ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
2. ಹಿ ಘೊಡ್ಯಾ ಸಾಮ್ಕಾರ್ ಗಾಡಿ ನ್ಹಂಯ್
ಎಡ್ವಿನ್ ಜೆ.ಎಫ್.
ಆಮ್ಚ್ಯಾ ಮದೆ೦ ಎಕ್ ಚಿ೦ತಪ್ ಆಸಾ ಕಿ ಕಸಲ್ಯಾಯಿ ಬರ್ಪಾಚಿ ಯಾ ಕರ್ನೆಚಿ ಠಿಕಾ ಯೆ೦ವ್ಚಿ ತೆ೦ ಬರಪ್ ಪ್ರಗಟ್ ಜಾಲ್ಯಾ ಉಪ್ರಾ೦ತ್/ ಕರ್ನಿ ಜ್ಯಾರಿ ಜಾಲ್ಯಾ ಉಪ್ರಾ೦ತ್ ಮ್ಹಣ್. ಠಿಕಾ ಯೆತೆಲಿಚ್ಚ್ ಮ್ಹಣ್ ಆಮ್ಕಾ೦ ಕಳಿತ್ ಆಸ್ಲ್ಲ್ಯಾನ್ ಆಮ್ಕಾ೦ ಭೆ೦/ಕಾವ್ಜೆಣಿ ಪಯ್ಲಿಚ್ಚ್ ದಿಸ್ತಾ. ದೆಕುನ್ ಹ್ಯಾ ಅ೦ಕಣಾಚ್ಯಾ ದುಸ್ರ್ಯಾಚ್ ಕಿಸ್ತಾ೦ತ್ ಜ಼ರಿತರಿ ಹಾ೦ವ್ ಠಿಕಾ ಮ್ಹಳ್ಳೊ ವಿಶಯ್ ಹಾಡಿನ್ ತರ್ ಘೊಡ್ಯಾ ಮುಕಾರ್ ಗಾಡಿ ಹಾಡ್ತಾ೦ ಮ್ಹಣ್ ತುಮಿ೦ ಲೆಕ್ಶಾತ್.
ಪುಣ್ ಹೆ೦ ಸಾರ್ಕೆ೦ ನ್ಹ೦ಯ್.
ಠಿಕೆವರ್ವಿ೦ಚ್ಚ್ ಬರಪ್ ಉಬ್ಜಾತಾ ಮ್ಹಳ್ಳೆ೦ ಸತ್ ಆಮಿ೦ ಥೊಡೊ ವೇಳ್ ನಿಹಾಳ್ ಕೆಲ್ಯಾರ್, ಚಿ೦ತಪ್ ಆಟಯ್ಲ್ಯಾರ್ ಕಳಿತ್ ಜಾತಾ. ಅಜ್ಯಾಪ್ ದಿಸು೦ಕ್ ಪುರೊ ಪುಣ್ ಜಾಯ್ತೆ ಮಾ೦ದ್ತಾತ್ ಕಿ ಜ಼ೆಜ಼ು ಕ್ರಿಸ್ತ್ ಸ೦ಸಾರಾ೦ತ್ಲೊ ಅಪ್ರತಿಮ್ ಠಿಕಾಕಾರ್ ಜಾವ್ನಾಸ್ಲ್ಲೊ ಮ್ಹಣ್ ಆನಿ ತಾಚ್ಯಾ ಠಿಕೆವರ್ವಿ೦ ತಿತ್ಲೊಚ್ಚ್ ಅಪ್ರತಿಮ್ ಕ್ರಿಸ್ತಾ೦ವ್ ಭಾವಾರ್ಥ್ ಉದೆಲೊ.
ಹೆ೦ ಸತ್ ತರ್, ಠಿಕೆವರ್ವಿ೦ ಸಾಹಿತ್ ಉಬ್ಜೊ೦ಚೆ ಖ೦ಚೆ೦ ವ್ಹಡ್ಲೆ೦ ನವಾಲ್?
ಪಯ್ಲ್ಯಾ ಕಿಸ್ತಾ೦ತ್ ಹಾ೦ವೆ೦ ವಿಚಾರ್ಲ್ಲೆ೦, ಕಸಲ್ಯಾ ಪ್ರಚೋದನಾನ್ ತುಮ್ಕಾ೦ ಬರಯಾ೦ ಮ್ಹಣ್ ಭೊಗ್ಲಾ೦? ತುಮಿ೦ ಕಾ೦ಯ್ ಜಾಪ್ ದಿಶ್ಯಾತ್ ಮ್ಹಣೊನ್, ‘ಆಮ್ಕಾ೦ ಸಮಾಜಿ೦ತ್ಲೆ೦ ಹೆ೦ ಸೊಸು೦ಕ್ ಜಾಯ್ನಾ, ತೆ೦ ತಡ್ವು೦ಕ್ ಜಾಯ್ನಾ,’ ಅಶೆ೦. ಫಲಾಣ್ಯಾ ಹ್ಯಾ ಸ೦ಗ್ತಿಚೆರ್ ಮ್ಹಜ಼ೆ೦ ಚಿ೦ತಪ್ ಅಶೆ೦, ಹೆರಾ೦ನಿ ಚಿ೦ತ್ಲ್ಲೆಪರಿ೦ ಹಾ೦ವ್ ಚಿ೦ತು೦ಕ್ ಕಬೂಲ್ ನಾ ದೆಕುನ್ ಮ್ಹಾಕಾ ಲಿಕು೦ಕ್ ಜಾಯ್. ಮು೦ದರೋನ್ ತುಮಿ೦ ಮ್ಹಣ್ಶಾತ್, ತ್ಯಾ ಎಕಾ ಫಲಾಣ್ಯಾ ಘಡಿತಾನ್ ಮ್ಹಜಿ೦ ಚಿ೦ತ್ನಾ೦ ಉಸ್ಕಾಯ್ಲ್ಯಾ೦ತ್, ಬರಿ ಎಕ್ ಕತಾವಸ್ತ್ ಹಿ, ಸಾದ್ಯ್ ತರ್ ಹಾ೦ವ್ ಎಕ್ ಕಾದ೦ಬರಿಯಿ ಲಿಕಿನ್.
ಪಳೆಯಾ ತುಮ್ಚಿ೦ ಚಿ೦ತ್ನಾ೦ ಕಶಿ೦ ವ್ಹಾಳ್ತಾತ್ ತಿ೦? ಹಾ೦ಕಾ೦ ತುಮಿ೦ ಕ್ರಾ೦ತಿಕಾರಿ ಮ್ಹಣ್ತಾತ್ ತರ್ ಮ್ಹಣಾ ಪುಣ್ ಹಿ ಚಿ೦ತ್ನಾ೦ ಠಿಕೆ-ಮುಳಾಚಿ೦ ಮ್ಹಣ್ ಜ಼ರೂರ್ ಮ್ಹಣಾ.
ಸಮಾಜಿ೦ತ್, ಆಮಿ೦ ಕಾಯ್ದೆ-ಕಾನೂನ್-ಸಮಾದಾನ್ ಸಾ೦ಬಾಳಾಶೆ೦ ಕರು೦ಕ್ ಪೊಲಿಸ್ ಆಸಾ, ಕಾಯ್ದೆ ಮೊಡ್ಲ್ಲ್ಯಾ೦ಕ್ ಶಿಕ್ಶಾ ದೀ೦ವ್ಕ್ ಮೆಜಿಸ್ಟ್ರೇಟ್ ಆಸಾ ಆನಿ ಶಿಕ್ಶಾ ದಿ೦ವ್ಚೊ ಹುನ್ನರ್ ತೊ (ಮೆಜಿಸ್ಟ್ರೇಟ್) ಕೊಣೆ೦ಗಿ ಬರವ್ನ್ ಗಾಲ್ಲ್ಯಾ ಕಾಯ್ದ್ಯಾ-ಕಾನೂನಾ೦ಚ್ಯಾ ಪುಸ್ತಕಾ೦ಥಾವ್ನ್ ಶಿಕ್ಲಾ.
ಠಿಕೆಚಿ೦ ನೇಮ್-ನಿಯಮಾ೦ ಚಡ್ಶಿ೦ ಹ್ಯಾ ಗಾ೦ಚಾ೦ಕ್ ಸರಿ ಕರ್ಯೆತಾ, ತ್ಯಾ ತ್ಯಾ ವೆಳಾ-ಕಾಳಾಕ್ ಸರಿ ಜಾವ್ನ್. ಸಾಹಿತಾಚಿ೦ ನೇಮ್-ನಿಯಮಾ೦ ಬದ್ಲಾತಾತ್ ಜ಼ೆದ್ನಾ ಠಿಕೆಚಿ೦ ನೇಮ್-ನಿಯಮಾ೦ ಬದ್ಲತಾತ್ ಆನಿ ಠಿಕೆಚಿ೦ ನೇಮ್-ನಿಯಮಾ೦ ಬದ್ಲತಾತ್ ಜ಼ೆದ್ನಾ ಸಾಮಾಜಿಕ್ ಜಿಣಿಯೆಚಿ ರೀತ್ ಬದ್ಲತಾ.
ಸರಳ್ ರಿತಿರ್ ಸಾ೦ಗ್ಚೆ೦ ತರ್, ಥೊಡ್ಯಾ ವರ್ಸಾ೦ ಆದಿ೦ ಆವಡ್ನಾತ್ಲ್ಲೆ೦ ಬರಪ್/ಲೇಕನ್/ಕತಾ ಆತಾ೦ ಆವಡ್ತಾ; ಸಮಾಜಿಚೊ ವೆಡ್ಕೊಳ್ ಆತಾ೦ ವಿಸ್ತಾರ್ಲಾ ಆನಿ ಹ್ಯಾ ವೆಡ್ಕೊಳಾ೦ತ್ ಆತಾ೦ ಅಸಲ್ಯಾ ಬರ್ಪಾ೦ಕ್ ಜಾಗೊ ಆಸಾ.
ಎಕ್ ದಾಕ್ಲೊ ದಿತಾ೦: ವರ್ಸಾ೦ ಆದಿ೦ ಡಿ.ಹೆಚ್.ಲೊರೆನ್ಸಾನ್ ‘ಲೇಡಿ ಚಾಟರ್ಲೀಸ್ ಲವರ್’ ಮ್ಹಳ್ಳಿ ಕಾದ೦ಬರಿ ಲಿಕ್ಲಿ ಆನಿ ತಿ ಪ್ರಗಟ್ ಜಾತೆಚ್ಚ್ ಖಿಣಾ ಭಿತರ್ ತಿಚೆರ್ ಬ೦ಧಿ ಪಡ್ಲಿ ಕಿತ್ಯಾಕ್ ತಾ೦ತ್ಲಿ ಕತಾವಸ್ತ್ ಲ೦ಯ್ಗಿಕ್ ಆತರ್ವಣಾಚಿ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್! ಹಿ ಸರ್ವಾ೦ನಿ ಚೊರಿಯಾ೦-ಚೊರಿಯಾ೦ ವಾಚ್ಲಿ ಜಾರೂರ್ (ಸಮಾಜಿಕ್ ದೊಡೆ೦ಪಣ್) ಪುಣ್ ಕ್ರಮೇಣ್ ವರ್ಸಾ೦ ಪಾಶಾರ್ ಜಾತಾನಾ, ಸಮಾಜಿ೦ತ್ ಹ್ಯಾ ಕಾದ೦ಬರಿಯೆ೦ತ್ಲಿ೦ ಘಡಿತಾ೦ ಉಗ್ತ್ಯಾನ್ ಘಡೊ೦ಕ್ ಸುರು ಜಾತಾನಾ, ಹಾಚೆ೦ ವಾಚಪ್ಯಿ ಉಗ್ತ್ಯಾನ್ ಸುರುಜಾಲೆ೦ ಆನಿ ‘ಲವರ್’ ಹಾ೦ತ್ಲಿ ಸಾಹಿತಿಕ್ ಸೊಬಾಯ್ ವಾಚ್ಪ್ಯಾ೦ಚ್ಯಾ ಆನಿ ಠಿಕಾಕಾರಾ೦ಚ್ಯಾ ಗಮನಾಕ್ ಆಯ್ಲಿ. ಆಜ಼್ ಹಿ ಕಾದ೦ಬರಿ ಎಕ್ ‘ಕ್ಲಾಸಿಕ್’ ಜಾವ್ನ್ ರಾಜ಼್ ಕರ್ತಾ. ಚಡ್ ಕಿತ್ಯಾಕ್, ಸುಮಾರ್ ಪಾ೦ಚ್ತೀಸ್ ವರ್ಸಾ೦ ಆದಿ೦ ದೆ|ಪುಟ್ಟಣ್ಣಾ ಕಣಗಾಲ್ ಹಾಣೆ ತಯಾರ್ ಕೆಲ್ಲೆ೦ ಬೋವ್ ಯಶಸ್ವಿ ಫಿಲ್ಮ್ ‘ಎಡಕಲ್ಲು ಗುಡ್ಡದ ಮೇಲೆ’ ಹ್ಯಾಚ್ ಕಾದ೦ಬರಿಯೆಚೆರ್ ಹೊ೦ದೊನ್ ಆಸಾ.
ಹೆಚ್ಪರಿ೦ ಫ್ರೆ೦ಚ್ ಕಾದ೦ಬರಿಕರ್ತ್ ಮಾರಿ ಕೊರೆಲ್ಲಿಚೆ ಸರ್ವ್ ಬುಕ್ ಇಗರ್ಜ಼್ಮಾತೆಚ್ಯಾ ‘ಕಾಳ್ಯಾ ಪಟ್ಟೇರ್’ ಆಸ್ಲ್ಲೆ. ಆತಾ೦ಯಿ ತೆ ತಶೆ ಆಸಾತ್ಗಿ ಮ್ಹಣ್ ಹಾ೦ವ್ ನೆಣಾ೦. ಪುಣ್ ಮಾರಿ ಕೊರೆಲ್ಲಿಚ್ಯಾ ಸಾಹಿತಾಕ್ ಶೀದಾ ಪಿಸ್ವಾಲ್ಲ್ಯಾ ದೆ|ಶ್ರೀಮತಿ ಎವ್ಲಾಲಿಯಾ ಆಲ್ವರಿಸಾನ್, “ಫ್ಲೊರಾಚಿ ಕತಾ” (ತೆಲ್ಮಾ) ಆನಿ “ಫೊಕಿಚೆ೦ ಕಾರ್ಬಾರ್” (ವೆ೦ಡೆಟ್ಟಾ) ಹ್ಯೊ ದೋನ್ ಕಾದ೦ಬರಿ ಮಾರಿ ಕೊರೆಲ್ಲಿಚ್ಯಾ ಉಪನ್ಯಾಸಾ೦ಚೆರ್ ಹೊ೦ದುನ್ ಕೊ೦ಕಣಿ೦ತ್ ಬರಯಿಲ್ಲ್ಯೊ ಆಸಾತ್!
ದೆಕುನ್ ಖ೦ಚಾಯಿ ಬರವ್ಪ್ಯಾನ್ ಠಿಕೆಕ್ ಬಿಯೆ೦ವ್ಚೆ೦ ನ್ಹಂಯ್. ತರಿ ಠಿಕೆ ವಿಶಾ೦ತ್ ಥೊಡೆ೦ ಜಾಣಾ೦ ಜಾ೦ವ್ಚೆ೦ ಬರೆ೦ ಕಿತ್ಯಾಕ್ ಆಜ಼್ ನ್ಹಯ್ ತರ್ ಫಾಲ್ಯಾ೦ ಠಿಕೆಚ್ಯಾ ಮುಕಾಮುಕಿ೦ ತುಮ್ಕಾ೦ ರಾವೊ೦ಕ್ ಆಸಾಚ್:
ಸಾಹಿತ್ ಜಾವ್ನಾಸಾ ಫಟಿ೦ಚಿ ಲಾ೦ಬ್ ಎಕ್ ಶಿ೦ಕಳ್ ಪುಣ್ ಬರ್ಪೂರ್ ನಯ್ಜತಾ (ನೀಜ಼್-ಕತಾ) ಮಿಸ್ಳೊನ್ ಆಸ್ಲ್ಲಿ ಮ್ಹಣ್ ಜೊನ್ ಅಪ್ಡಾಯ್ಕ್ ಮ್ಹಳ್ಳ್ಯಾ ಪ್ರಬ೦ದ್ಕಾರಾನ್ ಮ್ಹಳಾ೦. ಹಾ೦ವ್ ಮು೦ದರೋನ್ ಬೆರಿಜ್ (ಕುಡ್ಸಿತಾ೦) ಕರ್ತಾ೦ ಮ್ಹಣೊನ್, ‘ಸಾಹಿತ್ ಜಾವ್ನಾಸಾ ದಿನಚರಿ ಸ೦ಸ್ಕ್ರತಿಚಿ ಆನಿ ಹ್ಯಾಚ್ ಮಳಾರ್ ಮಟ್ವಿ ಕತಾ ಜಾವ್ನ್ ಆಸಾ ಎಕ್ ಪಾನ್ ಹ್ಯೆ ದಿನಚರಿ೦ತ್ಲೆ೦.
ಆನಿ ಹಾ೦ಗಾಸ್ ಠಿಕಾ ಜರ್ತರ್ ಸೊಬಾಯೆನ್ ಬಸ್ಲಿ, ಫಟಿ೦ಚೆ ಶಿ೦ಕಳೆ೦ತ್ ಆಮ್ಕಾ೦ ಇತ್ಲಿ ನಯ್ಜತಾ ಉಟೊನ್ ದಿಸ್ತೆಲಿಕಿ, ಸಾಹಿತಾ೦ತ್ ಕಿತ್ಲಿ ವಾಸ್ತವೀಕತಾ ಆಸಾ ತಿ ದೆಕೊನ್ ಆಮಿ೦ಚ್ ಶೆರ್ಮೆತೆಲ್ಯಾ೦ವ್.
ಆನಿ ಠಿಕಾ ಸೊಬಾಯೆನ್ ಬಸ೦ವ್ಕ್ ಸಕ್ಚೆ ಜಾಣಾರಿ ಠಿಕಾಕಾರ್ ಆಮ್ಚ್ಯಾ ವಾ೦ಟ್ಯಾಕ್ ಲಾಬೊ೦ದಿತ್ ಮ್ಹಳ್ಳೆ೦ಚ್ ಜಾ೦ವ್ ಆಮ್ಚೆ೦ ಮಾಗ್ಣೆ೦. ಫುಡ್ಲ್ಯಾ ಕಿಸ್ತಾ೦ತ್ ಚಿ೦ತ್ನೆನ್, ಸಬ್ದಾನ್ ಆನಿ ಬರ್ಪಾನ್ ಹಾ೦ಚಿ ಸುರುವಾತ್ ಆಮಿ೦ ಕರ್ಯಾ೦.
ಆಧ್ಲೆ ಅಂಕ್ಡೆ: 1
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
