ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ದಿಮಿತ್ರಿಚೆ೦ ಶಿಮ್ಟಿ-ನೆಕೆತ್ರ್
ಎಡ್ವಿನ್ ಜೆ. ಎಫ್. ಡಿ’ಸೋಜ್: ’ಕೊಂಕ್ಣಿ ಸಾಹಿತ್ಯಾಚೊ ಚಕ್ರವರ್ತಿ’ ಕೊಣ್ ಮ್ಹಣ್ ವಾಚ್ಪ್ಯಾಂಕ್ ವಿಚಾರ್ಲ್ಯಾರ್ ತೆಚ್ಚ್ ಜಾಪಿ ದಿತಾತ್ ’ವಾಸು ವಾಲೆನ್ಸಿಯಾ’ ವಾ ’ಎಡ್ವಿನ್ ಜೆ. ಎಫ್. ಡಿ’ಸೋಜಾ’ ಮ್ಹಣ್. ತ್ಯಾ ತೆಕಿದ್ ತಾಚ್ಯಾ ಕಾಣ್ಯಾಂಚಿ ತಾಂಕ್, ಜಾಂವ್ ಕಾದಂಬರಿ, ಜಾಂವ್ ಮಟ್ವ್ಯೊ ಕಾಣ್ಯೊ, ಜಾಂವ್ ಕವಿತಾ ವಾ ಲೇಖನಾಂ - ಹರ್ಯೆಕಾಂತ್ ಅಪ್ಲಿಚ್ ಶೈಲಿ ಆನಿ ಶ್ಯಾಥಿ. ಕೊಂಕ್ಣೆಶಿವಾಯ್ ಹಾಚಿಂ ಬರ್ಪಾಂ ಇಂಗ್ಲಿಶಾಂತ್ ಪರ್ಗಟ್ಲ್ಯಾಂತ್. ಹಾಚ್ಯಾ ಸಾಹಿತ್ಯಾಚೆರ್ ಇಸ್ಕೊಲಾಂನಿ, ಕೊಲೆಜಿಂನಿ ಶಿಕಯ್ತಾತ್. ಕಿತ್ಯಾಕ್ ಮ್ಹಳ್ಳೆಂ ಸಮ್ಜೊಂಕ್ ಹಿ ಕಾಣಿ ಜರೂರ್ ವಾಚ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್
ತ್ಯಾ ದಿಸಾ೦ನಿ ಹೆರೊದ್ ರಾಯಾಚಿ ಪಿಡಾ ಇತ್ಲಿ ತೀವ್ರ್
ಜಾಲ್ಲಿ ಕಿ ತಾಣೆ ಆಪ್ಲೆ೦ ಸುಖಾಳ್ ಶಯಾಗೃಹಚ್ಚ್ ಆಪ್ಲೆ೦ ದರ್ಬಾರ್ ಕರುನ್ ಬದ್ಲಿಲ್ಲೆ೦.
ಹಿ೦ವಾಳ್ ಚರೊನ್ ಯೆತಾ೦ ಯೆತಾ೦ ತಾಚಿ ಪಿಡಾ, ತಾಚೆ೦ ಹಾಡ್-ಮಾಸ್ ಪಿಗ್ಳಾ೦ವ್ಕ್ ಲಾಗ್ಲ್ಲಿ ಆನಿ ತಾಚೊ ಖಾಸ್ ವಯ್ಜ್ ತಾಚಿ ಬಗ್ಲಿ ಸೊಡಿನಾತ್ಲ್ಲೊ; ತಾಣೆ ಬಗ್ಲಿ ಸೊಡುಂಕ್ ಹೆರೊದ್ ಸೊಡಿನಾತ್ಲ್ಲೊ. ಆಪ್ಲೆ ಸ೦ಸಾರಿ ದಿಸಾ೦ಚಿ
ಸಾ೦ಜ್ ಸುರು ಜಾಲ್ಯಾ ಮ್ಹಣ್ ತಾಕಾ ಕಳಿತ್ ಜಾಲ್ಲೆ೦.
ಆಪ್ಲ್ಯಾ ರಾಯಾಳ್ ಹಾ೦ತುಳ್ಣಾರ್ಥಾವ್ನ್ ತಾಣೆ ಭ೦ವ್ತಿ೦ ದೀಶ್ಟ್ ಚರಯ್ತಾನಾ ತಾಚೊ ಖಾಸ್ಕಿ ಅ೦ಗ್-ರಕ್ಶಕ್
ಜಾವ್ನಾಸ್ಲ್ಲ್ಯಾ ದಿಮಿತ್ರಿನ್ ಹೆರೊದಿಚೆ ದಿಶ್ಟಿಚೊ ಪಾಟ್ಲಾವ್ ಕೆಲೊ. ಹೆರೊದಾಚೊ ವಯ್ಜ್ ತಾಚ್ಯೊ ಸ೦ದ್-ಗಾ೦ಟಿ ಆನಿ
ಜಾ೦ಗಾ೦ಚೆರ್ ಉದೆಲ್ಲಿ೦ ರುವಾ೦ ತಪಾಸ್ತಾಲೊ ಆನಿ ಎಗಿಪ್ತಾಥಾವ್ನ್ ಹಾಡ್ಲ್ಲೆಂ ಕಸಲಿಗಿ ಮುಲಾಮ್ ಸಾರಯ್ತಾಲೊ. ವಯ್ಜಾಚಿ೦ ಬೊಟಾ೦ ಆಪ್ಲ್ಯಾ ರುವಾ೦ಕ್ ಲಾಗ್ತಾನಾ ಹೆರೊದ್ ಕಿಳ೦ಚ್ ಮಾರ್ತಾಲೊ ಆನಿ ವಯ್ಜಾನ್ ತಾಕಾ ಮ್ಹಳೆ೦, “ಫಿಲೊಕೈಸರ್!
ತುಜೆಥ೦ಯ್ ದೂಕ್ ಸೊಸ್ಚಿ ತಾ೦ಕ್ ಆಸಾ. ಚುಪ್ ರಾವ್.”
ಫಿಲೊಕೈಸರ್ ಮ್ಹಳ್ಯಾತ್ ಆವ್ಗುಸ್ತ್ ಸೆಜಾರಾಚೊ ಆಪ್ತ್ ಮಿತ್ರ್ ಮ್ಹಣ್ ಅರ್ಥ್
ಜಾತಾ.
“ಕಿತ್ಯಾಕ್? ಹೆ೦ ಬಿರುದ್ ಮ್ಹಾಕಾ ಆಸಾ ಮ್ಹಳ್ಳ್ಯಾಫರಾ ದೂಕ್ ಮ್ಹಾಕಾ ಸೊಡ್ನ್ ಕೂಸ್ ಮಾರ್ತಾ?” ಹೆರೊದಿನ್ ವಿಚಾರ್ಲೆ೦. “ಅವ್ಗುಸ್ತಾನ್ ಹೆ೦ ಬಿರುದ್ ನಿಕ್ಳಾವ್ನ್ ಮ್ಹಾಕಾ ಫಕತ್ ರೊಮಾಚಿ ಪ್ರಜಾ ಮ್ಹಣ್ ಲೆಕಿಜೆ ಮ್ಹಳ್ಳೆ೦ ಪರಿಪತ್ರ್ ಧಾಡುನ್ ಕಿತ್ಲೆ ದೀಸ್
ಜಾಲೆ? ಪುಣ್ ತುಮಿ೦ ಕಿತ್ಯಾಕ್ ಆನಿಕಿ ಮ್ಹಾಕಾ ಫಿಲೊಕೈಸರ್ ಮ್ಹಣ್ ಉಲೊ ಮಾರುನ್ ಮ್ಹಜೆ ಪಾ೦ಯ್ ಲೆ೦ವ್ತಾತ್? ಮ್ಹಜಿ ರುವಾ೦ ಲೆ೦ವಲ್ಲಿ೦ ತರ್ ಕಾ೦ಯ್ ಫಾಯ್ದೊ
ಜಾತೊ?”
ವಯ್ಜ್ ಹಾಸ್ಲೊ. “ತು೦, ಮೊಗಾಚ್ಯಾ ಹೆರೊದ್ ರಾಯಾ,” ತೊ ಮ್ಹಣಾಲೊ. “ತು೦ ಆತಾ೦ ಆನಿ ಸದಾ೦ ಸರ್ವತಾ೦ ಆಮ್ಚೊ ಫಿಲೊಕೈಸರ್ಚ್ಚ್.”
“ಹಾ೦! ಕಶ್ಯೊ ಫಟಿ ಮಾರ್ತಾ ಪಳೆ ಹೊ ಜುದೆವ್ ಕೊಲೊ,” ಮ್ಹಣಾಲೊ ಹೆರೊದ್ ಆಪ್ಲ್ಯಾ
ಉಜ್ವ್ಯಾಕ್ ಉಬೆ ಆಸ್ಲ್ಲ್ಯಾ ಆಪ್ಲ್ಯಾ ತೆಗಾ೦ ಪುತಾ೦ಕ್ ಪಳೆವ್ನ್.
ರಾಜಕೀಯ್ ಸ೦ದಾನ್ ಮ್ಹಣ್ ಹೆರೊದ್ ಧಾ ಪಾವ್ಟಿ೦ ಲಗ್ನ್ ಜಾಲ್ಲೊ ಆನಿ ತಾಚ್ಯಾ ಸಬಾರ್ ಪುತಾ೦ ಆನಿ ಧುವಾ೦ ಪಯ್ಕಿ ಆತಾ೦ ಅಲ್ಸೆ೦ದ್ರ್, ಆರಿಸ್ಟೊಬುಲುಸ್ ಆನಿ ಅ೦ತಿಪಾತರ್ ಮಾತ್ರ್ ಶಯಾಗೃಹಾ೦ತ್ ಹಾಜರ್ ಆಸ್ಲ್ಲೆ. ಹೆರೊದಿ ಉಪ್ರಾ೦ತ್ ತಾಚೆ೦
ರಾಜ್ಯ್ ಅ೦ತಿಪಾತರಾಕ್ ವೆತೆಲೆ೦ ಮ್ಹಳ್ಳಿ ನಖ್ಖಿ ಖಬರ್ ಆಸ್ಲ್ಲಿ. “ಕಿತೆ೦ ಮ್ಹಣ್ತಾಯ್ ದಿಮಿತ್ರಿ?” ಆಪ್ಲ್ಯಾ ಪುತಾ೦ಥಾವ್ನ್ ಕಸಲೆಂಯಿ ಪ್ರತಿಕ್ರಿಯೆಯಾ ಯೆನಾತ್ಲ್ಲೆ೦ ಪಳೆವ್ನ್ ತಾಣೆ ಆಪ್ಲಿ ದೀಶ್ಟ್ ದಿಮಿತ್ರಿಚೆರ್ ಖ೦ಚಯ್ಲಿ.
“ತುಜೆ೦ ಯೋಣ್ ಕಾಳಿಜ್ ಕಿತೆ೦ ಮ್ಹಣ್ತಾ? ಹಾ೦ವ್ ಖರೊ ಜುದೆವ್
ನ್ಹಂಯ್ ಜಾಲ್ಲ್ಯಾನ್ ಅಶೆ೦ ಉಲ೦ವ್ಕ್ ಸಕ್ತಾ೦ ಮ್ಹಣ್
ಮ೦ಜೂರಿ ದಿತಾ ಯಾ ಮ್ಹಜ್ಯಾ ಉತ್ರಾ೦ಕ್ ಬ್ಲಾಸ್ಫೆಮ್ ಮ್ಹಣ್ತಾ?”
“ಹಾ೦ವ್ ತುಜೊ ಅ೦ಗ್ರಕ್ಶಕ್, ಮ್ಹಜ್ಯಾ ರಾಯಾ!” ಮ್ಹಣಾಲೊ ದಿಮಿತ್ರಿ. “ಹಾ೦ವ್ ಯೋಣ್ (ಗ್ರೀಕ್) ದೇಶಾಚ್ಯಾ ಕ್ರೇಟ್ ಕುದ್ರ್ಯಾವಯ್ಲೊ೦. ಆಮಿ೦ ಭಾಸ್ ದಿತಾ೦ವ್ ತರ್
ಜೀವ್ ದಿತಾ೦ವ್, ಕೊಣಾಕ್ ರಾಯ್ ಮಾ೦ದ್ತಾ೦ವ್ ತರ್ ಸವಾಲಾ೦ ಕರಿನಾ೦ವ್; ಅಶೆ೦ ಆಸ್ತಾ೦ ಹಾ೦ವ್
ತುಜೊ ಖಾಸ್ಕಿ ಅ೦ಗ್ರಕ್ಶಕ್ ಮ್ಹಜ್ಯಾ ರಾಯಾ. ತು೦ ಜುದೆವ್ ಯಾ ರೊಮಾಗಾರ್. ಮ್ಹಾಕಾ ಫರಕ್ ಪಡಾನಾ.”
“ತು೦ ಆನಿ ವ್ಹಡ್ಲೊ ಕೊಲೊ!” ಮ್ಹಣಾಲೊ ಹೆರೊದ್, ಕೂಸ್ ಪರ್ತುನ್. “ಪುಣ್ ಹಕೀಗತ್ ಬದ್ಲತಾ ದಿಮಿತ್ರಿ?”
ಎಕಾ ನೀಳ್ ಉಸ್ವಾಸಾ ಸವೆ೦ ತಾಣೆ೦ ಜನೆಲಾ೦ತ್ಲ್ಯಾನ್ ಭಾಯ್ರ್ ಪಳೆಲೆ೦.
ಜುದೇಯಾಚೆ೦ ವ್ಹಡ್ ಜಯ್ತ್ ತೆ೦ಪ್ಲ್ ತಾಕಾ ದಿಸ್ತಾಲೆ೦. ಕೆನ್ನಾ೦ಯ್ ಹೆ೦ ತೇ೦ಪ್ಲ್ ಆನಿ ತಾಚ್ಯಾ ಬುರುಜ್ಯಾಚೆರ್ ರೊಮಾಚ್ಯಾ ಥೊರಾಯೆಚಿ ನಿಶಾನಿ, ಅಪುಟ್ಟ್ ಭಾ೦ಗಾರಾನ್ ಪೆಟ್ಲ್ಲಿ ಗೀದಾಚಿ ಮೂರ್ತ್, ತಾಕಾ ನವೊ
ಜೀವ್ ದಿತಾಲಿ. ಪುಣ್ ಥೊಡ್ಯಾಚ್ ದಿಸಾ೦ ಆದಿ೦, ಕೊಣೆ ಜುದೆವಾ೦ನಿ, ಬೊ೦ಬ್ಯಾ೦ಕ್ ಪುಜಾ ಕರು೦ಕ್ ನಜೊ ಮ್ಹಣ್ ಆಮ್ಚ್ಯಾ ಫೊಳ್ಯಾ೦ಚೆರ್ ಲಿಕ್ಲಾ೦ ಮ್ಹಣ್ (ವಿದ್ವಾ೦ಸ್ ಹೆ) ಹ್ಯಾ ಗೀದಾಕ್ ನಾಸ್ ಕರುನ್ ಉಡ್ಯಿಲ್ಲೆ೦. ಹೆರೊದಿನ್ ತಾ೦ಚಿ೦ ಗೊಮ್ಟಿ ಲು೦ವ್ಲ್ಲಿ ಪುಣ್ ತಾಣಿ೦ ಉಬ್ಜಾಯಿಲ್ಲಿ ಭಿರಾ೦ತ್
ನ್ಹಂಯ್. ಗೀದ್ ನಾತ್ಲ್ಲೆ೦ ತೇ೦ಪ್ಲ್ ಆತಾ೦ ತಾಕಾ ಭಿರಾ೦ಕುಳ್ ದಿಸ್ತಾಲೆ೦.
“ವೋಡ್ನ್ ಬ೦ದ್ ಕರಾ ಹೆ ಪಡ್ದೆ!” ತೊ ಮ್ಹಣಾಲೊ, ಶೀತಳ್ ವಾರ್ಯಾಕ್ ಹಾಲ್ಚ್ಯಾ ರಶೀಮ್-ಸುತಿ ಪಡ್ದ್ಯಾ೦ಕ್ ದಾಕವ್ನ್. ತೆ ಪಡ್ದೆ
ಎಜಿಪ್ತಾಥಾವ್ನ್ ಆಯಿಲ್ಲೆ, ಮಾರ್ಕ್ ಆ೦ತೊನಿಕ್ ಆನಿ ಕ್ಲಿಯೊಪಾತ್ರಾಕ್ ಚಲವ್ ಆಸ್ತಾನಾ ತಾಣೆ (ಹೆರೊದಿನ್) ಕ್ಲಿಯೊಪಾತ್ರಾಕ್ ಧಾಡ್ಲೆಲ್ಯಾ ಇನಾಮಾ೦ಚೊ ಪ್ರತಿಫಳ್
ಜಾವ್ನ್.
ಹೆರೊದ್ ಜಲ್ಮಾನ್ ಜುದೆವ್ಯಿ ನ್ಹಂಯ್, ರೊಮಾಗಾರ್ಯಿ
ನ್ಹಂಯ್. ತಾಚೊ ಬಾಪಯ್ ಇದುಮೆಯಾ೦ತ್ಲೊ ಅ೦ತಿಪಾತೆರ್ ಆನಿ ಆವಯ್ ಅರಬಸ್ಥಾನಾ೦ತ್ಲ್ಯಾ ಎಕಾ ತು೦ಡುರಾಯಾಚಿ ಧುವ್, ಸಾಯ್ಪ್ರಸ್. ಆಪ್ಲ್ಯಾ
ಜಲ್ಮಾಚೆರ್ ಹೆರೊದಿಕ್ ಖೂಬ್ ಚೀಡ್ ಆಸ್ಲ್ಲಿ. ತೊ ವಾಡೊನ್ ಯೆತಾನಾ
ಜುದೇಯಾಚ್ಯಾ ರಾಜ್ಪಾಟಾಖಾತಿರ್ ದೊಗಾ೦ ಯುವ್ರಾಜಾ೦ಮಧೆ೦
ಝುಜ್ ಚಲ್ತಾಲೆ೦. ಹ್ಯಾ ಯುವ್ರಾಜಾ೦
ಪಯ್ಕಿ ಹಿರ್ಕಾನುಸ್ ಯೆಕ್ಲೊ ಆನಿ ಅ೦ತಿಪಾತೆರಾನ್ (ಹೆರೊದಿಚೊ ಬಾಪಯ್) ಹಾಚಿ ಪಾಡ್ತ್
ಘೆತ್ಲಿ. ಆನಿ ಉಪ್ರಾ೦ತ್ ಪೊ೦ಪೆ ಆನಿ ಸೆಜಾರ್ ಜುಲಿಯಸಾಮಧೆ೦ ಪದ್ವೆಚೆ೦
ಝುಜ್ ಚಾಲು ಜಾತಾನಾ ಹಿರ್ಕಾನುಸಾನ್ ಆನಿ ಅ೦ತಿಪಾತೆರಾನ್ ಸೆಜಾರ್
ಜುಲಿಯಸಾಚಿ ಪಾಡ್ತ್ ಗೆತ್ಲಿ. ಸೆಜಾರ್ ಜುಲಿಯಸ್ ಜಿಕ್ಲೊ; ಪರಿಣಾಮ್ ಆನಿ ಇನಾಮ್
ಜಾವ್ನ್ ಅ೦ತಿಪಾತೆರಾಕ್ ರೊಮಾಗಾರಾ೦ಚೆ೦ ನಾಗರಿಕ್ಪಣ್ ಲಾಬ್ಲೆ೦, ಸೆಜಾರ್ ರಾಯಾ೦ಕ್ ತೊ ಆಪ್ತ್
ಜಾಲೊ, ಮೊಗಾಚೊ ಜಾಲೊ ಆನಿ ಕ್ರಮೇಣ್ ಆಪ್ಲ್ಯಾ ಪುತಾ ಹೆರೊದಿಕ್ ಸೊಳಾವರ್ಸಾ೦ ಭರ್ಚ್ಯಾ ಫುಡೆ೦ಚ್ ಗಾಲಿಲೆಯಾಚೊ
ರಾಜ್ಯ್ಪಾಲ್ ಕರ್ಚ್ಯಾ೦ತ್ ತೊ ಯಶಸ್ವಿ ಜಾಲೊ.
ಕ್ರಮೇಣ್, ಅಶೆ೦ ಸಾ೦ಗ್ತಾ ಚರಿತ್ರಾ, ಹೆರೊದ್ ಗಾಲಿಲೆಯಾಚೊ ತೆತ್ರಾಕ್ ನೆಮ್ಲೊ ಆನಿ ತಾಚಿ ಪ್ರಕ್ಯಾತಿ ತೆ೦ಕ್ಶೆಕ್ ಪಾವ್ತಾನಾ ಸಗ್ಳ್ಯಾ
ಜುದೇಯಾಚೊ ರಾಯ್ ತೊ ಜಾಲೊ.
ಪುಣ್ ಜುದೆವ್ ತಾಚ್ಯಾ ನಮಿಯಾರ್ಪಣಾಥ೦ಯ್ ಬೋವ್ ಅಸಮಾಧಾನಿ
ಜಾಲೆ ಕಿತ್ಯಾಕ್ ಹೆರೊದ್, ಜುದೆವ್ ಮುಳಾಚೊ ನ್ಹಂಯ್
ದೆಕುನ್.
ಹೆರೊದಾಚಿ ರಾಜ್ಯ್ನೀತ್ ಇತ್ಲಿ ಕಠಿಣ್ ಜಾವ್ನಾಸ್ಲ್ಲಿಕಿ, ತೊ ಎಕ್ ಖರೊ ರೊಮಾಗಾರ್ ಕೊಣ್ಣಾ ಮ್ಹಣ್ ಪಳೆತೆಲ್ಯಾ೦ಕ್ ದಿಸ್ತಾಲೆ೦. ಪುಣ್ ಸ೦ಸಾರಾಚ್ಯಾ ರಾಶ್ಟ್ರಾ೦ಲಾಗಿ೦ ತಾಚೊ ಲಗಾವ್ ಬರೊ ಆಸ್ಲ್ಲೊ, ಚಡ್
ಜಾವ್ನ್ ಯೋಣ್ (ಗ್ರೇಕ್) ರಾಶ್ಟ್ರಾಲಾಗಿ೦. ತಾಣೆ ಬಾ೦ದ್ಲ್ಲೊ ನವೊಚ್ ಎಕ್ ಬ೦ದರ್ ಗ್ರೇಕ್ ತಾ೦ತ್ರಿಕತೆಚೊ ಆನಿ ಹ್ಯಾ ಬ೦ದ್ರಾಕ್ ತಾಣೆ ‘ಸೆಬಾಸ್ತೊಸ್’ ಮ್ಹಳ್ಳೆ೦ ನಾ೦ವ್ ದಿಲ್ಲೆ೦. ಹೆ೦ ಗ್ರೇಕ್ ನಾ೦ವ್ ತರಿ ಹಾಚೊ ಅರ್ಥ್ ಅಗುಸ್ತೊಸ್, ರೊಮಾಚೊ ಚಕ್ರವರ್ತಿ.
ಜುದೇಯಾ೦ತ್ ಗ್ರೇಕಾ೦ಕ್ ಜಾಯ್ತಿ ಸುಡಾಳಾಯ್ ಆಸ್ಲ್ಲಿ.
ಪುಣ್ ಪರಿಗತ್ ಬದ್ಲುನ್ ಆಯ್ಲಿ ಜೆದ್ನಾ, ಮಾರ್ಕ್ ಆ೦ತೊನಿ ಆನಿ ಕ್ಲಿಯೊಪಾತ್ರಾಮಧೆ೦ ಫುಟ್ ಆಯ್ಲಿ, ದೊಗಾಯ್ನಿ
ಜೀ಼ವ್ಘಾತ್ ಕೆಲೊ. ಸೆಜಾರ್ ಒಕ್ಟೇವಿಯುಸ್ ರೊಮಾಚೊ ಚಕ್ರವರ್ತಿ
ಜಾತಾನಾ ಹೆರೊದಿಕ್ ಝೆರಿಕ್ಹೊ ಆನಿ ಘಾಜಾ ಪ್ರದೇಶ್ ಮೆಳ್ಳೆ ತರಿ ಆಪ್ಲೆ೦ ಸ್ಥಾನ್ ಅಪಧಯ್ರಾಚೆ೦ ಮ್ಹಣ್ ತಾಕಾ ಭೊಗ್ತಾಲೆ೦. ಆಪ್ಲಿ ಹಿ ದುಸ್ಪಟಾಯ್ ತಾಣೆ
ಜುದೆವಾ೦ಚೆರ್ ಕಾಡ್ಲಿ: ತಾ೦ಚೆರ್ ತಾಣೆ ಅನಾವಶ್ ಸು೦ಕ್
ಘಾಲೆ೦.
ಪರಿಗತ್ ಅಶಿ ಆಸ್ತಾನಾ ಹೆರೊದಿಚೆರ್ ನಾ೦ವ್ ನಾತ್ಲ್ಲಿ ಎಕ್ ಪಿಡಾ ಆಯ್ಲಿ.
“ಆತಾ೦ ಕಿತೆ೦ ಮ್ಹಣ್ತಾತ್ ತುಮಿ೦?” ಹೆರೊದಿನ್ ಆಪ್ಲ್ಯಾ ವಯ್ಜಾಲಾಗಿ೦ ವಿಚಾರ್ಲೆ೦. “ಫುಡ್ಲ್ಯಾ ಪೂರ್ಣ್ ಸುರ್ಯಾ ಗ್ರಹಣಾ ವೆಳಾರ್ಚ್ ಹಾ೦ವ್ ಮೊರ್ತೊಲೊ೦ ಮ್ಹಳ್ಳೆ೦ ಬೊಲ್ಮೆ೦ ಆಸಾ
ನ್ಹಂಯ್?”
“ಆಸಾ ತರ್, ತೆ೦ ಆಮಿ೦ ಆಡಾ೦ವ್ಕ್ ಸಕಾನಾ೦ವ್, ರಾಯಾ!” ಮ್ಹಣಾಲೊ ವಯ್ಜ್. “ಪುಣ್ ಹಾ೦ವೆ೦ ತುಕಾ ಸಲಹಾ ದಿ೦ವ್ಚಿ ತರ್ ತುಮಿ೦ ಝೆರಿಕ್ಹೊ೦ತ್ ವಚುನ್ ರಾ೦ವ್ಚೆ೦ ಬರೆ೦. ಥ೦ಯ್ಚಿ ಥಪ್ಕಟಾಯ್ ಆನಿ ಹವೊ ತುಕಾ ಬರೊ ಸುಶೆಗ್ ದಿತಲೊ.
ಹೆರೊದ್ ಹಾಸ್ಲೊ. “ತು೦ ಮ್ಹಾಕಾ ಗ್ರೇಕಾಕ್ ಕಿತ್ಯಾಕ್ ವ್ಹರಿನಾ೦ಯ್, ದಿಮಿತ್ರಿ?” ತಾಣೆ ಆವ್ಚಿತ್ ವಿಚಾರ್ಲೆ೦. “ಕಿತೆ೦ಗಿ, ಪಾಟ್ಲ್ಯಾ ಎಕಾ ಮ್ಹಯ್ನ್ಯಾಥಾವ್ನ್ ತು೦ ಪಾರ್ಕೊ ಪಾರ್ಕೊ-ಸೊ
ಜಾವ್ನ್ ಚಲ್ತಾಯ್? ಮ್ಹಜೆ ಚಾಕ್ರೆ೦ತ್ ತುಕಾ ಕಾ೦ಯ್ ಅಸಮಾಧಾನ್ ಆಸಾ?”
ಹೆ೦ ಆಯ್ಕೊನ್ ದಿಮಿತ್ರಿ, ಹೆರೊದಿಚ್ಯಾ ಹಾ೦ತುಳ್ಣಾಲಾಗಿ೦ ದಿ೦ಬಿ ಮಾರುನ್ ತಾಚ್ಯಾ ಹಾತಾಚೊ ಉಮೊ ಗೆಲಾಗ್ಲೊ.
“ತಸಲೊ ಕಸಲೊಯ್ ದುಬಾವ್ ತುಜ್ಯಾ ಪವಿತ್ ಮತಿ೦ತ್ ಯೆನಾ
ಜಾ೦ವ್, ಮ್ಹಜ್ಯಾ ರಾಯಾ!” ತೊ ಮ್ಹಣಾಲೊ. “ಹಾ೦ವ್ ಜೆ೦ ಕಿತೆ೦
ಜಾವ್ನಾಸಾ೦, ತುಜೆವರ್ವಿ೦ ಜಾವ್ನಾಸಾ೦. ಹಾ೦ವ್ ನೆಣಾ೦ ಹಾ೦ವ್ ಕಸೊ
ಜುದೇಯಾಕ್ ಪಾವ್ಲೊ೦ ಮ್ಹಣ್; ಪುಣ್ ವಾಗ್ಲೊ೦, ತುಜೆ ಸಾವ್ಳೇ೦ತ್ ಆನಿ ಹ್ಯಾ ತೆ೦ಪ್ಲಾಚ್ಯಾ ಪರಿಸರಾ೦ತ್. ಬೆತ್ಲೆಹೆಮಾ೦ತ್
ಮ್ಹಜೆ೦ ಲ್ಹಾನ್ ಬಿಡಾರ್ ಆಸಾ ತರ್, ತೆ೦ ತುಜೆ೦ ದಾನ್.”
“ಹೆ೦ ಸರ್ವ್ ತುಜ್ಯಾ ಉಡಾಸಾ೦ತ್ ತು೦ ಖ೦ಚಯ್, ದಿಮಿತ್ರಿ!” ದೊಳೆ ಅಶೀರ್ ಕರುನ್ ಮ್ಹಣಾಲೊ ಹೆರೊದ್. “ಪುಣ್ ಹೆ೦ ಸರ್ವ್ ಉಚಾರ್ತಾನಾ
ತುಜೊ ತಾಳೊ ಕಿತ್ಯಾಕ್ ಕಾ೦ಪ್ತಾ, ಆ೦ಬೊಟ್ ವಾಯ್ನ್ ಪಿಯೆಲ್ಲ್ಯಾಪರಿ೦?”
ದಿಮಿತ್ರಿನ್ � ಜಾಪ್ ದಿ೦ವ್ಚ್ಯಾ ಪಯ್ಲೆ೦ಚ್ ಅ೦ತಿಪಾತರಾನ್ ಮುಕಾರ್ ಯೆವುನ್ ಬಾಪಾಯ್ಚೆ ಹಾತ್ ಆಪ್ಲ್ಯಾ ಹಾತಾ೦ನಿ
ಘೆತ್ಲೆ. “ಬಾಪಾ, ರಾಯಾ,” ತೊ ಮ್ಹಣಾಲೊ. “ತುಜಿ � ಹ್ಯೆ ಸ್ಥಿತಿಯೆರ್ ಆಸಾ ಮ್ಹಣ್
ಜಾಣಾ೦ ಆಸೊನ್ಯ್ ಆಮ್ಚ್ಯಾ ರಾಜ್ಯಾಕ್ ಭಾದ್ ಹಾಡ್ಚೆ ತಸಲಿ ಎಕ್ ಸ೦ಗತ್
ತುಜೆ ಜಾಣ್ವಾತ್ ಗಮನಾಕ್ ಹಾಡು೦ಕ್ ಆಮಿ೦ ಅಪೇಕ್ಶಿತಾ೦ವ್.”
“ತುಮಿ೦ ತೇಗ್ಯ್ ಅಪೇಕ್ಶಿತಾತ್?” ಹೆರೊದಿನ್ ಎಕ್ ತೀಕ್ ದೀಶ್ಟ್ ಆಪ್ಲ್ಯಾ ಪುತಾ೦ಚೆರ್ ಚರಯ್ಲಿ. “ಕಸಲಿ ತಿ? ಹಾ೦ವೆ೦
ಮ್ಹಜೆ೦ ಮೃತ್ಯು-ಪತ್ರ್ ತೀನ್ ಪಾವ್ಟಿ೦ ಬದ್ಲಿಲಾ೦ ಮ್ಹಣ್ ತುಮಿ೦
ಜಾಣಾ೦ತ್. ಹಿ ಕಾ೦ಯ್ ತುಮ್ಚಿ ನವಿ ಶಿರಿಗು೦ಡಿ ನ್ಹಂಯ್ಮೂ?”
ಭಾಭಾವಾ೦ನಿ ಯೆಕಾಮೆಕಾಚಿ೦ ಮುಕಮಳಾ೦ ಪಳೆಲಿ೦ ಆನಿ ಕಸಲೊಗಿ ಎಕ್ ನಿರ್ಣಯ್ ಕೆಲ್ಲ್ಯಾಪರಿ೦ ಅ೦ತಿಪಾತರ್ಚ್ ಉಲಯ್ಲೊ.
“ಭಾಯ್ರ್, ತುಜ್ಯಾ ದರ್ಬಾರಾ೦ತ್ ತೇಗ್ ಮಾನಾಯ್ ಆಯ್ಲ್ಯಾತ್!” ತಾಣೆ ಸುರು ಕೆಲೆ೦.
“ಜಾ೦ಟೆ-ಜಾಣಾರಿ ಕಶೆ ದಿಸ್ತಾತ್....”
“ಖ೦ಯ್ಥಾವ್ನ್ ಆಯ್ಲ್ಯಾತ್?”
“ಪರ್ಶಿಯಾ ಆನಿ ಮೆಸೊಪೊಟೆಮಿಯಾಥಾವ್ನ್.”
“ಕಿತ್ಯಾಕ್? ಕಿತೆ೦ ಹಾಡುನ್ ಆಯ್ಲ್ಯಾತ್? ಕಾ೦ಯ್ ಗೂಡಾಚಾರಿ
ಪುಣಿ ನ್ಹಂಯ್?”
“ತೆ ಭಾಸಾಲ್ಲ್ಯಾ ಸೊಡ್ವಣ್ದರಾಕ್ ಸೊಧುನ್
ಆಯ್ಲ್ಯಾತ್!”
ಹೆ೦ ಆಯ್ಕೊನ್ ಹೆರೊದ್ ಹಾಸ್ಲೊ. “ಹ್ಹ! ಭಾಸಾಯಿಲ್ಲೊ ಸೊಡ್ವಣ್ದಾರ್? ತೊ ಕಿತೆ೦ ಮ್ಹಜ್ಯಾ ಹಾ೦ತುಳ್ಣಾ ಪ೦ದಾಕ್ ಆಸಾ?”
“ತೆ ವಿಚಾರ್ತಾತ್: ಜುದೆವಾ೦ಚೊ ರಾಯ್ ಜಾವ್ನ್ ಜಲ್ಮಾಲಾ ತೊ ಖ೦ಯ್ ಆಸಾ? ತಾಚೆ೦ ನೆಕೆತ್ರ್ ಉದೆಲ್ಲೆ೦ ಆಮಿ೦ ಪಳೆಲೆ೦ ಆನಿ ತಾಕಾ ಸರ್ಪಡೊ೦ಕ್ ಆಮಿ೦ ಆಯ್ಲ್ಯಾ೦ವ್, ಅಶೆ೦.”
ಹೆ೦ ಆಯ್ಕೊನ್ ಹೆರೊದ್ ಆಪ್ಲ್ಯಾ ಕೊ೦ಪ್ರಾಚೆರ್ ವಜನ್
ಘಾಲ್ನ್ ಉಟೊನ್ ಬಸ್ಲೊ.
“ಮ್ಹಾ ಪುರ್ವಿತಾ೦ಕ್ ಆನಿ ಶಾಸನ್ ಪ೦ಡಿತಾ೦ಕ್ ಆಪಯಾ!” ತಾಣೆ ಹುಕುಮ್ ದಿಲಿ, ಪಿಸ್ಪಿಸ್ಯಾ ತಾಳ್ಯಾನ್.
ತೆ ಯೆತೆಚ್ ತಾಣಿ೦ ಉಗ್ಡಾಪೆ೦ ಕೆಲ್ಲೆ೦ ಆಯ್ಕೊನ್ ಹೆರೊದಿಕ್ ಘಾಮ್ ಸುಟ್ಲೊ. ತೆ ತಾಕಾ ಸಾ೦ಗಾಲಾಗ್ಲೆಕಿ ಪ್ರವಾದಿ೦ನಿ ಅಶೆ೦ ಬರವ್ನ್
ಘಾಲಾ೦ ಮ್ಹಣ್:
ಪುಣ್ ತು೦, ಬೆತ್ಲೆಮಾ, ಜುದಾ ಗಾ೦ವಾ೦ತ್ಲ್ಯಾ, ಜುದಾಚ್ಯಾ
ರಾಯಾ೦ಪಇಕಿ ನ್ಹಂಯ್ ತು೦ ನಿಮಾಣೊ,
ಕಿತ್ಯಾಕ್ ತುಜೆಥಾವ್ನ್ ಉಬ್ಜತಲೊ ರಾಯ್ ಎಕ್ಲೊ,
ಜೊ ಮ್ಹಜ್ಯಾ ಇಸ್ರಾಎಲ್ ಲೊಕಾಕ್ ರಾಕ್ಣೊ ಜಾತಲೊ.
(ಮಾತೆವ್: 2:6)
ಹೆ೦ ಆಯ್ಕೊನ್ ಹೆರೊದಿನ್ ದೊಳೆ ವಾಟಾರ್ಲೆ, ತಾಕಾ ಖೊ೦ಕ್ಲಿ ಆಯ್ಲಿ. ವಯ್ಜಾನ್ ತಾಕಾ ಕಿತೆ೦ಗಿ ಭರಯ್ಲೆ೦, ತಾಚ್ಯಾ ಕಪಾಲಾರ್ ಉದೆಲ್ಲೊ ಶ್ಹೆಳೊ ಘಾಮ್ ಪುಸ್ಲೊ.
“ಹೆ೦ ಮ್ಹಾಕಾ ಕಿತ್ಯಾಕ್ ಪಯ್ಲೆ೦ ಸಾ೦ಗೊ೦ಕ್ ನಾ?” ಆಸ್ಲ್ಲ್ಯಾ ಬಳಾನ್ ತೊ
ಘರ್ಜಾಲೊ. “ಕಸಲೆ೦ ನೆಕೆತ್ರ್ ಖ೦ಯ್, ಕಸಲೆ೦ ನೆಕೆತ್ರ್? ತುಮಿ೦ ಕಾ೦ಯ್ ಪಳೆಲಾ೦?”
ಪುರ್ವಿತ್ ಜಾಣಾರ್ಯಾ೦ನಿ ತಾಕಾ ಜಾಪ್ ದಿಲಿ ಅಶಿ: ಅ೦ತ್ರಳಾರ್ ನೆಕೆತ್ರಾ೦ ಸ೦ಬ೦ದಿತ್ ಖುಣ್ ಉದೆಲಾ೦ ತಶೆ೦ ದಿಸ್ತಾ ತೆ೦ ಖರೆ೦. ಪುಣ್ ಹೆ೦ ನೆಕೆತ್ರಾ೦ಚೆ೦ ಕಮಾಲ್
ನ್ಹಂಯ್ ಪುಣ್ ಶುಕ್ರ್ಗಿರೊ ಆನಿ ಬ್ರಹಸ್ಪತಿಗಿರೊ ತಾ೦ಚೆ ಕಕ್ಶೆ೦ಕ್ ಲಾಗೊನ್ ಯೆಕಾಮೆಕಾ ಆದಾಳ್ಚೆಪರಿ೦ ದಿಸ್ತಾತ್, ಎಕ್
ಜಾವ್ನ್ ದಿಸ್ತಾತ್ ಆನಿ ತಾ೦ಚೊ ಪ್ರಕಾಸ್ ಯೆಕಾ ರಿತಿಚಿ ಲಾ೦ಬ್ಶಿ, ಶಿಮ್ಟೇತಸಲಿ ಪ್ರಬಾವಳ್, ಉದೆಶಿ ಕರ್ತಾ.”
“ತರ್ ಹೆ೦ಚ್ ತೆ೦ ಖುಣ್ ಜಾವ್ಯೆತ್? ಮ್ಹಾಕಾ ಕಿತ್ಯಾಕ್ ತುಮಿ೦ ಸಾ೦ಗೊ೦ಕ್ ನಾ? ಮ್ಹಜೆ ಪರ್ಜೆಕ್ ಕಿತ್ಯಾಕ್ ತೆ೦ ದಿಸ್ಲೆ೦ ನಾ?”
“ಹೆ೦ ಖುಣ್ ಸಾಮಾನ್ಯಾ೦ಚ್ಯಾ ದೊಳ್ಯಾ೦ಕ್ ದಿಸಾನಾ, ಮ್ಹಜ್ಯಾ ರಾಯಾ.”
“ತರ್ ತೆ ತೇಗ್ ಅಸಾದಾರಣ್ ಮ್ಹಣ್ ಜಾಲೆ!” ತೊ ಆಪ್ಲ್ಯಾ ಪುತಾ೦ಕ್ ಪಳೆಲಾಗ್ಲೊ. “ತೆ ಕಾ೦ಯ್ ಸಯ್ನ್ ಹಾಡುನ್ ಯೆ೦ವ್ಕ್ನಾ೦ತ್ಮೂ?”
“ನಾ ಬಾಪಾ, ರಾಯಾ!” ತಾಣಿ ಸಾ೦ಗಾತಾಚ್ ಜಾಪ್ ದಿಲಿ. “ತೆ ಥಕ್ಲ್ಯಾತ್...”
“ತಾ೦ಚ್ಯಾ ಸುಶೆಗಾಚಿ ವಿಲೆವಾರಿ ಕರಾ!” ತಾಣೆ ದಿಮಿತ್ರಿಕ್ ಪಳೆಲೆ೦. “ಅರೆ! ತು೦ ಕಿತೆ೦ ದಿ೦ಬಿಯೆರ್ ಆಸಾಯ್ ದಿಮಿತ್ರಿ? � ಭಾಸಾಯಿಲ್ಲ್ಯಾ ಸೊಡ್ವಣ್ದಾರಾಕ್ ರಾಕೊನ್ ಆಸಾಯ್? ಅಸಲಿ೦ ಕಿತ್ಲಿಶಿ೦ ಬೊಲ್ಮಿ೦ ಹಾ೦ವೆ೦ ಆಯ್ಕಾಲ್ಯಾ೦ತ್. ತರಿಪುಣ್ ಹ್ಯೆ ಪಾವ್ಟಿ೦ ಆಮಿ೦ ಚತ್ರಾಯೆನ್
ಆಸಾಜೆ. ಊಟ್, ಆನಿ ತ್ಯಾ ತೆಗಾ೦ಕ್ ಸರ್ಬಾರಾಯ್ ಕರ್ತೆಚ್ ಹಾ೦ಗಾಸರ್ ಹಾಡ್. ಆನಿ ತುಮಿ೦,” ತೊ ಮ್ಹಣಾಲೊ ಆಪ್ಲ್ಯಾ ಪುತಾ೦ಕ್ ಪಳೆವ್ನ್. “ತುಮ್ಕಾ೦ ಕಿತ್ಲೆ ಪಾತಿಯೆತ್ ಮ್ಹಣ್ ಹಾ೦ವ್ ನೆಣಾ೦ ತರಿ ಪುಣ್ ಹಾ೦ಗಾಸರ್ಚ್ ರಾವಾ.”
ವಿಶೆವ್ ಘೆ೦ವ್ಚೆಖಾತಿರ್ ಹೆರೊದಿನ್ ಆಪ್ಲಿ ಪಾಟ್ ಹಾ೦ತುಳ್ಣಾಕ್ ತೆ೦ಕ್ಲಿ ಆನಿ ಕಸಲ್ಯಾಗಿ ಯೆಕೆ ಭ್ರಮಿದೆ೦ತ್ ರಿಗ್ಲೊ. ಕಿತ್ಲ್ಯಾ ವೆಳಾ ಉಪ್ರಾ೦ತ್ ಮ್ಹಣ್ ತೊ ನೆಣಾ೦, ದಿಮಿತ್ರಿನ್ ತಾಕಾ ಹಳ್ವಾಯೆನ್ ದೊ೦ಕುಳ್ನ್ ಉಟ್ಯ್ತಾನಾ ತೊ ಆಕಾ೦ತಾನ್
ಜಾಗೊ ಜಾಲೊ.
“ಉದೆ೦ತಿಚೆ ಜಾ೦ಟೆ ತುಮ್ಚ್ಯಾ ಸಾಮ್ಕಾರ್ ಆಸಾತ್, ಮ್ಹಜ್ಯಾ ರಾಯಾ!” ದಿಮಿತ್ರಿನ್ ತಾಕಾ ಕಳಯ್ಲೆ೦.
ಆಸ್ಡ್ಯೊ ಫಾಪಡ್ನ್ ಹೆರೊದಿನ್ ತಾ೦ಚೆರ್ ದೀಶ್ಟ್ ಗಾಲಿ. ದಿ೦ಬಿಯೆರ್ ತೆ ಆಸ್ಲ್ಲೆ; ತಾ೦ಚ್ಯಾ ದಿರುಸಾ೦ತ್ ತೆ ರಾಯಾಳ್ ದಿಸ್ತಾಲೆ.
“ತುಕಾ ಹ್ಯೆ ಸ್ಥಿತಿಯೆರ್ ಪಳೆ೦ವ್ಕ್ ಆಮಿ೦ ದೂಕ್ ಪಾವ್ತಾ೦ವ್, ಹೆರೊದ್ ರಾಯಾ!” ತಾ೦ಚೆಪಯ್ಕಿ ಎಕ್ಲೊ ಮ್ಹಣಾಲೊ. “ಹಾ೦ವ್ ಗಾಸ್ಪಾರ್.”
“ಹಾ೦ವ್ ಮೆಲ್ಕಿಯೊರ್,” ದುಸ್ರ್ಯಾನ್ ತಾಕಾ ಮಾನ್ ಭಾಗಾಯ್ಲೊ.
“ಆನಿ ಹಾ೦ವ್ ಬಾಲ್ತಾಜಾರ್.” ತಿಸ್ರ್ಯಾನ್ ಕಳಯ್ಲೆ೦.
“ಉದೆ೦ತಿಥಾವ್ನ್ ಆಯ್ಲ್ಯಾತ್?” ಹೆರೊದಿಚೊ ತಾಳೊ ಕಾ೦ಪ್ತಾಲೊ. “ಪರ್ಶಿಯಾ ಆನಿ ಮೆಸೊಪೊಟೇಮಿಯಾ. ಲಾ೦ಬ್
ಪಯ್ಣ್ ನ್ಹಂಯ್?”
“ವ್ಹಯ್ ಹೆರೊದ್ ರಾಯಾ. ತೀಸ್ ದೀಸ್ ಆನಿ ತೀಸ್ ರಾತಿ ಆಮ್ಕಾ೦
ಜಾಯ್ ಪಡ್ಲ್ಯೊ. ತೆ೦ ನೆಕೆತ್ರ್ ದಿಸ್ಲ್ಲ್ಯಾಚ್ ದಿಸಾ ಆಮಿ೦ ಪಯ್ಣ್ ಧರ್ಲೆ೦.....”
“ಉಟಾ ಆನಿ ತುಮ್ಚಿ ಬಸ್ಕಾ ಗೆಯಾ,” ಮ್ಹಣಾಲೊ ಹೆರೊದ್. “ವಾಯ್ನ್ ಸೆವಾ ಆನಿ
ಜೆವಣ್ ಕರ್ತೆಚ್ ರಾವಾ ಪುಣ್ ಸುಡಾಳಾಯೆನ್ ಉಲಯಾ.”
ಉದೆ೦ತಿಚ್ಯಾ ಜಾ೦ಟ್ಯಾ೦ನಿ ತಶೆ೦ಚ್ ಕೆಲೆ೦. ತಾ೦ಚ್ಯಾ ತಬಕಾ೦ನಿ ಊ೦ಚಿ ಮಾಸ್ ಆನಿ ಗೊಬ್ಳ್ಯಾ೦ನಿ ಪರಿಪಕ್ವ್ ವಾಯ್ನ್. ಪೋಟ್ ಬರ್ತಾನಾ, ವಾಯ್ನ್ ಚಡ್ತಾನಾ
ಜೀಬ್ ಸದಿಳ್ ಜಾತೆಲಿ ಅಶಿ ಪಾತಿಯೆಣಿ ಹೆರೊದಿಚಿ.
“ಹಾ೦ ತರ್,” ತೊ ಮ್ಹಣಾಲೊ. “ನೆಕೆತ್ರ್ ಪಳೆಲ್ಲ್ಯಾಚ್ ದಿಸಾ ತುಮಿ೦ ಭಾಯ್ರ್ ಸರ್ಲ್ಯಾತ್ ಮ್ಹಣ್ತಾನಾ ತುಮ್ಚ್ಯಾ ಸೊಡ್ವಣ್ದಾರಾಕ್ ತೀಸ್ ದೀಸ್ ಉತರ್ಲೆ ಮ್ಹಣ್
ಜಾಲೆ?”
“ತೊ ಆಮ್ಚೊ ಮಾತ್ರ್ ನ್ಹಂಯ್, ಸಗ್ಳ್ಯಾ ಸ೦ಸಾರಾಚೊ ಸೊಡ್ವಣ್ದಾರ್!” ಬಾಲ್ತಾಜಾರ್ ಮ್ಹಣಾಲೊ.
“ತರ್ ವ್ಹಡ್ ಎಕ್ ಸಯ್ನ್ ಆಸ್ತೆಲೆ೦ ತಾಚೆಲಾಗಿ೦?” ಹೆರೊದಿನ್ ಆಪ್ಲ್ಯಾ ಪುತಾ೦ಚೆರ್ ದೀಶ್ಟ್ ಗಾಲಿ.
“ತಾಕಾ ಸಯ್ನಾಚಿ ಕಿತೆ೦ ಗರ್ಜ್?” ದೊಳೆ ಉಬಾರೋನ್ ಮ್ಹಣಾಲೊ ಗಾಸ್ಪಾರ್. “ತಾಚೆ೦
ರಾಜ್ ಹ್ಯಾ ಸ೦ಸಾರಾಚೆ೦ ನ್ಹಂಯ್...”
“ತರ್ ಕಸಲೆ೦ ರಾಜ್, ಕಸಲಿ ಸೊಡ್ವಣ್?”
“ತೆ೦ ತೊಚ್ಚ್ ಆಮ್ಕಾ೦ ಶಿಕಯ್ತೊಲೊ,” ಮ್ಹಣಾಲೊ ಮೆಲ್ಕಿಯೊರ್. “ಖ೦ಡಿತ್, ಹೆರೊದ್ ರಾಯಾ, ಹೊ ಸೊಡ್ವಣ್ದಾರ್ ಖ೦ಯ್ಸರ್
ಜಲ್ಮಾಲಾ ಮ್ಹಳ್ಳಿ ನಖ್ಖಿ ಖಬರ್ ತುಕಾ ಆಸ್ತೆಲಿ?”
“ಖಬರ್? ಹಾ೦...ವ್ಹಯ್...ನಾ....ಮ್ಹಾಕಾ ಲಾಗು ಜಾಯ್ನಾತ್ಲ್ಲ್ಯೊ ಸ೦ಗ್ತಿ, ಚಿಲ್ಲರ್ ಸ೦ಗ್ತಿ...ಮ್ಹಜೆ ಹೆ ಪುತ್ ಪಳೆವ್ನ್
ಘೆತಾತ್.....” ತೊ ಅ೦ತಿಪಾತರಾಕ್ ಪಳೆಲಾಗ್ಲೊ. “ತುಮಿ೦ ಕಾ೦ಯ್ ಖಬರ್ ಆಯ್ಕಾಲ್ಯಾ ಯಾ ನೆಕೆತ್ರ್ಬಿ ಪಳೆಲಾ೦?”
“ತುಮ್ಕಾ೦ ಚಿಲ್ಲರ್ ದಿಸ್ಚ್ಯೊ ಸ೦ಗ್ತಿ ಆಮ್ಕಾ೦ಯ್ ತಶೊಚ್ ದಿಸ್ತಾತ್ ಬಾಪಾ ರಾಯಾ!” ಅ೦ತಿಪಾತರ್ ರಾಗಾನ್ ಮ್ಹಣಾಲೊ. “ಫುಡೆ೦ ಹೆ೦
ಜುದೇಯಾ ಚಲ೦ವ್ಕ್ ಆಮ್ಕಾ೦ ಆಸಾ, ನೆಕೆತ್ರಾ೦ ಪಳೆವ್ನ್, ಬೊಲ್ಮಿ೦ ಆಯ್ಕೊನ್ ಪಾಡ್ ಕರು೦ಕ್ ವೇಳ್ ಆಮ್ಚೆಲಾಗಿ೦ ನಾ.”
� ಸಾರ್ಕೆ೦!” ಫಟ್ಕಿರ್ಯಾ ಅಬಿಮಾನಾನ್ ಮ್ಹಣಾಲೊ ಹೆರೊದ್. “ತುಮಿ೦ಚ್ ಹ್ಯಾ ಸೊಡ್ವಣ್ದಾರಾಕ್ ಸೊದಿಜೆ ಪಡ್ತೆಲೆ೦. ಪುಣ್ ಮ್ಹಾಕಾ ಖಬರ್ ದಿಯಾ ಹಾ೦; ಮ್ಹಾಕಾ ತಾಕಾ ನಮಾನ್ ಕರು೦ಕ್
ಜಾಯ್, ತಾಕಾ ಕಸಲ್ಯಾಚಿಯ್ ಗರ್ಜ್ ಆಸಾ ತರ್....”
“ಆಮಿ೦ ತಾಕಾ ಸೊದುನ್ ಕಾಡ್ತಾ೦ವ್!” ತೆ ಎಕಾ ತಾಳ್ಯಾನ್ ಮ್ಹಣಾಲೆ.
“ಜಾಯ್ ತರ್ ಹಾ೦ವ್ ತಾ೦ಚಿ ಮಜತ್ ಕರು೦ಕ್ ತಯಾರ್ ಆಸಾ೦, ರಾಯಾ!” ಎಕಾಚಾಣೆ ಮ್ಹಣಾಲೊ ದಿಮಿತಿ. “ಕಶೆಯಿ ತುಕಾ ಖಬರ್ ದೀ೦ವ್ಕ್ ಆಸಾ
ನ್ಹಂಯ್?”
ಹೆರೊದಿನ್ ಚಿ೦ತ್ಲೆ೦, ಮಾತೆ೦ ಹಾಲಯ್ಲೆ೦.
ಎಕ್ ವಿಚಿತ್ರ್ ಹಾಸೊ ತಾಚ್ಯಾ ಮುಕಮಳಾರ್ ಉದೆಲೊ.
“ಖಬರ್ ಮ್ಹಾಕಾ ಜಾಯ್,” ತೊ ಮ್ಹಣಾಲೊ ಗೊಮ್ಟಿ ಆಡ್ ಗಾಲುನ್. “ಖಬರ್ ಮ್ಹಾಕಾ
ಜಾಯ್ಚ್ಚ್. ಬರೆ೦, ಹೊ ಮ್ಹಜೊ ಖಾಸ್ಕಿ ಚಾಕೊರ್, ಗ್ರೇಕ್ ಮನಿಸ್, ದಿಮಿತ್ರಿ ತುಮ್ಕಾ೦ ಸಾ೦ಗಾತ್ ಆನಿ ಮಜತ್ ದಿತೊಲೊ. ಹಾ೦, ಹೊ ಬರೊ
ಝುಜಾರಿ, ಧಯ್ರಾದಿಕ್ ಆನಿ ಚಲಾಕ್ವ೦ತ್....”
“ದಿಮಿತ್ರಿಚ್ಯಾ ಸಾ೦ಗಾತಾಕ್ ಆಮಿ೦ ಸ್ವಾಗತ್ ಮ್ಹಣ್ತಾ೦ವ್ ಆನಿ ತುಕಾ ಧನ್ಯ್ವಾದ್ ದಿತಾ೦ವ್, ಹೆರೊದ್ ರಾಯಾ,” ಮ್ಹಣಾಲೊ ಗಾಸ್ಪಾರ್. “ಪುಣ್ ದಿಮಿತ್ರಿಚ್ಯಾ ತ್ರಾಣಾಚಿ,
ಝುಜಾ-ಕುಶಲತೆ೦ಚಿ ಗರ್ಜ್ ಆಮ್ಕಾ೦ ಪಡ್ಚಿ ನಾ ಮ್ಹಳ್ಳೆ೦ ಖಚಿತ್.
ಜಲ್ಮಾಲ್ಲೊ ಸೊಡ್ವಣ್ದಾರ್ ಕಾ೦ಯ್ ಸ೦ಸಾರಿ ಮನಿಸ್ ನ್ಹಂಯ್, ಸ೦ಸಾರಿ
ಝುಜಾರಿ ನ್ಹಂಯ್.”
“ಆತಾ೦ ನ್ಹಂಯ್!” ಮ್ಹಣಾಲೊ ಹೆರೊದ್ ದುಬಾವಾನ್ಶೆ೦.
“ಪುಣ್ ತೊ ವ್ಹಡ್ ಜಾತಾನಾ, ಸಯ್ನ್ ಬಾ೦ದ್ತಾನಾ....”
ಉದೆ೦ತಿಚೆ ತೇಗ್ ಜಾ೦ಟೆ ಫಕತ್ ಹಾಸ್ಲೆ ಆನಿ ಜೆವಣ್ ಕರಿಲಾಗ್ಲೆ.
ಆಪ್ಣಾಖಾತಿರ್ ಎಕ್ ಘೊಡೊ ಆನಿ ತೆಗಾ೦
ಜಾ೦ಟ್ಯಾ೦ಖಾತಿರ್ ತೀನ್ ಖೆ೦ಚರಾ೦ (ಗಾಡ್ವಾ೦) ತಯಾರ್ ಕರ್ತಾ೦ ಮ್ಹಣ್ ಕಳವ್ನ್ ದಿಮಿತ್ರಿ ಭಾಯ್ರ್ ಗೆಲೊ;
ಜಟಾಪಟ್ ಜೆವಣ್ ಕರುನ್ ತೆ ಜಾ೦ಟೆಯ್ ವಚು೦ಕ್ ತಯಾರ್
ಜಾಲೆ.
“ಹಾ೦ಗಾಸರ್ ತುಜೆ ಸರ್ಬಾರಾಯೆ೦ತ್ ರಾವೊನ್ ವಿಶೆವ್
ಘೆ೦ವ್ಚಿ ಜಬ್ಬೊರ್ ಆಶಾ ಆಮ್ಕಾ೦ ನಾಡ್ತಾ, ಹೆರೊದ್ ರಾಯಾ,” ಮ್ಹಣಾಲೊ ಮೆಲ್ಕಿಯೊರ್. “ಪುಣ್ ಕಿತೆ೦ ಕರ್ಯಾ೦? ತೆವ್ಶಿಲ್ಯಾನ್ ಸ೦ಸಾರಾಚೊ
ತಾರೊಕ್ಯ್ ಆಮ್ಕಾ೦ ರಾಕ್ತಾ. ತಾಚ್ಯಾ ಜಲ್ಮಾಚಿ ಬರಿ ಖಬರ್ ಆಮಿ೦ ಸ೦ಸಾರಾಕ್ ಕಳಯ್ಜೆಚ್ಚ್.”
“ತಾರೊಕ್...ಹಾ೦..ಸೊಡ್ವಣ್ದಾರ್...ಮ್ಹಾಕಾಯ್ ತಾಚಿ ನಖ್ಖಿ ಖಬರ್ ದಿಯಾ ಹಾ೦!” ಗಾಗೆವ್ನ್ಶೆ೦ ಪರ್ತ್ಯಾನ್ ಮ್ಹಣಾಲೊ ಹೆರೊದ್. “ಆತಾ೦ ವಚಾ....”
ತೆ ಭಾಯ್ರ್ ವೆತೆಚ್ ಆಪ್ಲ್ಯಾ ಪುತಾ೦ಕ್ ಪಳೆವ್ನ್ ಹೆರೊದ್ ಮ್ಹಣಾಲೊ. “ಕಿತೆ೦ ಆಮ್ಚೊ ದಿಮಿತ್ರಿ ಯೆಕಾಚಾಣೆ
ಜಿವಾಳ್ಳೆಲ್ಯಾಪರಿ೦ ದಿಸ್ತಾ?” ಹ್ಯಾ ಸವಾಲಾಕ್ ತಾಣಿ ಜಾಪ್ ದೀ೦ವ್ಕ್ನಾ ತೆ೦ ಪಳೆವ್ನ್ ತಾಣೆ ಅಲ್ಸೆ೦ದ್ರ್ ಆನಿ ಆರಿಸ್ಟೊಬುಲುಸಾಲಾಗಿ೦ ವಿಚಾರ್ಲೆ೦. “ಮ್ಹಜ್ಯಾ ಪುತಾ೦ ಪಯ್ಕಿ ತುಮಿ೦ ಭಾರಿಚ್ ಲೊಕಾಮೊಗಾಳ್
ನ್ಹಂಯ್? ಮ್ಹಜಿ ಪ್ರಜಾ ತುಮ್ಕಾ೦ ಆರಾಧನ್ ಕರ್ತಾ ಆನಿ ಎಕಾ ದಿಸಾ ತುಮಿ೦
ಜುದೇಯಾಚೆ ರಾಯ್ ಜಾತೆಲೆ ಮ್ಹಣ್ ಭರ್ವಸ್ತಾ. ಸಾಮಾನ್ಯಾ೦ಕ್ ತುಮಿ೦ ಒಳ್ಕಾತಾತ್
ಜಾಲ್ಲ್ಯಾನ್ ಹ್ಯಾ ದಿಮಿತ್ರಿಚಿ ಸಾಮಾನ್ಯ್ ಮೋತ್ ಕಶಿ ಕಾಮ್ ಕರ್ತಾ ಮ್ಹಣ್ಯ್ ತುಮ್ಕಾ೦ ಕಳಿತ್ ಆಸ್ತೆಲೆ೦?”
“ಆಮಿ೦ ತಾಚೆರ್ ದೊಳೆ ದವರ್ತಾ೦ವ್!” ತೆ ಮ್ಹಣಾಲೆ, ಹೆರೊದಿಚೆ ವಿರಾರಾಯೆಥಾವ್ನ್ ಸುಟೊ೦ಕ್. “ತುಮ್ಕಾ೦ ಎಕ್ ತತ್ಕಾಲಿಕ್ ಅ೦ಗ್ರಕ್ಶಕ್ ಧಾಡ್ತಾ೦ವ್; ವಯ್ಜ್ ಹಾ೦ಗಾಸರ್ಚ್ಚ್ ಆಸ್ತೊಲೊ. ಆತಾ೦ ತು೦ ವಿಶೆವ್ ಘೆ.”
ಅಶೆ೦ ಮ್ಹಣೊನ್ ಹೆರೊದಿಚೆ ತೇಗ್ ಪುತ್ ಭಾಯ್ರ್ ಗೆಲೆ.
ರೊಮನ್ ಸಯ್ನಿಕಾಚ್ಯಾ ಪರಿಪೂರ್ಣ್ ನೆಸ್ಣಾರ್ ಆಸ್ಲ್ಲ್ಯಾ ದಿಮಿತ್ರಿಕ್ ಪಳೆವ್ನ್ ತ್ಯಾ ತೆಗಾ೦
ಜಾ೦ಟ್ಯಾ೦ಕ್ ವಿಸ್ಮಿತ್ ಜಾಲೆ೦. “ಮೊಗಾಚ್ಯಾ ದಿಮಿತ್ರಿ,” ತೆ ಮ್ಹಣಾಲೆ. “ಆಮಿ೦ ಕಾ೦ಯ್
ಝುಜಾಚೆ ತಯಾರಾಯೆರ್ ಆಸಾ೦ವ್?”
“ತುಮಿ೦ ಹೆರೊದಿಚ್ಯಾ ಜುದೇಯಾ೦ತ್ ಆಸಾತ್!” ತಾಣೆ ಜಾಪ್ ದಿಲಿ ಆಪ್ಲ್ಯಾ ಮಜ್ಬೂತ್ ಘೊಡ್ಯಾಚೆರ್ ಸವಾರ್
ಜಾವ್ನ್. “ಆಮ್ಚೊ ಸೊಡ್ವಣ್ದಾರ್ ಹ್ಯಾ ಜುದೇಯಾ೦ತ್ ಕಿತ್ಲ್ಯಾ ಆನಿ ಕಸಲ್ಯಾ ಅಪಾಯಾ೦ತ್ ಆಸಾ ಮ್ಹಣ್ ಹಾ೦ವ್
ಜಾಣಾ೦.”
“ತು೦ ಜಾಣಾ೦ಯ್!?” ಉದ್ಗಾರ್ಲೊ ಗಾಸ್ಪಾರ್. “ಪುಣ್ ತು೦ ಎಕ್ ಗ್ರೇಕ್ ಗುಲಾಮ್...”
“ವ್ಹಯ್! ಪುಣ್ ಹಾ೦ವ್ ಶಿಕ್ಪಿ. ಗುಲಾಮ್ಪಣಾ೦ತ್ಯ್ ಆಸ್ಲ್ಲ್ಯಾ ಸ್ವತ೦ತ್ರಾಯೆಕ್ ಲಾಗೊನ್ ಹಾ೦ವ್ ಶಿಕ್ಪಿ
ಜಾಲಾ೦. ಪವಿತ್ ಲಿಕಿತಾ೦ ವಾಚುನ್ ಸಮ್ಜಾಲ್ಲ್ಯಾ ಖಿಣಾಥಾವ್ನ್ ಹಾ೦ವ್ಯ್ ಭಾಸಾಯಿಲ್ಲ್ಯಾ ಸೊಡ್ವಣ್ದಾರಾಕ್ ರಾಕೊನ್ ಆಸಾ೦....”
ತೆ ತೇಗ್ ಯೆಕಾಮೆಕಾಚಿ೦ ಮುಕಮಳಾ೦ ಪಳೆಲಾಗ್ಲೆ. “ತರ್ ತು೦
ಜಾಣಾ೦ಯ್...ತು೦ ಜಾಣಾ೦ಯ್ ತೊ ಖ೦ಯ್ಸರ್ ಆಸಾ ಮ್ಹಣ್? � ದಿಸ್ಲಾ೦ ತೆ೦ ಶಿಮ್ಟಿನೆಕೆತ್ರ್?”
ದಿಮಿತ್ರಿನ್ ಆಪ್ಲೆ೦ ಮುಕಮಳ್ ಉಬಾರ್ನ್ ಆಗಸಾಕ್ ಪಳೆಲೆ೦.
“ಸುಮಾರ್ ತೀಸ್ ರಾತಿ೦ ಆದಿ೦ ಹಾ೦ವೆ೦ ತೆ೦ ನೆಕೆತ್ರ್ ಪಳೆಲೆ೦,” ತೊ ಮ್ಹಣಾಲೊ. ತಾಚ್ಯಾ ಮುಕಮಳಾರ್ ಉದೆಲ್ಲೊ ಪ್ರಕಾಸ್ ನೆಕೆತ್ರಾ೦ಚ್ಯಾ
ಜಿಳ್ಮಿಳ್ಯಾ ಉಜ್ವಡಾ೦ತ್ ಉಟೊನ್ ದಿಸ್ತಾಲೊ. “ಆನಿ ಬೆತ್ಲೆಹೆಮಾ೦ತ್ ಎಕಾ ಗೊರ್ವಾ೦-ಗೊಟ್ಯಾ೦ತ್ ತಾಕಾ ಹಾ೦ವೆ೦ ಪಳೆಲೊ, ವಸ್ತ್ರಾ೦ನಿ ಗುಟ್ಲಾವ್ನ್ ಆಸ್ಚೊ....”
“ಪುಣ್ ತುವೆ೦ ಹೆರೊದಾಕ್ ಸಾ೦ಗ್ಲೆ೦ನಾ೦ಯ್?”
“ದೆವಾಚಿ೦ ಮಯ್ಮಾ೦ ಮ್ಹಜ್ಯಾ ಚಿ೦ತ್ನಾ೦ಕ್ ಆನಿ ಕರ್ನ್ಯಾ೦ಕ್ ದಿಶಾ ಸಾ೦ಗ್ತಾತ್,” ದಿಮಿತ್ರಿ ಮ್ಹಣಾಲೊ. “ಪಳೆಯಾ, ತೆ೦ ಶಿಮ್ಟಿನೆಕೆತ್ರ್ಯಾ ಆತಾ೦ ದಿಸಾನಾ.”
“ಪುಣ್ ಕಿತ್ಯಾಕ್ ಜಾವ್ಯೆತ್?”
“ಹೆರೊದಿಚ್ಯಾ ರಗ್ತಾ-ತಾನೆಕ್ ಗುಸ್ಪಡಾ೦ವ್ಕ್! ದೆಕುನ್೦ಚ್ ಹಾ೦ವ್ ತುಮ್ಚೆ ಸಾ೦ಗಾತಾ ಆಸಾ೦ ಕಿತ್ಯಾಕ್ ಹಾ೦ವ್ ಮಾತ್ರ್
ಜಾಣಾ೦ ಸೊಡ್ವಣ್ದಾರ್ ಆನಿ ತಾಚಿ೦ ಆವಯ್-ಬಾಪಯ್ ಖ೦ಯ್ಸ್ರ್ ಆಸಾತ್ ಮ್ಹಣ್.”
ಪರ್ತ್ಯಾನ್ ತ್ಯಾ ತೆಗಾ೦ನಿ ಯೆಕಾಮೆಕಾಚಿ೦ ಮುಕಮಳಾ೦ ಪಳೆಲಿ೦. “ಆಮಿ೦ ತುಕಾ ಪಾತಿಯೆತಾ೦ವ್!” ತೆ ಎಕಾ ತಾಳ್ಯಾ೦ನ್ ಮ್ಹಣಾಲೆ. “ತು೦ಚ್
ಜಾ ಆಮ್ಚೆ೦ ಶಿಮ್ಟಿನೆಕೆತ್ರ್ ಆನಿ ವಾಟ್ ಆಮ್ಕಾ೦ ದಾಕಯ್!” ತೆ ತಾತಾ೦ಚ್ಯಾ ಖೆ೦ಚರಾ೦ಚೆರ್ ಸವಾರ್
ಜಾಲೆ.
ತ್ಯೆ ರಾತಿಚೆ ಶೀತಳಾಯೆ೦ತ್ ಸುಮಾರ್ ತೀನ್ ಘ೦ಟ್ಯಾ೦ಚಿ ಸವಾರಿ ಕರುನ್ ತೆ ಎಕೆ ಸುವಾತೆರ್ ಪಾವ್ಲೆ. ದಿಮಿತ್ರಿ, ಆಪ್ಲ್ಯಾ ಘೊಡ್ಯಾ ವಯ್ಲೊ ದೆ೦ವ್ಲೊ ಆನಿ ಆಪ್ಲೆ ಕೋಶಿಯೆ೦ತ್ಲಿ ತಲ್ವಾರ್ ಭಾಯ್ರ್ ಕಾಡುನ್ ಸಾಮ್ಕಾರ್ ಆಸ್ಚ್ಯಾ ಥಪ್ಕಟಾಯೆ೦ತ್ ನಿದುನ್ ಆಸ್ಚ್ಯಾ ಲ್ಹಾನ್ ಎಕಾ ಫಾಲ್ಕ್ಯಾಕ್ ದಾಕವ್ನ್ ಮ್ಹಣಾಲೊ. “ಪಳೆಯಾ ಬೆತ್ಲೆಹೆಮ್!” ಉಪ್ರಾ೦ತ್ ತಾಣೆ ಆಪ್ಲಿ ತಲ್ವಾರ್ ಹರ್ಧ್ಯಾಚೆರ್ ಆಡ್ವಿ ಧರುನ್ ದಿ೦ಭಿ ಘಾಲಿ. “ಥ೦ಯ್ಸರ್ ಆಸಾ ಆಮ್ಚೊ ಸೊಡ್ವಣ್ದಾರ್.”
ಹೆ೦ ಪಳೆವ್ನ್ ತ್ಯಾ ತೆಗಾ೦ನಿಯ್ ತಶೆ೦ಚ್ ಕೆಲೆ೦. “ಆಮ್ಕಾ೦ ಥ೦ಯ್ಸರ್ ವ್ಹರಿನಾ೦ಯ್?”
“ವರ್ತಾ೦ ಪುಣ್ ತ್ಯಾ ಫುಡೆ೦ ಆಮ್ಚಿ೦ ಅ೦ತಸ್ಕರ್ನಾ೦ ನಿತಳ್ ಕರ್ಚೆಖಾತಿರ್ ಹೊ ಭೆಟೊಳ್ ಆಮಿ೦
ಘೆವ್ಯಾ೦!”
ತಾ೦ಚೆ೦ ಧ್ಯಾನ್ ಆಕೇರ್ ಜಾತಾನಾ ಎಕ್ ವಿಚಿತ್ರ್ ಥ೦ಯ್ಸರ್ ಘಡ್ಲೆ೦: ಯೆದೊಳ್ ಲಿಪೊನ್ ಆಸ್ಲ್ಲೆ೦ ತೆ೦ ಶಿಮ್ಟಿನೆಕೆತ್ರ್ ಪರತ್ ಆಗಸಾರ್ ಉದೆಲ್ಲೆ೦.
“ಮಯ್ಮಾ ದೆವಾಕ್!” ತೆ ಉದ್ಗಾರ್ಲೆ. “ದಯ್ವಿಕ್ ನಿಶಾನಿ ಪರತ್ ಉದೆಲ್ಯಾ. ಖ೦ಡಿತ್
ಜಾವ್ನ್ ದಿಮಿತ್ರಿ....ಹೆ೦ ತುಜೆ೦ ನೆಕೆತ್ರ್, ತುಜ್ಯಾ ಭಾವಾರ್ಥಾಚೆ೦ ನೆಕೆತ್ರ್.....”
“ಆನಿ ತುಮ್ಚ್ಯಾಯ್!” ತೊ ಮ್ಹಣಾಲೊ. “ಕತಾ ಆಸಾ, ಪುಣ್
ಮಟ್ವಿ. ಆಯ್ಕಾ...ತ್ಯೆ ಪವಿತ್ ರಾತಿ೦ ಮ್ಹಜ್ಯಾ ಕುಡಿ೦ತ್ ಕಸಲೆಗಿ ಆಟಾವಿಟೆ
ಜಾತಾಲೆ ಆನಿ ಹೆರೊದಿಚಿ ಪರ್ವಣ್ಗಿ
ಘೆವುನ್ ಹಾ೦ವ್ ಹಿ ಲಾ೦ಬ್ ಸವಾರಿ ಕರುನ್ ಬೆತ್ಲೆಹೆಮಾ೦ತ್ ಆಸ್ಚ್ಯಾ ಮ್ಹಜ್ಯಾ ಬಿಡಾರಾಕ್ ಆಯ್ಲೊ೦.
ರೊಮಾಚ್ಯಾ ಚಕ್ರವರ್ತಿ ಆವ್ಗುಸ್ತ್ ಸೆಜಾರಾನ್ ಕಾನೆಶುಮಾರಾಚಿ ಹುಕುಮ್ ಹಾಡ್ಲ್ಲ್ಯಾನ್
ಜುದೇಯಾ೦ತ್ ಸಾಸಾ೦ವ್ ಗಾಲು೦ಕ್ ಇಡೆ೦ನಾತ್ಲ್ಲೆ೦. ಸರ್ವ್ ಛತ್ರಾ೦ ಭರ್ಲ್ಲಿ೦ ಆನಿ ತಾತಾ೦ಚೆ ನಾ೦ವ್ ದಾಕಲ್ ಕರು೦ಕ್ ಆಯಿಲ್ಲಿ೦ ಹರ್ಯೆಕಾ ಸಾ೦ದಿಮುಲ್ಯಾ೦ತ್ ಆಸ್ರೊ
ಘೆತಾಲಿ೦.
“ತ್ಯೆ ರಾತಿ೦ ಮ್ಹಾಕಾ ನೀದ್ ಪಡ್ಲಿ ನಾ. ರಾತಿಚೊ ತಿಸ್ರೊ ಪಾರ್
ಜಾತಾನಾ ಹಾ೦ವ್ ಭಾಯ್ರ್ ಆಯ್ಲೊ೦ ಆನಿ ಪ್ರಶಾ೦ತ್ ವ್ಹಾರೆ ಸೆವ್ತೆಚ್ ಭ೦ವ್ತಿ೦ ಪಳೆತಾನಾ ಎಕ್ ವಿಚಿತ್ರ್ ಪ್ರಕಾಸ್ ಪರಿಸರಾ೦ತ್ ಫಯ್ಲಾಲ್ಲೊ ಮ್ಹಾಕಾ ದಿಸ್ಲೊ; ಹ್ಯಾ ಬೆತ್ಲೆಹೆಮಾಚೆ ನಿವಾಸಿ ಬೊಕ್ರ್ಯಾ೦ಕ್ ಚರ೦ವ್ಚೆ ಗೊವ್ಳಿ, ಸಾದೆ-ಬೊಳೆ. ತಾ೦ಚ್ಯಾ ದುಬ್ಳ್ಯಾ ಬಿಡಾರಾ೦ಥಾವ್ನ್ ಅಸಲೊ ಪ್ರಕಾಶ್ ಯೆ೦ವ್ಕ್ ಸಾದ್ಯ್ ನಾ. ಹಾ೦ವೆ೦ ಆಗಸಾಕ್ ಪಳೆಲೆ೦ ಆನಿ ಮ್ಹಾಕಾ ದಿಸ್ಲೆ೦ ತೆ೦ ನೆಕೆತ್ರ್, ಶಿಮ್ಟಿನೆಕೆತ್ರ್. ತ್ಯೆ ಶಿಮ್ಟೆಚೆ೦ ಸಕಯ್ಲೆ೦ ಪೋ೦ತ್ ಭುಮಿಕ್ ತೆ೦ಕ್ಲ್ಲೆಪರಿ೦ ದಿಸ್ತಾಲೆ೦ ಆನಿ ಹಾ೦ವೆ೦ ಪಳೆಲೆ೦ಕಿ ಗೊವ್ಳ್ಯಾ೦ಚೊ ಎಕ್
ಜಮೊ, ತಾ೦ಚೊ ಆನಿ ತಾ೦ಚ್ಯಾ ಬೊಕ್ರ್ಯಾ೦ಚೊ ವಿಶೆವ್ ಭ೦ಗ್ ಕರುನ್ ನೆಕೆತ್ರಾಚೆ ಶಿಮ್ಟೆನ್ ಭುಮಿಕ್ ತೆ೦ಕ್ಲ್ಲೆಪರಿ ದಿಸ್ಚ್ಯೆ ಸುವಾತಿಕುಶಿ೦ ಮೆಟಾ೦ ಕಾಡ್ತಾಲೆ.
“ಹಾ೦ವೆ೦ಯ್ ತಾ೦ಚೊ ಪಾಟ್ಲಾವ್ ಕೆಲೊ; ಕಸಲ್ಯಾಗಿ ಸಕ್ತೆನ್ ಮ್ಹಾಕಾ ಥ೦ಯ್ಸರ್ ವೋಡ್ನ್ ವೆಲೊ ಆನಿ ಹಾ೦ವೆ೦ ಪಳೆಲೆ೦ಕಿ ತೊ ಪ್ರಕಾಸ್ ಎಕಾ ಗೊಟ್ಯಾಚೆರ್ ಪಡೊನ್ ರಾವ್ಲಾ. ಆನಿ ತವಳ್ ಮ್ಹಾಕಾ ಆಯ್ಕಾಲೆ೦ ತೆ೦ ಎಕ್ ಗಾಯಾನ್: ಅನ೦ದ್ ದೆವಾಕ್ ಅತಿ ಉನ್ನತಿ; ಶಾ೦ತಿ ಬರ್ಯಾ ಮನಾಚ್ಯಾ ಮನ್ಶಾ೦ಕ್ ಸ೦ಸಾರಿ. ಆನಿ ಹಾ೦ವ್ ಸಮ್ಜಾಲೊ೦ಕಿ ಹಿ
ಜಾವ್ನಾಸ್ಲ್ಲಿ ಮ್ಹಣ್ ತಿ ರಾತ್, ರಾತ್ ಮೊಗಾಚಿ, ರಾತ್ ಸೊಡ್ವಣ್ದಾರಾಚಿ.
“ಆನಿ ತ್ಯಾ ಗೊಟ್ಯಾ೦ತ್ ಹಾ೦ವೆ೦ ತಾಕಾ ದೆಕ್ಲೊ, ವಸ್ತ್ರಾ೦ನಿ ಗುಟ್ಲಾಯಿಲ್ಲೊ. ನಾಕಾ ಆಸ್ಲ್ಲಿ ಮ್ಹಾಕಾ ಚಡಿತ್
ರುಜ್ವಾತ್ ಜಾಣಾ೦ ಜಾ೦ವ್ಕ್ ತೊಚ್ಚ್ ಮ್ಹಣ್ ಭಾಸಾಲ್ಲೊ ತಾರೊಕ್---—ತಾಚ್ಯಾ ಮುಕಮಳಾಚೊ ಪ್ರಕಾಸ್ಚ್ಚ್ ಪುರೊ ಆಸ್ಲ್ಲೊ. ಉರ್ಲೆಲಿ ಸಗ್ಳಿ ರಾತ್ ಹಾ೦ವೆ೦ ತಾಚ್ಯಾ ಸನ್ನಿಧಾಯೆ೦ತ್ ಖರ್ಚಿಲಿ. ಕಸಲಿ ಶಾ೦ತಿ, ಕಸಲೆ೦ ಸಮಾಧಾನ್
ಮ್ಹಜೆಥ೦ಯ್ ಉದೆಲೆ೦ ತ್ಯೆ ರಾತಿ೦!” ದಿಮಿತ್ರಿ ಕಸ್ಕಸೋನ್ ರಡ್ಲೊ.
ತೆ ತೇಗ್ ಜಾ೦ಟೆ ಎಕ್ ಪಾವ್ಟಿ೦ ದಿಮಿತ್ರಿಕ್ ಆನಿ ಎಕ್ ಪಾವ್ಟಿ೦ ನೆಕೆತ್ರಾಕ್ ಪಳೆತಾಲೆ.
“ಆತಾ೦ ತಿ೦ ಖ೦ಯ್ ಆಸಾತ್?” ಹೆ೦ ಸವಾಲ್ ವಿಚಾರ್ಲ್ಲ್ಯಾ ಬಾಲ್ತಾಜಾರಾಚೊ ತಾಳೊ ಕಾ೦ಪ್ತಾಲೊ. “ಆಮ್ಕಾ೦ ತು೦ ಥ೦ಯ್ ವರ್ತಾಯ್?”
ಆಪ್ಣಾಕ್ಚ್ಚ್ ಸ್ಥಿಮಿತಾಯೆ೦ತ್ ಹಾಡುನ್ ದಿಮಿತ್ರಿನ್ ಆಪ್ಲಿ ತಲ್ವಾರ್ ಕೋಶಿಯೆ೦ತ್
ಘಾಲಿ. ತಾ೦ಕಾ೦ ಫುಡ್ ಕರುನ್ ತೊ ಮ್ಹಣಾಲೊ:
“ಆತಾ೦ ತಿ೦ ಮ್ಹಜ್ಯಾ ಘರಾ೦ತ್ ಆಸಾತ್!”
ಜಾ೦ಟ್ಯಾ೦ಚ್ಯಾ ಮುಕಾ೦ಮಳಾರ್ ಥಟಕಣ್ಯೊ ಉದೆಲ್ಯೊ. “ತುಜ್ಯಾ ಘರಾ೦ತ್?” ತೆ ಎಕಾ ತಾಳ್ಯಾನ್ ಹಾ೦ಕ್ರೆಲೆ.
“ವ್ಹಯ್! ಹಾ೦ವ್ ಯೆಕ್ಸುರೊ, ನಾ ಮ್ಹಾಕಾ ಬಾಯ್ಲ್ ಯಾ ಸಾ೦ಗಾತಿಣ್. ಗೊಟ್ಯಾಚಿ ಉಗ್ತಡ್ ಆನಿ ಹ್ಯಾ ವಿಚಿತ್ರ್ ಖುಣಾ೦ವರ್ವಿ೦ ಕಾ೦ಯ್ ಹೆರೊದಿಕ್
ಜಾಗ್ ಜಾಯ್ತ್ ಮ್ಹಳ್ಳೆ೦ ಭೆ೦ ಮ್ಹಾಕಾ ದೊಶಿಲಾಗ್ಲೆ೦ ಆನಿ ತಿಸ್ರ್ಯಾಚ್ ರಾತಿ೦ ಹಾ೦ವೆ೦ ತಾ೦ಕಾ೦
ಮ್ಹಜ್ಯಾ ಕಾಳ್ಜಾ೦ತ್ ಆನಿ ಬಿಡಾರಾ೦ತ್ ಆಸ್ರೊ ದಿಲೊ.’
“ಭಾಗಿ ಆನಿ ಸುಭಾಗಿ ತು೦, ದಿಮಿತ್ರಿ!” ಮ್ಹಣಾಲೊ ಗಾಸ್ಪಾರ್. “ಚಲ್ಯಾ೦, ವಚುನ್ ತಾಕಾ ಆಮಿ೦ ವ೦ದಿಯಾ೦!”
ಘರಾಭಿತರ್ ಸರ್ತಾನಾ ಬಾಳೊಕ್ ಆಪ್ಲೆ ಆವಯ್ ಮರ್ಯೆಸಾ೦ಗಾತಾ ತಾ೦ಕಾ೦ ಮೆಳ್ಳೊ. ಧರ್ಣಿರ್ ಪಾಯಾ೦ಪಡೊನ್ ತಾಕಾ ಸರ್ಪಡ್ಲೆ ತೆ ಆನಿ ಹಾಡ್ಲ್ಲಿ ಭೆಟ್ ಉಗ್ತಿ ಕರುನ್ ಸೊನೆ೦, ಧು೦ಪ್ ಆನಿ ರಗ್ತಾಬೊಳ್ ತಾಕಾ ಭೆಟಯ್ಲೊ ತಾ೦ಣಿ.(ಮಾತೆವ್
2:11)
ಹೆರೊದ್ ಉಚಾ೦ಬಳ್ ಜಾಲ್ಲೊ.
“ಹಾಚೊ ಅರ್ಥ್ ಕಿತೆ೦?” ತೊ ಬೊಬಾಟ್ಲೊ ಆಪ್ಲ್ಯಾ ಪುತಾ೦ಕ್ ಪಳೆವ್ನ್. “ತೊ ದಿಮಿತ್ರಿ ವಚುನ್ ಸಾತ್ ದೀಸ್ ಆನಿ ಸಾತ್ ರಾತಿ ಉತರ್ಲ್ಯೊ ಪುಣ್ ನಾ ತಾಚಿ ಝಳಕ್ ಆನಿ ನಾ ಝಳಕ್ ತ್ಯಾ ತೆಗಾ೦ಚಿ. ರಾಯ್ ಖ೦ಯ್ ತೆ, ರಾಯ್! ಸೊಡ್ವಣ್ದಾರಾಕ್ ಸೊದುನ್ ಆಯ್ಲ್ಯಾತ್ ಖ೦ಯ್, ಚೋರ್
ದಗಲ್ಬಾಜಿ ಖ೦ಚೆ. ಹೆ೦ಚ್ ಲಿಕ್ಲಾ೦ ತುಮ್ಚ್ಯಾ ಪ್ರವಾದಿ೦ನಿ?” ತೊ ಆತಾ೦ ಪುರ್ವಿತಾ೦ಚೆರ್ ಆನಿ ಶಾಸನ್ ಪ೦ಡಿತಾ೦ಚೆರ್ ಚಿಡ್ಲೊ.
“ಹೆರೊದ್ ರಾಯಾ!” ತೆ ಮ್ಹಣಾಲೆ. “ಜೆ೦ ಲಿಕ್ಲಾ೦, ತೆ೦ ಲಿಕ್ಲಾ೦ ಆನಿ ಲಿಕ್ಲ್ಲೆ೦ ತೆ೦
ಜ್ಯಾರಿ ಜಾತಾ ಮ್ಹಳ್ಳೆ೦ ಖ೦ಡಿತ್. ಆಮಿ೦ ಕಾ೦ಯ್ ಕರು೦ಕ್ ಸಕಾನಾ೦ವ್.”
“ಪುಣ್ ಹಾ೦ವ್ ಕರು೦ಕ್ ಸಕ್ತಾ೦!” ತೊ ಬೊಬಾಟ್ಲೊ, ಪರ್ತ್ಯಾನ್. ತಾಕಾ ಕಠಿಣ್ ಖೊ೦ಕ್ಲಿ ಆಯ್ಲಿ ಆನಿ ತಾಚ್ಯಾ ವಯ್ಜಾನ್ ಉಲ೦ವ್ಕ್ ನಜೊ ಮ್ಹಣ್ ತಾಕಾ ಚತ್ರಾಯ್ ದಿಲಿ. ಪುಣ್ ಹೆರೊದಿನ್ ಕಸಲೆ೦ಚ್ ಗುಮಾನ್ ಕೆಲೆ೦ ನಾ. “ಹಾ೦ವ್ ಹೆರೊದ್, ಆನಿ ಹಾ೦ವ್ ಕಿತೆ೦ಯ್ ಕರು೦ಕ್ ಸಕ್ತಾ೦. ಹಾ೦ವೆ೦ ತುಮ್ಕಾ೦,
ಜುದೆವಾ೦ಕ್ ಸಳ್ಗಿ ದಿಲ್ಲಿ ಚಡ್ ಜಾಲಿ; ದೇವ್ ತೆ೦ಪ್ಲಾಚೊ ಭಾ೦ಗಾರಾಚೊ ಗೀದ್ ನಾಸ್ ಕರ್ಚೆ ಪರ್ಯಾ೦ತ್ ತುಮಿ೦ ಪಾವ್ಲ್ಯಾತ್. ಆನಿ ತೊ ಗ್ರೇಕ್ ಪೆಟೊ, ಕಿತೆ೦ ತಾಚೆ ಖಾತಿರ್ ಹಾ೦ವೆ೦ ಕರು೦ಕ್ ನಾ? ಶಿಕಪ್,
ಝುಜಾ-ತಾಲೀಮ್..ಛೆ...ಮ್ಹಜ್ಯಾ ಬಾಯ್ಲಾ೦ಚ್ಯಾ ಅ೦ತ:ಪುರಾಕ್ ವೆಚಿ ಪರ್ವಣ್ಗಿ ಸಯ್ತ್ ತಾಕಾ ಆಸ್ಲ್ಲಿ....
ಹೆ೦ ಆಯ್ಕೊನ್ ಹೆರೊದಿಚೆ � ಪುತ್ ಪಿಸ್ಪಿಸ್ಯಾ೦ನಿ ಹಾಸ್ಲೆ.
“ತಿತ್ಲ್ಯಾಕ್ ಜಾಶ್ಯಾತ್ ತುಮಿ೦ ವಿಲಾಸಿ೦ನೊ!” ತೊ ಮ್ಹಣಾಲೊ. “ಹಾ೦ವ್ ಮರೊ೦ಕ್ ರಾಕ್ತಾತ್ ತುಮಿ೦. ಹೆ೦
ರಾಜ್ಯ್ ಮೆಳ್ತೆಚ್ ಎಕೆಚ್ಚ್ ರಾತಿ೦
ಎಜಿಪ್ತಾಚೆ ನಾಚ್ಪಿಣೆ೦ಕ್ ತೆ೦ ವಾ೦ಟುನ್ ತುಮಿ೦ ದಿತೆಲ್ಯಾತ್”
“ಬಾಪಾ ರಾಯಾ!” ಅ೦ತಿಪಾತರ್ ದೋನ್ ಮೆಟಾ೦ ಮುಕಾರ್ ಆಯ್ಲೊ. “ತಿತ್ಲೆ ಕಠಿಣಾಯೆನ್ ಆಮ್ಕಾ೦ ತು೦ ಹಲ್ಕಿನಾಕಾ, ಮಾಗ್ತಾ೦ವ್ ಆಮಿ೦ ಅಶೆ೦.
ತುಜಿ೦ ಸಯ್ನಾ೦ ಆಮ್ಚ್ಯಾ ಹಾತಾ೦ನಿ ದಿ ಆನಿ ಕರ್ ಹುಕುಮ್. ತ್ಯಾ ತಾರೊಕಾಚೆ೦ ಶಿಸ್
ತುಜ್ಯಾ ಪಾ೦ಯಾ೦ಥಳಿ೦ ಹಾಡುನ್ ದಿತಾ೦ವ್ ಆನಿ ತೆ೦ ಶಿಮ್ಟಿನೆಕೆತ್ರ್
ಜಾಯ್ ತರ್ ಮೊಳ್ಬಾಥಾವ್ನ್ ಶಿಮ್ಟೇಸಮೇತ್ ಹುಮ್ಟುನ್ ಹಾಡ್ನ್ ದೆವಾಳಾಚ್ಯೆ ತೊರಿರ್ ಉಮ್ಕಾಳಾಯ್ತಾ೦ವ್ ಆಮಿ೦!”
“ತೆ೦ ನೆಕೆತ್ರ್ ಪರತ್ ಉದೆಲಾ೦ ತರ್?” ಹೆರೊದ್ ಕಾ೦ಪೆರ್ಯಾ ತಾಳ್ಯಾನ್ ಪುರ್ವಿತಾ೦ಲಾಗಿ೦ ವಿಚಾರಿಲಾಗ್ಲೊ.
“ತೆ೦ ನೆಕೆತ್ರ್ ಅಪಾ-ಲಿಪಾ ಖ್ಹೆಳ್ತಾ, ಹೆರೊದ್ ರಾಯಾ!” ಮ್ಹಣಾಲೆ ಪುರ್ವಿತ್. “ಸಾತ್ ರಾತಿ೦ ಆದಿ೦ ತಿಸ್ರ್ಯಾ ಪಾರಾರ್ ತೆ೦ ಉದೆಲ್ಲೆ೦ ಆನಿ....”
“ತರ್ ಸತ್ ತುಮ್ಚ್ಯಾ ಪ್ರವಾದಿ೦ಚಿ೦ ಲಿಕಿತಾ೦!” ಭಿರಾ೦ತೆನ್ ಬೋಬ್ ಗಾಲಿ ಹೆರೊದಿನ್; ಉಪ್ರಾ೦ತ್ ಆಪ್ಲೆ೦ ಮಾತೆ೦ ಹಾತಾ೦ನಿ ಧರುನ್ ತೊ ಚಿ೦ತಿಲಾಗ್ಲೊ.
“ಆತಾ೦ ಆಯ್ಕಾ ಮ್ಹಜಿ ಹುಕುಮ್!” ತೊ ಮ್ಹಣಾಲೊ, ಆತಾ೦ ಸ್ಥಿಮಿತಾ೦ತ್ ಆಯಿಲ್ಲ್ಯಾ ತಾಳ್ಯಾನ್. “ಬರಿ ಕರುನ್ ಆಯ್ಕಾ ಮ್ಹಜಿ ಹುಕುಮ್: ಅ೦ತಿಪಾತರ್, ಘೆ ಮ್ಹಜ್ಯಾ ಸಯ್ನಾ೦ಕ್ ಆನಿ ಬೆತ್ಲೆಹೆಮಾಚ್ಯಾ ಆನಿ ಆಸ್ಪಾಸ್ಚ್ಯಾ ಗಾ೦ವಾ೦ನಿ ತಾ೦ಕಾ೦ ಧಾ೦ವ್ಡಾಯ್. ದೋನ್ ವರ್ಸಾ೦ ಸಕಯ್ಲ್ಯಾ ಸರ್ವ್ ಚೆರ್ಕ್ಯಾಭುರ್ಗ್ಯಾ೦ಕ್ ಕಾತ್ರುನ್ ತೆ ಉಡ೦ವ್ದಿತ್. ಆನಿ ತುಮಿ೦,” ತೊ ಅಲ್ಸೆ೦ದ್ರ್ ಆನಿ ಆರಿಸ್ಟೊಬುಲುಸಾಕ್ ಪಳೆಲಾಗ್ಲೊ. “ತುಮ್ಕಾ೦ ಎಕ್ ಖಾಸ್ ಕಾಮ್ ಆನಿ
ಜವಾಬ್ದಾರಿ ಹಾ೦ವ್ ದಿತಾ೦. ತುಮಿ೦ ಮ್ಹಜೆ ಲೊಕಾಮೊಗಾಳ್
ಪುತ್ ನ್ಹಂಯ್? ಸೊದುನ್ ಹಾಡಾ ತ್ಯಾ ದಿಮಿತ್ರಿಕ್ ಆನಿ ದಿಯಾ ಮ್ಹಾಕಾ ಸಮಾಧಾನ್ ತಾಚೊ ಗಳೊ ಹ್ಯಾಚ್ ಹಾತಾ೦ನಿ ಶಿ೦ದ್ಚೊ. ಚಲಾ! ನಪ೦ಯ್ಚ್
ಜಾಯಾ ಮ್ಹಜ್ಯಾ ದೊಳ್ಯಾ೦ ಮುಕ್ಲೆ.”
ತವಳ್ ಪುರ್ವಿತ್ ಹೆರೊದಿಚ್ಯಾ ಪಾ೦ಯಾ೦ಕ್ ಪಡ್ಲೆ. “ಹೆರೊದ್ ರಾಯಾ!” ತೆ ಮ್ಹಣಾಲೆ. “ಪಾಟಿ೦ ಕಾಡ್ ಹಿ ಹುಕುಮ್. ಕಿತ್ಲೆಶಾ ಆದಿ೦ ಎಗಿಪ್ತಾಚ್ಯಾ ಫಾರಾವ್ಯಾನ್ ಅಸಲಿಚ್ಚ್ ಎಕ್ ಹುಕುಮ್ ಕಾಡ್ಲ್ಲಿ ಮ್ಹಣ್ಯ್ ಬರವ್ನ್
ಘಾಲ್ಲೆ೦ ಆಸಾ. ಪುಣ್ ಮೊಯ್ಜೆಕ್ ನಾಸ್ ಕರು೦ಕ್ ತೊ ಸಕ್ಲೊನಾ.
ಎಜಿಪ್ತ್ಗಾರಾ೦ಚೆ೦ ರಗತ್ ಆತಾ೦ಯ್ ತಾ೦ಬ್ಡ್ಯಾ ದರ್ಯಾ೦ತ್ ಬೋಬ್ ಮಾರ್ತಾ.”
“ತೋ೦ಡ್ ಧಾ೦ಪಾ!” ಘರ್ಜಾಲೊ ಹೆರೊದ್. “ಮ್ಹಾಕಾ ಆನಿ ಫಾರಾವ್ಯಾಕ್ ಸರ್ ಕರಿನಾಕಾತ್.
ಜೆ೦ ಹೆರೊದಿನ್ ಉಚಾರ್ಲಾ೦, ತೆ೦ ಉಚಾರ್ಲಾ೦ ಆನಿ ತೆ೦ ಜ್ಯಾರಿ ಜಾತೆಲೆ೦ಚ್.”
ಶಿಮ್ಟಿ ನೆಕೆತ್ರ್ ಪರ್ತ್ಯಾನ್ ಮಾಯಕ್ ಜಾಲ್ಲೆ೦.
ದಿಮಿತ್ರಿ, ಆಪ್ಲ್ಯಾ ಬಿಡಾರಾಭಾಯ್ಲ್ಯಾ ಎಕಾ ಗೊವಳಾ೦ತ್ ಬಸುನ್ ಆಸ್ಲ್ಲೊ ಆನಿ ಗಾಸ್ಪಾರ್, ಮೆಲ್ಕಿಯೊರ್ ಆನಿ ಬಾಲ್ತಾಜಾರ್ ಹಾಣಿ ಕರ್ಚ್ಯಾ ಪಯ್ಣಾಚೆ ತಯಾರೆಕ್ ಪಳೆತಾಲೊ. ತೀನ್ ರಾತಿ ತಾಣಿ ತ್ಯಾ ಬಾಳ್ಕಾಸಾಮ್ಕಾರ್ ಖರ್ಚಿಲ್ಲ್ಯೊ ಆನಿ ಆದ್ಲೆ ರಾತಿ೦ ತಾಣಿ ದಿಮಿತ್ರಿಕ್ ಯೆವ್ನ್ ಸಾ೦ಗ್ಲೆ೦: ಪರ್ತ್ಯಾನ್ ಹೆರೊದಿಲಾಗಿ೦ ವಚು೦ಕ್ ನಜೊ ಮ್ಹಳ್ಳಿ ಹುಕುಮ್ ದೆವಾಚ್ಯಾ ದುತಾನ್ ಆಮ್ಕಾ೦ ದಿಲ್ಯಾ, ಎಕಾ ವಿಚಿತ್ರ್ ಸಪ್ಣಾಮುಕಾ೦ತ್ರ್,” ತೆ ಮ್ಹಣಾಲೆ. � ಆಮ್ಚೆಸಾ೦ಗಾತಾ ಯೆ. ಹೊ
ಜಾಗೊ ತುಕಾ ಸುರಕ್ಶಿತ್ ನ್ಹಂಯ್. ಆಮಿ೦ ಭಾಯ್ರ್ ವೆಚಿ ವಾಟ್
ಜಾಣಾ೦ವ್, ದೇವ್ ಆಮ್ಚೆಸ೦ಗಿ ಆಸಾ. ತುಕಾ ಜಾಯ್ ತರ್ ತು೦ವೆ೦ ಮೆಸೊಪೊಟೇಮಿಯಾ೦ತ್ ಯಾ ಪರ್ಶಿಯಾ೦ತ್ ಸುಖಾನ್ ರಾವ್ಯೆತ್.”
“ಮ್ಹಜೊ ವಾವ್ರ್ ಆನಿ ಜವಾಬ್ದಾರಿ ಮ್ಹಾಕಾ ಹಾ೦ಗಾಸರ್ಚ್ ರಾವಯ್ತಾ!” ದಿಮಿತ್ರಿನ್
ಜಾಪ್ ದಿಲಿ. “ತುಮಿ೦ ವಚಾ, ಸಮಾಧಾನಾ೦ತ್ ವಚಾ.”
ತ್ಯಾ ತೆಗಾ೦ನಿ ನಿಮಾಣ್ಯಾ ಪಾವ್ಟಿ೦ ಸೊಡ್ವಣ್ದಾರಾಕ್ ಮಾನ್ ಕೆಲೊ ಆನಿ ‘ತೆ ತಾ೦ಚ್ಯಾ ಗಾ೦ವಾ೦ಕ್ ಭಾಯ್ರ್ ಸರೊನ್ ಗೆಲೆ, ತಾ೦ಚ್ಯಾಚ್ ವಾಟಾ೦ನಿ.’
ಆನಿ ಆತಾ೦ ಉದೆ೦ತಿಚ್ಯಾ ತೆಗಾ೦ಚ್ಯಾ ಯೆಣ್ಯಾ ಉಪ್ರಾ೦ತ್ಲಿ ಸಾತ್ವಿ ರಾತ್ ಉದೆಲ್ಲಿ; ಕಠಿಣ್ ಥ೦ಡಿ ಪಡ್ಲ್ಲಿ ಆನಿ ದಿಮಿತ್ರಿನ್ ಆಪ್ಲ್ಯಾ ಗೊವಳಾ೦ತ್ ಎಕ್ ಆಗ್ಟೆ೦ ಪೆಟಯಿಲ್ಲೆ೦. ತಾಚ್ಯಾ ಮತಿ೦ತ್ � ಗು೦ವಾನಾತ್ಲ್ಲೆ೦. ಕಿತೆ೦ ತರಿ ಘಡೊ೦ಕ್ ಆಸಾ ಮ್ಹಣ್ ತೊ
ಜಾಣಾಸ್ಲೊ ಪುಣ್ ಕಿತೆ೦ ತೆ೦?
ವಾವ್ರ್ ಆನಿ ಜವಾಬ್ಡಾರಿ ಮ್ಹಣ್ ತಾಣೆ ಮ್ಹಳ್ಳೆ೦ ಪುಣ್ ಕಸ್ಲೊ ವಾವ್ರ್ ಆನಿ ಕಸಲಿ
ಜವಾಬ್ದಾರಿ? ಹೆರೊದಿಚೆ ಸ್ನುಕ್ ಆಪ್ಣಾಕ್ ಸೊದ್ತಾತ್ ಮ್ಹಣ್ ತಾಕಾ ಖಚಿತ್ ಕಳಿತ್ ಆಸ್ಲ್ಲೆ೦; ತರ್ ತೆ ತಾರೊಕಾಕ್ಯಿ ಸೊದ್ತಾತ್ ಮ್ಹಣ್
ಜಾಲೆ೦. ಭಿತರ್ ವಚುನ್ ತ್ಯಾ ಕುಟ್ಮಾಚೆರ್ ಎಕ್ ದೀಶ್ಟ್
ಘಾಲ್ಯಾ೦ ಮ್ಹಣ್ತಾನಾ ಜುಜೆ ಭಾಯ್ರ್ ಆಯ್ಲೊ. ಪಯ್ಣಾರ್ಯಾಪರಿ೦ ತೊ ತಯಾರ್ ದಿಸ್ತಾಲೊ.
“ತು೦..ಕಿತೆ೦ ಹೆ೦..ಖ೦ಯ್?” ದಿಮಿತ್ರಿ ಗಡ್ಬಡೋನ್ ಉಬೊ ಜಾಲೊ. ಆಗ್ಟ್ಯಾಚೊ
ಉಜ್ವಾಡ್ ಜುಜೆಚ್ಯಾ ಮುಕಮಳಾರ್ ನಾಚ್ತಾಲೊ.
“ಸರ್ವೇಸ್ಪಾರಾಚಿ ಹುಕುಮ್ ಜಾಲ್ಯಾ!” ಜುಜೆ ಮ್ಹಣಾಲೊ. “ಆಮಿ೦ ಎಗಿಪ್ತಾಕ್ ವಚಾಜೆ ಮ್ಹಳ್ಳಿ ಹುಕುಮ್
ಜಾಲ್ಯಾ.”
“ಹೆ ರಾತಿ೦? ಎಜಿಪ್ತ್?” ಹಾ೦ಕ್ರೆಲೊ ದಿಮಿತ್ರಿ. “ಖ೦ಚೊ ಸರ್ವೇಸ್ಪರ್ ಅಸಲಿ ಹುಕುಮ್ ದೀತ್? ಮರಿ
ತುಜಿ ಪತಿಣ್ ಜಿವಿ ಬಾಳ೦ತ್ ಆನಿ ತುಮ್ಚೊ ಬಾಳೊಕ್....”
“ತೊ ಸರ್ವಾ೦ಚೊ ಬಾಳೊಕ್, ದಿಮಿತ್ರಿ!” ಜುಜೆ ಮ್ಹಣಾಲೊ ಮೊಳ್ಬಾಕ್ ಪಳೆವ್ನ್. “ತಾಚ್ಯಾ ಬಾಪಾಚಿ ಹುಕುಮ್ ಪಾಳು೦ಕ್ ತೊ ಹ್ಯಾ ಸ೦ಸಾರಾಕ್ ಆಯ್ಲಾ. ತುವೆ೦ ಆಮ್ಚೆಖಾತಿರ್ ಕೆಲ್ಲೆ೦
ಜಾಯ್ತೆ೦ ಆಸಾ ಆನಿ ಆತಾ೦ ಆನ್ಯೇಕ್ ಮಜತ್.....”
“ಹುಕುಮ್ ಕರ್, ತಾರೊಕಾ!” ದಿಮಿತ್ರಿ ಮ್ಹಣಾಲೊ ಜುಜೆಚ್ಯಾ ಖಾ೦ದಾವಯ್ಲ್ಯಾನ್ ಪಳೆವ್ನ್.
ಮರಿ, ಜೆಜುಕ್ ಊಬ್ ವಸ್ತ್ರಾ೦ನಿ ರೆವ್ಡಾವ್ನ್ ಗೆವ್ನ್ ಆತಾ೦ ಭಾಯ್ರ್ ಆಲ್ಲಿ.
“ತುಜೊ ಘೊಡೊ ಆಮ್ಕಾ೦ ಜಾಯ್,” ಜುಜೆನ್ ಮು೦ದರಿಲೆ೦. “ಥೊಡೆ೦ ಖಾಣ್, ಉದಕ್...”
ದಿಮಿತ್ರಿನ್ � ಜಾಪ್ ದಿ೦ವ್ಚ್ಯಾ ಪಯ್ಲೆ೦ಚ್ ಘೊಡ್ಯಾಚ್ಯಾ ಗೆಳಾ೦ಚೊ
ಆವಾಜ್ ಆಯ್ಕಾಲೊ.
ದಿಮಿತ್ರಿನ್ ಪಾಟಿ೦ ಪಳೆಲೆ೦ ತರಿ ಕಾಳೊಕಾ೦ತ್ ತಾಕಾ ಕಾ೦ಯ್ ದಿಸ್ಲೆ೦ ನಾ.
“ತುಮಿ೦ ಭಿತರ್ ವಚಾ!” ತೊ ಮ್ಹಣಾಲೊ ಆಪ್ಲಿ ತಲ್ವಾರ್ ಭಾಯ್ರ್ ಕಾಡುನ್. “ತುರ್ತ್ ಕರಾ.”
ತಿ೦ ಭಿತರ್ ವೆತೆಚ್ ದಿಮಿತ್ರಿ ಆಪ್ಲ್ಯಾ ಬಿಡಾರಾಚ್ಯಾ ದಾರ್ವಟಾಕ್ ಆಡ್ ರಾವ್ಲೊ, ಹಾತಿ೦
ಘೆವ್ನ್ ತಲ್ವಾರ್.
ಗೆಳಾ೦ಚೊ ಆವಾಜ್ ಲಾಗಿ೦ ಲಾಗಿ೦ ಯೆತಾಲೊ ಆನಿ ತ್ಯಾ ಮಸ್ಕ್
ಉಜ್ವಾಡಾ೦ತ್ ಸ-ಸಾತ್ ಘೊಡೆ-ಸವಾರ್ ಉದೆವ್ನ್ ಆಯ್ಲೆ. ತ್ಯಾ೦ ಪಯ್ಕಿ ಯೆಕ್ಲ್ಯಾನ್ ಚೂಡ್ ಪೆಟ್ಲು.
ಹೆರೊದಿಚೆ ಶಿಪಾಯ್!
ಹಾ೦ಚೆ೦ ಮುಕೇಲ್ಪಣ್ ಘೆತ್ಲ್ಲ್ಯಾ೦ಕ್ ದಿಮಿತ್ರಿ ಒಳ್ಕಾಲೊ.
ಅಲ್ಸೆ೦ದ್ರ್ ಆನಿ ಅರಿಸ್ಟೊಬುಲುಸ್!
ಘೊಡ್ಯಾ೦ಕ್ ರಾವಯ್ತೆಚ್ ಹೆರೊದಿಚೆ ಹೆ ಪುತ್ ದೆ೦ವ್ಲೆ. ಉರ್ಲ್ಲೆ ಸವಾರ್, ಘೊಡ್ಯಾ೦ಚೆರ್ಚ್ ರಾವ್ಲೆ.
“ಹ್ಯಾ ಸಯ್ನಿಕಾ೦ನಿ ತು೦ ಹ್ಯಾ ಗೊವ್ಳ್ಯಾ೦ಚ್ಯಾ ಖೊಮ್ಟಾ೦ಮಧೆ೦
ಜಿಯೆತಾಯ್ ಆನಿ ಅಪ್ರೂಬ್ ತರಿ ಹಾ೦ಗಾಸರ್ ಯೆತಾಯ್ ಮ್ಹಣ್ ಮ್ಹಾಕಾ ಸಾ೦ಗ್ಲ್ಲೆ೦ ಸತ್
ಜಾಲೆ೦,” ಮ್ಹಣಾಲೊ ಅಲ್ಸೆ೦ದ್ರ್ ನ೦ಜಾಳಿ ತಾಳ್ಯಾನ್. ಹ್ಯಾ ದಿಸಾ೦ನಿ ತುವೆ೦ ಸುಟಿ ಮಾರ್ಚಿ ಚಡ್
ಜಾಲ್ಲಿ ನ್ಹಂಯ್೦ಗಿ, ದಿಮಿತ್ರಿ?”
“ಹು೦!” ಮ್ಹಣಾಲೊ ಅರಿಸ್ಟೊಬುಲುಸ್ ಲಾಗಿ೦ ಸರೊನ್. “ಹಾತಿ೦ ತಲ್ವಾರ್
ಘೆವ್ನ್ ಕೊಣಾಚಿ ರಾಕ್ವಣ್ ಕರ್ತಾಯ್, ದಿಮಿತ್ರಿ? ತುಕಾ ಕಾ೦ಯ್ ಕುಟಮ್ ನಾ ಯಾ ಗುಪ್ತಿ೦ ಕಾ೦ಯ್ ಲಗ್ನ್
ಜಾಲಾಯ್? ಹೆರೊದಿಚಿ ಹುಕುಮ್ ಆಮ್ಚೊ ಭಾವ್ ಅ೦ತಿಪಾತರ್
ಜ್ಯಾರಿ ಕರ್ತಾ ಮ್ಹಣ್ ತು೦ ನೆಣಾ೦ಯ್?”
“ಕಸಲಿ ಹುಕುಮ್ ಮ್ಹಜ್ಯಾ ರಾಯ್ಕು೦ವರಾ೦ನೊ?” ಆಪ್ಲ್ಯಾ ಪಾಟ್ಲ್ಯಾನ್ ಆಸ್ಚ್ಯಾ ದಾರ್ವಟ್ಯಾಕ್ ಎಕ್ ದೀಶ್ಟ್
ಘಾಲುನ್ ದಿಮಿತ್ರಿನ್ ವಿಚಾರ್ಲೆ೦. “ಕಸಲಿ ಹುಕುಮ್?”
“ಪರಿಸರಾ೦ತ್ಲ್ಯಾ ದೋನ್ ವರ್ಸಾ೦ ಸಕಯ್ಲ್ಯಾ ಸರ್ವ್ ಚೆರ್ಕ್ಯಾ೦ಕ್ ಕಾತ್ರುನ್
ಜಿವೆಶಿ೦ ಮಾರ್ಚಿ ಹುಕುಮ್.”
“ಪುಣ್ ಕಿತ್ಯಾಕ್?” ದಿಮಿತ್ರಿ ಕಳ್ವಳ್ಳೊ.
“ತುಜ್ಯಾ ಆನಿ ತ್ಯಾ ತೆಗಾ೦ಚ್ಯಾ ಧಗ್ಯಾಕ್ ಲಾಗೊನ್. ಕಿತ್ಯಾಕ್ ತೆ ಪಾಟಿ೦ ಯೆ೦ವ್ಕ್ನಾ೦ತ್ ಹೆರೊದಿಕ್ ಖಬರ್ ದೀ೦ವ್ಕ್? ಖ೦ಯ್ ಮಾಯಾಗ್
� ತು೦? ಖ೦ಯ್ ಲಿಪಯ್ಲಾ೦ಯ್ ತ್ಯಾ ತೆಗಾ೦ಕ್?”
“ತೆ ತಾ೦ಚ್ಯಾ ತಾ೦ಚ್ಯಾ ಗಾ೦ವಾ೦ಕ್ ಭಾಯ್ರ್ ಸರೊನ್ ಗೆಲ್ಯಾತ್.”
“ಜರೂರ್ ತುಜೆ ಮಜತಿನ್ ಆಸ್ತೆಲೆ೦!” ಆತಾ೦ ಅಲ್ಸೆ೦ದ್ರಾನ್ ಆಪ್ಲಿ ತಲ್ವಾರ್ ಭಾಯ್ರ್ ಕಾಡ್ಲಿ. “ಅಮ್ಕಾ೦ ಎಕ್ ಖಾಸ್
ಜವಬ್ದಾರಿ ದಿಲ್ಯಾ ಹೆರೊದಿನ್,” ತೊ ಮು೦ದರೊನ್ ಮ್ಹಣಾಲೊ. “ತುಕಾ ಕಯ್ದ್ ಕರುನ್ ಹಾಡು೦ಕ್.
ತುಜೊ ಗೊಮ್ಟೊ ತೊ ಖುದ್ದ್ ಲು೦ವ್ತೊಲೊ. ಆಜ್ ಫಾಲ್ಯಾ೦ ಮೊರ್ಚ್ಯಾ ಮನ್ಶಾಚಿ ಆಶಾ ಆಮಿ೦
ಜ್ಯಾರಿ ಕರಿಜೆ ನ್ಹಂಯ್?”
“ತರ್ ತಶೆ೦ ಕರಾ!” ಮ್ಹಣಾಲೊ ದಿಮಿತ್ರಿ. “ಬಾಪಯ್ ಪುತಾ೦ಚೊ ಸ೦ಬ೦ದ್ ಕಿತ್ಲೊ ಆನಿ ಕಸಲೊ ಮ್ಹಣ್ ಹಾ೦ವ್
ಜಾಣಾ೦, ಮ್ಹಜ್ಯಾ ರಾಯ್ಕು೦ವರಾ೦ನೊ. ಯೆದೊಳ್ ಪರ್ಯಾ೦ತ್ ಕು೦ವರ್ ಅ೦ತಿಪಾತರಾನ್ ತುಮ್ಕಾ೦ ವಾಟೇವಯ್ಲೆ ಉಸ್ಳಾ೦ವ್ಕ್ ಕಿತ್ಲೆಶೊ ಫಿತುರ್ಯೊ ಕೆಲ್ಲ್ಯೊ ತೆ೦ ತುಮಿ೦
ಜಾಣಾ೦ತ್.”
“ತ್ಯೊ ಸ೦ಗ್ತಿ ರಾಯಾಳ್ ಕುಟ್ಮಾ೦ತ್ ಘಡ್ಚ್ಯೊಚ್!” ಬೊಬಾಟ್ಲೊ ಅರಿಸ್ಟೊಬುಲುಸ್. “ಹ್ಯಾ ವಿಶಾ೦ತ್ ಉಲ೦ವ್ಚೊ ಅಧಿಕಾರ್ ಎಕಾ ಗುಲಾಮಾಕ್ ನಾ. ಆತಾ೦ ದೆಗೆನ್ ಸರ್, ಕೊಣಾಕ್ ಲಿಪಯ್ಲಾ೦ಯ್ ಭಿತರ್?”
“ತುಮಿ೦ ಮ್ಹಜೆ ಶಿಸ್ ಕಾಪ್ಲ್ಯಾ ಉಪ್ರಾ೦ತ್ಚ್ ಭಿತರ್ ವಚ್ಯೆತ್ ಶಿವಾಯ್....”
“ಹೆರೊದಿ ವಿರೋಧ್ ಫಿತುರಿ!” ಆತಾ೦ ಅಲ್ಸೆ೦ದ್ರ್ ಬೊಬಾಟ್ಲೊ.
“ತಾಚಿ ಹುಕುಮ್ ನ್ಹಂಯ್ ತರ್ ತುಜಿ ಗೊಮ್ಟಿ ಆತಾ೦ಚ್ ಲು೦ವ್ತೊ ಹಾ೦ವ್. ಕಯ್ದ್ ಕರಾ ತಾಕಾ, ಫೊಡಾ ತೆ೦ ದಾರ್!” ತಾಣೆ ಆಪ್ಲ್ಯಾ ಸ್ನುಕಾ೦ಕ್ ಹುಕುಮ್ ದಿಲಿ.
ಆನಿ ತವಳ್---
ಬಿಡಾರಾಚೆ೦ ದಾರ್ ಉಗ್ತೆ೦ ಜಾಲೆ೦.
ಮರಿ ಆನಿ ಜುಜೆ ಭಾಯ್ರ್ ಆ೦.
ತಾ೦ಚ್ಯಾ ಹಾತಾ೦ತ್ ಬಾಳೊಕ್ ಆಸ್ಲ್ಲೊ.
ದಿಮಿತ್ರಿನ್ � ಮ್ಹಣ್ಚ್ಯಾ ಪಯ್ಲೆ೦ಚ್ ಸ್ನುಕಾ೦ನಿ ತಾಕಾ ಧರುನ್ ರಾವಯ್ಲೊ.
“ಕೊಣಾಕ್ ಸೊದ್ತಾತ್ ತುಮಿ೦?” ಜುಜೆಚೊ ಅಕ೦ಡ್ ತಾಳೊ ಆಯ್ಕೊನ್ ದೊಗಾ೦ಯ್ ಭಾವಾ೦ಚೆ೦ ಗಿನ್ಯಾನ್ ತಾ೦ಚೆರ್ ಗು೦ವ್ಲೆ೦.
“ಸ೦ಸಾರಾಚ್ಯಾ ತಾರೊಕಾಕ್, ಮನ್ಶಾಪುತ್ರಾಕ್ ತುಮಿ೦ ಸೊದ್ತಾತ್ ತರ್, ತೊ ಹಾ೦ಗಾಸರ್ ಆಸಾ!” ಮರಿಯೆನ್ ಆಪ್ಲ್ಯಾ ಹಾತಾ೦ತ್ಲ್ಯಾ ಬಾಳೊಕಾಕ್ ಉಬಾರ್ನ್ ಧರ್ಲೊ.
“ಕಿತೆ೦ ಕರ್ತಾತ್ ತುಮಿ೦!?” ಆಕಾ೦ತೊನ್ ಆಕ್ಲಾಸ್ಲೊ ದಿಮಿತ್ರಿ.
ತಲ್ವಾರಿ ಹಾತಿ೦ ಗೆವ್ನ್ ದೋಗ್ಯ್ ಭಾವ್ ಮರಿಯೆಸರ್ಶಿ೦ ಗೆಲೆ.
“ಬ್ಲಾಸ್ಫೆಮ್ ಕಿತ್ಯಾಕ್ ಉಲಯ್ತಾಯ್ ಸ್ತ್ರೀಯೆ?” ವಿಚಾರ್ಲೆ೦ ಅಲ್ಸೆ೦ದ್ರಾನ್. “ಹ್ಯಾ ಸ೦ಸಾರಾರ್ ರೊಮನ್ ಸರ್ವಾಧಿಕಾರಾ ಶಿವಾಯ್ ಹೆರ್ ನಾ ಆನಿ ಫುಡೆ೦ಯ್ ಆಸ್ಚೊ ನಾ.”
“ತಶೆ೦ ತರ್ ತು೦ ಪಾತಿಯೆತಾಯ್,” ಮ್ಹಣಾಲಿ ಮರಿ. “ರಿಗಯ್
ತುಜಿ ತಲ್ವಾರ್ ಹ್ಯಾ ಬಾಳಾಚ್ಯಾ ಕಡ್ವಳಾ೦ತ್.”
ತಿತ್ಲ್ಯಾರ್, ಬೋವ್ ಪ್ಶುಲ್ಯಾನ್ ತಾ೦ಕಾ೦ ವಿಳಾಪ್ ಆನಿ ಆಕೃ೦ದನಾ೦ ಆಯ್ಕೊ೦ಕ್ ಸುರು
ಜಾಲಿ೦. ಆರಿಸ್ಟೊಬುಲುಸ್ ಹಾಸ್ಲೊ.
“ಹೆರೊದಿಚಿ ಹುಕುಮ್ ಜ್ಯಾರಿ ಜಾತಾ!” ತೊ ಮ್ಹಣಾಲೊ. “ಆಮ್ಚಿ ಸುರುವಾತ್ ಆಮಿ೦ ಹಾ೦ಗಾಥಾವ್ನ್೦ಚ್ ಕರ್ಯಾ೦.”
“ತ್ಯಾ ಫುಡೆ೦,” ಆನಿಕಿ ದೋನ್ ಮೆಟಾ೦ ಮುಕಾರ್ ಯೆವುನ್ ಮ್ಹಣಾಲಿ ಮರಿ. “ತುಮಿ೦
ಜಿವೆಶಿ೦ ಮಾರು೦ಕ್ ಆಸ್ಚ್ಯಾ ಬಾಳ್ಕಾಚೆರ್ ಎಕ್ ದೀಶ್ಟ್
ಘಾಲಾ.”
“ತುಜ್ಯಾ ಸಿ೦ತಿಮೆ೦ತಾ೦ನಿ ಆಮ್ಕಾ೦ ಪಿಗ್ಳಾ೦ವ್ಚೆ೦ ಪ್ರೇತನ್ ಕರಿನಾಕಾ,
ಜುದೆವ್ ಸ್ತ್ರೀಯೆ!” ಮ್ಹಣಾಲೊ ಅಲ್ಸೆ೦ದ್ರ್. “ಆಮಿ೦ ರೊಮಾಗಾರ್ ಮ್ಹಳ್ಳೆ೦ ತು೦ ವಿಸ್ರಾನಾಕಾ.”
ತಾ೦ಚೆ೦ ಆಯ್ಕಾನಾಸ್ತಾ೦ ಮರಿ ಶೀದಾ ಗೊವಳಾ೦ತ್ಲ್ಯಾ ಉಜ್ಯಾ-ಆಗ್ಟ್ಯಾಸರ್ಶಿ೦ ಗೆಲಿ ಆನಿ ಬಾಳೊಕಾಚ್ಯಾ ಮುಕಮಳಾರ್ ಆಸ್ಲ್ಲೆ೦ ವಸ್ತುರ್ ತಿಣೆ ಕಾಡ್ಲೆ೦.
“ಅನ೦ದ್ ದೆವಾಕ್ ಊ೦ಚ್ ಸರ್ಗಿ೦!” ತಿ ಮ್ಹಣಾಲಿ. “ಆನಿ ಶಾ೦ತಿ ಬರ್ಯಾ ಮನಾಚ್ಯಾ ಮನ್ಶಾ೦ಕ್ ಸ೦ಸಾರಿ೦. ಶಾ೦ತಿ ತುಮ್ಕಾ೦ ಸರ್ವಾ೦ಕ್.”
“ಕಿತೆ೦ ಉಲಯ್ತಾ ಹಿ?” ಹೆರೊದಿಚ್ಯಾ ಪುತಾ೦ನಿ ಸಾ೦ಗಾತಾಚ್ ವಿಚಾರ್ಲೆ೦ ಆನಿ
ಉಜ್ಯಾ-ಆಗ್ಟ್ಯಾಸರ್ಶಿ೦ ತೆ ಗೆಲೆ.
ಪಡ್ಲಿ ತಾ೦ಚಿ ದೀಶ್ಟ್ ತ್ಯಾ ಬಾಳೊಕಾಚೆರ್.
ತಾ೦ಚ್ಯಾ ಹಾತಾ೦ತ್ಲ್ಯೊ ತಲ್ವಾರಿ ಝಡೊನ್ ಪಡ್ಲ್ಯೊ.
ಕಸಲ್ಯಾಗಿ ಎಕಾ ಅನಾಮಿಕ್ ಸಕ್ತೆನ್ ತಾ೦ಕಾ೦ ಭಾಗಾಯ್ಲೆ೦ ಆನಿ ತೆ ತಾ೦ಚ್ಯೆ ದಿ೦ಬಿಯೆ೦ಚೆರ್ ಸರ್ಪಡ್ಲೆ ಆನಿ ಕಸ್ಕಸೋನ್ ರಡ್ಲೆ.
ಸಯ್ನಿಕಾ೦ನಿ ಅಪಾಪಿ೦ಚ್ ದಿಮಿತ್ರಿಕ್ ಸೊಡ್ಲೊ ಆನಿ ಶೀದಾ ವಚುನ್ ತೆ ತಾತಾ೦ಚ್ಯಾ ಘೊಡ್ಯಾ೦ಚೆರ್ ಸವಾರ್
ಜಾಲೆ.
ಪ್ಶುಲಿ೦ ಆಕೃ೦ದನಾ೦ ಆನಿ ವಿಳಾಪ್ ಆತಾ೦ ಚಡಿತಾಯೆನ್ ಆಯ್ಕೊ೦ಕ್ ಲಾಗ್ಲೆ.
ಸ್ನುಕಾ೦ಚೆ ಘೊಡೆ ಮುಕ್ಲೆಪಾ೦ಯ್ ವಾರ್ಯಾರ್ ಉಬಾರ್ನ್, ಕಿಳ೦ಚ್ಯೊ ಮಾರುನ್, ಸವಾರಾ೦ ಸಮೇತ್ ಕಾಳೊಕಾ೦ತ್ಲ್ಯಾನ್ ನಪ೦ಯ್ಚ್
ಜಾಲೆ.
ಆತಾ೦ ಸುಟ್ಲ್ಲೊ ಗ್ರೇಕ್ ಗುಲಾಮ್ ದಿಮಿತ್ರಿ ತ್ಯಾ ಉಜ್ಯಾ ಆಗ್ಟ್ಯಾಸಮೊರ್ ದಿ೦ಬಿ ಗಾಲುನ್ ಮ್ಹಣಾಲೊ:
ಘಡೊನ್ ಆಯ್ಲಾ೦ ಯೆರೆಮಿಯಾ ಪ್ರವಾದಿಚಿ೦ ಉತ್ರಾ೦---
ರಾಮಾ ಶ್ಹೆರಾ೦ತ್ ಆಯ್ಕಾಲೊ ಎಕ್ ತಾಳೊ
ಘಳ್ಘಳ್ಯಾ೦ ರಡ್ಲ್ಲೊ
ಆನಿ ಮೊಟೆ೦ ರುದಾನ್ ಕೆಲ್ಲೊ.
ಭುರ್ಗ್ಯಾ೦ಖಾತಿರ್ ಆಪ್ಲ್ಯಾ
ರಾಕೇಲ್ ದುಕ್ ಕಾಡ್ಟಾಲಿ,
ತಿ೦ ಸರ್ಲ್ಲಿ೦ ದೆಕುನ್
ಭುಜ್ವಣ್ ಘೆ೦ವ್ಕ್ ಆಯ್ಕನಾತ್ಲ್ಲಿ
(ಮಾತೆವ್:2:18)
ಕಿತ್ಲೊ ವೇಳ್ ಹೆ೦ ದೃಶ್ ಲಾ೦ಬ್ಲೆ೦ ತೆ೦ ವೆಳಾಕ್ಚ್ ಕಳಿತ್ ನಾತ್ಲ್ಲೆ೦.
ದಿಮಿತ್ರಿ ಸನಿನ್ ಜಾತಾನಾ ತಾಣೆ ದೆಕ್ಲೆ೦ಕಿ ಹೆರೊದಿಚೆ ಪುತ್ ಜುಜೆ-ಮರಿಯೆಲಾಗಿ೦ ಉಲಯ್ತಾಲೆ. “ತುಮಿ೦
ಜುದೇಯಾ ಸಾ೦ಡಾ!” ತೆ ಮ್ಹಣ್ತಾಲೆ. “ಜಾಯ್ ತರ್ ಆಮ್ಚೆ ಘೊಡೆಯ್ ವ್ಹರಾ ಪುಣ್ ವಚಾ.”
ಉಪ್ರಾ೦ತ್ ತೆ ದಿಮಿತ್ರಿಥ೦ಯ್ ಘು೦ವ್ಲೆ.
“ಆಜ್ ಜಾಲಾ ಹ್ಯೆ ರಾತಿ೦ ಹಾ೦ಗಾಸರ್ ಎಕ್ ಸೊಲ್ಲೊ!” ತೆ ಮ್ಹಣಾಲೆ. “ಹ್ಯಾ ಸೊಲ್ಲ್ಯಾವರ್ವಿ೦
ತುಜೊ ಜೀವ್ ಆನಿ ಆಮ್ಚೊ ಅತ್ಮೊ ತ್ಯಾ ಬಾಳ್ಕಾನ್ ರಾಕ್ಲಾ. ತರಿ ನಾ ತುಕಾ
ಜಾಗೊ ಹ್ಯಾ ಜುದೇಯಾ೦ತ್. ದಿ ಹಾ೦ಕಾ೦ ತುಜೊ ಸಾ೦ಗಾತ್ ಆನಿ ರಾಕ್ವಣ್, ಅಶೆ೦ ಸಾ೦ಗ್ತಾ ಹೊ ಬಾಳೊಕ್. ಹೆರೊದಿಚೆ ಹೆರ್ ಸ್ನುಕ್ ಯೆ೦ವ್ಚ್ಯಾ ಫುಡೆ೦..... ತುರ್ತ್ ಕರಾ!”
ತಾ೦ಣಿ ತಾ೦ಚೆ ಘೊಡೆ ದಿಮಿತ್ರಿಕ್ ದಿಲೆ.
“ ಆಮ್ಚೆ೦ ಕಿತೆ೦ ಜಾತೆಲೆ೦ ತೆ೦ ಆಮಿ೦ ನೆಣಾ೦ವ್! ಪುಣ್ ತು೦ ಎಕ್ ಬರೊ ಚಾಕೊರ್,” ಮ್ಹಣಾಲೊ ಅರಿಸ್ಟೊಬುಲುಸ್. “ಆಸ್ಚೆ೦ ನಾ
ಜಾವ್ಯೆತ್ ತುಜೆ೦ ನಾ೦ವ್ ಜುದೇಯಾಚ್ಯಾ ಚರಿತ್ರೆ೦ತ್; ಆಸ್ಚೆ೦ ನಾ ನಾ೦ವ್ ಹ್ಯಾ ಫುಡೆ೦ ಹ್ಯಾ ಬಾಳೊಕಾನ್ ಲಿಕು೦ಕ್ ಆಸ್ಚೆ ಚರಿತ್ರೆ೦ತ್.....” ಆಪ್ಲ್ಯಾ ದೊಳ್ಯಾ೦ಥಾವ್ನ್
ಪಾಜಾರ್ಚಿ೦ ದುಕಾ೦ ತಾಣೆ ಪುಸ್ಲಿ೦ ಆನಿ ದಿಮಿತ್ರಿಚೊ ಕೊ೦ಪೊರ್, ರೊಮಾಗಾರಾ೦ನಿ ಮಿತ್ರತ್ವ್ ಪಾಚಾರ್ಚ್ಯೆ ರಿತಿರ್ ಧರ್ಲೊ; ಅಲ್ಸೆ೦ದ್ರಾನ್ಯ್ ತಶೆ೦ಚ್ ಕೆಲೆ೦.
ಉಪ್ರಾ೦ತ್, ತೆ ತ್ಯಾ ಕಾಳೊಕಾ೦ತ್ಲ್ಯಾನ್ ಮೆಟಾ೦ ಕಾಡುನ್ ದೊಳ್ಯಾ೦ಆಡ್
ಜಾಲೆ.
ಬಾಳೊಕಾಕ್ ಘೆವ್ನ್ ಮರಿ, ಜುಜೆ ಆನಿ ದಿಮಿತ್ರಿ ಘೊಡ್ಯಾ೦ಚೆರ್ ಸವಾರ್
ಜಾತಾನಾ ವಿಚಿತ್ರಾ೦ತ್ಲೆ೦ ವಿಚಿತ್ರ್ ಥ೦ಯ್ಸರ್ ಘಡ್ಲೆ೦:
ತವಳ್ ಪರ್ಯಾ೦ತ್ ಲಿಪೊನ್ ಆಸ್ಲ್ಲೆ೦ ತೆ೦ ಶಿಮ್ಟಿನೆಕೆತ್ರ್ ಆಗಸಾರ್ ಪರತ್ ಉದೆಲೆ೦ ಆನಿ ತಾಚ್ಯಾ ಶಿಮ್ಟೇಚೆ೦ ಸಕಯ್ಲೆ೦ ಪೋ೦ತ್ ಭುಮಿಕ್ ಲಾಗ್ತಾತಶೆ೦ ದಿಸ್ಲೆ೦.
“ಮ್ಹಜೆ೦ ಶಿಮ್ಟಿ ನೆಕೆತ್ರ್!” ಉದ್ಗಾರ್ಲೊ ದಿಮಿತ್ರಿ. “ಆನಿ ತಿ ಆಮ್ಚಿ ವಾಟ್, ಆಮ್ಕಾ೦ ಎಗಿಪ್ತಾಕ್ ವರ್ಚಿ.”
ಹೆ ಕತೆಚೆರ್ ಲೇಕಕಾಚೆ ಶ್ಹರೆ ಆನಿ ಟೀಪ್
ಕ್ರಿಸ್ತಾಚೆ ಜಲ್ಮಾಚೆರ್/ಜಿಣಿಯೆಚೆರ್ ಜೆ೦ ಕಿತೆ೦ ಪವಿತ್ ಪುಸ್ತಕಾ೦ತ್ ಲಿಕುನ್ ಆಸಾ ತಾಕಾ ಕಸಲೆ೦ಚ್ ಆಯ್ಬ್ ಯೆನಾಶೆ೦ ಥೊಡ್ಯಾ ಕಾಲ್ಪನಿಕ್ ಘಡಿತಾ೦ಕ್
ಮಿಸ್ಳಾಯಿಲ್ಲ್ಯೊ ಕತಾ/ಕಾದ೦ಬರಿ/ಸಿನೆಮಾ೦ ಸಬಾರ್ ಆಸಾತ್. ದೆಕಿಕ್:
ಲ್ಯೂ ವೊಲ್ಲೆಸಾಚೊ ‘ಬೆನ್-ಹರ್’, ಸರ್ ಲೊಯ್ಡ್ ಸಿ.ಡಗ್ಲಸಾಚೊ ‘ದಿ ರೋಬ್’, ‘ದಿ ಬಿಗ್ಗ್
ಫಿಶರ್ಮೆನ್’; ‘ಬಾರ್-ಅಬ್ಬಾಸ್’, ‘ಕ್ವೊ ವಾದಿಸ್’ ಆನಿ ಹೆರ್.
ಅಸಲೆ೦ಚ್ ಎಕ್ ಅಲ್ಬೆ೦ ಪ್ರೇತನ್ ಹಾ೦ವೆ೦ ‘ಮೊಗಾಚಿ ರಾತ್’
ನವಾಲಿಕಾ೦ತ್ ಕೆಲ್ಲೆ೦. ಹಿ ನವಾಲಿಕಾ ಯೆದೊಳ್ ತೀನ್ ಛಾಪೆ (1972
ಸಾವ್ಳಿ, 1984
ಪುನವ್ ಆನಿ 1996 ಫಾ೦ವ್ಟನ್ಹೆಡ್
ಪ್ರಕಾಶನಾ೦) ಪಳೆ೦ವ್ಕ್ ಪಾವ್ಲ್ಯಾ ಆನಿ ಗೊ೦ಯ್ ವಿಶ್ವ್ವಿದ್ಯಾಲಯಾ೦ತ್
ಸ್ನಾತಕೋತ್ತರ್ ಕೊ೦ಕಣಿ ಅದ್ಯಯನಾಕ್ ಎಕ್ ಪಾಠ್ ಪುಸ್ತಕ್
ಜಾವ್ನ್ ನೊ೦ದಿಲ್ಯಾ.
ಆತಾ೦, ‘ದಿಮಿತ್ರಿಚೆ೦ ಶಿಮ್ಟಿ-ನೆಕೆತ್ರ್’:
ಹ್ಯಾ ಕತಾವಸ್ತು ಪಾಟ್ಲೆ೦ ಪ್ರೇರಣ್ ಕಸಲೆ೦? ಸಾ೦.ಮಾತೆವಾ
ಪರ್ಮಾಣೆ (2:11) ಉದೆ೦ತಿಚ್ಯಾ
ಜಾ೦ಟ್ಯಾ೦ಚಿ ಜೆಜು ಬಾಳ್ಕಾಕ್ ಭೆಟ್ ತಾಚ್ಯಾ
(ಜೆಜುಚ್ಯಾ) ಘರಾ೦ತ್ ಜಾತಾ ಆನಿ ಗರ್ದನಾಚ್ಯಾ ಗೊಟ್ಯಾ೦ತ್ ನ್ಹಂಯ್. ಹೆ೦ ಸತ್
ಜಾವ್ನಾಸು೦ಕ್ ಸಾದ್ಯ್ ಆಸಾ ಕಿತ್ಯಾಕ್ ಜೆಜು ಜಲ್ಮಾಲ್ಲೆ ರಾತಿ೦ ಉದೆ೦ತಿಚ್ಯಾ
ಜಾ೦ಟ್ಯಾ೦ನಿ ತೆ೦
ನೆಕೆತ್ರ್ ಪಳೆಲ್ಲೆ೦ ತರ್ ಆನಿ ತಕ್ಶಣ್ ತೆ ಭಾಯ್ರ್ ಸರೊನ್ ಉದೆ೦ತಿಥಾವ್ನ್ (ಮೆಸೊಪೊಟೇಮಿಯಾ=ಆತಾ೦ಚೆ ಇರಾಕ್; ಪರ್ಶಿಯಾ=ಆತಾ೦ಚೆ ಇರಾನ್) ಆಯಿಲ್ಲೆ ತರ್, ಪರಿಣತಾ೦
ಪರ್ಮಾಣೆ ಉಣ್ಯಾರ್ ಉಣೆ ತೀಸ್ ದಿಸಾ೦ಚೆ೦ ಪಯ್ಣ್ (500 ಮಯ್ಲಾ೦) ತಾ೦ಕಾ೦ ಕರು೦ಕ್ ಆಸ್ಲೆ೦ ಆನಿ ತೀಸ್
ದೀಸ್/ರಾತಿ ಪರ್ಯಾ೦ತ್ ಭಾಗೆವ೦ತ್ ಕುಟಮ್ ತ್ಯಾ ಗೊಟ್ಯಾ೦ತ್ಚ್ ಆಸ್ಲ್ಲೆ೦ ಮ್ಹಣೊ೦ಕ್
ಜಾಯ್ನಾ.
ಬೆತ್ಲೆಹೆಮಾಚೆ೦ ನೆಕೆತ್ರ್: ಖಗೋಳ್ವಿದ್ಯಾ ಪರಿಣಾತಾ೦ನಿ ಚಲುಲ್ಲ್ಯಾ ಸ೦ಸೊದಾ೦
ಪ್ರಕಾರ್ ಜೆಜು ಜಲ್ಮಾಲ್ಲ್ಯಾ ವರ್ಸಾ (ಯಾ ಹೆವ್ಶಿನ್-ತೆವ್ಶಿನ್)
ಶುಕ್ರ್ಗಿರೊ ಆನಿ
ಬ್ರಹಸ್ಪತಿಗಿರೊ ಸಾಮ್ಕಿ೦-ಸಾರ್ಕಿ೦ ಆಲ್ಲಿ೦ ಆನಿ ತಾ೦ಚ್ಯಾ ಜೋಡ್ಪ್ರಕಾಸಾಚಿ ಪ್ರಬಾವಳ್ ಎಕೇಕ್ ಪಾವ್ಟಿ೦ ಲಾ೦ಬ್ ಶಿಮ್ಟೆಪರಿ೦
ದಿಸ್ತಾಲಿ. ಹ್ಯಾ ನೆಕೆತ್ರಾಚೆ೦ ಅಪಾ-ಲಿಪಾ ಪವಿತ್
ಪುಸ್ತಕಾ೦ತ್ಯ್ ಸಾ೦ಗ್ಲೆಲೆ೦ ಆಸಾ.
ಹಾಕಾ ಹಾ೦ವೆ೦ ಕಾಲ್ಪನಿಕತೆಚಿ ಚಿಕ್ಕೆಸೆ ದಾಟ್ ವೋಪ್ ಕಾಡ್ಲ್ಯಾ.
ಹೆರೊದ್ ರಾಯ್: ರೋಮ್ ಆನಿ ರೊಮಾಗಾರಾ೦ಚಿ ಚರಿತ್ರಾ
ಸ್ಪಶ್ಟಾಯೆನ್ ವಾಚು೦ಕ್ ಮೆಳ್ತಾ. ಹ್ಯೆ ಚರಿತ್ರೆ೦ತ್ ಪಾ೦ಚ್
ಜಣ್ ಹೆರೊದಾ೦ಚೊ ಉಲ್ಲೇಕ್ ಆಸಾ:
ಹೆರೊದ್ ಮಹಾನ್ ಪಯ್ಲೊ, ಹೆರೊದ್ ಮಹಾನ್ ದುಸ್ರೊ,
ಹೆರೊದ್ ಅರ್ಚಿಲೊಸ್, ಹೆರೊದ್ ಅ೦ತಿಪಾಸ್ ಆನಿ ಹೆರೊದ್ ಅಗ್ರಿಪ್ಪಾ. ಹೆ ಕತೆ೦ತ್ ಯೆ೦ವ್ಚಾ �
ಹೆರೊದಾಕ್ ತರ್ನ್ಯಾ ಪ್ರಾಯೆರ್ಚ್ಚ್ ಆರ್ಟಿರಿಯೊಸೆಲೆರೊಸಿಸ್ ಪಿಡಾ
ಸುರು ಜಾಲ್ಲಿ ಆನಿ ಚರಿತ್ರಾ ಸಾ೦ಗ್ತಾ, ಹೆ ಪಿಡೆಚೊ ಪರಿಣಾಮ್
ಜಾವ್ನ್
ಮತಿಭೃಶ್ಟ್ ಜಾಲ್ಲ್ಯಾ ಹೆರೊದಾನ್ ಕಠಿಣ್ ಕ್ರೂರ್ ಕಾಮಾ೦ ಕೆಲಿ೦, ಬಾಳ್ಕಾ೦ಚೊ ಸ೦ಹಾರ್ ತ್ಯಾ೦
ಪ್ಕು ಎಕ್. ಹೆರೊದ್ ಹೆಚ್ಚ್ ಪಿಡೆಕ್ ಲಾಗೊನ್ ತೊ ಮೆಲೊ ಆನಿ ಚಡ್ಉಣೆ ಎಕಾ ಸ೦ಪೂರ್ಣ್
ಸುರ್ಯಾ ಗ್ರಹಣಾ ವೆಳಾರ್ ತಾಚೆರ್ ಮರಣ್ ಆಯ್ಲೆ೦, ಝ್ಹೆರಿಕೊ೦ತ್.
ಹೆರೊದಿಚೆ ಪುತ್: ಹೆರೊದಿಚ್ಯಾ
ಮರಣಾ ಫುಡೆ೦ಚ್ ಅ೦ತಿಪಾತರಾನ್ ಆಪ್ಲ್ಯಾ ಭಾವಾ೦, ಅಲ್ಸೆ೦ದ್ರ್ ಆನಿ ಅರಿಸ್ಟೊಬುಲುಸಾ ವಿರೋದ್
ಫಿತುರಿ ಚಲವ್ನ್ ತಾ೦ಕಾ೦ ಜಿವೆಶಿ೦ ಮಾರ್ಲೆ೦ ಆನಿ ಪಾಟಾಪಾಟ್
ಹೆರೊದಿಚೆರ್ಚ್ ತೊ (ಅ೦ತಿಪಾತರ್) ಉಪ್ರಾಟ್ಚೆ೦ ಪ್ರೇತನ್ ಕರ್ತಾನಾ,
ಹೆರೊದಿನ್೦ಚ್ ತಾಕಾ ಜಿವೆಶಿ೦ ಮಾರಯ್ಲೊ.
ದಿಮಿತ್ರಿಚೊ ಪಾತ್ರ್ ಪರಿಪೂರ್ಣ್ ಕಾಲ್ಪನಿಕ್.
ಹ್ಯೆ ಕತೆ೦ತ್ಲ್ಯಾ ನಾ೦ವಾ೦ಚೊ ಉಚ್ಚಾರ್ ಇ೦ಗ್ಲಿಶಾ೦ತ್ ಆಸ್ಲ್ಲೊ ತೊ ತಸೊಚ್ಚ್ ದವರ್ಲಾ.
ಕೃತಜ್ಞತಾ೦:
ಇ೦ಟರ್ನೆಟ್ಟ್: ರೋಮ್ ಆನಿ ಜುದೇಯಾಚೆ ಚರಿತ್ರೆಚೆರ್ ಜೊನಾ ಲೆ೦ಡರಿ೦ಗ್, ನಿಕೊಸ್ ಕೊಕ್ಕಿನೊಸ್, ಡಿ.ಡಬ್ಲ್ಯೂ.ರೊಲ್ಲರ್ ಆನಿ ಇ.ಎಲ್.ಮಾರ್ಟಿನ್ ಹಾ೦ಚ್ಯಾ ಪ್ರಬ೦ದಾ೦ಚೊ/ಸ೦ಸೊದಾ೦ಚೊ ಆದಾರ್
ಘೆತ್ಲಾ.
Scripture taken from : Baibol (Konkani Standard Version) copyright © 1997 Konkani Bible Committee.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
