ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 9. ಹಾಸೊ..... ಏಕ್ ಮಂಥನ್......!
ಮೆಲ್ವಿನ್ ಜೆ. ವಾಸ್
ದೆವಾಚಾ ರಚ್ನೆ ಪಯ್ಕಿ ಅತೀ ಊಂಚ್ ರಚ್ನೆಕ್, ಮನ್ಶಾಜಾತಿಕ್ ಸಮಾಧಾನ್ ಕೆದ್ನಾಂ ಮೆಳ್ತಾ? ಸವಾಲ್ ಭೋವ್ಶಾ ಭಾರಿಚ್ಚ್ ಸುಲಭ್ ಆನಿಂ ಜವಾಬ್ಯ್ ತಿತ್ಲ್ಯಾಚ್ ಸಸಾರಾಯೆಚಿ ಮ್ಹಣೊನ್ ಚಿಂತ್ಲ್ಯಾರ್ ಖಂಡಿತ್ ವ್ಹಡ್ಲಿ ಚೂಕ್. ಅಶೆಂ ಕಿತ್ಯಾಕ್?
ವ್ಹಯ್, ಹಾಂಗಾ ಥಾವ್ನ್ಂಚ್ ಮನ್ಶ್ಯಾಚಿ ಚಿಂತ್ಪಾ ಸಕತ್ ಚಿಂತುಂಕ್ ಆರಂಭ್ ಕರ್ತಾ. ಹಿಚ್ ಚಿಂತ್ಪಾ ಸಕತ್ ಮನ್ಶ್ಯಾಚಿ ರಾತಿಚಿ ನೀದ್ ದಿಸಾಚೆಂ ಸಮಾಧಾನ್ ಆಪ್ಲ್ಯಾ ವೆಂಗೆಂತ್ ಘೆವ್ನ್ ಖುದ್ದ್ ಕ್ರಿಯಾತ್ಮಕ್
creative ಜಾವ್ನ್ ಮತಿಚಾ ಎಕಾ ಕೊನ್ಶ್ಯಾಂತ್ ಬೊಸೊನ್ ಜೆಮ್ ಕಾಡ್ತಾ. ಆನಿ ಮನಿಸ್ ಬಾವ್ಡೊ ಚೊವೀಸ್ ವೊರಾಂಯ್ ಸಮಾಧಾನೆಕ್ ಸೊಧುನ್ ಭಂವ್ತಾ.
ಅಧ್ಯಾತ್ಮಿಕತೆಕ್ (spirituality) ಆಮ್ಚೊ ಭಾರತ್ ದೇಶ್ ನಾಂವಾಡ್ಲಾ ತರೀ ಹ್ಯಾಚ್ ಭಾರತಚಾ ನಾಗರಿಕಾಂಕ್ ಅಧ್ಯಾತ್ಮಿಕತೆಕ್ ಸಮ್ಜೊಂವ್ಕ್ ಭಾರಿಚ್ಚ್ ಕಷ್ಟ್. ಅಧ್ಯಾತ್ಮಿಕ್ ಜಾವ್ನ್ ಮನ್ಶಾಕ್ ಪಾರ್ಕುಂಚೆಂ ಭೋವ್ಚ್ ಸುಲಭಾಯೆಚೆಂ ಹಾತೆರ್ ಜಾವ್ನಾಸಾ ಹಾಸೊ. ಮನ್ಶ್ಯಾ ವೊಂಟಾ ವಯ್ಲ್ಯೊ ಹಾಸೊಚ್ ಸಗ್ಳ್ಯಾ ಮನ್ಶ್ಯಾಚಾ ಜಿವಿತಾಕ್ ಅಸ್ಪಷ್ಟ್ ರೂಪಾನ್ ದಾಖಯ್ತಾ.
ಮನಿಸ್ ಜೆದ್ನಾಂ ಚಿಂತುಂಕ್ ಆರಂಭ್ ಕರ್ತಾ ತೆದ್ನಾಂ ಆಪ್ಲಿ ಅಧ್ಯಾತ್ಮಿಕತಾ ಹೊಗ್ಡಾಯ್ತಾ. ಹಾಕಾ ಖರೆಂ ದೃಷ್ಟಾಂತ್ ದಿಂವ್ಚೆಂ ಜಾಲ್ಯಾರ್ ಜಳ್ಚಾ ಉಜ್ಯಾ ತೆವ್ಶಿಂ ಹಾಸೊನ್ ಹಾಸೊನ್ ಧಾಂವ್ಚೆಂ ನೆಣ್ತೆಂ ಬಾಳ್....!
ಅಜೂನ್ ಬಾಳಾನ್ ಚಿಂತುಂಕ್ ಆರಂಭ್ ಕರುಂಕ್ ನಾಂ ದೆಕುನ್ ಉಜ್ಯಾಕ್ ಪಳೆವ್ನ್ಯ್ ತಾಚ್ಯಾ ತೊಂಡಾರ್ ಹಾಸೊ. ಆನಿಂ ಹ್ಯೊ ಹಾಸೊಚ್ಚ್ ತೆಂ ನೆಣ್ತೆಂ ಬಾಳ್ ಅಧ್ಯಾತ್ಮಿಕ್ಪಣಾಂತ್ ಸಂಪೂರ್ಣ್ ಆಸಾ ಮ್ಹಳ್ಳ್ಯಾಚಿ ಸಾಕ್ಸ್ ದಾಖಯ್ತಾ....!
ತರ್ ಚಿಂತಾಪ್ ಕೆದ್ನಾಂ ಆರಂಭ್ ಜಾತಾ?
ತ್ಯಾಚ್ ನೆಣ್ತ್ಯಾ ಬಾಳಾಚೆಂ ಬೋಟ್ ಉಜ್ಯಾ ದಾವೆಕ್ ಭಾಜ್ತಾನಾ ಆಚಾನಾಕ್ ಬಾಳಾಚಿ ಮತ್ ತಾಚ್ಯಾ ಸಂಪೂರ್ಣ್ ಅಧ್ಯಾತ್ಮಿಕ್ಪಣಾಚಾ ಸಂಪೂರ್ಣಾತಾಯೆ ಥಾವ್ನ್ ಭಾಯ್ರ್ ಯೆತಾ ಆನಿಂ ಚಿಂತುಂಕ್ ಆರಂಭ್ ಕರ್ತಾ. ಹ್ಯಾ ಘಡಿಯೆ ಥಾವ್ನ್ ತೆಂ ಬಾಳ್ ಚಿಂತಾ, ಚಿಂತಾ ಆನಿ ಚಿಂತಾ. ಹಾಚೊಚ್ಚ್ ಪರಿಣಾಮ್ ಜಾವ್ನ್ ಬಾಳಾಚೊ ಹಾಸೊ ಮಾಯಾಗ್ ಜಾವ್ನ್ ಭಿರಾಂತೆಚೊ ಛಾರೊ ತೊಂಡಾರ್ ದಿಸೊನ್ ಯೆತಾ.
ಹೊಚ್ಚ್ ಛಾರೊ ಕ್ರಮೇಣ್ ಚಿಂತ್ಪಾ ಸಕತ್ ಚಡ್ತಾಂ ಆನಿ ವಾಡ್ತಾಂ ಚಡ್ ಚಡ್ ವಾಡೊನ್ ವಾಡಾವಳಿಕ್ ಪಾವ್ಲೆಲ್ಯಾ ತೊಂಡಾರ್ ಹಾಸೊ ಮ್ಹಳ್ಳ್ಯಾ ಮೊಲಾಧೀಕ್ ಮೊತಿಯಾಕ್ಚ್ ಮಾಯಾಗ್ ಕರಯ್ತಾ.
ಹ್ಯಾ ಸ್ಥಿತೆರ್ ಥಾವ್ನ್ ಪರ್ತ್ಯಾಕ್ ಪಾಟಿಂ ತ್ಯಾಚ್ ನೆಣಾರ್ಪಣಾಚಾ ಅಧ್ಯಾತ್ಮಿಕ್ಪಣಾಕ್ ಪಾವೊಂಕ್ ಕಿತೆಂ ಕರುಂಕ್ ಜಾಯ್? ತ್ಯಾಚ್ ಸೊಭಿತ್ ಹಾಸ್ಯಾಂಕ್ ಮನ್ಶಾ ವೊಂಟಾರ್ ಅಂಕ್ರೆವ್ನ್ ಪಾಲೆಂವ್ಕ್ ಕಶೆಂ ಸಾಧ್ಯ್? ಮತಿಕ್ ಪಾಟಿಂ ಘುಂವ್ಡಾಂವ್ಕ್ ಖಂಡಿತ್ ಸಾಧ್ಯ್ ನಾಂ. ತರ್?
Creativity ಯಾ ಸ್ರಜನಾಶೀಲತಾ ಎಕ್ಚ್ಚ್ ವಾಟ್. ಮನ್ಶಾ ಜಿವಿತ್ ಕ್ರಿಯಾತ್ಮಕ್ ರಿತಿರ್ ಬದ್ಲುಂಚೆಂ ಚಡ್ ಗರ್ಜ್. ಜರ್ ಮನ್ಶಾ ಜಿವಿತ್ ಸಂತೊಸಾನ್ ಕಾಡುಂಕ್ ಚ್ಯಾರ್ ದೀಸ್ ಕಾಮ್ ಕೆಲ್ಯಾರ್ ಪುರೊ ಮ್ಹಳ್ಳೆಂ ಕ್ರಿಯಾತ್ಮಕ್ ಚಿಂತಾಪ್ ಉಟ್ಲೆಂ ಜಾಲ್ಯಾರ್ ಹಪ್ತ್ಯಾಚಾ ಚ್ಯಾರ್ ದಿಸಾಂನಿಂ ಮನಿಸ್ ಕಾಮ್ ಕರ್ತಾ ಆನಿ ಉರ್ಲೆಲೆ ತೀನ್ ದೀಸ್ ಕ್ರಿಯಾತ್ಮಕ್ ಚಟುವಟಿಕೆನಿಂ ಮ್ಹಳ್ಯಾರ್ ಸಾಹಿತ್ಯ್ ರಚ್ಚೆಂ ಯಾ ವಾಚ್ಚೆಂ, ಸಂಗೀತ್ ಆಯ್ಕೊಂವ್ಚೆಂ ವಾ ವ್ಹಾಜಂವ್ಚೆಂ, ಭಂವ್ಡೆಕ್ ವೆಚೆಂ, ಆರಾಮ್ ಕರ್ಚೆಂ, ದರ್ಯಾ ವೆಳೆರ್ ಮಾಸ್ಳೆಕ್ ವೆಚೆಂ ಅಶೆಂ ಏಕೇಕ್ಚ್ಚ್ ಕ್ರಿಯಾತ್ಮಕ್ ಕ್ರಿಯೆಂತ್ ಮಗ್ನ್ ಜಾವ್ನ್ ತೆ ಉರ್ಲೆಲೆ ತೀನ್ ದೀಸ್ ಕಾಡ್ಚೆ.
ಹರ್ಯೇಕಾ ಕ್ರಿಯೆಕ್ ಪ್ರತಿಕ್ರಿಯಾ ಖಂಡಿತ್ ಆಸಾ. ಆನಿಂ ಹಿ ಪ್ರತಿಕ್ರಿಯಾ ತ್ಯಾ ಕ್ರಿಯೆಚ್ಯಾಕ್ಯ್ ಚಡ್ ಪ್ರಾಮುಖ್ಯತಾ ಘೆತಾ ಸೃಜನಶೀಲತಾ ಸಕ್ತೆಂತ್. ಹೊಚ್ಚ್ ಪ್ರಾಮುಖ್ಯತಾ ಮನ್ಶ್ಯಾ ಚಿಂತ್ಪಾ ಸಕ್ತೆಂತ್ ಸಂತೊಸಾಚಿ ಝರ್ ವ್ಹಾಳಯ್ತಾ.
ಕ್ರಿಯಾತ್ಮಕ್ ಸಂಗ್ತಿ ಕಿತ್ಲ್ಯೊ ವಾಡ್ತಾತ್ ತಿತ್ಲೆಂ ಮನ್ಶ್ಯಾ ಮತಿಕ್ ಸಮಾಧಾನ್ ಮೆಳ್ತಾ ಆನಿಂ ಹೆಂ ಸಮಾಧಾನ್ ಮನ್ಶ್ಯಾ ತೊಂಡಾರ್ ಹಾಸೊ ಜಾವ್ನ್ ಪ್ರತ್ಯಕ್ಷ್ ದಿಸ್ತಾತ್. ಆಶೆಂಚ್ ಮುಖಾರ್ಸುನ್ ವೆತಾನಾ ಮನಿಸ್ ಚಡ್ ಆನಿ ಚಡ್ ಕ್ರಿಯಾತ್ಮಕ್ ಜಾವ್ನ್ ಅಧ್ಯಾತ್ಮಿಕ್ಪಣಾಚಾ ಪಯ್ಲ್ಯಾ ಮೆಟಾರ್ ಪಾವ್ತಾ. ಹ್ಯಾ ಮೆಟಾರ್ ಮನಿಸ್ ಅಧ್ಯಾತ್ಮಿಕ್ ರಿತಿರ್ ಆನಿಂ ಸಂಸಾರಿ ರಿತಿರ್ ದೊನಾಂಯ್ತ್ಯೀ ಬರಾಬರ್ ಎಕಾಚ್ಚ್ ಹಂತಾಚಾ ಮತಿಚಾ ಸಮಾಧಾನೆಚಾ ವಾಡಾವಳಿರ್ ಆಸ್ತಾ. ಹಾಂಗಾ ಥಾವ್ನ್ ಆನೀಕ್ಯ್ ಮುಖಾರ್ಸುನ್ ಗೆಲೊ ಜಾಲ್ಯಾರ್ ತೊಚ್ಚ್ ಮನಿಸ್ ಸಂಸಾರಿ ಸುಖಾ ಥಾವ್ನ್ ಅಧ್ಯಾತ್ಮಿಕ್ ಸುಖಾ ತೆವ್ಶಿಂ ಚಡ್ ಮಾಲ್ವೊನ್ ನಿಮಾಣೆಂ ಅಧ್ಯಾತ್ಮಿಕತೆಚಾ ಶಿಖರಾಕ್ ಪಾವ್ತಾ. ಹ್ಯಾ ಶಿಖರಾ ಥಾವ್ನ್ ತಾಕಾ ಪಾಟಿಂ ನೆಣ್ತೆಂ ಬಾಳ್ ಜಾಂವ್ಕ್ ಜಾಯ್ನಾಂ ಜಾಲ್ಲ್ಯಾನ್ ತೊ ಸಗ್ಳೊ ಸಂತೊಸ್ ತ್ಯಾ ನೆಣ್ತ್ಯಾ ಬಾಳಾ ಮುಖಾಂತ್ರ್ ಸೊಧ್ತಾ ಆನಿ ತ್ಯಾಚ್ ಬಾಳಾಚೆ ಗೂಣ್ ಶೆಗುಣ್ ಪರೋಕ್ಷ್ ರಿತಿನ್ ಉಗ್ಡಾಪೆಂ ಕರ್ತಾ.
ಮನ್ಶಾ ಮತ್ ಆಜ್ ಅಂತರ್ಜಾಳಿ (internet) ಪರಿಂ ಜಾವ್ನ್ ಗೊಂದೊಳಾಯೆಂತ್ ಗೊಂದೊಳೊನ್ ಆಸ್ಲ್ಲ್ಯಾ ವಗ್ತಾ ಭೋವ್ಶಾ ಸೊಭಿತ್ ದೋನ್ ಹಾಸೊ ಪಳಂವ್ಕ್ ಜಾಯ್ ಜಾಲ್ಯಾರ್ ಖಂಡಿತ್ ಜಾವ್ನ್ ಖಂಯ್ಚಾಯ್ ನೆಣ್ತ್ಯಾ ಬಾಳಾಕ್ಚ್ ಸೊಧುನ್ ವಚೊಂಕ್ ಜಾಯ್ ಮ್ಹಳ್ಯಾರ್ ಚೂಕ್ ಜಾಂವ್ಚಿಂ ನಾಂ.
ಪುಣ್ ಮನ್ಶಾನ್ ಸಮಾಧಾನೆಚೊ ಹಾಸೊ ಆಪ್ಲ್ಯಾ ಜಿವಿತಾಂತ್ ಕಿರ್ಲಾಂವ್ಕ್ ಖಂಡಿತ್ ಅಧ್ಯಾತ್ಮಿಕತೆಚಾ ಉತ್ತುಂಗ್ ಶಿಖರಾಕ್ ಪಾವೊಂಕ್ ಜಾಯ್ ಮ್ಹಣೊನ್ ಖಂಡಿತ್ ನಾಂ. ಅಧ್ಯಾತ್ಮಿಕತೆಂತ್ ಮತಿಚೊ ಹಾಸೊ ಭಾಯ್ಲ್ಯಾನ್ ದಿಸಾನಾಂತ್ ಮತಿಚಾ ಉತ್ರಾಂನಿ ಮಾತ್ರ್ ಝಳ್ಕಾತಾತ್. ತೊಂಡಾಚೊ ಹಾಸೊ ಹ್ಯಾ ಉತ್ರಾಂಕ್ ಖಂಡಿತ್ ಸರಿ ಸಮಾ ನ್ಹಯ್ ತರೀ ಜಿವಿತಾಚೊ ಹಾಸೊ ತೊಂಡಾರ್ ಉದೆಂವ್ಚಾ ಛಾರ್ಯಾಕ್ ಖಂಡಿತ್ ಸರಿ ಸಮಾ.
ಹ್ಯಾ ಇತ್ಲ್ಯಾ ಮೊಲಾಧಿಕ್ ಹಾಸ್ಯಾಂ ಖಾತಿರ್ ಆಯ್ಚೊ ಮನಿಸ್ ಕೆದ್ನಾಂ
creative ಜಾತಲೊ? ಸಗ್ಳ್ಯಾ ಹಪ್ತ್ಯಾಂತ್ ಕೇವಲ್ ಏಕ್ಚ್ಚ್ ಘಂಟೊ
creative ಯಾ ಕ್ರಿಯಾತ್ಮಕ್ ಜಾವ್ನ್ ತ್ಯಾ ಕ್ರಿಯೆಚೆ ಪ್ರತಿಕ್ರಿಯಾ ಮನ್ಶಾ ಜಿವಿತಾಚಾ ಅಡ್ಚಣೆಂ ಸಗ್ಳ್ಯಾ ಹಪ್ತ್ಯಾಚಾ ಗೊಂದೊಳಾಯೆಂತ್, ಮತಿಚಾ ನಾ ಸಮಾಧಾನೆ ವಯ್ರ್ ಕಸಲೊ ಪರಿಣಾಮ್ ಹಾಡುಂಕ್ ಪಾವ್ತಾ ಮ್ಹಣೊನ್ ಸಮ್ಜಾತಾನಾ ಖಂಡಿತ್ ಜಾವ್ನ್ ಮನ್ಶ್ಯಾ ಜಿವಿತಾಚಿ ಸೃಜನಶೀಲತಾ ವೊರಾ ಥಾವ್ನ್ ವೊರಾಕ್ ವಾಡ್ತೆಲಿ ಆನಿ ಹರ್ಯೇಕ್ ಮನಿಸ್ ಆಪಾಪ್ಲ್ಯಾ ಜಾಗ್ಯಾರ್ ಸಮಾಧಾನೆಚೆಂ ಬೊಂದೆರ್ ಜಾವ್ನ್ ಹಾಸ್ಯಾಂಕ್, ಸೊಭಿತ್, ನಿತಳ್ ನಿರ್ಮಳ್ ತ್ಯಾ ನೆಣ್ತ್ಯಾ ಬಾಳಾ ಸಾರ್ಕ್ಯಾ ಹಾಸ್ಯಾಂಕ್ ಜಲ್ಮ್ ದಿತೆಲೆ ಮ್ಹಳ್ಳೊ ಮ್ಹಜೊ ಭರ್ವಸೊ.
ತ್ಯಾ ದೀಸ್ ಖಂಯ್ಚಾಯ್ ಆತ್ಮ್ಯಾಕ್ ಮನ್ಶಾ ಸಾಲ್ವಾಸಾಂವಾ ಖಾತಿರ್ ಅಧ್ಯಾತ್ಮಿಕಾಚಾ ತ್ಯಾ ಶಿಖರಾಕ್ ಪಾವೊನ್ ಶೆರ್ಮಾಂವ್ ದಿಂವ್ಚಿ ಖಂಡಿತ್ ಗರ್ಜ್ ನಾಂ. ಕಾರಾಣ್ ತ್ಯಾ ದೀಸ್ ಹೊ ಸಗ್ಳೊ ಸಂಸಾರ್ಚ್ ಸಮಾಧಾನೆಚಾ ಪಾಳ್ಣ್ಯಾಂತ್ ಧಲ್ತೊಲೊ. ಶಾಂತೆಚಿ ವಾತ್ ಝಳಯ್ತಾಲೊ. ಹಾಸ್ಯಾಂಚಿ ಲಾರಾಂ ಉಟಯ್ತಾಲೊ.
ಹ್ಯಾ ಖಾತಿರ್ ಮನ್ಶಾನ್ creative ಜಾಂವ್ಚೆಂ ಖಂಡಿತ್ ಗರ್ಜೆಚೆಂ. ಹೆಂ ಮ್ಹಜೆಂ ಸ್ವಪಾಣ್ ಜ್ಯಾರಿಂ ಜಾಂವ್ಕ್ ಹಾಂವೆಂ ಅಶೆಚ್ಚ್ ಕಿತ್ಲೆ ದೀಸ್ ಮೆಜ್ಚೆ ಪಡ್ತೆಲೆಂ?
ಮನ್ಶಾ ಜಾತಿನ್ ವಾವ್ರಾಕ್ ವೆಂಗುನ್ ನಿಮಾಣ್ಯಾ ನಿದೆಕ್ ವೆಂಗ್ತಾ ವರೇಗ್?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5, 6, 7, 8
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
