ಕವಿತಾकविताPoem
ಡಿ’ಕುನ್ಹಾಚಿಂ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
’ಪಥ್ಥರ್ ಕಹಾ ಗಯಾ ಕಭಿ
ಶೀಶಾ ಕಹಾ ಗಯಾ
ದಿಲ್ ಜೈಸಿ ಏಕ್ ಚೀಜ್ ಕೊ
ಕ್ಯಾ ಕ್ಯಾ ಕಹಾ ಗಯಾ’
ಕಿತ್ಯಾಕ್ಗಿ ಹಿಂ ಉತ್ರಾಂ ಮ್ಹಜೆ ಮತಿಕ್ ಯೆತಾತ್, ಕೆದ್ನಾಂಯ್ ಕೊಣಾಯ್ ಎಕಾ ವಾವ್ರಾಡ್ಯಾಕ್ ಪಳೆತಾನಾ. ಜಾಂವ್ ತೊ ಭಾಸೆಚೊ ವಾವ್ರ್, ಸಾಹಿತಿಕ್ ವಾವ್ರ್ ವಾ ಜಾಂವ್ ಸಮಾಜ್ ವಾವ್ರ್. ಹರ್ಯೆಕ್ಲ್ಯಾಕ್ ಕಿತೆಂ ಕಿತೆಂ ಆಯ್ಕೊಂಕ್, ಸೊಸುಂಕ್, ಭಗುಂಕ್ ಮೆಳ್ತಾನಾ ಖರೆಂಚ್ ಜೆಜುನ್ ಸಾಂಗ್ಲ್ಲ್ಯಾ ಆಟ್ ಭಾಗಿಂಚಿ ವೊಪಾರ್ ಉಡಾಸಾಕ್ ಯೆತಾ ಆನಿ ನೊವೊ ಭಾಗಿ ಆಮ್ಚೆ ದೊಳ್ಯಾಂ ಮುಖಾರ್ ಉಭೊ ಜಾತಾ - ಜೊ ಹಾತ್ ಭಾಂದುನ್ ವೊಗೊಚ್ಚ್ ಆಸಾ, ಜೊ ಜೆಮೆವ್ನ್ ಜಿಯೆವ್ನ್ ಆಸಾ ತೊಚ್ ಹೊ ನೊವೊ ಭಾಗಿ.
ಕವಿ ’ಸಬ್ಧ್’ ಚೊರ್ತಾತ್ ಮ್ಹಳ್ಳೆಂ ದುರ್ಸೊಣೆಂ ಆಯ್ಕೊನ್ ಆಯಿಲ್ಲ್ಯಾ ಮ್ಹಾಕಾ ಆಯ್ಲೆವಾರ್ ಅಸಲೆಂಚ್ ಘಡಿತ್ ಭೆಟ್ಲೆಂ. ಆಮ್ಚೆಂ ಚಿಂತಾಪ್ ಕಿತ್ಲೆಂ ಉತಳಾಯೆಚೆಂ ಮ್ಹಣ್ಚ್ಯಾಕ್ ಭೋವ್ಶಾ ಹೆಂ ಘಡಿತ್ ಅಪುರ್ಭಾಯೆಚಿ ಗೊವಾಯ್ ದೀತ್; ಅರೆ ಬಾಬಾ ಹಾಂಗಾ ಕೊಣ್ ಹೆರಾಂಚಿ ಆಸ್ತ್ ಚೊರ್ತಾ, ಕೊಣ್ ಹೆರಾಂಚೊ ಮಾನ್ ಚೊರ್ತಾ, ಕೊಣ್ ಹೆರಾಂಚೆಂ ಬದಿಕ್ ಚೊರ್ತಾ, ಕೊಣ್ ಹೆರಾಂಚಿಂ ಸ್ವಪ್ಣಾಂ ಚೊರ್ತಾ, ಕೊಣ್ ಹೆರಾಂಚೆಂ ಸಾಹಿತ್ಯ್ ಚೊರ್ತಾ ತರ್ಯೀ ಆಮಿ ಜೆಮೆವ್ನ್ ಆಸಾಂವ್. ಆತಾಂ ಎಕಾ ಕವಿನ್ ಏಕ್ ಸಬ್ಧ್ ಜೊ ಕೊಣೆಂಗೀ ಕೆದ್ನಾಂಗೀ ವ್ಹಾಪಾರ್ಲಲೊ ಸಬ್ಧ್ ವ್ಹಾಪಾರ್ಲ್ಲ್ಯಾಕ್ ತಾಚೆರ್ ಚೊರಿಯೆಚೊ ಅಪ್ರಾಧ್ ಮಾಂಡ್ಚೆಂ ಚಿಂತಾಪ್ ಕಿತ್ಲೆಂ ಉತಳಾಯೆಚೆಂ ಪಳೆಯಾ. ಖಂಯ್ ಆಸಾ ಆಮ್ಚಿ ಮತ್? ಖಂಯ್ ಆಸಾ ಆಮ್ಚೆಂ ಚಿಂತಾಪ್? ಕಿತ್ಯಾಕ್ ಆಮ್ಚಿಂ ಮತ್, ಆಮ್ಚೆಂ ಚಿಂತಾಪ್, ಆಮ್ಚೆ ವಿಚಾರ್ ಕುಸೊನ್ ಗೆಲ್ಯಾತ್?
ಅಸಲೆಂಚ್ ಚಿಂತಾಪ್ ಪರೋಕ್ಶ್ ರಿತಿನ್ ಹ್ಯಾ ಕವಿತೆಂತ್ ದಿಸೊನ್ ಯೆತಾ. ಮನಿಸ್ ಸರ್ವ್ ಖಿಣಾನ್ ಆಶೆತಾ, ಆಜ್ ಮನ್ಶ್ಯಾಲಾಗಿಂ ಸರ್ವಸ್ವ್ ಆಸಾ, ಕಂಪ್ಯೂಟರ್ ಆಸಾ, ಕಾರಾಂ ಆಸಾತ್, ಬಂಗ್ಲೆ ಆಸಾತ್, ಜಾಗೊ ಆಸಾ, ಶೇರ್ ಮಾರ್ಕೆಟಿಂನಿ/ಮ್ಯೂಚುವಲ್ ಫಂಡಾಂನಿ ದುಡು ಆಸಾ, ಸಮಾಜೆಂತ್ ಸ್ಥಾನ್-ಮಾನ್ ಆಸಾ, ಏಕ್ ಪುಸ್ಕಿ ಮಾರ್ಲ್ಯಾರ್ಯೀ ವೆದಿಚೆರ್ ಆಪವ್ನ್ ಫುಲಾಂ ಫಳಾಂ ಶಾಲಾಂ ಘಾಲ್ತಾತ್, ಪತ್ರಾಂನಿ ಸಾಯ್ಟಾಂನಿ ತಸ್ವೀರೊ ಯೆತಾತ್. ಹ್ಯಾ ಪರಿಗತೆಂತ್ ಸತ್ ಸಾಂಗ್ಚೆಂ ತರ್ ಮನಿಸ್ ಲಾಚಾರ್ ಜಾಲಾ. ಗರೀಬ್ ಜಾಲಾ. ಅಸ್ಕತ್ ಜಾಲಾ. ಜಿತ್ಲೊ ಭಾಯ್ಲೊ ಆಡಂಬರ್ ತೊ ಕರ್ನ್ ಸಂಸಾರಾಕ್ ಫಟಯ್ತಾಕೀ ತಿತ್ಲೊಚ್ ಪೊಕೊಳ್ ತೊ ಭಿತರ್ಲೆ ಭಿತರ್ ಜಾಲಾ. ಆಜ್ ಮನ್ಶ್ಯಾಲಾಗಿಂ ಎಕಾಮೆಕಾಕ್ ವೇಳ್ ನಾ. ಅಪ್ಲ್ಯಾ-ಪೆಲ್ಯಾಕ್ ಆಯ್ಕೊಂಕ್, ಪಳೆಂವ್ಕ್ ತಾಚೆಲಾಗಿಂ ವೇಳ್ ನಾ - ಕಸ್ಲಿಗೀ ಶೆವೊಟ್ ನಾತ್ಲ್ಲ್ಯಾ ಗಾಂವಾಕ್ ಧಾಂವ್ಣಿ.
ಹ್ಯಾ ಮಧೆಂ ಕವಿ ಖಂಚ್ಯಾ ಪಾಂವ್ಡಾರ್ ಜಿಯೆಂವ್ಕ್ ಲಾಗ್ಲ್ಯಾತ್? ಪತ್ರಾಂನಿ ಪ್ರಾಸ್ಬದ್ದ್ ಉತ್ರಾಂ ವಿಣುನ್ ಕವಿ ಜಾಲ್ಲೆ ಹೆಂ ಸಮ್ಜಂವ್ಚೆ ನಾಂತ್. ಅಸಲ್ಯಾಂಕ್ ಹಾಂಚೆ ಬಗ್ಲೆನ್ ಕೊಣಾ ಕೊಣಾಚೆಂ ಖಾತರ್ನ್ ಘಾಲ್ಲೆಂ ಮಾಸ್ ಕುಸೊನ್ ಆಸ್ಲ್ಯಾರೀ ಘಾಣ್ ನಾ. ಕೊಣಾ ಕೊಣಾ ಅಸ್ಕತ್ಯಾಂಚೆಂ ರಗಾತ್ ತಾಂಚೆ ಬಗ್ಲೆನ್ ಪಾಶಾರ್ ಜಾಲ್ಯಾರೀ ತಾಂಕಾಂ ತೆಂ ಫಕತ್ತ್ ಏಕ್ ರಂಗ್ ಜಾವ್ನ್ ದಿಸ್ತಾ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್ - ಕಿತ್ಯಾಕ್? ಚಿಂತ್ಪಾಚಿ ಉತಳಾಯ್. ಚಿಂತ್ಪಾಚಿ ಆಳ್ಸಾಯ್. ವೇಳ್ ನಾ. ವೇಳ್ ಆಸ್ಲ್ಯಾರ್ ಮೂಡ್ ನಾ. ಮೂಡ್ ಆಸ್ಲ್ಯಾರ್ ಚಿಂತುಂಕ್ ನಾಕಾ. ಚಿಂತುಂಕ್ ಜಾಯ್ ಜಾಲ್ಯಾರೀ ತಾಚ್ಯಾಧಿಂ ಅಪ್ಣಾಕ್ ಕಿತೆಂ ಫಾಯ್ದೊ-ಲುಕ್ಸಾಣ್ ಮ್ಹಣ್ ಚಾಚ್ಯಾರ್ ಪಾವ್ಟಿಂ ಚಿಂತುಂಕ್ ಪಡ್ತಾ.
ಕವಿ ಆಂಡ್ರುಕ್ ಹಾಂವ್ ಏಕ್ ಖರೊ ಕವಿ ಮ್ಹಣ್ ಮಾಂಧ್ತಾಂ. ಕಿತ್ಯಾಕ್ ತಾಚಿ ಜಿಣಿಂಚ್ ಏಕ್ ಕವಿತಾ. ತಾಚೆಂ ಚಿಂತಾಪ್ ಏಕ್ ಕವಿತಾ. ತಾಚ್ಯೊ ಎಕೇಕ್ ಕಾಣ್ಯೊ ಎಕೇಕ್ ಕವಿತಾ. ತಾಚ್ಯಾ ಕವಿತೆಚಿ ಘಟಾಯ್ ತರ್ಯೀ ಪಳೆಯಾ; ಹ್ಯಾ ಸಂಸ್ರಾಂತ್ ಮನಿಸ್ ಅಪ್ಲೆಂ ಬಂಡ್ವಾಳ್ ಘಾಲುಂಕ್ ಆಶೆತಾ ಮುನಾಫೊ ಜೊಡ್ಚಾ ವಾಟಾಂನಿ. ಹ್ಯಾ ಪರಿಗತೆಂತ್ ಮನಿಸ್ ಮನ್ಶಾಕ್ ಮೋಲ್ ದೀನಾ, ಅಪ್ಲೊ ಪೆಲೊ ತಾಕಾ ಪಡೊನ್ ಗೆಲ್ಲೆಂ ನಾ - ದೆಕುನ್ ಆಮ್ಚಾ ಸಮಾಜೆಚಾ ಖಣಿಂನಿ, ವೋಣಿಂನಿ, ಚರಂಡೆನಿ ಮೊಡಿಂ ಪಡ್ಲ್ಯಾಂತ್, ಕೊಣಾಚಿಂ ಲ್ಹಾಲ್ಹಾನ್ ಬಾಳಾಂ, ಕೊಣಾಚ್ಯೊ ಭಯ್ಣ್ಯೊ, ಕೊಣಾಚಿಂ ಬಾಯ್ಲಾಂ, ಕೊಣಾಚ್ಯೊ ಆವಯೊ ಆನಿ ಕೊಣಾಚೆ ಭಾವ್...
ಜಾಗೊ ಆಸಾ!
ಅರೆ!
ಮೊಳ್ಬಾಕ್ ಚಡ್ಲಾಂ
ಮೊಲ್
ಜಾಗ್ಯಾಂಚೆಂ!
ಮ್ಹಜೆಲಾಗಿಂಯ್
ಅಸಾ ಜಾಗೊ
ವಿಕುಂಕ್ ತಯಾರ್
ಆತಾಂಚ್!
ನಿತಳ್ ಮೊವಾಳ್
ಫಳಾದಿಕ್ ಜಾಗೊ
ಬಾಂದ್ಯೆತ್ ಮೊಲ್
ಕರೊಡಾಂಚೆಂ
ಉಬಾರ್ಯೆತ್ ಮಜ್ಬೂತ್
ಆಶೆ ರಾವ್ಳೆರಾಂ
ಕಮಂವ್ಕ್ ಚಡಿತ್
ಕುಟ್ಕೆ ಕುಟ್ಕೆ ಕರ್ನ್
ವಿಕುನ್ಯ್ ಚೊಡ್ಯೆತ್
ದನ್ಯಾಂನೊ
ದಲಾಲ್ಯಾಂನೊ
ಜಾಯ್ ತರ್
ವೆಗ್ಗಿಂ ಯೆಯಾ
ಫಾಲ್ಯಾಂ ಮೆಳ್ನಾ
ಚುರ್ಚುರೆ ನಾಕಾತ್
ಆತಾಂಚ್ ವರಾ
ಫಾಯ್ದೊ ಮಾರಾ!
ಅರೆ!
ಭುರ್ಶೆಂ ಸಪಾಣ್
ಮಾತ್ಯೆಂತ್ ಘೊಳ್ಚಾ
ಝೊಪ್ಡ್ಯಾಂತ್ ಲೊಳ್ಚಾ
ದುಬ್ಳ್ಯಾಚೆಂ!
ಮುಟಿ ತೆದ್ಯಾ
ಜಾಗ್ಯಾಕ್ ಮ್ಹಜಾ
ಹುಂಗ್ತಾ ಕೊಣ್
ಸುಣೆಂ?
ರೊಂಬ್ಲಾಂ ಥಂಯ್
ಅಜೂನ್
ಮ್ಹನ್ಶಾಪಣ್
ದೆಕುನ್ಂಚ್
ಮೊಲ್ ತಾಚೆಂ
ಭಿಕೆಚೆಂಯ್ ನ್ಹಂಯ್
ಶೂನ್ಯ್!
"ಜಾಗೆ ಮೊಲಾಂವ್ಕ್
ಮೊಳ್ಬಾಕ್ ಚಡಾ
ಮನ್ಶಾ ಮೊಲಾಂಕ್
ಚರಂಡ್ಯೆಂನಿ ಸೊಧಾ!"
ಕವಿತಾಮೃತ್ - 5
ಆಂಡ್ರು ಎಲ್. ಡಿ’ಕುನ್ಹಾ
ಜನನ್: 23
ಸಪ್ತೆಂಬರ್ 1966
ಪರ್ಗಟ್ ಜಾಲ್ಲೆ ಸ್ವತಾಚೆ ಕವಿತಾಜಮೆ:
ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ [2005,
ಆಶಾವಾದಿ
ಪ್ರಕಾಶನ್]
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಕುಪಾಂ ಪೊಂದ್ಲಿಂ ಮುಖಾಂ’ (2003,
ಸಂ: ಮೆಲ್ವಿನ್ ರೊಡ್ರಿಗಸ್).
’ಕವಿತಾಪಾಠ್ ಭಾಗ್-1’ (2005, ಸಂ: ವಲ್ಲಿ ಕ್ವಾಡ್ರಸ್).
’ಕಾಳೊಕಾಂತ್ಲಿಂ ಕಾಂತಾರಾಂ’ (2005, ಸಂ: ಮೆಲ್ವಿನ್ ರೊಡ್ರಿಗಸ್).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಸಂ: ವಲ್ಲಿ ಕ್ವಾಡ್ರಸ್).
’ಶೆಕ್ಡ್ಯಾಚೊ ಕೊಂಕ್ಣಿ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
ಲಾಭ್ಲ್ಲಿಂ ಇನಾಮಾಂ:
’ರಾಕ್ಣೊ’
ಸಾಹಿತಿಕ್ ಸ್ಪರ್ಧ್ಯಾಂತ್ ಪಯ್ಲೆಂ ಇನಾಮ್ ಲಾಭ್ಲ್ಯಾಂ.
ಸಾಹಿತಿಕ್ ವಾವ್ರ್:
’ಆಮ್ಚೊ ಯುವಕ್’ ಪತ್ರಾಚಾ ಸಂಪಾದಕೀಯ್ ಮಂಡಳೆಂತ್ ವಾವ್ರ್.
ವಿಶೇಸ್ ವಾವ್ರ್:
ಕೊಂಕ್ಣಿ ಕವಿತೆಂಚೆಂ ಅಂಕಣ್ ’ಕವಿತಾ ವ್ಹಾಳೊ’ ಚಲವ್ನ್ ವೆಲಾ (ಮಾಯ್ಭಾಸ್.ಕೊಮ್).
ಮಂಗ್ಳುರ್ ಆಕಾಶ್ವಾಣಿಚೆರ್ ತಶೆಂಚ್ ಸಭಾರ್ ಕವಿತಾಗೋಷ್ಟಿಂನಿ ಕವಿತಾ ವಾಚನ್ ಕೆಲಾಂ.
’ಕಯ್ದ್ಯಾಚೊ ಕವಿತಾ’, ’ಶಿಂಪಡ್ಲೆಲಿಂ ಮೊತಿಯಾಂ’, ’ತಿಂ ದುಖಾಂ ಉಲಯ್ತಾನಾ’, ’ಶಿಂಪಡ್ಲೆಲಿಂ ಮೊತಿಯಾಂ’ ಕವಿತಾಜಮ್ಯಾಂಕ್ ಪ್ರಸ್ತಾವನ್ ಬರಯ್ಲಾಂ.
ಆಂಡ್ರು ಎಲ್. ಡಿ’ಕುನ್ಹಾಚಿಂ ಕವಿತಾ/ಕಾಣಿ/ಲೇಖನಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ಅಜ್ಯಾಪಾಂ ಕವಿತಾ.
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ತೊ ಆನಿ ಹಾಂವ್ ಕವಿತಾ, ತಶೆಂಚ್ ತಾಚೆರ್ ಆರ್ಥರ್ ಪಿರೇರಾಚೆಂ ಕವಿತಾ.
2005 ಇಸ್ವೆಚ್ಯಾ ನತಾಲಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ಜೆಜು ಜಲ್ಮಾಲೊ ಕವಿತಾ.
2006 ಇಸ್ವೆಚ್ಯಾ ಪಾಸ್ಕಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ಎಪ್ರಿಲಾಂತ್ಲ್ಯಾ ರಾತಿಂ ಕವಿತಾ.
2006 ಇಸ್ವೆಚ್ಯಾ ನತಾಲಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ಭರ್ವಶ್ಯಾಚೆಂ ಗೀತ್ ಕವಿತಾ.
2007 ಇಸ್ವೆಚ್ಯಾ ಪಾಸ್ಕಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ಜಿವಂತ್ಪಣ್ ಕವಿತಾ.
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಚೆರ್ ಆಯಿಲ್ಲ್ಯಾ ಕವಿತಾಂಚೆರ್ ಹಾಚೆ ವಿಚಾರ್.
ಮೊಳ್ಬಾವಯ್ಲಿಂ ಸ್ವಪ್ಣಾಂ ಬುಕಾಕ್ ಬರಯಿಲ್ಲೆಂ ಸಂಪಾದಕೀಯ್.
2006 ಇಸ್ವೆಚ್ಯಾ ನತಾಲಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲಿ ಕೊಳ್ಸೊ ಮಟ್ವಿ ಕಾಣಿ.
ಕಥಾಝರ್ಚೆರ್ ಪರ್ಗಟ್ ಜಾಲ್ಲಿ ಬ್ರದರ್ ರೊಕಿ ಮಟ್ವಿ ಕಾಣಿ.
ಕವಿತಾಪಾಠಾಚೆರ್ ಹಾಚ್ಯಾ ’ಬಾಂಯ್’ ಕವಿತೆಚೆರ್ ಕೆಲ್ಲಿಂ ಅಧ್ಯಯನ್ ಲೇಖನಾಂ.
ಬೂಕ್ ಸಮೀಕ್ಶಾಚೆರ್ ಹಾಚ್ಯಾ ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ ಬುಕಾಚೆರ್ ಲೇಖನಾಂ.
’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ ಬೂಕ್ ಸಮೀಕ್ಶೆವೆಳಾರ್ ವಾಚುನ್ ಸಾಂಗ್ಲ್ಲೆಂ ಹಾಚೆಂ ಪತ್ರ್.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.