ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಕೊಂಕ್ಣಿ ಭಾಸ್ ಆನಿ ಲಿಪಿ
- ದೊನಾತ್ ಅಲ್ಮೇಡಾ, ತೊಟ್ಟಾಮ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ವೊರಾಯ್ಣಾರಾಂಚಿ ಶಿಫಾರಸ್ ಜೊಡ್ಲ್ಲೆಂ ಲೇಖನ್]
ಕೊಂಕ್ಣಿ ಭಾಸೆಕ್ ಸಂವಿಧಾನಾಚೆ ಆಟ್ವ್ಯೆ ವೊಳೆರಿಂತ್ ಜೊಕ್ತೊ ಜಾಗೊ ಮೆಳ್ಳ್ಯಾರೀ ಲಿಪಿಯೆ ವಿಶ್ಯಾಂತ್ಲೆ ಸಮಸ್ಸೆ ನಿವಾರ್ಚೆಂ ಆಮ್ಕಾಂ ದಿಸಾನಾಂತ್ ನ್ಹಂಯ್ಗಿ? ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ದೇವ್ನಾಗರಿ ಲಿಪಿಯೆಂತ್ಲ್ಯಾ ಚಡಾವತ್ ಪುಸ್ತಕಾಕ್ ಮಾತ್ರ್ ಪುರಸ್ಕಾರ್ ದಿತಾನಾ, ಕಾನಡಿ ಲಿಪಿಯೆಂತ್ಲ್ಯಾ ಲೇಖಕಾಂಕ್ ಖಂಡಿತ್ ಜಾವ್ನ್ ಅನ್ನ್ಯಾಯ್ ಜಾತಾ ಮ್ಹಣ್ ಮ್ಹಾಕಾ ಭೊಗ್ತಾ. ಕನ್ನಡ ಲಿಪಿಯೆಂತ್ ತಯಾರ್ ಕೆಲ್ಲೆಂ ಸಾಹಿತ್ಯ್ ಚಡ್ ಆಸಾ. ಭಾಸೆಚ್ಯಾ ಹೆರ್ ಲಿಪಿಯಾಂನಿ ತಯಾರ್ ಕೆಲ್ಲೆಂ ಸಾಹಿತ್ಯ್ ಉಣೆಂ ನ್ಹಂಯ್ಗಿ? ಕಿತ್ಯಾಕ್ ಹ್ಯಾ ವಿಶ್ಯಾಂತ್ ಭೇಧ್-ಭಾವ್ ಕರ್ಚೊ? ಹೆಂ ಸಾರ್ಕೆಂ ನ್ಹಂಯ್ ಮ್ಹಣ್ ಮ್ಹಾಕಾ ಭೊಗ್ತಾ.
ವ್ಹಯ್ ರೊಮಿ ಲಿಪಿ ಚಡ್ ಬರಿ ಮ್ಹಣ್ ಕೊಂಕ್ಣಿ ಜಾಣಾರಿ ಸಾಂಗ್ತಾತ್. ತರ್ ಲಿಪಿ ಕಳಿತ್ ನಾತ್ಲ್ಲ್ಯಾ ಮ್ಹಜ್ಯಾಬರಿಂ ಆಸ್ಲ್ಲ್ಯಾ ಲೇಖಕಾನ್ ಕಿತೆಂ ಕರ್ಚೆಂ? ಜಾಗತಿಕ್ ಮಟ್ಟ್ ಮ್ಹಣೊನ್ ಆಮ್ಚ್ಯಾ ಹಳ್ಳೆಂತ್ಲ್ಯಾಂಕ್ ಸೊಡುಂಕ್ ಜಾತಾಗಿ? ಹೆಂ ಸಾರ್ಕೆಂ ನ್ಹಂಯ್! ಕಿತ್ಯಾಕ್ ಮ್ಹಳ್ಯಾರ್ ಆದಿಂ ಥಾವ್ನ್ ಕನ್ನಡ ಲಿಪಿಂತ್ ಬರವ್ನ್ ಶ್ರೇಷ್ಟ್ ಮಟ್ಟಾಚೆಂ ಸಾಹಿತ್ಯ್ ರಚನ್ ಕೆಲ್ಲೆಂ ಹಳ್ಳೆಂಚ್ಯಾ ವ್ಯಕ್ತಿಂನಿ ಜಾವ್ನಾಸಾ ಮ್ಹಣ್ ಸಾಂಗ್ಲ್ಯಾರ್ ಚೂಕ್ ಜಾಂವ್ಚಿನಾ. ಆತಾಂಯ್ ಮಂಗ್ಳುರಾಂತ್ಲಿಂ ಹರ್ಯೆಕ್ ಕೊಂಕ್ಣಿ ಪತ್ರಾಂ ಕನ್ನಡಲಿಪಿಯೆಂತ್ಚ್ ಪರ್ಗಟ್ತಾ ನ್ಹಂಯ್ಗಿ?
ಆಮ್ಚ್ಯಾ ಇಸ್ಕೊಲಾಂನಿ ಕೊಂಕ್ಣಿ ಶಿಕಯ್ತಾತ್ ಮ್ಹಣ್ ಥಂಯ್ ಹಾಂಗಾ ಆಯ್ಕೊಂಕ್ ಮೆಳ್ತಾ. ಹೆಂ ಕಾರ್ಯಗತ್ ಕರ್ಚೆಂ ಕೊಣೆಂ? ಥಂಯ್ ಹಾಂಗಾ ಲಿಪಿಯೆ ಥಂಯ್ ಗುಸ್ಪೊಡ್ ಗೊಂದೊಳ್ ಕರ್ಚೊ ಕಿತ್ಯಾಕ್ ಆಮಿ ಕ್ರಿಸ್ತಾಂವ್ ಮಾತ್ರ್ ಕೊಂಕ್ಣೆ ನ್ಹಂಯ್? ಹೆರ್ ಜಾತಿಚ್ಯಾಂಕಿ ಕೊಂಕ್ಣೆ ಥಂಯ್ ಬರೊ ಅಭಿಮಾನ್ ಆಸಾ. ಆನಿ ತಿಂ ಬರೆಂ ಕರ್ನ್ ಉಲಯ್ತಾತ್ ಮಾತ್ರ್ ನ್ಹಂಯ್ ಕನ್ನಡ ಲಿಪಿಯೆಂತ್ ಬರಯ್ತಾತ್. ಕೊಂಕ್ಣಿ ಉಲಯ್ತೆಲ್ಯಾಂಚೊ ಸಂಖೊ ಕರ್ನಾಟಕಾಂತ್ ತಶೆಂ ಗೊಯಾಂತ್ ಚಡ್ ಆಸಾ ನ್ಹಂಯ್ಗಿ? ವ್ಹಯ್ ಇಂಗ್ಲಿಶ್ ಭಾಸೆಚಾ ಪ್ರಭಾವಾವರ್ವಿಂ ಕೊಂಕ್ಣಿಭಾಸ್ ಪ್ರತ್ಯೇಕ್ ಜಾವ್ನ್ ಶೆರಾಂತ್ ಮೊರೊನ್ ವೆತಾಂ ಮ್ಹಳ್ಳೆಂ ಸತ್ ಮ್ಹಣ್ ಮ್ಹಾಕಾ ಭೊಗ್ತಾ. ಹೆಂ ಆಮ್ಚ್ಯಾ ಫುಡಾರ್ಯಾಂಕ್ ಆನಿಕ್ಯೀ ಕಳೊಂಕ್ ನಾ ಮ್ಹಣ್ ದಿಸ್ತಾ. ವ್ಹಯ್ ಕೊಂಕ್ಣಿ ಮಿಸಾಂ ವಚೊನ್ ಇಂಗ್ಲಿಶ್ ಮಿಸಾಂ ಯೇಂವ್ಕ್ ಲಾಗ್ಲ್ಯಾಂತ್. ದೊತೊರ್ನ್ ಇಂಗ್ಲಿಶಾಂತ್ ಸುರು ಜಾಲ್ಯಾ. ಅಶೆಂ ಕೆಲ್ಲೆನಿಮ್ತಿಂಚ್ ಆಮ್ಚ್ಯಾ ಕೊಂಕ್ಣಿ ಭಾಸೆಕ್ ಮಾರ್ ಪಡ್ಲಾ ನ್ಹಂಯ್ಗಿ? ಹಳ್ಳೆಂಚ್ಯಾ ಫಿರ್ಗಜ್ಯಾಂನಿ ಇಂಗ್ಲಿಶ್ ಭಾಸೆಕ್ ತಿತ್ಲೊ ಹೊರ್ಭೊಸ್ ನಾ ನ್ಹಂಯ್ಗಿ? ತರ್ ಹೊ ಲಿಪಿಚೊ ಸಮಸ್ಸೊ ಕಿತ್ಯಾಕ್ ಹಾಡ್ಚೊ?
ವ್ಹಯ್ ಮಂಗ್ಳುರ್ ದಿಯೆಸೆಜಿಂತ್ ಜರ್ ಕೊಂಕ್ಣಿ ಭಾಸ್ ಇತ್ಲ್ಯಾ ಮಟ್ಟಾರ್ ಉರ್ಲ್ಯಾ ತರ್ ಹಾಕಾ ಆಮ್ಚೊ ಸರ್ವ್ ಫಿರ್ಗಜೆಚೊ ಆನಿ ಹಳ್ಳೆಚೊ ಲೋಕ್ ಮ್ಹಣ್ತಾಂ ಹಾಂವ್. ಹೆರ್ ಸಭಾರ್ ಸಂಘ್-ಸಂಸ್ಥ್ಯಾಂನಿ ಕೊಂಕ್ಣಿ ಭಾಸೆ ಥಂಯ್ ಅಭಿಮಾನ್ ದವ್ರುನ್ ಜಿವಿ ದವ್ರುಂಕ್ ತಾಣಿಂ ಹರ್ ಪ್ರೇತನ್ ಕೆಲಾಂ ಮ್ಹಳ್ಳೆಂ ಖಂಡಿತ್. ಹೆಂ ಕೆಲ್ಲೆಂ ಆಮಿಂ ಪಾವಾನಾ - ಅನಿಕ್ಯ್ ಚಡ್ ಆನಿ ಚಡ್ ಕರುಂಕ್ ಜಾಯ್.
ವ್ಹಯ್ ಕೊಂಕ್ಣಿ ಭಾಸ್ ಇಂಡೋ ಯುರೋಪಿಯನ್ ಭಾಸಾಂಚ್ಯಾ ಕುಟ್ಮಾಂತ್, ಇಂಡೋ ಇರಾನಿಯನ್ ವರ್ಗಾಜ್ ಲಗ್ತಿ ಜಾತಾ. ಹ್ಯಾ ವರ್ಗಾಚ್ಯೊ ಹೆರ್ ಭಾಸೊ ಪಂಜಾಬಿ ಆನಿ ಹಿಂದಿ, ಕಾಶ್ಮೀರಿ, ಗುಜರಾತಿ, ಮರಾಠಿ, ಹರ್ಯಾಣಿ, ಒರಿಯಾ, ಬೆಂಗಾಳಿ ಇತ್ಯಾದಿ ಜಾವ್ನಾಸಾತ್. ಹಾಂಗಾಸರ್ ಚಡಾವತ್ ಬರಯ್ತಾನಾ ದೇವ್ನಾಗರಿ ಲಿಪಿ ಉಪ್ಯೋಗ್ ಕರ್ತಾತ್ ಮ್ಹಳ್ಳೆಂ ಆಮ್ಕಾಂ ಕಳೊನ್ ಯೆತಾ. ವ್ಹಯ್ ಕನ್ನಡ ಲಿಪಿಂತ್ ಬರಯಿಲ್ಲೆ ಕಿತ್ಲೆಶೆ ಬೂಕ್ ಅಕಾಡೆಮಿಚ್ಯಾ ಪ್ರಶಸ್ತೆಕ್ ಫಾವೊ ಜಾಲ್ಯಾತ್ ಮಾತ್ರ್ ನ್ಹಂಯ್ ತ್ಯಾ ಲೇಖಕಾಕ್ ಗೌರವ್ ಆನಿ ಮಾನ್ ಮೆಳ್ಳಾ ಮ್ಹಳ್ಳೆಂ ಸತ್ ಜಾವ್ನಾಸಾ. ಆತಾಂ ಕೊಂಕ್ಣಿ ಕುಳಾರಾಂತ್, ಕೊಂಕ್ಣಿ ರಾಜ್ಯಾಂತ್ ಆಮ್ಕಾಂ ಕೊಂಕ್ಣೆಕ್ ಸ್ಥಾನ್ ಮಾನ್ ನಾ ಕಿತ್ಯಾಕ್?
ವ್ಹಯ್ ಗೊಯಾಂತ್ ಪಾಂಚ್ವೆ ಕ್ಲಾಸಿ ಥಾವ್ನ್ ಧಾವಿ ಮ್ಹಣಾಸರ್ ಕೊಂಕ್ಣಿ ಭಾಸ್ ಘೆಂವ್ಕ್ ಜ್ಯಾರಿ ಆನಿ ಥಂಯ್ಚರ್ ಶಿಕಯ್ತಾತ್ ಮ್ಹಣ್ ಆಮ್ಕಾಂ ಕಳೊನ್ ಯೆತಾ. ಹೆಂ ಬರೆಂ ಮ್ಹಣ್ ಮ್ಹಾಕಾ ಭೊಗ್ತಾ.
1882 ವರ್ಸಾ ಜೆಜ್ವಿತಾಂನಿ ಕೊಡಿಯಾಲ್ಬೈಲ್ ಪ್ರೆಸ್ಸ್ ಸುರು ಕರ್ತಚ್ಚ್ ಥಂಯ್ಚರ್ ಕನ್ನಡ ಲಿಪಿಯೆಂತ್ ಕೊಂಕ್ಣಿ ಸಾಹಿತ್ಯ್ ಪರ್ಗಟುಂಕ್ ಸುರು ಕೆಲೆಂ. ವ್ಹಯ್ ತ್ಯಾ ಕಾಳಾ ಥಾವ್ನ್ ಆಜ್ ಮ್ಹಣಾಸರ್ ಕೊಂಕ್ಣಿ ಸಾಹಿತ್ಯ್, ಪುಸ್ತಕಾಂ, ನೆಮಾಳಿಂ, ನಾಟಕ್, ಭಕ್ತಿಕ್ ಇಗ್ತಾಂ, ಕೊವ್ಳ್ಯೊ, ಸಿಡಿ, ಫಿಲ್ಮಾಂ ತಶೆಂ ಪದಾಂಚಾ ರುಪಾರ್ ದರಬಸ್ತ್ ಸಾಹಿತ್ಯ್ ಕನ್ನಡ ಲಿಪಿಂತ್ ರಚುನ್ ಆಯ್ಲಾಂ ನ್ಹಂಯ್ಗಿ?
ಸತ್ ಸಾಂಗೊಂ ತರ್ ಜಿತ್ಲೆಂ ಬುಕಾರುಪಾಚೆಂ ಸಾಹಿತ್ಯ್ ಕನ್ನಡ ಲಿಪಿಚಾ ಕೊಂಕ್ಣೆಂತ್ ಆಸಾಗಿ ತಿತ್ಲೆಂ ಹೆರ್ ಲಿಪಿಂನಿ ಭಿಲ್ಕುಲ್ ನಾ.ಕನ್ನಡ ಲಿಪಿಯಾಂತ್ಲ್ಯಾ ಪುಸ್ತಕಾಂನಿ ಧಾರ್ಮಿಕ್ ಬುಕಾಂಚೊ ಪ್ರಚಾರ್ ಚಡ್ ಆಸಾ, ಜಾಂವ್ಕ್ ಪುರೊ ತೊ ಭಕ್ತಿಕ್ ಗಿತಾಂಚೊ ಬೂಕ್ ವಾ ವಾಂಜೆಲ್. ಭೋವ್ಶಾ ಕನ್ನಡ ಲಿಪಿಯೆಂತ್ಲಿ ಕೊಂಕ್ಣಿ ಇತ್ಲಿ ಲೊಕಾಂಕ್ ಪಾವ್ಲ್ಯಾ ತರ್ ಹಾಕಾ ಧಾರ್ಮಿಕ್ ಬುಕಾಂಚೊ ಪ್ರಚಾರ್ಯ್ ಕಾರಾಣ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ದೆಖುನ್ ಕೊಂಕ್ಣಿ ಲೊಕಾಂ ಮಧೆಂ ವಾಸ್ಚಿ ಆನಿ ಬರಂವ್ಚಿ ಸವಯ್ ಸುರು ಜಾಲಿ ಮ್ಹಳ್ಳೆಂ
ಖಂಡಿತ್. ವ್ಹಯ್ ಮಟ್ವ್ಯೊ ಕಥಾ, ಕಾದಂಬರಿ, ಪದಾಂ ಹೆಂ ಸಾಹಿತ್ಯ್ ಹಾಂಗಾ ಆಮ್ಚ್ಯಾ ಕರ್ನಾಟಕಾಂತ್ ಚಡ್ ಆನಿ ಚಡ್ ನ್ಹಂಯ್ಗಿ? ವ್ಹಯ್ ಕೊಂಕ್ಣಿ ಲೇಖಕಾಂಚಾ ಲಿಪಿಯೆಚ್ಯಾ ಕುತಂತ್ರಿ ಖೆಳಾಕ್ ಲಾಗೊನ್ ತಶೆಂಚ್ ಫುಡ್ಲಿ ನದರ್ ದವ್ರುನ್ ಆಪ್ಲ್ಯಾ ಹಕ್ಕಾ ಖಾತಿರ್ ಎಕ್ವಟಾನ್ ಆನಿ ಖಳಾನಾಸ್ತಾನಾ ಮೊಟೊ ವಾವ್ರ್ ತಾಣಿಂ ಕರಿನಾಸ್ತಾನಾ ಆಪಾಪ್ಲೆ ಪಂಗಡ್ ಉಭೆ ಕರ್ನ್ ರಾಜ್ ಚಲಂವ್ಚ್ಯಾ ಹಾಂಗಾಚ್ಯಾ ಲೇಖಕಾಂಕ್ ಲಾಗೊನ್ ಹಾಂಗಾಚ್ಯಾ ಕಾಂಯ್ ಸಕತ್ದಾರ್ ಆನಿ ನಾಂವ್ ಆಸ್ಲ್ಲ್ಯಾ ಲೇಖಕಾಂಕ್ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಮೆಳ್ಳೊನಾ ನ್ಹಂಯ್ಗಿ?
ವ್ಹಯ್ ಪಾಟ್ಲ್ಯಾ ಸಭಾರ್ ವರ್ಸಾಂನಿ ಗಲ್ಫಾಂನಿ ಆಪ್ಲ್ಯಾ ಥೊಡ್ಯಾ ಕೊಂಕ್ಣಿ ಬರವ್ಪ್ಯಾಂಕ್ ಮಾನಾಚೆಂ ತಶೆಂ ಗೌರವಾಚೆ ಪುರಸ್ಕಾರ್ ಆನಿ ಪ್ರಶಸ್ಥಿ ದೀಂವ್ಕ್ ವಿವಿಧ್ ಸಂಸ್ಥೆ ಮುಖಾರ್ ಆಯ್ಲ್ಯಾತ್. ನೀಜ್ ಜಾವ್ನ್ ತಾಂಕಾಂ ಹೊಗ್ಳಿಕ್ ಫಾವೊ ಮ್ಹಣ್ತಾಂ ಹಾಂವ್. ತಾಂಕಾಂ ಸರ್ವಾಂಕ್ ಹಾಂವ್ ಮಾನಾಚೆಂ ಚೆಪೆಂ ಉಕಲ್ನ್ ಮಾನ್ ಭಾಗಯ್ತಾಂ. ವ್ಹಯ್ ಗಲ್ಫಾಂತ್ ಕೊಂಕ್ಣಿವಿಶಿಂ ನವಿ ಜಾಗೃತಿ ಸುರು ಜಾಲ್ಯಾ. ಹೆಂ ವಿವಿಧ್ ಪತ್ರಿಕೆಂನಿ ವಾಚುನ್ ತಶೆಂ ಆಯ್ಕೊನ್ ಸಂತೊಸ್ ಜಾತಾ. ತಿತ್ಲೆಂಚ್ ನ್ಹಂಯ್ ಆಸ್ತಾಂ ಮುಂಬಂಯ್ತ್ ಸಯ್ತ್ ಥೊಡ್ಯಾ ಪತ್ರಾಂಕ್ ಆನಿ ವ್ಯಕ್ತಿಂಕ್ ಲಾಗೊನ್ ಕನ್ನಡ ಲಿಪಿಯೆಂತ್ ಬರಯಿಲ್ಲ್ಯಾನ್ ಕೊಂಕ್ಣಿ ಚಡ್ ಜಿವಾಳ್ ಜಾಲ್ಯಾ ನ್ಹಂಯ್ಗಿ? ಹೆಂ ಸರ್ವ್ ಚಿಂತಾನಾ ಕೊಂಕ್ಣಿ ಜಿವಾಳ್ ಜಾಂವ್ಚಾ ಬರಿ ದಿಸೊನ್ ಯೆತಾ.
ಮೊನ್ಸಿಞೊರ್ ಸಿಲ್ವೆಸ್ಟರ್ ಮಿನೇಜ್ (ರಾಕ್ಣೊ ಸ್ಥಾಪಕ್) ಹಾಚ್ಯಾ ಕಾಳಾಥಾವ್ನ್ ಹಾವೆಂ ಬರಂವ್ಕ್ ಸುರು ಕೆಲ್ಲೆಂ. ತ್ಯಾ ವೆಳಾರ್ ಕನ್ನಡ ಲಿಪಿಂತ್ ಹಾವೆಂ ತಯಾರ್ ಕೆಲ್ಲೆಂ ಲ್ಹಾನ್ ಲ್ಹಾನ್ ಬರ್ಪಾಂಕ್ ಪರ್ಗಟ್ಲಾಂ, ತೆದ್ನಾಂ ಥಾವ್ನ್ ಅಜೂನ್ ಪರ್ಯಾಂತ್ ಬರವ್ನ್ ಆಯ್ಲಾಂ ಆನಿ ವಿವಿಧ್ ಪತ್ರಾಂಕ್ ಮೊಟೊ ಆಧಾರ್ ದೀವ್ನ್ ಆಯ್ಲಾಂ ಮ್ಹಣ್ ಉಚಾರುಂಕ್ ಸಂತೊಸ್ ಪಾವ್ತಾಂ. ಮೊನ್ಸಿಞೊರ್ ಸಿಲ್ವೆಸ್ಟರ್ ಮಿನೇಜ್ ಆನಿ ಸ್ವಾಮಿ ಸುಪ್ರಿಯಾ ಹಾಣಿಂ ದೊನ್ಶ್ಯಾಂಚಾಕೀ ಚಡ್ ಬೂಕ್ ಪರ್ಗಟ್ಲ್ಯಾತ್. ತರ್ಯ್ ಆತಾಂ ಹೊ ಲಿಪಿಯೆಚೊ ಗುಸ್ಪೊಡ್ ಗೊಂದೊಳ್!
ವ್ಹಯ್ ಕೊಂಕ್ಣಿ ಭಾಸ್ ಕೆನರಾಂತ್, ತೇಂಯ್ ವಿಭಾಜಿತ್ ದಕ್ಶಿಣ್ ಕನ್ನಡ್ ಜಿಲ್ಲ್ಯಾಂತ್ ಆಸ್ಲ್ಲೆ ತಿತ್ಲಿ ಸಕ್ರಿಯ್ ಹೆರ್ ಜಾಗ್ಯಾಂನಿ ನಾ ನ್ಹಂಯ್ಗಿ? ಗೊಂಯಾಂ ಪ್ರಾಸ್ ಕೆನರಾಂತ್ ಕೊಂಕ್ಣಿ ಚಡ್ ಜಿವಾಳ್ ಆತಾಂ ಮ್ಹಳ್ಳೆಂ ಖಂಡಿತ್ ಮ್ಹಣ್ ಮ್ಹಾಕಾ ಭೊಗ್ತಾ. ಥೆಂಯೀ ಹಾಂಗಾಸರ್ ಕಾರ್ಯಾಳ್ ಆತಾಂ ನ್ಹಂಯ್ಗಿ? ಕೊಂಕ್ಣಿ ಕಾಥೊಲಿಕಾಂ ಮಧೆಂ ಆಸ್ಚೆ ತಿತ್ಲಿಂ ಕೊಂಕ್ಣಿ ಪತ್ರಾಂ ಪರ್ಗಟ್ ಜಾಂವ್ಚೆ ಕೊಂಕ್ಣಿ ಬೂಕ್ (ಕನ್ನಡ ಲಿಪಿಯೆಂತ್) ಹೆರ್ ಮುಳಾಂಚ್ಯಾ ಕೊಂಕ್ಣಿ ಲೊಕಾಂ ಮಧೆಂ ನಾಂತ್ ನ್ಹಂಯ್ಗಿ? ಎಕಾ ಉತ್ರಾನ್ ಹಾವೆಂ ಸಾಂಗ್ಚೆಂ ತರ್ ಕೊಂಕ್ಣಿ ಭಾಸ್ ಸಾಂಭಾಳ್ನ್ ಹಾಡ್ಲ್ಲಿ ಚಡ್ ಜಾವ್ನ್ ಕಾಥೊಲಿಕಾನಿಂಚ್. ಹೆಂ ಸಕ್ಕಡ್ ಸಾಹಿತ್ಯ್ ರಚನ್ ಕನ್ನಡ ಲಿಪಿಂತ್ ಜಾತಾ ನ್ಹಂಯ್ಗಿ? ಹೆರ್ ಜಾತಿ ಪಂಗ್ಡಾಚೆ ಕೊಂಕ್ಣಿ ಉಲಯ್ತಾತ್, ಪುಣ್ ಸಾಹಿತ್ಯ್ ಜಾವ್ನ್ ತಾಂಚಾಮಧೆಂ ಕೊಂಕ್ಣಿ ಅಜೂನ್ ಉದೆಲಿ ನಾ ಮ್ಹಣ್ ಮ್ಹಜೆಂ ಚಿಂತಾಪ್.
ಕೆನರಾಂತ್ ಕೊಂಕ್ಣೆಕ್ ಕನ್ನಡ ಲಿಪಿ ಮುಖಾರುನ್ ವ್ಹರುಂಕ್ ಜೆರಾಲ್ ಅಡ್ಕಳ್ಯೊ ನಾಂತ್ ಮ್ಹಣ್ ಭೊಗ್ತಾ. ಅಡೆಭಾಗ್ ಆಯಿಲ್ಲೊ ಶೆರಾಂತ್ಲೊ ಥೊಡೊಲೋಕ್ ಸೊಡ್ಳ್ಯಾರ್ ಚಡ್ತಾವ್ ಜಣಾಂ ಆಪ್ಲ್ಯಾ ಘರಾಂನಿ ಕೊಂಕ್ಣಿ ಉಲಯ್ತಾತ್ ಆನಿ ಕೊಂಕ್ಣೆಂತ್ಚ್ ಕಾರ್ಯಿಂ ಜಾತಾತ್ ನ್ಹಂಯ್ಗಿ?
ಕನ್ನಡ ಇಸ್ಕೊಲಾಂನಿ ಕನ್ನಡ ಲಿಪಿಂತ್ ಬರಯಿಲ್ಲ್ಯಾ ಪುಸ್ತಕಾಂಚಿ ವಳೊಕ್ ಖಂಡಿತ್ ಆಸಾ ದೆಖುನ್ ಪತ್ರಾಂ ಪುಸ್ತಕಾಂ ವಾಚಾಪ್ ತಾಂಕಾಂ ಕಶ್ಟ್ ಜಾಯ್ನಾಂತ್ ನ್ಹಂಯ್ಗಿ? ಗಲ್ಫಾಂತ್ ತಶೆಂ ಗಾಂವಾಂನಿ ಆಮ್ಚ್ಯಾ ಭುರ್ಗ್ಯಾಂಕ್ ಆಮಿ ಕೊಂಕ್ಣಿ ವಾಚುಂಕ್ ಆನಿ ಉರಂವ್ಕ್ ಶಿಕಂವ್ಕ್ ಜಾಯ್. ಆಮ್ಚೊ ಜಾಯ್ತೊ ಲೋಕ್ ಪರ್ಗಾಂವಾಂತ್ ಆಸಾ, ಥಂಯ್ಚರ್ ತಿಂ ಚಡಾವತ್ ಕೊಂಕ್ಣಿ ಭಾಸೆಂತ್ ಕಾರ್ಯಿಂ ಕರ್ತಾತ್ ನ್ಹಂಯ್ಗಿ? ತಾಂಕಾಂ ನೀಜ್ ಜಾವ್ನ್ ಹೊಗ್ಳಿಕ್ ಫಾವೊ ಮ್ಹಣ್ತಾಂ. ಪಾಟ್ಲ್ಯಾ ಸಭಾರ್ ವರ್ಸಾಂನಿ ಕೊಂಕ್ಣೆಚಿ ಸೆವಾ ಕರುಂಕ್ ಸಂಘ್ ಸಂಸ್ಥೆ ಉದೆಲ್ಯಾತ್. ಮುಖ್ಯ ಜಾವ್ನ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಲೇಖಕಾಂಕ್ ಉತ್ತೇಜನ್ ದಿತಾ ಮಾತ್ರ್ ನ್ಹಂಯ್ ಆಧಾರ್ಯ್ ದಿತಾ. ಹಿ ಗಜಾಲ್ ಹರ್ಯೆಕಾ ಕೊಂಕ್ಣಿ ಪತ್ರಾಂನಿ ವಾಚುಂಕ್ ಮೆಳ್ತಾ. ಹೆಚ್ಚ್ಪರಿಂ ಕೊಂಕ್ಣಿ ಪತ್ರಾಂಕ್ಯ್ ಹಾಣಿಂ ದಿಂವ್ಚೊ ಪಾಟಿಂಬೊ ವರ್ತೊ. ಹೊ ಪಾಟಿಂಬೊ ಪತ್ರಾಚಾ ಪ್ರಚಾರಾ ಥಾವ್ನ್ ಪತ್ರಾಚೆ ವಿಶೇಸ್ ಅಂಖೆ ಪರ್ಗಟ್ಚಾ ರುಪಾರ್ ಸಯ್ತ್ ಆಸ್ಚೆಂ ಹೊಗ್ಳಿಕೆಕ್ ಫಾವೊ.
ವ್ಹಯ್ ಲೊಕಾಮೊಗಾಳ್ ಆಮ್ಚೊ ಗಾಂವ್ ಭಾವಾಂಚ್ಯಾ ವೆಬ್ಸಾಯ್ಟಿಂನಿ ಸಂಸಾರಾಚ್ಯಾ ಖಂಚ್ಯಾಯ್ ಕೊನ್ಶಾಂತ್ ಆಸ್ಲ್ಲ್ಯಾ ಕೊಂಕ್ಣಿ ಭುರ್ಗ್ಯಾಂಕ್ ಕೊಂಕ್ಣಿ ಭಾಸ್ ಶಿಕವ್ಯೆತ್ ನ್ಹಂಯ್ಗಿ? ತಾಂಕಾಂ ಮಾತ್ರ್ ನ್ಹಂಯ್ ಆಮ್ಚ್ಯಾ ಭುರ್ಗ್ಯಾಂಕ್ ಶಿಕಂವ್ಕ್ ಬರೆಂ ಜಾತಾ ಮ್ಹಳ್ಳೆಂ ಖಂಡಿತ್.
ರೊಮಿ ಲಿಪಿ ಜಾಯ್ಜಯ್ ಮ್ಹಣ್ಚಾಂಕ್ ಆನಿ ಬರಯ್ತೆಲ್ಯಾಂಕ್ ಆಮಿ ನಾಕಾ ಮ್ಹಣ್ಚೆಂ ನಾಕಾ. ಚಡಿತ್ ಶಿಕ್ಲ್ಲ್ಯಾಂಕ್ ಬಾಧಕ್ ನಾ. ಪುಣ್ ಕೊಂಕ್ಣೆಕ್ ಹಿ ಮಾತ್ರ್ ಲಿಪಿ ಆಸೊಂಕ್ ಫಾವೊ ಮ್ಹಳ್ಳೆಂ ಅರ್ಗಾಂಟ್ ಮಾತ್ರ್ ಕರುಂಕ್ ನಜೊ - ಹೆಂ ಮ್ಹಜೆಂ ಚಿಂತಾಪ್. ಕನ್ನಡ ಲಿಪಿಯೆಂತ್ಚ್ ಆನಿಕ್ಯ್ ಚಡ್ ಕೊಂಕ್ಣಿ ಸಾಹಿತ್ಯ್ ರಚನ್ ಕರ್ಯಾಂ. ತಿಚ್ಚ್ ಲಿಪಿ ಜಾಯ್ ಮ್ಹಣ್ ಕೊಣೆಂಯ್ ಠರಾವ್ ಮಂಜೂರ್ ಕರ್ಚೊ ನಾಕಾ. ಹ್ಯಾ ವಿಶ್ಯಾಂತ್ ನಿರ್ಧಾರ್ ಘೆಂವ್ಚ್ಕ್ ಅಧ್ಯಕ್ಶ್ ಜಾವ್ನ್, ಸಮ್ಮೇಳಾಕ್ ಜಾಂವ್, ಪರಿಶದೆಕ್ ಜಾಂವ್ ಹಕ್ಕ್ ನಾ ನ್ಹಂಯ್ಗಿ? ನಿರ್ಧಾರ್ ಘೆಂವ್ಚೆಂ ಹಕ್ಕ್ ಫಕತ್ತ್ ಕೊಂಕ್ಣಿ ಭಾಸ್ ಉಲಂವ್ಚಾ ತಶೆಂಚ್ ಬರಂವ್ಚಾ ವ್ಯಕ್ತಿಂನಿ ಮಾತ್ರ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
ಲಿಪಿಯೆಖಾತಿರ್ ಆಮಿ ಲಡಾಯ್ ಕರ್ಚಿ ನಾಕಾ. ಕೊಂಕ್ಣಿ ಭಾಸೆಚಿ ವ್ಹಾಡಾವಳೆವಿಶಿಂ ಚಿಂತ್ಯಾಂ. ಕನ್ನಡ ಲಿಪಿಯೆಂತ್ ರಚ್ಲ್ಲ್ಯಾ ಸಾಹಿತ್ಯಾಕ್ ಜೊಕ್ತ್ಯೊ ಪ್ರಶಸ್ಥ್ಯೊ ಮೆಳ್ಚಾಕ್ ಸಂಘಟಿತ್ ರಿತಿನ್ ವಾವ್ರ್ ಕರ್ಯಾಂ. ಕನ್ನಡ ಲಿಪಿಯೆಂತ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ ದವ್ರುನ್ ಮ್ಹಜ್ಯಾ ತಸಲ್ಯಾ ಲೇಖಕಾಂಕ್ ಮ್ಹಜಿ ಅಭಿಪ್ರಾಯ್ ದೀಂವ್ಕ್ ಆವ್ಕಾಸ್ ದಿಲ್ಲ್ಯಾಕ್ ಹಾಂವ್ ಖಾಲ್ತೆಪಣಿಂ ಉಪ್ಕಾರ್ ಬಾವುಡ್ತಾಮ್ ಆನಿ ದೇವ್ ಬರೆಂ ಕರುಂ ಮ್ಹಣ್ತಾಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications