ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಹಿಬಿಸ್ಕಸ್
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ.
ಸ್ಟೇನ್ ಅಗೇರಾಚ್ಯೊ ಹೆರ್ ಕಾಣ್ಯೊ: ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ
ಸ್ಟೇನ್ ಅಗೇರಾ
ಇಗ್ನೇಶಿಯಾಸಾಕ್ ವೇಳ್ ಪಾಶಾರ್ ಕರುಂಕ್ ಕಿತೆಂಯಿ ಹವ್ಯಾಸ್ ಭೋವ್ ಗರ್ಜೆಚೊ ಮ್ಹಣ್ ಭೊಗ್ಲ್ಲೆಂ ದೇಡ್ ಮಯ್ನ್ಯಾ ಆದಿಂ ನಿವೃತ್ತ್ ಜಾಲ್ಲ್ಯಾ ಸಂದರ್ಭಿಂ. ರೇಯ್ಲ್ವೆಂತ್ ತೀಸ್ ವರ್ಸಾಂ ಕಾಮ್ ಕರ್ನ್ ಅಚಾನಕ್ ಕಾಮಾಥಾವ್ನ್ ಮೆಕ್ಳೊ ಜಾತಾನಾ ತಾಕಾ ದೀಸ್ ಲಾಂಬ್ ಜಾಲ್ಲೊ. ಪುತಾಚೆ ನವ್ಕರಿ ಪಾಟ್ಲ್ಯಾನ್ ತಾಚಿ ಮ್ಹಿನತ್ ಗರ್ಜೆಚಿ ಮ್ಹಣ್ ತಾಕಾ ಭೊಗ್ಲ್ಲ್ಯಾನ್ ತಾಣೆ ಹವ್ಯಾಸಾಚಿ ಶಿಮ್ಟಿ ಧರ್ಲಿ ನಾ. ಪುಣ್ ಪುತಾಚ್ಯಾ ಪ್ರತಿಕ್ರಿಯಾದ್ವಾರಿಂ ತಾಕಾ ಹೆರ್ ಆಸಕ್ತ್ ಮಹತ್ವಾಚಿ ಮ್ಹಣ್ ಭೊಗ್ಲೆಂ.
ಸಕಾಳಿಂ ಉಟೊನ್ ದಿಸಾಳೆಂ ಕಿತ್ಲೆಂ ಮ್ಹಣ್ ವಾಚ್ಯೆತ್? ಟಿವಿಚೆರ್ ಖಬ್ರೊ ಕಾರ್ಯಕ್ರಮಾಂ ಪಳೆವ್ನ್ಯಿ ಕಾಂಟಾಳೊ ಆಯಿಲ್ಲೊ ಆಸಾ. ವೊಕಿಂಗಾಕ್ ವೆತಾಲೊ, ಬಾಜಾರಾಕ್ ವೆಚೆಂ, ಖಾಣಾ-ಜೆವ್ಣಾಚೊ ವಸ್ತು, ಮಾಸ್-ಮಾಸ್ಳಿ, ಉದಾಕ್, ವೀಜ್ ಸಕತ್ ಆನಿ ಟೆಲಿಫೋನಾಚೆಂ ಬಿಲ್ಲ್ ಫಾರಿಕ್ ಕರ್ಚೆಂ, ಇತ್ಯಾದಿ ಕಾಮಾಂ ಶಿಸ್ತೆರ್ ಕೆಲ್ಯಾರ್ಯಿ ಬಾಖಿಚೊ ವೇಳ್ ಕಿತೆಂ ಕರ್ಚೆಂ ಮ್ಹಣ್ ಸಮ್ಜಾನಾಸ್ತಾನಾ ತೊ ಕಶ್ಟಾತಾಲೊ. ದೊನ್ಪಾರಾಂ ಜೇವ್ನ್ ನಿದೊನ್ ತೊ ನೆಣಾ.
ಬಾವ್ಡೊ ಇಗ್ನೇಶಿಯಾಸ್.
ತೊ ಖಾಲಿ ಬಸೊನ್ ನೆಣಾ. ಆದಿಂ ದಫ್ತಾರಾಚ್ಯಾ ಕಾಮಾಂತ್ ತೊ ಅವ್ವಲ್. ಕಂಪ್ಯೂಟರಾ ಮುಕಾರ್ ಬಸೊನ್ ಕಿತ್ಲಿಂಯಿ ವೊರಾಂ ಖಳನಾಸ್ತಾನಾ ಕಾಮ್ ಕರ್ಚಿ ಶಾತಿ ತಾಚೆಲಾಗಿಂ ಆಸ್ಲ್ಲಿ. ತಸಲಿ ವಾಂವ್ಟ್ ಆತಾಂ ನವ್ಯಾನ್ ಭರ್ತಿ ಜಾಲ್ಲ್ಯಾ ತರ್ನಾಟ್ಯಾಂ ಥಂಯ್ ದಿಸ್ಚಿ ಅಪ್ರೂಪ್. ದಫ್ತರಾಂತ್ ಕ್ರಿಕೆಟ್ ಆನಿ ಚಲನ್ ಚಿತ್ರಾಂಚೆ ವಿಶಯ್ ಘೆವ್ನ್ ವೇಳ್ ಪಾಶಾರ್ ಕರ್ಚ್ಯಾ ಯುವಜಣಾಂಕ್ ದೆಕ್ತಾನಾ ಇಗ್ನೇಶಿಯಾಸಾಕ್ ಜಾಂವ್ಚಿ ವಿರಾರಾಯ್ ಸದಾಂಚಿ.
ಇಗ್ನೇಶಿಯಾಸ್ ಆನಿ ಜೂಲಿಯೆಟಾಕ್ ಏಖ್ಚ್ ಫಳ್, ತಾಂಚೊ ಎಕ್ಲೊಚ್ ಪೂತ್ ಆರ್ಥರ್. ಆರ್ಥರಾನ್ ಎಕಾ ವರ್ಸಾ ಆದಿಂ ಪದ್ವಿ ಆಪ್ಣಾಯಿಲ್ಲಿ. ಸಾರ್ಕೆಂ ಕಾಮ್ ಮಾತ್ರ್ ಅಜೂನ್ ಮೆಳ್ಲ್ಲೆಂ ನಾ. ಅಪುಣ್ ನಿವೃತ್ತ್ ಜಾತಾನಾ ಪೂತ್ ಬರ್ಯಾ ಕಾಮಾರ್ ಜಾಯ್ತೆಂ ಜೊಡ್ತಲೊ ಮ್ಹಳ್ಳೆಂ ಸಪಣ್ ಇಗ್ನೇಶಿಯಾಸಾಚೆ ಜಿಣಿಯೆಂತ್ ಖರೆಂ ಜಾಂವ್ಕ್ ನಾತ್ಲ್ಲೆಂ.
"ತುಜೆ ಥಂಯ್ ಶಿಸ್ತ್ ನಾ. ಶಿಸ್ತ್ ನಾತ್ಲ್ಲ್ಯಾಂಕ್ ಸಾರ್ಕೆ ಆವ್ಕಾಸ್ ಮೆಳಾನಾಂತ್" ಪುತಾಚೆರ್ ಇಗ್ನೇಶಿಯಾಸಾಚೆಂ ಸದಾಂಚೆಂ ದುರ್ಸೊಣೆಂ.
ಆರ್ಥರಾಕ್ ಸಮ್ಜವ್ನ್ ತೊ ಥಕ್ಲ್ಲೊ. ತಾಕಾ ಫುಟ್ಬೊಲಾಚೆಂ ಪಿಶೆಂ, ನವ್ಯಾ ಪಿಕ್ಚರಾಚಿ ಪಿಸಾಯ್. ಕಾಮ್ ನಾ ತರೀ ಸೆಜಾರ್ಚ್ಯಾ ಮಮತಾಲಾಗಿಂ ದೋಸ್ತಿ. ಹಿ ಇಶ್ಟಾಗತ್ ಕಾಳ್ಜಾಚ್ಯಾ ಸ್ಪರ್ಶ್ಯಾ ಮ್ಹಣಾಸರ್ ಪಾವ್ಲ್ಯಾ ಮ್ಹಣ್ಚೊ ತಾಚೊ ದುಬಾವ್ ಭೋವ್ಶಾ ಕಿತ್ಲ್ಯಾ ಮಟ್ಟಾಕ್ ಸತ್ ಮ್ಹಣ್ ತೊ ನೆಣಾ.
ಆಪ್ಣೆಂ ದುರ್ಸಾಲ್ಯಾರ್ಯೀ ಪುತಾಕ್ ಸದಾಂ ಪಾಟಿಂಬೊ ದಿತಾಲಿ ಜೂಲಿಯೆಟ್. ಆವಯ್ಚ್ಯಾ ಕೊಂಡಾಟ್ಯಾವರ್ವಿಂ ಆರ್ಥರ್ ಇತ್ಲೊ ಬೇಜವಾಬ್ಧಾರ್ ಜಾಲಾ ಮ್ಹಣ್ ಇಗ್ನೇಶಿಯಾಸಾಚಿ ಪಾತ್ಯೆಣಿ. ಹೆ ವಿರಾರಾಯೆ ಥಾವ್ನ್ ಮೆಕ್ಳೊ ಜಾಂವ್ಕ್ ಆಪ್ಣಾಕ್ ಹವ್ಯಾಸ್ ಗರ್ಜೆಚೆ ಮ್ಹಣ್ ತಾಚ್ಯಾ ಗುಮಾನಾಕ್ ಆಯಿಲ್ಲೆಂ.
ಪೆಟೊ ಆನಿ ಮಾಜ್ರಾಂಕ್ ಪೊಸ್ಚ್ಯಾವಿಶಿಂ ತಾಣೆ ಚಿಂತ್ಲೆಂ. ತಾಂಚೆ ಲೊಂವೆಚಿ ಘಾಣ್ ತೊ ಕಾಂಟಾಳ್ತಾಲೊ. ಸಮಾಜ್ ಸೆವೆಂತ್ ತಾಕಾ ಆಸಕ್ತ್ ನಾತ್ಲ್ಲಿ. ಸಮಾಜ್ ಸೆವಕಾಂಚೆಂ ಪೊಲಿಟಿಕ್ಸ್ ತಾಕಾ ವೊಂಬಾನಾತ್ಲ್ಲೆಂ. ಚಲನ್ ಚಿತ್ರಾಂ ತಾಕಾ ವಿರಾರ್ ಕರ್ತಾಲಿಂ. ಖೆಳಾಂನಿ ತಾಚೆಂ ಧ್ಯಾನ್ ರಿಗಾನಾತ್ಲ್ಲೆಂ. ಪಾರ್ಟ್ಟೈಮ್ ಕಾಮಾಚೆಂ ಪ್ರೇತನ್ ಕೆಲೆಂ. ಆಸಕ್ತ್ ದಾಕಯ್ಲ್ಯಾಂನಿ ಸಾರ್ಕೊ ಸಾಂಬಾಳ್ ಭಾಸಾಯ್ಲೊನಾ.
ತೀನ್ ದಿಸಾಂ ಆದಿಂ ದಿಸಾಳ್ಯಾರ್ ದೆಕ್ಲ್ಲೆಂ ಇಸ್ತಿಹಾರ್ ಘೆವ್ನ್ ತೊ ಗ್ರೀನ್ ನರ್ಸರಿಕ್ ಪಾವ್ಲ್ಲೊ. ಚಟ್ಟೆಂನಿ ಮಾಂಡುನ್ ದವರ್ಲ್ಲ್ಯಾ ಥರಾವಳ್ ಝಾಡಾಂನಿ ತಾಕಾ ಭುಲಯ್ಲೆಂ. ಘರಾ ಭಿತರ್ ಪಾಚ್ವೆಂ ಪರಿಸರ್ ರುತಾ ಕರುಂಕ್ ತಾಚೆಂ ಮನ್ ವೊಡ್ಲೆಂ. ಝಾಡ್ ಸಂಬಂದಿ ತಾಕಾ ಚಡಿತ್ ಮಾಹೆತ್ ನಾತ್ಲ್ಲಿ. ನರ್ಸರಿಚ್ಯಾ ಮೆನೆಜರಾಚಿ ಸಲ್ಹಾ ಘೆತಾನಾ ತಾಣೆ ಸಾತಾಟ್ ವರ್ಗಾಂಚ್ಯಾ ಝಾಡಾಂಚಿ ವಿಂಚವ್ಣ್ ದಾಕಯ್ಲಿ.
ತೊ ಸಂಯ್ಬಾಂತ್ ಅಮ್ಸೊರಿ ನ್ಹಂಯ್. ಸಯ್ರಾಣಾದ್ವಾರಿಂ ಮೇಟ್ ಕಾಡ್ಚ್ಯಾಂತ್ ನಿಪುಣ್. ಚಡಿತ್ ಸಂಕ್ಯಾಂತ್ ಏಕ್ಚ್ ಪಾವ್ಟಿಂ ಹಾಡ್ಚೆ ಪ್ರಾಸ್ ಪಯ್ಲೆಂ ಏಕ್ ಝಾಡ್ ಮೊಲಾವ್ನ್ ರುತಾ ಕರ್ಚೆಂ ತಾಕಾ ಸಾರ್ಕೆಂ ಮ್ಹಣ್ ದಿಸ್ಲೆಂ. ಹ್ಯಾ ಅನ್ಭೋಗಾಧ್ವಾರಿಂ ಸವ್ಕಾಸ್ ಚಡಿತ್ ಝಾಡಾಂ ಘರಾ ಭಿತರ್ ವಾಡಂವ್ಚೆ ವಿಶಿಂ ಚಿಂತ್ಯೆತ್ ಮ್ಹಣ್ ತಾಣೆ ಇರಾದೊ ಕೆಲೊ.
"ಹೆಂ ಹಿಬಿಸ್ಕಸ್" ನರ್ಸರಿಚ್ಯಾ ಮೆನೇಜರಾನ್ ಬೋಟ್ ದಾಕಯ್ಲೆಂ. "ಹ್ಯಾ ಝಾಡಾಚೆರ್ ಸೊಬಿತ್ ಫುಲಾಂ ಫುಲ್ತಾತ್, ರೂಂದ್ ಪಾಚ್ವಿಂ ಪಾನಾಂ, ಝಾಡಾಚಿ ಫಾವೊತಿ ಜೊಗಾಸಣ್ ಕೆಲಿ ತರ್ ರುಕಾಪರಿಂ ವಾಡ್ತಾ."
ಜೊಗಾಸಣ್? ಅಪ್ಣಾ ಪ್ರಾಸ್ ಹ್ಯಾ ಝಾಡಾಚೊ ವರ್ತೊ ಪೋಸ್ ಹೆರ್ ಕೋಣ್ ಕರುಂಕ್ ಸಕ್ತಾ?! ಪಯ್ಶೆ ಫಾರಿಕ್ ಕರ್ನ್ ಚಟ್ಟಿ ರಿಕ್ಶಾರ್ ಘಾಲ್ನ್ ತೊ ಘರಾ ಆಯ್ಲೊ.
ಪರ್ಗಾಂವಾಂತ್ ಜಲ್ಮೊನ್ ಮಂಗ್ಳುರಾ ಥಾವ್ನ್ ಪಯ್ಸಾ ಪಯ್ಸ್ ವ್ಹಡ್ ಜಾಲ್ಲ್ಯಾ ಇಗ್ನೇಶಿಯಾಸಾಕ್ ತ್ಯಾ ಝಾಡಾಂಚಿ ಒಳೊಕ್ ನಾತ್ಲ್ಲಿ ತರೀ ಮಂಗ್ಳುರಾಂಯ್ ಜಲ್ಮಾ ಥಾವ್ನ್ ಜಾಯ್ತಿಂ ವರ್ಸಾಂ ಖರ್ಚಿಲ್ಲ್ಯಾ ಜೂಲಿಯೆಟ್ ಝಾಡಾಚಿ ಜಾತ್ ಪಾರ್ಕಿಲಿ.
"ಹೆಂ ದಾಸವಾಳಾ ಪರಿಂ ದಿಸ್ತಾ" ತಿ ಮ್ಹಣಾಲಿ.
"ದಾಸವಾಳಾ ಮ್ಹಳ್ಯಾರ್?"
"ಮಂಗ್ಳುರ್ಚ್ಯಾ ಗಾಂವಾಂನಿ ಪಳೆಂವ್ಕ್ ಮೆಳ್ಚೆಂ ಭೋವ್ ಸಾಮಾನ್ಯ್ ಝಾಡ್ ಹೆಂ." ತಿಣೆ ವಿವರಿಲೆಂ. "ಹ್ಯಾ ಝಾಡಾಕ್ ಕಿತ್ಯಾಕ್ ತುವೆಂ ಪಯ್ಶೆ ಯೆಟ್ಲೆಯಿ? ಹಾಚೊ ಫಾಂಟೊ ಹಾಡ್ನ್ ಪುರ್ಲ್ಯಾರ್ ಸಮೇತ್ ಝಾಡ್ ಜಾತಾ. ಅಪ್ಲೇಸಕ್ತಿಂ ಜಾತಾ, ಫುಲಾಂ ದರಬಸ್ತ್ ಜಾತಾ."
"ಮ್ಹಳ್ಯಾರ್ ಹಿಬಿಸ್ಕಸಾಚೊ ಫಾಂಟೊ ಹಾಡುಂಕ್ ಹಾಂವೆಂ ಮಂಗ್ಳುರಾಚಿ ಭೆಟ್ ಕರಿಜೆ ಆಸ್ಲ್ಲಿ ಮ್ಹಣ್ತಾಯಿ ತುಂ?" ತೊ ತಾಪ್ಲೊ.
"ದಾಸವಾಳಾಚಿಂ ಝಾಡಾಂ ಹ್ಯಾ ಶ್ಹೆರಾಂತ್ಯಿ ಹಾಂವೆಂ ಪಳೆಯ್ಲ್ಯಾಂತ್." ಜೂಲಿಯೆಟಾನ್ ಜಾಪ್ ದಿಲಿ.
"ಹೆಂ ಝಾಡ್ ಮಮತಾಚ್ಯಾ ವೊಡ್ತಾಂತ್ ಹಾಂವೆಂ ಪಳೆಲಾಂ." ಆರ್ಥರಾನ್ ಮುಕಾರಿಲೆಂ. "ಮ್ಹಾಕಾ ಸಾಂಗ್ಲ್ಲೆಂ ತರ್ ಹಾಂವ್ ಫಾಂಟೊ ಹಾಡ್ತೊಂ ಆಸ್ಲ್ಲೊಂ."
ಆರ್ಥರಾಚೆಂ ಫ್ರೆಂಡ್ ಮಮತಾ. ಮಮತಾಚ್ಯಾ ಆವಯ್ ಬಾಪಾಯ್ಕ್ ಮಾಸ್ಳೆಚೆಂ ಬಿಜ್ನೆಸ್. ಮಾಸ್ಳಿ ವಿಕ್ಚ್ಯಾ ಕುಟ್ಮಾಸಂಗಿಂ ಆರ್ಥರಾಚಿ ಸಳ್ಗಿ ಇಗ್ನೇಶಿಯಾಸಾಕ್ ಖಾಯ್ಸ್ ನಾತ್ಲ್ಲಿ. ತಾಂಚಿ ದೋಸ್ತಿ ತುಟಂವ್ಕ್ ತಾಣೆ ದಿಲ್ಲೆ ಶೆರ್ಮಾಂವ್ ಸರ್ವ್ ವೆರ್ತ್ ಜಾಲ್ಲೆ.
"ಹೆಂ ಝಾಡ್ ಕಿತ್ಯಾಕ್ ಹಾಡ್ಲಾಂಯಿ ಮ್ಹಣ್ ಭೋವ್ಶಾ ತುಂ ನೆಣಾಂಯ್." ಇಗ್ನೇಶಿಯಾಸಾಚೆಂ ತೋಂಡ್ ಸಾವ್ಳೆಲೆಂ. "ಮ್ಹಜ್ಯಾ ಎಕಾ ಉತ್ರಾಕ್ ಸಮೇತ್ ಮಾನ್ ದೀನಾತ್ಲ್ಲ್ಯಾ ತುಜೆರ್ ಹ್ಯಾ ಫುಡೆಂ ವೇಳ್ ಆಟಂವ್ಚೊನಾ ಮಣೊನ್ ಹಾಂವೆಂ ನಿಚೆವ್ ಕೆಲಾ. ತೊ ಆನ್ಮೋಲ್ ವೇಳ್ ಹಾಂವ್ ಅಸಲಿಂ ಜಾಯ್ತಿಂ ಝಾಡಾಂ ಪೋಸ್ ಕರ್ಚ್ಯಾಂತ್ ಖರ್ಚಿತಲೊಂ. ಮ್ಹಜೊ ವೇಳ್ ನಿರ್ಫಳ್ ಜಾಂವ್ಚೊ ನಾ."
ಆರ್ಥರಾಚೆಂ ತೋಂಡ್ ಬಾವ್ಲೆಂ.
"ತುಜ್ಯಾ ಹಿಬಿಸ್ಕಾಕ್ ಆನಿ ಚೆರ್ಕ್ಯಾಕ್ ಕಿತೆಂ ಕನೆಕ್ಶನ್?" ಜೂಲಿಯೆಟಾಚೆಂ ಕಾಳಿಜ್ ದುಕ್ಲೆಂ. "ಚೆರ್ಕ್ಯಾಚೊ ಮೂಡ್ ಭಂಗ್ ಕರ್ಚೆಂ ತುಕಾ ಸವಯೆರ್ ಪಡ್ಲಾಂ."
ಚೆರ್ಕ್ಯಾಕ್ ದುಕ್ಚ್ಯಾವಿಶಿಂ ತಿಕಾ ಸಮ್ಜೊಣಿ ಆಸಾ. ತಾಚ್ಯಾ ಸಭಾವಾದ್ವಾರಿಂ ಆಪ್ಣಾಕ್ ತೊ ಕಿತ್ಲೆಂ ದುಕಯ್ತಾ ಮ್ಹಣ್ ತಿಣೆ ಚಿಂತುನ್ ಪಳಯ್ಲಾಂ?
ಝಾಡಾಚಿ ಚಟ್ಟಿ ತಾಣೆ ಟಿವಿಚೆ ಬಗ್ಲೆನ್ ದವರ್ಲಿ. ಪಾಚ್ವಿಂ ಝಾಡಾಂ ಸಿಟ್ಟಿಂಕ್ ರುಮಾಚಿ ಸೊಭಾಯ್ ಚಡಯ್ತಾ ಮ್ಹಣ್ಚ್ಯಾಂತ್ ದುಭಾವ್ ನಾತ್ಲ್ಲೊ. ಹೆಂ ಝಾಡ್ ಘರಾ ಆಯಿಲ್ಲ್ಯಾ ಉಪ್ರಾಂತ್ ಇಗ್ನೇಶಿಯಾಸಾಕ್ ತಾಚ್ಯಾ ಹಿಬಿಸ್ಕಸಾಚೆರ್ ವಿಶೇಸ್ ಮೋಗ್ ಆನಿ ಮಯ್ಪಾಸ್ ಉದೆಲೊ. ತೆಂ ಝಾಡ್ ವೆಗಿಂ ವಾಡೊನ್ ಫುಲಾಂ ದಿಂವ್ಚ್ಯಾ ಸಾಂಗಾತಾ ರೂಕ್ ಜಾತಲೊ ಮ್ಹಣ್ ತೊ ಭರ್ವಸ್ಲೊ. ಸಕಾಳಿಂ ಉಟೊನ್ ದಾಂತ್ ಬ್ರಶ್ ಕರ್ನ್ ಚ್ಹಾ ಪಿಯೆಂವ್ಚ್ಯಾ ಪಯ್ಲೆಂ ಝಾಡಾಚೆರ್ ಏಕ್ ದೀಶ್ಟ್ ಘಾಲಿನಾಸ್ತಾನಾ ತಾಕಾ ಸಮಧಾನ್ ನಾತ್ಲ್ಲೆಂ.
ಪಾನಾಚಿ ನವಿ ಆಂಕ್ರಿ ತೊ ಸೊದ್ತಾಲೊ.
"ಮಾಮ್ಮಿ, ಫಾಲ್ಯಾಂಚೆಂ ಮ್ಯಾಚ್ ಆಮ್ಕಾಂ ಭೋವ್ ಮಹತ್ವಾಚೆಂ. ಕೋಚಾನ್ ಮ್ಹಾಕಾ ಸೆಂಟರ್ ಫಾರ್ವರ್ಡ್ ಖೆಳೊಂಕ್ ಸಾಂಗ್ಲಾಂ. ಜಿಕ್ಲ್ಯಾಂವ್ ತರ್ ಆಮಿ ಸೆಮಿ ಫೈನಲಾಕ್ ಪಾವ್ತೆಲ್ಯಾಂವ್." ಸನ್ವಾರಾ ಸಕಾಳಿಂ ನಾಸ್ಟೊ ಜಾಲ್ಯಾ ಉಪ್ರಾಂತ್ ಆರ್ಥರ್ ಆವಯ್ಲಾಗಿಂ ಮ್ಹಣಾಲೊ.
ಪುತಾಚೊ ವಿಚಾರ್ ಕರ್ಯಾಂ ಮ್ಹಣ್ ತಾಕಾ ಭೊಗ್ಲೆಂ. ಪ್ರೇತನ್ ಪೂರ್ವಕಿಂ ತಾಣೆ ಮೌನತಾಯ್ ಸಾಂಬಾಳ್ಳಿ. ಪೂತ್ ಸಿಟಿ ಕ್ಲಬ್ಬಾಕ್ ಖೆಳ್ತಾಲೊ. ಪುಣ್ ಕೊಲೆಜಿಕ್ ಯಾ ಸಿಟಿ ಕ್ಲಬ್ಬಾಕ್ ಖೆಳೊನ್ ಎದೊಳ್ ಮೆಳ್ಳೆಂ ತರೀ ಕಿತೆಂ? ತೊ ವೇಳ್ ನವ್ಕರಿ ದೃಶ್ಟೆನ್ ಖರ್ಚಿಲ್ಲೊ ತರೀ ಎದೊಳ್ ಖಂಚಾಯಿ ಬರೆಂ ಕಾಮ್ ಮೆಳ್ತೆಂ ಆಸ್ಲ್ಲೆಂ.
"ಹಾಂವ್ ತೀನ್ ಗೋಲ್ ಮಾರ್ಲೆಂ ಮಾಮ್ಮಿ, ಚರಿತ್ರೆಂತ್ ಪಯ್ಲೆ ಪಾವ್ಟಿಂ ಸಿಟಿ ಕ್ಲಬ್ ಸೆಮಿ ಫಾಯ್ನಲಾಕ್ ಪಾವ್ಲೆಂ" ಆಯ್ತಾರಾ ಸಾಂಜೆರ್ ಖೆಳೊನ್ ಆಯಿಲ್ಲೊ ಆರ್ಥರ್ ಬೊಬಾಟ್ಲೊ.
ಪುತಾಕ್ ಉಲ್ಲಾಸ್ ಪಾಟವ್ಯಾಂ ಮ್ಹಣ್ ತೊ ಪ್ರೇರಿತ್ ಜಾಲೊ ತರೀ ಎಕಾ ಬೆಕಾರ್ ಫುಟ್ಬೊಲ್ ಖೆಳ್ಗಾಡ್ಯಾಕ್ ಉತ್ತೇಜಿತ್ ಕರುಂಕ್ ತಾಚೆಂ ಮನ್ ಆಯ್ಕಾಲೆಂ ನಾ. ಕಾಮ್ ನಾಸ್ತಾನಾ ಫುಟ್ಬೊಲ್ ಖೆಳೊನ್ ಕಿತೆಂ ಫಾಯ್ದೊ?
ಗೆಲೆತ್ಯಾ ಮಯ್ನ್ಯಾಂತ್ ಇಗ್ನೇಶಿಯಾಸಾನ್ ರಯ್ಲ್ವೇಂತ್ ಉಂಚ್ಲ್ಯಾ ಹುದ್ದ್ಯಾರ್ ಆಸ್ಚ್ಯಾ ನಾರಾಯಣ್ ರಾವಾಕ್ ಮೆಳೊಂಕ್ ಧಾಡ್ಲ್ಲೆಂ. ಆರ್ಥರಾನ್ ರೈಲ್ವೆಚಿ ಪರೀಕ್ಶಾ ದಿಲ್ಲಿ. ನಾರಾಯಣ್ ರಾವಾಕ್ ಭೆಟೊನ್ ಪರೀಕ್ಷೆಚೆಂ ನಂಬರ್ ದಿಲೆಂ ತರ್ ಕಾಮಾಚಿ ವೆವಸ್ತಾ ಜಾತೆಲಿ ಮ್ಹಣ್ ಇಗ್ನೇಶಿಯಾಸಾಚೊ ಭರ್ವಸೊ. ಅಪುಣ್ ಪ್ರೇತನ್ ಕರ್ತಾಂ ಮ್ಹಣ್ ನಾರಾಯಣ್ ರಾವಾನ್ ಆಶ್ವಾಸನ್ ದಿಲ್ಲೆಂ.
ಆರ್ಥರಾನ್ ರಯ್ಲ್ವೆಚಿ ಪರಿಕ್ಶಾ ದಿಲ್ಲಿ ಖರೆಂ. ಪುಣ್ ನಾರಾಯಣ್ ರಾವಾಕ್ ಭೆಟ್ಲೊ ನಾ.
"ಹಾಂವೆಂ ಪರೀಕ್ಶಾ ದಿಲ್ಯಾ. ಕಾಮ್ ಮೆಳ್ತೆಲೆಂ. ಶಿಫಾರಸ್ ನಾಕಾ" ಆರ್ಥರಾಚೊ ವಾದ್.
"ತುಕಾ ಜಿಣಿಯೆಚೊ ಅನ್ಭೋಗ್ ನಾ." ಇಗ್ನೇಶಿಯಾಸಾಚೊ ರಾಗ್ ಸ್ಪಶ್ಟ್ ದಿಸ್ಲ್ಲೊ. "ಆಯ್ಚಾ ಕಾಳಾರ್ ಶಿಫಾರಸ್ ನಾಸ್ತಾನಾ ಕಾಮ್ ಮೆಲಾನಾ."
ಪೂತ್ ಕಿತ್ಯಾಕ್ ಆಪ್ಣಾಚಿಂ ಉತ್ರಾಂ ಕಾನಾಂಕ್ ವ್ಹರಿನಾ? ಉಪ್ಕಾರಾಕ್ ಪಡಾನಾತ್ಲ್ಲಿಂ ತತ್ವಾಂ, ಮಮತಾಚಿ ಇಶ್ಟಾಗಾತ್, ಫುಟ್ಬೊಲಾಚಿ ಪಿಸಾಯ್, ಹಿಂದಿ ಪಿಕ್ಚರಾಂಚೆರ್ ಆಸಕ್ತ್.. ಕಸಲೊ ಫುಡಾರ್ ಫಾವೊ ಜಾತಲೊ ಆಪ್ಣಾಚ್ಯಾ ಎಕ್ಲ್ಯಾಚ್ ಪುತಾಕ್?
ಸುಕ್ರಾರಾ ಸಕಾಳಿಂ ಉಟೊನ್ ಝಾಡಾಚೆರ್ ನವಿ ಆಂಕ್ರಿ ಪಾಲೆಲ್ಯಾಗಿ ಮ್ಹಣ್ಚ್ಯಾ ಭರ್ವಶ್ಯಾನ್ ಇಗ್ನೇಶಿಯಾಸಾನ್ ಝಾಡಾಚೆಂ ತಪಾಸಣ್ ಕೆಲೆಂ.
ಇತ್ಲೆ ದೀಸ್ ಪಾಶಾರ್ ಜಾಲ್ಯಾರೀ ಹೆಂ ಝಾಡ್ ಕಿತ್ಯಾಕ್ ವಾಡೊಂಕ್ ನಾ, ವಾಡಾವಳ್ ಆಸಾ ತಶಿ ರಾವ್ಲ್ಯಾ ಮ್ಹಣ್ ಚಿಂತುನ್ ತೊ ಖಂತೀಶ್ಟ್ ಜಾಲೊ. ನವೆ ಆಂಕ್ರೆಚಿ ಝಳಕ್ ನಾತ್ಲ್ಲಿ.
"ಮ್ಹಾಕಾ ನಿರಾಶಿ ಕರಿನಾಕಾ." ಝಾಡಾಚ್ಯಾ ಮುಳಾಕ್ ಉದಾಕ್ ವೊತುನ್ ತೊ ಮ್ಹಣಾಲೊ. "ತುಜೆರ್ ಹಾಂವೆಂ ಜಾಯ್ತೊ ಭರ್ವಸೊ ದವರ್ಲಾ."
ತಾಚ್ಯಾ ಉಲ್ಯಾಕ್ ಝಾಡಾಥಾವ್ನ್ ಪ್ರತಿಕ್ರಿಯಾ ಆಶೆಲೊ ತೊ.
"ಹೆಂ ಕಾಟ್ ದಾಸವಾಳಾಚೆಂ ಝಾಡ್ ಹಾಡ್ಚ್ಯಾ ಬದ್ಲಾಕ್ ತುಂವೆಂ ಮನಿಪ್ಲಾಂಟ್ ಹಾಡಿಜೆ ಆಸ್ಲ್ಲೆಂ." ಜೂಲಿಯೆಟಾನ್ ತೆ ಸಾಂಜೆರ್ ತೆರ್ಸಾ ಉಪ್ರಾಂತ್ ಆಪ್ಲಿ ಅಭಿಪ್ರಾಯ್ ದಿಲಿ. "ಎದೊಳ್ ವಾಡೊನ್ ಸೊಬ್ತೆಂ ಆಸ್ಲ್ಲೆಂ."
"ಪಯ್ಶೆ ಖಾಲಿ ಜಾಂವ್ಚ್ಯಾ ಘರಾಂತ್ ಮನಿ ಪ್ಲಾಂಟ್ ವಾಡ್ಚೆಂ ಅಸಂಬವ್" ಇಗ್ನೇಶಿಯಾಸಾನ್ ಪುತಾಕ್ ಆಯ್ಕಾ ಸಾರ್ಕೆಂ ಸ್ಪಶ್ಟ್ ಉತ್ರಾಂನಿ ಜಾಪ್ ದಿಲಿ.
"ತುಜ್ಯಾ ಉತ್ರಾಂನಿ ರಾಜಾಂವ್ ನಾ" ಬಾಯ್ಲೆನ್ ಸೊಡ್ನ್ ದಿಲೆಂ ನಾ, "ಪಯ್ಶ್ಯಾಂಕ್ ಆನಿ ಮನಿ ಪ್ಲಾಂಟಾಕ್ ಕಿತೆಂ ಸಂಬಂದ್? ತುಜಿ ತಕ್ಲಿ ದಾಡ್ಡ್ ಜಾಲ್ಯಾ"
"ಹ್ಯಾ ಹಿಬಿಸ್ಕಸಾನ್ ಮ್ಹಜಿ ತಕ್ಲಿ ದಾಡ್ಡ್ ಕೆಲ್ಯಾ." ತೊ ಪುರ್ಪುರ್ಲೊ. "ಹ್ಯಾ ಝಾಡಾಚೆರ್ ಘೆತ್ಲ್ಲಿ ವಾಂವ್ಟ್ ಆನಿ ಉಮೆದ್ ನಿರ್ಫಳ್ ಜಾಂವ್ಕ್ ಲಾಗ್ಲ್ಯಾ"
"ಸಯ್ರಾಣ್ ಸಾಂಬಾಳ್" ಜೂಲಿಯೆಟಾನ್ ಧಯ್ರ್ ದಿಲೆಂ. "ಥೊಡ್ಯಾ ಝಡಾಂಕ್ ಪಾಲೆಂವ್ಕ್ ಆನಿ ಬೊಳ್ ಜಾಂವ್ಕ್ ವೇಳ್ ಲಾಗ್ತಾ."
ಮುಕ್ಲ್ಯಾ ಚಾರ್ ದಿಸಾಂನಿ ಕಿತೆಂಯಿ ಬರೆಪಣ್ ದಿಶ್ಟಿಕ್ ಆಯ್ಲೆಂ ನಾ. ಇತ್ಲೆಂ ಪಾವಾನಾತ್ಲ್ಲ್ಯಾಕ್ ತ್ಯಾ ಸಕಾಳಿಂ ಉಟೊನ್ ಝಾಡಾಚೆರ್ ನದರ್ ಭೊಂವ್ಡಾಯ್ತಾನಾ ಪಿಕಿಂ ಪಾನಾಂ ತಾಚ್ಯಾ ದೊಳ್ಯಾಂಕ್ ಸಾಂಪಡ್ಲಿಂ. ಆವಾಕ್ಕ್ ಜಾಲೊ ಇಗ್ನೇಶಿಯಾಸ್. ಗರ್ಮಿ ಸೊಸುಂಕ್ ಜಾಯ್ನಾಸ್ತಾನಾ ಪಾನಾಂ ಪಿಕೊಂಕ್ ಲಾಗ್ಲ್ಯಾಂತ್ ಮ್ಹಣ್ ತಾಣೆ ಚಿಂತ್ಲೆಂ. ಫ್ರಿಜ್ಜಾಂತ್ಲೆ ಆಯ್ಸಾಚೆ ಕುಡ್ಕೆ ವಿಂಚುನ್ ತಾಣೆ ಝಾಡಾಚ್ಯಾ ಮುಳಾಕ್ ಘಾಲೆ.
ಹ್ಯಾ ಮದೆಂ ಸೆಮಿ ಫಾಯ್ನಾಲಾಂತ್ ಸಿಟಿ ಕ್ಲಬ್ಬಾನ್ ಅಪ್ಲೆಂ ಮ್ಯಾಚ್ ಹೊಗ್ಡಾಯಿಲ್ಲೆಂ. ಆರ್ಥರಾನ್ ಏಕ್ ಗೋಲ್ ಮಾರ್ಲ್ಲೊ. ಜಾಪ್ ಜಾವ್ನ್ ವಿಜೇತ್ ಪಂಗ್ಡಾನ್ ತೀನ್ ಗೋಲ್ ಹಾಂಕಾಂ ದಿಲ್ಲೆ. ತೆ ಸಾಂಜೆರ್ ಆರ್ಥರ್ ಸಾರ್ಕೆಂ ಜೆವ್ಲೊನಾ. ಕಾಮ್ ನಾ ಮ್ಹಣೊನ್ ಚೆರ್ಕ್ಯಾಕ್ ಬೆಜಾರಾಯಿ ನಾ, ಮ್ಯಾಚ್ ಸಲ್ವಲೆಂ ಮ್ಹಣ್ಚಿ ನಿರಾಶಾ. ಹಾಂಕಾಂ ಕೊಣೆ ಸಮ್ಜೊಂವ್ಚೆ?
"ಏಕ್ ವಿಶಯ್ ಜಾಣಾಂಯ್?" ತೆ ರಾತಿಂ ನಿದೊಂಕ್ ವೆತಾನಾ ಬಾಯ್ಲೆನ್ ಖಬರ್ ದಿಲಿ. "ಆರ್ಥರಾಚೆಂ ಇಶ್ಟಿಣ್ ಮಮತಾಚಿ ಸಯ್ರಿಕ್ ಘಟ್ ಜಾಲಿ."
"ವಯ್ಗಿ?" ತೊ ಆನಂದಾನ್ ಹುಸ್ಕಾರ್ಲೊ. "ಆರ್ಥರಾಕ್ ಮಮತಾಲಾಗಿಂ ಲಫ್ಡೆ ಆಸಾತ್ ಮಣ್ ಹಾಂವ್ ಸಮ್ಜಾಲ್ಲೊಂ."
"ತುವೆಂ ಸಮ್ಜಾಲ್ಲೆಂ ಸರ್ವ್ ಸತ್ ನ್ಹಂಯ್" ತಿಣೆ ತೀರ್ಪ್ ದಿಲೆಂ. "ತಿಂ ಎಕಾಮೆಕಾ ಪಸಂದ್ ಕರ್ತಾತ್ ಮ್ಹಣೊನ್ ತಾಣೆ ಖುದ್ದ್ ಯಾ ಹೆರ್ ಕೊಣೆಂಯಿ ತುಕಾ ಸಾಂಗ್ಲಾಂ?"
"ನಾ" ಮ್ಹಣ್ ತಕ್ಲಿ ಹಾಲಯ್ಲಿ ಇಗ್ನೇಶಿಯಾಸಾನ್.
"ತರ್ ತುಂ ಕಶೆಂ ತ್ಯಾ ಹಂತಾಕ್ ಪಾವ್ಲೊಯ್?" ಜೂಲಿಯೆಟಾನ್ ವಿಚಾರ್ ಕೆಲೊ. "ಎಕಾಚ್ ಕ್ಲಾಸಿಂತ್ ಶಿಕೊನ್ ಸಳ್ಗೆನ್ ಉಲಯಿಲ್ಲ್ಯಾ ಫರಾ ತುಜೆ ತಸಲೆ ಆಶೀರ್ ಸಮ್ಜಣೆಚೆ ಅಪ್ಲೆಂ ಕಲ್ಪನ್ ಸತ್ ಮ್ಹಣ್ ಪಾತ್ಯೆತಾತ್ ಆನಿ ಕಲ್ಪನಾಚಾ ಭಿಯಾನ್ ದೀಸ್ ಸಾರ್ತಾತ್."
ಚಿಂತಪ್ ಅಶೀರ್ ಜಾಂವ್ ಯಾ ರೂಂದ್, ಆಪ್ಣಾಚೊ ಚೆರ್ಕೊ ಮಮತಾಚ್ಯಾ ಜಾಳಾಥಾವ್ನ್ ಮುಕ್ತ್ ಜಾಲೊ ಮ್ಹಣ್ ತೊ ಖುಶ್ ಪಾವ್ಲೊ. ತಾಣೆ ದೆವಾಕ್ ಅರ್ಗಾಂ ದಿಲಿಂ. ಅಚಾನಕ್ ತಾಕಾ ಝಾಡಾಚೊ ಉಡಾಸ್ ಆಯ್ಲೊ. ಆಪ್ಣಾಚೆಂ ಹಿಬಿಸ್ಕಸ್ ಕೆದಿಂಕ್ಚ್ ಫುಲಾಂ ದಿಂವ್ಚೆ ಸ್ಥಿತೆಕ್ ಪಾಂವ್ಚೆಂ ನಾ?
ಸಕಾಳಿಂ ಉಟ್ತಾನಾ ತಾಕಾ ಚಡಿತ್ ನಿರಾಶಾ ರಾಕೊನ್ ಆಸ್ಲ್ಲಿ. ಝಾಡಾಚಿಂ ಜಾಯ್ತಿಂ ಪಾನಾಂ ಪಿಕೊನ್ ಸಕ್ಲಾ ಗಳ್ಲ್ಲಿಂ. ನಿರಾಶೆನ್ ತಾಚ್ಯಾ ದೊಳ್ಯಾಂನಿ ದುಕಾಂ ಉದೆಲಿಂ. ಚಟ್ಟೆ ಸಮೇತ್ ಝಾಡ್ ಉಕಲ್ನ್ ಕಚ್ರ್ಯಾ ಡಬ್ಬ್ಯಾಕ್ ಉಡವ್ಯಾಂ ಮ್ಹಣ್ ತಾಕಾ ಭೊಗ್ಲೆಂ. ಝಾಡಾಂ ವಾಡಾಂವ್ಚೊ ಹವ್ಯಾಸ್ ಅಪ್ಣಾಕ್ ಸಾಂಗ್ಲ್ಲೊ ನ್ಹಂಯ್. ಅಪುಣ್ ಫುಲಾಂಚಿಂ ಸ್ವಪ್ಣಾಂ ಪಳೆವ್ನ್ ಆಸ್ಲ್ಲೊಂ. ಹ್ಯಾ ಝಾಡಾರ್ ನವಿಂ ನವಿಂ ಪಾನಾಂ ಸೊಡ್, ಆಸ್ಲ್ಲಿಂ ಪಾನಾಂ ಝಡೊಂಕ್ ಲಾಗ್ಲ್ಯಾಂತ್.
ಭೋವ್ಶಾ ಮುಕ್ಲ್ಯಾ ಏಕ್ ದೋನ್ ಮಯ್ನ್ಯಾಂನಿ ಚಟ್ಟೆಂತ್ ಸುಕೆಂ ಮುಳ್ಕಾಟ್ ಮಾತ್ರ್ ಉರ್ತೆಲೆಂ. ಪಯ್ಶೆ, ವೇಳ್ ಆನಿ ಮ್ಹಿನತ್ ವ್ಯರ್ಥ್ ಜಾತೆಲಿ.
ಆಪ್ಣೆಂ ಶೆರ್ಮಾಂವ್ ದೀಂವ್ಕ್ ಬಂದ್ ಕೆಲ್ಲ್ಯಾ ದಿಸಾಥಾವ್ನ್ ಆರ್ಥರಾಚ್ಯಾ ಸಬಾವಾಂತ್ ಮಹತ್ವಾಚಿ ಬದ್ಲಾವಣ್ ತಾಚ್ಯಾ ಗುಮಾನಾಕ್ ಆಯಿಲ್ಲಿ. ಫುಟ್ಬೊಲ್ ಖೆಳ್ತಾಲೊ, ಇಶ್ಟಾಂಲಾಗಿಂ ಟೆಲಿಫೊನಾರ್ ಅನಾವಶ್ಯಕ್ ಗಜಾಲಿ ಕರ್ತಾಳೊ. ಮಮತಾಚಿಂ ಫೊನಾಂ ಯೆತಾಲಿಂ, ನವಿಂ ಪಿಕ್ಚರಾಂ ಪಳೆತಾಲೊ, ಪುಣ್ ಸಾಂಗಾತಾಚ್ ಕಾಮಾಚೆ ಸೊದ್ನೆರ್ ಗಂಬೀರತಾ ಚಡ್ಲ್ಲಿ. ದಿಸಾಳ್ಯಾಚಿಂ ಇಸ್ತಿಹಾರಾಂ ವಿಂಚುನ್ ಅರ್ಜಿ ತಪ್ಪಾಲಾಕ್ ಘಾಲ್ತಾಲೊ. ಟೆಲಿಫೊನಾರ್ ಸಂದರ್ಶಾನಾಂಕ್ ಪ್ರೇತನ್ ಜ್ಯಾರಿ ಆಸ್ಲ್ಲೆಂ. ಹಫ್ತ್ಯಾಂತ್ ಚಾರ್-ಪಾಂಚ್ ಪಾವ್ಟಿಂ ಸೊಬಿತ್ ನ್ಹೆಸೊನ್ ಟಾಯ್ ಬಾಂದುನ್ ಫಾಯ್ಲ್ ಘೆವ್ನ್ ಭಾಯ್ರ್ ವೆತಾಲೊ. ಭೋವ್ಶಾ ಇಂಟರ್ವ್ಯೂವಾಕ್ ವೆತಾಲೊ ಜಾಯ್ಜೆ. ಪಾಟಿಂ ಯೆತೆಚ್ ಆವಯ್ ಆನಿ ಪೂತ್ ಪುಸ್ಪುಸೊನ್ ಉಲಯ್ತಾಲಿಂ.
ಇಸ್ತಿಹಾರಾಂಚೆರ್ ಭರ್ವಸೊ ದವರ್ನ್ ಮನ್ಶಾಕ್ ಕಾಮ್ ಮೆಳ್ತಾ? ಹಾಸೊ ಯೆತಾಲ್ಯೊ ಇಗ್ನೇಶಿಯಾಸಾಕ್. ಅಪ್ಣೆ ದಿಲ್ಲ್ಯಾ ಒಳ್ಕಿಂಚ್ಯಾ ವೆಕ್ತಿಂ ಪಾಟ್ಲ್ಯಾನ್ ಗೆಲ್ಲೊ ತರ್ ಎದೊಳ್ ನವ್ಕರಿ ಆಪ್ಣಾವ್ನ್ ಹಾತ್ಭರ್ ಜೊಡ್ತೊ ಆಸ್ಲ್ಲೊ.
ನಾಸಾಕ್ ತಯಾರ್ ಜಾಲ್ಲ್ಯಾ ಹಿಬಿಸ್ಕಸಾಕ್ ದೆಕ್ತಾನಾ ತೊ ವಿರಾರ್ ಜಾತಾಲೊ. ಹೆಂ ಝಾಡ್ ಆಪ್ಣಾಚಿ ಬೆಪರ್ವಾ ಕರ್ತಾ. ದೆಸ್ವಾಟೆಚೊ ಫೊಂಡ್ ಖುದ್ ಖೊಂಡುನ್ ಆಸಾ.
ಸೊಮಾರಾಚ್ಯಾ ತ್ಯಾ ದಿಸಾ ಸಕಾಳಿಂ ನಾಸ್ಟೊ ಕರ್ನ್ ಆರ್ಥರ್ ಬರೆಂ ನ್ಹೆಸೊನ್ ಗೆಲ್ಲೊ. ಇಗ್ನೇಶಿಯಾಸಾಚಿ ತಕ್ಲಿ ತಾಚೆ ಹಿಬಿಸ್ಕಸಾಚೆರ್ ಕೇಂದ್ರಿತ್ ಜಾಲ್ಲಿ. ಚಡಿತ್ ಜತನ್ ಆನಿ ಪೋಸ್ ಕರ್ಚ್ಯಾಂತ್ ಆರ್ಥ್ ನಾತ್ಲ್ಲೊ. ತಾಣೆ ನಿಚೆವ್ ಕೆಲೊ. ಝಾಡಾಚಿ ಚಟ್ಟಿ ಉಕಲ್ನ್ ಭಾಯ್ರ್ ಉಡಂವ್ಕ್ ತೊ ತಯಾರ್ ಜಾಳೊ. ತವಳ್ ವೊರಾಂ ಸಕಾಳಿಂಚಿಂ ಸಾಡೆ-ಇಕ್ರಾ.
ದಾರ್ ಉಗ್ತೆಂ ಕರ್ತಾನಾ ಭಾಯ್ರ್ ಥಾವ್ನ್ ಪಾಟಿಂ ಯೆಂವ್ಚೊ ಆರ್ಥರ್ ತಾಕಾ ಮುಕಾರ್ ಭೆಟ್ಲೊ. ತಾಚೆಂ ಮುಕಾಮಳ್ ಸಂತೊಸಾಚ್ಯಾ ಕಿರ್ಣಾಂನಿ ಪ್ರಕಾಸ್ತಾಲೆಂ.
"ಡೆಡಿ, ಮ್ಹಾಕಾ ಕಾಮ್ ಜಾಲೆಂ." ಬೊಬಾಟ್ಲೊ ಆರ್ಥರ್. "ಇಂಡಿಯನ್ ಏರ್ಲಾಯ್ನಾಂಚ್ಯಾ ಪಬ್ಲಿಕ್ ರಿಲೇಶನ್ಸ್ ವಿಭಾಗಾಂತ್. ಮ್ಹಜ್ಯಾ ಹ್ಯಾ ವರ್ಸಾಚ್ಯಾ ಫುಟ್ಬೊಲ್ ಪ್ರದರ್ಶನಾಚ್ಯಾ ಆಧಾರಾರ್ ಮ್ಹಾಕಾ ಹೆಂ ಫಾವೊ ಜಾಲಾಂ. ಕಾಮಾಸವೆಂ ಘರ್ ಆನಿ ಕಾರ್ ಮೆಳ್ತೆಲೆಂ. ತಾಂಚ್ಯಾ ನವ್ಯಾ ಫುಟ್ಬೊಲ್ ಪಂಗ್ಡಾಂತ್ ಮ್ಹಾಕಾ ಸ್ಥಾನ್ ಫಾವೊ ಜಾತೆಲೆಂ."
ಆರ್ಥರಾಚ್ಯಾ ತಾಳ್ಯಾಂತ್ ವೆಕ್ತ್ ಜಾಂವ್ಚೊ ಸಂತೊಸ್ ವರ್ಣುಂಕ್ ಅಸಾಧ್ಯ್. ಪುತಾಚೆರ್ ಮತಿಂತ್ ಶಿಜೊನ್ ಆಸ್ಚೊ ತಿರಸ್ಕಾರ್ ಎಕಾಚ್ ಕಿಣಾನ್ ಧುವ್ನ್ ಗೆಲೊ. ತಾಣೆ ಹಾತಿಂ ಆಸ್ಚಿ ಚಟ್ಟಿ ಸವ್ಕಾಸ್ ಸಕ್ಲಾ ದವರ್ಲಿ.
"ಉಲ್ಲಾಸ್ ತುಕಾ" ಇಗ್ನೇಶಿಯಾಸಾನ್ ಪುತಾಕ್ ಅಬಿಮಾನಾನ್ ಆರಾಯ್ಲೊ.
"ಕಂಗ್ರಾಟ್ಸ್ ಪುತಾ" ಜೂಲಿಯೆಟಾಚೊ ಸಂತೊಸ್ ಸಾಂಗ್ಚೊ ನ್ಹಂಯ್. "ತುಂ ಅಸಾಧಾರಣ್ ಮ್ಹಣ್ ಹಾಂವ್ ಜಾಣಾಸ್ಲ್ಲಿಂ."
"ಹಿ ಚಟ್ಟಿ ಘೆವ್ನ್ ತುಂ ಖಂಯ್ಚರ್ ಭಾಯ್ರ್ ಸರ್ಲಾಯ್?" ಪುತಾನ್ ವಿಚಾರ್ ಕೆಲೊ.
"ಹೆಂ ಝಾಡ್ ಮೊರ್ಚೆ ಸ್ಥಿತೆಕ್ ಆಯ್ಲಾಂ. ಹಾಂವೆಂ ಭರ್ವಸೊ ಹೊಗ್ಡಾಯ್ಲಾ. ಉಡಯ್ನಾಸ್ತಾನಾ ಹೆರ್ ಉಪಾವ್ ನಾ." ಇಗ್ನೇಶಿಯಾಸ್ ನಿರಾಶೆನ್ ಮ್ಹಣಾಲೊ.
"ಏಕ್ ವಾಟ್ ಆಸಾ.." ಆರ್ಥರಾನ್ ಭರ್ವಸೊ ಉಚಾರ್ಲೊ.
"ವಾಟ್? ಇಂಪೋಸಿಬಲ್." ಇಗ್ನೇಶಿಯಾಸಾನ್ ತಕ್ಲಿ ಹಾಲಯ್ಲಿ.
"ಹರ್ಯೆಕಾ ಸಮಸ್ಸ್ಯಾಕ್ ಏಕ್ ಪರಿಹಾರ್ ಆಸಾ." ಪುತಾನ್ ಐಡಿಯಾ ದಿಲಿ. "ಹಾಂವೆಂ ಥೊಡ್ಯಾ ದಿಸಾಂ ಆದಿಂ ಇಂಟರ್ನೆಟಾಂತ್ ಹ್ಯಾ ವಿಶಿಂ ವಾಚ್ಲೆಂ. ಹಿಬಿಸ್ಕಸ್ ಘರಾ ಭಿತರ್ ವಾಡಂವ್ಚ್ಯಾ ಝಾಡಾ ವರ್ಗಾಚೆಂ ನ್ಹಂಯ್. ಘರ್ಚ್ಯಾ ಭಾಂದ್ಪಾಸಾಂತ್ ಆನಿ ಬಂದಡೆಂತ್ ತೆಂ ಹೆ ಸ್ಥಿತೆಕ್ ಪಾವ್ಲಾಂ. ತುವೆಂ ಘಾಲ್ಲೆಂ ಉದಾಕ್ ಚಡ್ ಜಾವ್ನ್ ಪಾಳಾಂ ಕುಸ್ಲ್ಯಾಂತ್. ಜತನ್ ಗರ್ಜೆಚಿ, ಪುಣ್ ವಿಪ್ರೀತ್ ಬರಿ ನ್ಹಂಯ್. ಹಾಂಗಾಸರ್ ತುಜಿ ಜತನ್ ವಿಕಾಸಾಕ್ ಅಡ್ಕಳ್ ಜಾಂವ್ಕ್ ಪಾವ್ಲ್ಯಾ. ತುಂ ಥೊಡೆ ದೀಸ್ ಹಿ ಚಟ್ಟಿ ಬಾಲ್ಕನಿಚ್ಯಾ ವೊತಾಕ್ ದವರ್. ಉದಾಕ್ ಸುಕ್ತೆಲೆಂ. ಉಪ್ರಾಂತ್ ಗರ್ಜೆ ತೆಕಿದ್ ಇಲ್ಲೆಶೆಂ ಉದಾಕ್ ಘಾಲ್ಯಾರ್ ಬೊರೆಂ. ಹ್ಯಾ ಝಡಾಕ್ ಸ್ವತಂತ್ರ್ ಹವ್ಯಾಂತ್ ಜಿಯೆಂವ್ಕ್ ಏಕ್ ಆವ್ಕಾಸ್ ಫಾವೊ ಕರ್ ಡೆಡಿ. ಹೆಂ ಝಾಡ್ ಖುದ್ ಜಿಯೆಂವ್ಕ್ ಶಿಕ್ತೆಲೆಂ."
ಪುತಾಚ್ಯಾ ಉತ್ರಾಂನಿ ರಾಜಾಂವ್ ಝಳ್ಕಾಲೆಂ ಇಗ್ನೇಶಿಯಾಸಾಕ್.
ಇಗ್ನೇಶಿಯಾಸಾನ್ ತೆಚ್ ಘಡಿಯೆ ಚಟ್ಟಿ ಬಾಲ್ಕನಿರ್ ದವರ್ಲಿ. ದಾವೆಕ್ ಥೊಡ್ಯಾ ದಿಸಾಂನಿ ಉದಾಕ್ ಸುಕೊನ್ ಮಾತಿ ಘಟ್ ಜಾಲಿ. ಪಾನಾಂ ಝಡ್ಚಿಂ ರಾವ್ಲಿಂ. ಆಂಕ್ರ್ಯೊ ಫುಟ್ಲ್ಯೊ, ನವಿಂ ಪಾನಾಂ ಉದೆಲಿಂ. ಬೊಂಗೆ ದಿಸೊನ್ ಆಯ್ಲೆ, ಫುಲಾಂ ಫುಲ್ಲಿಂ, ಝಾಡ್ ವಾಡ್ಲೆಂ. ಇಗ್ನೇಶಿಯಾಸಾನ್ ಹೆರ್ ಥರಾವಳ್ ಝಾಡಾಂ ಹಾಡ್ನ್ ಪೋಸ್ ಕೆಲೊ. ತಾಚೆ ಬಾಲ್ಕನಿರ್ ಏಕ್ ಸೊಭಿತ್ ವೋಡ್ತ್ ತಯಾರ್ ಜಾಲೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
