ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
1. ಪಣ್ತೆಚಿ ಪೆಲಿ
ಹಾತಿ೦ ಮುಗೆಲ್ಯಾ ಪಣ್ತೆಚಿ ಪೆಲಿ
ಕೊಂಕಣ್ ಮ್ಹಜೆ೦ ನಾ೦ವ್
ಆಜ್ ಮುಗೆಲಿ ಆಸ್ಡಿ ವೊಲಿ
ಕೊಂಕಣ್ ಮ್ಹಜೊ ಗಾ೦ವ್
ದೊಳ್ಯಾಂತ್ ಝರಿ ಕಾಳ್ಜಾಂತ್ ಢೊಲಿ
ಆವಾಜ್ ಢಾಂವ್ ಢಾಂವ್
ಚಾಲಿಂತ್ ಲಾಲಿ ಪೊಲ್ಯಾರ್ ಭುಲಿ
ಕಾರಣ್ ಜಾಣಾಂ ಹಾ೦ವ್
ಘರಾಂತ್ ಜಲ್ಮ್ ತೆರಾಂತ್ ದಿವಾಳಿ
ಬಾಳ್ ನಂದನ್ ಜಾ೦ವ್
ಗಾಂವಾರ್ ನಾಳಿ ಪಾಳ್ಣ್ಯಾಂತ್ ಕಳಿ
ಬಾಳ್ ಗಾಜೊಂ ಗಾಂವ್
ಹಾತಿಂ ಮುಗೆಲ್ಯಾ ಪಣ್ತೆಚಿ ಪೆಲಿ
ಮತಿಂತ್ ಒರೆಸಾಂವ್
ಆಜ್ ಮುಗೆಲಿ ಆಸ್ಡಿ ವೊಲಿ
ಶುಭ್ ತುಜೆಂ ಜಾಂವ್
ದೆವಾಚಿ ಪುಜಾ ಜಾತಾ ತೆದ್ನಾಂ ಪಣ್ತಿ ಜಳ್ಟಾ. ಪಣ್ತೆಚಿ ಪೆಲಿ ಹಾತಾಂತ್ ಘೆವ್ನ್
ದೇವ್ದೆವಾಂಚೊ ಆನಿ ತಾಂಚೆ ಥಾವ್ನ್ ದೆಂವೊನ್ ಯೆಂವ್ಚ್ಯಾ ಸರ್ವ್ ಬರೆಪಣಾಚೊ
ಸ್ವಾಗತ್ ಜಾತಾ. ಪಣ್ತೆಚ್ಯೊ ಪೆಲಿಯೊ ಹಜಾರಾಂನಿ ಜಳವ್ನ್ ದಿವಾಳಿ ಸಂಭ್ರಮ್ತಾ.
ಹಾತಾಂತ್ ಪಣ್ತೆಚಿ ಪೆಲಿ ಘೆವ್ನ್, ವೊಲ್ಯಾ ಆಸ್ಡ್ಯಾಂನಿ ಕೊಂಕಣಾಚೊ ಕೊಂಕಣೊ ಮ್ಹಣ್ಟಾ ಕಿತೆಂ? ಹರ್ಯೆಕಾ ಕೊಂಕಣಿ ಮನ್ಶಾಚ್ಯಾ, ಕೊಂಕಣಿ ಭಾಶೆ ಆನಿ ಸಂಸ್ಕೃತೆಚ್ಯಾ ಸಂಘ್-ಸಂಘಟನಾಂಚ್ಯಾ ಜಲ್ಮಾ ವೆಳಿಂ ಕೊಂಕಣಿ ನವ್ಯಾನವ್ಯಾನ್ ಜಲ್ಮ್ ಘೆವ್ನ್ಂಚ್ ಆಸಾ ಆನಿ ತ್ಯಾ ಜಲ್ಮಾವೆಳಿಂ;
ದೊಳ್ಯಾಂತ್ ಝರಿ ಕಾಳ್ಜಾಂತ್ ಢೊಲಿ
ಆವಾಜ್ ಢಾಂವ್ ಢಾಂವ್
ಚಾಲಿಂತ್ ಲಾಲಿ ಪೊಲ್ಯಾರ್ ಭುಲಿ
ಕಾರಣ್ ಜಾಣಾಂ ಹಾಂವ್
ಕೊಂಕಣಿಚೊ ಜಲ್ಮ್ ಪಳಂವ್ಚ್ಯಾ ಎಕಾ ಕೊಂಕ್ಣ್ಯಾಚೊ ಆಪ್ಲೊ ಖಾಸ್ ಸಂತೊಸ್ ಅಸೊ ವರ್ಣಿತ್ ಜಾತಾ. ತಾಚ್ಯಾ ದೊಳ್ಯಾಂನಿ ಸಂತೊಸಾಚಿಂ ದುಕಾಂ, ಉಮಾಳ್ಯಾಂನಿ ಭರ್ಲ್ಲ್ಯಾ ಕಾಳ್ಜಾಚೊ ಧಡ್-ಧಡ್ ಆವಾಜ್, ಚಾಲಿಂತ್ ನಾಚ್ ಆನಿ ಪೊಲ್ಯಾರ್ ಆಕರ್ಶಣ್ ಆಸ್ತಾ ಆನಿ ತೊ ತಾಚೆಂ ಕಾರಣ್ಯಿ ಜಾಣಾಂ ಆಸ್ತಾ.
ಘರಾಂ ಜಾವ್ನ್ ಗಾಂವ್ ಆನಿ ಗಾಂವಾಂತ್ ದಿವಾಳಿ (ಹಾಂಗಾಸರ್ ಸಂಭ್ರಮ್, ಫೆಸ್ತ್) ಜಾಯ್ಜೆ
ತರ್ ಘರಾಘರಾಂನಿಯಿ ದಿವಾಳಿ ಜಾಯ್ಜೆ. ಘರಾಘರಾಂನಿ ಜಾಲ್ಲ್ಯಾ ಜಲ್ಮಾಚೊ ಸಂತೊಸ್ ಗಾಂವ್ಭರ್ ದಿಸಜೆ. ಪಾಳ್ಣ್ಯಾಂತ್ ಕಳಿ (ಅತ್ತಾಂ ಜಲ್ಮಲ್ಲೆಂ ಮೋವ್ ಮೊವಾಳ್ ಬಾಳ್) ಆಸಾ ದೆಕುನ್ ಗಾಂವಾರ್ ಸಂತೊಸಾಚ್ಯೊ ನಾಳಿ ಆವಾಜ್ ಕರ್ತಿತ್. ಹ್ಯಾ ಬಾಳಾಚೆಂ ನಂದನ್ ಜಾಂವ್, ಹೆಂ ಬಾಳ್ ಗಾಜೊಂ ಗಾಂವ್ (ನಾಂವಾಡ್ದಿಕ್ ಜಾಂವ್) ಮ್ಹಣ್ಚೊ ಅತ್ರೆಗ್ ಕವಿತೆಂತ್ ಅಸೊ ಸುಂದರ್ ರೂಪ್ ಘೆತಾ;
ಘರಾಂತ್ ಜಲ್ಮ್ ತೆರಾಂತ್ ದಿವಾಳಿ
ಬಾಳ್ ನಂದನ್ ಜಾಂವ್
ಗಾಂವಾರ್ ನಾಳಿ ಪಾಳ್ಣ್ಯಾಂತ್ ಕಳಿ
ಬಾಳ್ ಗಾಜೊಂ ಗಾಂವ್.
ಕವಿತೆಚ್ಯಾ ಸುರ್ವಾತೆಚಿ ತಿಸ್ರಿ ವೋಳ್ “ಆಜ್ ಮುಗೆಲಿ ಆಸ್ಡಿ ವೊಲಿ", ಕವಿತಾ ಆಕೇರ್ ಜಾತಾನಾ ಪರತ್ ತಿಸ್ರೆ ವೊಳಿಂತ್ ಯೆತಾ ಆನಿ ಸಗ್ಳ್ಯೆ ಕವಿತೆಚೆಂ ಚಿಂತಪ್ ಸಂತೊಸಾನ್ ವೊಲ್ಯೊ ಜಾಲ್ಲ್ಯಾ ಆಸ್ಡ್ಯಾಂನಿ ಬಾಂದುನ್ ಘೆತಾ.
ಹ್ಯೆ ಕವಿತೆಂತ್ ಆಸ್ಚೆಂ ಮೂಳ್ ಚಿಂತಪ್ ಕೊಂಕಣಿಚ್ಯಾ ಜಲ್ಮಾಚೆಂ. ಮನ್ಶಾಚ್ಯಾ ಜಿಣಿಯೆಂತ್ ಜಲ್ಮ್ ಎಕ್ಚ್ ಪಾವ್ಟಿ, ಪುಣ್ ಕೊಂಕಣೆಕ್ ತಶೆಂ ನ್ಹಯ್, ಕೊಂಕಣ್ ಗಾಂವಾಂತ್ ಏಕ್ ಏಕ್ ಕೊಂಕಣಿ ಮನಿಸ್ ಜಲ್ಮತಾನಾ ಕೊಂಕಣಿ ಭಾಸ್ ಪರತ್ ಆನಿ ಪರತ್ ಜಲ್ಮತಾ. ತ್ಯಾ ಸುಂದರ್ ಜಲ್ಮವೆಳಾ ಕವಿಚಾ ಹಾತಾಂತ್ ಪಣ್ತೆಚಿ ಪೆಲಿ ಆಸಾ, ಸ್ವಾಗತ್ ದೀಂವ್ಕ್, ಸಂತೊಸ್ ಪಾಚಾರುಂಕ್ ಆನಿ ವಾಟ್ ದಾಕಂವ್ಕ್.
ಚವ್ಪದಿಚೆರ್ ಆಸ್ಚ್ಯೆ ಹ್ಯೆ ಕವಿತೆಚಿ ಪಯ್ಲಿ ಆನಿ ತಿಸ್ರಿ ವೋಳ್; ದುಸ್ರಿ ಆನಿ ಚವ್ತಿ ವೋಳ್ ಪ್ರಾಸ್ ಬದ್ದ್ ಆಸಾ. ಕವಿತೆಚೆಂ ಭಾಯ್ಲೆಂ ರೂಪ್ ಕವಿತೆಕ್ ಕಾಲ್ಪನಿಕ್, ಕವಿತಾಮಯ್, ಅರ್ತ್ ನಾತ್ಲ್ಲ್ಯಾ ಸಿಂತಿಮೆಂತಾಂಚೆಂ ರೂಪ್ ದಿತಾ ಪುಣ್ ಉತ್ರಾನ್ ಉತರ್ ಜಿರವ್ನ್ ಭಿತರ್ ರಿಗ್ತಾನಾ,
“ಮನ್ಶಾಸಾಂಗಾತಾ ತಾಚಾ ಗಾಂವ್ಚಿ ಆನಿ ಘರ್ಚಿ ಭಾಸ್ಯ್ ಪರತ್ ನವ್ಯಾನ್ ಜಲ್ಮತಾ"
ಮ್ಹಣ್ಚೆಂ ಸತ್ ಕಲ್ಪನಾಸಕ್ತೆರ್ಚ್ ಆಸಾ ತಶೆಂ ಕವಿತೆಂತ್ ದಿಸೊನ್ ಕವಿತೆಚೆಂ ಸತ್ ಆನಿ
ಸೊಬಾಯ್ ವಾಚ್ಪಿ ಮನ್ ಭುಲವ್ನ್ ಧಲಯ್ತಾ.
ಕೊಂಕಣೆಕ್ ಯೇವ್ಕಾರ್ ಮಾಗ್ಚ್ಯೆ ಹ್ಯೆ ಕವಿತೆಂತ್ ಕವಿ ಆಪ್ಲ್ಯಾ ಉತರಾಂನಿ ಸಂಭ್ರಮ್ ಭರ್ತಾ. ಪೆಲಿ ಯೆವ್ಕಾರಾಚೊ ಸಂಕೇತ್ ಜಾವ್ನ್ ಖಂಯ್ಸರ್ ತರ್ಯಿ ದವರುನ್ ಸೊಡ್ಲ್ಲಿ ನ್ಹಯ್. ತಿ ಹಾತಾಂತ್ ಆಸಾ, ದೊಳೆ ಸಂತೊಸಾಚ್ಯಾ ದುಕಾಂನಿಂ ಭಿಜ್ಲ್ಲೆ ಆಸಾತ್, ಕಾಳ್ಜಾಂತ್ ಅತ್ರೆಗೀ ಉಮಾಳ್ಯಾಂಚಾ ಢೊಲಿಚೊ ಆವಾಜ್, ಚಾಲಿಂತ್ ನಾಚ್, ಪೊಲ್ಯಾರ್ ಸಂತೊಸಾನ್ ಉದೆವ್ನ್ ಆಯಿಲ್ಲೆಂ ಆಕರ್ಶಣ್- ಮಾಗಿರ್ ಘರ್, ಘರಾಂತ್ ಪಾಳ್ಣೆಂ, ಪಾಳ್ಣ್ಯಾಂತ್ ಕಳಿ, ಗಾಂವಾರ್ ನಾಳಿ ಆನಿ ಸಗ್ಳ್ಯಾನ್ ದಿವಾಳಿ......
ಪಣ್ತೆಚಿ ಪೆಲಿ ಹಾತಿಂ ಘೆವ್ನ್ ಮತಿಂತ್ ಮಾಗ್ಣೆಂ ಕರುನ್ ಕೊಂಕಣೆಚಾ ಜಲ್ಮಜಲ್ಮಾಕ್ ಬರೆಂ ಮಾಗ್ಚ್ಯಾ ಹ್ಯೆ ಕವಿತೆಂತ್ ಭರ್ಪೂರ್ ಸಂಭ್ರಮ್! ಹಿ ಕವಿತಾ ವಾಚ್ತಾಂವಾಚ್ತಾಂ ಉತ್ರಾಂ ರುಪ್ಣಿಂ ಜಾವ್ನ್ ಯೆತಾತ್ ಆನಿ ಮಾಗಿರ್ ಜೀವ್ ಭರೊನ್ ಖೆಳ್ಟಾತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications