ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
8. ತಿಸ್ರೊ ಶಕುನಿ
9. ಸಾಡೊ
10. ಪಾವ್ಸ್ ಆಶೆತಾಂ
ಗಿಮ್ಶಿಲ್ಯಾ ವೊತಾ೦ತ್ ಚಿ೦ತ್ಲೆಲಿ೦ ರುಪಾ೦ ಚಾ೦ದ್ಣ್ಯಾಚಾ ಚ೦ಗಾ
ಜಾಲಿ೦ಮು ರುತಾ ಆ೦ಗ್ಲೆ೦ ಲಾಗ್ತಾನಾ ಭಿಜ್ಲೆಲ್ಯಾ ಆ೦ಗಾ
ಲಜ್ ಸಾ೦ಡುನ್ ಹಾ೦ವ್ ಆಶೆತಾ೦ ಪಾವ್ಸ್ ಮೊಟೊ
ಲಜ್ ಘೆವುನ್ ತು೦ಗೊ ಖರ್ಶೆತಾ ಪಾವ್ಸ್ ಖೊಟೊ
ಜಾಲೆಂ ಸವಾಲ್ ಮೊಡ್ಕಿ ಭಾ೦ಗಾರಾಚಿ
ಜಾಪ್ ಕಶಿ ಆವ್ಯಾ ಮಾತಿ?
ನವಾಲ್ ದಿಸ್ತಾತ್ ರಾಜಾ೦ವ್ ತುಜೆ೦
ಉತ್ರಾ೦ನಿ೦ಚ್ ಕಾಡಿನ್ ಕಾತಿ
ಭಾ೦ಗ್ರಾ ಮೊಡ್ಕಿ ಫ಼ೊಡ್ಚಿ ಫ಼ೊಡುನ್
ಕೈಲೆ೦ತುಲೊ ನಗ್ ಸೊಲಿನ್
ಕಾನ್ಪಾರ್ಯಾಚೊ ಸರ್ ಕರುನ್
ತುಜಾಚ್ ಗಳ್ಯಾಕ್ ಗು೦ತುನ್ ಘಾಲಿನ್
ಜುಜೆಬಾಪಾ ಸಾ೦ಗ್ ಮಾಕಾ
ತುಜೆ ಥ೦ಯಿ ತೆ೦ಚ್ ಘಡ್ಲಾ೦
ಮಾಲ್ಘಡ್ಯಾ೦ಚ್ಯೆ ಜಾಪಿಕ್ ಮ್ಹಜ್ಯಾ
ತಾ೦ಬ್ಡೊ ನಾಸ್ತಿಕ್ ನಾ೦ವ್ ಪಡ್ಲಾ೦
ಮೊಗಾನ್ ಮ್ಹಜೊ ವಿಚಾರ್ ಜಾತಾ
ಮೊಗಾನ್ ಹಾ೦ವೆ೦ ಉಮೊ ದಿ೦ವ್ಚೊ
ಸಾ೦ಗ್ ಬಾಪಾ ಎಕಾ ಉಮ್ಯಾನ್
ಸಾ೦ಗ್ ಕಸೊ ಚೆರ್ಕೊ ಜಾ೦ವ್ಚೊ?
ಪಾವ್ಸ್ ಆಶೆಂವ್ಚೊ ಕೆದಾಳಾ? ಗಿಮಾಂತ್ ಯಾ ಪಾವ್ಸಾದಿಸಾಂನಿ? ಬಿಲ್ಕುಲ್ ಗಿಮಾಂತ್. ಪಾವ್ಶಿಲ್ಯಾ ದಿಸಾಂನಿ “ಹೊ ಪಾವ್ಸ್ ಕೆದಾಳಾ ರಾವ್ತಾ ಹಾಬಾ!’’ ಮ್ಹಣ್ಚೆಂ ಆಯ್ಕೊಂಕ್ ಮೆಳ್ಟಾ. ಚಲೊ ಪಾವ್ಸ್ ಆಶೆಲ್ಲೊ ಖಂಡಿತ್ ಜಾವ್ನ್ ಗಿಮಾಂತ್ ತೆಂಯಿ ವೊತ್ ತಾಪ್ತಾನಾ. ಗಿಮಾಂತ್ಲೆಂ ಚಾನ್ನೆಂ ಸುಂದರ್, ವೊತಾಚ್ಯಾ ಆನಿ ಚಾನ್ನ್ಯಾಚ್ಯಾ ಮೆಳಿಂತ್ ಚಲೊ ಪಾವ್ಸ್ ಆಶೆಲ್ಲೊ ಕಾಂಯ್ ಶೆತಾಚೆಂ ಕಾಮ್ ಕರ್ಚ್ಯಾಕ್ ನ್ಹಯ್, ಸುಕೊನ್ ವೆಚ್ಯಾ ರೂಕ್ಝಡಾಂಕ್ ಜೀವ್ ಭರೊಂ ಮ್ಹಣ್ಚ್ಯಾ ಇರಾದ್ಯಾನ್ಯಿ ನ್ಹಯ್. ಹಿ ಕವಿತಾ ಕಾಂಯ್ ಮೊಗಾಚಿ ಯಾ ಪ್ರಾಯೆಚ್ಯಾ ಉಚಾಂಬಳಾಯೆಚಿ?
ಗಿಮ್ಶಿಲ್ಯಾ ವೊತಾ೦ತ್ ಚಿ೦ತ್ಲೆಲಿ೦ ರುಪಾ೦ ಚಾ೦ದ್ಣ್ಯಾಚಾ ಚ೦ಗಾ
ಜಾಲಿ೦ಮು ರುತಾ ಆ೦ಗ್ಲೆ೦ ಲಾಗ್ತಾನಾ ಭಿಜ್ಲೆಲ್ಯಾ ಆ೦ಗಾ
ಲಜ್ ಸಾ೦ಡುನ್ ಹಾ೦ವ್ ಆಶೆತಾ೦ ಪಾವ್ಸ್ ಮೊಟೊ
ಲಜ್ ಘೆವುನ್ ತು೦ಗೊ ಖರ್ಶೆತಾ ಪಾವ್ಸ್ ಖೊಟೊ
ಗಿಮಾಂತ್ಲ್ಯಾ ವೊತಾಂತ್, ಚಾನ್ನ್ಯಾಚೆ ಸೊಬಾಯೆಂತ್ ವಾಡೊನ್ ಆಯಿಲ್ಲೆಂ ಏಕ್ ಚಿಂತಪ್ ಹಿ ಕವಿತಾ. “ಪಾವ್ಸ್ ಯೇಂವ್ ಮೊಟೊ ಆನಿ ಆಂಗ್ಲೆಂ ಲಾಗೊನ್ ರಾವೊಂ ಭಿಜ್ಲೆಲ್ಯಾ ಆಂಗಾ’’ ಮ್ಹಣ್ ಚಲೊ ಆಶೆತಾನಾ, ಆಂಗ್ಲೆಂ ನ್ಹೆಸ್ಲ್ಲೆಂ ಲಜೆನ್ “ಪಾವ್ಸ್ ಖೊಟೊ!’’ ಮ್ಹಣೊನ್ ಖರ್ಶೆತಾ. ಚಲಿ ಆಸ್ತಲಿ ಗಾಂವಾಂತ್ಲಿ, ಫಿರ್ಗಜೆಂತ್ಲಿ, ವಾಡ್ಯಾಂತ್ಲಿ ಯಾ ಶೆಜಾರಾ ಘರಾಂತ್ಲಿ, ಪುಣ್ ತಿ ಚಲ್ಯಾಚ್ಯಾ ಚಿಂತ್ನಾಂ ವಿಶಾಂತ್ ಕಾಂಯ್ ನೆಣಾಂ. ತಾಚಿ ಆಶಾ, ತಾಚೊ ಮೋಗ್ ತಾಚ್ಯಾಚ್ ಮನಾಂತ್ಲಿ ಮಸ್ತಿ! ಪಾವ್ಸಾಂತ್ ಭಿಜ್ಲೆಲ್ಯಾ ಆಂಗಾಕ್ ಭಿಜ್ಲೆಲೆಂ ಆಂಗ್ಲೆಂ ಲಾಗ್ತಾನಾ ತಿಕಾ ಮತಿಚ್ಯಾ ದೊಳ್ಯಾಂನಿ ಪಳೆವ್ನ್ ಜಾಲ್ಲೆ ಆಟೆವಿಟೆ ಮಾತ್ರ್ ತಾಚೆ! ಚಿಂತಪ್ ಧೊಶಿ ದಿತಾ ಆಪ್ಲ್ಯಾ ಚಿಂತ್ಪ್ಯಾಕ್ ಮಾತ್!
ಮತಿಂತ್ಲೆ ಮತಿಂತ್ ಆಪ್ಣೆಂ ಆಶೆಲ್ಲೆಂ ಕಾಂಯ್ ಚುಕಿಚೆಂ ಜಾಲೆಂ? ಅಶೆಂ ಚಲೊ ಆಪ್ಲ್ಯಾ ಚಿಂತ್ನಾಂಚಿ ಫೊಡ್ಣಿಶಿ ಕರ್ತಾ. ತಾಣೆಂ ಚಿಂತ್ಲ್ಲೆಂ ಸಾರ್ಕೆ ಯಾ ಚೂಕ್ ಮ್ಹಣ್ ಕೊಣ್ಯಿ ಎಕ್ಲೊ ಮೊಲಾಧಿಕ್ ಸವಾಲ್ ವಿಚಾರಿತ್ ತರ್ ತ್ಯಾ ಸವಾಲಾಕ್ ತಾಣೆಂ ದಿಂವ್ಚಿ ಜಾಪ್ ಮೋಲ್ ನಾತ್ಲ್ಲಿ, ಮಾತಿಯೆ ಧುಳಿ ಸಾರ್ಕಿ ಮ್ಹಣ್ ತೊ ಚಿಂತಾ.
ಜಾಲೆಂ ಸವಾಲ್ ಮೊಡ್ಕಿ ಭಾಂಗಾರಾಚಿ
ಜಾಪ್ ಕಶಿ ಆವ್ಯಾ ಮಾತಿ?
ನವಾಲ್ ದಿಸ್ತಾತ್ ರಾಜಾಂವ್ ತುಜೆಂ
ಉತ್ರಾಂನಿಂಚ್ ಕಾಡಿನ್ ಕಾತಿ
ಸವಾಲ್ರಾಜಾಂವಿ ದಿಸತ್ ವಿಚಾರ್ತಲ್ಯಾಕ್ ಪುಣ್ ಆಪ್ಣಾಕ್ ನ್ಹಯ್, ಆಪ್ಲ್ಯಾ ಚಿಂತ್ನಾಂಚೆಂ ಬರೆಂವಾಯ್ಟ್ ವಿಚಾರ್ತಲ್ಯಾಚೊ ಆಪುಣ್ ಬರೊಚ್ ವಿಚಾರ್ ಕರ್ತಾಂ ಮ್ಹಣ್ ತೊ ಮ್ಹಣ್ಟಾ.
ಭಾಂಗ್ರಾ ಮೊಡ್ಕಿ ಫ಼ೊಡ್ಚಿ ಫ಼ೊಡುನ್
ಕಯ್ಲೆಂತುಲೊ ನಗ್ ಸೊಲಿನ್
ಕಾನ್ಪಾರ್ಯಾಚೊ ಸರ್ ಕರುನ್
ತುಜಾಚ್ ಗಳ್ಯಾಕ್ ಗುಂತುನ್ ಘಾಲಿನ್
ಸವಾಲಾಂಚೆ ಸತ್ರಾ ವಾಂಟೆ ಕರುನ್ ವಿಚಾರ್ತಲ್ಯಾಚ್ಯಾ ಗಳ್ಯಾಕ್ ಘಾಲ್ತಾಂ. ಮೊಲಾದಿಕ್ ಮ್ಹಣ್ ದಿಸ್ಚೆಂ ಸವಾಲ್ ಮೋಲ್ನಾತ್ಲ್ಲೆಂ ತಸಲೆಂ ಕರ್ತಾಂ ಆನಿ ತೆಂ ಸವಾಲ್ ವಿಚಾರ್ತಲ್ಯಾಕ್ಚ್ ಆಡ್ ರಾಂವ್ಚೆಬರಿ ಕರ್ತಾಂ ಮ್ಹಣ್ಚೊ ಚಲೊ ಮಾಗಿರ್ ವಿರಾರ್ ಜಾವ್ನ್ ದೆವಾಚಿ ಮಜತ್ ಮಾಗ್ತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications