ಜಾವ್ಯೆತಾ?

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಭಿಜುಡೆ ಮಾತ್ರ್ ಅಪ್ಣಾಕ್ ಆವ್ಕಾಸ್ ನಾಂತ್ ಮ್ಹಣ್ ರಡ್ತಾತ್ ತರ್ ಆಶಾವಾದಿ ತೆ ಆವ್ಕಾಸ್ ಖುದ್ದ್ ರಚ್ತಾತ್ ’

ಕೊಣೆಂಯ್ ಕಶೆಂ ಬರೆಂ ಜಾವ್ಯೆತಾ?

ವರಸ್ : 2005

ಅಂಕೊ : 13

ಮಯ್ನೊ : ಜುಲಾಯ್

ಸಂಪಾದಕೀಯ್ - 13.

ವಲ್ಲಿ ಕ್ವಾಡ್ರಸ್

ಹಾವೆಂ ವಾಚ್‌ಲ್ಲಿ ಏಕ್ ಲಿಸಾಂವಾಭರಿತ್ ಮಟ್ವಿ ಕಾಣಿಂ ಹ್ಯಾ ಪರಿಂ ಆಸಾ; ಏಕ್ ಪಾವ್ಟಿಂ ಎಕ್ಲೊ ಭಾಂಗಾರಾಚಾ ಆಶೆನ್ ಹಿಮಾಲಯಾಕ್ ವಚೊನ್ ತಪಸ್ಸ್ ಕರುಂಕ್ ಲಾಗ್ಲೊ ಖೈಂ. ಆನಿಂ ತಾಚಾ ತಪಸ್ಸ್ಯಾಂತ್ ಸಂತೊಸ್ ಪಾವ್‌ಲ್ಲ್ಯಾ ದೆವಾನ್ ತಾಕಾ ದರ್ಶನ್ ದೀವ್ನ್ ತಾಚಿ ಆಶಾ ಸಮ್ಜೊನ್ ಅಶೆಂ ಸಾಂಗ್ಲೆಂ ಖೈಂ;

"ಬರೆಂ, ತುಕಾ ಚಡ್ ಭಾಂಗಾರಾಚಿ ಆಶಾ ಆಸ್ಚಿ ಮ್ಹಜಾನ್ ಜ್ಯಾರಿ ಕರ್‍ಯೆತ್, ಪುಣ್ ತ್ಯಾ ಖಾತಿರ್ ತುವೆಂ ಇಲ್ಲಿ ಮಿನತ್ ಕರಿಜಾಯ್ ಪಡತ್"

"ಹಾಂವ್ ಕಸ್ಲೀಯ್ ತಿ ಮಿನತ್ ಕರುಂಕ್ ಕಬೂಲ್" ಅಶೆಂ ತಾಣೆಂ ಜಾಪ್ ದೀವ್ನ್ ಮ್ಹಳೆಂ.

"ಬರೆಂ.. ತುಂ ಪಾರಸ್‌ಮಣಿ ಮ್ಹಳ್ಳೊ ಏಕ್ ಫಾತೊರ್ ಸೊಧುನ್ ವಚ್ ಆನಿಂ ತೊ ಫಾತೊರ್ ತುಂ ಖೈಂಸರ್ ಲಾಗಯ್ತಾಯ್ ಪಳೆ, ತೆಂ ಭಾಂಗಾರ್ ಜಾವ್ನ್ ಬದಲ್ತೆಲೆಂ"

ಆಯ್ಕೊನ್ ತೊ ಆತಾಂ ಭೋವ್ ಸಂತೊಸಾನ್ ಉಟ್ಲೊ, ತಕ್ಶಣ್ ತೊ ಮೆಳ್‌ಲ್ಲ್ಯೊ ಸರ್ವ್ ಲೊಂಕ್ಡಾಚೊ ಚೆಯ್ನಿ, ಸಾಂಕ್ಳಿಂಕ್ ಆಪ್ಲ್ಯಾ ಗಳ್ಯಾಚೆರ್ ನೆಸೊನ್ ರಾನಾಕ್ ಧಾಂವ್ಲೊ ಆನಿಂ ಎಕೆಕಾಚ್ ಫಾತ್ರಾಕ್ ವಿಂಚುನ್ ಅಪ್ಣಾಚಾ ಗಳ್ಯಾರ್ ಆಸ್ಚಾ ಲೊಂಕ್ಡಾಚಾ ಸಾಂಕ್ಳೆಂಕ್ ಲಾಗವ್ನ್ ತೆ ಫಕತ್ ಫಾತೊರ್ ಮ್ಹಣ್ ಗೊಮ್ತಚ್ ತೆ ಕಾಡ್ನ್ ಉಡವ್ನ್ ಮುಖಾರ್ ಗೆಲೊ ಆನಿಂ ದುಸ್ರೊ ಫಾತೊರ್ ವಿಂಚುನ್ ಗೆಲೊ.

ಅಶೆಂಚ್ ಸಭಾರ್ ದೀಸ್-ರಾತ್ ತೊ ಪಿಸಾಂತುರ್ ಮ್ಹಳ್ಳೆಪರಿಂ ಮೆಳ್‌ಲ್ಲ್ಯಾ ಮೆಳ್‌ಲ್ಲ್ಯಾ ಫಾತೊರಾಂಕ್ ವಿಂಚುನ್ ಆಪ್ಲ್ಯಾ ಗಳ್ಯಾರ್ ಆಸ್ಚಾ ಸಾಂಕ್ಳೆಕ್ ಲಾಗವ್ನ್ ಉಡಂವ್ಚೆಂಚ್ ಕಾಮ್ ಕರ್ನ್ ತೊ ಭುಕ್/ತಾನ್/ವಿಶೆವ್ ವಿಸ್ರಲೊ.

ಸಭಾರ್ ದೀಸ್ ಪಾಶಾರ್ ಜಾಲೆ ಆನಿಂ ಸಗ್ಳೆಂ ರಾನ್ ತಾಣೆಂ ಸೊಧ್ಲೆಂ ಆನಿಂ ಸಭಾರ್ ದಿಸಾಂ ಉಪ್ರಾಂತ್ ತೊ ರಾನಾಂತ್ಲೊ ಭಾಯ್ರ್ ಚಲೊನ್ ವೆತಾನಾ ಮುಖಾರ್ ತಾಕಾ ಮೆಳ್‌ಲ್ಲೊ ಲೋಕ್ ಸಗ್ಳೊ ತಾಕಾಚ್ ಅಜ್ಯಾಪಾನ್ ಪಳೆಂವ್ಚಾರ್ ಪಡ್ಲೊ ದೆಕುನ್ ತೊಯ್ ಅಪ್ಣಾಕ್ ಪಳೆಲಾಗ್ಲೊ. ಆನಿಂ ತಾಕಾಯ್ ಅಜ್ಯಾಪ್ - ಗಳ್ಯಾರ್ ತಾಣೆಂ ನೆಸ್‌ಲ್ಲ್ಯೊ ಸಾಂಕ್ಳಿ-ಚೆಯ್ನಿ ಸೊಡ್, ಸಗ್ಳೆಂ ತಾಚೆಂ ಆಂಗ್‌ಚ್ ಭಾಂಗಾರಾಂತ್ ಪರ್ಜಳ್ತಾಲೆಂ. ಕೆದ್ನಾಂ ತಾಣೆಂ ತೊ ಪಾರಸ್‌ಮಣಿ ಫಾತೊರ್ ವಿಂಚ್‌ಲ್ಲೊ ಆನಿಂ ಕೆದ್ನಾಂ ಉಡಯಿಲ್ಲೊ ಖುದ್ದ್ ತೊಚ್ ನೆಣಾಸ್‌ಲ್ಲೊ ದೆಕುನ್ ತಾಚೆಲಾಗಿಂ ತೊ ಪಾರಸ್‌ಮಣಿ ಫಾತೊರ್ ಖಂಯ್ಚೊ ಮ್ಹಳ್ಳೆಂ ಸಮ್ಜೊಂಕ್ ಜಾಲೆಂನಾ...

ಹಿ ಏಕ್ ಲ್ಹಾನ್ ಕಾಣಿ ತರ್‌ಯೀ ಹಾಂತ್ಲೆಂ ಲಿಸಾಂವ್ ಪಳೆಯಾಂ; ಆಮ್ಚಾ ಜಿಣ್ಯೆಂತ್‌ಯೀ ಜಾಯ್ತ್ಯಾ ರಾಠಾವಳೆಮಧೆಂ ಆಮ್ಕಾಂ ಸಭಾರ್ ಬರಿಂ ಮನ್ಶಾಂ ಮೆಳ್ತಾತ್ ನ್ಹಯ್‌ಗೀ? ಆಮಿಂಯ್ ಅಶೆಂಚ್ ತಾಂಕಾ ಗಳ್ಸುನ್ ಕೊನ್ಶಾಕ್ ಉಡಯ್ತಾಂವ್.

ತರ್ ಆಮ್ಚಾ ಜಿಣ್ಯೆಂತ್ ಯೆಂವ್ಚಾ ಬರ್‍ಯಾ ಮನಾಚಾ ಮನ್ಶಾಂಕ್ ಆಮಿಂ ಕಶೆಂ ಪಾರ್ಕೆಯೆತಾ?

ಭೋವ್ ಸಂಪೆಂ - ಪಯ್ಲೆಂ ಆಮಿಂ ಬರಿಂ ಆಸಾಂವ್ ತರ್ - ಆಮ್ಕಾಂ ಬರೆಂಚ್ ಜಾತೆಲೆಂ ಶಿವಾಯ್ ವಾಯ್ಟ್ ನ್ಹಯ್. ವೊಪಾಚೆಂ ಭಾಂಗಾರ್ ಚಡ್ ಪರ್ಜಳ್ತಾ ತರ್‌ಯೀ ವೇಳಾಕಾಳಾ ಉಪ್ರಾಂತ್ ಸಂಸಾರ್ ತಾಚೊ ವೋಪ್ ಪಾರ್ಕುಂಕ್ ಸಕ್ತಾ. ವೆಲ್ಡಿಂಗ್ ಕರ್ತಾನಾ ಲಂಕ್ಡಾಕ್ ಲಂಕ್ಡಾನ್ ಮಾತ್ರ್ ಸಾಂಗಾತ್ ದಿವ್ಯೆತ್ ಶಿವಾಯ್ ಭಾಂಗಾರಾನ್ ನ್ಹಯ್. ಭಾಂಗಾರಾಕ್ ಭಾಂಗಾರಾನ್ ಮಾತ್ರ್ ಸಾಂಗಾತ್ ದಿವ್ಯೆತ್ ಶಿವಾಯ್ ಭಾಂಗಾರಾಕ್ ಆನಿಂ ಲಂಕ್ಡಾಕ್ ವೆಲ್ಡಿಂಗ್ ಕರುಂಕ್ ಕೊಣಾಯ್ಚಾನ್ ಜಾತಾವೆ ತರ್? ತಶೆಂಚ್ ಭಾಂಗಾರಾಕ್ ಕಾಂಯ್ ಪ್ಲಾಸ್ಟಿಕಾಂತ್ ವೆಲ್ಡಿಂಗ್ ಕರುಂಕ್ ಜಾತಾಯೆ ಭಾಂಗಾರಾಶಿವಾಯ್?

’ದಾಯ್ಜ್’ ಪಂಗ್ಡಾಕ್ ಹೆಂ ಕಶೆಂ ಲಾಗು ಜಾತಾ ಮ್ಹಳ್ಳ್ಯಾ ಸವಾಲಾಕ್‌ಯ್ ಮ್ಹಜಿ ಹಿಚ್ ಜಾಪ್; ಜರೀ ತರೀ ಆಮ್ಚಾ ಮಿಸಾಂವಾಂಕ್ ಕಾಂಯ್ ಅರ್ಥ್ ಆಸಾ, ನಿಸ್ವಾರ್ಥಿ ಸೆವೆಚೊ ಮನೋಭಾವ್ ಆಸಾ, ತರ್ ತೆಚ್ ವರ್ಗಾಚೆ ಬರೆ ಮನಿಸ್ ಆಮ್ಚಾ ಪಂಗ್ಡಾಂಕ್ ಯೆತೆಲೆ ಶಿವಾಯ್ ಕೊಣಾಯ್ಚಾಯ್ ದಾಕ್ಶೆಣೆಕ್ ಜಾಂವ್, ಮುಲಾಜೆಕ್ ಜಾಂವ್, ಕೊಣಾಕೀ ಖುಶಿ ಕರ್ಚಾ ಇರಾದ್ಯಾನ್ ಜಾಂವ್, ಕೊಣಾಯ್ಕ್‌ಯ್ ಚಿಡಾಂವ್ಚಾ ಇರಾದ್ಯಾನ್ ಕೊಣೆಂಯ್ ಕಿತೆಂಯ್ ಕರುಂಕ್ ಜಾಯ್ನಾ. ಜಾಯ್ತ್ ತರ್‌ಯ್ ತಾಕಾ ಚಡ್ ತೇಂಪ್ ಬಾಳ್ವಿ ನಾ.

ದಾಯ್ಜ್ ಪಂಗ್ಡಾಕ್ ಆಯ್ಲೆವಾರ್ ಆಯಿಲ್ಲ್ಯಾ ವಾವ್ರಾಡ್ಯಾಂಕ್ ’ದಾಯ್ಜ್’ ಬರೊ ಯೆವ್ಕಾರ್ ಮಾಗ್ತಾಸ್ತಾನಾ ಏಕ್ ಸಂಗತ್ ಉಚಾರ್ಚಿ ಭೋವ್ ಗರ್ಜೆಚಿ ಮ್ಹಣ್ ದಿಸ್ತಾ ಆನಿಂ ತಿ ಜಾವ್ನಾಸಾ; ’ಹೆರಾಂಚೆಂ ಬರೆಂಪಣ್ ಪಳೆಂವ್ಚಿ ಶ್ಯಾಥಿ ಜ್ಯಾ ವೆಕ್ತಿಕ್ ಆಸ್ತಾ ಜೊ ಖುದ್ದ್ ಬರೊ ಜಾವ್ನಾಸಾ ಆನಿಂ ಬರೆಂಪಣ್ ಮ್ಹಳ್ಯಾರ್ ಕಸಲೆಂ ಮ್ಹಳ್ಳೆಂ ಸಮ್ಜೊಂಕ್ ಸಕ್ತಾ’

- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

मुक्त उलवप वा सवायेचें (चीप) उलवप?

बिजी आसाय‌गी?

ಕಸ್ಟ್