ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಆಮಿಂ ಜಯ್ತೆವಂತ್ ಜಾಂವ್ಕ್ ಕಿತೆಂ ಕರಿಜಾಯ್?
ವರಸ್ : 2005
ಅಂಕೊ : 7
ಮಯ್ನೊ : ಜನೆರ್
ಸಂಪಾದಕೀಯ್ - 7 .
ವಲ್ಲಿ ಕ್ವಾಡ್ರಸ್
ಎಕಾ ಲ್ಹಾನ್ ಕಾಣ್ಯೆಚೊ ಉಡಾಸ್ ಮ್ಹಾಕಾ ಯೆತಾ - ಎಕಾ ಝಡಾರ್ ಫುಲೊನ್ ಯೆಂವ್ಚಾ ಬೊಂಗ್ಯಾಕ್ ರಾಕೊನ್ ರಾವ್ಲಾ ಭ್ರಮರ್, ಆನಿಂ ತ್ಯಾ ಭ್ರಮರಾಕ್ ಗಿಳುಂಕ್ ರಾಕೊನ್ ರಾವ್ಲಾ ಶಿರ್ಲೊ, ಆನಿಂ ಶಿರ್ಲ್ಯಾಕ್ ಗಿಳ್ಚಾಕ್ ರಾಕೊನ್ ರಾವ್ಲಾ ಏಕ್ ದಿವೊಡ್, ಆನಿಂ ತ್ಯಾ ದಿವ್ಡಾಕ್ ಖಾಂವ್ಕ್ ರಾಕೊನ್ ರಾವ್ಲ್ಯಾ ಘೊಣ್, ಆನಿಂ ಕೆದ್ನಾಂ ಘೊಣಿಕ್ ಅಪ್ಲ್ಯಾ ಬಂದುಕೆಂತ್ ಜಿವೆಶಿಂ ಮಾರಿನ್ ಮ್ಹಣ್ ರಾಕೊನ್ ರಾವ್ಲಾ ಎಕ್ಲೊ ಶಿಕಾರೆಗಾರ್.
ಆಮ್ಚಾ ಸಮಾಜೆಚೆಂ ಪ್ರಸ್ತುತ್ ಚಿಂತಾಪ್ - ಜೆಂ ಲ್ಹಾನ್ ಮಾಸ್ಳ್ಯಾಂಕ್ ವ್ಹಡ್ ಮಾಸ್ಳ್ಯಾಂನಿ ಗಿಳ್ಚೆಂ - ಎದೊಳ್ಯೀ ಆಸ್ಲ್ಲೆಂ, ಆತಾಂಯ್ ಆಸಾ ಆನಿಂ ಅಶೆಂಚ್ ಜಾಲೆಂ ತರ್ ಆನಿಂ ಫುಡೆಂಯ್ ಆಸ್ತೆಲೆಂ.
ಆತಾಂ ಸವಾಲ್ ಹೆಂ ’ಜಯ್ತ್ ಮ್ಹಳ್ಯಾರ್ ಹೆಂಗೀ?’. ಕೊಣ್ ತೊ ಮನಿಸ್ ಆಶೆನಾ ಜಯ್ತೆವಂತ್ ಜಾಂವ್ಕ್? ಜಾಂವ್ ತೊ ಮನಿಸ್ ಸಮಾಜೆಚಾ ಖಂಯ್ಚಾಯ್ ವರ್ಗಾಂತ್ ಜಿಯೆಂವ್ದಿ ಯಾ ಕಸಲ್ಯಾಯ್ ಕಾಮಾರ್ ಆಸೊಂದಿ, ಪುಣ್ ತಾಕಾ ’ಜಯ್ತ್ ಮ್ಹಳ್ಯಾರ್ ಪ್ರಗತಿ’. ಬರೆಂ ಚಿಂತಾಪ್ ಹೆಂ ಆನಿಂ ಅಸಲೆಂ ಚಿಂತಾಪ್ ಏಕ್ ಪ್ರಗತಿಪರ್ ಸಮಾಜೆಕ್ ರುತಾಂ ಕರ್ತಾ ತೆಂ ಖಂಡಿತ್. ಏಕ್ ಘಡಿ ಆಮಿಂ ಅಮ್ಕಾಂಚ್ ಸವಾಲ್ ಕರ್ಯಾಂ;
’ಆಮ್ಚಾ ಜಿಣ್ಯೆಂತ್ ಆಮಿಂ ಜಯ್ತೆವಂತ್ ಜಾಂವ್ಕ್ ಕಿತೆಂ ಸರ್ವ್ ಕರಿಜಾಯ್?’ ಯಾ ಹೆಂಚ್ ಸವಾಲ್ ಇಲ್ಲೆಂ ಘುಂವ್ಡಾವ್ನ್ ವಿಚಾರ್ತಾಂ; ’ತೆಂ ಕಿತೆಂ ಸರ್ವ್ ಗರ್ಜೆಚೆಂ, ಜೆಂ ಆಮ್ಚಾ ಜಿಣ್ಯೆಂತ್ ಆಮ್ಕಾಂ ಜಯ್ತೆವಂತ್ ಕರುಂಕ್ ಸಕ್ತಾ?’.
ಮನಿಸ್ ದೆವಾನ್ ರಚ್ಲೆಲ್ಯಾ ಸರ್ವ್ ರಚ್ನಾಂ ಪಯ್ಕಿ ಉಂಚ್ಲೊ ಕಿತ್ಯಾಕ್ ಮ್ಹಳ್ಯಾರ್ ಮನಿಸ್ ಚಿಂತುಂಕ್ ಸಕ್ತಾ, ತಾಕಾ ಅಪ್ಲೆಂ ಫಾಲೆಂ ಕಶೆಂ ಆಸಾಜಯ್ ಮ್ಹಳ್ಳೆಂ ಚಿಂತುನ್ ಮೇಟ್ ಕಾಡುಂಕ್ ಸಾಧ್ಯ್ ಆಸಾ - ಜೆಂ ದೆವಾನ್ ರಚ್ಲೆಲ್ಯಾ ಹೆರ್ ಖಂಚಾಯ್ ರಚ್ನಾಂಕ್ ಸಾಧ್ಯ್ ನಾ. ತರ್ ಮನಿಸ್ ಜಾಲ್ಲೊ ಖಂಡಿತ್ ಹೆಂ ಸವಾಲ್ ಜರೂರ್ ವಿಚಾರ್ತಾ ಶಿವಾಯ್ ಕಶೀಯ್ ಜಿಣಿ ಸಾರ್ಲ್ಯಾರ್ ಜಾಲೆಂ ಮ್ಹಣ್ ನ್ಹಯ್. ಆತಾಂ ವಯ್ಲ್ಯಾ ಸವಾಲಾಕ್ ಜಾಪ್ ತೊ ತೊ ಮನಿಸ್ ತಾಂತಾಚಾ ಚಿಂತ್ಪಾಪ್ರಕಾರ್ ಜಾಪಿ ಸೊಧ್ತಾ.
ಪುಣ್ ಜೆರಾಲ್ ರಿತಿನ್ ಹ್ಯಾ ಸವಾಲಾಚಿ ಜಾಪ್ ವ್ಹೊರಾವ್ನ್ ಪಳೆಲಿ ತರ್ - ಚಡ್ತಾವ್ ಮನಿಸ್ ಇತ್ಲೆಂಚ್ ಆಶೆತಾ, ಆಪ್ಣಾನ್ಂಯ್ ಅಪ್ಲ್ಯಾ ಜಿಣ್ಯೆಂತ್ ’ಹೆಂ ಹೆಂ’ ಸಗ್ಳೆಂ ಜೊಡಿಜಯ್, ’ಹಿಂ ಹಿಂ’ ಕಾಮಾಂ ಕರಿಜಾಯ್, ಹೆಂ ಅಪ್ಣಾನ್ ಎಕಾ ದಿಸಾ ಗಳ್ಸಿಜಾಯ್. ಹಾಂಗಾಸರ್ ಮನಿಸ್ ಎಕಾ ಸಂಗ್ತೆಚೊ ಬೆಪಾರ್ವೊ ಕರ್ತಾ ಆನಿಂ ತೊ ಜಾವ್ನಾಸಾ ಆಮಿಂ ಗಳ್ಸುಂಕ್ ಆಸ್ಚಾ ಸಂಗ್ತ್ಯಾಂಚೆಂ/ವಸ್ತುಂಚೆಂ ಮೋಲ್ ಕಿತ್ಲೆಂ?
’ಆಮ್ಕಾಂ ಜಯ್ತೆವಂತ್ ಕರ್ಚಿ ಸಂಗತ್/ವಸ್ತ್ ಕಾಂಯ್ ಹೆರಾಂಕ್ ಲುಕ್ಸಾಣ್ ಕರ್ತಾಗೀ?’ ಯಾ ಆಮ್ಚಿ ಜಯ್ತ್ ಆಮಿ ಗಳ್ಸಿಲ್ಲ್ಯಾ, ಆಮಿ ಜೊಡ್ಲ್ಲ್ಯಾ ಸಂಗ್ತ್ಯಾಂನಿ/ವಸ್ತುಂನಿ ಮೆಜ್ಯೆತ್ಗೀ? ಹೆಂಚ್ ಚಿಂತಾಪ್ ಮುಖಾರುನ್ ವೆಲೆಂ ತರ್ ’ಜರ್ ಅಪ್ಣಾನ್ ಜಯ್ತೆವಂತ್ ಜಾಯ್ನಾಸ್ತಾನಾ ಸಯ್ತ್ ಹೆರಾಂಕ್ ಉಪ್ಕಾರ್ಚೆಂ ಕಿತೇಂಯ್ ಕೆಲಾಂ?’ - ಪುಣ್ ಹೆ ವಿಚಾರ್ ಚಿಂತ್ಚೆ ಮನಿಸ್ ಭೋವ್ ಉಣೆಂ. ಕಿತ್ಯಾಕ್ ಮ್ಹಳ್ಯಾರ್ ಹೆಂ ಚಿಂತಾಪ್ ಉದೆಂವ್ಚೆಂ ಮ್ಹಳ್ಯಾರ್ ಕುಪಾಂಚೆರ್ ರಾವ್ಳೆರ್ ಭಾಂದುಂಕ್ ಸಪ್ಣೆಂವ್ಚೆಂ ನ್ಹಯ್ಗೀ?
ಮನ್ಶಾಚಾ ಸುರಾತಾಖಾತಿರ್ ರಚ್ಲ್ಲೆ ದೊರೆ ಯಾ ಸಬ್ಧ್ ಜಾವ್ನಾಸಾತ್; ’ಸ್ಥಾನ್’, ’ಮಾನ್’, ’ಅಂತಸ್ತ್’, ’ಪ್ರತಿಶ್ಟಾ’, ’ಹುದ್ದೆ’. ಆನಿಂ ಜರೀ ತರೀ ಸಮಾಜೆಂತ್ ಎಕಾಮೆಕಾಲಾಗಿಂ ಉಭ್ಜೊಂವ್ಚೆಂ ಅಸಮಧಾನ್ ಹ್ಯಾಚ್ಚ್ ದೊರ್ಯಾಂ ನಿಮ್ತಿಂ. ಮನಿಸ್ ಕಿತ್ಲೀಯ್ ಸಮ್ಜೊಣಿ ಜೊಡುಂದಿ, ಕಿತ್ಲೀಯ್ ಜಾಣ್ವಾಯ್ ಘೆಂವ್ದಿ ಯಾ ಕಿತ್ಲೇಂಯ್ ಶಿಕಾಪ್ ಜೊಡುಂದಿ.
ಪುಣ್ ಜೆದ್ನಾಂ ವರೇಗ್ ಅಪ್ಲಿ ನದರ್ ಅಪ್ಲ್ಯಾ ತಳಾತಾ ಭಾಯ್ರ್ ಪಾವಂವ್ಕ್ ಸಕಾನಾಂಗೀ ತಿತ್ತುನ್ ಪರ್ಯಾಂತ್ ಅಸಲೆ ಅಶಿರ್ ಚಿಂತ್ಪಾಚೆ ದೊರೆ ಚಡೊನ್ಂಚ್ ವೆತೆಲೆ. ಆನಿಂ ಆವ್ಕಾಸ್ಸೊದ್ಪಿ ಜಾವ್ನ್, ಅಪ್ಲ್ಯಾ ಸುರಾತಾಖಾತಿರ್ ಸದಾಂಯ್ ಹೆರಾಂಕ್ ಉಪ್ಯೋಗ್ ಕರುಂಕ್ ಸೊಧ್ತೆಲೆ.
ಏಕ್ ಬರಿ ಸಮಾಜ್ ಬಾಂಧುನ್ ಹಾಡ್ಚಾಂತ್ ಏಕ್ ಸಾಹಿತಿಚಿ ಜವಬ್ಧಾರಿ ವರ್ತಿ ಆಸಾ. ಸಮಾಜೆಚೊ ಚುಕಿ ಧಾಖವ್ನ್ ದಿಂವ್ಚೊ ಮಾತ್ರ್ ನ್ಹಯ್ ಆಸ್ತಾಂ ತ್ಯಾ ಚುಕಿಂಕ್ ಪರಿಹಾರ್ ಸೊಧ್ಚಿ ಜವಾಬ್ಧಾರಿಯ್ ಸಾಹಿತಿಚಿಚ್ ಜಾವ್ನಾಸಾ. ಪುಣ್ ಹೆಂ ಘಡ್ಚಾಧಿಂ ತ್ಯಾ ಸಾಹಿತಿನ್ ವಿಚಾರ್ವಂತ್ ಜಾಂವ್ಚಿ ಭೋವ್ ಗರ್ಜ್ ಆಸಾ. ಆನಿಂ ಅಸಲೆ ವಿಚಾರ್ ಆಸ್ಲ್ಯಾರ್ ಮಾತ್ರ್ ಸಮಾಜೆಚಾ ಅಶಿರ್ ಚಿಂತ್ಪಾಚೆ ದೊರೆ ಕೊಸ್ಳಾಂವ್ಕ್ ತಾಚಾನ್ ಸಾಧ್ಯ್ ಶಿವಾಯ್ ತಾಕಾ ಮೆಳ್ಚೊ ಹೆರ್ ವಾಟೊ ನಾಂತ್.
ಅಸಲೆ ದೊರೆ ಉಭಾರ್ಚೆ ಫಕತ್ ಪೊಳ್ಕುರ್ವಾದಿಂನಿ ಮಾತ್ರ್. ಕಿತ್ಯಾಕ್ ಮ್ಹಳ್ಯಾರ್ ಪೊಳ್ಕುರ್ವಾದಿಂಕ್ ಹೆಂಚ್ ಜಯ್ತ್ ಪುಣ್ ವಿಚಾರ್ವಂತ್ ಮನ್ಶಾಕ್ ನ್ಹಯ್.
ಕಿತ್ಯಾಕ್ ಮ್ಹಳ್ಯಾರ್ ಜೆದ್ನಾ ಪರ್ಯಾಂತ್ ಆಮ್ಚಾ ಮತಿಂತ್ ಆಸ್ಚಾ ’ಅಪುಣ್ ಜಾಣಾರಿ’ ಮ್ಹಳ್ಳೊ ಕಾಳೊ ಪರ್ಧೊ ಆಮಿಂ ಪಯ್ಸ್ ಕರುಂಕ್ ಸಕ್ಚೆನಾಂವ್ - ತೆದೊಳ್ ಪರ್ಯಾಂತ್ ಆಮ್ಚಾ ಜಯ್ತಾಚಿ ನೀತ್ ಆನಿಂ ರೀತ್ ಅಸಲ್ಯಾಚ್ ಚಿಂತ್ಪಾಚೆರ್ ಹೊಂದ್ವೊನ್ ಆಸಾ. ಆನಿಂ ಜೆದ್ನಾಂ ಆಮಿಂ ಹಿ ರೀತ್/ನೀತ್ ಬದ್ಲುಂಕ್ ಸಕ್ತಾಂವ್ - ತೆದ್ನಾಂ ಆಮ್ಚಾ ಜಯ್ತಾಚಿ ವಾಟ್ ಆಮ್ಕಾಂ ಸೊಧುನ್ ಯೆತೆಲಿ. ದೆಕುನ್ ಆಮಿಂ ರಾಕೊನ್ ರಾವ್ಯಾಂ, ಆಶಾ ಕರ್ಯಾಂ. ಏಕ್ ದೀಸ್ ಖಂಡಿತ್ ಯೆತಲೊ ಹ್ಯಾ ರಿತಿ/ನಿತಿಂಕ್ ಪರ್ಯಾಯ್ ಚಿಂತಾಪ್ ಹಾಡ್ನ್.
ಪುಣ್ ವಡ್ಲೆಂ ಸವಾಲ್ ಹೆಂಚ್ - ತೊ ದೀಸ್ ಕೆದ್ನಾಂ ಯೆತಲೊ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
