ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 40. ಅಂಧ್ಕಾರ್
ಜಾನೆಟ್ ಡಿ’ಸೋಜ್: ಕಾಣ್ಯೆಗಾರ್ ಕಿತ್ಲ್ಯೊ ಅಪುರ್ಭಾಯೆಚ್ಯೊ ಕಾಣ್ಯೊ ಬರಂವ್ಕ್ ಸಕ್ತಾ ತರ್ಯ್, ಜೆದ್ನಾಂ ಅಪ್ಲಿ ಜಿಣಿಂಚ್ ಏಕ್ ಕಾಣಿ ಜಾಲ್ಲೆವೆಳಾರ್ ತೊ ಅಂಧ್ಕಾರಾಕ್ ಪೊಳ್ತಾ. ಪುಣ್ ಅಂಧ್ಕಾರಾಲಾಗಿಂ ಜೆದ್ನಾಂ ಝುಜೊನ್ ಮನಿಸ್ ಜಿಣ್ಯೆಕ್ ಪಾಟಿಂ ಯೆತಾ - ತೊ ಖರೊಚ್ಚ್ ಜಿಕ್ತಾ. ಬಾಯ್ ಜಾನೆಟ್ ಉರ್ಭನ್ ಡಿ’ಸೋಜ್, ಶಿರ್ವಾಂ ಏಕ್ ಬರಿ ಕಾಣ್ಯೆಗಾರ್ನ್ ಜಾಂವ್ಚಿ ಸರ್ವ್ ಖುಣಾಂ ತಿಚ್ಯಾ ಕಾಣ್ಯೆಂತ್ ಉಟೊನ್ ದಿಸ್ತಾತ್.
ಜಾನೆಟ್ ಡಿ’ಸೋಜಾ
ಪ್ರಸ್ತುರ್ ಜಿಣ್ಯೆಂತ್ ಘಡ್ಚಾ ಘಡಿತಾಂಚೊ ಆದಾರ್ ಘೆವ್ನ್ ಆಪ್ಲೆ ಕಲ್ಪನಾ
ನದ್ರೆಂತ್ ಕಾಣಿ ಲಿಕ್ಚಿ ಶ್ರೀಮತಿ ಜಾನೆಟ್ ಡಿಸೋಜಾ ಹೆಂ ಕಲ್ಪನ್
ಸಾದ್ಯಾ ವಾಚ್ಪ್ಯಾಂಕ್ ಸಾದ್ಯೆ ರಿತಿರ್ ವರ್ಣುನ್ ತಾಂಚಿಮ್
ಮನಾಂ ಜಿಕ್ಚ್ಯಾಂತ್ ಸುಫಳ್ ಜಾಲ್ಯಾ. ಆಪ್ಲ್ಯಾ ಕಾಣ್ಯಾಂನಿ ಆಪ್ಲ್ಯಾ-ಪೆಲ್ಯಾಂಚೊ
ಮಾಯಾಮೊಗಾಚೊ ಹುಸ್ಕೊ ಧರ್ ಧರ್ ಮ್ಹಣ್ ದಾಕಂವ್ಚಿ
ಶ್ಯಾತಿ ಹಿಚ್ಯಾ ಬರ್ಪಾಂಕ್ ಆಸಾ. ಸಾಹಿತಿಕ್ ಶೆತಾಂತ್ ಹೆಂ ತಿಚೆಂ ಪಯ್ಲೆಂ
ಮೇಟ್ ತರೀ ಆಪ್ಲ್ಯಾ ಲಿಕಿತಾಂತ್ ಸಾದ್ಯಾ ವಾಚ್ಪಾಂಚಿ ಮನಾಂ ಜಿಕ್ಚಿ ಬಳಿಷ್ಟ್
ಸಕತ್ ಹಿಚ್ಯಾ ಬರ್ಪಾಂಕ್ ಆಸಾ.
ಆಜ್ ದೊನ್ಪಾರಾಂ ಪೋಸ್ಟ್ಮೆನಾನ್ ಸುನಿಲಾಚೆಂ ಕಾಗದ್
ಹಾಡುನ್ ದಿಲ್ಲೆ ಘಡ್ಯೆ ಥಾವ್ನ್ ಮ್ಹಜೊ ಜೀವ್ ಕಾಂಪ್ತಾಲೊ. ಎಕಾ ಥರಾಚಿ
ಭಿರಾಂತ್ ಆನಿ ಬಾಂದ್ಪಾಸ್ ಮ್ಹಾಕಾ ಭೊಗ್ತಾಲೆ. ಸುನಿಲಾಚಿಂ ತಿಂ ಕಾಂಪೆರ್ಯಾ ಅಕ್ಶರಾಂನಿ ಬರಯಿಲ್ಲಿಂ ಉತ್ರಾಂ
ಮ್ಹಾಕಾ ವಾಚುಂಕ್ ಆನಿ ಪಾತ್ಯೆಂವ್ಕ್ ಕಶ್ಟ್ ಜಾಲ್ಲಿಂ. ಪರತ್ ಆನಿ
ಪರತ್ ಹಾಂವೆಂ ತೆಂ ಪತ್ರ್ ವಾಚ್ಲೆಂ. ಮ್ಹಜಾ ದೊಳ್ಯಾಂತ್ಲಿಂ ದುಕಾಂ, ಝರಿ
ಪರಿಂ ದೆಂವೊಂಕ್ ಲಾಗ್ಲಿಂ. ಹಾಯ್ ದೆವಾ ಕಸಲೊ ನ್ಯಾಯ್ ತುಜೊ ? ಕಿತ್ಯಾಕ್ ತುವೆಂ ಆಶೆಂ ಕೆಲೆಂಯ್ ? ಕಾಂಪ್ಚ್ಯಾ
ಹಾತಾಂನಿ ಹಾಂವೆಂ ಕಾಗಾದ್ ದೊಡುನ್ ಕವರಾ ಭಿತರ್ ದವರ್ಲೆಂ. ಗೆಲ್ಲ್ಯಾ ತ್ಯಾ
ವರ್ಸಾ ನತಾಲಾ ಫೆಸ್ತಾಕ್ ಸುನಿಲಾನ್ ಮ್ಹಾಕಾ ನತಲಾಚೊ
ಸಂದೇಶ್ ಬರವ್ನ್ ಕಾರ್ಡ್ ಘಾಲ್ಲೆಂ. ತ್ಯಾ ಉಪ್ರಾಂತ್ ಹ್ಯಾ
ಪಾವ್ಟಿಂ ಸುನಿಲಾನ್ ಮ್ಹಾಕಾ ದಿಲ್ಲಿ ಜವಾಬ್ದಾರಿ ನಿಮಾಣಿ ಆನಿ ಭಾರಿಚ್ ಕಶ್ಟಾಚಿ. ಹಿ ಜವಾಬ್ದಾರಿ
ಪೂರ್ಣ್ ಕರ್ಚಿ ಕಶಿ? ಆಶೆಂ ಕಶೆಂ ಘಡ್ಲೆಂ, ಸತ್ಗೀ? ಪರತ್ ಕಾಗದ್ ಉಗ್ತೆಂ ಕರುನ್
ವಾಚ್ಲೆಂ, ಮ್ಹಜೆಂ ದೂಕ್ ಉಮಾಳೊನ್ ಆಯ್ಲೆಂ, ಹಾಂವ್ ಗಳ್ಗಳ್ಯಾಂ ರಡ್ಲಿಂ.
*******
ಹಾಂವ್ ಹ್ಯೆ ಹಳ್ಳೇಕ್ ಪಂದ್ರಾ ವರ್ಸಾಂ ಫುಡೆಂ ಕಾಜಾರ್ ಜಾವ್ನ್ ಯೆತಾನಾ
ಸುನಿಲ್ ಚೊವ್ದಾ ವರ್ಸಾಂಚೊ ಭುರ್ಗೊ. ಆಟ್ವ್ಯಾ ವರ್ಗಾಂತ್ ಶಿಕ್ತಾಲೊ. ಆಮ್ಚ್ಯಾ
ಹ್ಯಾ ವಾಡ್ಯಾಂತ್ ಲಗ್ಬಗ್ ಬಾವೀಸ್ ಕ್ರಿಸ್ತಾಂವ್ ಕುಟ್ಮಾಂ ಜಿಯೆತಾಲಿಂ.
ಹರ್ ಎಕಾ ಘರಾ ಏಕ್ ವಾ ದೋಗ್ ಆನಿ ಚಡಿತ್ ಗಲ್ಫಾಂತ್ ಆಸ್ಲ್ಲೆ.
ವಾಡ್ಯಾಂತ್ಲೆಂ ದುರ್ಬೊಳೆಂ ಆನಿ ಕಶ್ಟಾಂಚೆಂ ಘರಾಣೆಂ ಆನಿ ಕಿತೆಂಚ್ ಉತ್ಪತ್ತಿ
ನಾತ್ಲ್ಲಿಂ ಮ್ಹಳ್ಯಾರ್ ಸುನಿಲಾ ಗೆಲಿಂ ಮಾತ್ ಮ್ಹಣ್ಯೆತ್.
ಪಂಚ್ವೀಸ್ ವರ್ಸಾಂ ಫುಡೆಂ ಆಮ್ಚ್ಯಾ ಸೆಜಾರ್ಚ್ಯಾ ಜೆಮ್ಮ
ಮೊತಿಚ್ಯಾ ಘರಾ ಆಳಾಚೆಂ ಕಾಮ್ ಕರುಂಕ್ ಮಾರ್ಸೆಲಾಮ್ ಯೇವ್ನ್ ರಾವ್ಲ್ಲೊ,.
ಮಾರ್ಸೆಲಾಮಾಚಿಂ ಆವಯ್-ಬಾಪಯ್ ತೊ ದಾಕ್ಟೊ ಆಸ್ತಾನಾ
ವೋಂಕ್-ಉದ್ಕಾಡೆಚ್ಯೆ ಪಿಡೆಂತ್ ಅಂತರ್ಲೆಲಿಂ ಜಲ್ಲ್ಯಾನ್, ತೊ ಅನಾಥ್ ಜಾಲ್ಲೊ. ಜೆಮ್ಮಮೊತಿನ್ ತಾಕಾ ಆಸ್ರ್ಯಾಚೆಂ ಚೆಡುಂ ಪಳೆವ್ನ್ ಕಾಜಾರ್ ಕರಯ್ಲೆಂ. ಆನಿ ಆಪ್ಲ್ಯಾ ಜಾಗ್ಯಾರ್
ಲ್ಹಾನ್ ದೋನ್ ಕುಡಾಚೆಂ ಧಾಕ್ಟೆಂ ಗುಡ್ಸುಲ್ ಬಾಂದುನ್
ದಿಲ್ಲೆಂ. ಮಾರ್ಸೆಲಾಮ್ ಜೆಮ್ಮಮೊತಿಚ್ಯಾ ತೊಟಾಂತ್, ಗಾದ್ಯಾಮೆರೆಂನಿ ಕಾಮ್ ಕರ್ತಾಲೊ. ತರ್ ಆಲಿಸ್ಬಾಯ್ ಘರಾಂತ್ಲೆಂ ಆನಿ ಗೊಟ್ಯಾಂತ್ಲೆಂ ಕಾಮ್ ಕರುನ್
ದೀಸ್ ಸಾರ್ತಾಲಿ. ತಾಂಕಾಂ ಜಲ್ಮಾಲ್ಲಿಂ ಮಾಲ್ಗಡೆಂ ಐಡಾ ದುಸ್ರೆಂ ಐವಿ ಆನಿ ತಿಸ್ರೊ
ಸುನಿಲ್.
ಆತಾಂ ಜೆಮ್ಮ ಮೊತಿ ಲಗ್ಬಗ್ ಸಾಟ್ ವರ್ಸಾಂಚೊ ಕಾರ್ಬಾರಿ, ದರ್ಬಾರಿ ಆನಿ
ವಡ್ಲೊ ಆಸ್ತಿವಂತ್ ಮನಿಸ್, ತಾಚಿ ಬಾಯ್ಲ್ ತಿಚ್ಯೆ ಪನ್ನಾಸ್
ವರ್ಸಾಂ ಪ್ರಾಯೆರ್ ಅಂತರ್ಲ್ಲಿ. ಆನಿ ತಾಚಿಂ ಪಾಂಚ್ ಭುರ್ಗಿಂ ಬರೆಂ ಶಿಕೊನ್ ಗಲ್ಫಾಂತ್ ಆನಿ
ಮುಂಬಯ್ ಮ್ಹಣ್ ಬರ್ಯಾ ಫುಡಾರಾಕ್ ಪಾವ್ಲ್ಲಿಂ. ಜೆಮ್ಮ
ಮೊತಿ ಎಕೆ ರಾತಿಂ ಆವ್ಚಿತ್ ಕಾಳ್ಜಾಘಾತಾಂತ್ ದೆವಾದೀನ್ ಜಾಲೊ. ತಾಚ್ಯಾ
ಮೊರ್ನಾ ವರ್ವಿಂ ಮಾರ್ಸೆಲಾಮಾಕ್ ಕಟೀಣ್ ನಶ್ಟ್ ಜಾಲ್ಲೊ. ನಿಜಾಯ್ಕೀ
ಸಾಂಗ್ಚೆ ತರ್ ಜೆಮ್ಮ ಮೊತಿಚ್ಯಾ ಮೊರ್ನಾ ವರ್ವಿಂ ಮಾರ್ಸೆಲಾಮ್ ಆನಿ ತಾಚೆ ಕುಟಮ್ ಅನಾಥ್ ಜಾಲ್ಲೆಂ.
ಜೆಮ್ಮ ಮೊತಿಚ್ಯಾ ವರ್ಸಾ ಮಿಸಾ ಉಪ್ರಾಂತ್ ಜೆಮ್ಮ ಮೊತಿಚಿ
ಸರ್ವ್ ಆಸ್ತ್ ಆನಿ ಘರ್ ವಿಕುನ್ ಮೆಳ್ಲ್ಲೆ ಪಯ್ಶೆ ವಾಂಟೆ ಕರ್ಚೆ
ಮ್ಹಣ್ ನಿರ್ದಾರ್ ಕೆಲೊ. ಆತಾಂ ಮಾರ್ಸೆಲಾಮ್ ಬಾವ್ಡೊ ಖಂತಿಶ್ಟ್ ಜಾಲೊ. ತಾಕಾ ಕಿತೆಂ ಕರ್ಚೆಂ ? ಖಂಯ್
ವೆಚೆಂ ? ಮ್ಹಣ್ ಸಮ್ಜಾನಾ ಜಾಲೆಂ. ವಾಡ್ಯಾಚ್ಯಾ ಥೊಡ್ಯಾಂನಿ ತಾಕಾ
ಸಲಹಾ ದಿಲಿ, ತಾಣೆ ರಾವೊನ್ ಆಸ್ಚೆಂ ತೆಂ ಲ್ಹಾನ್ ಗುಡ್ಸುಲ್ ತಾಚ್ಯಾ
ನಾಂವಾರ್ ಕರುಂಕ್ ಜೆಮ್ಮಮೊತಿಚ್ಯಾ ಭುರ್ಗ್ಯಾಂಕಡೆ
ವಿನತಿ ಕರ್ ಮ್ಹಣ್. ಜೆಮ್ಮಮೊತಿಚ್ಯಾ ಭುರ್ಗ್ಯಾಂಕ್
ಮಾರ್ಸೆಲಾಮಾಚಿ ಭಿರ್ಮತ್ ದಿಸ್ಲಿನಾ. ಮಾತ್ ನಂಯ್, ತಾಚಿ
ವಿನತಿ ತಾಂಕಾಂ ಕೊಡು ಲಾಗ್ಲಿ. ಆತಾಂ ಮಾರ್ಸೆಲಾಮ್ ದೆದೆಸ್ಪೊರ್ ಜಾಲೊ. ಗ್ರೇಸ್ತ್ಕಾಯೆಂತ್
ವಾಡ್ಲ್ಲ್ಯಾ ಜೆಮ್ಮಮೊತಿಚ್ಯಾ ಭುರ್ಗ್ಯಾಂಕ್ ಮಾರ್ಸೆಲಾಮಾಚಿ
ಪರಿಗತ್ ಸಮ್ಜಾನಾ ಜಾಲಿ. ರಾವೊಂಕ್ ಪಾಕೆಂ ಆಸ್ಲ್ಯಾರ್ ಆಪುಣ್ ಆನಿ
ಬಾಯ್ಲ್ ಲೊಕಾಚ್ಯಾ ಶೆತಾಂ ಭಾಟಾಂನಿ ಘೊಳೊನ್ ಪುಣಿ
ದೀಸ್ ಕಾಡ್ಯೆತ್ ಮ್ಹಳ್ಳೆಂ ಚಿಂತಾಪ್ ತಾಚೆಂ. ಮಾರ್ಸೆಲಾಮಾನ್
ವಿಶೆಂತ್ ಪಾವ್ಲಾಚ್ಯಾ ಮೆಳಾಚ್ಯಾ ಅಧ್ಯಕ್ಶಾಲಾಗಿಂ ವಿನತಿ ಕೆಲಿ. ತಾಣೆ
ಫಿರ್ಗಾಜ್ ಪಾದ್ರಿಚಿ ಸಲಹಾ ಘೆವ್ನ್, ತೀನ್ ಸೆಂಟ್ಸ್ ಜಾಗೊ
ಮಾರ್ಸೆಲಾಮಾಚ್ಯಾ ನಾಂವಾರ್ ಕರುಂಕ್ ಜೆಮ್ಮಮೊತಿಚ್ಯಾ
ಪುತಾಂಕಡೆ ಪರಾತ್ಲೆಂ. ನಿಮಾಣೆಂ ತೆ ರಾಜಿ ಜಾಲೆ.
ಜೆಮ್ಮಮೊತಿಚೊ ಸರ್ವ್ ಘರ್-ಜಾಗೊ, ಆಸ್ತ್ ಎಕಾ ಜಯ್ನಾಂಚ್ಯಾ ಕುಟ್ಮಾನ್
ಮೊಲಾಕ್ ಘೆತ್ಲೊ. ತಾಂಚ್ಯಾ ಶೆತಾಂತ್ ಆನಿ ಗೊಟ್ಯಾಂತ್ ಕಾಮ್ ಕರುಂಕ್ ತಾಣಿ
ಮಾರ್ಸೆಲಾಮಾಕ್ ಆನಿ ಆಲಿಸ್ಬಾಯೆಕ್ ಘೆಂವ್ಕ್ ನಾ. ಆತಾಂ
ಮಾರ್ಸೆಲಾಮ್ ಆನಿ ಆಲಿಸ್ಬಾಯ್ ವಾಡ್ಯಾಂತ್ಲ್ಯಾ ಹೆರ್ ಘರಾಂನಿ ಕಾಮ್ ಕರ್ತಾಲಿಂ. ರಾತಿಕ್ ಆಲಿಸ್ಬಾಯ್ ಚಿಮ್ಣೆಚ್ಯಾ ಉಜ್ವಾಡಾಕ್
ಬಸೊನ್ ಬಿಡಿಯೊ ಬಾಂದ್ತಾಲಿ. ಸುರ್ವಿಲೆ ಥೊಡೆ ದೀಸ್ ಕಶ್ಟಾಂನಿ
ಪಾಶಾರ್ ಜಾಲೆ. ಉಪ್ರಾಂತ್ ತಿಚ್ಯಾ ಘರ್ಚ್ಯಾ ಕಾಮಾಚೊ ವಾಂಟೊ ಐಡಾನ್ ಆನಿ ಐವಿನ್ ಕಾಣ್ಗೆಲೊ.
ಆಶೆಂ ದೋನ್ ವರ್ಸಾಂ ಪಾಶಾರ್ ಜಾಲಿಂ. ಏಕ್ ದೀಸ್ ಮಾರ್ಸೆಲಾಮ್
ಮಾಡಿಯೆರ್ ಚಡೊನ್ ಪೊಪ್ಳಾಂ ಕಾಡ್ತಾನಾ ಪಾಂಯ್ ಚುಕೊನ್
ಸಕ್ಲಾ ಪಡ್ಲೊ. ಆನಿ ತಾಚೆ ಪಾತಿಚ್ಯಾ ಕಣ್ಯಾಕ್ ಕಟೀಣ್ ಮಾರ್ ಜಾಲೊ.
ಮಣಿಪಾಲ್ ಆಸ್ಪತ್ರೆಂತ್ ಮಾರ್ಸೆಲಾಮ್ ಹಫ್ತೊಭರ್ ಉರ್ಲೊ ತರ್ಯೀ,
ವಾಂಚೊನ್ ಪಾಟಿಂ ಆಯ್ಲೊ ನಾ.
ವಿದವ್ ಆಲಿಸ್ಬಾಯ್ ಮಾರ್ಸೆಲಾಮಾಚ್ಯಾ ಮೊರ್ನಾ ಉಪ್ರಾಂತ್ ಆದಾರ್
ನಾ ಜಾಲೊ. ತಿಚ್ಯೆ ಜೊಡಿನ್ ಪೋಟ್ ಭರ್ಚೆಂಯೀ ಕಶ್ಟಾಚೆಂ ಜಾಲೆಂ. ಕೋಣ್ ಕಿತ್ಲೊ ತೇಂಪ್ ದಿತಿತ್? ತಿಣೆ ಐವಿಚೆಂ ಆನಿ ಐಡಾಚೆಮ್ ಇಸ್ಕೊಲ್
ಸೊಡಯ್ಲೆಂ, ತಿಂ ಘರಾ ಬಿಡಿಯೊ ಬಾಂದುಂಕ್ ಲಾಗ್ಲಿಂ. ಸುನಿಲ್
ಮಾತ್ ಇಸ್ಕೊಲಾಕ್ ವೆತಾಲೊ.
ಹ್ಯಾ ಘರಾಣ್ಯಾಚಿ ಹಿ ಸರ್ವ್ ಗಜಾಲ್ ಮ್ಹಾಕಾ ಮ್ಹಜ್ಯಾ ನವ್ರ್ಯಾನ್
ಸಾಂಗ್ಲ್ಲಿ. ಮ್ಹಜೊ ನವ್ರೊ ಗಲ್ಫಾಕ್ ಗೆಲ್ಯಾ ಉಪ್ರಾಂತ್,
ಹಾಂವ್ ಮಾಂಯ್-ಮಾಂವಾ ಸಾಂಗಾತಾ ಹಾಂಗಾಸರ್ ರಾವೊನ್ ಆಸ್ಲ್ಲಿಂ. ಆಮ್ಕಾಂ
ಲಾಗ್ಶಿಲೆಂ ಘರ್ ಮ್ಹಳ್ಯಾರ್ ಆಲಿಸ್ಬಾಯೆಚೆಂಚ್. ಮ್ಹಾಕಾ ಉಬ್ಗೊಣ್ ಜಾತಾನಾ
ಹಾಂವೆಂ ತಾಂಗೆರ್ ವಚೊನ್ ಬಸ್ಚೆಂ ಆಸ್ಲ್ಲೆಂ.
ಐವಿ, ಐಡಾ ಆನಿ ಸುನಿಲ್ ಮ್ಹಾಕಾ ಭಾರಿಚ್ ಮೊಗಾಚಿಂ ಜಾಲಿಂ. ದಿಸಾನ್ದೀಸ್ ಆಮಿ
ಲಾಗಿಂ ಜಾಲ್ಯಾಂವ್. ಆತಾಂ ದಿಸಾಕ್ ದೋನ್ ಪಾವ್ಟಿಂ ತಾಂಕಾಂ ಆಮ್ಗೆರ್ ಆನಿ
ಮ್ಹಾಕಾ ತಾಂಗೆರ್ ವಚನಾ ತರ್ ನೀದ್ ಪಡನಾತ್ಲಿ. ಆಮಿ
ಮಿಸಾಕ್, ಫೆಸ್ತಾಕ್ ಆನಿ ಕಾಜಾರಾಂಕ್, ಡ್ರಾಮಾಕ್ ಸಾಂಗಾತಾ
ವೆಚೆಂ ಆಸ್ಲ್ಲೆಂ. ಸುನಿಲ್ ತಾಚ್ಯಾ ಲಿಸಾಂವಾಂತ್ ಸಮ್ಜಾನಾ ಜಾಲ್ಯಾರ್
ಮ್ಹಜೆಲಾಗಿಂ ವಿಚಾರ್ತಾಲೊ. ಆನಿ ಇಸ್ಕೊಲಾ ಥಾವ್ನ್ ಯೆತಾನಾ
ಪೆಂಟೆ ಥಾವ್ನ್ ಕಿತೆಂಯೀ ಹಾಡ್ನ್ ದೀಂವ್ಕ್ ಸಾಂಗ್ಲ್ಯಾರ್ ನಾ
ಮ್ಹಣನಾತ್ಲ್ಲೊ.
ಆಯ್ಲೆವಾರ್ ಆಮ್ಚ್ಯಾ ವಾಡ್ಯಾಂತ್ ಮಸ್ತ್ ಬದ್ಲಾವಣ್ ಜಾವ್ನ್ ಆಯಿಲ್ಲಿಂ. ಗಲ್ಫಾಂತ್ಲ್ಯಾ
ಪಯ್ಶ್ಯಾಂನಿ ಲೋಕ್ ಗ್ರೇಸ್ತ್ ಜಾಲ್ಲೊ. ಆದ್ಲಿಂ ನಳ್ಯಾಂಚಿ ಘರಾ
ವಚೊನ್ ಟೆರೆಸಾಚೆ ಬಂಗ್ಲೆ ಉಬೆ ಜಾಲ್ಲೆ. ಗಾದ್ಯಾಂನಿ ಸಾಗ್ವೊಳಿ ಕರ್ಚಿ
ಬಂದ್ ಕೆಲ್ಲಿ. ಸಬಾರಾಂನಿ ಸಾಗೊಳೆಚ್ಯಾ ಗಾದ್ಯಾಂನಿ ಮಾಡ್ಮಾಡಿಯೊ ಕೆಂಳ್ಬೆ
ವಾಡಯಿಲ್ಲೆ. ಆಲಿಸ್ಬಾಯೆಕ್ ಪಯ್ಲೆಚೆಂ ಪರಿಂ ಕುಲಿಚೆಂ ಕಾಮ್
ಮೆಳಾನಾತ್ಲೆಂ. ಆನ್ಯೆಕ್ ವಾಟೆನ್ ಐಡಾ ಕಾಜಾರಾಕ್ ವಾಡೊನ್ ಯೆತಾಲೆಂ, ಆಲಿಸ್ಬಾಯ್ ಖಂತಿನ್ ಆನಿ
ಬೆಜಾರಾಯೆನ್ ದಿಸಾನ್ದೀಸ್ ಅಸ್ಕತ್ ಜಾವ್ನ್ ಯೆತಾಲಿ. ಐಡಾಕ್ ಶಿಕಪ್ ಉಣೆಂ ಆಸ್ಲ್ಲೆಂ, ಘರಾಂತ್ ದುಬ್ಳಿಕಾಯ್, ಭಾಂಗಾರ್ ಘಾಲ್ನ್ ಕಾಜಾರ್ ಕರ್ಚಿ
ಶ್ಯಾತಿ ಆಲಿಸ್ಬಾಯೆಕಡೆ ನಾತ್ಲ್ಲಿ.
ಆಮ್ಚಾ ವಾಡ್ಯಾಚ್ಯಾ ಲಿಗೊರಿ ಬಾಪ್ಪುನ್ ಐಡಾಕ್ ದುಸ್ರ್ಯಾಪಣಾಚಿ
ಸಯ್ರಿಕ್ ಹಾಡ್ಲ್ಲಿ. ನವ್ರೊ ಕುಂದಾಪುರ್ಚೊ, ವ್ಹಡ್ಲೊ ಸಾಗೊಳಿದಾರ್, ತಾಚಿ
ಪುಡ್ಲಿ ಬಾಯ್ಲ್ ವರ್ಸಾಂ ಫುಡೆಂ ಬಾಂಳ್ತೆರಾಂತ್ ಆಂತರ್ಲೆಲಿ., ದಾಕ್ಟುಲಿಂ ದೊಗಾಂ ಭುರ್ಗಿಂ ಆಸ್ಲ್ಲಿ. ಐಡಾ ಆವಯ್ಚೆ ಒತ್ತಾಯೆಕ್ ಅಸಹಾಯಕ್ಪಣಿ ವಿಧುರ್ ಅಲೆಕ್ಸಾಚಿ
ಪತಿಣ್ ಜಾಲೆಂ. ಸುನಿಲಾಚಿ ಧಾವಿ ಜಾಲ್ಲಿ ಮುಕಾರ್ ಶಿಕಂವ್ಚಿ ತಾಂಕ್ ಆಲಿಸ್ಬಾಯೆಕಡೆ
ನಾತ್ಲ್ಲಿ. ಸುನಿಲ್ ಪ್ರಾಯೆಪ್ರಾಸ್ ಚಡಿತ್ ಜವಾಬ್ದಾರೆವಂತ್ ಜಾಲ್ಲೊ.
ಸುನಿಲಾನ್ ಡ್ರಾಯ್ವಿಂಗ್ ಲಾಯ್ಸನ್ಸ್ ಕಾಡ್ಲ್ಲೆಂ. ಆನಿ ಸಕಾಳಿಂಥಾವ್ನ್
ಸಾಂಜೆ ಪರ್ಯಾಂತ್ ಹಾಂಚಿ, ತಾಂಚಿ ರಿಕ್ಶಾ ಚಲವ್ನ್ ಸಾಂಜೆರ್ ಇಲ್ಲೆಂ ಜೊಡುನ್
ಹಾಡ್ನ್ ದಿತಾಲೊ.
ವರ್ಸಾ ಉಪ್ರಾಂತ್ ಸುನಿಲಾನ್ ಪಾಸ್ಪೋರ್ಟ್ ಕೆಲ್ಲೊ. ಆನಿ ಆತಾಂ ಗಾಂವಾಕ್ ಆಯಿಲ್ಲ್ಯಾ
ಸಬಾರ್ ಗಲ್ಫಾಗಾರಾಂಕಡೆ ಆಪ್ಣಾಕ್ ವಿಜಾ ಧಾಡ್ಲ್ಯಾರ್ ಉಪ್ಕಾರ್ ಜಾತೊ
ಮ್ಹಣ್ ಆಡ್ದೊಸ್ ಮಾಗ್ತಾಲೊ. ಆಶೆಂಚ್ ತೀನ್ ಚಾರ್ ವರ್ಸಾಂ
ಪಾಶಾರ್ ಜಾಲಿಂ. ಸುನಿಲಾಕ್ ಕೊಣೆಂಯೀ ವಿಜಾ ದಾಡ್ಲಿನಾ. ತೊ ನಿರಾಶಿ ಜಾಲ್ಲೊ.
ಆಯ್ಲೆವಾರ್ ಆಲಿಸ್ಬಾಯೆಚಿ ಭಲಾಯ್ಕಿ ತಿತ್ಲಿ ಬರಿ ನಾತ್ಲ್ಲಿ. ತವಳ್ ತವಳ್ ತಿ ಪಿಡೆಂತ್
ಪಡ್ತಾಲಿ. ಐವಿಯೀ ವಾಡೊನ್ ಯೆತಾಲೆಂ. ಸುನಿಲಾಕ್ ಘರ್ಚಿ ಆರ್ತಿಕ್ ಸ್ಥಿತಿ ಖಂಚೆ ರಿತಿನ್
ಸುದ್ರಾಂವ್ಚಿ ಮ್ಹಣ್ ಸಮ್ಜಾನಾತ್ಲ್ಲಿ. ತೆವ್ಶಿನ್ ಕಾಜಾರ್ ಕರ್ನ್
ದಿಲ್ಲೆಂ ಐಡಾಯಿ ಸುಖಾನ್ ನಾತ್ಲ್ಲೆಂ. ತಾಚೊಯೀ ಘೊವ್
ಸೊರೊ ಪಿಯೆವ್ನ್ ಘರಾಂತ್ ದೆಸ್ವಾಟ್ ಕರ್ತಾಲೊ. ಹರ್ಯೇಕ್
ಪಾವ್ಟಿಂ ಕುಳಾರಾಥಾವ್ನ್ ಪಾಟಿಂ ವೆತಾನಾ ರಡೊನ್ ರಡೊನ್ ದುಖಾಂ ಗಳವ್ನ್
ವೆತಾಲೆಂ. ಸುನಿಲಾನ್ ನಿಮಾಣೆಂ ಬೆಂಕಾಚೆಂ ಲೋನ್ ಕಾಡುನ್
ಸ್ವಂತ್ ರಿಕ್ಶಾ ಘೆತ್ಲಿ. ನಿರಾಶೆಚ್ಯಾ ಮದೆಂಯೀ ತವಳ್ ತವಳ್ ಆಪ್ಣಾಕ್ ಕೊಣ್
ಪುಣೀ ವಿಜಾ ಧಾಡ್ತೆಲಿಂ ಮ್ಹಣ್ ತೊ ಆಶೆವ್ನ್ ಆಸ್ಲ್ಲೊ. ಏಕ್
ದೀಸ್ ಆಲಿಸ್ಬಾಯ್ ಚಡ್ಚ್ ಸಿಕ್ ಜಾಲಿ. ಆಸ್ಪತ್ರೆಂತ್ ದಾಕ್ತೆರಾನ್
ಪರೀಕ್ಷಾ ಕರ್ತಾನಾ ತಿಕಾ ಟ್ಯೂಮರ್ ಜಾಲಾ, ತುರ್ತಾನ್ ಒಪ್ರೇಶನ್ ಕರಿಜೆ ಮ್ಹಳೆಂ. "ಭೊರ್ಯಾ
ವಯ್ರ್ ಬೊರ್ಕುಟಿ" ಮ್ಹಳ್ಳೆಪರಿಂ ಸುನಿಲಾಕ್ ಧಾ-ಪಂದ್ರಾ
ಹಜಾರಾಚೆಂ ರೀಣ್ ಕಾಡುಂಕ್ ಪಡ್ಲೆಂ.
ಆಶೆಂಚ್ ಚಾರ್ ವರ್ಸಾಂ ಪಾಶಾರ್ ಜಾಲಿಂ. ಕಿತ್ಲೆಂ ಕೆಲ್ಯಾರೀ ಘರ್ಚಿ ಆರ್ತಿಕ್ ಸ್ಥಿತಿ
ಸುದ್ರಾನಾ ಜಾಲಿ. ಸುನಿಲ್ ಆತಾಂ ಎಕಾ ನಿರ್ದಾರಾಕ್ ಆಯಿಲ್ಲೊ.
ಮ್ಹಾಕಾ ಸುನಿಲಾಚಿಂ ಉತ್ರಾಂ ಆತಾಂಯೀ ಉಡಾಸಾಕ್ ಯೆತಾತ್: "
ಬಾಯೆ ಹಾಂವ್ ಏಕ್ ಚೆಡೊ ಜಾವ್ನ್ ಜಲ್ಮೊನೀ ಮ್ಹಜೆ ಆವಯ್ಕ್, ಭಯ್ಣಿಂಕ್
ಸುಖ್ ದೀಂವ್ಕ್ ಸಕಾನಾ ಮ್ಹಳ್ಳೆಪರಿಂ ಭಗ್ತಾ. ಹಾಂವ್ ರಿಕ್ಶಾ ವಿಕುನ್
ಬೆಂಕಾಚೆಂ ಲೋನ್ ಫಾರಿಕ್ ಕರುನ್ ಉರುಲ್ಲೆ ಪಯ್ಶೆ ಏಜೆಂಟಾಕ್
ದೀವ್ನ್ ಪುಣೀ, ವಿಜಾಕ್ ಪ್ರಯತ್ನ್ ಕರ್ತಾಂ. ಆನಿ ಕಿತ್ಲೆ
ದೀಸ್ ಅಶೆಂಚ್ಚ್ ಲೊಟ್ಚೆ ? ಐಡಾಯೀ ಕಶ್ಟಾಂತ್ ಆಸಾ, ಐವಿಕೀ ಕಾಜಾರ್ ಕರಿಜೆ. ಘರಾಚೆಂ
ಪಾಕೆಂಯೀ ಪರ್ನೆಂ ಜಾವ್ನ್ ಕುಟೊ ಜಡೊನ್ ಆಸಾ, ಚಿಂತಾನಾ ತಕ್ಲಿ ವಿರಾರ್ ಜಾತಾ.
ವೊರ್ಕಾಂತ್ಲ್ಯಾ ಶಿಲಾಬಾಪ್ಪುಚ್ಯಾ ಪುತಾಕ್ ಕಾಗದ್ ಬರಯ್ಲಾಂ,
ಮುಂಬಯ್ ಥೊಡೆ ದೀಸ್ ತಾಂಚ್ಯಾ ಘರಾ ರಾವೊನ್ ತಾಚ್ಯೆ ಒಳ್ಕಿಚೆ ಏಜೆಂಟ್ ಆಸ್ಲ್ಯಾರ್, ಇಲ್ಲೆ
ಪಯ್ಶೆ ಪುಣೀ ಉಣೆ ಕರಿತ್ ತರ್ ಪಳೆಂವ್ಚೆಂ?"
"ವ್ಹಯ್ ಸುನಿಲ್, ತುಂ ಮೇಟ್ ಕಾಡ್, ಉಪ್ರಾಂತ್ ದೇವ್ ಆಸಾ" ಮ್ಹಳೆಂ
ಹಾಂವೆಂ. ಸುನಿಲಾನ್ ರಿಕ್ಶಾ ವಿಕ್ಲಿ. ಮುಂಬಯ್ಚಿ ವಾಟ್ ಧರ್ಲಿ.
ಮಹಿನ್ಯಾ ಭಿತರ್ ಸುನಿಲ್ ಸಾವ್ದಿ ಪಾವ್ಲೊ.
ಆಲಿಸ್ಬಾಯೆಕ್ ಐಡಾಕ್, ಐವಿಕ್ ಆನಿ ತಶೆಂಚ್ ಮ್ಹಾಕಾ ಸುನಿಲ್
ಸಾವ್ದಿ ಪಾವ್ಲ್ಲಿ ಖಬರ್ ಭಾರಿಚ್ ದಾದೊಸ್ಕಾಯೆಚಿ ಜಾಂವ್ಕ್ ಪಾವ್ಲಿ.
ಸುನಿಲಾಚಿಂ ಚಡಾವತ್ ಹರ್ಯೆಕಾ ಮಯ್ನ್ಯಾ ಮಯ್ನ್ಯಾಕ್ ಚುಕಾನಾಸ್ತಾಂ
ಪಯ್ಶೆ ಧಾಡ್ತಾಲೊ. ಆಪುಣ್ ಬರೊ ಆಸಾಂ, ಆಪ್ಣಾವಿಶಿಂ ಕೆದ್ನಾಂಯೀ ಖಂತ್ ಕರಿನಾಕಾತ್
ಮ್ಹಣ್ ಬರಯ್ತಾಲೊ. ಸುನಿಲಾಚಿಂ ಕಾಗ್ದಾಂ ವಾಚುಂಕ್ ಆನಿ ಜಾಪ್ ಬರಂವ್ಕ್ ಆಲಿಸ್ಬಾಯ್
ಮ್ಹಜೆಲಾಗಿಂಚ್ ಹಾಡುನ್ ಯೆತಾಲಿ. ಹರ್ಯೆಕ್ ಕಾಗ್ದಾರ್
ಮ್ಹಾಕಾ ಆನಿ ಭುರ್ಗ್ಯಾಂಕ್ ವಿಸಾರ್ನ್ ತೊ ರೆಕಾದ್ ದಿತಾಲೊ.
ಎಕಾ ಕಾಗ್ದಾರ್ ತಾಣೆ ಬರಯ್ಲೆಂ. "ಹಾಂವ್ ಡ್ರಾಯ್ವಾರಾಚೆಂ ಕಾಮ್ ಕರುನ್ ಆಸಾ.
ಮ್ಹಜೊ ಧನಿ ಬರೊ ಮನಿಸ್. ಮ್ಹಾಕಾ ಪುತಾಪರಿಂ ಲೆಕ್ತಾ. ಜೆವ್ಣಾ ಖಾಣಾಂತ್
ಹರ್ಯೆಕ್ ಸಂಗ್ತಿಂನಿ ಧಾದೊಶಿ ಆಸಾ. ಮಯ್ನ್ಯಾಕ್ ಏಕ್ ಸುಟಿ ಆಸಾ.
ಪೊರ್ಚೆ ಸುಟಿಯೆರ್ ಆಂಜೆಲೊರ್ಚೊ ಏಕ್ ಈಶ್ಟ್ ಮೆಳ್ಳಾ. ತಾಣೆ ತಾಚೊ ಟೆಲಿಫೊನ್
ನಂಬರ್ ದಿಲಾ." ಅಶೆಂಚ್ ಲಗ್ಬಗ್ ವರಸ್ ಪಾಶಾರ್ ಜಾಲೆಂ.
ಹ್ಯಾ ಪಾವ್ಟಿಂ ಆಮ್ಚ್ಯಾ ಗಾಂವಾಂತ್ ಜೂನಾಚೆ ಬಾರಾ ತಾರಿಕೆ ಪರ್ಯಾಂತೀ
ಸಾರ್ಕೊ ಪಾವ್ಸ್ ನಾತ್ಲ್ಲೊ. ತ್ಯಾ ಉಪ್ರಾಂತ್ ಏಕ್ ಹಪ್ತೊಭರ್ ಕಟಿಣ್
ಪಾವ್ಸ್ ಆಯ್ಲೊ. ಹ್ಯಾಚ್ಚ್ ವೆಳಾರ್ ಆಲಿಸ್ಬಾಯ್ ಟೈಫಾಯ್ಡ್ ತಾಪಾಂತ್ ನಿದ್ಲಿ. ಟೈಫಾಯ್ಡ್ ತಾಪ್
ಮ್ಹಣ್ ಕಳ್ತಾನಾ ತಡವ್ ಜಾಲೊ ಆನಿ ಆಲಿಸ್ಬಾಯ್ ಚಡಿತ್ ಆಸ್ಕತ್ ಜಾಲಿ.
ದಿಸಾಚೊ ಚಡಾವತ್ ವೇಳ್ ತಿ ನಿದೊನ್ಂಚ್ಚ್ ಆಸ್ತಾಲಿ. ಪಾವಾನಾತ್ಲ್ಲ್ಯಾಕ್
ಪಾಟ್ಲ್ಯಾ ದೋನ್ ಮಯ್ನ್ಯಾಂಥಾವ್ನ್ ಸುನಿಲಾಚೆಂ ಕಾಗಾದ್
ನಾಸ್ತಾಂ, ತಿ ಆನಿಕೀ ಖಂತಿಶ್ಟ್ ಜಾಲ್ಲಿ. ಆಜ್ ಯೆತೆಲೆಂ, ಫಾಲ್ಯಾಂ ಯೆತೆಲೆಂ,
ಮ್ಹಣ್ತಾಂ ಮ್ಹಣ್ತಾಂ ದೀಸ್ ಪಾಶಾರ್ ಜಾಲೆ.
ಪರತ್ ಸುನಿಲಾಥಾವ್ನ್ ಮ್ಹಾಕಾ ಆಯಿಲ್ಲೆಂ ಹೆಂ ನಿಮಾಣೆಂ
ಪತ್ರ್ ವಾಚ್ಲೆಂ. ಮ್ಹಜ್ಯಾ ಭಿತರ್ ವೀಜ್ ಸಕತ್ ಚರ್ಲ್ಲೆ
ಪರಿಂ ಜಾತಾಲೆಂ. ಆಲಿಸ್ಬಾಯೆಚೆ ಹ್ಯೆ ಸ್ಥಿತೆಂತ್ ಸುನಿಲಾವಿಶಿಂ ಕಶೆಂ
ಸಾಂಗ್ಚೆಂ? ಮ್ಹಳ್ಳೆಂ ಮ್ಹಾಕಾ ಸಮ್ಜಾನಾ ಜಾಲೆಂ. ಸಾಂಗನಾಸ್ತಾಂ ರಾಂವ್ಚೆಂ
ಪರಿಂಯೀ ನಾತ್ಲ್ಲೆಂ.
ಆಸ್ಲ್ಲೆಂ ಸಗ್ಳೆಂ ಧಯ್ರ್ ಎಕ್ಟಾಂಯ್ ಕರ್ನ್ ಆಲಿಸ್ಬಾಯೆಚ್ಯಾ ಘರಾ ತೆವ್ಶಿನ್ ಚಮ್ಕಾಲಿಂ.
ಪಾಂಯ್ ಮುಕಾರ್ ವಚನಾಸ್ತಾಂ ಕಾಂಪ್ತಾಲೆ. ಕಾಲ್ಥಾವ್ನ್ ಕಠೀನ್
ಪಾವ್ಸ್ ಯೆತಾಲೊ. ಪರ್ತ್ಯಾನ್ ಮುಡ್ಲಾ ಮೊಳ್ಬಾರ್
ಪಾವ್ಸಾನ್ ಕಾಳೊಕ್ ಘಾಲ್ಲೊ.
ಭಾಯ್ಲ್ಯಾ ಕುಡಾಚ್ಯಾ ಕೊನ್ಶಾಂತ್, ಆಲಿಸ್ಬಾಯ್ ಮಾಂದ್ರೆರ್
ಪಾಂಯ್ ಸೊಡುನ್ ವೊಣ್ತಿಕ್ ವೊಣ್ಕೊನ್ ಬಸ್ಲ್ಲಿ.
ಹಾಂವ್ ಭಿತರ್ ಸರ್ತಚ್ "ಆಯ್ಲೆಂಯ್ಗೀ ಪುತಾ, ಆಜ್
ಪೆದೊ ಯೇಂವ್ಕ್ ನಾ ದಿಸ್ತಾ. ಸುನಿಲ್ ಕಾಂಯ್ ಬೊರೊ
ನಾ ದಿಸ್ತಾ, ಕಾಗಾದ್ ನಾಸ್ತಾಂ, ವೇಳ್ಚ್ ಪಾಶಾರ್ ಜಾಯ್ನಾ.
ಹ್ಯಾ ಪರಿಂ ಮ್ಹಾಕಾ ಕಾಗ್ದಾಕ್ ರಾಕೊಂಕ್ ಪಡ್ಲ್ಲೆಂ ನಾ. ಇಲ್ಲೊಸೊ ದೊಳೊ ಆಡ್ ಜಾಲೊ ತರ್ ಭಿರಾಂಕುಳ್
ಸಪ್ಣಾಂ ಪಡ್ತಾತ್. ಕಾಗ್ದಾಚಿ ವಾಟ್ ಪಳೆವ್ನ್ ಪಳೆವ್ನ್ ದೊಳೆ ವೊಳ್ಳೆ"
ಮ್ಹಣೊನ್ ದೊಳ್ಯಾಚ್ಯಾ ಕೊನ್ಶಾಂ ಉದೆಲ್ಲಿಂ ದುಕಾಂ ಪಾಲ್ವಾಚ್ಯಾ
ಪೊಂತಾನ್ ಪುಸ್ಲಿಂ ತಿಣೆ. ಆಲಿಸ್ಬಾಯೆಚೆ ಕಳ್ವಳೆ ಆನಿ ಚುರ್ಚುರೆ ಪಳೆವ್ನ್
ಮ್ಹಜ್ಯಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲೆಪರಿಂ ಜಾಲೊ.
ಹಳ್ತಾನ್ ಕುಶಿಚ್ಯಾ ಬಾಂಕಾರ್ ಬಸ್ಲಿಂ ಹಾಂವ್. ಮ್ಹಜೆ ಧಯ್ರ್ ಚುಕೊನ್ ಯೆತಾಲೆಂ.
ಕುಳಾರಾ ಆವಯ್ಕ್ ಪಳೆಂವ್ಕ್ ಮ್ಹಣ್ ಆಯಿಲ್ಲೆಂ ಐಡಾ ರಾವ್ಲ್ಲೆಂ. ಐವಿ ಅನಿ ಐಡಾ ದೊಗಾಂಯೀ ಆವಯ್ಪರಿಂಚ್ ಖಂತಿಶ್ಟ್
ದಿಸ್ತಾಲಿಂ. ಘರಾಂತ್ಲೆಂ ವಾತಾವರಣ್ ಸಂಪೂರ್ಣ್ ದುಕೆಸ್ತ್ ಆಸ್ಲ್ಲೆಂ, ಆಸಲ್ಯಾ ವೆಳಾರ್
ಹೊ ವಿಶಯ್ ಉಗ್ತೊ ಕರ್ಚೆಂ ಧಯ್ರ್ ಮ್ಹಾಕಾ ಆಯ್ಲೆಂ
ನಾ. ಭಾಯ್ರ್ ಪಾವ್ಸ್ ಎದೊಳ್ಂಂಚ್ ವೊತುಂಕ್ ಲಾಗ್ಲ್ಲೊ.
ಹಾಂವ್ ಗೆಲ್ಲೆಪರಿಂಚ್ ಪಾಟಿಂ ಆಯ್ಲಿಂ.
ತ್ಯೆ ರಾತಿಂ ಮ್ಹಾಕಾ ಜೇಂವ್ಕ್ ಜಾಲೆಂನಾ. ಮತಿಭಿತರ್ ಕಠಿಣ್
ಭಿರಾಂತ್ ದಿಸ್ತಾಲಿ. ದೊಳ್ಯಾಂ ಮುಕಾರ್ ಸುನಿಲಾಚೆಂ ರುಪ್ಣೆಂ ಎಕಾ ಉಪ್ರಾಂತ್ ಏಕ್
ದಿಸೊಂಕ್ ಲಾಗ್ಲೆಂ. ಸುನಿಲಾನ್ ಮ್ಹಾಕಾ ದಿಲ್ಲಿ ಜವಾಬ್ದಾರಿ
ಸಂಪೂರ್ಣ್ ಕರ್ಚಿ ವಾಟ್ ಸೊದುನ್ ರಾತ್ಭರ್ ನೀದ್ ನಾಸ್ತಾಂ ಉರ್ಲಿಂ.
ಸಕಾಳಿಂ ವೆಗ್ಗಿಂಚ್ ಚಾ ಪಿಯೆವ್ನ್ ತೆಂ ಕಾಗಾದ್ ಘೆವ್ನ್ ಶಿಲಾ ಬಾಪ್ಪುಚ್ಯಾ ಘರಾ ತೆವ್ಶಿನ್ ಚಮ್ಕಾಲಿಂ. ಶಿಲಾ ಬಾಪ್ಪು ಆಮ್ಚೆ ಸೆಜಾರಿ, ಮಧ್ಯಮ್ ಪ್ರಾಯೆಚೊ ಮಯ್ಪಾಸಿ ಮನಿಸ್. ಶಿಲಾ ಬಾಪ್ಪು ಸುನಿಲಾಚ್ಯಾ ಕಾಗ್ದಾಚಿ ಗಜಾಲ್ ಆಯ್ಕೊನ್ ಮಾತ್ಯಾಕ್ ಹಾತ್ ಮಾರಿಲಾಗ್ಲೊ. ಆಮಿ ದೊಗಾಂಯೀ ಆತಾಂ ಆಲಿಸ್ಬಾಯೆಗೆರ್ ಆಯ್ಲ್ಯಾಂವ್.
ಐವಿ ಕುಜ್ನಾಚ್ಯಾ ದಾರಾಕ್ ವೊಣ್ಕೊನ್ ಬಸೊನ್ ಮೊಗೆಂ ಕಾತರ್ತಾಲೆಂ. ಐಡಾ ಆಂಗ್ಣಾಂತ್ಲ್ಯಾ ಮಾಡಾಮುಳಾಂತ್ ಬೊಶಿಯೊ ಧುತಾಲೆಂ. ನಿದೊನ್ ಆಸ್ಲ್ಲಿ ಆಲಿಸ್ಬಾಯ್ ಆಮ್ಕಾಂ ಪಳೆವ್ನ್ ಉಟೊನ್ ವೊಣ್ತಿಕ್ ವೊಣ್ಕೊನ್ ಬಸ್ಲಿ. ಶಿಲಾ ಬಾಪ್ಪುನ್ ಆಲಿಸ್ಬಾಯಿಚಿ ಭಲಾಯ್ಕಿ ವಿಚಾರ್ಲಿ, "ಸಬಾರ್ ದಿಸಾಂಥಾವ್ನ್ ಯೇಜೆ ಮ್ಹಣ್ತಾನಾ ಜಾಲೆಂ ನಾ ಆಲಿಸ್ಬಾಯ್", ಕುಶಿಚ್ಯಾ ಬಾಂಕಾರ್ ಬಸೊನ್ ಶಿಲಾ ಬಾಪ್ಪುನ್ ಪ್ರಸ್ತಾಪ್ ಉಗ್ತೊ ಕರ್ಚೆಂ ಪ್ರೇತನ್ ಕೆಲೆಂ. "ಮ್ಹಜಿ ಭಲಾಯ್ಕಿ ಮಾತ್ತಿ ಪಡೊಂ. ಆಮ್ಕಾಂ ಸುನಿಲಾಚಿ ಖಬರ್ ನಾಸ್ತಾಂ, ರಾತ್ಭರ್ ನೀದ್ ಯೇನಾ, ಏಕ್ ಉಂಡಿ ಶಿತ್ ಪೊಟಾಕ್ ವಚನಾ, ಚೆಡೊ ಕಾಂಯ್ ಪಿಡೆಂತ್ ಪಡ್ಲಾ ಕೊಣ್ಣಾ." ತಿಚಿಂ ಉತ್ರಾಂ ಆಕೆರ್ ಜಾಂವ್ಚಾ ಪಯ್ಲೆಂಚ್ "ಆಲಿಸ್ಬಾಯೆ ತುಂವೆಂ ಧಯ್ರ್ ಕಾಣ್ಗೆಜೆ. ಆಮ್ಕಾಂ ಹ್ಯಾ ಸಂಸರಾಂತ್ ಕಶ್ಟ್ ಸೊಸುಂಕ್ ಆಸಾತ್ಚ್" ಶಿಲಾ ಬಾಪ್ಪು ಬಾಂಕಾ ಥಾವ್ನ್ ಉಟೊನ್ ಮಾಂದ್ರೆ ಕುಶಿನ್ ಬಸ್ಲೊ. ಐಡಾ ಆನಿ ಐವಿಯೀ ಕಾಮ್ ಸೊಡುನ್ ಆಮ್ಚೆಲಾಗಿಂ ಉಬಿಂ ಆಸ್ಲ್ಲಿಂ.
"ಕಾಗದ್ ವಾಚುನ್ ಸಾಂಗ್ ಪುತಾ," ಶಿಲಾ ಬಾಪ್ಪು ಪಾಟಿಂ ಪಳೆವ್ನ್ ಮ್ಹಾಕಾ ಸಾಂಗ್ತಾನಾ, "ಕೊಣಾಚೆಂ, ಕೊಣಾಚೆಂ ಆಮ್ಚ್ಯಾ ಸುನಿಲಾಚೆಂಗೀ, ಸಾಂಗ್ ಪುತಾ, ಸಾಂಗ್, ಕೆದಾಳಾ ಆಯ್ಲೆಂ." ಆಲಿಸ್ಬಾಯೆಚೆಂ ತೋಂಡ್ ಪ್ರಕಾಸಾನ್ ಭರ್ಲೆಂ. ದೊಡ್ಲ್ಲೆಂ ಕಾಗದ್ ಉಗ್ತೆಂ ಕರ್ತಾನಾ ಮ್ಹಜೆ ಹಾತ್ ಪಾಂಯ್ ಕಾಂಪೊಂಕ್ ಲಾಗ್ಲೆ. ವಾಚ್ಚ್ಯಾ ಪಯ್ಲೆಂ ತಾಳೊ ಭರೊನ್ ಆಯ್ಲೊ.
’ಮೊಗಾಚೆ ಬಾಯೆ,
ಸುನಿಲಾಚಿಂ ನಿಮಾಣಿಂ ಚಾರ್ ಉತ್ರಾಂ, ತುಕಾ ಹೆಂ ಕಾಗದ್ ಬರಯ್ತಾನಾ ಹಾಂವ್ ಯೆಮ್ಕೊಡಾಂತ್ ಆಸ್ತಲೊಂ, ಹ್ಯಾ ಸಂಸಾರಾಂತ್ ಆನಿ ಮ್ಹಜೆ ಮೆಜೂನ್ ಮ್ಹಳ್ಳೆಪರಿಂ ಥೊಡೆ ದೀಸ್ ಉರ್ಲ್ಯಾತ್.
ಮ್ಹಜಾ ಡ್ರಾಯ್ವರಾಚಾ ಕಾಮಾಂತ್ ಥಂಯ್, ಹಾಂಗಾ ಕವರಾಂ ಡೆಲಿವರಿ ಕರುಂಕ್ ಆಸ್ತಾಲಿಂ. ತ್ಯಾ ಕವರಾ ಮುಕಾಂತ್ರ್ ಡ್ರಗ್ಸ್ ಸಪ್ಲಾಯ್ ಜಾತಾ ಮ್ಹಣ್ ಹಾಂವ್ ನೆಣಾಂ ಆಸ್ಲ್ಲೊಂ. ಮ್ಹಾಕಾ ಕಳಿತ್ ಜಾತಾನಾ ಹಾಂವ್ ಪೊಲಿಸಾಂಚ್ಯಾ ಹಾತಾಂತ್, ಜಯ್ಲಾ ಭಿತರ್ ಪಡ್ಲ್ಲೊಂ. ಮ್ಹಜ್ಯಾ ಧನಿಯಾನ್ ಸಗ್ಳೊ ಅಪ್ರಾದ್ ಮ್ಹಜೆರ್ಚ್ ಘಾಲಾ ಆನಿ ತೊ ನಿರಾಪ್ರಾದಿ ಮ್ಹಣ್ ಎದೊಳ್ಚ್ ನಿರ್ದಾರ್ ಜಾಲಾ. ಆನಿ ಹ್ಯಾ ಗಾಂವಾಂತ್ ಹಾಂಗಾಸರ್ ಆಸಲ್ಯೆ ಕೆಝಿಂತ್ ಫಾಶಿ ದಿತಾತ್. ತುಕಾ ಹೆಂ ಕಾಗದ್ ಪಾವ್ತಾನಾ ಹಾಂವ್ ಹ್ಯಾ ಸಂಸಾರಾಂತ್ ಆಸ್ಚೊ ನಾ. ಹೆಂ ಕಾಗದ್ ಹಾಂವೆ ಭಾರಿಚ್ಚ್ ಕಶ್ಟಾಂನಿ, ಜಯ್ಲಾಕ್ ಜೆವಣ್ ದಿಂವ್ಚಾ ಭಾರತೀಯ್ ನಿವಾಸಿ ಮುಕಾಂತ್ರ್ ಪೋಸ್ಟ್ ಕರುಂಕ್ ದಿಲಾಂ. ಹ್ಯಾ ವೆಳಾ ತುಕಾ ಹೆಂ ಕಾಗದ್ ಪಾವ್ತೆಲೆಂ ಮ್ಹಳ್ಳೊ ಭರ್ವಸೊ ಮ್ಹಾಕಾ ನಾ.
ಬಾಯೆ ಹಾಂವ್ ನಿರಾಪ್ರಾದಿ ತೆಂ ದೇವ್ ಮಾತ್ ಜಾಣಾ, ಹ್ಯಾ ಸಂಸಾರಾಂತ್ ದುಬ್ಳೊ ಜಾವ್ನ್ ಜಲ್ಮೊಂಚ್ಯಾಕೀ, ಏಕ್ ಮೂಸ್ ಜಾವ್ನ್ ಜಲ್ಮೊಂಚೆಂ ಬರೆಂ ಹಾಂಗಾಸರ್ ದುಬ್ಳ್ಯಾಂಕ್ ಸುಟ್ಕಾ ಆನಿ ಬಚಾವಿ ನಾ.
ಮ್ಹಜ್ಯಾ ಹ್ಯಾ ಮೊರ್ನಾಚಿ ಖಬರ್ ಮ್ಹಜ್ಯಾ ಘರ್ಚ್ಯಾಂಕ್ ಕಳೊಂವ್ಚಿ ಏಕ್ ನಿಮಾಣಿ ಜವಾಬ್ದಾರಿ ತುಕಾ ದಿತಾಂ. ಮ್ಹಜ್ಯಾ ಮೊರ್ನಾಥಂಯ್ ಅನಾಥ್ ಜಾಲ್ಲ್ಯಾ ಮ್ಹಜ್ಯಾ ಆವಯ್ಕ್ ಆನಿ ಐವಿ, ಐಡಾಕ್ ತುಂ ಭುಜಯ್. ಹ್ಯಾ ಘರಾಂತ್ ಚೆಡೊ ಜಾವ್ನ್ ಜಲ್ಮೊನ್, ಮ್ಹಜೆಂ ಕರ್ತವ್ಯ್ ಕರುಂಕ್ ಸಕಾನಾತ್ಲ್ಲ್ಯಾ ಖಾತಿರ್ ಹಾಂವ್ ಭೊಗ್ಸಾಣೆಂ ಮಾಗ್ತಾ. ಜೆಜು ಕ್ರಿಸ್ತಾಚಾ ಉತ್ರಾಂ ಪರ್ಮಾಣೆ ಸರ್ಗಾರಾಜಾಂತ್ ಸಾಂಗಾತಾ ಮೆಳ್ಯಾಂ.
ತುಂಮ್ಚೆ ಥಂಯ್ ನಿರ್ಬಾಗಿ,
ಸುನಿಲ್"
ಮ್ಹಜೆಂ ಕಾಗದ್ ವಾಚುನ್ ಆಖೆರ್ ಜಾಂವ್ಚ್ಯಾ ಫುಡೆಂ ಆಲಿಸ್ಬಾಯ್ ಮತಿಹೀನ್ ಜಾಲ್ಲಿ. ಐವಿ ಆನಿ ಐಡಾ ತ್ಯೆಚ್ ವೊಣ್ತಿಕ್ ಮಾತೆಂ ಮಾರುನ್ ಬೊಬಾಟುಂಕ್ ಲಾಗ್ಲಿಂ. ಶಿಲಾ ಬಾಪ್ಪುನ್ ಆಲಿಸ್ಬಾಯೆಚ್ಯಾ ತೊಂಡಾಕ್ ಸರ್ಶಿನ್ ಆಸ್ಲ್ಲ್ಯಾ ಗೊಬ್ಳ್ಯಾಂತ್ಲೆಂ ಉದಕ್ ಮಾರ್ಲೆಂ. ಹ್ಯೆ ಬೊಬೆಕ್ ಸೆಜಾರ್ಚ್ಯಾ ಜೈನಾಂಚಿಂ ಧಾಂವೊನ್ ಆಯ್ಲಿಂ. ಹಾಂವೆ ಆಲ್ತಾರಿ ವಯ್ಲ್ಯೊ ವಾತಿ ಪೆಟಯ್ಲ್ಯೊ. ಶಿಲಾ ಬಾಪ್ಪುನ್ ಮಾಗ್ಣೆಂ ಸುರು ಕೆಲೆಂ. ಹಾಂವೆಂ ದಿಂಬಿ ಘಾಲಿ. ಹ್ಯಾ ದುಬ್ಳ್ಯಾ ಘರಾಂತ್ಲೊ ಏಕ್ಚ್ ದಿವೊ, ಸಾಸ್ಣಾಕ್ ಪಾಲ್ವಾಲ್ಲೊ. ಹ್ಯಾ ದಿವ್ಯಾಚ್ಯಾ ಉಜ್ವಾಡಾಂತ್ ಜಿಯೆವ್ನ್ ಆಸ್ಲ್ಲಿಂ ಅಂದ್ಕಾರಾಂತ್ ಬುಡೊನ್ ಗೆಲ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
