ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಗುಣಾಕಾರ್
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ. ’ಗುಣಾಕಾರ್’ ಕಾಣಿ ಅಜೀಕ್ ಸೊಳಾ ವರ್ಸಾಂಧಿಂ ಬರಯಿಲ್ಲಿ ಕಾಣಿ ತರ್ಯ್ ತಾಚಾ ವಿಂಚ್ಣಾರ್ ಕಾಣ್ಯಾಂ ಪಯ್ಕಿ ಹಿ ಏಕ್.
ಸ್ಟೇನ್ ಅಗೇರಾ
ರುಕ್ಕಪ್ಪನ್ ಕಾಂತಾರಾಕ್ ಸಕಯ್ಲ್ ಥಾವ್ನ್ ವಯ್ರ್ ಏಕ್ ಪಾವ್ಟಿಂ
ಪಳೆವ್ನ್ ತೊಂಡಾಂತ್ ವೊಮ್ತೊಂಚಿ ಪೀಕ್ ಭಾಯ್ರ್ ಉಡಯ್ಲಿ.
"ಕಿತೆಂ ಕಾಂತಾರಾಂ?" ವಿಷಯ್ ಕಳಿತ್ ಆಸೊನ್ಯೀ ತಾಣೆ ನೆಣಾ’ಸ್ಚಾಪರಿಂ ನಟನ್ ಕೆಲೆಂ.
"ಆಮ್ಚೆರ್ ದಯಾ ಕರಿಜಾಯ್ ಧನ್ಯಾ" ಕಾಂತಾರಾನ್ ತಕ್ಲಿ ಭಾಗಾಯ್ಲಿ.
ಹೆ ಸುಧ್ರೊಂಚಾ ವರ್ಗಾಚೆ ನ್ಹಂ. ಮುಕ್ಲಿ ಏಕ್ ಹಜಾರ್ ವರ್ಸಾಂ ಪಾಶಾರ್ ಜಾಲ್ಯಾರ್ಯೀ ಹೆ ಸುಧ್ರೊಂಚೆನಾಂತ್ - ರುಕ್ಕಪ್ಪ ಮತಿಂತ್ ಹಾಸ್ಲೊ.. ದೇವ್ರಾಜ ಅರಸಾಚಾ ಸರ್ಕಾರಾನ್ ಧನ್ಯಾಚಿ ಆಸ್ತ್ ವಕ್ಲಾಂಚಾಂಕ್ ದಿಲ್ಯಾರ್ ಕಿತೆಂ ಜಾಲೆಂ, ತಾಂಚಿ ರೀತಿ-ರಿವಾಜಿ, ನಡ್ತೆಂ ಬದ್ಲುಂಕ್ ಸಾಧ್ಯ್ ಜಾಲೆಂಗಿ?
"ವೆಗಿಂ ಭೊಗೊಳ್ರೇ.. ಮ್ಹಜೆಲಾಗಿಂ ಟೈಮ್ ನಾ." ವೊಂಟಾಂ ಥಾವ್ನ್ ಖಾಡ್ಕೆಕ್ ದೆಂವ್ಲ್ಲಿ ಪೀಕ್ ತಾಣೆ ತುವಾಲ್ಯಾನ್ ಪುಸ್ಲಿ.
"ಧನ್ಯಾ.." ಪಿಂರ್ಗಾಲೊ ಕಾಂತಾರಾ. "ಏಕ್ ದೊನ್ಶಿಂ ರುಪಯ್.. ಜಾಯ್. ದೇವಿಕಾಕ್ ಪಳೆಂವ್ಕ್ ಆಜ್ ಸಯ್ರಿಂ ಯೆತಾತ್."
"ಒಹೋ.. ದೇವಿಕಾ ಕಾಜಾರಾಕ್ ತಯಾರ್ ಜಾಲಾಂಗಿ? ಪೊರ್ಚಾ ಪಯ್ರ್ ಇತ್ಲೆಂ ಲ್ಹಾನ್ ಆಸ್ಲ್ಲೆಂ. ಚಡ್ಡಿ ಘಾಲ್ನಾಸ್ತಾನಾ ಹಿತ್ಲಾಂತ್ ಖೆಳ್ತಾಲೆಂ.." ರುಕ್ಕಪ್ಪಾನ್ ವೋಂಟ್ ಲೆಂವ್ಲೆ.
"ವರ್ಸಾಂ ರಾವ್ತಾತ್ವೆ ಧನ್ಯಾ? ಹ್ಹಿ.. ಹ್ಹಿ.." ಹಾಸ್ಲೊ ಕಾಂತಾರಾ. ಅರ್ಥ್ ನಾತ್ಲ್ಲ್ಯೊ ಹಾಸೊ.
"ತುಜೆಂ ಎದೊಳ್ ಪರ್ಯಾಂತ್ ರೀಣ್ ಕಿತ್ಲೆಂ ಜಾಲಾಂ ಮ್ಹಣ್ ಜಾಣಾಂಯ್? ಏಕ್ ಹಜಾರ್ ಪಾಂಯ್ಶಿ ಆನಿ ಬಾರಾ ರುಪಯ್. ಆತಾಂ ಪರತ್ ದೊನ್ಶಿಂ ರುಪಯ್. ಹೆಂ ಸರ್ವ್ ಕೆದಾಳಾ ಫಾರಿಕ್ ಕರ್ತಾಯ್ರೇ?" ರುಕ್ಕಪ್ಪನ್ ಬೊಲ್ಸಾಕ್ ಹಾತ್ ಘಾಲೊ.
"ಸರ್ವ್ ತುಮ್ಚಿ ದಯಾ ಧನ್ಯಾ. ಯೆಂವ್ಚಾ ಮಹಿನ್ಯಾ ಥಾವ್ನ್ ಹರ್ಯೆಕ್ ಪಾವ್ಟಿಂ ನಾರ್ಲ್ ವಿಕ್ಚರ್ ಕಂತಾರ್ ಭಾಂದ್ತಾಂ." ಹೆಂ ಉತಾರ್ ಪಾಟ್ಲ್ಯಾ ಎಕಾ ವರ್ಸಾ ಥಾವ್ನ್ ಕಾಂತಾರಾ ಸಾಂಗೊನ್ ಆಯಿಲ್ಲೊ.
ಕಾಗ್ದಾ ಕುಡ್ಕ್ಯಾಚೆರ್ ಕಾಂತಾರಾಚೆಂ ಬೊಟ್ ಧಾಂಬುನ್ ರುಕ್ಕಪ್ಪನ್ ದೊನ್ಶಿಂ ರುಪಯ್ ಮೆಜುನ್ ಒಪ್ಸಿಲೆ. ಕಾಂತಾರಾನ್ ರುಕ್ಕಪ್ಪಚೆ ಪಾಂಯ್ ಆಪ್ಡುನ್ ತಾಕಾ ಪಾಟ್ ಕೆಲಿ.
ರುಕ್ಕಪ್ಪಚಾ ಮುಖಮಳಾರ್ ಮತ್ಲಭಿ ಹಾಸೊ ಚರ್ಲ್ಯೊ. ಆಪ್ಣಾಚೊ ಇರಾದೊ ಪೊಂತಾಕ್ ಪಾವ್ತಲೊ. ರಿಣಾಂತ್ ಘಾಲ್ ದಾವ್ಲಿ ರೂಂದ್ ಕರ್.. ವೆಗಿಂಚ್ ಕಾಂತಾರಾಚಿ ದೋನ್ ಎಕ್ರೆ ಆಸ್ತ್ ಆಪ್ಣಾಚಿ ಜಾತೆಲಿ. ನ್ಹಂಯ್.. ತಿ ಕಾಂತಾರಾಚಿ ಆಸ್ತ್ ಭಿಲ್ಕುಲ್ ನ್ಹಂಯ್. ಅಪುಣ್ ತಾಚೊ ಖರೊ ವಾರೆಸ್ದಾರ್. ತಿ ಸುವಾತ್ ಆಪ್ಲ್ಯಾ ಪುರ್ವಜಾಂಚೆಂ ದಾಯ್ಜ್. ಸರ್ಕಾರಾಚಾ ಕಾನೂನಾನ್ ಆಪ್ಣಾಕ್ ನೀತ್ ದೀಂವ್ಕ್ ನಾ. ವರ್ಸಾಂ ಉತ್ರಾಲ್ಯಾರ್ಯೀ ಅಪ್ಣಾಚಿ ನೀತ್ ಅಪುಣ್ ಕರ್ನ್ ಘೆತಲೊಂ.
ಕ್ರೋಧಾನ್ ಖರ್ಶೆಲೊ ರುಕ್ಕಪ್ಪ.
ಆದ್ಲೆ ಉಗ್ಡಾಸ್ ತಾಚಾ ನಿಯಾಳಾಂತ್ ಜಿವಾಳ್ಳೆ.
ತವಳ್ಚಾ ದಿಸಾಂನಿ ಸರ್ಕಾರಿ ಇಸ್ಕೊಲಾಂತ್ ತೊ ಮೆಸ್ತ್ರಿ. ಕೇಶವ್ ತಾಚೊ ಎಕ್ಲೊಚ್ ಪೂತ್. ಪುರ್ವಜಾಂ ಥಾವ್ನ್ ದೆಂವೊನ್ ಆಯಿಲ್ಲಿ ತಾಚಾ ವಾಂಟ್ಯಾಚಿ ದೋನ್ ಎಕ್ರೆ ಆಸ್ತ್ ತಾಣೆ ಕಾಂತಾರಾಕ್ ಗೇಣಿಕ್ ದಿಲ್ಲಿ. ರುಕ್ಕಪ್ಪಾನ್ ನಿವೃತ್ತ್ ಜಾಂವ್ಚಾ ವರ್ಸಾ ಕಾನೂನ್ ಹಾಡ್ಲ್ಲೆಂ, ಡಿಕ್ಲೆರೇಶನ್ ದೀವ್ನ್ ಕಾಂತಾರಾ ನರ್ಗಾಲ್ಲೊ ತರೀ ಅಖ್ರೇಚಾ ವಗ್ತಾ ಹೆರಾಂಚೆ ವತ್ತಾಯೆಕ್ ರುಕ್ಕಪ್ಪಚಿ ಆಸ್ತ್ ತಾಣೆ ಆಪ್ಲ್ಯಾ ನಾಂವಾರ್ ಕೆಲ್ಲಿ.
ರುಕ್ಕಪ್ಪ ಸಲ್ವಾಲ್ಲೊ.
ನಿವೃತ್ತ್ ಜಾವ್ನ್ ಮುಕ್ಲಿಂ ದೋನ್ ವರ್ಸಾಂ ತಾಚೆ ಜಿಣ್ಯೆಂತ್ ಅತ್ಯಾಂತ್ ಕಠಿಣ್ ವರ್ಸಾಂ ಜಾಂವ್ಕ್ ಪಾವ್ಲಿಂ. ಭುಕ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಕಳಿತ್ ನಾತ್ಲ್ಲ್ಯಾ ತಾಕಾ ಆನಿ ತಾಚಾ ಕುಟ್ಮಾಕ್ ನೀಸ್-ಪೇಜೆಚೆ ದೀಸ್ ಆಯಿಲ್ಲೆ. ಬಾಯ್ಲೆಕ್ ಆರ್ ಮಾರ್ಲ್ಲಿ. ಕೊಲೆಜಿಂತ್ ಶಿಕ್ಚಾ ಕೇಶವಾಚೆಂ ಶಿಕಾಪ್ ರಾವವ್ನ್ ತಾಕಾ ಕಾಮಾ ಖಾಇತಿರ್ ಬೊಂಬೊಯ್ ಧಾಡ್ಲ್ಲೊ. ಕೇಶವ್ ಬುಧ್ವಂತ್ ಆನಿ ಚುರುಕ್ ಭುರ್ಗೊ. ಬೊಂಬೊಯ್ ವ್ಹಚೊನ್ ಚಾಲಾಕ್ ಜಾಲ್ಲೊ. ಹೊಟ್ಲಾಂತ್ ಕಾಮಾಕ್ ಭರ್ತಿ ಜಾವ್ನ್ ಥೊಡ್ಯಾಚ್ ವರ್ಸಾಂನಿ ಎಕೆ ಕಂಪೆನಿಚಾ ಕ್ಯಾಂಟಿನಾಚೆಂ ಕೊಂಟ್ರ್ಯಾಕ್ಟ್ ಘೆತ್ಲ್ಲೆಂ. ಉಪ್ರಾಂತ್ ದೋನ್
ವರ್ಸಾಂ ಭಿತರ್ ಪರೇಲಾಂತ್ ಎಕಾ ರೆಸ್ಟೋರೆಂಟಾಚೊ ತೊ ಮ್ಹಾಲಕ್ ಜಾಲ್ಲೊ. ಪುತಾ ವರ್ವಿಂ ಉಭ್ಜಾಲ್ಲ್ಯಾ ಭಾಂಗ್ರಾಳ್ಯಾ ದಿಸ್ಂಆಚೆಂ ಸುಖ್ ಭೊಗುಂಕ್ ಆವಯ್ ಜಿವಂತ್ ಉರ್ಲಿನಾ.
ತವಳ್ಚ್ ರುಕ್ಕಪ್ಪಾನ್ ಸೊಪುತ್ ಘಾಲ್ಲೊ.
ಆಪ್ಣಾಚಾ ಹಾತಾಂ ಥಾವ್ನ್ ಚೊಕ್ಲ್ಲಿ ಪುರ್ವಜಾಂಚಿ ಆಸ್ತ್ ಕಾಂತಾರಾಚಾ ಹಾತಾಂ ಥಾವ್ನ್ ಪಾಟಿಂ ಅಪ್ಣಾಂವ್ಚಾ ಇರಾದ್ಯಾನ್ ತಾಣೆ ಮತಿಂತ್ ಗುಣಾಕಾರ್ ಘಾಲ್ಲೆ. ಬಗ್ಲೆಚಿ ದೋನ್ ಎಕ್ರೆ ಸುವಾತ್ ಮೈಕಲ್ ಸೋಜಾನ್ ವಿಕ್ತಾನಾ ತಾಣೆ ಕೇಶವಾದ್ವಾರಿಂ ತಿ ಆಸ್ತ್ ಮೊಲಾಕ್ ಘೆತ್ಲ್ಲಿ. ಕಾಂತಾರಾಕ್ ತೊ ಸೆಜಾರಿ ಜಾಲ್ಲೊ. ಆದ್ಲೆಂ ವಿಸ್ರಾಲ್ಲ್ಯಾ ಪರಿಂ ತಾಣೆಂ ಇಷ್ಟಾಗತೆಚೆಂ ನಟನ್ ಕೆಲ್ಲೆಂ. ಬೆವ್ಡ್ಯಾ ಕಾಮ್ತಾರಾಕ್ ತಾಣೆ ಉಗ್ತ್ಯಾ ಹಾತಾಂನಿ ರೀಣ್ ದಿಲ್ಲೆಂ. ರುಕ್ಕಪ್ಪಾನ್ ಆಪ್ಲೆ ದಾಂಗೆ ಮಜ್ಭೂತ್ ಕೆಲ್ಲೆ. ತೊ ವೇಳ್ ಘಡಿಯೆಕ್ ರಾಕ್ತಾಲೊ. ಆಜ್ ನ್ಹಂಯ್ ತರ್ ಫಾಲ್ಯಾಂ...
ಕಾಂತಾರಾ ಗೆಲ್ಲಿ ವಾಟ್ ಪಳೆಯಿತ್ತ್ ರಾವ್ಲ್ಲ್ಯಾ ರುಕ್ಕಪ್ಪಚಿ ಖರಸ್ ದೆಂವ್ಲಿ. ತಾಕಾ ತಾನ್ ಲಾಗ್ಲ್ಲಿ. ಗುರ್ಗುಲೆತಾಂತ್ಲೆಂ ಉದಾಕ್ ತೊ ಪಿಯೆಲೊ. ದಾಂಡಿಯೆರ್ ಉಮ್ಕಾಳ್ಚೆಂ ಶಾಲ್ ಪಾಂಗ್ರುನ್ ತೊ ಆಂಗ್ಣಾಕ್ ದೆಂವ್ಲೊ. ಮಾಡಾ ಹಿತ್ಲಾಂತ್ ತಾಣೆಂ ಪಾವ್ಲಾಂ ವಿಂಚ್ಲಿಂ. ಮಾಡಾಂಕ್ ಕಾಟೆಂ ಭಾಂದ್ಚೆಂ ಕಾಮ್ ಚಲ್ತಾಲೆಂ. ಗಡಿ ಲಾಗಿಂ ಆಸ್ಚಾ ತಳ್ಯಾಲಾಗಿಂ ಪಾವ್ತಾನಾ ತಾಚಿ ಚಾಲ್ ಅಚಾನಕ್ ರಾವ್ಲಿ. ಹೆಣೆ-ತೆಣೆ ಕೊಣ್ಂಚ್ ನಾತ್ಲ್ಲೆ. ತಳ್ಯಾಂತ್ ಏಖ್ ಚಲಿ ಪಾತಳ್ ವಸ್ತುರ್ ರೆವ್ಡಾವ್ನ್ ನ್ಹಾತಾಲಿ.
ದೇವಿಕಾ!
ಕಾಂತಾರಾಚಿ ಧುವ್.
ರುಕ್ಕಪ್ಪಾನ್ ಥಿಂಪಿ ಗಿಳ್ಳಿ. ದೀಷ್ಟ್ ಬದ್ಲುಂಕ್ ತಾಚ್ಯಾನ್ ಅಸಾಧ್ಯ್ ಜಾಲೆಂ. ಕೆದಾಳಾಯೀ ಮ್ಹೆಳೆಂ ಆನಿ ಭುರ್ಶೆಂ ದಿಸ್ಚೆಂ ತೆಂ ಆಜ್ ಉದ್ಕಾಂತ್ ಅಪ್ಸರಾ ಕಶೆಂ ಸೊಭ್ತಾ? ವ್ಹಾ.. ರುಕ್ಕಪ್ಪಾನ್ ವೋಂಟ್ ಲೆಂವ್ಲೆ. ಆಂಗಾಕ್ ಚಿಡ್ಕಾಲ್ಲ್ಯಾ ಪಾತಳ್ ವಸ್ತುರಾ ಥಾವ್ನ್ ತಿಳ್ಚೆ ದೇವಿಕಾಚೆ ಮೋವ್ ವಿಶ್ವೆ ದೊಳ್ಯಾಂಕ್ ಫೆಸ್ತ್ ದಿತಾಲೆ.
ಉದ್ರೇಕಿತ್ ಭಗ್ಣಾಂನಿ ತೊ ಪಿಕ್ಲೊ. ರುಕ್ಕಪ್ಪ ಸಾಂತ್ ನ್ಹಂಯ್, ಬಾಯ್ಲ್ ಸರ್ಲ್ಲ್ಯಾ ಥೊಡ್ಯಾ ವರ್ಸಾಂ ಉಪ್ರಾಂತ್ ಘರ್ ಕಾಮಾಕ್ ಯೆಂವ್ಚಾ ಗಿರಿಜಾಕ್ ಏಕ್ ಪಾವ್ಟಿಂ ತಾಣೆಂ ನ್ಹಾಣ್ಯೆಂತ್ ಆರಾಯಿಲ್ಲೆಂ.
ಆಜ್ ಹ್ಯೆ ಪ್ರಾಯೆರ್ಯೀ ಪರತ್ ತೊ ಸ್ತ್ರೀಯೆಚಾ ಸ್ಪರ್ಶಾ ಖಾತಿರ್ ಅತ್ರೆಗ್ಲೊ. ಚಡಾವತ್ ಕಾಣಿಯಾಂನಿ ವಾಚ್ಲ್ಲೆಪರಿಂ ಫಾಲ್ಯಾಂ ಥಾವ್ನ್ ದೇವಿಕಾಕ್ ಆಪ್ಣಾಚಾ ಘರಾ ಕಾಮಾಕ್ ಧಾಡುಂಕ್ ಕಾಂತಾರಾಕ್ ಸಾಂಗಾಜಯ್ ಮ್ಹಣ್ ತಾಕಾ ಭೊಗ್ಲೆಂ. ಯಾ.. ರೀಣ್ ಮಾಫಿ ಕರ್ನ್ ದೇವಿಕಾ ಸಂಗಿಂ ಏಕ್ ರಾತ್ ಪಾಶಾರ್ ಕರ್ಚೆಂ ಸಂಧಾನ್ ಕರುಂ? ನಾ.. ಅಪ್ಣೆ ಪಾಳ್ನೆಕ್ ಸಾಂಪ್ಡೊಂಕ್ ನ್ಹಜೊ. ಅಪ್ಣಾಚೆಂ ತಪಸ್ಯ್ ಭಂಗ್ ಜಾಂವ್ಕ್ ನ್ಹಜೊ.
ಉದ್ರೇಕಿತ್ ಭಗ್ಣಾಂಚೆರ್ ಜಯ್ತ್ ವ್ಹರ್ನ್ ದೇವಿಕಾಕ್ ತಿತ್ಲ್ಯಾರ್ಚ್ ವಿಸ್ರೊನ್ ತಾಣೆ ವಾಟ್ ಕೆಲಿ. ಗುಣಾಕಾರ್ ಮುಮಾಮುಕಿ ಕರ್ಚಿ ಇಚ್ಚಾ ತಾಕಾ ನಾತ್ಲ್ಲಿ.
ಮುಖ್ಲ್ಯಾ ಥೊಡ್ಯಾ ದಿಸಾಂನಿ ಕಾಂತಾರಾನ್ ಚಡಿತ್ ರೀಣ್ ಘೆತ್ಲ್ಲೆಂ. ದೇವಿಕಾಚಿ ಸಯ್ರಿಕ್ ಚುಕ್ಲ್ಲ್ಯಾನ್ ತೊ ಚಡಿತ್ ಪಿಯೆಂವ್ಕ್ ಲಾಗ್ಲಾ ಮ್ಹಣ್ ಕಳೊನ್ ಆಯಿಲ್ಲೆಂ.
ಹ್ಯಾ ಇಡ್ಯಾಂತ್ ಕೇಶವಾ ಖಾತಿರ್ ರುಕ್ಕಪ್ಪಾನ್ ಏಕ್ ಚೆಡುಂ ಪಳೆಲ್ಲೆಂ. ತಾಣೆ ಕೂಡ್ಲೆ ಕೇಶವಾಕ್ ಗಾಂವಾಕ್ ಯೇಂವ್ಕ್ ತಾರ್ ಧಾಡ್ಲೆಂ. ಕೇಶವ್ ವಿಮಾನಾರ್ ಗಾಂವಾಕ್ ಆಯಿಲ್ಲೊ. ರುಕ್ಕಪ್ಪಾಚೊ ಸಂತೊಸ್ ಆನಿ ಸಂಭ್ರಮ್ ಸಾಂಗ್ಚೊ ನ್ಹಂಯ್.
"ಕಿತೆಂ ಪಪ್ಪಾ, ಟೆಲಿಗ್ರಾಮ್ ದೀವ್ನ್ ಗಾಂವಾಕ್ ಆಪಯ್ಲೆಂಯ್?" ಕೇಶವಾಕ್ ವಿಷಯ್ ಕಳಿತ್ ನಾತ್ಲ್ಲೊ.
"ಹಾಂವ್ ಕಿತೆಂಯಿ ಕೀಸ್ ಘಡ್ಲಾಂ ಮ್ಹಣ್ ಘಾಬರ್ಲೊಂ."
"ಪಯ್ಲೆಂ ತುಂ ನ್ಹಾವ್ನ್ ಜೆವಾಣ್ ಕರ್."
ಬಾಪಾಯ್ನ್ ಹುಕುಮ್ ದಿಲಿ. "ಕಿತೆಂಯೀ ಕೀಸ್ ಘಡ್ಲ್ಯಾರ್ ಮಾತ್ರ್ ಗಾಂವಾಕ್ ಯೇಜಾಯ್ವೆ. ನಾ ತರ್ ಯೇಂವ್ಕ್ ಜಾಯ್ನಾ?"
"ಸೊರ್ರಿ ಪಪ್ಪಾ." ಕೇಶವಾನ್ ಕೂಡ್ಲೆ ಮಾಫಿ ಮಾಗ್ಲಿ.
ಗಿರಿಜಾನ್ ಕುರ್ಲುಆಂಚೆಂ ನಿಸ್ತೆಂ ರಾಂದ್ಲ್ಲೆಂ. ಕೇಶವಾಕ್ ಲ್ಹಾನ್ ಥಾವ್ನ್ ಮಾಸಾಳ್ ಕುರ್ಲ್ಯಾಂಚೆರ್ ಆಂಗಾಲಾಪ್. ಸಾಂಗಾತಾಚ್ ಸುಂಕ್ಟಾಂ ಭಾಜ್ಲ್ಲಿಂ.
ಜೆವಾಣ್ ಜಾತಚ್ಚ್ ಕೇಶವಾ ಸೊಫಾಚೆರ್ ಆಡ್ ಪರ್ತಾಲೊ. ರುಕ್ಕಪ್ಪಾನ್ ತೊಂಡಾಕ್ ಪಾನ್ ಚೆಪ್ಲೆಂ.
"ಇತ್ಲಿ ಪ್ರಾಯ್ ಜಾಲಿ. ತುಕಾ ಆನಿಕೀ ಕಾಜಾರ್ ಜಾಂವ್ಚಿ ಆಲೋಚನ್ ನಾ?"
"ಪಳೆಯಾಂ, ಯೆಂವ್ಚಾ ವರ್ಸಾ." ಕೇಶವಾಚಿ ಮಟ್ವಿ ಜಾಪ್. ಆಪ್ಣಾಕ್ ತಾರ್ ಧಾಡ್ಲ್ಲೆಂ ಕಾರಣ್ ಆತಾಂ ತಾಕಾ ಸುಸ್ತಾಲ್ಲೆಂ. ಅಪುಣ್ ಬೊಂಬೊಂಯ್ತ್ ಎಕಾ ಮರಾಠಿ ಚೆಡ್ವಾಚಾ ಮೊಗಾರ್ ಆಸಾಂ ಮ್ಹಣ್ಚೊ ವಿಷಯ್ ತಾಣೆ ಗುಪಿತ್ ದವರ್ಲೊ. ಬಾಪಾಯ್ಚೆಂ ಮನ್ ದುಖಂವ್ಕ್ ತಾಕಾ ಖುಶಿ ನಾತ್ಲ್ಲಿ.
"ಹಾವೆಂ ತುಕಾ ಏಕ್ ಚೆಡುಂ ಪಳೆಯ್ಲಾಂ."
ರುಕ್ಕಪ್ಪನ್ ವಿಷಯ್ ಕಳಯ್ಲೊ. "ತುಂ ಏಕ್ ಪಾವ್ಟಿಂ ಪಳೆ. ನಾರಾಯಣ ಶೆಟ್ಟಿಚಿ ಧುವ್. ಸರೋಜ ಮ್ಹಣ್ ತಾಚೆಂ ನಾಂವ್. ಸೊಭಾಯೆಚೆಂ ಮಾಣಿಕ್. ಮಾನ್ ಅನಿ ಮಾಣ್ಸುಗೆಂತ್ ಆಂಜ್. ಚೆಡ್ವಾಕ್ ಹ್ಯಾಚ್ ವರ್ಸಾ ಕಾಜಾರ್ ಕರಂವ್ಚೆ ಆಲೋಚನೆರ್ ಆಸಾತ್ ತಿಂ."
ಖೇಶವಾನ್ ಜಾಪ್ ದಿಲಿನಾ.
"ಅನ್ಯೇಕ್ ವಿಷಯ್" ರುಕ್ಕಪ್ಪನ್ ಮುಖಾರ್ಸಿಲೆಂ.
"ಕಾಮ್ತಾರಾಕ್ ಹಾವೆಂ ರಿಣಾಂತ್ ಬುಡಯ್ಲಾ. ಎಕಾ ವರ್ಸಾ ಭಿತರ್ ಆಮ್ಚಿ ಆಸ್ತ್ ಆಮ್ಕಾಂ ಪಾಟಿಂ ಮೆಳಾಜಯ್."
"ಪಯ್ಶ್ಯಾಂವಿಶಿಂ ತುಂ ಫಿಕಿರ್ ಕರಿನಾಕಾ." ಆಂಗ್ಣಾಕ್ ಮೇಟ್ ದವರ್ಲೆಂ.
"ಹಾಂವ್ ಹಿತ್ಲಾಂತ್ ಏಕ್ ಭಂವ್ಡಿ ಮಾರ್ನ್ ಯೆತಾಂ." ಕೇಶವಾಕ್ ಸಾಂಗಾತ್ ನಾಸ್ತಾನಾ ಉಬ್ಗೊಣ್ ಆಯಿಲ್ಲಿ.
"ಗಡಿಲಾಗಿಂ ಆಸ್ಚಾ ತಳ್ಯಾಲಾಗಿಂ ವ್ಹಚಾನಾಕಾ."
ಬಾಪಾಯ್ನ್ ಚತ್ರಾಯ್ ದಿಲಿ. "ಥಂಯ್ಸರ್ ವಿಕಾಳ್ ಜಿವ್ದಾಳಿ ಆಸಾತ್."
ಬಾಪಾಯ್ಚೆರ್ ಎಕಾ ಥರಾಚೊ ಅವ್ಯಕ್ತ್ ರಾಗ್ ಆಯಿಲ್ಲೊ ಕೇಶವಾಕ್. ಯೆದೆಶ್ಯಾ ಲ್ಹಾನ್ ಕಾರಾಣಾ ಖಾತಿರ್ ತಾರ್ ಧಾಡ್ನ್ ಆಪಂವ್ಚಿ ಗರ್ಜ್ ಆಸ್ಲ್ಲಿ? ಸಯ್ರಿಕ್ ಆಸ್ಲ್ಲಿ ತರ್ ಕಾಗ್ದಾರ್ ಬರವ್ಯೆತ್ ಆಸ್ಲ್ಲೆಂ ನ್ಹಂಯ್ಗಿ? ಥಂಯ್ಸರ್ ರೆಸ್ಟೋರೆಂಟ್ ಕೊಣಾ-ಕೊಣಾಚಾ ಹಾತಾಂತ್ ದೀವ್ನ್ ಯೇಜಾಯ್ ಜಾಲೆಂ.. ಹಾಕಾ ಆಪ್ಲೆ ಗುಣಾಕಾರ್ ಸೊಡ್ಲ್ಯಾರ್ ದುಸ್ರಿ ಖಂತ್ ನಾ.
ಕೊಣೆಂಗೀ ತಾಳಿಯೊ ಪೆಟವ್ನ್ ಆಯಯಿಲ್ಲೊ ಆವಾಜ್ ಜಾಲೊ. ತಾಣಿ ಘುಂವೊನ್ ನದರ್ ಮಾರ್ಲಿ. ಕಾಂತಾರಾ ಆಪ್ಲ್ಯಾ ಆಮ್ಘಾ ಥಾವ್ನ್ ಹಾತ್ ಹಾಲಯ್ತಾಲೊ. ಯಾಂತ್ರಿಕ್ ರಿತಿನ್ ಕೇಶವಾನ್ ತೆವ್ಶಿನ್ ಮೆಟಾಂ ಕಾಡ್ಲಿಂ. ದೇವಿಕಾ ಇರ್ವಳ್ ಕಾತರ್ತಾಲೆಂ.
"ತುಂ ಯೆಂವ್ಚೊ ಆಸಾಯ್ ಮ್ಹಣೊನ್ ಧನಿ ಸಾಂಗ್ತಾಲೊ. ಗಾಂವಾಂತ್ ಚಡ್ ದೀಸ್ ರಾಂವ್ಚಿ ಆಲೋಚನ್ ಆಸಾಗೀ ಕೇಶವ್ಬಾಬು?.. ತುಂ ಕಹಲೆಂ ಪಳೆಂವ್ಚ್ಯಾರ್ ಪಡ್ಲಾಂಯ್ಗೊ?" ಕಾಂತಾರಾನ್ಧುವೆಕ್ ಧೆಂಖ್ಣೊ ಮಾರ್ಲೊ. "ಪಳೆಯಾಂ.. ಕೇಶವ್ಬಾಬು ಆಮ್ಚಾ ಇರ್ವಳಾಂಚಿ ರೂಚ್ ಪಳೆಂವ್ದಿ."
"ಕೇಶವ್ ನರ್ಗಾಲೊ ತರೀ ಕಾಂತಾರಾನ್ ವತ್ತಾಯ್ ಕೆಲಿ. ದೇವಿಕಾನ್ ಸೊಲ್ಲ್ಲೆ ಇರ್ವಳ್ ಕೇಶವಾಕ್ ದಿಲೆ. ಗೊಡ್ಸಾಣ್ ಚಾಕ್ಲ್ಲ್ಯಾ ತಾಣೆ ಚಡಿತ್ ಇರ್ವಳಾಂಕ್ ಹಾತ್ ಘಾಲೊ. ಕಾಂತಾರಾ ಭಿತರ್ ಗೆಲ್ಲ್ಯಾ ಸಂದರ್ಭಿಂ ತಾಣೆ ದೇವಿಕಾಚೆರ್ ಏಕ್ ಸಾರ್ಕಿ ನದರ್ ಮಾರ್ಲಿ. ನದರ್ ಬದ್ಲುಂಕ್ ತಾಕಾ ಕಷ್ಟ್ ಮಾರ್ಲೆ.
"ತುಂ ಮ್ಹಾಕಾ ತಶೆಂ ಕಿತ್ಯಾಕ್ ಪಳೆತಾಯ್?" ದೇವಿಕಾ ಲಜ್ಲೆಂ.
"ತುಂ ಸೊಭಿತ್ ಜಾಲಾಂಯ್ ದೇವಿಕಾ.." ಕೇಶವ್ ಭಾವನಾತ್ಮಕ್ ಜಾಲೊ.
"ಆನಿ ತುಂ?" ದೇವಿಕಾನ್ ಸೊಡ್ನ್ ದಿಲೆಂ ನಾ.
"ತುಂ ಸಿನೆಮಾ ಹೀರೊಪರಿಂ ದಿಸ್ತಾಯ್."
"ತುಕಾ ಆಮ್ಚೆ ಲ್ಹಾನ್ಪಣಾಚೆ ದೀಸ್ ಉಗ್ಡಾಸಾಂತ್ ಆಸಾತ್?" ಕೇಶವಾನ್ ಇರ್ವಳಾಕ್ ಘಾಸ್ ಮಾರ್ಲೊ.
"ಲ್ಹಾನ್ಪಣಾಚೆ ದೀಸ್ ಕೊಣ್ಯೀ ವಿಸ್ರಾತಾತ್?"
ದೇವಿಕಾನ್ ಪಾಟಿಂ ಸವಾಲ್ ಕೆಲೆಂ. "ತವಳ್ ಗಿಮೆಚಾ ದಿಸಾಂನಿ ಸರ್ಶಿಲ್ಯಾ ಗಾಂವಾ ಥಾವ್ನ್ ಹ್ಯಾ ಗಾಂವಾಕ್ ರಜೆರ್ ತುಂವೆಂ ಯೆಂವ್ಚೆಂ ಆಸ್ಲ್ಲೆಂ. ಆಮಿ ಖೆಳಾನಾತ್ಲ್ಲೊ ಖೆಳ್ ನಾತ್ಲ್ಲೊ. ಬ್ಯಾಟ್ಬೊಲ್, ಬುಗುರಿ, ಕುಟ್ತಿದೊಣ್ಣೆ, ಬೆರ್ಚಂಡಿ, ಗೋಲಿ, ಜುಬಿಲಿ.. ಉಗ್ಡಾಸ್ ಆಸಾ ತಾಂಕಾಂ? ಏಕ್ ದೀಸ್ ಹಿಂದ್ಳ್ಯಾರ್ ಥಾವ್ನ್ ಮ್ಹಾಕಾ ಲೊಟುನ್ ಘಾಲ್ನ್ ತುಂ ಧಾಂವ್ಲ್ಲೊಯ್, ತ್ಯಾ ದೀಸ್ ಮ್ಹಜೆಂ ಮುಸ್ಕಾರ್ ಫುಟ್ಲ್ಲೆಂ.."
"ಮ್ಹಾಕಾ ಉಗ್ಡಾಸ್ ಆಸಾ." ಹಾಸ್ಲೊ ಕೇಶವ್.
ಉಲೊಣೆ ಚಲಾತ್ತ್ ರಾವ್ಲೆಂ. ಉಲಯ್ತಾಂ ಉಲಯ್ತಾಂ ಆಪ್ಣೆಂ ಕಿತ್ಲೆ ಇರ್ವಳ್ ಖೆಲೆ ಮ್ಹಣ್ ತಾಕಾ ಖಬಾರ್ ನಾತ್ಲ್ಲಿ. ಸಾಂಜ್ ಉತ್ರೊನ್ ಪಯ್ಶಿಲ್ಯಾ ನಗಾರಿಚೊ ಆವಾಜ್ ಆಯ್ಕೊಂಕ್ ಲಾಗ್ಲೊ. ತಾಚೆಂ ಪೊಟ್ ಭರ್ಲ್ಲೆಂ.
ಪಾಟಿಂ ಘರಾ ತೆವ್ಶಿನ್ ಪಾವ್ಲಾಂ ಕಾಡ್ತಾನಾ ಏಕ್ ಸವಾಲ್ ಕೇಶವಾಕ್ ಧೊಸುಂಕ್ ಲಾಗ್ಲೆಂ. ಜಾಗೊ ಹೊಗ್ಡಾವ್ನ್ ಇತ್ಲಿಂ ವರ್ಸಾಂ ಪಾಶಾರ್ ಜಾಲ್ಲ್ಯಾ ಉಪ್ರಾಂತ್ ಆತಾಂ ಪರತ್ ತೊ ಜಾಗೊ ಆಪ್ಣಾಂವ್ಚೆ ಖಾತಿರ್ ಗುಣಾಕಾರ್ ಘಾಲ್ಚಾಂತ್ ಅರ್ಥ್ ಆಸಾ? ಕಾನೂನ್ ಸರ್ವಾಮ್ಕ್ ಏಕ್ಚ್ಚ್.. ತ್ಯಾ ಶಿವಾಯ್ ಆಜ್ ಆಪ್ಣಾಕ್ ಯಾ ಆಪ್ಲ್ಯಾ ಬಾಪಾಯ್ಕ್ ಕಿತೆಂ ಉಣೆಂ ಆಸಾ?
ರಾತ್ ಪಾಶಾರ್ ಜಾವ್ನ್ ಸಕಾಳ್ ಉದೆಲೊ.
ಕೇಶವಾಚಿ ಭಂವ್ಡಿಂ ಆರಂಭ್ ಜಾಲಿ. ಶೂನ್ಯ್ ಚಿಂತ್ನಾಂನಿ ಸಾಸ್ಪೊಂಚೊ ತೊ ಖಬಾರ್ ನಾಸ್ತಾನಾ ಗಡಿಲಾಗಿಂ ಪಾವ್ಲ್ಲೊ. ತಳ್ಯಾಂತ್ ಉಪ್ಯೆಂವ್ಚಾ ದೇವಿಕಾಕ್ ದೆಖ್ತಾನಾ ಏಕ್ ತಾಳ್ನಿ ಖೊಟ್ ಮಾರುಂಕ್ಲಾಗ್ಲಿ. ತೊ ಲಾಗಿಂ ಸರ್ಲೊ.
"ತಶೆಂ ಕಿತ್ಯಾಕ್ ಪಳೆತಾಯ್ ಕೇಶವ್ ಬಾಬು?"
ಕಿಡ್ಕಿಡೊನ್ ಹಾಸ್ಲೆಂ ದೇವಿಕಾ. "ಧಯ್ರ್ ಆಸ್ಲ್ಯಾರ್ ಉದ್ಕಾಕ್ ದೇಂವ್."
"ನೊಟ್ಟಿ ಗರ್ಲ್." ಕೇಶವ್ ತಳ್ಯಾಲಾಗಿಂ ಯೇವ್ನ್ ಬಸ್ಲೊ. "ಹಿ ಉಪ್ಯೆಂವ್ಚಿ ಪಿಸಾಯ್ ತುಂವೆಂ ಕೆದಾಳಾ ಆರಂಭ್ ಕೆಲಿಯ್?"
"ಸದಾಂಯ್ ತಳ್ಯಾಂತ್ ನ್ಹಾವ್ನ್ ದುರ್ಗಾ ದೇವಿಚಾ ದಿವ್ಳಾಚೆಂ ದರ್ಶನ್ ಕೆಲಾರ್ ಮ್ಹಾಕಾ ಬರೊ ಫುಡಾರ್ ಮೆಳ್ತಲೊ ಕಂಯ್" ತೆಂ ಗಂಬೀರ್ ಜಾಲೆಂ.
"ತಶೆಂ ಮ್ಹಣ್ ಕೊಣೆ ಸಾಂಗ್ಲೆಂ?"
"ದಿವ್ಳಾಚಾ ಪುಜಾರಿನ್."
"ತಳ್ಯಾಂತ್ ತುವೆಂ ಉಪ್ಯೆತಾನಾ ತುಜೆಂ ದರ್ಶನ್ ಕರ್ಚಿ ಇಚ್ಛಾ ಆಸ್ತೆಲಿ ತಾಚಿ"
ಹಾಸ್ಲೊ ಕೇಶವ್.
"ಶ್ಶೀ.. ತುಂ ನಾಕಾ ಜಾಲ್ಲೆಂ ಉಲಯ್ತಾಯ್."
ದೇವಿಕಾನ್ ನಕ್ಲಿ ರಗ್ ದಾಕವ್ನ್ ಉದಾಕ್ ಉಸ್ಳಾಯ್ಲೆಂ.
ಉದಾಕ್ ಕೇಶವಾಕ್ ಆಪ್ಟಾಲ್ಲೆಂ.
"ಯೂವ್.." ದಾಂತ್ ಚಾಬೊನ್ ಕೇಶವಾನ್ ನೀಟ್ ಜಾಂವ್ಚೆಂ ಪ್ರಯತ್ನ್ ಕರ್ತಾನಾ ತಾಚೊ ಪಾಂಯ್ ನಿಸ್ರಾಲ್ಲೊ.
"ಓಹ್ ಗಾಡ್.." ಬೋಬ್ ಮಾರ್ಲಿ ಕೇಶವಾನ್. ತಾಚೆಂ ಶರೀಕ್ ತಳ್ಯಾಂತ್ ಮಾಲ್ವೊನ್ ಉದಾಕ್ ಫಾಸ್ಳಾಲ್ಲೊ ಆವಾಜ್ ಜಾಲೊ. ದೇವಿಕಾ ಜ್ಯೊರಾನ್ ಹಾಸ್ಲೆಂ.
ಉಭೊ ಜಾಂವ್ಚಾ ಕೇಶವಾಚಾ ಆಂಗಾಂತ್ ವೀಜ್ ಸಕತ್ ಚರ್ಲಿ. ತಾಚೆ ಹಾತ್ ದೇವಿಕಾಚಾ ಹರ್ಧ್ಯಾ ಭಂವ್ತಿಂ ರೆವ್ಡಾಲ್ಲೆ. ತಾಣೆಂ ವೇಂಗ್ ಭಳ್ ಕೆಲಿ. ಸ್ಪರ್ಶಾಂಚಿಂ
ತರಂಗಾಂ ಅಗೋಚರ್ ಆನಂದ್ ದೀಂವ್ಕ್ ಲಾಗ್ಲಿಂ. ತಾಚೆ ವೋಂಟ್ ದೇವಿಕಾಚೆ ಕುಡಿಚೆರ್ ಮ್ಹೊರ್ ಮಾರುಂಕ್ ಲಗ್ಲೆ.
"ಸೊಡ್ ಮ್ಹಾಕಾ.." ತೆಂ ಕೇಶವಾಕ್ ಲೊಟುನ್ ವಯ್ರ್ ಧಾಂವ್ಲೆಂ.
ತೊ ಪಾಟಿಂ ಜ್ನಾನಾಜ್ ಆಯ್ಲೊ. ಅಪುಣ್ ಪೆಂಕ್ಟಾ ಮ್ಹಣಾಸರ್ ಉದ್ಕಾಂತ್ ಉಭೊ ಆಸ್ಚೆಂ ತಾಚಾ ಗಮನಾಕ್ ಗೆಲೆಂ. ದೇವಿಕಾ ದಿಷ್ಟಿಕ್ ನಾತ್ಲ್ಲೆಂ. ತಳ್ಯಾ ಥಾವ್ನ್ ವಯ್ರ್ ಯೇವ್ನ್ ತೊ ಘರಾಲಾಗಿಂ ಪಾವ್ಲೊ. ರುಕ್ಕಪ್ಪಚಿ ನದರ್ ತಾಚೆರ್ ಚರ್ಲಿ.
"ತುಂ ಭಿಜ್ಲೊಯ್ ಕಸೊ ಪುತಾ?" ಬಾಪಾಯ್ನ್ ಅಜ್ಯಾಪ್ ವ್ಯಕ್ತ್ ಕೆಲೆಂ.
"ತಳ್ಯಾಲಾಗಿಂ ಏಕ್ ಜಿವ್ದಾಳ್ ದಿಷ್ಟಿಕ್ ಪಡ್ಲಿ. ಭಿಂಯಾನ್ ಧಾಂವ್ತಾಂ ಮ್ಹಣ್ತಾನಾ ನಿಸ್ರೊನ್ ತಳ್ಯಾಂತ್ ಪಡ್ಲೊಂ" ತುವಾಲೊ ವಿಂಚುನ್ ತೊ ನ್ಹಾಣ್ಯೆಕ್ ರಿಗ್ಲೊ.
ಏಕ್ ಸಂಗತ್ ಕೇಶವಾಕ್ ಖಚಿತ್ ಜಾಲ್ಲಿ. ಗಾಂವಾಂತ್ ಚಡ್ ದೀಸ್ ರಾವ್ಲ್ಯಾರ್ ದೇವಿಕಾ ಸಂಗಿಂ ಲೈಂಗಿಕ್ ಸಂಪರ್ಕ್ ಆನಿ ಜಾಂವ್ಚೊ ಸಂಭವ್ ಚಡ್ ಆಸ್ಲ್ಲೊ. ವೊಡ್ನಿ ಕಾಟ್ ತುಟೊನ್ ವೊಮ್ತೊಂಚಾ ಶಿಖರಾಕ್ ಪಾವ್ಲ್ಲಿ. ಹೆಂ ಆಡಾಂವ್ಚೆಂ ತಾಕಾ ಸಮಂಜಸ್ ಕಶೆಂ ದಿಸ್ಲೆಂ. ನಾ ತರ್ ಬಾಪಾಯ್ಚಾ ಗುಣಾಕಾರಾಚೆಂ ಲೇಖ್ ಚುಕ್ಚೊ ಸಂಭವ್ ಆಸ್ಲ್ಲೊ. ಮುಕ್ಲೊ ಏಕ್ ಹಫ್ತೊ ತಾಣೆ ತಾಳ್ನೆಚೆರ್ ನಿಯಂತ್ರಣ್ ದವರ್ಲೆಂ. ಬಾಪಾಯ್ನ್ ದಾಕಯಿಲ್ಲ್ಯೆ ಸಯ್ರಿಕೆಕ್ ನಾ ಖುಶಿ ದಾಕವ್ನ್ ತಾಣೆ ಪಾಟಿಂ ಬೊಂಬೊಯ್ ವ್ಹೆಚಿ ತಾರೀಕ್ ನಿಘಂಟ್ ಕೆಲಿ.
ತ್ಯಾ ದನ್ಪಾರಾಂ ತೊ ಶಹರಾಕ್ ಗೆಲ್ಲೊ. ಇಂಡಿಯನ್ ಏರ್ಲೈನ್ಸಾಚಿ ತಾಣೆ ಟಿಕೇಟ್ ಘೆತ್ಲಿ. ಕೂಡ್ಲೆ ಹಳ್ಳೆಕ್ ವ್ಹಚಾನಾಸ್ತಾನಾ ತೊ ಥಿಯೆಟರಾಂತ್ ರಿಗ್ಲೊ. ಸಾಂಜೆಚಿ ದಾಖವ್ನ್ ಜಾತಚ್ಚ್ ತಾಣೆ ದೋನ್ ಬೊತ್ಲಿ ಬೀರ್ ಗಳ್ಯಾಂತ್ ವೊತ್ಲಿ. ಬಸ್ಸಾರ್ ಹಳ್ಳೆಕ್ ಪಾವ್ತಾನಾ ವೊರಾಂ ಸಾಡೆ-ಧಾ ಜಾಲ್ಲಿಂ. ರಸ್ತೆ ನಿರ್ಜನ್ ಜಾಲ್ಲೆ. ಸಾಂಖ್ಯಾಲಾಗಿಂ ಎಕಾ ಮಾಡಾ ಮುಳಾಂತ್ ತಾಕಾ ಏಕ್ ಪಿಂರ್ಗೊಣಿ ಆಯ್ಕಾಲಿ. ತಾಚಿ ಚಾಲ್ ರಾವ್ಲಿ.
"ಕೊ.. ಕೋಣ್..? ಕಾಂತಾರಾಚೊ ಸ್ವರ್.
ನಾಕ್ಭರ್ ಪಿಂಯೆವ್ನ್ ಲೇಲೆ ಕರ್ತಾಲೊ.
"ಹಾಂವ್ ಕೇಶವ್." ತಾಣೆ ವಳಕ್ ಸಾಂಗ್ಲಿ. "ಪಳೆಯಾಂ ಹಾಂವ್ ತುಕಾ ಘರಾ ಪಾವಯ್ತಾಂ."
ತಾಣೆ ಕಾಮ್ತಾರಾಕ್ ಆಪ್ಲ್ಯಾ ಭುಜಾಂಚೆರ್ ಆಧಾರ್ಸಿಲೊ. ಕಾಂತಾರಾ ಇಂಗ್ಲಿಶಾಂತ್ ಕಿತೆಂಗೀ ಪಿಂರ್ಗಾತಾಲೊ. ಘರಾ ಪಾವ್ತಾನಾ ತಾಕಾ ಘಾಮ್ ಸುಟ್ಲೊ. ಆಂಗ್ಣಾಕ್ ಪಾವ್ತಾನಾ ಕಾಂತಾರಾ ಸಕ್ಲಾ ಗಳ್ಳೊ. ತಾಕಾ ಥಂಯ್ಚ್ ಸೊಡುನ್ ತಾಣೆ ದಾರಾಕ್ ಠೊಕೆ ಮಾರ್ಲೆ.
"ಆಯ್ಲಾಯ್ಗೀ ದುಕ್ರಾಪರಿಂ ಘೊಟುನ್?..."
ಭಿತರ್ ದೇವಿಕಾ ಪುರ್ಪುರ್ತಾಲೆಂ. "ಖಂಚಾ ಕರ್ಮಾಕ್ ತುಂ ಮ್ಹಜೊ ಬಾಪುಯ್ಗಿ?
ಸುಣ್ಯಾ ಪ್ರಾಸ್ ಪಾಸ್ಟ್."
ದೇವಿಕಾನ್ ದಾರ್ ಉಘಡ್ಲೆಂ.
"ತುಂ?" ತೆಂ ಹಾಂಕ್ರೆಲೆಂ. "ಮ್ಹಜಿ ಚೂಕ್ ಜಾಲಿ. ಹಾಂವೆ ಅಪ್ಪಾ ಆಯ್ಲೊ ಮ್ಹಣ್ ಚಿಂತ್ಲೆಂ."
"ತುಜೊ ಅಪ್ಪಾ ಸಾಂಖ್ಯಾಲಾಗಿಂ ಲೊಳೊನ್ ಆಸ್ಲ್ಲೊ." ಕೇಶವಾನ್ ವಿವರ್ಸಿಲೆಂ.
"ಹಾಂವೆಂ ಕಷ್ಟಾಂನಿ ತಾಕಾ ಹಾಂಗಾ ಮ್ಹಣಾಸರ್ ಹಾಡ್ಲೊ."
"ಕಿತ್ಯಾಕ್ ಹಾಡ್ಲೊಯ್?" ದೇವಿಕಾನ್ ತಕ್ಲಿ ಭಾಗಾಯ್ಲಿ. "ಪಿರ್ವಾತಚ್ ಯೆತೊ ಆಸ್ಲ್ಲೊ. ತುವೆಂ ಅವಾನಶ್ಯಕ್ ತ್ರಾಸ್ ಘೆತ್ಲೆಯ್."
ಪುಸ್ವೆಚೊ ಚಂದ್ರ್ ದೇವಿಕಾಚೆರ್ ಖಂಚ್ಲ್ಲೊ. ಹಫ್ತ್ಯಾ ಆದ್ಲೆ ತಳ್ಯಾಂತ್ಲೆಂ ದೃಶ್ಯ್ ಕೇಶವಾಚಾ ದೊಳ್ಯಾಂ ಹುಜ್ರಿಂ ಉದೆವ್ನ್ ಆಯ್ಲೆಂ. ಮೊವಾಳ್ ವಿಶ್ವ್ಯಾಂಚೊ ಸ್ಪರ್ಶ್.. ಉದ್ರೇಕಿತ್ ಭಗ್ಣಾಂ.. ಹುನೊನಿ ವೊಡ್ನಿ.. ಲೈಂಗಿಕ್ ಮಿಲನಾಚೆ ಅತ್ರೆಗ್..
"ದೇ... ವಿ.. ಕಾ.." ತಾಚೆ ವೋಂಟ್ ಉಸ್ವಾಲೆ. ಸ್ವರಾಂತ್ ಆಹ್ವಾನ್ ನಿಶೆತಾಲೆಂ. ತಾಚೊ ಹಾತ್ ದೇವಿಕಾಚಾ ಭುಜಾಚೆರ್ ಬಸ್ಲೊ.
ದೇವಿಕಾಚೆಂ ಸರ್ವಾಂಗ್ ’ಜಿಮ್ಮ್’ ಆನಂದಾನ್ ಕಾಂಪ್ಲೆಂ. ತಾಣೆ ದೊಳೆ ಧಾಂಪ್ಲೆ. ಉಸ್ವಾಸ್ ಭಳ್ ಜಾಲೊ. ಪಾಲಂವ್ ಭುಜಾಂಚೆರ್ ಬಸ್ಲೊ.
ಕೇಶವಾಕ್ ಸೊಸುಂಕ್ ಜಾಲೆಂನಾ. ತಾಣೆ ಬಳಿಷ್ಟ್ ವೇಂಗ್ ಮಾರ್ಲಿ. ಬಾಕಿಚಿ ತೃಪ್ತೆಭರಿತ್ ಕರ್ನಿ ಸಲೀಸಾಯೆನ್ ಘಡೊನ್ ಗೆಲಿ.
ರಾತ್ ಉತ್ರೊನ್ ಸಕಾಳ್ ಉದೆಲೊ.
ಕೇಶವಾನ್ ಬೊಂಬೊಯ್ಚಿ ವಾಟ್ ಧರ್ಲಿ
ತೀನ್ ಮಹಿನೆ ಉಬೊನ್ ಗೆಲೆ.
ಎಕೆ ಸಕಾಳಿಂ ರುಕ್ಕಪ್ಪಾನ್ ಕಿತೆಂ ಮ್ಹಣ್ ಸಮ್ಜೊಂಚಾ ಪಯ್ಲೆಂ ಉಸ್ವಾಸ್ ಬಾಂಧುನ್ ಧಾಂವೊನ್ ಆಯಿಲ್ಲೊ ಕಾಂತಾರಾ ತಾಚಾ ಪಾಂಯಾಂಕ್ ಪಡ್ಲೊ.
"ಗಡ್ಬಡ್ ಜಾಲಿ ಧನ್ಯಾ.. ಹಾಂವ್ ಆತಾಂ ಕಿತೆಂ ಕರುಂ? ಮ್ಹಾಕಾ ಮಜತ್ ಕರ್ ಧನ್ಯಾ.." ಕಾಂತಾರಾ ಗಳ್ಗಳ್ಯಾಂ ರಡ್ಲೊ.
"ಹೊ ಕಸಲೊ ನಾಟಕ್ ಕಾಂತಾರಾ?" ರುಕ್ಕಪ್ಪಾನ್ ಘೊರೊಜ್ ಘಾಲಿ. "ಪಯ್ಶೆ ಜಾಯ್ ತರ್ ವಿಚಾರ್."
"ಸಮಸ್ಯಾ ಪಯ್ಶ್ಯಾಂಚಿ ನ್ಹಂಯ್ ಧನ್ಯಾ.. ಮ್ಹಜಾ ಘರಾಚೆರ್ ಮೊಳಾಬ್ ಕೊಸಾಳ್ಳಾಂ. ಮ್ಹಜಾ ಚೆಡ್ವಾನ್ ಆಮ್ಚೆ ಮರ್ಯಾದಿಚೆರ್ ಗಸ್ ಪುಸ್ಲ್ಯಾ."
"ವಿಷಯ್ ಶೀದಾ ಭೊಗೊಳ್ರೆ."
"ದೇವಿಕಾ ಆಂಕ್ವಾರ್ ಆವಯ್ ಜಾಂವ್ಚಾರ್ ಆಸಾ. ತಾಕಾ ಆತಾಂ ತೀನ್ ಮಯ್ನೆ ಕಂಯ್. ಹೆಂ ಕಸಲೆಂ ಪರಾಜಿತ್ ಜಾಲೆಂ ಧನ್ಯಾಂ?"
"ಖಂಚಾ ಪೋಲಿ ಅನ್ನಾಡ್ಯಾಚಿಂ ಕಾಮಾಂರೆ ಹಿಂ?"
"ಹಾಕಾ ಕಾರಣ್ ಕೇಶವ್ ಬಾಬು ಮ್ಹಣೊನ್ ತೆಂ ಸಾಂಗ್ತಾ." "ತೋಂಡ್ ಧಾಂಪ್ ಬೇಕೂಫಾ." ರಗ್ತಾಚಾ ವತ್ತಾಡಾನ್ ಬೊಬಾಟ್ಲೊ ರುಕ್ಕಪ್ಪಾ.
ಅನ್ಯೇಕ್ ಉತಾರ್ ಉಲಯ್ಶಿ ತರ್ ಜೀಬ್ ಕಾತರ್ನ್ ಹಾತಾಂತ್ ದೀಂವ್ಕ್ ಆಸಾಂ."
"ರಾಗಾರ್ ಜಾಯ್ನಾಕಾ ಧನ್ಯಾಂ.. " ಕಾಂತಾರಾನ್ ದುಃಖಾಂ ಪುಸ್ಲಿಂ. "ದೇವಿಕಾಚಿಂ ಉತ್ರಾಂ ಹಾಂವ್ಯೀ ಪಾತ್ಯೆನಾ. ತರೀ ಕೇಡವ್ ಬಾಬುಚಾ ತೊಂಡಾ ಥಾವ್ನ್ ಹಾಂವ್ ಏಕ್ ಉತಾರ್ ಆಯ್ಕೊಂಕ್ ಆಶೆತಾಂ. ತಾಣೆಂ ನೆಗಾರ್ ಕೆಲೆಂ ತರ್ ದೇವಿಕಾ ಕಿತ್ಲೆಂ ಫಟ್ಕಿರೆಂ ಮ್ಹಣ್ಚೆಂ ರುಜು ಜಾತೆಲೆಂ."
ತಾಚಾ ಉತ್ರಾಂನಿ ರುಕ್ಕಪ್ಪಾಕ್ ರಾಜಾಂವ್ ದಿಸ್ಲೆಂ. ತಾಣೆ ಕಾಂತಾರಾಕ್ ಸಮಧಾನ್ ಕರ್ನ್ ಧಾಡ್ಲೆಂ. ರುಕ್ಕಪ್ಪಾನ್ ಆಮ್ಸೊರಾನ್ ಪೋಸ್ಟ್ ಆಫಿಸಾಚಿ ವಾಟ್ ಧರ್ಲಿ. ಪುತಾಕ್ ಟೆಲಿಗ್ರಾಮ್ ಪಾಠವ್ನ್ ಪಾಟಿಂ ಘರಾ ತೆವ್ಶಿನ್ ಚಲ್ಚಾ ತಾಚಿಂ ಚಿಂತ್ನಾಂ ಗಾಂಚ್ ಚುಕೊನ್ ಶಿಂಪ್ಡಾಲ್ಲಿಂ.
ಆಪ್ಣಾಚಾ ಗುಣಾಕಾರಾಚೆಂ ಲೇಖ್ ಚುಕ್ಚಾರ್ ಆಸಾ.
ತೊ ದೀಸ್ ರುಕ್ಕಪ್ಪಾಚಾ ಉಗ್ಡಾಸಾಕ್ ಆಯ್ಲೊ. ತ್ಯಾ ದಿಸಾ ಕೇಶವ್ ತಳ್ಯಾಂತ್ ಬಿಜೊನ್ ಘರಾ ಆಯಿಲ್ಲೊ.. ತರ್ ಕೇಶವಾನ್ ನಿಜಾಯ್ಕ್ಯೀ ದೇವಿಕಾ ಸಂಗಿಂ ಗಡ್ಬಡ್ ಕೆಲ್ಯಾ?
ಹಾಂತುಂ ನವಾಲ್ ಕಿತೆಂ?
ತಿ ಉದ್ರಿಕ್ತ್ ಸೌಂದರ್ಯತಾ ದೆಖೊನ್ ಹ್ಯೆ ಪ್ರಾಯೆರ್ ಅಪ್ಣಾಕ್ ಸಮೇತ್ ದಾದ್ಲೆಂಪಣ್ ಜಾಗೆಂ ಜಾಲ್ಲೆಂ ತರ್ ಕೇಶವಾ ತಸಲ್ಯಾ ಧೃಡ್ಕಾಯ್ ತರ್ನಾಟ್ಯಾನ್ ನಿಸ್ರಾಲ್ಲ್ಯಾಂತ್ ಕಿತೆಂ ಚೂಕ್ ಆಸಾ?
ತರ್ ಆಪ್ಣಾಚಿ ತಪಸ್ಯಾ?
ತ್ಯೇ ಹೊಗ್ಡಾಯಿಲ್ಲ್ಯೆ ಆಸ್ತಿ ಖಾತಿರ್ ಅಪುಣ್ ಕಿತ್ಲೆಂಯೀ
ವರ್ಸಾಂ ರಾಕೊಂಕ್ ತಯಾರ್ ಆಸ್ಲ್ಲೊಂ. ಪುಣ್ ಹೆಂ ಕಿತೆಂ ಕೆಲೆಂಯ್
ಪುತಾ ತುವೆಂ? ಹ್ಯಾ ಸಮಸ್ಯಾಕ್ ಪರಿಹಾರ್ ಕಸಲೊ? ಏಕ್
ವಾಟ್ ಆಸಾ.. ದೇವಿಕಾ ಸಂಗಿಂ ಕೇಶವ್ಚೆಂ ಲಗ್ನ್ ಜಾಲೆಂ ತರ್? ಕೀಳ್ ಜಾತಿಚೆಂ ತರ್ ಕಿತೆಂ? ತಿ
ಸೊಭಾಯ್ ಹ್ಯಾ ಗಾಂವಾಂತ್ ಕೊಣಾಕ್ಚ್ ನಾ. ತ್ಯಾ ಶಿವಾಯ್ ದೇವಿಕಾ ಕಾಂತಾರಾಚೆಂ ಏಕ್ಚ್ ಭುರ್ಗೆಂ. ಯಾಂತ್ರಿಕ್ ರಿತಿನ್
ಹೊಗ್ಡಾಯಿಲ್ಲಿ ಪುರ್ವಜಾಂಚಿ ಆಸ್ತ್ ಪಾಟಿಂ ಆಪ್ಣಾಚಾ ಕುಟ್ಮಾಕ್ ಯೆತಲಿ.
ರುಕ್ಕಪ್ಪಾನ್ ನವೆ ಗುಣಾಕಾರ್ ಘಾಲೆ.
ದುಸ್ರ್ಯಾ ದಿಸಾ ಸಾಂಜೆರ್ ವಿಮಾನಾರ್ ಕೇಶವಾಚೆಂ ಯೆಣೆಂ ಜಾಲ್ಲೆಂ.
ಹರ್ಶೆಂ ಪುತಾಕ್ ಪಳೆಲ್ಲ್ಯಾಫರಾ ಅತೀ ಆನಂದ್ ವ್ಯಕ್ತ್ ಕರ್ಚಾ ರುಕ್ಕಪ್ಪಾನ್
ಹ್ಯಾ ಪಾವ್ಟಿಂ ತೋಂಡ್ ಹಿವ್ಳಾಯ್ಲೆಂ.
"ಕಿತ್ಯಾಕ್ ಚಿಲ್ಲರ್ ಕಾರಣಾಂ ಖಾತಿರ್ ಮ್ಹಾಕಾ ಟೆಲಿಗ್ರಾಮ್
ದೀವ್ನ್ ಆಪಯ್ತಾಯ್ ತುಂ?" ಕೇಶವ್ ಆಯಿಲ್ಲ್ಯಾಫರಾ ದುರ್ಸಾಲೊ.
"ಹ್ಯಾ ಪಾವ್ಟಿಂ ಕಾರಣ್ ಚಿಲ್ಲರ್ ನ್ಹಂಯ್ ಕೇಶವ್.."
"ತರ್ ತಿತ್ಲ್ಯಾ ಮಹತ್ವಾಚೆಂ ಕಸಲೆಂ ಕಾರಣ್ ತೆಂ?"
"ಕಾರಣ್ ದೇವಿಕಾ ಜಾವ್ನಾಸಾ." ದಾಂತ್ ಚಾಬ್ಲೆ ರುಕ್ಕಪ್ಪಾನ್. "ತೀನ್ ಮಯ್ನ್ಯಾ ಆಧಿಂ ಗಾಂವಾಕ್ ಆಯಿಲ್ಲ್ಯಾ ಸಂದರ್ಭಿಂ ತುವೆಂ ದೇವಿಕಾಸವೆಂ ಕಿತೆಂಯೀ ಲಫ್ಡೆ ಕೆಲ್ಲೆಯ್?"
ಕೇಶವಾನ್ ತಕ್ಲಿ ಪಂದಾಕ್ ಘಾಲಿ.
"ದೇವಿಕಾ ಆಂಕ್ವಾರ್ ಆವಯ್ ಜಾಂವ್ಚಾರ್ ಆಸಾ". ಪುಸ್ಪುಸ್ಲೊ ರುಕ್ಕಪ್ಪಾ. "ಆತಾಂ ತುಂ ಕಿತೆಂ ಕರ್ತಲೊಯ್? ತಾಚೆಲಾಗಿಂ ಕಾಜಾರ್ ಜಾತಲೊಯ್?"
"ಸಮಸ್ಯಾಂ ಹಾಂವೆ ರಚ್ಲ್ಯಾ. ಹಾಚೊ ಪರಿಹಾರ್ಯೀ ಹಾಂವ್ಚ್ ಸೊಧುನ್ ಕಾಡ್ತಲೊಂ." ಸ್ವಷ್ಟ್ ಜವಾಬ್ ದಿಲ್ಲ್ಯಾ ಕೇಶವಾನ್ ವೇಗಾನ್ ಪಾಂಯ್ ದವರ್ಲೊ.
ತಾಕಾ ಕಾಂತಾರಾಚಾ ಘರಾ ತೆವ್ಶಿನ್ ವೆಚೆಂ ರುಕ್ಕಪ್ಪಾನ್ ಪಳೆಲೆಂ. ಪುತಾಚಿ ಜಾಪ್ ಆಯ್ಕೊನ್ ತೊ ಥಟಾಕ್ ಜಾಲ್ಲೊ. ತಾಣೆ ಅಪೇಕ್ಷಿಲ್ಲ್ಯಾ ಫರ್ಮಾಣೆ ಕೇಶವಾನ್
ಚೂಕ್ ವಳ್ಕೊನ್ ಭ್ಯೆಂ ವ್ಯಕ್ತ್ ಕರುಂಕ್ ನಾತ್ಲ್ಲೆಂ. ಬದ್ಲಾಕ್ ಧಯ್ರಾನ್ ಪರಿಗತ್ ಫುಡ್ ಕೆಲ್ಲಿ.
ಕಾಂತಾರಾಚಾ ಘರಾ ದೋನ್ ವೊರಾಂಚೊ ಜುಂತ್ ಚಲವ್ನ್ ಕೇಶವ್ ಪಾಟಿಂ ಆಯ್ಲೊ. ತಾಚಾ ಮುಖಾಮಳಾರ್ ಶಾಂತಿ ರಾಜ್ ಕರ್ತಾಲಿ.
"ಸಮಸ್ಯಾ ಹಳೂ ಜಾಲಿಗಿ ಪುತಾ?" ರುಕ್ಕಪ್ಪಾನ್ ಆತುರಾಯೆನ್ ವಿಚಾರ್ಲೆಂ.
"ವ್ಹಯ್" ಕೇಶವ್ ಇಜಿಛೇರಾಚೆರ್ ಗಳ್ಳೊ.
"ಮ್ಹಳ್ಯಾರ್ ಕಾಜಾರಾಕ್ ತುಂ ರಾಜಿ ಜಾಲೊಯ್?" ರುಕ್ಕಪ್ಪಾಕ್ ಆಸ್ತ್ ಪಾಟಿಂ ಮೆಳ್ಲ್ಲೊ ಅನ್ಭೋಗ್ ಜಾಲೊ.
"ಕಾಜಾರ್ ಜಾಲೆಂ ತರ್ ಆಮ್ಚೆ ಆನಿ ತಾಂಚೆ ಮಧೆಂ ಫರಕ್ ಕಸಲೊ? ಹಾಂವೆ ವೆಗ್ಳಿ ಏಕ್ ವಾಟ್ ವಿಂಚ್ಲ್ಯಾ. ಯೆಂವ್ಚಾ ಹಫ್ತ್ಯಾ ಥಾವ್ನ್ ತುಂ ಮ್ಹಜೆಸಂಗಿಂ
ಬೊಂಬೊಯ್ ಯೆತಲೊಯ್, ಆಮಿ ಗಾಂವ್ ವಿಸ್ರಾತೆಲ್ಯಾಂವ್."
"ಪುಣ್ ಆಮ್ಚಿ ಹಿ ಆಸ್ತ್? ಆನಿ ತಿ ಪುರ್ವಜಾಂಚಿ ಆಸ್ತ್." ರುಕ್ಕಪ್ಪಾಚೆಂ ತೋಂಡ್ ವಿವರ್ಣ್ ಜಾಲೆಂ.
"ಆಮ್ಚಾ ಪುರ್ವಜಾಂಚಿ ಆಸ್ತ್ ಕಾಂತಾರಾಲಾಗಿಂ ಆಸೊಂ." ಕೇಶವಾನ್ ಧೃಡ್ ಫಯ್ಸಲ್ ಉಚಾರ್ಲೆಂ.
"ದೇವಿಕಾಕ್ ಪರಿಹಾರ್ ಜಾವ್ನ್ ಹಿ ದೋನ್ ಎಕ್ರೆ ಸುವಾತ್ ಹಾಂವೆ ತಾಂಚಾ ನಾಂವಾರ್ ಕರ್ಚಿ ಭಾಸ್ ದಿಲ್ಯಾ. ಸಾಂಗಾತಾಚ್ ರೀಣ್ ಮಾಫಿ ಕೆಲಾಂ."
"ಖಬಡ್ದಾರ್, ತುಂ ಆಸ್ತಿವಿಶಿಂ ಅಸಲೊ ನಿರ್ಧಾರ್ ಘೆಶಿ ತರ್!" ರುಕ್ಕಪ್ಪಾ ಕಾಂಪ್ಲೊ.
"ತುಂ ಅನ್ಬಾವಶ್ಯಕ್ ರಾಗಾರ್ ಜಾತಾಯ್"
ಹಾಸ್ಲೊ ಕೇಶವ್. "ಮ್ಹಜೆ ಗುಣಾಕಾರ್ ತುಕಾ ಅರ್ಥ್ ಜಾಂವ್ಕ್ ನಾಂತ್. ಅಖ್ರೇಕ್ ಹಿ ಸರ್ವ್ ಆಸ್ತ್ ದೇವಿಕಾಚಾ ಪೊಟಾಂತ್ ಆಸ್ಚಾ ಮ್ಹಜಾ ಭುರ್ಗ್ಯಾಚಾ ನಾಂವಾರ್ ವ್ಹೆತೆಲಿ-ಮೂ? ತರ್ ಹಾಂತುಂ ಆಮ್ಕಾಂ ಕಸಲಿ ಲುಕ್ಸಾಣ್?"
ರುಕ್ಕಪ್ಪಾ ಗುಸ್ಪಡ್ಲೊ. ಹೆ ನವೆ ಗುಣಾಕಾರ್ ಅರ್ಥ್ ಕರ್ನ್ ಘೆಂವ್ಕ್ ತಾಕಾ ಕಠಿಣ್ ತ್ರಾಸ್ ಭೊಗ್ಲೆ.
ಎಕಾ ಹಫ್ತ್ಯಾ ಉಪ್ರಾಂತ್ ಕೇಶವಾನ್ ಬಾಪಾಯ್ಕ್ ವಿಮಾನಾರ್ ಬೊಂಬೊಯ್ ಆಪವ್ನ್ ವ್ಹೆಲೊ. ತಾಂಕಾಂ ಏರ್ಪೋರ್ಟಾ ಪರ್ಯಾಂತ್ ಪಾವಂವ್ಕ್ ಕಾಂತಾರಾ ಗೆಲ್ಲೊ. ವಯ್ರ್ ಸರ್ಚಾ ವಿಮಾನಾಕ್ ತಾಣೆ ದೊಳೆಭರ್ ಪಳೆಲ್ಲೆಂ. ವಿಚಿತ್ರ್ ಹಾಸೊ ತಾಚಾ ತೊಂಡಾರ್ ಉದೆಲ್ಲ್ಯೊ.. ಥೊಡ್ಯಾ ವರ್ಸಾಂ ಆದಿಂ ಏಕ್ ಸುವಾತ್ ಡಿಕ್ಲೆರೇಶನಾ ಮುಖಾಂತ್ರ್ ಮೆಳ್ಲ್ಲಿ ತರ್ ತ್ಯಾಚ್ ಮನ್ಶಾಚಿ ಅನ್ಯೇಕ್ ಆಸ್ತ್ ಹ್ಯಾ ಪಾವ್ಟಿಂ ಫುಂಕ್ಯಾ ಸವಾಯ್ ಮೆಳ್ಲ್ಲಿ. ತಾಚಾ ಗುಣಾಕಾರಾಂನಿ ತೊ ಸಫಲ್ ಜಾಲ್ಲೊ. ಆಪ್ಲ್ಯಾ ತರ್ನಾಟ್ಪಣಾ ಧ್ವಾರಿಂ ರುಕ್ಕಪ್ಪಾಕ್ ಮಾಂಕೊಡ್ ಕರುಂಕ್ ದೇವಿಕಾ ಸಲ್ವಾಲ್ಲೆಂ. ತರೀ ಕೇಶವ್ ಸಲೀಸಾಯೆನ್ ಕರ್ಗಾಲ್ಲೊ.
ಕೇಶವಾಚೆರ್ ಕಾಂತಾರಾಕ್ ದಯಾ ಉದೆಲಿ. ದೇವಿಕಾ ಗುರ್ವಾರ್ ಮ್ಹಣೊನ್ ಆಪ್ಣೆ ಸಾಂಗ್ಲೆಂ ಆನಿ ತೆ ದೊಗ್ಯೀ ಪಾತ್ಯೆಲೆ.. ವ್ಹಾ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
