮ್ಹಜೊ ಆಟ್ರಾ ವರ್ಸಾಂ ಥಾವ್ನ್ ಮಿತ್ರ್, ಆನಿ ಹೆರ್ ಹಾಂಚೆಂ ಪತ್ರ್ ’ಮಿತ್ರ್’ ಸುರು ಜಾತೆಚ್ಚ್ ಮ್ಹಜೆ ’ಮಿತ್ರ್’ ಜಾಲೆ ತರ್ಯ್ ಆಮ್ಚೆಮಧೆಂ ಆಸ್ಚಿ ಏಕ್ ಸಾಮಾನ್ಯ್ ಸಂಗತ್ ಜಾವ್ನಾಸಾ ’ಕೊಂಕ್ಣಿ ವಾವ್ರ್’.
ಎಲ್ಯೆರ್ ತಾಕೊಡೆ ಸಂಯ್ಬಾನ್ ಖಾಲ್ತೊ/ಸಾದೊ ಆನಿ ಕೊಂಕ್ಣೆಂತ್ಲೊ ಲ್ಹಾನ್ ಪ್ರಾಯೆಚೊ ಸಂಪಾದಕ್ ಆನಿ ಬರವ್ಪಾಂತ್ ಜಶೆಂ ಉಲವ್ಪಾಂತ್ ಶೀದಾ ಆನಿ ಸುಡಾಳ್. ಸತ್ ಸಭಾರಾಂಕ್ ಸೊಸಾನಾ ಜಾಂವ್ಕ್ ಪುರೊ - ಪುಣ್ ಸತ್ ತೆಂ ಸತ್ಚ್ ನ್ಹಂಯ್ಗಿ? ಹಾಚಾ ’ಫಾಲ್ಗುಣಿಚೊ ವ್ಹಾಳೊ’ ಬುಕಾಕ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಲಾಭ್ಲ್ಯಾ, ಹಾಚೊ ದುಸ್ರೊ ಕವಿತಾಜಮೊ ’ಪೆಟ್ನೊಳಿಂ’ ಪರ್ಗಟ್ ಜಾಲಾ, ತಶೆಂಚ್ ಹಾಚಾ ಸಂಪಾದಕೀಯಾಂಚೊ ಬೂಕ್ ’ಅತ್ರೆಗ್’ ಪರ್ಗಟ್ ಜಾಲಾ ಮಾತ್ರ್ ನ್ಹಂಯ್ ಹಾಚ್ಯೊ ಎದೊಳ್ಚ್ ದೋನ್ ಸಂಗೀತ್ ಕೊವ್ಳ್ಯೊ ಆಯ್ಲ್ಯಾತ್.
ಕೊಂಕ್ಣೆಕ್ ಜರ್ ನವೊ ಭರ್ವಸೊ, ನವಿ ದಿಶಾ ಲಾಭಾಜಯ್ ತರ್ ಮಿತ್ರಾಚೆ ಮಿತ್ರ್ ಚಡಾಜಯ್ ಆನಿ ಸರ್ವಾಂನಿ ಎಕಾ ಮನಾನ್ ಕೊಂಕ್ಣಿ ವಾವ್ರಾಕ್ (ಸೆವೆಕ್ ನ್ಹಂಯ್) ಲಾಗಾಜಯ್ ಮ್ಹಣ್ ಮಾಂದ್ಚಾಂತ್ ಹಾಂವ್ಯ್ ಎಕ್ಲೊಂ.
- ವಲ್ಲಿ ಕ್ವಾಡ್ರಸ್
ಸಂವಾದ್:
ಸ:
ಕೊಂಕ್ಣಿ
ಪತ್ರಿಕೋದ್ಯಮಾಂತ್ ಪ್ರಾಯೆನ್ ಲ್ಹಾನ್ ತರೀ, ಹೆರ್
ಪತ್ರಾಂಚ್ಯಾ ತುಲಾನಾಂತ್ ಮಿತ್ರ್ ಖಂಡಿತ್ ಪಾಟಿಂ ನಾ
ಮ್ಹಳ್ಳಿ ಜೆರಾಲ್ ಪಾತ್ಯೆಣಿ. ಹ್ಯಾ ವಿಶಿಂ ತುಜೆ ವಿಚಾರ್ ಕಿತೆಂ?
ಜಾ: ಶೀದಾ
ಸಾಂಗ್ಚೆಂ ತರ್ ಕೊಂಕ್ಣಿ ಪತ್ರಿಕೋದ್ಯಮಾಂತ್ ಆಜೂನ್ ಜೊಕ್ತಿ
ವೃತ್ತಿಪರತಾಯ್ ದಿಸೊನ್ ಆಯ್ಲೆಲಿ ನಾ. ಚಡಾವತ್ ಪತ್ರಾಂ
ಏಕ್ ನಿರ್ದಿಶ್ಟ್ ವೋಂಯ್ ಘಾಲ್ನ್ ಬಸ್ಲ್ಯಾಂತ್. ಆರ್ಥಿಕತೆಂತ್
ಬಳ್ವಂತ್ ಆಸ್ಲೆಲಿಂ ಪತ್ರಾಂ ಸಯ್ತ್ ಕೊಂಕ್ಣೆಂತ್ ಕಶೇಂಯ್
ಛಾಪ್ಲ್ಯಾರ್ ಚಲ್ತಾ ಮ್ಹಳ್ಳ್ಯಾ ಬೆಫಿಕಿರಾಯೆಚ್ಯಾ ಚಿಂತ್ಪಾಚಿಂ
ಜಾಲ್ಯಾಂತ್.
ಪೂಣ್ ಹಕೀಗತ್ ಅಶಿಕೀ, ಆತಾಂ ಕೊಂಕ್ಣೆಂತ್ ಗುಂಡಾಯೆಚೆ ವಾಚ್ಪಿ ಚಡ್ಲ್ಯಾತ್. ತಶೆಂ ಆಸ್ತಾನಾ ಸಾಹಿತಿಕ್ ಮಟ್ಟಾರ್ ಝಡಾಯ್ ಆಸ್ಚೆಂ ಆನಿ ಚಾಲ್ತ್ಯಾ ಕಾಳಾಚೆ ಬದ್ಲಾವಣೆಕ್ ಸರಿ ಜಾವ್ನ್ ಲೊಕಾಕ್ ಆಂವಡ್ಚೆ ರಿತಿರ್ ಪತ್ರಾಂ ಪ್ರಕಟ್ಚೆಂ ಗರ್ಜೆಚೆಂ. ಹೆಂ ಪ್ರೇತನ್ ಆಮಿ ಅಡೇಜ್ ವರ್ಸಾ ಆದಿಂ ಕೆಲ್ಲೆಂ. ಆಜೂನ್ ಆಮಿ ತ್ಯಾ ಇರಾದ್ಯಾಂತ್ ಫಕತ್ ಧಾ ಠಕ್ಕೆ ಮಾತ್ರ್ ಯಶಸ್ವಿ. ಫುಡೆಂ ಆಮಿ ಜಾಯ್ತೆಂ ಕರುಂಕ್ ಆಸಾ.
ನವೆಸಾಂವಾಚೆಂ
ಗಿನ್ಯಾನ್ ಮ್ಹಜೆ ಥಂಯ್ ಆಸ್ಲೆಲ್ಯಾನ್ ಆನಿ ಮ್ಹಜೆ ಸಾಂಗಾತಾ
ಸಾಂಗಾತಿ ಮೀಡಿಯಾಚ್ಯಾ ಹೆರ್ ತೆಗಾಂಚೊ ವಾವ್ರ್ ಆಸ್ಲೆಲ್ಯಾನ್
ಮಿತ್ರ್ ಆಜ್ ಯಶಸ್ವೆ ಕುಶಿನ್ ಚಮ್ಕಾತೇ ಆಸಾ.
ಸ: ತುಂ
ಏಕ್ ಕವಿ, ಪದಾಂ ಘಡ್ಪಿ. ಪೂಣ್ ಪತ್ರಿಕೋದ್ಯಮಾಂತ್ ತುಕಾ
ಚಡ್ ಆಸಕ್ತ್ ಕಶಿ ಉದೆಲಿ?
ಜಾ: ಸಾಹಿತಿಕ್
ದೆಣೆಂ ಮ್ಹಜ್ಯಾ ರಗ್ತಾಂತ್ಚ್ ಆಸಾ. ಆನಿ ಕೊಂಕ್ಣೆಂತ್ ಪತ್ರಿಕೋದ್ಯಮ್,
ಸಾಹಿತಿಕ್ ಭಂವಾರಾಂತ್ ಮಾತ್ರ್ ಚಡಿತಾಯೆನ್ ಕರುಂಕ್ ಜಾತಾ.
ಖಬ್ರಾಂಕ್ ಯಾ ಮನೋರಂಜನಾಕ್ ಹಾಂಗಾ ಚಡಿತ್ ಅವ್ಕಾಸ್
ನಾ.
ಮಾಧ್ಯಮಾಚಿ
ಬಳ್ವಂತ್ಕಾಯ್ ಹಾಂವ್ ಬರ್ಯಾನ್ ಜಾಣಾ. ತ್ಯಾ ಶಿವಾಯ್
ಪತ್ರಾಂತ್ ಕಾಮ್ ಕರ್ತಾನಾ ಹರ್ ದಿಸಾ ನವೆಂಸಾಂವಾಚಿ
ವಾಟ್ ಉಗ್ತಿ ಆಸ್ತಾ. ತರ್ನೆ ಪ್ರಾಯೆರ್ಚ್ ಹೆರ್ ದೋನ್ ಪತ್ರಾಂಚೊ
ಸಹ ಸಂಪಾದಕ್ ಜಾವ್ನ್ ವಾವುರ್ಚೊ ಆವ್ಕಾಸ್ ಮ್ಹಾಕಾ
ಲಾಬ್ಲ್ಲೊ. ಉಪ್ರಾಂತ್ ತ್ಯಾ ಶೆತಾಂತ್ ಆಪಾಪಿಂ ಚಡ್ ವೋಡ್
ದಿಸೊನ್ ಆಯ್ಲಿ. ಆಜ್ ಕವಿತಾ, ಪದಾಂ, ಸಂಗೀತ್, ಎಕೆ ವಾಟೆನ್
ಹವ್ಯಾಸ್ ಜಾವ್ನ್ ವಾಡೊನ್ ಯೆತಾನಾ ಅನ್ಯೇಕೆ ಕುಶಿನ್
ಪತ್ರಿಕೋದ್ಯಮ್ ಪೊಟಾಚಿ ಪೋಡ್ ಜಾವ್ಚ್ಯಾ ವಾಂಟ್ಯಾಕ್
ಹಾಂವೆಂ ಬಳ್ ಕೆಲಾಂ.
ಸ: ಪ್ರಸ್ತುತ್
ಕೊಂಕ್ಣಿ ಪತ್ರಾಂಕ್ ಲೊಕಾಥಾವ್ನ್ ಮೆಳ್ಚೊ ಪಾಟಿಂಬೊ- ಹ್ಯಾ
ವಿಶಿಂ ತುಜೆ ವಿಚಾರ್ ಕಸಲೆ?
ಜಾ: ಸಮಾದಾನ್ಯೀ
ಆಸಾ, ನಿರಾಶಾಯೀ ಆಸಾ. ಆಮ್ಚ್ಯಾ ಲೊಕಾಕ್ ವಾಚ್ಪಿ ಸವಯ್
ಬಿಲ್ಕುಲ್ ಉಣಿ ಜಾಲ್ಯಾ. ಇಂಗ್ಲಿಶಾಚಿ ಗಿರಾಂತ್ ಲಾಗ್ಲ್ಯಾ ಮ್ಹಣ್
ನ್ಹಂಯ್, ತಿಂ ಇಂಗ್ಲೀಷ್ಯಿ ವಾಚಿನಾಂತ್. ಫಕತ್ ಪಯ್ಶೆ,
ಜೆವ್ಣಾಂ, ಶಿಕಾಪ್, ಸೊರೊ, ಪಿಕ್ನಿಕಾಂ ಹಾಚೆ ಪಾಟ್ಲ್ಯಾನ್ಚ್
ಆಯ್ಚಿ ಪಿಳ್ಗಿ ಲೆಂಬೆವ್ನ್ ಆಸಾ. ತಶೆಂ ಜಾಲ್ಲ್ಯಾನ್ ಫುಡೆಂ
ಫಕತ್ ಕೊಂಕ್ಣಿ ಪತ್ರಿಕೋದ್ಯಮಾಕ್ ನ್ಹಂಯ್, ಜೆರಾಲ್
ಪತ್ರಿಕೋದ್ಯಮಾಕ್ಚ್ ಕಶ್ಟಾಂಚೆ ದೀಸ್ ಆಸ್ತೆಲೆ.
ಪತ್ರಾಂ
ಆಮ್ಕಾಂ ನಾಕಾತ್ ಮ್ಹಣ್ ನಾಕ್ ವೊಳಾವ್ನ್ ನೆಗಾರಿತೆಲ್ಯಾಂಚೊ
ಸಂಕೊ ಚಡೊನ್ ಆಸಾ ತರೀ, ಕೊಂಕ್ಣೆಕ್ ಆಜೂನ್ ವಿಶಾಲ್
ಚಿಂತ್ಪಾಚೆ ಬರೆ ವಾಚ್ಪಿ ಸಬಾರ್ ಆಸಾತ್ ಮ್ಹಳ್ಳಿ ದಾದೊಸ್ಕಾಯ್.
ಸ: ಕೊಂಕ್ಣಿ
ಪತ್ರಿಕೋದ್ಯಮಾಂತ್ ನವೆಸಾಂವ್ ಯೇಂವ್ಕ್ ಕಿತೆಂ ಗರ್ಜೆಚೆಂ?
ಜಾ: ಪ್ರಸ್ತುತ್
ಮಿತ್ರ್ ಏಕ್ ಸೊಡ್ಲ್ಯಾರ್ ಕೊಂಕ್ಣೆಂತ್ಲಿಂ ಚಡಾವತ್ ಸಗ್ಳಿಂ
ಪತ್ರಾಂಯಿ ರಂಗ್ರಂಗಾಳ್ ಆಸಾತ್. ಎಕೆ ವಾಟೆನ್ ಆಯ್ಚೊ ಸಂಸಾರ್
ರಂಗಾಂಚೊ ಜಾಲ್ಲ್ಯಾನ್ ಹೆಂ ಗರ್ಜೆಚೆಂ. ಪೂಣ್ ರಂಗ್ ಮಾತ್ರ್
ಸಾರಯ್ಲ್ಯಾರ್ ಪಾವಾನಾ, ತಾಂತ್ಲ್ಯಾ ಹರ್ ಸಬ್ಧಾಕ್
ರಂಗ್ ದಿಂವ್ಚೆಂ ಪ್ರೇತನ್ ಕರಿಜೆ.
ಪಾನ್
ಭರ್ಚೆಂ ಯಾ ಜಾಯ್ರಾತ್ ಭರ್ಚೆಂ ಕಾಮ್ ಸಗ್ಳಿಂ ಪತ್ರಾಂ
ಕರ್ತೇ ಅಸಾತ್. ಪೂಣ್ ಪ್ರಸ್ತುತಾಯ್ (Presentation)
ಭಿಲ್ಕುಲ್
ಪಾವಾನಾ. ಥೊಡ್ಯಾ ಪತ್ರಾಂಚ್ಯಾ ಲೇಖನಾಂಕ್, ಖಬ್ರಾಂಕ್ ಆನಿ
ಹೆರ್ ಸಾಹಿತಾಕ್ ತಾಳ್ ಮೂಳ್ ಆಸಾನಾ. ಪಾನಾಂಗಟ್ಲ್ಯಾನ್
ಲಾಂಬ್ ರೂಂದ್ ಖಬ್ರ್ರೊ ಪ್ರಕಟ್ತಾತ್, ತ್ಯೋಯ್
ಬೆಳ್ಶೆಲ್ಲ್ಯೊ. ಥೊಡ್ಯಾ ಪತ್ರಾಂನಿ Editing ಮ್ಹಳ್ಳೊ
ವಿಷಯ್ಚ್ ನಾ. ಜೊಕ್ತ್ಯಾ ಸಂದರ್ಬಾರ್ ಜೊಕ್ತಿಂ ಲೇಕನಾಂ
ವಿಂಚುನ್, ಗರ್ಜೆಚ್ಯಾ ತಸ್ವೀರ್ಯಾಂ ಯಾ ಕಲೆಂ ಸವೆಂ ಪ್ರಕಟ್ಚೆ
ಕಾಮ್ ಬೋವ್ ಥೊಡಿಂ ಪತ್ರಾಂ ಕರುನ್ ಆಸಾತ್. ಅಶೆಂ
ಉತಳ್ ರಿತಿನ್ ಪತ್ರಾಂ ಚಲಯ್ಲೆಲೆ ವರ್ವಿಂ ವಾಡಾವಳಿ ಪಾಸತ್
ದೀಸ್ ರಾತ್ ಮ್ಹಿನತ್ ಕಾಡ್ಚ್ಯಾ ಆಮ್ಚೆ ತಸ್ಲ್ಯಾಂಚೆರ್
ವಾಯ್ಟ್ ಪರಿಣಾಮ್ ಪಡ್ತಾ. ಕೊಂಕ್ಣಿ ಪತ್ರಾಂನಿ ಕಾಂಯ್
ನಾ ಮ್ಹಳ್ಳೊ ತಾತ್ಸಾರ್ ಆಮಿಯೀ ಆಯ್ಕಾಜೆ ಪಡ್ತಾ. ದೆಕುನ್
ಸಗ್ಳ್ಯಾ ಸಂಪಾದಕಾಂನಿ ಹೆಂ ಮತಿಂತ್ ಧರಿಜೆ.
ಸ: ಇಂಟರ್ನೆಟ್
ಮಾಧ್ಯಮ್ ಖರೆಂಚ್ ಕೊಂಕ್ಣಿಕ್ ಉಪ್ಕಾರಾಚೆಂ ಜಾಲಾಗಿಂ?
ಜಾ: ವ್ಹಯ್.
ಇಂಟರ್ನೆಟಾಚೊ ವಾಪಾರ್ ಆಜ್ ಪತ್ರಿಕಾ ಶೆತಾಚ್ಯಾ ಶಿರಾಂ ಶಿರಾಂನಿ
ಜಾತೇ ಆಸಾ. ಎಕೆ ರಿತಿನ್ ಸಾಂಗ್ಯೆತ್-ಇಂಟರ್ನೆಟಾವಿಣೆ
ಪತ್ರಿಕೋದ್ಯಮ್ ಚಲಂವ್ಚೆಂ ಅಸಾದ್ಯ್. ಮಾಹೆತ್, ಸಂಪರ್ಕ್,
ತಸ್ವೀರ್, ಸಂವಾದ್, ಖಬ್ರ್ರೊ, ಹೆಂ ಸಗ್ಳೆಂ ಅಂತರ್ಜಾಳಾ
ಮುಕಾಂತ್ರ್ ತುರ್ತಾನ್ ಆನಿ ಪ್ರಭಾವಿಕ್ಪಣಿ ಜಾತಾ. ಗಾಂವಾ
ಭಾಯ್ರ್ ಆಸ್ಲೆಲೆ ಲೇಕಕ್ ಸಯ್ತ್ ಆಜ್ ಆಪ್ಲಿಂ ಬರ್ಪಾಂ
ಇಮೇಯ್ಲ್ ಕರ್ತಾತ್. ತಶೆಂ ಮ್ಹಣ್ತಾನಾ ಅಂತರ್ಜಾಳ್
ಮಾದ್ಯಮ್ ಬಿಲ್ಕುಲ್ ಗರ್ಜೆಚೆಂ.
ಸ: ಸಬಾರಾಂಥಾವ್ನ್
ಮಿತ್ರ್ ಪತ್ರಾಚೆ ಮಂಡಳೆಂತ್ ಅನ್ಬೋಗಿ ನಾಂತ್ ದೆಕುನ್
ಪರ್ನ್ಯಾ ಸಾಹಿತಿಂಕ್ ತೆ ಗವ್ರವ್ ದೀಂವ್ಕ್ ಸಕನಾಂತ್
ಮ್ಹಳ್ಳೊ ಅಪವಾದ್ ಆಯ್ಕೊಂಕ್ ಮೆಳ್ತಾ. ಹ್ಯಾ ವಿಶಿಂ ತುಜೊ
ವಿಚಾರ್?
ಜಾ: ಬಿಲ್ಕುಲ್
ಫಟ್. ಖರ್ಯಾನ್ ಸಾಂಗ್ಚೆಂ ತರ್ ಸಾಹಿತಿ ಕೆದಾಳಾಚ್ ಪರ್ನೆ ಜಾಯ್ನಾಂತ್,
ಪ್ರಾಯೆನ್ ಮಾಲ್ಘಡೊ ಜಾವ್ಯೆತಾ. ಪುಣ್ ಪ್ರಾಯೆನ್
ಮಾಲ್ಘಡೊ ಜಾಲ್ಲೆ ಕೂಡ್ಲೆ ತೋ ಅನ್ಬೊಗಿ ಸಾಹಿತಿ ಜಾಯ್ಜೆ
ಮ್ಹಣ್ ಕಾಂಯ್ ನಾ. ಕೊಂಕ್ಣೆಚ್ಯಾ ಭಂವಾರಾಂತ್ ಮಾಲ್ಘಡೆ
ಸಾಹಿತಿ ಮ್ಹಣ್ ಮಾತ್ಯಾರ್ ಡಜನ್ ಕಿಲೊ ಜಡಾಯ್ ಘೆತ್ಲೆಲ್ಯಾ
ಥೊಡ್ಯಾಂ ಪ್ರಾಸ್ ನವ್ಯಾನ್ ಉದೆಲ್ಲೆ ಕಿತ್ಲೆಗೀ ತರ್ನೆ ಬರವ್ಪಿ
ಅನ್ಬೋಗಿ ಆಸಾತ್. ಥೊಡೆ ಪ್ರಾಯೆನ್ಯಿ, ಜಾಣ್ವಾಯೆನ್ಯಿ
ಅನ್ಬೋಗಿ ಆಸ್ಚೆ ಬರವ್ಪಿ ಆಸಾತ್. ತರೀ ತಾಂಣಿ ಹೆರಾಂಕ್ ಸಸಾರ್
ಕರ್ಚೆ ಪಳೆತಾನಾ ಚೀಡ್ ಯೆತಾ.
ಮ್ಹಜಿ
ತಶೆಂ ಮಿತ್ರ್ ಮಂಡಳೆಚಿ ಶೈಲಿ ಅಶಿ-ಆಮಿ ಕೊಣಾಕೀ ಮಿತಿ ವಯ್ರ್
ಸಲಾಮ್ ಘಾಲಿನಾಂವ್ ಯಾ ಕೊಣಾಯ್ಚ್ಯಾ ಮಾತ್ಯಾ
ವಯ್ರ್ ಉಲಯ್ನಾಂವ್. ಆಮಿ ಕೊಣಾಕೀ ಪಯ್ಸ್ ದವ್ರುಂಕ್
ನಾ ಯಾ ಕೊಣಾಯ್ಕಿ ದುಕಂವ್ಕ್ ನಾ. ಥೊಡೆ ಜಣ್ ಆಮ್ಕಾಂಚ್
ಪಯ್ಸ್ ದವರ್ಚೆಂ ಪ್ರೇತನ್ ಕರುನ್ ಆಸಾತ್. ಪ್ರಾಯೆನ್
ಆನಿ ಅನ್ಭೊಗಾನ್ ಆಮಿ ಲ್ಹಾನ್ ಆಸಾಂವ್ ಮ್ಹಳ್ಳೆ ಕೂಡ್ಲೆ ಮಾಲ್ಘಡ್ಯಾಂನಿ ಯಾ
ಜಾಣ್ತೆಂ ಮ್ಹಣ್ತೆಲ್ಯಾನಿ ಕಿತೇಂಯ್ ದಿಲ್ಯಾರ್ ತೆಂ ಛಾಪ್ಚೆಂ
ಹೆಡ್ಡ್ಪಣ್ ಹಾಂವ್ ಕರಿನಾ. ತಶೆಂ ಕರುಂಕ್ ಗೆಲ್ಯಾರ್ ಮಿತ್ರ್
ಬಿಲ್ಕುಲ್ ವಾಂಚೊನ್ ಉರಾನಾ. ಉರ್ಲ್ಯಾರಿ ತಾಚೆಂ ಮಟ್ಟ್ ಬಿಲ್ಕುಲ್
ದೆಂವ್ತೆಲೆಂ. ಸಕ್ಡ್ಯಾಂನಿ ಚಲಂವ್ಚೆ ಬರಿಂ ಆಮಿಯೀ ಪತ್ರ್
ಚಲಂವ್ಚೆಂ ತರ್, ತೆಂ ಚಲಯ್ನಾಸಾಂ ರಾಂವ್ಚೆಂ ಬರೆಂ ನ್ಹಂಯ್.
ಸ: ಕೊಂಕ್ಣಿ
ಭಾಶೆಕ್ ಲಾಗ್ಲೆಲ್ಯಾ ‘ಲಿಪಿಚೆ’
ವಾಳಯೆವಿಶಿಂ ತುಜಿ ಅಭಿಪ್ರಾಯ್?
ಜಾ: ‘ಮಿತ್ರ್’
ಕಾನಡಿ ಲಿಪಿಂತ್ ಪ್ರಸಾರ್ ಕರ್ತಾಂವ್ ಜಾಲ್ಲ್ಯಾನ್ ಆನಿ ತಾಕಾ
ಕರ್ನಾಟಕಾಚಿ ವಾಚ್ಪಿ ಚಡ್ ಆಸಾತ್ ಜಾಲ್ಲ್ಯಾನ್ ಹಾಂವೆಂ ಕಾನಡಿ
ಲಿಪಿಕ್ ಪಾಟಿಂಬೊ ದಿಂವ್ಚೆಂ ಸಹಜ್. ಹಾಂತುಂ ಕಾಂಯ್ ದಾಕ್ಷೆಣ್
ನಾ. ತರೀ ಕೊಂಕ್ಣಿ ಭಾಶೆಚೆ ವಾಡಾವಳೆಕ್ ಲಿಪಿ ಕಾಂಯ್ ಏಕ್
ವ್ಹಡ್ ಸಮಸ್ಸೊ ಜಾಯ್ತ್ ಮ್ಹಣ್ ಮ್ಹಾಕಾ ಭೊಗಾನಾ.
ಆಯ್ಲೆವಾರ್ಚೆಂ ಥೊಡೆಂ ರಾಜಕೀಯ್ ಪಳೆತಾನಾ ಥೊಡ್ಯಾಂಕ್
ಕೊಂಕ್ಣೆಚೆಂ ಕಾಂಯ್ ಪಡೊನ್ ಗೆಲ್ಲೆಂನಾ. ಬದ್ಲಾಕ್ ಆಪ್ಲೆಂ
ಕೋಮುವಾದಿ ಚಿಂತಾಪ್ ಬಳ್ ಕರ್ಚೆ ಖಾತಿರ್ ‘ಲಿಪಿ’
ಮುಖಾಂತ್ರ್ ದಾಳ್ ಶಿಜಯ್ತೆ ಆಸಾತ್. ಹಾಕಾ ಮ್ಹಜೊ ವಿರೋದ್
ಆಸಾ.
ಸ: ಸುರ್ವಾತ್
ಕೆಲ್ಲ್ಯಾ ಮೆಟಾ ಥಾವ್ನ್ ಆಜ್ ಪರ್ಯಾಂತ್ ಜೆಂ ಕಿತೆಂ ತುವೆಂ
ಕೊಂಕ್ಣಿಂತ್ ಜೊಡ್ಲಾಂಯ್, ತಾಂತುಂ ತುಂ ಸಂತುಶ್ಟ್ ಆಸಾಯ್?
ಜಾ: ಖಂಡಿತ್
ಹಾಂವ್ ಸಂತುಶ್ಟಿ. ಕೊಂಕ್ಣಿಂತ್ ಹಾಂವೆಂ ಸೆವಾ ಕೆಲ್ಯಾ ಮ್ಹಣ್ಚೆಂ
ಧಯ್ರ್ ಹಾಂವ್ ಘೆನಾ. ವಾವ್ರ್ ಕೆಲಾ ಮ್ಹಣ್ ಮಾಂದ್ತಾ.
ತ್ಯಾ ವಾವ್ರಾಕ್ ಮ್ಹಾಕಾ ನಾಂವಾ ರುಪಾರ್, ಆನಿ ಧನಾ ರುಪಾರ್
ಫಾವೊತೊ ಪ್ರತಿಫಳ್ ಲಾಭ್ಲಾ. ಜಲ್ಮಾನ್ ಹಾಂವ್ ನಿರಾಶಾವಾದಿ
ನ್ಹಯ್.
ಪತ್ರಾಂ
ಕಾಡ್ನ್ ಜಾಯ್ತೆ ಜಣ್ ಸಲ್ವಲ್ಯಾತ್ ಆಸ್ಯೆತ್. ತಾಕಾ ತಾಂಚಿಂಚ್
ಮ್ಹಳ್ಳಿಂ ಕಾರಣಾ ಆಸ್ತಾತ್. ತಾಂಚೆಂ ದಾಡ್ಡೆಪಣ್ಯೀ ಕಾರಣ್
ಆಸ್ಯೆತಾ ಯಾ ತಾಂಚಿಂ ಚೂಕ್ ಮೆಟಾಂಯೀ ಕಾರಣ್ ಆಸ್ಯೆತಾ.
ದೆಕುನ್ ಕೊಂಕ್ಣಿ ಪತ್ರಿಕೋದ್ಯಮಾಕ್ ದುರ್ಸೊನ್ ಕಾಂಯ್
ಫಾಯ್ದೊನಾ. ಮ್ಹಜೆ ಪ್ರಕಾರ್ ಕೊಂಕ್ಣಿ ಪತ್ರಿಕೋದ್ಯಮಾಕ್
ಹಾಂಗಾ ಮೆಳ್ಚೊ ಪಾಟಿಂಬೊ ಹೆರ್ ಸಬಾರ್ ಭಾಸಾಂನಿ
ಮೆಳಾನಾ.
ಸ: ಏಕ್
ತರ್ನಾಟೊ ಜಾವ್ನ್ ಕೊಂಕ್ಣಿ
ಪತ್ರಿಕೋದ್ಯಮಾಚೊ ಹಾರ್-ಭಾರ್ ತುವೆಂ ಖಾಂದಾರ್ ಘೆತ್ಲಾಯ್.
ತುಜಿ ಮಹತ್ವಾಕಾಂಕ್ಶ ಖಂಚಿ?
ಜಾ: ಹಿ
ವಿಂಚವ್ಣ್ ಹಾಂವೆಂ ಸ್ವಖುಶೆನ್ ಕೆಲ್ಲಿ. ಕೊಣೆಂಚ್ ಮ್ಹಾಕಾ
ಬಲಾತ್ಕಾರಾನ್ ವೋಡ್ನ್ ಹಾಡುಂಕ್ ನಾ. ಕೊಂಕ್ಣೆಂತ್ ಸೆವಾ
ಕರ್ತಾಂ’ ಮ್ಹಣ್
ಹಾಂವ್ ಪೊಕ್ಳೆ ಉಲಯ್ನಾ. ಕೊಂಕ್ಣೆಂತ್ ವಾವ್ರ್ ಕರ್ತಾಂ.
ದೆಕುನ್ ತಾಕಾ ಮಜೂರಿ ಮೆಳಾಜೆ. ಹಿ ವೃತ್ತಿ ಹೆರ್ ಖಂಚಿಚ್
ವೃತ್ತೆಂ ಪ್ರಾಸ್ ಚಡ್ ಗವ್ರವಾಚಿ ಆನಿ ತೃಪ್ತೆಚಿ. ಹಾಂತುನ್
ಹಾಂವೆಂ ದಿಸಾನ್ದೀಸ್ ಶಿಕೊಂಕ್ ಜಾತಾ. ಹರ್ ದಿಸಾ ಹಾಂಗಾ
ನವೆಸಾಂವ್ ಆಸಾ. ತಶೆಂ ಜಾಲ್ಯಾನ್ ಆಳ್ಸಾಯ್, ಬೋರಿಂಗ್
ತಸಲೆ ಸಂದರ್ಭ್ ಉದೆನಾಂತ್.
ನಾಂವ್
ಜೊಡಿಜೆ, ಮಾನ್ ಜೊಡಿಜೆ, ಪ್ರಶಸ್ತ್ಯೊ ಆಪ್ಣಾಯ್ಜೆ,
ಆಸ್ತ್ ಕಮಾಯ್ಜೆ ಆಸಲ್ಯೊ ಮಹತ್ವಾಕಾಂಕ್ಶಾ ಮ್ಹಾಕಾ
ನಾಂತ್. ಹ್ಯಾ ಸಂಸಾರಾಂತ್ ಹರ್ ದಿಸಾ ಜಿವಾಳಾಯೆನ್ ಭರ್ಲೆಲೆಂ
ಮಾನಸಿಕ್ ತೃಪ್ತೆನ್ ಸಜ್ಗೆಲೆಂ ಏಕ್ ಗವ್ರವಾಚೆಂ ಜಿಣಿಂ
ಮ್ಹಾಕಾ ಸಾರುಂಕ್ ಜಾಯ್. ತಸಲೆಂ ಜಿಣೆಂ ದಿಂವ್ಚಿ ತಾಂಕ್
ಕೊಂಕ್ಣಿಕ್ ಖಂಡಿತ್ ಆಸಾ. ಕೊಂಕ್ಣಿ ಪತ್ರಿಕೋದ್ಯಮ್ ಹೆರ್ ಭಾಸಾಂಚ್ಯಾ
ಪತ್ರಿಕೋದ್ಯಮಾಬರಿಂಚ್ ಉಂಚಾಯೆಚೆಂ ಜಾಯ್ಜೆ- ಹಿಚ್ ಮ್ಹಜಿ
ಆಶಾ.
ಸ: ಕೊಂಕ್ಣಿ
ಭಾಶೆಕ್ ನಿರ್ನಾಮ್ ಕರಿಜೆ ಮ್ಹಣ್ ಥೊಡೆ ಪಂಡಿತ್ ಬೊಬಾಟ್ತಾತ್.
ಹ್ಯಾವಿಶಿಂ ತುಜೆ ವಿಚಾರ್ ಕಸಲೆ?
ಜಾ: ಗಾಂವಾಂತ್
ತಶೆಂ ಮ್ಹಣ್ತೆಲ್ಯಾಂವಿಶಿಂ ಹಾಂವೆಂ ಆಯ್ಕೊಂಕ್ ನಾ. ಪೂಣ್
ಲಿಪಿಚೊ ವಾದ್ ಹಾಡ್ನ್ ಕೊಂಕ್ಣೆಕ್ ಆಸ್ಕತ್ ಕರುಂಕ್ ಪೆಚಾಡ್ತೆಲೆ
ಥೊಡೆ ಆಸಾತ್. ತಾಂಚೊ ಇರಾದೊ ಕೊಂಕ್ಣೆಕ್ ನಿರ್ನಾಮ್ ಕರ್ಚೊ
ನ್ಹಂಯ್, ಕೊಂಕ್ಣೆಥಾವ್ನ್ ಲಾಬ್ ಜೊಡ್ಚೊ. ತಸಲ್ಯಾ
ಮತ್ಲಬ್ಯಾಂಕ್ ಮ್ಹಜೊ ಧಿಕ್ಕಾರ್ ಆಸಾ. ನಾಸ್ ಕರಿಜೆ
ಮ್ಹಳ್ಳೆ ನಿಚೆವ್ ಕರ್ನ್ ಖಂಚೆಯ್ ಭಾಶೆಕ್ ನಿರ್ನಾಮ್
ಕರುಂಕ್ ಸಾಧ್ಯ್ ನಾ. ಪೂಣ್ ಕೊಂಕ್ಣೆಚೊ ಮೋಗ್ ಕರ್ತೆಲ್ಯಾಂಚಾ
ಆಳ್ಸಾಯೆವರ್ವಿಂ ಆಮ್ಕಾಂ ಕಳಿತ್ ನಾಸ್ತಾನಾಂಚ್ ಕೊಂಕ್ಣೆಚೆಂ
ಬಳ್ ಉಣೆಂ ಜಾತೇ ಆಸಾ. ತ್ಯಾ ವಿಶಿಂ ಆಮಿ ಪಯ್ಲೆಂ ಜಾಗ್ರತ್ ಜಾಯ್ಜೆ.
ಸ: ದಾಯ್ಜ್
ಪಂಗ್ಡಾಕ್/ವಾಚ್ಪ್ಯಾಂಕ್ ತುಜೊ ಸಂದೇಶ್ ಕಿತೆಂ?
ಜಾ: ನಾಂವ್
ಜೊಡ್ಚೆಖಾತಿರ್ ಯಾ ಶಾಭಾಸ್ಕಿ ಆಪ್ಣಾಂವ್ಚೆಂ ಖಾತಿರ್ ಆಜ್ ಸಬಾರ್
ಜಣ್ ಕೊಂಕ್ಣೆಚ್ಯಾ ವಾವ್ರಾಂತ್ ಖಂಚಿಚ್ ಆಪೇಕ್ಶಾನಾಸ್ತಾಂ ವಾವುರ್ನ್
ಆಸಾತ್. ಆಟೆವಿಟ್ಯಾಂ ಮದೆಂಯೀ ಕೊಂಕ್ಣಿಕ್ ಮಾನ್ಯತಾಯ್
ದಿಂವ್ಚೆಂ ಪರ್ಜಳಿಕ್ ಮಿಸಾಂವ್ ದಾಯ್ಜಾಚೆಂ. ದಾಯ್ಜ್ ಅಂತರ್ಜಾಳ್
ಭೋವ್ಶ್ಯಾ ಕೊಂಕ್ಣಿ ಗುಂಡಾಯೆನ್ ಆಟಾಪ್ಚಿ ಏಕ್ ಮಾತ್ರ್
ವೆಬ್ಸೈಟ್. ಸಮಾಜೆಚಿ ಭಿರ್ಮತ್, ಕೊಂಕ್ಣೆಚೊ ಹುಸ್ಕೊ
ಆನಿ ಕೊಂಕ್ಣಿ ಬರವ್ಪ್ಯಾಂ ಥಂಯ್ ಮಾನ್ ‘ದಾಯ್ಜಾಕ್’
ಭೋವ್ ಚಡ್ ಆಸಾ. ತುಮಿ ಆಪಡ್ಲೆಲೆಂ ಭಾಂಗಾರ್ ಜಾಂವ್
ಇತ್ಲೆಂಚ್ ಮ್ಹಜೆಂ ಮಾಗ್ಣೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
