ಎಡಿನ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಯೆಯಾ, ಕವಿತಾ ವಾಚುನ್ ಮೊಗಾರ್ ಪಡಾ, ತುಮ್ಕಾಂ ಸರ್ವಾಂಕ್ ಭಾಗಿ ಮೋಗ್ ಕರ್ಣಾರಾಂಚೊ ದಿವಸ್ ಆಮಿಂ ಮಾಗ್ತಾಂವ್

- ಎಡಿನ್ ಜೆ. ಎಫ್. ಡಿ’ಸೋಜ್.

ಕವಿಚಾ ಕಾಳ್ಜಾಚೆಂ ದಾರ್ ಎಕ್‌ಚ್ - ತಾಂತುಂಚ್ ಯೆತಾ ಮೋಗ್ ಆನಿ ತಾಂತುಂಚ್ ಯೆತಾ ವೆಗ್ಳಾಚಾರ್. ಮೋಗ್ ಸರ್ವ್ ಹಾಡುನ್ ಯೆತಾನಾ ವೆಗ್ಳಾಚಾರ್ ಸರ್ವ್ ಲುಟುನ್ ವೆತಾ. ಪುಣ್ ಕಾಳಿಜ್ ಮಾತ್ ಅಜೂನ್ ವೆಗ್ಳಾಚಾರಾಧ್ಲ್ಯಾ ಮೊಗಾಚೊ ನಿಯಾಳ್ ಕರುನ್ ಆಸಾ. ’ಹಾಂವ್ ಕವಿ ನ್ಹಂಯ್’ ಮ್ಹಣ್ಚಾ ಕವಿಕ್ ಜರ್ ಇತ್ಲಿಂ ಬರಿಂ ಉತ್ರಾಂ ಮೆಳ್ತಾತ್ ಆನಿ ಅಪುರ್ಭಾಯೆಚಿಂ ಕವಿತಾ ಘಡ್ತಾತ್, ತರ್ ಕವಿ ಮ್ಹಳ್ಯಾರ್ ಕೊಣ್ ಮ್ಹಳ್ಳೆಂ ಸವಾಲ್ ಅಧುರೆಂಚ್ ಉರ್ತಾ.

ಕಾಳಿಜ್

ಮ್ಹಜ್ಯಾ ಎಕ್ಸುರ್‍ಯಾ ಕಾಳ್ಜಾಕ್
ಎಕ್ ದಾರ್ ಆಸ್‌ಲ್ಲೆ೦ ಆನಿ
ಕೆನ್ನಾಯ್ ತೆ೦
ಉಗ್ತೆ೦ಚ್ ಆಸ್ತಾಲೆ೦, ಸರ್‍ವಾ೦ಕ್

ಉಪ್ರಾ೦ತ್ ಎಕಾ ದಿಸಾ
ಲಾಕೊ೦ ಸಾ೦ಗಾತಾ ಮೋಗ್
ರಿಗ್ಲೊ ಆನಿ ಉಡಿ ಚಡ್ಲ್ಯೊ
ಎಕ್ಸುರ್‌ಪಣ್ ಪೊಳ್ಳೆ೦
ದೂಕ್ ಫಾಸಾಳ್ಳೆ೦
ಫುಲಾ೦ತ್ಲೆ೦ ಮ್ಹೊ೦ವ್ ಹಾ೦ವೆ೦
ಚಾಕ್ಲೆ೦

ಪುಣ್ ಹಾಯ್!
ವೆಗ್ಳಾಚಾರ್ ಆಯ್ಲೊ ತೆಚ್ಚ್
ದಾರಾ೦ತ್ಲ್ಯಾನ್ ಆನಿ
ಘೆವ್ನ್ ಗೆಲೊ ದಿಲ್ಲೆ೦ ಸರ್‍ವ್

ಆನಿ ಆತಾ೦
ಮ್ಹಜೆ೦ ಕಾಳಿಜ್ ಎಕ್ಸುರಾಯೆನ್
ಬ೦ಜರ್ ಭು೦ಯ್ ಜಾಲಾ೦
ವೀಣೆ ಸರಿಯೊ ತಾ೦ಡುನ್
ರಡ್ತಾ ದುಕಾನ್ ತಾಕಾ
ಬಾ೦ದುನ್ ಘಾಲಾ೦
ಮಾತಿ ಖೆಲ್ಲ್ಯಾ ಸಾ೦ಕ್ಳಿ೦ನಿ

- ಆನ್ಸಿ ಪಾಲಡ್ಕಾ

ನಿತಳ್, ನಿಸ್ಕಳ್ ಮೋಗ್ ಆಶೆಲ್ಲ್ಯಾಂಕ್ ಸಂಸಾರಾಂತ್ ಮೆಳ್ಚೊ ಧಗೊಚ್. ಕೊಂಪ್ರಾಚೆರ್ ಮೊಂವ್ ಚಾರವ್ನ್ ಚಾಕಂವ್ಚಿ ವಿಧ್ಯಾ ಜಾಣಾಸ್ಚಾಂನಿ ಹ್ಯಾ ಅಪುಟ್ ಮೋಗಿಕ್ ಕಸಲ್ಯಾ ರಿತಿನ್ ಖೆಳವ್ಯೆತಾ ಮ್ಹಣ್ಚ್ಯಾಕ್ ಹೆಂ ಕವಿತಾ ಗೊವಾಯ್ ದಿತಾ ತರ್‌ಯ್ ಮೊಗಾಚೊ ಲೇಪ್ ಹಾಂತುಂ ಧಾರಾಳ್ ಮಾಪಾನ್ ಆಸ್ಚೊ ದಿಸೊನ್ ಯೆತಾ.

ವಿರಹ್ ಗೀತ್

ರಸಿಕ್ ಉತ್ರಾನ್ ಮ್ಹಾಕಾ ವ್ಹೊಡ್ಲೆಂಯ್
ರುಚಿ ಘೊಸಾ ಪಿಂತ್ರಾಂ ಘಡ್ಲಿಂಯ್
ರಾನಾವನಾ ಗಿತಾಂ ಗುಂತುನ್
ರಿತ್ಯಾ ಹಾತಾನ್ ಪಾಟಿಂ ದಾಡ್ಲೆಂಯ್
ನಾಕಾ ಕವಿ ನಾಕಾ ಮ್ಹಾಕಾ
ತುಜಿ ಕಾವ್ಯಾ ಕೊವ್ಳಿ ನಾಕಾ

ದಿಗಂತಾಚ್ಯಾ ಚಂದ್ರಾಕ್ ಘೆತ್ಲೊಯ್
ದಿಶ್ಟಿ ಕುಡಿರ್ ಮ್ಹಜ್ಯಾ ವೊತ್ಲೊಯ್
ದಸ್ತುರೆಂತ್ಲಿಂ ಪಾಳಾಂ ಉಸ್ತುನ್
ಧಿಕ್ಕಾರಾಚೊ ಸೊವೊ ಘಾತ್ಲೊಯ್
ನಾಕಾ ಕವಿ ನಾಕಾ ಮ್ಹಾಕಾ 
ತುಜಿ ಕಾವ್ಯಾ ಸಾವ್ಳಿ ನಾಕಾ

ವೊಡ್ತಾ ಫುಲಾ ಪಾಕ್ಳಿ ವಿಂಚ್ಲಿಯ್
ವ್ಹಳೂ ಮ್ಹಜ್ಯಾ ವೊಂಟಾರ್ ಖಂಚ್ಲಿಯ್
ವೊವ್ಯಾ ವೇರ್ಸಾ ಯಾದ್ ಫುಟ್ತಾಂ
ವಿಶ್ವಾಸಾಚಿ ವಾಟ್ ಚೆಂಚ್ಲಿಯ್
ನಾಕಾ ಕವಿ ನಾಕಾ ಮ್ಹಾಕಾ
ತುಜಿ ಕಾವ್ಯಾ ಬಾವ್ಲಿ ನಾಕಾ

ಕೊಗ್ಳೆ ತಾಳೊ ಆರಾವ್ನ್ ಘೆತ್ಲೊಯ್
ಕೊವ್ಳಿ ಉಸವ್ನ್ ನೆರಾವ್ನ್ ಗಾಯ್ಲೊಯ್
ಕಾಜಾರಾಚಿ ವೊವ್ಳಿಗ್ ಸಾಂಗುನ್
ಕುಂವರಿಗೆರ್ ಮಿರವ್ನ್ ಗೆಲೊಯ್
ನಾಕಾ ಕವಿ ನಾಕಾ ಮ್ಹಾಕಾ
ತುಜಿ ಕಾವ್ಯಾ ಸಾವ್ಳಿ ನಾಕಾ

ತುಜ್ಯಾ ಮೊಗಾಕ್ ಆಶೆವ್ನ್ ಆಸ್ಲಿಂ
ತುಜೆಚ್ ಖಾತಿರ್ ರಾಕೊನ್ ಬಸ್ಲಿಂ
ತೊಡ್ಪ್ಯಾಯೆದಿ ಕೀಡ್ ಕೆನ್ನಾಂ
ತುಜೆ ಮತಿಂತ್ ಅಶೀಯ್ ಘುಸ್ಲಿ
ನಾಕಾ ಕವಿ ಸಾಂಡಿನಾಕಾ
ಫುಡಾರ್ ಮ್ಹಜೊ ಚಿವ್ಳಿನಾಕಾ

- ಎಡ್ಡಿ ಸಿಕೇರ್, ಖತಾರ್

ದೆವಾನ್ ಮನ್ಶ್ಯಾಕ್ ರಚ್ತಾನಾ ಕಾಳಿಜ್ ದಿಂವ್ಚೆಂ ತರ್ ಫಾತ್ರಾಚೆಂ ಕಾಳಿಜ್ ದಿಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ? ಹೆಂ ಸವಾಲ್ ಸಾದ್ಯಾಂಕ್ ಕರುಂಕ್ ಸಾಧ್ಯ್ ನಾ - ಏಕ್ ಕಲಾಕಾರ್ ಜಾವ್ನಾಸ್ಚಾಂಕ್ ಮಾತ್ರ್ ಕರುಂಕ್ ಸಾಧ್ಯ್.

ಕಾಳಿಜ್ ಫಾತ್ರಾಚೆಂ

ದೆವಾ ದೆವಾ ವಿಚಾರ್‍ತಾಂ ಹಾಂವ್
ತುವೆಂ ಮನ್ಶಾಕ್ ರಚ್ತಾನಾ
ಕಿತ್ಯಾಕ್ ತಾಕಾ ದಿಲೆಂಯ್ ಕಾಳಿಜ್
ಕಾಳಿಜ್ ರಗ್ತಾ ಮಾಸಾಚೆಂ
ಜ್ಯೆಂ ಕಾಳಿಜ್ ಭೆಸಾಂ ಜಾತಾ
ಹಜಾರೊಂ ಪಾವ್ಟಿಂ
ಪುಣ್ ಪರತ್ ಎಕ್ ಜಾತಾ
ಪರತ್ ಭೆಸಾಂ ಜಾಂವ್ಕ್

ಹಾಂವ್ ದೆವಾ ಥಕ್ಲೊಂ, ಸಲ್ವಾಲೊಂ
ದೆಕುನ್ ದೆವಾ ದೆವಾ
ವಿಚಾರ್‍ತಾಂ ಹಾಂವ್
ತುವೆಂ ಮನ್ಶಾಕ್ ರಚ್ತಾನಾ
ಕಿತ್ಯಾಕ್ ದಿಲೆಂನಾಂಯ್ ತಾಕ
ಕಾಳಿಜ್ ಫಾತ್ರಾಚೆಂ
ಜ್ಯೆಂ ಕಾಳಿಜ್
ತರ್ ಭೆಸಾಂ ಜಾತೆಂ
ತ್ಯೆಂ ಕಾಳಿಜ್
ಭೆಸಾಂ ಜಾವ್ನ್ಂಚ್ ಉರ್ತೆಂ

- ಸಿಜ್ಯೆಸ್ ತಾಕೊಡೆ.

ಹ್ಯಾ ಸಂಸಾರಾಂತ್ ತೀನ್ ರಿತಿಚೆ ಪಾದ್ರಿ ಆಸಾತ್; ಹೋಲಿ ಪಾದ್ರಿ, ಜ್ಯೋಲಿ ಪಾದ್ರಿ. ಪುಣ್ ಹೆ ಪೋಲಿಲ್ ಪಾದ್ರಿ ದಿಸಾನ್ ದೀಸ್ ಕಶೆ ಚಡೊನ್ ಗೆಲ್ಯಾತ್ ಮ್ಹಳ್ಳ್ಯಾಚೆರ್ ಹಾಸ್ಯ್ ಕವಿ ಸಿಜ್ಯೆಸ್ ತಾಕೊಡೆ ಅಪುರ್ಭಾಯೆನ್ ಪಿಂತ್ರಾಯ್ತಾನಾ ಖರೆಂಚ್ ಆಂಬೊಟ್ ಖೆಲ್ಲ್ಯಾಂಕ್ ಗಳ್ಯಾಕಡೆ ಲಾಸ್ತೆಲೆಂಚ್.

ಪೋಲಿ ಪಾದ್ರಿ!

ಪಾದ್ರಿಂ ಮಧೆಂ ತೀನ್ಂಚ್ ವರ್ಗ್
ಪಯ್ಲೆ ಆಸಾತ್ - ಹೋಲಿ ಪಾದ್ರಿ
ದುಸ್ರೆ ಥೊಡೆ - ಜ್ಯೋಲಿ ಪಾದ್ರಿ
ತಿಸ್ರೆ ಸಗ್ಳೆ - ಪೋಲಿ ಪಾದ್ರಿ!

ಹೋಲಿ ಪಾದ್ರಿ ಕ್ರಿಸ್ತಾಚೆ ಖರೆ ಯಾಜಕ್
ಜಿವಿತ್ ತಾಂಚೆಂ ಮಾಗ್ಣೆಂ ರಜಾರಾಂಚೆಂ
ಲೊಕಾಚೆ ತೆ ಖರೆಚ್ ಸೆವಕ್
ಕ್ರಿಸ್ತಾಪರಿಂ ಜಿಯೆಂವ್ಕ್ ಪ್ರೇತನ್ ಕರ್ಚೆ

ಜ್ಯೋಲಿ ಪಾದ್ರಿಂಚೆಂ ಜಿವಿತಿಚ್ ಜ್ಯೋಲಿ
ಕಾರಾಂನಿ ಭಂವ್ಚೆಂ, ಬಾರಾಂನಿ ಸೆಂವ್ಚೆಂ
ಲೊಕಾ ಮಧೆಂ ವಾಂಟೆ ಕರ್ಚೆ
ಪೊಲಿಸಾಂಕ್ ದವರ್ನ್ ಮಿಸಾಂ ಭೆಟಂವ್ಚೆ!

ಪೋಲಿ ಪಾದ್ರಿ ಬೊಕ್ರ್ಯಾ ವೆಸಾಚೆ ಬೊಲ್ಪೆ
ತರ್ನ್ಯಾ ಚಲಿಯಾಂಕ್ ಸೊಲುನ್ ಖಾಂವ್ಚೆ
ಕುಮ್ಸಾರಾಂ ಕರ್ಚೆ, ಕೊಯರಾಂ ಗಾಂವ್ಚೆ
ಎಕ್ಸುರ್‍ಯಾ ಬಾಯ್ಲಾಂಕ್ ಗ್ರಾಸುನ್ ಸೊಡ್ಚೆ

ಕರ್ತುಬಾಂ ತಾಂಚಿಂ ಸಾಂಗ್ಚೆಂ ಕಿತೆಂ
ಬಾಯ್ಲಾಂವಿಣೆ ಜಿವಿತ್ ರಿತೆಂ
ನರ್ಸಾಂ, ಮದ್ರಿ, ಟಿಚರಿಂಕ್ ನಾಡ್ತಾತ್
ಕಾಜಾರಿ ಬಾಯ್ಲಾಂಕ್ ಲಾಗಿಂ ವೊಡ್ತಾತ್!

ಕಿತ್ಲೆಶಿಂ ಕುಟ್ಮಾಂ ಪಿಡ್ಡ್ಯಾರ್ ಕೆಲಿಂ
ಹ್ಯಾ ಅನ್ನಾಡಿ ಪೋಲಿ ಪಾದ್ರಿಂನಿ
ಕಿತ್ಲೆಶಿಂ ಘರಾಣಿಂ ಧೆಸ್ವಾಟ್ ಕೆಲಿಂ
ಹಾಂಚ್ಯಾ ತೀನ್ ಕಾಸಾಂಚ್ಯಾ ಬುದಿಂನಿ!

ಗಲ್ಫಾಂತ್ ಘೊಳ್ಚ್ಯಾ ಬಾವ್ಡ್ಯಾ ಘೊವಾಕ್
ಜೊಡ್ಲೆಂ ಆನಿ ಧಾಡ್ಲೆಲಿ
ಗಾಂವಾಂತ್ ಆಸ್ಚ್ಯಾ ಎಕ್ಸುರ್‍ಯಾ ಬಾಯ್ಲಾಂಕ್
ಪೋಲಿ ಪಾದ್ರಿಂನಿ ನಾಡ್ಲೆಂ!

ಥೊಡಿಂ ಬಾಯ್ಲಾಂ ಭುರ್ಗ್ಯಾಂಕ್ ಸೊಡುನ್ 
ಪಾದ್ರಿ ಸಂಗಿಂ ಧಾಂವ್ಲಿಂ
ಹಾತ್ ಧರ್‌ಲ್ಲ್ಯಾ ಘೊವಾಕ್ ಸಾಂಡುನ್
ಸಂಸಾರ್ ಸಗ್ಳೊ ಭಂವ್ಲಿಂ

ದೀಸ್ ರಾತ್ ಫೊನಾಂ ಕರುನ್
ಬಾಯ್ಲಾಂಕ್ ಕಿತ್ಯಾಕ್ ಧೊಸ್ಚೆಂ?
ದಾದ್ಲೆ ನಾತ್‌ಲ್ಲ್ಯಾ ಘರಾಂನಿ ಹಾಣಿಂ
ಘುಟಾನ್ ಕಿತ್ಯಾಕ್ ಭೆಟ್ಚೆಂ?

ಜಿಣಿ ತಾಂಚಿ ಬದ್ಲಿನಾ ತರ್
ಲೋಕ್ ಖಂಡಿತ್ ಉಪ್ರಾಟ್ತಲೊ
ಪೋಲಿ ಪಾದ್ರಿ ಆಮ್ಕಾಂ ನಾಕಾ
ಇಗರ್ಜೆ ಮುಕಾರ್ ಬೊಬಾಟ್ತಲೊ!

ಕಾಜಾರಿ ಬಾಯ್ಲಾಂ ನ್ಹಂಯ್ ತರ್
ಆಂಕ್ವಾರ್ ಚೆಡ್ವಾಂ ಮೆಳಾನಾಂತ್?
ಹರ್ಧ್ಯಾರ್ ಊಬ್ ಆಸಾ ತರ್
ಲಗ್ನಾಂತ್ ಕಿತ್ಯಾಕ್ ಎಕ್ವಟ್ನಾಂತ್?

ದೆವಾನ್ ಜೊಡಿಲಾಂ ತೆಂ ಮನಿಸ್ ಮೊಡಿನಾ ಜಾಂವ್
ಬೈಬಲಾಂತ್ಲಿಂ ಉತ್ರಾಂ ವಿಂಚ್ಣಾರ್ ಉತ್ರಾಂ
ಪೋಲಿ ಪಾದ್ರಿ ವೆಗ್ಳಾಚಾರ್ ಕರ್ತಾತ್ ತರಿ
ಕೊಣಾಕ್ ಲಾಗು ಹಿಂ ಸೂತ್ರಾಂ?

ದೆವಾಕ್ ಆನಿ ಮನ್ಶ್ಯಾಂಕ್ ಫಟಂವ್ಕ್
ಹ್ಯಾ ಕಪಟಿ ಪಾದ್ರಿಂಕ್ ಧಿಕ್ಕಾರ್
ಗೊಮ್ಟ್ಯಾಕ್ ತಾಂಚ್ಯಾ ಪಾಸ್ ಬಿಗ್ದಿನಾ ತರ್
ಆಡಾಂವ್ಚೆ ಕಶೆ ವೆಗ್ಳಾಚಾರ್?

ತಾಂಚಿ ಝಡ್ತಿ ಆಮಿ ಕರ್ಚಿ ನ್ಹಂಯ್
ತರ್ ಆನಿ ಕೊಣೆ ಕರ್ಚಿ?
ಲೋಬ್ ತಾಂಚೊ ನಿಕ್ಳಾವ್ನ್ ತಾಂಕಾಂ
ವಾಗೊಳ್ಯಾ ಶಿಮ್ಟೆನ್ ನ್ಹಂಯ್ ಮಾರ್ಚಿ?

ಪೋಲಿ ಪಾದ್ರಿಂಕ್ ಧಾಂವ್ಡಾಯ್ನಾಂತ್ ತರ್
ಕ್ರಿಸ್ತಾಂವ್ ಸಮೊಡ್ತ್ ಕಾಬಾರ್
ಅಸಲಿಂ ಸ್ಕಾಂದಲಾಂ ಆಡಾಂವ್ಚೆ ಖಾತಿರ್
ಜಾಯ್ಜೆ ತಾಣಿಂ ಕಾಜಾರ್!

ಹೋಲಿ ಪಾದ್ರಿಂಕ್ ಆಮ್ಚೊ ಲೋಕ್
ಕೆನ್ನಾಂಯ್ ಮಾನ್ ಬಾಗಾಯ್ತಾ
ತಾಂಚೆಪರಿ ಸದಾಂ ಜಿಯೆಂವ್ಕ್
ಖಂಡಿತ್ ಪ್ರೇತನ್ ಕರ್ತಾ

ಜ್ಯೋಲಿ ಪಾದ್ರಿಯ್ ಬರೆ ಆಸಾತ್
ಪುಣ್ ಖಂಯ್‌ಗೀ ಚುಕೊನ್ ಪಡ್ಲ್ಯಾತ್
ಕ್ರಿಸ್ತಾಚೊ ತಾಣಿ ಆಧಾರ್ ಮಾಗ್ಲ್ಯಾರ್
ತಾಣಿಂಯ್ ಖಂಡಿತ್ ಹೋಲಿ ಜಾವ್ಯೆತ್

ಪುಣ್ ಪೋಲಿ ಪಾದ್ರಿಂಕ್ ಮಾತ್ರ್
ಲೋಕ್ ಕೆನ್ನಾಂಯ್ ಭೊಗ್ಸಿನಾ
ಕಪಟಿ ಜಿಣಿ ಜಿಯೆಂವ್ಚ್ಯಾ ತಾಂಕಾಂ
ಸರ್ಗಾ ರಾಜ್‌ಯೀ ಮೆಳ್ಚೆಂನಾ!

- ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್.

ಅಪ್ಲ್ಯಾ ಸುರುಪಾಯೆಚೊ ಜಾವ್ನ್ ರಚ್‌ಲ್ಲ್ಯಾ ಮನ್ಶ್ಯಾಕ್ ಜೀಣ್‌ಭರ್ ದಿಸಾನಾ, ಉಲಯ್ನಾಸ್ಚಾ ದೆವಾಕ್ ’ಮ್ಹಜೊ ಗುನ್ಯಾಂವ್ ಕಸಲೊ?’ ಮ್ಹಳ್ಳೆಂ ಸವಾಲ್ ವಿಚಾರ್ಚಿ ತಾಂಕ್ ಎಕಾ ಕವಿಕ್ ಶಿವಾಯ್ ಅನಿ ಕೊಣಾಕ್ ಆಸೊಂಕ್ ಸಾಧ್ಯ್ ಆಸಾ?

- ಹ್ಯಾ ಕವಿತೆಚಾ ಇಂಗ್ಲಿಶ್ ಅಣ್ಕಾರಾಕ್ ಅಂತರ್‌ರಾಷ್ಟ್ರೀಯ್ ಲೈಬ್ರೆರಿ ಆಫ್ ಪೋಯೆಟ್ಸ್ ಥಾವ್ನ್ 2006 ವರ್ಸಾಚಿ ಎಡಿಟರ್ಸ್ ಚೋಯ್ಸ್ ಪ್ರಶಸ್ಥಿ ಲಾಭ್ಲ್ಯಾ.

ಗುನ್ಯಾಂವ್ ಕೊಣಾಚೊ

ಭಕ್ತ್ ಮ್ಹಜಿ 
ಶಕ್ತಿ ತುಜಿ
ಚರಣಿಂ ತುಜ್ಯಾ
ಪಾವ್ಲಾಂ!

ಮಾಗ್ತಾಂ ಆತಾಂ,
ರಾಕ್ತಾಂ ಸದಾಂ
ಧರಣಿಂ ತುಜ್ಯಾ
ರಾವ್ಲಾಂ!

ರಚ್‌ಲ್ಲ್ಯಾ ಮ್ಹಾಕಾ
ಪೊಸ್‌ಲ್ಲ್ಯಾ ದಾತಾರಾ
ಅಪ್ರಾದ್ ಕಸ್ಲೊ
ತುಜೊ?

ಹಾಸನಾಂಯ್ ಮ್ಹಾಕಾ
ದಿಸನಾಂಯ್ ಕಿತ್ಯಾಕ್?
ದಾಕಯ್ (ತರೀ) ಗುನ್ಯಾಂವ್
ಮ್ಹಜೊ!

- ಮೆಲ್ವಿನ್ ಜೆ. ವಾಸ್, ಕೆಲರಾಯ್.

ದೊಳ್ಯಾಂಚಾ ಆಸ್ಡ್ಯಾಂನಿ ಸ್ವಪ್ಣಾಂ ಖಿರ್ಲೊನ್ ಯೆತಾನಾ ಆಸ್ಚೊ ಮಧುರ್ ಅನ್ಭೋಗ್ ತಿಂ ಸ್ವಪ್ಣಾಂ ಹಕೀಗತ್ ಜಾಯ್ನಾಸ್ತಾನಾ ಬಾವೊನ್ ವೆತಾನಾ ಕಸಲಿಂ ದುಖಾಂಚಿ ಝರ್ ಉದೆತಾ ಪಳೆಯಾ.

ಹಾಂವ್ ಆನಿ ತುಂ

ಮ್ಹಜ್ಯಾ ಯೆಣ್ಯಾಕ್ ರಾಕೊನ್ ರಾವ್ಲೆಲ್ಯಾ ತುಜ್ಯಾ ದೊಳ್ಯಾಂ ಲ್ಹಾರಾಂನಿ
ಉಪ್ಯೆವ್ನ್ ಯೆಂವ್ಚ್ಯಾ ತ್ಯಾ ಸಪ್ಣಾಂಚೆಂ ಹೆಂ ಗಾಯನ್ ಕಸಲೆಂ
ಝಳ್ಚ್ಯಾ ದಿವ್ಯಾಕ್ ಅಶೆವ್ನ್ ರಾವ್ಲೆಲ್ಯಾ ಆಮ್ಚ್ಯಾ ರಾತಿಚಾ ಪಾಲ್ವಾಂತ್
ವ್ಹಳೂ ವ್ಹಳೂ ಚರೊನ್ ಯೆಂವ್ಚ್ಯಾ ತ್ಯಾ ಭಗ್ಣಾಂಚಿಂ ಉತ್ರಾಂ ಕಸಲಿಂ

ತುಜ್ಯಾ ಕೆಸಾಂ ಪಂದ್ಲ್ಯಾ ಸಾವ್ಳೆಂತ್ ಮ್ಹಜಿಂ ಸಪ್ಣಾಂ ಹಿಂದ್ಳ್ಯಾರ್ ಧಲ್ತಾತ್
ತುಜ್ಯಾ ಆಸ್ಡ್ಯಾಂ ಉಸ್ಕ್ಯಾರ್ ಮ್ಹಜಿ ಭಗ್ಣಾಂ ವಿಶೆವಾಕ್ ವೆಂಗ್ತಾತ್

ಕಪಾಲಾ ತಿಳೊ ದೊಳೆ ದಾಂಪ್ತಾಂ ದಾಪ್ತಾಂ ತುಜ್ಯಾ ಆಸ್ಡೆ ಮುಳಾಂತ್
ಕಿರ್ಲೊನ್ ಆಯಿಲ್ಲಿ ಉಭಾಳ್ ಝರ್ ಇತ್ಲಿ ಊಬ್ ಕಶಿ
ಆಳ್ಶಿ ರಾತ್ ಪಾಲೊಂವ್ ಉಭಯ್ತಾಂ ಉಭಯ್ತಾಂ ದಿಶ್ಟಿ ಪಾಕ್ಳ್ಯಾಂನಿ
ಸೊಭೊನ್ ರಾವ್ಲೆಲ್ಯಾ ಫಾಂತ್ಯಾ ಮೊತಿಯಾಂನಿ ಇತ್ಲಿ ಖಾರ್‍ಸಾಣ್ ಕಶಿ

ತುಜ್ಯಾ ಹಾತಾ ತಾಳುವೆರ್ ಮ್ಹಜೆಂ ಬಿಡಾರ್ ಚಾನ್ನ್ಯಾಂತ್ ಫುಲ್ತಾ
ತುಜ್ಯಾ ಪಾಲ್ವಾ ಮೊಳಾಬಾರ್ ಮ್ಹಜೆಂ ನಾಂವ್ ತಾರಾಂ ಮಧೆಂ ಹಾಸ್ತಾ

ಆಜ್ ಹಾಂವ್ ಹಾಂಗಾ ದೊಳೆ ದಾಂಪ್ತಾಂ ತುಂ ಥಂಯ್ ತಿಳೊ ಲಾಯ್
ತ್ಯಾ ಕುಶಿನ್ ಥಾವ್ನ್ ವ್ಹಾಳೊನ್ ಯೆಂವ್ಚ್ಯಾ ವಾರ್‍ಯಾ ಉಭೆಕ್ ಹಾಂವ್ ಭುಜಯ್ತಾಂ
ಹ್ಯಾ ಕುಶಿನ್ ಥಾವ್ನ್ ವ್ಹಾಳೊನ್ ವೆಚ್ಯಾ ವಾರ್‍ಯಾ ಉಭೆಕ್ ತುಂ ವೆಂಗೆಂತ್ ಘೆ

- ಫ್ರಾನ್ಸಿ ಪಿರೇರಾ, ಯು.ಕೆ.

ಮೋಗ್ ಕರ್ಣಾರಾಂಚಾ ದಿಸಾ ಸಗ್ಳ್ಯಾಂಕ್ ಕಾಳ್ಜಾಂತ್ ದೂಕ್ ತರ್ ಹ್ಯಾ ಕವಿಕ್ ಪೊಟಾಂತ್ ದೂಕ್ - ಪುಣ್ ಹ್ಯಾ ದುಖಿಕ್ ಕಸಲೆಂ ವ್ಹಕಾತ್ ಬರೆಂ ಕರುಂಕ್ ಸಕ್ತಾ ಮ್ಹಳ್ಳೆಂ ತುಮಿಂಚ್ ವಾಚುನ್ ಪಾರ್ಕಿಯಾ.

ಪೊಟಾ ದುಃಖಿಕ್ ವ್ಹಕಾತ್

ಸಭಾರ್ ದಿಸಾಂ ಥಾವ್ನ್ ಮ್ಹಾಕಾ ಪೊಟಾಂತ್ ದೂಃಖ್ ಆಸ್ಲಿ,
ದಾಕ್ತೆರಾಂಕ್ ಮೆಳೊನ್ ಹಾಂವೆಂ ವ್ಹಕ್ತಾಂ ಕರಯ್ಲಿಂ.
ದಿಲ್ಲಿಂ ವ್ಹಖ್ತಾಂ ಕೆಲಿಂ ತರ್‌ಯಿ ದೂಃಖ್ ರಾವ್ಲಿನಾ,
ಪೊಟಾಂತ್ ಮುಡ್ಡುನ್ ದೂಃಖ್ ಯೆತಾ, ಸೊಸುಂಕ್ ತಾಂಕಾನಾ.

ಹಾಯ್ ದೆವಾ ಕಿತೆಂ ಕರ್‍ಚೆಂ ಮ್ಹಣ್ ಚಿಂತುನ್ ಬೊಸ್ತಾನಾ,
ಉಗ್ಡಾಸ್ ಆಯ್ಲೊ ವ್ಹಡ್ಲಿ ಮಾಂಯ್ಚೊ, ಪೋಟ್ ದುಃಖ್ತಾನಾ.
ಗರ್ಜ್ಡೆ, ಕಿರಾತ್ಯಾಚೊ ಕಸಾಯಿ ಪಿಯೆ ಮ್ಹಣ್ ತಿಣೆಂ ಸಾಂಗ್ತಾನಾ,
ಆತಾಂ ಇಂಗ್ಲೆಂಡಾಂತ್ ಗರ್ಜ್ಡೆ ಸೊಧ್ಚೆ ಖೈಂ ಮ್ಹಾಕಾ ಸಮ್ಜಾನಾ.

ಗಾಂವ್ಚ್ಯಾ ಇಶ್ಟಾಕ್ ಮ್ಹಜ್ಯಾ ಫೊನ್ ಕರ್‍ನ್ ವಿಷಯ್ ಸಾಂಗ್ತಾನಾ
ಮ್ಹಣ್ತಾ ತೊ ಆಂಯ್ಡೆ ಘಾಲ್ಯಾತ್ ಕೊಣೆಂಗಿ ಹಾಂವೆಂ ಜೆವ್ತಾನಾ.
ದೀಷ್ಟ್ ಕಾಡ್ ಪೊಟಾಚಿ ಮ್ಹಣ್ ತಾಣೆಂ ಸಲ್ಹಾ ದಿತಾನಾ,
ಪೊಟಾ ದುಃಖೆನ್ ಮ್ಹಾಕಾ ಸಾಯ್ಬಾ ಹಾಸೊಂಕ್ ತಾಂಕ್ಲೆಂನಾ.

ಫುಗ್ಗ್ಯಾಬರಿ ಮ್ಹಜೆಂ ಪೊಟ್ ವಾಡೊನ್ ಯೆತಾನಾ,
ಚಿಂತ್ಲೆಂ ಹಾಂವೆಂ ಫುಟ್ತಾ ಪೊಟ್ ಭಿರಾಂತ್ ಜಾತಾನಾ.
ಆಲೆಂ ಆನಿಂ ಮಿಟಾಚೊ ರೋಸ್ ಪಿಯೆತಾನಾ,
ಖಳ್ನ್ಯೊ ಯೆತಾತ್ ತರ್‌ಯಿ ಮ್ಹಜೆಂ ಪೋಟ್ ದೆವಾನಾ.

ದುಕಾನಾ ಥಾವ್ನ್ ಸಾಮಾನ್ ಘೆವ್ನ್ ಹಾಂವ್ ಪಾಟಿಂ ಯೆತಾನಾ,
ಮುಖಾರ್ ಮೆಳ್ಳಿ ಏಕ್ ಗರ್‍ಬೆಸ್ತ್ ಸ್ತ್ರಿ ಹಾಂವ್ ಮೆಟಾಂ ದೆಂವ್ತಾನಾ
ಏಕಾ ಮೆಕಾಚೆಂ ಪೊಟ್ ಹಾಂವೆಂ ಸಾರ್‍ಕೆಂ ದೆಖ್ತಾನಾ,
ಶೆರ್‍ಮೆಲೊಂ ಭಾವಾ ಹಾಂವ್ ತೆಂ ಮತಿಂತ್ ಚಿಂತಾನಾ.

ಆಲೆಂ, ಮಿರಿಂ, ಜಿರೆಂ, ಪುರಾ ಹಾಂವೆಂ ಸೆಂವ್ಲೆಂ,
ಖಂಚೆಯಿಂ ಉಪ್ಕಾರಾಕ್‌ಚ್ಚ್ ಪಡಾನಾ ಜಾಲೆಂ.
ವರ್‍ಸಾಂ ಪಯ್ಲೆಂ ಇಷ್ಟಾನ್ ಮ್ಹಜ್ಯಾ ಸಾಂಗ್‌ಲ್ಲೆಂ ಮತಿಕ್ ಆಯ್ಲೆಂ,
ಉಪಾಯ್ ಕೆಲೊ ಹಾಂವೆಂ ಆನಿಂ ಪೊಟಾ ದೂಃಖ್ ರಾವಯ್ಲೆಂ.

ಕಾಮಾಕ್ ಮ್ಹಜ್ಯಾ ದೋನ್ ದಿಸಾಂಚಿ ಸುಟಿ ಘಾಲಿ,
ಸಕಾಳಿಂ ಥಾವ್ನ್ ಚ್ಯಾಚಾರ್ ಕ್ಯಾನಾಂ ಬಿಯೆರ್ ಚಡಯ್ಲಿ.
ಕಾಂಟ್ಯಾನ್ ಕಾಂಟೊ ಹಾಂವೆಂಯಿ ಕಾಡ್ಲೊ ಸಂತೊಸಾನ್
ದುಸ್ರ್ಯಾ ದಿಸಾ ಪೊಟಾ ದೂಃಖ್ ತಕ್ಷಣ್ ರಾವ್ಲಿ.

ಕವಿತಾಝರ್ ಪಾನಾಕ್

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications