ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಗ್ಯಾಸ್ಟ್ರಿಕ್ ಆನಿ ಗ್ಯಾಸಾಚೊ ಸಮಸ್ಸೊ.
* ಮ್ಹಜಿ ಪ್ರಾಯ್ 42 ವರ್ಸಾಂ. ಮ್ಹಾಕಾ ಪಾಟ್ಲ್ಯಾ ಜಾಯಿತ್ತ್ಯಾ ತೆಂಪಾಥಾವ್ನ್ ಗ್ಯಾಸ್ಟ್ರಿಕ್ ಸಮಸ್ಸೊ ಆಸಾ. ಕಿತೆಂಯ್ ವಾಯಾಚೆಂ ಖೆಲ್ಯಾರ್ ಪೊಟಾಂತ್ ಭೊರ್ಲ್ಲೆಪರಿಂ ಜಾತಾ. ಹಾತಾ-ಪಾಂಯಾಚ್ಯಾ ಗಾಂಟಿಂನಿ ದೂಕ್ ಯೆತಾ. ಮಸ್ತು ಇಂಗ್ಲಿಶ್ ಒಕತ್ ಆನಿ ಆಯುರ್ವೇದ್ ಒಕತ್ ಘೆತ್ಲ್ಯಾರ್ಯಿ ಮ್ಹಜೊ ಸಮಸ್ಸೊ ಪರಿಯಾರ್ ಜಾಲ್ಲೊ ನಾ. ವ್ಹಡ್ ಆಸ್ಪತ್ರೆಕ್ ಗೆಲ್ಲ್ಯಾಕ್ ಪೊಟಾಭಿತರ್ ಲಾಯ್ಟ್ ಘಾಲ್ನ್ ಪಳೆಜೆ ಮ್ಹಣ್ ಸಾಂಗ್ಲೆಂ.. ಮ್ಹಾಕಾ ತಶೆಂ ಕರುಂಕ್ ನಾಕಾ.
- ಎಮ್.ಎಮ್. ಮಂಗ್ಳುರ್.
ಪೊಟಾಂತ್ ಭೊರ್ಲ್ಲೆಪರಿಂ ಜಾಂವ್ಚೆಂ, ಭುಕ್ ನಾಸ್ಚಿ, ದೆಂಕ್ ಯೆಂವ್ಚೆ, ಹಾಗ್ಣೆಂತ್ಲ್ಯಾನ್ ಚಡ್ ವ್ಹಾರೆಂ ವೆಚೆಂ ಹೆಂ ಸಕ್ಕಡ್ ಗ್ಯಾಸ್ಟ್ರಿಕ್ ಸಮಸ್ಸೊ ಮ್ಹಣ್ ಥೊಡ್ಯಾಂನಿ ಲೆಕ್ಲ್ಯಾರ್ ಪೆಂಕ್ಟಾಂತ್, ಹಾತಾ-ಪಾಂಯಾಚ್ಯಾ ಗಾಂಟಿಂನಿ ಸುಜ್ ಆನಿ ದುಕಿಕ್ ಗ್ಯಾಸ್ಟ್ರಿಕ್ ಸಮಸ್ಸೊ ಮ್ಹಣ್ ಲೆಕ್ಚಿಂಯ್ ಆಸಾತ್. ಪೊಟಾಂತ್ಲೆಂ ವ್ಹಾರೆಂ ಪೆಂಕ್ಟಾಂತ್ ವಾ ಹಾತಾ-ಪಾಂಯಾಂಚ್ಯಾ ಗಾಂಟಿಂನಿ ವಚೊನ್ ರಾವೊನ್ ದೂಕ್ ಉಬ್ಜಯ್ತಾ ಮ್ಹಣ್ ಸಮ್ಜುನ್ ದುಕಿಚ್ಯಾ ಸಮಸ್ಸ್ಯಾಂಕ್ ಗ್ಯಾಸ್ಟ್ರಿಕ್ ಸಮಸ್ಸೊ ಮ್ಹಣ್ ಸಾಂಗ್ಚೆಂ ಆಸ್ತಾ. ಹಾತಾ-ಪಾಂಯಾಚ್ಯಾ ಗಾಂಟಿಂನಿ ಯೆಂವ್ಚಿ ದೂಕ್ ಗ್ಯಾಸ್ಟ್ರಿಕ್ ಸಮಸ್ಸ್ಯಾ ಥಾವ್ನ್ ನ್ಹಯ್. ಜಾಯಿತ್ತೆಪಾವ್ಟಿಂ ಹಾತಾಂ-ಪಾಂಯಾಚ್ಯಾ ದುಕಿಕ್ ಘೆಂವ್ಚ್ಯಾ ಒಕ್ತಾಂಥಾವ್ನ್ ಪೊಟಾಂತ್ ಹುಲೊಪ್ ಉಬ್ಜೊಂಕ್ ಸಾಧ್ಯ್ ಆಸಾ.
ವಯ್ಜಕೀಯ್ ಥರಾನ್ ಗ್ಯಾಸ್ಟ್ರಿಕ್ ಸಮಸ್ಸೊ ಫಕತ್ ಜಿರ್ವಣೆಚ್ಯಾ ಭಾಗಾಂಕ್ ಲಗ್ತಿ ಏಕ್ ಸಾಮಾನ್ಯ್ ಸಮಸ್ಸೊ. ದೆಂಕ್ ಯೆಂವ್ಚೆಂ, ವ್ಹಾರೆಂ ಭೊರ್ಚೆಂ ವಾ ವೆಚೆಂ, ಪೆಂಕ್ಟಾಂತ್ ವಾ ಹಾತಾ-ಪಾಂಯಾಚ್ಯಾ ಗಾಂಟಿಂನಿ ದೂಕ್ ಯೆಂವ್ಚಿ ಗ್ಯಾಸ್ಟ್ರಿಕ್ ಸಮಸ್ಸ್ಯಾ ಥಾವ್ನ್ ನ್ಹಯ್. ಗ್ಯಾಸ್ ಭರ್ಚ್ಯಾಕ್ ವಾ ವೆಚ್ಯಾಕ್ ಆನಿ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಕಿತೆಂಚ್ ಲಗ್ತಿ ನಾ. ಆಮ್ಚ್ಯಾ ಲೊಕಾಂ ಮಧೆಂ ಗ್ಯಾಸ್ಟ್ರಿಕ್ ಸಮಸ್ಸೊ ಮ್ಹಣ್ ಚಾಲ್ತೇರ್ ಆಸ್ಚ್ಯಾ ಸಮಸ್ಸ್ಯಾಕ್ ಆನಿ ನೀಜ್ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಜಾಯಿತ್ತೊ ತಫಾವತ್ ಆಸಾ.
ಆಮಿ ಸೆವ್ಲ್ಲೆಂ ಖಾಣ್ ತೊಂಡಾಥಾವ್ನ್ ಖಾಣಾಚ್ಯಾ ನಳಿಯೆ ಮುಕಾಂತ್ರ್ ಖಾಣಾಕೋಶಾಕ್ ವೆತಾ. ಖಾಣಾಕೋಶಾಕ್ ವಯ್ಜಕೀಯ್ ನಾಂವ್ ’ಗ್ಯಾಸ್ಟರ್’ ಮ್ಹಣ್. ಥೊಡ್ಯಾ ನಿರ್ದಿಶ್ಟ್ ಕಾರಣಾಂನಿ ಖಾಣಾ-ಕೋಶಾಚೆ ಭಿತರ್ ಆಸ್ಚ್ಯಾ ನಾಜೂಕ್ ಭಾಗಾಂನಿ ಹುಲೊಪ್ (inflammation) ಉಬ್ಜತಾ. ಹುಲೊಪ್ ಉಬ್ಜಂವ್ಚ್ಯಾಕ್ ಗ್ಯಾಸ್ಟ್ರಯ್ಟೀಸ್ ಮ್ಹಣ್ ನಾಂವ್. ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಚಿಂ ಸ್ವಶ್ಟ್ ಖುಣಾಂ ಆಸ್ತಾತ್.
ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಜಾಯಿತ್ತಿಂ ಕಾರಣಾಂ ಆಸ್ತಾತ್. ಥೊಡ್ಯಾ ಜಣಾಂಕ್ ಸದಾಂಚೆಪ್ರಾಸ್ ಮಾತ್ಸೆಂ ತೀಕ್ ವಾ ಆಮ್ಸಾಣ್ ಚಡ್ ಜಾಲ್ಯಾರ್ ಪೊಟಾಂತ್ ಹುಲೊಪ್ ಸುರು ಜಾತಾ. ಹೆರ್ ಥೊಡ್ಯಾಂಕ್ ಆಮಾಲ್ ವಸ್ತ್ ಸೆವ್ಲ್ಯಾರ್, ನಿರ್ದಿಶ್ಟ್ ಥೊಡಿಂ ಒಕ್ತಾಂ ಘೆತ್ಲ್ಯಾರ್ ಪೊಟಾಂತ್ ಹುಲೊಪ್ ಉಬ್ಜುಂಕ್ ಸಾದ್ಯ್ ಆಸಾ. ಜಾಯಿತ್ತ್ಯಾ ಜಣಾಂಕ್ ದೂಕ್ ಉಣಿಂ ಕರ್ಚಿಂ ಒಕ್ತಾಂ ಸೆವ್ಲ್ಲೆಂಚ್ ಗ್ಯಾಸ್ಟ್ರಯ್ಟೀಸ್ ಜಾವ್ನ್ ಪೊಟಾಂತ್ ಹುಲೊಪ್, ಭುಕ್ ನಾಸ್ಚಿ, ವೊರೊಡ್ ಸುರು ಜಾತಾ. ಅಶೆಂ ಖಂಚ್ಯಾ ವಸ್ತು ಥಾವ್ನ್ ಪೊಟಾಂತ್ ಹುಲೊಪ್ ಉಬ್ಜತಾ ತಸಲಿ ವಸ್ತ್ ಆಡಾಯ್ಲ್ಯಾರ್ ಸಮಸ್ಸೊ ಉಬ್ಜನಾ. ನಿರ್ದಿಶ್ಟ್ ಕಾರಣ್ ಆಸುನ್ ಥೊಡೊ ವೇಳ್ ಮಾತ್ರ್ ಧೊಸ್ಚ್ಯಾ ಸಮಸ್ಸ್ಯಾಕ್ ತಕ್ಷಣಾಚಿ ಗ್ಯಾಸ್ಟ್ರಿಕ್ ಹುಲೊಪ್ (acute gastritis) ಮ್ಹಣ್ ನಾಂವ್ ಆಸಾ. ಹ್ಯಾ ಥರಾಚೊ ಸಮಸ್ಸೊ ಆಸ್ಲ್ಲ್ಯಾಂನಿ ಖಾಣಾ ಜೆವ್ಣಾಂತ್ ಚತ್ರಾಯ್ ಘೆತ್ಲ್ಯಾರ್ ಪಾವ್ತಾ. ಪೊಟಾಂತ್ ಹುಲೊಪ್ ಉಬ್ಜುಂಚೊ ಸಮಸ್ಸೊ ಅಪ್ರೂಪ್ ವಾ ಖಾಣಾ-ಜೆವ್ಣಾಥಾವ್ನ್ ಯೆತಾ ತರ್ ತ್ಯಾ ವೆಳಾರ್ ಮಾತ್ರ್ ಏಕ್ ವಾ ದೋನ್ ದೀಸ್ ನಿರ್ದಿಶ್ಟ್ ಥೊಡಿಂ ಒಕ್ತಾಂ ಘೆವ್ನ್ ಸಮಸ್ಸೊ ಆಡಾಯ್ವೆತಾ.
ಥೊಡ್ಯಾಂಥಂಯ್ ಖಾಣ್-ಜೆವ್ಣಾಕ್ ಕಿತೆಂಯ್ ಲಗ್ತಿ ನಾಸ್ತಾಂ ಪೊಟಾಂತ್ ಹುಲೊಪ್, ಭುಕ್ ನಾಸ್ಚಿ, ಪೋಟ್ ಭರ್ಲ್ಲೆಪರಿಂ ಜಾಂವ್ಚೆಂ ಅಸಲ್ಯೊ ದೊಶಿ ತವಳ್ ತವಳ್ ವಾ ಸದಾಂಯ್ ಮ್ಹಳ್ಳೆಪರಿಂ ಆಸ್ತಿತ್. ಹ್ಯಾ ಥರಾಚ್ಯಾ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಲಾಂಬ್ ಕಾಳ್ ದೊಸ್ಚೊ ಗ್ಯಾಸ್ಟ್ರಿಕ್ ಸಮಸ್ಸೊ (chronic gastritis) ಮ್ಹಣ್ ನಾಂವ್. ಲಾಂಬ್ ಕಾಳ್ ಧೊಸ್ಚ್ಯಾ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಥೊಡಿಂ ಕಾರಣಾಂ ಆಸಾತ್. ಹೆಪಯ್ಕಿಂ ಖಾಣಾಕೋಶಾಂತ್ ಆಸ್ಚೆ ಹೆಲಿಕೊಬ್ಯಾಕ್ಟರ್ ಪೈಲೋರಿ ನಾಂವಾಚೆ ಬ್ಯಾಕ್ಟೀರಿಯಾ ಪ್ರಮುಕ್ ಕಾರಣ್. ಖಾಣ್-ಪೀವನಾ ಮುಕಾಂತ್ರ್ ವಾ ತಸಲಿಂ ಬೆಕ್ಟೀರಿಯಾಂ ಆಸ್ಚ್ಯಾ ವ್ಹಡಾಂಥಾವ್ನ್ ಲ್ಹಾನ್ ಪ್ರಾಯೆರ್ಚ್ ಹಿಂ ಬೆಕ್ಟೀರಿಯಾಂ ಜಿರ್ವಣೆಚ್ಯಾ ಭಾಗಾಂಕ್ ಪಾವ್ತಾತ್ ಆನಿ ವಾಡಾವಳೆಚ್ಯಾ ವೆಳಾರ್ ಸಮಸ್ಸೊ ಉಬ್ಜಯ್ತಾತ್.
ಹ್ಯಾ ಶಿವಾಯ್ ಥೊಡ್ಯಾಂಥಂಯ್ ಅನ್ಕಿಟೆಚೊ ಸುರ್ವಿಲೊ ಭಾಗ್ ವಾ ಡಿಯೋಡಿನಮ್ ಥಾವ್ನ್ ಪೀಂತ್ ಖಾಣಾಕೋಶಾಕ್ ಪಾಟಿಂ ಮಾರ್ಚೆಂ (bile reflux), ನಿರ್ದಿಶ್ಟ್ ಕಾರಣ್ ನಾಸ್ತಾಂ ಖಾಣಾಕೋಶಾ ಭಿತರ್ ಪ್ರತಿರೋದ್ಹುಲೊಪ್ ಉಬ್ಜೊಂಚಿ (autoimmunity), ಖಾಣಾ-ಪೀವನಾಕ್ ಎಲರ್ಜಿ ಜಾಂವ್ಚಿ, ಚಡ್ ತೇಂಪ್ ದೂಕ್ ಉಣಿಂ ಕರ್ಚಿಂ ವಾ ಹೆರ್ ಒಕ್ತಾಂ ಸೆವುನ್ ಆಸ್ಚೆಂ ಲಾಂಬ್ ಕಾಳಾಚೆ ವಾ ತವಳ್ ತವಳ್ ದೊಶಿ ದಿಂವ್ಚ್ಯಾ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಕಾರಣ್ ಜಾವ್ಯೆತ್. ಹ್ಯಾ ಕಾರಣಾಂನಿ ಅಸ್ವಸ್ತ್ ಜಾಲ್ಲ್ಯಾ ಖಾಣಾಕೋಶಾಂತ್ ಬೆಕ್ಟೀರಿಯಾಂ ಥಾವ್ನ್ ಗ್ಯಾಸ್ಟ್ರಯ್ಟೀಸ್ ಜಾಂವ್ಕ್ ಸಾಧ್ಯ್ ಆಸಾ.
ಲಾಂಬ್ ಕಾಳ್ ಧೊಸ್ಚ್ಯಾ ಗ್ಯಾಸ್ಟ್ರಯ್ಟೀಸ್ ಸಮಸ್ಸೊ ಖಂಯ್ಚ್ಯಾ ಕಾರಣಾನ್ ಮ್ಹಳ್ಳೆಂ ನಕ್ಕಿ ಕರುಂಕ್ ಆನಿ ಜೊಕ್ತಿ ಚಿಕಿತ್ಸಾ ದೀಂವ್ಕ್ ಥೊಡಿ ತಪಾಸ್ಣಿ ಗರ್ಜ್ ಆಸ್ತಾ. ಹೆಪಯ್ಕಿಂ ತೊಂಡಾಥಾವ್ನ್ ಏಕ್ ಅಶೀರ್ ನಳಿಯೆಕ್ ಲಾಗೊನ್ ಆಸ್ಲ್ಲೊ ಉಜ್ವಾಡ್ ಭಿತರ್ ಘಾಲ್ನ್ ಖಾಣಾಕೋಶ್ ಪಳೆಂವ್ಕ್ ಸಾಧ್ಯ್ ಆಸಾ. ಹ್ಯಾ ತಪಾಸ್ಣೆಕ್ ಎಂಡೋಸ್ಕೋಪಿ ಮ್ಹಣ್ ನಾಂವ್. ಎಂಡೋಸ್ಕೊಪಿ ಕರ್ತನಾಂಚ್ ಸಮಸ್ಸ್ಯಾಚೆಂ ಕಾರಣ್ ಸೊಧುನ್ ಕಾಡ್ಚೆ ಖಾತಿರ್ ಗರ್ಜ್ ಮ್ಹಣ್ ದಿಸ್ಲ್ಯಾರ್ ಲ್ಹಾನ್ ಭಾಗ್ ಕಾಡ್ನ್ ತಪಾಸ್ಣೆಕ್(ಬಯೋಪ್ಸಿಕ್) ಧಾಡುಂಕ್ ಜಾತಾ. ಲಾಂಬ್ ಕಾಳಾಚೊ ಸಮಸ್ಸೊ ಅಪ್ರೂಪ್ ಕೆನ್ಸರಾಕ್ ಬದ್ಲುನ್ ವೆಚಿ ಸಾಧ್ಯತಾಯ್ ಆಸಾ. ಎಂಡೋಸ್ಕೊಪಿ ಕರ್ತನಾ ಹೆಲಿಕೋಬ್ಯಾಕ್ಟರ್ ಪೈಲೋರಿಚ್ಯಾ ತಪಾಸ್ಣೆಕ್ಯಿ ಅವ್ಕಾಸ್ ಆಸಾ. ಎಂಡೋಸ್ಕೊಪಿ ಸಲೀಸಾಯೆನ್, ಜಾಯಿತ್ತೆಪಾವ್ಟಿಂ ಆಸ್ಪತ್ರೆಂಕ್ ದಾಕಲ್ ಜಾಯ್ನಾಸ್ತಾಂ ಕರುಂಕ್ ಜಾತಾ. ಕಿತೆಂಚ್ ಭಿಯೆಂವ್ಚಿ ಗರ್ಜ್ ನಾ.
ಆಮ್ಶೆಂ-ತಿಕ್ಶೆಂ ಖಾಣ್ ಸೆವ್ಲ್ಯಾರ್, ಆಮಾಲ್ ಪಿಯೊಣೆಂ ಪಿಯೆಲ್ಯಾರ್ ಜಾಯಿತ್ತ್ಯಾಂಕ್ ಪೊಟಾಂತ್ ಹುಲೊಪ್, ವೊರೊಡ್ ಆನಿ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಚಿಂ ಹೆರ್ ಖುಣಾಂ ದಿಸುನ್ ಯೆತಾತ್. ತಾಂಣಿಂ ಸಮ ಸ್ಸ್ಯಾಕ್ ಪ್ರೇರಣ್ ಜಾಂವ್ಚೆ ವಸ್ತು ಸೆಂವ್ಚೆಂ ಆಡಾಂವ್ಚೆಂ ಒಕ್ತಾಂ ಘೆಂವ್ಚೆಪ್ರಾಸ್ ಬರೆಂ. ಥೊಡೆ ಜಣ್ ಅಸಲೊ ಸಮಸ್ಸೊ ಉಬ್ಜಲ್ಲ್ಯಾ ವೆಳಾರ್ ಏಕ್ ವಾ ದೋನ್ ಪಾವ್ಟಿಂ ರ್ಯಾನಿಟೀಡಿನ್, ಒಮೆಪ್ರಸೋಲ್ ತಸಲಿಂ ಒಕ್ತಾಂ ಘೆವ್ನ್ ಆಸ್ತಾತ್. ಅಪ್ರೂಪ್ ಅಶೆಂ ಒಕ್ತಾಂ ಘೆತ್ಲ್ಲ್ಯಾನ್ ಬಾದಕ್ ನಾ.
ಅಪ್ರೂಪ್ ವಾ ತವಳ್ ತವಳ್ ಪೊಟಾಂತ್ ಹುಲೊಪ್ ಯೆತಾ, ವೊರೊಡ್-ವೋಂಕ್ ಆಸ್ತಾ ತರ್ ಆಪ್ಣಾಯಿ ತ್ಲ್ಯಾಕ್ ಗ್ಯಾಸ್ಟ್ರಯ್ಟೀಸ್ ಸಮಸ್ಸೊ ಮ್ಹಣ್ ನಿರ್ದಾರ್ ಕರ್ನ್ ಒಕ್ತಾಂಚ್ಯಾ ಆಂಗ್ಡಿಥಾವ್ನ್ ಆಸಿಡ್ ಉಣಿಂ ಕರ್ತಾತ್ ತಸಲಿಂ (ಆಂಟ್ಯಾಸಿಡ್) ಸೆಂವ್ಚಿಂ ಆಸ್ತಾತ್. ಸಮಸ್ಸೊ ಗ್ಯಾಸ್ಟ್ರಯ್ಟೀಸ್ ಮ್ಹಣ್ ಅನ್ಬೋಗ್ ಆಸ್ಚ್ಯಾ ದಾಕ್ತೆರಾಥಾವ್ನ್ ನಖ್ಖಿ ಕರ್ಚೆಂ ಬರೆಂ. ಪೊಟಾಂತ್ ಹುಲೊಪ್, ಭುಕ್ ನಾಸ್ಚಿ ವಾ ವೊರೊಡ್ ಹೆರ್ ಜಾಯಿತ್ತ್ಯಾ ಲಿಪ್ತೆ ಪಿಡೆಂಚಿಂ ಖುಣಾಂ ಜಾವ್ಯೆತಾ. ವೆಳಾರ್ ಚಿಕಿತ್ಸಾ ಲಾಬ್ಲ್ಲ್ಯಾನ್ ಗೂಣ್ ಜಾವ್ಯೆತ್ ತಸಲೊ ಸಮಸ್ಸೊ ಲಿಪುನ್ ಉರ್ಲ್ಲ್ಯಾನ್ ಮಾರೆಕಾರ್ ಜಾಂವ್ಚಿ ಸಾಧ್ಯತಾಯ್ ಆಸಾ.
ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ತಪಾಸ್ಣಿ ಆನಿ ಚಿಕಿತ್ಸಾ ಜೆರಾಲ್ ಸರ್ಜನ್ ವಾ ಗ್ಯಾಸ್ಟ್ರೋಎಂಟಿರೋಲೊಜಿಸ್ಟ್ ದೀಂವ್ಕ್ ಸಕ್ತಾತ್. ಗ್ಯಾಸ್ಟ್ರಿಕ್ ಸಮಸ್ಸೊ ಲಾಂಬ್ ಕಾಳಾಚೊ ತರ್ ತಸಲ್ಯಾ ತಜ್ಞ್ ದಾಕ್ತೆರಾಂಕ್ ಭೆಟುನ್ ಜೊಕ್ತೆ ತಪಾಸ್ಣ್ಯೊ ಕರವ್ನ್ ಚಿಕಿತ್ಸಾ ಘೆಂವ್ಚಿ ಬರಿ. ಹೆಲಿಕೋಬ್ಯಾಕ್ಟರ್ ಪೈಲೋರಿ ಥಾವ್ನ್ ಯೆಂವ್ಚ್ಯಾ ಗ್ಯಾಸ್ಟ್ರಯ್ಟೀಸ್ ಸಮಸ್ಸ್ಯಾಕ್ ಆತಾಂ ಪ್ರಬಾವೀಕ್ ಒಕ್ತಾಂ ಮೆಳ್ತಾತ್. ದೋನ್ ವಾ ತೀನ್ ಥರಾಚಿಂ ಒಕ್ತಾಂ ಥೊಡೆ ಹಪ್ತೆ ತೆಂ ಮಯ್ನೆ ಪರ್ಯಾಂತ್ ಘೆಂವ್ಚೆಂ ಪಡ್ತಾ. ಸಮಸ್ಸೊ ಚಡ್ತಾವ್ ಪುರ್ತೊ ಗೂಣ್ ಜಾವ್ಯೆತಾ.
ಹೆರ್ ಥರಾನ್ ಖಾಣಾಕೊಶಾಂತ್ ಹುಲೊಪ್ ಯೆತಾ ತರ್ ತೊಯ್ ಉಣೊ ಕರುಂಕ್ ಆಧಾರ್ ಜಾಂವ್ಚಿಂ ಸಲೀಸಾಯೇನ್ ಘೆವ್ಯೆತ್ ತಸಲಿಂ ಒಕ್ತಾಂ ಚಾಲ್ತೇರ್ ಆಸಾತ್. ಆಪ್ಣಾಯಿತ್ಲ್ಯಾಕ್ ಲಾಂಬ್ಕಾಳ್ ಆಂಟ್ಯಾಸಿಡ್ಸ್ ವಾ ಹೆರ್ ಒಕ್ತಾಂ ಘೆತ್ಲ್ಲ್ಯಾನ್ ಅನಾಪೇಕ್ಶಿತ್ ಸಮಸ್ಸೆ (side effects) ಜಾವ್ಯೆತಾ. ದಾಕ್ತೆರಾಂಚ್ಯಾ ಸಲಹಾಪ್ರಮಾಣೆಂ ಒಕ್ತಾಂ ಸೆಂವ್ಚೆಂ ಬರೆಂ. ನಿರ್ದಿಶ್ಟ್ ಖಾಣ್-ಪಿವನಾಥಾವ್ನ್ ಗ್ಯಾಸ್ಟ್ರಯ್ಟೀಸ್ ಜಾತಾ ತರ್ ತಸಲೆ ವಸ್ತು ಸೆಂವ್ಚೆಂ ಆಡಾಂವ್ಕ್ ಜಾತಾ ತರ್ ತೆಂ ಚಡ್ ಬರೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
