ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
7. ಕೊಂಕ್ಣೆಂತ್ ಶೆಣ್ ಆನಿ ಘಾಣ್
ಆಯ್ಚ್ಯಾ ಕೊಂಕ್ಣೆಚೆಂ ನಿರ್ಬಾಗ್ಪಣ್ ಪಳೆವ್ನ್ ಹಾಸ್ಚೆಂಗೀ ರಡ್ಚೆಂಗೀ ಕಳಾನಾ. ಆಜ್ ಆಮ್ಚಿ ಕೊಂಕ್ಣಿ ಭಾಸ್ ತಿಸ್ರಿ ಭಾಸ್ ಜಾವ್ನ್ ಶಾಳೆಂನಿಂ ರಿಗೊನ್, ಫಾಲ್ಯಾಂ ಯುನಿವರ್ಸಿಟಿಂನಿಂ ದಾಖಲ್ ಜಾತೆಲಿ ಮ್ಹಣ್ಟಾನಾ, ಆಮ್ಚೆ ಕಾಂಯ್ ಬುಧ್ವಂತ್ ಬರವ್ಪಿ ಅನಿಕೀ ಆಬಾಚೊ ಕಾಸ್ಟೇ ಲೇಸ್ ಘೆವ್ನ್ ತಾಣೆಂ ರೊಯ್ಲ್ಲ್ಯಾ ವೊಡಾ ರುಕಾಕ್ ಉಮ್ಕೊಳ್ ಘೆತೇ ಆಸಾತ್, ಆನಿ ಮ್ಹಣ್ಟಾತ್: ಆಮಿಂ ಬರಂವ್ಚೆಂ ಸಾದ್ಯಾ ವಾಚ್ಪ್ಯಾಂ ಖಾತಿರ್ ಆನಿ ತಾಂಕಾಂ ಇತ್ಲೆಂ ದಾದೋಶಿ ಪುರೊ!
ಆತಾಂ.... ವಾಚ್ಪ್ಯಾಂಕ್ ಕಿತೆಂ ಜಾಯ್? ಕಿತೆಂ ನಾಕಾ? ಕಿತ್ಲೆಂ ಚಡ್? ಕಿತ್ಲೆಂ ಪುರೊ? ಹೆಂ ಠರಾಂವ್ಚೊ ಅದಿಕಾರ್ ಹ್ಯಾ ಬೇಕೂಫ್ ಬರವ್ಪ್ಯಾಂಕ್ ದಿಲ್ಲೊ ತರೀ ಕೊಣೆಂ? ಹೆ ಮ್ಹಾನ್ ಬರವ್ಪಿ ಅನಿಕೀ ಸತ್ತರ್ ಆಯ್ಶಿಂಚಾಂ ಸಪ್ಣಾಂಚ್ಯಾಂ ಸಂಸಾರಾಂತ್ ಆಸಾತ್. ತೇಂಚ್ಚ್ ಮೆಲ್ಲೆಂ, ಮಾಟ್, ಮಂತ್ರಾಂಚೊಂ ಸಾಂಕಳ್ ಕಾಣಿಯೊ ಆನಿ ರಗತ್ ಘೆಟೆ ಕರ್ಚ್ಯೊ ಕಾದಂಬರಿಯೊ.
ಆಜ್ ತ್ಯೋ ಕೊಣಾಕ್ ಜಾಯ್? ತ್ಯೊ ವಾಚುಂಕ್ ಕೊಂಕ್ಣೆಂತ್ ಆಜೂನ್ ಸಾದೊ ವಾಚ್ಪಿ ಜೀವಂತ್ ಆಸಾಗೀ? ತೊ ಎದೊಳ್ಚ್ಚ್ ರಗಾತ್ ಘೆಟೆ ಜಾವ್ನ್ ಮೆಲಾ! ಜರ್ ಕೊಂಕ್ಣೆಂತ್ ಹ್ಯಾ ಬರ್ಪಾಂಕ್ ಸಾದೊ ವಾಚ್ಪಿ ಮ್ಹಳ್ಳೊ ಏಕ್ ವರ್ಗ್ ಆಸ್ತೊ ತರ್ ಹ್ಯಾಚ್ಚ್ ಬರ್ಪಾಂಚೇರ್ ತೆದ್ನಾಂ ಚಲ್ಲ್ಲಿ "ಪಯ್ಣಾರಿ" ಆಜ್ ಬಂಧ್ ಪಡ್ಟಿನಾ! ತೆದ್ನಾಂ ಕೊಂಕ್ಣಿಂ ಬಾಯ್ಲಾಂಕ್ ಸಿರಿಯಲಾಂ ಪಳೆಂವ್ಕ್ ಟಿ. ವಿ. ನಾತ್ಲಿ. ಆತಾಂ ಹರ್ ಘರಾಂತ್ ಟಿ. ವಿ.ಯೀ ಆಸಾ, ಮಾತ್ಯಾರ್ ಮಾರುಂಕ್ ಊವೊಯೀ ಆಸಾತ್. ಮಿತ್ರ್ ತಸಲೆಂ ಪತ್ರ್ ಸಾಂಕಳ್ ಕಾಣಿ ನಾಸ್ತಾನಾಂಯೀ ಚಲ್ತಾ ಮ್ಹಣ್ಟಾನಾ ಹಾಚಿ ಅಂದಾಜ್ ಕರ್ಯೆತ್.
ಆಯ್ಚೊ ಕೊಂಕ್ಣಿ ವಾಚ್ಪಿ ಕಿತ್ಲೊಗೀ ಮುಕಾರ್ ಪಾವ್ಲಾ. ಹರೇಕ್ಲ್ಯಾಕ್ ಶೇಕ್ಸ್ಪಿಯರ್, ಎಲಿಯೆಟ್ - ಕಳಿತ್ ಆಸಾ. ತಾಕಾ ಹ್ಯಾ ಕೊಂಕ್ಣಿ "ಶೆಣಾ"ಚೆರ್ ಕಾಂಠಾಳೊ ಆಯ್ಲಾ. ದೇಕುನ್ ತೊ ವಿಚಾರ್ತಾ "ಸಾಹಿತ್" ಮ್ಹಳ್ಯಾರ್ ಕಿತೆಂ? ಮ್ಹಣ್ ಸಾಂಗಾ. ಆನಿ ಆಯ್ಲೆವಾರ್ ಚಲ್ಲ್ಲ್ಯಾ ಮಿತ್ರ್-ದಾಯ್ಜ್ ಶಿಭಿರಾಂತ್ ಮಾನೆಸ್ತ್ ಎಡ್ವಿನ್ ಜೆ. ಎಫ್. ಡಿ’ಸೊಜಾನ್ ಏಕ್ ಸಾದೊ ವಾಚ್ಪಿ ಜಾವ್ನ್ ಹೆಂ ಸವಾಲ್ ವಿಚಾರ್ಲೆಂ. ಏಕ್ ವಾಚ್ಪಿ ಜಾವ್ನ್ ಹೆಂ ವಿಚಾರ್ಚೆಂ ಹಕ್ಕ್ ತಾಕಾಯೀ, ಮ್ಹಾಕಾಯೀ ಜರೂರ್ ಆಸಾ. ಕಿತ್ಯಾಕ್ ಏಕ್ ವಾಚ್ಪಿ ವರ್ಗಣಿ ಭಾಂದುನ್ ಪತ್ರಾಂ ವಾಚ್ತಾ. ಜರ್ ತುಮ್ಕಾಂ ಮಾನ್ ಸಾಹಿತಿ ಮ್ಹಣ್ತೆಲ್ಯಾಂಕ್ ಹ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಕಳಿತ್ ನಾ, ತರ್ ತುಮಿಂ ಬರಂವ್ಚೆಂ ಕೊಣಾಚಾ ಕರ್ಮಾಕ್ ಆನಿ ಪುರುಶಾರ್ಥಾಕ್? ತುಮ್ಕಾಂ ಜರ್ ತಾಂಕ್ ಆಸಾ ತರ್ ದೋನ್ ಮಯ್ನೆ, ಕೇವಲ್ ದೋನ್ ಮಹಿನೆ ಮಯ್ನೆ ಬರಂವ್ಚೆಂ ರಾವಯಾ. ಕೋಣ್ ಸಾದೊ ವಾಚ್ಪಿ ತುಮ್ಕಾಂ ವಿಚಾರ್ತಾ ಪಳೆಯಾ. ಪತ್ರಾಂಚೆಂ ಸಂಪಾದಕ್ ನ್ಹಯ್. ತಾಂಚೆ ಕಡೆ ತರ್, ತುಮ್ಚೆಂ ಶೆಣ್ ಛಾಪುಂಕ್ ದರಬಸ್ತ್ ಸುವಾತ್ ಆಸಾ. ಜರ್ ದೋನ್ ಮಹಿನ್ಯಾಂನಿಂ ಮೆಜೂನ್ ಎಕಾ ತರೀ ಸಾದ್ಯಾ ವಾಚ್ಪ್ಯಾನ್ ತುಮ್ಕಾಂ "ಆತಾಂ ಕಿತ್ಯಾಕ್ ಬರಯ್ನಾಂತ್?" ಮ್ಹಣ್ ವಿಚಾರ್ಲೆಂ ತರ್, ತುಮಿಂ ಬರಂವ್ಚೆಂ ಸಾರ್ಥಕ್!
ಏಕ್ ಭಾಸ್ ಗಿರೇಸ್ತ್ ಜಾಯ್ಜೆ ತರ್ ತ್ಯಾ ಭಾಸೆಂತ್ ಉಂಚ್ಲೆಂ ಸಾಹಿತ್ ಯೇಜೆ. ಫಕತ್ "ಶೆಣಾ" ವರ್ವಿಂ ಭಾಸ್ ಘಾಣ್ತಾ ಶಿವಾಯ್ ಬರಿ ಜಾಯ್ನಾ. ಕೊಂಕ್ಣೆಚೆಂ ದುರ್ಭಾಗ್ಪಣ್ ಮ್ಹಳ್ಯಾರ್ ಕೊಂಕ್ಣಿ ಇಸ್ಕೊಲಾಂನಿಂ ಶಿಕೊವ್ಯೆತ್ ಜಾಲ್ಲೆಂ ಸಾಹಿತ್ ಆಮ್ಚೆಕಡೆ ನಾ. ಎಡ್ವಿನ್ ಜೆ.ಎಫ್. ಡಿ’ಸೊಜಾಚೊ ಕಾಣಿಯೊ ವಾ ಮೆಲ್ವಿನ್ ರೊಡ್ರಿಗಸಾಚೊ ಕವಿತಾ ಸೊಡ್ಲ್ಯಾರ್, ಪ್ರಾಥಮಿಕ್ ಇಸ್ಕೊಲಾಂತ್ ಶಿಕೊವ್ಯೆತ್ ತಸಲ್ಯಾ ಮಟ್ಟಾಕ್ಯೀ ಆಮ್ಚ್ಯಾ ಜಾಯ್ತ್ಯಾ ಮಾಲ್ಘಡ್ಯಾ ಬರವ್ಪ್ಯಾಂಚೆಂ ಸಾಹಿತ್ ನಾ. ಹೆಂ ನಾಗ್ಡೆಂ ಸತ್. ಏಕ್ ಭಾಸ್ ಸಾದಿ ಜಾಂವ್ಚಿ ಆನಿ ತಿ ಇಸ್ಕೊಲಾಂನಿಂ ಶಿಕಂವ್ಚಿ ಸಾಂಗಾತಾ ಸಾದ್ ನಾ. ಇಸ್ಕೊಲಾಂನಿಂ, ಕೊಲೆಜಿಂನಿಂ ಶಿಕಂವ್ಕ್ ಆನಿ ಸಂಸಾರಾಚಾ ಹೆರಾ ಭಾಸಾಂಚಾಂ ಸಾಹಿತಾ ಸಾಂಗಾತಾ ರಾವೊಂಕ್ "ಸಾದಿ" ಭಾಸ್ ಉಪ್ಕಾರಾನಾ. ಪ್ರೊ. ಸ್ಟೀವನ್ ಕ್ವಾಡ್ರಸ್ ವಾ ಎಡ್ವಿನ್ ಜೆ. ಎಫ್. ಡಿ’ಸೊಜಾ ತಸಲ್ಯಾಂಚಿಂ ಕ್ಲಾಸ್ ಕಾಣ್ಘೆಜೆ ತರ್ಯೀ ಯೋಗ್ಯತಾ ಅಸಾಜೇ. ನ್ಹಯ್ ತರ್ ಮಾನೆಸ್ತ್ ಎಡಿ ನೆಟ್ಟೊನ್ ಸಾಂಗ್ಲ್ಲೆಪರಿಂ "ಕೋಣನ ಮುಂದೆ ಕಿನ್ನರಿ" ಮಾತ್ ಜಾತಾ. ಪ್ರೊ. ಕ್ವಾಡ್ರಾಸಾಚಿ ಅನಿ ಎಡ್ವಿನ್ ಜೆ. ಎಫ್. ಡಿ’ಸೊಜಾಚಿ ಠೀಕಾ ಕರ್ಚೆ ಪಯ್ಲೆಂ ತಾಂಣಿಂ ಅದ್ಯಯನ್ ಕೆಲ್ಲ್ಯಾ ತಿತ್ಲ್ಯಾ ಬುಕಾಂಚಿಂ ನಾಂವಾಂ ತರ್ಯೀ ತುಮಿಂ ಆಯ್ಕಾಲ್ಯಾಂತ್ಗೀ ಮ್ಹಣ್ ಚಿಂತುನ್ ಪಳೆಜೆ.
ಮಾತ್ಯಾಚೆ ಕೇಸ್ ಝಡ್ಲ್ಲೇ ವರ್ವಿಂ ಕೋಣ್ಯೀ ಮಹಾನ್ ಸಾಹಿತಿ ಜಾಯ್ನಾ. ತಾಕಾ ತಿತ್ಲೆಂ ವಾಚಾಪ್, ಅನ್ಬೋಗ್, ಅಭಿವೆಕ್ತಿಚಿ ತಾಂಕ್ ಆಸಾಜೇ. ಹೆಂ ಕಾಂಯ್ ನಾಸ್ತಾನಾ ಫಕತ್ತ್ ರೆಡೊ ಮುತ್ಲ್ಲೆಪರಿಂ ಬರಯ್ತೇ ಗೆಲ್ಯಾರ್ ತೆಂ ಸಾಹಿತ್ ಜಾಯ್ನಾ ಮ್ಹಳ್ಳೆಂ ಸಮ್ಜೊಂಚೆಂ. ಅಸಲೆಂ ಸಾಹಿತ್ ಜರ್ ಅಮಿಂ ಅಮ್ಚ್ಯಾ ಇಸ್ಕೊಲಾಚ್ಯಾ, ಕೊಲೆಜಿಚಾ ಬುಕಾಂನಿಂ ಘಾಲೆಂ ತರ್ ಆಮ್ಚಿಂ ಭುರ್ಗಿಂ ಆಮ್ಕಾಂ ಥುಕ್ತೆಲಿಂ ಮ್ಹಳ್ಳೆಂ ಉಡಾಸಾಂತ್ ದವರ್ಚೆಂ. ತೆದ್ನಾಂ ಮರ್ಯಾದ್ ತುಮ್ಚಿ ವೆಚಿನಾ ಬಗಾರ್ ಕೊಂಕ್ಣೆಚಿ ವೆತೆಲಿ - ಹೆಂಯೀ ಜಾಣಾ ಜಾಂವ್ಚೆಂ.
ಮಾಲ್ಘಡ್ಯಾ ಸಾಹಿತಿಂಕ್ ಅಕ್ಮಾನ್ ಜಾತಾ ಮ್ಹಣ್ ತುಮಿಂಚ್ಚ್ ಕಿತ್ಯಾಕ್ ಬೊಬಾಟ್ತಾತ್? ತುಮ್ಚೆ ಸಾದೆ ವಾಚ್ಪಿ ಜೀವ್ ಆಸ್ಲ್ಯಾರ್ "ಹೆಂ" ತೆ ಸಾಂಗೊದಿತ್. ತೆದ್ನಾಂ ತುಮ್ಕಾಂಯೀ ಕಿತ್ಲೆ "ವಾಚ್ಪಿ" ಆಸಾತ್ ಮ್ಹಳ್ಳೆಂ ರುಜು ಜಾತೆಲೆಂ! ತುಮಿಂ ಫಕತ್ತ್ ತುಮ್ಚ್ಯಾ ಅಕ್ಮಾನಾ ವಿಶ್ಯಾಂತ್ ಉಲಯ್ತಾತ್... ಕೊಂಕ್ಣೆಂತ್ ಪಾಟ್ಲಿಂ ತೀಸ್ - ಚಾಳಿಸ್ ವರ್ಸಾಂ ಫಕತ್ "ಶೆಣ್" ಸಾಹಿತ್ ಬರವ್ನ್ ಕೊಂಕ್ಣಿ ಭಾಶೆಕ್ ಹೆರ್ ಭಾಸಾಂ ಸಮೊರ್ ಮಟ್ಟ್ ಕುಸ್ಕಾವ್ನ್ ತುಮಿಂ "ಹಲ್ಕ್" ಕೆಲಾಂ ಹಾಚೆವಿಶಿಂ ಕಿತ್ಯಾಕ್ ಉಲಯ್ನಾಂತ್?
ಆತಾಂಯೀ ಅಮ್ಕಾಂ ಸಾದೆಂ ವಾಚಾಪ್ ಪುರೊ.. ಆಮ್ಚೆ ವಾಚ್ಪಿ ಸಾದೆ ಮ್ಹಣ್ ಕೊಂಕ್ಣೆಕ್ ಅಕ್ಮಾನ್ ಕರ್ತೇ ಆಸಾತ್. ತರ್ ಏಕ್ ಉತಾರ್ ಸ್ಪಶ್ಟ್ ಸಾಂಗಾ... ಕೊಂಕ್ಣಿ ಇಸ್ಕೊಲಾಂನಿಂ ಶಿಕಂವ್ಚಿ ನಾಕಾ? ತೀ ಯುನಿವರ್ಸಿಟಿಕ್ ಪಾಂವ್ಚಿ ನಾಕಾ? ಸಂಸಾರಾಚಾ ಹೆರಾಂ ಭಾಸಾಂಚಾ ಸಾಹಿತಾ ಸಮೊರ್ ತಿಚೆಂ ಸಾಹಿತ್ ರಾಂವ್ಚೆಂ ನಾಕಾ? ವಾ ಆಮ್ಕಾಂ ತುಮಿಂ ಘಾಲ್ಚೆಂ "ಶೆಣ್"ಚ್ಚ್ ಪುರೊ!
’ತಿಸ್ರೊ ದೊಳೊ’ಚೆ ಆಧ್ಲೆ ಆಂಕ್ಡೆ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
