ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಎಡಿ ನೆಟ್ಟೊ
ಸಾಹಿತಿವಿಶಿಂ ದೋನ್ ಉತ್ರಾಂ:
ಹಾವೆಂ ಪಾಟ್ಲ್ಯಾ ಪಂದ್ರಾ-ಸೊಳಾ ವರ್ಸಾಂ ಥಾವ್ನ್ ಹ್ಯಾ ಸಾಹಿತಿಲಾಗಿಂ ಮೊಗಾನ್, ಇಸ್ಟಾಗಾತೆನ್ ಸಳಾವಳೆನ್ ಆಸಾಂ ದೆಖುನ್ ಹಾಚೆವಿಶಿಂ ಲಾಗ್ಶಿಲ್ಯಾನ್ ಸಮ್ಜೊಂಕ್ ಮ್ಹಾಕಾ ಸಾಧ್ಯ್ ಜಾಲೆಂ. ಪಳೆಂವ್ಕ್ ಗಂಭೀರ್ ದಿಸೊನ್ ಶಿಸ್ತೆಚೊ ಶಿಪಾಯ್ ತೊ ತರ್ಯ್ ಕಾಳ್ಜಾಂತ್ ತಿತ್ಲೊತ್ ಮೊವಾಳ್ ಆನಿ ಮಾಯಾಮೊಗಾಚೊ. ಸದಾಂಚ್ ಖುಶಾಲಿ ತರ್ಯ್ ದೆಖಿಭರಿತ್ ಸಾಹಿತಿ, ಏಕ್ ಬರೊ ಕಾಣ್ಯೆಗಾರ್, ಏಕ್ ಗೂಂಡ್ ಚಿಂತ್ಪಾಚೊ ಲೇಖಕ್, ಏಕ್ ಚಿಂತ್ಪಿ, ಚಡ್ ಕರ್ನ್ ಏಕ್ ಕೊಂಕ್ಣಿ ಮೋಗಿ ಮಾನೆಸ್ತ್ ಎಡಿ ನೆಟ್ಟೊಕ್ ಮೆಳೊಂಕ್, ಎಕಾ ಸಕಾಳಿಂ ಸಾಡೆ ಆಟ್ ವೊರಾಶೆಂ ಹಾಂವ್ ಅಚಾನಕ್ ತಾಕಾ ಸಾಂಗಾನಾಸ್ತಾನಾಂಚ್ ತಾಂಗೆರ್ ಪಾವ್ಲೊಂ ತರ್ಯ್ ತಾಣೆಂ ತಿತ್ಲ್ಯಾಚ್ ಮೊಗಾನ್ ಆನಿ ಗೌರವಾನ್ ಮ್ಹಾಕಾ ಯೆವ್ಕಾರ್ ಮಾಗೊನ್, ತಾಚೊ ಸಗ್ಳೊ ವೇಳ್ ಮ್ಹಜೆಸವೆಂ ಬೊಸೊನ್ ಖರ್ಚಿಲ್ಲ್ಯಾಕ್ ಹಾಂವ್ ತಾಚೊ ಉಪ್ಕಾರ್ ಬಾವುಡ್ತಾಂ ಆನಿಂ ತಾಚೆಸವೆಂ ಖರ್ಚಿಲ್ಲ್ಯಾ ಮೊಲಾಧಿಕ್ ಘಡಿಯೆ ಆಮ್ಚೆಮಧೆಂ ಜಾಲ್ಲ್ಯಾ ಸಂವಾದಾಚಿಂ ಸವಾಲಾಂ-ಜಾಪಿ ಹಾಂವ್ ದಾಯ್ಜ್ ವಾಚ್ಪ್ಯಾಂಕ್ ದೀಂವ್ಕ್ ಸಂತೊಸ್ ಪಾವ್ತಾಂ.
ಮಟ್ವಿ ವಳೊಕ್:
ಸಂಪೂರ್ಣ್ ನಾಂವ್: ಎಡ್ವಿನ್ ಮರಿಯಾಣ್ ನೆಟ್ಟೊ
ಲಿಖ್ಣೆ ನಾಂವ್: ಎಡಿ ನೆಟ್ಟೊ
ಜನನ್: 10 ಎಪ್ರಿಲ್
1938, ಜೆಪ್ಪು
ಮಂಗ್ಳುರ್
ಶಿಕಾಪ್: ಜೆಪ್ಪು ವರ್ಕ್ಶೋಪ್ ಸ್ಕೂಲ್ [1944 - 1952],
ಸಾಂ. ಲುವಿಸ್ ಹೈಸ್ಕೂಲ್
[1952-1956]
ಉದ್ಯೋಗ್: ಭಾರತೀಯ್ ವಾಯುಸೇನಾ (IBF)
[1956-1993]
(36.5
ವರ್ಸಾಂ)
ಸಾಹಿತ್ಯ್ ವಾವ್ರ್: 1956 ಇಸ್ವೆಂತ್
ಪಯ್ಲೆಂ ಕವಿತಾ ’ಆಪಯ್ತಾತ್ ತುಕಾ ಸ್ತೆಲ್ಲಾ’ [ಜೊ.ಸಾ.ಅಲ್ವಾರಿಸಾನ್]
ಲಿಖ್ಲೆಲ್ಯೊ ಕೃತಿಯೊ: (1956 - 13.2.2006
ಪರ್ಯಾಂತ್ - 2220:
ಪರ್ಗಟ್ ಜಾಲ್ಲ್ಯೊ - 1094)
ಮಟ್ವ್ಯೊ ಕಾಣ್ಯೊ 368 (ಪರ್ಗಟ್ ಜಾಲ್ಲ್ಯೊ
332)
ಲೇಖನಾಂ 1815 (ಪರ್ಗಟ್ ಜಾಲ್ಲ್ಯೊ
1731)
ಕವಿತಾ 29 (ಪರ್ಗಟ್ ಜಾಲ್ಲ್ಯೊ
25)
ಬೂಕ್ 8
(6)
[ಕುದ್ರೊ - 2003
(ಜೆಪ್ಪು ನಾಟಕ್ ಸಂಘ್), ಮಾಣ್ಕುಲೆಂ - 2004
(ಸೆವಕ್ ಮಯ್ನ್ಯಾಳೆಂ)]
ಪ್ರಶಸ್ಥಿ, ಪುರಸ್ಕಾರ್, ಸನ್ಮಾನ್:
1993 - ರಾಕ್ಣೊ
ಪತ್ರಾಚೊ ಸನ್ಮಾನ್ [2000 ರುಪಯ್]
2002 -
ದಿವೊ ಪ್ರಶಸ್ಥಿ [25000 ರುಪಯ್]
2003
- ಜೆಪ್ಪು ಫಿರ್ಗಜೆಚೊ ಸನ್ಮಾನ್/ಫುಲಾಂ
ಸಂವಾದ್:
ಸ:
ತುಮಿಂ ಕಾಣ್ಯೊ/ಲೇಖನಾಂ/ಕವನಾಂ ಬರಯ್ಲ್ಯಾಂತ್
ಪುಣ್ ತುಮ್ಕಾಂ ಖಂಚಾಚೆರ್ ಖಾಸ್ ಅಭಿರುಚ್ ಆನಿ ಕಿತ್ಯಾಕ್?
ಜಾ: ಮ್ಹಜಾ ಅಭಿರುಚಿಂ ಪಯ್ಕಿ ಪಯ್ಲೆಂ
ಸ್ಥಾನ್ ಹಾಂವ್ ದಿತಾಂ ಮಟ್ವ್ಯಾ ಕಾಣ್ಯಾಂಕ್, ತೇಂಯೀ ಸಾಮಾಜಿಕ್
ಕಾಣ್ಯಾಂಕ್, ಕಿತ್ಯಾಕ್ ಮ್ಹಳ್ಯಾರ್ ಸಮಾಜೆಚಾ ರಿತಿ
ರಿವಾಜಿಂಚೆರ್ ವಿಮರ್ಸೊ ಕರುಂಕ್
ಹೊ ಏಕ್ ಆವ್ಕಾಸ್. ಮ್ಹಾಕಾ ಸಮಸ್ಯಾಂಕ್ ಪರಿಹಾರ್ ದಿಂವ್ಚೆ
ತಸಲ್ಯೊ
(Result
Oriented)
ಕಾಣ್ಯೊ ಬರಂವ್ಕ್ ಚಡ್ ಆಂವಡ್ತಾತ್.
ಸ: ಲಗ್ಬಗ್ ತೀಸ್ ವರ್ಸಾದ್ಲಿ ಆನಿ ಆತಾಂಚಿ ಪರಿಗತೆವಿಶಿಂ ಇಲ್ಲೊ
ಸಂವಾದ್ ಚಲಂವ್ಚೊ ತರ್, ತವಳ್ಚಾ ಆನಿ ಆತಾಂಚಾ ಪರಿಗತೆವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ತವಳ್ ಉತಳ್ ಚಿಂತ್ಪಾಚೆಂ, ಆನಿ ಚಡಾವತ್ ದೆವಾಸ್ಪಣಾಚಾ ಚಿಂತ್ಪಾಚೆಂ
ಸಾಹಿತ್ಯ್ ಚಡ್ ಆಸ್ಲ್ಲೆಂ. ಪುಣ್ ಆತಾಂ ಸಾಹಿತ್ಯಾಚಾ ಪ್ರಕಾರಾಂತ್ ಜಾಯ್ತಿ ಬದ್ಲಾವಣ್ ಆಯ್ಲ್ಯಾ ತಶೆಂಚ್ ಯೇವ್ನ್ಂಚ್
ಆಸಾ. ತ್ಯಾ ಶಿವಾಯ್ ಸಾಹಿತ್ಯಾಚೆಂ ಮಟ್ಟ್ಯೀ ಚಡ್ಲಾಂ. ಸಾಹಿತ್ಯಾಚೆರ್
ಮಂಥನ್ ಕರುನ್, ನೀಜ್ ರುಪಾಚೊ, ವಾಸ್ತವಿಕ್ ಸತಾಂಚೊ ಕಾಣ್ಯೊ ಚಡ್ ಜಾವ್ನ್ ಆಜ್ಕಾಲ್
ಪರ್ಗಟ್ತಾತ್.
ಸ: ತವಳ್ಚೆಂ ಆನಿ ಆತಾಂಚೆಂ ಪತ್ರಿಕೋಧ್ಯಮಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಆಧಿಂ ಪತ್ರಿಕೋಧ್ಯಮ್ ಮ್ಹಳ್ಯಾರ್ ಥೊಡ್ಯಾಚ್
ಲೊಕಾಂಚಿ ಆಸ್ತ್ ಆನಿ ವಸ್ತ್ ಮ್ಹಳ್ಳೆಪರಿಂ ಎಕಾ ಥರಾಚೆಂ ಗುರ್ಕಾರ್ಪಣ್ ಚಲ್ತಾಲೆಂ
(ಚಿಂತ್ಪಾಚೆಂ ಸರ್ವಾದಿಕ್ಪಣ್). ಪುಣ್ ಆತಾಂ ಚಡಿತ್ ಪತ್ರಾಂ ಆಸ್ಲ್ಲ್ಯಾನ್ ಚಿಂತ್ಪಾಚೊ
ಪಂತಾಟ್ ಚಲ್ತಾ. ಸಂಪಾದಕಾಂಚೊ ಮನೋಭಾವ್ ಬದಲ್ಲಾ, ಬರ್ಯಾಂತ್ಲೆಂ ಬರೆಂ
ಸಾಹಿತ್ಯ್ ದೀಂವ್ಕ್ ಆಯ್ಚೆ ಚಡ್ತಾವ್ ಸಾಹಿತಿ ಪೆವಾಡ್ತಾತ್ ದೆಖುನ್ ದರಬಸ್ತ್ ಬರವ್ಪ್ಯಾಂಕ್ ರಚ್ತಾತ್.
ಹ್ಯಾ ನಿಮ್ತಿಂ ಪತ್ರಾಂಚೆಂ ಮಟ್ಟ್ಯ್ ಚಡ್ಲಾಂ.
ಸ: ತವಳ್ಚಾ ಆನಿ ಆತಾಂಚಾ ಕೊಂಕ್ಣಿ ವಾವ್ರಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಖಂಡಿತ್ ಜಾವ್ನ್ ಆತಾಂಚೊ ಕೊಂಕ್ಣಿ ವಾವ್ರ್ ಉಂಚಾಯೆರ್ ಆಸಾ, ಆಜ್ ಲಗ್ಬಗ್
ಪಂಚ್ವೀಸ್ ಕೊಂಕ್ಣಿ ಪತ್ರಾಂ ತಶೆಂಚ್ ಸುಮಾರ್ ಪನ್ನಾಸ್
ಫಿರ್ಗಜ್ ಪತ್ರಾಂ ಆಸಾತ್. ಕೊಂಕ್ಣಿ ವಾವ್ರ್ ಕೆಲ್ಲ್ಯಾಂಕ್
ಮಾನ್-ಸನ್ಮಾಕ್ ಪಾಟಂವ್ಚೆ ಲಗ್ಭಗ್ ಭಾರಾ ಸಂಸ್ಥೆ ಆಸಾತ್, ತಿತ್ಲೆಂಚ್
ನ್ಹಯ್, ಫಿರ್ಗಜೆವಾರ್ ನಾಟಕ್ ಖೆಳಂವ್ಚೆ ಕಾರ್ಭಾರಿ, ಕೊಂಕ್ಣಿ ತಾಲೆಂತಾಂಕ್
ಪ್ರೋತ್ಸಾಹ್ ದಿಂವ್ಚಾಕ್ ವೆವೆಗ್ಳೆ ತಾಲೆಂತಾಂ ಸ್ಪರ್ಧೆ ಚಡ್ಲ್ಯಾತ್. ತ್ಯಾಭಾಯ್ರ್ ಆಧುನಿಕ್ ತಂತ್ರ್ಗ್ಯಾನಾಚಾ ಆಧಾರಾನ್
ವೆಬ್ಸಾಯ್ಟ್ ಮಾಧ್ಯಮಾಂಧ್ವಾರಿಂ ಕೊಂಕ್ಣೆಕ್ ಆಜ್ಕಾಲ್ ಭರ್ಪೂರ್
ಮಜತ್ ಲಾಭೊನ್ ಆಸ್ಚಿ ಗಜಾಲ್ ಭೋವ್ ಧಾದೊಸ್ಕಾಯೆಚಿ.
ಸ: ತವಳ್ಚಾ ಆನಿ ಆತಾಂಚಾ ಕೊಂಕ್ಣಿ ಬರವ್ಪ್ಯಾಂಚಾ ಚಿಂತ್ಪಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಕೊಂಕ್ಣಿ (ಕಥೊಲಿಕ್) ಪರ್ಜಾಂಚೊ
ಮನೋಭಾವ್ ಪಯ್ಲೆಂ ಬರೊ ಆಸ್ಲ್ಲೊ, ತ್ಯಾಗ್, ಸಾಕ್ರಿಫಿಸ್ ಕರುನ್ ತೆ
ಪತ್ರಾಂ ಚಲಯ್ತಾಲೆ. ಪುಣ್ ಆತಾಂ ನಾಂವಾಖಾತಿರ್ ಚಲ್ಚೊ
ವಾವ್ರ್ ಚಡ್ ಜಾಲಾ, ಮಾನ್ ಯಾ ಲಾಭಾಖಾತಿರ್ ಕಾಮ್ ಕರ್ಚೆಂ ಚಡ್ ಜಾಲ್ಯಾತ್
ಮ್ಹಣ್ ಮ್ಹಾಕಾ ಭೊಗ್ತಾ. ಆಜ್ ಕೊಂಕ್ಣಿ ಸಾಹಿತ್ಯ್ ಯಾ
ಕೊಂಕ್ಣಿ ಪತ್ರಿಕೋಧ್ಯಮ್ ಎಕಾ ಥರಾಚೊ ಬಾಜಾರ್ (ದಂದೊ) ಸೊ ಜಾಲಾ ಮ್ಹಳ್ಳೆಂ
ಮ್ಹಜೆಂ ಭೊಗಾಪ್.
ತ್ಯಾಶಿವಾಯ್ ಬರವ್ಪಿ ಚಡ್ಲ್ಯಾತ್, ಪತ್ರಿಕೋಧ್ಯಮಾಚಾ ಆದಾಯಾಕ್ ಏಕ್
ವಾಟ್ ಜಾಲ್ಯಾ. ಪುಣ್ ಕೊಂಕ್ಣಿ ವಾವ್ರ್ ನಿರಂತರ್ ಚಲೊನ್ ಆಸಾ ತಿ ದಾಧೊಸ್ಕಾಯೆಚಿ ಗಜಾಲ್.
ಸ: ಕೊಂಕ್ಣಿ ಲಿಪಿಯೆವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಲಿಪಿಯಾಂಚೊ ವಾದ್ ಆಮ್ಚಾ ಕೊಂಕ್ಣೆಚಾ
ನಾಸಾಕ್ ಕಾರಾಣ್ ಜಾಂವ್ಕ್ ಸಕ್ತಲೊ. ಕೊಂಕ್ಣಿ ಭಾಶಾ ಮಂಡಳ್,
ಪರಿಶದೆಮಧೆಂ ಎಕ್ವಟ್ ತುಟ್ಲಾ, ಎಕಾಮೆಕಾ ರಾಗ್-ಶಿಣ್ ಉಭ್ಜಾಲಾ ಫಕತ್ತ್ ಲಿಪಿಯೆಚಾ
ವಾದಾನಿಮ್ತಿಂ.
ಪುಣ್ ಮ್ಹಜೆ ವಿಚಾರ್ - ಆವಯ್ಚೊ ಪಾನೊ ಆಮಿ ಕೆದಿಂಕ್ಚ್
ಸಾಂಡುಂಕ್ ನಜೊ - ಕನ್ನಡ ಲಿಪಿಚೊ ವಾದ್ ತರ್, ಆಧುನಿಕ್ ಜಾಗತೀಕರಣಾಂತ್ ದೇವ್-ನಾಗರಿ ಬರಿ ಮ್ಹಳ್ಳೊ ಏಕ್
ವಾದ್. ಹಾಂವ್ ಹ್ಯಾ ದೊನೀಂ ವಾದಾಂಕ್ ಮಾಂದ್ತಾಂ ಜಶೆಂ ಪ್ರಾಯೆಕ್
ಪಾವ್ಲೆಲ್ಯಾ ಪುತಾಕ್ ಆಪ್ಲ್ಯಾ ಆವಯ್ಚಾ ಪಾನಾಪ್ರಾಸ್
ಹೊಕ್ಲೆಚಿಂ ಸ್ಥನಾಂ ಚಡ್ ಪಸಂದ್ಗೀ ತಶೆಂ ಕಾನಡಿ ಲಿಪಿಯೆಂತ್ ಬರವ್ನ್
ವ್ಹಡ್ ಜಾಲ್ಲ್ಯಾಂತ್ ನಾಗರಿ ಪಸಂದ್ ಜಾಂವ್ಚೆಂ ನವಾಲ್
ನ್ಹಯ್. ದೆಖುನ್ ಆಮಿ ಸೊಡ್-ದೊಡ್ ಕರಿಜಾಯ್. ಪುಣ್
ಮ್ಹಜಿ ಖಾಸ್ಗಿ ಅಭಿರುಚ್ ಆನಿ ಆಂವಡ್ ಕಾನಡಿ ಲಿಪಿ.
ಸ: ಸೊಡ್-ದೊಡ್ ಕಶಿ?
ಜಾ: ಕೊಂಕ್ಣೆಚಾ ಸರ್ವ್ ಲಿಪಿಯಾಂಕ್
ಸಮಾಸಮ್ ಸ್ಥಾನ್ ಆನಿ ಮಾನ್ ಮೆಳಾಜಯ್, ಕೊಂಕ್ಣಿ
ಭಾಸೆಕ್ ಲಿಪಿಯಾಂಚಾಕೀ ಚಡ್
ಮಹತ್ವ್ ದೀಜಾಯ್.
ಸ: ತರ್ನೆ ಬರವ್ಪಿ ಆನಿ ಪರ್ನೆ ಬರವ್ಪಿಂ
ಮಧ್ಲೆಂ ಸಂಪರ್ಕ್/ಸಂಬಂಧಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಹಾಂವ್ ಯುವಪ್ರೇಮಿ, ಹಾವೆಂ
ಯುವ ಬರವ್ಪ್ಯಾಂಕ್
ಸಮ್ಜಾಲ್ಲ್ಯಾಪರಿಂ ಆಮ್ಚೆ ಮಾಲ್ಘಡೆ ಬರವ್ಪಿ, ತರ್ನ್ಯಾಂಲಾಗಿಂ ಉಗ್ತ್ಯಾಮನಾನ್ ಭರ್ಸಾನಾಂತ್.
ಸ: ಕಾರಾಣ್?
ಜಾ: ಪಯ್ಲೆಂ - ಮಾಲ್ಘಡ್ಯಾಂಕ್ ಮಾನ್
ದೀವ್ನ್ ಉಲಂವ್ಚೆ ಶೆಗುಣ್ ಆಯ್ಚಾ ಚಡಾವತ್ ಯುವಬರವ್ಪ್ಯಾಂಕ್
ನಾಂತ್ ದೆಖುನ್ (Inferiority
Complex) ತಶೆಂಚ್ ಚಡಾವತ್
ಮಾಲ್ಗಡ್ಯಾಂಕ್ ತರ್ನ್ಯಾ ಸಾಹಿತಿಂಲಾಗಿಂ ಮಾಯ್ಪಾಸಾನ್ ಉಲಂವ್ಚೆಂ
ಸಯ್ರಣ್ಯ್ ಆನಿ ಆಂವಡ್ ನಾ ಎಕಾ ಥರಾಚೆಂ (Superiority
Complex)
ಸ: ಪುಣ್ ಹೆಂಚ್ ನೀಜ್ ಕಾರಾಣ್ ಮ್ಹಣೊಂಕ್ ಜಾಯ್ನಾಂ,
ಲ್ಹಾನ್ ದಾಕ್ಲೊ ದೀಂವ್ ತರ್, ಥೊಡ್ಯಾಚ್ ವರ್ಸಾಂಧಿಂ ಪರ್ಗಾಂವಾಂತ್
ಥಾವ್ನ್ ಗಾಂವಾಕ್ ಆಯಿಲ್ಲೆವೆಳಾರ್, ಗಾಂವಾಂತ್ ಎಕಾ ಸಂವಾದಾವೆಳಾರ್ ಎಕ್ಲ್ಯಾನ್
ಮ್ಹಾಕಾ ಸವಾಲ್ ಕೆಲೆಂ ’ವಲ್ಲಿ ಜಾಲ್ಯೊಗೀ ತುಜ್ಯೊ
ಸಾಹಿತಿಕ್ ಭೆಟೊ?’, ಆನಿ ತೆದ್ನಾಂ ಎಕ್ಲೊ ತರ್ನಾಟೊ ಜಾ ದೀವ್ನ್
ಮ್ಹಣ್ತಾ ’ಸಾಹಿತಿಕ್ ಭೆಟೊ ದಿತಲೊ ಸಾಹಿತಿಕ್ ಪೆಟೊ ನ್ಹಯ್ಗೀ’
ಮ್ಹಣ್. ತಾಕಾ ಹಾವೆಂ ಕಸಲೀಯ್ ಜಾ ದೀಂವ್ಕ್ ನಾ (ದೀಂವ್ಕ್ ಜಾಯ್ನಾಸ್ತಾಂ
ನ್ಹಯ್). ಅಶೆಂ ಆಸ್ತಾನಾ ಆಮ್ಚಾ ಚಡ್ತಾವ್ ಬರವ್ಪ್ಯಾಂನಿ ಅಪ್ಲೊ
ಸ್ವ-ಗೌರವ್ ಹೊಗ್ಡಾಯ್ನಾಶೆಂ ಚತ್ರಾಯ್ ಸಾಂಬಾಳ್ಚಿ ಗರ್ಜ್ ಆಸಾ, ಅಸಲ್ಯಾಚ್ ಕಾರಾಣಾಂನಿಮ್ತಿಂ
ಭೋವ್ಶಾ ಅಸಲೊ ಅಂತರ್??
ಜಾ: ಖಂಡಿತ್ ವ್ಹಯ್ ಮ್ಹಣ್ ದಿಸ್ತಾ, ಆಯ್ಲೆವಾರ್
ಮ್ಹಾಕಾಯ್ ಅಸಲೆಂಚ್ ಏಕ್ ಘಟನ್ ಭೊಗುಂಕ್ ಮೆಳ್ಳೆಂ,
ಆಯ್ಲೆವಾರ್
ಹೆರೊಲ್ಪಿಯುಸಾಕ್ ಮಾನ್ ಕರ್ಚಾ ಸಂದರ್ಭಾರ್ ತಾಣೆಂ ಅಶೆಂ ಉಲ್ಲೇಕ್ ಕೆಲೆಂ ’ಮ್ಹಜೊ
ಮಿತ್ರ್ ಎಡಿ ನೆಟ್ಟೊ ಮ್ಹಾಕಾ ಸಭಾರ್ ಪಾವ್ಟಿಂ ಬೂದ್-ಬಾಳ್
ಸಾಂಗ್ತಾ’, ತೆದ್ನಾಂ ಮುಖ್ಲ್ಯಾನ್ ಬೊಸೊನ್ ಆಸ್ಲ್ಲೊ ಎಕ್ಲೊ
ಮ್ಹಣ್ತಾ ’ಬೂದ್ ಬಾಳ್ಗಿ ವ ಬಾಳ್ ಬೂದ್ಗೀ?’ ವಿಪರ್ಯಾಸ್ ಖಂಚೆಂಗೀ ಮ್ಹಳ್ಯಾರ್
ಹೊ ಕಾಂಯ್ ತರ್ನೊ ಮ್ಹಣ್ ತರ್ನೊಯ್ ನ್ಹಯ್,
ಪರ್ನೊ ಮ್ಹಣ್ ಪರ್ನೊಂಯ್ ನ್ಹಯ್.
ಸ: ಕೊಂಕ್ಣೆಂತ್ ತುಮ್ಚಿ ಮಹತ್ವಾಕಾಂಕ್ಷಾ
ಕಸಲಿ?
ಜಾ: ಆಮ್ಚಾ ಬರವ್ಪ್ಯಾಂನಿ ಪ್ರಶಸ್ತೆಕ್
ವ ಸಾಹಿತ್ಯಾಚಾ ಮಟ್ಟಾರ್ ಜಾಂವ್ ಭಾರತಾಚಾ ಹೆರ್ ಭಾಸೆಚಾ
ಮಟ್ಟಾಕ್ ಪಾವಾಜಯ್ - ಹಿಚ್ಚ್ ಮ್ಹಜಿ ಮಹತ್ವಾಕಾಂಕ್ಷಾ ಜಾವ್ನಾಸಾ.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ
ಸಂದೇಶ್ ಕಸಲೆ?
ಜಾ: ಸಾಹಿತಿಂಕ್ ಫುಲಂವ್ಚೆಸವೆಂ ಯುವಜಣಾಂಕ್ ಆವ್ಕಾಸ್
ಕರುನ್ ದೀಜಾಯ್. ಯುವಜಣಾಂಕ್ ಏಕ್ ಸಲ್ಹಾ - ಕಾಂಯ್ ಥೊಡಿಂ
ಬರ್ಪಾಂ ಪರ್ಗಟ್ತೆಚ್ಚ್ ತಕ್ಲೆಕ್ ಶಿಂಗಾಂ ಯೇನಾತ್ಲ್ಲೆಪರಿಂ ಪಳೆಂವ್ಕ್ ಜಾಯ್. ಚಡಿತ್
ಪರಿಶ್ರಮ್ ಕರುಂಕ್ ಕೆದ್ನಾಂಯ್ ಪಾಟಿಂ ಸರೊಂಕ್ ನಜೊ.
ಸ: ದಾಯ್ಜ್ ಡಾಟ್ ಕೊಮ್ ಸಾಯ್ಟಿವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಹಾಂವೆಂ ಸಭಾರಾಂಥಾವ್ನ್ ಆಯ್ಕಲ್ಲ್ಯಾ ಫರ್ಮಾಣೆಂ, ಕೊಂಕ್ಣಿ
ಸಾಹಿತ್ಯಾಕ್ ಪ್ರೋತ್ಸಾಹ್ ದಿಂವ್ಚೊ ವಾವ್ರ್ ದಾಯ್ಜ್ ಕರುನ್ ಆಸಾ ದೆಖುನ್
ಹೊ ವಾವ್ರ್ ಕೊಂಕ್ಣಿ ಭಾಸೆಚಾ ಉದರ್ಗತೆಖಾತಿರ್ ಖಂಡಿತ್ ಉಪ್ಕಾರ್ತೆಲೆಂ. ತಾಂಚಾ
ಸಭಾರ್ ರಿತಿಂಚಾ ಯೋಜನಾಂಧ್ವಾರಿಂ ಲಿಪೊನ್ ಗೆಲ್ಲ್ಯಾ ತಶೆಂಚ್
ಪಾಲ್ವಲ್ಲ್ಯಾ ಸಾಹಿತಿಂಚಾ ಸಾಹಿತ್ಯಾಕ್ ಉಜ್ವಾಡಾಕ್ ಹಾಡ್ಲ್ಲೆನಿಮ್ತಿಂ ಕೊಂಕ್ಣಿ
ಸಾಹಿತ್ಯಾಕ್ ಬರೆಂಚ್ ಜಾತೆಲೆಂ ಮ್ಹಣ್ತಚ್ ತಾಂಕಾಂ ಸರ್ವ್ ಬರೆಂ ಮಾಗ್ತಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
