ಇಸ್ಕೊಲಾಕ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಶೇಸ್ ಲೇಖನ್:

ಇಸ್ಕೊಲಾಕ್ ಏಕ್ ಕೊಂಕ್ಣಿ ಲೈಬ್ರೆರಿ

Placeholder: the original page gave this picture no description, and none has been written yet. It came from daaiz\daaiz\articles\vk1.asp.

ವಿತೊರಿ ಕಾರ್ಕಳ್

ಏಕ್ ಕೂಸ್:

ಕರ್ನಾಟಕಾಂತ್ಲ್ಯಾ ಇಸ್ಕೊಲಾಂನಿ ಕೊಂಕ್ಣಿ ಆಯ್ಲಿ. ಕರಾವಳಿಂತ್ಲ್ಯಾ 91 ಇಸ್ಕೊಲಾಂನಿ ಸವೆ ಕ್ಲಾಶಿಂತ್ ಭುರ್ಗಿಂ ತಿಸ್ರಿ, ವಿಂಚ್ಣುಕೆಚಿ ಭಾಸ್ ಜಾವ್ನ್ ಅಪುರ್ಭಾಯೆನ್ ಕನ್ನಡ ಲಿಪಿಂತ್ ಕೊಂಕ್ಣಿ ಶಿಕ್ತಾತ್. ಹ್ಯಾ ಭುರ್ಗ್ಯಾಂಕ್ "ಯೆಯಾ, ಕೊಂಕ್ಣಿ ಶಿಕುಂಯಾಂ -1" ಪಾಠ್‌ಬೂಕ್ ಸೊಡ್ಲ್ಯಾರ್ ಹರ್‍ಯೇಕ್ ಇಸ್ಕೊಲಾಕ್ ’ಮಿತ್ರ್’ ಗೌರವ್ ಪ್ರತಿ ಪಾವ್ತಾ. ಆನಿ ಹೊ ’ಮಿತ್ರ್’ ಕೊಂಕ್ಣಿ ಭುರ್ಗ್ಯಾಖಾತಿರ್ ತಾಂಕಾಂ ವಾಚುಂಕ್ ಪಾವ್ಟ್ ಕರ್‍ನ್ ದಿಜೆ ಅಶೆಂ ಶಿಕೊವ್ಪ್ಯಾಲಾಗಿಂ ಉಪ್ಕಾರ್ ಮಾಗ್‌ಲ್ಲೊ. ತೆಂ ಸೊಡ್ಲ್ಯಾನ್ ಭುರ್ಗ್ಯಾಂಕ್ ವಾಚುಂಕ್ ಮೆಳ್ಚೆಂ ಪತ್ರ್ ’ಕಾಜುಲೊ’ ಆನಿ ಘರಾ ವ್ಹಡಿಲಾಂನಿ ಹಾಡಯ್ಲ್ಯಾರ್ ರಾಕ್ಣೊ, ದಿವೊ, ದಿರ್‍ವೆಂ, ಕೂಟಾಮ್ ಆನಿ ಹೆರ್ ಪತ್ರಾಂ. ಭುರ್ಗ್ಯಾಂಚೆಂ ವಾಚಾಪ್ ವಿಸ್ತಾರುಂಕ್ ಹೆಂ ಸರ್ವ್ ಗರ್ಜೆಚೆಂ.

ದುಸ್ರಿ ಕೂಸ್:

ಕೊಂಕ್ಣೆಂತ್ ಆಯ್ಲೆವಾರ್‌ಚ್ಯಾ ವರ್ಸಾಂನಿ ಬುಕಾಂಚೆಂ ’ಬಂಪರ್ ಬೆಳೆಂ’ ಯೇಂವ್ಕ್ ಲಾಗ್ಲಾಂ. ವರ್ಸಾಕ್ ಸರಾಸರಿ ೩೫-೫೦ ನವೆ ಬೂಕ್ ವೆವೆಗ್ಳ್ಯಾ ಪ್ರಕಾಶನಾಖಾಲ್, ಕೊಣ್ 300, ಕೊಣ್ 500 ವ ಚಡ್ ಮ್ಹಳ್ಯಾರ್ 1000 ಪ್ರತಿಯೊ ಪರ್ಗಟ್ತಾತ್. ತಾಂತುಂ ಭೋವ್ ಥೊಡ್ಯಾಂಚ್ಯೊ ಸೊಡ್ಲ್ಯಾರ್ ಹೆರಾಂಚ್ಯೊ ಪ್ರತಿಯೊ ಗೌರವ್ ಪ್ರತಿಯೊ ಜಾವ್ನ್ ದೀವ್ನ್, ಇನಾಮಾ ದೀವ್ನ್ ಯಾ ದಾಳ್ನ್ ವ್ಹಾಳಯ್ ಖಾವ್ನ್ ವೆತಾತ್. ಹಿ ಪಾಟ್ಲ್ಯಾ ತೀನ್ ವರ್ಸಾಂನಿ ಹಾಂವೆಂ ಪಳೆಯಿಲ್ಲಿ ಗಜಾಲ್. ಚಡಾವತ್ ಪಯ್ಲೆಂಚ್ ಬುಕಾಚೊ ಖರ್ಚ್ ಪೋಶಕಾಂ ಥಾವ್ನ್ ಘೆತಾತ್ ಜಾಲ್ಲ್ಯಾನ್ ಮಾರ್ಕೆಟಿಂಕ್ ಮ್ಹಳ್ಳಿ ಗಜಾಲ್ ಹಾಂಗಾ ನಾ. ತಾಚಿ ಗರ್ಜ್‌ಯಿ ಕೊಣಾಯ್ಕಿ ಭಗಾನಾ.

ಕೊಣ್ ಎಕ್ಲೊ ವಿಕ್ರ್ಯಾಚೆಂ ಪ್ರಾಮಾಣಿಕ್ ಪ್ರೇತನ್ ಕರ್‍ತಾ ತರೀ, ಆಮ್ಚಿ ’25 ಲಾಕ್ ಲೋಕ್’ ತಾಂಕಾಂ ನಿರಾಶಿ ಕರ್‍ತಾ.

ಕೊಂಕ್ಣಿ ಲೈಬ್ರೆರಿ:

ಹ್ಯೊ ದೋನ್ ಕುಶಿ ಸಾಂಗಾತಾ ಘಾಲ್ತಾನಾ ಮ್ಹಜೆ ಮತಿಂತ್ ಉದೆಲ್ಲೆಂ ಚಿಂತಪ್ "ಇಸ್ಕೊಲಾಕ್ ಏಕ್ ಕೊಂಕ್ಣಿ ಲೈಬ್ರೆರಿ" ಹಾಂಗಾಸರ್ ವಾಚುಂಕ್ ಆಸಕ್ತ್ ಆಸ್ಚೊ ಪುಣ್ ಮೊಲಾಂವ್ಕ್ ಸಕನಾತ್ಲೊ ನವ್ಯಾ ರಗ್ತಾಚೊ ಏಕ್ ವರ್ಗ್ ತಯಾರ್ ಜಾತೇ ಆಸಾ. ಹೆಂಎಂ ’ಬುಕಾಂಚೆಂ ಬಂಬರ್ ಬೆಳೆಂ’ ಆಟಿಚ್ಯಾ ಆವ್ರಾಂತ್ ಪಾಡ್ ಜಾವ್ನ್ ಆಸಾ. ದೊನಿ ಕುಶಿನಿ ಬರೆಂಪಣ್ ಜಾಂವ್ಚಿ ವಾಟ್ ಹಿ ’ಲೈಬ್ರೆರಿ’

ಇಸ್ಕೊಲಾಂತ್ ಕೊಂಕ್ಣಿ ಹಾಡ್ಚಿ ಜವಾಭ್ದಾರಿ ಸಂಪ್ಲ್ಯಾ. ಪೂಣ್ ವಾಡಂವ್ಚೊ ವಾವ್ರ್ ಬಾಕಿ ಆಸಾ. ತಾಚೊ ಏಕ್ ವಾಂಟೊ ಜಾವ್ನ್ ಹಿ ಲೈಬ್ರೆರಿ ಆಸ್ತೆಲಿ. ಹರ್‍ಯೆಕಾ ಇಸ್ಕೊಲಾಂತ್ ’ಲೈಬ್ರೆರಿ’ ಆಸ್ತಾ. ತಾಂತುಂ ಆಸ್ಚೆ ಬೂಕ್ ಭುರ್ಗಿಂ ವಾಪರ್‍ತಾತ್. ಆತಾಂ ಹಿ ಸವ್ಲತ್ ಇಸ್ಕೊಲಾಚ್ಯಾ ಆಡಳ್ತ್ಯಾ ಮಂಡಳೆನ್ ಕೊಂಕ್ಣೆಕ್‌ಯಿ ವಾಡಂವ್ಚಿ. ಪುಣ್ ಹ್ಯಾ ಪಾವ್ಟಿಂ ಕೊಂಕ್ಣಿ ಶಿಕಂವ್ಚೆಂ ಧಯ್ರ್ ಆನಿ ಹುಮೆದ್ ಘೆತ್‌ಲ್ಲ್ಯಾ ಇಸ್ಕೊಲಾಂಕ್ ಬೊನಸಾ ರುಪಾರ್ ಕೊಂಕ್ಣಿ ಬೂಕ್ ಫುಂಕ್ಯಾಕ್ ದಿಂವ್ಚಿ ಯೆವ್ಜಣ್ ಕೆಲ್ಯಾ. ಹಾಂವೆಂ ಎದೊಳ್‌ಚ್ಚ್ ಸಭಾರ್ ಬರಯ್ಣಾರಾಂಕ್ ಸಂಪರ್ಕ್ ಕೆಲಾಂ ಆಸ್ತಾಂ ಸರ್ವಾಂನಿ ಅಪ್ಲಿ ಪರ್ವಣ್ಗಿ ಆನ್ ಇಬೂಕ್ ದಿಲ್ಯಾತ್. ಹ್ಯಾ ಮಯ್ನ್ಯಾಚ್ಯಾ ಅಕೆರಿಕ್ ಚಲ್ಚ್ಯಾ ಕೊಂಕ್ಣಿ ಶಿಕವ್ಪ್ಯಾಂಚ್ಯಾ ತರ್ಭೆತಿ ದಿಸಾ ಜಮೊ ಜಾಲ್ಲೆ ಬೂಕ್ ಇಸ್ಕೊಲಾಂಕ್ ವಾಂಟುನ್ ದಿತೆಲ್ಯಾಂವ್.

ಉಗ್ತೊ ಉಲೊ:

ಸರ್ವ್ ಕನ್ನಡ ಲಿಪಿಯೆಂತ್ಲ್ಯಾ ಕೊಂಕ್ಣಿ ಬರಯ್ಣಾರಾಂಕ್ ಹ್ಯಾ ಯೆವ್ಜಣೆಂತ್ ವಾಂಟೊ ಘೆಂವ್ಕ್ ವಿನತಿ ಕರ್‍ತಾಂ. ತುಮ್ಚೆಲಾಗಿಂ ಆಸ್ಚೆಂ ಭುರ್ಗ್ಯಾಂಕ್ ದಿವ್ಯೆತ್ ಮ್ಹಣ್ ಭಗ್ಚೆ ಬೂಕ್ 91 ಪ್ರತಿಯೊ ’ಮಿತ್ರ್’ ದಫ್ತರಾಕ್ ಅಕ್ತೋಬರ್ 25 ಭಿತರ್ ಪಾವಿತ್ ಕರಾ. ಹ್ಯಾ ತಾರಿಕೆ ಉಪ್ರಾಂತ್ ಆಯಿಲ್ಲೆ ವಾ ಫುಡ್ಲ್ಯಾ ದಿಸಾಂನಿ ನವೆ ಯೆಂವ್ಚೆ ಬೂಕ್ ಆಮಿ ಜಮವ್ನ್ ಉಪ್ರಾಂತ್ ಇಸ್ಕೊಲಾಂಕ್ ಪಾಟಯ್ತೆಲ್ಯಾಂವ್. ಗರ್ಜೆಚ್ಯಾ ಮಾಹೆತಿಕ್ ವಿತೊರಿ ಕಾರ್ಕಳ್ - 9845209374 ಹ್ಯಾ ನಂಬ್ರಾಕ್ ಸಂಪರ್ಕ್ ಕರ್‍ಯೆತ್.

ಖಾಲ್ತಿ ವಿನತಿ:

ಇಸ್ಕೊಲಾಂಚ್ಯಾ ವ್ಹಡಿಲಾಂಲಾಗಿಂ, ಕೊಂಕ್ಣಿ ಶಿಕವ್ಪ್ಯಾಂಪಾಗಿಂ ಏಕ್ ಖಾಲ್ತಿ ವಿನತಿ ಆಸಾಕೀ, ಹೆ ಬೂಕ್ ತುಮ್ಚ್ಯಾ ಇಸ್ಕೊಲಾಚ್ಯಾ ಲೈಬ್ರೆರಿಕ್ ಫುಂಕ್ಯಾಕ್ ದಿಂವ್ಚೆ. ತುಮಿ ಕಿತೆಂಯೀ ಫಾರಿಕ್ ಕರುಂಕ್ ನಾ. ದಯ ಕರುನ್ ಹೆ ಬೂಕ್ ಕೊಂಕ್ಣಿ ಭುರ್ಗ್ಯಾಂಕ್ ತಾಂಚ್ಯಾ ಗರ್ಜೆಕ್ ವಾಪ್ರುಂಕ್ ದಿಯಾ. ಭುರ್ಗಿಂ ವಾಚುಂದಿ. ತಾಂಚೆ ಥಂಯ್ ಕೊಂಕ್ಣೆಚಿ ವೋಡ್ ಜಿವಾಳುಂದಿ. ವಾಚ್ಪಾನಿಮ್ತಿಂ ಭುರ್ಗ್ಯಾಂಚೆಂಯ್ ಬರೆಂ ಜಾತೆಲೆಂ. ಸಾಂಗಾತಾಚ್ ಕೊಂಕ್ಣೆಚೆಂಯ್ ಬರೆಂ ಜಾತೆಲೆಂ.

ಲೇಖನಾಂಚಾ ಪಾನಾಕ್

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಫ್ಲಾಯ್ಟ್!?