ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 3. ಗಾದೊ ಆನಿ ಮೇರ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ಗಾಂವಾಂತ್ಲ್ಯಾ ಎಕಾ ಹಳ್ಳೆಂತ್ ಥೊಡೆ ಗಾದೆ ಬೆಳೆಂ ಕರುಂಕ್ ಕೊಸುನ್ ಘಾಲ್ಲೆ ಅನಿ ಸಗ್ಳೊ ಗಾದೊ ಕೆದಾನ್ ಬುಡ್ಲ್ಲೊ. ತ್ಯೇ ವಾಟೆರ್ ಪಾಶಾರ್ ಜಾಂವ್ಚೊ ಏಕ್ ಬುರ್ಗೊ ತ್ಯಾ ಗಾದ್ಯಾ ಮಧೆಂ ಆಸ್ಲ್ಲ್ಯಾ ಭಾರಿಕ್ ಮೆರೆಂತ್ಲ್ಯಾನ್ ಜಾಗ್ರೂತ್ಕಾಯೆನ್ ಚಲೊನ್ ವೆತಾಲೊ. ಖಂಯ್ ಪುಣೀಂ ಪಾಂಯ್ ನಿಸ್ರೊನ್ ಕೆದಾಕ್ ಪಡ್ಲ್ಯಾರ್ ಅಪ್ಲೆಂ ಆಂಗ್ ಮೆಳೆಂ ಜಾತಾ ಮ್ಹಳ್ಳ್ಯಾ ಚಿಂತ್ಪಾನ್.
ಅಶೆಂ ಚಲೊನ್ ವೆತಾಸ್ತಾಂ ಚುಕೊನ್ ಮ್ಹಳ್ಳೆಪರಿಂ ತಾಚೊ ಏಕ್ ಪಾಂಯ್ ಗಾದ್ಯಾಂತ್ ಪಡ್ಲೊ. ಆನಿಂ ತೊ ಬುರ್ಗೊ ಏಕ್ ಪಾಂಯ್ ಗಾದ್ಯಾಂತ್ ಆನ್ಯೇಕ್ ಪಾಂಯ್ ಮೆರೆರ್ ದವರ್ನ್ ಚಲೊನ್ ಆಸ್ತಾಂ ಅಪ್ಲೇಸ್ತಕಿಂ ಚಿಂತುಂಕ್ ಲಾಗ್ಲೊ;
’ಕಸೊಯ್ ಆಪ್ಣಾಚೊ ಏಕ್ ಪಾಂಯ್ ಚುಕೊನ್ ಕೆದಾಂತ್ ಬುಡ್ಲಾಸ್ತಾಂ ಏಕ್ ಪಾಂಯ್ ಮೆರೆಂತ್ ದವರ್ನ್ ಆಪ್ಣೆಂ ಸವ್ಕಾಸಾಯೆನ್ ಕಿತ್ಯಾಕ್ ಚಲಾಜಾಯ್?’ ಅಶೆಂ ಅಪ್ಲೆ ದೊನ್ಯಿ ಪಾಂಯ್ ಗಾದ್ಯಾಂತ್ ಘಾಲ್ನ್ ಸರಾರಾಂ ಚಲೊನ್ ಮುಖಾರ್ ಗೆಲೊ.
ಸಂದೇಶ್: ಹೆಂ ಘಡಿತ್ ಆಮ್ಚಾ ಪ್ರಸ್ತುತ್ ಜಿಣ್ಯೆಕ್ ಆರ್ಸೊ ಧರಿನಾಂಗೀ? ಜಿಣ್ಯೆಚಿ ಸಾರ್ಕಿ ವಾಟ್ ಕೆದ್ನಾಂಯ್ ಭಾರೀಕ್ ಆನಿ ಸವ್ಕಾಸ್ ಆಸ್ತಾಂ ತಿ ಚಲೊಂಕ್ ಮಸ್ತ್ ಸಯ್ರಣ್ ಆನಿ ಸೊಸ್ಣಿಕಾಯೆಚಿ ಗರ್ಜ್ ಆಸಾ. ತಶೆಂ ಆಸ್ತಾಂ ಜಾಯ್ತೆಪಾವ್ಟಿಂ ಆಮಿಂ ವಾಟ್ ಚುಕ್ತಾಂವ್. ಪುಣ್ ಏಕ್ ಪಾವ್ಟಿಂ ಚುಕೊನ್ ವಾಯ್ಟ್ ಕರ್ನ್ ತ್ಯೆಚ್ಚ್ ವಾಟೆರ್ ಮುಖಾರ್ ವೆಚಾ ಬದ್ಲಾಕ್ ತಿ ಚುಕ್ಲೆಲಿ ವಾಟ್ ಸಾರ್ಕಿ ಕರುಂಕ್ ಪಳೆಲ್ಯಾರ್ ಕಿತ್ಲೆಂ ಬರೆಂ ನ್ಹಂಯ್ಗೀ? ಕಿತ್ಯಾಕ್ ಮ್ಹಳ್ಯಾರ್ ಗಾದೊ ವ್ಹಡ್ ಜಾಲ್ಲೆಪರಿಂಚ್ಚ್ ಮೇರ್ ಅಶೀರ್ ಜಾವುನ್ ವೆತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
