ಕವಿತಾकविताPoem
ಜ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 7
ವಿಶಯ್: ಮ್ಹಜೊ ಮಾಂಯ್ಗಾಂವ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಆಮ್ಚೊ ಮಾಂಯ್ಗಾಂವ್ ಮ್ಹಣ್ತಾನಾ ಕೊಣಾಕ್ ಅಭಿಮಾನ್ ಭೊಗಾನಾ ಜಾಯ್ತ್? ಜಿಯೆಂವ್ಚಾ ಹರ್ಯೆಕಾ ಮನ್ಶಾಕ್, ಜಾಂವ್ ತೊ ಖಂಚಾಯ್ ಜಾತಿಚೊ, ವ್ಯಾಪ್ತೆಚೊ, ಕುಳಿಯೆಚೊ ವಾ ವರ್ಗಾಚೊ. ಪುಣ್ ಹರ್ಯೆಕ್ಲ್ಯಾಕ್ ಆಪಾಪ್ಲೊ ಮಾಂಯ್ಗಾಂವ್ ಮ್ಹಳ್ಳೊ ಆಸಾ. ಸಂಸಾರಾಂತ್ ಆಪ್ಲ್ಯಾ ಆವಯ್ವಿಶಿಂ, ಆಪ್ಲ್ಯಾ ಗಾಂವಾವಿಶಿಂ ಕವಿತಾ ಘಡೊಂಕ್ ನಾತ್ಲ್ಲಿ ಭಾಸ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಹೊ ವಿಶಯ್ ತಿತ್ಲೊ ಕಾಳ್ಜಾಕ್ ಲಾಗ್ಶಿಲೊ. ಕವಿತಾ ಜರ್ ಕಾಳ್ಜಾಚಿ ಭಾಸ್ ತರ್ ಹೊ ವಿಶಯ್ ಸಯ್ತ್ ಕಾಳ್ಜಾಕ್ ಲಗ್ತಿ ಜಾಲ್ಲೊಚ್ಚ್.
ಕೊಂಕ್ಣೆಂತ್ ಸಯ್ತ್ ಅಪ್ಲ್ಯಾ ಮಾಂಯ್ಗಾಂವಾಚೆರ್ ಜಾಯ್ತ್ಯಾ ಕವಿಂನಿ ಅಪುರ್ಭಾಯೆಚಿಂ ಕವಿತಾ ಬರಯ್ಲ್ಯಾಂತ್, ಫಾಮಾದ್ ಕವಿ
ಜೊಸ್ಸಿ ಪಿಂಟೊ ಕಿನ್ನಿಗೋಳಿ ತಸಲ್ಯಾ ಕವಿಂನಿ ಕಾಡ್ಲ್ಲ್ಯಾ ಬುಕಾಚೆಂ ನಾಂವ್ಯ್ "ಮ್ಹಜೊ ಗಾಂವ್" ಆನಿ ಭೋವ್ಶಾ ತಾಂತ್ಲೆಂ ಏಕ್ ಕವಿತಾ ಪದಾರುಪಾರ್ ಘರ್ ಘರಾಂನಿ ಆಯ್ಕೊಂಕ್ ಮೆಳ್ಚೆಂ;
"ಗಾಂವ್ಗೊ ಚೆಡ್ವಾ ಮ್ಹಜೊ ಗಾಂವ್ಗೊ
ಭಾರಾ ಗಾಂವಾಭರ್ ತಾಚೆಂ ನಾಂವ್ಗೊ
ವ್ಹಡ್ವಿಕಾಯ್ ಕಾಂಯ್ ಸಾಂಗ್ಚಿ ನ್ಹಂಯ್
ಪಳೆಲ್ಲೆಖರಿತ್ ತುಕಾ ಕಳ್ಚೆಂ ನ್ಹಂಯ್
ಗಾಂವಾಕ್ ಯೆಗೊ ಮಾಗಿರ್ ಸಾಂಗ್ಗೊ
ದುದಾ ಮೊಂವಾಚೊ ಮ್ಹಜೊ ಗಾಂವ್ಗೊ.."
ಆನಿ ಭಾರತಾಚೊ ಫಾಮಾದ್ ಗಜಲ್ ಗಾವ್ಪಿ ಅನುಪ್ ಜಲೋಟಾನ್ ತ್ಯಾ ಪದಾಕ್ ತಿತ್ಲ್ಯಾಚ್ ಅಪುರ್ಭಾಯೆನ್ ಗಾಯಿಲ್ಲೆಂ ಭೋವ್ಶಾ ಆಮಿಂ ಚಡ್ತಾವ್ ಆಯ್ಕೊನ್ ಜಾಣಾಂವ್.
ಹೆಂ ಪದ್-ಕವಿತಾ ಅಜಿಕ್ ಪಂದ್ರಾ-ಸತ್ರಾ ವರ್ಸಾಧಿಂ ಘಡ್ಲ್ಲೆಂ. ಆತಾಂಚಾ ಪರಿಗತೆಂತ್ ಹೆಂ ಕಿತ್ಲೆಂ ವಾಸ್ತವ್ ತೆಂ ಸಾಂಗ್ಚಿ ಗರ್ಜ್ ಮ್ಹಣ್ ಭೊಗಾನಾ.
ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ತ್ಯಾ ತ್ಯಾ ಕವಿಚೆರ್, ತಾಚಾ ಚಿಂತ್ಪಾಚೆರ್ ಹೊಂದ್ವೊನ್ ಆಸಾ. ಪ್ರಸ್ತುತ್ ಪರಿಗತೆಂತ್ ಸಂಸಾರ್ಭರ್ ನಿರಾಶಾ, ದೂಕ್ ಭರೊನ್ ವೊಮ್ತೊತಾ ದೆಖುನ್ ಕವಿಂನಿ ಅಪ್ಲ್ಯಾ ಕವಿತೆಂನಿ ಹ್ಯಾ ಸಂಸಾರಾಕ್ ಆಶಾವಾದ್ ಉಭ್ಜಾಂವ್ಚಿಂ ಕವಿತಾ ಬರಂವ್ಚಿ ಗರ್ಜ್ ಮ್ಹಳ್ಳೊ ವಾದ್ ಮಾಂಡ್ಚೆ ಜಾಯ್ತೆ ಆಸಾತ್. ಸಂಸಾರ್ ಉಲ್ಟೊ ಜಾಯ್ತ್ ತರ್ಯ್ ಅಪುಣ್ ಆಪ್ಲ್ಯಾ ಆವಯ್ವಿಶಿಂ ಜಾಂವ್, ಆಪ್ಲ್ಯಾ ಮಾಂಯ್ಗಾಂವಾ ವಿಶಿಂ ಜಾಂವ್ ವ ಆಪ್ಲ್ಯಾ ಭಾಶೆವಿಶಿಂ ನಿರಾಶ್ವಾದಿ ಬರಾಪ್ ಬರಂವ್ಚೊಂನಾ ಮ್ಹಳ್ಳೆ ಧ್ಯೇಯ್ ಘೆತ್ಲ್ಲೆ ಕವಿಯ್ ಜಾಯ್ತೆ ಆಸಾತ್. ತಾಂಚೆಂ ಚಿಂತಾಪ್ ಸಾರ್ಕೆಂ ನ್ಹಂಯ್ ಮ್ಹಣ್ಚೊ ಇರಾದೊ ಭಿಲ್ಕುಲ್ ನ್ಹಂಯ್. ಸತ್ ಸಾಂಗ್ಚೆಂ ತರ್ ಸಂಸಾರಾಂತ್ ಅನೀತೆಥಾವ್ನ್ ನೀತ್ ಸೊಧ್ಚೆಚ್ ಖರೆ ಕವಿ/ಕಲಾಕಾರ್.
ಪುಣ್ ಸತಾತ್ ತೆಚ್ಚ್ಪರಿಂ ಮಾಪ್ಚೆ, ಆನಿ ತೆಚ್ಚ್ಪರಿಂ ಪಿಂತ್ರಾಂವ್ಚೆ ವಾಸ್ತವ್ವಾದಿ ಕವಿಯ್ ಆಮ್ಚೆ ಮಧೆಂ ಆಸಾತ್ ಮ್ಹಣ್ತಾನಾ ವಾಚ್ಪ್ಯಾಂಕ್ ದೊನೀಂ ಪ್ರಕಾರಾಚ್ಯೊ ಕವಿತಾ ಹಾಂಗಾಸರ್ ಮೆಳ್ಳ್ಯಾತ್ ಮ್ಹಳ್ಳೊ ಸಂತೊಸ್ ಮ್ಹಜೊ.
ಕವಿ ಆರ್ಥರ್ ರೋಶನ್ ಪಿರೇರ್, ಒಮ್ಜೂರ್ ಫಿರ್ಗಜೆಚೊ ಪ್ರಸ್ತುತ್ ದುಭಾಯ್ ಶೆರಾಂತ್ ವಸ್ತಿ ಕರ್ನ್ ಆಸ್ಚೊ ತರ್ಯ್ ಅಪ್ಲ್ಯಾ ಮಾಂಯ್ಗಾಂವ್ಚೊ ವೋಡ್ ಆನಿ ಮೋಗ್ ತಾಚಾ ಕಾಳ್ಜಾಂತ್ ಕೆದಿಂಚ್ ಉಣಿಂ ಜಾಯ್ನಾ. ತಾಕಾ ಅಪ್ಲ್ಯಾ ಮಾಂಯ್ಗಾಂವಾಂತ್ ವ್ಹಾಳ್ಚ್ಯೊ ದುದಾ ಮೊಂವಾಚ್ಯೊ ಝರಿ ಅಜೂನ್ ದಿಸ್ತಾತ್. ಕವಿಚೆಂ ಚಿಂತ್ಪಾ ತ್ರಾಣ್ ಕಿತ್ಲೆಂ ಭಳ್ವಂತ್ ತೆಂ ವಾಚ್ಪಿಚ್ಚ್ ಅಂದಜ್ ಕರುಂಕ್ ಸಕ್ತಿತ್.
ಕವಯತ್ರಿ ವಾಯ್ಲೆಟ್ ಬಾಯ್ ಅಪ್ಲ್ಯಾ ಮಾಂಯ್ಗಾಂವಾಂತ್ ಸರ್ಗ್ ಆಸ್ಲ್ಯಾರ್ಯೀ, ಜರ್ ಅಪ್ಲೊ ಘರ್ಕಾರ್ ಪರ್ಗಾಂವಾಂತ್ ಆಸತ್ ತರ್ ಕಿತೆಂ ಫಾಯ್ದೊ ಮ್ಹಳ್ಳೆಂ ಚಿಂತಾಪ್ ಅಪ್ಲ್ಯೆ ಕವಿತೆಂತ್ ವ್ಹಾಳಯ್ತಾನಾ ಕವಿತಾ ಜಿಣ್ಯೆ ಅನ್ಭೋಗಾಚಾ ಸುತಾಂನಿ ಸೊಭೀತ್ ರಿತಿನ್ ವಿಣ್ಲ್ಲೆಂ ದಿಸೊನ್ ಯೆತಾ.
ಕವಯತ್ರಿ ನಿರ್ಮಲಾ ಗೋವಿಯಸ್ ಅಪ್ಲ್ಯಾ ಮಾಂಯ್ಗಾಂವ್ ’ಮಂಗ್ಳುರ್’ ಥಾವ್ನ್ ಹಜಾರೊಂ ಮಯ್ಲಾಂ ಪಯ್ಸ್ ಆಸಾ ತರ್ಯೀ ತಿಚೆಂ ಕಾಳಿಜ್ ಅಜೂನ್ ಅಪ್ಲ್ಯಾ ಮಾಂಯ್ಗಾಂವ್ಚಾ ಉಡಾಸಾನ್ ಉಡ್ತಾ ಆನಿ ಮೊಗಾನ್ ತೊವ್ತಾ.
ಕೊಂ
ಮ್ಹಣ್ತಾ ಮಾಂಯ್ಗಾಂವ್
ಮ್ಹಳ್ಯಾರ್ ’ಮಂಗ್ಳುರ್’
ಮಾತ್ರ್ ಮ್ಹಣೊನ್?
ಅಪ್ಣಾಚೊ ಮಾಂಯ್ಗಾಂವ್
’ಪಾಂಗ್ಳಾ’ ಆನಿ ಆಪ್ಲ್ಯಾ ಮಾಂಯ್ಗಾಂವಾಚೆರ್
ಅಪ್ಣಾಕ್ ಅಭಿಮಾನ್ ಆನಿ ಮೋಗ್
ಆಸಾ ಆನಿ ತಾಕಾ ಕಾರಾಣಾಂಯ್
ಆಸಾತ್ ಮ್ಹಣ್ ಅಪುರ್ಭಾಯೆನ್,
ಅಪ್ರೂಪಾಯೆನ್ ಕವಿತಾ
ಬರಂವ್ಚಿ ಬಾಯ್ ರೀನಾ ಕ್ವಾಡ್ರಸ್
ಅಪ್ಲ್ಯಾ ಕವಿತೆಂತ್ ವರ್ಣಿತಾ.
ಮ್ಹಾಕಾ ಕಿತ್ಯಾಕ್ಗಿ ಮ್ಹಜಾ ಮಾಂಯ್ಗಾಂವಾಂತ್ ವ್ಹಾಳ್ಚಾ ರಗ್ತಾಚಾ ವ್ಹಾಳಾಚೆಂ ಚಿತ್ರಣ್ ದಿಸೊನ್ ಯೆತಾ, ಮನಿಸ್ ಎಕಾಮೆಕಾಚಿಂ ಮಾಸಾಂ ಖಾಂವ್ಕ್, ಎಕಾಮೆಕಾ ಲುಟುನ್ ಖಾಂವ್ಕ್ ರಾಕೊನ್ ರಾಂವ್ಚೆಂ ದಿಸೊನ್ ಯೆತಾನಾ, ಹಾವೆಂ ’ಕಲ್ಪನಾಂ (ಫಟ್)’ ಆನಿ ’ವಾಸ್ತವ್ (ಸತ್)’ ಹಾಂಚೆಮಧ್ಲಿ ವಿಂಚವ್ಣ್ ಕರಿಜಾಯ್ ಪಡ್ಲೆಂ ಆನಿ ಕಿತ್ಯಾಕ್ಗೀ ಮ್ಹಾಕಾ ವಾಸ್ತವ್ ಖಾಯ್ಸ್ ಜಾಲೆಂ ದೆಖುನ್ ತೆಂಚ್ ಚಿಂತಾಪ್ ಕವಿತೆಂಚ್ ವ್ಹಾಳಂವ್ಕ್ ಚಿಂತ್ಲೆಂ. ಚಡ್ತಾವ್ ಅಪ್ಲ್ಯಾಚ್ ಮನ್ಶಾಂಚಿ ನದರ್ ಸಯ್ತ್ ಶರ್ಟಾಚಾ ಬೊಲ್ಸಾಪರ್ಯಾಂತ್ ಮಾತ್ರ್ ಶಿವಾಯ್ ತ್ಯಾ ಬೊಲ್ಸಾಪಾಟ್ಲ್ಯಾನ್ ಏಕ್ ಉಡ್ಚೆಂ ಕಾಳಿಜ್ ಆಸಾ ಮ್ಹಳ್ಳೆಂ ತಾಂಕಾಂ ಗೊಮ್ಲಾಂ ಮ್ಹಳ್ಳೆಂ ಸಮ್ಜೊಂಕ್ ಮ್ಹಜೆಂ ಮನ್ ಕಬೂಲ್
ನಾ.
ಕವಯತ್ರಿ ಅವಿನಾ ಮಿಯಾರ್ ಹಿಕಾ ಆಮ್ಚಾ ಗಾಂವಾಂತ್ ಆಸ್ಚಿ ಆಮ್ಚಿ ಸಂಸ್ಕೃತಿ ಕಶಿ ದಿಸ್ತಾ ಮ್ಹಳ್ಳೆಂ ಪಳೆಯಾ, ಹಾಂಗಾಸರ್ ದೇವ್-ಧರ್ಮ್, ಸಂಸ್ಕೃತಿ ಹಿಶಿನ್ ದೀವ್ಳ್ ತಿಶಿನ್ ಖೊಮ್ಟಾಂ ಮಧೆಂ ಆಸೊನ್ ಕಶಿ ಅಮಾಯಕ್ ರಿತಿನ್ ಸಂಸಾರಾಚಿ ರಾಜ್ವಟ್ಕಿ ಚಲಯ್ತಾ ಪಳೆಯಾ. ಕವಿತಾ ಇಲ್ಲೆಂ ಬಂಡಾಯ್ ದೆಖುನ್ ಜಿವೆಂ ಜಿವೆಂ ಸತ್ ಕವಯತ್ರಿನ್ ಅಪ್ಲ್ಯೆ ಕವಿತೆಂತ್ ವ್ಹಾಳಯ್ಲಾಂ ಮಾತ್ರ್ ನ್ಹಂಯ್, ಸಮಾಜೆಂತ್ ಊಂಚ್ ಮನಿಸ್ ಮ್ಹಣ್ ಹರ್ಧೆಂ ಪೆಟ್ಚಾಂಕ್ ಪುರ್ತೆಂ ನಾಗ್ಡೆಂ ಕೆಲಾಂ.
ಕವಿ ಪರ್ಗಾಂವಾಂತ್
ಆಸೊನ್ ಅಪ್ಲ್ಯಾ ಮಾಂಯ್ಗಾಂವ್ಚೆರ್ ನಿಯಾಳ್
ಕರ್ತಾನಾ ಥಂಯ್ಚರ್ ಉದೆಂವ್ಚೆಂ ಪಿಂತುರ್ ಖರೆಂಚ್ ಜಾವ್ನ್
ಮಾಂಯ್ಗಾಂವ್ಚೆಂ ವರ್ಣನ್ ಕರುಂಕ್ ಪಾವ್ತಾ ಮ್ಹಣ್ಚಾಕ್
ಕವಿ ಅನಿಲ್ ಪೆರ್ನಾಲ್ ಹಾಚೆಂ ’ನಿಸರ್ಗ್’ ಕವಿತಾ
ಗೊವಾಯ್.
ಕವಿ ಆಸ್ಟಿನ್ ಪ್ರಭುನ್ ಆಮ್ಚಾ ಮಾಂಯ್ಗಾಂವ್ಚೆಂ ಚಿತ್ರಣ್ ಅಪುರ್ಭಾಯೆನ್ ದಿವುನ್ ಆಧ್ಲ್ಯಾ ಆನಿ ಆತಾಂಚಾ ಪರಿಗತೆಂತ್ ಬದ್ಲೊನ್ ಯೆಂವ್ಚಿಂ ಮನ್ಶಾ ರುಪಾಂ ಆನಿ ಮನ್ಶಾ ಚಿಂತ್ಪಾಚೆಂ ಉಲ್ಲೇಕ್ ಅಪುರ್ಭಾಯೆನ್ ಕೆಲ್ಲೆಂ ದಿಸೊನ್ ಯೆತಾ. ಹ್ಯಾ ಕವಿತೆಂತ್ ಕವಿನ್ ಸಭಾರ್ ದಿಶೆಂನಿ ಅಪ್ಲೆಂ ಚಿಂತಾಪ್ ವ್ಹಾಳಯಿಲ್ಲೆಂ ದಿಸೊನ್ ಯೆತಾ.
ಕವಿ ವಿನ್ಸಿ ಮೆಲ್ಕಾರ್ ಅಪ್ಲ್ಯಾ ಮಾಂಯ್ಗಾಂವಾಂತ್ ಆಸ್ಚಾ ಬರ್ಯಾ ಮನಾಚಾ ಮನ್ಶಾಂಕ್ ಉಡಾಸ್ ಕಾಡುನ್ ಅಪ್ಲ್ಯಾ ಮಾಂಯ್ಗಾಂವ್ಚಿ ವ್ಹಡ್ವಿಕ್ ಗಾವ್ನ್ ಆಸ್ತಾನಾ ಕವಯತ್ರಿ ಪ್ರಿಯಾಕ್ ಆಪ್ಲೊ ಮಾಂಯ್ಗಾಂವ್ ಏಕ್ ರಂಗ್ಮಂಚ್ ಆನಿ ಆಮಿಂ ಸಗ್ಳೆ ವೀಕ್ಶಕ್ ಮ್ಹಳ್ಳೆಂಪರಿಂ ಭೊಗ್ತಾ. ಕವಯತ್ರಿಚಾ ಚಿಂತ್ಪಾಸಕತ್ ಪಳೆಯಾ, ಸಗ್ಳೆ ತಾಳಿಯೊ ಪೆಟ್ತಾತ್ ದೆಖುನ್ ಆಮಿಂಯ್ ತಾಳಿಯೊ ಪೆಟ್ಚ್ಯೊ, ಸಗ್ಳಿಂ ಹಾಸ್ತಾತ್ ದೆಖುನ್ ಆಮಿಂಯ್ ಹಾಸ್ಚೆಂ.. ಹ್ಯಾ ರಂಗ್ಮಂಚಿಯೆರ್ ಸೊಭಿತ್ ದಿಸ್ಚಿಂ ತಿಂ ವಿದ್ರೂಪ್ ಮನ್ಶಾ ರಂಗ್ ಥಾಪವ್ನ್ ಘೆವ್ನ್ ಸೊಭಿತ್ ದಿಸ್ತಾತ್ ಶಿವಾಯ್ ಭಿತರ್ಲೆ ಭಿತರ್ ಸರ್ವ್ ಕುಸ್ಡಿಂ ಮ್ಹಳ್ಳೆಂ ಚಿಂತಪ್ ವ್ಹಾಳಯ್ತಾ.
ಕವಿ ಮೆಲ್ವಿನ್ ಜೆ. ವಾಸ್, ಪರತ್ ಏಕ್ ಪಾವ್ಟಿಂ ಅಪ್ಲ್ಯಾ ಅಸ್ವಶ್ಟ್ ಇಮಾಜೆಂಕ್ ಅಗೋಚರ್ ರಿತಿಚಾ ಪಾಲಂವಾಂತ್ ಗುಟ್ಲಾವ್ನ್ ಆಪ್ಲ್ಯಾ ಮಾಂಯ್ಗಾಂವಾಂತ್ ತಿಕಾ ಗುಲಾಮ್ಪಣ್ ದೀವ್ನ್, ತಿಚಾ ನಾಂವಾರ್ ಮಿರಂವ್ಚಾಂಕ್ ಹಳ್ತಾಚಿ ಖೊಟ್ ಮಾರುನ್ ಜಾಗಂವ್ಚೆಂ ಪ್ರೇತನ್ ಕರ್ತಾ;
’ಥಿಳೊ ಏಕ್ ಸುರ್ಯಾ ಆಂಗ್ಣಾಂತ್ ಕಡೊನ್ ತಾಂಬ್ಡೊ ದರ್ಯೊ ಜಾಂವ್ಚೆಂ ಚಿತ್ರಣ್’ ಆನಿ
’ಕೊಡ್ಶ್ಯಾವಯ್ಲ್ಯಾ ಮಾಡಾರ್ ನಿದೊನ್ ಸ್ವಪ್ಣಾಂ ರಂಗಂವ್ಚೊ ಚಂದ್ರ್ - ಅಪ್ಣಾಚೆಂ ರುಪ್ಣೆಂ ತಾಂತುಂ ಸೊಧ್ತಾ’ ಉತ್ರಾಂನಿ ಹೊ ಚಂದ್ರ್ ಕೊಣ್ಯ್ ನ್ಹಂಯ್, ಅಪ್ಲ್ಯಾ ಸುರಾತಾಕ್ ಹೆರಾಂಕ್ ಕಶೆಂ ಭಸ್ಮುಂಚೆಂ ಆನಿ ಅಪ್ಣಾಚೆಂ ನಾಂವ್ ಕಶೆಂ ಥಿರ್ ಕರ್ಚೆಂ ಮ್ಹಳ್ಳೆಂ ಸ್ವಪಾಣ್ ದೆಖ್ಚಾಂಕ್ ಬೋಟ್ ಜೊಕ್ತಾ ಆನಿ ಅಖ್ರೇಕ್ ತ್ಯೇ ಆವಯ್ಚಿ ಪರಿಗತ್ ಅಶಿ ವರ್ಣಿತಾ ಆನಿ ಅಪ್ಲಿ ಖರಿ ವಿಮರ್ಶಾತ್ಮಕ್ ನದರ್ ಭಂವ್ಡಾಯ್ತಾ;
’ಅಸ್ಕತ್ ಆವಯ್ ಏಕ್ ಪಾವ್ಳೆಲ್ಲ್ಯೊ ಕಣ್ಶ್ಯೊ ವಿಂಚಾ ಕಾಂಕ್ಣಾಕ್ ಕಾಂಕಾಣ್ ಆಧಾಳ್ತಾ ಆನಿ ಖೊಂವ್ಚಿ ಶಿರೆಕ್ ತುಟಯ್ತಾ..’
ಕವಿ ಕ್ಲೆರೆನ್ಸ್ ಕೈಕಂಬ ಅಪ್ಲ್ಯಾ ಕವಿತೆಂತ್ ಹ್ಯಾ ಸೊಭಿತ್ ಪ್ರಿತುಮೆಕ್ ರಚ್ಲ್ಲ್ಯಾ ದೆವಾಕ್, ಹಿ ಪ್ರಥ್ವಿ ತೆಚ್ಚ್ ಸೊಭಾಯೆನ್ ದವ್ರುಂಕ್ ಉಲೊ ದಿಂವ್ಚೊ ದಿಸೊನ್ ಯೆತಾ. ದೆವಾನ್ ರಚ್ಲ್ಲ್ಯಾ ಹ್ಯಾ ರಚ್ನೆಂತ್ ಹರ್ಯೆಕಾಕ್ ಏಕ್ ಸ್ಥಾನ್-ಮಾನ್ ಆಸಾ ತಶೆಂಚ್ ಮೋಲ್ ಆಸಾ. ದೆಖುನ್ ಮನಿಸ್ ಅಪ್ಲ್ಯಾ ಸ್ವಾರ್ಥಿ ಇರಾದ್ಯಾಂಕ್ ಹ್ಯಾ ರಚ್ನೆಂಕ್ ಬರೆಂ-ವಾಯ್ಟ್ ಮ್ಹಣ್ ವೊಲಾಯ್ತ್ ತರ್ಯ್ ರಚ್ಲ್ಲೊ ದೇವ್ ಜಾಣಾ ’ಸತ್’ ಮ್ಹಳ್ಳೆಂ ಚಿಂತಾಪ್ ಉಟಯ್ತಾ..
ಅಪ್ರೂಪಾಯೆಚೊ ಕವಿ ವಿಲ್ಫ್ರೆಡ್ ಲೋಬೊ ಪಡೀಲ್ ಅಪ್ಲ್ಯಾ ಮಾಂಯ್ಗಾಂವಾಂತ್ ಆಸ್ಚಾ ಸಕ್ತೆಚಿ ಖರಿ ವಳೊಕ್ ನಾಸ್ತಾಂ ಪೊಕೊಳ್ ರಿತಿ ರಿವಾಜೆಂಚೆ, ಪೊಕೊಳ್ ಸಂಸ್ಕೃತೆಚೆ, ಪೊಕೊಳ್ ಭಾಶೆಚೆ ಗುಲಾಮ್ ಜಾಲ್ಲ್ಯಾಂಕ್ ಮೊವಾಳಾಯೆನ್ ಜಾಗಂವ್ಕ್ ಏಕ್ ಪ್ರಾಮಾಣಿಕ್ ಪ್ರೇತನ್ ಕರ್ಚೆಂ ದಿಸೊನ್ ಯೆತಾ. ಕವಿತೆಂತ್ ಖಂಯ್ಸರ್ಯ್ ಬೊಬಾಟ್ ನಾಸ್ತಾಂ ಶಾಂತ್ ರಿತಿನ್ ವ್ಹಾಳೊನ್ ಮಾಂಯ್ಗಾಂವ್ಚಿ ತಶೆಂಚ್ ಕವಿತೆಚಿ ಸೊಭಾಯ್ ದೊಡ್ತಿ ಕರುನ್ ಖರೆಂಚ್ ಜಾವ್ನ್ ಮಯ್ನ್ಯಾಚೊ ಕವಿ ಜಾವ್ನ್ ಜಿಕೊನ್ ಯೆತಾನಾ ತಾಕಾ ಉಲ್ಲಾಸ್ ಪಾಟಯ್ತಾಂ..
[ವಾಂಟೆಲಿ ಜಾಲ್ಲಿಂ]
2. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
3. ರೀನಾ ಕ್ವಾಡ್ರಸ್, ಪಾಂಗ್ಳಾ/ಕುವೇಯ್ಟ್.
4. ಆರ್ಥರ್ ರೋಶನ್ ಪಿರೇರ್, ಒಮ್ಜೂರ್.
5. ವಾಯ್ಲೆಟ್ ಜೆ.ಪಿರೇರ್, ಮಂಗ್ಳುರ್.
6. ಕ್ಲೆರೆನ್ಸ್ ಪಿಂಟೊ, ಕೈಕಂಬ/ಮಸ್ಕತ್.
7. ಆಸ್ಟಿನ್ ಪ್ರಭು ನಂತೂರ್/ಚಿಕಾಗೊ.
8. ವಲ್ಲಿ ಕ್ವಾಡ್ರಸ್, ಅಜೆಕಾರ್/ಕುವೇಯ್ಟ್.
9. ನಿರ್ಮಲಾ ಗೋವಿಯಸ್, ಬೆಂದುರ್/ಮಸ್ಕತ್.
10. ವಿನ್ಸಿ ಮೆಲ್ಕಾರ್, ಬೆಂಗ್ಳುರ್.
11. ಮೆಲ್ವಿನ್ ಜ್. ವಾಸ್, ಕೆಲರಾಯ್/ಕುವೇಯ್ಟ್.
1. ಮ್ಹಜೊ ಗಾಂವ್ ಆನಿ ಸಂಸ್ಕೃತಿ [ಮಯ್ನ್ಯಾಚೆಂ ಕವಿತಾ]
ವಿಲ್ಫ್ರೆಡ್ ಲೋಬೊ, ಪಡೀಲ್ಮ್ಹಜ್ಯಾ
ಗಾಂವ್ಚಾ ವ್ಹಾಳ್ಚಾ ವ್ಹಾಳಾ-ಝರಿಂನಿ
ಜುಳು ಜುಳು ಗಾಣಾಂ ಆಸಾತ್
ಕಪಟ್ ನಾತ್ಲ್ಲ್ಯಾ ನೆಣ್ತ್ಯಾ ಮನಾಂನಿ
ಮೊಗಾ ದರ್ಯೊ ಲ್ಹಾರಾಂ ಆಸಾತ್
ಕಂಯ್ಚಿ ಜಿವಾಝರ್
ಸೊಧುನ್ ಗೆಲಾಯ್ ಇಶ್ಟಾ
ಮೊಗಾ ಭಿಂ ಖಿರ್ಲನಾತ್ಲ್ಲ್ಯಾ
ಸುಕಿಧಾಡೆಚ್ಯಾ ಶೆರಾಕ್?
ಮ್ಹಜ್ಯಾ ಗಾಂವ್ಚ್ಯಾ ರಾನಾಂ ವನಾಂನಿ
ಸೊಭಾಯೆಚಿ ರಾಸ್ ಆಸಾ
ಏಕ್ಪಣಾನ್ ಜಿಯೆಂವ್ಚಿ
ಜಿಣ್ಯೆ ಆಸ್ಮಿತಾಯ್ ಆಸಾ
ಖಂಯ್ಚಿ ಸೊಭಾಯ್
ಸೊಧುನ್ ಗೆಲಾಯ್ ಇಶ್ಟಾ
’ಸಂಸ್ಕೃತಿ’ ನಾತ್ಲ್ಲ್ಯಾ
ವಿಕೃತೆಚ್ಯಾ ಕೊಂಡಾಂತ್?
ಮ್ಹಜ್ಯಾ ಗಾಂವ್ಚಾ ಲೊಕಾಥಂಯ್
ಖಡ್ಪಾಂ ಫೊಡ್ಚಿ ತಾಂಕ್ ಆಸಾ
ವಾರೆಂ ಝಡ್ ಪಾವ್ಸಾಕ್
ಶರ್ತಾಂ ಮಾರ್ಚೆಂ ಕಾಳಿಜ್ ಆಸಾ
ಖಂಯ್ಚೆಂ ಥಿರಾಸಣ್ ಸೊಧುನ್ ಗೆಲಾಯ್ ಇಶ್ಟಾ
ಸತಾವಾಟೆಚಿ ಝಳಕ್ ನಾತ್ಲ್ಲ್ಯಾ
ನಕ್ಲಿ ವೆಸಾಚ್ಯಾ ಸಂಸಾರಾರ್?
ಮ್ಹಜ್ಯಾ ಗಾಂವ್ಚಾ ತೊಟಾಂನಿ
ಕಿರ್ಲಾಂ ವೊಂಪ್ಚೊ ಸುರ್ಯೊ ಆಸಾ
ದಿಲ್ಲೊ ಗಾಂವ್ ಪರ್ಜಳಾಂವ್ಚಿ
ಶೆಗುಣಾಚಿ ಚಲಿ ಆಸಾ
ಖಂಯ್ಚಿಂ ಸೊಭಾಯೆ ಕಿರ್ಣಾಂ
ಸೊಧುನ್ ಗೆಲಾಯ್ ಇಶ್ಟಾ
ಕಾಳೊಕ್ ಧಾಂಪ್ಲ್ಲ್ಯಾ
ಪಾಳ್ ಪಡ್ಲ್ಲೆ ಭುಂಯ್ಕ್?
ಮ್ಹಜ್ಯಾ ಗಾಂವ್ಚ್ಯಾ ಶೆತಾಂನಿ
ಭಾಂಗ್ರಾತಸಲೆಂ ಬೆಳೆಂ ಅಸಾ
ಮಿನತೆಚ್ಯಾ ಫಳಾಕ್ ಫುಲೊನ್
ಸಂಭ್ರಮ್ಚೆಂ ಮನ್ ಆಸಾ
ಖಂಯ್ಚಿ ಗಿರೇಸ್ತ್ಕಾಯ್
ಸೊಧುನ್ ಗೆಲಾಯ್ ಇಶ್ಟಾ
ತೃಪ್ತೆನ್ ಜೇಂವ್ಕ್ ಕಳಾನಾತ್ಲ್ಲ್ಯಾ
ಕೊಂಕ್ರಿಟ್ ರಾನಾಕ್?
ಮ್ಹಜ್ಯಾ ಗಾಂವಾಂತ್ ಕಿತೆಂ ಆಸಾ, ಕಿತೆಂ ನಾ
ಜಾಣಾಂಯ್ಗಿ ಇಶ್ಟಾ
ಬರಾಪ್ ನಾತ್ಲ್ಲ್ಯಾ ನೆಣ್ತ್ಯಾ ಬೊಡಾಂಕ್
ಜಿಣಿ ಫುಡ್ ಕರ್ಚೆಂ ಹಟ್ ಆಸಾ
ತಂತ್ರ್ಗಿನ್ಯಾನಾಚೆ ಸುಕಿಧಾಡೆಂತ್
ಮನ್ಶಾ ಮನಾಂಚೊ ಸಂವಾದ್ ಆಸಾ
ಖಂಚ್ಯಾ ದುಕಾಕ್ಯಿ ಕರ್ಗಾನಾತ್ಲ್ಲೆಂ
ಫಾತ್ರಾತಸ್ಲೆಂ ಕಾಳಿಜ್ ಆಸಾ
ವೆಳಾ ಪ್ರದೇಶಾಕ್ ಸರಿ ಜಾಂವ್ಚಿ
ಭಾಸ್ ಸಂಸ್ಕೃತಿ ಆಸಾ
ದೆಕುನ್ಂಚ್ ಇಶ್ಟಾ
ದೀಸ್ಭರ್ ಘಾಮ್ ಪಿಳುನ್
ಪೋಟ್ ಥಾಂಬಂವ್ಚೊ ಮ್ಹಜೊ ಲೋಕ್
ಊಬ್ ವೊಲಿಂತ್ ಏಕ್ ಜಾತಾ..
2. ರಂಗ್ಮಂಚ್ [ಪ್ರಿಯಾ ಸಿಕ್ವೇರಾ, ಫೆರಾರ್]
ರಂಗಮಂಚಾರ್
ಚಲೊನ್ ಆಸಾತ್ ನಾಟಕ್
ಪಾತ್ರ್ ಸಭಾರ್
ಖೆಳ್ ಹಜಾರ್
ಮಿನುಟಾಕ್ ಏಕ್ ಪಾವ್ಟಿಂ
ಬದಲ್ಚೊ ವೇಸ್
ಬೊಗ್ತಾ ಅಶೆಂ
ಪಳೆವ್ನ್ ತಾಂಕಾ
ತೆಂ ಕಿತ್ಲೆ ಬರೆ!
ಪುಣ್ ಸತ್ ಗಜಾಲ್ ಆಶಿ
ವಿದ್ರೂಪ್ ತೆ
ಸೊಭಿತ್ ದಿಸೊಂಕ್
ಥಾಪ್ತಾತ್ ರಂಗ್!
ತ್ಯಾ ರಂಗಮಂಚಾರ್
ಮಧೆಂ ಮಧೆಂ
ವೊಡ್ತಾತ್ ಪರ್ಧೊ
ಅಖೇರ್ ಕರುನ್
ಮುಖ್ಲೊ ಭಾಗ್
ಸುರು ಕರುಂಕ್
ನವೊ ವಿಭಾಗ್
ವೀಕ್ಶಕ್ ಆಮಿಂ
ಸಗ್ಳಿಂ ಹಾಸ್ತಾನಾ
ಆಮಿಂಯ್ ಹಾಸ್ತಾಂವ್
ತಾಳಿಯೊ ಪೆಟ್ತಾನಾ
ಆಮಿಂಯ್ ಪೆಟ್ತಾಂವ್
ತಮಾಸೊ ಪಳೆಯ್ತಾಂವ್
ತ್ಯಾ ರಂಗಮಂಚಾಂತ್ಲ್ಯಾ
ಪಾತ್ರಧಾರಿಂಕ್ ಪಳೆವ್ನ್
ಸಲಾಮ್ ಮಾರ್ತಾಂವ್
ಪಾಂಯ್ಯಿ ಧುತಾಂವ್
ಬುದ್ವಂತ್ ಆಮಿಂ!
ಘಡ್ಯೆನ್ ವೇಸ್ ಬದ್ಲುಂಚೆ ಪಾತ್ರ್ಧಾರಿ
ಮ್ಹಣ್ ಜಾಣಾ ಜಾಲ್ಯಾರೀ
ವೇಸ್ ತಾಂಚೊ ಉಜ್ವಾಡಾಕ್ ಹಾಡುಂಕ್
ರಂಗಮಂಚಾರ್ ಕೆದಿಂಚ್ ಚಡ್ಚೆನಾಂವ್
ಆಮಿಂ ವೀಕ್ಶಕ್
ಫಕತ್ತ್ ನಿಶ್ಚಲ್ ವೀಕ್ಶಕ್!
ಫಕತ್ತ್ ನಿರ್ಜೀವ್ ವೀಕ್ಶಕ್!!
3. ಮ್ಹಜೊ ಗಾಂವ್ ಪಾಂಗ್ಳಾ [ರೀನಾ ಕ್ವಾಡ್ರಸ್, ಪಾಂಗ್ಳಾ]
ಮ್ಹಜೊ ಗಾಂವ್ ಪಾಂಗ್ಳಾ
ನಶಿಬಾನ್ ಮ್ಹಾಕಾ ಮೆಳ್ಳಾ
ಸರ್ವ್ ಸೊಭಾಯೆನ್ ತೊ ಸಜ್ಲಾ
ಮ್ಹಜೆಂ ಕಾಳಿಜ್ ಸಂತೊಸಾನ್ ಫುಲ್ಲಾಂ
ಖುಶಿ ಪಾವ್ತಾಂ ಹಾಂವ್ ಹ್ಯಾ ಗಾಂವಾಂತ್ ರಾವೊಂಕ್
ಸಗ್ಳಿಂ ಅತ್ರೆಗ್ತಾತ್ ಹಾಚಿ ಸೊಭಾಯ್ ಪಳೆಂವ್ಕ್
ಸರ್ವ್ ವಾವುರ್ತಾತ್ ಸಾಂಗಾತಾ ಮೆಳೊನ್
ಆಜ್ ಹಾಚಿ ಕಿತೆಂ ಕೀರ್ತ್ ಗಾಜಂವ್ಕ್ ಲಾಗ್ಲ್ಯಾ ಗಾಂವಾರ್ ಗಾಂವ್
ಸಭಾರ್ ಸಂಘ್-ಸಂಸ್ಥೆ ಆಸಾತ್ ಆಮ್ಚಾ ಗಾಂವಾಂತ್
ಸೆವಾ ದೀವ್ನ್ ಆಸಾತ್ ನಿಸ್ವಾರ್ಥ್ಪಣಾನ್
ದಿಸಾಂದೀಸ್ ಎಕೇಕ್ ಕಾರ್ಯಕ್ರಮ್ ದಿವುನ್
ಸಹಕಾರ್ ದೀವ್ನ್ ಆಸಾತ್ ಸರ್ವಾಂಕ್ ಮುಕಾರ್ ಯೇಂವ್ಕ್
ಆಜ್ ಜಾಲಾ ಹೊ ಏಕ್ ನಾಂವಾಡ್ದಿಕ್ ಗಾಂವ್
ಸಗ್ಳ್ಯಾನಿತ್ಲ್ಯಾನ್ ಆಯ್ಕೊಂಕ್ ಮೆಳ್ತಾ ಹ್ಯಾ ಗಾಂವ್ಚೆಂ ನಾಂವ್
ಗರ್ವ್ ಭೊಗ್ತಾ ಸಾಂಗೊಂಕ್ ಹ್ಯಾ ಪಾಂಗ್ಳಾಚಿಂ ಹಾಂವ್
ಸಗ್ಳ್ಯಾ ಥಂಯ್ ಅಸಲಿಂಚ್ ಭಗ್ಣಾಂ ಯೇಂವ್
4. ಮ್ಹಜೊ ಗಾಂವ್ [ಆರ್ಥರ್ ರೋಶನ್ ಪಿರೇರಾ]
ಮ್ಹಜಾ ಗಾಂವಾಂತ್ ವ್ಹಾಳ್ತಾತ್ ದುದಾಝರಿ
ಮಾನ್ ಸಾಂಬಾಳ್ಳಾ ಪಾಚ್ವ್ಯಾ ಪಾಲ್ವಾ ಝರಿ
ಧುಂವ್ರಿ ಕೆಸಾಂನಿ ಪಾಂಗ್ರವ್ನ್ ವೇಲ್ ಗಾಂವಾರಿ
ಖಂಯ್ಚಾಕ್ ತರೀ ಕರುಂ ಮ್ಹಜಾ ಗಾಂವಾಕ್ ಸರಿ
ಸರ್ಗಾ ಬರಿ ಗಾಂವ್ ಮ್ಹಜೊ ಹ್ಯಾ ಸಂಸಾರಿಂ
ತೆಚ್ಚ್ ಧರ್ತೆಚೆರ್ ಧಲ್ಲೆಂ ಪಾಳ್ಣೆಂ
ತೆಚ್ಚ್ ಧರ್ತೆಚೆರ್ ಜಾಲ್ಲೆಂ ರಡ್ಣೆಂ
ತೆಚ್ಚ್ ಧರ್ತೆಚೆರ್ ವಾಡ್ಲ್ಯೊ ಹಾಸೊ
ತೆಚ್ಚ್ ಧರ್ತೆಚೆರ್ ರಾವ್ಲೊಂ ಉಭೊ
ತೆಚ್ಚ್ ಧರ್ತೆಚೆರ್ ಆಪ್ಣಾಯ್ಲೆಂ ಜಾಯ್ತೆಂ
ರುಜ್ವಾತ್ ನಾತ್ಲೆಂ ಖರೆಂ ಸತ್ ತೆಂ
ಹೆಚ್ಚ್ ಜಿಬೆನ್, ಎಕಾ ಮನಾನ್, ಖರ್ಯಾ ಕಾಳ್ಜಾನ್
ವೊಲಾಯಿಲ್ಲೆಂ ಗಾಂವಾಕ್ ಸರ್ಗ್ ಮ್ಹಣೊನ್
ಪರ್ಕಿ ಗಾಂವಾಂತ್ ಗಾಂವಾಕ್ ಸಾಂಡುನ್
ಜಾಲೊಂ ಕಸೊ ಗಾಂವಾಕ್ ಸಯ್ರೊ ಜಾವುನ್
ಮನಾ ವೊಂಟಿಯೆಂತ್ ಯಾದಿ ಧಲ್ಲ್ಯೊ ಧಲೊನ್
ಅಶ್ಯೊ ಅಶ್ಯೊ ಆಯ್ಲ್ಯೊ ಯಾದಿ ತೆಶೆಂ ಗೆಲೊಂ ಭಂವೊನ್
ಮ್ಹಜೊ ಗಾಂವ್ ಆಪಯ್ತಾ ಮ್ಹಾಕಾ ಘಾಲುನ್ ಗಾಣಾಂ
ವಾಟೆರ್ ವೊಂಪ್ಲ್ಯಾಂತ್ ತಿಕಾಂ ವಜ್ರಾಂ ರತ್ನಾಂ
ದಾಮಾಸ್ಕಾಚಿ ಸತ್ರಿ ಬಾವ್ಲಿನಾ
ಪುರಾಸಾಣೆನ್ ದೊಡ್ಲಿನಾ
ಸದಾಂ ಪುನ್ವೆ ಮೊಳ್ಯಾಂತ್ ಧಲ್ಲಿಂ ಭಾಗಿ ಮನಾಂ
ಸಗ್ಳಿಂ ಕೂಡ್ ಕಾಳಿಜ್ ಮ್ಹಜಾ ಸ್ವರ್ಗಾಕ್ ತೆಂಕ್ತಾನಾ
ಹೊ ಮ್ಹಜೊ ಗಾಂವ್ ಮ್ಹಾಕಾ ಸೊಡ್ನ್ ನಿದ್ಲೊನಾ
ವೆತಾ ಖರೆಂಚ್ ಗಾಂವಾಕ್ ದೆಕುನ್ ಹಾಂವ್ ಜೆಮೆಲೊಂನಾ
ಹೊ ಮ್ಹಜೊ ಗಾಂವ್ ಮ್ಹಾಕಾ ಸೊಡ್ನ್ ನಿದ್ಲೊನಾ
ಹೊ ಮ್ಹಜೊ ಗಾಂವ್ ಯಾದಿ ಭಾಯ್ರ್ ಗೆಲೊನಾ
5. ಮಾಂಯ್ಗಾಂವ್ [ವಾಯ್ಲೆಟ್ ಜೆ. ಪಿರೇರಾ]
ಮಾಂಯ್ ಗಾಂವ್ ಮ್ಹಜೊ ಕಿತ್ಲೊ ತೊ ಸೊಭಿತ್
ಪುಣ್ ಹಾಂವ್ ಎಕ್ಸುರಿಂ ಕಾಂಯ್ ನಾ ಮ್ಹಾಕಾ ಕಳಿತ್
ಪತಿ ಮ್ಹಜೊಂ ಪಾವ್ಲಾ ಪಯ್ಶಿಲ್ಯಾ ತ್ಯಾ ಪರ್ಗಾಂವಾಕ್
ಜೀಣ್ ಮ್ಹಜಿ ಸರಿ, ಮೂಳ್ ನಾತ್ಲೆಲ್ಯಾ ಕಾಣಿಯೆಕ್
ಕಾಜಾರಿ ಜಿವಿತ್ ಹೆಂ, ನಾ ಎಕಾಮೆಕಾಚೊ ಸಾಂಗಾತ್
ಭುರ್ಗಿಂ ಜಾಲಿಂ ದೊಗಾಂ, ಪತಿ ಗೆಲೊ ಪರತ್ ಪರ್ಗಾಂವಾಕ್
ದೋನ್ ವರ್ಸಾಂನಿ ರಜೆರ್ ಆಯ್ಲೊ ಪರತ್ ಗಾಂವಾಕ್
ವರ್ಣುಂಕ್ ಲಾಗ್ಲೊ ಪರ್ಗಾಂವಾಚ್ಯಾಕೀ ಮಾಂಯ್ ಗಾಂವ್ಚ್ಚ್ ಸೊಭಿತ್
ಮಾಂಯ್ಗಾಂವ್ ಆಮ್ಚೊ ಭೋವ್ಚ್ಚ್ ಗ್ರೇಸ್ತ್
ಭರೊನ್ ಪಾಚ್ವಾ ರಂಗಾನ್, ದಿಸ್ತಾ ಕಿತೆಂ ಊಂಚ್
ಪುಣ್ ಮಾಂಯ್ಗಾಂವ್ಚೊ ಸಾಂಬಾಳ್ ಪಾವಾನಾ ದೀಸ್ ಕಾಡುಂಕ್
ಪೊಟಾ ಭುಕೆ ಖಾತಿರ್ ಕಿತ್ಲ್ಯಾನಿಂ ಮಾಗ್ಲೊ ಆದೇವ್ಸ್ ಮಾಂಯ್ಗಾಂವಾಕ್
ಪರ್ಗಾಂವಾಂತ್ ಕಿತ್ಲೆಶೆ ಘೊಳ್ತಾತ್ ಸಾಂಡುನ್ ಅಪ್ಲ್ಯಾ ಕುಟ್ಮಾಕ್
ಸಾಕ್ರಿಫಿಸ್ ತಾಂಚೊ ವರ್ತೊ, ಕುಟ್ಮಾಕ್ ಕರುಂಕ್ ಗ್ರೇಸ್ತ್
ಎಕ್ಸುರಿಂ ಜಿಣಿಂ ಸಾರ್ತಾತ್, ಆಸಾಗೀ ಹಾಕಾ ಕಾಂಯ್ ಅರ್ಥ್
ಕಾಜಾರ್ ಜಾವ್ನ್ಯೀ ಥೊಡೆಂ ಎಕ್ಸುರೆ, ಜಿಣಿಂ ತಾಂಚಿ ವ್ಯರ್ಥ್
ಮಾಂಯ್ ಗಾಂವ್ ವಿಶಾಲ್ ತರೀ ನಾಂತ್ ಕೊಣೀ ಖುಶಾಲ್
ಹಪ್ತೊ ಭರ್ ಘೊಳ್ಳೊ ತರ್, ಕುಟ್ಮಾ ಪೊಸ್ಯೆತ್ ಎಕ್ ದೀಸ್
ವ್ಹ್ಯಾಟ್ ಘಾಲ್ನ್, ವೊರ್ವಿಂ ಚಡ್ಲ್ಯಾಂತ್ ಸರ್ವ್ ಮೊಳ್ಬಾಕ್
ಮಾಗ್ತಾ ದೆವಾ ಗಿರೇಸ್ತ್ ಕರ್ ಮ್ಹಜ್ಯಾ ಹ್ಯಾ ಮಾಂಯ್ ಗಾಂವಾಕ್
6. ಮಾಂಯ್ಗಾಂವ್ [ಕ್ಲೆರೆನ್ಸ್ ಕೈಕಂಬ]
ಪರತ್ ಪಧ್ವೆದಾರಾಚ್ಯಾ ಪದ್ವೆಚಿ ಕಿರ್ಣಾಂ ಪರ್ಜಳ್ಳ್ಯಾಂತ್
ಧರ್ತೆ ಪಾಲಂಗಾರ್ ತಣಾ ಪೊಟ್ರೆ ಫುಟ್ಲ್ಯಾತ್
ಮ್ಹಜಿ ಪ್ರಿತುಮ್ ಪ್ರೀತಿಚೊ ಸಾಡೊ ನ್ಹೆಸ್ಲ್ಯಾ
ಆಕಾಸಾಚೆರ್ ಮೊಡಾಂ ಕುರೊವ್ ಮಾಖುನ್ ಆಸಾ.
ಗಾಂವ್ಚ್ಯಾ ಕೊಳೊಸಾರ್ ಕೊರೊಡ್ ಕಳೆ ಫುಲ್ಲ್ಯಾತ್
ಜಿವಾಳ್ ಪರ್ವತ್ ಮೊಡಾಂಕ್ ರಸ್ಮಾ ಉಮೊ ದಿತಾತ್
ಧೋವ್ ಧಾಂಗ್ರೊ ಫೆರಾಂವ್ಕ್ ತಯಾರ್ ಜಾಲಾ
ಮ್ಹಜೊ ಗಾಂವ್ ಸೊಭಾಯೆನ್ ಮಾಣ್ಕುಲೊ ಜಾಲಾ
ಚಿನ್ವಾರಾಚ್ಯಾ ಚೆಕ್ಮಕಾಚೆಂ ಅಜ್ಯಾಪ್ ಹೆಂಚ್ಚ್ ಮ್ಹಣ್ತಾಂ
ಘಾಡಿಗಾರಾಚ್ಯಾ ಗ್ರಾಣ್ಯಾನ್ ಹಾಕಾ ಗ್ರೇಸ್ತ್ ಕೆಲ್ಲೆಂ ಕೊಣ್ಣಾ
ಕೊಳ್ಮಿಂ ನಾಸ್ತಾಂ ಉದ್ಕಾ ಶಿಂವರ್ ಪಡ್ಲ್ಲೊ ಹಾಂಗಾ
ಚಿತ್ರ್ಗಾರಾಚೆಂ ಸೊಭಾಣ್ ಜಾಲೊ ಹೊ ಮ್ಹಜೊ ಗಾಂವ್
ಧರ್ತೆರ್ ಉಭೊ ರಾವೊನ್ ಗೊಡ್ಯಾ ಸವಾರ್ ಹಾಂಚಿ
ಸ್ವಶ್ಟೆರ್ ನಾಚೊನ್ ಆಸ್ಚ್ಯಾ ಥೊಡ್ಯಾ ಮಾಡಾಂಚಿ
ಅನಂತ್ ಆಕಾಸಾಕ್ ಮೊಡಾಂಕ್ ಆಪಡ್ಚಿ ಆಶಾ ತಾಂಚಿ
ಮ್ಹಜ್ಯಾ ಗಾಂವ್ಚಿ ಸೊಭಾಯ್ ದೆಖ್ಚೆಂ ನಶಿಬ್ ಸದಾಂಚೆಂ
ಮ್ಹಜ್ಯಾ ಗಾವಾಚೆರ್ ಬೆಸಾಂವ್ ವೊತ್ಲ್ಲ್ಯಾ ರಚ್ನಾರಾ
ಹಿ ಸೃಶ್ಟಿ ಅಶಿಚ್ಚ್ ತುಜ್ಯಾ ಗೊಪಾಂತ್ ದವರ್ ದೆವಾ
ಪಾಚ್ವ್ಯಾ ತುಪ್ಯಾಂತ್ ತುಫಾನ್ ನಾ ಯೇಂವ್ ಹಾಂಗಾ
ಹಿ ಸೊಬಾಯ್ ತುಜ್ಯಾ ಮಹಿಮೆಚಿ ಗೊರೊಜ್ ಕರುಂ ಸದಾಂ
7. ಮ್ಹಜೊ ಮಾಂಯ್ಗಾಂವ್ [ಆಸ್ಟಿನ್ ಪ್ರಭು ನಂತೂರ್]
ಮಾಡ್, ಮಾಡಿಯೊ, ಈಂದಾ ರೂಕ್
ವಾರ್ಯಾಕ್ ಧಲ್ಚೆಂ ಥಾಂಬಯ್ತ್ ಭುಕ್
ಭುಂಯ್, ಭಾಟಾಂ, ಭಾತಾ-ಶೆತಾಂ
ದಿಸ್ತಾತ್ ಸಗ್ಳ್ಯಾನ್ ಚಲೊನ್ ವೆತಾಂ
ನಳ್ಯಾಂಚಿಂ ಘರಾಂ ಪರಿಸರಾಂತ್
ಕೊಂಕ್ರೀಟ್ ಕಟ್ಟೋಣಾಂ ಮಧೆಗಾತ್
ಈಡ್ಯಾ-ಈಡ್ಯಾಂನಿ ತಿಂ ಗುಡ್ಸುಲಾಂ
ಹೆಣೆಂ ತೆಣೆಂ ಭುರ್ಗ್ಯಾಂಕ್ ಶಾಲಾಂ
ಗಲ್ಲ್ಯಾ ಗಲ್ಲ್ಯಾಂನಿ ಚಿಕಿತ್ಸಾಲಯಾಂ
ಪಾಟಾಪಾಟ್ ತಿಂ ವಕ್ತಾಂ ದುಖಾನಾಂ
ಭರೊನ್ ವೊಮ್ತೊಂಚಿಂ ನಗರ್ ಬಸ್ಸಾಂ
ಪಾತಳ್ ಉದ್ಕಾಡೆ ಕಶಿಂ ರಸ್ತ್ಯಾ ವಾಹನಾಂ
ರಸ್ತ್ಯಾರ್ ಜಾಲ್ಲಿ ಫಾತ್ರಾಂ ಪ್ರಾಸ್
ಭೀಕರ್ ಫೊಂಡಾಂಚಿ ಸಗ್ಳ್ಯಾನ್ ರಾಸ್
ಪೋಂವೊನ್ ವೆಚ್ಯಾ ಡೀಸಿಲಾಚೊ ವಾಸ್
ಬೈಕಾರ್ ವೆತೆಲ್ಯಾಂಕ್ ಅವ್ಘಡಾ ಘಾಸ್
ಮೈಲಾಕ್ ಏಕ್ ಸೊಭಿತ್ ಇಗರ್ಜ್
ಆಪ್ರೂಪ್ ಪಳ್ಳಿ, ಸಾಣ್ ಆನಿಂ ದೀವ್ಳ್
ಮಹಾ ವಿದ್ಯಾಲಯಾಂ ಸಗ್ಳ್ಯಾನಿತ್ಲ್ಯಾನ್
ಕಾಜು, ಆಂಬೆ, ಪೊಣ್ಸಾ ರೂಕ್ ನಿತ್ರಾಣ್
ಕೊಂಕ್ಣಿ, ತುಳು, ಕಾನಡಿ ಆನಿಂ ಮಲ್ಯಾಳಿ
ಕ್ರೀಸ್ತಾಂವ್, ಹಿಂದು, ಮುಸ್ಲಿಮ್ ಜಾತಿ
ಗ್ರೇಸ್ತಾಂ-ದುಬ್ಳಿಂ, ಗೊರಿಂ ಆನಿಂ ಕಾಳಿಂ
ಸುಣಿಂ, ಮಾಜ್ರಾಂ, ಗೊರ್ವಾಂ, ಮನ್ಜಾತಿ
ಕೊಂಗ್ರೆಸ್, ಬಿಜೆಪಿ, ಸಮಾಜ್ವಾದಿ
ಮುಸ್ಲಿಂ ಲೀಗ್, ಕಮ್ಯುನಿಸ್ತ್ ಪಾಡ್ತಿ
ಕೊಂಕ್ಣೆ, ಬೊಣ್ಕೆ, ಪಾಗ್ಪಿ ಆನಿಂ ಮಾಪ್ಳಿ
ಹಾಣಿಂ ಕರ್ಚಿ ಮಂಗ್ಳುರ್ಚಿ ವೀದ್ವಾವ್ಳಿ
ಚಡ್ತಾವ್ ರಾಜ್ಕಾರಣಿ ನಿದೊನ್ ಪಡ್ಚೆ
ಮತ್ ಮೆಳ್ತಚ್ ಸಂಪೂರ್ಣ್ ವಿಸರ್ಚೆ
ದೇವ್, ಜಾತ್-ಕಾತ್ ಮಧೆಂ ಹಾಡ್ಚೆ
ಜಿಕೊನ್ ಯೆತಸರ್ ಕಿತೇಂಯ್ ಲೆಂವ್ಚೆ
8. ಮಾಂಯ್ಗಾಂವ್ [ವಲ್ಲಿ ಕ್ವಾಡ್ರಸ್]
ದುದಾ ಮೊಂವಾಚೊ ಗಾಂವ್ ಖಂಯ್ ಮ್ಹಜೊ
ದೂದ್ ತಾಂಬ್ಡೆಂಗಿ ವ ಮೊಂವ್?
ಕೊಗುಳೆ ಮೊರಾಂಚೊ ನಾಚ್ ಖಂಯ್ ಹಾಂಗಾ
ಕಾವ್ಳ್ಯಾಂಚೆಂ ಗೀತ್ ಆಯ್ಕತಾಂಗಿ ಹಾಂವ್?
ಮ್ಹಜಾ ಗಾಂವಾಂನಿ ತಣ್ ಲಾಸ್ತಾ ಮಾತಿ ಭಾಜ್ತಾ
ಮನಿಸ್ ರಾಕ್ತಾ ಚಿಂವೊಂಕ್ ಮನ್ಶಾಚೆಂ ರಗಾತ್
ಅಪ್ಲೊ ಪೆಲೊ ದಿಸಾಚಾ ಉಜ್ವಾಡಾಕ್
ಮಾತೆಂ ಸಯ್ತ್ ತಾಸ್ತಾ
ನಂಯೊ ಬಾಂಯೊ ರಗ್ತಾಳ್ ಸಗ್ಳ್ಯೊ
ಉಪ್ಯೆಂವ್ಕ್ ಲಾಗ್ಲ್ಯಾಂತ್ ಹಾಡಾಂ
ತೆಣೆಂ ಹೆಣೆಂ ಹುಲ್ಪೊನ್ ಗೆಲ್ಯಾಂತ್
ಜಾತಿ ಧರ್ಮಾಚಿಂ ಬೊಡಾಂ
ಮ್ಹಜಾ ಗಾಂವಾಂತ್ ಭಾಂದ್ಪಾಂ ಉಭಾರ್ಲ್ಯಾಂತ್
ಮನ್ಶಾಪಣಾಕ್ ಪುರುನ್ ಘಾಲಾಂ
ಗಾಂವಾಂತ್ ಮ್ಹಜಾ ಲುಸಿಫೆರ್ ದೆಂವ್ಲ್ಯಾತ್
ಮಾಂಯ್ಕ್ ಉಭೆಂ ಚಿರುನ್ ಘಾಲಾಂ
ಉಲಂವ್ಕ್ ಜೊಕ್ತಿ ಭಾಸ್ ನಾ
ನೆಸೊಂಕ್ ಜೊಕ್ತೊ ವೇಸ್ ನಾ
ಗಾಂವಾಂತ್ ಆಮ್ಚೆಂ ನಾಂವ್ ನಾ
ಗಾಂವಾರ್ ಮ್ಹಜೊ ಗಾಂವ್ ನಾ
9. ಮಾಂಯ್ಗಾಂವ್ [ನಿರ್ಮಲಾ ಗೋವಿಯಸ್, ಬೆಂದುರ್]
ಮ್ಹಜಾ
ಮಾಂಯ್ ಗಾಂವಾ ಥಾವ್ನ್
ಹಜಾರೊಂ ಮೈಲಾಂ ಪಯ್ಸ್
ಪಾವ್ಲ್ಯಾಂ ಹಾಂವ್
ಮನ್ ಧಲ್ತಾ, ಕಾಳಿಜ್ ಉಲ್ಲಾಸ್ತಾ ನಿಯಾಳ್ತಾಂ ತುಕಾ
ಸೊಭಿತ್ ತೆಂ ನಾಂವ್, ವೈಭವ್ ಗಾಜ್ಲಾ ಗಾಂವಾನ್ ಗಾಂವ್.
ಶೀತಳ್ ವಾರೆಂ, ಉತಳ್ ಸುವಾತೆ
ಸಮೊರಿ
ವ್ಹಾಳ್ತಾತ್ ನಿತಳ್ ಉದ್ಕಾ ಝರಿ
ರೂಕ್ ಝಡಾಂ ಫುಲಾಂ ಫಳಾಂ ಬರಾಬರಿ
ಪಾಚ್ವೊ ಚರೊವ್ ಮೆಳ್ತಾ ಥಂಯ್ಸರಿ
ಉದೆಂತಿಚೆಂ ರೋಮ್
ಘನಾ ಮಾನಾಚೆಂ ನಾಂವ್
ದೆವಾಚಾ ದೊಳ್ಯಾ ಥಾವ್ನ್ ಪಾಚಾರ್ಲಾಂ ಉಜ್ವಾಡಾ ಕೀರ್ಣ್
ತಾಚಾ ವಿಚಿತ್ರ್ ಕೃತ್ಯಾಂನಿ ತಿಚಿ ಸೊಭಾಯ್ ಸಂಪೂರ್ಣ್
ವ್ಹಾಳ್ತಾತ್ ದೊಳ್ಯಾನಿಂ ದುಃಖಾಂ
ನಿಯಾಳ್ತಾಂ ವೆಗ್ಳಾಚಾರಾಚಿಂ ಘಡಿತಾಂ
ಮನ್ ರಾಕೊನ್ ಅಸಾ, ಕಾಳಿಜ್ ಲಾಲೆವ್ನ್ ಅಸಾ
ತುಜಾ ಗೊಪಾಂತ್ ಲಿಪೊನ್, ವೆಂಗೆತ್ ಅರಾವ್ನ್
ಸಂಗಿಂ ಜಿಯೆಂವ್ಕ್ ಸದಾಂ ಸರ್ವದಾಂ
10. ಮ್ಹಜೊ ಮಾಂಯ್ಗಾಂವ್ [ವಿನ್ಸಿ ಮೆಲ್ಕಾರ್]
ಮ್ಹಜೊ ಮಾಂಯ್ಗಾಂವ್
ಹಾವೆಂ ಜಲ್ಮ್ ಘೆತ್ಲ್ಲೊ
ಆವಯ್ ಬಾಪಾಯ್ಚೆ ಹಾತ್ ಧರುನ್
ಕಾಡ್ಲ್ಲೆಂ ಪಯ್ಲೆಂ ಮೇಟ್
ಮಾಂಯ್ ಮ್ಹಳ್ಳೆಂ ಉತಾರ್
ಪಯ್ಲೆಂ ಜಿಬ್ಯೆರ್ ಹಾಡ್ಲ್ಲೆಂ
ಕಶೆಂ ಹಾಂವ್ ವಿಸ್ರೊಂ..?
ಕಿತೆಂ ಉಣೆಂ ಆಸಾ ಮಾಂಯ್ ಗಾಂವಾಂತ್..?
ತಳಿಂ, ಬಾಂಯೊ, ನಂಯೊ ಆಸಾತ್
ರುಕಾ-ಝಡಾಂನಿ ಭರೊನ್ ಆಸ್ಲ್ಲೆಂ ರಾನ್ ಆಸಾ
ಶೆತಾಂ-ಭೆಟಾಂ, ಮಾಡಾಂ-ಮಾಡಿಯಾಂಚಿಂ ತೊಟಾಂ
ನಿತಳ್ ಥಂಡ್ ವಾರೆಂ ಆಸಾ..
ಸೊಭಾಯ್ ವರ್ಣುಂಕ್ ಸಕಾನಾಸ್ಲ್ಲೆ
ಗುಡೊ ದೊಂಗೊರ್ ಪಾಚ್ವಿ ಧರ್ಣ್ ಆಸಾ
ಖಂಯ್ಸರೀ ಮೆಳಾನಾತ್ಲ್ಲಿಂ ಫುಲಾಂ ಫಳಾಂ ಆಸಾತ್
ಚಿಲಿ ಪಿಲಿ ಆವಾಜ್ ದಿಂವ್ಚಿಂ ಸುಕ್ಣಿಂ ಸಾವ್ಜಾಂ ಆಸಾತ್
ಕಿತೆಂ ಉಣೆಂ ಆಸಾ..?
ಎಕಾಮೆಕಾ ಆಧಾರ್ ಜಾಂವ್ಚಿಂ ಮನ್ಶಾಂ ಆಸಾತ್
ಸದಾಂಚ್ ಮೋಗ್ ದಿಂವ್ಚಿಂ ವ್ಹಡಿಲಾಂ ಆಸಾತ್
ಜಿವಾಕ್ ಜೀವ್ ದಿಂವ್ಚೆಂ ಲ್ಹಾನ್ಪಣಾಚೆ ಸಾಂಗಾತಿ ಆಸಾತ್
ಕಿತೆಂ ಉಣೆಂ ಆಸಾ ಹ್ಯಾ ಮಾಂಯ್ ಗಾಂವಾಂತ್..?
ವಿಸ್ರೊಂಕ್ ಸಕ್ಚೊನಾ ಕೆದಿಂಚ್
ಹೊ ಮ್ಹಜೊ ಮಾಂಯ್ ಗಾಂವ್
ಉಗ್ಡಾಸ್ ಆಸ್ತಲೊ ಕೆದ್ನಾಂಯ್
ವ್ಹಡಿಲಾಂಚ್ಯಾ ಮೊಗಾ ಮಾಯ್ಪಾಸಾಚೊ
ವೆಚಿನಾ ರೂಚ್ ಉಸ್ವಾಸ್ ಆಸ್ತಾ ಪರ್ಯಾಂತ್
ಮ್ಹಜ್ಯಾ ಮಾಂಯ್ ಗಾಂವ್ಚಾ ಮಾತ್ಯೆಚಿ..
11. ಪಾಂಯ್ಜಾಣಾಂ [ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ದಿಶ್ಟಿ ಪಾಕ್ಳ್ಯಾಂಚಾ
ಪಾಂಯ್ಜಾಣಾಂಚೊ ದಾಗೊ ತುಟೊನ್
ಆಸ್ಡ್ಯಾ ಮಧ್ಲ್ಯಾ ಮರುವನಾ ಥಾವ್ನ್
ವೆಗ್ಳಾಚಾರಾಚೊ ಫುಡಾರ್ ಘೆವ್ನ್
ಜಿವಾಚಿ ಆಶಾ ಸಾಂಡುನ್
ಧರ್ತೆಕ್ ವೆಂಗುಂಕ್ ವೆಚಾ
ಹ್ಯಾ ಉಭಾಳ್ ಮೊತಿಯಾಂಕ್
ಹಾತಾ ತಳ್ವೆರ್ ಜೊಗಾಸಾಣೆನ್ ಸಾಂಭಾಳುನ್
ಮೌನ್ಪಣಿಂ
ನದರ್ ಉಭಾರುನ್ ಮೊಳ್ಬಾಕ್ ಚೊಯ್ತಾಂ ತರ್ -
ಥಿಳೊ ಏಕ್
ಸುರ್ಯಾ ಆಂಗ್ಣಾಂತ್ ಕಡೊನ್
ತಾಂಬ್ಡೊ ದರ್ಯೊ ಜಾಂವ್ಚೊ ದಿಸ್ತಾ
ಕೊಡ್ಶ್ಯಾವಯ್ಲ್ಯಾ ಮಾಡಾರ್ ನಿದೊನ್
ಸ್ವಪ್ಣಾಂ ರಂಗಂವ್ಚೊ ಚಂದ್ರ್
ಅಪ್ಣಾಲೆಂ ರುಪ್ಣೆಂ ತಾಂತುಂ ಸೊಧ್ತಾ
ತ್ಯಾ ಭಾಯ್ರ್ -
ಏಕ್ ಆವಯ್
ವಿಣ್ಗ್ಯಾ ಯಾದಿಂಚಾ ಮೆರೆರ್
ಪಾವ್ಳೆಲ್ಲ್ಯೊ ಕಣ್ಶ್ಯೊ ವಿಂಚುನ್ ಯೆತಾ
ವಿಂಚ್ತಾಂ ವಿಂಚ್ತಾಂ ಶಿರಿಗಾನಾ ಗಾಯ್ತಾ
ಉತ್ರಾಂತ್ ಉತಾರ್ ಮೊರ್ಗುಟೊನ್ ಕಡ್ತಾ
ಕಾಂಕ್ಣಾಕ್ ಕಾಂಕಾಣ್ ಆಧಾಳ್ತಾ
ಖೊಂವ್ಚಿ ಶಿರೆಕ್ ತುಟಯ್ತಾ!
ಆನಿ ಆಬ್ಳೆ!
ಉಸ್ಳಾಲ್ಲೊ ಏಕ್ ಥೆಂಬೊ
ತಾಂಬ್ಡೊ ತಾಂಬ್ಡೊಸೊ
ಮೊಡಾಂ ಮಧೆಂ ಬರಾಫ್ ಜಾಂವ್ಚಾಧಿಂ
ಮ್ಹಜಾ ತಳಾತಾರ್ ದೆಂವ್ತಾ
ಆನಿ ಹಾಂವ್ -
ಮ್ಹಜಾ ಹಾತಾಂತ್ಲ್ಯಾ
ಜೀವ್ ಘೆತ್ಲ್ಲ್ಯಾ ಉಭಾಳ್ ಮೊತಿಯಾಂಕ್
ಪಾಲ್ವಾ ಪೊಂತಾನ್ ಗುಂತ್ತಾಂ
ದಿಶ್ಟಿ ಪಾಕ್ಳ್ಯಾಂಕ್ ನೆಸಂವ್ಕ್
ಜಿವಾಕ್ ಜೀವ್ ದೀಂವ್ಕ್
ಮ್ಹಜಾ ಮಾಂಯ್ಗಾಂವಾಂತ್ ಪಾಂಯ್ಜಾಣಾಂ!
12. ನಿಸರ್ಗ್ [ಅನಿಲ್ ಪೆರ್ನಾಲ್]
ಪ್ರಕೃತೆಚಾ ಸೊಭಾಯೆಚೆಂ ನ್ಹಾಣ್ ನ್ಹಾತಾನಾ ಕೌತುಕ್ ಭಗ್ತಾ
ಅತ್ಮ್ಯಾಕ್ ಮ್ಹಜ್ಯಾ ಭುಲ್ ಘಾಲುನ್ ಅಪ್ಣಾ ಕುಶಿನ್ ತಾಂಡುನ್ ವ್ಹರ್ತಾ
ತೆಂ ಊಂಚ್ ಉಭಾರ್ ಪರ್ವತ್
ಕೆದ್ನಾಂ ಕೆದ್ನಾಂ ಬರ್ಪಾವೋಲ್ ಧಾಂಪುನ್ ನಿದ್ಚೆ
ಕೆದ್ನಾಂ ಕೆದ್ನಾಂ ಪಾಚ್ವ್ಯಾನ್ ನೆಸೊನ್ ರಾಂವ್ಚೆಂ
ಹೊ ಸುರ್ಯೊ..
ಕೆದ್ನಾಂ ಕೆದ್ನಾಂ ಕುಪಾಂ ಮಧ್ಲ್ಯಾನ್ ತಿಳುಂಕ್ ಯೆಂವ್ಚೊ
ಪರ್ವತಾಂಚ್ಯೊ ವೆವೆಗ್ಳ್ಯೊ ಕುಶಿ ಧಾಖಂವ್ಚ್ಯೊ
ಆನಿ ಹ್ಯಾ ಪರ್ವತಾಕ್ ವೆಡ್ಕೊಳ್ ಘಾಲುನ್
ಕಪಲಾಚೆರ್ ಕೀಸ್ ಧಾಂಬುನ್
ಹಳೂ ಹಳೂ ಪೊಳ್ಚಿ ಹಿ ಧುಂವ್ರಿ
ತೊ ರಾನಾಂ ಝಡಾಂಚೊ ಸುವಾದ್
ಕಿಡಿಂಚೊ ಆವಾಜ್
ದೆಂವೊನ್ ಯೆಂವ್ಚ್ಯಾ ಉದ್ಕಾಚೊ ಜುಳು ಜುಳು ನಾದ್
ವ್ಹಾಳ್ಚ್ಯಾ ವಾರ್ಯಾಕ್ ಧಲ್ಚ್ಯಾ ರುಕಾಂನಿ ಉತಂವ್ಚೆಂ ಸಂಗೀತ್
ಬಂದಾಡ್ ನಾಸ್ತಾಂ ಭಂವ್ಚ್ಯೊ ಮನ್ಜಾತಿ
ರಚ್ನಾರಾಚಾ ರಚ್ನೆಚೆಂ ಕೌತುಕ್ ಕರುಂಕ್ ಲಾಯ್ತಾ
ಮ್ಹಜ್ಯಾ ತಸ್ಲ್ಯಾ ರಚ್ನಾಂಕ್ ಶಾಂತೆಚೆಂ ಅಮೃತ್ ಪಿವಯ್ತಾ
ಹಿ ಲಾಂಬ್ ವಿಶಾಲ್ ದರ್ಯಾತಡ್
ಕೆದ್ನಾಂ ಶಾಂತ್ ಕೆದ್ನಾಂ ಉಚಾಂಬಳಾಯೆಚೊ ಹೊ ದರ್ಯೊ
ದೀಸ್ಭರ್ ಘೊಳೊನ್ ವಿಶೆವಾಕ್ ಯೆಂವ್ಚೊ ಸುರ್ಯೊ
ದರ್ಯಾ ಉದ್ಕಾಚೆರ್ ಉಜ್ವಳ್ಚಿಂ ಸುರ್ಯಾಚಿಂ ರುಪ್ಯಾಚಿಂ ರುಪ್ಯಾಳಿಂ ಕಿರ್ಣಾಂ
ಹಿಂ ಚಿಲಿಪಿಲಿ ಅವಾಜಾಚಿಂ ಸುಕ್ಣಿಂ ಸಾವ್ಜಾಂ
ಖಂಯ್ ಥಾವ್ನ್ಂಗೀ ಉಭೊನ್ ಯೆಂವ್ಚಿಂಹಿಂ ಡೊಂಕಾಂ
ಭಿಜ್ಲ್ಲ್ಯಾ ರೆಂವೆರ್ ಆಪ್ಲ್ಯಾ ಪಾವ್ಲಾಂಚಿ ಮ್ಹೊರ್ ಧಾಂಬ್ಚಿ
ಘಡ್ಯೆನ್ ಲ್ಹಾರಾಂನಿ ತಿಂ ಪುಸುನ್ ಕಾಡ್ಚಿಂ
ಆನಿಂ ಹೆಂ ಸರ್ವ್ ದೆಖ್ತಾಂ ದೆಖ್ತಾಂ..
ಮಾಜ್ವೊನ್ ವೆಚೊ ಸುರ್ಯೊ..
ಶಾಂತ್ ಜಾಂವ್ಚಿಂ ರಾಚ್ನಾಂ..
ನಿಶ್ಶಬ್ಧ್...
ಸರ್ಗ್
13. ಆಮ್ಚಿ ಸಂಸ್ಕೃತಿ [ಅವಿನಾ ಮಿಯಾರ್]
ಯೆಯಾ, ಪಳೆಯಾ ಸಂಸ್ಕೃತಿ ಆಮ್ಚಿ
ಮೆಳ್ತಾ ಪಳೆಂವ್ಕ್ ಆವಯ್ ಕೊಂಕಣಿ
ಹಾಂಗಾಸರ್ ಕೊನ್ಶಾ ಕೊನ್ಶಾಂನಿ
ವಿಸ್ತಾರ್ ಸುವಾತ್, ದೆವಾಳಾಂ ರಾವ್ಳೆರಾಂ ಹ್ಯೇ ಕುಶಿನ್
ಗಲೀಜ್ ಕೊಂಡಾಂ, ಮೊಡ್ಕುರ್ ಖೊಮ್ಟಾಂ ತ್ಯೇ ಕುಶಿನ್
ಹಾಂಚೆ ಮಧೆಂ ಉಜಳ್ತಾ ಪರ್ಜಳ್ತಾ ಸಂಸ್ಕೃತಿ ಆಮ್ಚಿ
ರಜಾರ್ ನೊವೆನಾಂ ದೆವಾಳಾಂನಿ
ಹೋಮ್ ಬಲಿದಾನಾಂ ಕಿತ್ಲಿಂ ಗುಮಾನಿಂ
ಕಾಜಾರಾಂ ವೊಲಾಂ ಬೊತ್ಲಿ ಗುದಾಮಾನಿಂ
ಕಿತ್ಲ್ಯೊ ಸುಭಾಗಿಣಿ ಬಾವ್ಳ್ಯಾ ವೆಂಗೆಂನಿ
ಪಳೆಂವ್ಕ್ ಯೆಯಾ ಸಂಸ್ಕೃತೆ ಧರ್ಮಾ ಧರ್ಶನಿಂ
ಯೆಯಾ ಪಳೆಯಾ ಸಂಸ್ಕೃತಿ ಆಮ್ಚಿ
ದೆವಾಳಾ ಭಾಯ್ರ್ ಭುಕೆ ಜಮ್ಯಾಂನಿ
ದೆವಾ ತೋಂಡ್ ಚೊಯ್ತೆಲೆ ದೆಕಾನಾಸ್ತಾಂ ತಿಶಿನ್
ವೆತಾತ್ ಘೆವ್ನ್ ದೆವಾ ಕಾಣಿಕೊ ಹಾತಿಂ
ಪೂನ್ ಜೊಡ್ಲ್ಲಿಂ ನಾಜೂಕ್ ಸಂಸ್ಕೃತೇ ಭುರ್ಗಿಂ
ಕೊಂಡಾಂ ಖೊಮ್ಟಾಂತ್ಲ್ಯಾ ಯೆಮ್ಕೊಂಡಾಂನಿ
ಉಜ್ವಾಡ್ ಚೊಂವ್ಕ್ ಸಕಾನಾಸ್ಲ್ಲೆಂ ಜಿವಾನಿಂ
ಗಳೊನ್ ಇರೊನ್ ಖಿರೊನ್ ಭಾಗೊನ್
ಲಕ್ಲ್ಯಾತ್ ಥಕ್ಲ್ಯಾತ್ ವ್ಹಾವವ್ನ್ ತುಮ್ಚ್ಯಾ ಪಾತ್ಕಾಂ ವೊಜೆಂ
ಊಂಚ್ ಸಂಸ್ಕೃತೆಚೆ ಊಂಚ್ ಮನಿಸ್ ತುಮಿ
ಗಾಂವಾರ್ ಸಗ್ಳ್ಯಾ ಸಂಸ್ಕೃತೇ-ಧರ್ಮ್ ಶಿಕಯ್ತಾತ್ ತುಮಿ
ತುಮ್ಚ್ಯಾ ಪುರ್ವಜಾಂಚ್ಯೊ ವೆಭಿಚಾರ್ ಕಾಣಿಯೊ
ಹರ್ಧೆಂ ಫುಲವ್ನ್ ಗುಮಟ್ ವ್ಹಾಜಯ್ತಾತ್ ತುಮಿ
ಸಂಸಾರಾಕ್ ಬೂದ್ ಸಾಂಗೊಂಕ್ ’ಭಂವ್ಡಿ’ ಮಾರ್ತಾತ್ ತುಮಿ
ಗಾಂವಾಭಾಯ್ರ್ ತುಮ್ಚ್ಯಾ ಮಾಲ್ಘಡ್ಯಾಂಚ್ಯಾ
ಪಾತ್ಕಾಂ ಭೊರ್ಯಾಕ್ ಅನಾಥಾಶ್ರಮ್ ವೊಲಾಯ್ಲೆಂ
ತುಮ್ಚ್ಯಾ ಘರ್ಚಿ ಕುಸಡಾಯ್ ಧಾಂಪುನ್ ವರುಂಕ್
ಭಾವ್-ಭಾಂದವ್ಪಣ್ ಶಿಕಯ್ಲೆಂ ತುಮಿ
ಭಾವಾಂ ಖುನಿ ಭಯ್ಣಿ ವೆಪಾರ್ ಕರುನ್
ಘರಾಣೆಂ ಪಿಸ್ಡುನ್ ಉಡಯ್ಲೆಂ ತುಮಿ
ನಿರ್ಬಳ್ಯಾಂಚೆಂ ರಡ್ಣೆಂ-ದೂಕ್, ಅಸ್ತ್ರಿಯಾಂಚೊ ವಿಳಾಪ್
ರೆತಿರ್ ದಾನಾಂ ಮಾಗ್ಣ್ಯಾಂನಿ ವೆಲ್ಯೊ ಧಾಂಪ್ಲ್ಯೊ
ತುಮ್ಚೊ ಕಾಳೊ ಬಾಜಾರ್ ವೆಭಿಚಾರ್ ನಾದಿಸೊಂಕ್
ಕುಡಿರ್ ಸಂಸ್ಕೃತೆ ಧರ್ಮಾ ಶೆಲೊ ಧಗ್ಲೊ ರೆವ್ಡಾಯ್ಲೊ
ತಾಚೆಸಂಗಿಂ ತುಮ್ಚೆ ತಸಲ್ಯಾ ಕುಸ್ಡ್ಯಾ ಘಾಣೆಡ್ಡ್ಯಾ
ಸಂಸ್ಕೃತೇ ಜಗವ್ಣೆಂ ಸಜವ್ಣೆಂ ಸುಂರ್ಗಾವ್ಣೆಕ್ ಲಾಗ್ಲ್ಯಾತ್
ಜರ್ ತುಮ್ಕಾಂ ಸಂಸ್ಕೃತಿ ರಾಕಣ್ ಜಾಯ್..
ಪಯ್ಲೆಂ ತುಮ್ಚ್ಯಾ ಆವಯ್ ಭಯ್ಣಿ ವೆಪಾರ್ ರಾವಯಾ
ತುಮ್ಚೆ ತಸಲ್ಯಾಂಚ್ಯಾ ರಗ್ತಾ-ಘಾಮಾ ವ್ಹಾಳೊ ಪುಸುನ್ ಕಾಡಾ
ತುಮ್ಚ್ಯಾ ಮಾಲ್ಘಡ್ಯಾ ಪುರ್ವಜಾಂಚಿಂ ಗುಲಾಮ್ಗಿರಿ
ತುಮ್ಚೆ ತಕ್ಲೆ ಅಕ್ಕಲಾಂತ್ಲಿ ನಿಕ್ಳಾಯಾ
ಹ್ಯೇ ಗಲೀಜ್ ಸಂಸ್ಕೃತೆಕ್ ಸೊರ್ಮುಣಾಂತ್ ಲಾಸುನ್ ಸೊಡಾ
ತಾಚೆ ಉಪ್ರಾಂತ್..
ನವ್ಯೆ ಸಂಸ್ಕೃತೆಚಿ ಬುನ್ಯಾದ್ ಘಾಲಾ
ಪುಣ್ ತಾಚ್ಯಾಕ್ಯೀ ಪಯ್ಲೆಂ
ತುಮಿ ’ಮನಿಸ್’ ಜಾಂವ್ಕ್ ಪ್ರೇತನ್ ಕರಾ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.