ಕವಿತಾकविताPoem
’ಜಾಗೆಕವಿ’
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ - 1
ಲಿಸಾಂವ್ - 1. ವಾಟ್
ಕವಿತಾ - ವಾಟ್
ಕವಿ: ಮೆಲ್ವಿನ್ ರೊಡ್ರಿಗಸ್, ಕುಲ್ಶೇಕರ್
ಬೂಕ್: ವಾಟ್
ಪ್ರಕಾಶಕ್: ಕವಿತಾ ಪ್ರಕಾಶನ್
ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ತಾರಿಕ್: 11 ಫೆಬ್ರೆರ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಹಿ ಮಾಟ್ ಪಡ್ಲ್ಲಿ ವಾಟ್
ಪಾಟ್ ಕರ್ನ್
ಸಾಟ್ ಸುಮಾನ್ ಸರ್ಲೆ
ನ್ಯಾಶನಲ್ ಹೈವೆಚೆರ್ ಧಾಂವ್ಡಾಂವ್ಚ್ಯಾ ಟ್ಯಾಂಕರಾಬರಿ
ಹಾವೆಂ ಹಿ ವಾಟ್ ಗುಡ್ಡಾಯಿಲ್ಲಿ ಫಿಕಿರ್ ನಾಸ್ತಾಂ
ತವಳ್ ತವಳ್ ಜೆಮೆವ್ನ್
ಕಂಯ್ ವರ್ನ್ ಪಾಯ್ತಾ ಚಿಂತಿನಾಸ್ತಾಂ
ಅನ್ಭೋಗಾಚ್ಯೆ ಅಸ್ಕತ್ಕಾಯೆಚಿಂ ಟಯರಾಂ ಫುಟೊನ್
ರಾಜ್ರಸ್ತ್ಯಾ ಬಗ್ಲೆಚ್ಯಾ ಝಿರಿಯೆಂನಿ
ಕಿತ್ಲೆ ಪಾವ್ಟಿಂ ಟ್ಯಾಂಕರ್ ಪರ್ತಲ್ಲೆಂ ನಾ?
ವಾಂಚೊನ್ ಉರ್ಲಾಂ ಹಾಂವ್
ಆಂಬ್ರಾವಯ್ಲ್ಯಾ ಕುಪಾಂ ಪೊಂದ್ಲ್ಯಾ
ಖಂಚ್ಯಾಕೀ ದಿಸಾನಾಸ್ಚ್ಯೆ
ದಯೆಚ್ಯೆ ಶಿರೆಕ್ ಲಾಗೊನ್
ಶಿರ್ಶಿರ್ತಾತ್ ಶಿರೆಂಚ್ಯೊ ಶಿರೊ
ಪರ್ನೆ ವಾಟೆಕ್ ನಿಯಾಳ್ತಾನಾ
ಆತಾಂ ಮ್ಹಜಿ ವಾಟ್ ಹಾಂವೆಂಚ್ ಕಾತರ್ಲ್ಯಾ
ಕಾಕುಳ್ತಿಕ್ ಬಗ್ಲೆಕ್ ಸಾರುನ್
ಬಗ್ಲೆಚ್ಯಾ ಕರಡಾಕ್ ಉಜೊ ದೀವ್ನ್
ಉಭಾರಾಯೊ ಖೊಂಡುನ್ ಖಂದ್ಕಾಂ ಪುರುನ್
ಮ್ಹಜಿ ವಾಟ್ ಹಾಂವೆಂಚ್ ರುತಾ ಕೆಲ್ಯಾ
ರೂಂದ್ ನ್ಹಯ್ ಆಸ್ಯೆತ್ ಹಾಯ್ವೆ ಬರಿ ಫಿಕಿರ್ ನಾ
ಮುಕ್ಲ್ಯಾನ್ ದಾಂಟಾತಾ ಪಾಟ್ಲ್ಯಾನ್ ಆಪ್ಟಾತಾ
ಮ್ಹಳ್ಳ್ಯಾಚಿ ಖಂತ್ ನಾ
ಹಾಂವ್ ಎಕ್ಲೊಚ್ ಹ್ಯೆ ವಾಟೆನ್
ಮ್ಹಜೆಂಚ್ ಮಿಸಾಂವ್ ಮ್ಹಜೆಂಚ್ ತೆಸಾಂವ್
ಸವ್ಕಾಸ್ ಗೆಲ್ಯಾರ್ಯೀ ಪರ್ವಾ ನಾ
ಬೊಯ್ಲ್ಯಾಚ್ಯೆ ಗಾಡಿಯೆ ಬರಿ
ಶೆವೊಟಾಚ್ಯಾ ಬಂದ್ರಾಕ್ ಕುಪಾಂ ಪೊಂದ್ಲ್ಯಾ ಚಂದ್ರಾಕ್
ಪಾಂವ್ಟಿಂ ಪಾವ್ತಾಂ, ಖಿಣಾನ್ ಪಾವ್ತಾಂ
ಮ್ಹಳ್ಳ್ಯಾ ಧಯ್ರಾನ್ ಶಿರ್ಶಿರ್ನಾಸ್ತಾಂ.
ಕವಿಚಿ ವ್ಹಳೊಕ್:
ಮೆಲ್ವಿನ್ ರೊಡ್ರಿಗಸ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಪಯ್ಲೆಂ ದೆ|ಚಾ.ಫ್ರಾ.ದೆ’ಕೊಸ್ತಾಚಾ ಸಾಂಗಾತಾನ್ ಸುರ್ವಾತ್ ಕೆಲ್ಲ್ಯಾ ’ಜಾಗೆಕವಿ’ ವರ್ವಿಂ, ಫಿರ್ಗಜೆ ಥಾವ್ನ್ ಫಿರ್ಗಜೆಕ್ ಭೆಟೊ ದೀವ್ನ್, ಕೊಂಕ್ಣೆಂತ್ ಸಭಾರ್ ಕವಿ ಉದೆಶೆಂ ಕರುಂಕ್ ಕಾರಾಣ್ ಜಾಲ್ಲೊ ಕವಿ. ಹಾಚಾ ಕವಿತಾಂನಿ, ಕೊಂಕ್ಣಿ ಭಾಸೆಚಿ ಸೊಭಾಯ್ ಪಾರ್ಕಿವ್ಯೆತ್. ದುಭಾಂಯ್ತ್ ತವಳ್ತವಳ್ ಕವಿತಾಚಿಂ ಕಾಮಾಸಾಳಾಂ ಚಲವ್ನ್ ವರ್ಚಾ ಮೆಲ್ವಿನಾಚೆಂ ಎದೊಳ್ ಪರ್ಯಾಂತ್ ’ಮೊಗಾಪೆಳೊ’, ’ಫಿಂತಾಂ’ ತಶೆಂಚ್ ’ವಾಟ್’ ಅಶೆಂ ತೀನ್ ಕವಿತಾಜಮೆ ಪರ್ಗಟ್ಲ್ಯಾತ್. ತಶೆಂಚ್ ಹೆರ್ ಕವಿಂಚಿಂ ಕವಿತಾ ಎಕ್ಟಾವ್ನ್ ಕುಪಾಂ ಪೊಂದ್ಲಿಂ ಮುಖಾಂ ಮ್ಹಳ್ಳೊ ಬೂಕ್ ತಾಣೆಂ ಆಂiರ್ ಪರ್ಗಟ್ಲಾ.
ಏಕ್ ಕವಿ ಮಾತ್ರ್ ನ್ಹಯ್ ಆಸ್ತಾಂ, ಏಕ್ ವಿಮರ್ಶಕ್, ವಿಚಾರ್ವಂತ್ ಬರವ್ಪಿ, ಕಾಣ್ಯೆಗಾರ್ ಆನಿಂ ಅಂಕಣ್ಕಾರ್ಯ್ ಜಾವ್ನಾಸಾ. ತಾಚಿಂ ಕವಿತಾಕ್ ಸಂಬಂಧ್ ಜಾಲ್ಲಿಂ ಅಂಕಣಾಂ ಕವಿತಾಕುಳಾರ್, ಆತಾಂ ಮಾಯ್ಭಾಸ್.ಕೊಮ್ ಹಾಚೆರ್ ಕವಿತಾಕುಡೆಂ ಪರ್ಗಟ್ ಜಾತೆಚ್ ಆಸಾ. ತಶೆಂಚ್ ಕವಿತಾ.ಕೊಮ್ ಸಾಯ್ಟಾಚೊ ಹೊ ಸಂಪಾದಕ್.
ಮೆಲ್ವಿನಾಕ್ ಮೊಗಾಪೆಳೊ ಕವಿತಾಜಮ್ಯಾಕ್, ಕೊಂಕ್ಣಿ ಭಾಷಾ ಮಂಡಳ್ - ಗೊಯಾಂ ಥಾವ್ನ್ ಪ್ರಶಸ್ಥಿ ತಶೆಂಚ್ ಸಭಾರ್ ಕವಿತಾ ಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.
(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್) ಬಸ್ಲ್ಲಿಂ: ವೀಣಾ ಮಿನೇಜಸ್, ರೀನಾ ಕ್ವಾಡ್ರಸ್, ಪ್ರಿಯಾ ಸಿಕ್ವೇರಾ, ಕ್ಯಾರಲ್ ಮಾರ್ಟಿಸ್.
ಉಭಿಂ ಆಸ್ಚಿಂ: ವಲ್ಲಿ ಕ್ವಾಡ್ರಸ್, ಆಂಟನಿ ಮಿನೇಜಸ್, ಮೆಲ್ವಿನ್ ವಾಸ್, ಫೆಡ್ರಿಕ್ ಕ್ವಾಡ್ರಸ್, ಹೆನ್ರಿ ಲುವಿಸ್, ಜೊನ್ ಕೊರೆಯಾ, ಜೆರಾಲ್ಡ್ ಡಿ’ಸೊಜ್, ಸಿರಿಲ್ ಪೆರಿಸ್, ಲ್ಯಾನ್ಸಿ ಪಿಂಟೊ ನಾಯಕ್ ಆನಿ ಡೇವಿಡ್ ಲುವಿಸ್ (ತಸ್ವೀರೆರ್ ನಾ).
ಕವಿತಾಚೆರ್ ಹೆರಾಂಚಿ ಪ್ರತಿಕ್ರಿಯಾ
ಜಿಣ್ಯೆಲಿಸಾಂವ್ ದಿಂವ್ಚಿ ಕವಿತಾ - ಡೇವಿಡ್ ಲುವಿಸ್, ತಲ್ಲೂರ್
ಆಪ್ಲ್ಯಾ ಜಿವಿತಾ ಥಂಯ್ ಜಾಲ್ಲ್ಯಾ ಬದ್ಲಾವಣೆ ವಿಶ್ಯಾಂತ್ ಕವಿತಾಧ್ವಾರಿಂ ವರ್ತಮಾನ್ ವಿವರ್ಸಿತಾನಾ ಭುತ್ಕಾಲಾಚೆಂ ವ ಆಧ್ಲ್ಯಾ ಜಿಣ್ಯೆಂತ್ ಜಾಲ್ಲ್ಯಾ ಘಡಿತಾಂ/ಅನ್ಭೋಗಾವಿಶಿಂ ಧಾಖವ್ನ್ ವರ್ತಮಾನ್ಕಾಲಾಚ್ಯಾ ಆಪ್ಲ್ಯಾ ಜೀವನ್ಶೈಲೆಚೆರ್ ಜಿಯೆಲ್ಯಾರ್ ಬರೆಂ ಭವಿಶ್ಯ್ ಮೆಳ್ತೆಲೆಂ ಮ್ಹಳ್ಳೆಂ ’ಆಶೆಚೆಂ’ ವಿವರ್ ಕವಿ ಮೆಲ್ವಿನ್ ರೊಡ್ರಿಗಸ್ ದಿತಾ. ಹಾಂವ್ ಹ್ಯಾ ಕವಿತೆಕ್ ’ಬದ್ಲಾವಣ್’ ಮ್ಹಣ್ ನಾಂವ್ ದಿತಾಂ.
ಆಧಿಂ ಭಗ್ಲ್ಲ್ಯಾ ಜಿಣ್ಯೆಕ್ ’ಮಾಟ್ ಪಡ್ಲ್ಲಿ ವಾಟ್’ ಮ್ಹಣ್ ವಿವರ್ಸಿತಾನಾ ವರ್ತ್ಮಾನ್ ಕಾಳಾಚ್ಯಾ ಅನ್ಭೋಗಾಂತ್ ಆಧ್ಲ್ಯಾ ಕಾಳಾಚ್ಯಾ ಸುಖಾಕ್ ಕವಿ ಕಾಂಠಾಳ್ತಾ ಆಸ್ತಲೊ ವಾ ಆಧ್ಲೆಂ ಸುಖ್ ’ಚೂಕ್ ವಾ ಪಾತಕ್’ ಮ್ಹಣ್ ಸಮ್ಜಾಲಾ ಆಸ್ತಲೊ.
’ನ್ಯಾಶನಲ್ ಹಾಯ್ವೆಚೆರ್ ಧಾಂವ್ಡಾಂವ್ಚ್ಯಾ ಟ್ಯಾಂಕರಾಬರಿ ಹಾಂವೆಂ ಹಿ ವಾಟ್ ಗುಡ್ಡಾಯಿಲ್ಲಿ" ಮ್ಹಣ್ತಾನಾ ಖಂಚಿಯ್ ಫಿಕಿರ್ ನಾಸ್ತಾಂ ಜಿವಿತಾಂತ್ ಮಜೆಚೆಂ, ಸುಖಾಚೆಂ, ಮಸ್ತೆಚೆಂ, ಆಮಾಲಾಚೆಂ ವ ಸುಲಭಾಯೆಚೆಂ ಜೀವನ್ ಜಿಯೆಲಾ ಮ್ಹಣ್ ಭಗ್ತಾ. ಕಿತ್ಯಾಕ್ ಅಸಲಿ ಜಿಣಿ ಜಿಯೆಂವ್ಕ್ ಅನ್ಭೋಗಾಚಿ ಗರ್ಜ್ ನಾ, ಶಿಸ್ತ್, ದೇವ್ಭಿರಾಂತ್, ದಾಕ್ಶೆಣ್ ವ ವೆಳಾಕಾಳಾಚಿ ಫಿಕಿರ್ ಕರ್ಚಿ ಗರ್ಜ್ ನಾ, ಥೊಡೊ ದುಡು ಥೊಡೆ ಇಸ್ಟಾಂಚಾ ಒತ್ತಾಯೆಕ್ ವ ದಾಕ್ಶೆಣೆಕ್ ಒಪ್ವೊನ್ ಹ್ಯಾ ಸುಖಾಕ್ ವೆಂಗ್ಲ್ಲೆಂ ಆಸ್ತೆಲೆಂ. ಆನಿಂ ಅಸಲೆಂ ಸುಖ್ ಭೊಗ್ತಾಸ್ತಾನಾ ಆಘಾತ್ ವ ಅನ್ವಾರಾಂ ಆಯ್ಲ್ಯಾಂತ್ ಆಸ್ತೆಲಿಂ. (ಟ್ಯಾಂಕರ್ ಪರ್ತಾಲ್ಲೆಂ) ಜಿವಿತ್ ಸಂಪೂರ್ಣ್ ನಾಸ್ ಜಾಂವ್ಚಾ ಪಯ್ಲೆಂ ಅನ್ವಾರ್ ನಿವ್ರಾಲ್ಯಾಂತ್ ಆಸ್ತೆಲಿಂ (ವಾಂಚೊನ್ ಉರ್ಲಾಂ). ಆನಿಂ ಹ್ಯಾ ಬದ್ಲಾವಣೆಕ್ ಮ್ಹಣ್ಜೆ ಚೂಕ್ ವಳ್ಕೊನ್ ಜಿಣಿಂ ಬದ್ಲುಂಕ್ ’ದೆವಾಚೆಂ ಬೆಸಾಂವ್’ ಆಸ್ತೆಲೆಂ (ಆಂಬ್ರಾವಯ್ಲ್ಯಾ ಖಂಚ್ಯಾಕೀ ದಿಸಾನಾತ್ಲೆ ದಯೆಚ್ಯೆ ಶಿರೆಕ್) ಮ್ಹಣ್ ಕವಿ ಪಾತ್ಯೆತಾ.
ಫುಡೆಂ ದಾಕ್ಶೆಣೆಕ್, ಇಸ್ಟಾಗಾತೆಕ್, ಫುಡ್ ಕರ್ನ್ (ಕಾಕುಳ್ತಿಕ್ ಬಗ್ಲೆಕ್ ಸಾರುನ್, ಬಗ್ಲೆಚ್ಯಾ ಕರಡಾಕ್ ಉಜೊ ದೀವ್ನ್) ಕಸ್ಟ್ ಸೊಸುನ್ (ಉಭಾರಾಯೊ ಖೊಂಡುನ್), ಸತಾ ನಿತಿನ್ ಚಲೊಂಕ್ ಆಶೆತಾ.. ಅಪ್ಲೆಂಚ್ ತತ್ವಾಂ, ಆನಿ ಕಾಯ್ದೆ-ನಿಯಮಾ ಕಾಣ್ಘೆವ್ನ್ (ವಾಟ್ ಹಾಂವೆಂಚ್ ರುತಾಂ ಕೆಲ್ಯಾ) ಕಸ್ಟ್ ಜಾತಾತ್ ತರ್ಯೀ (ರೂಂದ್ ನ್ಹಯ್ ಆಸ್ಯೆತ್ ಹಾಯ್ವೆಬರಿ). ’ಅಪುಣ್’ ವ ’ಹಾಂವ್’ ಜಾವ್ನ್ ಜಿಯೆಂವ್ಕ್ ಚಿಂತಾ ’ಆಸ್ಲ್ಲ್ಯಾಂತ್ಚ್’ ಸಂತುಷ್ಟ್ ಜಾಂವ್ಚೆಂ ಪ್ರೇತನ್ ಕರ್ತಾ (ಸವ್ಕಾಸ್ ಗೆಲ್ಯಾರ್ಯ್ ಪರ್ವಾನಾ) ಆನಿಂ ಶೆವೊಟಾಕ್ ಪಾವ್ತಲೊಂ ಮ್ಹಳ್ಳ್ಯಾ ಸಂತೊಸಾನ್ ಆಧ್ಲ್ಯಾ ಜಿಣ್ಯೆಕ್ "ಮಾಟ್ ಪಡ್ಲ್ಲಿ ವಾಟ್" ಮ್ಹಣೊನ್ ವೊಲಾಯ್ತಾ.
ಕವಿ ’ಹಾಂವ್’ ಆನಿಂ ’ಅಪುಣ್’ ಜಾವ್ನ್ ಜಿಯೆಜೆ ಆನಿಂ ’ಆಸ್ಲ್ಲ್ಯಾಂತ್ಚ್ ತೃಪ್ತಿ ಜೊಡಿಜೆ ಮ್ಹಣ್ ಆಪ್ಲ್ಯಾ ಕವಿತೆಂತ್ ಸಮಾಜೆಕ್ ವಿವರ್ಸಿತಾ.
ಜೆದ್ನಾಂ ಜಿಣ್ಯೆಚೊ ಅನ್ಭೋಗ್ ಕವಿತಾ ಜಾತಾನಾ - ಹೆನ್ರಿ ಲುವಿಸ್, ಸಾಸ್ತಾನ್
ಕವಿತೆಚಿ ಸೊಭಾಯ್ ಹಿಚ್ಗೀ ಜಿತ್ಲಿ ತಿ ಜಿಣ್ಯೆಚಾ ಅನ್ಭೊಗಾಕ್ ಗುಂತುನ್ ಯೆತಾಗೀ ತಿತ್ಲಿ ತಿ ವಾಚ್ಪ್ಯಾಕ್ ಪಸಂದೆಚಿ ಜಾತಾ. ಆನಿಂ ಹಾಕಾ ವಾಟ್ ಕವಿತಾಚ್ ರುಜ್ವಾತ್ ದಿತಾ.
ಕವಿತೆಂತ್ಲೊ ಕವಿ ಜಿಣ್ಯೆಂತ್ ಅಪ್ಣಾನ್ ಜೊಡ್ಲೆಲ್ಯಾ ಅನ್ಭೊಗಾಕ್ ಪಿಂತ್ರಾಯ್ತಾಸ್ತಾನಾ ಲಿಸಾಂವ್ ಶಿಕ್ತಾ ತಶೆಂಚ್ ತೆಂ ಲಿಸಾಂವ್ ವಾಚ್ಪ್ಯಾಂಸವೆಂ ವಾಂಟುನ್ ಘೆತಾ.
ವಾಟ್ ಕವಿತಾ ಮೆಲ್ವಿನ್ ರೊಡ್ರಿಗಸಾಚಾ ಚಡ್ತಾವ್ ಕವಿತೆಚಾಕೀ ವೆಗ್ಳಿಚ್ ಆಸಾ - ರುಪಾಂತ್ ತಶೆಂ ಚಿಂತ್ಪಾನ್.
ಕವಿತಾ ಪಾಂಚ್ ಕಣಾಂಚೆಂ ಕೋಂತ್ ಜಾತಾನಾ - ಜೊಮೆಲ್, ಬೊಂದೆಲ್
1) ಜಿವಿತ್ ಜಾವ್ನಾಸಾ ದೆವಾನ್ ದಿಲ್ಲೆಂ ಫುಂಕ್ಯಾಚೆ ದೆಣೆಂ. ಪುಣ್ ಸರ್ವಾಂಕ್ ಹೆಂ ರಾಜಾಂವ್ ಸಮ್ಜೊನ್ ಘೆಂವ್ಕ್ ಕಷ್ಟ್ ಮಾರ್ತಾತ್. ಹರ್ಯೆಕ್ಲ್ಯಾಂಕ್ ತಾಂಚೆಂ ಜೀವನ್ ಏಕ್ ಖುರಿಸ್, ವೊಜೆಂ ಯಾ ಕಷ್ಟ್ ಮ್ಹಳ್ಳೆಬರಿ ಭೊಗ್ತಾ. ಹ್ಯಾ ಕವನಾಂತ್ ಕವಿ ತಾಚೆಂ ಜಿವಿತ್ ಏಕಾ ವಾಟೆಕ್ ಸರಿ ಕರ್ತಾ. ಆನಿಂ ತೀಯ್ ವಾಟ್ ಮಾಟ್ ಪಡ್ಲ್ಲಿ ವಾಟ್ ಮ್ಹಣ್ ಸಾಂಗ್ತಾ. ಮಣ್ಜೆ ಹಾಂಗಾಸರ್ ಮಾಟ್ ಮ್ಹಳ್ಯಾರ್ ಜಿವಿತಾಂತ್ಲೆ ಕಷ್ಟ್, ಖುರಿಸ್ ಇತ್ಯಾದಿ. ಆನಿಂ ಅಸಲೆಂ ಜಿವಿತ್ ಸಭಾರ್ ಜಣ್ ಹ್ಯಾ ಸಂಸಾರಾಂತ್ ಯೇವ್ನ್ ಜಿಯೆವ್ನ್ ಗೆಲ್ಯಾತ್.
2) ಹಾಂವ್ ಹೆಂ ಜೀವನ್ ಯಾ ‘ವಾಟ್’ ಕಶೆಂ ಜಿಯೆತಾಂ? ಕವಿನ್ ಸಾಂಗ್ಚೆ ತರ್ ‘ನ್ಯಾಶನಲ್ ಹೈವೇಚೆರ್ ಧಾಂವ್ಡಾಂವ್ಚ್ಯಾ ಟ್ಯಾಂಕರಾಬರಿ’ಗೀ? ನ್ಯಾಶನಲ್ ಹೈವೆ ರೂಂದ್ ಮಾರೊಗ್, ಮ್ಹಣ್ಜೆ ಸುಲಾಬಯೆಚಿ ವಾಟ್, ಜಿವಿತ್. ಕಾಂಯ್ ವಿಶೇಷ್ ಕಷ್ಟ್ ನಾಸ್ತಾನಾ ಜಿಯೆಂವ್ಚೆ. ‘ಟ್ಯಾಂಕರ್’ ಮ್ಹಳ್ಯಾರ್ ಆಧುನೀಕರಣಚೊ ನವ್ಯೊ ಸೌಲತ್ಯೊ. ಸಭಾರ್ ಜಣ್ ಜಿಣಿ ಜಿಯೆತಾತ್ ಪುಣ್ ತ್ಯಾ ಜೀವನಾಂತ್ ಕಾಂಯ್ ಸಾರ್ ನಾ, ಕಿತೆಂಚ್ ಉದ್ದೇಶ್ ಆಸಾನಾ. ಆಧುನೀಕ್ ಜಿವಿತಾಚೊ (Modern Life) ಕಿತೆಂಚ್ ಅನ್ಬೊಗ್ ನಾಸ್ತಾನಾ, ಹೆರ್ ಜಿಯೆತಾತ್ ದೆಕುನ್ ಹಾಂವ್ಯ್ ತಶೆಂ ಜಿಯೆತಾ, ಯಾ ತಸ್ಲ್ಯಾ ಸಂಗ್ತ್ಯಾಂಕ್ ಲಬ್ದೊನ್ ಆಮ್ಚೆಂ ಜಿವಿತ್ ಕಂಯ್ ತರೀ ರಾವ್ಲಾಂಗೀ?
3) ಮುಕಾರ್ಸುನ್ ಕವಿ ಅಂತಸ್ಕರ್ನ್ ಯಾ ತಾಚೆಂ ಕೊಶೆಡ್ದ್ (ಆಂಬ್ರಾವಯ್ಲ್ಯಾ ಕುಪಾಂ ಪೊಂದಾ) ತೀಳ್ನ್ ಪಳೆತಾ. ಜಿವಿತಾಂತ್ ಆಸ್ಚೆ ಗುಪಿತ್ ಘುಟ್, ಕೊಣಾಕೀ ದಿಸಾನಾತ್ಲ್ಲೆಂ ರಾಜ್, ಆನಿಂ ಮಿಸ್ತೆರ್ ನಿಯಾಳ್ತಾನಾ ಶಿರೆಂಚ್ಯೊ ಶಿರೊ ಶಿರ್ಶಿರ್ತಾತ್. ಆಮಿ ಆಮ್ಚಿಚ್ ಝಡ್ತಿ ಕರ್ಚಿ ಯಾ ಆಮ್ಚಾ ಪಾಟ್ಲ್ಯಾ ಜಿವಿತಾಕ್ ಘುವೊನ್ ಪಾಟಿಂ ಏಕ್ ನದರ್ ಘಾಲ್ಚಿ ಬೋವ್ ಗರ್ಜೆಚೆ. ನಿಜಾಯ್ಕಿ ಹೆಂ ಬೋವ್ ಕಷ್ಟಾಂಚೆ ಕಾಮ್ ಜಾವ್ನಾಸಾ, ಜಾಲ್ಯಾರೀ, ತೆದ್ನಾಂ ಮಾತ್ರ್ ಆಪುಣ್ ಕಂಯ್ ಆಸಾಂ, ಕಿತ್ತುನ್ ಪಾವ್ಲಾಂ ಮ್ಹಳ್ಳೆಂ ಕಳ್ತಾ.
4) ಕವಿ ಆಪ್ಣಾಕ್ಚ್ ತೀಳ್ನ್ ಪಳೆಲ್ಲ್ಯಾ ಉಪ್ರಾಂತ್ ತೊ ಎಕಾ ನಿರ್ಧಾರಾಕ್ ಯೇವ್ನ್ ಪಾವ್ತಾ. ಕೊಣಾಯ್ಚಾಯ್ ದಯೆಕ್ ಯಾ ಕಾಕುಳ್ತಿಕ್ (Influence) ರಾಕೊನ್ ರಾವನಾ. ಜಿವಿತಾಚಾ ವಾಟೆರ್ ಆಡ್ ಪಾಂಯ್ ದಿಂವ್ಚೆತಸಲ್ಯಾ ವಾಯ್ಟ್ ಸವಯಾಂಕ್ ಹುಮ್ಟುನ್ ಉಡಂವ್ಕ್ ಪ್ರಯತ್ನ್ ಕರ್ತಾ (ಕರಡಾಕ್ ಉಜೊ ದೀವ್ನ್). ಹರ್ಯೆಕ್ಲ್ಯಾಚಾ ಜಿವಾನಾಂತ್ ಥರಾವಳ್ ಥರಾಂಚೆ ಬಂಧಕ್ (Blocks) ಆಸ್ತಾತ್. ಕವಿನ್ ಸಾಂಗ್ಚೆಬರಿಂ ಉಭಾರಾಯೊ ಖೊಂಡುನ್, ಖಂದ್ಕಾಂ ಪುರುನ್ ನವಿ ವಾಟ್ ಯಾ ಜಿವಿತ್ ಚಮ್ಕೊಂಕ್ ಸಾಧ್ಯ್ ಆಸಾ.
5) ಕವಿತಾಚಿ ಅಖ್ರೇಚಿ ಪಂಗತ್ ಹ್ಯಾ ಕವನಾಚೊ ತೀರ್ಲ್ ಯಾ ಸಾರಾಂಶ್ ಜಾವ್ನಾಸಾ. ಏಕ್ ಪಾವ್ಟಿಂ ಮ್ಹನಿಸ್ ಏಕಾ ನಿರ್ಧಾರಾಕ್ ಪಾವ್ಲ್ಲ್ಯಾ ಉಪ್ರಾಂತ್ ತೊ ನಿರ್ಧಾರಾಚೊ ಪರಿಣಾಮ್ (consequences) ಕಿತೆಂಯ್ ಜಾವ್ಯೆತ್ ತ್ಯೊ ಕವಿಕ್ ಭಿರಾಂತ್ ಹಾಡಿನಾ. ಕೋಣ್ ಕಿತೆಂ ಮ್ಹಣ್ತಾ ಮ್ಹಳ್ಳ್ಯಾಚಿ ಪರ್ವಾ ನಾ. ತಾಚೊ ನಿರ್ಧಾರ್ ಯಾ ನವಿ ವಾಟ್, ಹಾಯ್ವೆಬರಿ ಸುಲಾಭಾಯೆಚಿ, ರುಂದಾಯೆಚಿ ನ್ಹಯ್ ಜಾಂವ್ಕ್ ಪುರೊ. ದುಸ್ಮಾನ್ ಪಾಸ್ ಮಾಂಡಿತ್ ಯಾ ಪಾಟ್ಲ್ಯಾನ್ ಕೊಣಿಂ ಖೊಡಿಯೊ ಕಾಡ್ತಿತ್, ಖೆಳ್ಕುಳಾಂ ಕರ್ತೀತ್ ಮ್ಹಳ್ಳಿ ಖಂತ್ಚ್ ನಾ. ಹರ್ಯೆಕ್ಲ್ಯಾನ್ ತಾಂಚಿ ಜಿಣಿ ಜಿಯೆಂವ್ಕ್ ಆಸಾ. ಹಾಂತ್ಲೆಂ ಫಳಾಪಳ್ ಘೆಂವ್ಕ್ ಸಾಧ್ಯ್ ನಾ. ದೆವಾಚೆಂ ಪುಂಕ್ಯಾಚೆ ದೆಣೆಂ ಹೆಂ ಜಿವಿತ್ ಆಮ್ಚೆ ಮೀಸಾಂವ್ ಜಾಂವ್ಕ್ ಜಾಯ್. ಆಮ್ಚೆ ಉದ್ದೇಶ್, ನಿರ್ದಾರ್ ಯಾ ಶೆವೊಟಾಕ್ ಪಾವೊಂಕ್ ವೇಳ್ ಜಾಲ್ಯಾರೀ ಜೀಕ್ ಆಮ್ಚಿಚ್ ಜಾತಾ.
ಬಂಡಾಯ ಕವಿತಾ? - ವಲ್ಲಿ ಕ್ವಾಡ್ರಸ್, ಅಜೆಕಾರ್
ಮೆಲ್ವಿನ್ ರೊಡ್ರಿಗಸಾಚಿಂ ಚಡುಣೆಂ ಸಗ್ಳಿಂ ಕವಿತಾಂಚೆಂ ಅಧ್ಯಯನ್ ಹಾಂವೆಂ ಕೆಲಾಂ ತರ್ಯೀ ’ವಾಟ್’ ಕವಿತಾ ಮ್ಹಾಕಾ ತಾಚೆಂ ಏಕ್ ಅಪ್ರೂಪ್ ಬಂಡಾಯ್ ಕವಿತಾಶೆಂ ಝಳ್ಕಾಲೆಂ. ಕವಿತಾ ಫ್ರೀ ವರ್ಸಾಂಚೆರ್ ಬರಯ್ಲಾಂ ತರ್ಯೀ ಉತ್ರಾಂ ಉತ್ರಾಂನಿ ಕವಿನ್ ಉಭೆಂ ಕೆಲ್ಲ್ಯೊ ಇಮಾಜ್ಯೊ ಭೋವ್ ವಿಜ್ಮಿತ್ ಕರ್ತಾತ್.
ಪಯ್ಲ್ಯಾ ಪಂಗ್ತೆರ್ ಕವಿ ಅಪ್ಲ್ಯಾ ಅನ್ಭೋಗಾಕ್ ಸಾಂಕೇತಿಕ್ ರಿತಿನ್ ವರ್ಣಿತಾನಾ ಆನಿಂ ’ಅನ್ಭೋಗಾಚ್ಯೆ ಅಸ್ಕತ್ಕಾಯೆಚಿಂ ತಯರಾಂ ಫುಟೊನ್’. ಉತ್ರಾಂನಿ ಸಾಂಗ್ತಾ ಅನ್ಭೋಗ್ ನಾತ್ಲ್ಲೊ ಮನಿಸ್ ಕಿತ್ಲೊ ಮುಕಾರ್ ಪಾವ್ಲ್ಯಾರ್ಯೀ ತಾಕಾ ಪಡ್ಣಿಂ ಆಸ್ಚಿ ಕುರುಃ ದಿತಾ.
ತಿಸ್ರಿ ಪಂಗತ್ ಕವಿತಾ ಬಂಡಾಯ್ ಚಿಂತ್ಪಾಕ್ ರುಜ್ವಾತ್ ದಿತಾತ್. ಉತ್ರಾಂ ಪಳೆಯಾ, ’ಕಾಕುಳ್ತಿಕ್ ಬಗ್ಲೆಕ್ ಸಾರುನ್’, ’ಬಗ್ಲೆಚ್ಯಾ ಕರಡಾಕ್ ಉಜೊ ದೀವ್ನ್’. ಹಿಂ ದೋನ್ ಉತ್ರಾಂ ಮ್ಹಣ್ ಲೆಖ್ಲೆಂ ತರ್ ಕವಿಚಾ ಮತಿಂತ್ ಕಾಕುಳ್ತಿಕ್ ಸ್ಥಾನ್ ಆಸಾ, ತರ್ಯೀ ಕವಿನ್ ಕಾಕುಳ್ತಿಕ್ ಸದ್ದ್ಯಾಕ್ ಬಗ್ಲೆನ್ ದವರ್ಲ್ಯಾ ಮಾತ್ರ್, ಪುಣ್ ಬಗ್ಲೆಚಾ ಕರಡಾಕ್ ಉಜೊ ದಿಲಾ - ಮ್ಹಳ್ಯಾರ್ ಹುಲ್ಪಾಯ್ಲಾ. ಕಿತ್ಯಾಕ್ ಮ್ಹಳ್ಯಾರ್ ತಾಚಿ ಗರ್ಜ್ ಕವಿಕ್ ನಾ. ಪುಣ್ ವಯ್ಲಿಂ ದೊನೀಂ ಉತ್ರಾಂ ಏಕ್ ಕರ್ನ್ ವಾಚ್ಲಿಂ ತರ್ ಕಾಕುಳ್ತಿಕ್ ಬಗ್ಲೆನ್ ಲೊಟುನ್, ಬಗ್ಲೆಚಾ ಕರಡಾಸವೆಂ ದೊನಾಯ್ಕೀ ಹುಲ್ಪಾಯ್ಲಾ.
ಚೊವ್ತ್ಯಾ (ಅಖ್ರೇಚಾ) ಪಂಗ್ತೆರ್ ಕವಿ ಸಮ್ಜಾಯ್ತಾ ತಿಸ್ರ್ಯಾ ಪಂಗ್ತೆಚೊ ಮಹತ್ವ್. ಕವಿ ನಿರಾಸ್ಲಾ ಎಕ್ಸುರ್ಪಣಾಕ್, ತಾಚೆ ವಾಟೆರ್ ತೊ ಎಕ್ಲೊಚ್ ಮ್ಹಣ್ ಶಿಣ್ಲಾ, ತಿಸ್ರ್ಯಾ ಪಂಗ್ತೆರ್ ಕವಿ ಇತ್ಲ್ಯಾ ಧಯ್ರಾನ್ ಖಂದ್ಕಾಂ ಪುರ್ತಾ, ಗುಡೆ ಖೊಂಡ್ತಾ ತರ್ಯೀ ಅಖ್ರೇಚಾ ಪಂಗ್ತೆರ್ ಎಕ್ಲೊಚ್ ವೆತಾ ಅಪ್ಲ್ಯಾ ಸ್ವಪ್ಣಾಂಚಿ ವಾಟ್ ಘೆವುನ್. ಹೆಂ ಚಿಂತಾಪ್ ಗುಸ್ಪೊಡಾಯ್ ಉದೆಶೆಂ ಜರೂರ್ ಕರ್ತಾ - ಹೆಂ ಏಕ್ ಚಿಂತಾಪ್ ತರ್ ಹಾಚೆಂ ಪರ್ಯಾಯ್ ಚಿಂತಾಪ್ ಭೋವ್ ಲಿಸಾಮ್ವಾಭರಿತ್ ಜಾವ್ನಾಸಾ - ಕವಿತಾಚೆಂ ನಾಂವ್ ’ವಾಟ್’. ಆನಿಂ ಹಿ ವಾಟ್ ನವಿ ವಾಟ್ ಆನಿಂ ನವಿ ದಿಶಾ ಧಾಖಯ್ತಾ, ಮನಿಸ್ ಕಸ್ಟಾಂಕ್, ಭಿಂಯೆವ್ನ್ ಅಪ್ಲಿಂ ಸ್ವಪ್ಣಾಂ ನಿಹಾಳ್ನ್ ಬೊಸ್ಲೊ ತರ್ ತಿಂ ಸ್ವಪ್ಣಾಂ ಅಧುರಿಂಚ್ ಉರ್ತೆಲಿಂ ಶಿವಾಯ್ ಕಾರ್ಯಗತ್ ಜಾಂವ್ಚಿಂನಾಂತ್. ದೆಕುನ್ ದೊನಾ ಪಯ್ಕಿ ಏಕ್ ವಿಂಚವ್ಣ್ ಗರ್ಜೆಚಿ - ಎಕ್ಚ್ ಸ್ವಪ್ಣಾಂ ದೆಖ್ಚಿಂ ರಾವಜ್ಯಾಯ್ ಯಾ ತಿಂ ಸ್ವಪ್ಣಾಂ ಸತ್ ಕರ್ಚಿ ವಾಟ್ ಸೊಧಿಜಾಯ್ ಮ್ಹಳ್ಳಿ.
ಪುಣ್ ವಿಜ್ಮಿತ್ಕಾಯೆಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಕವಿಚೆಂ ಮಿಸಾಂವ್ ಆರಂಬ್ತಾ ಸಾಟ್ ಸುಮಾನಾ ಉಪ್ರಾಂತ್.
ಕವಿಚಾ ಉತ್ರಾಂನಿ:
ಕವಿತಾ ಬರಂವ್ಚೆಂ ದೆಣೆಂ, ಜಲ್ಮಾಚೊ ಗೂಣ್ ಮ್ಹಣ್ತಾತ್. ಹಾಂವ್ ಏಕ್ ಕವಿ ಮ್ಹಣ್ ತುಮಿ ಆಪಯ್ತಾತ್ ಜಾಲ್ಯಾರ್ ಹ್ಯಾ ಜಲ್ಮಾಚ್ಯಾ ಗುಣಾವಿಶಿಂ ಹಾಂವೆಂ ಸೊಧ್ ಚಲಯ್ಜೆ ಪಡ್ತಾ. ಮ್ಹಜ್ಯೆ ಸಮ್ಜಣೆಪ್ರಕಾರ್ ಮ್ಹಜ್ಯೆ ಆವಯ್ಚ್ಯಾ ಕುಟ್ಮಾಂತ್ ಜಾಂವ್, ಬಾಪಾಯ್ಚ್ಯಾ ಕುಟ್ಮಾಂತ್ ಜಾಂವ್ ಕೊಣ್ಯ್ ಕವಿ ಯಾ ಸಂಗೀತ್ಗಾರ್ ನಾತ್ಲ್ಲೆ. ಅಪ್ರೂಪ್ ಬರಂವ್ಚೆ ಬರ್ಪಿ ಆಸ್ಲ್ಲೆ; ಫಾಮಾದ್ ನಟ್/ನಟಿ ಆಸ್ಲ್ಲ್ಯೊ. ಪುಣ್ ಕವಿ ನಾತ್ಲ್ಲೆ.
ಹಾಂವ್ ಸೊಡ್ವೊಣ್ದಾರಾಚ್ಯಾ ಪಾಯಾಂಮುಳಿಂ ದೆರೆಬೈಲಾಂತ್ ಜಲ್ಮಲ್ಲೊಂ. ಮ್ಹಜ್ಯಾ ಆಟ್ ವರ್ಸಾಂ ಪ್ರಾಯೆರ್ ಮ್ಹಜೊ ಆಜೊ ಸರ್ಲ್ಲೊ. ತೊ ಮಾತ್ರ್ ಮ್ಹಾಕಾ ಜಾನಪದಾಚಿಂ ಗಿತಾಂ ಶಿಕಯ್ತಾಲೊ. ಮ್ಹಜೆರ್ ವಿಶೇಸ್ ಪ್ರಭಾವ್ ಘಾಲ್ಲೆಂ, ಆನಿ ಮ್ಹಾಲ್ಗಡ್ಯಾಂಚ್ಯಾ ಕವಿತಾ ಪ್ರತಿಭೆಚೆರ್ ಹಾಂವೆಂ ಕೆದಳಾಯ್ ಗರ್ವ್ ಉಚಾರಿಶೆಂ ಕರಂವ್ಚೆಂ ’ಆಡ್ಕುಲೊಗೊ ಬುಡ್ಕುಲೊ’ ಗೀತ್ ಮ್ಹಾಕಾ ಮ್ಹಜ್ಯಾ ಆಜ್ಯಾನ್ ಶಿಕಯಿಲ್ಲೆಂ. ತೆಂ ಕಿತ್ಲೆ ಜಣ್ ಜಾಣಾಂತ್ ಹಾಂವ್ ನೆಣಾಂ! ಹಾಂವೆಂ ಶಿಕ್ಲ್ಲಿ ಪಯ್ಲಿ ಕವಿತಾಚ್ ಹಿ!
ಆಡ್ಕುಲೊಗೊ ಬುಡ್ಕುಲೊ ತೆಲಾತುಪಾಚೊ
ಬಾಯೆಗೇರ್ ಬಾಬು ಜಾಲಾ ಫಿಂರ್ಗಿ ರುಪಾಚೊ
ಮಾಡಾಮುಳಾಂತ್ ಚೆರ್ಕೊ ಜಾಲಾ ಧಾಂಗ್ರೊ ಫೆರಾಯಾಂ
ಉಟಾಗೊ ಬಾಯಾಂನೊ ಮಾಂದ್ರಿ ಖವ್ಳಿಯಾಂ
ಮ್ಹಜೊ ಆಜೊ ಹಾಂವ್ ಬೋವ್ ಲ್ಹಾನ್ ಆಸ್ತಾನಾಂಚ್ ಸರ್ಲ್ಲೊ ಜಾಲ್ಲ್ಯಾನ್, ಮಾಗೀರ್ ಅಸಲಿ ಏಕ್ ಊಬ್ ಮ್ಹಜೆಥಂಯ್ ಜಿವಿ ಕಶಿ ಉರ್ಲಿ?
ಹಾಂವೆಂ ವಾಡ್ಲ್ಲ್ಯಾ ಪರಿಸರಾಕ್ ಲಾಗೊನ್ ಕೊಣ್ಣಾ, ಸ ವರ್ಸಾಂಚ್ಯೆ ಪ್ರಾಯೆರ್ಥಾವ್ನ್ ಬಾರಾ ವರ್ಸಾಂ ಪರ್ಯಾಂತ್ ಸದಾಂ ಮಿಸಾಕ್ ಹಾಂವ್ ವೆತಾಲೊಂ. ಇಗರ್ಜ್ಯ್ ಘರಾ ಪಾಟ್ಲ್ಯಾನ್ಚ್ ಆಸ್ಲ್ಲಿ. ಥೊಡೆಪಾವ್ಟಿಂ ದೋನ್-ತೀನ್ ಮಿಸಾಂ ಆಯ್ಕೊಂಚೀಂಯ್ ಆಸ್ಲ್ಲಿಂ. ತವಳ್ ’ಒಪಿಸ್ ಮಿಸಾಂ’ ಮ್ಹಣ್ ಆಸ್ಲ್ಲಿಂ. ಮಿಸಾಪಯ್ಲೆಂ ಪಾದ್ರ್ಯಾಬ್ ಚಡುಣೆ ಅರ್ಧೊ ಘಂಟೊ ಒಪಿಸ್ ವಾಚ್ತಾಲೊ - ಮೆಲ್ಲ್ಯಾಚ್ಯಾ ಅತ್ಮ್ಯಾಕ್. ಹೆಂ ಸಗ್ಳೆಂ ಲಾತ್ಯಾನ್ ಚಲ್ತಾಲೆಂ. ಪಾದ್ರ್ಯಾಬಾಕ್ ಜಾಪಿ ದೀಂವ್ಕ್ ’ರಾಯ್ಯಾಬ್’ ಆಸ್ತಾಲೊ. ರಾಯ್ಯಾಬ್ ಫಾಮಾದ್ ಕೊಂಕಣಿ ನಟ್. ತಾಚ್ಯಾ ಸಾಂಗಾತಾ ಹಾಂವ್ ಪಿಟ್ಕುಲೊ. ಥೊಡೆಪಾವ್ಟಿಂ ರಾಯ್ಯಾಬ್ ಪಾವೊಂಕ್ ವೇಳ್ ಜಾಲ್ಲ್ಯಾ ಸಂದರ್ಭಾರ್ ಹಾಂವ್ ಎಕ್ಲೊಚ್ ಜಾಪಿ ದಿತಾಲೊಂ. ’ಲಿಬೆರಾ ಮೆಂ ದೋಮಿನೆ’ ತಸಲಿಂ ಜಾಯ್ತಿಂ ಲಾತಿನ್ ಕಾಂತಾರಾಂ ಮ್ಹಾಕಾ ತೊಂಡ್ಪಾಠ್ ಯೆತಾಲಿಂ. ಅರ್ಥ್ ಮಾತ್ರ್ ಎಕಾಚೋಯ್ ಕಳಿತ್ ನಾತ್ಲ್ಲೊ.
ಕಾಂಯ್ ಧಾ ವರ್ಸಾಂಚೊ ಆಸ್ತಾನಾ ಪನ್ನಾಸಾಂ ವಯ್ರ್ ಕಾಂತಾರಾಂ ಹಾಂವೆಂ ಬರಯಿಲ್ಲಿಂ. ಸಗ್ಳಿಂ ’ಜೆಜು, ದೇವ್, ಸೊಮಿ, ಮರಿಯೆ’ ಭೊಂವ್ತಿಂ. ಎಕಾ ವ್ಹಡ್ ಬುಕಾಂತ್ ಬರವ್ನ್ ದವರ್ಲ್ಲಿಂ ಹಿಂ ಕಾಂತಾರಾಂ ಮಾಗೀರ್ ಖಂಯ್ ಹೊಗ್ಡಾಯ್ಲಿಂ ಮ್ಹಣೊನ್ಚ್ ಕಳಿತ್ ನಾ. ಕಾಂಯ್ ಕಾಪ್ಯೆಚ್ಯಾ ಬುಡ್ಕುಲ್ಯಾಕ್ ಉಜೊ ಕರುಂಕ್ ಲಾಂಕುಡ್ ನಾತ್ಲ್ಲ್ಯಾವೆಳಾರ್, ಜಳಯ್ಲ್ಯಾಂತ್ ಜಾಂವ್ಕ್ಯ್ ಪುರೊ.
ಘರಾಂತ್ ಸದಾಂ ತೇರ್ಸ್ ಆಸ್ತಾಲೊ. ಹ್ಯಾ ಸಂದರ್ಭಾರ್ ಜಾಯ್ತಿಂ ಕಾಂತಾರಾಂ ಹಾಂವ್ ಗಾಯ್ತಾಲೊಂ. ಮಾಗೀರ್ ನವೀಕರಣಾಚ್ಯಾ ಸಂದರ್ಭಾರ್ ಇಗರ್ಜೆಂತ್ ಗಾಂವ್ಚ್ಯಾಕ್ ನವಿಂ ಕಾಂತಾರಾಂ ಆಯ್ಲಿಂ, ನವೆ ತಾಳೆ ಆಯ್ಲೆ. ನವ್ಯಾ ಕಾಂತಾರಾಂಚಿಂ ಪುಸ್ತಕಾಂ ಯೇಂವ್ಕ್ ನಾತ್ಲ್ಲಿಂ ಜಾಲ್ಲ್ಯಾನ್ ಕಾಂತಾರಾಂ ಗಾಯ್ತಾನಾ ಆಮಿ ಭುರ್ಗೆ ಗುಸ್ಪೊಡ್ ಕರ್ತಲ್ಯಾಂವ್. ತ್ಯಾದೆಕುನ್ ಶಿಕೊನ್ ದೋನ್ ವರ್ಸಾಂ ಪರ್ಯಾಂತ್, ಕಾಂತಾರಾಂಚೆ ಬೂಕ್ ಯೆತಾಪಾಸುನ್ ಹಾಂವ್ ’ಹಾ, ಭಾಗಿ ಕಿತ್ಲೆಂ’ ಕಾಂತಾರ್ ’ಆಬಾಕ್ ಏಕ್ ಇರ್ನೆಂ’ ಮ್ಹಣೊನ್ ಗಾಯ್ತಾಲೊಂ. ಥೊಡಿಂ ಜಣಾಂ ’ಯೇ ದೆವಾ ಮೊಗಾಳಾ ತಾರ್ಲೊ ಖಾ’ ಮ್ಹಣೊನ್ಯ್ ಗಾಯ್ತಾಲಿಂ ಮ್ಹಳ್ಳೆಂ ಹಾಂವೆಂ ಆಯ್ಕಾಲಾಂ. ಆಮ್ಚೆಲಾಗಿಂ ತೆದಿ ವ್ಹಡ್ Reasoning ಸಕತ್ಯ್ ನಾತ್ಲ್ಲಿ. ವಿಚಾರ್ನ್ ಸಮ್ಜೊನ್ ಘೆಂವ್ಚಿ ಹುಶಾರ್ಗಾಯ್ ನಾತ್ಲ್ಲಿಗಿ, ವಿಚಾರುಂಕ್ ಕಾವ್ಜೆಣಿಗಿ ಮ್ಹಳ್ಳೆಂ ಉಡಾಸಾಂತ್ ಯೇನಾ.
ಸಾತ್ ವರ್ಸಾಂ ಪ್ರಾಯೆರ್ ಥಾವ್ನ್ಚ್ ಹೆರಾಂಲಾಗ್ಚೆ ಮಾಗೊನ್ ಘೆವ್ನ್ ಮಿತ್ರ್, ಝೆಲೊ, ಕಾಣಿಕ್ ಆನಿ ಪಯ್ಣಾರಿ ಚುಕನಾಸ್ತಾಂ ವಾಚ್ತಾಲೊಂ. ಪುಣ್ ಕೆದಳಾಯ್ ಮ್ಹಾಕಾ ಕವಿತಾ ವಾಚ್ಲ್ಲೊ ಉಡಾಸ್ ನಾ. ವಾಚ್ಲ್ಯಾರ್ಯ್ ಮ್ಹಜೆರ್ ತಾಂಣಿ ಪ್ರಭಾವ್ ಘಾಲಾ ಮ್ಹಣ್ ಹಾಂವ್ ಲೆಕಿನಾ.
ತವಳ್ ಘರಾಂತ್ ಜಾಯ್ತ್ಯಾ ನಾಟಕಾಂಚಿಂ ತಾಲಿಮಾಂ ಚಲ್ಲ್ಲಿಂ ಆಸಾತ್. ನಾಟಕಾಂತ್ಲ್ಯಾ ಗಿತಾಂಚೆಂ ಆಭ್ಯಾಸ್ ಚಲ್ಲ್ಲೆಂ ಆಸಾ. ಇಗರ್ಜೆಚ್ಯಾ ವಠಾರಾಂತ್ ಜಾಯ್ತೆ ಕೊಂಕಣಿ ನಾಟಕ್ ಸಾದರ್ ಜಾತಾಲೆ ಆನಿ ಭೊಂವಾರಾಂತ್ ತುಳು ನಾಟಕ್. ವಿಲ್ಫಿ ರೆಬಿಂಬಸಾನ್ ’ಚೂ ಚೂ’ ಮ್ಹಳ್ಳೆಂ ಲ್ಹಾನ್ಪಣಾರ್ಚ್ ಹಾಂವೆಂ ಆಯ್ಕಾಲ್ಲೆಂ. ತುಳು ನಾಟಕಾಂನಿ ಹಿಂದಿ ಪದಾಂಚ್ಯೆ ಧಾಟಿರ್ ಪದಾಂಚೆಂ ರಚನ್ ಜಾತಾಲೆಂ. ಹಿಂ ಸಗ್ಳಿಂ ಗಿತಾಂ ಹಾಂವ್ ಜಿಕೊನ್ ಧರ್ತಾಲೊಂ. ವಿಕ್ಟರ್ ಕೊನ್ಸೆಸೊನ್ ಜಾಯ್ತ್ಯಾ ಸಂದರ್ಭಾಂನಿ ಮ್ಹಾಕಾ ಪದಾಂ ಶಿಕಯ್ಲ್ಲೀಂಯ್ ಆಸಾತ್. ಪುಣ್ ಹ್ಯಾ ಖಂಯ್ಚ್ಯಾಯ್ ಗಿತಾಂನಿ ಕಸಲೋಯ್ ಪ್ರಭಾವ್ ಮ್ಹಜೆರ್ ಘಾಲಾ ತೆಂ ಹಾಂವ್ ಸಾಂಗೊಂಕ್ ಸಕನಾ.
ಲ್ಹಾನ್ಪಣಾರ್ ಮಾವ್ಶೆಚ್ಯಾ ಘರಾ ಆಮಿ ಕಾಂಯ್ ಪಂಚ್ವೀಸ್ ತೀಸ್ ಜಣಾಂ ಜಿಯೆತೆಲ್ಯಾಂವ್. ವ್ಹಡ್ ಘರ್ - ನೋವ್ ಕುಡಾಂಚೆಂ. ಅಭಿವ್ಯಕ್ತ್ ಕುಟಮ್. ಮಾಗೀರ್ ಸಕಡ್ ವಿಂಗಡ್ ವೆತಾನಾ ಆಮೀಂಯ್ ಭಾಡ್ಯಾಚ್ಯಾ ಘರಾ ಗೆಲ್ಯಾಂವ್. ಕಷ್ಟ್ ಪಾಂಯಾಂ ಪೊಂದ್ಲಿ ಭುಂಯ್ ಪೊಕೊರ್ನ್ ಖಾತಾನಾ ಪರ್ತ್ಯಾನ್ ಪಾಟಿಂ ಮಾವ್ಶೆಗೆರ್. ತಾಂಚ್ಯಾ ಘರಾಂತ್ ನ್ಹಯ್, ತಾಂಚ್ಯಾ ಗೊಟ್ಯಾಂತ್. ಚಡುಣೆ ಚಾರ್ ವರ್ಸಾಂ! ಗೊರ್ವಾಂ ನಾತ್ಲ್ಲಿಂ. ಶೆಣ್ ಕಿಡೆ ನಾತ್ಲ್ಲೆ. ಪುಣ್ ಮುಚ್ಚಳಿಕೆ ನಾತ್ಲ್ಲ್ಯಾ ಘರ್ಚ್ಯಾ ಪಾಕಾಸ್ಯಾಂಚೆರ್ ಭಿತರ್ಲ್ಯಾನ್ ದಿವೊಡ್ ಚರ್ತಾಲೆ. ಪಾಟ್ಲ್ಯಾನ್ ವ್ಹಡ್ ಜಯ್ತ್ ರಾನ್ಯ್ ಆಸ್ಲ್ಲೆಂ. ಅಶೆಂ ಖಾವ್ಣೆಚೆರ್ ನಿದೊನ್ ಹಾಂವ್ ವ್ಹಡ್ ಜಾಲ್ಲೊಂ. ಕೊಣಾ ಮಾಯಾಂಚ್ಯಾ ಹಿತ್ಲಾಂನಿ ಗೆಣೀಕ್ ಘೆತ್ಲ್ಲ್ಯಾ ಆಬೊಲ್ಯಾಂಚ್ಯಾ ಆಳ್ಯಾಂಕ್ ಕುಸ್ಲ್ಲೆಂ ಮೂತ್ ವ್ಹಾವವ್ನ್, ಉದಕ್ ವ್ಹಾವವ್ನ್ ಹಾಂವ್ ವ್ಹಡ್ ಜಾಲ್ಲೊಂ, ದಡ್ಡಲ್ಕಾಡಾಂತ್ಲ್ಯಾ ಮ್ಹಾರಾಂಚ್ಯಾ ಇಸ್ಕೊಲಾಂತ್ ಹಾಂವ್ ಎಕ್ಲೊ ಕಿರಿಸ್ತಾಂವಾಂಚೊ ಭುರ್ಗೊ ಸಕಾಳಿಂ ಸಾತಾಂಕ್ ಧಾಂವೊನ್ ವಚೊನ್ ಮ್ಹಾರಾಂಕ್ ಯೆಂವ್ಚ್ಯಾ ಖಾಣಾಂತ್ಲೆಂ- ಗೊಬ್ಳ್ಯಾಂತ್ ದೂಧ್ ಆನಿ ಲೊಣಿ ಸಾರಯಿಲ್ಲಿಂ ಉಂಡ್ಯಾಚಿಂ ಪರ್ಮಳಿಕ್ ಚಾರ್ ಕಾಪಾಂ ಹಾಡ್ನ್ ಯೇವ್ನ್, ಭಾಂವ್ಡಾಂ ಸಂಗಿಂ ವಾಂಟುನ್ ಖಾವ್ನ್ ವ್ಹಡ್ ಜಾಲ್ಲೊಂ.
ಆಟ್ವೆಕ್ ಪಾವ್ತಾನಾ ದೆರೆಬೈಲ್ ಥಾವ್ನ್ ಕುಲ್ಶೇಕರ್ ಪಾವ್ಲ್ಯಾಂವ್. ಪದ್ವಾ ಹೈಸ್ಕುಲಾಂತ್ ಶಿಕೊನ್ ಆಸ್ತಾನಾ ಸಾಂಜೆರ್ ಇಸ್ಕೊಲಾಥಾವ್ನ್ ಯೇವ್ನ್ ಕೊಣಾಘರಾಂನಿ ವಸ್ತುರ್ ಉಂಬಳ್ನ್, ಉದಕ್ ವೋಡ್ನ್ ದೀವ್ನ್ ಪೂಡ್-ಕಾಸ್ ಕಮಾಯ್ತಾಲೊಂ. ರಜೆಚ್ಯಾ ದಿಸಾಂನಿ ಭಾಟಿ ಘೆವ್ನ್ ಗುಡ್ಯಾಕ್ ವಚೊನ್ ಶೆಣ್ ಆರಾವ್ನ್, ಜಳೊವಾಕ್ ಶೆಣ್ಕುಟಾಂ ಕರ್ತಲ್ಯಾಂವ್ ಆನಿ ಥೊಡೆಪಾವ್ಟಿಂ ವಿಕ್ತಲ್ಯಾಂವ್ ಸಯ್ತ್.
ಪಿಯುಸಿಂತ್ ಆಸ್ತಾನಾ ಕೊಣೆಂಕಿ ದಿಲ್ಲೆಂ ವೂಲನ್ ಪ್ಯಾಂಟ್ ರಿಪೇರಿ ಕರವ್ನ್, ಎಕಾ ಪೆಂಟಾಂತ್ ಹಾಂವೆಂ ಸಗ್ಳೆಂ ವರ್ಸ್ ಕಾಡ್ಲ್ಲೆಂ ಆಸಾ. ವ್ಹಾಣೊ ನಾಸ್ತಾನಾ ಜಾಯ್ತೆ ಪಾವ್ಟಿಂ ಕೊಲೆಜಿಕ್ ಗೆಲಾಂ. ವ್ಹಾಣೊ ಆಸ್ಲ್ಯಾರಿ ಜರೊನ್ ಗೆಲ್ಲ್ಯಾ ಖೊಟಾಂಚ್ಯೊ ವ್ಹಾಣೊ ಮ್ಹಯ್ನೆ ಮ್ಹಯ್ನೆ ಶಿರ್ಕಯ್ಲ್ಯಾತ್.
ಜಿವಿತಾಚಿ ಅಸಲಿ ಏಕ್ ಕೂಸ್ ವಿಂಗಡ್ಚ್ ಎಕಾ ಸಂದರ್ಭಾರ್ ಸಾಂಗುಂಯೆತ್ ಕೊಣ್ಣಾ. ಪುಣ್ ಹಾಂಗಾ ಹಾಚಿ ಏಕ್ ಝಳಕ್ ದಿಲಿ ಕಿತ್ಯಾಕ್ ಮ್ಹಳ್ಯಾರ್ ಆಜೂನ್ ಮ್ಹಜ್ಯಾ ಜಾಯ್ತ್ಯಾ ಕವಿತಾಂನಿ - ಜಿವಿತಾಚ್ಯಾ ಹ್ಯಾ ಸೊರ್ಮುಣಾಚಿಂ, ಸೊರ್ಮುಣಾಚ್ಯಾ ಭಗಾಭಗಾ ಪೆಟ್ಚ್ಯಾ ಉಜ್ಯಾಚಿಂ ಆನಿ ಹ್ಯಾ ಉಜ್ಯಾಂತ್ ಜಳೊನ್ ವ್ಹಡ್ ಜಾಲ್ಲ್ಯೆ ಜಿಣಿಯೆಚಿಂ - ವೆವೆಗ್ಳಿಂ ರುಪಾಂ ಆನಿ ಮುಖಾಂ ಝಳ್ಕೆಕ್ ಯೆತಾತ್.
ಹಾಂವ್ ಉಜ್ಯಾಂತ್ ಜಲ್ಮಲ್ಲೊ ಮನೀಸ್. ತ್ಯಾದೆಕುನ್ ಜಿವಿತಾಂತ್ ಯೆಂವ್ಚ್ಯಾ ಚಿಲ್ಲರ್ ವೊತಾಂಕ್ ಹಾಂವ್ ಬಾವನಾ. ಕಿತ್ಲೊ ಹಾಂವ್ ಭಾಜುನ್ ವೆತಾಂ ತಿತ್ಲ್ಯೊ ಕವಿತಾ ಮ್ಹಜೆಥಾವ್ನ್ ಭುಂಯ್ ಪಡ್ತಾತ್!
ಮ್ಹಾಕಾ ಪಂದ್ರಾ ವರ್ಸಾಂ ಭರ್ತಿ ಜಾಂವ್ಚ್ಯಾ ಪಯ್ಲೆಂ 1977 ಇಸ್ವೆಂತ್ ’ಪಯ್ಣಾರಿ’ರ್ ಮ್ಹಜೆಂ ಪಯ್ಲೆಂ ಬರಪ್ ಪರ್ಗಟ್ ಜಾಲೆಂ. ತ್ಯಾದಿಸಾಥಾವ್ನ್ ಆಜ್ಪಾಸುನ್ ಹಾಂವ್ ಬರವ್ನ್ ಆಯ್ಲಾಂ. ಪಯ್ಲೆಂ ಲೇಖನಾಂ, ಸಂದರ್ಶನಾಂ, ಏಕ್ ಕಾದಂಬರಿ, ಏಕ್ ಪಿಂಜುನ್ ಉಡಯಿಲ್ಲೊ ನಾಟಕ್, ಕಾಣಿಯೊಂ ಆನಿ ನಿಮಾಣೆಂ ಕವಿತಾ. ಬರಂವ್ಕ್ ಸುರು ಕರ್ನ್ ಆಟ್ ವರ್ಸಾಂ ಉಪ್ರಾಂತ್ಚ್ ಹಾಂವೆಂ ಮ್ಹಜಿ ಪಯ್ಲಿ ಕವಿತಾ ’ಮಿತ್ರ್’ ಪತ್ರಾರ್ ಪರ್ಗಟ್ ಕೆಲ್ಲಿ.
ಖಿಣಾನ್ ಜಲ್ಮಲೆ
ಉದ್ಕಾ ಬುಳ್ಬುಳೆ
ಕ್ಷಣಿಕ್ ಆವ್ದೆಂತ್
ಪಾಟವ್ನ್ ಉಲ್ಲಾಸ್
ಮನ್ಶಾ ಮತಿಕ್
ಪಾಲ್ವಲೆ
ಜಿಕೊನ್ ಕಾಳ್ಜಾಂ
ಉಟವ್ನ್ ಮನ್ಶಾಭೊಗ್ಣಾಂ
ಚಿಂತಾಂ
ಜಿವಿತಾಂತ್ ತೆ ನಾ ಸಲ್ವಾಲೆ!
ಹೈಸ್ಕುಲಾಂತ್ ಆಸ್ತಾನಾ ಶಿಕ್ಲ್ಲಿ ’ಕಬೀರಾ ಛುದಾ ಕೆ ಕೂಕುರಿ, ಕರತ್ ಭಜನ್ ಮೆಂ ಭಂಗ್, ಯಾ ಕೋ ಟುಕುಡಾ ಡಾರಿ ಕೈ, ಸುಮಿರನ್ ಕರೊ ನಿಸಂಗ್’ ಹಿಂದಿ ಕವಿತಾ ಸೊಡ್ಲ್ಯಾರ್ ಕನ್ನಡಾಚ್ಯೊ ಏಕ್ಯ್ ಕವಿತಾ ಯಾದಿಂತ್ ನಾಂತ್. ಹಾಂ! ಉಡಾಸಾಂತ್ ಆಸಾ ಮ್ಹಳ್ಯಾರ್ ಪಯ್ಲೆ ಕ್ಲಾಶಿಂತ್ಲಿ ’ನಾಯಿಮರಿ’ ಮಾತ್ರ್. ಕೊಲೆಜಿಂತ್ ಭಾಸ್ ಜಾವ್ನ್ ಹಿಂದಿ ಹಾಂವ್ ಶಿಕ್ಲ್ಲೊಂ ತರಿ ತವಳ್ ಜಾಲ್ಯಾರಿ ಏಕ್ಯ್ ಕವಿತೆಚೊ ಪ್ರಭಾವ್ ಮ್ಹಜೆರ್ ಪಡ್ಲಾ ಮ್ಹಣ್ ಹಾಂವ್ ಲೆಕಿನಾ.
ಕೊಲೆಜ್ ಸಂಪ್ತಚ್ ’ಮಿತ್ರ್’ ಆನಿ ’ಝೆಲೊ’ ಪತ್ರಾಂಚೊ ಸಹ-ಸಂಪಾದಕ್ ಜಾವ್ನ್ ವಾವುರ್ತಾನಾ, ಏಕ್ ಪಾವ್ಟಿಂ ಸಂಪಾದಕ್ ಡೊಲ್ಫಿ ಕಾಸ್ಸಿಯಾನ್ ನತಾಲಾಂಚ್ಯಾ ಅಂಕ್ಯಾಖಾತೀರ್ ಕವಿತಾ ಬರಂವ್ಕ್ ಮ್ಹಾಕಾ ಸಾಂಗ್ಲೆಂ. ಬರವ್ನ್ ಜಾತಚ್ ತಾಕಾ ವಾಚುನ್ ದಿತಾನಾ ’ಕವಿತಾ ಅಶಿ ಬರಂವ್ಚಿ ನ್ಹಯ್’ ಮ್ಹಣ್ ತಾಣೆ ಕೊನ್ಶಾಕ್ ಉಡಯ್ಲಿ.
ಥೊಡ್ಯಾಚ್ ತೆಂಪಾಉಪ್ರಾಂತ್ ಮ್ಹಣ್ಜೆ 1984 ಇಸ್ವೆಂತ್ ಪಂದ್ರಾವಿ ಅಖಿಲ್ ಭಾರತೀಯ್ ಕೊಂಕಣಿ ಪರಿಶದ್ ಬೆಂಗ್ಳುರಾಂತ್ ಜಮ್ಲ್ಲ್ಯಾವೆಳಾರ್ ಥಂಯ್ಸರ್ ಜಮ್ಲ್ಲ್ಯಾ ಕವಿಸಮ್ಮೇಳನಾಂತ್ ಹಾಂವೆಂ ಮ್ಹಜೆಂ ಪಯ್ಲೆಂ ಕವಿತಾವಾಚನ್ ಕೆಲೆಂ. ವಾಚುನ್ ಮಾಂಚಿ ದೆಂವ್ತಾನಾ, ಹಾತ್ ಹಾಲಂವ್ಕ್ ಜಾಯ್ತೆ ಗೊಂಯ್ಕಾರ್ ಚಲೆ-ಚಲಿಯೊ ಹಾಜರ್ ಆಸ್ಲ್ಲಿಂ. ಹಾಂವ್ ಫುಗ್ಲೊಂ - ಖಮಿರ್ ನ್ಹಯ್, ಸುರ್ ಘಾಲ್ಲೆಂ ಪೀಟ್ ಫುಗ್ಲ್ಲ್ಯಾಬರಿ.
ಹಾಚ್ಯಾಕ್ಯ್ ವರ್ಸಾಂ ಆದಿಂಚ್ ಮ್ಹಾಕಾ ಚಾಫ್ರಾಚಿ ವೊಳಕ್ ಜಾಲ್ಲಿ. ಪುಣ್ ತಾಕಾ ಏಕ್ ಕವಿ ಮ್ಹಣೊನ್ ಹ್ಯಾ ಉಪ್ರಾಂತ್ಚ್ ಹಾಂವ್ ವೊಳ್ಕೊಂಕ್ ಶಿಕ್ಲೊಂ. ತಾಚ್ಯಾ ಕವಿತಾಂಚ್ಯಾ ಸಂಪೂರ್ಣ್ ಮೊಗಾರ್ ಪಡ್ಲೊಂ. ತಾಚ್ಯೊ ಶೆಂಭರಾಂಚ್ಯಾಕಿ ಚಡಿತ್ ಕವಿತಾ ತೊಂಡ್ಪಾಠ್ ಕೆಲ್ಯೊ. ಥೊಡೆಪಾವ್ಟಿಂ ಕವಿ ಸಮ್ಮೇಳನಾಖಾತೀರ್ ಚಾಫ್ರಾನ್ ತಾಚ್ಯೊ ಕವಿತಾ ವ್ಹರ್ನ್ ವಚೊಂಕ್ ನಾತ್ಲ್ಲ್ಯಾ ಸಂದರ್ಭಾರ್ ಹಾಂವೆಂ ತಾಚ್ಯೊ ಕವಿತಾ ತಾಕಾ ಬರವ್ನ್ ದಿಲ್ಯೊ. ಜಾಯ್ತೆಪಾವ್ಟಿಂ ಟಾಗೋರ್ಪಾರ್ಕಾಂತ್, ಟೌನ್ಹೊಲ್ ಪಾರ್ಕಾಂತ್ ಬಸೊನ್ ಕವಿತಾವಿಶಿಂ ಆಮಿ ಉಲಯ್ಲ್ಯಾಂವ್. ತೊ ಆಮ್ಗೆರ್ ಯೆತಾಲೊ. ಹಾಂವ್ ತಾಂಗೆರ್. ತಾಚೆಂ ’ಸೊಂಶ್ಯಾಚೆಂ ಕಾನ್’ ಪುಸ್ತಕ್ ಛಾಪ್ಯಾಕ್ ಗೆಲ್ಲೆಂ ತರೀ ಕವಿತಾಂಚೊ ಸಂಖೊ ಉಣ್ಯೊ ಮ್ಹಣೊನ್ ರವೀಂದ್ರ ಕೆಳೆಕಾರಾನ್ ಪರ್ಗಟ್ ಕರುಂಕ್ ಗಳಾಯ್ ಕೆಲ್ಲ್ಯಾವೆಳಾರ್, ವ್ಹಡ್ಲೆಂ ಏಕ್ ಸರ್ಕಸ್ ಕರುನ್ ಮ್ಹಳ್ಳೆಬರಿ ತಾಚ್ಯೊ 1950-60 ಇಸ್ವೆಂನಿ ಬರಯಿಲ್ಲ್ಯೊ ಪಂದ್ರಾಂಲಾಗಿಂ ಕವಿತಾ ಎಕ್ಟಾಂಯ್ ಕರುನ್ ತಾಕಾ ದಿಲ್ಯೊ. ತಶೆಂ ತಾಚೆಂ ಪುಸ್ತಕ್ ಖಿಣಾನ್ ಪರ್ಗಟ್ ಜಾಲೆಂ. ಉಪ್ರಾಂತ್ ತೆಂಚ್ ಪುಸ್ತಕ್ ಕಾನಡಿಂತ್ ಹಾಂವೇಂಯ್ ಪರ್ಗಟ್ ಕೆಲೆಂ.
ಚಾಫ್ರಾಕ್ ಕವಿತಾಶೆತಾಂತ್ಲೊ ಮ್ಹಜೊ ಗುರು ಮ್ಹಣ್ ಹಾಂವ್ ಮಾಂದುನ್ ಆಯ್ಲಾಂ. ಚಾಫ್ರಾ ಸೊಡ್ಲ್ಯಾರ್ ಎರಿಕ್ ಒಝೇರಿಯೊನ್ ಮ್ಹಜ್ಯಾ ಕವಿತಾಂಕ್ ತಾಳೆ ಬಸವ್ನ್ ದಿಲ್ಲಿ ಹುಮೆದ್ ತಶೆಂ ಫಾ. ವಿಲ್ಲಿ ಸಿಲ್ವಾಚ್ಯಾ ಗಿನ್ಯಾನಾಚೆ ಥೆಂಬೆ - ಮ್ಹಜ್ಯಾ ಕವಿತಾಂಚೆರ್ ಜರೂರ್ ಜಾವ್ನ್ ಪ್ರಭಾವ್ ಘಾಲುಂಕ್ ಪಾವ್ಲ್ಯಾತ್. ಹೆ ವೆಕ್ತಿ ಮಾತ್ರ್ ನ್ಹಯ್ ಮನೋಹರ್ ರಾಯ್ ಸರ್ದೆಸಾಯಿ ತಸಲ್ಯಾ ಅಂತರ್ರಾಷ್ಟ್ರೀಯ್ ಖ್ಯಾತೆಚ್ಯಾ ಕೊಂಕಣಿ ಕವಿಂಲಾಗಿಂ ಲಾಗ್ಶಿಲೊ ಸಂಪರ್ಕ್ ಮ್ಹಾಕಾ ಆಸಾ. ನಾಗೇಶ್ ಕರ್ಮಲಿ, ಪುಂಡ್ಲಿಕ್ ನಾಯ್ಕ್, ರಮೇಶ್ ವೆಳುಸ್ಕಾರ್, ಜೆ.ಬಿ.ಮೊರಾಯಸ್ ತಸಲ್ಯಾ ರಾಷ್ಟ್ರೀಯ್ ಖ್ಯಾತೆಚ್ಯಾ ಕವಿಂಲಾಗಿಂ ಸಳಾವಳ್ ಮ್ಹಾಕಾ ಆಸಾ. ಲುವೀಸ್ ಮಸ್ಕರೇಞ್ ಜಲ್ಮೊನ್ ಮೆಜುನ್ ವರ್ಸಾನ್ ಹಾಂವ್ ಜಲ್ಮಲ್ಲೊಂ ತರಿ ತಾಚ್ಯಾ ಕವಿತಾಂಚೊ ಆನಿ ಜಿಣ್ಯೆಚೊ ಅನ್ಭೋಗ್ ತಾಚ್ಯಾ ಕುಟ್ಮಾಲಾಗಿಂ ದವರ್ಲ್ಲ್ಯಾ ಸಂಪರ್ಕಾವರ್ವಿಂ ಹಾಂವ್ ಆಪ್ಣಾಂವ್ಕ್ ಸಕ್ಲಾಂ. ಕವಿ ಫೆಲಿಕ್ಸ್ ಪಾವ್ಲ್ ನೊರೆಞಾಕ್ ತಾಚ್ಯಾ ಮರ್ಣಾಆದಿಂ ಹಾಂವ್ ಭೆಟ್ಲಾಂ. ಇಂಗ್ಲಿಷಾನ್ ಬರಂವ್ಚಿ ಇಸ್ರಾಯೆಲ್ ಕವಯಿತ್ರಿ ರೊಶೆಲ್ ಮಾಸಾಲಾಗಿಂ ಈಮೇಯ್ಲಾದ್ವಾರಿಂ ಸಂಪರ್ಕ್ ಹಾಂವೆಂ ಸಾಂಬಾಳ್ಳಾ. POETRY ಇಂಗ್ಲಿಷ್ ನೆಮಾಳ್ಯಾಚೊ ಹಾಂವ್ ವರ್ಗಣಿದಾರ್. "ಋತು’ ಕೊಂಕಣಿ ದ್ವೆಮಾಸಿಕಾಕ್ ಆದಿಂಥಾವ್ನ್ ಹಾಂವ್ ಬರವ್ನ್ ಆಯ್ಲಾಂ. ಕನ್ನಡ ಕವಿಂ ಪಯ್ಕಿ ನಿಸಾರ್ ಅಹಮ್ಮದ್ ಆನಿ ಕುವೆಂಪು ಮ್ಹಜ್ಯಾ ಮೊಗಾಚೆ! ಪರ್ಸಿಯನ್ ಕವಿ ರುಮಿ, ಮ್ಹಜೆರ್ ಪ್ರಭಾವ್ ಘಾಲ್ಲೊ ಕವಿ. ನಿರಾಶಾವಾದಾನ್ ಬುಡ್ಲ್ಲ್ಯಾ ಮ್ಹಜ್ಯಾ ಕವಿತಾಂಕ್ ಆಶಾವಾದಾಚಿ ಘುಂವ್ಡಿ ಜರ್ ಲಾಬ್ಲ್ಯಾ ತಾಕಾ ’ರುಮಿ’ ಕಾರಣ್! ಮ್ಹಜ್ಯಾ ಸಮಕಾಲೀನ್ ಜಾಯ್ತೆ ಕವಿ -ಮಾವ್ರಿಸ್, ಜೊಸ್ಸಿ, ಆಂಡ್ರು ಆನಿ ಹೆರಾಂಚ್ಯೊ ಕವಿತಾ ವಾಚುನ್ ತಾಂಚ್ಯಾ ಮೊಗಾರ್ ಪಡ್ಲ್ಲೊಂ ಆಸಾ.
ಮ್ಹಜ್ಯೆ ಆವಯ್ಚೆಂ, ಬಾಪಾಯ್ಚೆಂ ಆನಿ ಭಯ್ಣಿಚೆಂ ಮರಣ್ ಮ್ಹಜ್ಯಾ ಕವಿತಾಂನಿ ವೆವೆಗ್ಳಿಂ ವಸ್ತುರಾಂ ಶಿರ್ಕಾವ್ನ್ ತವಳ್ತವಳ್ ವಯ್ರ್ ಯೆತೇ ಆಸ್ತಾ. ಹ್ಯಾ ಮರ್ಣಾವರ್ವಿಂ ಮ್ಹಾಕಾ ರೆವ್ಡಾಲ್ಲೆಂ ಭ್ಯೆಂ, ಮಾಗೀರ್ ಸಂಪೂರ್ಣ್ ಸಲ್ವೊನ್ ’ಮರ್ಣಾಕ್ ಯೆವ್ಕಾರ್’ ದಿಂವ್ಚ್ಯಾಪಾಸುನ್ ಪಾವ್ಲ್ಲೆಂ ಮ್ಹಜ್ಯೆ ಕವಿತೆಂನಿ ಝಳ್ಕತಾ.
ಪುಣ್ ಪಾಟ್ಲ್ಯಾ ದೋನ್ ವರ್ಸಾಂಥಾವ್ನ್ ತಸಲ್ಯಾ ಎಕಾ ಕಾಳಾಂತ್ಲೊ ಹಾಂವ್ ಸವ್ಕಾಸ್ ಉತ್ರೊನ್ ಆಯಿಲ್ಲ್ಯಾಬರಿ ಮ್ಹಾಕಾ ಭೊಗ್ತಾ. ಅಂತರ್ರಾಷ್ಟ್ರೀಯ್ ರಾಜಕೀ ಗಜಾಲಿ ಆನಿ ಆಶಾವಾದಾಚಿಂ ಬಳ್ವಂತ್ ಬುರುಜಾಂ ಮ್ಹಜ್ಯಾ ಕವಿತಾಂನಿ ಆಯ್ಲೆವಾರ್ ಹಾಂವ್ ಬಾಂದುಂಕ್ ಸಕ್ಲಾಂ. ಮ್ಹಣ್ತಾನಾ ’ಮೊಗಾಪೆಳೊ’ ಕವಿತೆಂಚ್ಯಾ ಉತಳ್ ಮೊಗಾಂತ್ಲ್ಯಾನ್ ಪಾಶಾರ್ ಜಾವ್ನ್, ’ಫಿಂತಾಂ’ ಕವಿತೆಂಚ್ಯಾ ನಿರಾಶ್ವಾದಾಚ್ಯಾ ಪಾಯ್ವಾಟೆರ್ ಝರ್ಕಟ್ಲ್ಲ್ಯಾ ಮ್ಹಜ್ಯಾ ಕವಿತಾಂಕ್ ಆತಾಂ ’ವಾಟ್’ ಕವಿತಾಂದ್ವಾರಿಂ ನವಿಚ್ ದಿಶಾ ಲಾಬ್ಲ್ಯಾ ಮ್ಹಳ್ಳೆಂ ಹಾಂವ್ ಸಮ್ಜತಾಂ. ಆಯ್ಲೆವಾರ್ ಕವಿತೆಂತ್ಲ್ಯಾ ’ಗಝಲ್’ ’ಹೈಕು’ ’ಸೆಸ್ಟಿನಾ’ ’ಸೊನೆಟ್’ ರುಪಾಂವಿಶಿಂ ಹಾಂವೆಂ ಅಭ್ಯಾಸ್ ಸುರು ಕೆಲಾ. ಬೋವ್ಶಾ ಕೊಂಕಣಿಕ್ಚ್ ಪಯ್ಲೆಂಚಿಂ ಆಪುಟ್ ’ಗಝಲಾಂ’ ಹಾಂವೆಂ ಲಿಕ್ಲ್ಯಾಂತ್, ’ಹೈಕು’ ಲಿಕ್ಲ್ಯಾತ್. ಕವಿತಾ ಜಿವಿತಾಚ್ಯಾ ನವ್ಯಾ ಹುಂಬ್ರಾರ್ ಪಾಯ್ ತೆಂಕ್ತಾನಾ ಅಸಲೊ ಏಕ್ ಅಭ್ಯಾಸ್ ಮ್ಹಾಕಾ ಗರ್ಜೆಚಿ ತಾಂಕ್ ಜೋಡ್ನ್ ದಿತಲೊ ಮ್ಹಳ್ಳೆಂ ಹಾಂವ್ ಭರ್ವಸ್ತಾಂ ಆನಿ ಮ್ಹಾಕಾ ಯೆದೊಳ್ವರೇಗ್ ಶಾಂತ್ಪಣಿಂ ಆಯ್ಕಲ್ಲ್ಯಾ ತುಮ್ಕಾಂ ದೇವ್ ಬರೆಂ ಕರುಂ ಮ್ಹಣ್ತಾಂ.
- ಮೆಲ್ವಿನ್ ರೊಡ್ರಿಗಸ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.