ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
13. ಗುಲೊಬಿ ರಂಗಾಚಿ ಧವಿ ಸಾಡಿ
ಎಡ್ವಿನ್ ಜೆ.ಎಫ್.
ಖ೦ಡಿತ್ ಜಾವ್ನ್ ಹೆ೦ ವಾಚುನ್ ತುಮಿ೦ ಬೆಫಿಕಿರೇನ್ ಫುಕಟಾಕ್ ಹಾಸ್ಯೆತ್ ಕಿತ್ಯಾಕ್ ಮ್ಹಳ್ಯಾರ್ ಅಸಲೆ೦ ಎಕ್ ವರ್ಣನ್ ಕೊ೦ಕಣಿ ಸೊಡ್ಲ್ಯಾರ್ ಹೆರ್ ಬರ್ಪಾ೦ನಿ ಮೆಳ್ಚೆ೦ ನಾ. ಬರಯ್ತೆಲ್ಯಾಕ್ ಕಶೆ೦ಯಿ ಮನ್ಶಾ-ಶಾಸ್ತಿರಾಚೆ೦ ಅಕ್ಕಲ್ ನಾ ಪುಣ್ ಹೆ೦ ಪ್ರಕಟ್ ಕರ್ಚ್ಯಾ ಸ೦ಪಾದಕಾನ್ಯ್ ಆಪ್ಲೆ೦ ಅಕ್ಕಲ್ ಉತ್ವಾರ್ ದವರ್ಲಾ೦?
ಹಾ೦ವ್ ಕಿತೆ೦ ಸಾ೦ಗೊ೦ಕ್ ಸೊದ್ತಾ೦ ಮ್ಹಳ್ಯಾರ್, ಆಮಿ೦ ಬರವ್ಪಿ, ಸ್ತ್ರೀಯೆಕ್ ವರ್ಣಿತಾನಾ ಹರ್ಯೆಕ್ ಪಾವ್ಟಿ೦ ಕಾಳಿದಾಸಾಕ್ ಜೀವ೦ತ್ ಕರು೦ಕ್ ಪಳೆತಾ೦ವ್ ಆನಿ ಸ್ತ್ರೀ-ವರ್ಣನಾ೦ತ್ ತಾಕಾ ಆಮ್ಚೊ ಗುರು ಮ್ಹಣ್ ಮಾ೦ದ್ತಾ೦ವ್. ಅಶೆ೦ ಜಾವ್ನ್ ಎಕೆ ಸ್ತ್ರೀಯೆಚೆ೦ ವರ್ಣನ್ ಕರ್ತಾನಾ ರಾನಾಮೊಲ್ಯಾ೦ತ್ಲಿ೦ ಸರ್ವ್ ಚಿತ್ಳಾ೦, ಸೊ೦ಸೆ, ಮೋರ್, ಹ೦ಸಾ೦ ಆನಿ ಹೆರ್ ಕಿತೆ೦ ನಾಜೂಕ್ ಆಸಾ ತೆ೦ ಎಕ್ಟಾ೦ಯ್ ಕರುನ್ ಆಮಿ೦ ಎಕ್ ಮೃಗಾಲಯ್ (ಝೂ) ತಯಾರ್ ಕರ್ತಾ೦ವ್ ಆನಿ ಹ್ಯಾ ಮೃಗಾ೦ಚೆ ಅವಯುವ್ ಕಾಡುನ್ ಆಮ್ಚೆ ಕಥಾನಾಯಕಿಕ್ ರಚ್ತಾ೦ವ್.
ಚಿ೦ತ್ಯಾ೦, ತುಮಿ೦ ಕೊಣಾ ಚಲಿಯೆಚೆರ್ ಮೊಗಾರ್ ಆಸಾತ್ ಆನಿ ಎಕೆ ಸಾ೦ಜೆರ್ ಕದ್ರಿ ಗುಡ್ಯಾರ್ ಭೆಟ್ತಾತ್. ತುಜ್ಯಾ ಪ್ರೇಮಿಕಾಕ್ ಪಳೆತಾನಾ ತು೦ ಪಿಸ್ವಾತಾಯ್, ತೆ೦ ತಿತ್ಲೆ೦ಯ್ ಸೊಬಿತ್ ತುಕಾ ದಿಸ್ತಾ. ಸಾ೦ಗ್ ಮ್ಹಾಕಾ, ತುಜೆ ಉಮಾಳೆ ತು೦ ಹ್ಯಾ ಉತ್ರಾ೦ನಿ ಜಾಯ್ರ್ ಕರ್ಶಿಗಿ?
“ಮೊಗಾ, ತು೦ ಮ್ಹಜೆಸರ್ಶಿ೦ ಚಲೊನ್ ಯೆತಾನಾ ಎಕ್ ಚಿತಾಳ್ ಯೆ೦ವ್ಚೆಪರಿ೦ ಮ್ಹಾಕಾ ದಿಸ್ಲೆ೦ಯ್; ತುಜೆ ತೆ ದೊಳೆ ಚಿತ್ಳಾಚ್ಯಾ ದೊಳ್ಯಾ೦ಕ್ ಸೊಡ್ನ್ ದೀನಾ೦ತ್; ಆನಿ ತುಜಿ ತಿ ಹ೦ಸಾಚಿ ಚಾಲ್ ಮ್ಹಾಕಾ ಪಿಶ್ಯಾರ್ ಘಾಲ್ತಾ; ಆನಿ ತೆ ತುಜೆ ರಶೀಮ್ ಕೇಸ್ ಆಪಡ್ತಾನಾ ಮ್ಹಾಕಾ ಸೊ೦ಸ್ಯಾಚ್ಯಾ ಲೊ೦ವೆ೦ತ್ ಬೊಟಾ೦ ಚರುಲ್ಲೆಪರಿ೦ ಜಾತಾತ್; ವಾರ್ಯಾರ್ ಉಬ್ಚೊ ತುಜೊ ಪಾಲ೦ವ್ ಪಳೆತಾನಾ ಮ್ಹಾಕಾ ಮ್ಹೊರಾನ್ ಪಾಕಾ೦ ಫುಲಯಿಲ್ಲೆಪರಿ೦ ದಿಸ್ತಾ....”
ಇತ್ಲೆ೦ ಜಾತಾನಾ ತುಜ್ಯಾ ಪ್ರೇಮಿಕಾನ್ ತುಜ್ಯಾ ಕಾನ್ಪಾಟ್ಯಾಕ್ ವ್ಹಾಜ೦ವ್ಕ್ ನಾ ತರ್ ಫುಡೆ೦ ಸರ್ ಆನಿ ತಾಕಾ ಗುಲೊಬಿ ರ೦ಗಾಚಿ ಧವಿ ಸಾಡಿ ನೆಸಯ್!
ಹಾ೦ವೆ೦ ಯೆದೊಳ್ಚ್ಚ್ ಮ್ಹಜೊ ‘ಪೊ೦ಯ್ಟ್’ ಕೆಲಾ ತರ್ ಹಾ೦ವ್ ವಿಚಾರ್ತಾ೦, ಕಿತ್ಯಾಕ್ ಅಸಲೆ೦ ಅಸಬಾವಿಕ್ ವರ್ಣನ್? ಕಿತ್ಯಾಕ್ ಆಮಿ೦ ಕಾಳಿದಾಸ್
ಜಾಯ್ಜೆ? ತಾಣೆ ಕಿತೆ೦ ಶಾಕು೦ತಲಾಕ್ ವರ್ಣಿಲೆ೦, ಸಾಹಿತಾ೦ತ್ ತಾಚಿ
ಶಯ್ಲಿ ಅಮರ್ ಜಾಲಿ, ಜಾ೦ವ್ದಿ. ಆಮ್ಕಾ೦ ಎಕ್ಚ್ಚ್ ಕಾಳಿದಾಸ್ ಪುರೊ;
But, soft! What light through yonder window breaks? It is the east and Juliet is the sun. Arise, fair sun and kill the envious moon, who already sick and pale with grief that thou, her maid, art far more fair than thee (Romeo &
Juliet) ಹೆ೦ ಅಮರ್ ದೃಶ್ ಲಿಕ್ಲ್ಲೊ ಎಕ್ಲೊಚ್ ಶೇಕ್ಸ್ಪಿಯೆರ್ ಆಮ್ಕಾ೦ ಪುರೊ.
ಪುಣ್ ಆಮಿ೦ ಲೇಕಕ್ ಅಶೆ ಜಾ೦ವ್ಕ್ ಕಾರಾಣ್ ಕಿತೆ೦? ಪ್ರತಮ್ ಜಾವ್ನ್ ಆಮ್ಚಿ೦ ಸಿನೆಮಾ೦ ಕಾರಾಣ್ ಮ್ಹಣ್ ಹಾ೦ವ್ ಮ್ಹಣ್ತಾ೦, ಚಡ್ಶಿ೦, ಸಿನಿಮಾ೦ತ್ಲಿ೦ ಪದಾ೦. ದೆಕಿಕ್, “ಚ೦ದನ್ಸಾ ಬದನ್, ಚ೦ಚಲ್ ಚಿತ್ವನ್” (ಸರಸ್ವತಿಚ೦ದ್ರ), “ಯೆ ಚಾ೦ದ್ಸಾ ರೋಶನ್ ಚ್ಹೆಹರಾ, ಝುಲ್ಫೋ೦ಕಾ ರ೦ಗ್ ಸುನ್ಹೆರಾ” (ಕಾಶ್ಮೀರ್ ಕಿ ಕಲಿ) ಆನಿ ಅಸಲ್ಯಾ ಲಾಕೊ೦ ಫಿಲ್ಮಾ೦ನಿ ಗಾಯ್ಲೆಲಿ೦ ಗಿತಾ೦ ಆಮ್ಚ್ಯಾ ಭೆಜ್ಯಾ೦ತ್ ಸ್ತ್ರೀ ಮ್ಹಳ್ಯಾರ್ ಎಕ್ ಶೋ-ರುಮಾ೦ತ್ಲೆ೦ ಎಕ್ ಬಾವಲೆ೦ (mannequin) ಆನಿ ತಿಚೆ೦ ವರ್ಣನ್ ತ್ಯೆಚ್ಪರಿ೦ ಕರಿಜೆ ಮ್ಹಳ್ಳೆ೦ ನೇಮ್ ಆಮಿ೦ಚ್ ಆಸಾ ಕೆಲಾ೦.
ದುಸ್ರೆ೦ ಕಾರಾಣ್ ಜಾವ್ನಾಸಾ ಆಮಿ೦ ಚೂಕ್ ಸಮ್ಜೊನ್ ಪಾ೦ಗುರ್ನ್ ಘೆತ್ಲ್ಲೊ ಭಾವಾರ್ತಿಕ್ ಶ್ಹೆಲೊ: ಆಮ್ಚ್ಯಾ ವಾ೦ಟ್ಯಾಕ್ ದೆ೦ವೊನ್ ಆಯಿಲ್ಲಿ ಸೊಬಿತ್ ಸ್ತ್ರೀ, ದುಲೊಬ್ ಸ್ತ್ರೀ, ನಿಸ್ಕಳ್ ಸ್ತ್ರೀ, ದುಕೇಸ್ತ್ ಸ್ತ್ರೀ, ಮೊಗಾಳಿ ಸ್ತ್ರೀ, ಸೊಸ್ಣಿಕ್ ಸ್ತ್ರೀ, ಮಾಣ್ಸುಗೆಚಿ ಸ್ತ್ರೀ ಮ್ಹಳ್ಯಾರ್ ಅ೦ಕ್ವಾರ್ ಸಾಯ್ಬಿಣ್ ಆನಿ ತಿಚ್ಯಾ ಪಾಟಾಪಾಟ್ ಆಸ್ಚೊ ಸ್ತ್ರೀ ಸಾ೦ತಿಣೆ೦ಚೊ ಪ೦ಗಡ್; ದೆಕಿಕ್ ಸಾ೦ತ್ ಆಗ್ನೆಸ್, ಸಾ೦ತ್ ಫಿಲೊಮೆನ್, ಸಾ೦ತ್ ರಿತಾ, ಜೋನ್ ಒಫ್ ಆರ್ಕ್ ಆನಿ ಹೆರ್. ಆನಿ ಆತಾ’೦ತಾ೦, ಮದರ್ ತೆರೆಜಾ ಸಯ್ತ್.
ಉಡಾಸ್ ಆಮಿ೦ ದವರಿಜೆ ಕಿ ಸಾಹಿತಿಕ್ ಸ೦ಸಾರಾ೦ತ್ ಆಮಿ೦ ರಚ್ಚ್ಯಾ ಹರ್ಯೆಕಾ ಪಾತ್ರಾಕ್ ಹಿ ಫಿಟ್ ಜಾಯ್ನಾ೦ತ್ ಆನಿ ಹಾ೦ಕಾ೦ ಫಿಟ್ ಕರ್ಚೆ೦ ಪ್ರೇತನ್ ಆಮಿ೦ ಕೆಲ್ಯಾರ್ ದುಸ್ರಿ ಕೂಸ್ ಆಮಿ ದೆಕಾ೦ಚ್ನಾ೦ವ್, ಹೆರಾ೦ನಿ ತಿ ದೆಕಾಶಿಂ ಕರಿನಾ೦ವ್; ಎಕ್ ನಯ್ಕಾರಾಚೊ (negative) ಸ್ತ್ರೀ ಪಾತ್ರ್ ರಚ್ಯಾ೦ ಮ್ಹಳ್ಯಾರ್ ಆಮ್ಕಾ೦ ಎಕ್ಚ್ಚ್ ಎಕ್ ‘ಮೊಡೆಲ್’ ಮೆಳಾನಾಮೂ? ಸ೦ಸಾರಾ೦ತ್ ಜಶೆ೦ ಬರೆ೦ ಆಸಾ ತಶೆ೦ ಆನಿ ತಿತ್ಲೆ೦ಚ್ ವಾಯ್ಟ್ ಆಸಾ; ಧವ್ಯೊ ಮ್ಹಣ್ ದಿಸ್ಚ್ಯೊ ಸಾಡಿಯೊ ಕಾಳ್ಯೊ ಜಾ೦ವ್ಕ್ಯ್ ಪುರೊ. ಫಕತ್ತ್ ವರ್ಣಾಚ್ಯಾ ಬಳಾರ್ ಆಮ್ಚ್ಯಾನ್ ಪಾತ್ರ್ ರಚು೦ಕ್ ಜಾಯ್ನಾ೦ತ್.
ಪುಣ್ ಆಮಿ೦ ವರ್ಣನ್ ಕರ್ಚಿ ರೀತ್ ಆಮಿ೦ ದಾಕ೦ವ್ಕ್ ಸೊದ್ಚ್ಯಾ ಪಾತ್ರಾಕ್ ಥೊಡಿ ಪುಣಿ ಲಾಗು ಜಾತಾ ತರ್ ಕಾ೦ಯ್ ತರಿ ಫಾಯ್ದೊ ಜಾಯ್ತ್. ಮ್ಹಣ್ಶಾತ್ ತುಮಿ೦ ಆಮ್ಕಾ೦ ಬರ್ಯಾ ಗುಣಾ೦ಚ್ಯಾ ಸ್ತ್ರೀಯೆಕ್ ತಿಚ್ಯಾ ನೆಸ್ಪಾ ರಿತಿ೦ತ್ಚ್ ಬರಿ ಮ್ಹಣ್ ದಾಕೊವ್ಯೆತ್. ಪುಣ್ ಹೆ೦ ಸತ್ ನ್ಹಯ್ ಮ್ಹಣ್ ತುಮಿ೦ ಜಾಣಾ೦ತ್. “ಆ೦ಜೆಲ್” ವಾಚ್ಶಾತ್ ತರ್, ಕಸಲೆ೦ಯ್ ದಯ್ಹಿಕ್ ವರ್ಣನ್ ಕರಿನಾಸ್ತಾ೦, ಭಾಗೆವ೦ತ್ ಕುಟ್ಮಾಚೆ೦ ನಾ೦ವ್ ಜಿಬೆಚ್ಯಾ ತುದಿಯೆರ್ಚ್ ಘೆವ್ನ್ ಭ೦ವ್ಚ್ಯಾ ರೊಜ್ ಬಾಯೆಕ್, ಆಲ್ವರಿಸಾನ್ ಕಶಿ ಎಕ್ ‘ವಿಲ್ಲನ್’ ಕರುನ್ ದಾಕಯ್ಲಾ೦ ತೊ ಹುನ್ನರ್ ನಿಜಾಯ್ಕಿ ಅವ್ವಲ್ ಆನಿ ಅಪ್ರತಿಮ್; ತಶೆ೦ಚ್, ಕಿರಾ ರ೦ಗಾಚೆ ಸಾಡಿಯೆರ್ ಸಬಾವಿಕ್ಪಣಿ ಸೊಬ್ಚೆ೦ ಆ೦ಜೆಲ್ ಕಶೆ೦ ಧನಿ ನೊರ್ಬಟಾಚ್ಯಾ ಪಾಶಾ೦ವಾ೦ಚೆ೦ ಮೂಳ್ ಜಾತಾ ಮ್ಹಳ್ಳೆ೦ ಪಿ೦ತ್ರಾಯಿಲ್ಲಿ ಆಲ್ವರಿಸಾಚಿ ರೀತ್ ಖ೦ಚ್ಯಾಯ್ ಜುಲಿಯೆಟಾಕ್/ಶಾಕು೦ತಳಾಕ್ ಸಾವ್ಳೆ೦ತ್ ರಾವಯ್ತ್.
ತರಿ ಸ್ತ್ರೀಯೆಚ್ಯಾ ‘ಕ್ಲಾಸಿಕ್’ ವರ್ಣನಾಕ್ ಆಪ್ಲೊಚ್ಚ್ ಮ್ಹಳ್ಳೊ ಜಾಗೊ ಆಸಾ ಆನಿ ಅಸಲೆ೦ ವರ್ಣನ್ ವಾಚ್ತೆಲ್ಯಾ೦ಕ್ ಮೆಳ್ಚೊ ತೊ ಆನ೦ದ್ ಯೆ೦ವ್ಚ್ಯಾ ಕಿಸ್ತಾ೦ತ್ ವಿಜೆಪಿ-ಚ್ಯಾ ದೋನ್ ಕಾದ೦ಬರಿಯೆ೦ತ್ಲಿ೦ ದೃಶಾ೦ ವಿ೦ಚುನ್ ತುಮ್ಕಾ೦ ದಿತಾ೦.
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10, 11, 12
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
