[ಆಮಿಂ ಕಿತ್ಲೆ ವ್ಹಡ್?]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆಮಿಂ ಕಿತ್ಲೆ ವ್ಹಡ್?

ವರಸ್ : 2004

ಅಂಕೊ : 5

ಮಯ್ನೊ : ನವೆಂಬರ್

ಸಂಪಾದಕೀಯ್ - 5 .

ವಲ್ಲಿ ಕ್ವಾಡ್ರಸ್

ಹ್ಯಾ ಸಂಸಾರಾಂತ್ ವಾಡಾವಳ್ ಆಶೆನಾತ್‌ಲ್ಲೊ ಕೊಣ್ಂಚ್ ಆಸ್ಚೊನಾ ಮ್ಹಣ್ ಹಾಂವ್ ಚಿಂತಾಂ. ಜಾಂವ್ ತಿ ವಾಡಾವಳ್ ಕುಡಿಚಿ, ಅತ್ಮ್ಯಾಚಿ, ಜಾಣ್ವಾಯ್-ಸಮ್ಜೊಣೆಚಿ, ಶಿಕ್ಪಾಚಿ, ದುಡ್ವಾಚಿ, ನಾಂವಾಚಿ ಯಾ ಹೆರ್ ಕಸಲೀಯ್. ತಿ ಜಾವ್ಯೆತ್ ಲೌಕಿಕ್ ವಾಡಾವಳ್ ಯಾ ಬೌತಿಕ್ ವಾಡಾವಳ್, ಜಾಂವ್ ತಿ ಖಂಚಾಯ್ ವರ್ಗಾಚಿ, ಪುಣ್ ಹರ್ಯೆಕ್ಲೊ ಮನಿಸ್ ಅಶೆತಾ ಅಪ್ಣಾನ್ ವಾಡಾಜಯ್ ಮ್ಹಳ್ಳೆಂ.

ಏಕ್ ಘಡಿ ಹ್ಯಾ ಚಿಂತ್ಪಾಚೆರ್ ಆಮಿಂ ಆಮ್ಚಿ ನದರ್ ಘುಂವ್ಡಾವ್ಯಾಂಗೀ? ಆಮ್ಚಾ ಸಮಾಜೆಚಾ ಎಕೆಕಾಚ್ ವರ್ಗಾಚೆರ್ ಏಕ್ ನದರ್ ಘಾಲ್ನ್, ಕಶೆಂ ಹ್ಯಾ ಹರ್ಯೆಕಾ ವರ್ಗಾಂತ್ಲೊ ಕರ್ಯೆಕ್ ಪ್ರಕಾರಾಚೊ ಮನಿಸ್ ವಾಡಾವಳ್ ಆಶೆತಾ ಮ್ಹಳ್ಳೆಂ? ಬರೆಂ -

ಪಯ್ಲೆಂ ಕಾಮ್ ಕರ್ಚಾ ವರ್ಗಾಕ್ ಪಳೆಯಾಂ, ಜಾಂವ್ ತೊ ಕಂಪೆನಿಂತ್ ಕಾಮ್ ಕರುಂ ಯಾ ದಫ್ತರಾಂತ್ ಕಾಮ್ ಕರುಂ. ತಾಣೆಂ ಕಾಮ್ ಕರ್ಚೊ ಮೂಳ್ ಉದ್ದೇಶ್ ಪೋಟ್ ಭರ್ಚೊ ಆನಿಂ ಆಪ್ಲ್ಯಾ ಕುಟ್ಮಾಕ್ ಪೊಸ್ಚೊ ತರ್‌ಯ್ ಅಪ್ಣಾಕ್‌ಯ್ ವಡ್ಲೊ ಜಾಯ್ಜಯ್ ಮ್ಹಳ್ಳಿ ಆಶಾ/ವೊಡ್ಣಿಂ ಆಸ್ತಾ ಆನಿಂ ತೊ ಹ್ಯಾ ಖಾತಿರ್ ಮಿನತ್ ಕರ್ತಾ.

ಫಿಲ್ಮಾಚೆಂ ನಟನ್ ಕರ್ಚಾಂಕ್ ಪಳೆಯಾಂ, ಹರ್ಯೆಕ್ಲೊ ಕಲಾವಿದ್ ನ್ಹಯ್ ತರ್‌ಯ್ ಏಕ್ ಕಲಾಕಾರ್ ಕಿತೆಂ ಆಶೆತಾ? ಅಪ್ಣಾನ್ ವಡ್ಲೊ ಜಾಯ್ಜಯ್, ಅಪ್ಣಾನ್ ನಾಂವ್, ದವ್ಲತ್, ಗೌರವ್, ಸ್ಥಾನ್ ಅಪ್ಣಾಯ್ಜಾಯ್ ಆನಿಂ ಅಪ್ಣಾನ್‌ಯ್ ಸುಪರ್‌ಸ್ಟಾರ್ ಜಾಯ್ಜಯ್, ನಿರ್ದೇಶಕ್ ಜಾಯ್ಜಯ್.. ಅಶೆಂ ಪುರಾ ಅಶೆತಾ.

ಆನಿಂ ಹ್ಯಾ ವಾಡಾವಳೆಕ್ ಆಶೆಂವ್ಚೆಂ ಸ್ವಾಭಾವಿಕ್. ದೊತೊರ್ ಜಾವ್ನ್ ಕಾಮ್ ಕರ್ಚೊ ಜಾಂವ್, ಇಜ್ನೆರ್ ಯಾ ವಕೀಲ್ ಜಾವ್ನ್ ಕಾಮ್ ಕರ್ಚೊ ಜಾಂವ್, ಸಗ್ಳೆ ಹಿಚ್ ವಾಡಾವಳ್ ಆಶೆತಾತ್. ಪುಣ್ ಆಯ್ಚಾ ಸಂಸಾರಾಂತ್ ಫಕತ್ ನಾಂವ್ ವರ್ಚಾ ಇರಾದ್ಯಾನ್, ಅಪುಣ್ಂಚ್ ವಡ್ಲೊಂ ಮ್ಹಳ್ಳೆಂ ಸಮಾಜೆಚಾ ಲೊಕಾಂ ಮುಖಾರ್ ರುಜು ಕರ್ನ್ ಧಾಖಂವ್ಚಾಕ್ ಮನಿಸ್ ಸರ್ವ್ ಥರಾಂಚೊ ಖೆಳ್ ಖೆಳ್ತಾ.

ಪ್ರಸ್ತುತ್ ಸಮಾಜೆಚಾ ಲೌಕಿಕ್ ಚಿಂತ್ನಾಂನಿ ತೊ ಬುಡೊನ್ ಇತ್ಲೆಂಚ್ ಚಿಂತಾ, ಕಶೆಂ ಪುಣೀಂ ಕರ್ನ್ ಅಪ್ಣಾನ್ ನಾಂವ್ ಹಾಡಿಜಾಯ್, ಸಮಾಜೆಂತ್ ಅಪುಣ್ಂಯ್ ಏಕ್ ಪ್ರತಿಷ್ಟಾ ಆಸ್ಚೊ ಮನಿಸ್ ಮ್ಹಳ್ಳೆಂ ರುಜು ಕರಿಜಾಯ್ ಮ್ಹಳ್ಳ್ಯಾ ಚಿಂತ್ನಾಂನಿ ಬುಡ್ತಾ. ಭಾರಿ ಬರೆಂ ಚಿಂತಾಪ್ - ಜರ್ ಸಗ್ಳೊ ಹೆಚ್‌ಪರಿಂ ಚಿಂತಿತ್ ತರ್ ಆಮ್ಚಿ ಸಮಾಜ್, ಆಮ್ಚೊ ಗಾಂವ್, ಆಮ್ಚೊ ದೇಶ್ ಖಂಡಿತ್ ಮುಖಾರ್ ಪಾವ್ತಾ ತೆಂ ಖಂಡಿತ್.

ಪುಣ್ ಏಕ್ ಸಂಗತ್ ಹಾಂಗಾಸರ್ ಹಾಂತ್ಲೊ ಚಡ್ತಾವ್ ಲೋಕ್ ವಿಸ್ರತಾ ಆನಿಂ ತೊ ಜಾವ್ನಾಸಾ, ಹ್ಯಾ ನಾಂವಾಚಾ ಧಾಂವ್ಣೆಂತ್ ಮನಿಸ್ ಜಾಯ್ತೆಪಾವ್ಟಿಂ ವಾಂಕ್ಡಿ ವಾಟ್ ಧರ್ತಾ. ಜಾಯ್ತೆಪಾವ್ಟಿಂ ಹೆರಾಂಚಾ ವಾಟೆವಯ್ಲೊ ಕಾಂಟೊ ಜಾತಾ. ಹ್ಯಾ ರಾಟಾವಳೆಮಧೆಂ ಮೆತೆರ್ ಜಾವ್ನ್ ಮನಿಸ್ ಅಪ್ಲೆ ಧ್ಯೇಯ್, ಅಪ್ಲೆ ವಿಚಾರ್, ಅಪ್ಲೆಂ ಸತ್ ಸಯ್ತ್ ಆಡೊವ್ ಘಾಲ್ತಾ.ಆನಿಂ ಹಿಚ್ ಧಾಂವ್ಣಿಂ ದಿಸಾನ್ ದೀಸ್ ಹ್ಯಾ ವರ್ಗಾಚಾ ಮನ್ಶಾಂಕ್ ಇತ್ಲಿ ಅಬ್ಲೇಶಿ ಕರ್ತಾ ಮ್ಹಳ್ಯಾರ್, ತಾಣಿಂ ಕರ್ಚೆಂ ಸಗ್ಳೆಂ ಸಾರ್ಕೆಂ ಮ್ಹಣ್ ತೆ ಚಿಂತುಂಕ್ ಲಾಗ್ತಾತ್ ಆನಿಂ ತಾಂಚಾ ವಾಟೆಮಧೆಂ ಆಯಿಲ್ಲ್ಯಾಂಕ್ ತೆ ಮೊಡ್ತಾತ್, ಚಿರ್ತಾತ್, ಖಾತರ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ಂವ್ ವಡ್ಲೊಂ ಮ್ಹಳ್ಳೊ ಅಹಂಭಾವ್ ತಾಂಚಾ ತಕ್ಲೆಂತ್ ತಾಂಚಾ ಮತಿಚೆರ್ ಪಾಳಾಂ ರೊಂಬಯ್ತಾ.

ಆತಾಂ ಹೆಂಚ್ ಚಿಂತಾಪ್ ಆಮ್ಚಾ ಸಮಾಜೆಕ್, ಆಮ್ಚಾ ಭಂವ್ತೊಣೆಚಾ ಸಂಸಾರಾಕ್ ಲಗ್ತಿ ಕರುಂಕ್ ಪಳೆಲೆಂ ತರ್ ಆಜ್‌ಕಾಲ್ ಪಾವ್ಸಾಂತ್ ಉದೆಂವ್ಚಾ ಆಳ್ಮ್ಯಾಂಪರಿಂ ಸಂಚಾಲನಾಂ ಉದೆತಾತ್. ಆನಿಂ ನಾಂವ್ ನಾಸ್ತಾನಾಂಚ್ ಮೊರೊನ್‌ಯ್ ವೆತಾತ್. ಆಜ್‌ಕಾಲ್ಚಾ ಸ್ಪರ್ಧಾತ್ಮಕ್ ಸಂಸಾರಾಂತ್ ಸ್ಪರ್ಧ್ಯಾಚಾ ಮನೋಭಾವಾಮಧೆಂ ಶಿರ್ಕೊನ್ ಬರೆ ಮನೋಭವ್ ಚುಕೊನ್, ಉರ್ತಾ ಫಕತ್ ಕಚ್ಚಾಟ್. ಫಕತ್ ಬರಿಂ ಕಾಮಾಂ ಕರುಂಕ್ ಸಂಚಾಲನಾಂ ಅನಿವಾರ್ಯ್ ಮ್ಹಣ್ ನಾ.

ಸಂಚಾಲನಾಂ ನಾಸ್ತಾನಾ ಸಯ್ತ್ ತಿಂ ಬರಿಂ ಕಾಮಾಂ ಕರ್ಯೆತಾ. ತರ್‌ಯ್ ಸಮಾಜೆ ಮುಖಾರ್ ಹಾಂವ್ ತಾಚೊ ಹ್ಯಾ ಸಂಚಾಲನಾಚೊ ನಿರ್ದೇಶಕ್, ಹ್ಯಾ ಸಂಚಾಲನಾಚೊ ಸಂಚಾಲಕ್, ಹ್ಯಾ ಸಂಚಾಲನಾಚೊ ಘಡ್ಣಾರ್, ಹ್ಯಾ ಸಂಚಾಲನಾಚೊ ಅಧ್ಯಕ್ಶ್ ಮ್ಹಣೊನ್ ತಕ್ಲೆಚೆರ್ ಶಿಂಗಾಂ ಘೆವುನ್ ಭಂವ್ಚೆ ಮನಿಸ್ ಹ್ಯಾ ಸಮಾಜೆಕ್ ಮೊಡ್ಚೆ ತಸಲೆ ಶಿವಾಯ್ ಜೊಡ್ಚೆ ಬಿಲ್ಕುಲ್ ನ್ಹಯ್. ಆಮ್ಚಿ ವಾಡಾವಳ್ ಕಶಿ ಆಸಾಜಯ್? ಅಪ್ಲ್ಯಾ ಭಂವ್ತೊಣಿಚೊ ಲೋಕ್ ಕಸಲ್ಯಾ ಚಿಂತ್ಪಾಚೊ? ಆಮಿಂ ಬರಿಂ ಮ್ಹಣ್ ವೊಪುನ್ ಘೆಂವ್ಚಿಂ ಸತಾಂ ಕಿತ್ಲಿಂ ಬರಿಂ? ಮ್ಹಳ್ಳೆಂ ಅವಲೋಕನ್ ಕರ್ಚಿ ಕಿತ್ಲಿ ಗರಜ್ ಆಮ್ಕಾಂ? ಕಿತ್ಲೆ ಬರೆ ವಿಚಾರ್ ಆಮ್ಕಾಂ ಆಮ್ಚೊ ಧರ್ಮ್ ಶಿಕಯ್ತಾ.

ತರ್‌ಯ್ ಕಿತ್ಯಾಕ್ ಸರ್ವ್ ಥರಾಚೆಂ ಹಗೆಂ, ಜಿದ್ದ್, ಮೊಸೊರ್ ಆನಿಂ ಕುಸ್ಡೆಂಪಣ್ ಆಮ್ಚಾ ಶಿರಾಂ ಶಿರಾಂನಿ ವಾಳ್ತಾ? ಹೆಂ ಚಿಂತಾಪ್ ಕೊಣಾಚೆಂ? ಆನಿಂ ಖಂಚಾ ಅರ್ಥಾರ್ ಚಿಂತಾಂವ್ ಆಮಿಂ ವಡ್ಲೆ ಮ್ಹಣ್? ಹಿ ಆಮ್ಚಿ ವಾಡಾವಳ್? ಕೆನ್ನಾಂ ಆಮಿಂ ಹೆರಾಂಕ್ ನ್ಹಯ್ ಆಮ್ಕಾಂಚ್ ಹಿಂ ಸವಾಲಾಂ ಕರುಂಕ್ ಸಕ್ತಾಂವ್ ಆನಿಂ ಹ್ಯಾ ಸವಾಲಾಂಕ್ ಜಾಪಿ ಸೊಧುಂಕ್ ಪ್ರೇತನ್ ಕರ್ತಾಂವ್ ತೆದ್ನಾಂವ್ ಆಮಿಂ ವ್ಹಡ್ಲೆ ಜಾಂವ್ಕ್ ಪಾವ್ತಾಂವ್. ಪುಣ್ ವಾಡಾವಳೆಕ್ ಆಶೆಂವ್ಚಾ ಹರ್ಯೆಕ್ಲ್ಯಾನ್ ಸಮ್ಜಾಜೆ ಜಾಲ್ಲೆಂ ಸತ್ ಜಾವ್ನಾಸಾ ಹೆಂ ’ಸರ್ವಾಂಚಾಕೀ ವಡ್ಲೊ ಜಾವ್ನಾಸಾ, ಜೊ ಸಾಕ್ರಿಫಿಸ್ ಕರುಂಕ್ ಜಾಣಾ ಆಸ್ಚೊ’.

ಆನಿಂ ಸಾಕ್ರಿಫಿಸಾಚೊ ಮನೋಭಾವ್ ನಾತ್‌ಲ್ಲೆಂ ಸಂಚಾಲನ್ ಮ್ಹಳ್ಯಾರ್ ಫುಟ್ಕೊರ್ ತಾರ್ವಾಚೆರ್ ಪಯ್ಣ್ ಕರ್ಚೆಪರಿಂಚ್ ನ್ಹಯ್‌ವೇ?

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

[ಆಮಿಂ ಕಿತ್ಲೆ ವ್ಹಡ್?]

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್