ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಏಕ್ ಫೊಡ್ ದುಕ್ರಾಮಾಸ್
ಕ್ಯಾಥರಿನ್ ರೊಡ್ರಿಗಸ್: ಕೊಂಕ್ಣಿ ತಶೆಂಚ್ ತುಳು ಭಾಸೆಚಾ ಸಾಹಿತ್ಯಾಂತ್ ಫಾಮಾದ್ ಜಾಲ್ಲಿ ಕ್ಯಾಥರಿನ್ ಏಕ್ ಸಮಾಜ್ ಸೆವಕಿ ಮಾತ್ರ್ ನ್ಹಂಯ್, ಸಾದ್ಯಾ ಲೊಕಾಂಚಾ ಕಾಳ್ಜಾಚಾ ಎಕೆಕಾ ಉಡಿಯೆಕ್ ಲಾಗ್ಸಿಲ್ಯಾನ್ ಪಾರ್ಕಿಲ್ಲಿ ಜಾವ್ನಾಸಾ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಹಾಂತುಂ ಹಿಚಾ ’ಚರುವೊ’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಹಿಚ್ಯಾ ’ಕೇಲ್ ಅಮ್ಮಾ’ ಕಾಣ್ಯೆಕ್ ವೊರಾಯ್ಣಾರಾಂಚೆಂ ಇನಾಮ್ ಲಾಭ್ಲಾಂ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಹಾಂತುಂ 2000 ರುಪ್ಯಾಂಚೆಂ ತಿಸ್ರೆಂ ಇನಾಮ್ ಜೊಡ್ಲೆಲಿ ಕಾಣಿ]
ಕ್ಯಾಥರಿನ್ ರೊಡ್ರಿಗಸ್
ಪೊಡ್ದೊ..... ಮ್ಹಾಕಾ ಸಮ್ಜಾನಾತ್ಲಿ ಭಾಸ್. ಭೊಂವಾರಿ ಭುರ್ಖಾ ನ್ಹೆಸ್ಲ್ಲ್ಯೊ ಸ್ತ್ರೀಯೊ. ತಾಂ ಗಾಲ್ಲೆಂ ಫರ್ಪ್ಯೂಮ್, ಘಾಮ್. ಕೆದಾಳಾಗೀ ಉದಾಕ್ ಆನಿ ಸಾಬು ಪಳಯಿಲ್ಲಿ ಮುಸ್ತಾಯ್ಕಿ. ವೊರಾಡೊ ಯೆತಾಲೊ. ಗಳೊ ಹಾತ್ ಭರ್ ಭಾಂಗಾರ್. ಭಿತರ್ ನ್ಹೆಸ್ಲ್ಲ್ಯಾ ಕಾಪ್ಡಾಕ್ ವಾ ಗಾಗ್ರ್ಯಾಕ್ ದಾಟ್ಲ್ಲೊ ಚಿಕೊಲ್. ಅಬ್ಬಾ! ಏಕ್ ಪಾವ್ಟಿಂ ಬಾಯ್ರ್ ವಚೊನ್ ವಾಳ್ಚೆಂ ವಾರೆಂ ಸೆವ್ಯಾಂ ಮ್ಹಳ್ಳಿ ಆಶಾ. ಪುಣ್ ದಿಸಾನಾತ್ಲ್ಲ್ಯಾ ಪಿಂಜ್ರ್ಯಾ ಭಿತರ್ ಶಿರ್ಕಾಲ್ಲಿ ಶೆಳಿ ಹಾಂವ್. ತಿತ್ಲ್ಯಾರ್....
’ಶಹಾದಾತ್ ಕಲೀಮ’ ಮೌಲ್ವಿಚ್ಯಾ ಗರ್ಗರ್ಯಾ ತಾಳ್ಯಾ ಥಾವ್ನ್ ವಾಳ್ಳೆ. ’ಅಶ್ಹದು ಅಲ್ಲಾ ಇಲಾಹ ಇಲ್ಲಲ್ಲಾಹು ವ ಅಶ್ಹದು ಅನ್ನ ಮುಂತದರಸೂಲುಲ್ಲಾ’ [ಅಲ್ಲಾಹ್ ಸೊಡುನ್ ದುಸ್ರೊ ದೇವ್ ನಾ. ಮಹಮ್ಮದ್ ಪೈಗಂಬರ್ ಅಲ್ಲಾಹುನ್ ಧಾಡ್ಲ್ಲೊ ಮನಿಸ್ ಮ್ಹಳ್ಳೆಂ ಹಾಂವ್ ಮ್ಹಜ್ಯಾ ಮನಾಂತ್ ಥಿರ್ ಕರುನ್ ಹೆಂ ಉಚಾರ್ತಾಂ ಆನಿ ಮುಕಾರ್ ಮ್ಹಜೊ ಧರ್ಮ್ ಹೊ ಮ್ಹಣೊನ್ ಮಾನುನ್ ಘೆತಾಂ] ಹೆಂ ಮ್ಹಜ್ಯಾ ತೊಂಡಾಂತ್ಲೆಂ ಹಾಡ್ತಾನಾ ಮ್ಹಾಕಾ ತಾಚೊ ಅರ್ಥ್ ಕಳೊಂಕ್ ನಾ. ’ದುಲ್ಹಾನ್ ಕಾ ವೊಡ್ನಿ’ ಮಾತೆಂಗೊಳ್ ಹಾಸ್ತಾಲಿ. ಹುನ್ ರಗಾತ್ ಮ್ಹಾಕಾ ಕಿತೆಂ ಕರುಂಕ್ ಸಕ್ಲ್ಲೆಂ ಮ್ಹಳ್ಳೆಂ ಸತ್ ಸಮ್ಜಾತಾನಾ.....? ಮ್ಹಜ್ಯಾ ಜಿವಿತಾಚೆಂ ಬಿಡಾರ್ ಧರ್ಣಿ ಸಮಾ ಜಾಲ್ಲೆಂ.
************
ಮ್ಹಜ್ಯಾ ಮಮ್ಮಿ ಡ್ಯಾಡಿನ್ ಮ್ಹಾಕಾ ಕಿತ್ಲೆಂ ಸಮ್ಜಾಯಿಲ್ಲೆಂ ನಾಕಾಗೊ ಪುತಾ ರೈನಾ ಘರ್ ಸೊಡುನ್ ವಚಾನಾಕಾ. ತುಂ ಆಮ್ಚೆಂ ಎಕ್ಚ್ ಬಾಳ್. ದುದಾ ತುಫಾನ್ ತುಕಾ ವಾಗಯ್ಲಾಂ ಪುತಾ. ತುವೆಂ ವಾಗಾಚೆಂ ದೂದ್ ಜಾಯ್ ಮ್ಹಳ್ಯಾರ್ಯ್ ತುಕಾ ಹಾಡ್ದುನ್ ದಿಲಾಂ. ಆತಾಂ ತುಕಾ ಪಾಕಾಟೆ ಆಯ್ಲೆ. ಬೋಂಚ್ ಆಯ್ಲಿ ಖಾಂವ್ಕ್ ದೆಕುನ್ ಪಾಟಿಂ ಫುಡೆಂ ಚಿಂತಿನಾಸ್ತಾನಾ ಉಭೊಂಕ್ ಆಶೆನಾಕಾ. ತುಕಾ ಆಮಿ ಜೊಕ್ತೊ ಚಲೊ ಪಳವ್ನ್ ಕಾಜಾರ್ ಕರಿನಾಂವ್ಗೀ? ಬರ್ಯಾಂತ್ಲೊ ಬರೊ ನೊವ್ರೊ ತುಕಾ ತುಜ್ಯಾ ಪಪ್ಪಾನ್ ವಿಂಚ್ಲಾ. ನಾಕಾ ಪುತಾ ಆಡ್ವಾರ್ಲೆಲೆಂ ಫಳ್ ಖಾಂವ್ಕ್ ಅರ್ಗಾಂಟ್ ಧರಿನಾ" ತಿ ಆಪ್ಲಿ ಭಗ್ಣಾ ಸಾಂಗ್ತಾನಾ ಫಾತ್ರೆಲ್ಲೆಂ ಕಾಳಿಜ್ ಮ್ಹಜೆಂ ಕುಸ್ಕುಟ್ ಮೊವಾಳುಂಕ್ ನಾ.
ಹಂಕಾರಾನ್ ಹಟ್ಟಾನ್ ಆನಿ ಜಿದ್ದಾನ್ ಅಬ್ಬಾಸ ಸಂಗಿಂ ಮಜಾ ಮಾರ್ತಾನಾ ಕಿತ್ಲ್ಯಾ ಜಣಾಂನಿ ಮ್ಹಾಕಾ ಬೂದ್ ಸಾಂಗ್ಲ್ಲಿ. ದೊಳ್ಯಾಂಕ್ಯ್ ಚರ್ಬೆಚಿಂ ಖೊವ್ಳಾಂ, ಕಾನಾಂಕೀ ಪ್ರಾಯೆಚಿ ಆಡಿ ಬಸ್ತಾನಾ ಕಿತೆಂಯ್ ಮ್ಹಾಕಾ ಕಳ್ಳೆಂಚ್ ನಾ.
ಮೀನಾನ್ ಮ್ಹಾಕಾ ಕಿತ್ಲೆ ಸಮ್ಜಾಯ್ಲೆಂ "ರೈನಾ..... ತುಕಾ ದುಕ್ರಾ ಮಾಸ್ ಮ್ಹಳ್ಯಾರ್ ತುಂ ಮೆಲ್ಲೆಂ ಜೀವ್ ಜಾತಾಯ್. ತೊ ತುಕಾ ಖಾಂವ್ಕ್ ದೀತ್ಗೀ? ತುಂ ಮೋಡರ್ನ್ ಚಿಂತ್ಪಾಚೆಂ. ತುಜೆಂ ಹೆಂ ಆಧುನಿಕ್ ನ್ಹೆಸಾಣ್ ತುಕಾ ಸಪ್ಣಾಂತ್ಯ್ ಘಾಲುಂಕ್ ಆಡ್ವಾರ್ತಾ ಪಳೆ. ಉಗ್ತೆ ತುಜ್ಯಾ ಭರ್ಲ್ಲ್ಯಾ ವಿಶ್ವ್ಯಾಂಕ್ಯ್ ಆನಿ ತುಜ್ಯಾ ಗ್ರೇಸ್ತ್ ಕಾಯೆಕ್ ತೊ ಬುಲ್ಲಾ. ತುಂ ಏಕ್ ಪಾವ್ಟಿಂ ತಾಚ್ಯಾ ಮುಟಿಂತ್ ಮೆಳ್ಶಿ ಉಪ್ರಾಂತ್ ತೊ ತುಕಾ ಕಾಳ್ಯಾ ಬುರ್ಖಾ ಭಿತರ್ ಪಿಚಾರ್ ಕರ್ತಲೊ. ಉಡಾಸ್ ಆಸೊಂ"
ಹಾಂವ್ ತೆಂ ಆಯ್ಕೊನ್ ಪೋಟ್ಭರ್ ಹಾಸ್ಲ್ಲಿಂ. "ಅರೆ ಗದ್ದಾ ಆಮ್ಚೆ ಮಧೆಂ ಖರಾರ್ ಜಾಲಾಂ. ಹಾಂವ್ ಮ್ಹಾಕಾ ಜಾಯ್ ತಶೆಂ ಜಿಯೆತಾಂ. ತೊ ತಾಕಾ ಬರೆಂ ದಿಸ್ತಾ ತಶೆಂ. ಆಬ್ಬಾಸ್ ಮೋಗ್ ಕರ್ತಾ ಮ್ಹಜ್ಯಾ ಗುಣಾಂಕ್,ಸೊಭಾಯೆಕ್ ಆನಿ ಸೋಶಿಯಲ್ ನೇಚರಾಕ್. ಮ್ಹಾಕಾ ಬರೆಂ ತೆಂ ಹಾವೆಂ ಖಾವ್ಯೆತ್. ತಾಕಾ ಜಾಯ್ ತಾಣೆ. ತಾಚೊ ಧರ್ಮ್ ತಾಕಾ ಮ್ಹಜೊ ಧರ್ಮ್ ಮ್ಹಾಕಾ."
ಹಾವೆಂ ಲಟ್ಟೆ ಸೊಡ್ತಾನಾ "ಜಾಯ್ತ್ ರೈನಾ ಕೆಲ್ಲೆಂ ಖಾ. ವಾಟ್ಲ್ಲೆಂ ಪಿಯೆ. ಮ್ಹಕಾ ಕಿತೆಂ ಕಶ್ಟ್?" ತೆಂ ಪಾಟ್ ಘಾಲುನ್ ವೆತಾನಾ ಹಾಂವ್ ಹಾಸ್ಲ್ಲಿಂ.
***********
ಶಹಬಾತ್ ಕಲೀಮ ಆಖೇರ್ ಜಾಲೆಂ. ಮ್ಹಾಕಾ ನಾಪೊ ಕುಲಿಕುಡೊ [ನವೆಂ ನಾಂವ್] ಜಾವ್ನ್ ಇಸಾಯಿ ನಾಂವ್ ಕಾಡುನ್ ಫಾತಿಮಾ ಮ್ಹಳ್ಳೆಂ ನವೆಂ ನಾಂವ್ ದಿತಾನಾ ಮ್ಹಾಕಾ ಕಿತೆಂಗೀ ಎಕಾ ರಿತಿಚಿ ಕಾವ್ಜೆಣಿ ಭೊಗ್ಲ್ಲಿ.
ಆಜ್ ಪರತ್ ಮ್ಹಾಕಾ ಸೊಭಯ್ಲೆಂ. ಗೂಂಗ್ಹಾಟ್ ಘಾಲೆಂ. ಧವ್ಯಾ ಪಡ್ದ್ಯಾ ಪಾಟ್ಲ್ಯಾನ್ ಬಸಯ್ಲೆಂ. ಅಬ್ಬಾಸ್ ಸಾಂಗ್ತಾಲೊ ಆಜ್ ಆಮ್ಚೆಂ ನಿಖಾ! ದೆಕುನ್ ಎಕ್ಲೊ ರೆಡಿಮೇಡ್ ಬಾಪ್ಲೊ ಜಲ್ಮಾಲೊ. ಅಬ್ಬಾಸ ಸಂಗಿಂ ಮ್ಹಜ್ಯಾ ನವ್ಯಾ ಜನಿತ್ ಬಾಪ್ಲ್ಯಾಕ್ ನಿಖಾ. ಮೌಲ್ವಿ ವ್ಹಡ್ಲ್ಯಾನ್ ಬಿಸ್ಮಿಲ್ಲಾಹಿ ವಲ್ಹಂದುಲ್ಲ್ಲಾ.... ಆಶೆಂ ನಿಖಾಚೆಂ ಪ್ರಾರ್ಥನ್ಕರುನ್ ಮ್ಹಜೆಂ ನಾಂವ್ ಕಾಡುನ್ [ನವೆ] ಕಬೂಲ್ ಹೇ ಮ್ಹಣೊನ್ ತೀನ್ ಪಾವ್ಟಿಂ ವಿಚಾರ್ತಾನಾ ತಾಣೆ ಕಬೂಲ್ ಮ್ಹಣ್ತಾನಾ ಹಾಂವ್ ಕುತ್ತ್ ಕರುನ್ ಹಾಸ್ಲ್ಲಿಂ. ಉಪ್ರಾಂತ್ ಹಾಂವೆಯ್ ತಶೆಂಚ್ ತೀನ್ ಪಾವ್ಟಿಂ ಕಬೂಲ್ ಮ್ಹಳ್ಳೆಂಚ್ ನಿಖಾ ಸಂಪ್ಲೆಂ.
ಪುಣ್.... ಹೆಂ ಕಸಲೆಂ ನಿಖಾ!? ಆಮ್ಚೆಂ ಕಾಜಾರ್ ಸ ಮಹಿನ್ಯಾಂ ಆದಿಂ ಜಾಲ್ಲೆಂ. ಸರ್ಕಾರಿ. ಕಾಯ್ದ್ಯಾ ಪ್ರಕಾರ್ ಆಮಿ ಮಾಲ್ಗಡ್ಯಾಂಚಾ ಕಬ್ಲಾತೆ ಆನಿ ಬೆಸಾಂವಾ ವಿಣೆ ಸಂಸಾರ್ ಬಾಂದ್ಲ್ಲೊ.
***********
ತ್ಯಾ ದಿಸಾ ಮ್ಹಾಕಾ ಜಲ್ಮ್ ದಿಲ್ಲಿಂ ಕಿತ್ಲೆಂ ರಡ್ಲ್ಲಿಂ. ನಾಕಾ ಪುತಾ ಆಸಲೊ ನಿರ್ದಾರ್ ಘೆನಾಕಾ ತುಂ ಫಟ್ವಾತಾಯ್ ತುಂ ಆಮ್ಕಾಂ ಭಿಂ ಯಾಕ್ ಆನಿ ಭಾತಾಕ್ ಎಕ್ಲೆಂಚ್. ತಳಾತಾ ವಯ್ಲ್ಯಾ ರುಂವಾಂ ಪರಿಂ ತುಕಾ ವಾಗಯ್ಲಾಂ. ಆಮ್ಚೆಂ ಎಕ್ಚ್ ಸಪಾಣ್ ತುಂ. ಆಸಲೆಂ ಮೇಟ್ ಕಾಡಿನಾಕಾ, ತುಕಾ ಕಸಲೊ ಜಿಣಿಯೆ ಸಾಂಗಾತಿ ಜಾಯ್ ತೆಂ ಸಾಂಗ್. ಮ್ಹಜಿ ಸಗ್ಳಿ ಆಸ್ತ್ ವಿಕುನ್ ತರ್ಯ್ ತುವೆಂ ಪಸಮ್ದ್ ಕೆಲ್ಲ್ಯಾ ಚಲ್ಯಾ ಲಾಗಿಂ ಲಗ್ನ್ ಕರುನ್ ದಿತಾಂ. ಮಂತನಾಚ್ಯಾ ಕುಟ್ಮಾಚೆಂ ಡಿಗ್ರಿ ಆಪ್ಣಾಯಿಲ್ಲೆಂ, ಎಕಾ ಬಸ್ಸಾಚಾ ಏಜಂಟಾಲಾಗಿಂ ಕಾಜಾರ್ ಜಾತಾಂ ಮ್ಹಣ್ತಾಯ್ ಹೆಂ ಕಿತೆಂ ಚಣೆ ಖಾವ್ನ್ ಹಾತ್ ಧುಂವ್ಚ್ಯಾ ತಿತ್ಲೆಂ ಸಲೀಸ್ಗೀ? ತುಜೆ ಸಂಪ್ರದಾಯ್, ಖಾಣ್ ಜೆವಾಣ್ ಆನಿ ತಾಚೆಂ ಕಸಲೆಂ ತುಕಾ ಪಸಮ್ದ್ ಜಾಯ್ತ್? ತುಕಾ ತೊ ಲಾಂಬ್ ದಗ್ಲೊ ಶಿರ್ಕಾವ್ನ್ ಉಬ್ದೇಸ್ ಭೊಗ್ಚೆನಾಂತ್ಗೀ? ಸಾಂಗ್ ರೈನಾ ತುಜ್ಯಾನ್ ಸಾದ್ಯ್?
"ಡ್ಯಾಡಿ ತುಕಾ ತಿ ಖಂತ್ ನಾಕಾ. ಆಮಿ ಕಾಜಾರ್ ಮಾತ್ರ್ ಜಾತಾಂವ್ ಆಮ್ಚೆಂ ಸ್ವತಂತ್ರ್ ವಿಕಿನಾಂವ್. ತೊ ಮಸಿದೆಕ್ ಹಾಂವ್ ಇಗರ್ಜೆಕ್. ಆಮ್ಚ್ಯಾ ಮರ್ಜೆನ್ ಆಮಿ ಜಿಯೆತಾಂವ್"
"ರೈನಾ ತುಕಾ ಫಟ್ವಂಕ್ ಪುತಾ ಹಿ ಚಾಲ್.. ತುಂ ತಾಚ್ಯಾ ಮುಟಿಕ್ ಮೆಳ್ತಚ್ ತೊ ತುಜೆಂ ಸ್ವತಂತ್ರ್ ಮಾತ್ರ್ ನ್ಹಯ್ ತುಜಿ ಆಶಾ ಭಗ್ಣಾ ಸರ್ವ್ ಲುಟ್ತಲೊ. ತುಂ ಆನಿಕೀ ಉದ್ಕಾಂತ್ ದೊಳೆ ಸೊಡ್ಚೆಂ ಶಿಕ್ಚೆಂ ಭುರ್ಗೆಂ. ಪುಣ್ ಅಬ್ಬಾಸಾಕ್ ಜವಾಬ್ದಾರಿ ಆಸಾ ನೋವ್ ಜಣಾಂಕ್ ಪೊಸ್ಚಿ. ತೊ ತುಜ್ಯಾ ಕುಡಿಕ್ ಆನಿ ದುಡ್ವಾಕ್ ಲಬ್ದಾಲಾ.ತುಜಿ ಸೊಬಾಯ್ ಪಿಸ್ಡುನ್ ಜಾತಚ್ ತಾಕಾ ದುಸ್ರ್ಯಾಕ್ ಸೊಧುಂಕ್ ವಾಟ್ ಸಲೀಸ್"
"ತೊ ತುಜ್ಯಾ ಗ್ರೇಸ್ತ್ಕಾಯೆಕ್ ಆಂಯ್ಡೆ ಸೊಡ್ಲ್ಯಾರ್ ಭಿರ್ಮತ್ ತುಮ್ಚಿ. ಏಕ್ ದೆಡ್ಕಿ ಲೆಗುನ್ ದಿಂವ್ಚೊ ನಾ."
"ಕೊಣಾಕ್ ಜಾಯ್ ತುಜೆಂ? ಹಾಂವ್ ಮ್ಹಜೊ ಸಂಸಾರ್ ಕಸೊ ಬಾಂದ್ತಾಂ ಪಳೆಯಾ!" ಮಾತ್ಯಾ ವಯ್ಲಿ ಉತ್ರಾಂ ಅಲಯ್ಲಿಂ.
"ಆಮಿ ಆಡ್ಕಳ್ ಹಾಡ್ಲ್ಯಾರ್.....?"
"ತಶೆಂ ಕೆಲ್ಯಾರ್ ಮ್ಹಜೆಂ ಮೊಡೆಂ ಪಳೆಯಾ. ಹಾಂವ್ ಆತಾಂ ಪ್ರಾಯೆಕ್ ಆಯ್ಲ್ಯಾಂ. ದೆಕುನ್ ಮುಕ್ಲೆಂ ಮೇಟ್ ಕಾಡ್ತಾ ಕಂಪ್ಲೇಂಟ್!"
"ಶಹಬ್ಬಾಶ್ ಪುತಾ ಶಹಬ್ಬಾಶ್!" ಡ್ಯಾಡಿ ಮಧೆಂಚ್ ಉಲಯ್ಲೊ. "ತುಕಾ ಜಲ್ಮ್ ದೀವ್ನ್ ಲ್ಹಾನ್ ವ್ಹಡ್ ಕೆಲ್ಲ್ಯಾಕ್ ವ್ಹಡ್ಲೆಂ ಇನಾಮ್ ತಯಾರ್ ಕೆಲಾಂಯ್. ತುವೆಂ ಮೊರ್ಚೆಂಯ್ ನಾಕಾ ಮ್ಹಜ್ಯಾ ಘರಾ ಪೊಲಿಸಾಂನಿ ಯೆಂವ್ಚೆಂಯ್ ನಾಕಾ. ತುಜ್ಯಾ ಅಬ್ಬಾಸಾಕ್ ಆಪಯ್. ಆನಿ ತುಕಾ ಆಮಿ ಎದೊಳ್ ಕಿತೆಂ ದಿಲಾಂ ತೆಂ ಸಗ್ಳೆಂ ಘೆವ್ನ್ ವಚ್. ದಾರ್ ಕಾಡ್ಲಾಂ ಗೇಟ್ ಉಗ್ತಿ ಆಸಾ."
ಡ್ಯಾಡಿಚಿಂ ಹಿಂ ಕಾಳ್ಜಾಕ್ ಮಾರ್ಚಿಂ ಉತ್ರಾಂಯ್ ಮ್ಹಜೆಂ ಧಾರುಣ್ ಕಾಳಿಜ್ ಮೊವಾಳುಂಕ್ ಸಕೊಂಕ್ ನಾಂತ್. ಅಬ್ಬಾಸ್ ಆಯ್ಲೊ. ಸಂಗಿಂ ದೋಗ್ ದೆಡೆ. ಬಾಯ್ರ್ ಗೆಲ್ಲೊ ಡ್ಯಾಡಿಯ್ ಆಯ್ಲೊ. ಕಾಯ್ಚ್ ಮುಲಾಜ್ ನಾಸ್ತಾನಾ ಹಾವೆಂ ಮ್ಹಜೆಂ ಮ್ಹಳ್ಳೆಂ ಸರ್ವ್ ಬಾಂದ್ಲೆಂ. ಟೆಂಪೊರ್ ಭರ್ತಾನಾ..... ಡ್ಯಾಡಿ ಆಯ್ಲೊ. ಹಾತಿಂ ಏಕ್ ಕಾಗಾತ್!
"ದೊಗಾಂಯ್ ವಾಚಾ ಆನಿ ದಸ್ಕತ್ ಘಾಲಾ" ಡ್ಯಾಡಿಚಿಂ ಉತ್ರಾಂ.
"ಆಜ್ ಥಾವ್ನ್ ಹ್ಯಾ ಘರಾಂತ್ ಮ್ಹಕಾ ಕಸಲೊಯ್ ಸಂಭಂಧ್ ನಾ. ಹೆಂ ದಾರ್ ಮ್ಹಾಕಾ ಭಂಧ್. ಮ್ಹಜ್ಯಾ ಸ್ವಂತ್ ಖುಶೆನ್ ಹಾಂವ್ ಅಬಾಸಾ ಸಂಗಿಮ್ ಮ್ಹಜೊ ಸಂಸಾರ್ ಬಾಂದ್ತಾಂ. ಕೊಣೀ ಮ್ಹಜ್ಯಾ ಕಾಮಾಂತ್ ಮೆತೆರ್ ನಾಂತ್. ಬರೆಂ ಯಾ ವಾಯ್ಟ್ ಹಾಕಾ ಹಾಂವ್ಚ್ ಜವಾಬ್ದಾರ್.
ಆಡೆಂ ದೊಳ್ಯಾಂಕ್ ಆಡ್ ಘಾಲ್ಲೆಂ. ಹಂಕಾರಾಚ್ಯಾ ಧಾವೆನ್ ತೋವ್ಲ್ಲಿಂ. ವೀಸ್ ವರ್ಸಾಂ ಮ್ಹಾಕಾ ವಾಗಯಿಲ್ಲ್ಯಾಕ್ ಎಕಾ ಖಿಣಾನ್ ವಿಸ್ರಾಲಿಂ. ಶಿಕ್ಪಾಚೆಂ ಮೋಲ್ ಎಕಾ ದಸ್ಕತೆ ಸಂಗಿಂ... ರಗ್ತಾ ಸಂಭಂಧಾಚ್ಯಾ ವಾಳಾಂತ್ ವೀಕ್ ಭರ್ಸಿಲೆಂ.
***********
ಚಾರ್ ಪಾಂಚ್ ಮಯ್ನೆ ಕಿತೆಂ ಮಜಾ. ಹೊಟ್ಲಾಂನಿ ರುಮಾ. ರೂಚಿಚಿಂ ಖಾಣಾಂ. ಬೆಂಕಾಂತ್ ಆಸ್ಲ್ಲೊ ಲಗ್ಬಗ್ ದೇಡ್ ಲಾಕ್ ಸಾಂಗಾತಾ ಪೊಸೊಭರ್ ಭಾಂಗಾರ್ ಸರ್ವ್ ಉದಾಕ್! ಅಬ್ಬಾಸ್ ಮ್ಹಾಕಾ ಮಾಂಕ್ಡಾ ಪರಿಂ ನಾಚಯ್ತಾಲೊ. ಹಾಂವ್ ಗದ್ದಾ ಪ್ರಾಯೆಚಾ ಹಂಕಾರಾನ್ ಕುಡ್ಡಿಂ ಜಾಲ್ಲಿಂ.
ಅಂತ್ರಳಾಚಿಂ ತಾರಾಂ ತುಟೊನ್ ಮ್ಹಾಕಾ ತೊ ನೆಟಯ್ತಾಲೊ. ಚಾಂದ್ನ್ಯಾಚ್ಯಾ ಸಾಡಿಯೆನ್ ಮ್ಹಾಕಾ ಸೊಭಯ್ತಾಲೊ. ದರ್ಯಾಚಾ ಮೊತಿಯಾಂನಿ ಮ್ಹಜೊ ಶ್ರಂಗಾರ್ ಕರ್ತಾಲೊ. ಗೊಡ್ಸಾಣ್... ಕಿತ್ಲೆ ದೀಸ್ ಉರಾತ್? ಮೊಗಾಚಿ ಧಾವ್ ನಿಂವ್ಲಿ. ಆತಾಂ ಎಕಾಮೆಕಾಚ್ಯೊ ಚುಕಿ ಉಡಾಸಾಕ್ ಆಯ್ಲ್ಯೊ. ವಿಶ್ವಾಸ್ ಬೆಳ್ಶೆಲೊ.
ಮೋಡರ್ನ್ ಗರ್ಲ್ ಮ್ಹಣೊಂಕ್ ಮ್ಹಾಕಾ ಆಶಾ. ದೆಕುನ್ ಆಯಿಲ್ಲೆಂ ನವೆಂ ಪ್ಯಾಶನ್ ಮ್ಹಾಕಾ ಕರಿಜಾಯ್. ಭರ್ಲ್ಲೆ ಮ್ಹಜೆ ವಿಶ್ವೆ ಜಾತಾ ತಿತ್ಲೆ ವಾರ್ಯಾರ್ ಗಾಲ್ತಾನಾ ಮ್ಹಾಕಾ ಸಂತೊಸ್. ಆಂಗಾಕ್ ಲಾಗ್ಚೆಂ ವಸ್ತುರ್ ನ್ಹೆಸೊನ್ ಯುವಕಾಂ ಸಂಗಿಂ ಮಜಾ ಮಾರ್ತಾನಾ ಕಿತೆಂ ಆನಂದ್.
ಮಿನಿ, ಮಿಡಿ, ಸ್ಲೀವ್ಲೆಸ್, ನೆಕ್ಲೆಸ್, ಜೀನ್ಸ್, ಕಬಾಟಾನಿ ಭರ್ಲ್ಲ್ಯಾ ನವ್ಯಾ ನವ್ಯಾ ಫ್ಯಾಶನಾಸೊ ಅಂಗಲಾಪ್. ನವೆಂ ಆಯಿಲ್ಲೆಂ ಮ್ಹಾಕಾ ಜಾಯ್. ಘಾಲುನ್ ಸ್ಕೂಟಿರ್ ವೆತಾನಾ ಮ್ಹಜೆ ಕೇಸ್ ವಾರ್ಯಾರ್ ಉಭ್ತಾಲೆ. ತೊಂಡಾಕ್ ಡೊವ್ ಸೋಫ್ ತರ್, ಆಂಗಾಕ್ ಪಿಯರ್ಸ್, ಕೆಸಾಂಕ್ ಉಂಚ್ಲೊ ಶ್ಯಾಂಪು, ಡ್ಯಾಡಿ ಮ್ಹಾಕಾ ಜಾಯ್ ಮ್ಹಳ್ಳೆಂ ಧಾಡುನ್ ದಿತಾನಾ ಮ್ಹಜಿ ಪ್ರೆಂಡ್ಚಾಂ ಮೊಸ್ರಾನ್ ಭರ್ತಾಲಿಂ. ಆಬ್ಬಾಸ್ ಮ್ಹಾಕಾ ತವಳ್ಚ್ ಭುಲ್ಲ್ಲೊ.
ಪುಣ್.... ಆತಾಂತಾ ಹಾವೆಂ ತೆಂ ವಸ್ತುರ್ ನ್ಹೆಸ್ತಾನಾ ತೋಂಡ್ ಕಾಳೆಂ ಕರ್ತಾಲೊ. ಬಾಯ್ರ್ ಆಪವ್ನ್ ವರುಂಕ್ ಪಾಟಿಂ ಕರ್ತಾಲೊ. ತಾಚ್ಯಾ ಘರಾ ವೆತಾಲೊ. ಮ್ಹಜೆಂ ಎಕೇಕ್ಚ್ ನಗ್ ನಪಂಯ್ಚ್ ಜಾತಾಲೆಂ. ಎಕಾ ಸಾಕಾಳಿಂ ಉಟ್ತಾನಾ ಮ್ಹಜೆಂ ಸ್ಕೂಟಿ ಮಾಯಾಗ್! ವಿಚಾರ್ತಾನಾ ತಾಚಿ ಖಡಕ್ಕ್ ಜಾಪ್ ’ಹಾವೆಂ ವಿಕ್ಲಾಂ. ಮ್ಹಾಕಾ ತುವೆಂ ತೆಂ ಸೊಡ್ಚೆಂ ಪಸಂದ್ ನಾ’. ಹಾಂವ್ ರಾಗಾನ್ ಬಸ್ಲಿಂ. ತೆಂ ಮ್ಹಜ್ಯಾ ಜಲ್ಮಾ ದಿಸಾಕ್ ಮ್ಹಜ್ಯಾ ಡ್ಯಾಡಿನ್ ಮ್ಹಾಕಾ ಕಿತ್ಲ್ಯಾ ಮೊಗಾನ್ ದಿಲ್ಲೆಂ. ತ್ಯಾ ದಿಸಾ ಮ್ಹಾಕಾ ಡ್ಯಾಡಿಚೊ ಪಯ್ಲೊ ಉಡಾಸ್ ಆಯ್ಲೊ.
ನವೊ ಜೀವ್ ಮ್ಹಜ್ಯಾ ಪೊಟಾಂತ್ ವಾಡ್ತಾನಾ ಅನ್ಯೇಕ್ ರಜಾರ್ ಆರಂಭ್ ಜಾಲೆಂ.
ತುಜಿ ಜಾತ್ ತುಕಾ ಮ್ಹಜಿ ಜಾತ್ ಮ್ಹಾಕಾ ಮ್ಹಳ್ಳೆಂ ಉತಾರ್ ಭೆಳ್ಶೆಲೆಂ. ಭುರ್ಗೆಂ ಭುಂಯ್ ಪಡ್ಚ್ಯಾ ಪಯ್ಲೆಂ ತುವೆಂ ಮ್ಹಜ್ಯಾ ಜಾತಿಕ್ ಯೇಜಾಯ್ ಆನಿ ಆಮ್ಚ್ಯಾ ಘರಾ ಪಾಟಿಂ ವಚಾಜಾಯ್. ತುಜ್ಯಾ ಮರ್ಜೆನ್ ತುಕಾ ಪೊಸುಂಕ್ ಮ್ಹಾಕಾ ಸಾದ್ಯ್ ನಾ ಮ್ಹಣ್ತಾನಾ.... ಹಾಂವ್ ಖಂಯ್ಚ್ಯಾ ಗುಂಡಿಯೆಕ್ ಉಡ್ಲ್ಯಾಂ ಮ್ಹಳ್ಳೆಂ ಕಳ್ತಾನಾ ಪರತ್ ಮಮ್ಮಿ ಡ್ಯಾಡಿಚೊ ಉಡಾಸ್ ಆಯ್ಲೊ.
ಹೆವ್ಶಿನ್ ದರ್ಯೊ ತೆವ್ಶಿನ್ ಕಂದಕ್! ಖಂಯ್ ವಚೊಂ? ಗುಂಡಿಯೆಕ್ ಉಡ್ಕಿ ಮಾರುನ್ ಜಾಲಾಂ ಆತಾಂ ಹಾತ್ ಪಾಂಯ್ ಬಡವ್ನ್ ತರ್ಯ್ ತಡಿಕ್ ಪಾವಾಜಾಯ್. ಹಿಂವಾನ್ ಕಾಂಪ್ತಾಲಿಂ. ಅಬ್ಬಾಸಾಕ್ ಆತಾಂ ಮ್ಹಜ್ಯಾ ಮೆಟಾಂ ಮೆಟಾಂನಿ ಚೂಕ್ ದಿಸ್ತಾಲಿ. ದೆಕುನ್ ಉಟ್ತಾ ಬಸ್ತಾನಾ ಶಿರಾಪ್ತಾಲೊ. ಆತಾಂ ಹಾವೆಂ ಸರ್ವ್ ಹೊಗ್ಡಾಯಿಲ್ಲೆಂ. ಪಾಟಿಂ ಯೇಂವ್ಕ್ ಜಾಯ್ನಾತ್ಲ್ಲ್ಯಾ ತಿತ್ಲೆಂ ಮುಕಾರ್ ಪಾವ್ಲ್ಲಿಂ. ರಡೊಂಕ್ ಮಾತ್ರ್ ಉರ್ಲೆಂ.
’ಫಾತ್ಮಾ.....’ ಮ್ಹಣೊನ್ ಆಪಯ್ಲ್ಯಾರ್ ಕೊಣಾಕ್ ಆಪಯ್ತಾತ್ ಮ್ಹಳ್ಳ್ಯಾ ಪರಿಂ ಪಳೆತ್ತ್ ರಾವ್ತಾಲಿಂ. ಮ್ಹಜಿಂ ದೋನ್ ಕಬಟಾಂ ಭರುನ್ ಆಸ್ಲ್ಲೆಂ ವಸ್ತುರ್ ಥರಾ ಥರಾಚೊ ಸ್ಯಾಂಡಲ್ಸ್ ಕಿತೆಂ ಜಾಲೆಂ ಹಾಂವ್ ನೆಣಾ. ಅಬ್ಬಾಸಾಚ್ಯಾ ಘರಾ ಆಂಗ್ಭರ್ ಕಾಪಾಡ್ ಆನಿ ಕಾಳೊ ಭುರ್ಖಾ ಮ್ಹಾಕಾ ಮೆಳ್ಳೊ. ಮ್ಹಾಕಾ ಹೆಂ ನ್ಹೆಸೊಂಕ್ ಉಬ್ದೇಸ್ ಭಗ್ತಾಲೊ. ಮ್ಹಜ್ಯಾ ವಸ್ತುರಾ ವಿಶ್ಯಾಂತ್ ವಿಚಾರ್ತಾನಾ ಅಬ್ಬಾಸಾಚೆ ದೊಳೆ ಉಜೊ ವೊಂಕ್ಲೆ.
"ಹೆಂ ಘರ್ ಚೆಡಿಯಾಂಚೆಂ ನ್ಹಯ್. ಮ್ಹಜಿಂ ಅಬ್ಬಾ ಅಮ್ಮಿ ಮರ್ಯಾದ್ವಂತಾ ತಾಣಿ ಸಾಂಗ್ಲ್ಲ್ಯಾ ಪರಿಂ ಜಿಯೆ."
"ಮ್ಯಳ್ಯಾರ್....!"
"ಆನಿ ತುಂ ಖಯ್ಚೆಂ ಅಪ್ವಂತ್?" ತಾಚ್ಯಾ ಆವಯ್ನ್ ಮಾರ್ ದಿಲೊ.
ಚಿಂತುಂಕ್ ಲಾಗ್ಲಿಂ. ತೀನ್ ವರ್ಸಾಂ ಮ್ಹಜ್ಯಾ ಪಾಟ್ಲ್ಯಾನ್ ಸಿನೇಮಾ ತಾರಾಂಕ್ ತುಲನ್ ಕರುನ್ ಮ್ಹಜೊ ಮೋಗ್ ಕೆಲ್ಲ್ಯಾ ಅಬ್ಬಾಸಾನ್ ದಿಂವ್ಚಿ ಸರ್ಟಿಫಿಕೇಟ್ ಹಿಚ್ಚ್ಗೀ?
ಕಾಳೊಕ್! ಕಾಳೊಕ್!! ಉಜ್ವಾಡಾಚೆಂ ದಾರ್ ದಿಸಾನಾ. ಜನೆಲಾಂ ನಾಂತ್. ಆಸ್ಲ್ಲಿಂ ಬಾಗ್ಲಾಂ ಪಿಚಾರ್. ಧಗಿಚೆ ದೀಸ್. ಘಾಮ್ ದೆಂವ್ತಾಲೊ. ಮ್ಹಜೆಂ ಆಂಗ್, ವಸ್ತುರ್ ವಾಸ್ ಯೆತಾಲೆಂ. ಸದಾಂ ನಾಂವ್ಕ್ ನಾ. ವಸ್ತುರ್ ಧುಂವ್ಕ್ ಅವ್ಕಾಸ್ ನಾ. ಭಾಯ್ರ್ ವೆತಾನಾ ಮಾತೆಂಗೋಳ್ ಕಾಪ್ಡಾಚೆಂ ಖೊಳ್! ಆತಾಂತಾಂ ಅಪ್ರೂಪ್ ಭಾಯ್ರ್ ವೆತಾನಾ ಭುರ್ಖಾ ನ್ಹಯ್. ದೊಳ್ಯಾಂಕ್ ಭಾಂದುಂಕ್ ’ಮುಕಾಮ್’. ದೋನ್ ದೊಳೆ ಮಾತ್ರ್ ದಿಸ್ತಾಲೆ. ಉಸ್ವಾಸ್ ಸೊಡುಂಕ್ಯ್ ಕಶ್ಟಾತಾಲಿಂ. ಅಬ್ಬಾಸಾಚಾ ಆವ್ಯ್ ಬಾಪಾಯ್ಕ್ ಹಾಂವ್ ತಾಂಚಾ ಪುತಾ ಪಾಟ್ಲ್ಯಾನ್ ಧಾಂವೊನ್ ಆಯಿಲ್ಲಿಂ. ತಾಣಿಂ ಮುಕಾರ್ ರಾವೊನ್ ನಿಖಾ ಕೆಲ್ಲೆಂ ಜಾಲ್ಯಾರ್ ಪುತಾಕ್ ಪೊಸೊ ಭರ್ ದೋತ್ ಮೆಳ್ತಿ. ಪುಣ್ ಹಾವೆಂ ಕಿತೆಂ ಉಣೆಂ ಹಾಡ್ಲ್ಲೆಂ. ತೆಂ ಕಿತೆಂ ಜಾಲೆಂ. ಮ್ಹಾಕಾ ಅರ್ಥ್ ಜಾಯ್ನಾತ್ಲ್ಲ್ಯಾ ಭಾಹೆನ್ ಗಾಳಿ ದಿತಾನಾ ತೋಂಡ್ ಯೇನಾತ್ಲ್ಲ್ಯಾ ಮೊನ್ಯಾ ಪರಿಂ ಭಿತರ್ ಚಲ್ತಾಲಿಂ.
ದೀಸ್ ವೆತಾ ವೆತಾನಾ ಹಾಂವ್ ಫಾತಿಮಾಬಿ ಜಾಲಿಂ. ಅಬ್ಬಾಸಾಚಿ ಬೀಬಿ ಮ್ಹಳ್ಳಿ ಸಾಕ್ಸ್ ಸ ವರ್ಸಾಂನಿ ಪಾಂಚ್ ಚೆಡ್ವಾಂ ಜಲ್ಮಾಲಿಂ. ಹ್ಯಾ ನೆಂಟುಲ್ಯಾಂಚಿ ಚಾಕ್ರಿ ಕರುಂಕ್ ಜಾಯ್ನಾಸ್ತಾನಾ ರಡ್ಲಿಂ. ಭುರ್ಗಿಂ ನಾಕಾ ಆಪರೇಶನ್ ಕರ್ಯಾಂ ಮ್ಹಣ್ತಾನಾ.... ಅಲ್ಲಾಚಾ ಕಾಯ್ದ್ಯಾಕ್ ಅಪಚಾರ್ ಕರ್ಚೆಂ ತುಜೆಂ ಅನ್ನಡ್ಪಣ್ ರಾವಯ್. ಇಸಾಯಿ ಜಾಲ್ಲ್ಯಾ ತುಕಾ ತಿತ್ಲೆಂಯ್ ಕಳಾನಾಂಗೀ? ಧೆಂಕ್ಣೆಂ ಪಡ್ತಾನಾ ಥಂಡ್ ಪಡ್ಲಿಂ.
’ನಿಯ್ಯತ್ ಸಹರಿ’ ಆನಿ ’ನಿಯ್ಯತ್ ಇಫ್ತಾರ್’ ಕರ್ತಾನಾ ಮಾಂಯ್ನ್ ಲ್ಹಾನ್ ಆಸ್ತಾನಾ ಮಾಂಡಿಯೆರ್ ಬಸೊನ್ ಶಿಕಯಿಲ್ಲೆಂ ಜೆಜು ಬೊಳ್ಯಾಚೊ ಉಡಾಸ್ ಯೆತಾಲೊ. ದಿಸಾಕ್ ಪಾಂಚ್ ಪಾವ್ಟಿಂ ನಮಾಜ್ ಕರ್ತಾನಾ ಮ್ಹಜೆಂ ಮನ್ ಪಿಸಾಂತುರ್ ಜಾತಾಲೆಂ. ಸಾಂಜೆರ್ ಸಾಕಾಳಿಂ ಮಾಗ್ಣಿಂ ಮ್ಹಣೊಂಕ್ ಮಮ್ಮಿನ್ ಉಟಯ್ತಾನಾ ಹಾಂವ್ ತಿಚೆರ್ ರಾಗಾರ್ ಜಾತಾಲಿಂ. ಪುಣ್ ಆತಾಂ.... ’ಕಾವುಬಾ-ಖಿಬುಲೆ ಅಸ್ತಮ್ತೆ ಪಳವ್ನ್ ಕರ್ತಾನಾ ತೇರ್ಸಾಚೊ ಖಣ್ ಮತಿರ್ ಧಾಂವ್ತಾಲೊ. ಕಾಳ್ಜಾಂತ್ ಕಿತೆಂಯ್ ಝಗ್ಡೆಂ ಜಾಂವ್ ಜಿಯೆಂವ್ಚ್ಯಾ ಖಾತಿರ್ ಅಬ್ಬಾಸಾಚ್ಯಾ ಘರ್ಚ್ಯಾಂಚಾ ದೊಳ್ಯಾಂಕೀ ಮಾತ್ತಿ ಘಾಲ್ತಾಂಲಿಂ.
’ರಮ್ಜಾನ್’ ಯೆತಾ ಮ್ಹಣ್ತಾನಾ ಕಾಂಪ್ತಾಲಿಂ. ಕಿತ್ಲೊ ಭಿರಾಂಕುಳ್ ಉಪಾಸ್. ವರ್ಸಾಕ್ ಆಸ್ಚೆ ದೋನ್ ಸಲೀಸ್ ಉಪಾಸ್ ಕರುಂಕ್ಯ್ ಪಾಟಿಂ ಸರ್ತಾಲಿಂ. ಮಮ್ಮಿನ್ ಬರ್ಯಾಕ್ ಸಾಂಗ್ಚೆಂ ವಾಯ್ಟ್ ದಿಸ್ತಾಲೆಂ. ಆತಾಂ ಹೊ ವನ್ವಾಸ್ ಸೊಸ್ತಾನಾ ಕೆದಾಳಾ ಹಿ ಫುಲ್ಗೊತ್ರ್ ಮುಗ್ದಾತ್ ಮ್ಹನ್ ರಾಕ್ತಾಲಿಂ. ಸುರ್ಯೊ ಕೆದಾಳಾ ಬುಡಾತ್? ಕೆದಾಳಾ ಏಕ್ ಪಾವ್ಟಿಂ ತಾಪ್ಲ್ಲ್ಯಾ ಪೊಟಾಕ್ ಥಂಡ್ ಕರಿನ್ ಮ್ಹಣ್ ಆಶೆತಾಲಿಂ. ಭುಕೆಚ್ಯೊ ಬೊಬೊ ಮ್ಹಜ್ಯಾ ಪೊಟಾಂತ್ ಆಯ್ಕಾತಾನಾ ಮ್ಹಜ್ಯಾ ಖಾತಿರ್ ರಾಕೊನ್ ರಾಂವ್ಚಿಂ ಡ್ಯಾಡಿ ಮಮ್ಮಿ ಹಿ ಮ್ಹಜಿ ಗತ್ ಪಳೆವನ್ ಕಿತೆಂ ಮ್ಹಣ್ತಿತ್? ಪರತ್ ಮ್ಹಜ್ಯಾ ಮತಿಂತ್ ತಾಂಚೆಂ ರುಪ್ಣೆಂ ಖೆಳ್ಳೆಂ. ಹಾವೆಂಚ್ ಮಾಗೊನ್ ಘೆತ್ಲ್ಲಿ ಹಿ ಕಾಲ್ಸ್ ಹಾವೆಂಚ್ ಪಿಯೆಜಾಯ್ ನ್ಹಯ್ಗೀ?
ಸದಾಂ ಪಿಡೆಸ್ತ್ ಮ್ಹಜ್ಯಾ ಬಾಳಾಂಕ್ ಮ್ಹಜ್ಯಾಕೀ ಫಾಸ್ಟ್! ಮೋಗ್ ತಾಂಕಾಂ ನಾ. ಪೋಟ್ಭರ್ ಖಾಣ್ ಕೋಣ್ ದಿತಾ? ಆಂಗ್ಭರ್ ನ್ಹೆಸಾಣ್ ನಾ. ಲ್ಹಾನ್ ಏಕ್ ಥಿಬೊ ಲಾಗ್ಲ್ಯಾರ್ಯ್ ತೆಂ ವಸ್ತುರ್ ನ್ಹೆಸೊಂಕ್ ಪುಟ್ವಾನಾತ್ಲ್ಲ್ಯಾ ಮ್ಹಾಕಾ ಆಜ್ ಶಿಂವೊನ್ ಶಿಂವೊನ್ ದುಸ್ರ್ಯಾಚ್ ರಿತಿನ್ ಸೊಭ್ಚೆಂ ಪಿಂದ್ಕರ್ ಕಾಪಾಡ್ ಗತ್! ಮ್ಹಜೆ ಭರ್ಲ್ಲೆ ವಾಡ್ಕುಳೆ ಗುಲೊಬಿ ಪೊಲೆ ಹಾವೆಂ ಮಾಗೊನ್ ಘೆತ್ಲ್ಲ್ಯಾ ಸುಖಾನ್ ಚಿಂವ್ಳಾಲ್ಲೆ. ಹಂಕಾರಾನ್ ಭರ್ಲ್ಲಿ ಸೊಭಾಯೆಚಿ ಕೂಡ್ ನಿತ್ರಾಣಿ ಜಾಲ್ಲಿ.
ತವಳ್ ಕಾಡುನ್ ಉಡಯಿಲ್ಲೆಂ ಆಜ್ ಖಾಂವ್ಕ್ ಆಶೆಲಿಂ. ಪುಣ್ ಕಾಜಾರ್ ಜಾವ್ನ್ ಸ ವರ್ಸಾಂನಿ ಸತ್ತಾರ್ ವರ್ಸಾಂಚೆಂ ಆಪ್ಣಾಯ್ಲೆಂ. ಆತಾಂ ಮ್ಹಾಕಾ ಮಮ್ಮಿ ಡ್ಯಾಡಿಚಿಂ ಉತ್ರಾಂ ಹೆಡಾಂವ್ಕ್ ಲಾಗ್ಲಿಂ
ಹಾಂವ್ ನೆಣಾ. ಕಿತ್ಯಾಕ್ ಆಮ್ಗೆರ್ ಇತ್ಲಿಂ ಸಯ್ರಿಂ. ಕೊಣ್ಯ್ ಮ್ಹಾಕಾ ಸಾಂಗಾನಾಂತ್. ಸೆಜಾರ್ಚಿ ಕಾರ್ಮಿನ್ ಬಾಯ್ ಕಾಲ್ ರಾತಿಂ ಸಾಂಗ್ಚೆಂ ಥೊಡೆಂ ಆಯ್ಕಾಲೆಂ. ಫಾಲ್ಯಾಂ ಅಬ್ಬಾಸಾಕ್ ಪರತ್ ನಿಖಾ ಖಂಯ್! ಪಂಚ್ವೀಸ್ ಪವನಾ ಭಾಂಗಾರ್ ಆನಿ ಪನ್ನಾಸ್ ಹಜಾರ್ ರುಪಯ್ ದೋತ್ ಖಂಯ್. ಆಯ್ಕೊನ್ ರಡ್ಲಿಂ. ಅಬ್ಬಾಸಾಚಾ ಪಾಂಯಾಂಕ್ ಪಡ್ಲಿಂ. ’ಆಶೆಂ ಕರಿನಾಕಾಯ್ ಮ್ಹಾಕಾ ಆನಿ ಮ್ಹಜ್ಯಾ ಭುರ್ಗ್ಯಾಂಕ್ ವಾಟೆರ್ ಘಾಲಿನಾಕಾ’ ಮ್ಹಣ್ ಅಡ್ದೊಸ್ ಮಾಗ್ತಾನಾ....
’ತುಂ ಮ್ಹಜ್ಯಾ ಗೊಮ್ಟ್ಯಾಕ್ ಬಾಂದ್ಲ್ಲೊ ಚಿರ್ಯಾ ಫಾತೊರ್. ಕೊನ್ಶ್ಯಾಕ್ ಪಡ್. ಮ್ಹಾಕಾ ಚಲೊಂಕ್ ಜಾಯ್ ಚಡ್ ಉಲಯ್ಲ್ಯಾರ್ ತಲಾಖ್ ದಿತಾಂ. ಫಾಲ್ಯಾ ಕೊಣಾಚ್ಯಾ ಪುಣಿ ಮುಕಾರ್ ಪಡ್ಶಿ ಜಾಗ್ರುತ್!’ ಮ್ಹಾಕಾ ಖೊಟಾವ್ನ್ ವೆತಾನಾ ಪರತ್ ಮಮ್ಮಿ ಡ್ಯಾಡಿಚೆಂ ರಡ್ಕುರೆಂ ರುಪ್ಣೆಂ ಮ್ಹಜೆ ಮುಕಾರ್ ಆಯ್ಲೆಂ.
ಗೌಜಿ ಗಮ್ಮತ್ ಸಂಗಿಂ ಮ್ಹಾಕಾ ಆಯ್ಲೆಂ ಏಕ್ ವಾದಾಳ್. ಸಲ್ಮಾ ಅಬ್ಬಾಸಾಚಿ ದುಸ್ರಿ ಬೀಬಿ. ಸಕ್ಡಾಂಕೀ ಮೊಗಾಚೆಂ. ಸದಾಂಚ್ ಹಾಸ್ತಾಲೆಂ. ಮ್ಹಾಕಾ ಕೊಂಕ್ತಾಲೆಂ. ಮ್ಹಜ್ಯಾ ಅಬ್ಬಾಸಾ ಸಂಗಿಂ ಖಿಡ್ಕಿಡ್ತಾನಾ ಹಾಂವ್ ರಡ್ಲಿಂ. ವರ್ಸಾನ್ ತಾಕಾ ಚೆರ್ಕೊ ಜಾತಾನಾ ತಾಕಾ ಮಾನ್ ಸಮ್ಮಾನ್ ವಾಡ್ಲೊ. ಹಾಂವ್ ಕಚ್ರ್ಯಾಂತ್ಲೊ ಕೋಯ್ರ್ ಜಾಲಿಂ.
ಆತಾತಾಂ ಹಾಂವ್ ಅರ್ದಿ ಪಿರ್ಕಿ. ಮ್ಹಜ್ಯಾ ತಕ್ಲೆಂತ್ ಖದ್ನೆ ಪುಟ್ತಾಲೆ. ಪರತ್ ರಮ್ಜಾನ್ ಆಯ್ಲೊ. ಮ್ಹಜ್ಯಾ ಕುಡಿಂತ್ ಖಂಯ್ಚೊ ರಾಕ್ಕೊಸ್ ರಿಗ್ಲ್ಲೊ ಕೊಣ್ಣಾ. ಭುಕ್! ಭುಕ್! ಭುಕ್! ಪಯ್ಲೆಂ ಪಯ್ಲೆಂ ತೆಂ ಜೆವಾಣ್, ಖಾಣ್ ಮ್ಹಜ್ಯಾ ಪೊಟಾಂತ್ ರಾವಾನ್ತ್ಲ್ಲೆಂ. ಆತಾಂತಾಂ ಕಿತೆಂಯ್ ಮೆಳ್ಳ್ಯಾರ್ ಭೊಕಾಯ್ತಾಲಿಂ. ಪುಣ್ ಮೆಳ್ತೆಲೆಂ ಕಿತೆಂ? ಸಕ್ಡಾಂನಿ ಖಾಂವ್ನ್, ಜೇವ್ನ್ ಉರ್ಲ್ಲೆಂ. ಏಕ್ ಬಾಳ್ ಮರಿಯಮ್ ದೊನ್ಚ್ ವರ್ಸಾಂನಿ ಪುರೊ ಹೊ ಸಂಸಾರ್ ಮ್ಹಣ್ ಚಮ್ಕಾಲೆಂ. ಮ್ಹಾಕಾ ತವಳ್ ರಡೊಂಕ್ ಯೇಂವ್ಕ್ ನಾ. ತಾಕಾ ಪುಣೀ ಸುಟ್ಕಾ ಮೆಳ್ಳಿ ನ್ಹಯ್ಗೀ ಮ್ಹಣ್ ಸಮಾಧಾನ್ ಭೊಗ್ಲೆಂ. ಆತಾಂ... ಪರತ್ ಮ್ಹಜೆಂ ಪೋಟ್ ವ್ಹಾಡ್ತನಾ........?
’ಆಶಾ!? ದುಕ್ರಾ ಮಾಸ್ ಖಾಯ್ಜೆ ಮ್ಹಳ್ಳೆ ದುವಾಳೆ. ಮ್ಹಾಕಾ ದುಕ್ರಾ ಮಾಸ್ ಮ್ಹಳ್ಯಾರ್ ಜೀವ್. ಕಾಳಿಜ್ ಅನ್ಕಿಟಿ ರಾಂದ್ಲ್ಯಾರ್ ತಾಚಿ ರೂಚ್ಚ್ ವೆಗ್ಳಿ. ಸರ್ಪಾತೆಲ್ ಕೆಲ್ಯಾರ್ ಅಖೇರ್ ಪರ್ಯಾಂತ್ ಮ್ಹಾಕಾಚ್ ಮಮ್ಮಿ ಸಾಂಗ್ತಾಲಿ ’ದುಕ್ರಾ ಮಾಸ್ ಮ್ಹಳ್ಯಾರ್ ಮೆಲ್ಲೆಂ ಜೀವ್ ಜಾಯ್ತ್!’ ಪರತ್ ಮತಿ ಪಡ್ದ್ಯಾರ್ ಮಮ್ಮಿ ಖೆಳ್ಳಿ.
ರಮ್ಜಾನ್ ದನ್ಫಾರ್ ಭಾರ್! ಸಗ್ಳಿಂ ಘರಾಂತ್ ಗಾಡ್ ನಿದೆಂತ್ ಆಸ್ಲ್ಲಿಂ. ಕಾರ್ಮಿನ್ ಬಾಯೆಗೆರ್ ದುಕೊರ್ ರಾಂದ್ಲಾ. ಮ್ಹಾಕಾ ಪರ್ಮಳ್ ಯೆತಾ. ತಿಕಾ ಮ್ಹಜಿ ಕಾಣಿ ಕಳಿತ್. ಭುಕೆಚ್ಯೊ ಬೊಬೊ ಕಾನಿಂ ಮಾರ್ತಾಲೆಂ ದೆಕುನ್ ಲೋವ್ ಹಾವೆಂ ತಿಚ್ಯಾ ಘರ್ಚೆಂ ದಾರ್ ಬಡಯ್ಲೆಂ. ಲಜ್ ಸಾಂಡುನ್ ಮಾಗ್ಲೆಂ. ತಿಣೆ ಬೊಶಿಯೆಂತ್ ಮಾಸ್ ಆನಿ ಸನ್ನಾಂ ದಿಲಿಂ. ಮಾಸ್ ಪಳೆತಾನಾಚ್ ಮ್ಹಾಕಾ ಕಿತೆಂ ಜಾಲೆಂ ನೆಣಾಂ ಕೊಣ್ಯ್ ವೊಡುನ್ ವರಿತ್ ಮ್ಹಳ್ಳ್ಯಾ ಭಿಂಯಾನ್ ವೆಗ್ಗಿಂ ವೆಗ್ಗಿಂ ಖಾಂವ್ಕ್ ಲಾಗ್ಲಿಂ.
ಖದ್ನೊ ಪುಟ್ಲೊ! ಉಜೊ ಪೆಟ್ಲೊ! ವಾದಾಳ್ ಉಟ್ಲೆಂ! ತೊಂಡಾಂತ್ ಆಸ್ಲ್ಲೆಂ ಗಿಳುಂಕ್ಯ್ ನ್ಹಯ್ ಪಾಟಿಂ ಕಾಡುಂಕ್ಯ್ ನ್ಹಯ್. ತವಳ್ ಉರ್ಲ್ಲ್ಯಾ ಶೆಡಿಯೆಕ್ ಹಾತ್ ಘಾಲುನ್ ಅಬ್ಬಾಸಾನ್ ಬುರ್ಬುರೆಂ ವೊಡುನ್ ವರ್ತಾನಾ ಮಾಸ್ ಗಳ್ಯಾಕ್ ಶಿರ್ಕಾಲೆಂ. ಸುವ್ವರ್! ಛಿ! ಹಲ್ಕಟ್ ಬೂದ್ ಖಂಯ್ ವಚಾತ್? ಪಾಂಯಾಂಚಿ ಕಾತ್ ಗೆಲಿ. ಘರಾ ಯೆತಾಚ್ಚ್ ಖೊಟೊ ಮುಟಿ ಗಾಳಿ ಶಿರಾಪ್ ರಗಾತ್ ವಾಳ್ಳೆಂ. ಬೊಬಾಟ್ ಮಾರುಂಕ್ಯ್ ತಾಳೊ ಫುಮಾರ್ ಜಾಲಾ. ತವಳ್ ಮ್ಹಾಕಾ ಜೀವ್ ವೆಚಿ ತಾನ್ ಲಾಗ್ಲಿ. ಅಬ್ಬಾಸಾಚೆ ಲೊಂಕ್ಡಾ ಸಾರ್ಕೆ ಹಾತ್ ಮ್ಹಜೊ ಗಳೊ ಚಿಡ್ಡಿತಾನಾ ಮ್ಹಜ್ಯಾ ಆಶೆಚ್ಯಾ ಮಾಸಾ ಸಂಗಿಂ ಮ್ಹಜ್ಯಾ ಜಿಣಿಯೆಚಿ ಸಾಂಜ್ ವೆಳಾ ಆದಿಂಚ್ ಉದೆಲಿ. ಪಾತ್ಕಾಚಿ ವಾಟ್ಲಿ ಭರ್ಲಿ. ಕರ್ಮಾಚೆಂ ಲೇಖ್ ದಿಂವ್ಚೊ ವೇಳ್ ಆಯ್ತೊ ಜಾಲೊ! ಆತಾಂ ಮ್ಹಜ್ಯಾ ಭಿತರ್ ಏಕ್ ಆಶಾ ಉದೆಲಿ!
ಆತಾಂ ಹಾವೆಂ ನಿಮಾಣೊ ಪಾತ್ರ್ ಖೆಳೊಂಕ್ ಆಸಾ. ಪಡೊಂಕ್ ಆಯ್ತಿ ಜಾಲ್ಲಿ ವಾಲ್ ಧರ್ಣಿಕ್ ಶೆವ್ಟಾಲಿ. ಏಕ್ ಘೊಟ್ ಉದಾಕ್ ಮೆಳ್ಲ್ಲೆಂ ಜಾಲ್ಯಾರ್!? ಏಕ್ ಖಳ್ನಿ ಯೆತಾನಾಂಚ್ ಉದಾಕ್ ಘೆವ್ನ್ ಧಾಂವೊನ್ ಯೆಂವ್ಚಿ ಮಮ್ಮಿ ಮ್ಹಜ್ಯಾ ಗಯ್ರ್ಯಾ ದೊಳ್ಯಾಂಕ್ ದಿಸ್ಲಿ.
ಮ್ಹಜೆಂ ತಾರುಂ ಆಯ್ತೆಂ ಜಾಲಾಂ. ಮ್ಹಜ್ಯಾ ಭುರ್ಗ್ಯಾಂಚಿ ಗತ್ ಕಿತೆಂ? ಭಿಯಾನ್ ಕಂಗಾಲ್ ಜಾವ್ನ್ ಮ್ಹಾಕಾ ದೆಖ್ತಾಲಿಂ. ಮ್ಹಜೆ ದೊಳೆ ಧಾಂಪುಂಕ್ಯ್ ಆಯ್ಕಾನಾಸ್ತಾನಾ ಉಗ್ತೆಚ್ ಉರ್ಲೆ.
ಮಮ್ಮಿ ಡ್ಯಾಡಿನ್ ಕಿತ್ಲೊ ಅಡ್ದೊಸ್ ಮಾಗ್ಲ್ಲೊ. ’ನಾಕಾ ಪುತಾ ತಿ ಜಾತ್ ಬಾಳ್ವೊಂಕ್ ದೀನಾ" ಮ್ಹಣ್ತಾನಾ ಹಾಂವ್ ನವೊ ಅಧ್ಯಾಯ್ ಆರಂಬ್ ಕರ್ತಾಂ ಮ್ಹಣೊನ್ ಉಡ್ಲ್ಲಿಂ. ಉಡ್ಲ್ಲಿಂ ಪಡ್ಲಿಂ. ಆತಾಂ ಮೂಟ್ಭರ್ ಮಾತಿ ಕಶಿ ಪಡಾತ್? ಮ್ಹಣ್ ಚಿಂತಾಲಿಂ.
ಆತಾ ಪುಣೀ ಡ್ಯಾಡಿ ಮಮ್ಮಿ ಯೇವ್ನ್ ಮ್ಹಜಿ ಕೂಡ್ ಇಗರ್ಜೆಕ್ ವರುನ್ ಸಿಮಿಸ್ತ್ರೆ ಭಿತರ್ ಪುರ್ತಿತ್ಗೀ? ಕಶೆಂ ಸಾಂಗೊಂ ತೇಲ್ ಸಂಪ್ಲಾಂ ದಿವೊ ಪಾಲ್ವಾಲಾ.
’ಜೆಜು’ ಮ್ಹಣ್ತಾನಾ ಮ್ಹಜೊ ತಾಳೊ ಭಿಯೆಲೊ. ಹೆಂ ಸಾಂಗ್ಚೆಂ ಭಾಗ್ ಮ್ಹಾಕಾ ಆಸಾ? ಕೂಡ್ ಸೊಡ್ಲಿ ಕುಶಿನ್ ಲಿಪ್ಲಿ. ಕಾಣಿ ಸಂಪ್ಲಿ ದೆಕುನ್ ಕೂಡ್ ಭಿತರ್ ವೆಲಿ. ರಾಕೊನ್ ರಾವ್ಲಿಂ. ಮ್ಹಜಿಂ ಮಾಂಯ್ ಬಾಬ್ ಯೆತೆಲಿಂ. ನಿಮಾಣೊ ಸಂಸ್ಕಾರ್ ಕರ್ತೆಲಿಂ. ಸಪಾಣ್ ತೆಂ. ಕಸಪ್ಪಿ ಮನ್ಶ್ಯಾಂನಿ ಮ್ಹಜ್ಯಾ ಕುಡಿಚಿ ವೀದ್ ವಾವ್ಳಿ ಕರುನ್ಚ್ ಮ್ಹಾಕಾ ಖಫನ್ ಲುಗ್ಟಾಮ್ತ್ ರೆವ್ಡಾಯ್ಲೆಂ. ಮ್ಹಜ್ಯಾ ಖಾತಿರ್ ಕೊಣ್ಯ್ ರಡಾನಾತ್ಲ್ಲೆಂ. ’ಮಯ್ಯತ್ ಕಟೀಲ್’ ವಾವೊನ್ ಹಾಡ್ಲಿ. ತಾಂತುಂ ನವಿ ಮಾಂದ್ರಿ ಘಾಲ್ತಾಚ್ ಮ್ಹಾಕಾ ತಾಂತುಂ ನಿದಾಯ್ಲೆಂ. ತಾಂಬ್ಡೆಂ ಖಫನ್ ’ಮಯ್ಯತ್ ಕಟೀಲ್’ ಚೆರ್ ಘಾಲ್ತಾಚ್ ಫುಲಾಂ ಘಾಲಿಂ. ತವಳ್ ಜಾಲ್ಯಾರ್ ಕಿತ್ಲಿ ಸೊಭಿತ್ ಪೇಟ್, ಖುರಿಸ್ ರೀದ್, ಫುಲಾಂ, ಸೊಭಿತ್ ವಸ್ತ್ರಾನ್ ನ್ಹೆಸೊನ್ ಮ್ಹಾಕಾ ಮರ್ಯಾದಿನ್ ವರ್ತಿತ್. ಆತಾಂ....? ಜಡಾಯೆಚ್ಯಾ ಚಿರ್ಯಾ ಫಾತ್ರಾಕ್ ಉಡಂವ್ಚಿ ಉರ್ಬಾ. ಹ್ಯಾ ವೆಳಾರ್ಯ್ ಮ್ಹಾಕಾ ಮಮ್ಮಿ ಡ್ಯಾಡಿಚೊ ಉಡಾಸ್. ತಾಂಕಾ ಕೊಣೆಯ್ ಸಾಂಗ್ಲಾಗೀ?
ಕಬೂರ್ ಆಯ್ತೊ, ಬೊಟಾಂತ್ ಮೆಜ್ಚ್ಯಾ ತಿತ್ಲೆ ದಾದ್ಲೆ ’ಸಾಸ್ಣಾಚೊ ವಿಶೆವ್ ಮಾಗ್ತಾತ್’ ಮ್ಹಳ್ಳೆಂ ಸಾದ್ಯ್ಚ್ ನಾ ಜಾಲೆಂ. ಮೌಲ್ವಿನ್ ’ಮಯ್ಯತ್ಗೆ ತಸ್ಬೀತ್’ ಆರಂಭ್ ಕೆಲೆಂ. ಸಿಮಿತ್ರ್ ನ್ಹಯ್ ಖಬರ್ಸ್ತಾನಾಂತ್ ’ಕಬೂರ್’ ಆಯ್ತೊ ಜಾಲ್ಲೊ. ನವ್ಯಾ ಮಾಂದ್ರೆ ಸಮ್ಗಿಮ್ ಕಾವುಬಾ ಖಿಬುಲೆ ಕರ್ಚ್ಯಾ ಪರಿಂ ಮ್ಹಾಕಾ ನಿದಾಯ್ಲೆಂ.
ಮೌಲ್ವಿನ್ ’ಧುವಾ’ ಕರುಂಕ್ ಆರಂಬ್ ಕೆಲೆಂ. ’ಅಲ್ಲಾಹ್ ತುಜ್ಯಾ ಸವಾಲಾ ವೆಳಾರ್ ಹಾಕಾ ಥಿರ್ ಕರ್. ತಾಚ್ಯಾ ಮನಾಂತ್ ಜವಾಬಿ ತುಂ ಘಾಲ್. ತಾಚ್ಯಾ ದೊನೀ ಕುಶಿಂನಿ ಕಬ್ರನ್ ವಿಸ್ತಾರ್ ಕರ್. ಹಾಕಾ ತುಂ ಮಾನುನ್ ಘೆವ್ನ್ ಸ್ವೀಕಾರ್ ಕರ್’ ಮ್ಹಣ್ತಾಚ್ ಆಯಿಲ್ಲ್ಯಾಂನಿ ತಿತೀನ್ ಮುಟಿ ಮಾತಿ ಘಾಲಿ. ಕಬೂರ್ ಮಾತ್ಯೆಂತ್ ದಾಂಪ್ತಾನಾ ಮ್ಹಜ್ಯಾ ಪ್ರಾಯೆಚ್ಯಾ ಚುಕಿನ್ ಸ ವರ್ಸಾಂ ಹಾವೆಂ ಜಿಯೆಲ್ಲಿ ಜೀಣ್ ಸಂಪ್ತಾನಾ ಆನಿಕೀ ಗಳ್ಯಾಂತ್ ಶಿರ್ಕಾಲ್ಲಿ ದುಕ್ರಾ ಮಾಸಾಚಿ ಪೊಡ್ ಭಿತರ್ಲ್ಯಾ ಭಿತರ್ ಕುಸ್ತಾಲಿ!!!
***************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
