ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಅಂಕಣ್ಕಾರಾ ವಿಶ್ಯಾಂತ್
’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.
ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಕೊಂಕ್ಣಿ ಸೆವಾ, ಕೊಂಕ್ಣಿ ಸೆವಾ ಮ್ಹಣ್ ಹರ್ಧೆಂ ಬಡವ್ನ್ ಆಸ್ಚ್ಯಾ ಮನ್ಶಾಂಚಿಂಚ್ ಭುರ್ಗಿಂ ಕೊಂಕ್ಣಿ ಉಲಯ್ನಾಂತ್ಮೂ ಆಸ್ಟಿನಾಮಾ? [ಕೊಂಕ್ಣೊ, ದುಬಾಯ್].
ಗಜಾಲ್ ಬದಲ್ಲ್ಯಾ ಕೊಂಕ್ಣ್ಯಾ, ಆದಿಂ ಆವಯ್ ಬಾಪಾಯ್ನ್ ಸಾಂಗ್ಲ್ಲ್ಯಾಪರಿಂ ಭುರ್ಗಿಂ ಆಯ್ಕಾತಾಲಿಂ; ಆತಾಂ ಭುರ್ಗ್ಯಾಂನಿ ಸಾಂಗ್ಲ್ಲ್ಯಾಪರಿಂ ಆವಯ್-ಬಾಪಯ್ ಚಲ್ತಾತ್.
ಪಯ್ಲೆಂ ಕವಿಂಕ್ ಹಲ್ಕ್ ಕರ್ನ್ ಆಸ್ಲ್ಲೆ ಥೊಡೆ ಮ್ಹಾತಾರೆ ಆತಾಂ ಖುದ್ದ್ ಕವಿತಾ ಬರಂವ್ಕ್ ಲಾಗ್ಲ್ಯಾತ್ಮೂ? [ಸೆವ್ರಿನ್, ಶಿರ್ವಾಂ].
ಆಳೆ ಸೆವ್ರಿನಾ, ಆದಿಂ ತರ್ನಾಟಿಂ ಮಾತ್ರ್ ಮಾತ್ಯಾಕ್ ವಿಂಗಡ್ ಕಾಲೊರ್ ಘಾಲ್ತಾಲಿಂ. ಆತಾಂ ಪಳೆಲಾಂಯ್ವೆ? ಜಗ್ಗು ಪಡ್ಲ್ಲೆ ಮ್ಹಾತಾರೆ ಪರ್ಯಾಂತ್ ಕೇಸಾಂಕ್ ಕಾಲೊರ್ ಘಾಲ್ನ್ ಬಿಂದಾಸ್ ವೆತಾತ್; ಕಾಲ್ ಬದಲ್ಲಾ.
ಬ್ಯಾಂಗಳೊರ್ ಆಸ್ಲ್ಲೆಂ ಬೆಂಗಳೂರು ಜಾಲ್ಲೆಪರಿಂ ಅಮೆರಿಕಾ ನಾಂವ್ ಬದಲ್ಚೆಂ ತರ್ ಕಸಲೆಂ ಆಸ್ಯೆತ್? [ಕುಮಾದ್ರ್, ಕುಂದಾಪುರ್].
ತುಕಾ ಕೊಣೆಂ ಸಾಂಗ್ಲೆಂ ಕುಮಾದ್ರೆ ಆಮೆರಿಕಾಂತ್ ಪೆಂಕ್ಟಾಂತ್ ಬಳ್ ನಾಸ್ಲ್ಲೆ ಆಸಾತ್ ಮ್ಹಣ್ ತಸೆಂ ಪೂರಾ ನಾಂವಾಂ ಬದ್ಲುಂಕ್?
ಆಮ್ಚಾ ದೇಶಾಚೆಂ ಕ್ರಿಕೆಟ್ ಸುಧಾರ್ಚಿ ಆನಿ ಸುಣ್ಯಾಚಿ ಶಿಮ್ಟಿ ನೀಟ್ ಜಾಂವ್ಚಿ ಸಾಧ್ಯ್ ಆಸಾವೆ ಮಾಮಾ? [ಕುರ್ಪಾಣೊ, ಕುಪ್ಪೆಪದವು].
ಕಾಂಯ್ ತಾಂಚ್ಯಾ ಮಾತ್ಯಾರ್ ಕುರ್ಪಾಣೆ ದೀವ್ನ್ ತ್ಯಾ ಕ್ರಿಕೆಟ್ ಮೈದಾನಾರ್ ಧಾಂವ್ಡಾಯ್ಲೆಂ ಜಾಲ್ಯಾರ್ ಕಾಂಯ್ ತೆ ಸುಧಾರ್ತಿತ್ ಕೊಣ್ಣಾ! ಭಾರತಾಚೆಂ ನಾಂವ್ಚ್ಚ್ ಪಿಡ್ಡ್ಯಾರ್ ಕರ್ತಾತ್ ಹೆ.
ಆಜ್ಕಾಲ್ ಕಂಕ್ನಾಡಿ ಮೆಂಟಲ್ ಹಾಸ್ಪಿಟಲಾಂತ್ ಸಯ್ತ್ ಕೊಂಕ್ಣಿ ಕವಿತಾ ವಾಚ್ತಾತ್ಗಾ ಕಿತ್ಯಾಕ್ ಜಾವ್ಯೆತ್? [ಬೊನಾಬ್, ಕಂಕ್ನಾಡಿ].
ತುಂ ನೆಣಾಂಯ್ ಹೆಂ - ಕವಿತಾ ವಾಚ್ತಾನಾ ಜರ್ ತುಂ ಚೀತ್ ದೀವ್ನ್ ಆಯ್ಕಾಶಿ ಆನಿ ತಾಂತ್ಲಿ ಮಧುರತಾ ಜಾತಾ ತಿತ್ಲಿ ಮತಿಂತ್ ಘೆವ್ನ್ ತ್ಯಾ ಉತ್ರಾಂಚೊ ಅರ್ಥ್ ಸಮ್ಜಾಶಿ, ತುಕಾ ಮತಿಚಿ ಪಿಡಾ ಧಾಂವ್ಡಾಂವ್ಕ್ ಹೆಂ ಸಲೀಸ್ ಜಾಯ್ತ್. ತುಂ ಕೊಣಾಚೆರ್ ಉಜೊ ವೊಂಕ್ತಾಯ್ ಹಾಂವ್ ಕಿತೆಂ ಜಾಣಾಂ?
ಕೊಂಕ್ಣಿ ಬರವ್ಪಿ ಜಾಲ್ಲ್ಯಾ ಕರ್ಮಾಕ್ ಕೊಂಕ್ಣೆಂತ್ ಮೆಳ್ಚೊ ಪ್ರತಿಫಳ್ ಕಸಲೊ ಆಸ್ಟಿನಾಮಾ? [ಕೊ.ಲೆ ಮಂಗ್ಳುರ್]. (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಬರೇಂ ಜೆವಾಣ್ ಜೇವ್ನ್ ಘಾಣೆಡ್ಡ್ಯೊ ಪುಸ್ಕ್ಯೊ ಮಾರ್ಚ್ಯೊ ಆಯ್ಕಾಲಾಂಯ್ವೆ ತುಂವೆಂ? ಸಭಾರ್ ಕೊಂಕ್ಣಿ ಲೇಖಕಾಂಕ್ ಮೆಳ್ತಾ ತಿತ್ಲೆಂಚ್.
ಆದಾಂವ್ ಆನಿ ಏವೆಕ್ ಕಾಯ್ನ್ ಆನಿ ಆಬೆಲ್ ಮ್ಹಳ್ಳೆ ದೋಗ್ಚ್ ಪೂತ್ ಆಸ್ಲ್ಲೆ ತರ್ ಉಪ್ರಾಂತ್ಲಿ ಸಂತತಿ ಕಶಿಗಾ ವಾಡ್ಲಿ? [ದುಕೊರ್ ಬೊಸ್ತ್ಯಾಂವ್, ಅಬ್ಬಾಸಿಯಾ].
ಕೋಣ್ ಮ್ಹಣ್ತಾತ್ ಕಾಯ್ನ್ ಆವಯ್ಚ್ಯಾ ಆಂಗಾರ್ ಉಡ್ಲೊ ಮ್ಹಣ್; ಕೋಣ್ ಮ್ಹಣ್ತಾತ್ ಆದಾಂವ್ನ್ ಏವೆಕ್ ಪರತ್ ಗುರ್ವಾರ್ ಕೆಲೆಂ ಮ್ಹಣ್. ಕಿತೆಂ ಜಾಲ್ಯಾರೀ ತಿಂ ತಾಂಚೆ ಮಧೆಂಚ್ ಮೋಗ್ ಕರಿಲಾಗ್ಲಿಂ ಆನಿ ಸಂತತ್ ವಾಡಯ್ಲಿ ಮ್ಹಣ್ತಾತ್ ಆನಿ ಥೊಡೆ. ಕೋಣ್ ಸಾರ್ಕೊ ಹಾಂಗಾ - ಹಾಂವ್ ನೆಣಾಂ.
ಕ್ರಿಸ್ಮಸ್ ಗೊಟೊ ಭಾಂದುಂಕ್ ತುಮಿ ಮಂಗ್ಳುರಾಕ್ ಯೆತಾತ್ ಮ್ಹಣ್ ಆಯ್ಕಾಲೆಂ ವ್ಹಯ್ವೆ ಸಾಡ್ವಾಂನೊ? [ಜಿ.ಎಲ್.ಸಲ್ದಾಞ್].
ವ್ಹಯ್ ಸಲ್ದಾ~ಜ್ ಮಾಮಾ, ಹಾಂವ್ ದಸೆಂಬ್ರ್ ಪಂದ್ರಾ ಥಾವ್ನ್ ಜನೆರ್ ಪಂದ್ರಾ ಪರ್ಯಾಂತ್ ಮಂಗ್ಳುರಾಂತ್ ಆಸ್ತಲೊಂ. ಕಾಂಯ್ ತುಜಿಂ ಗಾಢ್ವಾಂ ಆಸ್ಲ್ಯಾರ್ ಗೊಟೊ ಬಾಂದ್ಯಾಂ; ಕಿತೆಂ ಮ್ಹಣ್ತಾಯ್?.
ಮೊರ್ತಚ್ ಗುಣಾಂಕ್ ಗಾಂವ್ಚೆ ಥೊಡೆ ಜೀವ್ ಆಸ್ತಾನಾ ಕಿತ್ಯಾಕ್ ಮೊನೆ ಆಸ್ಟಿನ್ ಅಂಕಲ್? [ಗಂಗು ಗಂಗೊಳ್ಳಿ].
ಜೀವ್ ಆಸ್ತಾನಾ ಗೂಣ್ ಗಾಯ್ಲ್ಯಾರ್ ತಾಂಚ್ಯಾ ನಾಂವಾಕ್ ಹರ್ಕತ್ ಯೆತಾ ಆನಿ ಮೆಲ್ಯಾ ಉಪ್ರಾಂತ್ ಗಾಣಾಂ ಗಾಯ್ಲ್ಯಾರ್ ಗಾಯ್ತೆಲ್ಯಾಂಚ್ಯಾ ನಾಂವಾಕ್ ಮಾನ್ ಮೆಳ್ತಾ; ಮೆಲ್ಲ್ಯಾ ಮೊಶಿಕ್ ದೂಧ್ ಚಡ್ ಮ್ಹಳ್ಳೆಂ ನೆಣಾಂಯ್ಗಿ ಕಿತೆಂ?
ಹಾಂಗಾ ಥೊಡೆ ಪೆಪರಾಂನಿ ಸಾಂತಾಪರಿಂ ಬರಂವ್ಚೆ ಚೊರ್ಯೆಂತ್ ಸೊರೊ ಉಕಡ್ತಾತ್ಮೂ? [ಬಾಲ್ಚಾಟ್ ಬಾತ್ತು, ಕುವೇಯ್ಟ್].
ಸೊರೊ ಉಕಡ್ಲ್ಲ್ಯಾಂತ್ ಕಿತೆಂ ಬಾಧಕ್ ಆಸಾ? ಧರ್ಲ್ಯಾರ್ ಮಾತ್ರ್ ನ್ಹಂಯ್ಗಿ ತಾಂಚ್ಯಾ ನಾಂವಾಕ್ ಕಳಂಕ್ ಯೆಂವ್ಚೆಂ? ತುಕಾ ಪೆಗ್ ಮಾರುಂಕ್ ಕಾಂಯ್ ಆಪಂವ್ಕ್ ನಾಂಗಿ ಕಿತೆಂ ಬಲ್ಚಟಾ?
ಅಪುಟ್ ಕೊಂಕ್ಣೆಚೆ ಸಬ್ಧ್ ಆತಾತಾಂ ಥೊಡ್ಯಾಂಕ್ ಅಥ್ವೆ ಲಾಗೊಂಕ್ ಲಾಗ್ಲ್ಯಾತ್ಮುಂಗಾ - ಕಸಲಿ ಫಜಿಂತ್ ಹಿ? [ಪೊಕಾ ಸಿಕೇರ್, ಪಕ್ಶಿಕೆರೆ] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ತೆಂ ತಸೆಂಚ್ ಪೊಕಾ, ದೆಖುನ್ಂಚೆ ನಂಯ್ಗಿ ಥೊಡೆ ಕಾಜಾರಿ ಬಾಯ್ಲ್ ಆಸ್ತಾನಾಂಯ್ ಸೆಜಾರ್ನಿಲಾಗಿಂ ಮೀರಯ್ತಾತ್ ಆನಿ ತಾಂಚಿ ದೋಯ್ ಹೆರಾಂಚಾ ಕುಂಡ್ಲ್ಯಾಂತ್ ಖಿರಯ್ತಾತ್?.
ಸಂಸಾರಾಂತ್ ಹೆರ್ ದೇಶಾಂಕ್ ವಿಜಿಟ್ ವೀಜಾ ಮೆಳ್ಚೆಪರಿಂ ಸರ್ಗಾ-ಯೆಮ್ಕೊಂಡಾಕ್ಯೀ ವಿಜಿಟ್ ವಿಜಾ ಮೆಳ್ಳಿ ತರ್? [ಕುವಾಳೊ ಕಾತ್ರಿನ್, ಕಟ್ಪಾಡಿ]
ತುಕಾ ಕೊಣೆಂ ಸಾಂಗ್ಲೆಂ ಮೆಳಾನಾ ಮ್ಹಣ್? ಪೆದ್ರು ಆತಾಂ ಭಾರಿಚ್ ಸ್ಟ್ರಿಕ್ಟ್ ಜಾಲಾ ಖಂಯ್! ಸರ್ಗಾರ್ ಬರ್ಯಾ ಥರಾನ್ ಜಿಯೆನಾ ಜಾಲ್ಯಾರ್ ತೊ ತಾಂಕಾಂ ವೀಜಾ ದೀವ್ನ್ ಆತಾಂ ಯಮ್ಕೊಂಡಾಕ್ ಧಾಡ್ತಾ ಮ್ಹಣ್ ಮ್ಹಾಕಾ ಕಾಲ್ಚ್ಚ್ ಈ-ಮೇಯ್ಲ್ ಆಯ್ಲಾಂ!
ಕೊಂಕ್ಣಿ ಆಮ್ಚಿ ಭಾಸ್ ಗ್ರೇಸ್ತ್ ಮ್ಹಣ್ತಾತ್; ತರ್ ಕೊಂಕ್ಣಿ ಬರಯ್ಣಾರ್ ದುಬ್ಳೊಚ್ಚ್ ಜಾವ್ನ್ ಉರ್ತಾ ಕಿತ್ಯಾಕ್ ಸಾಂಗ್ಶಿಗಿ ಆಸ್ಟಿನಾಬಾ? [ಪ್ರಸನ್ನ್, ನಿಡ್ಡೋಡಿ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಕೊಂಕ್ಣೆಚಿಂ ಸಾಹಿತಿಕ್ ಮೌಲ್ಯಾಂ ಗ್ರೇಸ್ತ್ ಆಸ್ತಿತ್; ಪುಣ್ ತಿ ಭಾಸ್ ಬರವ್ನ್, ವಾಪರ್ನ್, ವೃದ್ಧಿ ಕರ್ಚೆ ಲೇಖಕ್ ಮಾತ್ರ್ ಸಭಾರ್ ದುರ್ಬಳೆ ಜಾವ್ನ್ ರಾವ್ಲ್ಯಾತ್. ಹಾಕಾ ಮುಖ್ಯ ಕಾರಣ್ ಕೊಂಕಣಿಕ್ ಆಸಾತ್ ಪಾಂಚ್ ಲಿಪಿ! ವಾಚಕ್ ವೃಂದ್ ಘುಸ್ಪಡ್ಲಾ ಆನಿ ತಾಂತಾಂಚ್ಯಾಚ್ ಪಂಗ್ಡಾಂತ್ ಉರ್ಲಾ.
ಸಂಸರಾರ್ ವಸ್ತುರಾಚೆಂ ಫ್ಯಾಶನ್ ಯೆಂವ್ಚೆ ಖಾತಿರ್, ದೆಂವ್ಚಾರಾನ್ ಸರ್ಪಾಚೆ ರೂಪ್ ಘೆವ್ನ್ ಏವೆಕ್ ನಾಡ್ಲೆಂ. ಆತಾಂ ಹೆಂ ಪ್ರಯತನ್ ಬೆಕಾರ್ ಜಾವ್ನ್ ಯೆಂವ್ಚೆಬರಿ ದಿಸ್ತಾಮೂ ಹಾಕಾ ಕಾರಣ್ ಕಿತೆಂ ಆಸ್ಟಿನ್ ಮಾಮಾ? [ಬಿಂದು, ಬೆಂದುರ್].
ಏವೆಕ್ ಕೊಣೆಂಚ್ ನಾಡುಂಕ್ ನಾ ಬಿಂದು, ಏವ್ ಆದಾಂವ್ಚಿ ವಿಣ್ಗಿ ಕೂಡ್ ಪಳೆವ್ನ್ ಹೆಂ ಕಿತೆಂ, ತೆಂ ಕಿತೆಂ ಮ್ಹಣ್ ವಿಚಾರುಂಕ್ ಲಾಗ್ಲಿ ಆನಿ ತಾಚ್ಯಾ ಮೊಗಾರ್ ಪಡ್ಲಿ!
ಆಪ್ಲ್ಯಾ ಭುರ್ಗ್ಯಾಂಕಡೆ ಘರಾ ಸಯ್ತ್ ಇಂಗ್ಲಿಷ್ ಉಲವ್ನ್ ಇಸ್ಕೊಲಾಂನಿಂ ಲೊಕಾಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಶಿಕಂವ್ಕ್ ಪೆಚಾಡ್ಚ್ಯಾ ಮಾನಯಾಂಕ್ ಕಿತೆಂ ಮ್ಹಣ್ತಾಯ್ ಆಸ್ಟಿನಾಮಾ? [ಕೊಂಕ್ಣೊ, ದುಬಾಯ್].
ಸೆಮಿನರಿ ಥಾವ್ನ್ ಪಾಟಿಂ ಆಯಿಲ್ಲೊ ಲೋಕ್ ತೊ. ತಾಣಿಂ ಹೆರಾಂಕ್ ಮಾತ್ರ್ ಅಸೆಂ-ತಸೆಂ ಕರಾ ಮ್ಹಣ್ ಸಾಂಗ್ಚೆಂ ಆನಿ ಆಪ್ಣೆಂ ಬೊಲ್ತಿಚ್ಚ್ ವಾಟ್ ಧರ್ಚಿ.
ಪಾದ್ರಿ ಲೊಕಾಂಕ್ ಶೆರ್ಮಾಂವಾಂತ್ ’ಮೋಗ್ ಕರಾ ಎಕಾಮೆಕಾಚೊ’ ಮ್ಹಳ್ಳೊ ಉಪಾದೆಸ್ ದಿತಾತ್ ಪುಣ್ ತಾಂಚಾ ದುಸ್ಮನಾಂಕ್ ಕಿತ್ಯಾಕ್ ಭಗ್ಸಿನಾಂತ್ಗಾ? [ಅಸ್ಕತ್ ಪಿಲೊ, ಮಸ್ಕತ್].
ತಾಣಿಂ ಸಾಂಗ್ಚೆಂ ಮಾತ್ರ್, ಕರ್ಚೆಂ ಹಾಂವೆ ಆನಿ ತುಂವೆಂ. ತಾಣಿಂ ಸಾಂಗ್ಲ್ಲ್ಯಾಪರಿಂ ತಾಣಿಂ ಏಕಾಮೆಕಾಚೊ ಮೋಗ್ ಕೆಲ್ಯಾರ್ ಕಿತ್ಲ್ಯೊ ಆಂಕ್ವಾರ್ ಶಿಕ್ಷಕಿ ಗುರ್ವಾರ್ ಜಾಂವ್ಕ್ ಆಸಾತ್ ತೆಂ ತುಂ ಜಾಣಾಂಯೆ?
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ ಹಾಪ್ತ್ಯಾಳೆಂ’
ಪ್ರಸನ್ನ್, ನಿಡ್ಡೋಡಿ
’ದಿವೊ ಹಾಪ್ತ್ಯಾಳೆಂ’
ಪೊಕಾ ಸಿಕೇರ್, ಪಕ್ಶಿಕೆರೆ
’ಸೆವಕ್ ಮಯ್ನ್ಯಾಳೆಂ’
ಕೊ.ಲೆ.ಮಂಗ್ಳುರ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
