ಕವಿತಾकविताPoem
ಘೆ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 4
ಸೂತ್ರ್ 4: ಘೆ ಖುರಿಸ್ ಕೊಂಕ್ಣೆಚೊ
ಜೆರಿ ಡಿ’ಮೆಲ್ಲೊ, ಬೆಂದುರ್
ಖುರಿಸ್ ಸಡ್ವೊಣೆಚೊ ಘುರ್ತ್!?
ಹಿಂದಿ ಭಾಸೆಂತ್ ಏಕ್ ಸೊಭಿತ್ ಸಾಂಗ್ಣಿ ಆಸಾ ಅಶಿ; ’ಜಬ್ ಜಹಾಸ್ ಡೂಬ್ನೆ ಲಗ್ತಿ ಹೆ, ಚೂವೆ ಇನ್ಸೆ ಪಹ್ಲೆ ಭಾಗ್ತೇ ಹೇಂ’ (ಜೆದ್ನಾಂ ತಾರುಂ ಬುಡೊಂಕ್ ಲಾಗ್ತಾ, ತೆದ್ನಾಂ ಪಯ್ಲೆಂ ತಾಂತ್ಲೆಂ ಧಾಂವ್ತಾತ್ ಉಂದಿರ್). ಹಿ ಸಾಂಗ್ಣಿ ಚಡ್ತಾವ್ ಕೊಂಕ್ಣೆಕ್ ಲಗ್ತಿ ಜಾತಾ ಮ್ಹಣ್ಚ್ಯಾಂತ್ ಕಾಂಯ್ ದುಭಾವ್ ನಾ. ಖಂಚೆಂಯ್ ಸಂಚಾಲನ್/ಸಂಘಟನ್ ಆಸೊಂ, ವಾ ಭಾಸ್/ಸಂಸ್ಕೃತಿ - ಪರಿಣಾಮ್ ಹೊಚ್ಚ್!. ದೆಕುನ್ ಫಿಂರ್ಗಿ ಸಂಸ್ಕೃತೆಚಾ ಗುಲಾಮ್ಪಣಾಂತ್ ಆಸ್ಚೆ ಕೊಂಕ್ಣೆ ಧೋಭಿಘಾಟಾಚ್ಯಾ ಪೆಟ್ಯಾಪರಿಂ ಜಾಲ್ಯಾತ್; ನ್ಹಂಯ್ ಘರ್ಚೆ (ಕೊಂಕ್ಣೆಚೆ), ನ್ಹಂಯ್ ಧೋಭಿಘಾಟಾಚೆ (ಫಿಂರ್ಗಿ). ಕಿತ್ಯಾಕ್, ಕೊಣಾಪಾಟ್ಲ್ಯಾನ್ ಹಿಂ ಧಾಂವ್ಲ್ಯಾಂತ್ಗೀ? ತಾಂಕಾಂ ಫಿಂರ್ಗಿ ಲೋಕ್ ಸೊಡ್, ತಾಂಚಿಂ ಸುಣಿಂಯೀ ಹುಂಗಾನಾಂತ್.
’ಘೆ ಖುರಿಸ್ ಕೊಂಕ್ಣೆಚೊ’ ಸೂತ್ರಾ ಪಾಟ್ಲ್ಯಾನ್ ಜಾಯ್ತೊ ಆಟವ್ ಘಾಲ್ಲೊ. ಖರೆಂಚ್ ಜಾವ್ನ್ ಹೆಂ ಸೂತ್ರ್ ಕಾಂಯ್ ಚಿಲ್ಲರ್ ನ್ಹಂಯ್. ಹೆಂ ಹಾಂತ್ಲಿಂ ಎಕೇಕ್ ಕವಿತಾ ವಾಚ್ತಾಂ ತುಮ್ಕಾಂ ಗೊಮ್ತೆಲೆಂಚ್. ಪುಣ್ ಹೊ ಆಟವ್ ಕಸ್ಲೊ ಮ್ಹಳ್ಳೆಂ ಸಮ್ಜೊಂಚೆಂ ತರ್, ಖುರ್ಸಾಚಿ ವಳೊಕ್ ಆಮ್ಕಾಂ ಜೆಜು ಥಾವ್ನ್ ಜಾಲ್ಲಿ, ಆಮ್ಚಾ ಗಾಂವಾಂತ್ ಜಾಂವ್, ಆಮ್ಚ್ಯಾ ದೇಶಾಂತ್ ಜಾಂವ್ ಖುರ್ಸಾರ್ ಮಾರ್ಚಿ ರಿವಾಜ್ ಭಿಲ್ಕುಲ್ ನಾ. ಖುರಿಸ್ ಏಕ್ ಸಡ್ವೊಣೆಚೊ ಘುರ್ತ್. ಜೆಜುನ್ ಅಪ್ಲೆಂ ಬಲಿದಾನ್ ತ್ಯಾ ಖುರ್ಸಾರ್ ದಿಲ್ಲೆವರ್ವಿಂ ಕ್ರೀಸ್ತಿ ಲೊಕಾಂಚಿ ಸಡ್ವಣ್ ಜಾಲಿ ಮ್ಹಣ್ ಭಾವಾರ್ಥ್ ಸಾಂಗ್ತಾ. ಪುಣ್ ಏಕ್ ಸವಾಲ್ - ಜೆಜುಕ್ ಖುರಿಸ್ ದಿಲ್ಲೊ ಕಾಂಯ್ ಚೈನಾ ವ ಜಪಾನ್ಚ್ಯಾನಿ ನ್ಹಂಯ್, ಅಮೇರಿಕಾ ವಾ ರಶ್ಯಾಚ್ಯಾಂನಿ ನ್ಹಂಯ್, ಶ್ರೀಲಂಕಾಚಾ ಎಲ್.ಟಿ.ಟಿ.ಇನ್ ವಾ ಅಫ್ಘಾನಿಸ್ತಾನಾಚ್ಯಾ ಅಲ್ಕಾಯ್ದಾನ್ ನ್ಹಂಯ್. ಜೆಜುಕ್ ಖುರಿಸ್ ದಿಲ್ಲೊ ವಾ ಖುರ್ಸಾರ್ ಖಿಳಾಯಿಲ್ಲೊ ಜಾವ್ನಾಸಾ ತಾಚ್ಯಾಚ್ ಲೊಕಾಂನಿ, ತಾಚ್ಯಾಚ್ ಗಾಂವ್ಚ್ಯಾಂನಿ ಆನಿ ತಾಚ್ಯಾಚ್ ಅಪ್ಲ್ಯಾಂನಿ.
ಖುರಿಸ್ ಏಕ್ ಸಾಂಕೇತಿಕ್ ಘುರ್ತ್ ಜಾವ್ನ್ ಕೊಂಕ್ಣೆಚಿ ಪರಿಗತ್ ಇಲ್ಲಿ ಸುಡಾಳ್ ಸಮ್ಜೊಂಚೆಂ ಪ್ರೇತನ್ ಕೆಲೆಂ ತರ್, ಕೊಂಕ್ಣೆಚಿ ಪರಿಗತ್ ಆಜ್ ಇತ್ತುನ್ ಪಾವೊಂಕ್ ಕಾರಾಣ್ಯೀ ಹೆಂಚ್ - ಎಕಾಮೆಕಾ ದಿಲ್ಲೆ ವಾ ದೀವ್ನ್ ಆಸ್ಚೆ ಖುರಿಸ್. ಪುಣ್ ವಿಪರ್ಯಾಸ್ ಖಂಚೆಂಗೀ ಮ್ಹಳ್ಯಾರ್ ಅಜೂನ್ ಕೊಣ್ಂಚ್ ಕೊಣಾಕ್ಚ್ ಸಾಲ್ವಾರ್ ಕರುಂಕ್ ಪಾವೊಂಕ್ ನಾಂತ್. ಜೆ ಖುರ್ಸಾರ್ ಚಡ್ಲ್ಲೆ ಚಡ್ತಾವ್ ಸಂಪ್ಲ್ಯಾತ್, ಬಾಕಿಚೆ ಥೊಡೆ ಆಸ್ಲ್ಯಾರ್ ಫುಡ್ಲ್ಯಾ ದಿಸಾಂನಿ ತಾಂಕಾಂಯ್ ಮರ್ಯಾದೆನ್ ಜಿಯೆಂವ್ಕ್ ದಿಂವ್ಚೆನಾಂತ್ ಮ್ಹಳ್ಳಿ ನಖ್ಖಿ ಪಾತ್ಯೆಣಿ ಮ್ಹಾಕಾ ತರ್ಯೀ ಆಸಾ. ಕಿತ್ಯಾಕ್ ಅಜೂನ್ ಆಮ್ಚಾ ಚಡ್ತಾವ್ ಸಂಘ್ ಸಂಸ್ಥ್ಯಾಂನಿ ಕರ್ಚಿಂ ಕಾಮಾಂ ತರ್ಯೀ ತಸಲಿಂಚ್ - ಥೊಡಿಂ ಕೊಣಾಕ್ ಖುರ್ಸಾಂವ್ಚೆಂ ಮ್ಹಣ್ ವಿಂಚ್ತಿತ್ ತರ್, ಥೊಡಿಂ ಫಕತ್ತ್ ಖುರಿಸ್, ಖಿಳೆ ಎಕ್ಟಾಂವ್ಚೆಂ ಕಾಮಾರ್ ವೆಸ್ತ್. ಲೊಕಾಕ್ ಹೆಂ ಸರ್ಕಸ್ ಆನಿ ಫುಕಟಾಚೊ ತಮಾಸೊ ದೆಖುನ್ ಜಾಗೆ ಆಸೊನ್ಯೀ ಜೆಮೆವ್ನ್ಯೀ ಏಕ್ಚ್ ಜಾಪ್ ’ಖುರ್ಸಾಯ್ ತಾಕಾ ಖುರ್ಸಾಯ್’.
ಹ್ಯಾ ಪರಿಗತೆಕ್ ಫುಡ್ ಕರುಂಕ್ ಖಡ್ಪಾ ಕಾಳ್ಜಾಚೆ ಸೊಜೆರ್ ಜಾಯ್! ತಾಂಕಾಂಯ್ ಸುರ್ವಾತೆರ್ ಕಠೀನ್ ಝಡ್ತಿ ಕರ್ತೆಲೆ ಆಸಾತ್. ತಾಂಚಿ, ತಾಂಚ್ಯಾ ಸಂತಾನ್ ಕುಟ್ಮಾಚಿ, ಝಡ್ತಿ ಕರುಂಕ್ ಕಾಂಯ್ ಉಣಿಂ ನಾಂತ್. ಪುಣ್ ಝಡ್ತಿ ಕರ್ಚ್ಯಾ ಹಾಂಣಿ ಗೊಂಯ್ಟಾಂಯ್ ಕೆಲ್ಲೆಂ ನಾ ವಾ ಕರ್ಚೆಪರಿಂ ನಾ. ಹಾಂಚೆ ತೊಂಡಾಪುರ್ತೆ ಶಿಫಾರಾಸ್ ಆನಿ ಸುಕೊ ಸಯ್ಲಾಪ್ ಪಳೆತಾನಾ - ಜೆಜುನ್ ವೊಪಾರಿಂನಿ ಸಾಂಗ್ಲ್ಲೆ ಫಾರಿಜೆವ್ ಹೆಚ್ಚ್ ಮ್ಹಣ್ಚಾಕ್ ಕಾಂಯ್ ದುಭಾವ್ ನಾ. ಪುಣ್ ಹಾಂಚೆವಿರೋದ್ ಆವಾಜ್ ಕಾಡುಂಕ್ ಕೊಣಾಕ್ಚ್ ಬೆಟ್ರಿ ನಾ. ಕಾಂಯ್ ಆವಾಜ್ ಕಾಡ್ಲ್ಯಾರ್ ಫಾಲ್ಯಾಂ ಅಪ್ಣಾಕ್ ಮೆಳೊಂಕ್ ಆಸ್ಚಿಂ ಶ್ಹಾಲಾಂ, ಫುಲಾಂ, ಫಳಾಂ, ಬಿರುದೊ, ಪ್ರಶಸ್ಥ್ಯೊ ಕಾಂಯ್ ಚುಕ್ತಿತ್ ತರ್ ಮ್ಹಳ್ಳಿ ಭಿರಾಂತ್ ಆಸೊಂಕ್ಯೀ ಪುರೊ. ಕಾಂಯ್ ಆಸ್ಚೆಂ ಆಸಾ ತಶೆಂ ಬರಯ್ತೆಲೆ ಎಕ್ಲೊ ದೋಗ್ ಆಸ್ತಿತ್ ತರ್ ತಾಂಕಾಂ ಪಿಶ್ಯಾರ್ ಕಾಡ್ಚೆಂ ’ತೋಗಿ? ತೊ ಪಿಸೊಯಾ, ತಾಣೆಂ ಬರಂವ್ಚೆಂ ತಶೆಂಚ್’ ಮ್ಹಳ್ಳ್ಯೊ ಖೊಡಿ ಕಾಡ್ಲ್ಯಾರ್ ಜಾಲೆಂ. ದೆಕುನ್ ಆಮ್ಚೆ ಶೆಂಭೊರಾಂತ್ ನೊವೊದ್ ಠಕ್ಕೆ ಬರವ್ಪಿ/ಕವಿ ಅಜೂನ್ ಆಲ್ತಾರ್ ಭುರ್ಗೆಚ್ಚ್ ಜಾವ್ನ್ ಜಿಯೆತಾತ್, ಆಲ್ತಾರ್ ಭುರ್ಗೆ ಜಾವ್ನ್ಂಚ್ ಮೊರ್ತೆಲೆ.
ಅಜೀಕ್ ತೀಸ್ ಪಾಂತೀಸ್ ವರ್ಸಾಂ ಆದಿಂ ಚಾ.ಫ್ರಾನ್ ಹ್ಯೇವಿಶಿಂ ಬರಯಿಲ್ಲಿಂ ಉತ್ರಾಂ ಅಶಿಂ ಆಸಾತ್; ’ಚಾರಾಂಯೀ ವಾಟಾಂನಿ ಮ್ಹಳ್ಳೆಬರಿ ಕೊಂಕಣಿ ಭಾಶೆಚೆರ್ ದಾಂಡೆ ಮಾರ್ತಾತ್. ಅಪ್ಲೆಚ್ ಮನಿಸ್ ಅಪ್ಲ್ಯೊಚ್ ತಕ್ಲ್ಯೊ ಫೊಡ್ತಾತ್. ಭಾಸ್ ಆನಿ ದೇಸ್ ವಿಸರ್ಲೆಲೆ ಆಪ್ಲ್ಯಾಚ್ ಫೊಂಡಾಚೆರ್ ಬಸೊನ್ ಅಪ್ಲೆಂಚ್ ಮಾಸ್ ಖಾತಾತ್’.
ಆತಾಂ ಹಾಂಗಾಸರ್ಯೀ ಥೊಡ್ಯಾ ಕೊಂಕ್ಣಿ ಕವಿಂನಿ ತರ್ಯೀ ಹ್ಯಾ ಪರಿಗತೆಕ್ ಬರ್ಯಾನ್ ಸಮ್ಜೊನ್ ಘೆತ್ಲಾಂ - ಹಿ ಧಾದೊಸ್ಕಾಯ್ ಮ್ಹಜಿ. ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿಚಿಂ ಉತ್ರಾಂ ಪಳೆಯಾ; ’ತುಜೆಂಚ್ ಚೊರುನ್ ತುಕಾಚ್ ಲುಟುನ್ ಕವಿ ಜಾಲೊಂ..!’. ಅಶೆಂ ಕವಿ ಜಾಲ್ಲೊ ಅಖ್ರೇಕ್ ಉಚಾರ್ತಾ; ’ತುಜೆಥಾವ್ನ್ ವಾವಂವ್ಚೊ ಸೊಡುನ್ ಫುಡೆಂ ತುಜ್ಯಾಚ್ ಖಾಂದಿಂ ಖುರಿಸ್ ದಿಲೊ’. ಹಿಂ ಅರ್ಥಾಭರಿತ್ ಉತ್ರಾಂ ಜಿಣ್ಯೆ ಅನ್ಭೋಗಾಂತ್ ಪಿಕ್ಲ್ಲ್ಯಾಂಕ್/ಥಕ್ಲ್ಲ್ಯಾಂಕ್ ಮಾತ್ರ್ ಹಾಡಂವ್ಕ್ ಸಾಧ್ಯ್.
ಕವಿ ಬಾಬ್ ಸ್ಟ್ಯಾನಿ ಮೆಂಡೊನ್ಸಾ ಆಯ್ಚಾ ಕಾಳಾರ್ ಕಾಲ್ಪನಿಕ್ (Theretical) ಜಿಣ್ಯೆಚಿ ಗರ್ಜ್ ನಾ ಬಗಾರ್ ವಾಸ್ತವಿಕ್ (Practical) ಜಿಣ್ಯೆಚಿ ಗರ್ಜ್ ಆಸ್ಚಿ ಸುಸ್ತಾತಾ. ದೆಕುನ್ ’ತೊಂಡಾಂತ್ ಫಕತ್ತ್ ಸಾಂಗ್ಚೆಂ ನ್ಹಂಯ್ ಕಾರ್ಯಾಂತ್ ಕರ್ನ್ ದಾಕಂವ್ಕ್ ಜಾಯ್’ ಮ್ಹಳ್ಳೊ ಮೊಲಾಧಿಕ್ ಸಂಧೇಶ್ ಪಾಚಾರ್ತಾ.
ಕವಿ ಬಾಬ್ ಆಸ್ಟಿನ್ ಪ್ರಭುನ್ ವ್ಹಾವಯಿಲ್ಲೊ ಕೊಂಕ್ಣೆಚೊ ಖುರಿಸ್ ಆನಿ ತಾಚೆರ್ ತೊ ಖುರಿಸ್ ಚಡಯಿಲ್ಲಿ ಕಾಣಿಂ ಹಾಂವ್ ಲ್ಹಾನ್ಪಣಾರ್ ಆಯ್ಕೊನ್ ಆಯ್ಲಾಂ ತರ್ಯೀ ತಾಚೆಂ ’ಕೊಂಕ್ಣಿ ಖುರಿಸ್ ವ್ಹಾವಯ್ಲೊ’ ವಾಚ್ತಾಂ ವಾಚ್ತಾಂ ಮ್ಹಜ್ಯಾ ಸುಕ್ಯಾ ದೊಳ್ಯಾಂನಿ ಸಯ್ತ್ ದೋನ್ ಥೆಂಬೆ ದುಃಖಾಂ ಉದೆನಾಯೆ ರಾವ್ಲಿಂನಾಂತ್. ಕೊಣ್ ಸಾರ್ಕೊ? ಕೋಣ್ ಚುಕಿದಾರ್? ಮ್ಹಣ್ ಕೊಲಾಂವ್ಚೆ ತಿತ್ಲೊ ಮಹಾನ್ ಹಾಂವ್ ನ್ಹಂಯ್ ತರ್ಯೀ ಮ್ಹಜ್ಯಾ ಮತಿಂತ್ ಸದಾಂಚ್ ಉದೆಂವ್ಚೆಂ ಸವಾಲ್ ಫಕತ್ತ್ ಹೆಂ ’ಎಕಾಮೆಕಾಕ್ ಭಗ್ಸಿಯಾ, ತುಮ್ಚಾ ದುಸ್ಮನಾಂಚೊ ಮೋಗ್ ಕರಾ’ ಮ್ಹಳ್ಳೊ ಪುಲ್ಪುತ್ರಾವಯ್ಲೊ ಶೆರ್ಮಾಂವ್ ತರ್ ಲಾಗು ಜಾತಾ ಫಕತ್ತ್ ಲಾಯಿಕಾಂಕ್ ಮಾತ್ರ್?.
ಕವಿ ಬಾಬ್ ಮನು ಬಾಹ್ರೇಯ್ನ್ ಹ್ಯೇ ಪಾವ್ಟಿಂ ಕೊಂಕ್ಣಿ ಖುರಿಸ್ ವ್ಹಾವಂವ್ಕ್ ಹಾಂಗಾಸರ್ ಆಯ್ಲಾ ಆನಿ ಅಪ್ಲ್ಯಾ ಅನ್ಭೋಗಾಚಿ ಭುತಿ ವಾಚ್ಪ್ಯಾಂಸಮೊರ್ ಸೊಡಯ್ತಾ; ’ಶಿಕ್ಲಿಂ ಬಾಳಾಂ, ಫುಟ್ಲಿಂ ಪಾಳಾಂ, ಉಭ್ಲಿಂ ಪರ್ಗಾವಾಂತ್, ಶಿಕ್ಲ್ಲಿ ಕೊಂಕ್ಣಿ ವಿಸ್ರಾಲಿಂ, ಪರ್ಕ್ಯಾ ಭಾಶೆಚೆ ಹಾಂಕಾಂ ವಳ್ಕಾಲೆನಾಂತ್’.
ಕವಯತ್ರಿ ಬಾಯ್ ನಿರ್ಮಲಾ ಗೋವಿಯಸ್ ಅಪ್ಲೆ ಕವಿತೆಂತ್, ಹೆರ್ ಭಾಸಾಂಕ್ ಮರ್ಜೆಕ್ ವ್ಹಾಪಾರಾ ಪುಣ್ ಕೊಂಕ್ಣೆಕ್ ಗರ್ಜೆಕ್ ವಾಪಾರಿನಾಸ್ತಾಂ ಭಿಲ್ಕುಲ್ ರಾವಾನಾಕಾತ್ ಮ್ಹಳ್ಳೊ ಸಂಧೇಶ್ ದಿತಾ.
ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾಕ್ ಹೊ ಕೊಂಕ್ಣಿ ಖುರಿಸ್ ಮ್ಹಣ್ತಚ್ಚ್ ’ಸಿರಿವಂತ್’ ಚೊ ಉಡಾಸ್ ಯೆತಾ. ತಾಚ್ಯಾ ಜಿಣ್ಯೆ ಆವ್ದೆಂತ್ ಘೆತ್ಲ್ಲೆಂ ಏಕ್ ಸಾಹಿತಿಕ್ ಸಂವಾದ್ ಹಿಣೆಂ ಘೆಂವ್ಚೆ ವೆಳಾರ್ ಹಿಣೆಂ ಸಿರಿವಂತಾವಿಶಿಂ ಜಾಯ್ತೆಂ ಪಾರ್ಕಿಲ್ಲೆಂ. ದೆಖುನ್ ಖರೆಂಚ್ ಜಾವ್ನ್ ಹಿಚ್ಯಾ ಕವಿತೆಂತ್ಲಿಂ ಎಕೆಕ್ ಉತ್ರಾಂ ಕಾಳ್ಜಾಕ್ ತೊಪ್ತಾತ್.
ಕವಿ ಬಾಬ್ ರೋಶನ್ ರೊಡ್ರಿಗಸ್ ಅಪ್ಲ್ಯಾ ಕವಿತೆಂತ್ ಕೊಂಕ್ಣಿ ಯುವ ಬರವ್ಪ್ಯಾಂಕ್ ತಸಲಿಚ್ ಜಾಗ್ವಣ್ ಆನಿ ಹಿಶಾರೆ ದಿತಾ - ಫಕತ್ತ್ ನಾಂವಾಖಾತಿರ್ ವಾ ಲಾಭಾ ಖಾತಿರ್ ಕೊಂಕ್ಣಿ ವಾವ್ರಾಕ್ ದೆಂವಾನಾಕಾ. ಖರ್ಯಾ ಮನಾನ್ ಆನಿ ಮೊಗಾನ್ ದೇಂವ್ ತೊ ಮ್ಹಣ್ತಾ.
ಕವಯತ್ರಿ ಬಾಯ್ ನಂದಿನಿಚಿಂ ಉತ್ರಾಂ ಕಿತ್ಲಿಂ ಭಳಿಷ್ಟ್ ಆನಿ ಸತ್ ಪಳೆಯಾ;
’ಹೆಂ
ನಾತೆಂ ತುಜೆಂ ಮ್ಹಜೆಂ ವರಸಾಂ ವರಸಾಂಚೆಂ
ಜಣಾಂ ಜಣಾನ್ ದೆಕ್ಲ್ಯಾಂತ್ ತುಜಿಂ ದುಕಾಂ
ದುಕಾಂ ಥಳ್ಥಳಿಂ ವಜ್ರಾಂ ಮೊತಿಯಾಂ ಥಿಕಾಂ
ತುಜೆಸಂಗಿಂ ಜಿಯೆವ್ನ್ ರಡೊನ್ ಮೆಲೆ ಕಿತ್ಲೆ?’
ಇತ್ಲೆಂ ಸರ್ವ್ ಕೊಂಕ್ಣೆಕ್ ಜಾಲೆಂ ತರ್ಯೀ ಕವಿ ಅಜೂನ್ ಥಕೊಂಕ್ ನಾ, ಫುಡೆಂಯ್ ಥಕ್ಚೊನಾ ಮ್ಹಳ್ಳೊ ಆಶಾವಾದಿ ಅಪುರ್ಭಾಯೆನ್ ಹಿಣೆಂ ಪಿಂತ್ರಾಂವ್ಚೊ ದಿಸೊನ್ ಯೆತಾ.
ಕವಿ ಬಾಬ್ ಪ್ರಕಾಶ್ ರಂಗನಪಲ್ಕೆಕ್ ಹಾಂವ್ ಮುಖಾಮುಖಿ ಜಾತಾನಾ ತೊ ಭೋವ್ ತರ್ನೊ ತರ್ಯೀ ತ್ಯಾ ತಾಚ್ಯಾ ತರ್ನ್ಯಾ ಖಾಂದ್ಯಾರ್ ಜಡಾಯೆಚೊ ಖುರಿಸ್ ಆನಿ ಕಾಳಿಜ್ಭರ್ ಕೊಂಕ್ಣಿ ಮೋಗ್ ಹಾವೆಂ ಪಾರ್ಕಿಲ್ಲೊ ತರ್ಯೀ ತಾಚ್ಯಾ ಖುರ್ಸಾಚೆಂ ಖಾಂದ್ ಮಾರುಂಕ್ ಮ್ಹಜ್ಯಾ ಖಾಂದೊ ರಿತೊ ನಾಸ್ತಾಂ ವೆಳಾಕಾಳಾನ್ ಆಮ್ಚೆಮಧೆಂ ವೆಗ್ಳಾಚಾರ್ ಹಾಡ್ಲೊ. ನಾಂ ತರ್ ಆಜ್ ತೊಯೀ ಕುವೆಯ್ಟಾಂತ್ ಆಸ್ತೊ ಆನಿ ತಾಚೆಸವೆಂ ಹಾಂವ್ಯೀ ಭರ್ಮಾನ್ ಸಾಂಗಾತ್ ದಿತೊಂ. ತಾಚಾ ಕವಿತಾಂತ್ ಆಸ್ಚೆ ಅತ್ಮೆ ಜರೂರ್ ಹಾಚಿ ಗೊವಾಯ್ ದಿತಾತ್.
ಕವತ್ರಿ ಬಾಯ್ ಪ್ರಿಯಾ ಸಿಕ್ವೇರಾನ್ ಪರ್ದ್ಯಾ ಪಾಟ್ಲ್ಯಾನ್ ಕರ್ಚೊ ವಾವ್ರ್ ಭೋವ್ಶಾ ಕೊಣಾಕ್ಚ್ ಕಳಿತ್ ಆಸ್ಚೊನಾ. ಆಜ್ ಜರ್ ದಾಯ್ಜ್.ಕೊಮ್ ದಿಸಾನ್ದೀಸ್ ಚಡಿತ್ ವಾಚ್ಪ್ಯಾಂಕ್ ಅಪ್ಲೆಶಿಂ ಆಕರ್ಶಿತ್ ಕರುಂಕ್ ಪಾವ್ಲಾಂ ತರ್ ಹಾಚಿ ಪಯ್ಲಿ ಹೊಗ್ಳಿಕ್ ಫಾವೊ ದೊಗಾಂಯ್ ಸಹ-ಸಂಪಾದಕಾಂಕ್, ಏಕ್ ಮೆಲ್ವಿನ್ ವಾಸ್ ತರ್ ದುಸ್ರೆಂ ಬಾಯ್ ಪ್ರಿಯಾ ಸಿಕ್ವೇರಾ. ಇತ್ಲೆಂ ಸಮ್ಜತೆಲ್ಯಾಂಕ್ ಆತಾಂ ತಾಚ್ಯಾ ಕವಿತೆಂತ್ ಆಸ್ಚಾ ಜಿವಾಕ್ ಸಮ್ಜೊಂಕ್ ಭಿಲ್ಕುಲ್ ಸಲೀಸ್ ಜಾಯ್ತ್.
ಪುಣ್ ಸಮಾಜ್/ಕೊಂಕ್ಣಿ ವಾವ್ರ್ ವೆವೆಗ್ಳ್ಯಾ ರಿತಿರ್ ಕರ್ನ್ ಕೊಂಕ್ಣಿ ವರ್ತುಲಾಂತ್ ಫಾಮಾದ್ ಜಾಲ್ಲೊ ಕವಿ ಬಾಬ್ ಜೆರಿ ಡಿ’ಮೆಲ್ಲೊಚೆಂ ಕವಿತಾ, ಉಂಚ್ಲೆಂ ತಶೆಂಚ್ ಗೂಂಡ್ ಅರ್ಥಾಚೆಂ. ಖುದ್ದ್ ಖುರಿಸ್ ವ್ಹಾವವ್ನ್ ಅನ್ಭೋಗ್ ಆಸ್ಚಾ ಹಾಣೆಂ, ಕೊಂಕ್ಣಿ ವಾವ್ರಾಡ್ಯಾಂಕ್ ದಿಂವ್ಚಿ ಉರ್ಭಾ ತರ್ಯೀ ಕಿತ್ಲಿ ಪಳೆಯಾ. ಹೆಚ್ಚ್ ಖಾತಿರ್ ಹೊ ಫಾಮಾದ್. ಆಯ್ಚಾ ಕಾಳಾರ್ ಅಸಲೆ ಅನಿಕೀ ಚ್ಯಾರ್ ಕವಿ ಆಸ್ತೆ ತರ್ ಖಂಡಿತ್ ಜಾವ್ನ್ ಕೊಂಕ್ಣೆಂತ್ ಖುರಿಸ್ ಚಡಯ್ತೆಲೆ ಖರಸ್ ಕಾಡ್ಚಾಂತ್ ನವಾಲ್ ನಾ. ಹೆಚ್ಚ್ ಚಿಂತ್ಪಾ ಖಾತಿರ್ ಬಾಬ್ ಜೆರಿ ಡಿ’ಮೆಲ್ಲೊ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಯೆತಾನಾ ತಾಕಾ ಉಲ್ಲಾಸ್.
ಉತ್ರಾಂತ್ ಸೂತ್ರಾಂ - 4: ಘೆ ಖುರಿಸ್ ಕೊಂಕ್ಣೆಚೊ
[ವಾಂಟೆಲಿ ಜಾಲ್ಲಿಂ]
10. ವಿನ್ಸಿ ಮೆಲ್ಕಾರ್, ಬೆಂಗ್ಳುರ್.
ಖುರಿಸ್? ಕೊಂಕ್ಣೆಚೊ? [ಮಯ್ನಾಚೆಂ ಕವಿತಾ]-
ಜೆರಿ ಡಿ’ಮೆಲ್ಲೊ, ಬೆಂದುರ್
ಕೊಂಕ್ಣಿ ಆವಯ್ಚೆ ಗರ್ಭಿಂ ಜಲ್ಮೊನ್
ಕೊಂಕ್ಣಿ ಸಂಸ್ಕೃತೆ ಉಸ್ಕ್ಯಾರ್ ಖೆಳೊನ್
ಕೊಂಕ್ಣಿ ಪಾನೊ ಚಿಂವೊನ್ ವಾಡೊನ್
ಕೊಂಕ್ಣಿ ಮೊಗಾನ್ ಆತಾಂ ತೊವೊನ್
ಕೊಂಕ್ಣಿ ಸೆವೆಕ್ ಮಾತೆಂ ಮಾರುನ್
ಕೊಂಕ್ಣಿ ಆಂಗ್ಣಾಕ್ ದೆಂವ್ಲೆಲ್ಯಾ
ಕೊಂಕ್ಣಿ ಸುಪುತ್ರಾನೊಂ.. ಕೊಂಕ್ಣಿ ಕುಂವರಾನೊಂ..
ಉತ್ರಾಂಕ್ ಮ್ಹಜ್ಯಾ ಆಯ್ಕಾ ಆತಾಂ
ಉಪಾದೆಸಾಂಕ್ ಮ್ಹಜ್ಯಾ ಕಾನ್ ದಿಯಾತ್ ಸದಾಂ
ಚರಿತ್ರೆಂತ್ಲ್ಯಾ ಪಾನಾಂನಿ
ಕೊಂಕ್ಣಿ ವಾವ್ರಾಡ್ಯಾಂನಿ
ಜುದಾಸಾಂಕ್ ದೆಕ್ಲಾಂ
ಕಶ್ಟಾಂ-ಘಾಮ್ ವ್ಹಾರಯ್ಲಾ...
ಕೊಂಕ್ಣಿ ಸೆವಾ ತಾಂಚಿ ದೆಖೊನ್
ಪಿಶ್ಯಾಂತ್ ತಾಂಕಾ ಮೆಳವ್ನ್
ಪೊಲ್ಯಾರ್ ತಾಂಚ್ಯಾ ಮಾರುನ್
ಫಟಿಂಚ್ಯಾ ಕಾಂಟ್ಯಾಂಚೊ ಮುಕುಟ್
ಮಸ್ತಕಾರ್ ತಾಂಚ್ಯಾ ಸೊಭಯ್ಲಾ
ಕೊಂಕ್ಣಿಂತ್ಲ್ಯಾ ಪಿಲಾತಾಂನಿ
ಧುವ್ನ್ ಆಪ್ಲೆ ಹಾತ್
ವಾಚ್ಲಾಂ ತಾಂಚೆರ್ ಫರ್ಮಾಣ್...
ದುಡು ವಾಟಾರ್ನ್.. ನೀದ್ ಭಂಗವ್ನ್
ತಯಾರ್ ಕೆಲ್ಲೆಂ ಕೊಂಕ್ಣಿ ಸಾಹಿತ್ಯ್
ಆಲ್ಮಾರಿಂತ್ ಕುಸೊನ್..
ವ್ಹಾಳಯೆ ಖಾಣ್ ಜಾತಾಂ..
ಖಾಂದಿ ಖುರಿಸ್ ವಾವವ್ನ್
ಪರತ್ ಪರತ್ ಧರ್ತೆಕ್ ಶೆವ್ಟೊನ್
ಕಶ್ಟಾಂ ದೊಂಗೊರ್ ಚಡ್ಚೊ ಅನ್ಭೋಗ್
ತಾಣಿಂ ಭಗ್ಲಾ...
ಪುಣ್ ತುಮಿ...
ಕೊಂಕ್ಣಿ ವಾವ್ರಾಡ್ಯಾನೊಂ.. ಕೊಂಕ್ಣಿ ಸುಪುತ್ರಾನೊ...
ಭಿಯೆನಾಕಾತ್... ಪಾಟಿಂ ಪಳೆನಾಕಾತ್...
ಕಿತ್ಯಾ....
ಕಶ್ಟಾಂ ಬಗಾರ್ ಫಳ್ ನಾಂ...
ಖುರ್ಸಾ ಬಗಾರ್ ಜಯ್ತ್ ನಾಂ..
ಅಮರ್ ಜಾಲ್ಲ್ಯಾ ವೀರ್ ಕೊಂಕ್ಣ್ಯಾನಿಂ
ಖುರಿಸ್ ತಾಂಚೊ ವಾವಯ್ಲಾ
ಕೊಂಕ್ಣೆಕ್ ಜಿವಂತ್ ದವರ್ಲ್ಯಾ...
ತಾಂಚ್ಯಾ ವಾವ್ರಾನ್ ತಾಂಚ್ಯಾ ಘಾಮಾನ್
ಸಂವಿಧಾನಾಚೆ ಅಟ್ವ್ಯಾ ವೊಳೆರಿಂತ್
ಕೊಂಕ್ಣಿ ಭಾಸ್ ಶಾಭಿತ್ ಆಸಾ...
ತಾಂಚ್ಯಾ ವಾಂವ್ಟಿನ್ ವರ್ತೆ ಮ್ಹಿನತೆನ್
ಶಾಳಾಂನಿ ಆಜ್ ಕೊಂಕ್ಣಿ ರಿಗೊನ್
ಜಯ್ತ್ ವರ್ತೆಂ ಆಪ್ಣಾಂವ್ಕ್ ಸಕ್ಲ್ಯಾ..
ಧಯ್ರ್ ಘೆಯಾ...
ಕೊಂಕ್ಣಿ ಕುಂವರಾನೊ ಕೊಂಕ್ಣಿ ಸುಪುತ್ರಾನೊ
ಧಯ್ರ್ ಘೆಯಾ...
ವಾವ್ರ್ ತುಮ್ಚೊ ರಾವಯ್ನಾಕಾತ್... ಪಯ್ಣ್ ತುಮ್ಚೆಂ ಸಂಪಯ್ನಾಕಾತ್...
ಘೆಯಾ ಖುರಿಸ್ ಕೊಂಕ್ಣಿಚೊ.. ನಿರಾಸ್ ತುಮಿ ಜಾಯ್ನಾಕಾತ್..
ಏಕ್ ದೀಸ್...
ಜಾತೆಲ್ಯಾತ್ ತುಮಿ ವರ್ತೆ ನಶಿಬ್ವಂತ್...!
ಕೊಂಕ್ಣಿ ಮಾಯೆಚೆಂ ಋಣ್ ತಿರ್ಸಿಲ್ಲೆ ಪುನೆವಂತ್...!!
ಕೊಂಕ್ಣಿ ಖುರಿಸ್ ವ್ಹಾವಯ್ಲೊ [ - ಆಸ್ಟಿನ್ ಪ್ರಭು]
ಉತ್ರಾಂತ್ ಸೂತ್ರಾಂ - ಘೆ ಖುರಿಸ್ ಕೊಂಕ್ಣೆಚೊ
ಮ್ಹಜ್ಯಾ ಬಾಪಾಕ್ ಆಸ್ಲೊ ವ್ಯಾಪಾರ್ ಶಿಂವ್ಣೆಚೊ
ಮುಂಬಯ್ ಸೊಡ್ನ್ ಹಾಂವ್ ಮಂಗ್ಳುರ್ ಆಯ್ಲೊಂ
ಬಾಪಾಯ್ಚಾ ಶೊಪಾಂತ್ ಶಿಂವೊನ್ಂಚ್ ರಾವ್ಲೊಂ
ಏಕ್ ದೀಸ್ ಘರಾ ತೊ ಝೆಲೊ ವಾಚ್ತಾನಾ
ಕಳಿತ್ ಜಾಲೆಂ ಜೊಸಾ ಆನಿಂ ಪತ್ರ್ ಚಲಯ್ನಾ
ಗೆಲೊಂ ಜೊಸಾಲಾಗಿಂ ತೆಂ ಪತ್ರ್ ಅಧೀನ್ ಕರುಂಕ್
ಮೊರ್ಚೆಂ ಪತ್ರ್ ಸದಾಂ ಜಿವಾಳ್ ದವರುಂಕ್
ನವೊ ಆಕಾರ್ ದೀವ್ನ್ ರಂಗಾಳ್ ಫೊರ್ ಕೆಲೊ
ಯುವಜಣಾಂಲೆಂ ಪತ್ರ್ ಮ್ಹಣ್ ಬಿಲ್ಲೊ ಲಾಯ್ಲೊ
ಪ್ರಸಾರ್ ಬರೊಚ್ಚ್ ವಿಕ್ರೊ ಲೊಕಾಮೊಗಾಳ್ ಜಾಲೊ
ಸ ಮಹಿನ್ಯಾಂನಿ ಮಿತ್ರ್ ಪತ್ರಾಚೊ ಸಂಪಾದಕ್ ಜಾಲೊಂ
ವರ್ಸಾ ಭಿತರ್ ಕಾಣಿಕ್ ಪತ್ರ್ಯೀ ಆಪ್ಣಾವ್ನ್ ಸೊಡ್ಲೆಂ
ತೆವ್ಳ್ಯಾ ಪತ್ರಾಂಚೊ ತರುಣ್ ಸಂಪಾದಕ್ ನಾಂವ್ ಮೆಳ್ಳೆಂ
ಏಕ್ ದೀಸ್ ಏಕ್ ಯಾಜಕ್ ಮ್ಹಾಕಾ ವಾಟೆರ್ ಭೆಟ್ಲೊ
ಆರೆ ತುಂ ತರ್ನಾಟೊ, ತುಜೆಂ ಮಿತ್ರ್ ಮ್ಹಾತಾರೆಂ ಮ್ಹಣಾಲೊ
ಕಸೆಂ ತರ್ನಾಟೆಂ ಕರುಂ ಮ್ಹಳ್ಳ್ಯಾಕ್ ಐಡಿಯಾ ದೀಲಾಗ್ಲೊ
ಸಮಾಜೆಂತ್ಲ್ಯಾ ಮುಖೆಲ್ಯಾಂವಿಶಿಂ ಬರಂವ್ಕ್ ಸಾಂಗಾಲಾಗ್ಲೊ
ಏಕ್ ದೀಸ್ ಆವ್ಚಿತ್ತ್ ಸಂಪಾದಕಾಕ್ ಪತ್ರ್ ಆಯ್ಲೆಂ
ಹ್ಯಾಚ್ಚ್ ಪಾದ್ರಿ ವಿಶ್ಯಾಂತ್ ತಾಂತುಂ ಬರವ್ನ್ ಆಸ್ಲ್ಲೆಂ
ತುರ್ಥಾನ್ ಹಾಂವೆಂ ಹೆಂ ಪತ್ರ್ ಛಾಪುನ್ಂಚ್ ಸೊಡ್ಲೆಂ
ಪರಿಣಾಮ್ ಕಸೊ ರಾವತ್ ಪಳೆಂವ್ಕ್ ಮನ್ ತಯಾರ್ ಜಾಲೆಂ
ದುಸ್ರ್ಯಾಚ್ಚ್ ದೀಸಾ ಮ್ಹಜೊ ಲೇಖಕ್ ಮಿತ್ರ್ ಆಪಯ್ಲಾಗ್ಲೊ
ಕಿತೆಂ ತುಂವೆಂ ಕೆಲೆಂಯ್ ಮ್ಹಣೊನ್ ಸವಾಲ್ ಘಾಲಿಲಾಗ್ಲೊ
ನ್ಹಂಯ್ಗೀ ತಾಣೆಂ ಸಾಂಗ್ಲ್ಲೆಂ ಮುಖೆಲ್ಯಾಂ ವಿಶ್ಯಾಂತ್ ಬರಂವ್ಕ್
ಸಮಾಜಿಕ್ ಜಾಗೃತಿ ಮಿತ್ರ್ ಪತ್ರಾ ಮುಖಾಂತ್ರ್ ಹಾಡುಂಕ್?
ಏಕಾಚ್ಛಾಣೆಂ ಮ್ಹಾಕಾ ವಕಿಲಾಚೆಂ ನೋಟೀಸ್ ಆಯ್ಲೆಂ
ಮುಂಬಯ್ಚ್ಯಾ ಕೋಡ್ತಿಂತ್ ಫಿರ್ಯಾದ್ ಮಾಂಡುನ್ ಜಾಲ್ಲೆಂ
ಮ್ಹಜ್ಯಾ ಪತ್ರಾಚೆಂ ನ್ಯಾಯ್ ವೃತ್ತ್ ಮಂಗ್ಳುರ್ ಜಾಲ್ಯಾರೀ
ಮ್ಹಜೆರ್ ಅಪ್ರಾಧ್ ಮಾಂಡ್ಲ್ಲೊ ತ್ಯಾ ಬ್ಯಾಂಡ್ರಾ ವೇಳೆರಿ
ಹಾಂವೆ ತುರ್ಥಾನ್ ತ್ಯಾ ಪಾದ್ರಿಕ್ ಭಗ್ಸಾಣ್ಯಾ ಪತ್ರ್ ಲಿಖ್ಲೆಂ
ಪತ್ರ್ ಛಾಪ್ಲ್ಲಿ ಚೂಕ್ ಜಾಲಿ, ಮಾಫ್ ಕರ್ ಮ್ಹಣ್ ಸಾಂಗ್ಲೆಂ
ಪುಣ್ ಹ್ಯಾ ಪಾದ್ರಿನ್ ಮ್ಹಾಕಾ ಶೀದಾ ಖುರ್ಸಾರ್ಚ್ಚ್ ಮಾರ್ಲೆಂ
ದೋನ್ ವರ್ಸಾಂ ಕೋಡ್ತಿಂತ್ ನಾಚೊಂಕ್ಚ್ ಲಾಯ್ಲೆಂ
ಪಾದ್ರಿಚೆರ್ ರಾಗ್ ಆಸ್ಲ್ಲ್ಯಾ ಏಕಾ ಸೆಮಿನರಿಸ್ತಾನ್ ಹೆಂ ಧಾಡ್ಲ್ಲೆಂ
ಫಟ್ಕಿರೆಂ ನಾಂವ್ ದೀವ್ನ್ ಮ್ಹಾಕಾ ಮಾಂಕೊಡ್ ಕೆಲ್ಲೆಂ
ಹೆಂ ಸರ್ವ್ ಮ್ಹಾಕಾ ಉಪ್ರಾಂತ್ ಕಳೊನ್ ಆಯ್ಲೆಂ
ಇತ್ಲ್ಯಾ ಭಿತರ್ ಪಾದ್ರಿನ್ ಕೋಡ್ತಿಕ್ ವ್ಹರುನ್ ಜಾಲ್ಲೆಂ
ಮ್ಹಾಕಾ ಏಕ್ ಮೆಳ್ಳೊ ವಕೀಲ್ ಬಾರ್ಕುರ್ ಗಾಂವಾಂತ್ಲೊ
ಮುಂಬಯ್ ಶ್ಹೆರಾಂತ್ ವಕಾಲತ್ ಕರುನ್ ತೊ ಆಸ್ಲೊ
ನಿಮಾಣೆ ದೋಗೀ ವಕೀಲ್ ಸಾಂಗಾತಾ ಯೇವ್ನ್ ಮೆಳ್ಳೆ
ಚುಕಿದಾರ್ ಕರುನ್ ಮ್ಹಾಕಾ ಶಿಕ್ಷಾ ದೀಂವ್ಕ್ ನಿರ್ಧಾರಿಲೆಂ
ಮಿತ್ರ್, ಝೆಲೊ, ಕಾಣಿಕ್ ಪತ್ರಾಂಚ್ಯಾ ಮುಖ್ ಪಾನಾಂನಿ
ತೀತೀನ್ ಪಾವ್ಟಿಂ ’ಮಾಫಿ ಆಶೆತಾಂ’ ಛಾಪುನ್ ಭೆಟಯ್ಲಿಂ
ತೀನ್ ಆಂಕ್ಡ್ಯಾಂನಿ ಸಗ್ಳೆಂ ಪಾನ್ಂಚ್ ಹ್ಯಾ ಮಾಫಿಕ್ ಭೆಟಯ್ಲೆಂ
ಕೊಂಕ್ಣಿ ಸಂಸಾರಾಂತ್ ಮ್ಹಾಕಾ ನಾಲೀಸಾಯ್ ದೀಲಾಗ್ಲೆಂ
ಪತ್ರಾಂಚೊ ವಿಖ್ರೊ ದೆಂವ್ಲೊ, ಬ್ಯಾಂಕ್ ಲೋನ್ ಚಡಾತ್ತ್ ಆಯ್ಲೊ
ತುರ್ಥ್ ಪರಿಸ್ಥಿತಿ ಜಾಹೀರ್ ಜಾಲ್ಲಿ ಭೊರ್ಯಾ ವಯ್ರ್ ಭೊರ್ಕುಟೊ
ಮುಂಬಯ್ಚ್ಯಾ ವಿಕ್ರ್ಯಾ ಪ್ರತಿನಿಧಿನ್ ಧಾ ಹಜಾರ್ ಗುಳುಂ ಕೆಲೆ
ರಿಣಾಂತ್ ಆಸ್ಲ್ಲ್ಯಾ ಮ್ಹಜೆ ಸತ್ತ್ಯಾನಾಸ್ ಕರುನ್ ಘಾಲೆಂ
ನಿಮಾಣೆಂ ತೀನ್ಯೀ ಪತ್ರಾಂ ಹಾಂವೆ ಬಂಧ್ ಕರಿಜಾಯ್ ಪಡ್ಲಿಂ
ಸ್ವಪ್ಣಾಂ ಸರ್ವ್ ಮ್ಹಜಿಂ ನಿಸ್ಸಂತಾನ್ ಜಾವ್ನ್ಂಚ್ ಗೆಲಿಂ
ಶಿಂವ್ಕಾರ್ ಜಾವ್ನ್ಂಚ್ ಜರ್ ಹಾಂವ್ ವ್ಯಾಪಾರ್ ಕರುನ್ ಆಸ್ಲೊಂ
ಅಸಲೊ ಕೊಂಕ್ಣಿ ಖುರಿಸ್ ಕೆದಿಂಚ್ ವ್ಹಾವಂವ್ಕ್ ನಾ ಸಕ್ತೊಂ!
ಘೆ ಖುರಿಸ್ ಕೊಂಕಣಿಚೊ [ - ನಂದಿನಿ]
ತುಂ ದೆವಾಬರಿ, ದೊವಾಬರಿ, ಸಕ್ತೆವಂತಿ ಸುಂದರಿ
ತುಂ ಆವಯ್, ಫಕತ್ ಆವಯ್, ಆವಯ್ ಸರ್ವಾಂಚಿ
ತುಂ ನ್ಹಂಯ್ ಧುವ್, ಭಯ್ಣ್, ಬಾಯ್ಲ್ ವಾ ಸುನ್ ಕೆದಿಂ ಕೊಣಾಚಿ
ತುಂ ಫಕತ್ ಆವಯ್, ಆವಯ್ ಆಮಾ ಸರ್ವಾಂಚಿ
ತುಂ ಮಧುರ್, ಮೊವಾಳ್ ಅತಿ ರಮ್ಯ್ ಸುಂದರ್
ತುಂ ಸುಂದರಿ ಅಮ್ರುಕಿ ತುಂ ಮ್ಹೊಂವಾಳ್ ಗಿರೆಸ್ತ್
ಸರ್ವೀಣ್ ತುಜಿಂ ಉತರಾಂ ಸುರ್ ಸಂಗೀತಾಚೊ ಗಳ್ಯಾಂತ್
ತುಂ ಬೆಸಾಂವ್ ಮಾಲ್ಘಡ್ಯಾಂಚೆಂ ತುಂ ನಿಧಿ ಅತಿ ಅಪೂರ್ವ್!
ಹೆಂ ನಾತೆಂ ತುಜೆಂ ಮ್ಹಜೆಂ ವರಸಾಂ ವರಸಾಂಚೆಂ
ಜಣಾಂ ಜಣಾನ್ ದೆಕ್ಲ್ಯಾಂತ್ ತುಜಿಂ ದುಕಾಂ
ದುಕಾಂ ಥಳ್ಥಳಿಂ ವಜ್ರಾಂ ಮೊತಿಯಾಂ ಥಿಕಾಂ
ತುಜೆಸಂಗಿಂ ಜಿಯೆವ್ನ್ ರಡೊನ್ ಮೆಲೆ ಕಿತ್ಲೆ?
ಆವಯ್ಗೆ ಆವಯ್ ದೂಕ್ ತುಜೆಂ ಅನಂತ್
ವ್ಹಾಳ್ತಾ ಸದಾಂಕಾಳ್ ಏಕ್ ನಾ ಏಕ್ ಕಾರಣಾಕ್
ತುಂ ದುಕೆಸ್ತ್ ನಿರಂತರ್ ತರಿ ಖಂತ್ ನಾ ತುಜಾ ಭುರ್ಗ್ಯಾಂಕ್
ಮಜೆನ್ ರಾವ್ಲ್ಯಾಂತ್ ತುಜಿಂ ಭುರ್ಗಿಂ ದುಕಾಂ ತುಜಿಂ ಪುಸುಂಕ್!!
ತುಜಾ ಸೊಡ್ವಣೆಚಾ ಖುರ್ಸಾರ್ ಮಾಯೆ ದಿಲೊ ಪ್ರಾಣ್
ದೆಕುನ್ ಆತಾಂ ಖುರ್ಸಾಕ್ ನಾ ಜಡಾಯ್
ನಾ ತಾಕಾ ಲಜ್, ನಾ ಕಸಲೀಯ್ ಮಾಲಿಸಾಯ್
ರಗ್ತಾನ್ ಜಾಲಾ ತೊ ಅಮರ್, ಜಯ್ತಾಚೊ ಸಂಕೇತ್ !!
ಆತಾಂ ತುಜಾ ಭುರ್ಗ್ಯಾಂಕ್ ಖುರಿಸ್ಚ್ ಖುರಿಸ್ !
ಆಲ್ತಾರಿರ್ ಖುರಿಸ್, ಬಾಗ್ಲಾರ್ ಖುರಿಸ್, ಧಾಂವ್ಚಾ ಕಾರಾರ್ ಖುರಿಸ್
ಹಾತಾಂತ್ ಖುರಿಸ್, ಗಳ್ಯಾಂತ್ ಖುರಿಸ್, ಕಾನಾಂತೀ ಖುರಿಸ್ !!
ತಾಂಚೆ ಸಂಗಿಂ ಕೊಂಕಣಿ ಮಾಯೇ ತುಜೊಯ್ ಏಕ್ ಖುರಿಸ್!!
ತುಜೊ ಖುರಿಸ್ ಘೆವ್ನ್ ನೀಸ್ ಪಿಯೆವ್ನ್ ವಾಂಚ್ಲೆ
ಬಾಯ್ಲ್ ಭುರ್ಗ್ಯಾಂಕ್ ವಾಟೆರ್ ಘಾಲ್ನ್ ಸರ್ಗಾರ್ ಗೆಲೆ
ಗಂಗಾಗತಿಕ್ ಪಾವ್ಲೆ ಪೂಣ್ ತುಜಾ ಖುರ್ಸಾ ಪಂದಾಚ್ ಮೆಲೆ
ಮೆಲ್ಲೆ ತೆ ಮೊರೊನ್ ಗೆಲೆ ಪುಣ್ ಖುರಿಸ್ ತುಜೊ ಸೊಡ್ನ್ ಗೆಲೆ
ಮಾಯೆಗೆ ಮಾಯೆ, ಮಾಯೆ ಕೊಂಕಣಿ ಮಾಯೆ
ತುಜಾ ದೊಳ್ಯಾಂನಿ ದೂಕ್ ಅಮರ್ ಕಶೆಂ ಜಾಲೆಂಗೆ?
ಚಿಂತಾ ಕರುಂ ನಾಕಾಗೆ ಆಸಾಂವ್ ಆಮಿ ತುಜಿಂ ಭುರ್ಗಿಂ
ಘೆಂವ್ಕ್ ಖುರಿಸ್ ಕೊಂಕಣೆಚೊ, ಖುರಿಸ್ ಜಯ್ತಾಚೊ, ಖುರಿಸ್ ಮಾನಾಚೊ!!
ಕೊಂಕ್ಣೆಚೊ ಖುರಿಸ್ [- ಮನು, ಬಾಹ್ರೇಯ್ನ್]
ಹಾಂವ್ ಜಲ್ಮತಾನಾ ಕಿತೆಂ ರಿತಿ-ರಿವಾಜ್
ಆಮ್ಚಿ ಸಂಸ್ಕೃತಿ ಗುಮ್ಟಾಂಚೊ, ಭಾಶೆಚೊ ಆವಾಜ್
ಕೊಂಕ್ಣಿ ಭಾಸ್ ಉಲಯ್ತಾನಾ ಮ್ಹೊಂವ್ ಗಳ್ತಾಲೆಂ ನೀಳ್
ಹಿಚ್ಚ್ ಆಮ್ಚಿ ಮಾಯ್ಭಾಸ್ ಖುರಿಸ್ ಜಾಲಾ ಆಜ್.
ಪಯ್ಲೆಂ ಶಾಳ್ ಜಾಲ್ಲೆಂ ಮಾಯ್ಭಾಶೆಚೆಂ
ಗಿನ್ಯಾನ್ ಚಡ್ತಾನಾ ಭಾಲೆ ಮಾರ್ಲೆ ಇಂಗ್ಲಿಶಾಚೆ
ಜೀಬ್ ಲೊಳ್ತಾಲಿ, ಲಜ್ ದಿಸ್ತಾಲಿ, ಉಲಂವ್ಕ್ ಸಬ್ಧ್ ಕೊಂಕ್ಣೆಚೆ
ಘಾಯೆಲಿ ಪುರ್ವಜಾಂಚಿ ಸಂಸ್ಕೃತಿ ಮೂರ್ತಿ ಮಾರ್ ಕೊರ್ಡ್ಯಾಂಚೆ
ಶಿಕ್ಲಿಂ ಬಾಳಾಂ, ಫುಟ್ಲಿಂ ಪಾಳಾಂ, ಉಭ್ಲಿಂ ಪರ್ಗಾವಾಂತ್
ಶಿಕ್ಲ್ಲಿ ಕೊಂಕ್ಣಿ ವಿಸ್ರಾಲಿಂ, ಪರ್ಕ್ಯಾ ಭಾಶೆಚೆ ಹಾಂಕಾಂ
ವಳ್ಕಾಲೆನಾಂತ್,
ಫಿಂರ್ಗಿ ಜಿಬೆರ್ ಅಡ್ಚಾಲಿ ಭಾಸ್, ಪಡ್ಲೊ ಕೊಂಕ್ಣೆಚೊ ಖುರಿಸ್ ಜಾವ್ನ್ ಆಸ್ಕತ್
ಪರ್ಗಾಂವಿ ಪುರ್ಲೆಂ ಕೊಂಕ್ಣೆಕ್, ಜಾಲ್ಯಾರೀ ಭಾಸ್ ಜಾಲಿ ಜೀವಂತ್
ಖಿರ್ಲಾಲೆಂ ಸಂಸ್ಕೃತಿಚೆಂ ಉದ್ಯಾವನ್ ಕೊಂಕ್ಣ್ಯಾಚೆಂ ಆಯ್ಕಾಲೆಂ ಗಾಯನ್
ಪರತ್ ಫುಲ್ಲೆಂ ದಿರ್ವೆಂ ಕೊಂಕ್ಣೆಕ್ ನ್ಹೆಸಯ್ಲೆಂ ನ್ಹೆಸಾಣ್
ಕವಿ ಲೇಖಕ್ ನಾಟಕಿಸ್ತ್ ಗಾವ್ಪ್ಯಾಂನಿ ಉರಯ್ಲಿ ಭಾಸ್ ಕರ್ನ್ ಶ್ರಮಧಾನ್
ಅಸ್ಕತ್ ಜಾಲ್ಲೆ, ಜಾಯ್ತೆ ಸರ್ಲೆ ಕೊಂಕ್ಣಿ ಭಾಶೆಚೊ ಖುರಿಸ್ ವ್ಹಾವವ್ನ್
ಉಂಚ್ಲೊ ಅವಾಜ್, ಫುಟ್ಲೊ ತೊರ್ನೊ ಸಂಸಾರ್ಭರ್ ಕೊಂಕ್ಣಿ ಭಾಶೆಚೊ
ಆಟ್ವ್ಯಾ ವೊಳೆರಿಂತ್ ’ದಾಂಬ್ಲೊ ಸಿಕ್ಕೊ’ ಭಾರತೀ ಸರ್ಕಾರಾಚೊ
ಕೊಂಕ್ಣೆಚೊ ಖುರಿಸ್ ಪ್ರಕಾಶಿತ್ ಜಾಲೊ ಉಭ್ಲೊ ಬಾವ್ಟೊ ಸಂಸ್ಕೃತಿಚೊ
ಆಳ್ವೊಂಚಿನಾ ಕಳ್ವೊಂಚಿ ನಾ ಪರತ್ ಪಡ್ಚೊನಾ ಖುರಿಸ್ ಕೊಂಕ್ಣೆಚೊ
ಘೆ ಖುರಿಸ್ ಕೊಂಕ್ಣೆಚೊ [- ಪ್ರಸನ್ನ್, ನಿಡ್ಡೋಡಿ]
ಕೊಂಕ್ಣಿ ಆವಯ್ ಜಾವುನ್ ತುಂ ಮ್ಹಜಿ
ಪೊಸುನ್, ಖಾವವ್ನ್, ಮೊಗಾನ್ ವಾಗವ್ನ್
ಕೊಂಕ್ಣಿ ಶಿಕಾಪ್ ದಿವುನ್ ನಾಂವ್ ದಿಲೆಂಯ್
ತುಜೆಂಚ್ ಚೊರುನ್ ತುಕಾಚ್ ಲುಟುನ್ ಕವಿ ಜಾಲೊಂ..!
ಬಳಾಧಿಕ್, ಧಯ್ರಾಧಿಕ್ ಜಾವುನ್ ವ್ಡೊನ್
ಧಾರೆಚ್ಯಾ ಭಾಲಿಯೆಪರಿಂ ಲಿಖ್ಣಿ ಝರವ್ನ್
’ಭಾಲ್ಯೆಚೆಂ ತೀರ್’ ತುಜೆರ್ ಮಾರುನ್
ಸ್ವಾರ್ಥ್ ಆನಿ ವ್ಹಡ್ಪಣಾನ್ ಖುರಿಸ್ ಹಾಂವ್ ಜಾಲೊಂ
ಜಾಣಾರಿ ಜಾವುನ್ ನೆಣಾರಿ ತುಕಾ ಕೆಲೊ
ಉತರ್ ಪ್ರಾಯೆರ್ ತುಜ್ಯಾ
ಹಾತೆರ್ ಆನಿ ಆಧಾರ್ ಜಾಂವ್ಚೆ ವೆಳಿಂ
ಧಾರುಣ್ ಜಾವುನ್ ತುಕಾ ಪೊಂಡಾ ಪರ್ಯಾಂತ್
ಪಾವಂವ್ಕ್ ವೇಳ್ ಲೆಗುನ್ ದೆಖ್ಲೊ ನಾ..!
ಕೊಂಕ್ಣಿ ಮಾತೆಚೊ ಸುಪುತ್ರ್ ಜಾವ್ನ್
ಕೊಂಕ್ಣಿ ಖುರಿಸ್
ತುಜೆಥಾವ್ನ್ ವಾವಂವ್ಚೊ ಸೊಡುನ್ ಫುಡೆಂ
ತುಜ್ಯಾಚ್ ಖಾಂದಿಂ ಖುರಿಸ್ ದಿಲೊ ಮ್ಹಣೊನ್
"ತುಂಚ್ ಘೆ ಖುರಿಸ್ ಹೊ ಕೊಂಕ್ಣೆಚೊ.."
ಹಾಂವ್ ನ್ಹಂಯ್ ಹಕ್ಕ್ದಾರ್ ಹ್ಯಾ ಖುರ್ಸಾಚೊ..!
ಖುರಿಸ್ ಘೆಂವ್ಕ್ ಮುಖಾರ್ ಸರ್ [- ಸ್ಟ್ಯಾನಿ ಮೆಂಡೊನ್ಸಾ]
ಕೊಂಕ್ಣಿ ತುಜಿ ಉರೊಂಕ್ ಜಾಯ್
ಕೊಂಕ್ಣೆ ಖಾತಿರ್ ತುಕಾ ಮೊರೊಂಕ್ ಜಾಯ್
ತರ್ ಘೆ ಖುರಿಸ್ ಕೊಂಕ್ಣೆಚೊ
ಉಗ್ಡಾಸ್ ದವರ್ ಮ್ಹಜಾ ಸಾಂಗ್ಣೆಚೊ
ತೊಂಡಾಂತ್ ಫಕತ್ತ್ ಸಾಂಗ್ಚೆಂ ನ್ಹಂಯ್
ಕಾರ್ಯಾಂತ್ ಕರ್ನ್ ದಾಕಂವ್ಕ್ ಜಾಯ್
ತರ್ ವ್ಹಾವಂವ್ಕ್ ಘೆ ಖುರಿಸ್ ಕೊಂಕ್ಣೆಚೊ
ಮಾಂದುನ್ ಘೆ ಅರ್ಥ್ ಹ್ಯಾ ಕೊಡು ಸತಾಚೊ
ಹಾಂವ್ ಕೊಂಕ್ಣೊ ಮ್ಹಣ್ ಸಾಂಗ್ತಾಯ್ ತೆಂ ಸ್ವಷ್ಟ್
ಪುಣ್ ತುಜ್ಯಾ ಭುರ್ಗ್ಯಾಂಕ್ ತಿ ಶಿಕಂವ್ಕ್ ತುಕಾ ಕಿತ್ಯಾಕ್ ಕಷ್ಟ್
ಘೆ ಖುರಿಸ್ ಕೊಂಕ್ಣೆಚೊ
ಉರಯ್ ಮಾನ್ ತುಜ್ಯಾ ಆವಯ್ಚೊ
ಪರ್ಗಾವಾಂತ್ ಕೊಂಕ್ಣಿ ಉಲಂವ್ಕ್ ದಿಸ್ತಾ ನಂಯ್ಗೀ ಲಜ್
ದೆಕುನ್ಂಚ್ ಕೊಂಕ್ಣಿ ಉಲಂವ್ಕ್ ಯೆತಾ ತುಕಾ ಗಾಗ್
ಆಸಾ ತರ್ ಹುಸ್ಕೊ ತುಕಾ ಮಾಂಯ್ ಭಾಶೆಚೊ
ಖಾಂದ್ಯಾರ್ ಘೆ ಖುರಿಸ್ ತುಜಾ ಕೊಂಕ್ಣೆಚೊ
ಬಾಯ್ಲೆ ಭುರ್ಗ್ಯಾಂಚಿ ಪಿರ್ಪಿರಿ
ವಾವ್ರ್ ರಾಟಾವಳೆಂಚಿ ಕಿರ್ಕಿರಿ
ಕರ್ಶಿಗೀ ಕೊಂಕ್ಣೆಚಿ ಇಲ್ಲಿಶಿ ಚಾಕ್ರಿ
ಘೆ ಖುರಿಸ್ ಕೊಂಕ್ಣೆಚೊ
ಖುರ್ಸಾಂತ್ ಕಿತೆಂ ಆಟಾಪುನ್ ಆಸಾ
ಲಜ್, ನಾಲಿಸಾಯ್, ಕಷ್ಟ್ ಆನಿ ಅನ್ಕೊಣೆ
ಸಗ್ಳೆಂ ಹೆಂ ಅನ್ಭೋಗ್ ಜಾಲಾ
ಕೊಂಕ್ಣೆಚಾ ಖುರ್ಸಾಕ್ ಘೆತ್ಲಾ ಕೊಣೆ
ನಷ್ಟಾಂ ವಿಣ್ ದು:ಖ್ ನಾ ಕಷ್ಟಾಂ ವಿಣ್ ಸುಖ್
ಖುರ್ಸಾ ಥಾವ್ನ್ ಕಷ್ಟ್ ಪೂಣ್ ಆಖ್ರೇಕ್ ಮೆಳ್ತಾ ಜಯ್ತ್
ಆಟವ್ ಕರ್ ಹ್ಯಾ ನಿಯಾಮಾಚೊ
ಘೆ ಖುರಿಸ್ ಕೊಂಕ್ಣೆಚೊ
ಉಚಾರ್ನ್ ಕಾಂಯ್ ನಾ ಫಾಯ್ದೊ
ಪಾಳ್ತಾಯ್ ತುಜೊ ಕಾಯ್ದೊ
ವ್ಹಾಳಾಯ್ ಏಕ್ ಥೆಂಬೊ ಘಾಮ್
ಕರುನ್ ಕೊಂಕ್ಣೆ ಖಾತಿರ್ ನಿಸ್ವಾರ್ಥಿ ಕಾಮ್
ಜೆಮೆತಾಯ್ ಕಿತ್ಯಾ? ಮುಕಾರ್ ಸರ್ ಘೆವ್ನ್ ಖುರಿಸ್ ಕೊಂಕ್ಣೆಚೊ.
ಘೆತ್ಲೊ ಖುರಿಸ್ ಕೊಂಕ್ಣೆಚೊ [- ವಾಯ್ಲೆಟ್ ಜೆ. ಪಿರೇರಾ]
ಪ್ರಕೃತಿಚ್ಯಾ ತ್ಯಾ ಸೊಭಾಯೆಕ್ ಭುಲ್ತಾನಾ
ಮ್ಹಜೆ ಥಂಯ್ ಕವಿತಾ ಸ್ಪಿರಿತ್ ವ್ಹಾಳ್ತಾನಾ
ಚಿಂತುನ್ ಆಸ್ಲೊಂ ಸಂಸಾರಾರ್ ವ್ಹಾಳಂವ್ಕ್ ಕವಿತಾ
ಉತ್ರಾಂ ಗುಂತ್ಲಿಂ ಪ್ರಕೃತಿಚಿ ರೂಚ್ ಚಾಕ್ತಾನಾ
ಕವಿಚ್ಯಾ ದೃಷ್ಟೆನ್ ದೆಕ್ತಾಲೊ ಹೊ ಸಂಸಾರ್
ನೆಣಾಸ್ಲೊ ಮೆಳ್ತೆಲೆಂ ಮ್ಹಣ್ ಜುದಾಸ್ ಸಭಾರ್
ಕೊಂಕ್ಣೆ ಖಾತಿರ್ ಜೀವ್ ದೀಂವ್ಕ್ ಆಸ್ಲ್ಲೊ ತಯಾರ್
ಜೀಕ್ ಸಲ್ವಣೆನ್ ಜಿಣ್ಯೆಂತ್ ಜಾಲ್ಲೊ ವಿರಾರ್
ಕೊಂಕ್ಣಿ ಮ್ಹಣ್ ಮಾರ್ಲಿ ಹಾಂವೆ ಬೊಬಾಟ್
ತಿಂ ಪತ್ರಾಂ ತೆಂ ಬೂಕ್ ಕೆಲೆ ಹಾಂವೆ ಪರ್ಗಟ್
ತರೀ ಮ್ಹಜ್ಯಾ ಕುಟ್ಮಾಚಿ ನೆಣಾಸ್ಲೊಂ ಗತ್
ಬಾಯ್ಲ್ ಭುರ್ಗ್ಯಾಂಕ್ ಲಾಗ್ಲಿ ಫುಡಾರಾಚಿ ಖಂತ್
ಕೊಂಕ್ಣೆಚೊ ಖುರಿಸ್ ಆಸ್ಲೊಲೊ ಮ್ಹಜ್ಯಾ ಖಾಂದಾರ್
ನಾ ಪಾವ್ಲಿ ಜೋಡ್ ಪಾಂಯಾಕ್ ವೊಡ್ತಾನಾ ಮಾತ್ಯಾಕ್
ಸಿರೆನಾಚ್ಯಾ ಸಿಮಾಂವ್ ಬರಿಂ ಕೊಣಿ ನಾತ್ಲ್ಲೆ ಕುಮ್ಕೆಕ್
ಮೆಳ್ತಾಲಿ ಥಾಪ್ಡಾಂ ಸಲ್ವಣೆಚಿಂ ಹರ್ಯೇಕ್ ಮೆಟಾಕ್
ಪಡ್ಲೊಂ ಹರ್ಯೇಕ್ ಘಡಿ ಕೊಂಕ್ಣೆಚ್ಯಾ ಖುರ್ಸಾ ಪಂದಾ
ಜಾಲೊ ನಿತ್ರಾಣಿ ಆಯ್ಲೆ ಮರಣ್ ಜೀವ್ ಗೆಲೊ ಉಭೊನ್
ಕೊಂಕ್ಣೆ ಖುರ್ಸಾಂತ್ ಮೆಟಾ ಮೆಟಾಂಕ್ ಮೆಳ್ಳಿ ಸಲ್ವಣ್
ಪುನರ್ಜಿವಂತ್ಪಣಾಕ್ ಆಶೆವ್ನ್ ಘೆತಾಂ ಪೊಂಡಾಂತ್ ವಿಶೆವ್ ಸಾಸಾಣ್
ಘೆ ಖುರಿಸ್ ಕೊಂಕ್ಣೆಚೊ [- ಆಸ್ಟಿನ್ ಪ್ರಭು]
ಜೆಜು ನಝರೆನ್ ಜಲ್ಮಾಲ್ಲೊ ತೆನ್ನಾಂ
ಖುರಿಸ್ ಜಾವ್ನಾಸ್ಲ್ಲೊ ಏಕ್ ಕೀಳ್ ವಸ್ತ್
ಬಂಧಿಖಾನಾಂಕ್ ಹಾಚೆರ್ ಮಾರ್ನ್ ಸೊಡ್ತಾಲೆ
ಮೆಲೆನಾಂತ್ ತರ್ ಲಾಗಾಡ್ ಕಾಡ್ತಾಲೆ
ಆದ್ಲ್ಯಾ ಕಾಳಾರ್ ಕೊಂಕ್ಣಿಯ್ ತಶಿಚ್
ಜಾವ್ನಾಸ್ಲ್ಲಿ ಗ್ರೇಸ್ತಾಂಕ್ ಏಕ್ ಕೀಳ್ ಭಾಸ್
ಘರಾ ಆಯಾ ಮಾತ್ರ್ ತಿ ಭಾಸ್ ಉಲಯ್ತಾಲಿ
ಘರ್ಚಿಂ ಫಿಂರ್ಗಿ ಮರ್ಜೆನ್ ಜಿಯೆತಾಲಿಂ
ಸಭಾರಾಂನಿ ಕೊಂಕ್ಣಿ ಖುರಿಸ್ ವ್ಹಾವಂವ್ಕ್ ಧರ್ಲೆ
ತಾಂಕಾಂ ಜೀವ್ ಆಸ್ತಾಂಚ್ ಮಾತ್ಯೆಂತ್ ಪುರ್ಲೆ
ಕೊಂಕ್ಣಿ ಖಾತಿರ್ ತಾಣಿಂ ಸರ್ವಸ್ವ್ ಹೊಗ್ಡಾಯ್ಲೆಂ
ಕೊಂಕ್ಣಿ ಖುರ್ಸಾರ್ ಲೋಕಾನ್ ಜಿವೆಶಿಂ ಮಾರ್ಲೆಂ
ಆತಾಂ ಹ್ಯಾ ಖುರ್ಸಾಚೊ ಕಾಲೊರ್ ಬದಲ್ಲಾ
ಕೊಂಕ್ಣಿ ಭಾಶೆಚಿ ಕೃಶಿ ವೃದ್ಧಿ ಜಾವ್ನ್ ಆಯ್ಲ್ಯಾ
ಅಂತರ್ಜಾಳಾರ್ ಹಾಚೊ ಪ್ರಭಾವ್ ಫಾಂಕ್ಲಾ
ದೋನ್ ರಾಜ್ಯಾಂಚ್ಯಾ ಶಾಲಾಂನಿ ಕೊಂಕ್ಣಿ ರಿಗ್ಲ್ಯಾ
ಮಂಗ್ಳುರಾಂತ್ ಎರಿಕಾಚೆಂ ಕಲಾಂಗಣ್ ಉಭೆಂ ಜಾಲಾಂ
ಸೆಜಾರಾಚ್ಚ್ ಸಾರಸ್ವತಾಂನಿ ಕೊಂಕ್ಣಿ ಕೇಂದ್ರ್ ಬಾಂದ್ಲಾಂ
ಜಸೆ ಆದ್ಲೆ ಖುರಿಸ್ ಆತಾಂ ಗಳ್ಯಾಂನಿ ಸೊಭ್ತಾತ್
ತಶಿಚ್ ಕೊಂಕ್ಣಿ ಮಾಂಯ್ ಆಜ್ ಸಂಸಾರ್ಭರ್ ಗಾಜ್ತಾ
ತರ್ ಲಜ್ತಾಯ್ ಕಿತ್ಯಾಕ್ರೆ ಕೊಂಕ್ಣ್ಯಾ ತುಂ ಆಜ್?
ಸಾಂಗಾತಾ ಮೇಳ್ ಆನಿ ಬಾಂದ್ ಕೊಂಕ್ಣಿ ಸಮಾಜ್
ಘೆವ್ನ್ ತೊ ಕೊಂಕ್ಣಿ ಖುರಿಸ್ ತುಜ್ಯಾ ಖಾಂದ್ಯಾರ್
ಭರಾನ್ ವ್ಹಾವಯ್ ಕೊಂಕ್ಣಿ ಮಾಯೆಕ್ ಶಿಖರಾರ್!
ಕೊಂಕ್ಣಿ ಖುರಿಸ್ ವ್ಹಾವಯ್ಲ್ಯಾರ್ ಮರಣ್ ಮೆಳ್ಚೆಂನಾ
ಕೊಂಕ್ಣಿ ಖಾತಿರ್ ವಾವುರ್ಲ್ಯಾರ್ ವಸ್ತುರ್ ಗಳ್ಚೆಂನಾ
ಹೆರ್ ಭಾಸಾಂಚೆ ತುಕಾ ಹೀನ್ ರೀತಿನ್ ತಿಳ್ಚೆನಾಂತ್
ಕೋಣ್ಂಚ್ ಬಲಾತ್ಕಾರಾನ್ ತುಜೆಂ ಶಿಂತಿದ್ ಪಿಳ್ಚೆನಾಂತ್
ನಮಾನ್ ತುಕಾ ನಮಾನ್ ಕೊಂಕ್ಣಿ ಖುರ್ಸಾ
ಜಯ್ತ್ ಜಾಂವ್ ತುಜೆಂ ವರ್ಸಾನ್ ವರ್ಸಾ
ತುಜ್ಯಾ ಜಯ್ತಾನ್ ಕೊಂಕ್ಣಿ ವೃದ್ಧಿ ಜಾಂವ್
ಪ್ರಸಾರುನ್ ಮಾಂಯ್ಭಾಸ್ ಗಾಂವಾನ್ ಗಾಂವ್
ಘೆ ಖುರಿಸ್ ಕೊಂಕ್ಣೆಚೊ [- ರೋಶನ್ ರೊಡ್ರಿಗಸ್]
ಕೊಂಕ್ಣಿ ಕೊಂಕ್ಣಿ ಕೊಂಕ್ಣಿ
ಸಗ್ಳ್ಯಾಂನಿ ಕೊಂಕ್ಣೆಚಿ ಸುಕಿ ಖೊಂಕ್ಲಿ
ಕರ್ಚ್ಯಾಕ್ ಕೊಣಿ ನಾಂತ್ ಚಾಕ್ರಿ
ಘೆಂವ್ಕ್ ತಯಾರ್ ಕೊಂಕ್ಣೆಚಿ ಭಾಕ್ರಿ
’ಪಾಯ್’ ಜಾಲೊ ’ಪೊಪ್’
’ಮೀಸ್’ ಜಾಲೆಂ ’ಮಾಸ್’
’ಮಾಸ್’ ಜಾಲೆಂ ’ಮೀಟ್’
’ಕೊಂಕ್ಣಿ’ ಜಾಲೆಂ ’ಕೊಂಕನಿ’
ಪಾದ್ರಿ ಮದ್ರಿಂಚ್ಯಾ ಇಸ್ಕೊಲಾಂನಿ ಉಲಂವ್ಕ್ ನಾ ಕೊಂಕ್ಣಿ!
ವ್ಹಡಿಲಾಂಕ್ ನಾಕಾ ಆಪ್ಲ್ಯಾ ಭುರ್ಗ್ಯಾಂನಿ ಉಲಂವ್ಕ್ ಕೊಂಕ್ಣಿ!
ದುಕ್ತಾನಾ ಅಪ್ಶೆಂಚ್ ತೊಂಡಾರ್ ಯೆತಾ ಉಚಾರ್ ’ಯೇ ಮಾಂಯ್’
ಮಾಂಯ್ಚಾ ಉಸ್ಕ್ಯಾರ್ ಕೊಂಕ್ಣಿ ಬಾಯ್ಲೆಚ್ಯಾ ಉಸ್ಕ್ಯಾರ್ ಕೊಂಗ್ಲಿಷ್!
ನಾ ಕೊಂಕ್ಣೆಕ್ ಏಕ್ ಲಿಪಿ
ಕನ್ನಡ, ದೇವ್ನಾಗರಿ, ರೋಮಿ..
ಕೊಂಕ್ಣೆಚೆಂ ವ್ಯಾಕರಣ್ ಜಾಲಾಂ ತಯಾರ್
ಇಸ್ಕೊಲಾಂನಿ ಸುರು ಜಾಲಾ ಕೊಂಕ್ಣಿ ಅಧ್ಯಾಯ್
ಕೊಂಕ್ಣಿ ಪತ್ರಾಂ ನವಿಂ ನವಿಂ ಛಾಪ್ತಾತ್ ಸಭಾರ್
ಆವಾಜಾವಿಣೆಂ ಬಂದ್ ಪಡ್ತೆಲಿಂ ಮುಕಾರ್
ಕೊಂಕ್ಣಿ ಪತ್ರಾಂ ವಾಚ್ಪಿ ವಾಚ್ತಾತ್ ಜಬ್ಬೊರ್
ಪುಣ್ ಘೆನಾಸ್ತಾಂ ತಿಂ ಮೊಲಾಕ್!.
ಭುರ್ಗ್ಯಾಂಕ್ ನಾಕಾ ಸೊಮ್ಯಾಚಿಂ ನಿಮಾಣಿಂ ಭಾರಾ ವೊರಾಂ
ಜಾಯ್ ತಾಂಕಾಂ ಶಂಕರ್ ಮಹದೇವನಾಚಿಂ ತೀನ್ ವೊರಾಂ
ಅಸ್ಪ್ರಶ್ಯ್ ಮ್ಹಣ್ ಚಿಂತಿನಾಕಾ ತುಂ ಕೊಂಕ್ಣೆಕ್
ವೆಳಾ ತೆಕಿದ್ ಹಾಜರ್ ಜಾ ಕೊಂಕ್ಣಿ ಮಾಂಚಿಯೆಕ್
ಮನ್ ಆಸಾ ತರ್ ಘೆಂವ್ಕ್ ಕೊಂಕ್ಣಿ ಖುರಿಸ್
ಕೊಂಕ್ಣ್ಯಾ ಥಂಯ್ ಉಲಯ್ ಕೊಂಕ್ಣಿ
ಮೊಲಾಕ್ ಘೆವ್ನ್ ವಾಚ್ ಪತ್ರಾಂ ಕೊಂಕ್ಣಿ
ಲಾಬ್-ನಾಂವಾಕ್ ತುಂ ಜಾಯ್ನಾಕಾ ಸಿಮಾಂವ್!
ಘೆ ಖುರಿಸ್ ಕೊಂಕ್ಣೆಚೊ [- ವಿನ್ಸಿ, ಮೆಲ್ಕಾರ್]
ಕೊಂಕ್ಣಿ ಭುರ್ಗ್ಯಾಂಕ್ ಘೆವ್ನ್
ರಡೊನ್ ಭಂವ್ತಾಂ, ಆವಯ್ ದುಃಖಾಂ ಗಳವ್ನ್
ಬಾವ್ಟೊ ಉಭವ್ನ್, ಬೊಬೊ ಘಾಲ್ತಾ
ಮ್ಹಣ್ತಾ..
ಕೊಂಕ್ಣಿ ಉರಯ್, ಕೊಂಕ್ಣಿ ಶಿಕಯ್..
ಆವಯ್ ತಿ ದೂದ್ ದಿತಾ
ಮಾಂಯ್ ಮ್ಹಳ್ಳೆಂ ಶಿಕವ್ನ್ ದೀವ್ನ್
ಪೊಕೊಳ್ ಮಾತ್ಯೆ ವೊಣೊದಿಕ್
ಮಾಂಯ್ ಭಾಸೆಚೊ ಖಾಂಬೊ ಜಾತಾ
ಜಲ್ಮ್ ತೊ ಘೆವ್ನ್ ಜಾಲಾ
ಭಿಂ ಖಿರ್ಲೊನ್ ವಾಡೊನ್ ಜಾಲಾಂ
ಫಾಲೆವ್ನ್ ಆಂಕ್ರ್ಯೊ ಬಾವೊನ್ ಪಡ್ಲ್ಯಾತ್
ಆಧಾರ್ ನಾಸ್ತಾಂ, ಅನಾಥ್ ಜಾವ್ನ್
ಜಿಣ್ಯೆ ಲಿಸಾಂವ್ ಜಿರೊನ್ ಘೆ
ಆಂಗಾಂತ್ ಮಿರಿಯೊ ಪಡ್ಚ್ಯಾ ಪಯ್ಲೆಂ
ಉಲಯ್, ಶಿಕ್, ಕಾಣ್ಗೆ ಮೋಗ್ ಮಯ್ಪಾಸ್
ಜೀವಂತ್ ಹಾಂಗಾ ಆಸ್ತಾ ಪರ್ಯಾಂತ್
ಜಾಯ್ಗಿ ಖುರಿಸ್ ಕೊಂಕ್ಣೆಚೊ [- ಪ್ರಕಾಶ್, ರಂಗನಪಲ್ಕೆ]
ಹಾಂವೆಯ್ ಮಾತ್ಸೊ ಘೆತ್ಲ್ಲೊ
ಖುರಿಸ್ ಹೊ ಕೊಂಕ್ಣೆಚೊ
ಜಡಾಯ್ ಇಲ್ಲಿ ಚಡ್ತಾನಾ
ಕೊನ್ಶ್ಯಾಕ್ ಬಾಬಾ ದವರ್ಲೊ.
ಬೋವ್ ಉಣೆ ಹಾಂಗಾ
ಮಗ್ದಲೆನಾಚೊ ಮರ್ಯೊ ಯಾ ಸಿರೆನಾಂಚೆ ಸಿಮಾಂವ್
ಸಂಗ್ಳ್ಯಾಂಕ್ ಜಾಯ್ ನಾಂವ್ಗಾ
ಸೊಧ್ತಾತ್ ಸುಲಾಭಾಯೆಚೊ ಉಪಾವ್!
ಥೊಡ್ಯಾಂನಿ ವ್ಹಾವಯ್ಲೊ ಖುರಿಸ್
ಪೊಂತಾರ್ ಪರ್ಯಾಂತ್ ಕಾಲ್ವಾರ್
ಬಾಯ್ಲೆ ಭುರ್ಗ್ಯಾಂಕ್ ನಾಂ ನೀಸ್
ಕೊಂಕ್ಣಿ ಸಾಹಿತಿಚೆ ಆತ್ಮೆ ಸಾಲ್ವಾರ್!
ಅಸ್ತಾ ಹುಮೆದ್ ಉರ್ಭಾ ಸುರ್ವೆರ್
ಅರ್ಧ್ಯಾ ವಾಟೆರ್ ಅಪ್ಶಿಚ್ ನಿವ್ತಾ
ವಾಡ್ತಾನಾಂ ರಿಣಾಂಚೊ ಭಾರ್
ಕೊಂಕ್ಣಿ ಪ್ರಕಶನ್ ದಾರ್ ಧಾಂಪ್ತಾ!
ಕೊಂಕ್ಣೆಂತ್ಲಿಂ ಸಭಾರ್ ಅದ್ಲಿಂ ಪತ್ರಾಂ
ಆಜ್ ಉಡಾಸಾಕಿ ಯೆನಾಂತ್
ಅಕ್ರೇಚಿಂ ಚಾರ್ ಉತ್ರಾಂ
ಕೊಂಕ್ಣಿ ಖುರ್ಸಾಂತ್ ಲಾಭ್ ಆಶೆನಾಕಾತ್
ಘೆ ಖುರಿಸ್ ಕೊಂಕ್ಣೆಚೊ [- ಪ್ರಿಯಾ ಫೆರಾರ್]
ಬಗ್ಲೆಕ್ಚ್ ಪುರ್ಲ್ಲ್ಯಾ ಖುರ್ಸಾಚೆರ್ ದೀಶ್ಟ್ ಘಾಲ್ತಾನಾ
ಧುಳಿನ್ ಭರ್ಲ್ಲೊ
ಧುಳ್ ನಿತಳ್ ಕರುಂಕ್ ಗೆಲ್ಲೊ
ಹಾಂವ್ಚ್ ಧುಳಿಂತ್ ಬುಡ್ಲೊಂ!
ತರೀ ಖುರ್ಸಾ ವಯ್ಲಿ ಧುಳ್ ತಿ
ಗೆಲಿಚ್ಚ್ ನಾಂ
ವಾಳಯ್ ಲಾಗೊನ್ ಯೆಂವ್ಚಾ ಖುರ್ಸಾಕ್
ಕುಂಬು ಜಾಯ್ತ್ ಮ್ಹಣ್ ಭಿಂಯೆವ್ನ್
ತೊ ಉಕಲ್ನ್ ಜಾಗೊ ಬದ್ಲುಂಕ್ ಗೆಲ್ಲೊ ಹಾಂವ್
ಹಾಂವ್ಚ್ ಜಡಾಯೆಂತ್ ಖುರ್ಸಾ ಪಂದಾ ಪಡ್ಲೊಂ
ತರೀ ತೊ ಖುರಿಸ್ ತೊ ಮಾತ್ರ್
ಆಪ್ಲ್ಯಾ ಜಾಗ್ಯಾ ಥಾವ್ನ್ ಹಾಲ್ಲೊಚ್ ನಾಂ!
ವಾರ್ಯಾ ವಾದಾಳಾಕ್ ಕಠಿಣ್ ಪಾವ್ಸಾಕ್ ಶಿರ್ಕೊನ್
ಮೊಡೊನ್ ಪಡಾತ್ ಮ್ಹಣ್ ಖಂತಿನ್
ಪಾಕೆಂ ಬಾಂಧುಂಕ್ ಗೆಲ್ಲೊಂ ಹಾಂವ್
ಪಾಕೆಂ ತೆಂ ಉಭಾರುಂಕ್ ಸಕ್ಲೊನಾಂ
ಕಾರಾಣ್ ಥಂಯ್ಸರ್ ಪಂಚಾಂಗ್ಚ್ಚ್
ಥಳ್ ಚುಕ್ಲ್ಲೆಂ!
ಧುಳಿಂತ್ ಪಡ್ಲ್ಯಾರ್ಯಿ ಪರ್ವಾ ನಾಸ್ತಾಂ
ಧುಳ್ ತಿ ಜಾಡುನ್ ಆಸಾಂ
ಜಾಡಾಯೆಂತ್ ಆಡ್ಚಾಲ್ಯಾರ್ಯೀ
ವಾಳಯ್ ಲಾಗಾನಾಶೆಂ ಪ್ರಯತ್ನ್ ಕರ್ತಾಂ
ಪಾಕೆಂ ಉಬಾರುಂಕ್
ಪಂಚಾಂಗ್ ಘಟ್ ಕರುನ್ ಆಸಾ
ಹೊ ಮ್ಹಜೊಯೀ ಖುರಿಸ್
ತುಜೊಯೀ ಖುರಿಸ್
ಹಾಂವ್ಯೀ ಘೆತಾಂ
ತುಂಯೀ "ಘೆ ಕೊಂಕ್ಣೆಚೊ ಖುರಿಸ್"
ಘೆ ಖುರಿಸ್ ಕೊಂಕ್ಣೆಚೊ [- ನಿರ್ಮಲಾ ಗೋವಿಯಸ್, ಬೆಂದುರ್]
ಘೆ ಖುರಿಸ್ ಕೊಂಕ್ಣೆಚೊ
ಶಿಸ್ ತುಂ ಕೊಂಕ್ಣಿ ಮಾಯೆಚೊ
ಕೊಂಕ್ಣಿ ಭಾಶೆಚೊ ಜರ್ ಜಾತಾಯ್ ಪಿಸೊ
ಕಾಳ್ಜಾಂತ್ ಝಳೊನ್ ಖತ್ಕತೊ ಮೊಗ್ ತಿಚೊ
ವಿಚಿತ್ರ್ ಸಕ್ತೆನ್, ನಿಂವಯ್ತ್ ಮೊಗ್ ಹೆರ್ ಭಾಶೆಸೊ
ಪರ್ಕಿ ಭಾಸ್ ಜೊಯ್ತಾನಾ, ವೆಂಗ್ ಮಾರ್ತಾನಾ
ಅಡ್ಹೂಕ್ ಮಾರಿತ್ ಕೊಂಕ್ಣಿ ಬಾಶೆಚಿಂ ಗಾಣಾಂ
ಪರ್ಕಿ ಭಾಶೆಂಚೆ ಅಮಾಲ್ ಚಡ್ತಾನಾ
ಖುರಿಸ್ ಬಾರಾಧಿಕ್ ಕೊಂಕ್ಣಿ ಮಾಯೆಚೊ
ಪರ್ಕಿ ಭಾಸ್ ವ್ಯವಾಹಾರಿಕ್ ಸಂಪರ್ಕಾಕ್ ಗರ್ಜೆಚಿ
ಲೆಕ್ ಮೀತ್ ಪ್ರಯೊಗ್ ತರ್, ಮರ್ಜೆಚಿ
ಮರ್ಜಿ ಮುಕ್ಲ್ಯಾನ್ ಪ್ರವೆಶ್ ತರ್, ಅಮ್ಚಿ ಭಾಸ್ ಪಾಟ್ಲ್ಯಾನ್ ನಪಂಯ್ಚ್
ಉರಾತ್ ಅನಾತ್ ಸದಾಂಕಾಳ್
ಕೊಂಕ್ಣಿ ಮಾಯೆಚೊ ಖುರಿಸ್ ಖಾಂಧ್ಯಾರ್ ವ್ಹಾವಯಾಂ
ಅನಾಥ್ ಕರಿನಾಸ್ತಾಂ ತಿಕಾ ವೆಂಗೆತ್ ಅರಾವ್ನ್ ಧರ್ಯಾಂ
ನಿಂದಾ ಕಿತ್ಲಿಯೀ ಸೊಸುನ್,
ಕೊಂಕ್ಣಿ ಅಭಿಮಾನಿ ಚಡವ್ನ್, ಖುರ್ಸಾಚೆಂ ವಜನ್ ವಾಂಟುನ್
ಹ್ಯಾ ಸಮಾಜೆಂತ್ ತಿಕಾ ಫಾವೊ ತೊ ಮಾನ್ ಲಾಭವ್ನ್,
ಜಯ್ತಾಚಿ ವಾಟ್ ಚಮ್ಕೊವ್ಯಾಂ
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.