ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 15
ದರ್ಭಾರಾಂತ್ಲಿ ಪಿಂರ್ಗೊಣ್
ಬೂಕ್: ದರ್ಭಾರಾಂತ್ಲಿ ಪಿಂರ್ಗೊಣ್
ಕವಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್ [ತಿಸ್ರೊ ಕವಿತಾಜಮೊ]
ಪ್ರಸ್ತಾವನ್: ವಲ್ಲಿ ವಗ್ಗ, ಮೈಸೂರ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 86
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್.
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್
ತಾರಿಕ್: 15 ಅಗೋಸ್ತ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ತಿಸ್ರೊ ದೊಳೊಚೆರ್ ಎಚ್ಚೆಮಾಚಿ ಸಮೀಕ್ಶಾ ವಾಚ್.
ಮೆಲ್ವಿನ್ ಜೆ. ವಾಸ್
ಎಚ್ಚೆಮ್
ಕವಿಚಿ ವ್ಹಳೊಕ್:
ಕೊಂಕ್ಣಿ ಕವಿತಾ ಶೆತಾಂತ್ ಕವಿ ಜಾವ್ನ್ ಉದೆಲ್ಲೊ ಚಾರ್-ಪಾಂಚ್ ವರ್ಸಾಂನಿ ತರ್ಯ್ ಎದೊಳ್ಚ್ ಅಡೇಯ್ಶಾಂ ವಯ್ರ್ ಕವಿತಾ ಲಿಖುನ್ ತಾಂತ್ಲ್ಯೊ ಚಡ್ತಾವ್ ಪರ್ಗಟ್ಲ್ಯಾತ್. ’ಚ್ಯಾರ್ ಮುಖಾಂ (2002)’, ’ಕಟ್ಪುತ್ಳಿ(2004)’ ಉಪ್ರಾಂತ್ ಹೊ ತಾಚೊ ತಿಸ್ರೊ ಕವಿತಾಜಮೊ. ಅಖಿಲ್ ಭಾರತೀಯ್ ಬರವ್ಪ್ಯಾಂಚಾ ಎಕ್ತಾರಾಚೊ ಜೆರಾಲ್ ಕಾರ್ಯದರ್ಶಿ ಜಾವ್ನ್ ಆಸ್ಚೊ ಹೊ ಕುವೆಯ್ಟಾಂತ್ ಸರಾಗ್ ಕವಿತಾಚಿಂ ಕಾಮಾಸಾಳಾಂ ಚಲವ್ನ್ ವರ್ನ್ ಆಸಾ. ಹೆರಾಂಚಿಂ ಕವಿತಾ ಸಂಪಾದನ್ ಕರುನ್ ಪರ್ಗಟ್ ಕರ್ಚೆಂ ಮಿಸಾಂವ್ಯ್ ಧರುನ್ ಎದೊಳ್ಚ್ ಕವಿತಾ ಅಧ್ಯಯನಾಚೆ ದೋನ್, ತಶೆಂಚ್ ಹೆರಾಂಚಾ ಕವಿತಾಂಚೆ ಸ ಬೂಕ್ ಪರ್ಗಟ್ಲ್ಯಾತ್. (ಜಿವಿತಾ ಸೊಭಾಣ್ (2002), ಕಯ್ದ್ಯಾಚ್ಯೊ ಕವಿತಾ (2004), ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ (2005), ಕವಿತಾಪಾಠ್ ಭಾಗ್-1 (2005), ಮೊತಿಯಾಂ ಆನಿ ತಾರಾಂ (2005), ದರ್ಯಾಕ್ ಉದಾಕ್ ((2005-ಕವಿತಾಪಾಠ್ ಭಾಗ್-2) ಆನಿ ಬಾಮುಣಾಂಚೆಂ ಚೆಡುಂ(2006).
ವಿಮರ್ಶೆ/ಸಮೀಕ್ಶಾ ಲೇಖನ್
ಪಾತ್ರ್ ಆನಿ ಪಾತ್ರ್ದಾರಿ, ಸೂತ್ರ್ ಆನಿ ಸೂತ್ರ್ದಾರಿ [- ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಕವಿತಾ ಸಾಹಿತ್ಯಾಚೊ ಪ್ರಕಾರ್ ಕಸಲೊಯ್ ಜಾಂವ್ದಿ, ಜಾಂವ್ ತೆಂ ಸಾಹಿತ್ಯ್ ನವ್ಯ್/ನವೋದಯ್ ವಾ ಬಂಡಾಯ್, ಹ್ಯಾ ಸರ್ವ್ ಸಾಹಿತ್ಯಾ ಮಧ್ಲೊ ಕವಿ ಮಾತ್ರ್ ಎಕ್ಲೊಚ್. ಕವಿ ಏಕ್ ಮನಿಸ್ ಮ್ಹಣ್ತಾನಾ ತೊ ಕಾಂಯ್ ಸಮಾಜೆ ಥಾವ್ನ್ ವಿಂಗಡ್ ಭಿಲ್ಕುಲ್
ನ್ಹಯ್. ತೊಯ್ ಹ್ಯಾ ಸಮಾಜೆಚೊ ಏಕ್ ವಾಂಟೊ ಜಾಲ್ಲ್ಯಾನ್ ಹ್ಯಾ ಸಮಾಜೆಂತ್ ತೊ ಖಂಡಿತ್ ಏಕ್ ಪಾತ್ರ್ದಾರಿ ಆನಿ ತಾಚೆಂ ಜಿಣೆಂ ಏಕ್ ಪಾತ್ರ್. ಹೊ ಪಾತ್ರ್ ತೊ ಖಂಯ್ಚಾಯ್ ಸೂತ್ರಾಂಚಾ ಅಧಾರಾನ್ ಖೆಳೊಂದಿ ಪುಣ್ ಜೆನ್ನಾ ಹೊ ಪಾತ್ರ್ದಾರಿ ಆಪ್ಲ್ಯಾ ಆನಿ ಸಮಾಜೆಚಾ ವಿಕಾನಾಚಾ ಸಂಘರ್ಷಾ ಮಧೆಂ ಅಡ್ಚಾತಾ ತೆದ್ನಾಂ ತೊ ಆಪ್ಣಾಚೊಯ್ ಸೂತ್ರ್ದಾರಿ ಜಾತಾ. ಹಾಂಗಾಸರ್ ಪಾತ್ರ್ದಾರಿಯ್ ತೊಚ್ ಸೂತ್ರ್ದಾರಿಯ್ ತೊಚ್ಚ್.
ಅಶೆಂ ಮ್ಹಣ್ತಾನಾ ಸಮಾಜೆಂತ್ ತಾಣೆಂ ಖೆಳ್ಚಾ ಪಾತ್ರಾಂನಿ ಬದ್ಲಾವಣ್ ಯಾ ವೈವಿಧ್ಯತಾ ಜಾಣ್ವಾಯೆಚಾ ಪರಿಮಿತೆಂತ್ ವಿಕಾಸಾಕ್ ಹೊಂದ್ವೊನ್ ಜಲ್ಮ್ ಘೆತಾ. ಹರ್ಯೆಕ್ ಪಾತ್ರಾಂಚಾ ಜಲ್ಮಾ ಮಧೆಂ ವ್ಹಾಡಾವಳ್ ಖಂಡಿತ್ ಆಸಾ. ಹಿ ವ್ಹಾಡಾವಳ್ ಸಮಾಜ್ ಮ್ಹಳ್ಳ್ಯಾ ವಿಶಾಲ್
Universal ಚಿಂತ್ಪಾ ಆನಿ ಹಾಂವ್ ಮ್ಹಳ್ಳ್ಯಾ ಖಾಸ್ಗಿ ಚಿಂತ್ಪಾ ಮಧ್ಲ್ಯಾ ಸಂಘರ್ಶಾಂತ್ ಉದೆವ್ನ್ ಆಯಿಲ್ಲ್ಯಾ ನಾಜೂಕ್ ಸಿಂತಿಮೆಂತಾಂಚಾ ಸ್ಪಂದನಾಕ್ ಬಗ್ಲೆಕ್ ಘೆವ್ನ್ ವಾಡ್ತಾ. ಹೆಂ ಸ್ಪಂದನ್ ಏಕ್ ಸೂತ್ರ್ದಾರಿ, ಸಾಹಿತಿ ಜಾವ್ನ್ ಅಭಿವ್ಯಕ್ತ್ ಕರುಂಕ್ ಸಕ್ತಾ ಹಿ ಅಭಿವ್ಯಕ್ತಿಚ್ ದರ್ಭಾರಾಂತ್ಲಿ ಪಿಂರ್ಗೊಣ್.
ಹ್ಯಾ ಪಿಂರ್ಗೊಣೆಕ್ Direct Focus ಕೆಲೆಂ ತರ್, ಮಾತಾಳೆಂ ಆನಿ ಮುಖ್ಚಿತ್ರ್ ಸ್ಪಷ್ಟ್ ಕರ್ಚಾಪರಿಂ, ಬೋಬ್, ದೂಕ್, ರುದಾನ್, ನಿರಾಶಾ, ಲಾಚಾರ್ಪಣ್, ಮಾಗ್ಣೆ, ವಿನತಿ ಸ್ಪಷ್ಟ್ ದಿಸೊನ್ ಯೆತಾ. ಪುಣ್ ಎದೊಳ್ಚ್ ಹಾವೆಂ ಸಾಂಗ್ಲ್ಲೆಪರಿಂ ಜೆದ್ನಾಂ ಪಾತ್ರ್ದಾರಿ ಅಪ್ಲೊ ಸೂತ್ರ್ದಾರಿ ಜಾತಾ ತೆದ್ನಾಂ ತೊ ದೊನ್ಯೀ ವಾಂಟ್ಯಾಂನಿ ಎಕ್ಲೊಚ್ ವ್ಯಕ್ತಿ ಜಾವ್ನ್ ಹ್ಯಾ ಸಮಾಜ್ ಮ್ಹಳ್ಳ್ಯಾ ದರ್ಭಾರಾಂತ್ ಪಾತ್ರ್ದಾರಿ ಜಾವ್ನ್ ಕಿತ್ಲೊ ಮಹತ್ವಾಚೊ ವಾಂಟೊಗಿ ತಿತ್ಲೊಚ್ ಸೂತ್ರ್ದಾರಿ ಜಾವ್ನ್ಯೀ ಮಹತ್ವಾಚೊ. ಅಶೆಂ ಆಸ್ತಾನಾ ದರ್ಭಾರಾಂತ್ ತಾಚೊ ಪಾತ್ರ್ ಮಾತ್ರ್ ಸ್ಪಷ್ಟ್ ದಿಸ್ತಾ. ತಾಚಿಂ ಸೂತ್ರಾಂ ಅಸ್ಪಾಷ್ಟ್ ಜಾವ್ನ್ ತ್ಯಾ ಪಾತ್ರಾ ಭಿತರ್ ಲಿಪ್ತಾತ್. ಹೆಂ ದರ್ಭಾರಾಂತ್ ದಿಸೊನ್ ಯೇನಾ. ಕಿತ್ಯಾಕ್ ಮ್ಹಳ್ಯಾರ್ ತಾಚಿಂ ಸೂತ್ರಾಂ ಆಪ್ಲ್ಯಾ ಪಾತ್ರಾಕ್ ಚಡ್ ಆನಿ ಚಡ್ ಜಿವಾಳ್ ದವರ್ಚಾ ಉದ್ದೇಶಾಚಿಂ ಆನಿ ತಾಚೊ ಪ್ರಭಾವ್ ಸಮಾಜೆಕ್ ಚಡ್ ಆನಿ ಚಡ್ ಅಧಿಕ್ ಮಾಪಾನ್ ಆನಿ ಪಾತ್ರ್ದಾರಿಂಕ್, ಸೂತ್ರಾಂಕ್ ಆನಿ ಸೂತ್ರ್ದಾರಿಕ್ ಎಕಾಚ್ ನದ್ರೆನ್ ಪಳೆನಾಸ್ತಾನಾ ವಿವಿಂಗಡ್ ಆನಿ ಸ್ವತಂತ್ರ್ ನದ್ರೆನ್ ಪಳೆಂವ್ಚೆಂ.
’ದರ್ಭಾರಾಂತ್ಲಿ ಪಿಂರ್ಗೊಣ್’ ಕವಿತಾಜಮ್ಯಾಂತ್ಲ್ಯಾ ವಾಸ್ತವಿಕ್ ವಿಚಾರಾಂಕ್ ಚಡ್ಚ್ ಸಾಂಗಾತ್ ದಿಂವ್ಚೆಂ ದರ್ಭಾರ್, ಆನಿ ಪಾತ್ರ್ದಾರಿಂಕ್ ಪಯ್ಲೆಂ ಪಳೆವ್ನ್ ತ್ಯಾ ಸೂತ್ರಾಂಕ್ ಆನಿ ಸೂತ್ರ್ದಾರಿಂಕ್ ಉಪ್ರಾಂತ್ ಪಳೆವ್ಯಾಂ.
’ಆಯ್ಲೆ ಪಳೆ ಆತಾಂ
ಘಾಟಾಗಾರ್, ಭಾಟಾಂಗಾರ್
ತೊಟಾಗಾರ್ ಪೊಟಾಗಾರ್
ಎಕ್ಟಾಂಯ್ ಜಾವುನ್
.... ಗಾರ್
ಮೊಲಾಕ್ ಘೆವುಂಕ್
ವಾರ್ ಆಪಂವ್ಕ್
ಆಡೊವ್ ಘಾಲುಂಕ್
ವೋಡ್ನ್ ವರುಂಕ್
ಪುತ್ಳಿ’ [ಪುತ್ಳಿ]
ಆನಿ ಪಾತ್ರಾಂಕ್ ಪಳೆಂವ್ಚೆಂ ತರ್;
’ಫಯ್ಸಲ್ ಆಯ್ಲೆಂ ದರ್ಭಾರಾಂತ್ಲೆಂ
ಕವಿ ಉಟ್ಲೊ ಕಾಂಪೊನ್ ಕಾಂಪೊನ್
ಜೈಕಾರ್ ಘಾಲ್ಯೊ ವಿದ್ವಾನಾಂಚೆರ್
ಕವಿನ್ಯ್ ಫಿಂರ್ಗೊನ್ ಫಿಂರ್ಗೊನ್’ [ದರ್ಭಾರಾಂತ್ಲಿ ಪಿಂರ್ಗೊಣ್]
ಆನಿ ಪಾತ್ರ್ದಾರಿಕ್ ಸೊಧ್ಲೆಂ ಜಾಲ್ಯಾರ್
’ದರ್ಭಾರಾ ವಾಟೆರ್
ಖರ್ಶೆವ್ನ್ ಖರ್ಶೆವ್ನ್
ಕವಿ ಎಕ್ಲೊ ಚಲೊಂಕ್ ಲಾಗ್ಲೊ
ಬರ್ಯಾಕ್ಗೀ ವಾಯ್ಟಾಕ್ಗೀ
ಹಾಂವ್ ಸಾಂಗಾನಾ
ತುಮಿಂಚ್ ಸಾಂಗಾ’ [ತುಮಿಂಚ್ ಸಾಂಗಾ]
ಹ್ಯಾ ದರ್ಭಾರಾಂತ್ ಘಾಟಾಗಾರ್, ತೊಟಾಗಾರ್, ಭಾಟಾಂಗಾರ್ ಪೊಟಾಗಾರ್. ಮೊಲಾಕ್ ಘೆಂವ್ಚೆ, ವಾರ್ ಆಪಂವ್ಚೆ, ಆಡೊವ್ ಘಾಲ್ಚೆ ಆಸಾತ್ ಮ್ಹಣ್ತಾನಾ ಹೆಂ ದರ್ಭಾರ್ ಏಕ್ ಚಾಲ್ತಿ ಸಮಾಜ್ ಜಾಲಿ.
ಆತಾಂ ಪಾತ್ರ್ ಏಕ್ ಪಾತ್ರ್ದಾರಿ ಏಕ್ ಕವಿಚ್ ಜಾಲಾ. ಅಶೆಂ ಆಸ್ತಾನಾ ಪಾತ್ರಾಕ್ ಜೀವ್ ಭರುಂಕ್ ಪಾತ್ರ್ದಾರಿಕ್ ಕಾಂಯ್ ಕಷ್ಟ್ ನಾಂತ್. ಹೆಂ ಕವಿತಾ ಜಮ್ಯಾಚೆಂ ಮುಖ್ಚಿತ್ರ್ ಸ್ಪಷ್ಟ್ ಕರ್ತಾ. ತರ್ ಖಂಯ್ಸರ್ಯಿ ಮಿಸ್ತೆರ್ ಯಾ ಗೊಂದೊಳ್ ನಾ. ಏಕ್ ಕವಿ ಕವಿ ಜಾವ್ನ್ಂಚ್ ದರ್ಭಾರ್ ಮ್ಹಳ್ಳ್ಯಾ ಸಮಾಜೆಚಾ ಆಂಗ್ಣಾಂತ್ ಅಪ್ಲೊ ಪಾತ್ರ್ ಖೆಳ್ತಾ.
ಹಾಂಗಾಸರ್ ಪಾತ್ರ್ ಆನಿ ಪಾತ್ರ್ದಾರಿ ಕವಿಚ್ ಜಾಲ್ಲ್ಯಾನ್ ಸೂತ್ರ್
ಆನಿ ಸೂತ್ರ್ದಾರಿಯ್ ತೊಚ್ಚ್ ಜಾತಾ. ಅಶೆಂ ಆಸ್ತಾಂ ಪಾತ್ರ್ ಆನಿ ಪಾತ್ರ್ದಾರಿ, ಸೂತ್ರ್ ಆನಿ ಸೂತ್ರ್ದಾರಿ ಹಾಂಕಾ ವಿವಿಂಗಡ್ ಯಾ ಸ್ವತಂತ್ರ್ ನದ್ರೆನ್ ಪಳೆಂವ್ಚೆಂ ಗರ್ಜ್ ನಾ.
ತರ್ ದರ್ಭಾರಾಂತ್ಲಿ ಪಿಂರ್ಗೊಣ್ ಎಕಾ ಕವಿಚಿ? ಎಕಾ ಸಾಹಿತಿಚಿ? ಹಾಕಾ ’ವ್ಹಯ್’ ಮ್ಹಳ್ಳಿ ಜವಾಬ್ ದಿಲಿ ತರ್ ಕವಿ ಏಕ್ ಮನಿಸ್ ಜಾವ್ನ್ ಹ್ಯಾ ದರ್ಭಾರಾಂತ್ ಮಹತ್ವಾಚೊ ವಾಂಟೊ? ಯಾ ಏಕ್ ಮನಿಸ್ ಕವಿ ಜಾವ್ನ್?
ಹಾವೆಂ ಪಯ್ಲೆಂಚ್ ಸಾಂಗ್ಲ್ಲ್ಯಾಪರಿಂ ಸಮಾಜೆಂತ್ ಜಿಯೆಂವ್ಚೊ ಮನಿಸ್ ಎಕಾ
ನ್ಹಯ್ ಎಕಾ ರುಪಾನ್ ಸಮಾಜೆಂತ್ ಆಪ್ಲೊ ಪಾತ್ರ್ ಖೆಳ್ತಾ. ತರ್ ಕಿತೆಂ ಕವಿ ಹಾಂಗಾಸರ್ ಕವಿ ಜಾವ್ನ್ ಆಪ್ಲ್ಯಾ ಕವಿಪಣಾಚೊ ಪಾತ್ರ್ ಖೆಳ್ತಾ? ಹೆಂ ವ್ಹಯ್ ತರ್ ಹ್ಯಾ ಪಾತ್ರಾಕ್ ಆನಿ ಕವಿಕ್ ತಶೆಂಚ್ ಹ್ಯಾ ಸಮಾಜೆಕ್ ಚಡ್ ಲಾಗ್ಶಿಲೊ ತಶೆಂ ಶೀದಾ ಸಂಬಂಧ್ ಆಸಾ ಮ್ಹಣ್ ಜಾಲೆಂ.
ಆತಾಂ ಹೊ ಸಂಬಂಧ್ ಕಿತ್ಯಾಕ್ ಆನಿ ಕಸೊ ಮ್ಹಳ್ಳೆಂ ಪಳೆಲೆಂ ತರ್;
’ಸತ್ಚ್ ಸಾಂಗ್ತಾಂ ಹಾಂವ್ ಕೊಂಕ್ಣಿ ಮ್ಹಾಕಾ ದೇವ್
ಕೊಣ್ಯ್ ಉಲಯ್ನಾ ತರ್ ದೆವಾ ತುಂಚ್ ತಾಂಕಾಂ ಪಾವ್
ಕೊಣಾಕ್ ಸಾಂಗೊಂ ಆತಾಂ ಭಂವೊನ್ ಆಸಾಂ ಗಾಂವ್
....
ತುಮ್ಚಿಚ್ಚ್ ಖುಶಿ ಜಾಂವ್ ಕೊಂಕ್ಣಿ ಮ್ಹಜೆಂ ನಾಂವ್’ [ಕೊಣಾಕ್ ಸಾಂಗೊಂ ಆತಾಂ]
ಹೊ ಸಂಬಂಧ್ ಕೊಂಕ್ಣಿ ಮ್ಹಣೊನ್ ವೊಪ್ತಾನಾ ಹ್ಯಾ ಸಂಬಂಧಾಚಾ ರುಂದಾಯೆಚೊ ಆನಿ ಗುಂಡಾಯೆಚೊ ಅಂದಾಜ್ ಕರ್ಯೆತ್. ಕೊಂಕ್ಣಿ ಮ್ಹಣ್ತಾನಾ ಹಾಂಗಾಸರ್ ಕೊಂಕ್ಣಿ ಭಾಶಾ, ಕೊಂಕ್ಣಿ ಸಂಸ್ಕೃತಿ, ಕೊಂಕ್ಣಿ ಸಾಹಿತ್ಯ್, ಕೊಂಕ್ಣಿ ಸಮಾಜ್, ಕೊಂಕ್ಣಿ ಗಾಂವ್ ಆನಿ ಕೊಂಕ್ಣೆಕ್ ಲಗ್ತಿ ಜಾಲ್ಲೆಂ ಸರ್ವ್ಯ್ ಹ್ಯಾ ಕವಿ ಸಾಂಗಾತಾ ಸಂಬಂಧ್ ಜೊಡ್ತಾ ಮ್ಹಣ್ಯೆತ್. ಅಶೆಂ ಆಸ್ತಾಂ ಹೊ ಸಂಬಂಧ್ ಏಕ್ Universal ಸಂಬಂಧ್ ಜಾಲೊ. ಸಂಬಂಧ್ Universal ಮ್ಹಣ್ತಾನಾ ಖೆಳ್ಚೊ ಪಾತ್ರ್ಯ್ Universal ಪಣಾಕ್ ಲಾಗು ಜಾತಾ. ಕಾರಾಣ್ ಹಾಂಗಾ ಪ್ರಸ್ತುತ್ ಕೆಲ್ಲೆಂ ದರ್ಭಾರ್ ಎಕಾ ಸಮಾಜೆಕ್ ಉಭೆಂ ಕರ್ತಾ ಜಾಲ್ಲ್ಯಾನ್. Universal ಸಂಬಂಧಾಂತ್ Universal ವಿಚಾರಾಂಚಾ ಪಾತ್ರಾ ಥಾವ್ನ್ ಹ್ಯಾ ಕವಿತಾ ಜಮ್ಯಾಂತ್ ಕವಿನ್ ಪ್ರಸ್ತುತ್ ಕೆಲ್ಲೆ ವಿಚಾರ್ ಸಮಾಜೆಕ್ ಖಂಯ್ಚಾ ಮೂಳ್ ಥಳಾರ್ ಉಭೆ ಜಾಲ್ಯಾತ್?
’ಹಾಂವ್ ಬರಂವ್ಕ್ ವಚಾನಾ
ವಾಚುನ್ ಕೊಣಾಚಿ ನೀದ್ ವಚಾತ್
ನಿದೆಂತ್ ಕೊಣ್ ದಾಂತ್ ಖಿರ್ಲಿತ್’ [ಹಾಂವ್ ಬರಂವ್ಕ್ ವಚಾನಾ]
’ಆಮ್ಚಾ ಗಾಂವಾಂತ್ ದೀಕ್ ಝಳ್ತಾ
ವಾತ್ ಕಡ್ತಾ ಮೇಣ್ ಪೆಡ್ಟಾ
ಜೆಮೆತೆಲ್ಯಾಂಕ್ ರಾಸ್ ಘಾಲುನ್
ಜಾಗೆಲ್ಲೊ ಹರ್ಧೆಂ ಪೆಡ್ಟಾ
ಹಾಂವ್ ಸತ್ತ್ ಸಾಂಗ್ತಾಂ
ಹಾಡಾಂ ಉಡವ್ನ್ ತಾಳ್ಟಾ
ದೆಕುನ್ ಪೆಟೊಯ್ ಶೆಣ್ ಘಾಲ್ತಾ’ [ಪರ್ಜಾಂಚಿ ಪುಜಾ]
ಹಾಂವ್ ಬರಂವ್ಕ್ ವಚಾನಾ ಮ್ಹಣ್ ಸಾಂಗೊನ್ ಕೊಣಾ ಬಾವ್ಡ್ಯಾಚಿ ನೀದ್ ಫಾರ್ಚೊ ವಿಚಾರ್. ವಾತ್ ಕಡೊನ್ ಮೇಣ್ ಪೆಟೊನ್ ಜೆಮೆತೆಲ್ಯಾ ವಯ್ರ್ ರಾಜ್ ಚಲಂವ್ಕ್ ಹಾಡಾಂ ಉಡವ್ನ್ ತಾಳ್ಚೆ ವಿಚಾರ್ ಪಳೆತಾನಾ ಖಂಡಿತ್ ಕ್ರಾಂತಿಕಾರಿ ವಿಚಾರ್. ಅಸತ್, ಅನೀತ್ ಆನಿ ದುರ್ವಿಚಾರ್ ಝಳೊನ್ ಆಸ್ಚಾ ಸಮಾಜೆವಯ್ರ್ ಸ್ವಯಂ ಜಾವ್ನ್ ಪ್ರತ್ಯಕ್ಷ್ಪಣಿ ಕ್ರಾಂತಿಕ್ ಉಟಂವ್ಚೆಂ ಯಾ ಜಾಗಂವ್ಚೆಂ ಪ್ರೇತನ್.
ಸಮಾಜೆಕ್ ಕ್ರಾಂತಿ ಕಿತ್ಯಾಕ್ ಗರ್ಜ್?
ಸಮಾಜ್, ತಾಂತುಂಯ್ ಪ್ರಜಾಪ್ರಭುತ್ವಾಚಾ ವಾ ಬಂಡ್ವಾಳ್ಶಾಹಿ ವ್ಯವಸ್ತೆಚಾ ಸಮಾಜೆಂತ್ ಸಮಾಜೆಚಾ ವಿಕಾಸಾಚೆಂ ಕಾರಾಣ್ ಮುಕಾರ್ ದವರ್ನ್ ಹಾಂಗಾಸರ್ ಸಗ್ಳೆಂಚ್ ವಿಕಾಸ್ ಜಾತಾ. ಹಿ ಏಕ್ ಸಾಂಖಳ್. ಹ್ಯಾ ಸಾಂಖ್ಳೆಚೊ ಬಾಂಧ್ ಕಿತ್ಲೊ ಮಜ್ಭೂತ್ ಜಾತಾ ತಿತ್ಲಿ ಸಮಾಜ್ ವಿಕಾಸ್ ಜಾತಾ. ಜರ್ತರ್ ಖಂಯ್ಚರ್ಯ್ ಹ್ಯಾ ಬಾಂಧಾ ಮಧೆಂ ಕಸಲ್ಯಾಯ್ ಥರಾಚಿ ಅಡ್ಚಣ್ ಆಯ್ಲಿ ತರ್ ತಿ ಸಮಾಜ್ ತ್ಯಾ ಅಡ್ಚಣೆ ಥಾವ್ನ್ ಭಾಯ್ರ್ ಯೇಂವ್ಕ್ ಕರ್ಚಾ ಪ್ರೇತನಾಂತ್ ಆಪ್ಲ್ಯಾ ವಿಕಾಸಾಚಾ ಹಂತಾಂನಿ ಪಾಟಿಂ ಉರ್ತಾ ಆನಿ ಹಾಚೊ ಪ್ರಭಾವ್ ಚಡ್ ಜಾವ್ನ್
ಬಂಡ್ವಾಳಾವಯ್ರ್ ಪಡ್ತಾ. ಆನಿ ಬಂಡ್ವಾಳ್ ಪ್ರತ್ಯಕ್ಶ್ ನ್ಹಯ್
ತರ್ಯೀ ಪರೋಕ್ಶ್ ರುಪಾನ್ ಜಾಲ್ಯಾರ್ಯೀ ಆಪ್ಲ್ಯಾ ವಯ್ರ್ ಪಡ್ಲೆಲ್ಯಾ ಪ್ರಭಾವಾಕ್ ಸಮಾಜೆಚಾ ವರ್ತುಲಾಂತ್ ಜಿಯೆಂವ್ಚಾ ಮನ್ಶಾಚಾ ಚಾಲ್ತ್ಯಾ ಜಿವಿತಾಂತ್ ಘಾಕ್ತಾ. ಹಾಚೊ ಪರಿಣಾಮ್ ಸಮಾಜೆ ಭಿತರ್ಲ್ಯಾ ಹರ್ಯೆಕ್ ಮನ್ಶಾ ವಯ್ರ್ ಎಕಾಚ್ ಮಾಪಾನ್ ಪಡ್ತಾ ಜಾಲ್ಯಾರ್ಯೀ ಹಾಂತುಂ ಚಡ್ ಅಡ್ಚೊಂಚೆಂ ಅಜೂನ್ ವಿಕಾಸಾಚಾ ಹಂತಾಕ್ ಪಾವಾನಾತ್ಲ್ಲ್ಯಾ ಯಾ ನವೆಂ ನವೆಂ ವಿಕಾಸಾಚಾ ಹಂತಾಕ್ ಪಾವ್ಲ್ಲ್ಯಾ ನಿಮ್ನ್ ಆನಿ ಮಧ್ಲ್ಯಾ ವರ್ಗಾಚಾ ಮನ್ಶ್ಯಾಂನಿ. ಹಾಂಗಾಸರ್ ಪಯ್ಲೊ ವರ್ಗ್ ಕೆದಾಳಾಯ್ ಶಾಭಿತ್ಚ್ ಅಶೆಂ ಮ್ಹಣ್ತಾನಾ ಹಾಂಗಾಚೆರ್ ಕ್ರಾಂತಿ ಉಮಾಳುನ್ ಯೆತಾ.
ಆತಾಂ ಹ್ಯಾ ಕವಿತಾ ಜಮ್ಯಾಂತ್ಲಿಂ ಕ್ರಾಂತಿ ಸಮಾಜೆಚಾ ಖಂಯ್ಚಾ ವರ್ಗಾಥಾವ್ನ್ ಖಂಯ್ಚಾ ವರ್ಗಾಕ್ ಯಾ ಖಂಯ್ಚಾ ತತ್ವಾಂ ಥಾವ್ನ್ ಖಂಯ್ಚಾ ತತ್ವಾಕ್ ಮ್ಹಣೊನ್ ಪಳೆಲೆಂ ಜಾಲ್ಯಾರ್;
’ಕಾಶ್ಮಿರಾಥಾವ್ನ್ ಕನ್ಯಾಕುಮಾರಿ ಪರ್ಯಾಂತ್
ಗುಜ್ರಾತಾ ಥಾವ್ನ್ ಬೆಂಗಾಲಾ ಪರ್ಯಾಂತ್
ಉದೆಲ್ಲ್ಯಾ, ಉದೆಂವ್ಚಾ ಜಾತಿ ಕಾತಿಚಾ ನಿಬಾಂನಿ
ನಾಸ್ ಜಾವ್ನ್ ಗೆಲ್ಲ್ಯಾ ಅಮಾಯಕ್ ಮನ್ಶಾಂಸವೆಂ
ಆಜ್ ಆಮಿಂ ಸ್ವಾತಂತ್ರ್’ [ಆಮಿಂ ಸ್ವತಂತ್ರ್]
’ಖಚ್ರ್ಯಾಂತ್ಲೆಂ ಖಾಣ್ ಸೊಧ್ತೆಲ್ಯಾಂನೊ
ರಿತ್ಯಾ ಪೊಟಾರ್ ನಿದ್ತೆಲ್ಯಾಂನೊ
ನಾಗ್ಡೆ ಕುಲೆ ಧಾಖಂವ್ಚಾನೊ
ಸಾಂಗಾ ಮ್ಹಾಕಾ ಸಾಂಗಾ ತುಮಿ
ತೋಂಡ್ ಧಾಂಪುನ್ ಅವಾಜೆವೀಣ್
ತುಮ್ಚಿ ಬೋಬ್ ಕೊಣಾಕ್?’ [ತುಮ್ಚಿ ಬೋಬ್ ಕೊಣಾಕ್]
’ದರ್ಭಾರ್ಚ್ ಯೆಮ್ಕುಳ್ಯಾಂನಿ ಭರ್ಲಾ
ಪಾಪ್ ಭಿರ್ಮತ್ ಉಗ್ತ್ಯಾನ್ ಚಿರ್ಲಾಂ
ಕೊಲೆ ಹಾಂಗಾ ರಾಜ್ವಟ್ ಕರ್ತಾತ್
ಸಾಂಗೊಂಕ್ ಕಿತೆಂ ಬಾಕಿ ಉರ್ಲಾಂ
ಮನ್ಜಾತ್ ಜಾಲಾ ಮನಿಸ್ ಆತಾಂ
ಶಿಣೊಂಕ್ ಹಾಂಗಾ ಕೊಣ್ ಉರ್ಲಾಂ
ಕಾಯ್ದೆ ಕಾನುನಾಂಚೊ ಬಾಜಾರ್ ಆಸ್ತಾಂ
ನ್ಯಾಯ್ ನೀತ್ ಕೊಣೆಂ ಫಾರ್ಲಾಂ’ [ಅಸ್ತ್ವ್ಯಸ್ತ್]
ಸಾಮಾಜಿಕ್, ಧಾರ್ಮಿಕ್, ಆರ್ಥಿಕ್ ಆನಿ ರಾಜಕೀಯ್ ವ್ಯವಸ್ತೆಚಿ ಕ್ರಾಂತಿ. ದರ್ಭಾರಾಕ್ ರಿಗ್ಲ್ಲ್ಯಾ ಕವಿಕ್ ಹಾಂಗಾಸರ್ ಸಗ್ಳ್ಯಾ ವಾಟೆಂನಿ ಸಗ್ಳೆಂಚ್ ಅಸ್ತ್ವ್ಯಸ್ತ್ ದಿಸ್ತಾ. ತಾಚ್ಯಾ ವಿಚಾರಾಂ ಫರ್ಮಾಣೆ ಸಮಾಜೆಚಿ ಸಿಸ್ಟಮ್ (ವ್ಯವಸ್ಥಾ) ಸಾರ್ಕಿ ನಾ.
ಕೊಂಕ್ಣಿ ಸಮಾಜೆಜೆಂತ್ಲೊ ಕೊಂಕ್ಣಿ ಸಮಾಜೆಕ್ ಸಂಬಂಧ್ ಜೊಡ್ಚೊ ಹೊ ಕವಿ ಜರ್ತರ್ ಆಪ್ಲ್ಯಾ ದರ್ಭಾರಾಕ್ ವೆಚಾ ವಾಟೆರ್ ಸಗ್ಳ್ಯಾ ಸಮಾಜೆಚಾ ಮ್ಹಳ್ಯಾರ್ ಕೊಂಕ್ಣಿ ಸಮಾಜೆಕ್ ಸೊಡುನ್ ಅಖಂಡ್ ದೇಶಾಚಾ
Universal ಸಮಾಜೆಚಾ ಅವ್ಯವಸ್ತ್ ಸಿಸ್ಟಮಾಚಿ ಆನಿ ತಾಚ್ಯಾ ಪ್ರಸ್ತುತ್ ಪರಿಗತೆಚಿ ಪರಿಚಯ್ ದಿತಾ. ಹಾಂಗಾಸರ್ ಫಕತ್ತ್ ಪರಿಚಯ್ ಮಾತ್ರ್. ಚಾಲ್ತ್ಯಾ ಸಮಾಜೆಚಾ ಬದ್ಲಾಲ್ಲ್ಯಾ ಪಸ್ತುತೆಚಿ ಪರಿಚಯ್.
ಹ್ಯಾ ಪರಿಚಯೆಚೊ ಸಂಬಂಧ್ ಹ್ಯಾ ಕವಿಸವೆಂ ಕಸೊ ಪಡ್ತಾ ಮ್ಹಳ್ಳೆಂ ತೆಂ ಪಳೆಂವ್ಚೆಂ ಚಡ್ ಗರ್ಜ್. ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಕವಿ ಖುದ್ದ್ ಏಕ್ ಮನಿಸ್ ಜಾವ್ನ್ ’ಪಯ್ಲೆಂ’ ಆನಿ ಏಕ್ ಕವಿ ಜಾವ್ನ್ ’ಉಪ್ರಾಂತ್’ ಸಮಾಜೆಸವೆಂ ಸಂಬಂಧ್ ಜೊಡ್ತಾ ತೆಂ ಸತ್. ಹ್ಯಾ ಸಂಬಂಧಾಕ್ ಮುಕಾರ್ ದವರುನ್ ಆನಿ ತಾಣೆಂಚ್ ದಾಕವ್ನ್ ದಿಲ್ಲ್ಯಾ ಹ್ಯಾ ಸಂಬಂಧಾ ಭಿತರ್ಲ್ಯಾ ಸಮಾಜೆಚಿ ಪರಿಚಯ್ ಮುಕಾರ್ ದವರುನ್ ತಾಚಾ ವಿಚಾರಾಂಕ್ ವೊರಾವ್ನ್ ಪಳೆತಾನಾ;
’ಆತಾಂ ಅರ್ಗಾಂ ತುಕಾ ದೆವಾ
ಆವ್ಕ್ ಜಿಣೆಂ ಫಾವೊ ಕೆಲ್ಲ್ಯಾಕ್
ತುಜಿ ಕುರ್ಪಾ ಆಸಾ ಜಾಲ್ಯಾರ್
ಪರತ್ ಕೊಬುಚ್ ಕರ್ ತುಂ ಮ್ಹಾಕಾ
ಉಪ್ಕಾರ್ ಪರತ್ ಆಟಯ್ತಾಂ
ಜೀವ್ ಪಾಟಿಂ ಸಮರ್ಪಿತಾಂ’ [ಚಿಂವ್ಡಾಚಿಂ ಅರ್ಗಾಂ]
ಕೊಣಾಥಾವ್ನ್ ಆಪ್ಣಾಕ್ ಜಾಯ್ ತೆಂ ಘೆವ್ನ್ ಉಪ್ರಾಂತ್ ಆಪ್ಣಾಚೆಂ ಸರ್ವ್ ಸಮರ್ಪುನ್ ದೆವಾಕ್ ಅರ್ಗಾಂ ದೀವ್ನ್ ಪರತ್ ಕೊಬುಚ್ ಜಾಂವ್ಚೊ ವಿಚಾರ್ ಎಕಾ ಕುಶಿನ್ ಜಾಲ್ಯಾರ್
’ಮುಡ್ಲಾಚೊ ಸುರ್ಯೊ ಪಡ್ಲಾ ವಚೊಂದಿ
ಚಂದ್ರೆಮ್ ಹನಿಮೂನಾಕ್ ವಚೊಂದಿ
ದೇವ್ ಚ್ಯಾರ್ ದಿಸಾಂನಿ ಪರತ್ ಸಗ್ಳೆಂ ರಚುಂದಿ
ಯಾ ಸಾಗೊರಾಚೆಂ ಉದಾಕ್ ಆಂಬೊಟ್ ಜಾಂವ್ದಿ
ಮ್ಹಾಕಾ ಕಿತೆಂ ಪಡೊನ್ ಗೆಲಾಂ?’ [ಮ್ಹಾಕಾ ಕಿತೆಂ ಪಡೊನ್ ಗೆಲಾಂ]
ತ್ಯಾಚ್ ಪಯ್ಲೆಂ ಆಪ್ಣೆಂ ದಿಲ್ಲ್ಯಾ ಸಮಾಜೆಚಾ ಪರಿಚಯೆ ಥಾವ್ನ್ ವೆಗ್ಳೊ ರಾಂವ್ಚೆಂ ಪ್ರೇತನ್? ಯಾ ಆಪ್ಲ್ಯಾ ತ್ಯಾ ಸಂಬಂಧಾಕ್ ಮೊಡುನ್ ಉಡಂವ್ಚೆಂ ನೆಗಾರ್ಪಣ್? ಹಾಕಾ ನೆಣಾರ್ಪಣಾಚಿ ಪೊಳಾಪಳ್ ಮ್ಹಣ್ ಘೆತ್ಲ್ಯಾ;
’ಕಿತ್ಯಾಕ್ಗಾಯ್ ಹಾಂಗಾ ಪಡ್ಲಾ
ಸಾಲ್ವಾರ್ ಜಾಂವ್ಚಾಕ್ ಯಾ ಕರ್ಚಾಕ್
ಸಂಸಾರಾಕ್ ಭೋವ್ಶಾ ರಂಗ್ ದಿಂವ್ಚಾಕ್
ಏಕ್ ಥೆಂಬೊ ರಗಾತ್’ [ಏಕ್ ಥೆಂಬೊ ರಗಾತ್]
ಎಕಾ ಥೆಂಬ್ಯಾ ರಗ್ತಾಂತ್ ಸಂಸಾರಾಕ್ ರಂಗ್ ದಿಂವ್ಚೊ. ಸಂಸಾರಾಕ್ ಸಾಲ್ವಾರ್ ಕರ್ಚೊ ಹೊ ಆಶಾವಾದ್. ಹೊ ಆಶಾವಾದ್ ಖಂಯ್ ಪಾಸೊನ್ ಜಿಕ್ಲಾ?
’ಹಾಂವ್ ಫಟ್ ಮಾರಿನಾ
.....
ಸತ್ ಉಚಾರ್ಚೆಯ್ ಕೊಣ್ ಉರ್ಲ್ಯಾತ್?’ [ಪರ್ಜಾಂಚಿ ಪುಜಾ]
ಸತ್ ಉಚಾರ್ಲ್ಲೊ ಸಂಸಾರಿಂ ಕೊಣ್ಯ್ ಉರೊಂಕ್ ನಾಂತ್ ಮ್ಹಣೊನ್ ಜಾಣಾ ಜಾಲ್ಲ್ಯಾ ಉಪ್ರಾಂತ್ಯ್ ಧಯ್ರಾಧಿಕ್ ಮೇಟ್ ಸತಾಕ್ ದಿಂವ್ಚೆಂ. ಹೆಂ ಮೇಟ್ ಪಳೆಲ್ಯಾರ್;
’ಆತಾಂ ಮ್ಹಜಿ ಜಿಣ್
ಹಾವೆಂಚ್ ಲಿಖುನ್ ಘಾಲ್ಯಾ
....
ಆಮಾಸ್ ಯಾ ಪುನವೆಚಿ ಫಿಕಿರ್ ನಾಸ್ತಾಂ
ಪಾವ್ಸಾ ವೊತಾಚೊ ಹುಸ್ಕೊ ನಾಸ್ತಾಂ
ಜಿಯೆತಲೊಂ ಕಸೊಯ್
ಥೊಡ್ಯಾಚ್ ಆಂಕ್ರ್ಯಾಂಕ್ ಘೆವುನ್’ [ರೂಕ್]
ಸ್ಪಶ್ಟ್ ವಿಂಚವ್ಣೆಂತ್ ಸ್ವಶ್ಟ್ ಆಶಾವಾದ್. ಹೊ ಹ್ಯಾ ಕವಿನ್ ಜಿಯೆಂವ್ಚಾ ಸಮಾಜೆಚಾ ಅನಿತೆ ವಿರುದ್ದ್ ಬಂಡಾಯ್ ಯಾ ಕ್ರಾಂತಿಯ್ ಜಾಂವ್ಕ್ ಸಕ್ತಾ, ಹ್ಯಾ ಕ್ರಾಂತಿಚಾ ವಿಚಾರಾಂಕ್ ಉಗ್ಡಾಪೆಂ ಕರ್ತಾನಾ;
’ಗುಡೆ ದೊಂಗೊರ್ ನಾಡ್ತಿತ್ ತುಕಾ ಕುಶಿನ್ ತಿಳುಂಕ್ ವಚಾನಾಕಾ
ತುಜಾ ವಾಟೆರ್ ಫಾತೊರ್ ಘಾಲ್ತಿತ್ ಮ್ಹಣೊನ್ ಭಿಂಯಾನ್ ಕಾಂಪಾನಾಕಾ
ತುಜಿ ವಾಟ್ ಮತಿಂತ್ ಖಂಚವ್ನ್ ಚಲ್ ತುಂ ಪಾಟಿಂ ಪಳೆನಾಕಾ
ಲಿಪ್ತೆ ಮಿಸ್ತೆರ್ ಉಘಡ್ತೆಲೆ ಆತಾಂ ಚಲ್ಶಿ ತರ್ ತುಂ ಮುಖಾರ್’ [ಚಲ್ ತುಂ ಮುಖಾರ್]
ದರ್ಭಾರಾಚಾ ವಾಟೆರ್ ಧಯ್ರಾನ್ ಮೇಟ್ ಕಾಡ್ಚೊ ಹೊ ಕವಿ ಆಶಾವಾದಿಯ್ ಜಾಲಾ, ಬಂಡಾಯಾಕ್ಯ್ ವೆಂಗ್ಲಾ, ವಿಚಾರಾಂಕ್ಯ್ ಜಾಗಯ್ತಾ. ಧಯ್ರ್ಯ್ ಭಾಸಾಯ್ತಾ ಜಾಲ್ಯಾರ್ಯೀ ತೊ ಖಂಚಾ ಕಾರಾಣಾ ಖಾತಿರ್ ’ಮ್ಹಾಕಾ ಕಿತೆಂ ಪಡೊನ್ ಗೆಲಾಂ’ ಮ್ಹಣೊನ್ ತಾಣೆಂಚ್ ದಾಖವ್ನ್ ದಿಲ್ಲ್ಯಾ ಸಮಾಜೆಚಾ ಪರಿಚಯೆ ಥಾವ್ನ್ ಚುಕಾರಿ ಮಾರ್ತಾ?
ಪ್ರತ್ಯಕ್ಶ್ಪಣಿ ಹಿ ತಾಚಿ ಪೊಳಾಪಳ್ ಮ್ಹಣೊನ್ ಘೆತ್ಲ್ಯಾರ್ ಪರೋಕ್ಶ್ಪಣಿಂ ಹೆಂ ಮ್ಹಾಕಾ ಬೋಟ್ ದಾಖಂವ್ಚೆಂ ಪ್ರೇತನ್ ಪುಣೀಂ
ನ್ಹಯ್ಮೂ? ಹ್ಯಾವಿಶಿಂ ಅಧ್ಯಯನ್ ಕೆಲ್ಯಾರ್ ಹ್ಯಾ ಕವಿತೆಂತ್ ವರ್ಣನ್ ಕೆಲ್ಲಿ ಸಮಾಜ್, ತಾಂತ್ಲೆ ವಿಚಾರ್, ತಾಂತುಂ ಲಿಪೊನ್ ಆಸ್ಚೊ ಸಂಬಂಧ್ ಪಯ್ಲೆಂ ಹ್ಯಾ ಕವಿನ್ ದಾಕವ್ನ್ ದಿಲ್ಲೊ ಅಪ್ಣಾಚೊ ಆನಿ ಹ್ಯಾಚ್ ಸಮಾಜೆಚೊ ಸಂಬಂಧ್. ಪಯ್ಲೆಂ ಹ್ಯಾ ಕವಿನ್ ದಾಕವ್ನ್ ದಿಲ್ಲೊ ಅಪ್ಣಾಚೊ ಆನಿ ಹ್ಯಾಚ್ ಸಮಾಜೆಚೊ ಸಂಭಂದ್. ತರ್ ಕಾಂಯ್ ಹೊ ಕವಿ ಹಾಂಗಾ ಕವಿಚಾ ಪಾತ್ರಾ ಥಾವ್ನ್ ಭಾಯ್ರ್ ಯೇವ್ನ್ ಪಾತ್ರ್ದಾರಿಚಾ ಮ್ಹಳ್ಯಾರ್ ಎಕಾ ಸಾಮಾನ್ಯ್ ಮನ್ಶಾಚಾ ಪರಿಮಿತೆಂತ್ ರಾವ್ಲಾ?
ಸಾಮಾನ್ಯ್ ಮನಿಸ್ ಜಾವ್ನ್ ತೊ ಕಾಂಯ್ ಕರುಂಕ್ ಸಕಾನಾ ಜಾಲ್ಲೆಂಚ್ ಆನಿ ಹಾಂಗಾ ತಾಣೆಂ ಖೆಳ್ಚಾ ಪಾತ್ರಾ ಥಾವ್ನ್ ತಾಣೆಂ ದಾಕಯಿಲ್ಲಿಂ ಸಮಾಜೆಚಿಂ ಸತಾಂಯ್ ತಾಚ್ಯಾ ಕ್ರಾಂತಿಕ್ ಏಕ್ ವಾಟ್ ದಾಕಂವ್ಚೆಂ ಪಳೆತಾನಾ ಹಾಂಗಾಸರ್ ಹೊ ಪಾತ್ರ್ಧಾರಿಚೊ ಏಕ್ ಹಂತ್ ಮ್ಹಣೊನ್ ಘೆವ್ಯೆತ್. ಹಾಕಾ ಸ್ವಷ್ಟ್ ಕರ್ಚೆಂ ತರ್;
’ತಾಕಾಯ್ ಹಾಂಚಿ ಭಾಸ್ ಕಳಾನಾ ಯಾ
ಹಾಂಕಾಂ ತಾಚಿ ಭಾಸ್ ಕಳಾನಾ ಆಸ್ಯೆತ್
ಮ್ಹಾಕಾ ಹಾಂಚಿ ಭಾಸ್ ಸಮ್ಜತಾ ತರ್ಯ್
ಹಾಂವ್ಯ್ ಮೊನೊ ಖಾಂಬೊಚ್.’ [ಮೊನೊ
ಖಾಂಬೊ]
ಭಿತರ್ಲ್ಯಾ ರುಪಾನ್ ’ಮೊನೊ ಖಾಂಬೊ’ ಮ್ಹಳ್ಯಾರ್ ತೊ ಅಸಹಾಯಕ್ ಜಾಲಾ ಆಸ್ತಾಂ ಭಾಯ್ಲ್ಯಾ ರುಪಾಂತ್;
’ನಾ ಮ್ಹಣ್ಚಾಕ್ ಮ್ಹಜೆಲಾಗಿಂ
ದಿಲಾಂಯ್ ತುವೆಂ ದರಬಸ್ತ್
ಸಾಹಿತಿ ಮ್ಹಳ್ಳೊ ಬಿಲ್ಲೊ ದಿಲಾಯ್
ಜೀಣ್ಭರ್ ಗುಲಾಮ್ ಕೆಲಾಯ್
....
ಮೊರೊನ್ಂಚ್ ಜಿಯೆಂವ್ ಹಾಂವ್
ಸದೆಂವ್ ತುಜೆಂಚ್ ನಾಂವ್’ [ಸಕ್ಕಡ್ ತುಜೆಂಚ್]
ಹ್ಯಾ ಭಾಯ್ಲ್ಯಾ ರುಪಾಂತ್ ತೊ ಸಾಹಿತಿ ಜಾಲಾ ಆನಿ ಭಿತರ್ಲ್ಯಾ ರುಪಾಂತ್ ಜ್ಯೆ ಕಿತೆಂ ತಾಕಾ ಅಸಹಾಯಕ್ ಕರ್ತಾ ತಾಕಾ ಹ್ಯಾ ಭಾಯ್ಲ್ಯಾ ರುಪಾಧ್ವಾರಿಂ ಯಾ ಹ್ಯಾ ತಾಚಾ ಪಾತ್ರಾಧ್ವಾರಿಂ ಸಾಧ್ಯ್ ನಾತ್ಲ್ಲೆಂ ಸಾಧ್ಯ್ ಕರಯ್ತಾ.
ಹೆಂ ಸಗ್ಳೆಂ ದರ್ಭಾರಾಚಾ ಸಮಾಜೆಂತ್ಲೆಂ ಜಾಲ್ಯಾರ್ ಆತಾಂ ದರ್ಭಾರಾಂತ್ಲಿ ಫಿರ್ಯಾದ್ ಪಳೆವ್ಯಾಂ;
’ಆಸ್ತ್ ಗೆಲ್ಯಾ ಬದಿಕ್ ಗೆಲಾಂ
ಸಯ್ರಿಂ ಕುಟಾಮ್ ಸೊಡುನ್ ಗೆಲಾಂ
ಕೊಂಕ್ಣಿ ಮಾಯೆಚಾ ವಾವ್ರಾಕ್ ಲಾಗ್ಲಾಂ
ಭಾಡ್ಯಾಕ್ ಹಾಡ್ಲ್ಲೆಂಯ್ ಆಡೊವ್ ಘಾಲಾಂ’
ಹಿ ಹ್ಯಾ ಕವಿಚಿ ಫಿರ್ಯಾದ್ [ದರ್ಭಾರಾಂತ್ಲಿ ಪಿಂರ್ಗೊಣ್]
’ಅಸೊ ಕರ್ಚೊಗೀ ವಾವ್ರ್ ವಾ ಸೆವಾ
ಎಕಾ ವಿಧ್ವಾನಾನ್ ವಿಚಾರ್ ಕೆಲೊ
ಬಾಗ್ವೊಂಕ್ ಕಳಾನಾ ಚಲೊಂಕ್ ಕಳಾನಾ
ವಾವ್ರ್ ತುಜೊ ಕಸೊ ಜಾತಲೊ’
ವಿಧ್ವಾನಾಂಚಿ ಹಿ ಪ್ರತಿ ಫಿರ್ಯಾದ್!
ಆತಾಂ ದರ್ಭಾರಾಂತ್ ಹಾಜರ್ ಆಸ್ಲ್ಲ್ಯಾ ಹ್ಯಾ ಚುಕಿದಾರ್ ಕವಿಚಾ ಕವಿ ಜಾತಿಚಾ ಅತ್ಮ್ಯಾಂಚಿ ಬೋಬ್ ಪಳೆವ್ಯಾಂ!
’ಭಂವ್ತೊಣಿಂ ರಾವೊನ್ ಬೊಬೊಚ್ ಘಾಲ್ತಾತ್
ಹಾಂಗಾ ಕ್ರಾಂತಿ ಜಾಂವ್ಚೆಪರಿಂಚ್ ನಾ
ಕ್ರಾಂತೆಚೆ ಹಾಂಗಾ ಪೋಟ್ ಫುಟೊನ್
ಆನ್ಕಿಟ್ಯೊ ಚಿರೊನ್ ಉದಾರೆಚ್ ಪಡೊನ್
ಹೆಂ ರಂಗ್ಮಂಚ್ಚ್ ಸಾಂಡುನ್ ಗೆಲ್ಯಾತ್’ [ಅನ್ಯೇಕ್ ಪೆಟೊ ಮೆಲಾ ಪಳೆ]
ಹ್ಯಾ ಬೊಬೆ ಪಾಟ್ಲ್ಯಾನ್ ದರ್ಭಾರಾನ್ ದಿಲ್ಲೆಂ ಫಯ್ಸಲ್ ಪಳೆವ್ಯಾಂ;
’ಭಾಂದಾ ತಾಕಾ ವಿಣ್ಗೊ ಕರುನ್
ಫಾತೊರ್ ಮಾರಾ ಕಾತಿ ಸೊಲಾ
ಮಿಟಾ ಉದ್ಕಾಂತ್ ತಾಕಾ ನ್ಹಾಣವ್ನ್
ಚಾರ್ ವಾಟಾಂನಿ ಪುರ್ಶಾಂವ್ ಕರಾ’ [ದರ್ಭಾರಾಂತ್ಲಿ ಪಿಂರ್ಗೊಣ್]
ವಿದ್ವಾನಾಂಚಾ ಫಯ್ಸಾಲಾಕ್ ಆತಾಂ ಕವಿಚಿ ಪ್ರತಿಕ್ರಿಯಾ ಪಳೆಯಾ;
’ಫಯ್ಸಲ್ ಆಯ್ಲೆಂ ದರ್ಭಾರಾಂತ್ಲೆಂ
ಕವಿ ಉಟ್ಲೊ ಕಾಂಪೊನ್ ಕಾಂಪೊನ್
ಜೈಕಾರ್ ಘಾಲ್ಯೊ ವಿದ್ವಾನಾಂಚೆರ್
ಕವಿನ್ಯ್ ಫಿಂರ್ಗೊನ್ ಫಿಂರ್ಗೊನ್’ [ದರ್ಭಾರಾಂತ್ಲಿ ಪಿಂರ್ಗೊಣ್]
ದರ್ಭಾರಾಚಾ ಫಯ್ಸಲಾ ಮುಖಾರ್ ಕವಿ ಹಾಂಗಾಸರ್ ಸಂಪೂರ್ಣ್ ಅಸಹಾಯಕ್ ಜಾಲಾ ತಾಕಾ ಆತಾಂ ದರ್ಭಾರಾಚಾ ಫಯ್ಸಲಾ ಮುಖಾರ್ ಬಂಡಾಯ್ ಯಾ ಕ್ರಾಂತಿ ಉಭಿ ಕರ್ಚಿ ವಾಟ್ ನಾ. ಅಪುಣ್ ಅಪ್ಣೆ ಖೆಳ್ಲ್ಲ್ಯಾ ಹ್ಯಾ ಮ್ಹಳ್ಳ್ಯಾ ಪಾತ್ರಾಂತ್ ನಿರ್ದೋಶಿ ಮ್ಹಣೊನ್ ತೊ ರುಜು ಕರುನ್ಯ್ ತಾಚ್ಯಾ ಪಾತ್ರಾಚಾ ಕ್ಲೈಮ್ಯಾಕ್ಸಾಚಾ ಹಂತಾರ್ ತೊ ಅಪ್ಲಿ ಸಲ್ವಣ್ ಮಾಂಧುನ್ ಘೆತಾ.
ಹಿ ಮಾಂಧುನ್ ಘೆತ್ಲ್ಲಿ ಸಲ್ವಣ್ ಸ್ಪಷ್ಟ್ಪಣಿಂ ರುಜು ಕರ್ಚಿ ಜಾಲ್ಯಾರ್;
’ತುಮ್ಚಿಚ್ಚ್ ಖುಶಿ ಜಾಂವ್ ಕೊಂಕ್ಣಿ ಮ್ಹಜೆಂ ನಾಂವ್
ಪತ್ರಾಂಗಾರಾ, ಸಾಯ್ಟಾಂಗಾರಾ ರಾಕೊನ್ ಮ್ಹಾಕಾ ರಾವ್
ತಸ್ವೀರ್ ಮ್ಹಜಿ ಧಾಡ್ತಾಂ ಮರ್ಣಾಕ್ ಆತಾಂ ವೆಂಗ್ತಾಂ!’ [ಕೊಣಾಕ್ ಸಾಂಗೊಂ ಆತಾಂ]
ಸಂಪೂರ್ಣ್ ನಿರಾಸ್, ಸಲ್ವಣಿ ಆನಿ ಸಲ್ವಣೆಂತ್ ಮೊರ್ನಾಕ್ ವೇಂಗ್. ಇತ್ಲ್ಯಾರ್ ದರ್ಭಾರ್ ಸಂಪ್ಲೆಂ. ದರ್ಭಾರಾಚೊ ಏಕ್ ವಾಂಟೊ ಸಂಪ್ಲೊ. ಪಾತ್ರ್ ಅಖೇರ್ ಜಾಲೊ ಆತಾಂ ಪಾತ್ರ್ದಾರಿ ಜೊ ಹ್ಯಾ ಪಾತ್ರಾಚೊ ಸೂತ್ರ್ ಆನಿ ಸೂತ್ರ್ದಾರಿ ಜಾವ್ನ್ ಆಸ್ಲ್ಲೊ ಎದೊಳ್ ವರೇಗ್ ಆಪ್ಲ್ಯಾ ಆಪ್ಲ್ಯಾ ಭಿತರ್ಲ್ಯಾ ರುಪಾಕ್ ಲಿಪವ್ನ್ ದವರ್ಲ್ಲೊ ಆತಾಂ ಭಾಯ್ರ್ ಯೆತಾ ಆನಿ ಹ್ಯಾ ಸಮಾಜೆಮುಖಾರ್ ರಾವ್ತಾ. ಹಾಕಾ ಆತಾಂ ಕೊಣ್ಯ್ ವಳ್ಕಾನಾ ಕಿತ್ಯಾಕ್ ಮ್ಹಳ್ಯಾರ್ ದರ್ಭಾರ್ ಜೀವಂತ್ ಆಸಾತ್. ತಾಂಚಾ ಜಯ್ತಾಚೆಂ ಫೆಸ್ತ್, ತಾಂಕಾ ಲಾಭ್ಲ್ಲ್ಯಾ ಜೀಕಾಚಿ ಗವ್ನ್ ಆಚರಣ್ ಕರುಂಕ್ ಜಮ್ಲ್ಯಾತ್ ಫಿರ್ಯಾದೆಚಾ ದರ್ಭಾರಾ ಥಾವ್ನ್ ಗವ್ಜೆಚಾ ದರ್ಭಾರಾಂತ್.
ಆತಾಂ ಹ್ಯಾ ಗವ್ಜೆಚೆಂ ದರ್ಭಾರ್ ಪಳೆವ್ಯಾಂ;
’ಕೊಂಕಣ್ ಡೇ’ ತಕ್ಲೆನಾಂವಾಚಿಂ ಫಳಿಂ
ಸೊಭಿತ್ ದಾಟ್ ಅಕ್ಶರಾಂಚಿಂ ಆಟೊಳಿಂ
ಪೋಪ್-ರ್ಯಾಪ್ ಪದಾಂಚಾ ನಾದಾರ್
ಎಮ್ಸಿ ಇಂಗ್ಲಿಶಾಂತ್ ರಯ್ಲಾಂ ಸೊಡಿ
’ಕೊಂಕ್ಣಿ ಈಸ್ ಅವರ್ ಮದರ್’
’ಮೇ ಶಿ ಲಿವ್ ಫಾರೆವರ್’ [ಗಲ್ಫಾಂತ್ಲೊ ಏಕ್ ಕೊಂಕ್ಣಿ ದೀಸ್]
ಆಪ್ಲ್ಯಾ ಸಮಾಜೆಚಿ ಹಿಪೋಕ್ರೆಸಿ ಪಳೆಲ್ಲೊ ಹೊ ಸೂತ್ರ್ದಾರಿ ಪರ್ತ್ಯಾನ್ ಅಪ್ಲ್ಯಾ ಮತಿಂತ್ಲ್ಯಾ ಸೂತ್ರಾಕ್ ಸೊಧುಂಕ್ ಲಾಗ್ತಾ;
’ವಯ್ರ್ ವೆಲಾಂ ವಾ ಸಕ್ಲಾ ಲೊಟ್ಲಾಂ ಸಾಂಗಾಂ ಹಾಂಕಾ ಕೊಣೆ ಚೊರ್ಲಾಂ
ಪೊಂಡಾಂತ್ ಪಡ್ಲ್ಯಾತ್ ವಾ ಕೊಂಡಾಂತ್ ಬುಡ್ಲ್ಯಾತ್
ರಗ್ತಾಚಾ ದುಖಾಂಕ್ ದೊಳೆ; ಭುಕೆಚಿ ಬೊಬೆಕ್ ಕಾನ್ ಧಾಂಪುನ್
ಕಾಜುಲೆ ಪಿಸೊಳಿಂ ಕಾಂಯ್ ಧರುಂಕ್ ಗೆಲ್ಯಾತ್?’ [ಕವಿ ಖಂಯ್ ಜಿಯೆತಾತ್?]
ಆಪ್ಲ್ಯಾಚ್ ಸೂತ್ರಾಂನಿ ವಿಣುನ್ ಕವಿಚೊ ಪಾತ್ರ್ ಖೆಳ್ಲ್ಲೊ ಪಾತ್ರ್ದಾರಿ ಸಲ್ವೊನ್ ಗೆಲ್ಯಾರ್ಯೀ ಹಾಂಗಾ ಸೂತ್ರ್ದಾರಿ ಸಲ್ವಾನಾ. ತೊ ಪರತ್ ನವ್ಯಾ ಎಕಾ ಕವಿಚಾ ಪಾತ್ರಾಕ್ ಜಲ್ಮ್ ದೀಂವ್ಕ್ ಸೊಧ್ತಾ. ಹೆಂಚ್ ಕವಿತಾ ಜಮ್ಯಾಂತ್ಲೆಂ ವ್ಹಡ್ಪಣ್ ಯಾ ವಿಚಾರಾಂಚೆಂ ಗ್ರೇಸ್ತ್ಪಣ್ ಮ್ಹಣೊನ್ ಘೆತ್ಲ್ಯಾರ್;
ಅಪ್ಣೆಂ ಖೆಳೊನ್ ಸಂಪಯಿಲ್ಲ್ಯಾ ಕವಿಚಾ ತ್ಯಾ ಪಾತ್ರಾಂತ್ ಹೊ ಸೂತ್ರ್ದಾರಿ ತಾಚ್ಯಾ ದರ್ಭಾರಾಕ್ ವೆಚಾ ಸಗ್ಳ್ಯಾ ಸಮಾಜೆಚೆಂ ಪೊಕೊಳ್ಪಣ್ ಉಗ್ಡಾಪೆಂ ಕರುನ್ಯ್ ಆಪ್ಲ್ಯಾ ಥೊಡ್ಯಾಚ್ ಆಂಖ್ರ್ಯಾಂ ವಯ್ರ್ ಭರ್ವಸೊ ದವರುನ್ಯ್ ಎಕಾಚ್ ಥೆಂಬ್ಯಾ ರಗ್ತಾಚಾ ಬಲಿದಾನಾಚಿ ಸಕತ್ ಬಗ್ಲೆಕ್ ಘೆವ್ನ್ಯ್ ನಿಮಾಣೆಂ ದರ್ಭಾರಾಚಾ ವಿಧ್ವಾನಾಂ ಮುಖಾರ್ ಸಲ್ವೊನ್ ಅಪ್ಲೊ ಪಾತ್ರ್ ಸಂಪಂವ್ಚೆಂ, ಕ್ರಾಂತಿಕಾರಿ ನಿರಾಸ್ವಾದ್ ಯಾ
(Revolutionary pessimism) ವಿಚಾರಾಂಕ್ ಉಕ್ಲುನ್ ಧರ್ಚೆಂ ಹ್ಯಾ ಕವಿತಾ ಜಮ್ಯಾಚೆಂ ಉಣೆಂಪಣ್ ಜಾಲಾಂ.
ಹ್ಯಾ ಕವಿತಾಜಮ್ಯಾಂತ್ ಕ್ರಾಂತಿಕಾರಿ ವಿಚಾರ್ಚ್ ಉಟೊನ್ ರಾವ್ಲ್ಯಾತ್ ಮ್ಹಳ್ಳೆಂ ತೆಂ ಸತ್.
ಹ್ಯಾ ವಿಚಾರಾಂಕ್ ವ್ಹಾಳಯಿಲ್ಲ್ಯಾ ರಿತಿ ವಯ್ರ್
ಖಂಯ್ಚರ್ಗಿ ಭರ್ವಸೊ ಯಾ ಆಶಾವಾದ್ ಝಳ್ಕಾತಾ
ಜಾಲ್ಯಾರ್ಯ್ ಕವಿತಾ ಜಮ್ಯಾಚಾ ಮುಳಾವ್ಯಾ ವಿಚಾರಾಂ ಮುಖಾರ್
ಸಲ್ವಣಿ ಆಪ್ಣಾಯಿಲ್ಲೆಂ ಸಾಮಾಜಿಕ್ ಜಾಂವ್ ಧಾರ್ಮಿಕ್
ಜಾಂವ್ ಆರ್ಥಿಕ್ ಜಾಂವ್ ಯಾ ರಾಜಕೀಯ್ ಜಿವಿತಾಕ್ ದಿಶಾ
ಧಾಖಯ್ನಾ.
ಕವಿತಾಜಮ್ಯಾಂತ್ ವ್ಹಾಳಯಿಲ್ಲೆ ವಿಚಾರ್ ವಾಸ್ತವಿಕ್ ಯಾ ತಾತ್ವಿಕ್ಪಣಾಕ್ ಲಾಗು ಜಾಯ್ನಾಂತ್ ಜಾಲ್ಲ್ಯಾನ್ ಕವಿ ಮ್ಹಳ್ಳ್ಯಾ ಪಾತ್ರ್ರ್ ಥಾವ್ನ್ ತಾಚ್ಯಾ ಸೂತ್ರ್ಧಾರಿನ್ ಉಟಯಿಲ್ಲೊ ಕ್ರಾಂತಿಚೊ ಆವಾಜ್ ಹ್ಯಾ ಸಮಾಜೆಚಾ ವಿಧ್ವಾನಾಂ ಮುಖಾರ್ ಧಾಂಬುನ್ ವೆಚೊ ವಾಸ್ತವಿಕ್ ಖಂಡಿತ್ ವ್ಹಯ್. ಕಾಂಯ್ ಹ್ಯಾಚ್ ಖಾತಿರ್ ಸೂತ್ರ್ದಾರಿ ಹಾಂಗಾಸರ್ ವಾಸ್ತವಾಚಾ ಮುಖಾರ್ ತಕ್ಲಿ ಭಾಗಾಯ್ತಾ ಆನಿ
ಆಪ್ಲ್ಯಾ ಪಾತ್ರಾಕ್ ಪರ್ದೊ ವೊಡ್ತಾ.
’ದರ್ಭಾರ್’ ಆನಿ ’ಫಿಂರ್ಗೊಣೆ’ ಮಧ್ಲೊ ಕವಿ [- ವಲ್ಲಿ ಕ್ವಾಡ್ರಸ್]
ಹಾಂವ್ ಕವಿತಾ ಬರಂವ್ಕ್
ಸುರು ಕರ್ತಾನಾ ’ಹಾವೆಂಯ್ ಕಿತ್ಯಾಕ್ ಕವಿತಾ ಬರಂವ್ಚಿಂ?’ ಮ್ಹಳ್ಳ್ಯಾ
ಸವಾಲಾಕ್ ಜೊಕ್ತಿ ಜಾಪ್ ಸೊಧ್ಚಾಂತ್ ಹಾಂವ್ ಜಿಕ್ಲ್ಲೊಂಚ್
ನಾ. ಹಾಂವ್ ಜಾಪಿ ಆಯ್ಕೊಂವ್ಚಾಕೀ ಜಾಪಿ ಸೊಧ್ಚಾಂತ್ ಚಡ್ ಸಂತುಶ್ಟ್ ಜಾತಾಂ.
ಹೆಚ್ಚ್ ಖಾತಿರ್ ಜಾಯ್ಜಯ್ ಹಾವೆಂ ಬರುಲ್ಲ್ಯಾ ಪಯ್ಲ್ಯಾ ಕವಿತಾ ಆನಿ ಬರುಲ್ಲ್ಯಾ ದುಸ್ರ್ಯಾ ಕವಿತಾ
ಮಧೆಂ ಚಡುಣೆಂ ಚೊವ್ದಾ ವರ್ಸಾಂ, ದೆಡ್ಶೆಂ ಮಟ್ವ್ಯೊ ಕಾಣ್ಯೊ ಆಸಾತ್.
ಹ್ಯಾ ದೇಡ್ ದಾಕ್ಡ್ಯಾಂತ್ ಹಾವೆಂ ಕಿತ್ಲೆಂ ಜೊಡ್ಲೆಂ (ದುಡು)
ವಾ ಕಿತ್ಲೆಂ ಮೊಡ್ಲೆಂ ತೆಂ ಹಾವೆಂ ಲೆಖಾಕ್ ಧರುಂಕ್ ನಾ, ತೆಚ್ಚ್ಪರಿಂ ಕಿತ್ಲೆಂ
ಹೊಗ್ಡಾಯ್ಲೆಂ ಮ್ಹಳ್ಳೆಂಯ್ ಲೆಕಾಕ್ ಧರುಂಕ್ ನಾ ತರ್ಯ್ ಅಶೆಂ
ಹೊಗ್ಡಾವ್ನ್ಂಚ್ ಜೊಡ್ಲ್ಲೆಂ (ಅನ್ಭೋಗ್) ಜಾಯ್ತೆಂ ಆಸಾ.
ಅಮೃತಾ ಪ್ರೀತಮ್ ಭೋವ್ಶಾ ಸತ್ಚ್ಚ್ ಸಾಂಗ್ತಾ; ’ಜೆದ್ನಾಂ
ಮೊರ್ತಾಪರ್ಯಾಂತ್ ಜಿಯೆಲ್ಲ್ಯಾ ಆಮ್ಕಾಂ ಜಿಣಿ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ
ಸಮ್ಜಾನಾಂ ತರ್, ಮೆಲ್ಲ್ಯಾ ಉಪ್ರಾಂತ್ ಮರಣ್ ಮ್ಹಳ್ಳೆಂ ಕಶೆಂ
ಸಮ್ಜೊಂವ್ಚೆಂ?’ ಜಿಣಿ ಆನಿ ಕವಿತಾಯ್ ಭೋವ್ಶಾ ಅಸಲೆಚ್
ಮಿಸ್ತೆರ್? ಜೆದ್ನಾಂ ಜಿಣಿಂಚ್ ಆಮ್ಕಾಂ ಸಮ್ಜಾನಾಂ ತರ್ ಕವಿತಾ ಕಶಿ
ಸಮ್ಜೊಂವ್ಚಿ? ಅಜೂನ್ ಹಾಂವ್ ಸಮ್ಜೊಂಕ್, ಶಿಕೊಂಕ್ ಹಟ್ ಧರುನ್
ಮ್ಹಳ್ಳೆಪರಿಂ ಪ್ರೇತನ್ ಕರುನ್ ಆಸಾಂ. ಪುಣ್ ಹ್ಯಾ
ಹಠಾಪಾಟ್ಲ್ಯಾನ್ ಫಕತ್ತ್ ಮ್ಹಜೊ ಸ್ವಾರ್ಥ್ ನಾ, ಬಗಾರ್ ಅತುರಾಯ್, ಅತ್ರೆಗ್ ಆನಿ ಆಶಾ ಆಸಾ ಆನಿ ಖಂಡಿತ್
ಹೊ ಮಿಸ್ತೆರ್ ಸಮ್ಜೊಂಕ್ ಸಕ್ತಲೊಂ ಮ್ಹಳ್ಳೊ ಭರ್ವಸೊ ಆಸಾಂ.
ಆರ್ವಿಲ್ಲ್ಯಾ ವರ್ಸಾಂನಿ ಹಾವೆಂ ಬರುಲ್ಲಿಂ ಕವಿತಾ ಜಾಂವ್, ಪರ್ಗಟ್ಲ್ಲೆ ಕವಿತಾಚೆ
ಬೂಕ್ ಜಾಂವ್, ಲಾಭ್ಲ್ಲಿಂ ಇನಾಮಾಂ ಜಾಂವ್, ಚಲುಲ್ಲಿಂ/ಚಲಂವ್ಚಿಂ ಕವಿತಾಚಿಂ ಅಂಕಣಾಂ ಜಾಂವ್ ಯಾ ಕವಿತಾಪಾಠ್ ಜಾಂವ್ -
ಹರ್ಯೆಕಾಂತ್ ಹಾಂವ್ ಶಿಕೊನ್ ಆಸಾಂ, ಅಜೂನ್ ತಾಚ್ಯಾಕೀ ಜಾಯ್ತ್ಯಾ
ವಾಂಟ್ಯಾಚೆಂ ಶಿಕೊಂಕ್ ಬಾಕಿ ಉರ್ಲಾಂ. ’ಚ್ಯಾರ್ ಮುಖಾಂ’ ಹಾಂತ್ಲಿಂ
ಮುಖಾಂ ಆತಾಂ ಮ್ಹಾಕಾಚ್ ಬೊಲ್ತಿಂ ದಿಸ್ತಾತ್, ಪುಣ್ ತೆಂ
ಮುಖ್ ’ಕಟ್ಪುತ್ಳಿ’ ಬುಕಾಂತ್ ಎಕಾ ಬೊಂಬ್ಯಾಚೆಂ (ಇಮಾಜೆಚೆಂ) ರೂಪ್ ಘೆತಾ, ಆನಿ ಆತಾಂ
’ದರ್ಭಾರಾಂತ್ಲಿ ಫಿಂರ್ಗೊಣ್’ ಹಾಂತುಂ ತ್ಯಾ ಬೊಂಬ್ಯಾಕ್ ಜೀವ್
ಮೆಳ್ತಾಶೆಂ ಭಗ್ತಾ, ಕಿತ್ಯಾಕ್ ಮ್ಹಳ್ಯಾರ್ ’ಚ್ಯಾರ್ ಮುಖಾಂ’ ಫಕತ್ತ್ ತಸ್ವೀರೆಂತ್
ಮಾತ್ರ್ ಆಸಾತ್, ಬೊಂಬಿಂ ತ್ಯಾ ತಸ್ವೀರೆಥಾವ್ನ್ ಭಾಯ್ರ್ ಯೇವ್ನ್ ರಂಗ್ಮಂಚಿಯೆರ್ ಚಡ್ಲ್ಯಾಂತ್ ತರ್ಯ್ ತಾಂಕಾಂ
ಹಾಸೊಂಕ್ ಕಳಾನಾ, ನಾಚೊಂಕ್ ಕಳಾನಾ, ಚಲೊಂಕ್ ಕಳಾನಾ - ಕೊಣ್ಗೀ
ಹಾಂಚೊ ಹಾಸೊ ಹಾಸ್ತಾತ್, ಕೊಣ್ಗಿ ಹಾಂಕಾಂ ನಾಚಯ್ತಾತ್, ಕೊಣ್ಗೀ
ಹಾಂಕಾಂ ಹಾಲಯ್ತಾತ್. ಪುಣ್ ಆತಾಂ ಹಾಂಗಾಸರ್ ಹಾಸೊ ಆಸಾತ್, ರಡ್ಣೆಂ ಆಸಾ, ನಿರಾಸ್-ಆಶಾ,
ಸುಕ್-ದೂಕ್, ರಾಗ್-ಆವೇಶ್ ಧಾರಾಳ್ ಮಾಪಾನ್ ಆಸಾ.
ತಶೆಂ ಮ್ಹಣ್ ಕವಿತಾ ಮ್ಹಳ್ಯಾರ್ ಮ್ಹಾಕಾ ಕಾಂಯ್
ಮ್ಹಜಾ ಮತಿಚೆ ಅಕ್ಲಾಸ್ ವಾಚ್ಪ್ಯಾಚಾ ಮಾತ್ಯಾರ್ ಥಾಪ್ಚೆಂ
ಮಾಧ್ಯಮ್ ಬಿಲ್ಕುಲ್ ನ್ಹಯ್. ಆಜ್ಕಾಲ್ ಸಂಸಾರಾಚಾ ಕೊನ್ಶಾ ಕೊನ್ಶಾಂನಿ ಚಲ್ಚೆ ವೆವಸ್ತಿತ್ ದರ್ಭಾರ್, ತ್ಯಾ ದರ್ಭಾರಾಂನಿ ಕಶೆಂ ಚಲ್ತಾ ಕೊಣಾ ಕೊಣಾಚೆಂ ರಾಜ್,
ಪೊಯ್ಶೆ, ಪದ್ವಿ ಆಸ್ಲ್ಯಾರ್ ಕಶೆಂ ಉಗ್ತ್ಯಾ ಬಾಜಾರಾಂತ್
ಮಾನ್-ಮರ್ಯಾದ್ ವಿಖ್ರ್ಯಾಕ್ ಮೆಳ್ತಾ, ಕೊಣಾಕ್ ಕಶೆಂ
ವಯ್ರ್ ಚಡಯ್ಜಾಯ್ ಕಿತ್ಲೆಂ ವಯ್ರ್ ಚಡಯ್ಜಾಯ್,
ವಯ್ರ್ ಚಡುಲ್ಲ್ಯಾಂತ್ ಜಾಂವ್ಚೊ ’ಬೌತಿಕ್ ಲಾಭ್’ ಕಿತ್ಲೊ? ಯಾ ಕಸಲೊ?
ಹ್ಯಾ ಸರ್ವಾಂಚೆರ್ ಕಸೊ ನಿಹಾಳ್ ಜಾತಾ - ಬಿಲ್ಕುಲ್ ಬಂಡ್ವಾಳ್ಶಾಹಿ ಚಿಂತಾಪ್, ಜಿತ್ಲೆಂ ಬಂಡ್ವಾಳ್ ತಿತ್ಲಿ
ವ್ಹಾಡ್ - ವಾ!. ಆನಿ ಹ್ಯಾ ಬಾಜಾರಿ ಚಿಂತ್ಪಾಮಧೆಂ ಕೊಣ್ಯ್ ಎಕ್ಲೊ
ಸತಿ (ಪೆದ್ದ) ಸಾಂಪಡ್ಲೊ ತರ್ ಕಶೆಂ ತಾಚೆರ್ ಹಾಂಚೊ ಗುನ್ಯಾಂವಾಚೆಂ
ವೊಜೆಂ ಚಡವ್ನ್ ಚುಕಿದಾರ್/ಅಪ್ರಾದಿ ಕರ್ಯೆತ್ ಮ್ಹಳ್ಳಿಂ ಅತರ್ವಣಾಂ ಕುಡ್ಡ್ಯಾಂಕ್ಯ್ ರೂಪ್ ರೂಪ್
ದಿಸ್ತಾತ್. ಆನಿ ಹ್ಯಾ ಅತರ್ವಣಾಂತ್ ತ್ಯಾ ಬಾವ್ಡ್ಯಾಕ್ ಧರ್ನ್ ಕಶೆಂ ತಾಚೆಂ ಬಲಿದಾನ್ ಭೆಟಯ್ತಾತ್ ಆನಿ
ಹೆಂ ಸರ್ವ್ ಸೊಸ್ಲ್ಲೆಶಿವಾಯ್ ನಿರ್ವೋಗ್ ನಾಸ್ತಾಂ ಕಶೆಂ ಉದೆತಾ ’ಫಿಂರ್ಗೊಣ್’ ಮ್ಹಳ್ಳೆಂ
ಸಾಂಗ್ಚೆಂಚ್ ಸಾಧನ್ ಮ್ಹಜೆಂ. ಕಿತ್ಲೊಂ ಜಿಕ್ಲಾಂ ಕಿತ್ಲೊಂ ಸಲ್ವಾಲಾಂ ತೆಂ
ವಾಚ್ಪಿಚ್ ಅನ್ಯೇಕಾ ದರ್ಭಾರಾಂತ್ ಫಯ್ಸಲ್ ದೀಂವ್ದಿತ್.
ಹಾಂವ್ ಜೆದ್ನಾಂ ಕವಿತಾಶೆತಾಂತ್ ಪಾಂಯ್ ತೆಂಕ್ಲ್ಲೆಂಚ್ ’ಕಿತ್ಯಾಕ್ ರಿಗ್ಲೊಯ್? ಆತಾಂ ಕವಿತಾ ಬರವ್ನ್ಂಚ್
ಸೊಡ್’ ಮ್ಹಳ್ಳೆಂ ’ಕಿತ್ಯಾಕ್ ಆಪಡ್ಲೆಂಯ್? ಆತಾಂ ಧುವ್ನ್
ಸೊಡ್’ ಮ್ಹಳ್ಳೆಂ ಮ್ಹಜಾ ಮತಿನ್ ಘೆತ್ಲ್ಲೆಂ ಫರ್ಮಾಣ್ ದೆಕುನ್
’ಕವಿತಾ’ ಬರವ್ನ್ಂಚ್ ಗೆಲ್ಲೆಶಿವಾಯ್ ದುಸ್ರಿ ವಾಟ್ ನಾತ್ಲ್ಲಿ. ತಶೆಂ
ಮ್ಹಣ್ ಕವಿತಾ ಕಾಂಯ್ ಮ್ಹಜಾ ಖಾಂದಿ ದಿಲ್ಲೊ ಖುರಿಸ್
ಬಿಲ್ಕುಲ್ ನ್ಹಯ್, ಕವಿತಾಂಕ್ ಹಾಂವ್ ಅಜೂನ್ ವರ್ತ್ಯಾ
ಮೊಗಾನ್ ಆನಿ ಗೌರವಾನ್ ಶಿಕೊನ್ ಆಸಾಂ ದೆಖುನ್ ವೆಚ್ಯಾಧಿಂ
ಮ್ಹಜಾ ತಾಂಕಿಭಿತರ್ಲೆಂ ಕರ್ನ್ ವೆಚಿ ಆಶಾ/ಪಿಸಾಯ್/ಹೊರ್ಭೊಸ್ ಯಾ
ಹೆರ್ ಕಿತೆಂಯ್ ಮಾತ್ತಿ ಗೊಬೊರ್.
ಕೊಂಕ್ಣಿ ಕವಿತಾಶೆತಾಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ನವೆಂ ಚಿಂತಾಪ್,
ನವೊ ಜೀವ್ ಕೊಂಕ್ಣಿ ಕವಿತಾಂನಿ ಆಯ್ಲಾ ಮ್ಹಣ್ ಹಾಂವ್ ತರ್ಯ್
ಪಾತ್ಯೆತಾಂ. ಹಾಚೆಂ ಕಾರಾಣ್ ಇತ್ಲೆಂಚ್ - ಪಾರಂಪರಿಕ್ ಚಿಂತ್ಪಾಚಿ ಜಾಲ್ಲಿ ಬದ್ಲಾವಣ್. ಕವಿತಾ ಮ್ಹಳ್ಯಾರ್ ಆಮಿ
ಸಮ್ಜೊಂವ್ಚೆಂ ವಾ ಬರಂವ್ಚೆಂ ವಾ ಲೆಖ್ಚೆಂ - ಲಾಂಬಾಯೆಂತ್, ರುಂದಾಯೆಂತ್, ಗುಂಡಾಯೆಂತ್ ಆನಿ ಉಭಾರಾಯೆಂತ್ ಜಾಂವ್ಚಿ ಬದ್ಲಾವಣ್.
ಹೆಂ ಕಿತ್ಲೊ ತೇಂಪ್ ಉರತ್ ಮ್ಹಳ್ಳೆಂ ಕೊಣಾಯ್ಚಾನ್ಯ್
ನಖ್ಖೆಂ ಸಾಂಗೊಂಕ್ ಕಶ್ಟ್ ತರ್ಯ್ ಹೆಂ ಅಶೆಂಚ್ ಮುಖಾರುನ್ ಆಸಾಜಯ್ ಮ್ಹಳ್ಳಿ ಅಶಾ
ಮ್ಹಜಿ.
’ಕಟ್ಪುತ್ಳಿ’ ಬುಕಾ ಉಪ್ರಾಂತ್ ಮ್ಹಾಕಾ ’ಬಂಡಾಯ್ ಕವಿ’ ಜಾವ್ನ್ ಕುರ್ವಾರ್ ಕೆಲ್ಲೆಂಚ್
ಹಾವೆಂ ಮ್ಹಜಾ ವಳ್ಕಿಚ್ಯಾಲಾಗಿಂ ಜರ್ ’ಕಸೊ ಆಸಾಯ್ರೆ’
ಮ್ಹಣ್ ಸವಾಲ್ ಕೆಲೆಂ ತರ್ಯ್ ತಾಚಾ ಮತಿಂತ್ ’ವಲ್ಲಿ, ತುಂ ಬಂಡಾಯ್
ಸವಾಲ್ ಪುಣಿಂ ವಿಚಾರ್ತಾಯ್ಗಿ?’ ಮ್ಹಳ್ಳೊ ದುಭಾವ್ ಜರೂರ್ ಆಸ್ಲ್ಲೊ. ಜೆಜುಪರಿಂ
’ತೊಮಸಾ ಹಾಡ್ ತುಜೆಂ ಬೋಟ್ ಘಾಲ್ ಮ್ಹಜಾ ಕಡ್ವಳಾಕ್’
ಮ್ಹಣೊಂಕ್ ಮ್ಹಜೆಲಾಗಿಂ ಕಾಂಯ್ ನಾಂ.
ಮ್ಹಜಾ ಕವಿತಾಂಕ್ ಜಾಯ್ತ್ಯಾಂನಿ ಪ್ರೇರಣ್ ದಿಲಾಂ, ಪ್ರೇರಣಾಶಿವಾಯ್
ಮ್ಹಜಾ ಕವಿತಾಂಕ್ ಜೀವ್, ಉಸ್ವಾಸ್, ತಾನೆಕ್, ಭುಕೆಕ್
ದಿಲ್ಲ್ಯಾ ದಿತೆಚ್ಚ್ ಆಸ್ಚಾ ಮ್ಹಜಾ ಭೋವ್ ಮೊಗಾಚಾಂಕ್
ಹಾಂವ್ ಆಭಾರಿ ಜಾವ್ನಾಸಾಂ, ದಾಯ್ಜ್ ಪಂಗ್ಡಾಚಾ ಸರ್ವಾಂಕ್, ತಶೆಂಚ್
ಮ್ಹಜೆಥಂಯ್ ಕವಿತಾಚೆಂ ಝಡ್ ಕಿರ್ಲಾಶೆಂ ಕೆಲ್ಲ್ಯಾಂಕ್, ತಾಂಚೊ ಜತ್ನೆನ್
ಪೋಸ್ ಕೆಲ್ಲ್ಯಾಂಕ್, ಮೆಲ್ವಿನ್ ರೊಡ್ರಿಗಸ್, ಆಂಡ್ರು ಡಿ’ಕುನ್ಹಾ, ಎಚ್ಚೆಮ್, ಸಿಜ್ಯೆಸ್ ತಾಕೊಡೆ, ಕ್ಲೆರೆನ್ಸ್ ಕೈಕಂಬ,
ಹೇಮಾಚಾರ್ಯ, ಎಡ್ವಿನ್ ಜೆ.ಎಫ್.ಡಿ’ಸೊಜ್, ಜೆಮ್ಮಾ ಪಡೀಲ್, ಆಸ್ಟಿನ್
ಪ್ರಭು ಹಾಂಚೆಸವೆಂ ವಿಮರ್ಶಕಾಂಕ್, ಮೆಲ್ವಿನ್ ವಾಸ್ ಕೆಲರಾಯ್,
ಮೆಲ್ವಿನ್ ಪಿಂಟೊ ನೀರುಡೆ, ನಾನು ಮರೋಲ್ ಆನಿ ಹೆರಾಂಕ್
ಸರ್ವಾಂಕ್ ಹಾಂವ್ ಋಣಿ.
ಹೆಚ್ಚ್ಪರಿಂ ಮ್ಹಜಾ ಕವಿತಾಂಕ್ ಮ್ಹಾಕಾ ಜಾಯ್ತ್ಯಾಂನಿ ತ್ರಾಣ್
ದಿಲಾಂ, ಎದೊಳ್ಚ್ಚ್ ಹಾವೆಂ ಉಲ್ಲೇಕ್ ಕೆಲ್ಲ್ಯಾ ಸರ್ವ್ ಥರಾಂಚಾ ದರ್ಭಾರಾಂನಿ, ವಿಧ್ವಾನಾಂನಿ,
ಮುಂಡಾಸ್ಗಾರಾಂನಿ, ಶಿಪಾಯಾಂನಿ, ಸಾಲ್ವಾರ್ ಜಾಲ್ಲ್ಯಾಂನಿ,
ಸಾಲ್ವಾರ್ ಕರ್ಚಾಂನಿ, ಬಲಿ ದಿಂವ್ಚಾಂನಿ, ಬಲಿಯೆಕ್ ಚಡಂವ್ಚಾಂನಿ,
ದಿಸಾ ಉಜ್ವಾಡಾಕ್ ರಗಾತ್ ಚಿಂವ್ಚಾ ’ಮನಿಸ್’ ಮ್ಹಳ್ಳ್ಯಾ ಕಾನೆಟಾಂನಿ,
’ಕೊಂಕ್ಣಿ ಸಂಚಾಲನ್’ ಮ್ಹಳ್ಳೊ ಡೋಂಗ್ ಕರುನ್ ’ಅಪ್ಲೆಂ ಬೊಳ್ಕೆಂ’ ಭರ್ಚಾಂಕ್,
ಮಾತ್ರ್ ನ್ಹಯ್ ’ಕೊಂಕ್ಣಿ’ ಮ್ಹಣೊನ್ ವೆವೆಗ್ಳೆ ಸರ್ಕಸ್ ಕರ್ಚಾಂಕ್, ಕೊಂಕ್ಣೆಚೆಂ ಕಾಮ್ ಕರಿಜಾಯ್ ಅಸೊನ್ಯ್ ಜೆಮೆಂವ್ಚಾಂ/ಘೊರೆಂವ್ಚಾಂ
ಸರ್ವಾಂಕ್ ಆನಿ ಅಖ್ರೇಕ್ ಹೆಂ ಸಗ್ಳೆಂ ದೊಳೆ, ಕಾನ್, ತೊಂಡ್ ಉಘಡುನ್ ಪಳೆಂವ್ಚಾ
ಮ್ಹಜೆಭಿತರ್ಲ್ಯಾ ಕವಿಕ್ - ಹ್ಯಾ ಸರ್ವಾಂಕ್ ಹಾಂವ್ ಜೀಣ್ಭರ್ ಋಣ್ಕಾರಿ!.
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
