ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 11. ಭಾಂದುನ್ ದಿಲ್ಲಿ ಭುತಿ
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಕುಟ್ಮಾಂತ್ ಏಕ್ ಆವಯ್ ಬಾಪಯ್ ಆನಿ ಏಕ್ ಪೂತ್ ಆಸ್ಲ್ಲೊ. ತಾಂಕಾಂ ಆಸ್ಚೊ ಎಕ್ಚ್ಚ್ ಪೂತ್ ಜಾಲ್ಲೆವರ್ವಿಂ ಮೊಸ್ತ್ ಮೊಗಾನ್ ಆನಿ ಕೊಂಡಾಟ್ಯಾನ್ ತಾಕಾ ವ್ಹಡ್ ಕೆಲ್ಲೊ ದೆಖುನ್ ತರ್ನಾಟೊ ಜಾವ್ನ್ ಯೆತಾ ಪರ್ಯಾಂತ್ ತಾಕಾ ಜಾವಾಬ್ಧಾರಿ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಕಳೊಂಕ್ಚ್ನಾ.
ಬಾಪುಯ್ ಸದಾಂ ಕಾಮ್ ಕರ್ತಾಲೊ ಆನಿ ಆಪ್ಲ್ಯಾ ಕುಟ್ಮಾಕ್ ಪೊಸ್ತಾಲೊ ತರ್ ಹೊ ಪೂತ್ ಸದಾಂ ಇಶ್ಟಾಂ ಸಾಂಗಾತಾ ಭಂವೊನ್ ಬಾಪಾಯ್ಚಿ ಜೋಡ್ ಮೊಡ್ತಾಲೊ.
ಅಶೆಂ ಆಸ್ತಾಂ ಏಕ್ ದೀಸ್ ಬಾಪಾಯ್ಕ್ ಪುತಾಚಾ ಫುಡಾರಾಚಿ ಖಂತ್ ಉದೆಲಿ ಆನಿ ಹಿ ಖಂತ್ ತಾಣೆ ಆಪ್ಲ್ಯಾ ಬಾಯ್ಲೆಲಾಗಿಂ ಸಾಂಗ್ಲಿ.
ಆನಿಂ ಪುತಾಕ್ ಜವಾಬ್ದಾರಿ ಯೇಜಯ್ ತರ್ ತಾಣೆಂಯ್ ಕಿತೆಂ ತರೀ ಕಾಮ್ ಕರುಂಕ್ ಸುರು ಕರುಂಕ್ ಜಾಯ್ ಮ್ಹಣೊನ್ ಸಾಂಗ್ಲೆಂ.
ಪುಣ್ ಕಿತೆಂ ಜಾಲ್ಯಾರೀ ಪೂತ್ ತೊ ಪೂತ್ಚ್ಚ್ ಶಿವಾಯ್ ಖಂಯ್ಚಾಯ್ ಆವಯ್ಕ್ ತೊ ಪೂತ್ಚ್ಚ್ ಜಾತಾ ಶಿವಾಯ್ ಭುತ್ ಜಾಯ್ನಾ. ತಶೆಂಚ್ ತಿಣೆ ಕಾಂಯ್ ಕಾನ್ ಹಾಲಯ್ಲೆನಾಂತ್. ದೀಸ್ ಅಶೆಚ್ಚ್ ಪಾಶಾರ್ ಜಾಲೆ ಆನಿ ಭಾಯ್ಲೆನ್ ಕಾನ್ ಹಾಲಂವ್ಕ್ ನಾತ್ಲ್ಲೆಂ ಪಳೆಲ್ಲೊ ಬಾಪುಯ್ ಏಕ್ ದೀಸ್ ಪುತಾಕ್ ಆಪವ್ನ್ ಫಾಲ್ಯಾಂ ಥಾವುನ್ ತುಜಿ ಭಂವ್ಡಿ ಪುರೊ ಆನಿ ಸದಾಂ ತುಂವೆ ಕಾಮ್ ಕರುಂಕ್ ಜಾಯ್ ಆನಿ ಸದಾಂ ತುಂವೆಂ ಜೊಡುನ್ ಹಾಡ್ಲ್ಲೆಂ ನಾಣೆಂ ಆಪ್ಣಾಕ್ ದೀಂವ್ಕ್ ಜಾಯ್ ಮ್ಹಣೊನ್ ಸಾಂಗಾಲಾಗ್ಲೊ. ಪುತಾಕ್ ಹೆಂ ಆಡೂಕ್ ಲಾಗ್ಲೆಂ ತರೀ ಬಾಪುಯ್ ತೊ ಬಾಪುಯ್ ಪಳೆ. ದೆಖುನ್ ಜಾಯ್ತ್ ಮ್ಹಣಾಲೊ.
ಆವಯ್ಚೆಂ ಕಾಳಿಜ್ ದುಖ್ಲೆಂ ಆನಿಂ ಮ್ಹತಿ ಭಿತರ್ ಪುತಾಕ್ ಹ್ಯಾ ಸಂಕಶ್ಟಾಂತ್ಲೊ ಬಚಾವ್ ಕರುಂಕ್ ಕಿತೆಂ ಕರ್ಚೆಂ ಮ್ಹಣೊನ್ ರಾತ್ಭರ್ ಚಿಂತಿಲಾಗ್ಲಿ. ದುಸ್ರೆ ದೀಸ್ ಬಾಪುಯ್ ಉಟೊನ್ ಕಾಮಾಕ್ ಗೆಲೊ ಆನಿ ಪೂತ್ ಖಂತೀನ್ ಬೊಸ್ಲೊ ತೆಂ ಪಳೆವ್ನ್ ಆವಯ್ಚೆಂ ಕಾಳಿಜ್ ಕಡ್ಲೆಂ ಆನಿಂ ಪುತಾಕ್ ಸಮಾಧಾನ್ ಕರುಂಕ್ ತಿ ಭಿತರ್ ವಚೊನ್ ಪತಿಚಾ ಬೊಲ್ಸಾಂತ್ ಆಸ್ಚೆಂ ಏಕ್ ನಾಣೆಂ ಕಾಡುನ್ ಪುತಾಕ್ ದೀವ್ನ್ ಹಿ ವಿಶಯ್ ಕೊಣಾಕೀ ಸಾಂಗಾನಾಸ್ತಾಂ ಸಾಂಜೆರ್ ಯೇವ್ನ್ ತೆಂ ನಾಣೆಂ ಬಾಪಾಯ್ಕ್ ದೀಂವ್ಕ್ ಸಾಂಗಾಲಾಗ್ಲಿ. ಪೂತ್ ಖುಶೇನ್ ತೆಂ ನಾಣೆಂ ಘೆವ್ನ್ ಗೆಲೊ ಆನಿ ದೀಸ್ಭರ್ ಭಂವೊನ್ ರಾತಿಂ ಪುರಾಸಾಣೆಚೊ ವೇಸ್ ಪಾಂಗ್ರುನ್ ಯೇವ್ನ್ ತೆಂ ನಾಣೆಂ ಆಪ್ಲ್ಯಾ ಬಾಪಾಯ್ಕ್ ದಿಲೆಂ.
ಬಾಪಾಯ್ನ್ ತೆಂ ನಾಣೆಂ ಕಾಡ್ನ್ ಆಂಗ್ಣಾಕ್ ಉಡಯ್ಲೆಂ ಆನಿ ತಿಂ ಸಾಂಗಾತಾ ಜೆವ್ಲಿಂ.
ಅಶೆಚ್ಚ್ ತೊಡೆ ದೀಸ್ ಪಾಶಾರ್ ಜಾಲೆ, ಪೂತ್ ಸದಾಂ ಆವಯ್ಲಾಗ್ಚೆಂ ನಾಣೆಂ ಘೆವ್ನ್ ವೆತಾಲೊ ಆನಿ ದೀಸ್ಭರ್ ಭಂವೊನ್ ಸಾಂಜೆರ್ ಯೇವ್ನ್ ತೆಂ ನಾಣೆ ಬಾಪಾಯ್ಕ್ ದಿತಾಲೊ ಆನಿ ಬಾಪುನ್ ತೆಂ ನಾಣೆಂ ಕಾಡ್ನ್ ಆಂಗ್ಣಾಕ್ ಉಡಯ್ತಾಲೊ. ಏಕ್ ದೀಸ್ ತಿ ಆವಯ್ ಸಲ್ವಾಲಿ. ತಿಕಾ ತಿಚಾ ಪತಿಚಾ ಬೊಲ್ಸಾಂತ್ ನಾಣೆಂ ಮೆಳ್ಳೆಂ ನಾ ಆನಿ ಪುತಾಕ್ ತಿಣೆ ಸಾಂಗ್ಲೆಂ ’ಫುತಾ ಆಜ್ ತುಂ ನೀಜ್ ಜಾವ್ನ್ ಕಾಮ್ ಕರ್ ಕಿತ್ಯಾಕ್ ಮ್ಹಳ್ಯಾರ್ ಆಜ್ ನಾಣೆಂ ನಾ’.
ಹೆಂ ಆಯ್ಕೊನ್ ಪೂತ್ ಬಾವ್ಲೊ ತರೀ ಕಾಮ್ ಕರಿನಾಸ್ತಾಂ ದುಸ್ರೊ ಉಪಾವ್ ನಾತ್ಲೆಲ್ಯಾವರ್ವಿಂ ತೊ ಕಾಮ್ ಕರುಂಕ್ ಗೆಲೊ.
ಅಶೆಂ ದೀಸ್ ಭರ್ ವೊತಾಂತ್ ಘಾಮ್ ಪೀಳ್ನ್ ಕಾಮ್ ಕರ್ನ್ ಪುರಾಸಾಣೆಂತ್ ಆಯಿಲ್ಲ್ಯಾ ಪುತಾನ್ ಸದಾಂಚೆಪರಿಂ ಬಾಪಾಯ್ಕ್ ನಾಣೆಂ ದಿಲೆಂ ಆನಿ ಸದಾಂಚೆಪರಿಂಚ್ಚ್ ಬಾಪಾಯ್ನ್ ತೆಂ ನಾಣೆಂ ಕಾಡ್ನ್ ಆಂಗ್ಣಾಕ್ ಉಡಯ್ಲೆಂ. ತವಳ್ ಪೂತ್ ರಾಗಾನ್ ಪೆಟ್ಲೊ ಆನಿ ತಶೆಂ ನಾಣೆಂ ಉಡಯಿಲ್ಲ್ಯಾ ಬಾಪಾಯ್ಕ್ ಸವಾಲ್ ಕರಿಲಾಗ್ಲೊ.
ಬಾಪುಯ್ ಏಕ್ ಘಡಿ ಪುತಾಕ್ ಪಳೆವ್ನ್ ಹಾಸ್ಲೊ ಆನಿ ಮ್ಹಣಾಲೊ ’ಪುತಾ ಹೊಚ್ಚ್ ತುಜಾ ಪಯ್ಲ್ಯಾ ಮಿನತೆಚೊ ಫಳ್ ಆನಿ ತೆಂ ಪಾರ್ಕುಂಕ್ ಹಾಂವ್ ಅಶೆಂ ಕರ್ತಾಲೊ. ಬಾಂದುನ್ ದಿಲ್ಲಿ ಭುತಿ ಕೆದ್ನಾಂಯ್ ಅರ್ಧ್ಯಾಕ್ಚ್ಚ್ ಪಾವ್ತಾ ಪುತಾ, ಶೆವೊಟಾ ಪರ್ಯಾಂತ್ ಉರ್ಚಿ ಭುತಿ ಆಮ್ಚಿ ಮಿನತ್ ಮಾತ್ರ್’
ಸಂದೇಶ್: ಮೆಜಾವಯ್ಲೆಂ ಕೆಳೆಂ ಕಾಡ್ನ್ ಪಿಲ್ಯಾದ್ ಜೊಡ್ಚಾಂತ್ ಕೊಣಾಯ್ಕೀ ಭುಲವ್ಯೆತ್ ತರೀ ತಿ ಭುಲವ್ಣಿ ಶಾಶ್ವತ್ ನ್ಹಂಯ್. ಕಿತ್ಯಾಕ್ ಮ್ಹಳ್ಯಾರ್ ತೆಂ ಮೆಜಾರ್ ಆಸ್ಲ್ಲೆಂ ಕೆಳೆಂ ಕೊಣಾಚಾಗೀ ಮಿನತೆನ್ ಅಯಿಲ್ಲೆಂ. ಆನಿಂ ಮಿನತ್ ಕೊಣಾಯ್ಕೀ ಬೆಶ್ಟೆಂ ಸೊಡ್ನ್ ಘಾಲಿನಾ. ಸಂಸಾರಾಚಾ ನದ್ರೆಕ್ ಕೊಣೆಂಯ್ ಫ಼ಟವ್ಯೆತ್, ಪುಣ್ ಆಪ್ಲ್ಯಾ ಅಂತಸ್ಕರ್ನಾಕ್ ಸರಿ ಜಾವ್ನ್ ಮಿನತ್ ಕೆಲ್ಯಾರ್ ತಾಚೊ ಪ್ರತಿಫ಼ಳ್ ಖಂಡಿತ್ ಚುಕಾನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
