ಕವಿತಾकविताPoem
ದಿವ್ಯಾ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’
ಕವಿತಾಪಾಠ್ - 6
ಲಿಸಾಂವ್ - 6 . ಮ್ಹಜೊ ದಿವೊ
ಕವಿತಾ - ಮ್ಹಜೊ ದಿವೊ
ಕವಿ: ಮಾವ್ರಿಸ್ ಶಾಂತಿಪುರ
ಬೂಕ್: ಕಿರಾ ಬೋಂಚ್
ಪ್ರಕಾಶಕ್: ಪ್ರಿಯಾ ಪ್ರಕಾಶನ್
ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್
ತಾರಿಕ್: 8 ಜುಲಾಯ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಪಾಲ್ವಾ ಪೊಂತ್ ಪಿಂದೂನ್
ಮ್ಹಜಾ ದಿವ್ಯಾಕ್ ವಾತ್ ಕೆಲ್ಯಾ
ಗೊಬ್ರಾಂತ್ಲೊ ಇಂಗ್ಳೊ ಫುಂಕುನ್
ಮ್ಹಜಾ ದಿವ್ಯಾಕ್ ದೀಷ್ಠ್ ದಿಲ್ಯಾ
ದೆವಾ ದೆವಾ ತೂಂಚ್ ವ್ಹಡ್
ದಿವೊ ಮ್ಹಜೊ ಪೆಟಂವ್ಕ್ ಸೊಡ್
ತಾಕ್ ದೀವ್ನ್ ತೇಲ್ ಹಾಡ್ನ್
ದಿವ್ಯಾಕ್ ಮ್ಹಜಾ ತಾನೆಕ್ ದಿಲಾ
ದಿವ್ಯಾ ಉಜ್ವಾಡಾನ್ ಇಲ್ಲೆಂ ಜೊಡ್ಲ್ಲೆಂ
ದಿವೊ ಝಳಂವ್ಕ್ ಆಡ್ವಾಕ್ ಗೆಲಾಂ
ದೆವಾ ತುಜಿ ಬಿರ್ಮತ್ ವ್ಹಡ್
ದಿವೊ ಮ್ಹಜೊ ಪೆಟಂವ್ಕ್ ಸೊಡ್
ದಿವ್ಯಾಕ್ ಮ್ಹಜಾ ಜಬ್ಬೊರ್ ಆಶಾ
ಝಗ್ಡೊನ್ ತರೀ ಜಿಯೆಂವ್ಕ್
ವಾರ್ಯಾಚೊ ವ್ಹಾಳೊ ದಿವ್ಯಾ ಕುಶಿನ್
ದಿವ್ಯಾಕ್ ಮ್ಹಜಾ ಸದಾಂ ಭಿಂಯೆಂವ್ಕ್
ದೆವಾ ವಾರ್ಯಾಕೀ ತುಂ ವ್ಹಡ್
ದಿವೊ ಮ್ಹಜೊ ಜಳೊಂಕ್ ಸೊಡ್
ಜಿಯೆ ಮ್ಹಣೊನ್ ದಿವೊ ದಿಲೊಯ್
ದಿವ್ಯಾಕ್ ಪಳೆ ಝಳ್ತಾ ಕಸೊ
ಉಜ್ವಾಡ್ ತರೀ ಮೆಳಾತ್ ಕಿತ್ಲೊ
ದಿವೊ ಮ್ಹಜೊ ಝಳ್ಳ್ಯಾರ್ ಅಸೊ
ದಿವ್ಯಾ ಜೀಬ್ ಕರ್ ವ್ಹಡ್
ದಿವೊ ಮ್ಹಜೊ ಜಳ್ಳ್ಯಾರ್ ಪುರೊ
ದಿವ್ಯಾಕ್ ಧನಿ ತುಂಚ್ ದೆವಾ
ದಿವೊ ಆಸ್ತಾಂ ಜಿವೊ ಹಾಂವ್
ದಿವ್ಯಾ ವರ್ವಿಂಚ್ ತುಜಿ ಸೆವಾ
ತುಜಿಚ್ ಖುಶಿ ಜಾಂವ್ ದೆವಾ
ದೆವಾ ಪೂನ್ ಜೊಡ್
ದಿವೊ ಮ್ಹಜೊ ಫುಂಕುನ್ ಸೊಡ್
ಕವಿಚಿ ವ್ಹಳೊಕ್:
ಮಾವ್ರಿಸ್ ಶಾಂತಿಪುರ, ಪಾಂಬೂರ್ ಫಿರ್ಗಜೆಚೊ ಏಕ್ ಲೊಕಾಮೊಗಾಳ್ ಕವಿ, ಪತ್ರ್ಕರ್ತ್, ಕಾಣ್ಯೆಗಾರ್ ತಶೆಂಚ್ ಪತ್ರಿಕೋಧ್ಯಮಿ ತರ್ಯೀ ಕವಿತಾ ತಾಚಿ ಪಯ್ಲಿ ಅಭಿರುಚ್ ಆನಿಂ ಕೊಂಕ್ಣಿ ಕವಿತಾಶೆತಾಂತ್ ತಾಣೆಂ ಎದೊಳ್ಚ್ ಅಪ್ಲೆಂ ಸ್ಥಾನ್ ರುತಾಂ ಕೆಲಾಂ. ’ಕಿರಾ ಬೋಚ್’ ಕವಿತಾಬುಕಾಕ್ ಗೊಂಯ್ಚಿ ಭಾಶಾ ಮಂಡಳ್ ಪ್ರಶಸ್ಥಿ ಹಾಕಾ ಲಾಭ್ಲ್ಯಾ, ಹಿ ಮಾತ್ರ್ ನೈಂ, ಹಾಚಾ ಸಭಾರ್ ಕವಿತಾಂಕ್ ಇನಾಮಾಂಯ್ ಲಾಭ್ಲ್ಯಾಂತ್.
(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)
ಬಸ್ಲ್ಲಿಂ: ಐಡಾ ಡಿ’ಸಿಲ್ವಾ, ಫಿಡೇಲಿಸ್ ಫೆರ್ನಾಂಡಿಸ್, ಅಲೆಕ್ಸಾಂಡರ್ ಫೆರ್ನಾಂಡಿಸ್, ಪ್ರಿಯಾ ಸಿಕ್ವೇರಾ.
ಉಭಿಂ ಆಸ್ಚಿಂ: ರೀಮಾ ಕ್ವಾಡ್ರಸ್, ವೀಣಾ ಮಿನೇಜಸ್, ಆಂಟನಿ ಮಿನೇಜಸ್, ಮೆಲ್ವಿನ್ ಜೆ. ವಾಸ್, ಲಾರೆನ್ಸ್ ಪಿಂಟೊ, ಸಿರಿಲ್ ಪೆರಿಸ್, ಜೊಮೆಲ್.
ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್
ಕವಿತಾಪಾಠ್ - 5 . ಬಾಂಯ್ ಆಂಡ್ರು ಎಲ್. ಡಿ’ಕುನ್ಹಾ)
ಕವಿತಾಪಾಠ್ - 4 . ಆಜ್ (ವಲ್ಲಿ ಕ್ವಾಡ್ರಸ್)
ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)
ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)
ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)
ಮ್ಹಜ್ಯಾ ದಿವ್ಯಾ ಪಾಟ್ಲೊ ಕಾಳೊಕ್....! [- ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಕವಿತಾ ತೆಂ ಖಂಯ್ಚಾಯ್ ಕಾಳಾಚೆಂ ಜಾಂವ್ ಪೂಣ್ ತೆಂ ಗುಂಡಾಯೆಂತ್ ಅಧ್ಯಯನ್ ಕರುನ್ ತ್ಯಾ ಕವಿತೆಂತ್ಲ್ಯಾ ತೀರ್ಳಾಕ್ ಉಸ್ತುನ್ ಆಪ್ಣಾಯಿತ್ಲ್ಯಾಕ್ ಪೂನ್ ಜೊಡ್ತಾಂ ಹಾಂವ್. ’ಮ್ಹಜೊ ದಿವೊ’ ಕವಿತಾ ಅಧ್ಯಾಯನಾಕ್ ದೆಂವ್ತಾನಾ ಹಾಂವೆ ಪೂನ್ ಜೊಡ್ಚಾ ವಾಟೆರ್ ಸಭಾರ್ ಅಸ್ಪಷ್ಟ್ ಸವಾಲಾಂ ಮ್ಹಾಕಾ ಮ್ಹಜ್ಯಾ ಶೆವೊಟಾಕ್ ಪಾವೊಂಕ್ ಖಾಡುಂ ವಿಣುನ್ ಮ್ಹಾಕಾ ಸ್ವಾಗತ್ ಕರ್ತಾತ್ ತಶೆಂ ಭೊಗ್ಲೆಂ ತರೀ ಮ್ಹಾಕಾ ನಾ ಸಮಾಧಾನ್ ಜಾಂವ್ಕ್ ನಾಂ. ಆತಾಂ ಹೆಂ ಕವಿತಾ ತುಮ್ಚೆ ಮುಖಾರ್ ದವರ್ತಾಂ ಹಾಂವ್.
ಸಂಕ್ಷಿಪ್ತ್ ರಿತಿನ್ ಹ್ಯಾ ಕವಿತೆಚೊ ಸಾರ್ ಹಾಂವೆ ಸಾಂಗ್ಲೊ ತರ್..... ಕವಿತಾ ನಾಯಕ್, ದಿವೊ ಆನಿ ದೇವ್ ಹ್ಯಾ ತೆಗಾಂ ಮಧೆಂ ವಿಣ್ಲ್ಲೆಂ ಹೆಂ ಕವಿತಾ ಕವಿತಾ ನಾಯಕಾಕ್ ಆಪ್ಲೊ ದಿವೊ ಮ್ಹಳ್ಯಾರ್ ಆಪ್ಲೊ ಆತ್ಮೊ ಯಾ ಸ್ವಾಸ್ ಉರಂವ್ಕ್ ಕರ್ಚೆಂ ಸಾಧನ್ ಯಾ ರುದಾನ್. ಕ್ರಮೇಣ್ ವಿನಂತಿ ಆನಿ ಸಲ್ವಣ್. ನಿಮಾಣೆಂ ನಿರಾಸ್ ಆನಿ ಪೊಳ್ಕುರ್ಪಣಾಕ್ ಪಾವೊನ್ ನಿರಾಸ್ವಾದಾಂತ್ ಹೆಂ ಕವಿತಾ ಆಖೇರ್ ಜಾತಾ ತಶೆಂ ದಿಸ್ತಾ. ಆನಿ ದೆವಾಕ್ ಪೂನ್ ಜೊಡ್ಚಾಕ್ ಉಲೊ ದಿತಾ.
ಪುಣ್ ಹಾಂವ್ ಸಾಂಗ್ತಾ ಹೆಂ ಕವಿತಾ ಸಲ್ವಣೆಂತ್ಂಚ್ ಆರಂಭ್ ಜಾವ್ನ್ ಸಲ್ವಣೆಂತ್ ಆಖೇರ್ ಜಾಲಾಂ. ಸಲ್ವಣೆಚಾ ನಿಸಣೆಚೆಂ ’ಮ್ಹಜೊ ದಿವೊ’ ಕವಿತಾ ಕೇವಲ್ ಏಕ್ ಮೆಟ್ ಮಾತ್ರ್. ಏಕ್ ಹಂತ್ ನೈಂ. ಹ್ಯಾ ಸಲ್ವಣೆಚಾ ಮೆಟಾಚಾ ಪಯ್ಲೆಂಚಿ ಆನಿ ಉಪ್ರಾಂತ್ಲಿಂ ಅಸ್ವಷ್ಟ್ ಮೆಟಾಂ ಆತಾಂ ಪಳಂವ್ಯಾಂ. ’ಮ್ಹಜೊ ದಿವೊ ’ ಕವಿತೆಕ್ ಸವಿಸ್ತಾರ್ ರಿತಿರ್ ಆತಾಂ ವ್ಹಾಳಯ್ಲೆಂ ತರ್......
ಪಾಲ್ವಾ ಪೋಂತ್ ಪಿಂದುನ್
ಮ್ಹಜ್ಯಾ ದಿವ್ಯಾಕ್ ವಾತ್ ಕೆಲ್ಯಾ....
ದಿವ್ಯಾ ಧನಿ ತುಂಚ್ ದೆವಾ
ದಿವೊ ಆಸ್ತಾಂ ಜಿವೊ ಹಾಂವ್
ಕವಿತೆಚಾ ಪಯ್ಲ್ಯಾ ಪಂಕ್ತೆರ್ ಪಾಲ್ವಾ ಪೊಂತ್ ಪಿಂದುನ್ ವಾತ್ ಕರುನ್ ದಿವೊ ಜಳಯಿಲ್ಲೊ ಕೋಣ್ ತೆಂ ಉಲ್ಲೇಕ್ ನಾ. ಪುಣ್ ನಿಮಾಣ್ಯಾ ಪಂಗ್ತೆರ್ ತೊ ಹಾಂವ್ ಮ್ಹಣ್ತಾ ಹೆಂ ಕವಿತಾ.
ಹಾಂಗಾಸರ್ "ದಿವೊ ಆಸ್ತಾಂ ಜಿವೊ ಹಾಂವ್" ಮ್ಹಳ್ಯಾರ್ ಏಕ್ ಚಲೊ ಕವಿತಾನಾಯಕ್ ಜಾಲಾ. ಚಲೊ ಜರ್ ಕವಿತಾ ನಾಯಕ್ ಮ್ಹಣ್ ಮಾಂದ್ಲೆಂ ತರ್, ತೊ ಕೊಣಾಚಾ ಪಾಲ್ವಾಚೆಂ ಪೋಂತ್ ಪಿಂದ್ತಾ?
ಹೆಂ ಸವಾಲ್ ಚಡ್ ಗರ್ಜೆಚೆಂ. ಹಾಂಗಾಸರ್ ಕವಿನ್ ಕವಿತಾ ನಾಯಕಿಕ್ ವಿಂಚ್ಲ್ಲೆಂ ತರ್ ತಿಣೆಂ ಜಿವಿತಾ ವಾಟೆರ್, ತಿಚ್ಯಾ ಕಸಲ್ಯಾಯ್ ವಿಚಾರಾಂಕ್ ಜಾಂವ್, ತೆಂ ಆಪ್ಲ್ಯಾ ಪಾಲ್ವಾ ಪೋಂತ್ ತಿಣೆಂ ಪಿಂದ್ಚೆಂ ಸಹಜ್ ತರ್, ಎಕಾ ಚಲ್ಯಾನ್ ಪಾಲ್ವಾ ಪೋಂತ್ ಪಿಂದ್ಚೆಂ ಆನಿ ಆಪ್ಲೊ ದಿವೊ ಝಳಂವ್ಚೆ ಅಸಹಜ್. ಹಾಂಗಾಸರ್ ಹೊ ಕವಿತಾನಾಯಕ್ ಇತ್ಲೊಯ್ ಸಲ್ವಾಲಾ ಕೀ ತೊ ಆಪ್ಲ್ಯಾಚ್ ಪಾಲ್ವಾ ಪೊಂತಾಕ್ ಪಿಂದ್ತಾ.
ಪಾಲ್ವಾಚೊ ಆನಿ ಚಲ್ಯಾಚೊ ಸಂಬಂಧ್ ಆಮಿಂ ಉಗ್ಡಾಸ್ ದವರುಂಕ್ ಜಾಯ್ ಹಾಂಗಾಸರ್. ’ಪಾಲಂವ್’ ಖಂಯ್ಚಾ ರಿತಿಚಾ ಸಂಬಂಧಾನ್ ಅರ್ಥ್ ಕೆಲ್ಯಾರೀಯ್ ತೊ ಸಂಬಂಧ್ ಚಲಿಯೆಕ್ಚ್ ಚಡ್ ಸೊಭ್ತಾ. ತರ್ ಕವಿತಾ ನಾಯಕ್ ಕೊಣಾಚೊ ಪಾಲಂವ್ ಪಿಂದ್ತಾ?
ಮುಖಾರ್ಸುನ್ ವೆಲೆಂ ತರ್....
ಗೊಬ್ರಾಂತ್ಲೊ ಇಂಗ್ಳೊ ಪುಂಕುನ್
ಮ್ಹಜ್ಯಾ ದಿವ್ಯಾಕ್ ದೀಷ್ಟ್ ದಿಲ್ಯಾ
ದೆವಾ ದೆವಾ ತುಂಚ್ ವ್ಹಡ್
ದಿವೊ ಮ್ಹಜೊ ಪೆಟಂವ್ಕ್ ಸೊಡ್
ಪಾಲ್ವಾಚೆಂ ಪೋಂತ್ ಪಿಂದುನ್ ವಾತ್ ಕೆಲ್ಯಾ. ಪೂಣ್ ತಿ ವಾತ್ ಝಳಂವ್ಕ್ ಗೊಬ್ರಾಂತ್ಲೊ ಇಂಗ್ಳೊ ಫುಂಕ್ಲಾ. ಮ್ಹಳ್ಯಾರ್ ಕ್ರಾಂತಿ. ಆನಿ ದೆವಾಲಾಗಿಂ ವಿನಂತಿ. ಹಾಂಗಾಸರ್ ಕ್ರಾಂತಿ ಸಾರ್ಕಿ. ದೆವಾಲಾಗಿಂ ವಿನಂತಿಯ್ ಸಾರ್ಕಿ ಮ್ಹಣೊನ್ ಘೆತ್ಲ್ಯಾರ್ ಪಾಲ್ವಾ ಪೋಂತ್ ಪಿಂದ್ಚೆಂ ಕಿತ್ಲೆಂ ಸಾರ್ಕೆಂ?
ಗೊಬ್ರಾಂತ್ಲೊ ಇಂಗ್ಳೊ ಫುಂಕ್ಲೆಲ್ಯಾಕ್ ವಾತ್ ಕರುಂಕ್ ಪಾಲಂವ್ಚ್ ಕಿತ್ಯಾಕ್? ಜರ್ ತರ್ ಹೊ ಕವಿತಾ ನಾಯಕ್ ಆಪ್ಲೊ ದಿವೊ ಝಳಂವ್ಚಾ ಖಾತಿರ್ ಕೊಣಾಯ್ಚೊ ಪಾಲಂವ್ ಪಿಂದ್ತಾ ತರ್ ಹೆಂ ಶೋಷಣ್ ಜಾಲೆಂ. ಶೋಷಣಾಕ್ ಕ್ರಾಂತಿ ಯಾ ವಿನಂತಿ ಖಂಡಿತ್ ಸಾಂಗಾತ್ ದೀನಾ. ಜರ್ತರ್ ಕವಿತಾ ನಾಯಕ್ ಖಚ್ರ್ಯಾ ಡಬ್ಬ್ಯಾಂತ್ಲೆಂ ಪಾಲ್ವಾಚೆಂ ಪೋಂತ್ ಪಿಂದ್ತಾ ಜಾಲ್ಯಾರ್ ತಾಕಾ ಕ್ರಾಂತಿಚಿ ಯಾ ವಿನಂತಿಚಿ ಗರ್ಜ್ ನಾಂ.
ಹ್ಯಾ ವಾದಾಕ್ ಸ್ಪಷ್ಟ್ ಕರುಂ ತರ್, ತಾಕ್ ದೀವ್ನ್ ತೇಲ್ ಹಾಡ್ನ್ ದಿವ್ಯಾಕ್ ಮ್ಹಜ್ಯಾ ತಾನೆಕ್ ದಿಲಾಂ ದಿವ್ಯಾ ಉಜ್ವಾಡಾನ್ ಇಲ್ಲೆಂ ಜೊಡ್ಲ್ಲೆಂ ದಿವೊ ಜಳಂವ್ಕ್ ಆಡ್ವಾಕ್ ಗೆಲಾಂ ಹಾಂಗಾಸರ್ ತಾಕ್ ದೀವ್ನ್ ತೇಲ್ ಮ್ಹಳ್ಯಾರ್, ತಾನೆಕ್ ಕರ್ಗವ್ನ್ ತೇಲ್ ಹಾಡುನ್ ದಿವೊ ಜಳಯ್ಲಾ ಮ್ಹಳ್ಯಾರ್ ’ಸಂಘರ್ಷ್’. ಹ್ಯಾ ಸಂಘರ್ಷಾಂತ್ ಇಲ್ಲೆಂ ಜೊಡ್ಲ್ಲೆಂ ದಿವೊ ಜಳಂವ್ಕ್ ಆಡ್ವಾಕ್ ಗೆಲಾಂ ಮ್ಹಳ್ಯಾರ್ ವಿಪರೀತ್ ಸಂಘರ್ಷ್. ಆನಿ ತಿಚ್ಚ್ ದೆವಾಲಾಗಿಂ ವಿನಂತಿ.
ದಿವೊ ಜಳಂವ್ಕ್ ವಿಕ್ಲ್ಲೆಂ ತಾಕ್ ಆನಿ ಆಡ್ವಾಕ್ ಗೆಲ್ಲಿ ಜೋಡ್...! ಹೆಂ ತಾಕ್ ಆನಿ ಜೋಡ್ ಕಸಲಿ? ತಾಕ್ ದೀವ್ನ್ ಜೊಡ್ಚೆಂ ಬಹುಶ: ಕವಿತಾ ನಾಯಕಾಕ್ ಅಸಾಧ್ಯ್. ಜರ್ ತರ್ ಹಾಂಗಾಸರ್ ಆಮಿಂ ಖರ್ಯಾ ತಾಕಾಕ್ ಪಾವ್ಲ್ಯಾರ್, ಇತ್ಲೆಂ ಬರ್ಪೂರ್ ತಾಕ್ ಆಸ್ತಾನಾ ದಿವ್ಯಾಕ್ ಲೊಣಿ ಜಳವ್ಯೆತ್. ತೆದ್ನಾಂ ತಿ ಕ್ರಾಂತಿ ಯಾ ವಿನತಿ ಯಾ ಆಡವ್ ಖಂಡಿತ್ ನಾಂ.
ಆತಾಂ ಪಾಲ್ವಾ ಪೋಂತ್ ಪಿಂದುನ್ ತಾಕ್ ದೀವ್ನ್ ಜೊಡ್ಚಿ ಜೋಡ್ ಪಳಯ್ಲ್ಯಾರ್ ಕವಿತಾ ನಾಯಕಾಚೆರ್ ಖಂಡಿತ್ ದುಬಾವ್ ಮಾರ್ತಾ. ಹೊ ಕವಿತಾ ನಾಯಕ್ ಪರ್ದ್ಯಾ ಪಾಟ್ಲೊ ಯಾ ಪಾಟ್ಲೆಂ ಕವಿತಾ ನಾಯಕಿ ಪುಣಿಂ ನಹಿಂ? ಜರ್ ತರ್ ಹೆಂ ಕವಿತಾ ನಾಯಕಿ ತರ್ ಹೆಂ ಕವಿನ್ ಲಿಪಯ್ಲಾಂ ಕಿತ್ಯಾಕ್? ಹಾಕಾ ಆನಿಕೀ ಸ್ಪಷ್ಟ್ ಕರುಂ ತರ್ ದಿವೊ ಪೆಟಯ್ಲ್ಯಾ ಉಪ್ರಾಂತ್ ಜೋಡ್ ಆಯ್ಲ್ಯಾ. ಹೆಂ ಖರೆಂ ತರ್ ದಿವೊ ಪೆಟಂವ್ಚಾ ಪಯ್ಲೆಂ ದಿವೊ ಕಸೊ ಜಳ್ತಾಲೊ ಮ್ಹಳ್ಳೆಂ ವರವ್ನ್ ಪಳಂವ್ಕ್ ಜಾಯ್. ಹೆಂ ಹ್ಯಾ ಕವಿತೆಚೆಂ ಅಸ್ವಷ್ಟ್ ಮೇಟ್...!
ದಿವ್ಯಾಕ್ ಮ್ಹಜ್ಯಾ ಜಬ್ಬೊರ್ ಆಶಾ ಝಗ್ಡೊನ್ ತರೀ ಜಿಯೆಂವ್ಕ್ ವಾರ್ಯಾಚೊ ವ್ಹಾಳೊ ದಿವ್ಯಾ ಕುಶಿನ್ ದಿವ್ಯಾಕ್ ಮ್ಹಜ್ಯಾ ಸದಾಂ ಭಿಯೆಂವ್ಕ್ ಆತಾಂ ಪಾಲ್ವಾಚೆಂ ಪೋಂತ್ ಪಿಂದ್ಲ್ಲೆಂ ದಿವ್ಯಾನ್ ನಹಿಂ ತರ್ ದಿವ್ಯಾಕ್ ಆತಾಂ ಜಿಯೆಂವ್ಚಿ ಆಶಾ ಉದೆಲ್ಯಾ. ವಾರ್ಯಾಚೊ ವ್ಹಾಳೊ ಪರ್ತ್ಯಾಕ್ ಕ್ರಾಂತಿಕ್ಚ್ ಉಲೊ ದಿತಾ. ದಿವ್ಯಾಚಾ ಆಶೆಕ್ ಕವಿತಾ ನಾಯಕಾಚಿ ಕ್ರಾಂತಿ ಆನಿ ವಿನತಿ. ಹೆಂ ನಿಜಾಯ್ಕ್ಯ್ ವಾಸ್ತಾವಾಕ್ ಲಾಗು ಜಾತಾ.
ಜಿಯೆ ಮ್ಹಣೊನ್ ದಿವೊ ದಿಲೊಯ್
ದಿವೊ ಪಳೆ ಜಳ್ತಾ ಕಸೊ
ಉಜ್ವಾಡ್ ತರೀ ಮೆಳಾತ್ ಕಿತ್ಲೊ
ದಿವೊ ಮ್ಹಜೊ ಜಳ್ಳ್ಯಾರ್ ಅಸೊ
ಹಾಂಗಾಸ್ರ್ ಕವಿತಾ ನಾಯಕಾಚಿ ಕ್ರಾಂತಿ ನಾಂ. ತೊ ಥಕ್ಲಾ. ನಿರಾಸ್ ಜಾಲಾ. ಸಲ್ವೊನ್ ರಾವ್ಲಾ. ಆನಿ ದಿವೊ ದಿಲ್ಲ್ಯಾಚೆರ್ ಶಿಣ್ತಾ ವಿನತಿ ಕರುನ್.
"ದಿವ್ಯಾಕ್ ಧನಿ ತುಂಚ್ ದೆವಾ
ದಿವೊ ಆಸ್ತಾಂ ಜಿವೊ ಹಾಂವ್
ದಿವ್ಯಾ ವರ್ವಿಂಚ್ ತುಜಿ ಸೆವಾ
ತುಜಿಚ್ ಖುಶಿಂ ಜಾಂವ್"
ಕ್ರಾಂತಿ ಆಪ್ಣಾಯಿಲ್ಲೊ ಕವಿತಾ ನಾಯಕ್ ಆಪ್ಲ್ಯಾ ಸಲ್ವಣೆಕ್ ಮಾಂದುನ್ ಘೆವ್ನ್, ದೆವಾಚಾ ಸಕ್ತೆಚೆರ್ ಸಂಪೂರ್ಣ್ ಆಪ್ಲ್ಯಾ ದಿವ್ಯಾಕ್ ಸಮರ್ಪುನ್ ರಾವ್ಲಾ. ದೆವಾ ದೆವಾ ಪೂನ್ ಜೊಡ್ ದಿವೊ ಮ್ಹಜೊ ಪುಂಕುನ್ ಸೊಡ್ ಸಂಪೂರ್ಣ್ ಸಲ್ವಣಿ, ಹತಾಶ್ಪಣ್, ಜಿವಿತಾಚೆರ್ ತಾತ್ಸಾರ್, ಕ್ರಾಂತಿ ನಾಂ. ದಿವ್ಯಾಕ್ ವಾತ್ ಕೆಲ್ಯಾ. ಪುಣ್ ಫುಂಕುಂಕ್ ಆತಾಂ ದೇವ್ ಜಾಯ್. ಆಪ್ಣಾ ವರ್ವಿಂ ದಿವೊ ಪಾಲ್ವೊಂಕ್ ಜಾಯ್ನಾಂ ಮ್ಹಳ್ಯಾರ್ ಹೊ ದಿವೊ ಖಂಡಿತ್ ಹ್ಯಾ ಕವಿತಾ ನಾಯಕಾನ್ ರಚ್ಲ್ಲೊ ನಹಿಂ. ದಿವೊ ಕವಿತಾ ನಾಯಕಾನ್ ರಚುಂಕ್ ನಾಂ ತರ್ ಹ್ಯಾ ದಿವ್ಯಾಕ್ ವಾತ್ ಕರುಂಕ್ ಪಾಲ್ವಾ ಪೋಂತ್ ಪಿಂದ್ಚಿ ಗರ್ಜ್ ನಾಂ. ಪಾಲ್ವಾ ಪೋಂತ್ ಪಿಂದ್ಚಿ ಗರ್ಜ್ ಪಡ್ತಾ ತರ್ ಕವಿತಾ ನಾಯಕಿಕ್ ಮಾತ್ರ್. ಕಾರಾಣ್ ದಿವೊ ಕಶೆಂ ತರೀ ತಿಣೆಂ ಜಳಂವ್ಕ್ಚ್ ಪಡ್ತಾ.
ಪಾಲ್ವಾ ಪೋಂತ್ ಪಿಂದುನ್, ಮಧ್ಯಾನ್ ರಾತಿಂ ದಿವೊ ಜಳವ್ನ್, ತಾಕಾ ದೀವ್ನ್ ಜೋಡ್ ಹಾಡುನ್ ತಿಣೆಂ ದಿವೊ ಝಳಂವ್ಚಿ ವಾಟ್ ಆಪ್ಣಾಯ್ಲ್ಯಾ ತರ್ ಹೆಂ ಹ್ಯಾ ಕವಿತೆಕ್ ಚಡ್ ಲಾಗ್ಶಿಲ್ಯಾನ್ ಸಂಭಂದ್ ರಚ್ತಾ. ಹ್ಯಾ ಸಂಬಂಧಾಂತ್ ತಿ ಕ್ರಾಂತಿ ಆನಿ ಚಲಿಯೆಚ್ಯಾ ಜಲ್ಮಾಗುಣಾಚಿ ವಿನತಿ ಕವಿನ್ ಉಲ್ಲೇಖ್ ಕೆಲ್ಲಿ ರೀತ್ ಸಾರ್ಕಿ ವೆತಾ. ಹ್ಯಾ ವಿಚಾರಾಂಕ್ ಆನಿಕೀ ಸ್ವಷ್ಟ್ ಕರ್ಚೆಂ ತರ್, ಕವಿತಾ ಆರಂಭ್ ಜಾಲ್ಲಿ ರೀತ್ ಆಮಿಂ ಪಳೆಂವ್ ತರ್, ಪಾಲ್ವಾ ಪೋಂತ್ ಪಿಂದುನ್ ಗೊಬ್ರಾಂತ್ಲೊ ಇಂಗ್ಳೊ ಪುಂಕ್ಚೆಂ ಮ್ಹಳ್ಯಾರ್ ಆಪ್ಲ್ಯಾ ಸಲ್ವಣೆಂತ್ ಯಾ ನಿರಾಶೆಂತ್ ಜಿವಿತ್ ಸಾರುಂಕ್ ಆಪ್ಲೆಂ ನಿಮಾಣೆಂ ಮೇಟ್ ಕಾಡ್ಚಿ ಕ್ರಾಂತಿ ಕೇವಲ್ ಚಲಿಯೆಕ್ ಮಾತ್ರ್ ಲಾಗು ಜಾತಾ. ದಿವ್ಯಾ ಉಜ್ವಾಡಾಚಿ ಜೋಡ್ ದಿವ್ಯಾ ಜಳವ್ಣೆಕ್ ಆಡ್ವಾಕ್ ವೆಚೆಂಯ್ ಚಲಿಯೆಕ್ ಲಾಗು ಜಾತಾ. ಪಾಲ್ವಾ ಪೋಂತ್ ಪಿಂದುನ್, ತಾಕಾ ವಿಕುನ್ ತೇಲ್ ಹಾಡ್ಚೆಂ ಹೆಂ ನಿಮಾಣೆಂ ಜಿವಿತಾಚಾ ಸಂಘರ್ಷಾಚೆಂ ಮೇಟ್ಯ್ ಚಲಿಯೆಕ್ ಲಾಗು ಜಾತಾ. ತರ್ ಕವಿನ್ ಹಾಂಗಾ ಕವಿತಾ ನಾಯಕಾಕ್ ಕಿತ್ಯಾಕ್ ಮುಖಾರ್ ಹಾಡ್ಲಾಂ?
ಕವಿತಾ ನಾಯಕಾನ್ ಪಾಲ್ವಾಚೆಂ ಪೋಂತ್ ಪಿಂದ್ಲೆಂಚ್ ತರ್ ತಾಚ್ಯಾ ಸಲ್ವಣೆ ಉಪ್ರಾಂತ್ ದುಸ್ರೆಂ ಮೇಟ್ಯ್ ತಾಚ್ಯಾ ಮುಖಾರ್ ಖಂಡಿತ್ ಆಸಾ. ದಿವೊ ಪಾಲ್ವೊಂಕ್ ದೆವಾಚಾ ಪಾಂಯಾಂ ಪಡ್ಚಿ ತಾಕಾ ಗರ್ಜ್ ನಾಂ. ಏಕ್ ಪಾಲಂವ್ ನಾಂ ತರ್ ದುಸ್ರೊ ಪಾಲಂವ್ ಆಸಾ. ಹಾಂಗಾಸರ್ ಹಾಂವ್ ಕವಿಚಾ ಉತ್ರಾಂನಿಂಚ್ ಉಲಯ್ತಾಂ ಪಾಲಂವ್ ಮ್ಹಳ್ಳ್ಯಾ ಎಕಾ ಸಬ್ದಾಂತ್ ಯಾ ಹ್ಯಾ ಎಕಾ ಇಮಾಜೆಂತ್ ಸಭಾರ್ ಅರ್ಥ್ ಆಸಾತ್. ಪೂಣ್ ಸಗ್ಳೆ ಅರ್ಥ್ ಚಲಿಯೆಕ್ ಮಾತ್ರ್ ಲಾಗ್ಶಿಲ್ಯಾನ್ ಸಂಭಂದ್ ರಚ್ತಾತ್. ಚಲ್ಯಾ ಸಂಗಿಂ ಸಂಭಂದ್ ರಚ್ಲ್ಯಾರ್ ತೆಂ ಶೋಷಣ್ ಜಾತಾ. ಶೋಷಣ್ ಆನಿ ಕ್ರಾಂತಿ ಎಕಾಮೆಕಾ ತದ್ವಿರುದ್ಧ್ ಜಾವ್ನಾಸಾತ್. ತಿಂ ಸಾಂಗಾತ್ ದೀನಾಂತ್. ಕ್ರಾಂತಿ ಆನಿ ಸಲ್ವಣ್ ಎಕಾಮೆಕಾ ಸಾಂಗಾತ್ ದಿತಾತ್. ಶೋಷಣ್ ಕ್ರಾಂತಿಕ್ ಜಲ್ಮ್ ದಿತಾ ತರ್ ಕ್ರಾಂತಿ ಜಯ್ತಾಕ್ ಯಾ ಸಲ್ವಣೆಕ್ ವಾಟ್ ದಾಖಯ್ತಾ....!
ಬಹುಶ: ಮ್ಹಜೆಂ ಸವಾಲ್ ಹಾಂಗಾಸರ್ ಚಡ್ ಗರ್ಜೆಚೆಂ ನಹಿಂ. ಪೂಣ್ ಹಾಚ್ಯಾಕ್ಯ್ ಚಡ್ ಗರ್ಜೆಚೆಂ ಕಿತೆಂ ಮ್ಹಳ್ಯಾರ್ ದಿವೊ ಫುಂಕ್ತಾ ಮ್ಹಣಾಸರ್ ಸಲ್ವಣಿ ಕಿತ್ಯಾಕ್? ಜಾಂವ್ ತೊ ಕವಿತಾ ನಾಯಕ್ ಯಾ ತೆಂ ಕವಿತಾ ನಾಯಕಿ, ಸಲ್ವಣಿ ಯಾ ಮರ್ಣಾಕ್ ಆಪವ್ಣೆಂ ಹ್ಯಾ ಕವಿತಾ ಅಧ್ಯಾಯನಾಂತ್ ಕಿತೆಂ ಲಿಸಾಂವ್ ದಾಖವ್ನ್ ದಿತಾ?
ಜರ್ತರ್ ಹೆಂ ಕವಿತಾ ಎಕಾ ಕವಿತಾ ನಾಯಕಾಕ್ ಲಾಗು ಜಾತಾ ತರ್ ಹ್ಯಾ ಮರ್ಣಾಕ್ ಆಪವ್ಣ್ಯಾಂತ್ ತಾಣೆಂ ಖಂಡಿತ್ ಲಜೆಕ್ ಪಾಲಂವ್ ಕರುನ್ ಆಪ್ಲ್ಯಾ ಭಂವ್ತಿಂ ರೆವ್ಡಾಯ್ಲಾ ಆನಿ ತಾಂತು ತೊ ಖೈದಿ ಜಾವ್ನ್ ಅಸ್ಪಷ್ಟ್ ರುಪಾನ್ ಚಲಿ ಜಾಲಾ. ಜರ್ ತರ್ ಹೆಂ ಕವಿತಾ ಎಕಾ ಕವಿತಾ ನಾಯಕಿಕ್ ಲಾಗು ಜಾತಾ ತರ್ ಹ್ಯಾ ಮರ್ಣಾಕ್ ಆಪವ್ಣ್ಯಾಂತ್ ತಾಣೆ ಖಂಡಿತ್ ಆಪ್ಲ್ಯಾ ಸಂತತಿಚಿ ಸಲ್ವಣಿ ಮಾಂದುನ್ ಘೆತ್ಲ್ಯಾ ಆನಿ ಸಬಾರ್ ಚಲಿಯಾಂಕ್ ಏಕ್ ಲಿಸಾಂವ್ ಯಾ ಮಿಸಾಂವ್ ಜಾಂವ್ಚಾ ಬದ್ಲಾಕ್ ತೆಂ ಏಕ್ ತೆಸಾಂವ್ ಜಾವ್ನ್ ಉರ್ಲಾಂ.
ಅಶೆಂ ಕಿತ್ಯಾಕ್?
ಕಾರಾಣ್ ಸಂಪೆಂ. ಕವಿತೆನ್ ಹಾಂಗಾಸರ್ ಸಲ್ವಣೆಂತ್ಚ್ ಜಲ್ಮ್ ಘೆತ್ಲಾ.....! ಸಲ್ವಣೆಚಾ ಜಿವಿತಾಂತ್ ನಿಮಾಣ್ಯಾ ಕ್ರಾಂತಿಕ್ ಆಪ್ಣಾಯಿಲ್ಲೆಂ ಜಿವಿತ್ ಪಯ್ಲೆಂಚ್ ಸಲ್ವಾಲಾಂ...! ಪಾಲ್ವಾ ಪೋಂತ್ ಪಿಂದ್ತಾನಾ ತೆಂ ಸಂಪೂರ್ಣ್ ಸಲ್ವಾಲೆಂ...!!!! ಪಾಲ್ವಾ ಪೋಂತ್ ಪಿಂದ್ತಾನಾ ತೆಂ ಸಲ್ವೊನ್ ಗೆಲ್ಲೆಂ ತರೀ ಕ್ರಾಂತಿಕ್ ದೆಂವ್ಲ್ಲೆಂ. ಹಿ ಕ್ರಾಂತಿ ದಿವ್ಯಾಚಿ ನ್ಹಯ್. ದಿವ್ಯಾಚೊ ಧನಿ ದೇವ್. ಮ್ಹಳ್ಯಾರ್ ದಿವೊ ಆನಿ ದೇವ್, ಚಾಕೊರ್ ಆನಿ ಧನಿ. ದಿವ್ಯಾಚೊ ಧನಿ ದೇವ್ ತರ್ ಏಕ್ ಚಾಕೊರ್ ದೊಗಾಂಚೊ ಗುಲಾಮ್ ನಹಿಂ. ತರ್ ಹೊ ತಿಸ್ರೊ ಖಂಡಿತ್ ಹ್ಯಾ ದಿವ್ಯಾಕ್ ಸಾಂಬಾಳ್ತಾಲೊ ಜಾವ್ನಾಸಾ.
ಆತಾಂ ಹ್ಯಾ ದಿವ್ಯಾಕ್ ಸಾಂಬಾಳ್ತೆಲ್ಯಾನ್ ಆಪ್ಲೆಂ ಸಾಂಬಾಳ್ಲ್ಲಿ ರೀತ್ ಸಾರ್ಕಿ? ಅಸ್ಪಷ್ಟ್ ಸವಾಲಾಂ, ಸಭಾರ್ ಗೊಂದೊಳಾಂತ್ ಖಾಡುಂ ಮಾರ್ತಾತ್. ಹ್ಯಾಚ್ ಕಾರಾಣ್ ಖಾತಿರ್ ಹಾಂವ್ ಹ್ಯಾ ಕವಿತೆಂತ್ ಎಕಾ ಕವಿತಾ ನಾಯಕಿಕ್ ಉಭೆಂ ಕರ್ತಾ...! ಹೆಂ ಕಿತ್ಲೆಂ ಸಾರ್ಕೆಂ ತೆಂ ಮಾಂಧುನ್ ಘೆಂವ್ಚೊ ತಾಂತಾಂಚೊ ವೈಯುಕ್ತಿಕ್ ವಿಚಾರ್. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಕವಿತೆಕ್ ಹಾಂವೆ ಮ್ಹಜ್ಯಾ ಚಿಂತ್ಪಾನ್ ಮ್ಹಜ್ಯಾ ವಿಚಾರಾಂನಿ, ಮ್ಹಜ್ಯಾ ಜಾಣ್ವಾಯೆಂತ್ ಆನಿ ಕವಿನ್ ಕವಿತೆಂತ್ ಉಭ್ಯೊ ಕೆಲ್ಲ್ಯಾ ಇಮಾಜೆಂಚಾ ಪಾಟ್ಲ್ಯಾ ಅಸ್ಪಶ್ಟ್ ರುಪಾಂಕ್ ಸಂಬಂಧ್ ರಚುನ್ ಹೊ ಮ್ಹಜೊ ವಾದ್ ಮಾಂಡ್ಲಾ.
ಹೆಂ ಕವಿತಾ ನಿರಾಶೆಂತ್ ಆರಂಭ್ ಜಾಲ್ಲೆಂ ತೆಂ ಮಹತ್ವಾಚೊ ವಿಶಯ್ ನಹಿಂ. ಆಪ್ಣಾಯಿಲ್ಲ್ಯಾ ಸಲ್ವಣೆಂತ್ (ತೆಂ ಕಸಲ್ಯಾಯ್ ಕಾರಾಣಾಕ್ ಲಾಗೊನ್ ಜಾಂವ್ಕ್ ಪುರೊ ಹೆಂ ಕಾರಾಣ್ ಮಹತ್ವಾಚೆಂ ನಹಿಂ) ತೆಂಯ್ ಜಿವಿತಾಚಾ ನಿಮಾಣ್ಯಾ ಕ್ರಾಂತಿಕಾರಿ ಮೆಟಾಕ್ ಕವಿತಾ ನಾಯಕಿ ವೆಂಗ್ಲಿ ತರ್ ಹಾಂತು ಕಾಂಯ್ ವಾಯ್ಟ್ ನಾಂ. ಹಾಕಾ ಕಾರಾಣ್ ಹಾಂವ್ ತುಂ ಆನಿ ಆಮ್ಚಿ ಸಮಾಜ್ ಯಾ ಹೊ ಬಂಡಾವಾಳ್ಶಾಹಿ ವಾದ್.
ಪೂಣ್ ಕವಿತೆಂತ್ ಆರಂಭಿಕ್ ಹಂತಾರ್ ದಿಸೊನ್ ಆಯಿಲ್ಲಿ ಕ್ರಾಂತಿ ಸವ್ಕಾಸ್ ನಿಂವೊನ್ ಯೆಂವ್ಚಿ ಮಾತ್ರ್ ಆಮ್ಚಾ ಸಮಾಜೆಕ್ ತೆಂಯ್ ಚಲಿಯೆ ಸಮಾಜೆಕ್ ಶೆಳೆಂ ಉದಾಕ್ ವೊತ್ಲ್ಲ್ಯಾಪರಿಂ. ಚಲ್ಯಾಚಾ ಸಮಾಜೆಕ್ ತರೀಯ್ ಹೆಂ ಪಾಲಂವಾಕ್ ವೆಂಗ್ಲ್ಲ್ಯಾ ಪರಿಂ. ಅಶೆಂ ಕಿತ್ಯಾಕ್? ಆಪ್ಲ್ಯಾಪಣಾಂತ್ ದಿವ್ಯಾಕ್ ಜಳವ್ನ್ ಸಲ್ವಾತಾನಾ ತಿ ಸಲ್ವಣಿ ಸಗ್ಳಿ ದಿವ್ಯಾಚಾ ಮಾತ್ಯಾರ್ ಥಾಪುನ್ ದಿವೊ ಪಾಲ್ವಂವ್ಕ್ ದೆವಾಕ್ ಕರ್ಚಿ ವಿನತಿ ಸಾರ್ಕಿ...? ದಿವೊ ಪಾಲ್ವೊನ್ ದೆವಾನ್ ಪೂನ್ ಜೊಡ್ಯೆತ್?
ಹಾಂವ್ ತರೀ ಹ್ಯಾ ಕವಿತೆಕ್ ವಿನತಿ, ಮಾಗ್ಣೆಂ, ಪಿಂರ್ಗೊಣಿ, ಸಲ್ವಣಿ ಮ್ಹಣೊಂಕ್ ಸಕ್ತಾಂ. ಪುಣ್ ಅಶೆಂ ಕಿತ್ಯಾಕ್? ಕವಿತಾ ನಾಯಕಿನ್ ಜಿವಿತಾಚಾ ಸಂಘರ್ಷಾಂತ್ ವಿಂಚುನ್ ಕಾಡ್ಲ್ಲಿ ವಾಟ್ ಹಾಕಾ ಕಾರಾಣ್? ಯಾ ಹಿಚ್ಚ್ ಏಕ್ ನಿಮಾಣಿ ವಾಟ್ ಹ್ಯಾ ಕವಿತಾ ನಾಯಕಿಕ್?
ಹ್ಯಾಚ್ ಖಾತಿರ್ ಆನಿ ಅಸಲ್ಯಾ ಚಿಂತ್ಪಾ ಖಾತಿರ್ ಆಜ್ ತ್ಯಾ ಕಾಂಕ್ಣಾಚಾ ಗಲ್ಲೆಂತ್ ಪಿರಾಯೆಚಾ ಬಾಯ್ಲಾಂನಿ ನೆಸಂವ್ಚಾ ಬಣಾ ಬಣಾಚಾ ಕಾಂಕ್ಣಾ ಮಧೆಂ ಯಾ ತ್ಯಾ ನಾಚ್ಚಾ ಸಾಲಾಂತ್ ಪಾಯ್ಜಾಣಾಂ ಬಾಂದ್ಚಾ ತ್ಯಾ ತಾಕ್ ಪಿಯೆಲ್ಲ್ಯಾ ಜಬ್ಬೋರ್ ದಾಗ್ಯಾಂ ಮಧೆಂ ಹ್ಯಾ ಸಮಾಜೆಂತ್ಲ್ಯಾ ನೆಣ್ತ್ಯಾ ಚಲಿಯಾಂಚೆಂ ಜೀವನ್ ಆಡ್ಚಾಲಾಂ. ದಿವೊ ಪುಂಕ್ಚೆಂ ದೆವಾಕ್ಯ್ ಸಲೀಸ್ ನಹಿಂ. ಅಶೆಂ ಆಸ್ತಾಂ ತ್ಯಾ ಪಿರಾಯೆಚ್ಯಾ ಬಾಯ್ಲಾಂನಿ ನ್ಹೆಸಂವ್ಚಾ ಬಣಾ ಬಣಾಚಾ ಕಾಂಕ್ಣಾಂಕ್ ಥುಕೊನ್ ತ್ಯಾ ನಾಚ್ಚ್ಯಾ ಸಾಲಾಂತ್ ಪಾಯ್ಜಾಣಾಂಕ್ ಖೊಟಾವ್ನ್ ನವಿ ಕ್ರಾಂತಿ ಉಟಂವ್ಚಿ ಚಡ್ ಗರ್ಜೆಚಿ. ಸಲ್ವಣೆಕ್ ವೆಂಗ್ಚಿ ನಹಿಂ.
ಆತಾಂ ಆಮಿ ಬಾಬ್ ಮೆಲ್ವಿನ್ ರೊಡ್ರಿಗಸಾಚಿ ’ಮರ್ಣಾಕ್ ಯೆವ್ಕಾರ್’ ಕವಿತಾ ದಾಖ್ಲ್ಯಾಕ್ ಘೆತ್ಲಿ ತರ್..... ಹ್ಯಾ ಕವಿತೆಂತ್ಲೊ ಕವಿತಾ ನಾಯಕ್ಯ್ ಮರ್ಣಾಕ್ ವಿನತಿ ಕರ್ತಾ.
"ಲಜೆನಾಕಾ ಯೆ ಮರ್ಣಾ
ಆಪವ್ನ್ ಮಾಕಾ ವ್ಹರ್ ಪ್ರತಿಭೆಚಿಂ ಮ್ಹಜಿಂ ಕಿರ್ಣಾಂ
ತರ್ನ್ಯಾರ್ ಫಂಡಾಂತ್ ಭರ್...
ನಾಕಾ ಆನಿ ಘಳಾಯ್ ಕರುಂಕ್
ಭಿತರ್ ಸರ್ ಮರ್ಣಾ
ತುಂಯ್ ತಾಂಚೆ ಮೆಳಿಂತ್ ಘುಸ್ಲಾಂಯ್
ಆತಾಂ ಮರ್ಚೆಂ ಕಶೆಂ ಕಳ್ನಾ"
ಇತ್ಲಿ ನಿರಾಶಾ ಆನಿ ಇತ್ಲಿ ಸಲ್ವಣಿ ಜಿವಿತಾಂತ್? ದೊನ್ಯ್ ಕವಿತೆಂನಿ ಮರ್ಣಾಕ್ಚ್ ಯೆವ್ಕಾರ್. ಹ್ಯಾ ಯೆವ್ಕಾರಾಂತ್ ಬಲಿ ಜಾತಾ ನಿರಾಪ್ರಾಧಿ ದಿವೊ. ದೊನೀ ವಾಟೆನಿಂ ತೊ ಚಾಕೊರ್ ಜಾವ್ನಾಸಾ. ಎಕಾ ವಾಟೆನ್ ತಾಚ್ಯಾ ಧನಿಯಾಚೊ ಎಕಾ ವಾಟೆನ್ ತಾಕಾ ಝಳಂವ್ಚಾಚೊ. ಹಾಂಗಾಸ್ರ್ ದೊನ್ಯ್ ದಿವೆ ತರ್ನ್ಯಾಪಣಾರ್ಚ್ ದೆವಾಕ್ ಪೂನ್ ಜೊಡುಂಕ್ ಆಪವ್ಣೆಂ ದಿತಾತ್.
ಆತಾಂ ಚಾ.ಪ್ರಾ. ದೆಕೊಸ್ತಾಚೆಂ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತಾ ದಾಖ್ಲ್ಯಾಕ್ ಘೆತ್ಲೆಂ ತರ್,
"ದೆಕುನ್ ಮೊಣ್ಕೊ ಘೊಟ್ಲಾ
ರಾಜಾಂವ್ ಪೆಲ್ಯಾನ್ ಲೊಟ್ಲಾ
ಆತ್ಮೊ ಪಿಂರ್ಗತ್ ಸುಟ್ಲಾ
ದರ್ಯಾಕ್ ಉಜೊ ಪೆಟ್ಲಾ
ಸೊಸ್ಚೆಂ ಪುರ್ಯಾನ್ ಪುರೊ ಸೊಸ್ಲಾಂ
ಆತಾಂ ದರ್ಯಾ ವೆಳೆರ್ ಬೊಸ್ಲಾಂ
ಶಿಂತಿದ್ ತಾಸ್ಲಾಂ ಸಯ್ರಾಣ್ ಲಾಸ್ಲಾಂ
ಮನಾಂತ್ ಮೆಕ್ಳೆಂ ಚಿಂತಪ್ ಪೊಸ್ಲಾಂ
ಒಕ್ತಾ ಉಂಡೊ ವಾಟ್ಲಾ"
ಅಸ್ವಷ್ಟ್ ರಿತಿನ್ ಮರ್ಣಾಕ್ ಯೆವ್ಕಾರ್. ನಿರಾಶೆಂತ್ ಮೊಣ್ಕೊಚ್ ಆಧಾರ್. ಅಶೆಂ ಕಿತ್ಯಾಕ್? ಹಾಂಗಾಸ್ರ್ ತ್ಯಾ ನಿರಪ್ರಾಧಿ ದಿವ್ಯಾಚಿ ಬಲಿ ಭೆಟಂವ್ಕ್? ದಿವ್ಯಾಚಿ ಅಶಿ ಬಲಿ ಭೆಟಯಿಲ್ಲ್ಯಾಂತ್ ಸಲ್ವಣೆಂತ್ ವ್ಹಡ್ಲಿ ಸಲ್ವಣ್ ಆಪ್ಣಾಂವ್ಕ್ ಸಕ್ಯೆತ್ ನ್ಹಯ್ ಆಸ್ತಾಂ ಜೀಕ್ ಖಂಡಿತ್ ನಾಂ. ಜಯ್ತಾಚಿ ವಾಟ್ ಆಮ್ಕಾಂ ಪಯ್ಸ್ ಜಾಲ್ಯಾ.....?
’ಮ್ಹಜೊ ದಿವೊ’ ಕವಿತಾಂತ್ಲ್ಯಾ ಕವಿತಾ ನಾಯಕಿಚೆಂ ಹೆಂ ಜಿವಿತಾ ಸಂಘರ್ಷ್ ತಿಣೆಂ ತೆಂ ಸಂಘರ್ಷ್ ಚಲಯಿಲ್ಲಿ ರೀತ್ ಕಿತ್ಲಿ ಸಾರ್ಕಿ? ತಿಣೆಂ ಆಪ್ಣಾಯಿಲ್ಲ್ಯಾ ರಿತಿಂತ್ ತಿಕಾ ಸಲ್ವಣಿ ನ್ಹಯ್ ಆಸ್ತಾಂ ಜೀಕ್ ಮೆಳೊಂಕ್ ಸಾಧ್ಯ್ಚ್ ನಾಂ. ಸಲ್ವಾಲ್ಯಾ ಜಿವಿತಾಂತ್ ಆರಂಭ್ ಜಾಲ್ಲೆಂ ಕವಿತಾ ನಿಮಾಣ್ಯಾ ಹಂತಾರ್ಯ್ ಸಲ್ವಣೆಕ್ ವೆಂಗ್ಚೆಂ ಚಡ್ ನಿರಾಶಾದಾಯಕ್.
ಕ್ರಾಂತೆಂತ್ ನಿರಾಸ್ವಾದ್ ಆಸ್ಲ್ಲ್ಯಾ ಸಭಾರ್ ಕ್ರಾಂತಿಕಾರಿ ಚಲಿಯಾಂಚೆ ಮನ್ ಕದ್ವಾಳಾಯ್ತಾ. ಚಲಿಯಾಂಚಾ ಜಿವಿತಾಂತ್ ಕ್ರಾಂತಿ ಕಿತ್ಲಿ ಚಡ್ ಗರ್ಜೆಚಿ ತಿತ್ಲಿಚ್ ಕವಿತೆಂತ್ಲ್ಯಾ ನಾಯಕಿಚಿ. ಬಹುಶ್: ಫುಡಾರಾಕ್ ಹೆಂ ಚಿಂತಾಪ್ ಖಂಡಿತ್ ಗರ್ಜ್ ಪಡ್ತೆಲೆಂ ಮ್ಹಳ್ಳೊ ಮ್ಹಜೊ ಆಶಾವಾದಾಚೊ ಸಂಘರ್ಷ್.
ದಿವೊ ಜರ್ ಎಕಾ ಕುಟ್ಮಾಚೆರ್ ಪಡ್ತಾನಾ [- ಸಿರಿಲ್ ಪೆರಿಸ್, ಬೆಂದುರ್]
ಮ್ಹಜೊ ದಿವೊ ಕವಿತೆಂತ್ ಮ್ಹಾಕಾ ದಿಸ್ಲ್ಲೆಂ ಪಿಂತುರ್ ಜಾವ್ನಾಸಾ - ಹೊ ದಿವೊ ಎಕಾ ಕುಟ್ಮಾಚೆರ್ ತಶೆಂಚ್ ಕುಟ್ಮಾಚಾ ಸಾಂದ್ಯಾಂಚೆರ್ ಪಿಂತ್ರಾಯಿಲ್ಲೊ ದಿವೊ ಜಾವ್ನಾಸಾ. ಜಸೊ ಎಕಾ ಕುಟ್ಮಾಂತ್ ಎಕಾ ಸಾಂದ್ಯಾಕ್ ಜಿವಿತ್ ದಿಂವ್ಚಾಕ್ ಘರ್ಚೊ ವ್ಹಡಿಲ್ ಅಪ್ಲೆಂ ಸರ್ವಸ್ವ್ ದಿತಾ ಆನಿಂ ಪಾಡ್ ವಾಟೆರ್ ವಚೊಂಕ್ ಸೊಡಿನಾಸ್ತಾಂ ರಾಕೊನ್ ವರ್ತಾ ಮ್ಹಳ್ಳೆಂ ಸುರ್ವಿಲ್ಲ್ಯಾ ಪಂಗ್ತೆಂನಿ ಪಳೆವ್ಯೆತಾ.
ಪುಣ್ ಅಖ್ರೇಚಾ ಪಂಗ್ತ್ಯಾಂನಿ ತೊಚ್ ವ್ಹಡಿಲ್ ಭೋವ್ಶಾ ವಾಯ್ಟ್ ವಾಟೆರ್ ವೆಚಾ ಆಪ್ಲ್ಯಾ ಸಾಂದ್ಯಾಕ್ ರಾವಂವ್ಕ್ ಸಕಾನಾಸ್ತಾಂ ದೆವಾಕ್ ಉಲೊ ಮಾರುನ್ ’ಅಪ್ಲೊ ದಿವೊ’ ಮ್ಹಣ್ಜೆ ಆಪ್ಲ್ಯಾ ಕುಟ್ಮಾಚಾ ಸಾಂದ್ಯಾಕ್ ಸಂಪ್ಣಿ ದೀ ಮ್ಹಣ್ ಉಲೊ ದಿತಾ.
ಭಿಂಯೆವ್ನ್ ಝಳ್ಚೊ ಮ್ಹಜೊ ದಿವೊ [-ಆಂಟನಿ ಮಿನೇಜಸ್, ಬೊಂದೆಲ್]
ಕವಿತಾಚಾ ಸುರ್ವೆರ್ ಕವಿನ್ ಮ್ಹಜೊ ದಿವೊ ಮ್ಹಣ್ ಸಾಂಗೊನ್ ಜಿಣಿ ಯಾ ಜಿವಿತ್ ಮ್ಹಳ್ಳಿ ಇಮಾಜ್ ಉಭಿ ಕರುಂನ್ ದಾಖಯ್ಲ್ಯಾ ಮಾತ್ರ್ ನೈಂ ಕಿತ್ಲ್ಯಾ ಕಷ್ಟಾಂನಿಯ್ ಹರ್ಯೆಕ್ ಮನಿಸ್ ಜಿಯೆಂವ್ಕ್ ಪೆಚಾಡ್ತಾ ಆನಿ ಆಶೆತಾ ಆನಿ ಅಖ್ರೇಕ್ ಆಪುಣ್ ಜಿಣ್ಯೆಂತ್ ಸಲ್ವಾಲ್ಯಾರೀ ಕಿತೆಂ ಆಶೆತಾಂ ಮ್ಹಣ್ ಸೊಭಿತ್ ಕರ್ನ್ ಹ್ಯಾ ಕವಿತಾಧ್ವಾರಿಂ ಆಮ್ಕಾಂ ಸಾಂಗ್ತಾ.
ಆತಾಂಚಾ ಕಾಳಾಚಿ ಪಿಳ್ಗಿ ರಾಂದ್ಪಾಕ್ ಗ್ಯಾಸ್ ವಾಪರ್ತಾ ಜಾಲ್ಲ್ಯಾನ್ ತಾಂಕಾಂ ಖಂಡಿತ್ ಕಳಿತ್ ಆಸ್ಚೆಂ ನಾಂ ರಾಂದ್ಣಿಂತ್ ಉಜೊ ಪೆಟಂವ್ಕ್, ಪ್ರತ್ಯೇಕ್ ಜಾವ್ನ್ ಪಾಲ್ವಲ್ಲೊ ಉಜೊ ಫುಂಕುನ್ ಪೆಟಂವ್ಕ್ ಕಿತ್ಲೆ ಕಷ್ಟ್ ಆಸಾತ್ ಮ್ಹಣ್. ಕವಿನ್ ಸಾಂಗ್ಚೆ ಪ್ರಮಾಣೆ ಖಂಡಿತ್ ಜಾವ್ನ್ ತೆಂ ಕಷ್ಟಾಂಚೆ ಕಾಮ್ ಕಿತ್ಯಾಕ್ ಮ್ಹಳ್ಯಾರ್ ರಾಂದ್ಣಿಂತ್ ಹುನ್ ಇಂಗ್ಳೆ ಆಸ್ತಾತ್ ಆನಿ ತೊಂಡ್ ರಾಂದ್ಣಿ ಮುಖಾರ್ ವರ್ನ್ ಫುಂಕ್ತಾನಾ ಗೊಬೊರ್ ಆನಿ ದಾವ್ ತೊಂಡಾಕ್, ಹಾತಾಂಕ್ ಆನಿ ದೊಳ್ಯಾಂಕ್ ಮಾರ್ತಾ ಮ್ಹಳ್ಯಾರ್ ಕಿತ್ಲ್ಯಾ ಕಷ್ಟಾಂನಿ ಜಿಯೆತಾ ಮ್ಹಣ್ ಸಾಂಗ್ತಾ. ದೆವಾ ತುಂಚ್ ಮಾಕಾ ಪಾವ್ ಮ್ಹಣ್ತಾ ಆನಿ ಜಿಯೆಂವ್ಕ್ ದೆವಾಲಾಗ್ಚೊ ಆಧಾರ್ ಮಾಗ್ತಾ.
ಕಷ್ಟಾಂನಿ ಘಾಮ್ ಕಾಡುನ್ ಘೊಳುಂನ್ ಆಪ್ಲೆಂ ಜಿವಿತ್ ಸರ್ತಾ ಮಾತ್ರ್ ನೈಂ ಆಪ್ಲೆಂ ಜಿವಿತ್ ಅಡೊವ್ ಘಾಲ್ನ್ ತಾಚ್ಯಾ ಕುಟ್ಮಾಚ್ಯಾ ಉರ್ಲ್ಲ್ಯಾ ಸಾಂದ್ಯಾಂಕ್ಯಿ ಪೊಸ್ತಾ ಆನಿ ತಾಂಚ್ಯಾ ಬರ್ಯಾಪಣಾ ಪಾಸತ್ ತೊ ಝರ್ತಾ. ಆನಿ ಕವಿನ್ ಸಾಂಗ್ಲ್ಲೆಪರಿಂ ದಿವೊ ಝಳೊಂವ್ಕ್ ಅಡ್ವಾಕ್ ಗೆಲಾಂ ಮ್ಹಳ್ಯಾರ್ ತೊ ಕೊಣಾಚ್ಯಾಗೀ ಗುಲಾಮ್ಗಿರಿಂತ್ ಆಸ್ಲೆಲೆಪರಿಂ ಭಾಸ್ ಜಾತಾ. ಆನಿ ತೊ ಆಪ್ಣಾಚಿ ಭಿರ್ಮತ್ ಪಾವ್ ಮ್ಹಣ್ ದೆವಾಲಾಗಿಂ ಮಾಗ್ತಾ. ಕಿತ್ಲೆ ಕಷ್ಟ್ ಜಾಲ್ಯಾರೀ ಹರ್ಯೇಕ್ ಮನಿಸ್ ಜಿಯೆಂವ್ಕ್ ಆಶೆತಾ ಆನಿ ಆಪ್ಲ್ಯಾ ಉದರ್ಗತೆ ಖಾತಿರ್ ಪೆಚಾಡ್ತಾನಾ ಕವಿ ’ವಾರ್ಯಾಚೊ ವ್ಹಾಳೊ’ ಮ್ಹಣ್ ಸಾಂಗುನ್ ’ಸಮಾಜ್’ ಮ್ಹಳ್ಳಿ ಅನ್ಯೇಕ್ ಮಹತ್ವಾಚಿ ಇಮಾಜ್ ಉಭಿ ಕರುನ್ ಹ್ಯಾ ಕವನಾಕ್ ಚಡ್ ಅರ್ಥ್ ದಿತಾ.
ಜರ್ ವಾರೆಂ ವ್ಹಾಳ್ಳೆಂ ತರ್ ಕಸೊ ಝಳ್ಚೊ ಉಜೊ ಯಾ ದಿವೊ ವಾರ್ಯಾ ಕುಶಿಕ್ ಮಾಲ್ವೊಂಚೆಬರಿ ಜಾತಾಗೀ ಯಾ ವಾರೆಂ ಕಶೆಂ ಉಜೊ ಪಾಲ್ವಾಯ್ತಾ ತಶೆಂಚ್ ಹಿ ಸಮಾಜ್ ಕಷ್ಟಾತೆಲ್ಯಾಂಕ್ ಆನಿ ದುಬ್ಳ್ಯಾಂಕ್ ನೀಟ್ ರಾವೊಂಕ್ ಸೊಡಿನಾಸ್ತಾನಾ ಹರ್ಯೇಕಾ ವಾಟೆನ್ ತಾಣಿಂ ಬಾಗ್ವೊನ್ ಚಲಾಶೆಂ ಕರ್ತಾ ಮಾತ್ರ್ ನೈಂ ತಾಣಿಂ ವಯ್ರ್ ಯೇನಾಶೆಂ ಧಾಂಬುನ್ ಧರುಂಕ್ ಪಳೆತಾ ಆನಿ ಹ್ಯಾ ಖಾತಿರ್ ಸರ್ವ್ ರಿತಿಚೆಂ ಪ್ರಯತ್ನ್ ಕರ್ತೆಚ್ ಆಸ್ತಾ. ಗರೀಬ್ ಮನ್ಶಾಂನಿ ಜಿಯೆಂವ್ಚಾ ಖಾತಿರ್ ಸಮಾಜಿಕ್ ಭಿಯೆಜಾಯ್ ಪಡ್ತಾ ತರ್ಯೀ ದೆವಾ ವರ್ನಿಂ ವ್ಹಡ್ ಕೊಣ್ಂಚ್ ನಾ ಮ್ಹಣ್ ಸಾಂಗ್ತಾನಾ ಅಪ್ಣಾಕ್ ಹ್ಯಾ ಸಮಾಜೆಂತ್ ಝಳೊಂಕ್ ಸೊಡ್ ಮ್ಹಣ್ ಸಾಂಗ್ತಾ.
ಆನಿ ಆತಾಂ ಹ್ಯಾ ಕವಿತಾಂತ್ ಆಮಿ ಇಲ್ಲೆಂಶೆ ಮುಕಾರ್ ವಚೊಂ ಜಾಲ್ಯಾರ್ ಆಮ್ಕಾಂ ದಿಸ್ತಾಗೀ ಕವಿ ಆಪ್ಲ್ಯಾ ಜಿಣಿಯೆಂತ್ ಸಂರ್ಪೂಣ್ ರಿತಿನ್ ನಿರಾಸ್ಲಾ ತೆಂ ಆಮ್ಕಾಂ ಭಾಸ್ ಜಾತಾ ಕಿತ್ಯಾಕ್ ತೊ ಹಾಂಗಾಸರ್ ತಾಕಾಚ್ ತಾಚೆ ತಿತ್ಲ್ಯಾಕ್ ಪಳೈತಾ ಆನಿ ಚಿಂತ್ತಾಕೀ ಆಪುಣ್ ದುಬ್ಳೊ ಜಾವ್ನ್ ಇತ್ಲ್ಯಾ ಕಷ್ಟಾಂನಿ ಹಾಂವ್ ಜಿಯೆತಾ ಆನಿ ಹ್ಯಾ ಸಮಾಜೆ ವಿರೋಧ್ ಆಪ್ಣಾಕ್ ವಚೊಂಕ್ ಜಾಯ್ನಾ. ತರೀ ಆಪುಣ್ ಅಶೆಂಚ್ ಜಿಯೆನ್ ಜಾಲ್ಯಾರ್ ಆಪ್ಣಾ ಥಾವ್ನ್ ದುಸ್ರ್ಯಾಂಕ್ ಕಿತೆಂಚ್ ಫಾಯ್ದೊ ಲಾಭ್ಚೊ ನಾ ಮಾತ್ರ್ ನೈಂ ಅಪುಣ್ ಕಿತೆಂಚ್ ಕರುಂಕ್ ಸಕಾನಾ ಮ್ಹಣ್ ಸಾಂಗ್ತಾನಾ ದಿವ್ಯಾ ಜೀಬ್ ವಡ್ ಕರುನ್ ಆಪ್ಣಾಚೊ ದಿವೊ ಝಳ್ಳ್ಯಾರ್ ಪುರೊ ಮ್ಹಣ್ ಸಾಂಗ್ತಾನಾ ಹಾಂಗಾಸರ್ ತಾಚ್ಯಾ ಜಿವಿತಾಂತ್ ನಿರಾಸುನ್ ಸಂತೊಸಾನ್ ಜಿಯೆಂವ್ಚಿ ಆಶಾ ಸೊಡ್ಲ್ಲೆ ಬರಿಂ ದಿಸೊನ್ ಯೆತಾ. ಜಿಣ್ಯೆಂತ್ ಸರ್ವ್ ಕಷ್ಟಾಂಕ್ ಸಾಂಪ್ಡಾಲ್ಲೊ ತೊ ದೆವಾಲಾಗಿಂ ಧಾಂವ್ತಾ ಆನಿ ದೆವಾಕ್ ಆಪ್ಲೊ ಧನಿ ಮ್ಹಣೊನ್ ತಾಚ್ಯಾ ಕಾಕುಳ್ತಿನ್ ಆಪುಣ್ ಯೆದೊಳ್ ಜಿವೊ ಆಸಾಂ ಆನಿ ಆಪುಣ್ ಸದಾಂಚ್ ತಾಚಾ ಖುಶೆಕ್ ತಯಾರ್ ಆಸಾಂ ಮ್ಹಣ್ ಸಾಂಗ್ತಾ ತರೀ ಆತಾಂ ತಾಚಿ ಜಿಯೆಂವ್ಚಿ ಆಶಾ ಸಂಪೂರ್ಣ್ ನಿವ್ಲ್ಯಾ ಮಾತ್ರ್ ನೈಂ ದಿವೊ ಆಪ್ಲೊ ಫುಂಕುಂನ್ ಸೊಡ್ ಮ್ಹಣೊನ್ ಆಪ್ಣಾಚೆಂ ಮೊರ್ನ್ ಮಾಗ್ತಾ.
ಕವಿನ್ ಹ್ಯಾ ಕವಿತೆಂತ್ ಕಷ್ಟೊಂಚೊ ಮನಿಸ್ ದುಬ್ಳೊ ಮ್ಹಣ್ ಸಾಂಗ್ಲಾಂ ಮಾತ್ರ್ ನೈಂ ತೊ ಖಂಯ್ಚಾ ಥರಾನ್ ಗುಲಾಮ್ಪಣಾಂತ್ ಆಸಾ ತೆಂ ಸಾಂಗುಂಕ್ ನಾ. ಜಾಂವ್ಕ್ ಪುರೊ ತೊ ಆರ್ಥಿಕ್ ಸಂಕಷ್ಟಾಂಕ್ ಸಾಂಪ್ಡಾಲಾ ಯಾ ರಾಜಕೀಯ್ ಶೋಷಣಾಕ್ ವಳಗ್ ಜಾಲಾ ಪುಣ್ ಖಂಡಿತ್ ಜಾವ್ನ್ ಆಮಿ ಸಮ್ಜೊಜಿ ಇತ್ಲೆಂಕೀ ದುಬ್ಳ್ಯಾಂಕ್, ಗತ್ ಆಧಾರ್ ನಾತ್ಲೆಲ್ಯಾಂಕ್ ಆನಿ ಸರ್ವ್ ಥರಾಚ್ಯಾ ಕಷ್ಟ್ ಸಂಕಷ್ಟಾಂಕ್ ಸಾಂಪ್ಡಾಲ್ಲ್ಯಾಂಕ್ ಹಿ ಸಮಾಜ್ ಕುಮೊಕ್ ಕರ್ನಾ, ಹಾತ್ ದೀವ್ನ್ ವಯ್ರ್ ಉಕಲ್ಚೆಂ ಪ್ರಯತ್ನ್ ಕರ್ನಾಂ ಮಾತ್ರ್ ನೈಂ ತಾಣಿಂ ಆನಿಕ್ಯ್ ಚಡ್ ಕಷ್ಟೊಂಚೆಪರಿಂ ಕರ್ನ್ ಪಯ್ಸ್ ರಾವೊನ್ ಸೊಭಾಯ್ ಪಳೆತಾ.
ಕವಿಚೊ ದಿವೊ ಕವಿಚಿಚ್ ಜಿಣಿ [- ಪ್ರಿಯಾ ಸಿಕ್ವೇರಾ, ಫೆರಾರ್]
’ಮ್ಹಜೊ ದಿವೊ’ ಕವಿತಾಂತ್, ಕವಿತಾಂತ್ಲೊ ಕವಿ ಆಪ್ಲ್ಯಾ ಜಿಣ್ಯೆ ವಿಷ್ಯಾಂತ್ ಉಲಯ್ತಾ. ಸುರ್ವಿಲ್ಯಾ ಉತ್ರಾಂನಿ ಕವಿತಾಂತ್ಲೊ ಕವಿ ಜಿಯೆಂವ್ಕ್ ಆಶೆತಾಂ ಮ್ಹಣ್ ’ಝಗ್ಡೊನ್ ತರೀ ಜಿಯೆಂವ್ಕ್’ ಮ್ಹಳ್ಳ್ಯಾಂ ಉತ್ರಾಂನಿ ಪಳೆವ್ಯೆತ್. ಸಭಾರ್ ಉತ್ರಾಂನಿ ದೆವಾಕ್ ಹಾಕ್ ಮಾರ್ಚೊ ಕವಿತಾಂತ್ಲೊ ಕವಿ ಆಖ್ರೇಕ್ ’ದಿವೊ ಮ್ಹಜೊ ಫುಂಕುನ್ ಸೊಡ್’ ಮ್ಹಣುನ್ ನಿರಾಸ್ ಜಾಲ್ಲ್ಯಾ ಬರಿ ಝಳ್ಕತಾ. ’ಗೊಬ್ರಾಂತ್ಲೊ ಇಂಗ್ಳೊ ಫುಂಕುನ್’, ಪಳೆಯಾ ಹಿ ಉತ್ರಾಂ.
ಗೊಬ್ರಾಂತ್ ಇಂಗ್ಳೊ ಆಸಾ ಮ್ಹಣ್ ತೊ ಗೊಬೊರ್ ಕಿಂಡ್ಲ್ಲ್ಯಾ ಶಿವಾಯ್ ಕಳನಾ. ತಶೆಂಚ್ ಕವಿತಾಂತ್ಲೊ ಕವಿ ಹ್ಯಾ ಸಂಸಾರ್ ಮ್ಹಳ್ಳ್ಯಾ ಗೊಬ್ರಾಂತ್ ಆಪುಣ್ ಏಕ್ ಇಂಗ್ಳೊ. ಹ್ಯಾ ಗೊಬ್ರಾಂತ್ ಹಾಂವ್ ಲಿಪೊನ್ ಆಸಾ. ಆಪ್ಣಾನ್ ಉಗ್ತಡಾಕ್ ಯೇಜಾಯ್ ಮ್ಹಣ್ ತಾಚಿ ಆಶಾ ಹಾಂಗಾಸರ್ ಝಳ್ಕತಾ.
ಇಂಗ್ಳೊ ತೊ ಫುಂಕುನ್ ಉಜೊ ಯೇಶೆಂ ಕರಿಜಾಯ್ ತರ್ ತೆಂ ಸಲಿಸಾಯೆಚೆಂ ಕಾಮ್ ನ್ಹಯ್. ತೊ ಫುಂಕುನ್, ಫುಂಕುನ್ ಉಜೊ ಪೆಟಾಶೆಂ ಪ್ರಯತ್ನ್ ಕರಿಜೆ ಪಡ್ತಾ. ತಶೆಂಚ್ ಕವಿತೆಂತ್ಲೊ ಕವಿ ಆಪ್ಲ್ಯಾ ಜಿಣ್ಯೆಧ್ವಾರಿಂ ಹ್ಯಾ ಸಂಸಾರಾರ್ ಆಪ್ಣಾಚೆಂ ವ್ಯಕ್ತಿತ್ವ್ ಆಸಾ ಕರುಂಕ್ ಪ್ರಯತನ್ ಕರ್ತಾ. ಆಪ್ಣಾಚೆಂ ವ್ಯಕ್ತಿತ್ವ್ ಸಾಂಭಾಳ್ನ್ ವರುಂಕ್ ಹ್ಯಾ ಘಾತ್ಕಿ ಸಂಸಾರಾಂತ್ ಸಲಭ್ ನ್ಹಯ್.
ಕೊಣಾ ಎಕ್ಲ್ಯಾನ್ ಬರೆಂ ಕಾಮ್ ಕೆಲ್ಯಾರ್ ತಾಚ್ಯೊ ಖೊಡಿ ಕಾಡ್ಚ್ಯೊ ನಾಂವ್ ಪಾಡ್ ಕರ್ಚೆಂ ಆಮ್ಚಾ ಸಮಾಜೆಕ್ ಸವಯೆಚೆಂ ಜಾವ್ನ್ ಗೆಲಾಂ. ತಾಂಚ್ಯಾ ವ್ಯಕ್ತಿತ್ವಾಕ್ ಏಕ್ ಕಾಳೊ ಥಿಕ್ ಲಾಂವ್ಚಾಕ್ ಸಭಾರ್ ಜಣಾಂ ತಯಾರ್. ಆನಿ ಆಸಲ್ಯಾ ವೆಳಾರ್ ನಿರಾಶಾ ಭೊಗ್ಚಿ ಸಹಜ್. ಹ್ಯಾ ವೆಳಾರ್ ಸಭಾರ್ ಜಣಾಂ ಲೊಕಾಂಚ್ಯಾ ಪಾಡ್ ಜಿಬೆಕ್ ಫುಡ್ ಕರುಂಕ್ ತಾಂಕಾನಾಸ್ತಾಂ ಭಿಂಯೆವ್ನ್ ಫಳಾಫಳ್ ಘೆಂವ್ಕ್ ಆಶೆತಾತ್. ಪುಣ್ ಕವಿತಾಂತ್ಲೊ ಕವಿ ಆಸಲ್ಯಾ ಪರಿಸ್ಥಿತೆಂತ್ ಸಂಸಾರಾಕ್ ಫುಡ್ ಕರುಂಕ್ ಆಶೆತಾ ಮ್ಹಣ್ ಹ್ಯಾ ಉತ್ರಾಂಧ್ವಾರಿಂ ಪಳೆವ್ಯೆತ್.
"ದಿವ್ಯಾಕ್ ಮ್ಹಜ್ಯಾ ಜಬ್ಬೊರ್ ಆಶಾ
ಝಗ್ಡೊನ್ ತರೀ ಜಿಯೆಂವ್ಕ್
ವಾರ್ಯಾಚೊ ವಾಳೊ ದಿವ್ಯಾ ಕುಶಿನ್
ದಿವ್ಯಾಕ್ ಮ್ಹಜಾ ಸದಾಂ ಬಿಯೆಂವ್ಕ್"
ಹಾಂಗಾಸಾರ್ ಕವಿತೆಂತ್ಲ್ಯಾ ಕವಿಚೆ ಅತ್ಮ್ವಿಶ್ವಾಸ್ ಝಳ್ಕತಾ. ಆಪುಣ್ ಆಪ್ಣಾಚೆ ವ್ಯಕ್ತಿತ್ವ್ ಮ್ಹಳ್ಳೊ ದಿವೊ ಖಂಡಿತ್ ಪಾಲ್ವೊಂಕ್ ಸೊಡಿಸೊನಾ. ಆಪುಣ್ ಉಪ್ಯೆತಲೊಂ ಹ್ಯಾ ಸಂಸಾರ್ ಮ್ಹಳ್ಳ್ಯಾ ದರ್ಯಾಂತ್ ಮ್ಹಣ್ ಕವಿತಾಂತ್ಲೊ ಕವಿ ಸಾಂಗ್ತಾ.
ಹ್ಯಾ ಸಂಸಾರಿ ಜಿಯೆಂವ್ಚೆಂ ಕಷ್ಟಾಂಚೆಂ, ಕಷ್ಟ್ ಸುಖ್ ಜಿಣ್ಯೆಚಿ ದೋನ್ ರುಪಾಂ, ಭ್ಯೆಂ - ಭಿರಾಂತ್, ಪಿಡಾ-ಶಿಡಾ ಸಹಜ್. ದೆವಾಚಿ ಸಸಾಯ್ ನಾಸ್ತಾನಾ ಧಯ್ರಾನ್ ಜಿಣಿ ಸಾರುಂಕ್, ಸಂಸಾರಾಕ್ ಫುಡ್ ಕರ್ನ್ ಆಪ್ಣಾಚೆಂ ಅಸ್ತಿತ್ವ್ ಆಸಾ ಕರುಂಕ್ ಸಾಧ್ಯ್ ನಾ. ಕವಿತಾಂತ್ಲೊ ಕವಿ ಆಪ್ಣಾಚೆಂ ವ್ಯಕ್ತಿತ್ವ್ ದೆವಾಚೆಂ ದೆಣೆಂ ಮ್ಹಣ್ತಾ.
"ತುಂವೆ ದಿಲ್ಲೊ ಜೀವ್ ಹೊ. ತುಜಿಚ್ಚ್ ಸೆವಾ ಹಾಂವ್ ಕರ್ತಲೊಂ. ತುಜೆ ಖುಶೆ ಫರ್ಮಾಣೆಂ ಚಲ್ತಲೊಂ"
ಮ್ಹಣ್ ಕವಿಚೆ ದೆವಾಲಾಗಿ ಸಂಭಾಶಣ್. ಹಾಂಗಾಸರ್ ಕವಿಚೆ ತೆಂ ಖಾಲ್ತೆಂಪಣ್, ಆಪುಣ್ ಏಕ್ ಕಿರ್ಕೊಳ್ ವ್ಯಕ್ತಿ ಮ್ಹಣ್ಚೆ ಚಿಂತಾಪ್ ಝಳ್ಕತಾ. ನಿಜಾಯ್ಕಿ ಆಪುರ್ಬಾಯೆಚೆಂ ಚಿಂತಾಪ್. ಆನಿ ಸರ್ವಾ ಥಂಯ್ ಆಸಾಜಾಯ್ ಜಾಲ್ಲೆಂ.
"ದಿವ್ಯಾಕ್ ಧನಿ ತೊಂಚ್ ದೆವಾ
ದಿವೊ ಆಸ್ತಾಂ ಜಿವೊ ಹಾಂವ್
ದಿವ್ಯಾ ವರ್ವಿಂಚ್ ತುಜಿ ಸೆವಾ
ತುಜಿಚ್ ಖುಶಿ ಜಾಂವ್"
ಹಾಂಗಾಸರ್ ಕವಿತೆಂತ್ಲ್ಯಾ ಕವಿನ್ ಆಸಲಿಂ ಉತ್ರಾಂ ಉಚಾರ್ನ್ ವಾಚ್ಪ್ಯಾಂಕ್, ಆಪ್ಣಾಚೆಂ ಬರೆಪಣ್ ಝಳ್ಕಾಶೆಂ ಕೆಲಾಂ.
ಹ್ಯಾ ಕಾಳಾರ್ ಅಸಲೆಂ ಏಕ್ ಚಿಂತಾಪ್ ಭಾರೀ ಉಣೆಂ. ಆಪುನ್ಂಚ್ ವ್ಹಡ್, ಮ್ಹಜ್ಯಾ ಮಿನತೆನ್ ಹಾಂವೆ ನಾಂವ್, ದವ್ಲತ್ ಜೊಡ್ಲ್ಯಾ ಮ್ಹಣ್ಚೊ ಲೋಕ್ಚ್ ಚಡ್. ದೆವಾಚಿ ಭಿರಾಂತ್ ಜಾಂವ್, ದೆವಾಚೊ ಉಪ್ಕಾರ್ ಬಾವುಡ್ಚೆಂ ಉತಾರ್ಚ್ ಯೇನಾ. ಆಸಲಿ ಕವಿತೆಂತ್ಲ್ಯಾ ಕವಿಚಿ ಉತ್ರಾಂ ವಾಚ್ಪ್ಯಾಂಕ್ ದೆಖಿಭರಿತ್.
"ದೆವಾ ದೆವಾ ಪೂನ್ ಜೊಡ್ ದಿವೊ ಮ್ಹಜೊ ಫುಂಕುನ್ ಸೊಡ್"
ಕವಿತಾಂತ್ಲ್ಯಾ ಕವಿನ್ ಭಿಂಯೆವ್ನ್ ಹಿಂ ಉತ್ರಾಂ ಉಚಾರ್ಲ್ಯಾಂತ್ಗಿ ಯಾ ದೆವಾಚಿ ಖುಶಿ ಜಾಂವ್ದಿ ಮ್ಹಣ್ ಸಾಂಗ್ತಾ?.
ಜರೂರ್ ದೆವಾಚೆ ಖುಶೆಕ್ ಖಾಲ್ತಿಮಾನ್ ಘಾಲ್ನ್ ’ದಿವೊ ಮ್ಹಜೊ ಫುಂಕುನ್ ಸೊಡ್ " ಮ್ಹಣ್ತಾ ಜಾಂವ್ಕ್ ಪುರೊ. ಸುರ್ವಿಲ್ಯಾ ಉತ್ರಾಂನಿ ಆಪ್ಣಾಚೆಂ ವ್ಯಕ್ತಿತ್ವ್ ಉಗ್ಡಾಪೆ ಕರ್ಚಿ ಆಶಾ ಆಸ್ಚೊ ಕವಿತಾಂತ್ಲೊ ಕವಿ ಬಿಂವ್ಕುರೊ ಜಾಂವ್ಕ್ ಸಾಧ್ಯ್ ನಾ. ಏಕಾ ಘಡ್ಯೆಕ್ ಕವಿತೆಂತ್ಲ್ಯಾ ಕವಿಚೆ ಪೊಳ್ಕುರ್ಪಣ್ ದಿಸ್ಲ್ಯಾರ್ಯೀ ತಾಚೆ ಥಂಯ್ ಆಸ್ಚಿ ತಿ ಉರ್ಭಾ, ಝಗ್ಡೊನ್ ತರೀ ಜಿಯೆಂವ್ಚಿ ಆಶಾ ಪಳೆತಾನಾ ಕವಿತೆಂತ್ಲೊ ಕವಿ ಬಿವ್ಕುರ್ ಜಾಂವ್ಕ್ ನಾ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.
ದಿವೊ ಜೆನ್ನಾ ಉಲಂವ್ಕ್ ಧರ್ತಾನಾ!!! [ವಲ್ಲಿಕ್ವಾಡ್ರಸ್, ಅಜೆಕಾರ್]
ದಿವೊ ಉಲಂವ್ಕ್ ಧರಿತ್ ತರ್? ಝಡಾಂ ಚಲೊಂಕ್ ಲಾಗ್ತಿಂ ತರ್? ಮಾಸ್ಳ್ಯೊ ಉಭೊಂಕ್ ಸಕ್ತಿಂ ತರ್? ಸುರ್ಯೊ ಭಂವ್ಡೆಕ್ ರಜೆರ್ ಗೆಲೊ ತರ್ ಕಿತೆಂ ಜಾಯ್ತ್?
ಖರೆಂ - ವಾಸ್ತವ್ ಸಂಸಾರಾಂತ್ ಹೆಂ ಅಸಂಭದ್ದ್ ವಾ ಅಸಾಧ್ಯ್. ಪುಣ್ ಕವಿಚಾ ಸಂಸಾರಾಂತ್ ಹೆಂ ಮಾತ್ರ್ ನ್ಹಯ್, ಕಿತೆಂಯ್ ಸಾಧ್ಯ್ ದೆಕುನ್ ಕವಿಚಾ ಸಂಸಾರಾಂತ್ ಗಾಡಾಂವ್ ಗಾಯ್ತಾ, ಆಂದ್ಳೊ ಚೊಯ್ತಾ, ಮೊನೊ ಉಲಯ್ತಾ.. ಕವಿಚಿ ಸಕತ್ ಕಿತ್ಲಿ ಮ್ಹಳ್ಯಾರ್ ಮೂಯ್ ಸಯ್ತ್ ಹಸ್ತೆಕ್ ಬಾಗ್ಸಿತಾ, ಆಂಕರ್ ಸಯ್ತ್ ಚರ್ಬೆಲ್ಲ್ಯಾ ಮಾಂಕೊಡಾಚೆಂ ತೋಂಡ್ ಧಾಂಪಯ್ತಾ.
ಕೊಂಕ್ಣಿ ಕವಿತಾಂತ್ ಆಸ್ಚೆ ಕವಿಚ್ ಬೊಟಾಂನಿ ಮೆಜ್ಯೆತ್ ಆಸ್ತಾಂ, ಹ್ಯಾ ಕವಿಂಚಾ ಕವಿತಾಂಚೊ ಪ್ರಕಾರ್ಯ್ ತಾಚಾಕೀ ಚಡಿತ್ ಆಸೊಂಕ್ ಸಾಧ್ಯ್ ನಾ. ಆನಿಂ ಹ್ಯಾ ಬೊಟಾಂನಿ ಮೆಜ್ಯೆತ್ ಆಸ್ಚಾ ಕವಿಂ ಪಯ್ಕಿ, ಪಾಂಬೂರ್ ಫಿರ್ಗಜೆಚೊ ಮೌರಿಸ್ ಡೆ’ಸಾ ಎಕ್ಲೊ - ಜೊ ’ಮಾವ್ರಿಸ್ ಶಾಂತಿಪುರ’ ಮ್ಹಳ್ಳ್ಯಾ ಲಿಖ್ಣೆನಾಂವಾನ್ ಕೊಂಕ್ಣಿ ಕವಿತಾ ಶೆತಾಂತ್ ಭೋವ್ ವಳ್ಕಿಚೊ. ಕವಿತಾ ಮ್ಹಳ್ಯಾರ್ ಕಶಿಂ ಮ್ಹಳ್ಳ್ಯಾ ಸವಾಲಾಕ್ ತಾಚಿಚ್ ಮ್ಹಳ್ಳಿ ಜಾಪ್ ಆಸಾ ಆನಿಂ ತಿ ತಾಚಿಂ ಎಕೆಕ್ ಕವಿತಾ ವಾಚ್ತಾನಾ ಸುಸ್ತಾತಾ.
ಮ್ಹಜೊ ದಿವೊ ಕವಿತಾ ಅಶೆಂ ಆಸಾ;
"ಪಾಲ್ವಾ ಪೊಂತ್ ಪಿಂದೂನ್ ಮ್ಹಜಾ ದಿವ್ಯಾಕ್ ವಾತ್ ಕೆಲ್ಯಾ
ಗೊಬ್ರಾಂತ್ಲೊ ಇಂಗ್ಳೊ ಫುಂಕುನ್ ಮ್ಹಜಾ ದಿವ್ಯಾಕ್ ದೀಷ್ಠ್ ದಿಲ್ಯಾ
ದೆವಾ ದೆವಾ ತೂಂಚ್ ವ್ಹಡ್ ದಿವೊ ಮ್ಹಜೊ ಪೆಟಂವ್ಕ್ ಸೊಡ್
ತಾಕ್ ದೀವ್ನ್ ತೇಲ್ ಹಾಡ್ನ್ ದಿವ್ಯಾಕ್ ಮ್ಹಜಾ ತಾನೆಕ್ ದಿಲಾ
ದಿವ್ಯಾ ಉಜ್ವಾಡಾನ್ ಇಲ್ಲೆಂ ಜೊಡ್ಲ್ಲೆಂ ದಿವೊ ಝಳಂವ್ಕ್ ಆಡ್ವಾಕ್ ಗೆಲಾಂ
ದೆವಾ ತುಜಿ ಬಿರ್ಮತ್ ವ್ಹಡ್ ದಿವೊ ಮ್ಹಜೊ ಪೆಟಂವ್ಕ್ ಸೊಡ್
ದಿವ್ಯಾಕ್ ಮ್ಹಜಾ ಜಬ್ಬೊರ್ ಆಶಾ ಝಗ್ಡೊನ್ ತರೀ ಜಿಯೆಂವ್ಕ್
ವಾರ್ಯಾಚೊ ವ್ಹಾಳೊ ದಿವ್ಯಾ ಕುಶಿನ್ ದಿವ್ಯಾಕ್ ಮ್ಹಜಾ ಸದಾಂ ಭಿಂಯೆಂವ್ಕ್
ದೆವಾ ವಾರ್ಯಾಕೀ ತುಂ ವ್ಹಡ್ ದಿವೊ ಮ್ಹಜೊ ಜಳೊಂಕ್ ಸೊಡ್
ಜಿಯೆ ಮ್ಹಣೊನ್ ದಿವೊ ದಿಲೊಯ್ ದಿವ್ಯಾಕ್ ಪಳೆ ಝಳ್ತಾ ಕಸೊ
ಉಜ್ವಾಡ್ ತರೀ ಮೆಳಾತ್ ಕಿತ್ಲೊ ದಿವೊ ಮ್ಹಜೊ ಝಳ್ಳ್ಯಾರ್ ಅಸೊ
ದಿವ್ಯಾ ಜೀಬ್ ಕರ್ ವ್ಹಡ್ ದಿವೊ ಮ್ಹಜೊ ಜಳ್ಳ್ಯಾರ್ ಪುರೊ
ದಿವ್ಯಾಕ್ ಧನಿ ತುಂಚ್ ದೆವಾ ದಿವೊ ಆಸ್ತಾಂ ಜಿವೊ ಹಾಂವ್
ದಿವ್ಯಾ ವರ್ವಿಂಚ್ ತುಜಿ ಸೆವಾ ತುಜಿಚ್ ಖುಶಿ ಜಾಂವ್
ದೆವಾ ದೆವಾ ಪೂನ್ ಜೊಡ್ ದಿವೊ ಮ್ಹಜೊ ಫುಂಕುನ್ ಸೊಡ್"
ಎಕೆಕಾ ವೊಳಿಂತ್ಲ್ಯಾ ಎಕೆಕಾ ಉತ್ರಾಕ್ ಧರುನ್ ಪಾರ್ಕಿಯಾಂ - ಕವಿತೆಂತ್ಲ್ಯಾ ಕವಿಚೆ ಬದ್ಲೊನ್ ಯೆಂವ್ಚೆ ಉಮಾಳೆ ಎಕಾ ಕುಶಿನ್ ದವರ್ಯಾಂ ತಶೆಂಚ್ ಎಕೆಕಾ ವೊಳಿಂತ್ಲ್ಯಾ ಎಕೆಕಾ ಉತ್ರಾಂನಿ ಲಿಪೊನ್ ಆಸ್ಚೊ ಇಮಾಜ್ಯೊಯ್ ಅನ್ಯೆಕಾ ಕುಶಿನ್ ದವರ್ಯಾಂ. ಕವಿತೆಂಚೆಂ ತೀರ್ಳ್ ಸೊಧ್ಯಾಂ; ಕವಿತೆಚೊ ವ್ಹಾಳೊ ಪಾರ್ಕಿಯಾಂ ಆನಿಂ ಸರ್ವಾಂಚಾಕೀ ಗರ್ಜೆಚೆಂ - ಕವಿತೆಂತ್ ಕವಿನ್ ಉಲಂವ್ಚಿಂ ಉತ್ರಾಂ ಆಯ್ಕೊವ್ಯಾಂ;
ಮ್ಹಾಕಾ ಹೊ ದಿವೊ ವೆಕ್ತಿತ್ವಾಚಾ ದಿವ್ಯಾಪರಿಂ ದಿಸ್ತಾ. ಕವಿತಾಂತ್ಲೊ ಕವಿ ಅಪ್ಲೆಂಚ್ ಮ್ಹಳ್ಳೆಂ ಏಕ್ ವೆಕ್ತಿತ್ವ್ ರುತಾಂ ಕರ್ಚಾಂತ್ ಅಪ್ಲೆಂ ಸರ್ವ್ ಆವ್ಕ್ಚ್ ಹ್ಯಾ ಕವಿತೆಂತ್ ಝರಯಿಲ್ಲಿಂ ಖುಣಾಂ ದಿಸೊನ್ ಯೆತಾತ್.
ಸುರ್ವಾತ್ ಕೆಲ್ಲ್ಯಾ ವ್ಹೊಳಿ ಥಾವುನ್ ಅಖೇರಿಚಾ ವ್ಹೊಳಿ ಪರ್ಯಾಂತ್ ಉಟೊನ್ ದಿಸ್ಚಿಂ ಭಗ್ಣಾಂ/ಉಮಾಳೆ/ಅತ್ರೆಗ್ ಆನಿಂ ಭೊಗಾಪ್ ಪಳೆಯಾಂ, ಸುರ್ವಾತೆಚೆರ್ ಕವಿತೆಂತ್ಲೊ ಕವಿ ಸತಾ-ನಿತಿನ್, ಅಪ್ಲ್ಯಾ ದಿವ್ಯಾಕ್ ಜಿವೊ ದವರ್ಚಾಕ್ ಅಪ್ಣೆಂ ವಿಶೇಸ್ ಮಿನತ್ ಕೆಲ್ಲಿ ಕಳ್ತಾ, ಪಾಲ್ವಾಚೆಂ ಪೋಂತ್ - ಮ್ಹಳ್ಯಾರ್ ಅಪ್ಲೊ ಮಾನ್ ಧಾಂಪ್ಚಾಕ್ ಅಪ್ಣಾನ್ ನೆಸ್ಲ್ಲ್ಯಾ ವಸ್ತ್ರಾಕ್ಚ್ ಚಿರುನ್ ದಿವ್ಯಾಕ್ ವಾತ್ ಕೆಲ್ಯಾ. ಗೊಬ್ರಾಂತ್ಲೊ ಇಂಗ್ಳೊ ಫುಂಕುನ್ ಮ್ಹಳ್ಯಾರ್ ಸರ್ವಾಂನಿ ಭರ್ವಸೊ ಸಾಂಡ್ಲ್ಲೆವೆಳಾರ್ ತಾಣೆಂ ಅಪ್ಲೊ ದಿವೊ ಝಳಂವ್ಕ್ ಮನ್ ಕೆಲಾಂ.
ಆನಿಂ ಮುಖ್ಲ್ಯಾ ವ್ಹೊಳಿಂನಿ ತೊ ಹಾಚಿ ಕುರುಹ್ ದಿತಾ; ದೆವಾ ದೆವಾ ತುಂಚ್ ವ್ಹಡ್, ದಿವೊ ಮ್ಹಜೊ ಪೆಟಂವ್ಕ್ ಸೊಡ್ ಹ್ಯಾ ದಿವ್ಯಾಕ್ ಕವಿತೆಂತ್ಲ್ಯಾ ಕವಿನ್ ಕಿತ್ಲ್ಯಾ ಜತ್ನೆನ್ ಪೊಸ್ಲಾಂ ಪಳೆಯಾ;
’ತಾಕ್ ದೀವ್ನ್ ತೇಲ್ ಹಾಡ್ನ್ ದಿವ್ಯಾಕ್ ಮ್ಹಜಾ ತಾನೆಕ್ ದಿಲಾಂ,
ದಿವ್ಯಾ ಉಜ್ವಾಡಾಕ್ ಇಲ್ಲೆಂ ಜೊಡ್ಲ್ಲೆಂ ದಿವೊ ಝಳಂವ್ಕ್ ಆಡ್ವಾಕ್ ಗೆಲಾಂ’
ಮ್ಹಳ್ಯಾರ್ ಕವಿಕ್ ಅಪ್ಲ್ಯಾ ತಾನೆಚಾಕೀ ಚಡ್ ಫಿಕಿರ್ ಅಪ್ಲ್ಯಾ ದಿವ್ಯಾಚಾ ತಾನೆಚಿ, ಕವಿ ಅಪ್ಣಾಕ್ ಕಿತ್ಲೆ ಸಂಕಸ್ಟ್ ಆಯ್ಲೆ ತರ್ಯೀ ಅಪ್ಲ್ಯಾ ದಿವ್ಯಾಕ್ ಜತ್ನೆನ್ ಸಾಂಭಾಳುಂಕ್ ಆಸ್ಚಿ ಆಪ್ಣಾಚಿ ಆಶಾ ವೆಕ್ತ್ ಕರ್ತಾನಾ ಮಾತ್ಸೊ ಕಾವ್ಜೆತಾ ಆಪ್ಲ್ಯಾ ದಿವ್ಯಾಚಾ ಫುಡಾರಾಕ್ ಚಿಂತುನ್ ದೆಕುನ್ ದೆವಾಲಾಗಿಂ ಪರತ್ ವಿನತಿ ಕರ್ತಾ;
’ದೆವಾ ತುಜಿ ಬಿರ್ಮತ್ ವ್ಹಡ್, ದಿವೊ ಮ್ಹಜೊ ಪೆಟಂವ್ಕ್ ಸೊಡ್’
ಮ್ಹಳ್ಯಾರ್ ಮ್ಹಜೊ ದಿವೊ ಪೆಟೊನ್ಂಚ್ ಉರೊಂ ಮ್ಹಳ್ಳಿ ಕವಿಚಿ ಆಶಾ ತೊ ದೆವಾಕ್ ಸಮರ್ಪುನ್ ದಿತಾ. ಮುಖ್ಲ್ಯಾ ಪಂಗ್ತೆರ್ ಕವಿ ದಿವ್ಯಾವಿಶಿಂ ಉಲಯ್ತಾ
’ದಿವ್ಯಾಕ್ ಮ್ಹಜಾ ಜಬ್ಬೊರ್ ಆಶಾ, ಝಗ್ಡೊನ್ ತರ್ಯೀ ಜಿಯೆಂವ್ಕ್
ವಾರ್ಯಾಚೊ ವ್ಹಾಳೊ ಮ್ಹಜಾ ಕುಶಿನ್, ದಿವ್ಯಾಕ್ ಮ್ಹಜಾ ಸದಾಂ ಭಿಂಯೆಂವ್ಕ್’
ಹಾಂಗಾಸರ್ ಸಾರ್ಕೆ ರಿತಿನ್ ಪಳೆಯಾ, ಕವಿತೆಂತ್ಲೊ ಕವಿ ಅಪ್ಣಾಕ್ ಆನಿಂ ದಿವ್ಯಾಕ್ ಕಿತೆಂಚ್ ಫರಕ್ ನಾ ಮ್ಹಣ್ತಾ. ಅಪುಣ್, ಅಪ್ಣಾಚೆಂ ವೆಕ್ತಿತ್ವ್ಚ್ ಹೊ ದಿವೊ ಆನಿಂ ಅಪ್ಣಾನ್ ಅಪ್ಲೆಂ ವೆಕ್ತಿತ್ವ್/ ಅಪ್ಲೊ ಜೀವ್ ಉರವ್ನ್ ವರುಂಕ್ ಸದಾಂಯ್ ಝಗ್ಡೆಂ ಕರುಂಕ್ ಪಡ್ತಾ ಮ್ಹಣ್ ಸಾಂಗ್ತಾ;
ಅಪ್ಣಾಕ್ ತಶೆಂಚ್ ಅಪ್ಲ್ಯಾ ದಿವ್ಯಾಕ್ ಜಬ್ಬೊರ್ ಆಶಾ - ಜಿಯೆಂವ್ಕ್, ತೆಂಯ್ ಝಗ್ಡೊನ್ ತರ್ಯೀ ಜಿಯೆಂವ್ಕ್. ವಾರ್ಯಾಚೊ ವ್ಹಾಳೊ ಕಿತ್ಯಾಕ್ಗೀ ಮ್ಹಾಕಾ ಆನಿಂ ಮ್ಹಜಾ ದಿವ್ಯಾಕ್ ಫುಂಕುಂಕ್ ಯೆಂವ್ಚಾರ್ ಆಸ್ತಾಂ, ಮ್ಹಾಕಾ ಆನಿಂ ಮ್ಹಜಾ ದಿವ್ಯಾಕ್ ಸದಾಂಚ್ ಭಿಂಯೆಂವ್ಕ್ ಮ್ಹಣ್ತಾ ಕವಿ.
’ದೆವಾ ವಾರ್ಯಾಚಾಕೀ ತೂಂಚ್ ವ್ಹಡ್, ದಿವೊ ಮ್ಹಜೊ ಜಳೊಂಕ್ ಸೊಡ್’.
ಮುಖ್ಲಿ ಪಂಗತ್ ಭೋವ್ಶಾ ಕವಿನ್ ಅಪ್ಲ್ಯಾ ದಿವ್ಯಾವಿಶ್ಯಾಂತ್ ದೆವಾಲಾಗಿಂ ಉಲಂವ್ಚೆಪರಿಂ ದಿಸ್ತಾ; ಪುಣ್ ಹ್ಯಾ ಪಂಗ್ತೆರ್ ವಾಪಾರ್ಲ್ಲ್ಯೊ ದೋನ್ ವ್ಹೊಳಿ ಇಲ್ಲ್ಯೊ ಘುಸ್ಪಡಾಯ್ತಾತ್. ಪಯ್ಲ್ಯಾ ಪಂಗ್ತೆರ್ ತೊ ಖರೊಚ್ ದೆವಾಲಾಗಿಂ ಉಲಯ್ತಾ ಅಸೊ;
’ಜಿಯೆ ಮ್ಹಣೊನ್ ದಿವೊ ದಿಲೊಯ್, ದಿವ್ಯಾಕ್ ಪಳೆ ಝಳ್ತಾ ಕಸೊ.’
ದುಸ್ರ್ಯಾ ವ್ಹೊಳಿಂತ್ ತೊ ಅಪ್ಲ್ಯಾ ದಿವ್ಯಾಚೆರ್ ಇಲ್ಲೊ ದುಭಾವ್ಯಾ, ದಿವ್ಯಾಚಾ ವಾತಿನ್ ಫಾಂಕಂವ್ಚಾ ಉಜ್ವಾಡಾಕ್ ತೊ ಇಲ್ಲೊ ನಿರಾಸ್ತಾ, ಅಸೊಚ್ ಝಳೊನ್ ಉರ್ಲೊ ತರ್ ಉಜ್ವಾಡ್ ತರ್ಯೀ ಮೆಳಾತ್ ಕಿತ್ಲೊ?
ಉಪ್ರಾಂತ್ ಪರತ್ ದೆವಾಕ್ ಉಲೊ ದಿತಾ ಅಸೊ;
’ದೆವಾ ಜೀಬ್ ವ್ಹಡ್ ಕರ್, ದಿವೊ ಮ್ಹಲೊ ಝಳ್ಳ್ಯಾರ್ ಪುರೊ.’
ಆತಾಂ ಅಖೇರಿಚಾ ಪಂಗ್ತೆಕ್ ಆಮಿಂ ಪಾವ್ಲ್ಯಾಂವ್. ಎದೊಳ್ ಪರ್ಯಾಂತ್ ಕವಿತೆಂತ್ಲೊ ಕವಿ ಹಾಸ್ಲಾ, ನಾಚ್ಲಾ, ರಡ್ಲಾ, ತಾಪ್ಲಾ, ಕಡ್ಲಾ ತರ್ಯೀ ದಿವ್ಯಾಚೊ ತಾಣೆ ವರ್ತೊ ಮೋಗ್ ಕೆಲಾ. ಪುಣ್ ಆತಾಂ ಎಕ್ಚ್ ಪಾವ್ಟಿಂ ಕವಿ ನಿರಾಸ್ಲಾ ಆನಿಂ ಅಶೆಂ ಉಚಾರ್ತಾ;
’ದಿವ್ಯಾಕ್ ಧನಿ ತುಂಚ್ ದೆವಾ, ದಿವೊ ಆಸ್ತಾಂ ಜಿವೊಂ ಹಾಂವ್
ದಿವ್ಯಾವರ್ವಿಂಚ್ ತುಜಿ ಸೆವಾ, ತುಜಿಚ್ ಖುಶಿ ಜಾಂವ್.’
’ದೆವಾ ದೆವಾ ಪೂನ್ ಜೋಡ್, ದಿವೊ ಮ್ಹಜೊ ಫುಂಕುನ್ ಸೊಡ್’
ಕಿತ್ಯಾಕ್ ಹೊ ನಿರಾಸ್? ಕಸಲೆಂ ಹೆಂ ದೂಕ್? ಕಿತ್ಯಾಕ್ ಹಿ ಫೊಳಾಫಳ್? ಕಿತ್ಯಾಕ್ ಹೊ ಜೀವ್ಘಾತ್? ದೆವಾಕ್ಚ್ ಪೂನ್ ಜೋಡ್, ಅಪ್ಲೊ ದಿವೊ ಫುಂಕುನ್ ಮ್ಹಣ್ಚಾ ಕವಿಚಾ ಕಾಳ್ಜಾಂತ್ಲೊ ನಿರಾಸ್ವಾಸ್ ತರ್ಯ್ ಕಿತ್ಲೊ??
ಹೆಂಚ್ ಆತಾಂ ಕವಿನ್ ಪಂಗ್ತೆ ಥಾವ್ನ್ ಪಂಗ್ತೆಂನಿ ಭೊಗ್ಲ್ಲ್ಯಾ/ಸೊಸ್ಲ್ಲ್ಯಾ ಭೊಗಾಪಾಕ್ ಪಳೆಲೆಂ ತರ್; ಆಶಾ ಥಾವ್ನ್ ಉಭ್ಜಾಲಿ ಪಂಗತ್, ಬಿರ್ಮತೆನ್ ಭರೊನ್, ಹಠಾಕ್ ಪಾಡೊನ್, ಝಗ್ಡೆಂ-ಝುಜ್ ಕರುನ್ ಅಖ್ರೇಕ್ ದುಖಾನ್, ನಿರಾಸೊನ್ ಪಡ್ತಾ ಯಾ ಪೊಳ್ತಾ ಯಾ ಸಂಪ್ತಾ. ಮ್ಹಳ್ಯಾರ್ ಗೌತಮ್ ಬುದ್ಧಚೆಂ ತತ್ವ್ ಕವಿತೆಂತ್ಲೊ ಕವಿ ವೊಪುನ್ ಘೆತಾ; ನಿರಾಸ್ ಆನಿ ದುಖಾಕ್ ಆಶಾಚ್ ಕಾರಾಣ್. ಕವಿತೆಂತ್ಲ್ಯಾ ಕವಿಚಿಂ ವೆವೆಗ್ಳಿಂ ಹಂತಾಂ ಪಳೆಯಾಂ;
ಪಯ್ಲೊ ಹಂತ್ - ಸುರ್ವಿಲ್ಲ್ಯಾ ದಿಸಾಂಚೊ - ಮ್ಹಳ್ಯಾರ್ ಭುರ್ಗೆಂಪಣ್/ನೆಣಾರ್ಪಣ್. ಹೆಂ ಭುರ್ಗೆಂಪಣ್ ಮ್ಹಳ್ಯಾರ್ ಪಾಳ್ಣ್ಯಾಂತ್ಲೆಂ ಭುರ್ಗೆಂಪಣ್ ನ್ಹಯ್, ಬಗಾರ್ ಸುರ್ವಾತ್ ಕೆಲ್ಲೊ ಕಾಳ್. ತವಳ್ ಮನ್ಶಾಕ್ ಆಶಾ ಆಸ್ತಾತ್, ವೊಡ್ಣಿಂ ಆಸ್ತಾ ಪುಣ್ ಅನ್ಭೋಗ್ ಆಸಾನಾ....
ದುಸ್ರೊ ಹಂತ್ - ಪಯ್ಲೊ ದಖೊ.. ಮ್ಹಳ್ಯಾರ್ ಅಪ್ಣೆಂ ಕೆದಿಂಕ್ಚ್ ಆಶೆನಾತ್ಲ್ಲೊ ದಖೊ, ಲ್ಹಾನ್ ತರ್ಯ್ ಭೋವ್ ವ್ಹಡ್ ಮ್ಹಣ್ ಭೊಗ್ತಾನಾ ಸೈಂಬಿಕ್ ರಿತಿನ್ ಆಶಾಚೆರ್ ಉದಾಕ್ ಪಡ್ಲ್ಲೆಪರಿಂ ಜಾತಾ.
ತಿಸ್ರೊ ಹಂತ್ - ಪರತ್ ಪರತ್ ದಖೆ ಯೆತಾನಾ ಮನಿಸ್ ಖರೊಚ್ ಖುಭಾಳ್ತಾ ಆನಿಂ ಹಠಾರ್ ಪಡ್ತಾ, ಕಿತ್ಯಾಕ್ ಜಾಯ್ನಾಂ ಪಳೆಯಾಂ ಮ್ಹಳ್ಳೆಂ ಹಠ್. ಆನಿಂ ಹಠ್ ಆಸ್ಚೊ ಮನಿಸ್ ಸಾಧನ್ ಕರುಂಕ್ ಸಕ್ತಾ - ಬರೆಂ ಯಾ ವಾಯ್ಟ್. ಆನಿಂ ಹ್ಯಾ ಹಠಾನ್ ತೊ ಕಿತೆಂಯ್ ಕರುಂಕ್ ಸಕ್ತಾ, ಜಗ್ಡೆಂ-ಝುಜ್ಯ್.
ಚೊವ್ತೊ ಹಂತ್ - ಪರಿಪಿಕಾಯೆಚೊ, ಸಮ್ಜೊಣಿ-ಅನ್ಭೋಗ್ ಖುದ್ದ್ ಭೊಗ್ಚೊ ಹಂತ್. ಆನಿಂ ಹಾಂಗಾಸರ್ ಕವಿ ಅಪ್ಲ್ಯಾ ದಿವ್ಯಾಕ್ ಆನಿಂ ತ್ಯಾ ದಿವ್ಯಾಚಾ ಅಸ್ಕತ್ಕಾಯೆಕ್ ಪಾರ್ಕುಂಕ್ ಸಕ್ತಾ, ತೆಚ್ ದಿವ್ಯಾಕ್ ತಾಕ್ ದೀವ್ನ್ ಪೊಸುನ್ ವಾಗಯಿಲ್ಲೊ ಕವಿ, ಪಾಲ್ವಾ ಪೋಂತ್ ಪಿಂದುನ್ ವಾತ್ ಕೆಲ್ಲೊ ಕವಿ ತೆಚ್ಚ್ ವಾತಿಚೆರ್ ಅಪ್ಲಿ ನಾ-ಖುಶಿ ಧಾಖವ್ನ್ ದೆವಾ ತುಂ ತಿ ವಾತ್ ವಡ್ ಕರ್ ಮ್ಹಣ್ತಾ. ಕವಿ ಹಾಂಗಾಸರ್ ತಿ ವಾತ್ ವ್ಹಡ್ ಕರುಂಕ್ ಅನ್ಯೆಕಾ ಪಾಲ್ವಾಂಚಾ ಪೊಂತಾಕ್ ಪಿಂದುನ್ ವಚಾನಾ, ಬಗಾರ್ ದೆವಾಕ್ಚ್ ಉಲೊ ದಿತಾ.
ಪಾಂಚ್ವೊ ಹಂತ್ - ನಿರಾಶೆಚೊ, ದುಖಾಚೊ, ಲಜೆಚೊ, ಅವ್ಮಾನಾಚೊ, ತಾತ್ಸಾರಾಚೊ.. ಕವಿ ಹಾಂಗಾಯ್ ದೆವಾಕ್ಚ್ ಉಲೊ ದಿತಾ... ತೆಚ್ಚ್ ದೆವಾಕ್ ಜಾಕಾ ತಾಣೆಂ ಎದೊಳ್ ಪರ್ಯಾಂತ್ ಅಪ್ಲ್ಯಾ ದಿವ್ಯಾಕ್ ರಾಕೊನ್ ವ್ಹರುಂಕ್ ಉಲೊ ದಿಲ್ಲ್ಯಾ ದೆವಾಕ್ - ಏಕ್ ಪಾವ್ಟಿಂ ಅಪ್ಲೊ ದಿವೊ ಫುಂಕುನ್ ಸೊಡ್ ಆನಿಂ ಪೂನ್ ಜೊಡ್ ಮ್ಹಣ್ತಾ. ದೆವಾನ್ ಪೂನ್ ಕೊಣಾಥಾವ್ನ್ ಜೊಡ್ಚೆಂಗಾಯ್? ಪುಣ್ ಕವಿಚಾ ಸಂಸಾರಾಂತ್ ಸರ್ವ್ ಸಾಧ್ಯ್ ಆಸಾ..
ಆತಾಂ ಮ್ಹಜೊ ದಿವೊ ಕವಿತೆಂತ್ಲ್ಯೊ ಎಕೆಕ್ ಇಮಾಜ್ಯೊ ಪಳೆಯಾಂ; ದಿವೊಚ್ ಏಕ್ ವ್ಹಡ್ಲಿ ಇಮಾಜ್ - ಮ್ಹಾಕಾ ಹಿ ಇಮಾಜ್ ಎಕಾ ಜಿವಾಪರಿಂ, ಎಕಾ ವೆಕ್ತಿತ್ವಾಪರಿಂ, ಎಕಾ ಆಶಾ-ಅತ್ರೆಗಾಪರಿಂ ದಿಸ್ತಾ.
ಹ್ಯಾ ಕವಿತೆಂತ್ ಮ್ಹಾಕಾ ತೀನ್ ಇಮಾಜ್ಯೊ ಸ್ವಸ್ಟ್ ದಿಸ್ತಾತ್, ದಿವೊ, ದೇವ್, ಕವಿತೆಂತ್ಲೊ ಕವಿ. ದಿವೊ ಮ್ಹಳ್ಯಾರ್ ಶೋಶಿತ್ ಯಾ ಕಟ್ಪುತ್ಳಿ. ದೇವ್ ಮ್ಹಳ್ಯಾರ್ ಖೆಳಯ್ತಲಿಂ ಯಾ ಶೋಶಣ್ ಕರ್ಚೊ ಯಾ ನಾಚಂವ್ಚೊ. ಆನಿಂ ಕವಿತೆಂತ್ಲೊ ಕವಿ ಏಕ್ ಮೊನೊ ಪ್ರೇಕ್ಶಕ್/ವೀಕ್ಶಕ್. ತೊ ಫಕತ್ ಪಳೆತಾ ಮಾತ್ರ್ ಶಿವಾಯ್ ಹೆರ್ ಕಿತೆಂಚ್ ಕರಿನಾ.
ಹೆಂ ಕವಿತಾ ಬ್ಯಾಲಡ್ ಕವಿತೆಕ್ ತಾಳ್ ಪಡ್ತಾ. ಆತಾಂ ಬ್ಯಾಲಡ್ ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜೊವ್ಯಾಂ;
ದುಸ್ರೊ ಭಾಗ್ (ಕವಿತಾಚೆ ಪ್ರಕಾರ್): ಬ್ಯಾಲಡ್ ಕವಿತಾ
ಬ್ಯಾಲಡ್ ಕವಿತಾ ಕವಿತಾಂಚಾ ಸಭಾರ್ ಪ್ರಕಾರಾಂ ಪಯ್ಕಿ ಬ್ಯಾಲಡ್ ಕವಿತಾಂ ಮ್ಹಳ್ಳೊ ಏಕ್ ಪ್ರಕಾರ್ ಆಸಾ, ಚಡ್ತಾವ್ ಜಾವ್ನ್ ಬ್ಯಾಲಡ್ ಕವಿತಾಂನಿ ಕಾಣಿ ಆಸ್ತಾ, ಎಕಾ ಗಿತಾಪರಿಂ ತಿ ವಾಳ್ತಾ ಚಾಚಾರ್ ವ್ಹೊಳಿಂಚೊ ಕವಿತಾ ಆನಿಂ ತ್ಯಾ ಚಾರ್ ವ್ಹೊಳಿಂನಿ (Lines), ದುಸ್ರ್ಯಾ ವ್ಹೊಳಿಚೊ ಅಖ್ರೇಚೊ ಸಬ್ಧ್ ಆನಿಂ ಚೊವ್ತ್ಯಾ ವ್ಹೊಳಿಚೊ ಅಖ್ರೇಚೊ ಸಬ್ಧ್ ತಾಳ್ ಪಡ್ತಾತ್.
ದಾಖ್ಲೊ ದಿಂವ್ಚೊ ತರ್;
’ಪಾಲ್ವಾ ಪೊಂತ್ ಪಿಂದೂನ್
ಮ್ಹಜಾ ದಿವ್ಯಾಕ್ ವಾತ್ ಕೆಲ್ಯಾ
ಗೊಬ್ರಾಂತ್ಲೊ ಇಂಗ್ಳೊ ಫುಂಕುನ್
ಮ್ಹಜಾ ದಿವ್ಯಾಕ್ ದೀಷ್ಠ್ ದಿಲ್ಯಾ’
ಹ್ಯಾ ಪಂಗ್ತೆಂತ್ಲ್ಯೊ ಚಾರ್ಯ್ ವ್ಹೊಳಿ ಪಳೆಯಾಂ, ದುಸ್ರ್ಯಾ ವ್ಹೊಳಿಚೊ ಅಖ್ರೇಚೊ ಸಬ್ಧ್ ’ಕೆಲ್ಯಾ’ ಆನಿಂ ಚೊವ್ತ್ಯಾ ವ್ಹೊಳಿಂತ್ಲೊ ಅಖ್ರೇಚೊ ಸಬ್ಧ್ ’ದಿಲ್ಯಾ’ ಎಕಾಮೆಕಾ ತಾಳ್ ಪಡ್ತಾತ್. ಹಾಕಾ ಇಂಗ್ಲಿಶಾಂತ್ ’ರೈಮಿಂಗ್’ ಮ್ಹಣ್ತಾತ್, ಮ್ಹಣ್ಜೆ ’ಪ್ರಾಸ್’.
ಬ್ಯಾಲಡ್ ಕವಿತಾ ಮ್ಹಳ್ಯಾರ್ ಖಂಚಿ?:
ಬ್ಯಾಲಡ್ ಕವಿತಾ ಎಕಾ ಕಾಣ್ಯೆರುಪಾಚಿ ಕವಿತಾ, ಜಾಂತುಂ ಚಾಚಾರ್ ವ್ಹೊಳಿಂಚೊ ಪಂಗ್ತ್ಯೊ ಆಸೊನ್, ದುಸ್ರ್ಯಾ ವ್ಹೊಳಿಚಾ ಅಖ್ರೇಚೊ ಸಬ್ಧ್, ಚೊವ್ತ್ಯಾ ವ್ಹೊಳಿಚಾ ಅಖ್ರೇಚಾ ಸಬ್ಧಾಕ್ ತಾಳ್ ಪಡ್ತಾ, ಆನಿಂ ತೆಂ ಬ್ಯಾಲಡ್ ಕವಿತಾ ಜಾತಾ.
ಬ್ಯಾಲಡ್ ಕವಿತಾ ಚಡುಣೆಂ 14 ಆನಿಂ ಪಂದ್ರಾವ್ಯಾ ಶೆಕ್ಡ್ಯಾಂತ್ ಫ್ರೆಂಚಾಂತ್ ಸುರ್ವಾತ್ ಜಾವ್ನ್ ಭೋವ್ ಲೊಕಾಮೊಗಾಳ್ ಜಾಲ್ಲಿ. ಬ್ಯಾಲಡ್ ಕವಿತೆಕ್ ಆಸಾಜಯ್ ಜಾಲ್ಲೆ ಗೂಣ್;
* ಬ್ಯಾಲಡ್ ಕವಿತಾ ಎಕಾ ಕಾಣ್ಯೆಕ್ ಸಾಂಗ್ತಾ.
* ಬ್ಯಾಲಡ್ ಕವಿತಾ ಕಾರ್ಯಾಕ್ ಆನಿಂ ಸಂಭಾಶಣಾಂಕ್ ಆಟಾಪ್ತಾ ಶಿವಾಯ್ ಜಾಗ್ಯಾಚೆಂ ವರ್ಣನ್ ಜಾಂವ್ ಫಕತ್ತ್ ವರ್ಣನ್ ಜಾವ್ನ್ ಆಸಾನಾ.
* ಬ್ಯಾಲಡ್ ಕವಿತೆಚಿಂ ಮಿಟರಾಂ ಭೋವ್ ಸಂಪಿಂ ಜಾವ್ನಾಸಾತ್.
* ವ್ಯಂಗ್ಯ್ ಕವಿತಾ ಬ್ಯಾಲಡ್ ಕವಿತಾ ಜಾಂವ್ಕ್ ಸಕ್ತಾತ್.
* ಬ್ಯಾಲಡ್ ಕವಿತಾ ಎಕಾ ಪದಾರುಪಾರ್ ಸಲೀಸಾಯೆನ್ ಗಾವ್ಯೆತ್ - ಚಡ್ತಾವ್ ಬ್ಯಾಲಡ್ ಪದಾಂ ಫೋಕ್ ಸಾಂಗ್ಸ್ ಜಾವ್ನ್ ಯಾ ಕಂಟ್ರಿ ಮ್ಯೂಜಿಕಾರುಪಾರ್ ಗಾಂವ್ಕ್ ಸಲೀಸ್ ಜಾತಾತ್.
ಬ್ಯಾಲಡ್ ಕವಿತಾಂನಿ ಸಭಾರ್ ಪ್ರಕಾರ್ ಆಸಾತ್; ತಾಂಚೊ ಮಟ್ವ್ಯಾನ್ ಉಲ್ಲೇಕ್ ಕರ್ಚೊ ತರ್;
1. ಬ್ರಾಡ್ಶೀಡ್ ಬ್ಯಾಲಡ್ [ಹಾಕಾ ಸ್ಟ್ರೀಟ್ ಬ್ಯಾಲಡ್ ಮ್ಹಳ್ಲೆಂ ನಾಂವ್ಯೀ ಆಸಾ] ಮ್ಹಳ್ಯಾರ್ ಕೀಳ್ (ಮವಾಲಿ) ಅರ್ಥಾಚಾ ಉತ್ರಾಂನಿ ಲಿಖ್ಲ್ಲಿಂ ಕವಿತಾ. (16ವ್ಯಾ ಶೆಕ್ಡ್ಯಾಂತ್ ಹ್ಯಾ ಕವಿತಾಂಚಿ ಸುರ್ವಾತ್ ಜಾಲಿ ಇಂಗ್ಲಿಶ್ ಭಾಸೆಂತ್ - ಕವಿ ರೋಬಿನ್ ಹುಡ್ ಹಾಣೆಂ ಜಾಯ್ತ್ಯೊ ಬ್ಯಾಲಡ್ ಕವಿತಾ ಲಿಖ್ಲ್ಯಾತ್). ಹ್ಯಾ ಪ್ರಕಾರಾಂತ್ ಆಸ್ಚೊ ಅನ್ಯೇಕ್ ಪ್ರಕಾರ್ ಜಾವ್ನಾಸಾ ಮರ್ಡರ್ ಬ್ಯಾಲಡ್ - ಮ್ಹಳ್ಯಾರ್ ಏಕ್ ಕವಿತಾ ಎಕಾ ಖುನ್ಯೆಗಾರಾವಿಶ್ಯಾಂತ್, ಖುನಿಯೆವಿಶ್ಯಾಂತ್ ಯಾ ತ್ಯಾ ಖುನಿಯೆಚಾ ಇರಾದ್ಯಾಂವಿಶ್ಯಾಂತ್ ವಿವರ್ ಆಟಾಪ್ಚೆಂ ಕವಿತಾ.
2. ಸಾಹಿತಿಕ್ ಬ್ಯಾಲಡ್ [18ವ್ಯಾ ಶೆಕ್ಡ್ಯಾಂತ್ ಹ್ಯಾ ಕವಿತಾಂನಿ ಜಲ್ಮ್ ಘೆತ್ಲೊ]
3. ಬ್ಯಾಲಡ್ ಒಪೆರಾ [20ವ್ಯಾ ಶೆಕ್ಡ್ಯಾಂತ್ ಹ್ಯಾ ಪ್ರಕಾರಾಚಾ ಕವಿತಾಂನಿ ಸುರ್ವಾತ್ ಜಾಲಿ - ಪ್ರತ್ಯೇಕ್ ಜಾವ್ನ್ ಇಂಗ್ಲಿಶಾಂತ್]
4. ಜಾಝ್ ಬ್ಯಾಲಡ್ [ಹೊ ಪ್ರಕಾರ್ ಇಲ್ಲೊ ಸಿಂತಿಮೆಂತಾಳ್ ಪ್ರಕಾರ್ ಜಾವ್ನಾಸೊನ್ ಭೋವ್ ಪ್ರಚಲಿತ್ ಜಾವ್ನಾಸ್ಚೊ ಪ್ರಕಾರ್ ಜಾವ್ನಾಸಾ. ಹಿಂ ಕವಿತಾ ಚಡ್ತಾವ್ ಜಾವ್ನ್ ರೋಕ್, ಪೋಪ್ ಯಾ ಕಂಟ್ರಿ ಸಂಗಿತಾಂತ್ ಮೆಳ್ತಾ]
5. ಪವರ್ ಬ್ಯಾಲಡ್ [ತಾಂತ್ರಿಕತೆಂತ್ (Technically) ಹೊ ಪ್ರಕಾರ್ ಬ್ಯಾಲಡ್ ಕವಿತಾಂಚೊ ಪ್ರಕಾರ್ ನ್ಹಯ್ ಪುಣ್ ಭಾವಾಂತ್ ವ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ಹಾಂತುಂ ದಿಸೊನ್ ಯೆಂವ್ಚಿಂ ಮೊಗಾಚಿಂ (Romantic) ಕವಿತಾ/ಪದಾಂ ಬ್ಯಾಲಡ್ ಕವಿತೆಕ್ ಭೋವ್ ಲಾಗ್ಸಿಲಿಂ ದೆಕುನ್ ಹಾಕಾಯ್ ಬ್ಯಾಲಡ್ ಕವಿತೆಚೊ ಪ್ರಕಾರ್ ಮ್ಹಣ್ಂಚ್ ಘೆತಾತ್]
ಕೊಂಕ್ಣೆಂತ್ ವಾಚುಂಕ್ ಮೆಳ್ಚಿಂ ಬ್ಯಾಲಡ್ ಕವಿತಾ/ಪದಾಂ;
ಶರೊ: ಕೊಂಕ್ಣೆಂತ್ ಹಾಂವೆಂ ಹಾಂಗಾಸರ್ ಫಕತ್ತ್ ಕಾನಡಿ ಲಿಪಿಯೆಂತ್ಲ್ಯಾ ಮಂಗ್ಳೂರಿ ಕೊಂಕ್ಣಿ ಕವಿಂಕ್ ಮಾತ್ರ್ ಲೆಕಾಕ್ ಧರ್ಲಾಂ. ಗೊಂಯ್ಕಾರ್ ತಶೆಂಚ್ ಹೆರ್ ಕೊಂಕ್ಣಿ ಕವಿಂನಿ ಬ್ಯಾಲಡ್ ಕವಿತಾ ಬರಯ್ಲ್ಯಾಂತ್ ಆನಿಂ ತಾಂಚೊ ಉಲ್ಲೇಕ್ ಹಾಂಗಾಸರ್ ಮ್ಹಾಕಾ ಮೆಳೊಂಕ್ ನಾತ್ಲ್ಲೆನಿಮ್ತಿಂ ಸರ್ವ್ ಕೊಂಕ್ಣಿ ಬುಕಾಂಕ್ ಲೆಕಾಕ್ ಧರುಂಕ್ ಸಕೊಂಕ್ನಾ.
ವಿಲ್ಫಿ ರೆಬಿಂಬಸಾನ್ ಸಭಾರ್ ಪದಾಂ ಬ್ಯಾಲಡ್ ರಿತಿನ್ ಬರಯ್ಲ್ಯಾಂತ್ ಆನಿಂ ಬ್ಯಾಲಡ್ ರಿತಿನ್ ತಿಂ ತಾಳ್ ಪಡ್ತಾತ್.
ದಾಕ್ಲೊ - ಭಿಕಾರ್ಯಾಚೆಂ ಕುಟಾಮ್;
’ಆಮ್ಚಾ ಗಾಂವಾಂತ್ ಪಾಪ್ ಎಕ್ಲೊ ಭಿಕಾರಿ ಆಸ್ಲಲೊ
ದೀಸ್ ಭರ್ ಕಟ್ಟಿ ಘೆವುನ್ ಭಿಕ್ ಮಾಗ್ತಾಲೊ
ಆಪ್ಲ್ಯಾ ಲ್ಹಾನ್ ಘರಾಂತ್ ಅಪುಣ್ ಎಕ್ಲೊ ರಾವ್ತಾಲೊ
ಎಕಾ ದಿಸಾ ಸಕಾಳಿಂ ಫುಡೆಂ ಮರೊನ್ ಪಡ್ಲಲೊ.’
ಆಮ್ಚಾ ಘರಾಂತ್ ಆಸ್ಲಿ ಎಕ್ಲಿ ಪುರ್ಪುರಿ ಪದ್;
’ಆಮ್ಘೆಲ್ಯಾ ಘರಾಂತ್ ಆಸ್ಲಿ ಎಕ್ಲಿ ಪುರ್ಪುರಿ
ದೀಸ್ಭರ್ ಪುರ್ಪುರೊನ್ ರಾವ್ತಾ ಸರ್ಸರಿ
ಮಾಮ್ಮಿ ಜರ್ ಮಾರಿತ್ ಮ್ಹಾಕಾ ತಿ ವೊಡ್ನ್ ವೆಂಗೆಂತ್ ಧರಿ
ತೊಂಡ್ ಮ್ಹಜೆಂ ತಿ ಪುಸ್ತಾ ಮ್ಹಜೆಂ ದುಖ್ ಥಾಂಭಾಸರಿ.’
ತಶೆಂಚ್ ’ಜೋನಿ ಜೋನಿ’ ಪದ್;
’ಹರ್ಯೆಕ್ ಸಕಾಳಿಂಚ್ಯಾ ವೆಳಾ
ಆಮ್ಚೆ ಚಾಲಿಂತ್ಲಿಂ ಜನೆಲಾಂ
ಉಗ್ತಿಂ ಜಾತಾತ್ ಆನಿ ಚೆಡ್ವಾಂ
ತಿಂ ತಿಳ್ತಾತ್ ಸೊಭಿತ್ ಮುಖಾಮುಳಾಂ.’
ತಶೆಂಚ್ ವಿಲ್ಫಿನ್ ಸಭಾರ್ ಹೆರ್ ಪದಾಂಯ್ ಬ್ಯಾಲಡ್ ರಿತಿನ್ ಬರಯ್ಲ್ಯಾಂತ್. ಹಾಂವ್ ಯೆತಾಂಗೊ ಘಾಟಿ ದೆವೊನ್, ಹ್ಯಾ ಸಂಸಾರಾಂತ್ ಏಕ್ ಆವಯ್ ಏಕ್ ಬಾಪುಯ್, ಹಾಂತ್ಲಿಂ ಉಟೊನ್ ದಿಸ್ಚಿಂ ಥೊಡಿಂ ಪದಾಂ.
ಅಶಿಂಚ್ ಮೆಲ್ವಿನ್ ರೊಡ್ರಿಗಸಾನ್ ಥೊಡಿಂ ಬ್ಯಾಲಡ್ ಕವಿತಾ ಲಿಖ್ಲ್ಯಾಂತ್, ಮಟ್ವ್ಯಾನ್ ತಾಂಚೊ ಉಲ್ಲೇಕ್ ಕರ್ಚೊ ತರ್;
ನಾಕ್ (ಬೂಕ್ -ಫಿಂತಾಂ) - ಹೆಂ ಪರಿಪೂರ್ಣ್ ರಿತಿಚೆಂ ಬ್ಯಾಲಡ್ ಕವಿತಾ ಮ್ಹಣ್ ಸಾಂಗೊಂಕ್ ಜಾಯ್ನಾಂ ತರ್ಯ್ ಹಿ ಏಕ್ ನಾಕಾಚಿ ಕಾಣಿ ಸಾಂಗ್ತಾ ದೆಕುನ್ ಹೆಂ ಬ್ಯಾಲಡ್ ಪ್ರಕಾರಾಕ್ ತಾಳ್ ಪಡ್ತಾ ಮ್ಹಣ್ ಮ್ಹಜೆಂ ಚಿಂತಾಪ್.
’ನಾಕ್ ಮ್ಹಜೆಂ ಮೊಟೆಂ ಮಾಟೆಂ
ಲಾಖಾಂತ್ ಏಕ್ ಮ್ಹಣ್ತಾತ್
ಕಿತ್ಲೋಯ್ ಲೆಗುನ್ ಬರೊ ದಿಸ್ಲೊಂ
ನಾಕ್ ತರ್ಯ್ ಖೊಂಡ್ತಾತ್’.
ಗೊರ್ವಾಂಚೆಂ ರಡ್ಣೆಂ (ಬೂಕ್ -ಫಿಂತಾಂ)
’ಸೊಮ್ಯಾ ಸೊಮ್ಯಾ ಪಾತ್ಕಿ ಆಮಿ
ರಡೊನ್ ಜಾಲಾಂ ಕಾಳಿಜ್ ಲೊಣಿ
ಚಿಂತುಂಕ್ ನಾತ್ಲೆಂ ಕೆನ್ನಾಂಯ್ ಆಮಿ
ಜಲ್ಮ್ ಜಾಯ್ತ್ ಮ್ಹಣ್ ಗೊಟ್ಯಾಂತುಣಿ.
ಹಾಂವ್ಗೊ ಜ್ಯಾಮ್ ಜಾಲೊಂ (ಬೂಕ್ -ಮೊಗಾಪೆಳೊ)
’ಪಾಂತೀ ಕಂರ್ಬಳ್, ತುಜೊಚ್ ಪರ್ಮಳ್
ಚಿಂತುನ್ ದಾರಾರ್ ಗೆಲೊಂ
ಮುಕ್ಲೆ ಓಣಿಂತ್ ಮ್ಹಾಡ್ಡೆಂ ಗೆಲೆಂ
ಹಾಂವ್ಗೋ ಜ್ಯಾಮ್ ಜಾಲೊಂ.
ವಲ್ಲಿ ಕ್ವಾಡ್ರಸಾಚೆಂ ’ಏಕ್ ಪರ್ಗಟ್ ರುದಾನ್’ (ಬೂಕ್ - ಕಟ್ಪುತ್ಳಿ)
’ಬಾಮುಣ್ ಹಾಂವ್ ಮಾಸ್ ಖಾಂವ್ಕ್ಯ್ ತಯಾರ್
ಕಸ್ಟಾಂ ನಶ್ಟಾರ್ ತುಂಚ್ ಮ್ಹಜೊ ಆಧಾರ್
ದುರ್ಬೊಳ್ ಜಿಣೆಂ ಮ್ಹಜೆಂ ತುಂ ಕರ್ ಸಾಕಾರ್
ಆವ್ಕ್ ಹಿಕಾ ಫಾವೊ ಕರ್ ಹಜಾರಾಂಚೆ ಹಜಾರ್.
ಸಿಜ್ಯೆಸ್ ತಾಕೊಡೆಚೆಂ ’ಆನಿ ಏಕ್ ಗೊಲ್ಗೋಥಾ’ ಮ್ಹಳ್ಳೆಂ ಕವಿತಾಯ್ ಬ್ಯಾಲಡ್ ಪ್ರಕಾರಾಚೆಂಚ್. ಆನಿಂ ಹಾಂತ್ಲಿ ಏಕ್ ಪಂಗತ್ ಘೆವ್ಯಾಂ;
’ಆವಯಾಂಚ್ಯಾ ಪಾನ್ಯಾಂನಿ ದುದಾ ಬದ್ಲಾಕ್
ರಗ್ತಾ ಝರಿ ವ್ಹಾಳ್ತಾತ್
ಆಂಜ್ಯಾ ದಿಶ್ಟಿ ಮೊಳ್ಬಾಕ್ ಲಾವುನ್
ಪಾವ್ಸಾ ಶೆಣಾಂಕ್ ರಾಕ್ತಾತ್’.
ಹಾಂತುಂಯ್ ದುಸ್ರ್ಯಾ ವ್ಹೊಳಿಚೊ ಅಖ್ರೇಚೊ ಸಬ್ಧ್ ’ವ್ಹಾಳ್ತಾತ್’ ಆನಿಂ ಚೊವ್ತ್ಯಾ ವ್ಹೊಳಿಚೊ ಅಖ್ರೇಚೊ ಸಬ್ಧ್ ’ರಾಕ್ತಾತ್’ ಎಕಾಚ್ ಪ್ರಾಸಾಚೆ ಜಾವ್ನಾಸಾತ್.
ಅಖ್ರೇಚೊ ಶರೊ : ಬ್ಯಾಲಡ್ ಪ್ರಕಾರ್ ಚಡ್ತಾವ್ ಜಾವ್ನ್ ಎಕಾ ಸಿಂತಿಮೆಂತಾಳ್ ಕಾಣ್ಯೆಕ್ ವಿವರ್ಸಿತಾ, ಭೋವ್ ಸಾದ್ಯಾ ಉತ್ರಾಂನಿ ದೆಕುನ್ ಅಮ್ಕೆಂ ಕವಿತಾ ಬಲ್ಲಾಡ್ ಜಾವ್ಯೆತಾ ವಾ ನಾ-ಜಾವ್ಯೆತಾ ಮ್ಹಳ್ಳ್ಯಾಚೆರ್ ಜಾಯ್ತೊ ತರ್ಕ್ ಮಾಂಡ್ಯೆತಾ. ತರ್ಯ್ ಮ್ಹಜೊ ಹ್ಯಾ ಲೇಖನಾಚೊ ಇರಾದೊ ಫಕತ್ತ್ ಬ್ಯಾಲಡ್ ಕವಿತಾಂಕ್ ಕಶೆಂ ವಳ್ಕೊಂವ್ಚೊ ತಶೆಂಚ್ ಬರಂವ್ಕ್ ಪ್ರೇತನ್ ಕರ್ಚೊ ಮ್ಹಳ್ಳೊ ಮಾತ್ರ್ ಶಿವಾಯ್ ಕೊಣಾಚಿಂ ಕವಿತಾ ಬ್ಯಾಲಡ್ ಕೊಣಾಚಿಂ ನ್ಹಯ್ ಮ್ಹಣ್ಚೊ ಬಿಲ್ಕುಲ್ ನ್ಹಯ್.
[ಹೆಂ ಲೇಖನ್ ಜುಲಾಯ್ 8 ತಾರಿಕೆರ್ ’ದಾಯ್ಜ್’ ಹಾಣಿಂ ಕುವೆಯ್ಟಾಂತ್ ಮಾಂಡುನ್ ಹಾಡ್ಲ್ಲ್ಯಾ ಕವಿತಾಪಾಠ್ ವೆಳಾರ್ ವಾಚುನ್ ಸಾಂಗ್ಲಾಂ - ವಲ್ಲಿ ಕ್ವಾಡ್ರಸ್]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.