ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ
ಲಿಯಾಬ್
ಸಾಹಿತಿವಿಶಿಂ ದೋನ್ ಉತ್ರಾಂ:
[’ಲಿಯಾಬ್’ - ಹಾಚಿಂ ಬರ್ಪಾಂ ಲ್ಹಾನ್ಪಣಾ ಥಾವ್ನ್ ವಾಚುನ್ ಆಯಿಲ್ಲೊಂ ಹಾಂವ್ ತಾಚಾ ಸಭಾರ್ ಅಭಿಮಾನಿಂ ಪಯ್ಕಿ ಎಕ್ಲೊಂ, ತೊ ಕೊಂಕ್ಣೆಂತ್ಲೊ ಮಾಲ್ಘಡೊ ಸಾಹಿತಿ ದೆಖುನ್ ತಾಕಾ ಮೆಳೊಂಕ್ ವೆತಾನಾ ಸಹಜ್ ರಿತಿಚಿ ಕಾವ್ಜೆಣಿ ಭಗ್ತಾಲಿ (ನ್ಹಂಯ್ ತೊ ಮ್ಹಾಕಾ ಕಾಂಯ್ ಗೀಳ್ನ್ ಸೊಡಿತ್ ಮ್ಹಳ್ಳಿ). ಪುಣ್ ತಾಚೆಂ ಸಾದೆಂ ವೆಕ್ತಿತ್ವ್, ಶಾಂತ್ ಸ್ವಭಾವ್, ಖಾಲ್ತೆ ಶೆಗುಣ್ ಆನಿ ಮಾಯ್ಪಾಸಿ ಉತ್ರಾಂ ಖರೆಂಚ್ ಜಾವ್ನ್ ಆಧ್ಲ್ಯಾ ಕೊಂಕ್ಣಿ ಮನ್ಶಾಂಚಿ ಏಕ್ ಝಳಕ್ ದಿತಾಲಿ ಮಾತ್ರ್ ನ್ಹಂಯ್ ತಾಚೆಥಾವ್ನ್ ಮ್ಹಾಕಾ ಜಾಯ್ತೆಂ ಶಿಕೊಂಕ್ ಆಸ್ಚೆಂ ರೂಪ್ ರೂಪ್ ಸಾಂಗ್ತಾಲಿ. ’ಲಿಯಾಬ್/ಕಾವ್ಯದಾಸ್’ ಕೊಂಕ್ಣೆಚೊ ಕವಿ ಆನಿ ಬರೊ ಬರಯ್ಣಾರ್ ತರ್ಯ್ ಹಾಚ್ಯಾಧಿಂ ತಾಕಾ ಹಾಂವ್ ಮೆಳೊಂಕ್ ನಾತ್ಲ್ಲೊಂ.
[ವಾಯ್ಲೆಟ್ ಜೆ. ಪಿರೇರಾ ಆನಿ ಲಿಯಾಬ್ ಸಂವಾದಾಚಾ ವೆಳಾರ್]
ಆಯ್ಲೆವಾರ್ ರಜೆರ್ ಗೆಲ್ಲೆವೆಳಾರ್ ತಾಕಾ ಭೆಟ್ಚೆಂ ಭಾಗ್ ದೆವಾನ್ ಮ್ಹಾಕಾ ದಿಲ್ಲೆಂ, ಮಾಯ್ ಮಯ್ನ್ಯಾಚಾ 30 ತಾರಿಕೆರ್, ’ಸಂದೇಶ’ ಸಭಾಸಾಲಾಂತ್. ಮಟ್ವ್ಯಾ ಆವ್ದೆಂತ್ ತರ್ಯ್ ತಾಚೆಲಾಗಿಂ ದೋನ್ ಉತ್ರಾಂ ಉಲಂವ್ಕ್ ಸಾಧ್ಯ್ ಜಾಲೆಂ, ಪುಣ್ ಪರತ್ ಏಕ್ ಪಾವ್ಟಿಂ ತಾಕಾ ಮೆಳಾಜಯ್ ಮ್ಹಳ್ಳಿ ಆಶಾ ಮ್ಹಜೊ ಗಳೊಭರ್ ಆಸ್ಲ್ಲಿ ತರ್ಯ್ ಅಚಾನಕ್ ಮ್ಹಜಿ ಭಲಾಯ್ಕಿ ಭಿಗಡ್ಲೆಲ್ಯಾವರ್ವಿಂ ತಿ ಆಶಾ ಅಧುರಿಚ್ ದವರ್ನ್ ಪರ್ಗಾಂವಾಕ್ ಪಾಟಿಂ ಆಯ್ಲೊಂ. ಪುಣ್ ಹೆಂ ಸಮ್ಜಾಲ್ಲಿ ಮ್ಹಜಿ ಭಯ್ಣ್ ಮ್ಹಣ್ ಹಾವೆಂ ಲೆಖ್ಚಿ, ಕೊಂಕ್ಣೆಖಾತಿರ್ ಮ್ಹಜ್ಯಾಕೀ ಉರ್ಭೆನ್ ವಾವ್ರ್ ಕರ್ನ್ ಆಸ್ಚಿ ಕವಯತ್ರಿ ವಾಯ್ಲೆಟ್ ಬಾಯೆನ್ ಮ್ಹಜಾ ಹ್ಯಾ ಚಿಂತ್ನಾಂಕ್ ಥೆಂಕೊ ದಿಲೊ ಮಾತ್ರ್ ನ್ಹಂಯ್ ಲಿಯಾಬಾಕ್ ವಚೊನ್ ಭೆಟೊನ್ ಹೆ ಅಪುರ್ಭಾಯೆಚೆಂ ಸಂವಾದ್ ಚಲಯ್ಲೆಂ. ದೇವ್ ಬರೆಂ ಕರುಂ ತುಕಾ ವಾಯ್ಲೆಟ್ ಬಾಯ್.]
ಸ:
ಕೊಂಕ್ಣೆಂತ್ಲ್ಯಾ ಮಾಲ್ಘಡ್ಯಾಂ ಸಾಹಿತ್ಯ್ಕಾರಾಂ ಪಯ್ಕಿ ತುಮಿ ಎಕ್ಲೆ. ತುಮ್ಕಾಂ ತವಳ್ಚಾ ಕೊಂಕ್ಣಿ ಪರಿಗತೆಕ್ ಆಯ್ಚಿ ಕೊಂಕ್ಣಿ ಪರಿಗತಿಚೆಂ ತುಲನ್ ಕರ್ತಾನಾ ಕಿತೆಂ ಭಗ್ತಾ? ಆನಿ ಕಿತ್ಯಾಕ್?
ಜಾ: ತವಳ್ಚಾ ಆನಿ ಆಯ್ಚಾ ಕೊಂಕ್ಣಿ ಪರಿತಗೆಂತ್ ಜಾಯ್ತಿ ಬದ್ಲಾವಣ್ ಜಾಲ್ಯಾ - ತವಳ್ಚಿ ಕೊಂಕ್ಣಿ ಎಕಾಚ್ಚ್ ರಿತಿಚಿ ಮ್ಹಳ್ಳೆಪರಿಂ ಆಸ್ಲ್ಲಿ. ಉಲಂವ್ಚಿ ಅನಿಂ ಬರಂವ್ಚಿ ರೀತ್ ಎಕ್ಚ್ಚ್ ಆಸ್ಲ್ಲಿ. ಆತಾಂಚ್ಯಾ ಕೊಂಕ್ಣೆಂತ್ ಮಿಶ್ರಣ್ ಆಸಾ, ವಿವಿಧ್ ಪತ್ರಾಂನಿ ವಿವಿಧ್ ಥರಾಂಚಿ ಕೊಂಕ್ಣಿ ವ್ಹಾಪಾರ್ತಾತ್, ಕೊಂಕ್ಣೆಂತ್ ಸುಮಾರ್ ಪಾಂಚ್ ಥರಾಂಚ್ಯೊ ಲಿಪಿಂ ಆಸಾತ್. ಆಮ್ಚ್ಯಾ ಭುರ್ಗ್ಯಾಂನಿ ಖಂಚಿ ಲಿಪಿ ಶಿಕ್ಚಿ. ಆಮ್ಚ್ಯಾ ಕನ್ನಡ ಮಾಧ್ಯಾಮಾನಿಂ ಕೊಂಕ್ಣೆಚೆ ಮಾಹಾಪ್ರಾಣ ಕಾಡ್ಲ್ಯಾತ್. ಆತಾಂ "ಲೇಖನ್" ಮ್ಹಣ್ ಬರಂವ್ಚ್ಯಾ ಬದ್ಲಾಕ್ "ಲೇಕನ್" ಮ್ಹಣ್ ಬರಯ್ತಾತ್ (ಕನ್ನಡಾಂತ್ "ಲೇಕನ"- ಆಶೆಂ ಬರಯ್ಲ್ಯಾರ್ ತೆಂ ಚೂಕ್ ಜಾತಾ). ತ್ಯಾ ದೆಕುನ್ ಆಮ್ಚಿಂ ಭುರ್ಗಿಂ ಕನ್ನಡಾಂತ್ ಪಾಟಿಂ ಉರೊಂಕ್ ಹೆಂ ಎಕ್ ಕಾರಾಣ್ ಜಾವ್ನಾಸಾ. ಆದಿಂ ಬರಯ್ಣಾರ್ ಉಣೆಂ ಆಸ್ಲ್ಲೆ. ಮಾಲ್ಘಡ್ಯಾ ಸಾಹಿತಿಂಚ್ಯಾ ಪ್ರಯತ್ನಾನ್ ಆತಾಂ ಬರಯ್ಣಾರ್ ಚಡ್ಲ್ಯಾತ್.
ಸ: ತುಮ್ಚಿ ಸಾಹಿತಿಕ್ ಸುರ್ವಾತ್ ಕೆದಾಳಾ? ಕಶಿ ಜಾಲಿ? ತುಮ್ಕಾಂ ಕೊಂಕ್ಣಿ ಸಾಹಿತ್ಯಾಂತ್ ಲಾಭ್ಲ್ಲೆಂ ಪ್ರೇರಣ್ ಕಸಲೆಂ?
ಜಾ: ಮ್ಹಜಿ ಸಾಹಿತಿಕ್ ಸುರ್ವಾತ್ 1950 ಇಸ್ವೆಂತ್ ಜಾಲ್ಲಿ. ನೊವ್ಯಾ ಕ್ಲಾಸಿ ಥಾವ್ನ್ ಹಾಂವೆ ಸಾಹಿತ್ಯಾಚಿ ಸುರ್ವಾತ್ ಕೆಲ್ಲಿ. ಮ್ಹಜ್ಯಾ ಅವಯ್ ಬಾಪಯ್ ಚಡ್ತಿಕ್ ಶಿಕಾಪ್ ನಾಂ ತರ್ಯೀ ಆಮ್ಚ್ಯಾ ಘರಾಂತ್ ವಿವಿಧ್ ಮಾಗ್ಣಾಂಚೆ ಬೂಕ್, ತಶೆಂಚ್ಚ್ ರಾಕ್ಣೊ ಚುಕಾನಾಸ್ತಾ ಯೆತಾಲೊ. ತಶೆಂಚ್ಚ್ ಮ್ಹಾಕಾ ಮೊನ್ಸಿಞೊರ್ ಸಿಲಾ ಮಿನೇಜ್, ಫೆಲಿಕ್ಸ್ ಪಾವ್ಲ್ ನೊರೆಞ್, ಫಾದರ್ ವಿನ್ಸೆಂಟ್ ಲೋಬ್, ಮೊನ್ಸಿಞೊರ್ ಅಚ್ಚು ಸೋಜಾನ್ ಮೊಸ್ತ್ ಉತ್ತೇಜನ್ ದಿಲ್ಲೆಂ. ಹಾಂವ್ ಟ್ರೇನಿಂಗಾರ್ ಆಸ್ತಾನಾ ರಾಕ್ಣೊ ಮ್ಹಜಾ ಹಾತಾಂತ್ ಸಾಂಬಾಳುಕ್ ದೀವ್ನ್ ಗೆಲ್ಲೊ. ವಿ.ಜೆ.ಪಿ ಸಲ್ದಾನಾ, ಜೊ.ಸಾ.ಅಲ್ವಾರಿಸ್ ಆನಿ ರಾಕ್ಣಾಚೆ ಸರ್ವ್ ಸಂಪಾದಕಾಂ ಥಾವ್ನ್ ಮ್ಹಾಕಾ ಬರೆಂ ಉತ್ತೇಜನ್ ಮೆಳ್ಲ್ಲೆಂ..
ಸ: ತುಮ್ಚಾ ಕಾಳಾಚೆಂ ಕೊಂಕ್ಣಿ ಪತ್ರಿಕೋಧ್ಯಮ್ ಆನಿ ಆತಾಂಚಾ ಪತ್ರಿಕೋಧ್ಯಮಾಂತ್ ಕಿತ್ಲಿ ಬದ್ಲಾವಣ್ ಜಾಲ್ಯಾ? ಕೊಂಕ್ಣೆಚಾ ವ್ಹಾಡಾವಳೆಕ್ ಹಿ ಬದ್ಲಾವಣ್ ಕಿತ್ಲಿ ಉಪ್ಕಾರ್ತಾ?
ಜಾ: ಆದಿಂ ಕೊಕ್ಣೆಂತ್ ಚಡ್ ಪತ್ರಾಂ ನಾತ್ಲ್ಲಿ, ಪಯ್ಲ್ಯಾನ್ ಪಯ್ಲೆಂ ’ಕೊಂಕ್ಣಿ ದಿರ್ವೆಂ’, ’ಸಮಾಜೆಚೊ ದಿವೊ’, ಬೊಂಬಯಾಂತ್ ’ಸುಖ್ ದುಃಖ್’, ’ರಾಕ್ಣೊ’ ಕೊಂಕ್ಣಿ ಪತ್ರಾಂ ಮಾತ್ರ್ ಆಸ್ಲ್ಲಿಂ. ಆತಾಂ ಮಸ್ತ್ ಪತ್ರಾಂ ಆಸಾತ್ ಆನಿ ತಾಂಚೆ ಮಧೆಂ ಸ್ಪರ್ಧೊ ಚಲ್ತಾ, ಪುಣ್ ಹೆಂ ಸರ್ವ್ ಕೊಂಕ್ಣೆಚ್ಯಾ ಅಭಿವೃದ್ಧೆಕ್ ಉಪ್ಕಾರಾಕ್ ಪಡಾನಾಂತ್ ಮ್ಹಣ್ ಚಿಂತಾ. ದುಸ್ರೆಂ ಕಿತೆಂಗೀ ಮ್ಹಳ್ಯಾರ್ ಆಮ್ಚ್ಯಾ ಪತ್ರಾಂನಿ ಸಂಶೋಧನೀಯ್ ಲೇಖನಾಂ ಉಣಿಂ.?
ಸ: ತುಮಿಂ ಹೆರ್ ಥರಾಚೆಂ ಸಾಹಿತ್ಯ್ ರಚ್ಲಾಂ, ಲೇಕನಾಂ ಜಾಂವ್, ಸಂಪಾದಕೀಯ್ ಜಾಂವ್, ಕವಿತಾ ಜಾಂವ್, ಕಾಣ್ಯೊ ಜಾಂವ್, ನವಾಲಿಕಾ ಜಾಂವ್.. ತುಮ್ಕಾಂ ಸಾಹಿತ್ಯಾಚೊ ಖಂಚೊ ಪ್ರಕಾರ್ ಭೊವ್ ಆಂವಡ್ತಾ ಆನಿ ಕಿತ್ಯಾಕ್?
ಜಾ: ಮ್ಹಾಕಾ ಕವನಾ ಚಡ್ ಆಂವಡ್ತಾತ್ ಕಿತ್ಯಾಕ್ ಮ್ಹಳ್ಯಾರ್ ಇಂಗ್ಲೀಷಾಂತ್ ಎಕ್ ಸಾಂಗ್ಣಿ ಆಸಾ
’Poetry is the elder sister of all arts, and the parent of
most’. ಮ್ಹಾಕಾ ಕವನಾಂಚಿ ಪಿಸಾಯ್ ಆದಿಂ ಥಾವ್ನ್ ಸುರು ಜಾಲ್ಲಿ ತಿ ಆತಾಂಯ್ ಆಸಾ. ಲೇಖನಾ ಹಾಂವ್ ಬರಯ್ತಾಂ, ಪುಣ್ ಮ್ಹಾಕಾ ಕವನಾಂ ಬರಂವ್ಚ್ಯಾಂತ್ ವರ್ತಿಂ ದಾಧೊಸ್ಕಾಯ್ ಅನಿಂ ಸಂತೊಸ್ ಲಾಭ್ತಾ.
ಸ: ’ಲಿಯಾಬ್’ ಆನಿ ’ಕಾವ್ಯಾದಾಸ್’ ಮಧ್ಲೊ ಅಂತರ್ ಕಿತ್ಲೊ?
ಜಾ: ’ಲಿಯಾಬ್’ ಮ್ಹಜಾ ಲೇಖನಾಂಕ್, ಮ್ಹಜಾ ಕಾಣಿಂಯಾಂಕ್ ಹ್ಯಾ ನಾಂವಾದ್ವಾರಿ ಪರ್ಗಟ್ ಕರ್ತಾ. ಆನಿ ಕವನಾಂ ’ಕಾವ್ಯಾದಾಸ್’ ಮ್ಹಳ್ಳ್ಯಾ ನಾಂವಾಖಾಲ್ ಪಾಯ್ಸ್ ಜಾತಾತ್. ಮೊನ್ಸಿಂಞೊರ್ ಸಿಲ್ವೆಸ್ಟರ್ ಮಿನೇಜಸ್ (ಪಯ್ಲೊ ರಾಕ್ಣಾಚೊ ಸಂಪಾದಕ್) ತಾಣೆಂ ಭ್ಹುರ್ಗಾಂಚೊ ಕೊನ್ಸೊ ಸುರು ಕೆಲ್ಲ್ಯಾ ತವಳ್ ’ಲಿಯಾಬ್’ ಮ್ಹಳ್ಳೆ ನಾಂವ್ ದಿಲ್ಲೆ. ಆಶೆಂ ಹಿಂ ದೊನೀ ನಾಂವಾ ಆಜೂನ್ಯೀ ಉರ್ಲ್ಯಾಂತ್. ಜಶೆಂ ಮ್ಹಾಕಾ ಚಡಾವತ್ ವಾಚ್ಪಿ ಅಜೂನ್ ’ರಾಕ್ಣೊ ಲಿಯಾಬ್’ ಮ್ಹಣ್ ವೊಲಾಯ್ತಾತ್.
ಸ: ಕೊಂಕ್ಣಿ ಪತ್ರಾಂ ಆನಿ ವೆಬ್ಸಾಯ್ಟ್ ಕೊಂಕ್ಣೆಚಾ ವ್ಹಾಡಾವಳೆಕ್ ಕಿತ್ಲೊ ಪ್ರಮುಖ್?
ಜಾ: ಕೊಂಕ್ಣಿ ಪತ್ರಾಂ ಆಸ್ಲ್ಲ್ಯಾನ್, ಕೊಂಕ್ಣಿ ಪತ್ರಾಂನಿ ಪರ್ಗಟ್ ಜಾಂವ್ಚಿ ಲೇಖನಾಂ ವಾಚುನ್ ಆಮ್ಚೊ ಲೋಕ್ ಕೊಂಕ್ಣಿ ವಾಚುಂಕ್ ಆನಿಂ ಬರಂವ್ಕ್ ಶಿಕ್ತಾ. ವೆಬ್ಸಾಯ್ಟಾಂ ಆಯ್ಲೆವಾರ್ಚ್ಚ್ ಸುರು ಜಾಲ್ಲಾನ್ ಕಿತ್ಲ್ಯಾ ಜಣಾಂಕ್ ಹೆಂ ಪಾವ್ತಾ ಮ್ಹಳ್ಳೆ ಸಾಂಗೊಂಕ್ ಅಸಾಧ್ಯ್. ತರೀ ಆತಾಂ ಸಭಾರಾಲಾಗಿಂ ಕಂಪ್ಯೂಟರ್ ಆಸ್ಲ್ಲ್ಯಾನ್ ಚಡ್ ಲೋಕ್ ಅಂತರ್ಜಾಳಿಂತ್ಲೆಂ ಸಾಹಿತ್ಯ್ ವಾಚ್ತಾತ್. ಆನಿ ಆತಾಂ ದಾಯ್ಜ್.ಕೋಮ್ ಅನಿಂ ಮಾಂಯ್ಭಾಸ್.ಕೋಮ್ರ್ ಕವಿಂಚಿ ಕವಿತಾ/ಕಾಣ್ಯೊ ಪರ್ಗಟ್ ಜಾತಾನಾ ತಾಂಕಾಯ್ ವರ್ತೊ ಸಂತೊಸ್ ಭಗ್ತಾ, ಆನಿಂ ಹೆಂ ಕವಿ, ಕವಿಯತ್ರಿಚ್ಯಾ ಜೀವನಾಂತ್ ಭೋವ್ ಮಹತ್ವಾಚೊ ಪಾತ್ರ್ ಖೆಳ್ತಾ.
ಸ: ತುಮಿಂ ಕೊಂಕ್ಣೆಂತ್ ಏಕ್ ಸಾಹಿತಿ ಜಾವ್ನ್ ಪಾಂಯ್ ತೆಂಕ್ಚಾ ವೆಳಾರ್ ತುಮ್ಚ್ಯಾ ಮತಿಂತ್ ಆಸ್ಲ್ಲಿಂ ಸ್ವಪ್ಣಾಂ ಜ್ಯಾರಿ ಜಾಲ್ಯಾಂತ್?
ಜಾ: ಸತ್ ಸಾಂಗ್ಚೆಂ ತರ್ ಹಾವೆಂ ಬರಂವ್ಕ್ ಧರ್ಲ್ಲ್ಯಾ ವೆಳಾರ್ ಕಾಂಯ್ ಸ್ವಪ್ಣಾಂ ನಾತ್ಲ್ಲಿಂ. ಮ್ಹಾಕಾ ಬರೊಂವ್ಚೆ ದೆಣೆ ಆಸ್ಲ್ಲೆ. ಸಂಪಾದಕಾಂ ಥಾವ್ನ್ ಉತ್ತೇಜನ್ ಮೆಳ್ತಾಲೆ. ಮ್ಹಾಕಾ ಎಕ್ ಬರಯ್ಣಾರ್ ಜಾಯ್ಜಯ್ ಮ್ಹಣ್ ಆಶಾ ಆಸ್ಲ್ಲಿ. ತ್ಯಾ ವೆಳಾ ಆಮ್ಕಾಂ ಬರಯ್ಣಾರಾಂಕ್ ಕಾಂಯ್ ರಿಟರ್ನ್ಸ್ ಮೆಳಾನಾತ್ಲ್ಲೆ. ಪುಣ್ ದೆವಾನ್ ದಿಲ್ಲಿಂ ದೆಣಿಂ ಆಮಿಂ ಗಳ್ಸಿತಲ್ಯಾಂವ್. ಹಾಂವೆ ಅಜೂನ್ ಪರ್ಯಾಂತ್ ಕಿತ್ಲಿಂ ಕವಿತಾ ಯಾ ಲೇಖನಾಂ ಬರಯ್ಲ್ಯಾಂತ್ ಮ್ಹಳ್ಳೆಂ ಮ್ಹಾಕಾಚ್ಚ್ ಕಳಿತಾ ನಾಂ. ತಾಂಚೆಂ ಲೇಕ್ ಜಾಂವ್ ವಾ ತಾಂಚ್ಯೊ ಪ್ರತಿಯೊ ಜಾಂವ್ ಮ್ಹಜೆಲಾಗಿಂ ನಾಂತ್. ಹಾಂವೆ ’ಕ್ರಿಸ್ತಾಚೆಂ ಜನನ್’ ಬರಂವ್ಕ್ ಧರ್ಲ್ಲೆ,
1960 ಇಸ್ವೆಂತ್ ಹಾಂವ್ ಭೋಪಾಲ್ ಟ್ರೇನಾರ್ ವೆತಾನಾ ತೊ ಬೂಕ್ ಭಾಯ್ರ್ ಪಡ್ಲೊ, ತ್ಯಾ ನಂತರ್ ಹಾಂವೆ ತೆಂ ಲೇಖನ್ ಥಂಯ್ಚ್ ರಾವಯ್ಲೆಂ.
ಸ: ಕೊಂಕ್ಣೆಂತ್ ತುಮ್ಚೆಂ ಸ್ವಪಾಣ್ ಕಸಲೆಂ?
ಜಾ: ಸ್ವಪ್ಣಾಂ ಕಾಂಯ್ ನಾಂತ್,
My idea is like milton 'they also saw you stand and
wait". ಮ್ಹಾಕಾ ಕಿತೆಂ ಸಗ್ಳೆಂ ಕರುಂಕ್ ತಾಂಕ್ತಾ ತೆಂ ಕರ್ಚೆ, ಕಾಂಯ್ ಆಶಾ ಆಸೊನ್ ನ್ಹಂಯ್ ಯಾ ಕೊಣೆಂಯ್ ಮ್ಹಾಕಾ ವ್ಹಡ್ಲೊ ಬರೆಯ್ಣಾರ್ ಮ್ಹಣಾಜಯ್ ಮ್ಹಣ್ ನ್ಹಂಯ್. ಕಿತ್ಲೊ ತೇಂಪ್ ತಾಂಕ್ತಾ ತಿತ್ಲೊ ತೇಂಪ್ ಬರಂವ್ಚಿ ಆಶಾ ಮ್ಹಜಿ..
ಸ: ಕೊಂಕ್ಣಿ ಭಾಸೆಂತ್ ’ಏಕ್ ಲಿಪಿ’ ಹ್ಯಾ ವಾದಾವಿಶಿಂ ತುಮ್ಚೆ ವಿಚಾರ್ ಕಸಲೆ? ಕೊಂಕ್ಣೆಚಾ ವ್ಹಾಡಾವಳೆಕ್ ಲಿಪಿ ಕಿತ್ಲಿ ಮಹತ್ವಾಚಿ?
ಜಾ: ಖಂಚಿಯ್ ಭಾಸ್ ವಾಡಾಚೆ ಆನಿಂ ಆಭಿವೃದ್ಧಿ ಜಾಯ್ಜಯ್ ತರ್ ತಾಕಾ ಪ್ರಾಮಾಣಿಕ್ ರೀತ್ ಆನಿಂ ಲಿಪಿಚಿ ಗರ್ಜ್ ಆಸಾ. ಪುಣ್ ಆಮ್ಚಾ ದುರಾದೃಶ್ಟಾನ್ ಕೊಂಕ್ಣಿ ಪಾಂಚ್ ಲಿಪಿಂನಿ ಬರಯ್ತಾತ್. ಎಕಾ ಲಿಪಿನ್ ಬರಯಿಲ್ಲೆಂ ಆನ್ಯೇಕ್ ಲಿಪಿನ್ ವಾಚುಂಕ್ ಜಾಯ್ನಾ. ತಶೆಂ ಜಾಲ್ಲ್ಯಾನ್ ಅಮ್ಚಾ ಸಾಹಿತ್ಯಾಕ್ ಎಕಾ ಲಿಪಿಚಿ ಗರ್ಜ್ ಆಸಾ. ಆತಾಂ ಹಾಂಗಾ ಸವಾಲ್ ಯೆತಾ ಖಂಚಿ ಲಿಪಿ ಗರ್ಜೆಚಿ? ದೂರ್ದೃಷ್ಟೆನ್ ಪಳೆಂವ್ಚೆ ತರ್ ಆಮ್ಚಿಂ ಭುರ್ಗಿಂ ಹಿಂದಿ ಶಿಕ್ತಾತ್, ತಿಂ ವ್ಹಡ್ ಜಾತಾನಾ ತಿಂ ಭುರ್ಗಿಂ ದೇವ್ನಾಗರಿ ಶಿಕ್ತೆಲಿ ಆನಿಂ ತಾಂಚ್ಯಾ ಭುರ್ಗ್ಯಾಂಕ್ ದೇವ್ನಾಗರಿ ಶಿಕಯ್ತಿತ್. ಪುಣ್ ಆಧ್ಲ್ಯಾಂಕ್ ಹಿಂದಿ ಯೇನಾತ್ಲ್ಯಾ ವರ್ವಿಂ ದೇವ್ನಾಗರಿ ಸಮ್ಜಾನಾ. ತ್ಯಾ ದೆಕುನ್ ಹೆಂ ಸಮಸ್ಯಾಚೆಂ ಸವಾಲ್.
ಸ: ದಾಯ್ಜ್.ಕೊಮ್ ಸಾಯ್ಟಿವಿಶ್ಯಾಂತ್ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ದಾಯ್ಜ್.ಕೊಮ್ ಹಾಂವೆ ಆಯ್ಲೆವಾರ್ ಥಾವ್ನ್ ವಾಚುಂಕ್ ಸುರು ಕೆಲ್ಲೆಂ. ದಾಯ್ಜ್ ಸರ್ವ್ ಬರೆಯ್ಣಾರಾಂಕ್ ಸಾಹಿತಿಂಕ್ ಮೊಸ್ತ್ ಉತ್ತೇಜನ್ ದಿತಾ. ತಶೆಂಚ್ಚ್ ಭಾಶೆಕ್ ಪ್ರಚಾರ್ ದಿತಾ. ಹ್ಯಾ ವರ್ವಿಂ ಕೊಂಕ್ಣೆಚಿ ಅಭಿವೃದ್ಧಿ ಸಾಧ್ಯ್ ಜಾತಾ. ದಾಯ್ಜಾರ್ ವಿವಿಧ್ ವಿಭಾಗ್/ಅಂಕಣ್ ಆಸ್ಲ್ಲ್ಯಾನ್ ಕೊಂಕ್ಣೆಚ್ಯಾ ಸರ್ವ್ ಲೇಖಕಾಂಕ್ ಹರ್ಯೇಕಾ ರಿತಿನ್ ಉತ್ತೇಜನ್ ಮೆಳ್ತಾ.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ಕೊಂಕ್ಣೆಂತ್ಚ್ಚ್ ಪ್ರಚಾರ್, ಕೊಂಕ್ಣಿ ಲೊಕಾಕ್ ಆದರ್ಶ್ ಆನಿಂ ವಾಟ್ ದಾಖಂವ್ಚೊ ತಸಲೊ ಜಾಂವ್ದಿ ಮ್ಹಣ್ ಮ್ಹಜಿ ಆಶಾ. ದಾಯ್ಜಾಚ್ಯಾ ಸಾಧನಾಕ್ ಆಮ್ಚೆ ಹಾತ್ ಮೆಳೊನ್ ಹೆಂ ಕಾಮ್ ಆಮಿಂ ಕರ್ಯೆತ್. ದಾಯ್ಜಾಚಿ ಖಬಾರ್ ನಾತ್ಲ್ಲ್ಯಾಂಕ್ ತ್ಯಾ ವಿಶ್ಯಾಂತ್ ಮಾಹೆತ್ ದೀವ್ನ್ ಹ್ಯಾ ವೆಬ್ಸಾಯ್ಟಾಕ್ ಆನಿಕ್ಯೀ ಪ್ರಚಾರ್ ಮೆಳೊಂಕ್ ಸಾಧನ್ ಕರುಂಕ್ ಸಾಧ್ಯ್ ಆಸಾ. ಮೊಸ್ತು ವಾಂವ್ಟ್ ಕಾಡ್ನ್ ವಲ್ಲಿ ಹೆಂ ಸರ್ವ್ ಕರ್ನ್ ಆಸಾ. ತಾಕಾ ದೇವ್ ಸರ್ವ್ ಬರೆಂ ಕರುಂ ಮ್ಹಣ್ತಾ, ಆನಿಂ ಬರೆಂ ಮಾಗ್ತಾ. ದೇವ್
ಬರೆಂ ಕರುಂ.
ಸ: ದೇವ್ ಬರೆಂ ಕರುಂ ತುಮ್ಕಾಂ ಲಿಯಾಬ್, ತುಮ್ಚಾ ಅಮೊಲಿಕ್ ವೆಳಾಕ್ ತಶೆಂಚ್ ತುಮಿ ದಿಲ್ಲ್ಯಾ ಅಪುರ್ಭಾಯೆಚಾ ಜವಾಬಿಂಕ್.
ಜಾ: ದೇವ್ ಬರೆಂ ಕರುಂ ತುಕಾಯ್ ಮ್ಹಾಕಾ ಮೆಳೊಂಕ್ ಇತ್ತುನ್ ಆಯಿಲ್ಲ್ಯಾಕ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
