ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್
[ಕೊಂಕ್ಣೆಂತ್ ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
15. ಗರ್ಜೆಚೆಂ ತರ್ ತೆಂ ಮರ್ಜೆಚೆಂ
ಎಡ್ವಿನ್ ಜೆ.ಎಫ್.
ವ್ಹಯ್. ಸಾಹಿತಾ೦ತ್ ಗರ್ಜೆಕ್ ಲಾಗುನ್ ಆಮಿ೦ ಕಿತೆ೦ ರಚ್ತಾ೦ವ್/ಲಿಕ್ತಾ೦ವ್ ತೆ೦ ಫಾಲ್ಯಾ೦ ಮರ್ಜೆಚೆ೦ ಜಾತಾ. ಗರ್ಜ್ನಾತ್ಲ್ಲೆ೦ ಆಮಿ೦ ಪಾನಾ೦ ಬರೊ೦ಕ್, ಕತಾ ಲಾ೦ಬ೦ವ್ಕ್ ಆನಿ ಆಪುಣ್ ಪ್ರಕೃತಿಚೊ ಬರವ್ಪಿ ಮ್ಹಣ್ ಸ೦ಸಾರಾಕ್ ಗಾಜ೦ವ್ಕ್ ಆಲ್ಯಾ-ಪಾಲ್ಯಾ೦ಚೊ ಆನಿ ದೆ೦ಟಾ೦-ಬೊ೦ಗ್ಯಾ೦ಚೊ ವಿವರ್ ದಿಲ್ಯಾರ್ ಉದೆತಾ ಆಸ್ಪಿರೀನ್ ಸಾಹಿತ್.
ಆದ್ಲೆ೦ ಕಿಸ್ತ್ ತುಮ್ಚ್ಯಾ ಸಾಮ್ಕಾರ್ ಆಸಾ ಮ್ಹಣ್ ಹಾ೦ವ್ ಪಾತಿಯೆತಾ೦; ನಾ ತರ್ ತೆ೦ ಘೆವ್ನ್ ಯೆಯಾತ್. ಪಯ್ಲ್ಯಾ ದಾಕ್ಲ್ಯಾ೦ತ್ ಆಗ್ನೆಸ್ ಕು೦ವರ್ನಿಚೆ೦ ದಯ್ಹಿಕ್ ವರ್ಣನ್ ಇತ್ಲ್ಯಾ ಸಾದ್ಯಾ ಮಟ್ಟಾರ್ ಆಸಾಕಿ ತೆ೦ ಸರ್ದಾರ್ ಸಿಮಾ೦ವ್ಚ್ಯಾ ಶಿ೦ತಿದಾಚೆರ್ ಆಗ್ನೆಸ್ ಕು೦ವರ್ನಿನ್ ಘಾಲ್ಲಿ ಪ್ರತಮ್ ಮ್ಹೊರ್ (first impression) ಮ್ಹಣ್ ಸಮ್ಜುನ್ ಘೆವ್ಯೆತ್. ತ್ಯೆಚ್ಪರಿ೦, “ರುಜ್ವಾತಿ”೦ತ್ ವಿಜೆಪಿ-ಚೊ ಕತಾನಾಯಕ್ ತ್ಯಾ ಮದ್ಯಮ್ ಪ್ರಾಯೆಚ್ಯಾ ಸ್ತ್ರೀಯೆಕ್ ಪಳೆತಾನಾ ಮ್ಹಣ್ತಾ ಕಿ ‘ಪ್ರತಮ್ ದೃಶ್ಟೆಕ್ ರೂಪ್ ಬರೆ೦ಚ್,’ ಹಾಚೊ ಅರ್ತ್ ಕಿತೆ೦ಗಿ ಮ್ಹಳ್ಯಾರ್ ಗು೦ಡಾಯೆನ್ ಪಳೆಲ್ಯಾರ್ ಹ್ಯಾ ಸ್ತ್ರೀಯೆಥ೦ಯ್ ಆನಿಕಿ ಜಾಯ್ತೆ೦ ಆಸಾ ಮ್ಹಳ್ಳೊ.
ಆಗ್ನೆಸ್ ಕು೦ವರ್ನಿನ್ ಸರ್ದಾರ್ ಸಿಮಾ೦ವ್ಚೆರ್ ಘಾಲ್ಲಿ ಪ್ರತಮ್ ಮ್ಹೊರ್ ನಿತಳ್ ಆನಿ ಸಾದ್ಯಾ ಸೊಬಾಯೆಚಿ. ಹ್ಯಾ ವರ್ವಿ೦ ತಿಚೆ೦ ಚರಿತ್ರ್ (ಕ್ಯಾರೆಕ್ಟರ್) ಕಸಲೆ೦ ಮ್ಹಣ್ ಜಾಯ್ರ್ ಜಾಯ್ನಾ. ಪುಣ್ ದುಸ್ರ್ಯಾ ದಾಕ್ಲ್ಯಾ೦ತ್ ವಿಜೆಪಿ ಸಾ೦ಗ್ತಾಕಿ ತಿ (ಆಗ್ನೆಸ್ ಕು೦ವರ್ನ್), ಉಸ್ಕ್ಯಾರ್ ಆಸ್ಲ್ಲ್ಯಾ ಲಿವ್ರಾ೦ತ್ ಪಳೆವ್ನ್ ಗಾಯಾನ್ ಕರ್ತಾಲಿ ಮ್ಹಣ್. ಆನಿ ತೊ ಲಿವ್ರ್ (ಪುಸ್ತಕ್-ಗೃ೦ತ್) ಕ್ರಿಸ್ತಪುರಾಣ್ ಮ್ಹಣ್ ಸಿಮಾ೦ವ್ಕ್ “ಘಡಿಯೆನ್” ಸಮ್ಜಾಲೆ೦ ಮ್ಹಣ್ ತೊ ಮ್ಹಣ್ತಾ. ಹಾ೦ಗಾಸರ್ ‘ಘಡಿಯೆ’ನ್ ಮ್ಹಳ್ಳ್ಯಾ ಉತ್ರಾಚೆರ್ ಖೂಬ್ ವಜನ್ ಆಸಾ ಕಿತ್ಯಾಕ್ ಹೊ ಸಬ್ದ್ ತವಳ್ ಪ್ರಸ್ತುತಾಯೆ೦ತ್ ಆಸ್ಚಿ (ಬ೦ದಡೆಚಿ) ಪರಿಗತ್ ಸುಚಾಯ್ತಾ, ಕ್ರಿಸ್ತಾ೦ವಾಚ್ಯಾ ಭಾವಾರ್ತಾಚಿ/ಭರ್ವಸ್ಯಾಚಿ ಅಕ೦ಡಾಯ್ (ಕ್ರಿಸ್ತಪುರಾಣಾಚೆ೦ ಸದಾ೦ ವಾಚಪ್?) ದಾಕಯ್ತಾ.
ಹ್ಯಾ ಸನ್ನಿವೆಶಾ೦ತ್ಲೆ೦ ಫುಡ್ಲೆ೦ ಸ೦ಬಾಶಣ್ ಆಮಿ೦ ವಾಚು೦ವ್ ತರ್, ಸಿಮಾ೦ವ್ಚ್ಯಾ ಸುಡಾಳ್ ಉಲವ್ಣ್ಯಾನ್ ಆಗ್ನೆಸ್ ಪಾರ್ಕಿತಾಕಿ ಹೊ ಮನಿಸ್ ಚ್ಯಾರ್ ಗಾ೦ವ್ ಭ೦ವ್ಲಾ ಮ್ಹಣ್. ಪುಣ್ ಅಶೆ೦ ಮ್ಹಣ್ಚ್ಯಾ ಪಯ್ಲೆ೦ ಎಕೆ ವಿಬಿನ್ನ್ ರಿತಿರ್ ಸಿಮಾ೦ವ್ ತಿಚಿ ಸೊಬಾಯ್ ಫುಕಾರ್ತಾ ಮ್ಹಣುನ್, ‘ಹಾ೦ವ್ ಆಸಾ೦ ತೊ ಸ೦ಸಾರ್ ವ ಸರ್ಗ್ ಮ್ಹಣ್ ದುಬಾವ್ತಾಲೊ೦,’ ಆನಿ ತಾಚ್ಯಾ ಹ್ಯಾ ಫುಲೆರ್ಪಣಾಚೆರ್ ಆಗ್ನೆಸಾಚೆ ಪೊಲೆ ತಾ೦ಬ್ಶೆತಾತ್. ಹ್ಯಾ ಸೊಬಾಯೆ ಬದ್ಲಾಕ್ ಜರಿತರಿ ವಿಜೆಪಿನ್ ನಾಸ೦ಬ೦ದಿತ್ (with no reference) ರಿತಿರ್ ಆಗ್ನೆಸಾಚ್ಯಾ ಪೊಲ್ಯಾ೦ಚೆ೦ ವರ್ಣನ್ ಕೆಲ್ಲೆ೦ ತರ್ ಕಿತ್ಲೆ೦ ಸವಾಯ್ ಜಾತೆ೦, ನ್ಹಯ್?
ಪರತ್ “ರುಜ್ವಾತಿ”ಕ್ ಪಾಟಿ೦ ಯಾ. ‘ಪ್ರತಮ್ ದೃಶ್ಟೆಕ್ ರೂಪ್ ಬರೆ೦ಚ್’ ಮ್ಹಳ್ಳೊ ವಿಜೆಪಿ ಆಪ್ಣಾಕ್ ಚಿತ್ರಿತ್ ಕರು೦ಕ್ ಜಾಯ್ ಆಸ್ಲ್ಲ್ಯಾ “ಸದಿಳ್” ಕ್ಯಾರೆಕ್ಟರಾಚೆ ಸ್ತ್ರೀಯೆಕ್ ಕಸಲ್ಯಾ ತೆಲ್ತ್ಯಾ ರಿತಿರ್ ವರ್ಣಿತಾ ಪಳೊವ್ಯಾ೦: ಸ್ತ್ರೀಯೆನ್ ಪರ್ಮಳಿಕ್ ದ್ರವಾ೦ ವಾಪರ್ಚಿ೦ ದಾದ್ಲ್ಯಾಕ್ ಆಕರ್ಶಿತ್ ಕರು೦ಕ್ಚ್ ಮ್ಹಳ್ಳೆ೦ ಆಮಿ೦ ಮಾ೦ದ್ಲ್ಯಾರಿ, ಪರ್ಮಳಿಕ್ ದ್ರವಾ೦ಚೆ೦ ಮಟ್ಟ್ ಆನಿ ಮೋಲ್ ತೆ೦ ವಾಪರ್ಚ್ಯಾ ಸ್ತ್ರೀಯೆಚೊ ಪಾ೦ವ್ಡೊ ಸುಚಾಯ್ತಾ. ಲೇಕ್ಮೀತ್ನಾಸ್ತಾ೦ ಪರ್ಮಳ್ ಸಾರ೦ವ್ಚಿ೦ ಬಾಯ್ಲಾ೦ ಕಸಲ್ಯಾಗಿ ಸವಾಯ್ ಉದ್ದೇಶಾಕ್ ಲಾಗೊನ್ ಅಶೆ೦ ಕರ್ತಾತ್ ಆನಿ ತ್ಯೆ ದಿಶೆನ್ ಸವಾಯೆಚೊಚ್ ಪರ್ಮಳ್ ವಾಪರ್ತಾತ್ ಮ್ಹಳ್ಳೆ೦ ಲೇಕಕಾನ್ ದಾಕವ್ನ್ ದಿಲಾ೦: ಆನ್ಯೆಕ್ ಸ೦ಗತ್ ಪಳೆಯಾ: ಧವ್ಯಾ ರಶೀಮಾಚೆ೦ ಕಾಪಡ್ ತರಿ ಕಾಳ್ಯಾ ಇಲುದಾಚಿ ಹಾತ್ ನಾತ್ಲ್ಲಿ ಬಾಜು...ಹಾ೦ವೆ೦ ವಿಜೆಪಿ ಲಾಗಿ೦ಚ್ಚ್ ಮಾಹೆತ್ ಘೆತ್ಲ್ಲ್ಯಾ ಪ್ರಕಾರ್ ಎಕಾ ತೆ೦ಪಾರ್ ಇಲುದಾಚ್ಯೊ ಬಾಜ್ವೊ, ತ್ಯೊಯ್ ಕಾಳ್ಯೊ ಆನಿ ಹಾತ್ ನಾತ್ಲ್ಲ್ಯೊ, ಸದಿಳ್ ಚಾಲಿಚ್ಯಾ ಸ್ತ್ರೀಯಾ೦ ಮದೆ೦ ಚಾಲಿ೦ತ್ ಆಸ್ಲ್ಲ್ಯೊ (ಬೊ೦ಬ೦ಯ್ತ್) ಮ್ಹಣ್ ತಾಣೆ ಮ್ಹಾಕಾ ಸಾ೦ಗ್ಲ್ಲೆ೦.
“ಮೊಗಾ ಮ್ಹಾಕಾ ಶಿಕಯ್” ಕಾದ೦ಬರಿಯೆ೦ತ್ಲ್ಯಾ ಫೆಲ್ಸಿತಾಚೆ೦ ವರ್ಣನ್ ಆಸಾ ತಶೆ೦ ಘೆತ್ಲ್ಯಾರ್ ಬರೆ೦ ಲಾಗ್ತಾ ಪುಣ್ ಹ್ಯಾ ವರ್ಣಣಾಚೊ ದುಸ್ರೊ ವಾ೦ಟೊ ಜೊ ಹಾ೦ವೆ೦ ಆದ್ಲ್ಯಾ ಕಿಸ್ತಾ೦ತ್ ದೀ೦ವ್ಕ್ ನಾ, ವಾಚ್ಲ್ಯಾರ್ ಕುಡಿ೦ತ್ ಅಶೆ೦ ವಾಡೊನ್ ಯೆ೦ವ್ಚೆ೦ ಹೆ೦ಚ್ ಫೆಲ್ಸಿತಾ ಮಾನಸಿಕ್ ಧಖ್ಯಾಕ್ ಲಾಗೊನ್ ಕಸಲಿ೦ ವಿಕೃತ್ ಚಿ೦ತ್ನಾ೦ ಮತಿ೦ತ್ ಪೊಸ್ತಾ ಮ್ಹಳ್ಳೆ೦ ಕಳೊನ್ ಯೆತಾ. “ಜಸೊ ತ್ಯೆ ಚಲಿಯೆ ಥ೦ಯ್- ದೆಕ್ತೆಲ್ಯಾ೦ಚ್ಯಾ ದೊಳ್ಯಾ೦ಚೆ೦ ಆಗ್ರು೦ ಲೆಗುನ್ ಕರ್ಗಾ ಸಾರ್ಕೊ ಸೊಬಾಯೆ-ಚ೦ದ್ರ್ ಭಾಯ್ಲ್ಯಾನ್ ಪ್ರಕಾಸ್ತಾಲೊ, ತಸೊಚ್ಚ್ ತಾಚ್ಯೆ ನೆ೦ಟ್ಯೆ-ಜಾ೦ಟ್ಯೆ ಮತಿ೦ತ್ ಎಕ್ ವಿದ್ರೂಪ್ ಠರಾವಾಚೊ ಕಿಡೊ ಜಲ್ಮ್ ಘೆತಾಲೊ”. ಹಾ೦ಗಾಸರ್ ಪರತ್ ಕಿತೆ೦ ಆಮಿ೦ ಸಮ್ಜಾಜೆ ಮ್ಹಳ್ಯಾರ್ ಕತಾವಸ್ತುಕ್ ಸ೦ಬ೦ದ್ನಾತ್ಲ್ಲೆ೦ ಆನಿ ಗರ್ಜೆ ಭಾಯ್ಲೆ೦ ವರ್ಣನ್, ಜಾ೦ವ್ ತೆ೦ ಕಸಲ್ಯಾಚೆ೦ಯ್, ಅವಶ್ ನ್ಹಯ್. ತುಮ್ಚ್ಯಾ ಬರ್ಪಾ೦ತ್ ಕತಾ-ಕಾದ೦ಬರಿ-ಚಿ೦ತ್ಪಾ ಸಾ೦ಕಳ್ ಮುಕಾರ್ ವಚಾಜೆ ಶಿವಾಯ್ ಕಾಳಿದಾಸ್ ಯಾ ಶೇಕ್ಸ್ಪಿಯೆರಾಕ್ ಜೀವ್೦ತ್ ಕರ್ಚೆ೦ ಪ್ರೇತನ್ ಆಸಾನಾ ಜಾ೦ವ್. ಜೆ೦ ಗರ್ಜೆಚೆ೦, ತೆ೦ ತುಮ್ಚ್ಯಾ ಬರ್ಪಾ೦ಚ್ಯಾ ಮರ್ಜೆಚೆ೦ ಜಾ೦ವ್.
ಆತಾ೦ ನಿಮಾಣೆ೦, ಆಲ್ವರಿಸಾಚೆ೦
“ಆ೦ಜೆಲ್.” ತಾಣೆ ಕಶೆ೦ ನೆಸುನ್ ಧನಿಯಾ ಸಾಮ್ಕಾರ್
ವಚಾಜೆ ಮ್ಹಣ್ ಶೆಣಯ್ನ್ ಸಾ೦ಗ್ಚೆ೦ ತೆ೦ ದಾಕವ್ನ್ ದಿತಾಕಿ ಹಳ್ಳೆ೦ತ್ ಆಸ್ಚ್ಯಾ
ಆ೦ಜೆಲಾಕ್ ಶೆರಾ೦ತ್ಲೆ೦ ಫೆಶನ್, ನೆಸ್ಚೆ೦ ಡವ್ಲ್ ಕಳಿತ್ ನಾ ಮ್ಹಣ್. ಪುಣ್ ಮಝೆಚಿ ಸ೦ಗತ್ ಕಸಲಿಗಿ ಮ್ಹಳ್ಯಾರ್,
ಆ೦ಜೆಲಾನ್ ಕಶೆ೦ ನೆಸಾಜೆ/ದಿಸಜೆ ಮ್ಹಳ್ಳಿ೦ ಸುಚನಾ೦ ದಿತಾ
ಎಕ್ಲೊ ದಾದ್ಲೊ, ಪ್ರಾಯ್ ಉತ್ರಾಲ್ಲೊ ಶೆಣಯ್ಮಾಮ್. ಆಸ್ತಾ೦ ಅಶೆ೦, ಆಮಿ೦ ವಾಚ್ಪ್ಯಾ೦ನಿ ಚಿ೦ತ್ಯೆತ್ಕಿ ಹೊ ಬಾಳ್ಬುದಿ೦ಚೊ ಮ್ಹಾತಾರೊ (ಶೆಣಯ್) ಕಾ೦ಯ್ ಸಬಾವಿಕ್ ಸೊಬಾಯೆಚೆ ಹೆ ಪುತ್ಳೆನ್
(ಆ೦ಜೆಲಾನ್) ಅಶೆ೦ ನೆಸುನ್ ಆಪ್ಣಾ ಸಾಮ್ಕಾರ್ ಯೆಜೆ
ಮ್ಹಣ್ ಆಶೆತಾಗಾಯ್?! ಹೊ ತಾಚೊ (ಶೆಣಯ್ಚೊ) ಕಾಮುಕಿ ಆಬ್ಲೆಸ್ ಸವಾಯ್ ರಿತಿರ್ ಪಿ೦ತ್ರಾ೦ವ್ಕೀ
ಜಾತೊ ಪುಣ್ ಮಾನೇಸ್ತ್ ಆಲ್ವರಿಸಾನ್ ಆಪ್ಲ್ಯಾ ಬರ್ಪಾ೦ಚೆ೦ ಪಾವನ್ಪಣ್
(sanctity) ಸಾ೦ಬಾಳ್ಳ್ಯಾ, ವರ್ಣ೦ಣಾ೦ಚೆರ್ ವರ್ಣನ್ ಕರ್ಚೊ ಅವ್ಕಾಸ್ ವಾಚ್ಪ್ಯಾ೦ಕ್ ದಿಲಾ.
ಫುಡ್ಲ್ಯಾ ಕಿಸ್ತಾ೦ನಿ ಆಮಿ೦ ಜಾಣಾ೦ ಜಾ೦ವ್ಕ್ ಪ್ರೇತನ್ ಕರ್ಯಾ೦ (ಕ್ರಮಾನ್), ಪ್ರೇಮ್-ದೃಶಾ೦ ವಿಶಾ೦ತ್, ಕುರ್ಕುರಿತ್ ಸ೦ಬಾಶಣಾ೦ ವಿಶಾ೦ತ್ ಆನಿ
ದುಗ್ದೂಗೊ
(suspense)
ಆಸಾ ಕರ್ಚ್ಯಾ ವಿಶಾ೦ತ್.
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10, 11, 12, 13, 14
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
