ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಎಕಾ ತೆಂಪಾರ್ ವಾತಿಕಾನಾಂತ್ ಇಗರ್ಜ್ ಭಾಂದುಂಕ್ ಪೈಶೆ ದಾನ್ ದಿಲ್ಯಾರ್, ತಾಂಕಾಂ ಪ್ಲೇನಾರ್ ಇಂದುಲ್ಜೆನ್ಸಾ ಫುಂಕ್ಯಾಕ್ ದಿಂವ್ಚಿ ರೀತ್ ಪಾಳ್‌ಲ್ಲಿ ತಿ ಸೊಸುಂಕ್ ಜಾಯ್ನಾಸ್ತಾಂ, ತುಜೊ ಸೆವಕ್ ಮಾರ್ಟಿನ್ ಲೂಥರ್ ಭಿಗಡ್ಲೊ. ಉಪ್ರಾಟ್ಲೊ ಆನಿ ಲಡಾಯ್ ಕೆಲಿ. ಆವಾಜ್ ಕೆಲೊ.

Placeholder: the original page gave this picture no description, and none has been written yet. It came from daaiz\daaiz\column\sv\sv.asp.

ಸತಾಂತ್ಲಿಂ ವಿಚಿತ್ರಾಂ - 18. ಇಂದುಲ್ಜೆನ್ಸಾಂ!?

ಜೆಮ್ಮಾ ಪಡೀಲ್

ದೆವಾ ತುವೆಂ ರಚ್ಲೆಲ್ಯಾ ಹ್ಯಾ ಸಂಸಾರಾಂತ್ ಎಕಾ ಥರಾಚೆಂ ಝುಜ್ ಸುರು ಜಾಲಾಂ. ಏಕ್ ನ್ಹವೆಂ ವ್ಹಾರೆಂ ವ್ಹಾಳೊಂಕ್ ಲಾಗ್ಲಾಂ - ಜಾಗತೀಕರಣ್ (Globalization). ಹ್ಯಾ ಝುಜಾಂತ್ ಜಿಕ್ಚೊ ಸರ್ವಾಂಕ್ ಪಾಟಿಂ ಘಾಲುನ್ ಮುಕಾರ್ ಪಾಂವ್ಚೊ! ಹ್ಯಾ ಝುಜಾಂತ್ ಗರ್ನಾಳಿ ನಾಂತ್; ನಾಳಿ ನಾಂತ್. ಗುಳೆ ನಾಂತ್. ಟ್ಯಾಂಕರಾಂ ನಾಂತ್. ವಾರ್‍ಯಾ ವಿಮಾನಾಂ ನಾಂತ್. ಸಬ್ ಮೆರಿನಾಂ ನಾಂತ್. ಕಸಲೆಂಚ್ ನಾಂ. ಹ್ಯಾ ಝುಜಾಂತ್ ಫಕತ್ತ್ ಲೊಕಾಕ್, ಭುಲಂವ್ಚೆಂ ವಿಧಾನ್. ಹ್ಯಾ ’ವಿಧಾನಾಂ’ವರ್ವಿಂ ತ್ಯಾ ತ್ಯಾ ಕಂಪೆನಿಚೊ ಸಾಮಾನ್ ವಿಕ್ಚೆಂ ಉಣ್ಯಾ ದರಿರ್. ತಾಂಚ್ಯಾ ಕಾರ್ಖಾನ್ಯಾಂತ್ ಸರ್ವ್ ಉಣ್ಯಾ ಧರಿಕ್ ಉತ್ಪಾದನ್ ಕರುಂಕ್ ವಿವಿಧ್ ಕ್ರಮಾಂ! ಹೆಂ ಝುಜ್ ಗಾಂವಾ ಗಾಂವಾಂ ಮಧೆಂ ನ್ಹಯ್. ಹೆಂ ಝುಜ್ ಜಾಗೊ ಭಿತರ್ ಘಾಲುಂಕ್ ನ್ಹಯ್. ಹ್ಯಾ ಝುಜಾ ಖಾತಿರ್ ಸೊಜೆರ್ ನಾಕಾತ್. ರಾನಾ ಮೊಳ್ಯಾಂನಿ ಯಾ ಹಿಮಾ ಪ್ರದೇಶಾಂತ್ ರಾಂವ್ಚಿ ಕಸಲೀಯ್ ಗರ್ಜ್ ನಾಂ!. ಹೆಂ ಆರ್ಥಿಕ್ ಝುಜ್. ಸ್ಪರ್ಧೊ (Competition) ಮ್ಹಳ್ಳೆಂ ಪ್ರಮುಕ್ ಸೂತ್ರ್ ಹಾತಿಂ ಘೆವ್ನ್ ಹಾಂಗಾ ಸರ್ವ್ ಚಲ್ತಾ. ಹ್ಯಾ ಝುಜಾಂತ್ ಧೆಸ್ವಾಟ್ ನಾ. ಹ್ಯಾ ಝುಜಾಂತ್ ಬೋಂಬ್ ಉಡಂವ್ಚೆಂ ದೃಶ್ಯ್ ನಾ! ಟಿವಿ ಮುಕಾರ್ ಬಸೊನ್ ತೋಂಡ್ ಹಿವ್ಳಾವ್ನ್ (ಭಿಭೀತ್ಸ್ ದೃಶ್ಯ್ ದೆಖ್ತಾನಾ) ತೆವ್ಶಿನ್ ಪಳೆಂವ್ಚೆಂ ಕಸಲೆಂಚ್ ರೀತ್ ನಾಂ.

ಹೆಂ ಲೊಕಾ ಖಾತಿರ್ ಉಭೆಂ ಕರುನ್ ತಾಂಚ್ಯಾ ಪ್ರತಿಭೆನ್ ಉತ್ತೀರ್ಣ್ ಜಾಂವ್ಚೆಂ ಏಕ್ ವಿಶೇಷ್ ಖೆಳ್. ಹ್ಯಾ ಖೆಳಾಂತ್ ಸಭಾರ್ ದೃಶ್ಯಾಂ ಆಸಾತ್:-

1. ದೋನ್ ವಸ್ತು ಘೆ ಆನಿ ಅನ್ಯೇಕ್ ಫುಂಕ್ಯಾಕ್!

2. ತುಜೆಂ ಪರ್ನೆಂ ವಸ್ತ್ ದೀ ಆನಿ ನವೆಂ ಘೆ!

3. ತುಂ ವಸ್ತ್ ಘೆ ಆನಿ ತುಕಾ ನಶೀಬ್ ಆಸ್ಲ್ಯಾರ್ ಲೊಟ್ರಿಂತ್ ರುಪಯ್ ಯಾ ಭಾಂಗಾರ್ ಇನಾಮ್ ಜಾವ್ನ್ ಘೆ.!

4. ಮುಂಗಡ್ ಪೈಶೆ ಭಾಂದ್ ಆನಿ ಹಜಾರ್ ಸವ್ಲಾತ್ಯೊ ಅನುಭವ್ಸಿ ವಯ್ಲ್ಯಾ ಆನಿ ಹಜಾರ್ ರಿತಿಂನಿ ಜಾಗತೀಕರಣಾಚ್ಯಾ ಪರಿಣಾಮಾನ್, ಹ್ಯಾ ಸಂಸಾರಾಂತ್ ಖರೀದ್ ಕರ್ಚ್ಯಾಂಕ್ ಭುಲಂವ್ಕ್ ಟಿ.ವಿ.ಧ್ವಾರಿಂ ಥಿಯೆಟರಾಂತ್ ಬಾ ದೈನಿಕ್ ಪತ್ರಾಂನಿ ಜಾಹೀರಾತಾಂ ಘಾಲ್ನ್ ಲೊಕಾಂಚಿಂ ಮನಾ ವೊಡ್ತಾತ್!

ದೆವಾ ಆಮಿಂ ತುಜಿಂ ರಚ್ನಾಂ; ಕಿರ್ಕೊಳ್ ರಚ್ನಾಂ. ತುಜ್ಯಾ ಹ್ಯಾ ಸಂಸಾರಾಂತ್ ಜಾಗತೀಕರಣ್ ಆರ್ಥಿಕ್ ಸಂಸಾರಾಂತ್ ನವೆಂಸಾಂವ್ ಹಾಡ್ಲಾಂ ಜಾಲ್ಯಾರ್, ತುಜ್ಯಾ ಮನ್ಶ್ಯಾಂನಿ ಶೆಕ್ಡ್ಯಾಂ ಆಧಿಂ ಥಾವ್ನ್ ಮಾಫಿ ಆನಿ ರಿಯಾಯ್ತಿ ದಿಂವ್ಚಿ ಪದ್ದತಿ ದೆಂವೊಂಕ್ ಕಾರಾಣ್ ಜಾಲ್ಯಾಂತ್. ಎಕಾ ತೆಂಪಾರ್ ವಾತಿಕಾನಾಂತ್ ಇಗರ್ಜ್ ಭಾಂದುಂಕ್ ಪೈಶೆ ದಾನ್ ದಿಲ್ಯಾರ್, ತಾಂಕಾಂ ಪ್ಲೇನಾರ್ ಇಂದುಲ್ಜೆನ್ಸಾ ಫುಂಕ್ಯಾಕ್ ದಿಂವ್ಚಿ ರೀತ್ ಪಾಳ್‌ಲ್ಲಿ ತಿ ಸೊಸುಂಕ್ ಜಾಯ್ನಾಸ್ತಾಂ, ತುಜೊ ಸೆವಕ್ ಮಾರ್ಟಿನ್ ಲೂಥರ್ ಭಿಗಡ್ಲೊ. ಉಪ್ರಾಟ್ಲೊ ಆನಿ ಲಡಾಯ್ ಕೆಲಿ. ಆವಾಜ್ ಕೆಲೊ. ತುಂ ಕಿತೆಂ ಕೆಲಾಂಯ್ ತೆಂ ’ಖರೆಂ’ ಜಾವ್ನಾಸಾ; ಸತ್ ಜಾವ್ನಾಸಾ.

ತೊ ತುಜೆಥಾವ್ನ್ ಪಯ್ಸ್ ಚರ್ಲೊ.

ತಶೆಂ ನ್ಹಯ್ ತುಂವೆಂ ಉಭೆಂ ಕೆಲ್ಲ್ಯಾ ಸಮುದಾಯ ಥಾವ್ನ್ ವಿಂಗಡ್ ಜಾಲೊ. ತೊ ಗೆಲೊ ಜಾಲ್ಯಾರೀ ತೆಂ ಪ್ಲೇನಾರ್ ಇಂದುಲ್ಜೆನ್ಸ್ ಮ್ಹಳ್ಳೆಂ ಮಟ್ವೆಂ (Short cut) ತುಜ್ಯಾ ಸರ್ಗಾರಾಜಾಕ್ ವಚೊಂಕ್ ಉಭೆಂ ಕೆಲ್ಲೆಂ ವಿಧಾನ್ ಆತಾಂಯ್ ಆಸಾ.

’ತೆ’ ಸಾಂಗ್ತಾತ್ - ತುಂ ಪಾಂಚ್ ಪಾವ್ಟಿಂ ’ಹೆಂ’ ಮಾಗ್ಣೆಂ ಮ್ಹಣ್ - ತುಕಾ ಪುಲ್ಪುತ್ರ್ ನಾ. ಆತ್ತಾಂ ಮೆಲ್ಯಾರ್ ಶೀದಾ ಸರ್ಗಾಕ್!.

ಹೆಂ ಭಾರಿ ಬರೆಂ ದೆವಾ. ಹೆಂ ಮಾಗ್ಣೆಂ ಮ್ಹಣ್ಚೆ ಪಯ್ಲೆಂ ’ತ್ಯಾ’ ಮನ್ಶ್ಯಾನ್ ಕಿತೆಂ ವಾಯ್ಟ್ ಕರುಂಕ್ ಜಾತಾ ತೆಂ ಕರ್, ಸಾಂಗ್ಲೆಲೆಂ ಮಾಗ್ಣೆಂ ಸರಾರಾಂ ಮ್ಹಣ್ - ಕಸಲೀಯ್ ಪುಲ್ಪುತ್ರ್ ನಾ!. ಕಿತೇಂಯ್ ಕರ್ - ತುಕಾ ದೆವಾಚಿ ಶಿಕ್ಷಾ ನಾಂ.

’ತುಜ್ಯಾ ಮನ್ಶ್ಯಾಂನಿ ರಚಿತ್ ಕೆಲ್ಲ್ಯಾ ಆನಿ ಪರ್ವಣ್ಗಿ ದಿಲ್ಲ್ಯಾ ಪುಸ್ತಕಾಂತ್ ಭುರ್ಗ್ಯಾಂಕ್ ಶಿಕಯ್ತಾತ್ - ಫಟಿ ಮಾರ್ಲ್ಯಾರ್ ಪುಲ್ಪುತ್ರ್. ಖುನಿ ಯಾ ಮಾರೆಕಾರ್ ಪಾತ್ಕಾಂ ಕೆಲ್ಲ್ಯಾಂನಿ ಸುಟಾವೆಂ ಕುಮ್ಸಾರ್ ಜಾಂವ್ಚೆಂ - ತಾಂಕಾಂ ಪುಲ್ಪುತ್ರ್ ಆಸಾ. ತಸಲ್ಯಾಂನಿ ಪ್ಲೇನಾರ್ ಇಂದುಲ್ಜೆನ್ಸಾಂ ’ವಾಂಟ್ಚ್ಯಾ’ ದಿಸಾ ಯೆಂವ್ಚೆಂ ಆನಿ ಸಾಂಗ್‌ಲ್ಲೆಂ ಕರ್ಚೆಂ - ತಾಂಕಾಂ ಕಸಲೇಂಯ್ ಬಾಕಿ ನಾಂ. ಪುಲ್ಪುತ್ರ್ ನಾ. ತಾಂಕಾಂ ಪ್ಲೇನಾರ್ ದಿಲೆಲ್ಯಾ ಇಂದುಲ್ಜೆನ್ಸಾವರ್ವಿಂ  ’ಮ್ಹಳೆಂ’ ಮಾಫಿ ಮೆಳ್ಳ್ಯಾ!

ಹೆಂ ಕಿತೆಂ ಸೊಮಿಯಾಂ? ತುಕಾ ಕಸೆಂ ದಿಸ್ತಾ? ತುಜ್ಯಾ ಕಷ್ಟಾ ಪಾಶಾಂವಾಂ ವೆಳಾ, ಭಾರಾಬ್ಬಾಸಾಕ್ ಸುಟ್ಕಾ ಮೆಳ್‌ಲ್ಲಿ ಮೊರ್ನಾಂತ್ ವಾಂಚ್‌ಲ್ಲೊ. ಹ್ಯಾ ತುಜ್ಯಾ ಸಂಸಾರಾಂತ್, ಖುನಿಗಾರಾಂಕ್ ಮೊರ್ನಾಚೆಂ ಫರ್ಮಾಣ್ ದಿಲ್ಲ್ಯಾ ಕೊರ್ಟಾಚೊ ಆದೇಶ್ ತ್ಯಾ ದೇಶಾಚ್ಯಾ ಅಧ್ಯಕ್ಶಕ್ ಆಸಾ - ಮಾಫ್ ಕರುನ್ ಮರಣ್ ನಾ - ಬಗಾರ್ ಮೊರ್ನಾ ಪರ್ಯಾಂತ್ ಜೈಲಾಂತ್ ಸಜಾ!

ಹಾಂಗಾ ಕಿತೆಂಚ್ ನಾ. ಏಕ್ ಕುಮ್ಸಾರ್ ಜಾ. ಉಪ್ರಾಂತ್ ಪ್ಲೇನಾರ್ ಇಂದುಲ್ಜೆನ್ಸಾಂ ಖಾತಿರ್ ವಾವ್ರ್ ಕರ್.

ಮ್ಹಾಕಾ ಕಿತೇಂಯ್ ಸಮ್ಜಾನಾ ದೆವಾ. ತುಂ ಕಿತೆಂ ಸಾಂಗ್ತಾಯ್. ರಾಜಾಂವಾಂ ಫರ್ಮಾಣೆ ಸಾರ್ಕೆಂ? ಕೆಲ್ಲ್ಯಾ ಚುಕಿಕ್ ಪ್ರಾಚಿತ್ ನಾಂ. ಕೆಲ್ಲ್ಯಾ ಪಾತ್ಕಾಕ್ ಶಿಕ್ಷಾ ನಾ. ಸರ್ವ್ ಫುಂಕ್ಯಾಕ್!?

ಸ್ಪರ್ಧ್ಯಾತ್ಮಕ್ ಸಂಸಾರಾಂತ್ ಲೊಕಾಕ್ ಭುಲಂವ್ಕ್ ಹಜಾರ್ ವಿಧಾನಾಂ ಆಸಾತ್. ಹ್ಯಾ ವಿಧಾನಾಂನಿ ಕಾಂಯ್ ಚೂಕ್ ನಾ. ಪುಣ್ ಹೆಂ ’ಇಂದುಲ್ಜೆನ್ಸ್’ ಮ್ಹಳ್ಳೆಂ ವಿಧಾನ್ ಕಿತೇಂಯ್ ವಾಯ್ಟ್ ಕೆಲ್ಯಾರೀ ಕಸಲೇಯ್ ವಾಂದೆ ನಾಸ್ತಾಂ, ಸುಲಾಭಾಯೆನ್ ಸರ್ಗಾಕ್ ವಚೊಂಕ್ ಸೊಡ್ತಾ!

ಪುಲ್ಪುತ್ರ್ ಮ್ಹಳ್ಯಾರ್ ಕಿತೆಂ ಸೊಮಿಯಾಂ? ಯೆದೊಳ್ ಯಾ ’ಪುಲ್ಪುತ್ರ್ - ಪುಲ್ಪುತ್ರ್’ ಮ್ಹಳ್ಳೆಂ ಭಿಂಯಾಂಚಿಂ ಉತ್ರಾಂ ಆಯ್ಕೊನ್ ಭಿಂಯೆಲ್ಲ್ಯಾಂತ್ ’ಪ್ಲೇನಾರ್ ಇಂದುಲ್ಜೆನ್ಸ್’ ಏಕ್ ಸುಲಭ್ ವಾಟ್ ಕಿತೇಂಯ್ ಕರ್. ಕಸಲೋಯ್ ಅನ್ನ್ಯಾಯ್ ಕರ್. ಭಿಂಯೆಂವ್ಚಿ ಕಾಂಯ್ ಗರ್ಜ್ ನಾ - ತುಕಾ ಪುಲ್ಪುತ್ರ್ ನಾ - ಪ್ಲೇನಾರ್ ಇಂದುಲ್ಜೆನ್ ಘೆ! ದೆವಾ ಕಿತೆಂ ’ಹಾಂವ್ ಕರುಂ?’ ಪಾತ್ಕಾಂ ಕರುಂ? ಕುಮ್ಸಾರಾಂತ್ ಸಾಂಗೊನ್ ಉಪ್ರಾಂತ್ ಪುಲ್ಪುತ್ರೆ ಥಾವ್ನ್ ಸಾಲ್ವಾಸಾಂವ್ ಘೆಂವ್?

ಆಧ್ಲ್ಯಾ ಕಾಳಾರ್ ಸಾಂಗ್ತಾಲೆ - ಏಕ್ ಫಟ್ ಮಾರ್ಲ್ಯಾರ್ ಸಾತ್ ವರ್ಸಾಂ ಪುಲ್ಪುತ್ರ್! ಹ್ಯಾ ತುಜ್ಯಾ ಪುಲ್ಪುತ್ರೆಂತ್ ಘಡಿಯಾಳ್ ಆಸಾ? ಸೆಕುಂದಾಂ, ಮಿನುಟಾಂ ಆನಿ ವೊರಾಂ ಆಸಾ? ಎಕಾ ವೊರಾಕ್ 24 ವೊರಾಂ ಯಾ...???

ತುಂವೆಂ ಹ್ಯಾ ತುಜ್ಯಾ ಸಂಸಾರಾಂತ್ ಜನನ್ ದಿಲ್ಲ್ಯಾ ವಿಗ್ಯಾನಿ - ಆಲ್ಬರ್ಟ್ ಐನ್‌ಸ್ಟೇನಾಚ್ಯಾ ’Theory of Relativity’ ಫರ್ಮಾಣೆ - ಖಂಯ್ ಏಕ್ ವಸ್ತ್ ಉಜ್ವಾಡಾಚ್ಯಾ ವೇಗಾವರ್ವಿಂ ಮುಕಾರ್ ಆಸಾ -

- ಥಂಯ್ ದೀಸ್ ನಾ.

- ಥಂಯ್ ರಾತ್ ನಾ.

- ಥಂಯ್ ವೇಳ್ ನಾ.

- ಥಂಯ್ ಮುಖ್ಲೆಂ ಯಾ ಪಾಟ್ಲೆಂ ನಾ.

ತರ್ ಹೆಂ ತುಜೆಂ ಪುಲ್ಪುತ್ರ್ ಖಂಯ್ ಆಸಾ? ಆಧ್ಲೆ ಪಾವ್ಟಿಂ ಯೆಮ್ಕೊಂಡ್, ಸರ್ಗ್ ಆನಿ ಲಿಂಬಾ ವಿಶ್ಯಾಂತ್ ಬರಯಿಲ್ಲ್ಯಾಕ್ ತುಂವೆಂ ಕಾಂಯ್ ಪ್ರತಿಕ್ರಿಯಾ ಧಾಖಂವ್ಕ್ ನಾಂಯ್. ತಶೆಂ ತರ್ ಹಾಂವೆಂ ಬರಯಿಲ್ಲೆಂ ಸರ್ವ್ ಸಮಾ? ತರ್.. ತುಜೆ ಮನಿಸ್ ಬೊಬಾಟುನ್ ಸಾಂಗ್ಚ್ಯಾ ಪುಲ್ಪುತ್ರೆ ವಿಶ್ಯಾಂತ್ ಕಿತೆಂ ಅಪೇಕ್ಷಿಯೆತ್? ಕಿತೇಂಯ್ ಆಸ್ಲ್ಯಾರ್ ಜರೂರ್ ಕಳಯ್ ಮ್ಹಾಕಾ. ’ರಾಕೊನ್’ ರಾವ್ಲ್ಯಾತ್ ಕೊಣ್ಣಾ. ದೆವಾ.. ತುಂ ಮ್ಹಾಕಾ ರಾಕ್. ತುಜೆರ್ ಸರ್ವ್ ಹಾಂವ್ ಮ್ಹಾಕಾಚ್ ಒಪ್ಸಿತಾಂ.

ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications