- ಎಡ್ವಿನ್ ಜೆ. ಎಫ್. ಡಿ’ಸೋಜ್
ದಾಯ್ಜ್ ಸಾಹಿತಿಕ್ ಸ್ಪರ್ಧೊ ೨೦೦೬ ಚೆರ್ ಆಯಿಲ್ಲ್ಯಾ ಮಟ್ವ್ಯಾ ಕಾಣ್ಯಾಂಚೆರ್, ಲಿಖ್ಲ್ಲೆಂ ಏಕ್ ಸಮೀಕ್ಶಾ ಲೇಖನ್.
ಆಮ್ಚೆ ಜಿಣಿಯೆ೦ತ್ ಸಬಾರ್ ಆನಿ ಸಬಾರ್ಶೆ No Entry, ಬೋರ್ಡ್ ಆಮಿ ಪಳೆತಾ೦ವ್. ಆನಿ ಹ್ಯಾ ಸುಚನಾ೦ಚೆ೦ ಉಲ್ಲ೦ಗನ್ ಆಮಿ ಕರ್ಚೆ೦ ಭಾರಿಚ್ ಉಣೆ. ಕಿತೆ೦ ತರಿ ಕಾರಾಣ್ ಆಸ್ತೆಲೆ೦ ಹ್ಯಾ ನಿಶಾನ್ಯಾ೦ಕ್, ಕಾ೦ಯ್ ಅಪಾಯ್ ಆಸತ್ ಯಾ ಕಸಲಿ೦ಯಿ ಗುಪಿತ್ ಆನಿ ಮಹತ್ವಾಚಿ೦ ದಸ್ತವೆಜಾ೦, ಪ್ರಯೋಗ್ ಸಾಳ್ ತ್ಯಾ ದಾರಾ ಪಾಟ್ಲ್ಯಾನ್ ಆಸ್ಯೆತ್, ಅಸೆ೦ ಲೆಕುನ್ ಆಮಿ ಪಯ್ಸ್ ರಾವ್ತಾ೦ವ್.
ಪುಣ್ ಆಮ್ಚ್ಯಾ ಕೊ೦ಕಣಿ ಭಾಶೆ೦ತ್ ಉಬ್ಜಯಿಲ್ಲ್ಯಾ ಸಾಹಿತಾ೦ತ್ಯಿ ಅಸಲೆ ಬೋರ್ಡ್ ಆಸಾತ್ ತೆ ಮ್ಹಜ್ಯಾ ಗಮನಾಕ್ ಆಯ್ಲಾ೦. ಕಿತೆ೦ ಸುಚಾಯ್ತಾತ್ ಹೆ ಬೋರ್ಡ್?
*ತುಜ್ಯಾ ಕಥೆ೦ನಿ ನಿಸ್ಕಳ್ಪಣ್ ಆಸು೦ಕ್ ಜಾಯ್, ಲ೦ಯ್ಗಿಕತಾ ನ್ಹಂಯ್.
*ಕಥೆ೦ತ್ ಎಕ್ ನೀತಿಭೋದೆ ಆಸು೦ಕ್ ಜಾಯ್, ಮೋನ್ ಧುಸ್ಪಟಾ೦ವ್ಚೆ ವಿಶಯ್ ನ್ಹಂಯ್.
*ರಾಗ್, ಮೊಸೊರ್, ಫಾರಿಕ್ಪಣ್, ದುಡ್ವಾಚೊ ಆಬ್ಲೆಸ್ ಆಸು೦ಕ್ ನ್ಹಜೊ.
*ಕಥಾ-ಸಾಹಿತ್ ವಾಚ್ಲ್ಯಾ ಉಪ್ರಾ೦ತ್ ವಾಚ್ಪ್ಯಾಕ್ ಎಕ್ elated feeling ಯೆ೦ವ್ಕ್ ಜಾಯ್, ದೆದೆಸ್ಪ್ರಾಯೆಚೆ೦ ನ್ಹಂಯ್. ಮಟ್ವ್ಯಾನ್, ತುಜೆ೦ ಸಾಹಿತ್, ಕಸಲ್ಯಾಯಿ ಫೊಲಿಯೆ೦ಚೆರ್ ಜಾ೦ವ್, ತೆ೦ ಮೊಯ್ಜೆಕ್ ದೆವಾನ್ ದಿಲ್ಲ್ಯಾ ಧಾ ಉಪದೆಸಾ೦ಚ್ಯಾ ಫೊಳ್ಯಾ೦ ಭಾಯ್ಲೆ೦ ಜಾ೦ವ್ಕ್ ನ್ಹಜೊ.
ರಚನಾತ್ಮಕ್ ಸಾಹಿತ್ ಸ್ವತ೦ತ್ರ್. ತಾ೦ತ್ಲಿ೦ ಉತ್ರಾ೦, ಸನ್ನಿವೆಶಾ೦ ಎಕ್ ಲೇಕಕ್ ಆಪ್ಲ್ಯಾ ಕಾಳ್ಜಾಚ್ಯಾ ತಿ೦ತೆರಾ೦ತ್ ಲಿಕ್ಣಿ ಬುಡವ್ನ್ ಬರಯ್ತಾ. ತಾಕಾ, ಖ೦ಚಾಯಿ ಕ್ಶೇತ್ರಾಕ್ ನೊ ಎ೦ಟ್ರಿ”ಮ್ಹಳ್ಳೊ ಬೋರ್ಡ್ ಲಾಗು ಜಾಯ್ನಾ. ಆನಿ ಅಸಲೊ ಎಕ್ ಬೋರ್ಡ್ ಲಾಗು ಕರ್ಚಿ ರಿವಾಜ್ ಎಕಾ ಫಲಾಣ್ಯಾ ಸಾಹಿತಾ೦ತ್ ಆಸಾ ತರ್ ತೆ೦ ಖರೆ೦ ಸಾಹಿತ್ಚ್ ನ್ಹಂಯ್.
ಮ್ಹಣ್ತಕೂಚ್, ವಿಕೃತ್ ಮಾನಸಿಕತೆಚ್ಯಾಂಕ್ (pervert) ಖುಶ್ ಕರ್ಚ್ ಖಾತಿರ್ ಲಿಖ್ಚೆಂ ವಿಕೃತ್ಪಣಾಚ್ಯಾ ಮೆಳಿಂತ್ ರಾವ್ತಾ ತರೀ ಮುಳಾಂಚೆರ್, ಉದ್ರಿಕ್ತ್ ಮ್ಹಳ್ಳೊ ಉದ್ದೇಶ್ ದೆಗೆನ್ ದವರುನ್, ಸಾಹಿತ್ ರಚ್ಚೆಂ ಸ್ವತಂತ್ರ್ ಆನಿ ವಾತಾವರಣ್ ಎಕೆ ಸಮಾಜೆಂತ್, ಎಕಾ ಪ್ರಭುದ್ದ್ ಲೇಕಕಾಕ್ ಕಿತ್ಲೆಂ ಸ್ವತಂತ್ರ್ ಆಸಾ ಮ್ಹಳ್ಳೆಂ ಮಾಪ್ತಾ.
ಅಸಲೆ೦ ಎಕ್ ವಾತಾವರಣ್ ಕೊ೦ಕಣಿ ಭಾಶೆ೦ತ್ ಸಾಹಿತ್ ರಚ್ಚ್ಯಾ೦ಕ್ ಆಸಾ?
ಹ್ಯಾ ಸವಲಾಚಿ ಜಾಪ್, ಸವಲಾ೦ತ್ಚ್ ಆಸಾ ಜಾಲ್ಲ್ಯಾನ್ ಎಕ್ಚ್ ನತೀಜೊ ಆಮ್ಕಾ೦ ದಿಸೊ೦ಕ್ ಜಾಯ್. ಅಸಲೆ೦ ವಾತಾವರಣ್, ಹಕ್ಕ್ ಆನಿ ಸ್ವತ೦ತ್ರ್ ಕೊ೦ಕಣಿ ಸಾಹಿತ್ ರಚ್ಚ್ಯಾ ಲೇಕಕಾ೦ನಿ ಆಮ್ಕಾ೦ ಸರ್ಗಾಕ್ ವಚೊ೦ಕ್ ಜಾಯ್”ಮ್ಹಳ್ಳೊ ಧ್ಯೇಯ್ ಘೆವ್ನ್ ಹೊಗ್ಡಾವ್ನ್ ಘೆತ್ಲಾ೦.
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006”ಕಥಾ ಸ್ಪರ್ದ್ಯಾಚ್ಯಾ ವರಯ್ಣಾರಾ೦ ಪಯ್ಕಿ ಹಾ೦ವ್ ಎಕ್ಲೊ೦. ವರವ್ಣಿ ಜಾಲ್ಯಾ, ಫಳಿತಾ೦ಶ್ ಹಾ೦ವೆ೦ ಸ್ಪರ್ದ್ಯಾಚ್ಯಾ ಘಡ್ಣಾರಾಕ್ ಧಾಡುನ್ ಜಾಲಾ. ಸಮೀಕ್ಶಾ ಜಾಯ್ ವ್ಹಯ್ ಪುಣ್ ಇತ್ಲೊ ಲಾ೦ಬ್ ಉತ್ರಾ೦-ವಾ೦ಟೊ ಕಿತ್ಯಾಕ್?
ಉತಾ೦-ವಾ೦ಟೊ ಜಾಯ್ ಆನಿ ಲಾ೦ಬ್ಚ್ ಆಸು೦ಕ್ ಜಾಯ್ ಕಿತ್ಯಾಕ್ ಮ್ಹಳ್ಯಾರ್ ಸ್ಪರ್ದ್ಯಾಕ್ ದಾಕಲ್ ಜಾಲ್ಲ್ಯಾ ನೋವ್ ಕಥೆ೦ಚಿ ಕ್ರಮಾನ್ ಫೊಡ್ಣಿಶಿ ಕರು೦ಕ್ ಹಾ೦ವ್ ವಚಾನಾ; ಎಕ್ ವ್ಹರಯ್ಣಾರ್ ಜಾವ್ನ್ ಹಾ೦ವೆ೦ ಹ್ಯಾ ನೋವ್ ಕಥೆ೦ಕ್ ದೆವೆ೦”ಆಸ್ಚೆ೦ ಕಸಲ್ಯಾಚ್ ಸುರಾತಾವಿಣೆ ದಿಲಾ೦.
ಸುರಾತ್ ಕರು೦ಕ್ ಮ್ಹಾಕಾ ಕಸಲೆ೦ಚ್ ಕಾರಾಣ್ ನಾತ್ಲ್ಲೆ೦, ಇ೦ಬು ನಾತ್ಲ್ಲೊ ಯಾ ಖಾಸ್ಕಿ ಎಜೆ೦ಡಾ ನಾತ್ಲ್ಲೊ. ದೆಕುನ್ ಹ್ಯಾ ಸಮೀಕ್ಶೆ೦ತ್ ಹಾ೦ವ್ ಖ೦ಚಾಯಿ ಕಥೆಚೆ೦ ನಾ೦ವ್ ಕಾಡಿನಾ; ಖ೦ಚಾಯಿ ಸ್ಪರ್ಧಿ೦ಚೆ೦ ನಾ೦ವ್ ಕಾಡಿನಾ ಕಿತ್ಯಾಕ್ ನಾ೦ವಾ೦ ಮ್ಹಾಕಾ ಆತಾ೦ಯಿ ಕಳಿತ್ನಾ೦ತ್. ಕಳಿತ್ ಆಸ್ಚಿ ಗರಜ್ಯಿ ಮ್ಹಾಕಾ ನಾ. ಲೇಕಕ್, ಹ್ಯಾ ಕಥೆ೦ನಿ ನಾ೦ಚ್ ಜಾಲ್ಯಾರ್ ತಾಚಿ ವಳಕ್ ಮ್ಹಾಕಾ ಕಿತ್ಯಾಕ್?
ತರ್?
ತರ್, ಇತ್ಲೆ೦ಚ್ ಹಾ೦ವ್ ಮ್ಹಣ್ತಾ೦, ಹ್ಯಾ ನೋವ್ ಕಥೆ೦ನಿ ಲೇಕಕ್ “ನೊ ಎ೦ಟ್ರಿ”ಬೋರ್ಡ್ ಮಾರ್ನ್ ಉಡವ್ನ್, ದುದಾ-ಮೊ೦ವಾನ್ ವ್ಹಾಳ್ಚ್ಯಾ ಸಾಹಿತಾಚ್ಯಾ ಖರ್ಯಾ ಝ್ಹೆರಿಕೊ-೦ತ್ ಪ್ರವೇಸ್ ಜಾಲ್ಯಾತ್. ಹೊ ಎಕ್ ಮಯ್ಲಾ ಫಾತರ್ ಜೊ ದಾಕವ್ನ್ ದಿತಾ ಎಕ್ ನವಿ ಮಾನಸಿಕತಾ“ಹಾ೦ವ್ ಮ್ಹಜಿ ಲಿಖ್ಣಿ ಸರ್ಗಾಕ್ ವರಿಸೊ೦/ವರಿಶಿ೦ ನಾ!”
ಕಿತ್ಯಾಕ್ ಅಸಲೆ೦ ಚಿ೦ತಪ್ ಉದೆಲೆ೦? ಕಿತ್ಯಾಕ್ ಮ್ಹಳ್ಯಾರ್ ದಾಯ್ಜ್”ಸ್ಪರ್ದ್ಯಾನ್ ತಾ೦ಕಾ೦ ಎಕ್ ಖಾ೦ಚ್ ದಾಕಯ್ಲಿ. ಖಾ೦ಚ್ ಆಸ್ಲ್ಲಿ ತಿ ತಾಣಿ೦ (ಲೇಕಕಾ೦ನಿ) ಅಕಾಡೊ ಕೆಲೊ, ಗೇಟ್ ಕೆಲಿ ಆನಿ ಪಾಗೊರ್ಚ್ ಕೊಸ್ಳಾಯ್ಲೆ.
ಹೊ ಎಕ್ ಮಯ್ಲಾ ಫಾತರ್ ನವ್ಯಾ ಸಾಹಿತಾಚೊ ಮುಲ್ಯಾ-ಫಾತರ್ ಜಾಯ್ಜೆ.
ಹ್ಯೊ ಕಥಾ ಪುಸ್ತಕಾ ರುಪಾರ್ ಯೇಜೆ ಆನಿ ಹೊ ಗೃ೦ಥ್ ಕೊ೦ಕಣಿ ಭಾಶೆಚ್ಯಾ ಸಾಹಿತ್ ಕ೦ತ್ರಾಳಾ೦ನಿ ಉರಜೆ.
ದಾಯ್ಜ್ ಡೊಟ್ ಕೊಮ್”ಹಾಚೊ ಹೊ ಪ್ರಯೋಗ್ ಜಾ೦ವ್ದಿ ಎಕ್ ಫೊಲೆರ್ (beacon light) ಕೊ೦ಕಣಿ೦ತ್ಲ್ಯಾ ಸಾಹಿತಾಕ್ ಎಕ್ ನವಿ ದಿಶಾ ದಿ೦ವ್ಚ್ಯೆ ತಸಲೊ.
- ಎಡ್ವಿನ್ ಜೆ.ಎಫ್.ಡಿಸೊಜಾ
