ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರುಸ್ತುರುಸಾಂವ್
ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್
ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್
ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್
ರುಸ್ತುರುಸಾಂವ್ - 2 . ಗ್ರೇಸ್ತ್ಕಾಯ್!
ಲ್ಯಾನ್ಸಿ ಪಿಂಟೊ ನಾಯಕ್
"ಮನ್ಶಾ ಜಾತಿಕ್ ಬರೆಂಪಣ್ ಕರ್ಚಿ ಗರ್ಜ್ ಆಸ್ತಾನಾ ದೆವಾನ್ ಖುದ್ದ್ ಯೆಂವ್ನ್ ಸ್ವಂತ್ ಕಿತೆಂಚ್ ಕೆಲ್ಲೆಂನಾ, ಬಗಾರ್ ಎಕಾ ದಾಕ್ಟುಲ್ಯಾ ಬಾಳಾಕ್ ಆವಯ್ಚಾ ಉದಾರಾಂತ್ ಜಲ್ಮ್ ದೀಂವ್ಕ್ ಆವ್ಕಾಸ್ ಕೆಲೊ. ಆಜ್ ನ್ಯೂಟನಾ ಥಾವ್ನ್ ಮದರ್ ತೆರೆಸಾ ಪರ್ಯಾಂತ್ ತಶೆಂಚ್ ಸ್ವಷ್ಟೀಕೃತ್ ಜಾಲ್ಲಿಂ ಮ್ಹಣ್ ಚಿಂತ್ಚೆಂಚ್ ಜೀವನ್ ಜಾವ್ನಾಸಾ" ಮ್ಹಣ್ ಏಕ್ ಪ್ರಖ್ಯಾತ್ ಸಾಹಿತಿ ಸಾಂಗ್ತಾ.
ಚಡಾವತ್ ಮನ್ಶಾ ಜಾತಿಂತ್ ಜಲ್ಮಾಲ್ಲ್ಯಾಂಕ್ ಜೀವನ್ ಮ್ಹಳ್ಯಾರ್ ಜಾತಾ ತಿತ್ಲಿ ಗ್ರೇಸ್ತ್ಕಾಯ್ ಮುಟಿಂತ್, ಸುಂದರ್ ಪುಡ್ಪುಡಿತ್ ಸುಡ್ಸುಡಿತ್ ಸಾಂಗಾತಿ ಸಾಂಗಾತಿಣ್ ಬಗ್ಲೆಕ್, ಗೆಲ್ಲೆಕಡೆ, ಆಯಿಲ್ಲೆಕಡೆ ಮಾನ್ ಗೌರವ್ ಉಪ್ರಾಂತ್ ಆನಿ ಹುದ್ದ್ಯಾಂತ್ ’ಸಕತ್’ ಇತ್ಯಾದಿ ಇತ್ಯಾದಿ ಅವಪ್ಣಾಂ ಆಸ್ತಾತ್.
ಕೊಣ್ ಎಕ್ಲೊ ಇಜ್ನೆರ್ ಜಾತಾ, ಅನ್ಯೇಕ್ಲೊ ವಯ್ಜ್/ದೊತೊರ್ ಜಾತಾ ಎಕ್ಚ್ ಉದ್ದೇಶ್ ಸಮಾಜಿಕ್ ಸೆವಾ ವ ವಾವ್ರ್ ದಿಂವ್ಚೊ ಆನಿ ತಾಚಾಕೀ ಚಡ್ ಮಾಪಾನ್ ಪಾಟಿಂ ಘೆಂವ್ಕ್ ಪೆಚಾಡ್ಚೆಂ. ಹರ್ಯೆಕ್ ವ್ಹಡಿಲಾಂ ಭುರ್ಗ್ಯಾಥಾವ್ನ್ ಕಿತೆಂ ಅಶೆತಾತ್?! ಬರೊ ನಾಗರಿಕ್ ಜಾಯ್ಜಯ್ ಮ್ಹಣ್ ಚಿಂತಾತ್ ತರೀ ಬರೆ ಪಯ್ಶೆ ಜಲ್ಮಾಲ್ಲ್ಯಾ ಹರ್ಯೆಕಾ ಜಿವಿಕ್ ಝುಜ್ ಏಕ್ ಅನಿವಾರ್ಯ್ ಸಂಗಪ್. ಎಕಾ ದೇಶಾಕ್, ಎಕಾ ರಾಜ್ಯಕ್ ವ ಎಕಾ ಮನ್ಶಾಕ್ ’ಝುಜ್’ ಏಕ್ ಚುಕೊಂಕ್ ಅಸಾಧ್ಯ್ ಜಾಲ್ಲಿ ಸಂಗತ್.
ಹೆಂ ಝುಜ್ ಅಪ್ಲ್ಯಾ ಅಸ್ಮಿತ್ಕಾಯೆಖಾತಿರ್, ಆಪ್ಲ್ಯಾ ಹುದ್ದ್ಯಾಖಾತಿರ್, ಆಪ್ಲ್ಯಾ ದರ್ಭಾರಾಖಾತಿರ್, ಆಪ್ಲ್ಯಾ ಮತ್ಲಾಭಾಖಾತಿರ್, ಆಪ್ಲ್ಯಾ ’ಪವರಾ’ಖಾತಿರ್.. ಎಕಾ ಉತ್ರಾನ್ ಆಪ್ಲ್ಯಾ ಸ್ವಾರ್ಥಾಚಾ ಫಾಯ್ಯಾಖಾತಿರ್. ಮನ್ಶಾಕ್ ಅಪುಣ್ ಕಿತ್ಲೊಂ ಊಂಚ್ ವೆತಾ ತೆಂ ಮುಖ್ಯ ನ್ಹಯ್, ಅಪ್ಣಾಚಾ ಸಕ್ಲಾ ಕಿತ್ಲೆ ಜಣ್ ಆಸಾತ್ ತೆಂ ಮುಖ್ಯ.
ಹ್ಯಾ ಖಾತಿರ್ ಝುಜ್..!! ಹ ಹ ಹ!!
ಝುಜ್ - ಥೊಡ್ಯಾಂಕ್ ಗ್ರೇಸ್ತ್ ಜಾಂವ್ಕ್!
ಝುಜ್ - ಥೊಡ್ಯಾಂಕ್ ದುಬ್ಳೆಂ ಕರುಂಕ್!!
ಝುಜ್ - ಜಿಯೆಂವ್ಕ್ ಆನಿ ಮೊರೊಂಕ್ ಸಂಬಂಧ್ ಜಾಲ್ಲೆಂ.
ಝುಜ್ - ನಿರ್ಮಾಣಾಕ್ ಆನಿ ವಿನಾಶಾಕ್ ಸಂಬಂಧ್ ಜಾಲ್ಲೆಂ.
ತ್ಯಾ ಖಾತಿರ್ ಖಂಚಾಯ್ ಪರಿಗತೆಂತ್ಯೀ ಮನ್ಶಾನ್ ಅಪ್ಲಿಂ ಝುಜಾಂ ನಿರ್ಲಕ್ಷಾ ಕರುಂಕ್ ಸಾಧ್ಯ್ ನಾಂತ್. ಆನಿಂ ಝುಜಾಕ್ ಹಾತೆರ್.. ಮುಖ್ಯ ಜಾವ್ನ್ ಪಯ್ಶೆ! ತಾಚಾ ಬರಾಬರ್ ಮುಖಾರ್ಸುಂಕ್ ಮಾನಸಿಕ್ ಸಕತ್. ಅಪ್ಲ್ಯಾ ಲಾಗ್ಶಿಲ್ಯಾಂಥಾವ್ನ್ ವ ಇಸ್ಟಾಂಥಾವ್ನ್ ಸಹಕಾರಾಚೆಂ ಭಳ್. ವ್ಹಡ್ಲಿ ವಳೊಕ್, ಕಾಯ್ದೆ ಕಾನುನಾಂ ಮೊಡ್ಚಿ ಸಕತ್, ವಾಂಕ್ಡ್ಯಾ ವಾಟಾಂನಿ ಧಯ್ರ್, ಭಿರಾಂತ್ ಉಭ್ಜಾಂವ್ಚಿ ವಿಧ್ಯಾ ಇತ್ಯಾದಿ.
ಸಗ್ಳೆಂ ಆಸ್ಲ್ಯಾರ್ಯೀ ಮನಿಸ್ ಜಿಕ್ತಾಗೀ? ಜಿಕ್ತಾಗೀ?? ಜಿಕ್ತಾಗೀ?? ತೆಂ ಏಕ್ ಸವಾಲ್!!
ಹ ಹ ಹ ವಿಚಿತ್ರ್ ಸವಾಲ್. ಆಮ್ಚೊ ದೇಶ್ ದುಬ್ಳೊ, ಆಮ್ಚೆಂ ರಾಜ್ಯ್ ದುಬ್ಳೆಂ ಆನಿಂ ಆಮ್ಚೆಂ ಕುಟಾಮ್ ದುಬ್ಳೆಂ.. ಹೆಂ ಉಸಾಣೆಂ.
ದುಸ್ರ್ಯಾ ವಾಂಟ್ಯಾನ್ .. ಎಕಾ ಉತ್ರಾನ್ ಸಾಂಗ್ಚೆಂ ತರ್ ಆಮ್ಚೆಲಾಗಿಂ ಗ್ರೇಸ್ತ್ಕಾಯ್ ನಾ. ವ್ಹಯ್ಗೀ? ಕಸಲಿ ಗ್ರೇಸ್ತ್ಕಾಯ್ ಆನಿಂ ಕಿತ್ಲಿ?! ಗ್ರೇಸ್ತ್ಕಾಯ್ ಮ್ಹಳ್ಯಾರ್ ಚಡಾವತ್ ಚಿಂತಾಪ್ ಪಯ್ಶ್ಯಾಂಚೆಂ ಭಳ್ - ಮನಿ ಪವರ್. ಉರ್ಲ್ಲ್ಯೊ ಗ್ರೇಸ್ತ್ಕಾಯೊ ಆಮಿ ನೆಣಾಂವ್. ಗ್ರೇಸ್ತ್ ಮ್ಹಳ್ಯಾರ್ ಕಿತ್ಲೆ ಪಯ್ಶೆ ಆಸ್ಲ್ಲೊ? ತೇಂವೀ ’ಫಿಗರ್’ ಆಜ್ಕಾಲ್ ಸಾಂಗೊಂಕ್ ಧಯ್ರ್ ಮೆಳಾನಾ. ಲಾಖಾಂನಿ ಆಸ್ಲ್ಲೊ ಗ್ರೇಸ್ತ್ಗೀ?, ಕೊರೊಡಾಂನಿ ಆಸ್ಲ್ಲೊ ಗ್ರೇಸ್ತ್ಗೀ?! ದಾನ್ ದಿತಲೊ ಗ್ರೇಸ್ತ್ಗೀ?? ಸೂಟ್ಬೂಟ್ ನೆಸ್ತಾಲೊ ಗ್ರೇಸ್ತ್ಗೀ???ರಾತಿಚಿ ಸುಶೆಗಾತ್, ಪಿಂದ್ಲ್ಲ್ಯಾ ಖಲ್ಸಾಂವಾಂತ್ ಬಾಯ್ಲೆಚಾ ಬಗ್ಲೆಕ್ ಸಮಧಾನೆಚಿ ನೀದ್ ಕಾಡ್ಚೊ ಏಕ್ ಸಾದೊ ದೀಸ್ಪಡ್ತೊ ಗ್ರಾಸ್ ಜೊಡ್ಚೊ ಗ್ರೇಸ್ತ್?! ...
ಹೆಂ ರೋದ್ ವ್ಹಡ್ ಆಸಾ.. ಆಸೊಂ!! ಭಾರತೀಯ್ ಬರವ್ಪ್ಯಾಂಚಾ ಮಾಂಚಿಯೆರ್ ಎಕಾ ಜಮಾತೆಚಾ ವಿರಾಮಾಚಾ ವೆಳಾರ್ ವೆಳಾರ್ ಎಕಾ ಬರವ್ಪ್ಯಾನ್ ವಾಸ್ತವ್ ಪರಿಗತೆವಿಶಿಂ ಅಪ್ಲಿ ಅಭಿಪ್ರಾಯ್ ಚಾಯೆಚೆಂ ಕೋಪ್ ತೊಂಡಾಂತ್ ಚಾಕೊನ್ ಸಾಂಗ್ಲೆಂ.
"ಆಮ್ಚಾ ಭಾರತಾಂತ್ ಇತ್ಲಿ ಪುರಾ ಲಡಾಯ್, ಝಗ್ಡಿಂಂ, ಲೂಟ್ಮಾರ್, ದಂಗೆ ಜಾಂವ್ಕ್ ಕಾರಾಣ್ ಆಮ್ಚ್ಯಾ ಲೊಕಾಂಚಿ ದುಬ್ಳಿಕಾಯ್.. ದುಬ್ಳಿಕಾಯೆನ್ ಮನಿಸ್ ಫಸ್ತಾತ್, ನಾಕಾ ಜಾಲ್ಲ್ಯಾ ಕಾಮಾಂತ್ ಘುಸ್ತಾತ್ ಆನಿಂ ಅಭಿವೃದ್ದೆಕ್ ಅಡ್ಕಳ್ ಹಾಡ್ತಾತ್.."
ಎಕಾ ಘಡ್ಯೆ ತೆಂ ಸಾರ್ಕೆಂ ದಿಸ್ತಾನಾಂ ಫಟ್ ಕರ್ನ್ ಅನ್ಯೇಕ್ ಬರವ್ಪಿ (ವೃತ್ತೆಂತ್ ದೊತೊರ್) ಉಲಯ್ಲೊ;
"ತಶೆಂ ತರ್ ಫಾಲ್ಯಾಂ ಆಮ್ಚಾ ಭಾರತ್ ಸರ್ಕಾರಾನ್ ಹರ್ಯೆಕ್ಲ್ಯಾ ಅಪ್ಲ್ಯಾ ಪ್ರಜೆಕ್ ಧಾ ಧಾ ಲಾಖ್ ರುಪಯ್ ನೋಟ್ ಛಾಪುಂಕ್ ದಿಲ್ಯಾರ್ ಆಮ್ಚೊ ದೇಶ್ ’ಮಹಾನ್’ ಜಾವ್ನ್, ಲೋಕ್ ಆನಿ ದೇಶ್ ಗ್ರೇಸ್ತ್ ಜಾಂವ್ಕ್ ಸಕಾತ್ಗೀ?"
ಹ್ಯಾ ಸವಾಲಾನ್ ಥಂಯ್ ಆಸ್ಲೆಲ್ಯಾ ಸರ್ವಾಂಚಾ ಮತಿಕ್ ಜಾಗಯ್ಲೆಂ ಆನಿಂ ಅಪಾಪ್ಲ್ಯಾ ಹಾತಾಂನಿ ಆಸ್ಚಿಂ ಚಾಯೆಚಿಂ ಕೊಪಾಂ ಸಕ್ಲಾ ಗಳಯ್ಲಿಂ. ಖಾಂವ್ಚೆಂ ತೋಂಡ್ ಎಕಾ ಘಡ್ಯೆ ಶಿಂವ್ಲ್ಲೆಪರಿಂ ಜಾಲೆಂ. ಸವಾಲಾಂತ್ಲ್ಯಾ ಸಂಸಾರಾಂತ್ಲೆಂ ಭಾಯ್ರ್ ಆಯಿಲ್ಲ್ಯಾ ಉಪ್ರಾಂತ್ ಎಕೆಕ್ಲೆ ಫಿಂರ್ಗಾಲೆ;
"ಬರೆಂ ಸವಾಲ್!" ದಾಕ್ತೆರ್ ಹಾಸ್ಲೊ. "ಬರ್ಯಾ ಸವಾಲಾಕ್ ಬರಿ ಜಾಪ್ಯೀ ಸಾಂಗಾ?!" ಅಪ್ಲ್ಯಾಚ್ ಮರ್ಜೆಚ್ಯೊ ಹಾಸೊ ಹಾಸ್ಲೊ. ಜಾಪಿ ವ್ಹಳೂ ಅಪಧಯ್ರಾನ್ ಭಾಯ್ರ್ ಸರ್ಲ್ಯೊ "ಪಯ್ಶೆ ದಿಲ್ಲೆಫರಾ ಗ್ರೇಸ್ತ್ ಕರುಂಕ್ ಜಾಯ್ನಾ"
"ಪಯ್ಶೆ ತಾತ್ಕಾಲಿಕ್ ಪರಿಹಾರ್.. ತಾಂತುಂ ದೇಶ್ ಮಹಾನ್ ವ ಗ್ರೇಸ್ತ್ ಜಾಯ್ನಾ"
’ದೇಶಾಕ್ ಉನ್ನತೆಂತ್ ಮೆಜ್ಚಿಂ ಆನಿ ಮನ್ಶಾಕ್ ಗ್ರೇಸ್ತ್ಕಾಯೆನ್ ಮೆಜ್ಚಿಂ ಹಾತೆರಾಂ ಆನಿ ಮಾಪ್ ವಿಂಗಡ್ ಆಸಾತ್.. ಪಯ್ಶಾಂನಿ ಜಾಯ್ನಾಂ’ ’ಪಯ್ಶ್ಯಾಂಧ್ವಾರಿಂ ವೀದ್ವಾವ್ಳಿ ಅನಿಕೀ ಚಡ್ತೆಲ್ಯೊ ಆನಿ ಮನಿಸ್ ಅನಿಕೀ ಸಕ್ಲಾ ಪಡ್ತಾಲೊ’ ’ಮನಿಸ್ ಪಯ್ಶ್ಯಾಂಚೊ ದುರುಪಯೋಗ್ ಕರ್ತಲೊ. ಎಕಾಮೆಕಾ ಸ್ವಾರ್ಥಿ, ಮತ್ಲಾಬಿ, ಜಾತಲೊ.. ಲುಟ್ಚೆಂ, ಫಾರ್ಚೆಂ, ಮವಾಲಿಪಣ್ ಚಡ್ತೆಲೆಂ.. .. ಇತ್ಯಾದಿ’
ದೊತೊರಾನ್ ಅಖ್ರೇಕ್ ಹಾಸೊನ್ಂಚ್ ವ್ಹಳೂ ತೋಂಡ್ ಉಗ್ತೆಂ ಕೆಲೆಂ;
"ಕೆದ್ನಾಂವರೇಗ್ ಪಯ್ಶೆ ಕಶೆ ಉಪ್ಯೋಗ್ ಕರಿಜಾಯ್ ಮ್ಹಳ್ಳೆಂ ಶಿಕಾಪ್ ಆನಿ ಸಮ್ಜಣಿ ಆಮ್ಕಾಂ ನಾ, ತೆದ್ನಾಂವರೇಗ್ ಪಯ್ಶೆ ದೀಂವ್ನ್ ಕೊಣಾಯ್ಕೀ ಗ್ರೇಸ್ತ್ ಕರುಂಕ್ ಜಾಯ್ನಾಂ. ಆಮ್ಚಾ ಮತಿಂತ್ಲೆಂ ’ದುಬ್ಳೆಂ’ ಚಿಂತಾಪ್ ಕಾಡ್ನ್ ಉಡವ್ನ್ ಬರೆಂ ’ಗ್ರೇಸ್ತ್’ ಚಿಂತಾಪ್ ಹರ್ಯೆಕ್ಲ್ಯಾನ್ ಹಾಡ್ನ್ ಕಾಂಯ್ ತರ್ಯೀ ಬರೆಂ ಕಾಮ್ ನಿಷ್ಟೆನ್ ಶ್ರದ್ದೆನ್, ಮಿನತೆನ್ ಪ್ರಾಮಾಣಿಕ್ಪಣಾನ್, ಸಮರ್ಪಿತ್ ಮನೋಭಾವಾನ್ ಕೆಲೆಂ ತರ್ ಮಾತ್ರ್ ಖಂಡಿತ್ ಆಮ್ಚಿ ಆನಿ ದೇಶಾಚಿ ಪ್ರಗತಿ ಉದರ್ಗತಿ ಜಾಂವ್ನ್ ಶಿಸ್ತೆಭರಿತ್ ’ಗ್ರೇಸ್ತ್’ ಜಾಂವ್ಚೆಂ ಸ್ವಪಾಣ್ ಪಳೆವ್ಯೆತ್.."
ತೊ ಸಾಂಗೊನ್ಂಚ್ ಗೆಲೊ. ಪುಣ್ ಅಮಿಂ ಮತಿಭಿತರ್ಚ್ ಚಿಂತುಂಕ್ ಪಡ್ಲ್ಯಾಂವ್; ’ಅಶೆಂ ಜಾಂವ್ಚೆಂ ಕೆದಾಳಾ?! ಆನಿಂ ಜಾಯ್ತ್ಗೀ?!’ ಖಂಡಿತ್ ಸಾಧ್ಯ್ ಆಸಾ.. ಆಮಿಂ ಹರ್ಯೆಕ್ಲ್ಯಾಂನಿ ಪ್ರೇತನ್ ಕೆಲ್ಯಾರ್. ದುಬ್ಳಿಂ ಮನ್ಶಾಂ ಗ್ರೇಸ್ತ್ ನಾಂತ್ಗೀ?! ತೀನ್-ಚಾರ್ ಸಾದ್ಯಾ ಕಾಪ್ಡಾಂನಿ ಸಂಸಾರ್ ಪ್ರಖ್ಯಾತ್ ಜಾಲ್ಲಿ ಮದರ್ ತೆರೆಜಾ.. ದುಬ್ಳಿಗೀ ಗ್ರೇಸ್ತ್?!
ಮ್ಹಜೆಂ ಹೆಂ ’ರುಸ್ತುರುಸಾಂವ್ ನ್ಹಯ್’ ಬಗಾರ್ ’ಜಿಂಗ್ರಿಪಿಸಾಂವ್’ ಮ್ಹಣ್ ಭೊಗೊಂಕ್ ಪುರೊ. ಮುಖಾರ್ ಮುಖಾರ್ ರಾಕೊನ್ ರಾವಾತ್.. ಕಿತೆಂ ಆಸ್ತೆಲೆಂ ಹ.. ಹ.. ಹ.. ಉಜ್ಯಾಚೊ ಪಾವ್ಸ್ ಪಡ್ಚೊ ಅನ್ಭೋಗ್ ಜಾಣಾಂತ್ಗೀ?!
ನಾಂ.. ಬಿಲ್ಕುಲ್ ನಾಂಮೂ? ಬರೆಂ.. ಆಮ್ಚಾ ಕೊಂಕ್ಣಿ ಪಂಡಿತಾನ್ ಸಾದ್ಯಾ ಗಾಂವ್ಚಾ ಭುರ್ಗ್ಯಾಂಕ್ ಕೊಂಕ್ಣಿ ವ್ಯಾಕರಣ್ ಶಿಕಂವ್ಚೆಂ ಪ್ರೇತನ್ ಕೆಲೆಂ. ಸ್ತ್ರೀಲಿಂಗ, ಪುಲಿಂಗ, ಅನಿ ನಪುಂಸಕ ಲಿಂಗ ತರೀ ಕೊಂಕ್ಣೆಂತ್ ’ಲಿಂಗ’ ತಾಚಾ ಮತಿಕ್ ಸಾರ್ಕಿಂ ಸಮ್ಜಾಲಿಂ ನಾಂತ್ ದೆಕುನ್ ತಾಣೆಂ ಹೊಂದ್ವೊಂವ್ಚೆಂ ಸಬ್ಧ್ ವಿಚಾರ್ಲೆಂ.
"ರೆಡ್ಯಾಕ್ ರೆಡಿ ಜಾತಾ ತರ್ ಘೊಡ್ಯಾಕ್ ಕಿತೆಂರೆ ಬಾಬಾ?"
"ಘೊಡಿ"
"ವೆರ್ರಿ ಗುಡ್!" ಖುಶೇನ್ ಮುಖ್ಲಿಂ ಸವಾಲಾಂ ಕೆಲಿಂ;
"ಪಾಡ್ಯಾಕ್?"
"ಪಾಡಿ"
"ಚೆಡ್ಯಾಕ್?"
"ಚೆಡಿ"
"ಛೆಕ್ಕ್!.. ಪಂಡಿತ್ ದೆದೆಸ್ಪ್ರಾರ್ ಜಾಲೊ.
"ಖಂಯ್ಸರ್ಗೀ ಚೂಕ್ ಘಡ್ಲ್ಯಾ ನ್ಹಯ್ಗೀ?"
ಮುಖ್ಲ್ಯಾ ರುಸ್ತುರುಸಾಂವಾಚೆರ್ ಯೆತೆಲೆಂ ’ಚೂಕ್’
ವಾಚುಂಕ್ ಯೆತೆಲೆಂ ’ದೂಕ್’
ಹ ಹ ಹ.. ರಾಕ್ಚೆಂ ಆನಿಂ ರಾಕ್ಚೆಂ...!!
ರುಸ್ತುರುಸಾಂವ್ - 1. ರೋದ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
