ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ತುಂ ಜೆದ್ನಾಂ ಬೌತಿಕ್ ಸುಖಾಚೊ ಪಾಟ್ಲಾವ್ ಕರ್ತಾಯ್ ತೆದ್ನಾಂ ದೂಕ್ ತುಜೊ ಪಾಟ್ಲಾವ್ ಕರ್ತಾ, ಜೆದ್ನಾಂ ತುಂ ಸಮ್ಜಣೆಚೊ ಪಾಟ್ಲಾವ್ ಕರ್ತಾಯ್ ತೆದ್ನಾಂ ಬೌತಿಕ್ ಸುಖ್ ತುಜೊ ಪಾಟ್ಲಾವ್ ಕರ್ತಾ"
ಜೆದ್ನಾಂ ಗಾಡಾಂವ್ ಗೊಡೊ ಜಾತಾನಾ
ವರಸ್ : 2007
ಅಂಕೊ : 33
ಮಯ್ನೊ : ಮಾರ್ಚ್
ಸಂಪಾದಕೀಯ್ - 33.
ವಲ್ಲಿ ಕ್ವಾಡ್ರಸ್
ಪರ್ಗಾಂವಾಂತ್ಲ್ಯಾ ಕೊಂಕ್ಣಿ ಸಮಾಜೆಕ್ ಡಯಾನ್ ಡಿ’ಸೋಜಾಚಿ ವಳೊಕ್ ಕರ್ನ್ ದಿಂವ್ಚಿ ಗರ್ಜ್ ನಾ, ಹಾಚಿಂ ಕಾಮಾಂ, ಸಮಾಜ್ಸೆವಾಚ್ಚ್ ಹಾಚಿ ವಳೊಕ್ ಕರ್ನ್ ದಿತಾತ್. ಕೊಣ್ ಹಾಕಾ ರಾಜಕೀಯ್ ಮನಿಸ್ ಮ್ಹಣೊಂದಿ, ಕೊಣ್ ಹಾಕಾ ನಾಂವಾ ಖಾತಿರ್ ಹೆಂ ಕರ್ತಾ ಮ್ಹಣೊಂದಿ, ಪುಣ್ ಹೊ ಮಾತ್ರ್ ಹ್ಯಾ ಸಮಾಜೆಂತ್ ಮನ್ಶಾ ರುಪಾರ್ ಜಿಯೆಂವ್ಚಾ ಎಕೆಕಾ ಅನಿಶ್ಟ್ ವರ್ಗಾಚಾ ಮನ್ಶ್ಯಾಂಚೊ ಪಡ್ದೊ ಉಘಡ್ನ್ಂಚ್ ವೆತಾ...
ಆಯ್ಲೆವಾರ್ ಪುತ್ತೂರ್ಚ್ಯಾ ಎಕಾ ಕ್ರಿಸ್ತಾಂವ್ ಬಾಯ್ಲೆಕ್, ಎಮಿಲಿಯಾಕ್ ಕಾಮಾಕ್ ದವರ್ನ್ ಖಂಚ್ಯಾ ರಿತಿಚೆಂ ಮಾನಸಿಕ್ ತಶೆಂ ದೈಹಿಕ್ ರಿತಿನ್ ಕಶ್ಟ್ ದಿಲ್ಲೆಂ ಘಡಿತ್ ವಾಚುಂಕ್ ಮೆಳ್ಳೆಂ. ಆಜ್ಕಾಲ್ ಖಬ್ರೊ ಕರ್ಚ್ಯಾ ಸ್ಪರ್ಧ್ಯಾಂತ್ ಮೀಡಿಯಾನ್ ಖೆಳ್ಚ್ಯಾ ಸರ್ಕಸಾಕ್ ಶೆಂಭೊರ್ ಠಕ್ಕೆ ಪಾತ್ಯೆಂವ್ಕ್ ಜಾಯ್ನಾ, ’ಸು’ ಆಸ್ಚಾಕ್ ’ಸುಕುರುಂಡೆ’ ಕರ್ತಾತ್! ಪುಣ್ ಉಜೊ ನಾಸ್ತಾಂ ಧುಂವರ್ ಉಟೊಂಕ್ಯ್ ಸಾಧ್ಯ್ ನಾ ದೆಖುನ್ ಹೆಂ ಘಡಿತ್ ಸತ್ ಮ್ಹಣ್ಚ್ಯಾಂತ್ ಕಾಂಯ್ ದುಭಾವ್ ನಾ. ಪುಣ್ ವಿಜ್ಮಿತಾಯೆಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಹಿಕಾ ಕಾಮಾಕ್ ದವರ್ಲೆಲಿಂ ಸಯ್ತ್ ಕ್ರಿಸ್ತಾಂವಾಂ, ತಿಂಯೀ ಆಮ್ಚಿಂ ಮಂಗ್ಳುರ್ಚಿಂ ಕ್ರಿಸ್ತಾಂವಾಂ - ವ್ಹಾ! ಆಯ್ಚಾ ದಿಸಾ ಸರ್ವ್ ಮಂಗ್ಳುರಿ ಕ್ರಿಸ್ತಾಂವಾಂನಿ ಹರ್ದೆಂ ಪೆಟುನ್ ಆಮಿಂ ಕ್ರಿಸ್ತಾಂವಾಂ ಮ್ಹಣ್ಚೊ ದೀಸ್ ಪರತ್ ಉದೆಲಾ...
ಅಶೆಂ ಮ್ಹಣ್ತಾನಾ ಮ್ಹಜ್ಯಾ ಮತಿಕ್ ಅನ್ಯೇಕ್ ಸಂಗತ್ ಝಳ್ಕತಾ - ಆಮ್ಚಿ ಮಂಗ್ಳುರಿ ಸಮಾಜ್ ಉದೆಂತಿಚಾ ರೊಮಾಚಿ ದೆವಾಚಿ ವಿಂಚುನ್ ಕಾಡ್ಲೆಲಿ ಪರ್ಜಾ, ಆಮ್ಕಾಂ ಜಲ್ಮಾ ಥಾವ್ನ್ ಮೊರ್ತಾ ಪರ್ಯಾಂತ್ ಮೀಸ್-ಮಾಸ್, ಕುಮ್ಸಾರ್-ಕುಮ್ಗಾರ್, ದಾನ್-ಧರ್ಮ್ ಹೆಂ ಚಿಂತಾಪ್ ಆಮ್ಚಾ ಶಿರಾಂ ಶಿರಾಂನಿ ವ್ಹಾಳ್ತಾ. ಬಾಪ್ತಿಜ್ಮಾಚಾ ದಿಸಾ ಥಾವ್ನ್ ಮೊರ್ನಾಚಾ ಫೊಂಡಾಕ್ ವೆತಾ ಪರ್ಯಾಂತ್ ಆಮಿ ವಾಸ್ಚೊ ವಾಂಜೆಲ್, ಆಮಿಂ ಆಯ್ಕೊಂವ್ಚಿಂ ಮಿಸಾಂ, ಆಮಿಂ ಗಾಂವ್ಚಿಂ ಕಾಂತಾರಾಂ, ಹರ್ಯೆಕಾ ಕರೆಜ್ಮಾವೆಳಾರ್ ಆಮಿಂ ರೆತಿರೊ ಕರ್ತಾಂವ್, ವರ್ಸಾಕ್ ಕಿತ್ಯಾಕ್, ಮಯ್ನ್ಯಾ ಮಯ್ನ್ಯಾಕ್ ಕುಮ್ಸಾರ್ ಜಾವ್ನ್ ಪಾತ್ಕಾಂ ಕರ್ಚೆಂ ಲೈಸನ್ಸ್ ರಿನೀವ್ ಕರ್ತಾಂವ್. ಆಮ್ಚಾ ಭಾಗೆವಂತ್ಪಣಾಚೊ, ಆನಿ ದಾನ್ ಧರ್ಮಾಚೊ ಕುರುಃ ಆಮ್ಚಾ ಫಿರ್ಗಜೆಂತ್ಲ್ಯಾ ಭಾಂದ್ಪಾಂನಿ ಆಸ್ಚಾ ದುದಾಫಾತ್ರಾಚೆರ್ ಪಳೆಯಾ, ಸೊವಿನಿಯರಾಂನಿ ಪಳೆಯಾ, ಆಮ್ಚಾ ಸಮಾಜೆಂತ್ಲ್ಯಾ ಆಶ್ರ್ಯಾಂನಿ ಪಳೆಯಾ - ಆಮ್ಚಿಂ ನಾಂವಾಂ ಕಿತ್ಲಿ ಝಿಳ್ಮಿಳ್ತಾತ್ ಮ್ಹಳ್ಳೆಂ. ಪರ್ಗಾಂವಾಂತ್ ಆಸೊನ್ ಗಾಂವಾಕ್ ಗೆಲ್ಲೆವೆಳಾರ್ ಪರತ್ ರೆತಿರೆಂಕ್ ವಚೊಂಕ್ ದಿಸಾನ್ ದೀಸ್ ರೆತಿರ್ಯಾಂಚಿಂ ಮಂದಿರಾಂ ಉಭಿಂ ಜಾತಾತ್. ಇತ್ಲಿಂ ಭಾಗೆವಂತ್ ಆಮಿ ಅಸಲಿ ಜಿಣಿ ಜಿಯೆತಾಂವ್? ಹ್ಯಾ ಆಮ್ಚಾ ಜಿಣ್ಯೆಚೆರ್ ಆಮಿಂ ಆಮ್ಚೆಂ ಹರ್ದೆಂ ಪೆಟಿನಾಂವ್ ತರ್ ಆನಿ ಕೊಣೆಂ ಪೆಟ್ಚೆಂ ನ್ಹಂಯ್ಗಿ?
ಏಕ್ ಲ್ಹಾನ್ ಸವಾಲ್; ಇಗರ್ಜೆಂತ್ ವ್ಹಡ್ ವ್ಹಡ್ ಭಾಂದ್ಪಾಂ ಉಭಾರ್ಚಾ ಪಾದ್ರಿಂಕ್ ತಾಂಚ್ಯಾ ಫಿರ್ಗಜೆಂತ್ ಕಿತ್ಲಿಂ ಪರ್ಗಾಂವಾಂತ್ ಆಸಾತ್? ಕೋಣ್ ಕೋಣ್ ಖಂಚ್ಯಾ ಖಂಚ್ಯಾ ಕಾಮಾರ್ ಆಸಾತ್ ಮ್ಹಳ್ಳೆಂ ಕಳಿತ್ ಆಸಾ. ಫಕತ್ ಗಾಡಿ ಬಂಗ್ಲೊ ಆಸ್ಚಾಂಗೆರ್ ಮಾತ್ರ್ ವಚೊಂಕ್ ಹಾಂಕಾಂ ಫುಟ್ವಾತಾ? ಎಮಿಲಿಯಾ ತಸಲಿಂ ಗರೀಬಾಂ ಖಂಚ್ಯಾ ಸ್ಥಿತೆರ್ ಆಸಾತ್? ತಾಂಚಿಂ ಧನ್ಯಾಂ ಕಸಲಿಂ? ಸಾರ್ಕೊ ಸಾಂಭಾಳ್ ಮೆಳ್ತಾಗೀ? ಹೆಂ ಸರ್ವ್ ಕೊಣಾಯ್ಕ್ಯೀ ಪಡೊನ್ ಗೆಲಾಂ? ವಾ ಹ್ಯಾವಿಶಿಂ ಕೊಣ್ಯ್ ಚಿಂತುಂಕ್ ಗೆಲಾಂ? ಆಮ್ಕಾಂಯ್ ಜಾಯ್ ಫಕತ್ತ್ ಭಾಂದ್ಪಾಂ - ಮೊರೊನ್ ಕುಸೊನ್ ವೆಚ್ಯಾ ಕುಡಿಕ್ ಪುರ್ಲ್ಲ್ಯಾ ಫೊಂಡಾಚೆರ್ಯೀ ಭಾಂದುಂಕ್ ಆಶಾ - ಭಾಂದ್ಪಾಂ!!
ಜೆಜುಚೆ ಪಾಟ್ಲಾವ್ದಾರ್ ಆಮಿ - ಪುಣ್ ಜೆಜುನ್ ಆಪ್ಲ್ಯಾ ಜಿಣ್ಯೆಂತ್ ಖಂಚೀಂಯ್ ಭಾಂದ್ಪಾಂ ಬಾಂಧುಂಕ್ ಗೆಲ್ಲೆಂ ಕೊಣೆಂಯ್ ಆಯ್ಕಲಾಂ? ತರ್ ಫಕತ್ತ್ ಕೊಂಕ್ರೆಟೆಚಿಂ ಭಾಂದ್ಪಾಂ ಭಾಂದ್ಚೊ ಹೊರ್ಭೊಸ್ ಲಾಗ್ಲ್ಲ್ಯಾ ಪಾದ್ರಿಂಕ್ ಹೊ ಹೊರ್ಭೊಸ್ ಖಂಚ್ಯಾ ದೆವಾನ್ ದಿಲ್ಲೊ?
ಥೊಡ್ಯಾಚ್ ದಿಸಾಧಿಂ ಅನ್ಯೇಕ್ಲಿ ಗಾಂವ್ಚಿ ಬಾಯ್ಲ್ - ಎಕಾ ವೀಲ್ಚೆರಾಚೆರ್ ಅಪ್ಣಾಕ್ ಚಲೊಂಕ್ ಸಾಧ್ಯ್ ನಾ ದೆಖುನ್ ಮ್ಹಜಿ ಮಜತ್ ಕರಾ ಮ್ಹಣ್ ಪರ್ಗಟ್ ರಿತಿನ್ ರಡ್ಚೆಂ ದೃಶ್ಯ್ ಪಳೆಂವ್ಕ್/ವಾಚುಂಕ್ ಮೆಳ್ಳೆಂ. ಹಾಂತುಂ ಕಿತ್ಲೆಂ ಸತ್ ಆಸಾ ಆನಿ ಕಿತ್ಲೆಂ ಖಬ್ರೆ ಮಾಧ್ಯಮಾನ್ ಫೊಣ್ಣ್ ಘಾಲಾಂ ತೆಂ ನೆಣಾಂ ತರ್ಯೀ ಹೆಂ ವಾಚುನ್ ಲೊಕಾಂಕ್ ಖರೆಂಚ್ ಜಾವ್ನ್ ಹ್ಯಾ ಸಂಸಾರಾಂತ್ ಮನ್ಶಾಪಣಾಚೆಂ ಮೋಲ್ ಉಗ್ಡಾಪೆಂ ಜಾಲೆಂ. ಆಯ್ಲೆವಾರ್ ಕವಿ ಆಂಡ್ರುನ್ ಬರಯಿಲ್ಲ್ಯಾ ಕವಿತೆಚಿಂ ಅಖ್ರೇಚಿಂ ಉತ್ರಾಂ ಉಲಯ್ಲಿಂ;
"ಜಾಗ್ಯಾಚಿಂ ಮೊಲಾಂ ಧರುಂಕ್
ಮೊಳ್ಬಾಕ್ ಚಡಾ
ಮನ್ಶ್ಯಾಚಿಂ ಮೊಲಾಂ ಸೊಧುಂಕ್
ಚರಂಡೆಂನಿ ಸೊಧಾ"
ಮ್ಹಳ್ಯಾರ್ - ಮೊಳ್ಬಾಕ್ ಚಡೊಂಕ್ ಸಕ್ತೆಲ್ಯಾಂಕ್ ಜರೂರ್ ಜಾಗ್ಯಾಚಿಂ ಮೊಲಾಂ ಮೆಳ್ತಿತ್ ತರ್ಯ್ ಚರಂಡೆಂನಿ ಮನ್ಶ್ಯಾಚಿಂ ಮೊಲಾಂ ಮೆಳ್ತಿತ್ ಮ್ಹಳ್ಳಿ ಖಾತ್ರಿ ನಾ - ದೆಖುನ್ ಸೊಧಾ!
ವ್ಹಾ! - ದೆವಾರ್ ರಚ್ಲ್ಲ್ಯಾ ರಚ್ನೆಪಯ್ಕಿ ಮನಿಸ್ ಕಿತ್ಲಿ ವರ್ತಿ ರಚ್ನಾಂ ನ್ಹಂಯ್ಗಿ? ಹ್ಯಾ ಖಾತಿರ್ ಪರತ್ ಏಕ್ ಪಾವ್ಟಿಂ ಆಮಿ ಆಮ್ಚೆಂ ಹರ್ದೆಂ ಪೆಟುಯಾಂಗಿ?
ಹ್ಯಾ ಸಮಾಜೆಚೆ ಸಾಂದೆ ಆಮಿಂ ಸರ್ವಾಂ, ಆಮ್ಚಿ ಜಿಣಿ ಇತ್ಲಿ ಪವಿತ್ರ್ಕೀ - ಅಸಲ್ಯ್ ಕಿತ್ಲೆಶ್ಯಾ ಅಮಾಯಕ್ ಮನ್ಶ್ಯಾಂಕ್ ಲಿಪವ್ನ್ ಆಸಾ ಆಮ್ಚಿ ಸಮಾಜ್ ಮ್ಹಳ್ಳೆಂ ಕೊಣ್ ಜಾಣಾ? ಡಯಾನಾ ತಸಲೆ ಚ್ಯಾರ್ ಮುಖೆಲಿ ಆಮ್ಚಾ ಸಮಾಜೆಂತ್ ಉದೆವ್ನ್ ಯೆತಿತ್ ತರ್ - ಖರೆಂಚ್ ಜಾವ್ನ್ ಆಮ್ಚಿ ಸಮಾಜ್ ಅನಿಕ್ಯೀ ಇಲ್ಲಿ ಸುಧಾರ್ತಿ.
ಅಶೆಂ ಮ್ಹಣ್ತಾನಾ ಮ್ಹಾಕಾ ಕಾರ್ವಾರ್ಚ್ಯಾ ಭಿಸ್ಪಾನ್ ಅಜೀಕ್ ವೀಸ್ ವರ್ಸಾಧಿಂ ಸಾಂಗ್ಲ್ಲೆಂ ಉತಾರ್ ಉಡಾಸಾಕ್ ಯೆತಾ; "ಹಾಂವ್ ಕೊಣಾಚ್ಯಾಯ್ ಘರಾ ಗೆಲ್ಯಾರ್ ತ್ಯಾ ಘರ್ಚ್ಯಾಂಚಿ ಕಾಲೆತಿ ಸಮ್ಜೊಂಕ್ ತಾಂಚ್ಯಾ ಘರ್ಚ್ಯಾ ಖಾಕುಸಾಕ್ ವೆತಾಂ" - ಭೋವ್ ಅರ್ಥಾಭರಿತ್ ಉತ್ರಾಂ ಹಿಂ. ಮ್ಹಣ್ಜೆ - ಮನ್ಶ್ಯಾಕ್ ಸಮಾಜೆಂತ್ ಖರೊ ಮಾನ್ ಫಾವೊ, ತಾಚೆಂ ಘರ್, ತಾಚೊ ಬಂಗ್ಲೊ, ತಾಚಿ ಮುಸ್ತಾಯ್ಕಿ, ತಾಚೆಂ ಕಾಮ್ ಪಳೆವ್ನ್ ನ್ಹಂಯ್, ತೊ ಅಪ್ಲ್ಯಾ ಲ್ಹಾನಾಂಕ್ ಖಂಚ್ಯಾ ನದ್ರೆಂತ್ ಪಳೆತಾ ಮ್ಹಳ್ಳ್ಯಾಚೆರ್ ಜಾವ್ನಾಸಾ.
ಆತಾಂ ಮ್ಹಾಕಾ ಉಡಾಸ್ ಯೆತಾ ಎಕಾ ಗಾಂವ್ಚೊ ಏಕ್ ಪಿಸೊ ಮಡ್ವಳ್ ಆಪ್ಲ್ಯಾ ಗಾಡ್ವಾಕ್ ಘೆವ್ನ್ ಎಕಾ ನಂಯ್ಚಾ ದೆಗೆರ್ ವಚೊನ್ ತ್ಯಾ ಗಾಡ್ವಾಕ್ ಎಕಾ ಫಾತ್ರಾಂತ್ ಘಾಸಿಲಾಗ್ಲೊ ಕಂಯ್. ಸಕಾಳಿಂ ಥಾವ್ನ್ ಘಾಸುನ್ ಘಾಸುನ್ ತ್ಯಾ ಗಾಡ್ವಾಚಿ ಕಾತ್ ಫುಟೊನ್ ರಗಾತ್ ದೆಂವೊಂಕ್ ಲಾಗ್ಲೆಂ ತರ್ಯ್ ಹೊ ಮಡ್ವಳ್ ಘಾಸಿಲಾಗ್ಲೊ.. ಗಾಡ್ವಾಕ್ ಭಾಂದುನ್ ಘಾಲಾಂ ದೆಖುನ್ ತೆಂ ಗಾಡಾಂವ್ ರಾವೊನ್ ಬೋಬ್ ಘಾಲ್ತಾಲೆಂ ತರ್ಯೀ ಮಡ್ವಳಾನ್ ಗಾಡ್ವಾಕ್ ಘಾಸ್ಚೆಂ ರಾವಯ್ಲೆಂನಾ.
ಗಾಡ್ವಾಚಿ ಬೋಬ್ ಆಯ್ಕಾಲ್ಲೊ ಥೊಡೊ ಲೋಕ್ ನಂಯ್ಲಾಗಿಂ ಯೇವ್ನ್ ಮಡ್ವಳಾಲಾಗಿಂ ಸವಾಲ್ ಕರಿಲಾಗ್ಲೊ ಕಂಯ್;
"ಕಿತ್ಯಾಕ್ ತ್ಯಾ ಗಾಡ್ವಾಕ್ ತುಂ ಅಸೊಯ್ ಘಾಸ್ತಾಯ್?"
ಮಡ್ವಳಾನ್ ಜಾಪ್ ದಿಲಿ ಕಂಯ್
"ಹಾಕಾ ಹಾಂವ್ ಆತಾಂ ಗೊಡೊ ಕರ್ತಾಂ"
ಆಮ್ಚಾ ಸಮಾಜೆಂತ್ ಗಳ್ಯಾರ್ ಕೋಂತ್ ಬೆಂತೊಣ್ಯೊ ಘಾಲ್ನ್, ಹಾಫ್ತ್ಯಾಕ್ ಸರಾಗ್ ಮಿಸಾಕ್ ವಚೊನ್, ಕರೆಜ್ಮಾಕ್ ರೆತಿರೊ ಕರ್ನ್ ಅಸಲಿ ಜಿಣಿ ಜಿಯೆತೆಲ್ಯಾಂಕ್ ಕಿತ್ಲೆಂಯ್ ಘಾಸ್ಲ್ಯಾರ್ ಸುಧಾರ್ತಿತ್?
ಮನ್ಶ್ಯಾಪಣಾಚೊ ಭೊಂಗೊಸ್ತೊಳ್ ಕರ್ಚ್ಯಾ ಅಸಲ್ಯಾಂಕ್ ಖರೆಂಚ್ ಧರ್ನ್ ತಾಂಚ್ಯಾ ಗೊಮ್ಟ್ಯಾಕ್ ದಾಂತ್ಯಾಚೊ ಫಾತೊರ್ ಭಾಂದುನ್ ಗುಂಡಿಯೆಕ್ ಲೊಟುನ್ ಘಾಲಿಜಾಯ್.
ಪುಣ್ ವ್ಹಡ್ಲೆಂ ಸವಾಲ್ ಹೆಂ;
"ಅಶೆಂ ಕೆಲೆಂ ತರ್ ಆಮ್ಚಾ ಸಮಾಜೆಂತ್ ಬಾಕಿ ಉರ್ಚಿಂ ಕಿತ್ಲಿಂ?"
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
