ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
2. ಪಾವ್ಸ್
ಪಾವ್ಸ್ ಆಯ್ಲೊ, ಬಾ೦ಯೊ ಭರ್ಲ್ಯೊ
ಜೊತಾಂ ಗಾದ್ಯಾಕ್ ದೆಂವ್ಲಿಂ, ಬಿಯಾಳೊ ರೊಯ್ಲೊ
ಆಳ್ಮಿಂ ಉಟೊನ್ ಫ಼ುಲ್ಲಿಂ.
ಸಾಂಗಾತಾಚ್ ಆವ್ರ್ ಆಯ್ಲೆಂ,
ಘರಾಂ ಕೊಸಾಳ್ಳಿಂ, ಮಾರೊಗ್ ಭಿಗಡ್ಲೆ
ಬಸ್ಸಾಂ ರಾವ್ಲಿಂ.
ತಾನ್ ಥಾಂಬ್ಲಿ, ತಳಿಂ ಬಾಂಯೊ
ವೊಮ್ತಾಲಿಂ, ಝರಿ ಫ಼ುಲ್ಲ್ಯೊ
ವ್ಹಾಳ್ ಪೊಕ್ರಿ ಜಾಲೆ.
ನಳಾ ಉದಾಕ್ ತಾಂಬ್ಡೆಂ ಜಾಲೆಂ
ಚರಂಡೆಚೆಂ ನಳಾಂತ್ ಗೆಲೆಂ
ಬಾಂಯ್ತ್ಲೆಂ ಉದಾಕ್ ಮ್ಹೆಳೆಂ ಜಾಲೆಂ.
ಝರಮ್ ಕೊಲೆರಾ, ಕಾಳ್ಜೊರ್
ಆನಿ ಜೊಂಡಿಸಾಚಿ ಪಿಡಾ ಮುರ್ಮುರ್ಲಿ.
ಲಿಂಗನಮಕ್ಕಿ ವಯ್ರ್ ಆಯ್ಲೆಂ.
ಕಾತರ್ಲ್ಲಿ ವೀಜ್ ಪಾಟಿಂ ಮೆಳ್ಳಿ.
ರೂಕ್ ಹುಂಬಳ್ಳೆ, ಖಾಂದೆ ಕೊಸಳ್ಳೆ.
ವೀಜ್ ದಿವ್ಯಾಂನಿಂ ಕೂಕ್ಲು ಕೆಲೆಂ.
ಥೊಡೆ ಪಾವ್ಟಿ ಪಾವ್ಸ್
ಪಡ್ಟಾ ಕಿತ್ಯಾಕ್ ಆನಿ
ಥೊಡೆ ಪಾವ್ಟಿ ರಡ್ಟಾ ಕಿತ್ಯಾಕ್?
ಪಾವ್ಸ್ ಸದಾಂಚೊ, ಸಗ್ಳ್ಯಾಂಕ್ ಒಳ್ಕಿಚೊ. ‘ಪಾವ್ಸ್’ ಕವಿತೆಚಿ ವಸ್ತ್ಜಾವ್ನ್ ಆಸ್ಚಿ ಹಿ ಏಕ್ ಉಗ್ತಿ, ಸಾದಿಸುದಿ ಕವಿತಾ. ಸದಾಂಚ್ಯಾ ಶಿತ್ ಕಡಿಯೆಬರಿ. ಪಾವ್ಸಾಚಾ ಸುರ್ವಾತೆಕ್ ರಯ್ತಾನ್ ಜೊತಾಂಕ್ ಘೆವ್ನ್ ಗಾದ್ಯಾಂತ್ ದೆಂವ್ಚೆಂ ರೂಪ್ ಸದಾಂಚೆ ತರ್ಯಿ ಹರ್ಏಕ್ ಪಾವ್ಟಿ ಮತಿಕ್ ಸಮೃದ್ದೆಚೆಂ ಸಮಾದಾನ್ ಹಾಡ್ಚೆಂ ತಸಲೆಂ.
ಪಾವ್ಸ್ ಆಯ್ಲೊ, ಬಾಂಯೊ ಭರ್ಲ್ಯೊ
ಜೊತಾಂ ಗಾದ್ಯಾಕ್ ದೆಂವ್ಲಿಂ, ಬಿಂಯಾಳೊ ರೊಯ್ಲೊ
ಆಳ್ಮಿಂ ಉಟೊನ್ ಫ಼ುಲ್ಲಿಂ.
ಹ್ಯಾ ರುಪ್ಣ್ಯಾ ಥಾವ್ನ್ ಮೆಳ್ಚೆಂ ಸಮಾದಾನ್ ಆನಿ ತಾಚೆಥಾವ್ನ್ ಯೆಂವ್ಚ್ಯೆ ಸಮೃದ್ದೆಚೆಂ ಚಿಂತಪ್ ಅಮರ್. ದೆಕುನ್ ಹರ್ಏಕ್ ಕವಿ ಹರ್ಎಕಾ ಕಾಳಾರ್ ಮ್ಹಳ್ಳೆಬರಿ ಪಾವ್ಸಾ ವಿಶಾಂತ್ ಏಕ್ ನಾ ಏಕ್ ಕವಿತಾ ರಚ್ತಾ.
ತಾನ್ ಥಾ೦ಬ್ಲಿ, ತಳಿ೦ ಬಾ೦ಯೊ
ವೊಮ್ತಾಲಿ೦, ಝರಿ ಫ಼ುಲ್ಲ್ಯೊ
ವ್ಹಾಳ್ ಪೊಕ್ರಿ ಜಾಲೆ.
ಪ್ರಕೃತೆಚ್ಯಾ ಉಸ್ಕ್ಯಾರ್ ಪಾವ್ಸ್ ಬೋವ್ ಸುಂದರ್. ಭರೊನ್ ವೊಮ್ತೊಂಚ್ಯೊ ಬಾಂಯೊಂ, ತಳಿಂ ಪೊಕ್ರಿಪಣಾಚೆ ವ್ಹಾಳ್ ಪ್ರಕೃತೆಚ್ಯೆ ಸೊಬಾಯೆಕ್ ಸುಂದರ್ ರೂಪ್ ದಿತಾತ್. ಪಾವ್ಸ್ ಪ್ರಕೃತೆಚೊ ವಾಂಟೊ, ತೊ ಪ್ರಕೃತೆಸಾಂಗಾತಾ ಪ್ರಕೃತಿ ಜಾವ್ನ್ ಮೆಳ್ಟಾ ಆನಿ ಪ್ರಕೃತೆಚ್ಯಾ ಉಸ್ಕ್ಯಾರ್ ಆಸ್ಚೊ ಮನಿಸ್ ತಾಚೊ ಫಾಯ್ದೊ ಜೊಡ್ಟಾ.
ಪುಣ್ ಶಹರಾಂತ್ ಹೊಚ್ ಪಾವ್ಸ್ ನಾಸಾಚೊ ಭುತ್ ಜಾತಾ. ಬಾಂಯೊಂ ಮ್ಹೆಳಯ್ತಾ.
ನಳಾ ಉದಾಕ್ ತಾ೦ಬ್ಡೆ೦ ಜಾಲೆ೦
ಚರ೦ಡೆಚೆ೦ ನಳಾ೦ತ್ ಗೆಲೆ೦
ಬಾ೦ಯ್ತ್ಲೆ೦ ಉದಾಕ್ ಮ್ಹೆಳೆ೦ ಜಾಲೆ೦.
ಝರಮ್ ಕೊಲೆರಾ ಆನಿ ಕಾಳ್ಜೊರಾಚಿ ಪಿಡಾ ಹಾಡ್ಟಾ. ಪುಣ್ ಉದಕ್ ವಯ್ರ್ ವಯ್ರ್ ಚಡತ್ ಯೆತಾ.
ಝರಮ್ ಕೊಲೆರಾ, ಕಾಳ್ಜೊರ್
ಆನಿ ಜೊ೦ಡಿಸಾಚಿ ಪಿಡಾ ಮುರ್ಮುರ್ಲಿ.
ಲಿ೦ಗನಮಕ್ಕಿ ವಯ್ರ್ ಆಯ್ಲೆ೦.
ವೀಜ್ ಯೆತಾವೆತಾ, ರೂಕ್ ಹುಂಬಳ್ಟಾತ್, ಖಾಂದೆ ಕೊಸಳ್ಟಾತ್, ಘರಾಂ ಪಡ್ಟಾತ್, ರಸ್ತೆ ಕೊಸ್ಳೊನ್ ಬಸ್ಸಾಂ ರಾವ್ತಾತ್.
ಕಾತರ್ಲ್ಲಿ ವೀಜ್ ಪಾಟಿ೦ ಮೆಳ್ಳಿ.
ರೂಕ್ ಹು೦ಬಾಳ್ಳೆ, ಖಾ೦ದೆ ಕೊಸಾಳ್ಳೆ.
ವೀಜ್ ದಿವ್ಯಾ೦ನಿ೦ ಕೂಕ್ಲು ಕೆಲೆ೦.
ನಾಗರಿಕ್ ಜಿಣಿಯೆಚ್ಯಾ ನವೆಸಾಂವಾಂತ್ ಮನ್ಶಾಕ್ ಪಾವ್ಸ್ ತಾಣೆಂ ಚಿಂತ್ಲ್ಲೆಬರಿ, ತಾಕಾ ಜಾಯ್ ಜಾಲ್ಲೆಬರಿ ಯೇಜೆ. ಇಲ್ಲೆಂ ಚಡ್ಉಣೆಂ ಜಾಲೆಂ ತರ್, ಹೊ ಪಾವ್ಸ್ ಆಯ್ಲೊ ಕಿತ್ಯಾಕ್ ಮ್ಹಣ್ಚೆಂ ಆನಿ ಆಯ್ಲೊನಾ ತರ್ ಪಾವ್ಸ್ ಹೆ ಪಾವ್ಟಿ ಆಯ್ಲೊ ನಾ ಕಿತ್ಯಾಕ್ ಮ್ಹಣ್ಚೆಂ ನಿರಂತರ್ ಚಲ್ತಾ.
ಕವಿತಾ ತೀನ್ ವೊಳಿಂನಿ ದಿಸ್ತಾ ತರೀ, ವಿಶೆಷ್ ಬಾಂದಪ್ ದಿಶ್ಟಿಕ್ ಪಡನಾ. ಸಾಧಾರಣ್ ಚಿಂತ್ಪಾಧಾರಿರ್ ಕವಿತಾ ವ್ಹಾಳೊನ್ ಆಯ್ಲ್ಯಾ. ಸಾದಿಂ ಉತ್ರಾಂ ಆನಿ ಸದಾಂಚೆಂ ಚಿಂತಪ್
ವಾಚ್ಪ್ಯಾಕ್ ಚಡ್ ಪಯ್ಸ್ ವಾ ಗುಂಡಾಯೆಕ್ ವಚೊಂಕ್ ಆವ್ಕಾಸ್ ದೀನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications