ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 20
ಹುಲೊಪ್
ಎಡಿ ನೆಟ್ಟೊ
ನಾಂವ್: ಎಡ್ವರ್ಡ್ ಮರಿಯಾಣ್ ನೆಟ್ಟೊ
ಲಿಖ್ಣೆಂ ನಾಂವ್: ಎಡಿ ನೆಟ್ಟೊ
ಜನನ್: 10 ಎಪ್ರಿಲ್ 1938.
ಜಲ್ಮಾಲ್ಲೊ ಗಾಂವ್: ಜೆಪ್ಪು.
ಹೆರ್ ಕಾಣ್ಯೊ: ಗಡ್ ಆನಿ ತಡ್.
ವಳೊಕ್:
ಶಿಕಾಪ್: ಜೆಪ್ಪು ವರ್ಕ್ಶೋಪ್ ಸ್ಕೂಲ್ [1944 - 1952],
ಸಾಂ. ಲುವಿಸ್ ಹೈಸ್ಕೂಲ್ [1952-1956]
ಉದ್ಯೋಗ್: ಭಾರತೀಯ್ ವಾಯುಸೇನಾ (IBF)
[1956-1993]
(36.5
ವರ್ಸಾಂ)
ಸಾಹಿತ್ಯ್ ವಾವ್ರ್: 1956 ಇಸ್ವೆಂತ್
ಪಯ್ಲೆಂ ಕವಿತಾ ’ಆಪಯ್ತಾತ್ ತುಕಾ ಸ್ತೆಲ್ಲಾ’ [ಜೊ.ಸಾ.ಅಲ್ವಾರಿಸಾನ್]
ಲಿಖ್ಲೆಲ್ಯೊ ಕೃತಿಯೊ: (1956 - 13.2.2006
ಪರ್ಯಾಂತ್ - 2220:
ಪರ್ಗಟ್ ಜಾಲ್ಲ್ಯೊ - 1094)
ಮಟ್ವ್ಯೊ ಕಾಣ್ಯೊ 368 (ಪರ್ಗಟ್ ಜಾಲ್ಲ್ಯೊ
332)
ಲೇಖನಾಂ 1815 (ಪರ್ಗಟ್ ಜಾಲ್ಲ್ಯೊ
1731)
ಕವಿತಾ 29 (ಪರ್ಗಟ್ ಜಾಲ್ಲ್ಯೊ
25)
ಬೂಕ್ 8
(6)
[ಕುದ್ರೊ - 2003
(ಜೆಪ್ಪು ನಾಟಕ್ ಸಂಘ್), ಮಾಣ್ಕುಲೆಂ - 2004
(ಸೆವಕ್ ಮಯ್ನ್ಯಾಳೆಂ)]
ಪ್ರಶಸ್ಥಿ, ಪುರಸ್ಕಾರ್, ಸನ್ಮಾನ್:
1993 - ರಾಕ್ಣೊ
ಪತ್ರಾಚೊ ಸನ್ಮಾನ್ [2000 ರುಪಯ್]
2002 -
ದಿವೊ ಪ್ರಶಸ್ಥಿ [25000 ರುಪಯ್]
2003
- ಜೆಪ್ಪು ಫಿರ್ಗಜೆಚೊ ಸನ್ಮಾನ್/ಫುಲಾಂ
ಚಿಂತಾಪ್: ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ಹೊ ಆಪ್ಲ್ಯಾ ರಾಜಕೀಯ್ ಲೇಖನಾಂಕ್ ಫಾಮಾದ್ ತರ್ಯೀ ಹೊ ಏಕ್ ಅಪುರ್ಭಾಯೆಚೊ ಕಾಣ್ಯೆಗಾರ್ ಆನಿ ಅಪ್ರೂಪ್ ಕವಿ ಸಯ್ತ್. ಸಂಯ್ಬಾನ್ ಶಿಸ್ತೆಚೊ ತರ್ಯೀ ಮಯ್ಪಾಸಿ, ಮೊಗಾಳ್ ಆನಿ ಸಾದೊ ಮನಿಸ್. ಆಪ್ಲ್ಯಾ ಹರ್ಯೆಕಾ ಕಾಣ್ಯಾಂನಿ ವಾಚ್ಪ್ಯಾಕ್ ಎಕಾ ಅಥ್ವ್ಯಾಚ್ ಸಂಸಾರಾಕ್ ಆಪವ್ನ್ ವ್ಹರ್ಚಿ ಶ್ಯಾಥಿ ಹಾಚ್ಯಾ ಕಾಣ್ಯಾಂನಿ ದಿಸೊನ್ ಯೆತಾ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 20. ಹುಲೊಪ್
ದನ್ಪರಾಂ ಸುಮಾರ್ ಎಕಾ ವರಾರ್ ಭಾರಿಚ್ಚ್ ಆವಾಜಾನ್ ಆಯಿಲ್ಲೊ ಆಮ್ಚೊ ಪೂತ್ ಹೊಂಡಾ ಬಾಯ್ಕ್ ರಾವವ್ನ್ ದಡ್ಬಡುನ್ ಮೆಟಾಂ ಚಡ್ಲೊಂ ಆನಿಂ "ಲೊನಾನ್ ಸತ್ತ್ಯಾನಾಸ್ ಕೆಲೆಂ, ಆಮ್ಚಿಂ ಮರ್ಯಾದ್ ಕಾಡ್ಲಿ" ಮ್ಹಣ್ ಬಡ್ಬಡ್ಲೊಂ. ತಾಚೆಂ ರಾಗಿಷ್ಟ್ ತೋಂಡ್ ಆನಿಂ ಉಚಾಂಬಳ್ ಉತ್ರಾಂ ಮ್ಹಾಕಾ ಘಡ್ಬಡುಂಕ್ ಕರ್ತಾನಾ ಹಾಂವ್ ನೀಟ್ ಜಾಲೊಂ ಆನಿಂ ರಾಂದ್ಪಾಂ ಕುಡಾಂತ್ ಆಸ್ಲೆಲಿ ಪತಿಣ್ ಎಕಾ ಬಕ್ಕಾರಾನ್ ಭಾಯ್ರ್ ಆಯ್ಲಿ. ತಿ ರಾವ್ಲೆಲ್ಯಾ ಕಡೆಂಚ್ ಹುಳ್ವುಳ್ಚಾ ಪುತಾಕ್ ಆನಿಂ ಬಸ್ಲೆಲ್ಯಾ ಕಡೆಂಚ್ ದೊಳೆ ಸೊಡ್ಚಾಂ ಮ್ಹಾಕಾ ಪಳೆವ್ನ್ ಬಿರಾಂತೆನ್ ಹಾಂವೆ ದಡ್ಬಡ್ಚಾ ಕಾಳ್ಜಾನ್ ವಿಚಾರ್ಲೆಂ.
"ತಶೆಂ ಕಿತೆಂ ಜಾಲೆಂ, ಲೊನಾನ್ ಕಿತೆಂ ಕೆಲೆಂ?"
"ತುಮ್ಚೆಂ ಲೊನಾ ಆಮ್ಚಿ ಮರ್ಯಾದ್ ಮಾರ್ಗಾಕ್ ಉಡಂವ್ಕ್ ತ್ಯಾ ಹಲ್ಕಟ್ಯಾ ಕಡೆ ರಿಜಿಸ್ಟರ್ ಕಾಜಾರ್ ಜಾಲೆಂ," ಮ್ಹಣ್ ಪೂತ್ ಖೆಂವ್ಜಾಲೊ ಆನಿಂ ಹಾತ್ ಉಕ್ಲೊನ್ ಮುಟಿ ಅಂರ್ದಿಲಾಗ್ಲೊ.
"ಆಯ್ಯೋ ದೆವಾ ಮ್ಹಜ್ಯಾ" ಪತಿಣ್ ಆಕ್ಲಾಸ್ಲಿ, "ಹಾ! ಕಿತೆಂ ಸತ್ತ್, ಕೆದಾಳಾ? ಹಾಂವ್ ದಡ್ಬಡ್ಲೊಂ"
"ಆತ್ತಾಂ, ಪಂದ್ರಾ ಮಿನುಟಾಂ ಆದಿಂ ಡಿ.ಸಿ. ಆಫೀಸಾಂತ್ಲ್ಯಾ ಸಬ್ - ರಿಜಿಸ್ಟಾರ್ ದಫ್ತರಾಂತ್" ಬೊಬಾಟ್ಲೊ ಪೂತ್. "ತೆವ್ಶಿನ್ ಪಾವ್ಲೆಲ್ಯಾ ಮ್ಹಜ್ಯಾ ಮ್ಹಜ್ಯಾ ಎಕಾ ಇಷ್ಟಾನ್ ಫೋನ್ ಕರುನ್ ಮ್ಹಾಕಾ ಸಾಂಗ್ಲೆಂ ಆನಿಂ ಲೋನಾ ರಿಜಿಸ್ಟಾರ್ ದಫ್ತರಾಂತ್ ಆಸಾ, ಕಿತ್ಯಾ ಮ್ಹಣ್ ವಿಚಾರ್ಲೆಂ. ತಕ್ಲೆಕ್ ತೊಣ್ಕ್ಯಾನ್ ಮಾರೆಲ್ಲ್ಯಾಬರಿ ಬೊಗ್ತಾನಾ ಆನಿಂ ಜೀವ್ ಹಾತಾಂತ್ ದರುನ್ ಹಾಂವ್ ತೆವ್ಶಿನ್ ದಾಂವ್ತಾನಾ ಲೊನಾ ನಿಜಾಯ್ಕಿ ರಿಜಿಸ್ಟರ್ ಕಾಜಾರ್ ಜಾಂವ್ಕ್ ತಯಾರ್ ಜಾಲ್ಲೆಂ. ಕಿತೆಂ ಕರ್ತಾಯ್, ಪಿಶೆಂ ಪಾಂಗುರ್ತಾತ್ ಮ್ಹಣ್ ಹಾಂವ್ ಮುಖಾರ್ ವೆತಾನಾ ತ್ಯಾ ಬೆವಾರ್ಶ್ಯಾಚೆ ಈಶ್ಟ್ ಮ್ಹಾಕಾ ಆಡ್ ಆಯ್ಲೆ ಆನಿಂ, ಲೊನಾನ್ ರಿಜಿಸ್ಟ್ರಾರಾಕ್ ಕಿತೆಂಗಿ ಸಾಂಗ್ಲೆಲ್ಯಾನ್ ತಾಣೆಂ ತುಜ್ಯಾ ಭಯ್ಣಿಕ್ ಪ್ರಾಯ್ ಜಾಲ್ಯಾ, ತೆಂ ಸ್ವಂತ್ ಖುಶೆನ್ ಆಯ್ಲಾ ದೆಕುನ್ ಗಲಾಟೊ ಕರಿನಾಸ್ತಾಂ ಭಾಯ್ರ್ ವಚ್ ಮ್ಹಣ್ ಫರ್ಮಾಯ್ಲೆಂ."
ಮ್ಹಣ್ ಪೂತ್ ರಡ್ಲೊ. ದೆಕುನ್ ಹಾಂವ್ ಪಾಟಿಂ ಆಯ್ಲೊಂ ಪಪ್ಪಾ ಆನಿಂ ಕಿತೆಂ ಕರುಂ ಲೊನಾನ್ ಹ್ಯಾ ರಿತಿಂ ಆಮ್ಚಾ ಪಾಟಿಕ್ ಸುರಿ ಘಾಲ್ತಾನಾ?" ವಿಚಾರ್ತಾಂ ಪಾಯ್ ಕೊಸಾಳೆಲ್ಯಾ ಬರಿ ಸೊಫಾರ್ ಗಳೊನ್ ಹುಸ್ಕಾರುಂಕ್ ಲಾಗ್ಲೊ. ತಾಚಾ ಬರಾಬರ್ ಮ್ಹಜಿ ಪತಿಣ್ ಹಾ! ಮ್ಹಣ್ ರಡ್ಟಾನಾ ಮ್ಹಾಕಾಯಿ ಕಾಳಿಜ್ ಅಂರ್ದಿಲ್ಲ್ಯಾಬರಿ ದೂಕ್ ಉಬ್ಜಾಲಿ, ತರೀ ಸಿಂತಿಮೆಂತಾ ಸಾಂಬಾಳುನ್ ಆನಿಂ ಶಿಂತಿದ್ ಸಾರ್ಕೆಂ ಕರುನ್ "ಚೆಡ್ವಾನ್ ಕಾಮ್ ಪಾಡ್ ಕೆಲೆಮೂ, ತಾಚಾ ಫುಡಾರಾಚಿ ಗತ್ ಜಾಲಿಮೂ, ಶಿಕಾಪ್ ಸಂಪಯ್ - ಉಪ್ರಾಂತ್ ಪಳೆಂವ್ಯಾ ಮ್ಹಣ್ ಪಾಟಾಯಿಲ್ಲಿ ಬೂದ್ಬಾಳ್ ತಾಣೆಂ ನೆಗಾರ್ ಕೆಲೆಂಮೂ, ಆತಾಂ ಕಿತೆಂ ಕರ್ಚೆಂ?" ಮ್ಹಣ್ ಹಾಂವ್ ಕಳ್ವಳ್ಳೊಂ, "ಇತ್ಲ್ಯಾ ದರ್ವಡ್ಯಾನ್ ಕಿತ್ಯಾ ಉಡ್ಲೆಂ?" ವಿಚಾರ್ಲೆಂ.
"ಹಂಕಾರಾನ್ ಉಡ್ಲಾಂ ತರ್ ಕುಸ್ಕಾತಾನಾ ಪಡ್ತೆಲೆಂ" ಮ್ಹಣ್ ಪೂತ್ ಖೆಂವ್ಜಾಲೊ. "ಆಮ್ಚಾಂ ಉತ್ರಾಂಕ್ ಮ್ಫ್ಲ್ ದೀನಾಸ್ತಾಂ ಆಮ್ಚಿಂ ಮರಾದ್ ಲೆಕಿನಾಸ್ತಾಂ ಭಾಯ್ರ್ ಮೇಟ್ ದವರುಂಕ್ ಧಯ್ರ್ ಘೆತ್ಲ್ಲ್ಯಾ ತಾಣೆಂ ಹಾಂಗಾ ಪಾಟಿಂ ಯೆಂವ್ಚೆಂ ನಾಕಾ. ಪಪ್ಪಾ, ತುಮ್ವೆಂ ತಾಕಾ ಹಾಂಗಾ ರೀಗ್ ದೀಂವ್ಕ್ ನಜೊ, ಆಮ್ಕಾಂ ಲೆಕಾ ಭಾಯ್ರ್ ದವರ್ಲೆಲೆಏ ತೆಂ ಖಂಯ್ ತರಿ ವಚುಂದಿ, ತಾಚಾ ಫುಡಾರಾಚಿ ಗತ್ ಕಿತೆಂಯಿ ಜಾಂವ್ದಿ, ಆಜ್ ಥಾವ್ನ್ ತಿ ಖಂತ್ ಆಮ್ಕಾಂ ನಾಕಾ" ಮ್ಹಣ್ ಉಟ್ಲೊ.
ತಾಚಿ ಕೊಡ್ಸಾಣ್ ಮ್ಹಾಕಾ ಸಮ್ಜಾಲಿ, ಪಂಚ್ವೀಸ್ ವರ್ಸಾಂಚಾ ತರ್ನಾಟ್ಪಾಣಾನ್ ಸಳ್ಸಳ್ಯಾ ರಗ್ತಾಚಾ ಜೊಶಾನ್ ಆನಿಂ ಗರ್ವಾನ್ ಭರ್ಲೆಲ್ಯಾ ತಾಕಾ ಎಕ್ವೀಸ್ ವರ್ಸಾಂಚಾ ದಾಕ್ಟ್ಯಾ ಭಯ್ಣಿನ್ ದಿಲ್ಲೊ ದಕೊ ಬಿರಾಂಕುಳ್ ಆಕ್ಲಾಸಾಚೊ ಜಾಲ್ಲೊ. ಭಾರಿಚ್ ಕಷ್ಟಾಂನಿ ಬಿ.ಕೊಮ್ ಸಂಪವ್ನ್ ಆನಿಂ ಭಾರಿಚ್ಚ್ ಮಿನತೆನ್ ಟೆಲಿಕೊಮಾಂತ್ ಧಾಕ್ಟುಲೊ ಉದ್ಯೋಗ್ ದರುನ್ ಮಾನಾನ್ ಜಿಯೆತಲ್ಯಾ ತಾಕಾ ಆಪ್ಲೆಂ ಕಲ್ಸಾಂವ್ಂಚ್ ನಿಕ್ಳಾಯಿಲ್ಲ್ಯಾಬರಿ ಬೊಗ್ತಾಲೆಂ. ಶಿಕ್ಚಾಂತ್ ಹುಶಾರ್ ಆಸ್ಚಿ ದಾಕ್ಟಿ ಭಯ್ಣ್ ಜಾತಾ ತಿತ್ಲೆಂ ಶಿಕೊಂದಿ, ಫ್ರೊಪೆಸರ್ ಯಾ ಪೊಲಿಸ್ ಇನ್ಸ್ಪೆಕ್ಟರ್ ಯಾ ಮಿಲಿಟ್ರಿ ಆಫಿಸರ್ ಜಾವ್ನ್ ಘರಾಣ್ಯಾಕ್ ವಿಶಿಶ್ಟ್ ಕೀರ್ತ್ ಹಾಡುಂದಿ ಮ್ಹಣ್ ವಿಪ್ರೀತ್ ಹುಸ್ಕೊ ದಾಕಂವ್ಚಾ ತಾಕಾ ಭಯ್ಣಿಚೆಂ ಹೆಂ ಅವ್ಜಿತ್ತ್ ಕಾರ್ಯೆಂ ಪೊಸ್ಕಟ್ಯಾಕ್ ಖೊಟ್ ಘಾಲ್ಲ್ಯಾಬರಿ ಜಾಲ್ಲೆಂ. ವಯ್ ತಾಚೊ ರಾಗ್ ಸದ್ದ್ಯಾಕ್ ನಿವ್ಚೊ ನಾ.
ಹಾಂವೆಂ ಪತಿಣೆ ವಯ್ರ್ ದೀಷ್ಟ್ ಘಾಲಿ. ತಿ ತಕ್ಲೆಕ್ ಘಡ್ಗಡೊ ಪಡೋನ್ ಸಯ್ರ್ - ಭಯ್ರ್ ಜಾಲ್ಲ್ಯಾಬರಿ ದೊಳೆ ಸೊಡ್ತಾಲಿ ಆನಿಂ ಮ್ಹಜೆ ದೊಳೆ ಮೆಳ್ತಾನಾ ದುಃಖಾಂ ಗಳಂವ್ಕ್ ಲಾಗ್ಲಿ. ತಿಚಿ ಅವಸ್ಥಾ ಮ್ಹಾಕಾ ಸಮ್ಜಾಲಿ, ಸಾಧಿ ಆನಿಂ ಸತ್ತಿ ಜಾಲ್ಲ್ಯಾನ್ ಹೆಣೆಂ - ತೆಣೆಂ ಆಶೆಂಚ್ ಘಡ್ಚೆಂ ತೆಂ ಆಯ್ಕಾಲ್ಲ್ಯಾರಿ ಆಪ್ಲ್ಯಾ ಘರಾ ತಶೆಂ ಜಾಂವ್ಚೆಂ ನಾಕಾ, ಆಫ್ಲಿ ಭುರ್ಗಿಂ ತಶೆಂ ಕೆದಿಂಚ್ ಕರ್ಚಿನಾಂತ್ ಮ್ಹಣ್ ಘಟ್ಟ್ ಪಾತ್ಯೆವ್ನ್ ಆಸ್ಲ್ಲಿ.
ಆತಾಂ ತಶೆಂಚ್ ಅವ್ಜಿತ್ತ್ ಆಮ್ಗೆರ್ ಘಡ್ತಾನಾ ದೊಳ್ಯಾಂ ಹುಜ್ರಿಂ ಝಗ್ಲಾಣೆಂ ಮಾರ್ಲೆಲ್ಯಾಬರಿ, ಕಾನಾ ಬಗ್ಲೆನ್ ಘಡ್ಗಡೊ ಪುಟ್ಲೆಲ್ಯಾಬರಿ ತಿ ಕಾಂಪೊನ್ ಗೆಲ್ಲಿ. ಹ್ಯಾ ವಗ್ತಾ ಹಾಂವೆಂ ಅರಾಬಾಯ್ ದೀವ್ನ್, ತಾಳೊ ಪಿಂದುನ್ ಆನಿಂ ಗಾಳಿ ಮಾರುನ್ ಮ್ಹಜೊ ಸಂತಾಪ್ ವೊಂಕ್ಚಾ ಬದ್ಲಾ ಸಂಯಮ್ ಸಾಂಬಾಳುನ್ ತಿಕಾ ಭುಜಂವ್ಚೆಂ - ಸಮಾಧಾನ್ ಕರ್ಚೆಂ ಭಾರಿಚ್ಚ್ ಗರ್ಜೆಚೆ ಮ್ಹಣ್ ಹಾಂವ್ ವಳೂ ಪುಸ್ಪುಸ್ಲೊಂ ಆನಿಂ ತಿಚಿ ಕಾಳ್ಜಾ ಉಡಿ ಉಣಿ ಕರ್ಚಿಂ ಉತ್ರಾಂ ಉಲಯ್ಲೊಂ.
"ಆಮ್ಚಿಂ ಭುರ್ಗಿಂ ಮ್ಹಣ್ ಬಹುಶಾ ಆಮಿಂ ತಾಂಕಾಂ ಮೋಗ್ ತಿಕ್ಕೆ ಚಡ್ಚ್ಚ್ ದಿಲೊ, ಆಮಿಂ ಕಶ್ಟಾಲ್ಯಾಂವ್ ತರೀ ಭುರ್ಗಿಂ ಆಮ್ಚಿಂ ಸುಖಾನ್ ವಾಡೊಂದಿತ್ ಮ್ಹಣ್ ಸವ್ಲತ್ಯೊ ತಿಕ್ಕೆ ಚಡ್ಚ್ ವೊತ್ಲಿಂ. ಮಾತ್ಯೆಚಿ ಮೊಡ್ಕಿ ತಿಕ್ಕೆ ಉಣಿ ಶಿಜಾಯಿಲ್ಲ್ಯಾಬರಿ ಜಾಲೆಂ, ಸಂದರ್ಭಾಕ್ ಆದಾಳ್ತಾನಾ ಏಕ್ ಮೊಡ್ಕಿ ಪುಟ್ಲಿ. ಆತಾಂ ಕಿತೆಂ ಕರುಂಕ್ ಜಾತಾ, ಪುಟ್ಲೆಲಿ ಮೊಡ್ಕಿ ಘಡ್ಸುಂಕ್ ಜಾಯ್ನಾ, ತಿ ತಾಚೆ ಇತ್ಲ್ಯಾಕ್ ಪಡೋನ್ ಆಸೊಂದಿ, ತುಂ ಕಿತೆಂ ಮ್ಹಣ್ತಾಯ್? ಆಮಿಂ ಆರಾಬಾಯ್ ದಿಂವ್ಚಾ ಬಾಯ್ಲೆಬರಿ ಕರಿನಾಸ್ತಾಂ ಮೊನ್ಯಾಬರಿ ಕ್ರಿಸ್ತಾಚಿ ಕೂಡ್ ಉಸ್ಕ್ಯಾರ್ ಘೆತ್ಲ್ಲ್ಯಾ ಮರಿಯೆ ಬರಿ ಜಾಂವ್ಯಾಂ. ಮ್ಹಾಕಾ ಬೊಗ್ತಾ, ಕಠಿಣ್ ಬೆಜಾರಾಯ್ ದೊಸ್ತಾ, ಧುವೆಕ್ ಚಾರ್ ಗಾಳಿ ಮಾರುನ್ ದೋನ್ ಖೊಟ್ ಘಾಲ್ಯಾಂ ಮ್ಹಣ್ ತಾಳ್ಣಿಂ ಯೆತಾ. ತಶೆಂ ಪೂರಾ ನಾಕಾ, ಆಮಿಂ ಮರಿಯೆಬರಿ ಆಮ್ಚಾ ದುಃಖಾಚಿ ಕೊಡ್ಸಾಣ್ ಗಿಳ್ಯಾಂ, ಭಲಾಯ್ಕೆಕ್ ಬರೆಂ"/
ತಿ ಬಹುಶಾ ಶಾಂತ್ ಜಾಲಿ, ಖಂಡಿತ್ ಹುಶಾರ್ ಜಾಲಿ ದೆಕುನ್, "ತುಕಾ ಚಾ ಕರ್ತಾಂ" ಮ್ಹಣ್ ಬಿತರ್ ಗೆಲಿ. ಹಾಂವ್ "ಕಿತ್ಯಾ ಆಶೆಂ ಜಾಲೆಂ, ಖಂಯ್ ಅಮಿಂ ಚುಕ್ಲ್ಯಾಂವ್"? ಮ್ಹಣ್ ನಿಯಾಳಿಲಾಗ್ಲೊಂ.
ಸಾಟ್ ವರ್ಸಾಂಚೊ ಹಾಂವ್ ನಿವ್ರತ್ತ್ಪಣಾಚಾ ಪಯ್ಲ್ಯಾ ವರ್ಸಾಂತ್ ಜಿಯೆತಾಲೊಂ, ಸರ್ಕಾರಿ ಹುದ್ದೊ ಸಾಂಬಾಳ್ಲ್ಲ್ಯಾನ್ ಹಾತ್ಭರ್ ಪೆನ್ಶನ್ ಮೆಳ್ತಾಲೆಂ ಆನಿಂ ಕಶಿಶನ್ ಪುಂಜಾಯಿಲ್ಲೊ ದುಡು ಚಡ್ತಿಕ್ - ಆದಾಯ್ ಹಾಡ್ತಾಲೊ. ಗ್ರೇಸ್ತ್ ರಿತಿನ್ ನ್ಹಂಯ್ ತರೀ ತ್ರಪ್ತಿ ಮಿತಿನ್ ಜಿಣಿ ಸಾರುಂಕ್ - ಆಮ್ಕಾಂ ಜಾತಾಲೆಂ ಆನಿಂ ದೊಳ್ಯಾಂ ಹುಜ್ರಿಂ ದೊಗಾಂ ಭುರ್ಗಿಂ ತರ್ನಾಟ್ಪಾಣಾನ್ ಭರುನ್, ತಾಲೆಂತಾನಿಂ ಪರ್ಜಳೊನ್ ಆನಿಂ ಭಂವ್ತಿಚಾ ಲೊಕಾ ಥಾವ್ನ್ ಮೆಚ್ವೊಣಿ ಜೊಡುನ್ ಆಪ್ಲ್ಯಾ ಫುಡಾರಾ ತೆವ್ಶಿಂ ಖಚಿತ್ ಮೆಟಾಂ ಕಾಡ್ತಾನಾ ಆಮಿಂ ಖಂಡಿತ್ ಸಂತುಷ್ಟ್ ಜಾವ್ನಾಸ್ಲ್ಲ್ಯಾಂವ್. ಪೂತ್, ಆಪ್ಲ್ಯಾ ಉದ್ಯೋಗಾಂತ್ ಭದ್ರ್ ಠಿಕುಲ್ಲೊ, ಮೆಳ್ಚಾ ಸಾಂಬಾಳಾನ್ ಘರಾಕ್ಯಿ ಆಧಾರ್ ದಿತಾಲೊ ಆನಿಂ ಸದ್ದ್ಯಾಕ್ ಮೊಗಾ ಪಿಶೆಂಪಣ್ ದೊಸಿನಾಸ್ತಾಂ ಸೀದಾ ಚಲ್ತಾಲೊ. ದುವ್ ಬರ್ಯಾ ಫುಡಾರಾಖಾತಿರ್ ಯುನಿವರ್ಸಿಟಿಂತ್ ಶಿಕ್ತಾಲೆಂ.
ಆನಿಂ, ತಾಂಚಾ ಫುಡ್ಲ್ಯಾ ಜೀವಿತಾ ವಿಶಿಂ ಹಾಂವ್ ಆನಿಂ ಪತಿಣ್ ಮಾಂಡ್ಣಿ ಕರುನ್ ಆಸ್ತಾನಾ, ಗಾದಿ ಬರಿ ಸ್ವಪ್ಣಾಂತ್ ಮಾಂಡಾಸ್ ಖಾತಾನಾ ಆನಿಂ ರಂಗಾಳ್ ಸ್ವಪ್ಣಾಂನಿ ಆಲಂಕಾರಾಭರಿತ್ ದಾದೊಸ್ಕಾಯ್ ರೂಪಿತ್ ಕರ್ತಾನಾ ಧುವೆನ್ ಹೊ ನಿಶ್ಟುರ್ ತೊಣ್ಕೊ ಆಮ್ಚಾ ತಕ್ಲೆರ್ ಮಾರೊಲ್ಲೊ.!
ಪತಿಣೆಚಾ ಒತ್ತಾಯೆಕ್ ಲಾಗೊನ್ ಪೂತ್ ಜೆವ್ಣಾ ವಿಧಿ ಸಂಪವ್ನ್ ದೋನ್ ವರಾರ್ಶೆಂ ಪಾಟಿಂ ಕಾಮಾಕ್ ಗೆಲೊ ಆನಿಂ ಮೆಟಾಂ ದೆಂವ್ತಾಬಾ, " ತೆಂ ತೀನ್ ಕಾಸಾಂಚೆ ರಾಂಡ್ ಯೇತ್ ತರ್ ಬಿತರ್ ಪಾಂಯ್ ದವರುಂಕ್ ಸೊಡ್ನಾಕಾತ್, ಸಾರ್ಣಿ ಖುಂಟ್ಯಾನ್ ಮಾರ್ನ್ ದಾಂವ್ಡಾಯಾ" ಮ್ಹಣ್ ತಾಕಿದ್ ದೀಂವ್ಕ್ ಲ್ಪಾವ್ಲೊ. ಪ್ರಾಯೆಕ್ ಪಾವುಲ್ಲೊ ಪೂತ್, ಗಾದಿಬರಿ ಇಶ್ಟಾ ಬರಾಬರ್ ಸ್ಥಾನ್ ಘೆತಾ ಮ್ಹಣ್ ಹಾಂವೆ ತಕ್ಲಿ ಹಾಲಯ್ಲಿ. ತೊ ಗೆಲ್ಯಾ ಉಪ್ರಾಂತ್ ಪತಿಣ್ ಆನಿಂ ಹಾಂವ್ ದೋನ್ ಉಂಡಿ ಸೆವೊಂಕ್ ಬಸ್ಲ್ಯಾಂವ್, ಬೆಜಾರಾಯೆನ್ ಜಿಬೆನ್ ಆನಿಂ ಮನಾನ್ ಸಹಾಕಾರ್ ದಿಲೊ ನಾ ಜಾಲ್ಲ್ಯಾನ್ ಉಟ್ಲ್ಯಾಂವ್ ಆನಿಂ ಫುಡೆಂ ಕಿತೆಂ ಕರ್ಚೆಂ, ಹೆಂ ಪೂರಾ ಕಶೆಂ ಸೊಸ್ಚೆಂ, ವಿಚಾರ್ತೆಲ್ಯಾಂಚಾ ಕೊಡು ಉತ್ರಾಂಕ್ ಕಿತೆಂ ಸಾಂಗ್ಚೆಂ ಮ್ಹಣ್ ಚಿಂತೇಸ್ತ್ ಜಾಲ್ಯಾಂವ್. ಚಿಂತಿನಾತ್ಲೆಲ್ಯಾ ಜಿನ್ಸಿಂ ಮ್ಹಾಕಾ ಆಪ್ಟಾಲೊ.
ಪಾಂಚ್ ವರಾರ್ ಸದಾಂಚಾ ಸವಯೆ ಪರ್ಮಾಣೆಂ ಹಾಂವ್ ಚಾ ಪಿಯೆವ್ನ್ ವಾಕಿಂಗಾಕ್ ಭಾಯ್ರ್ ಸರ್ಲೊಂ. ಘರಾಚಿ ಗೇಟ್ ಬಂದ್ ಕರುನ್ ಮಾರ್ಗಾಕ್ ಪಾವ್ತಾನಾ ಏಕ್ ಆಟೊ ರಿಕ್ಶಾ ಲಾಗಿಂ ಯೇವ್ನ್ ಥಾಂಬ್ಲಿ. ಕೋಣ್ ಕಿತೆಂ? ಮ್ಹಣ್ ದೊಳೆ ಸೊಡ್ತಾನಾ ದೆಂವ್ಚಿ ಧುವ್ ದಿಸ್ಲಿ, ತೆಂ ಪಪ್ಪಾ ಮ್ಹಣ್ ರಡಾಲಾಗ್ಲೆಂ. ಹಾಂವ್ ಘಡಿಭರ್ ಬಳ್ ನಾತ್ಲೆಲ್ಲ್ಯಾಬರಿ ಗಳ್ಳೊಂ. ತರೀ ಶಿಂತಿದ್ ಆರಾವ್ನ್, "ಹೂಂ!! ಆಯ್ಲೆಂಯ್ಗಿ? ಆಮಿಂ ತುಕಾಚ್ಚ್ ರಾಕೊನ್ ಆಸ್ಲ್ಲ್ಯಾಂವ್, ಘರಾ ಮಾಮ್ಮಿ ಆಸಾ, ತಿಕಾ ಚಡ್ ರಡೊಂಕ್ ಕರಿನಾಸ್ತಾಂ ತುಜಿ ಮುಸ್ತಾಯ್ಕಿ ಆರಾವ್ನ್ ಪಾಟಿಂ ವಚ್" ಮ್ಹಳ್ಳೆಂ ಆನಿಂ ಕಾಂಯ್ಚ್ ಘಡೊಂಕ್ ನಾತೆಲ್ಲ್ಯಾಬರಿ ಮುಖಾರ್ ಗೆಲೊಂ. ಫುಡೆಂ ಪಾವೊನ್ ಪಾಟಿಂ ಗುಂವೊನ್ ಪಳೆಯ್ತಾನಾ ತೆ ಥಂಯ್ಚ್ ರಾವೊನ್ ಮ್ಹಾಕಾ ದೆಕ್ತಾಲೆಂ, ಬಹುಶಾ ಪಪ್ಪಾ ಕಿತ್ಯಾ ಥಂಡ್ ಮ್ಹಣ್ ಆಜಾಪೊನ್.
ಹಾಂವ್ ಇಗರ್ಜೆ ತೆವ್ಶಿಂ ಗೆಲೊಂ ಆನಿಂ ಕಾಳೊಕ್ ಪಡ್ತಾ ಪರ್ಯಾಂತ್ ಲೂರ್ದ್ ಸಾಯ್ಬಿಣೆಚಾ ಗ್ರೊಟ್ಟೊ ಮುಳಾಂತ್ ಬಸ್ಲೊಂ. ಸಹಜ್ ಜಾವ್ನ್ ಧುವೆಚಿ ಚಿಂತ್ನಾಂಚ್ ದೊಸ್ತಾಲಿಂ, ತೆಂ ಗರ್ಚಿಂ ಮೆಟಾಂ ಚಡ್ತಾನಾ ಮ್ಹಜ್ಯಾ ಪತಿಣೆಕ್ ಜಾಂವ್ಚಾ ತಳ್ಮಳ್ಯಾ ವಿಶಿಂ ಚಿಂತುನ್ ಹಾಂವ್ ಆನಿಕ್ಯಿ ದುಃಖೆಸ್ತ್ ಜಾಲೊಂ, ತಿಚೆಂ ರುದಾನ್ ಮ್ಹಜ್ಯಾ ದೊಳ್ಯಾಂ ಹುಜ್ರಿಂ ಜಾಂವ್ಚಾಬರಿ ಕಳ್ವಳ್ಳೊಂ. ಇಡ್ಯಾಂತ್, ತೆಂ ಮ್ಹಜ್ಯಾ ಸಾಮ್ಕಾರ್ ಉಬೆಂ ಜಾತಾನಾ ಮ್ಹಾಕಾ ಕಿತ್ಯಾ ರಾಗ್ ಆಯ್ಲೊನಾ? ರಾಗಿಶ್ಃಟ್ ಉತ್ರಾಂ ಕಿತ್ಯಾ ಸುಟ್ಲಿನಾಂತ್? ಹತ್ ಕಿತ್ಯಾ ಮಾರುಂಕ್ ವಯ್ರ್ ಗೆಲೊನಾಂ ಮ್ಹಣ್ ವಿಜ್ಮಿತ್ ಪಾವ್ಲೊಂ. ಬಹುಶಾ ಹಾಂವೆಂ ಆಶಾ ಸೊಡ್ಲಿ, ದುವೆ ಥಂಯ್ ಮಯ್ಪಾಸಾಚಿ ಬೊಗ್ಣಾಂ ಮೆಲಿಂ, ತಾಣೆಂ ಮ್ಹಜ್ಯಾ ಕಾಳ್ಜಾಕ್ ಕೆಲ್ಲೊ ಘಾಯ್ ಮ್ಹಾಕಾ ನಿಸ್ತೇಜಿತ್ ಕರುಂಕ್ ಪಾವ್ಲೊಂ ಮ್ಹಣ್ ಚಿಂತಿಲಾಗ್ಲೊಂ. ಬರೆಂ ಜಾಲೆಂ ಘರಾ ಪೂತ್ ನಾತ್ಲ್ಲೊ, ನಾಂ ತರ್ ಹಾತಿಂ ಮೊಡೆಂ ಪಡ್ತೆಂ, ಹೆಂಯೀ ಬಾವಾಚಾ ವೆಳಾವಿಶಿಂ ಕಳಿತ್ ಆಸೊನ್ಂಚ್ ಆಯಿಲ್ಲೆಂ.
ಆಮೊರೆಚಿ ಘಾಂಟ್ ಮಾರ್ತಾನಾ ಹಾಂವ್ ಘರಾ ಪಾಟಿಂ ಆಯ್ಲೊಂ ಆನಿಂ ವಳು ಪತಿಣೆಕ್ ಸೊದುನ್ ಗೆಲೊಂ. ತಿಂ ರಾಂದ್ಪಾಕುಡಾಂತ್ ಆಸ್ಲ್ಲಿ, ಚಪಾತಿ ಕರ್ತಾಲಿ, ಮ್ಹಾಕಾ ಪಳೆವ್ನ್ "ಹೊ! ಆಯ್ಲೊಯ್ಗಿ, ತುಕಾಚ್ಚ್ ರಾಕೊನ್ ಆಸ್ಲಿಂ" ಮ್ಹಣಾಲಿ. ಹಾಂವ್ ಆಜಾಪ್ಲೆಂ. "ಏಕ್ ದುಃಖ್ ನಾಂ, ಏಕ್ ರಡ್ನೆಂ ನಾಂ, ದುವೆಕ್ ಪಳೆವ್ನ್ ಕಾಳಿಜ್ ಪಾತೊರ್ ಜಾಲೆಂಗಿ?" ಮ್ಹಣ್ ಚಿಂತಿಲಾಗ್ಲೊಂ," ಕಿತ್ಯಾ ರಾಕ್ತಾಲೆಂಯ್ಮ್ ಕಿತೆಂ ಜಾಲೆ?" ಮ್ಹಣ್ ಕಳಿತ್ ಆಸ್ಲ್ಯಾರಿ ವಿಚಾರ್ಲೆಂ. ತಿ ಚಪಾತಿ ಗುಂವ್ಡಾಯ್ತಾ ಗುಂವ್ಡಾಯ್ತಾಂ "ಲೊನಾ ಆಯಿಲ್ಲೆಂ, ಮುಸ್ತಾಯ್ಕಿ ವರೊನ್ ಗೆಲೆಂ", ಮ್ಹಣ್ ಪುಸ್ಪುಸ್ಲಿ. ಹಾಂವೆಂ "ಜಾಣಾಂ ತೆಂ ಯೆತಾನಾ ಹಾಂವ್ ಗೆಟಿಲಾಗಿಂ ಆಸ್ಲ್ಲೊಂ, ತುಂವೆಂ ಕಿತೆಂ ಮ್ಹಳೆಂಯ್"? ವಿಚಾರ್ಲೆಂ. ತಿಚೆಂ ತೊಂಡ್ ಬಾವ್ಲೆಂ. "ಹಾಂವ್ ಕಿತೆಂ ಮ್ಹಣೊಂ? ಮುಸ್ತಾಯ್ಕಿ ವರ್ತಾ ಮ್ಹಣಾಲೆಂ, ವರ್ ಮ್ಹಳೆಂ. ವರ್ತಾನಾ ರಡ್ಲೆಂ, ಬರ್ಯಾನ್ ರಾವ್ ಮ್ಹಣ್ ದಾಡ್ಲೆಂ, ತಿತ್ಲೆಂಚ್" ಮ್ಹಣಾಲಿ. ಹಾಂವೆಂ "ಬರೆಂ ಕೆಲೆಂಯ್" ಮ್ಹಳೆಂ.
ಆಶೆಂ ಪೂರಾ ಘಡೊನ್ ಧಾ ವರ್ಸಾಂ ಉತರ್ಲ್ಯಾಂತ್. ಸತ್ತ್ರ್ ವರ್ಸಾಂಚೊ ಹಾಂವ್ ತಿಕ್ಕೆ ಪಿಡೆಸ್ತ್ ಜಾಲಾಂ, ಮ್ಹಜೆಂ ಕಾಳಿಜ್ ತವಳ್ ಖೊಂಕ್ತಾ ಆನಿಂ ಮ್ಹಾಕಾ ಜಬ್ಬೊರ್ ದೂಕ್ ದಿತಾ. ಚಾರ್ ವರ್ಸಾಂ ಆದಿಂ ಕಂಕ್ನಾಡಿ ಆಸ್ಪತ್ರೆಂತ್ ಧಾ ದೀಸ್ ಆಸ್ಲ್ಲೊಂ. ಹಿ - ತಿ ಪರೀಕ್ಶಾ, ಹಿ ತಿ ಚಿಕಿತ್ಸಾ ಆನಿಂ ಹೆಂ ತೆಂ ಕಾಡುಂಕ್ - ಶಿರ್ಕಾಂವ್ಕ್ ಮ್ಹಣ್ ಕಾಳಿಜ್ ಘಟ್ ಕರುಂಕ್. ದಾಕ್ತೆರಾನ್ ತ್ಯಾ ವೆಳಾಅ ಚತ್ರಾಯ್ ಪಾಟಾಯಿಲ್ಲಿಂ. "ಆನ್ಯೇಕ್ ಪಾವ್ಟಿಂ ಕಾಳ್ಜಾ ದೂಕ್ ಉಟ್ಲ್ಯಾರ್ ವ್ಹಡ್ಲಿ ಬಾಯ್ಪಾಸ್ ಸರ್ಜರಿ ಕರುಂಕ್ ಪಡ್ತೆಲಿ, ಲಾಖಾಂನಿ ಖರ್ಚ್ ಆಸ್ತೊಲೊ" ಮ್ಹಣ್ಚಾ ಉತ್ರಾಂನಿ. ಆತಾಂ ಪರ್ತ್ಯಾನ್ ಕಾಳ್ಜಾ ದೂಕ್ ಉಟ್ಲ್ಯಾ ಆನಿಂ ಹಾಂವ್ ಕಂಕ್ನಾಡಿ ಫಾತಿಮಾ ವಾರ್ಡಾಣ್ತ್ ನಿದ್ಲಾಂ. ದಾಕ್ತೆರಾನ್ ಬೊಲ್ಮೆಂ ಸಾಂಗ್ಲೆಲ್ಯಾ ಬರಿಚ್ಚ್ ವ್ಹಡ್ಲ್ಯಾ ಬಾಯ್ಪಾಸ್ ಸರ್ಜೆರಿಚಿ ತಯಾರಿ ಚಲ್ತಾ. ತ್ಯಾ ಖಾತಿರ್ ಹಾಂವ್ ತಯಾರ್ ಜಾತಾಂ.
ತೀನ್ ದಿಸಾಂ ಆದಿಂ ದಾಕ್ತೆರಾನ್ ಮ್ಹಳ್ಳೆಂ "ತುಜಿ ಕಾಲೆತ್ ತಿತ್ಲಿ ಬರಿ ನಾಂ, ಪ್ರಾಯೆಸ್ತ್ ಜಾಲ್ಲ್ಯಾನ್ ವ್ಹಡ್ಲಿ ಸರ್ಜರಿ ತಿಕ್ಕೆ ಕಷ್ಟಾಂಚಿ ಜಾತೆಲಿ, ತರೀ ಬಿಯೆಂವ್ಕ್ ಕಾಂಯ್ ನಾಂ, ಆಮಿಂ ಆಸಾಂವ್ ಆನಿಂ ತುಕಾ ಸಾರ್ಕೊ ಕರುನ್ಂಚ್ ಪಾಟಿಂ ದಾಡ್ತಾಂವ್. ಪುಣ್ ಮನ್ಶ್ಯಾ ಹಾತಾ ಪ್ರಾಸ್ ಆನ್ಯೇಕ್ ವ್ಹಡ್ಲೊ ಹಾತ್ ಆಸಾ, ತಾಚೆಂ ಬೆಸಾಂವ್ ಪಡ್ಲ್ಯಾರ್ ಪುರೊ, ಆಮ್ಚಿಂ ವಾಂವ್ಟ್ ಸುಫಳ್ ಜಾತೆಲಿ" ಮ್ಹಣ್ ಧಯ್ರ್ ದಿಲ್ಲೆಂ. ಪುಣ್ ಕಾಳ್ಜಾ ದುಕಿನ್ ಮಾಕಾ ಉಲಂವ್ಕ್ ಜಾಯ್ನಾತ್ಲೆಂ, ನೀದ್ ತಾಚೆ ಪಯ್ಲೆಂ ಪಡಾನಾತ್ಲ್ಲಿ ಆನಿಂ ಹಾಂವೆಂ ಸವ್ಕಾಸಾಯೆನ್ ವೇಳ್ ಪಾಶಾರ್ ಕರಿಜಾಯ್ ಮ್ಹಣ್ ದಾಕ್ತೆರಾನ್ ದಿಲ್ಲ್ಯೊ ಗುಳಿಯೊ ಮ್ಹಜಿ ಮತ್ಚ್ ಘಯ್ರ್ ಕರ್ತಾಲ್ಯೊ. ಮ್ಹಜಿ ನಿಮಾಣಿಂ ಘಡಿ ಲಾಗಿಂ ಆಯ್ಲ್ಯಾಗಿ ಮ್ಹಣ್ ಚಿಂತಾಲೊ, ವೆಚಾ ಪಯ್ಲೆಂ ಸಂಸಾರಿ ಜವಾಬ್ದಾರಿ ಆನಿಂ ವಳ್ವಳೆ ನಾಸ್ತಾಂ ದೊಳೆ ದಾಂಪಿಜಾಯ್.
ಸಕ್ಡಾಂ ಪ್ರಾಸ್ ವರ್ತಿ ಜವಾಬ್ದಾರಿ, ಮ್ಹಜ್ಯಾ ಸಾದ್ಯಾ - ಸತ್ತಿ ಪತಿಣೆಕ್ ತಯಾರ್ ಕರ್ಚಿ, ಹಾಂವ್ ಪ್ರಾಣ್ ಸೊಡಿನ್ ತರ್ ತಿಣೆಂ ಕಾಳಿಜ್ ಪುಟಾಯ್ನಾಸ್ತಾಂ ಜಿಯೆಂವ್ಕ್ ಕರ್ಚಿ ಆನಿಂ ತ್ಯಾ ವಾಟೆನ್ ಆಮ್ಚಾ ಭುರ್ಗ್ಯಾಂನಿ ಫಾಸ್ಳೆಕ್ ರಾವೊನ್ ತಿಚಾ ಜಿಣಿಯೆಂತ್ ಉರ್ಭಾ ಬರ್ಚಿ. ಹಾಂವೆಂ ತಿಕಾ ಆರ್ಥಿಕ್ ಭದ್ರತಿ ದಿಲ್ಲಿ, ಸಾತ್ ಸೆಂಟ್ಸ್ ಸುವಾತೆಂತ್ ಆಸ್ಚೆಂ ಮಾಳಿಯೆಚೆಂ ಘರ್ ಆನಿಂ ಜಾಗೊ ಆಮ್ಚಾ ದೊಗಾಂಯ್ಚಾ ನಾಂವಾರ್ ರಿಜಿಸ್ಟರ್ ಕೆಲ್ಲೊ. ತ್ಯಾ ಶಿವಾಯ್ ಮ್ಹಾಕಾ ಮೆಳ್ಚಾ ಪೆನ್ಶನಾಚೊ ಅರ್ದೊ ವಾಂಟೊ ಸುಮಾರ್ ಪಾಂಚ್ ಹಜಾರಾಂ ಲಾಗಿಂ ತಿಕಾ ಲಾಭ್ಚಾ ಬರಿಚ್ ಪೋಸ್ಟ್ ಆಫೀಸಾಂತ್ಯಿ ಮಹಿನ್ಯಾವಾರ್ ಆದಾಯ್ ಮೆಳ್ಚಿ ವಿಲಾವಾರಿ ಕೆಲ್ಲಿ. ತಾಚೆ ವಯ್ರ್ ತಿಚಿ ಜತನ್ ಘೆಂವ್ಕ್ ಪೂತ್ ಆಸ್ಲ್ಲೊ.
ಸ ವರ್ಸಾಂ ಆದಿಂ ತೊ ಕಾಜಾರ್ ಜಾಲ್ಲೊ. ಇಶ್ಟಾಗತ್ ಕರುನ್ ಬರೊ ಸಾಂಬಾಳ್ ಆಸ್ಚಾ ನರ್ಸಾಕ್ ತಾಣೆಂ - ದರುಲ್ಲೊ. ತೀನ್ ವರ್ಸಾಂನಿ ದೊಗಾಂ ನಾತ್ರಾಂಕ್ ಆಮ್ಚಾ ಉಸ್ಕ್ಯಾರ್ ಘಾಲುನ್ ಆಮ್ಕಾಂ ದಾದೊಸ್ಕಾಯ್ ದಿಲ್ಲಿ ಆನಿಂ ದೋನ್ ವರ್ಸಾಂ ಆದಿಂ ಆಮ್ಚಾ ಘರಾ ವಯ್ರ್ ಮಾಳಯ್ ಬಾಂದುನ್ ಕುಟ್ಮಾಚಾ ಅಂತಸ್ತೆಕ್ ಅಲಂಕಾರ್ ಪಾಟಯಿಲ್ಲೊ. ಘರ್ಚಾ ರಾಟಾವಳಿಂನಿ ಟಿಪ್ಪು ಸುಲ್ತಾನಾಬರಿ ಚಲ್ತಾಲೊ ಮ್ಹಳ್ಯಾರ್ ಆಪ್ಣಾಂಕ್ ಬರೆಂ ಜಾಂವ್ಚೆಂ, ದಿಸ್ಚೆಂ ಕರುಂಕ್ ಒದ್ದಾಡ್ತಾಲೊ ತರೀ ಆಮ್ಚಾ ಜಿಣಿಯೆಂತ್ ಚಡ್ ಮೆತೆರ್ ಜಾಯ್ನಾತ್ಲೊ. ಮ್ಹಾಕಾ ತಾಚೆರ್ ಭರ್ವಸೊ ಆಸ್ಲ್ಲೊ. ತಾಚೆಸಂಗಿ ಪತಿಣ್ ಮ್ಹಜಿ ರಗ್ಳ್ಯಾವಿಣೆಂ ಜಿಯೆಂವ್ಕ್ ಸಕ್ತೆಲಿ ಮ್ಹಣ್ಚೆಂ ಧಯ್ರ್ ಆಸ್ಲ್ಲೆಂ. ಕಿತ್ಯಾ ಸುನ್ ಆಮ್ಚಿಂ ಉದ್ಯೋಗಾ ರಗ್ಳ್ಯಾನ್ ತಿಚೆ ವಯ್ರ್ ಹೊಂದುನ್ ಆಸ್ಲಿ ಆನಿಂ ನಾತ್ರಾಂ ತಿಕಾ ಬಾರಿಚ್ಚ್ ಚಿಡ್ಕಾಲ್ಲಿಂ.
ತರೀ ತಿಕಾ ತಿಚೆಂಚ್ ಮ್ಹಳ್ಳೆಂ ಮನ್ ಆಸಾ, ರಗ್ತಾಬಾಂದಾನ್ ಉಡ್ಚೆಂ ಕಾಳಿಜ್ ಆಸಾ ಆನಿಂ ಕುಟ್ಮಾ ಸಂಬಂದಾನ್ ಹುಳ್ವುಳ್ಚಿಂ ಬೊಗ್ಣಾಂ ಆಸಾತ್ ಮ್ಹಳ್ಳೆಂ ಹಾಂವ್ ಜಾಣಾಸ್ಲೊ. ಹಾಂವ್ ಆಸಾ ಆನಿಂ ಬರೊ ಸಾಂಗಾಂತ್ ಲಾಭ್ತಾಂ. ಆಪ್ಲಿಂ ಗೂಂಡ್ ಬೊಗ್ಣಾಂ ಚಡಿತ್ ಖದ್ವಳಾಯ್ನಾಸ್ತಾಂ ತಿ ದೀಸ್ ಪಾಶಾರ್ ಕರ್ತಾಲಿ ಆನಿಂ ಖುಶಾಲ್ ದಿಸ್ತಾಲಿ ತರೀ ಕಾಳ್ಜಾಚಾ ಎಕಾ ಕೊನ್ಶಾಂತ್ ಆಪ್ಲ್ಯಾ ವೆಚಿಕ್ ದುವೆ ಖಾತಿರ್ ತಿ ರುದಾನ್ ಕರ್ತಾಲಿ. ಆನಿಂ ತಾಕಾ ಪಾಟಿಂ ಹಾಡುಂಕ್ ಲಾಲೆತಾಲಿ ಮ್ಹಳ್ಳೆಂ ಮ್ಹಾಕಾ ಖಂಡಿತ್ ಕಳಿತ್ ಆಸ್ಲ್ಲೆಂ. ಪುಣ್ ಪುತಾಕ್ ಆಡ್ ವಚೊಂಕ್ ಮನ್ ನಾಸ್ತಾಂ ತಾಣೆಂ ಆಮ್ಕಾಂ ದಿಂವ್ಚೊ ಮಾನ್ ಆನಿಂ ದಾಕಂವ್ಚೆಂ ಬರೆಂ ಮನ್ ಹೊಗ್ಡಾಂವ್ಕ್ ಧಯ್ರ್ ನಾಸ್ತಾಂ ಆಣಿಂ ಆಮ್ಕಾಂ ಶರ್ತ್ ಮಾರುನ್ ಮ್ಹಳ್ಳ್ಯಾಬರಿ ಪಯ್ಸ್ ಗೆಲ್ಲ್ಯಾ ತಾಚಾ ಹುಜ್ರಿಂ ಖಾಲ್ತೊ ಜಾಂವ್ಕ್ ಖುಶಿನಾಸ್ತಾಂ ಹಾಂವ್ ಥಂಡ್ ರಾವುಲ್ಲೊಂ, ಪಾಟ್ಲಿಂ ಧಾ ವರ್ಸಾಂ.
ಆನಿಂ ತೆಂಯಿ ಪಯ್ಸ್ ರಾವ್ಲ್ಲೆಂ. ಹೆವ್ಶಿಲ್ಯಾ ವರ್ಸಾಂನಿ ಆಮ್ಚಾಂ ಝಳ್ಕೆಕ್ ಪಡಾನಾಸ್ತಾಂ, ಪುತಾಚಾ ಕಾಜಾರಾಕ್ ಸಯ್ತ್ ಯೆಂವ್ಕ್ ನಾತ್ಲ್ಲೆಂ ಆನಿಂ ಹಾಂವ್ ಕಾಳ್ಜಾ ದುಕಿನ್ ಆಸ್ಪತ್ರೆಂತ್ ಪಡ್ಲೆಲ್ಯಾ ವೆಳಾರಿ ಪಯ್ಸ್ಚ್ ಉರ್ಲ್ಲೆಂ. ಬಹುಶಾ ತಾಚಿ ಬೊಗ್ಣಾಂಯೀ ಎಕ್ದಮ್ ಕೊಡು ಆಸ್ಲ್ಲಿಂ. ಕಿತ್ಯಾ ತೆಂ ರಿಜಿಸ್ಟರ್ ಕಾಜಾರ್ ಜಾವ್ನ್ ಆನಿಂ ಮುಸ್ತಾಯ್ಕಿ ಘೆವ್ನ್ ಆಪ್ಲ್ಯಾ ನವ್ರ್ಯಾ ಸಂಗಿಂ ದೇರಳಗಕಟ್ಟೆ ಗೆಲ್ಲ್ಯಾ ದುಸ್ರ್ಯಾ ದಿಸಾ ಪೂತ್ ಆಮ್ಚೊಂ ತಾಂಚಾ ಬೊಂಟೆಕ್ ಗೆಲ್ಲೊ. ತಾಕಾ ಚಾರ್ ಗಾಳಿ ಮಾರುನ್ ಆನಿಂ ಆಡ್ ಆಯಿಲ್ಲ್ಯಾ ನವ್ರ್ಯಾಕ್ ಚಾರ್ ಪೊಪಾವ್ನ್ ಪಾಟಿಂ ಆಯಿಲ್ಲೊ. ತಾಚೊ ನವ್ರೊ ಚಿಲ್ಲರ್ ಜಾವ್ನಾಸ್ಲೊ. ಕೊಣಾಜೆ ಯುನಿವರ್ಸಿಟಿಂತ್ ಎಟೆಂಡಾರಾಚೆ ಕಾಮ್ ಕರ್ತಾಲೊ ಆನಿಂ ಅಮ್ಚಿಂ ದುವ್ ಬಿರ್ಮೆತೆಚಾ ಬೊಗ್ಣಾಂನಿ ತಾಕಾ ಸಾಂಗಾಂತ್ ದೀಂವ್ಕ್ ಮುಖಾರ್ ಸರ್ಲ್ಲೆಂ. ತೆಂ ಆಪ್ಲೆಂ ಶಿಕಾಪ್ ಸಂಪವ್ನ್ ಥಂಯ್ಚ್ ಶಿಕಯ್ತಾಲೆಂ ಮ್ಹಣ್ ಹಾಂವ್ ಆಯ್ಕಾಲ್ಲೆಂ.
ವ್ಹಯ್, ತಾಕಾ ಪಾಟಿಂ ಹಾಡಿಜಾಯ್, ಕಿತ್ಯಾ ತೆಂ ಸಾದ್ಯಾ ಮಟ್ಟಾನ್ ಜಿಯೆತಾಲೆಂ, ಆದಾಯ್ ವಿಶೇಶ್ ನಾತ್ಲ್ಲೊ, ಬಾಡ್ಯಾಚಾ ಘರಾಂತ್ ಚಡ್ ಸವ್ಲತಾಯ್ ನಾತ್ಲ್ಲಿ, ದೊಗಾಂ ನಾತ್ರಾಂಕ್ ಉತ್ತೀಮ್ ಫುಡಾರ್ ಮೆಳ್ಚೊ ಭರ್ವಸೊ ನಾತ್ಲ್ಲೊ ಆನೀಂ ತಾಚಾಕ್ಯಿ ವರ್ತೆಂ ಮ್ಹಜ್ಯಾ ಪತಿಣೆಚೆಂ ಕಾಳಿಜ್ ತೆವ್ಶಿನ್ಂಚ್ ವೊಡ್ತಾಲೆಂ. ಇತ್ಲಿಂ ವರ್ಸಾಂ ಥಂಡ್ ಉರ್ಲೆಲ್ಯಾ ಮ್ಹಾಕಾ ಆತಾಂ ಹಿಂ ಚಿಂತ್ನಾಂ ಖಾತಾಲಿ, ಧುವೆಕ್ ಪಾಟಿಂ ಹಾಡ್ಚಿ ಆಶಾ ಜಬ್ಬೊರ್ ಕಾಂತಯ್ತಾಲಿ. ದೆಕುನ್ ಹಾಮ್ವೆಂ ಪತಿಣೆಕ್ ಲಾಗಿಂ ಆಪವ್ನ್, "ಲೊನಾಕ್ ಆಪಯ್" ಮ್ಹಣ್ ಪುಸ್ಪೊಸ್ಲೊಂ ಆನಿಂ ವೆಗ್ಗಿಂಚ್ ಮ್ಹಣ್ಚೊ ಹಿಶಾರೊ ಕೆಲೊ. ಪಯ್ಲೆಂ ವಿಜ್ಮಿತ್ ಜಾಲ್ಲಿ ತಿ ಉಪ್ರಾಂತ್ ಸುಡ್ಸುಡಿತ್ ಜಾವ್ನ್ ಭಾಯ್ರ್ ಧಾಂವ್ಲಿ ಆನಿಂ ಹಾಂವ್ ದೊಳೆ ದಾಂಪುನ್ ಫುಡ್ಲ್ಯಾ ನಾಜೂಕ್ ಕಾರ್ಯಾ ವಿಶಿಂ ನಿಯಾಳಿಲಾಗ್ಲೊಂ.
ದನ್ಪರಾಂ ಚಾರ್ ವರಾರ್ಶೆಂ ಲೊನಾ ಆಪ್ಲ್ಯಾ ನವ್ರ್ಯಾ - ಭುರ್ಗ್ಯಾಂ ಸಂಗಿಂ ದಾಂವೊನ್ ಆಯ್ಲೆಂ ಆನಿಂ ಮ್ಹಜಿ ನಾಜೂಕ್ ಗತ್ ಪಳೆವ್ನ್ ವಿಳಾಪ್ ಕರಿಲಾಗ್ಲೆಂ. ಹಾತ್ ಭಾಶೆನ್ ತಾಕಾ ಭುಜವ್ನ್ ಹಾಂವೆಂ ಬಿರಾಂತೆನ್ ದೊಳೆ ಸೊಡ್ಚಾ ನಾತ್ರಾಂ ವಯ್ರ್ ಹಾತ್, ಚರಯ್ಲೊ ಆನಿಂ ಜಾಂವ್ಯಾಂಕ್ ಲಾಗಿಂ ಆಪವ್ನ್ ಹಾತ್ ದರ್ಲೊ. ಮ್ಹಜ್ಯಾ ಹಿಶಾರ್ಯಾಂನಿ ಧುವ್ - ನಾತ್ರಾಂ ಜಾಂವ್ಯ್ ಕಡೆಂ ಉಲಯಿತ್ತ್ ರಾವ್ಲೊಂ. ಪೂತ್ ಯೆತಾಲೊಗಿ ಕೆದಾಳಾ ಮ್ಹಣ್ ಪತಿಣೆಕಡೆ ಪುಸ್ಪುಸ್ತಾನಾ ತಿ ತಕ್ಲಿ ಹಾಲವ್ನ್ ಪಾಂಚ್ ಬೊಟಾಂ ದಾಕಯ್ಲಾಗ್ಲಿ ಬಿಯಾನ್ಶೆ.
ವ್ಹರಾಂ ಪಾಂಚ್ ಉತರ್ತಾನಾ ಪೂತ್ ಆಯ್ಲೊ ಆನಿಂ ಪತಿಣ್ ಬಿರಾಂತ್ಲೆಲ್ಯಾ ಬರಿಚ್ ಬಿತರ್ ದೀಷ್ಟ್ ಘಾಲ್ಲ್ಯಾ ತಕ್ಶಣ್ ರಾಗಾಚೊ ಖಾಂಬೊ ಜಾವ್ನ್ ಬಾಗ್ಲಾರ್ಚ್ ಉಬೊ ಜಾಲೊ. ಸಳ್ಸಳಿಂ ಉತ್ರಾಂ ಭಾಯ್ರ್ ಪಡ್ಚಾ ಆದಿಂಚ್ ಹಾಂವೆಂ ಹಿಶಾರೊ ಕರುನ್ ಲೊನಾಕ್ ಆಪಯಿಲ್ಲೆ ಹಾಂವೆಂ, ತಾಣೆಂ ರಾಗ್ ಕರುಂಕ್ ನಜೊ ಮ್ಹಣ್ ಕಳಯ್ಲೆಂ ಆನಿಂ ಲಾಗಿಂ ಆಪಯ್ಲೊ. ನಾರ್ಗೊನ್ಶೆಂ ಲಾಗಿಂ ತೊ ಯೆತಾನಾ ಆನಿಂ ಮ್ಹಜೆ ಸರ್ಶಿಂ ರಾವ್ತಾನಾ ಹಾಂವೆಂ ಹಿಶಾರ್ಯಾನಿಂಚ್ ಲೊನಾಕ್ ತಾಚಾ ಪಾಯಾಂಥಳಾಂ ಪಡೊಂಕ್ ಆನಿಂ ಮಾಫ್ ಮಾಗೊಂಕ್ ಸಾಂಗ್ಲೆಂ. ತೆಂ ಏಕ್ - ಮೇಟ್ ಪಾಟಿಂ ಸರೊನ್ ಆಪ್ಲ್ಯಾ ನವ್ರ್ಯಾ ತೆವ್ಶೀಮ್ ದೀಷ್ಟ್ ಲಾಯ್ತಾನಾ ತಾಣೆಂಯ್ ಜಾಯ್ತ್ ಮ್ಹಳ್ಳ್ಯಾ ಜಿನ್ಶಿಂ ತಕ್ಲಿ ಹಾಲಾಯ್ಲಿ. ತ್ಯಾಚ್ ಪರಿ ಲೊನಾ ಫುಡೆಂ ಸರ್ಲೆಂ ಆನಿಂ ಮ್ಹಜ್ಯಾ ಪುತಾಚೆ ಪಾಯ್ ದರುಂಕ್ ಬಾಗಾಲೆಂ, "ಮ್ಹಾಕಾ ಮಾಫ್ ಕರ್" ಉತ್ರಾಂ ಸಂಗಿಂ.
ಪುಣ್ ತೊ ಒಪ್ಲೊ ನಾಂ, ಎಕಾಚ್ಛಾಣೆಂ ಪಾಟಿಂ ಗೆಲೊ ಆನಿಂ, "ಹಾಕಾ ಬೊಗ್ಸುಂಕ್ ಹಾಂವ್ ತಯಾರ್ ನಾಂ ಪಪ್ಪಾ, ಹೆಂ ಧಾ ವರ್ಸಾಂ ಪಯ್ಸ್ ರಾವ್ಲೆಂ, ಹಾಕಾ ಆಮ್ಚಿಂ ಗರ್ಜ್ ನಾಂ" ಮ್ಹಣಾಲೊ ಕೊಡ್ಸಾಣ್ ಭರ್ಲ್ಲ್ಯಾ ತಾಳ್ಯಾನ್, "ತಾಕಾ ಖಂಯ್ ಗರ್ಜ್ ನಾಂಗಿ, ತರ್ ಮ್ಹಾಕಾಯಿ ನಾಂ"
"ಪುಣ್ ಮ್ಹಾಕಾ ಆಸಾ, ಹೆಂ ಮ್ಹಜೆಂ ನಿಮಾಣೆಂ ಪಯ್ಣ್ ಸಮಾಧಾನೆನ್ ಕರುಂಕ್. ಮ್ಹಜ್ಯಾ ದೊಳ್ಯಾಂ ಹುಜ್ರಿಂ ತುಮಿಂ ರಾಜಿ ಜಾಂವ್ಚಿ ಅಧಿಕ್ ಗರ್ಜ್ ಮ್ಹಾಕಾ ಆಸಾ" ಮ್ಹಣ್ ಸಮ್ಜಣಿ ತಾಕಾ ಪಾಟಂವ್ಚಾ ಖಾತಿರ್ ಹಾಂವ್ ಒದ್ದಾಡ್ಲೊಂ, ಪುಸ್ಪುಸ್ಲೊಂ ಆನಿಂ ಹಾತಾನ್ ಹಿಶಾರ್ ಉತ್ರಾಂವ್ಕ್ ಪೆಚಾಡ್ಲೊಂ. ಹರ್ದ್ಯಾಕ್ ಹಾತ್ ಮಾರುನ್ ಹಾಂವ್ ರಡ್ಲೊಂ, ಹಾಂವ್ ತೆವ್ಶಿನ್ ವಚಾನ್ ತರ್ ತುಂಮ್ಚಾ ಮಾಮ್ಮಿಮ್ ಸಮಾಧಾನೆನ್ ಜಿಯೆಂವ್ಚೆ ಖಾತಿರ್ ತುಂಮಿಂ ಸಂದರ್ಭ್ ರಚಿಜಾಯ್ ಆನಿಂ ತ್ಯಾ ಖಾತಿರ್ ತುಮಿಂ ರಾಜಿ ಜಾಯ್ಜಾಯ್. ತುಂವೆಂ ಲೊನಾಕ್ ಘರಾ ಹಾಡಿಜಾಯ್, ಸಕಯ್ಲ್ಯಾ ಭಾಗಾಂತ್ ಮಾಮ್ಮಿ ಸವೆಂ ರಾವೊಂಕ್ ಸೊಡಿಜಾಯ್ ಆನಿಂ ಘರ್ಚೊ ಸರ್ವ್ ಹಾರ್-ಭಾರ್ ವಾವವ್ನ್, ಮ್ಹಜ್ಯಾ ಸ್ಥಾನಾರ್ ರಾವೊನ್ ಏಕ್ ಮೊಗಾಲ್ ಆನಿಂ ಎಕ್ವಟಿತ್ ಕುಟಾಮ್ ಠರಾಯ್ಜಾಯ್. ದಯಾ ಕರುನ್ ಒಪ್ವೊ ಪುತಾ.."
ಮ್ಹಜೊ ಪೂತ್ಯಿ ರಡ್ಲೊ ಆನಿಂ ಲೊನಾಕ್ ಪೊಟ್ಲುನ್ ಧರುನ್ ಉಮೆ ದೀಂವ್ಕ್ ಲಾಗ್ಲೊ. ಪತಿಣ್ ಮ್ಹಜಿ ಏಕಾ ಉಡ್ಕಾಣಾನ್ ತಾಂಚಾ ವೆಂಗೆಂತ್ ಗುಸ್ಲಿ ಆನಿಂ ರುದಾನ್ ಕರಿಲಾಗ್ಲಿ.
ಆನಿಂ ಹಾಂವ್ ದೊಳೆ ದಾಂಪುನ್ "ಹ್ಯಾಚ್ಚ್ ಸಮಾಧಾನೆನ್ ಗೆಲ್ಯಾರ್ ಪುರೊ, ಹಾಂವ್ ತಯಾರ್, ಆಸೊಚ್ಚ್, ಆತಾಂಚ್" ಮ್ಹಣ್ ಲಾಲೆಲೊ!
********
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
