ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
’ರೊಮಾಚೆಂ ಶ್ಹೆರ್ ಎಕಾಚ್ಚ್ ದಿಸಾಂತ್ ಉಭೆಂ ಜಾಂವ್ಕ್ ನಾ’
ಪಾಟಿಂ ಪಳೆಂವ್ಕ್ ನಾ
ವರಸ್ : 2011
ಅಂಕೊ : 53
ಮಯ್ನೊ : ಸಪ್ತೆಂಬರ್
ಸಂಪಾದಕೀಯ್ - 53.
ವಲ್ಲಿ ಕ್ವಾಡ್ರಸ್
ಕೊಂಕ್ಣಿ ಪತ್ರಾಂಚಿ ಆಯ್ಚಿ ಪರಿಗತ್ ದಿಸಾನ್ದೀಸ್ ಅಸ್ಕತ್ ಜಾವ್ನ್ ಯೆತೇ ಆಸಾ, ಕಾಂಯ್ ತೆಂಪಾಧಿಂ ಭರ್ವಸೊ ಹಾಡುಂಕ್ ಸಕ್ಲ್ಲಿಂ ಪತ್ರಾಂ ಸಯ್ತ್ ಬಂಧ್ ಪಡ್ಲ್ಯಾಂತ್. ಆರ್ಥಿಕ್ ದಿವಾಳಿ ವಾ ಲಾಚಾರ್ಪಣಾಂತ್ ಸಂಸಾರ್ ಕಂಗಾಲ್ ಜಾಲಾಸ್ತಾಂ, ಕೊಣಾಕ್ಯೀ ಅಪ್ಲೆಂ ಕುಟಾಮ್, ಅಪ್ಲೆಂ ಕಾಮ್ ಶಿವಾಯ್ ಹೆರ್ ಸಂಗ್ತೆಂಕ್ ಗುಮಾನ್ ದಿಂವ್ಚೆಂ ತಿತ್ಲೆಂ ಸಲೀಸ್ ನ್ಹಯ್. ಅಶೆಂ ಆಸ್ತಾಂ, ಪಾವ್ಸಾಳ್ಯಾ ಆವ್ರಾನ್ ನ್ಹಂಯ್ದೆಗೆಲ್ಯಾ ಮಾತಿ-ರುಕಾಂಕ್ ಕೊಸ್ಳೊನ್ ವರ್ಚೆಪರಿಂ, ಹ್ಯಾ ಕೊಂಕ್ಣಿ ವರ್ತುಲಾಂತ್ ಕಾಂಯ್ ಇಲ್ಲೊ ವಾವ್ರ್ ಕರ್ಯಾಂ ಮ್ಹಣೊನ್ ಉದೆಲ್ಲ್ಯಾ ಉರ್ಭೆವಂತ್, ತಾಲೆಂತ್ವಂತಾಂಕ್ ಸಯ್ತ್ ಹ್ಯಾ ಸ್ಥಿತೆನ್ ಅಪ್ಣಾಸವೆಂ ಕೊಸ್ಳೊನ್ ವ್ಹೆಲೆಂ. ಫುಡೆಂ ಕಿತೆಂ?
ಕೊಂಕ್ಣಿ ಪತ್ರಾಕ್ ವಾಚ್ಪಿ ಚಡಾಜಯ್ ಮ್ಹಣ್ ಸಭಾರ್ ಪತ್ರಾನಿ, ಸಂಸ್ಥ್ಯಾಂನಿ ಪ್ರೇತನಾಂ ಕೆಲಿಂ, ಪುಣ್ ವರ್ಗಣೆದಾರ್ ಮಾತ್ ಚಡ್ಲೆ ಶಿವಾಯ್ ಕೊಂಕ್ಣಿ ಪತ್ರಾಂ ವಾಚ್ತೆಲೆ ಉಣೆಂಚ್ ಜಾಲೆ. ಆಧ್ಲ್ಯಾ ಕಾಳಾರ್ ಘರಾಂನಿ ಆಸ್ಚ್ಯಾ ಪ್ರಾಯೆಸ್ತಾಂಕ್-ಬಾಯ್ಲಾಂಕ್ ಕೊಂಕ್ಣಿ ಪತ್ರಾಂ ವಾಚುಂಕ್ ಮೆಳ್ತಾಲಿಂ, ಪುಣ್ ಆಜ್ಕಾಲ್ ಟಿ.ವಿ.ಂನಿ ಸೀರಿಯಲ್ಸ್ ಆಸಾತ್. ಇಸ್ಕೊಲಾಂ-ಕೊಲೆಜಿ ಥಾವ್ನ್ ಯೇವ್ನ್ ಥೊಡೆ ಪಾವ್ಟಿಂ ಪತ್ರಾಂ-ಬೂಕ್ ವಾಚ್ತೆಲ್ಯಾಂಕ್ ಆಜ್ಕಾಲ್ ಜಾಯ್ತ್ಯೊ ವಿಂಚವ್ಣ್ಯೊ ಆಸಾತ್, ಜಾಯ್ತಿಂ ಮಾಧ್ಯಮಾಂ ಉಪಲಬ್ಧ್ ಆಸಾತ್, ಅಂತರ್ಜಾಳ್ ಹಾಂತುಂ ಪ್ರಮುಖ್. ದೆಕುನ್ ಅಂತರ್ಜಾಳಿಚೆರ್ ಕೊಂಕ್ಣಿ ಸಾಹಿತ್ ವಾಚ್ತೆಲ್ಯಾಂಚೊ ಸಂಖೊ ಚಡೊನ್ ಯೆಂವ್ಚೊ ಎಕಾ ದಿಶೆನ್ ಬರೆಂಚ್ ಮ್ಹಣ್ಯೆತ್. ಸಭಾರಾಂ ಅಜೂನ್ ಪರ್ಯಾಂತ್ ಕೊಂಕ್ಣಿ ಸಾಯ್ಟಿಂತ್ಲೆಂ ವಾಚ್ತಾತ್ ಮಾತ್ರ್ ನ್ಹಯ್, ಪ್ರಿಂಟ್ ಕಾಡುನ್ ಘರಾ ಸಯ್ತ್ ವ್ಹರ್ತಾತ್ ಮ್ಹಣ್ ಸಭಾರಾಂನಿ ಸಾಂಗ್ಲಾಂ.
ಕೊಂಕ್ಣೆಚಿ ಪರಿಗತ್ ಹ್ಯಾ ಸ್ಥಿತೆಕ್ ಪಾವೊಂಕ್ ಕಸ್ಲೀಂಯ್ ಕಾರಣಾಂ ಆಸೊಂದಿತ್, ಥೊಡೊ ವೇಳ್ ಆಯ್ಲೆವಾರ್ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಜಾಲ್ಲಿ ಬದ್ಲಾವಣ್ ಪಳೆಯಾಂ;
ಸಾಂಗಾತಿ ಮೀಡಿಯಾನ್ ಭೋವ್ ಉರ್ಭೆನ್, ನವೆಂ ಚಿಂತಪ್, ನವಿ ದಿಶಾ ದೀಂವ್ಕ್ ಪ್ರೇತನ್ ಕೆಲ್ಲೆಂ ’ಮಿತ್ರ್’ ಬಂಧ್ ಪಡ್ಲೆಂ. ’ಝೆಲೊ’ ಪತ್ರ್ ಬಂಧ್ ಪಡ್ಲೆಂ. ಕಾಂಯ್ ನವಿಂ ಪತ್ರಾಂ ಪರ್ಗಟೊನ್ ಯೆಂವ್ಚಿಂ ಖುಣಾಂ ದಿಸೊನ್ ಯೇನಾಂತ್. ಪರ್ಗಟೊನ್ ಯೆಂವ್ಚ್ಯಾ ಚಡ್ತಾವ್ ಪತ್ರಾಂಚ್ಯಾ ಚಡ್ತಾವ್ ಪಾನಾಂನಿ ಅರ್ಗಾಂ-ಇಸ್ತಿಹಾರಾಂನಿ ಭರ್ಲ್ಯಾಂತ್ ಶಿವಾಯ್ ಸಾಹಿತ್ ಭೋವ್ ಉಣೆಂ. ಅಶೆಂ ಸಾಂಗ್ತಾನಾ ಏಕ್ ಸವಾಲ್ ಮತಿಂತ್ ಧೊಸುಂಕ್ ಪುರೊ; ’ಸಾಹಿತ್ ಮ್ಹಳ್ಯಾರ್ ಕಿತೆಂ?’
ಹ್ಯಾ ಸವಾಲಾಕ್ ಜಾಪ್ ಕಾಂಯ್ ದೋನ್-ಅಡೇಜ್ ದಾಕ್ಡ್ಯಾಧಿಂ ಖಡಾಪಾನ್ ದಿಲ್ಲಿ ಆಸಾ; "ಜ್ಯೆ ಕಿತೆಂ ಬರ್ಪಾನ್ ಆಸಾ, ತೆಂ ಸಾಹಿತ್, ಜಾಂವ್ ತೆಂ ವಕ್ತಾ ಸಾಹಿತ್, ಧರ್ಮಾ ಸಾಹಿತ್ ವಾ ಕಲಾತ್ಮಕ್ ಸಾಹಿತ್".
ಆತಾಂ ಅಸಲಿ ಸಾಹಿತಿಕ್ ಸುಕಿಧಾಡ್ ಕಶಿ ಆಯ್ಲಿ? ಎಕ್ಚ್ಚ್ ಪಾವ್ಟಿಂ ಸರ್ವ್ ಬರವ್ಪ್ಯಾಂನಿ ಅಚಾನಕ್ ಬರಂವ್ಚೆಂ ಉಣೆಂ ಕೆಲೆಂ ವ ಲಿಖ್ಣಿ ಬಂಧ್ ಕೆಲಿ ಕಿತ್ಯಾಕ್?
’ಕೊಂಕ್ಣಿ ಸಾಹಿತಾಂತ್ ಏಕ್ ಬರವ್ಪಿ ಜಾಂವ್ಕ್ ಕಸ್ಲೀಯ್ ಅರ್ಹತಾ ಗರ್ಜ್ ನಾ’ ಮ್ಹಳ್ಳಿ ಏಕ್ ಖೊಡ್ ಅಡ್ಹೂಕ್ ತರ್ಯೀ ಸತ್. ಹೆಂ ಕೊಂಕ್ಣಿ ಸಾಹಿತಾಕ್ ಮಾತ್ರ್ ಸೀಮಿತ್ ನ್ಹಯ್, ಹರ್ಯೆಕಾಕ್ ಲಾಗು ಜಾತಾ, ಜಾಂವ್ ಸಂಪಾದಕ್, ಗಾವ್ಪಿ, ಪ್ರಕಾಶಕ್ ವ ವಿಮರ್ಶಕ್. ದೆಕುನ್ ಹಾಂಗಾ ಉಲಯಿಲ್ಲೆಂ ಪುರಾ ಭಾಶಣ್ ಜಾತಾ, ಬರಯಿಲ್ಲೆಂ ಪುರಾ ಸಾಹಿತ್ ಜಾತಾ. ಕಿತೆಂಯ್/ಕಶೆಂಯ್ ಪರ್ಗಟ್ಲಲಿಂ ಪರ್ಗಟ್ಣಾರ್ ಜಾತಾತ್. ಕಸಲಿಚ್ ಸಾಹಿತಿಕ್ ಅರ್ಹತಾ ಗರ್ಜ್ ಮ್ಹಣ್ ನಾ. ಇತ್ಲೆಂಚ್ ನ್ಹಯ್, ವಿಮರ್ಸೊ ಮ್ಹಳ್ಳ್ಯಾ ನಿಭಾನ್ ಕಿತೆಂಯ್ ಬರವ್ಯೆತಾ, ಕಶೆಂಯ್ ಬರವ್ಯೆತಾ. ಸಾಹಿತಿಕ್ ಮರ್ಯಾದ್ ಮ್ಹಳ್ಳಿ ಗರ್ಜ್ ನಾ.
ಪುಣ್ ಕೊಂಕ್ಣೆಚಿ ಖರಿ ವ್ಹಾಡಾವಳ್ ಆಶೆತಾಂವ್ ತರ್ ಅಶೆಂ ಜಾಯ್ನಾಯೆ. ಭಿಲ್ಕುಲ್ ಅಶೆಂ ಜಾಯ್ನಾಯೆ. ಸಾಹಿತ್ ಏಕ್ ಮಾಧ್ಯಮ್, ಎಕಾ ತಕ್ಲೆಂತ್ ಆಸ್ಚೆ ವಿಚಾರ್ ಸಭಾರ್ ತಕ್ಲೆಕ್ ರಿಗೊನ್ ಕಾಮ್ ಕರುಂಕ್ ಸಕ್ಚೆ ತಸಲೆ. ಸಾಹಿತಾಮುಖಾಂತ್ರ್ ಅಭಿವ್ಯಕ್ತ್ ಜಾಲ್ಲೆ ವಿಚಾರ್ ವರ್ಸಾನ್ ವರಸ್ ಹರ್ಯೆಕಾ ವಾಚ್ಪ್ಯಾಕ್ ಮಹತ್ವಾಚೆ ಮ್ಹಣ್ ಭಗಾಜಯ್ ಶಿವಾಯ್ ’ಕಾಂಠಾಳೊ’ ಹಾಡ್ಚೆತಸ್ಲೆಂ ಜಾಯ್ನಾಯೆ. ಹಾಂಗಾಸರ್ ವಿಚಾರಾಂಚಿ ಪರಿಪಕ್ವತಾ ಗರ್ಜೆಚಿ, ಮೂಳ್ ನೈತಿಕ್ ಶಿಕ್ಪಾಚಿ ಗರ್ಜ್ ಆಸಾ, ಕಿತೆಂ ಬರೆಂ/ವಾಯ್ಟ್ ಮ್ಹಳ್ಳೆಂ ತುಲನ್ ಕರ್ಚಿ ಶ್ಯಾಥಿ ಆಸ್ಚಿ ಗರ್ಜ್ ಆಸಾ, ಅನ್ಭೋಗಾಚಿ ಸಾಯ್ ಗರ್ಜೆಚಿ, ಸಾಹಿತಿಕ್ ಪ್ರಭುದ್ದತಾ ಭೋವ್ ಗರ್ಜೆಚಿ, ಅಭಿವ್ಯಕ್ತೆಕ್ ವಿಂಚ್ಲೆಲ್ಯಾ ಸಾಹಿತಿಕ್ ಭಾಸೆಚಿ ಮರ್ಯಾದ್ ರಾಕ್ಚಿ ಭೋವ್ ಗರ್ಜೆಚಿ’.
ಆತಾಂ ಅನ್ಯೇಕ್ ಸವಾಲ್ ಮತಿಂತ್ ಉದೆಂವ್ಕ್ ಪುರೊ, ಅಸಲೊ ಸಾಹಿತಿಕ್ ಕೊಂಕ್ಣೆಂತ್ ಕಸೊ ಯೆತಲೊ? ಸರ್ಗಿಂ ಥಾವ್ನ್ ದೆಂವ್ತಲೊ? ವಾ ಧರ್ತಿ ಫುಟೊನ್ ಉದೆತಲೊ? ತೊ/ತಿ ಸಯ್ತ್ ಆಮ್ಚೆಚ್ ಪಯ್ಕಿಂತ್ ಯೇಂವ್ಕ್ ಜಾಯ್ ನ್ಹಯ್? ಕಶೆಂ ಯೆತಲೊ? ಹ್ಯಾ ಸವಾಲಾಂಚೆರ್ ವಿಚಾರ್ ಗರ್ಜೆಚೊ.
ಆಜ್ ಆಮ್ಚ್ಯಾ ಸಾಹಿತಿಕ್ ಪರಿಗತ್ ಅಸಲ್ಯೆ ಸ್ಥಿತೆಕ್ ಪಾವ್ಲ್ಯಾ ಮ್ಹಳ್ಯಾರ್ ಆಮ್ಕಾಂ ಪತ್ರಾಂ/ಸಾಯ್ಟಾಂ/ಫಿರ್ಗಜ್ ಪತ್ರಾಂ ಅಸೊನ್ಯೀ ತಿಂ ಸರ್ವಾಂಕ್ ’ಏಕ್ ಮಾಧ್ಯಮ್’ ಜಾಯ್ನಾ. ’ಸಂಘಟನಾಂ/ಸಂಸ್ಥೆ’ ಆಸೊನ್ಯೀ, ’ಎಕ್ವಟಿತ್’ ಮನೋಭಾವ್ ನಾ. ’ಮೆಟಾಂ ಮೆಟಾಂಕ್ ದೊರೆ’, ಕುಡ್ಕ್ಯಾಚೆಂ ಪರ್ತ್ಯಾಕ್ ಕುಡ್ಕೆ, ತ್ಯಾ ಕುಡ್ಕ್ಯಾಂನಿ ಸಯ್ತ್ ವೆವೆಗ್ಳೆ ರಿತಿಚೆ ಮಾನ್-ಸಮ್ಮಾನ್, ಬಿರೊದೊ ಆನಿ ಎದೊಳ್ ಮೆಳ್ಲ್ಲೆ ಸರ್ವ್ ಬಿರುದೆಂಕ್ ಕುಡ್ಸಿಲೆಂ ತರ್, ತೊ ಸಂಖೊ ಸದ್ದ್ಯಾಚ್ಯಾ ಕೊಂಕ್ಣಿ ವಾಚ್ಪ್ಯಾಂಚ್ಯಾ ಸಂಖ್ಯಾಕೀ ಮಿಕ್ವತ್.
ಆಸೊಂ - ಕೊಂಕ್ಣೆಚೆಂ ಉದ್ದಾರ್ ಜಾತಾ ತರ್ ಹೆಂ ಸರ್ವ್ ಬರೆಂಚ್. ಪುಣ್ ಮ್ಹಾಕಾ ಹೆಂ ಸಮ್ಜಾನಾ, ಕಿತ್ಯಾಕ್ ಕೊಂಕ್ಣೆಂತ್ ತುಟಾಫಟ್? ಭೋವ್ಶಾ ಕೊಂಕ್ಣೆಚ್ಯಾಕೀ ವೆಕ್ತಿ ಪ್ರಮುಖ್ ಜಾಲ್ಲೆನಿಮ್ತಿಂ ಕೊಣ್ಣಾ. ಆಸೊಂ.
ಬದ್ಲಾವಣ್ ಏಕ್ ಪ್ರಕ್ರಿಯಾ, ಖಂಚ್ಯಾಯ್ ಭಾಸೆಂತ್ ’ಶ್ರೇಷ್ಟ್ ಸಾಹಿತಿ’ ಬರ್ಯಾ ಸಾಹಿತಿಂ ಥಾವ್ನ್ ಮಾತ್ರ್ ಉದೆತಾ, ’ಬರೆ ಸಾಹಿತಿ’ ಸಾಧಾರಣ್ ಬರಯ್ಣಾರಾಂ ಥಾವ್ನ್ ಉದೆತಾತ್, ’ಸಾಧಾರಣ್’ (ಕೊಂಕ್ಣೆಚ್ಯಾ ಮಟ್ಟಾರ್ ಸಾಂಗ್ಚೆಂ ತರ್ ಹವ್ಯಾಸಿ) ಬರಯ್ಣಾರಾಂ ಥಾವ್ನ್ ಉದೆತಾತ್. ಅಶೆಂ ಆಸ್ತಾಂ, ಕೊಂಕ್ಣೆಂತ್ ಕೊಣ್ಯೀ ಎಕ್ಲೊ ಹವ್ಯಾಸಿ ಬರಯ್ಣಾರ್ ಉದೆಲೊ ತರ್, ತಾಚ್ಯಾ ಲಿಖ್ಪಾಚೆರ್ ಎಕ್ಚ್ಚ್ ಪಾವ್ಟಿಂ ಶ್ರೇಷ್ಟ್ ಸಾಹಿತಾಚಿ ಅಪೇಕ್ಶಾ ಕರ್ಚಿ ಖರಿಚ್ಚ್ ಜಾವ್ನ್ ತ್ಯಾ ಬರವ್ಪ್ಯಾಚೆರ್ ದಿಂವ್ಚೊ ’ಖಾಂದಿ ಖುರಿಸ್’ ನಾಸ್ತಾಂ ಆನಿ ಕಿತೆಂ?. ಆತಾಂ ಉದೆತಾ ಅನ್ಯೇಕ್ ವಾದ್. ಪುಣ್ ಥೊಡೆ ಅಜೂನ್ ಮ್ಹಣಾಸರ್ ಕಂಯ್ ಥಾವ್ನ್ ಸುರ್ವಾತ್ ಕೆಲ್ಲಿಕೀ, ತೆಚ್ಚ್ ಮಟ್ಟಾರ್ ಆಸಾತ್, ವಾಚ್ಪಾಚಿ ಆಳ್ಸಾಯ್, ಚಿಂತ್ಪಾಚಿ ಆಳ್ಸಾಯೆನ್. ಅಸಲ್ಯಾಂಕ್ ಕೊಣೆಂಯ್ ಖೊಂಕುನ್ ವಾ ಗುಡ್ಡಾವ್ನ್ ಬದ್ಲುವೆತಾ?. ದೆಕುನ್ ಆಮಿ ಘೊಡ್ಯಾಕ್ ಉದ್ಕಾಲಾಗಿಂ ಮಾತ್ರ್ ಆಪವ್ನ್ ವರ್ಯೆತಾ ಶಿವಾಯ್ ಘೊಡ್ಯಾಚೆಂ ತೋಂಡ್ ಉದ್ಕಾಂತ್ ಧಾಂಬುನ್ ದವರುಂಕ್ (ಘೊಡ್ಯಾಕ್ ಉದಾಕ್ ಭರಂವ್ಕ್) ವೆಚೆಂಚ್ ನಾಕಾ. ಜೊ ತಾನೆಲಾ, ತೊ ಪಿಯೆಂವ್ದಿ.
ಸದ್ದ್ಯಾಚ್ಯಾ ಪರಿಗತೆಂತ್ ಏಕ್ ಸಂಗ್ತೆಚೊ ಉಲ್ಲೇಕ್ ಗರ್ಜೆಚೊ ಮ್ಹಣ್ ಮ್ಹಾಕಾ ಭಗ್ತಾ, ಸದ್ದ್ಯಾಚ್ಯಾ ಕೊಂಕ್ಣಿ ಸಾಹಿತಿಕ್ ಪರಿಗತೆಂತ್ ಕೊಂಕ್ಣಿ ಕವಿತಾಂ ’ಗುಣ್ ಮಟ್ಟಾ’ನ್ ಬರಿಂ ಜಾವ್ನ್ಂಚ್ ಆಸಾತ್. ಹ್ಯಾ ಪಾಸತ್ ಜಾಯ್ತ್ಯಾಂನಿ ಮಿನತ್ ಕೆಲ್ಯಾ, ಕರ್ನ್ಂಚ್ ಆಸಾತ್. ಆನಿ ಹಿಂ ಗುಣ್ ಮಟ್ಟಾಚಿಂ ಕವಿತಾ ಬರಯ್ತೆಲಿಂ ಸರ್ವಾಂ ನವಿಂಚ್ ನ್ಹಯ್, ಸಭಾರ್ ತೆಂಪಾ ಥಾವ್ನ್ ಕವಿತಾ ಬರವ್ನ್ ಆಯಿಲ್ಲಿಂ. ಆನಿಂ ಹಾಂಚ್ಯಾ ಸಾಹಿತಿಕ್ ಸುರ್ವಾತೆರ್ ಜರ್ ಅಸಲೊಚ್ಚ್ ಖಾಂದಿ ಖುರಿಸ್ ಹಾಂಚ್ಯಾ ಖಾಂದಾರ್ ದಿಲ್ಲೊ ತರ್ ಭೋವ್ಶಾ ಕೆದಿಂಚ್ ಅಸಲಿಂ ಬರಯ್ತಿಂನಾಂತ್ ಕೊಣ್ಣಾ. ಹಾಂತ್ಲಿಂ ಸರ್ವಾಂ ಫುಡಾರಾಚೆ ಚಾ.ಫ್ರಾ. ಜಾತಿತ್ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ ನ್ಹಯ್ ತರ್ಯೀ, ಕಾಂಯ್ ಥೊಡೆ ಜಾತಿತ್ ತರ್ ತಾಂಚ್ಯಾ ಸ್ವ-ಪರಿಶ್ರಮಾಂತ್ ಮ್ಹಳ್ಳೆಂ ಖಂಡಿತ್.
ಹೆಂಚ್ ಮ್ಹಜೆಂ ಚಿಂತಾಪ್, ಜಶೆಂ ಇಂಗ್ಲಿಶಾಂತ್ ಏಕ್ ಸಾಂಗಾಪ್ ಆಸಾ; "Rome is not built in a day", ತೆಚ್ಚ್ಪರಿಂ ಹರ್ಯೆಕ್ ಬದ್ಲಾವಣ್ ಏಕ್ ನಿರಂತರ್ ಪ್ರಕ್ರಿಯಾ, ಆನಿ ಫಕತ್ತ್ ವೇಳ್-ಕಾಳ್ ಮಾತ್ರ್ ’ಕೆದ್ನಾ’ ಮ್ಹಳ್ಳ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಸಕ್ತಾ. ಪುಣ್ ತೆದೊಳ್ ಮ್ಹಣಾಸರ್ ಸಯ್ರಣ್ ಗರ್ಜೆಚೆಂ. ಕಿತ್ಯಾಕ್ ಮ್ಹಳ್ಯಾರ್ ಸಯ್ರಾಣ್ ಚುಕೊನ್ ಕೊಣೆಂಯ್ ಕಿತೆಂಚ್ ಸಾಧನ್ ಕೆಲ್ಲೆಂ ನಾ; ಶಿವಾಯ್ ಅಸಲ್ಯಾ ಹವ್ಯಾಸಿ ಬರಯ್ಣಾರಾಂಕ್ ಕೊಂಕ್ಣಿ ಸಾಹಿತಾಚೆರ್ ಕಾಂಠಾಳೊ ಯೆಂವ್ಚೆಪರಿಂ ಕರ್ಚೆಂ.
ಪುಣ್ ಆಮಿ ತ್ಯಾ ದಿಶೆನ್ ಚಿಂತುಂಕ್ ವೆಚೆಂಚ್ ನಾಕಾ, ಆಮ್ಚೆಂ ಮಿಸಾಂವ್ ಸಂಪೆಂ ಆನಿ ಸುಡಾಳ್, ದೆಕುನ್ ಪಾಟಿಂ ಪಳೆಂವ್ಚೆಂಚ್ ನಾಕಾ.
ಕೊಂಕ್ಣಿ ಸಾಹಿತಾಚೆಂ ತಶೆಂಚ್ ಸರ್ವಾಂಚೆಂ ಬರೆಂಚ್ ಜಾಂವ್.
ದೇವ್ ಬರೆಂ ಕರುಂ,
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
