ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಖಂಚ್ಯಾ ಧರ್ಮಾಕ್ ವೆಂಗುಂ? ಘರಾಂ ಭಾಂದುನ್ ದಿತೆಲ್ಯಾಂಚೊ ವಾ ಘರಾಂ ಲಾಸ್ತೆಲ್ಯಾಂಚೊ?’
ತುಜೊ ಧರ್ಮ್ ಕಸಲೊ?
ವರಸ್ : 2008
ಅಂಕೊ : 45
ಮಯ್ನೊ : ಅಕ್ತೋಬರ್
ಸಂಪಾದಕೀಯ್ - 45.
ವಲ್ಲಿ ಕ್ವಾಡ್ರಸ್
ಪಾಟ್ಲ್ಯಾ ಸಭಾರ್ ವರ್ಸಾಂ ಆಮ್ಚ್ಯಾ ದೇಶಾಂತ್ ಕ್ರಿಸ್ತಾಂವಾಚೆರ್ ಹಲ್ಲೊ ಚಲೊನ್ ಆಸ್ಲ್ಲೊ. ಜಶೆಂ ರೆಡ್ಯಾಚ್ಯಾ ಪಾಟಿಚೆರ್ ಬೆತಾಂತ್ ಮಾರ್ತಾನಾ ರೆಡ್ಯಾನ್ ಭಗ್ಲ್ಲೆಪರಿಂ ಆಮಿಂ ಚಿಂತ್ಲ್ಲೆಂ. ಪಯ್ಲೊ ಮಾರ್ ಪಡ್ತಾನಾ ರೆಡ್ಯಾಕ್ ಖಬಾರ್ಚ್ ನಾ. ದುಸ್ರೊ ಮಾರ್ ಪಡ್ತಾನಾ ಕಸ್ಲೊಗೀ ಅಸ್ಪಷ್ಟ್ ಆವಾಜ್ ಆಯ್ಕಾಲೊ. ತಿಸ್ರೊ ಮಾರ್ ಪಡ್ತಾನಾ ಹೊ ಆವಾಜ್ ಲಾಗ್ಶಿಲ್ಯಾನ್ ಆಯ್ಕಲ್ಲೆಪರಿಂ ಜಾಲೆಂ. ಚೊವ್ತೊ ಮಾರ್ ಪಡ್ತಾನಾ ಕಾಂಯ್ ಹೊ ಮಾರ್ ಆಪ್ಣಾಕ್ ಪಡ್ತಾಗೀ ಮ್ಹಳ್ಳೊ ದುಭಾವ್ ಜಾಲೊ. ಪಾಂಚ್ವೊ ಮಾರ್ ಪಡ್ತಾನಾ ಕಳ್ಳೆಂ ಹೋ - ಹೊ ಮಾರ್ ಆಪ್ಣಾಕ್ಚ್ಚ್ ಪಡೊನ್ ಆಸಾ ಮ್ಹಣ್.
ಹೆಚ್ಚ್ಪರಿಂ ದೇಸ್ಭರ್ ಕ್ರಿಸ್ತಾಂವಾಚೆರ್ ಜಾಲ್ಲ್ಯಾ, ಜಾತೇಚ್ಚ್ ಆಸ್ಚ್ಯಾ ಹಲ್ಲ್ಯಾಚೆರ್ ಆಮ್ಕಾಂ ಮಂಗ್ಳುರಿ ಕ್ರಿಸ್ತಾಂವ್ ಪರ್ಜೆಕ್ ಕಿತೆಂಚ್ ಪಡೊನ್ ಗೆಲ್ಲೆಂ ನಾ. ಎಕಾ ವಾಟೆರ್ ದುಸ್ಮಾನಾಕ್ ಭಗ್ಸುಂಚೊ ಮೋಗ್, ದುಸ್ರೆ ವಾಟೆರ್ ಭಿತರ್ಲೆ ಭಿತರ್ ಲಿಪೊನ್ ಆಸ್ಚೆಂ ಭಿವ್ಕುರ್ಪಣ್. ತಿಸ್ರೆಂ ಆಮ್ಚ್ಯಾ ಸಮಾಜೆಂತ್ ವಯ್ರ್ ವೆತೆಲ್ಯಾಂಕ್ ಸಕ್ಲಾ ವೋಡ್ನ್ ಹಲ್ಕ್ ಕರ್ನ್ ಜಿಯೆಂವ್ಚ್ಯಾ ಕುರ್ಲ್ಯಾಂಚ್ಯಾ ಖಾಸ್ತಾಚ್ಯಾ ಕುಳಿಯೆಂತ್ಲ್ಯಾ ಆಮ್ಚ್ಯಾ ಅಸ್ಕತ್ಕಾಯೆಚೊ ಭರ್ಪೂರ್ ಫಾಯ್ದೊ ಜೊಡುನ್ ಆಮ್ಚ್ಯಾಚ್ ಆಂಗ್ಣಾಕ್ ದೆಂವೊನ್ ಆಮ್ಚೆರ್ ಹಲ್ಲೊ ಚಲ್ಲೊ. ಆಮ್ಚ್ಯಾ ಬಾಯ್ಲಾಂಚೆರ್, ಭುರ್ಗ್ಯಾಂಚೆರ್ ಮಾರ್ ಪಡ್ಲೆ. ಪುಣ್ ಜೊಕ್ತಿ ಜವಾಬ್ ದೀಂವ್ಕ್ ಆಮ್ಚೊ ಲೋಕ್ ಜರೂರ್ ಪಾಟಿಂ ಸರ್ಲೊನಾ. ಹಿ ಖಬಾರ್ ಖಿಣಾನ್ ಪರ್ಗಾಂವಾನಿ ವಿಸ್ತಾರ್ಲಿ ಆನಿ ಸಂಸಾರ್ಭರ್ ಹ್ಯಾ ಕಿರ್ಕೊಳ್ ಕರ್ನ್ಯಾಂಕ್ ವಿರೋದ್ ಕೆಲೊ.
ಪುಣ್ ಹ್ಯಾ ಸಂದರ್ಭಾರ್ ಸಭಾರ್ ಸತಾಂ ಉಗ್ಡಾಪಿಂ ಜಾಲಿಂ. ಆಮ್ಚ್ಯಾ ಥೊಡ್ಯಾ ಪ್ರಾಂತೀಯ್ ಖಬ್ರಾ ಪತ್ರಾಂಚೆಂ ಖರೆಂ ರೂಪ್ ಉಗ್ತೆಂ ಜಾಲೆಂ. ಸತಾಕ್ ಪಾಟಿಂಭೊ ದೀಜಯ್ ಆಸ್ಚಿಂ ಹಿಂ ಪತ್ರಾಂ ಬೇಜವಾಭ್ದಾರಿಪಣಾನ್ ಅಸಲ್ಯಾ ಕೋಮುವಾದಿಂಚ್ಯಾ ಕರ್ನ್ಯಾಂಕ್ ಹರ್ಸುಂಚಿಂ ಬರ್ಪಾಂ ಪರ್ಗಟೊಂಕ್ ಲಾಗ್ಲಿಂ. ಹಾಂಕಾಂ ಖುರ್ಸಾಚೆರ್ ಉಮ್ಕಾಳಾಯಿಲ್ಲ್ಯಾ ಜೆಜುಚಿ ಇಮಾಜ್ ಮೊಡ್ಲ್ಲಿ ಜಾಂವ್, ಇಗರ್ಜೆಚ್ಯಾ ಖುರಿಸಾಚೆರ್ ಹಾಂಚೊ ಬಾವ್ಟೊ ಭಾಂದ್ಲ್ಲೊ ದಿಸ್ಲೊಚ್ಚ್ ನಾ. ಜರ್ಥರ್ ಹಿಚ್ಚ್ ಗತ್ ಜರ್ ಹಾಂಚ್ಯಾ ಹನುಮಾನಾಚ್ಯಾ ಇಮಾಜೆಚಿ ಶಿಮ್ಟಿ ಖಾತರಿಲ್ಲಿ ವಾ ಹಾಂಚ್ಯಾ ತ್ರಿಶೂಲಾಚೆರ್ ಖುರಿಸ್ ವಾ ಚಾಂದ್ನೆಂ ಭಾಂದ್ಲ್ಲೆಂ ತರ್ ಕಿತೆಂ ಜಾತೆಂ ಮ್ಹಳ್ಳೆಂ ಚಿಂತಾಪ್ ಹಾಂಚ್ಯಾ ಕಟ್ಟ್ಯಾಂತ್ ಉದೆಲ್ಲೆಂ ಕಿತ್ಯಾಕ್ ನಾ?. ಹ್ಯಾ ಬೇಜವಾಭ್ದಾರಿಚ್ಯಾ, ಪಕ್ಶ್ಪಾತಿ ದಿಸಾಳ್ಯಾಂವಿಶಿಂ ಖರೆಂಚ್ ಜಾವ್ನ್ ಅಖ್ಖ್ಯಾ ಕ್ರಿಸ್ತಾಂವ್ ಪರ್ಜೆನ್ ನಿಯಾಳ್ ಕರ್ಚಿ ಗರ್ಜ್ ಆಸಾ. ದೆಕುನ್ ಹರ್ಯೆಕ್ಲ್ಯಾ ಕ್ರಿಸ್ತಾಂವಾನ್ ಅಸಲ್ಯಾ ಪತ್ರಾಕ್ ಪಾಟಿಂಭೊ ದಿಂವ್ಚೆಂ ಬಂಧ್ ಜಾಯ್ಜಯ್. ಜರ್ ಅಸಲೆಂ ಬೇಜವಾಬ್ಧಾರಿಪಣಾಚೆಂ ಪತ್ರಿಕೋಧ್ಯಮ್ ಕೊಣೀಂ ಕ್ರಿಸ್ತಾಂವಾಂ ಕರ್ತಿಂ ತರ್ ಎದೊಳ್ಚ್ಚ್ ಪತ್ರಾಂ ಹುಲ್ಪಾಯ್ತಿಂ ಮ್ಹಳ್ಳೆಂ ಅಪುಟ್ ಸತ್.
ಮಂಗ್ಳುರಾಂತ್ ಚಲ್ಲ್ಲ್ಯಾ ಹಲ್ಲ್ಯಾಚಿ ಖಬ್ರಾಂನಿ, ಖಬ್ರಾ ಮಾಧ್ಯಮಾಂನಿ ಪರ್ಗಟೊನ್ ಆಯಿಲ್ಲ್ಯೊ ತಸ್ವೀರೊ ಪಳೆತಾನಾ ನಿಜಾಯ್ಕೀ ಕಾಳಿಜ್ ಕಡಯ್ತಾ ಮಾತ್ರ್ ನ್ಹಯ್ ರಗಾತ್ ಕಡ್ತಾ, ಪುಣ್ ಹೊ ವೇಳ್ ರಗಾತ್ ಕಡವ್ನ್ ಗೆಟೊ ಕರ್ಚೊ ನ್ಹಯ್, ಫುಡೆಂ ಯೇಂವ್ಕ್ ಆಸ್ಚ್ಯಾ ಅನ್ವಾರಾಂಕ್ ಕಶೆಂ ಫುಡ್ ಕರ್ಚೆಂ ಮ್ಹಳ್ಳ್ಯಾಚೆರ್ ನಿಯಾಳ್ ಕರ್ಚಿ ಗರ್ಜ್ ಆಸಾ. ಆಮ್ಚ್ಯಾ ಸಮಾಜೆಚೊ ಹುಸ್ಕೊ ಆಸ್ಚ್ಯಾ ಆಮ್ಚ್ಯಾ ಮುಖೆಲಿಂಕ್ ಆಡ್ ಪಾಂಯ್ ದಿಲ್ಲೊ ಕಿತ್ಲೊ ಮಾರಗ್ ಪಡ್ಲೊ ಮ್ಹಳ್ಳೆಂ ಆತಾಂ ತರ್ಯೀ ಆಮ್ಚ್ಯಾ ಕಟ್ಟ್ಯಾಂತ್ ಗೆಲ್ಯಾರ್ ಬರೆಂ. ಖಬ್ರಾ ಮಾಧ್ಯಮಾಂನಿ ಪರ್ಗಟೊನ್ ಆಯಿಲ್ಲ್ಯಾ ತಸ್ವೀರೆಂನಿ ಪೊಲಿಸಾಂಚೆ ಮಾರ್ ಖಾಂವ್ಚೆ ಬಾವ್ಡೆ ತರ್ನಾಟೆ, ಬಾಯ್ಲಾಂ, ಕೊಣಾಚ್ಯಾ ತಕ್ಲೆರ್ ರಗಾತ್, ಕೊಣಾಚಿ ಮುಸ್ತಾಯ್ಕಿ ಪಿಂಜ್ಲ್ಯಾ. ಮನ್ಶ್ಯಾಪಣಾಚೆಂ ಚಿಂತಾಪ್ ಆಸ್ಚ್ಯಾ ಖಂಚ್ಯಾಯ್ ಧರ್ಮಾಚ್ಯಾಕ್, ಹೆ ಮಾರ್ ಖಾವ್ನ್, ಲಜ್ ಭಗ್ಚ್ಯಾ ಲೊಕಾಕ್ ಪಳೆತಾನಾ ಸ್ಪಶ್ಟ್ ಕಳ್ತಾ ಹಿಂ ನಿರ್ದೋಶ್ ಮ್ಹಣ್. ಪುಣ್ ಏಕ್ ಸತ್ ಮಾತ್ರ್ ಸ್ಪಶ್ಟ್ ಉಚಾರಿಜಯ್ - ಜೆ ಕೊಣೆಂ ಮಾರ್ ಖೆಲ್ಯಾತ್, ವಾ ಲಜ್-ಅವ್ಮಾನ್ ಮ್ಹಣ್ ಭಗ್ಲಾಂ, ಜೈಲಾಕ್ ಗೆಲ್ಯಾಂತ್ - ಅಸಲ್ಯಾ ಸರ್ವಾಂಕ್ ನಿಜಾಯ್ಕೀ ಮಾನ್ ಫಾವೊ.
ಆಜ್ ಆಮ್ಚೆಂ ರಾಶ್ಟ್ರ್ ಸಂಸಾರಾಂತ್ಲ್ಯಾ ಪ್ರಮುಖ್ ರಾಶ್ಟ್ರಾಂ ಪಯ್ಕಿಂತ್ ಏಕ್ ಜಾಂವ್ಕ್ ಪಾವ್ಲಾಂ ಕಾಡ್ಚ್ಯಾ ಸಂಧರ್ಭಾರ್, ಆಮಿ, ಸಂಸಾರಾಚ್ಯಾ ನದ್ರೆಂತ್ ಶಿಕ್ಪಿ, ಪ್ರಜ್ನಾವಂತ್, ಜಾಣಾರಿ, ಆಜ್ ಖಂಯ್ಚ್ಯಾ ಪಾಂವ್ಡಾರ್ ಆಸಾಂವ್ ಮ್ಹಳ್ಳೆಂ ಅವಲೋಕನ್ ಕರ್ಚಿ ಭೋವ್ ಚಡ್ ಗರ್ಜ್ ಆಸಾ. ಆಜ್ಕಾಲ್ ಸಂಸಾರಾಂತ್ ದಿಸಾನಾತ್ಲ್ಲ್ಯಾ ದೆವಾಖಾತಿರ್, ದಿಸ್ತೆಲ್ಯಾಂಚೊ ಎಕಾಮೆಕಾಚೊ ದೊರಿ ವೊಡ್ಚೊ ಸ್ಪರ್ಧೊ ಚಲೊನ್ ಆಸಾ. ಆನಿ ಹಿ ದೊರಿ ವೊಡ್ನ್ ವೊಡ್ನ್ ಕೊಣಾಚ್ಯಾ ಹಾತಾಂ ಪಾಂಯಾಂಚಿ ಕಾತ್ ವೆತಾ, ಕೊಣಾಚೊ ಪ್ರಾಣ್ ವೆತಾ. ತರ್ ಧರ್ಮಾಂತರ್ ಮ್ಹಳ್ಳೊ ಏಕ್ ಇತ್ಲೊ ವ್ಹಡ್ ಸಮಸ್ಸೊ ತರ್ ಹ್ಯಾ ಸಮಸ್ಸ್ಯಾಚೆರ್ ಎಕೊಡೊ ನಿಯಾಳ್ ಜರೂರ್ ಕರ್ಯಾಂ. ಧರ್ಮ್ ಪ್ರಚಾರಾಚೆರ್ ಚರಿತ್ರಾ ಕಿತೆಂ ಸಾಂಗ್ತಾ ತೆಂ ಪಳೆವ್ಯಾಂ;
ಜೆಜು ಕ್ರೀಸ್ತ್ ಅಶೆಂ ಮ್ಹಣ್ತಾ; "ವಚಾ ಆನಿ ಹಿ ಬರಿ ಸುವಾರ್ತಾ ಸರ್ವ್ ಜನಾಂಗಾಕ್ ಪರ್ಗಟ್ ಕರಾ" - ಕ್ರಿಸ್ತಾಂವ್ ಧರ್ಮ್ ಇಸ್ರಾಯೆಲಾ ಥಾವ್ನ್ ಯುರೋಪ್, ಅಮೆರಿಕಾಕ್ ವಿಸ್ತಾರ್ಲೊ.
ಸ್ವಾಮಿ ವಿವೇಕಾನಂದ ಸಾಂಗ್ತಾ "ತುಮಿಂ ತುಮ್ಚೊ ಧರ್ಮ್ ವಿಸ್ತಾರುಂಕ್ ಭಾಯ್ಲ್ಯಾ ರಾಶ್ಟ್ರಾಂಕ್ ವಚಾ, ಸುರ್ಯಾ ಪಂದ್ಲ್ಯಾ ಸರ್ವ್ ರಾಶ್ಟ್ರಾಂಕ್ ಹೊ ಧರ್ಮ್ ಪರ್ಗಟಾ" - ಹಿಂಧು ಧರ್ಮ್ ಏಶಿಯಾಂತ್ಲ್ಯಾ ರಾಶ್ಟ್ರಾಂನಿ ಮಾತ್ರ್ ನ್ಹಯ್, ಮಲಾಯ್ ಪೆನಿನ್ಸುಲಾ, ಕಾಂಬೋಡಿಯಾ, ಅನ್ನಮ್, ಸುಮತ್ರಾ, ಜಾವಾ, ಬಾಲಿ ತಶೆಂಚ್ ನೋರ್ನಿಯೊ ದೇಶಾಂಕ್ ವಿಸ್ತಾರ್ಲೊ.
ಹಿಂಧ್ವಾಂಚ್ಯಾ ಪವಿತ್ರ್ ಗೃಂಥಾಂನಿ ಸಯ್ತ್ ಧರ್ಮ್ ಪರ್ಗಟ್ ಕರಂವ್ಚೊ ಉಲೊ ದಿಂವ್ಚಿಂ ಉತ್ರಾಂ ವಾಚುಂಕ್ ಮೆಳ್ತಾತ್;
"ಜೆ ಕ್ರಿಯಾಳ್ ಜಾವ್ನಾಸ್ಚೆ ದೆವಾಕ್ ಹರ್ಸುಂದಿತ್, ಆನಿ ಸರ್ವಾಂಕ್ ಲಾಗಿಂ ಹಾಡುಂದಿತ್" (ಋಗ್ವೇದ್: 9.63.5)
"ಹಾಂವ್ ಹಿಂ ಸಂತೊಸ್ಭರಿತ್ ಉತ್ರಾಂ ಆಮ್ಚ್ಯಾ ಲೊಕಾಕ್ ತಶೆಂಚ್ ಪರ್ಕ್ಯಾಂ ಸಮೊರ್ ಉಲಯ್ತಲೊಂ" (ಯಜುರ್ವೇದ್: 26. 1-2)
ಗೌತಮ್ ಬುದ್ದಾ ಅಶೆಂ ಸಾಂಗ್ತಾ; "ವಚಾ ತುಮಿ ಸರ್ವ್ ರಾಶ್ಟ್ರಾಂಕ್ ಆನಿ ಹಿ ಸುವಾರ್ತಾ ಪರ್ಗಟಾ. ಸಾಂಗಾ ತಾಂಕಾಂ - ದುಬ್ಳಿಂ ಆನಿ ನಿರ್ಗತಿಕಾಂ, ಗ್ರೇಸ್ತಾಂ ಆನಿಂ ಉಂಚ್ಲಿಂ ಸರ್ವ್ ಏಕ್" - ಬುದ್ದ ಧರ್ಮ್ ಚೈನಾ, ಕೊರಿಯಾ, ಜಪಾನ್, ಶ್ರೀ ಲಂಕಾ, ಟಿಬೇಟ್, ಮಯಾನ್ಮಾರ್, ಥಾಯ್ಲ್ಯಾಂಡ್ ತಶೆಂಚ್ ವಿಯೆಟ್ನಾಮ್ ರಾಶ್ಟ್ರಾಂಕ್ ವಿಸ್ತಾರ್ಲೊ.
ಮುಸ್ಲಿಮ್ ಧರ್ಮ್ ಅರಬ್ ರಾಶ್ಟ್ರಾ ಥಾವ್ನ್ ಏಸಿಯಾ ತಶೆಂಚ್ ಆಫ್ರಿಕಾಕ್ ವಿಸ್ತಾರ್ಲೊ.
ಗುರು ಗೋವಿಂದ್ ಸಿಂಘ್ ಮ್ಹಣ್ತಾ; "ಹೆಚ್ಚ್ ಇರಾದ್ಯಾ ಪಾಸೊನ್ ಹಾಂವ್ ಜಲ್ಮಾಲ್ಲೊಂ, ಆನಿ ಹೊ ಧರ್ಮ್ ವಿಸ್ತಾರುಂಕ್ ದೆವಾನ್ ಮ್ಹಾಕಾ ನಮ್ಯಾರ್ಲೊ" - ಸಿಖ್ಖ್ ಧರ್ಮ್ ಭಾರತಾ ಥಾವ್ನ್ ಯುರೋಪ್, ಆಸ್ಟ್ರೇಲಿಯಾಕ್ ತಶೆಂಚ್ ಅಮೆರಿಕಾಕ್ ಸಯ್ತ್ ವಿಸ್ತಾರ್ಲಾ.
ಜರ್ ಹರ್ಯೆಕ್ ಧರ್ಮ್ ಆಪ್ಲ್ಯಾ ಧರ್ಮಾಚೊ ಸಾರ್ ಹೆರಾಂಕ್ ಪರ್ಗಟುಂಕ್ ಉಲೊ ದಿತಾ ತರ್ ಕಶೆಂ ಕೊಣಾಯ್ ಎಕ್ಲ್ಯಾಕ್ ವಾ ದೊಗಾಂಕ್ ಗುನ್ಯಾಂವ್ಕಾರ್ ಕರ್ಚೆಂ?
ಆಮಿಂ ಚರಿತ್ರಾ ಪಳೆಂವ್ಚಿ ನಾಕಾ ತರ್ ಸೊಡ್ಯಾಂ, ತಿ ಆಮ್ಕಾಂ ನಾಕಾ - ಸತಾಕ್ಚ್ ವೆಂಗ್ಯಾಂ. ಪಾಟ್ಲ್ಯಾ ಚಾಳಿಸ್ ವರ್ಸಾಂನಿ ಭಾರತಾಂತ್ಲ್ಯಾ ಕ್ರಿಸ್ತಾಂವ್ ಲೊಕಾಂಚೊ ಸಂಖೊ ಪಳೆಯಾ;
1971 ಇಸ್ವೆಂತ್ ಭಾರತಾಂತ್ಲ್ಯಾ ಕ್ರಿಸ್ತಾಂವಾಚೊ ಸಂಖೊ 2.59%
1981 ಇಸ್ವೆಂತ್ ಭಾರತಾಂತ್ಲ್ಯಾ ಕ್ರಿಸ್ತಾಂವಾಚೊ ಸಂಖೊ 2.43%
1991 ಇಸ್ವೆಂತ್ ಭಾರತಾಂತ್ಲ್ಯಾ ಕ್ರಿಸ್ತಾಂವಾಚೊ ಸಂಖೊ 2.32%
2001 ಇಸ್ವೆಂತ್ ಭಾರತಾಂತ್ಲ್ಯಾ ಕ್ರಿಸ್ತಾಂವಾಚೊ ಸಂಖೊ 2.04%
ತರ್ ಕ್ರಿಸ್ತಾಂವ್ ಮಿಶಿನರಿ ಗರಿಬ್ ಲೊಕಾಕ್ ಕನ್ವಡ್ತರ್ ಕರ್ತಾ ಮ್ಹಳ್ಳ್ಯಾ ಬದ್ನಾಮಾಚೆರ್ ಕಿತ್ಲೆಂ ಸತ್ ಆಸಾ? ಹೊ ಬದ್ನಾಮ್ ಸತ್ ಆಸ್ತೊ ತರ್, ಆಮ್ಚ್ಯಾ ದೇಶಾಚೊ ಕಾಂಯ್ 78% ಚ್ಯಾಕೀ ಚಡಿತ್ ಲೋಕ್ ಗರೀಬ್ ಆಸಾ, ಜೊ ಕ್ರಿಸ್ತಾಂವ್ ಜಾವ್ನ್ ಬದ್ಲತೊ ನ್ಹಯ್?
ಆಜ್ ಸಂಸಾರಾಚ್ಯಾ ಹರ್ಯೆಕಾ ಕೊನ್ಶ್ಯಾಂನಿ ಧರ್ಮ್, ದೇವ್, ಕಾತ್, ಜಾತ್, ಕುಳಿ, ರಂಗ್, ವರ್ಗ್ ಅಶೆಂ ವೆವೆಗ್ಳ್ಯಾ ನಿಭಾಂನಿ ಝಗ್ಡಿಂ ಝುಜಾಂ ಜಾತೇ ಆಸಾತ್. ಸಯ್ರಣ್, ಸೊಸ್ಣಿಕಾಯ್ ಮ್ಹಳ್ಳೆ ಫಕತ್ತ್ ಸಬ್ಧ್ ಜಾವ್ನ್ ಉರ್ಲ್ಯಾತ್ ವಾ ಬುಕಾಂನಿ ಸಯ್ತ್ ಆಪ್ಲೆಂ ಅಸ್ಥಿತ್ವ್ ಹೊಗ್ಡಾಂವ್ಕ್ ಪಾವ್ಲ್ಯಾತ್ ತರ್ ಸವಾಲ್ ಉದೆತಾ ಹೆಂ - ಮನ್ಶ್ಯಾಪಣಾಚ್ಯಾಕೀ ವರ್ತೊ ಧರ್ಮ್?
ಕ್ರಿಸ್ತಾಂವ್ ಮಿಶಿನರಿ ಗರಿಬಾಂಕ್ ವೆವೆಗ್ಳ್ಯಾ ರಿತಿರ್ ಭೆಶ್ಟಾವ್ನ್, ಪುಸ್ಲಾವ್ನ್, ಕನ್ವಡ್ತರ್ ಕರ್ತಾತ್ ಮ್ಹಣೊನ್ ಕೊಣಾಕ್ ಜಿವೊ ಲಾಸ್ಲೊ, ಕೊಣಾಚೆಂ ಘರ್ ಹುಲ್ಪಾಯ್ಲೆಂ, ಇಗರ್ಜ್ಯೊ ಲಾಸ್ಲ್ಯೊ, ಬಾಯ್ಲಾಂ-ಚೆಡ್ವಾಂಚೆರ್ ಸಾಮೂಹಿಕ್ ಅತ್ತ್ಯಾಚಾರ್ ಚಲಯ್ಲೊ, ಪುರ್ಶಾಂವ್ ಕಾಡ್ಲೊ. ಕೊಣಾಚೊ ದೀಸ್ಪಡ್ತೊ ಗ್ರಾಸ್ ನಾಸ್ ಕೆಲೊ. ಸಮಾಜೆಂತ್ ದಣ್ಸತೆಲ್ಯಾಂಕ್, ನಿರ್ಗತಿಕಾಂಕ್ ಹಿಂ ಕ್ರಿಸ್ತಾಂವ್ ಮಿಶಿನರಿಂ ಯೇವ್ನ್ ಕನ್ವಡ್ತರ್ ಕರ್ತಾತ್ ಮ್ಹಳ್ಳೆ ನಾರೆ ಘಾಲ್ತೆಲ್ಯಾಂಚ್ಯಾ ವಾದಾಚೆರ್ ಎಕೊಡೊ ನಿಯಾಳ್ ಕರ್ಯಾಂ. ಏಕ್ ಘಡಿ ಹಾಂವ್ ಹ್ಯಾ ಸಂಸಾರಾಂತ್ ಕಸಲೊಚ್ಚ್ ಧರ್ಮ್ ನಾತ್ಲ್ಲೊಂ ಮ್ಹಣ್ ಚಿಂತಾಂ ಆನಿ ಜರೀ ತರೀ ಮ್ಹಾಕಾ ಆಪ್ಲ್ಯಾ ಧರ್ಮಾಚಿ ವಿಂಚವ್ಣ್ ಕರುಂಕ್ ಪಡ್ತಿ ತರ್ ಮ್ಹಜೆ ಸಮೊರ್ ಆಸ್ಚ್ಯೊ ವಿಂಚವ್ಣ್ಯೊ ಕಸಲ್ಯೊ?
ಘರಾಂ ಭಾಂದುನ್ ದಿತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊ ವಾ ಘರಾಂ ಲಾಸ್ತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊಂ?
ನ್ಹೆಸೊಂಕ್ ಪಾಂಗ್ರುಂಕ್ ದಿತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊಂ ವಾ ವಿಣ್ಗೆಂ ಕರುನ್ ಅತ್ತ್ಯಾಚಾರ್ ಕರ್ನ್ ಪುರ್ಶಾಂವ್ ಕಾಡ್ತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊಂ?
ಕಾಮಾಂ ದಿವಯ್ತೆಲ್ಯಾಂಚ್ಯಾ ಧರ್ಮಾಂಕ್ ವೆಂಗೊಂ ವಾ ದೀಸ್ಪಡ್ತೊ ಗ್ರಾಸ್ ನಾಸ್ ಕರಯ್ತೆಲ್ಯಾಂಚ್ಯಾ ಧರ್ಮಾಂಕ್ ವೆಂಗೊಂ?
ಘಾಯೆಲ್ಲ್ಯಾಂಕ್ ವ್ಹಕಾತ್ ಪುಸ್ತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊಂ ವಾ ಹಾತ್ ಪಾಂಯ್ ಮೊಡ್ತೆಲ್ಯಾಂಚ್ಯಾ ಧರ್ಮಾಂಕ್ ವೆಂಗೊಂ?
ಎಕಾಮೆಕಾಚೊ ಮೋಗ್ ಕರುಂಕ್ ಶಿಕಯ್ತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊಂ ವಾ ಎಕಾಮೆಕಾ ಧ್ವೇಶ್ ಪಾಚಾರ್ತೆಲ್ಯಾಂಚ್ಯಾ ಧರ್ಮಾಂಕ್ ವೆಂಗೊಂ?
ಆವಯ್ ಬಾಪುಯ್ ನಾಸ್ತಾಂ ಅನಾಥ್ ಜಾಲ್ಲ್ಯಾ ಬುರ್ಗ್ಯಾಂಕ್ ವಿಂಚುನ್ ಜಿವಿತ್ ದಿತೆಲ್ಯಾಂಚ್ಯಾ ಧರ್ಮಾಕ್ ವೆಂಗೊ ವಾ ಆವಯ್ ಬಾಪಾಯ್ಕ್ ಜಿವೆಶಿಂ ಮಾರುನ್ ಅನಾಥ್ ಕರ್ತೆಲ್ಯಾಂಚ್ಯಾಂ ಧರ್ಮಾಕ್ ವೆಂಗುಂ?
ಹ್ಯಾ ಸವಾಲಾಂಕ್ ಕೊಶೆಡ್ದ್ ಮ್ಹಳ್ಳೆಂ ಆಸ್ತೆಂ ತರ್ ಹಿಂ ಜವಾಬ್ ದಿತೆಲಿಂ? ಅಸಲ್ಯಾ ಮನ್ಶ್ಯಾಂಕ್ ಆಪ್ಲ್ಯಾ ಧರ್ಮಾಂಕ್ ಆಸ್ತೆಲ್ಯಾಂಚೊ ದೇವ್ ಖರೆಂಪಣಿ ಆಸತ್ ತರ್, ಆಜ್ ತೊ ಸಯ್ತ್ ಲಜೆನ್ ದೊಡೊಂಕ್ ಆಸಾ ಆನಿ ಅಪ್ಲೇಸ್ತಕಿಂ ವಿಚಾರುಂಕ್ ಆಸಾ ’ಹೊ ಕಸಲೊ ಧರ್ಮ್?’.
ಪುಣ್ ಕೊಶೆಡ್ದ್ ಮ್ಹಳ್ಳೆಂ ಆಸ್ಲ್ಲೆಂ ತರ್ ಹ್ಯೊ ಕರ್ನ್ಯೊ ತರ್ಯೀ ಕಶ್ಯೊ ಜಾತ್ಯೊ ನ್ಹಯ್? ಆತಾಂ ಅನ್ಯೇಕ್ ಕರುಂ ತರ್ - ಸಾಂಗ್ ಮ್ಹಾಕಾ, ತುಜೊ ಧರ್ಮ್ ಕಸಲೊ?
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
