ಕವಿತಾकविताPoem
ಧಾಕ್ಲೊ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸಿಜ್ಯೆಸ್ ತಾಕೊಡೆ
ಕುಸ್ವಾರ್
ಆನ್ನಾ ಬಾಯೆಚೊ ಕುಸ್ವಾರ್ ಬಾಬಾ
ಪರ್ಮಳ್ ಘಮ ಘಮ
ಲಾಡು ಮಾತ್ರ್ ಫಾತೊರ್ ಸಾಯ್ಬಾ
ಅಯ್ಯೋ ರಾಮ ರಾಮ!
ಡೊಟ್ಟಿ ಬಾಯೆನ್ ಚಾಕ್ಲ್ಯೊ ದಾಂಬ್ಲ್ಯೊ
ಘಟ್ಟ್ ಕರು ಕರು
ಚಾಬೊನ್ ಚಾಬೊನ್ ಪುರೊ ಸಾಯ್ಬಾ
ದಾಂತಾ ದೂಕ್ ಸುರು!
ದೇವ್ ಮೊಗಾಚೊ ಧಾಕ್ಲೊ
ಅಂಧ್ಕಾರ್ ಫಾಸ್ಳಾವ್ನ್ ಫಾಂಕ್ಲೊ ಪ್ರಕಾಸ್, ಪ್ರಶಾಂತ್ ಮೌನಾಂತ್ ಗಾಯನ್
ದೊಂಗ್ರಿ ಹಿಂವಾಂತ್ ಕಾಂಪ್ಲೆ ಗೊವ್ಳಿ, ವಿಜ್ಮಿತ್ ಆನಿ ಭಿಂಯಾನ್
ಆಕಾಂತುನ್ ಸರ್ವ್ ಭಂವ್ತಿಂ ಚೊಯ್ತಾಂ, ಪರ್ಜಳ್ ಆಂಜ್ಯಾಂ ಜಮೊ
ಸಂದೇಶ್ ದಿವುನ್ ಗಾತಾಲೊ ಗೀತ್ "ಉಂಚಾರ್ ದೆವಾಕ್ ನಮೊ"
ದೆವಾ ಸೆರಾಫಾಂಚೊ ಸಾಂಗಾತ್ ಸಾಂಡುನ್ ಪಯ್ಸ್ ಸರ್ಲೆಲ್ಯಾಕ್
ಎಸಾವ್ ಬರಿ ಮೂಟ್ ಭರ್ ಮಾಸಾಕ್ ದೇವ್ಪಣ್ಚ್ ವಿಕ್ಲೆಲ್ಯಾಕ್
ಬಚಾವ್ ಕರುಂಕ್ ದೇವ್ ಆಯ್ಲಾ ಆಜ್, ಜ್ಯಾರಿ ಕರುಂಕ್ ಸೊಲ್ಲೊ
ಮನ್ಶ್ಯಾ ಮೊಗಾನ್ ಪಿಸೊಚ್ ಜಾಲ್ಲ್ಯಾ ದೆವಾನ್ ಆದಿಂ ಕೆಲ್ಲೊ-
ದೊಂಗೊರ್ ದೆಂವೊನ್ ಧಾಂವ್ಲೆ ಗೊವ್ಳಿ, ಸಾಂಡುನ್ ಬೊಕ್ರ್ಯಾಂಕ್ ತಾಂಚ್ಯಾ-
ಬೆತ್ಲೆಹೆಮಾಚ್ಯಾ ಲ್ಹಾನ್ ಗಾಂವಾಂತ್, ಗೊಟ್ಯಾಂತ್ ಗರ್ಧನಾಂಚ್ಯಾ
ಪಿಂಜ್ಕರ್ ಫಾಳಿಂನಿಂ ಗುಟ್ಲಾವ್ನ್ ವ್ಹಯ್, ಖಾವ್ಣೆರ್ ತಾಕಾ ಸೊಡ್ಲಾ-
ದೇವ್ ಮೋಗ್ ಕಿತ್ತುನ್ ವಚಾತ್ ಮ್ಹಳ್ಳ್ಯಾಕ್ ಧಾಕ್ಲೊ ಹಾಂಗಾ ಘಡ್ಲಾ-
ರಚ್ನಾರಾಚಿ ದಯಾ ಆಟವ್ನ್, ಗೊವ್ಳಿ, ಕಾಳ್ಜಾನ್, ಮನಾನ್
ಜುಜೆ ಮರ್ಯೆ ಸಂಗಿಂ ಕರ್ತಾತ್ ದೇವ್ ಬಾಳ್ಕಾಕ್ ಆರಾಧಾನ್
ಕಾವ್ಯಾದಾಸ್
^ ವಯ್ರ್
ಪ್ರಿಯಾ ಸಿಕ್ವೇರಾ, ಫೆರಾರ್
ಕ್ರಿಸ್ಮಸ್ ಆನಿ ಹಾಂವ್
ಘರಾಂ ಘರಾಂನಿ ಝಳ್ತಾತ್ ದಿವೆಂ
ಜಿಳ್ಮಿಳ್ತಾತ್ ಭಾಂದ್ಪಾಂ ನೆಕೆತ್ರಾಂ ಸವೆಂ
ಬಾಂದ್ಲಾಂ ವ್ಹಡ್ಲೊ ಗೊಟೊ ಗರ್ಧನಾಚೊ
ನೆಟಯ್ಲಾ ತೊ ಘುರ್ತ್ ಮ್ಹಣ್ ಮಂಥನಾಚೊ
ಭರ್ಲ್ಯಾಂತ್ ಸರ್ವ್ ’ಕ್ರಿಸ್ಮಸಾ’ಚ್ಯಾ ಆಮಲಾರ್
ಚಿಂತಾ ಹಾಂವ್
ಸರ್ಗಿಂ ಸಂಸಾರಾಚ್ಯಾ ರಾಯಾಚ್ಯಾ ಪುತಾಕ್
ಕಿತ್ಯಾಕ್ ಮೆಳ್ಳೆಂನಾ ರಾವ್ಳೆರ್ ಜಲ್ಮೊಂಕ್
ಫಾವೊ ಜಾಲೊ ತಾಕಾ ಗೊಟೊ ಗರ್ಧನಾಚೊ
ಮೆಳ್ಳೊ ಸಾಂಗಾಂತ್ ಗೊರ್ವಾಂಚೊ
ದುಬ್ಳ್ಯಾಂತ್ಲೊ ದುಬ್ಳೊ ಜಾವ್ನ್ ಜೆಜು ಜಲ್ಮಾಲೊ
ದೇಖ್ ಜಾವ್ನ್ ಮೋಗ್ ಕರ್ಚಾಕ್ ದುಬ್ಳ್ಯಾಂಚೊ
ಆಧಾರ್ ಜಾಂವ್ಚಾಕ್ ಬಾವ್ಡ್ಯಾಂಚೊ
ಆಸಾತ್ ಮಿಣ್ಮಿಣ್ಚಿ ನೆಕೆತ್ರಾಂ ಮೊಳ್ಬಾರ್
ಧರ್ತೆಕ್ ದಿತಾತ್ ಉಜ್ವಾಡ್ಯ್ ಭರ್ಪೂರ್
ತರ್ ಕಿತೆಂ ಫಾಯ್ದೊ ನೆಟವ್ನ್ ನಕ್ಲಿ ನೆಕೆತ್ರ್
ಉಜ್ವಾಡ್ ಫಾಂಕಂವ್ಕ್ ಸಕತ್ಗಿ ಕಾಳೊಕಾಂತ್
ವಾಟ್ ದಾಕಯ್ತ್ಗಿ ಚುಕೊನ್ ವೆತೆಲ್ಯಾಂಕ್
ವಾಟ್ ದಾಕಯ್ಲಿ ಶಿಮ್ಟಿ ನೆಕೆತ್ರಾನ್
ವಾಟ್ ಚುಕಲ್ಲ್ಯಾ ತೆಗಾಂ ರಾಯಾಂಕ್
ದೊಳ್ಯಾಂಚೆರ್ ಪಟ್ಟಿ ಬಾಂದುನ್ ಭಂವ್ಚೆಂ ಸಬಾರ್
ದಾಂಟೊನ್ ಪಡೊನ್ ಮಾರ್ ಖಾತಾತ್ ಲಾಚಾರ್
ಕ್ರಿಸ್ಮಸಾಚ್ಯಾ ವೆಳಾರ್
ಜಾಂವ್ಕ್ ಪಾವನ್ಗಿ ಹಾಂವ್ ಏಕ್ ಶಿಮ್ಟಿ ನೆತೆತ್ರ್
ಸಕಾನ್ಗಿ ವಾಟ್ ವರೊಂಕ್ ಎಕಾ ರಾಯಾಕ್ ಪುಣಿ
ನಾ ಬರೆಂ ಉತಾರ್ ಬಾವಾಂ ಭಯ್ಣಿಂ ಕಡೆ
ಪುಣ್ ಸೆಜಾರಾ ವಾಂಟ್ಲೊ ನಮುನ್ಯಾವಾರ್ ಕುಸ್ವಾರ್
ಕಾಳ್ಜಾಂತ್ ಭರೊನ್ ಅಂಧ್ಕರಾಚೊ ದೆಂವ್ಚಾರ್
ಮನಾಂ ತಿ ಕುಸ್ವಾರ್ ಬಾಜ್ಚಾ ಹುನುಂನಿ ತೆಲಾಬರಿ
ಜಿವೆಂಚ್ ಬಾಜ್ತಾತ್ ನೆಣ್ತ್ಯಾಂಕ್ ಲಾಂಬ್ ಜಿಬೆನ್
ಬೊಗ್ತಾ ಮ್ಹಾಕಾ
ಕಿತೆಂ ಬರೆಂಪಣ್ ವಾಂಟುನ್ ಕುಸ್ವಾರ್ ಪೊಟಾಂ ಭರ್ಲ್ಯಾಂಚೊ
ಜರ್ ಉಪಾಶಿ ದವರ್ನ್ ಭುಕೆಲ್ಲ್ಯಾಂಕ್
ಬೆಟವ್ನ್ ಮೀಸ್ ಮಾಣ್ಸುಗಿ ಸಾಂಡುನ್ ನೆಟವ್ನ್
ದೀವ್ನ್ ಕ್ರಿಸ್ಮಸ್ ಪಾರ್ಟಿ ವಿಸ್ಕೆ ಬರಾಬರ್
ಜಾಂವ್ಚೊ ನಾ ಜೆಜು ಖುಶ್ ಆಶೆ ಕೆಲ್ಯಾರ್
ತರ್ ಹಾಂವ್
ಸಂತೊಸ್ ಹಾಡಂವ್ಕ್ ಸಕಾನ್ಗಿ ಎಕಾ ಘರಾಂತ್
ಜಾವ್ನ್ ಏಕ್ ಮೊಗಾಚಿ ಕಾಣಿಕ್
^ ವಯ್ರ್
ನಿದೆ ಬಾಳಾ
ನಿದೆ ಬಾಳಾ ನಿದೆ, ರಡೊನಾಕಾ
ರಚ್ನಾಕ್ ತುಜ್ಯಾ ಸಂಸಾರ್ ರಡಾತ್
ವೋಂಟ್ ಹಾಸೊ ವಿಸ್ರಾತ್..!
ನಿದೆ ಬಾಳಾ ನಿದೆ, ರಡೊನಾಕಾ
ಉಲ್ಯಾಕ್ ತುಜ್ಯಾ ಸಂಸಾರ್ ಜಾಗತ್
ಸುಕ್ರು ಫಾಂತೆಂ ವಿಸ್ರಾತ್..!
ನಿದೆ ಬಾಳಾ ನಿದೆ, ರಡೊನಾಕಾ
ಹಾಸ್ಯಾಂಕ್ ತುಜ್ಯಾ ಸಂಸಾರ್ ಹಾಸತ್
ವಿಧವ್ ದುಃಕ್ ವಿಸ್ರಾತ್..!
ನಿದೆ ಬಾಳಾ ನಿದೆ, ರಡೊನಾಕಾ
ದೊಳ್ಯಾಂಕ್ ತುಜ್ಯಾ ಸಂಸಾರ್ ಪ್ರಕಾಸತ್
ಚಂದ್ರ್ ಪುನ್ವೆಕ್ ವಿಸ್ರಾತ್..!
ನಿದೆ ಬಾಳಾ ನಿದೆ, ರಡೊನಾಕಾ
ಆವಾಜಾಕ್ ತುಜ್ಯಾ ಸಂಸಾರ್ ಭಿಂಯೆತ್
ದರ್ಯೊ ಗಾಜ್ ವಿಸ್ರತ್..!
ನಿದೆ ಬಾಳಾ ನಿದೆ, ರಡೊನಾಕಾ
ದುಃಖಾಂನಿ ತುಜ್ಯಾ ಸಂಸಾರ್ ಬುಡಾತ್
ಮೊಗೊರ್ ಉಪ್ಯೆಂವ್ಕ್ ವಿಸ್ರತ್..!
ನಿದೆ ಬಾಳಾ ನಿದೆ, ರಡೊನಾಕಾ
ಮುಕಮಳಾರ್ ತುಜ್ಯಾ ಸಂಸಾರ್ ಸೊಭಾತ್
ಆವಯ್ ತುಜಿ ಪಾನೊ ವಿಸ್ರತ್..!
ಸನ್ನು ಮೊನಿಜ್, ಬೊಳಿಯ
^ ವಯ್ರ್
ಜೆ.ಎಲ್.ಮಂಜರಪಲ್ಕೆ
ಪಾವ್ಸ್
ಪಾವ್ಸಾಕ್ ಕಾಂಯ್ ಗಿರಾಂತ್ ಕಿತೆಂ
ಸರ್ಸರಿತ್ ಆಯ್ಲಾ
ರಾತ್ ಉತ್ರೋನ್ ಜಾಂವ್ಚ್ಯಾ ಫುಡೆಂ ಫಾಂತೆಂ
ಹಜಾರಾಂಕ್ ನಿರಾಶ್ರಿತ್ ಕರುಂಕ್
ಪಾವ್ಲಾ
ರಾಂವ್ಚೆಂ ಪಾಕೆಂ ಕೊಸ್ಳೊನ್ ಪಡ್ಲಾಂ
ನೆಸ್ಚೆಂ
ವಸ್ತುರ್ ವಾಳೊನ್ ಗೆಲಾಂ
ಖಾಣಾ ವೊರ್ವಿ ಭಿಜೊನ್ ಗೆಲ್ಯಾ
ಭಿಯಾಳೊ
ಸರ್ವ್ ವಿಭಾಡ್ ಜಾಲಾ
ಘರ್-ದಾರಾಚಿ ಜಾಲ್ಯಾ ದೆಸ್ವಾಟ್
ಸಾಂಡ್ಲಾಂ
ಹಾಣಿಂ ಭುಂಯ್ ಭಾಟ್
ದೇಶಾಚಿ ಭುಕ್ ಥಾಂಬೊಂವ್ಚೊ ರೈತ್
ದೀಸ್ ಸಾರ್ತಾ ಉಪ್ವಾಸ್ ಕರಿತ್
ಬಿ.ಬಿ.ಸಿಂತ್ ಖಬರ್ ಗಾಜ್ಲಿ
ನಾ
ಸಿ.ಎನ್.ಎನಾಕ್ ಕಳಿತ್ಚ್
ನಾ
ದೇಶಾಚಾ ಪ್ರಮುಖ್ ಖಬ್ರೆ ಮಾಧ್ಯಮಾನಿಂ
ದುಬ್ಳ್ಯಾ
ಲೊಕಾಚಾ ಕಷ್ಟಾಂಕ್ ಸ್ಥಾನ್ಂಚ್ ನಾ.
ಸೋಮಾಲಿಯಾಚಾ ಬರ್ಗಲಾಕ್
ಕಾಳ್ಜಾಂ ಅಮ್ಚಿಂ ಕಡ್ತಾತ್
ಓರಿಸ್ಸಾ - ಗುಜ್ರಾತಾಚಾ ವಿಕೋಪಾಕ್
ಮನಾಂ ಅಮ್ಚಿಂ ರಡ್ತಾತ್
ಪಯ್ಶ್ಯಿಲ್ಯಾ ತ್ಯಾ ಗುಜ್ರಾತಾಂತ್ ತರ್
ಅಮ್ಚೆಂ ಐ.ಸಿ.ವೈ ಯಮ್ ಎದೊಳ್ಚ್
ಸೆವೆಕ್ ಲಾಗ್ತೆಂ
ಗದಗ್, ಧಾರ್ವಾಡ್. ಭಾಗಲಕೋಟ್ ಜಿಲ್ಲ್ಯಾಂಚಿ ಆವ್ರಾ ದೆಸ್ವಾಟ್
ಬಿ.ಬಿ.ಸಿ.ರ್ ಗಾಜ್ಲ್ಲಿ ತರ್ ಯುವಜಣ್ ಎದೊಳ್ ಧಾಂವ್ತೆ?
ಸಂಸಾರಾಚೆಂ ಗಮನ್ ಥಂಯ್ ಖಂಚ್ತಾಂ
ಅಮಿಂಯ್ ಕುಮ್ಕೆಕ್ ಧಾಂವ್ತಾಂವ್
ಅಮ್ಚ್ಯಾಚ್ ರಾಜ್ಯಾಂತ್ ಲೋಕ್ ನಿರಾಶ್ರಿತ್ ಅಸ್ತಾಂ
ಅಮಿಂ ಹಾಂಗಾ
ಮಾಸಾ-ಜೆವ್ಣಾನಿಂ ಲೊಳ್ತಾಂವ್.
ಆವ್ರಾ ಉದ್ಕಾನ್
ಬುಡ್ಲ್ಯಾತ್ ಗಾಂವ್
ತರೀ ಚಡ್ಲ್ಯಾ ಚುನಾವಣಾಚಿ ದಾವ್
ಗೆಲಾಂ ತರ್ ತಾಂಚೆಂ ಗೆಲಾಂ
ಹಾಂಕಾಂ ಖಂಚಾಣಿಂ ಉಣೆಂ ಚಾಲಾಂ.
ಖಂಯ್
ವೆತಲೊ ಹೊ ದುಬ್ಳೊ ಲೊಕ್
ಕೋಣ್ ಆಯ್ಕಾತ್ ತಾಂಚೆ ಅಕ್ಲಾಸ್
ಸರ್ಕಾರಿ ಕುಮ್ಕೆನ್ ಕೆಲಾ ನಿರಾಸ್
ಬೊಂವ್ತಿಂ ಭರ್ಲಾ ತಾಂಚಾ ಕಾಳೊಕ್
ದುಬ್ಳ್ಯಾ ದೇಶಾಚಾ ದುಬ್ಳ್ಯಾ
ಲೊಕಾಚಿ
ಅಲಕ್ಷಾಚ್ ಜಾಲ್ಯಾ
ಮರ್ಜಾನಿಂಚ್ ದೀಸ್ ಕಾಡ್ಚ್ಯಾ ಆಮ್ಕಾಂ
ಮನ್ಕ್ಯಾಪಣಾಚಿಯಿ
ವಿಸರ್ ಪಡ್ಲ್ಯಾ.
^ ವಯ್ರ್
ನತಾಲ್... ತುಜೆವಿಣೆಂ ......
ತುಜ್ಯಾಚ್ಚ್ ಮೊಗಾ ಸಾವ್ಳೆಂತ್
ಉಸ್ವಾಸಾ ಗೊಪಾಂತ್ ಖರ್ಚಿಲ್ಲ್ಯೊ
ನತಾಲಾಂ ರಾತಿ
ಕಿತ್ಲೆಶ್ಯೊ..
ಅಜೂನ್ ಜಿವ್ಯೊ ಹ್ಯಾ ಮನಾಂತ್
ಹಜಾರ್ ಸಾಳ್ಕಾಂ ಪ್ರಾಸ್
ತುಂಚ್ಚ್ ಊಂಚಿ ಮ್ಹಣ್
ಶೆಂಬೊರ್ ನೆಕೆತ್ರಾಂ ಪ್ರಾಸ್
ತುಂ ಸೊಭಾಗಿಣ್ ಮ್ಹಣ್
ಕಾಳ್ಯಾ ಕುತಾಂವಾಕ್ ಆಡ್ಚಾಲ್ಲ್ಯಾ
ಧೊವ್ಯಾ ಭುತಾಂವಾ ಬರಿ
ಕಾಳ್ಯಾ ಕಾಪ್ಡಾರ್ ಸೊಭ್ಚ್ಯಾ ತುಕಾ
ಬಾವ್ಳ್ಯಾಂನಿ ವೆಂಗೊನ್
ಕಾಳ್ಜಾಕ್ ಲಾಗಿಂಚ್ಚ್ ಮೆಳವ್ನ್
ಗುಲೊಬಿ ಗಾಲಾಂಕ್ ಪೊಶೆವ್ನ್
ಉನ್ಮಾದಾನಿಂ ದಿಲ್ಲ್ಯಾ
ಉಮಾಳ್ಯಾಂಚ್ಯಾ ಉಜ್ಯಾಚೊ
ನತಾಲಾ ಕೀಸ್
ಅಜೂನ್ ಜಿವೊ ಹ್ಯಾ ಮನಾಂತ್...
ಜಿಣಿಯೆ ಬಂಗ್ಲ್ಯಾಚ್ಯಾ ಬೊಲ್ಕಾಂವಾಂತ್
ಸಾಂಗಾತಾ ಬಸೊನ್
ಮೊಳ್ಭಾ ಮೊಡಾಂನಿ ಭರ್ಲ್ಲ್ಯಾ
ನೆಕೆತ್ರಾಂ ರಾಶಿಕ್ ಪಳವ್ನ್
ಫಾಂತೆಂ ಜಾತಾ ವರೇಗ್
ಬರ್ಣೆಂತ್ ಭರ್ಲ್ಲೆ ಕಿಸ್ಮಿಸೆ ಲ್ಹಾಡು
ದಾಲಿಯೆಂತ್ ಆಸ್ಲ್ಲಿಂ
ಬದ್ಮಾ ತೊರೆಂಜಾ ಮೌಲಿಂಗಾ
ಖೆಲ್ಲೊ ಸ್ವಾದ್
ಜಾಲಾಂತ್ ಮಾಂಡ್ಲ್ಲ್ಯಾ
ಗರ್ದನಾಚ್ಯಾ ಗೊಟ್ಯಾ ಖಾವ್ಣೆರ್
ನಿದ್ಲ್ಲ್ಯಾ ಬಾಳ್ಕಾ ಜೆಜುಕ್
ಭೋವ್ಶಾ ಆತಾಂಯ್ ಯೆತಾ ಕೊಣ್ಣಾ....
ಪುಣ್, ಹ್ಯಾ ವರ್ಸಾಂತ್
ಹಾಂವ್ ಹಾಂಗಾಸರ್
ಆನಿಂ ತುಂ ಪಯ್ಸ್ ತರ್....
ಸತ್ಚ್ಚ್ ಸಾಂಗ್ತಾಂ
ತುಜೆ ವಿಣೆಂ
ಹೆಂ ನತಾಲ್ ಮಾತ್
ಉಡಾಸಾಚೆಂ ತುಫೆಂ ಜಾಲಾಂ..
ಕ್ಲೆರೆನ್ಸ್ ಕೈಕಂಬ
^ ವಯ್ರ್
ಅನಿಲ್ ಪೆರ್ನಾಲ್
ಕ್ರೀಸ್ತಾ ಯೆಣೆಂ
ಹಿ೦ವಾಳ್ ವೇಳ್ ನತಾಲಾ೦ ಕಾಳ್
ಪರತ್ ಯೆತಾ೦ ಜಲ್ಮೊನ್
ಹ್ಯಾ ಧರ್ತೆಚೆರ್ ಜಾವುನ್ ಬಾಳ್
ದೋನ್ ಹಜಾರ್ ವರ್ಸಾ೦ ಪುರ್ವಿ೦
ತುಮ್ಚ್ಯಾ ಪುರ್ವಜಾ೦ಕ್ ಹಾ೦ವೆ೦ ಶಿಕವ್ಣ್ ದಿಲ್ಲಿ
ಸತಾ-ನಿತಿಚಿ ವಾಟ್ ದಾಕಾಯಿಲ್ಲಿ
ಎಕಾ-ದೆವಾಚಿ ವಳಕ್ ದಿಲ್ಲಿ
ಬಾಪಾಚೆ೦ ಘರ್ ಮ್ಹಜೆ೦ ವ್ಯಾಪಾರಾಚೆ೦ ಕೇ೦ದ್ರ್ ಜಾಲ್ಲೆ೦
ಮ್ಹಕಾ ಸೊಸ್ಲ್ನಾ೦
ಚಾಬೂಕ್ ಹಾತಿ೦ ಘೆವ್ನ್ ಮಾರ್ನ್ ತಾ೦ಕಾ೦ ಧಾ೦ವ್ಡಾಯಿಲ್ಲೆ೦
ಆತಾ೦,
ದೋನ್ ಹಜಾರ್ ವರ್ಸಾ೦ ಉಪ್ರಾ೦ತ್
ಮ್ಹಜೆ ಪಾಟ್ಲಾವ್ದಾರಿ ತುಮ್ಕಾ೦ ದೆಖ್ತಾ೦ ತರ್
ಕಿತೆ೦ ದೆಖೊ೦!!!?
ಮ೦ದಿರಾ೦ ಜಾಲ್ಯಾ೦ತ್
ಖಬ್ರಾ೦ಚೊ ಜಾಗೊ, ಫ್ಯಾಶನ್ ಕೇ೦ದ್ರಾ೦
ಶೆಳೆಲ್ಲೊ ಭಾವಾರ್ತ್
ಮ್ಹಜ್ಯಾಚ್ಚ್ ಉತ್ರಾ೦ಚೊ ಕರುನ್ ಅಪಾರ್ಥ್
ಅಪ್ಲ್ಯಾಚ್ಚ್ ಫಾಯ್ದ್ಯಾಕ್ ಮನ್ಶಾನಿ೦
ಕೆಲ್ಯಾತ್ ಇಗರ್ಜ್ಮಾತೆಚೆ
ಹಜಾರ್ ವಾ೦ಟೆ
ಡೋ೦ಗ್, ಕಪಟ್ಪಣ್, ಹಗೆ೦, ಮೊಸೊರ್
ಸ್ವಾರ್ಥ್, ಜಿದ್ಧ್, ಜಾಳ್ಕಾಯ್, ಫಟಿ
ಮೀತ್ ಮಿರ್ವೊನ್ ವೆಚ್ಯಾ ಹ್ಯಾ ಮೆಳ್ಯಾ ಹವ್ಯಾ೦ತ್
ಬಾಳ್ ಜಾವುನ್ ಸ್ವಾಸ್ ಕಸೊ ಘೆವು೦!?
ಇತ್ಲೆ೦ ಮ್ಹೆಳೆ೦ ಘೆವುನ್ ಆಸ್ಚ್ಯಾ ತುಮ್ಕಾ೦
ಮ್ಹಜೆ ಪಾಟ್ಲಾವ್ದಾರಿ ಮ್ಹಣೊ೦!?
ಭಾಯ್ಲಿ ತಯಾರಿ ಭರಾನ್ ಚಲ್ತಾ
ಪೂಣ್ ಭಿತರ್ಲೆ೦ ಮ್ಹೆಳೆ೦ ಕೋಣ್ ಚೊಯ್ತಾ!?
ಮ್ಹಜ್ಯಾ ಸ್ವಾಗಾತಾಕ್ ವೀಜ್ ದಿವ್ಯಾ೦ಚೊ ಸು೦ರ್ಗಾರ್ ನಾಕಾ
ಸೂಟ್-ಬೂಟಾ೦ಚಿ ಸಜವ್ಣಿ ನಾಕಾ
ರಸ್ಮಾ-ಸಾಡಿಯೊ, ಭಾ೦ಗ್ರಾ-ನಗಾ೦ಚೆ೦ ಪ್ರದರ್ಶನ್ ನಾಕಾ
ಹೆರಾ೦ ಥ೦ಯ್ ತುಮ್ಚೆ೦ ಬರೆ೦ ಮನ್
ಮನ್ಶ್ಯಾ೦ ಥ೦ಯ್ ಮನ್ಶಾಪಣ್
ಲ್ಹಾನಾ೦ ಥ೦ಯ್ ದಯಾಳ್ಪಣ್
ಭೊಗ್ಸು೦ಚೆ೦ ಉದಾರ್ಪಣ್
ತುಮ್ಚಿ೦ ನಿತಳ್ ಕಾಳ್ಜಾ೦ ಪುರೊ!!.
^ ವಯ್ರ್
ನವೆಂ ಕ್ರಿಸ್ಮಸ್
ಕಿತೆಂ ಗಲಾಟೊ, ಕಿತೆಂ ದಬಾಜೊ
ಕಿತೆಂ ಪಿಯೊವ್ಣೆಂ, ಕಿತೆಂ ತಿ ಮಝಾ
ನವಿ ಮುಸ್ತಾಯ್ಕಿ, ದಿವ್ಯಾಂಚಿ ರಾಸ್
ಘರಾಂ ಘರಾಂನಿ ಕುಸ್ವಾರಾಚೊ ವಾಸ್
ತೆಣೆಂ ಆಮ್ಚ್ಯಾ ಆನಿಂ ತುಮ್ಚ್ಯಾ ಸೆಜಾರಾ
ಗಂಗ್ಗಾಗತ್ ನಾತ್ಲ್ಲಿಂ ಮಾರ್ತಾತ್ ಆಕ್ಲಾಸ್
ತಾಂಕಾಂ ಪಿಯೆಂವ್ಕ್ ನಾ, ಖಾಂವ್ಕ್ ನಾ
ಪಾಂಗ್ರುಂಕ್ ನಾ, ಹಾಂತ್ಳುಂಕ್ ನಾ
ಥೊಡ್ಯಾಂಕ್ ರಾವೊಂಕ್ ಪಾಕೆಂ ನಾ
ಭುರ್ಗ್ಯಾಂಕ್ ಶಾಲಾಕ್ ಧಾಡುಂಕ್ ಕಾಸ್ ನಾಂತ್
ಪಿಡೆಂನಿ ಸಭಾರಾಂ ವ್ಹಳ್ವಳ್ತಾತ್
ವಕ್ತಾಂ ಹಾಡುಂಕ್ ಸಯ್ತ್ ತಾಂಕ್ ನಾ
ಆಮ್ಚ್ಯಾ ತೊಂಡಾರ್ ಮೊಲಾಧಿಕ್ ಪಾವ್ಡರ್
ತಾಂಚ್ಯಾ ತೊಂಡಾರ್ ಕಿರ್ಮೆಂ ಆನಿಂ ದು:ಖಾಂ
ಆಮಿಂ ಖೆಲ್ಲೆಂ ಜಿರಂವ್ಕ್ ಸದಾಂ ಧಾಂವ್ತಾಂವ್
ತಿಂ ಖಾಂವ್ಚ್ಯಾವಿಶಿಂ ಫಕತ್ ಸ್ವಪ್ಣೆತಾತ್
ಜೆಜು, ತುಂ ಜಲ್ಮಾಲೊಯ್ ಎಕಾ ಮಾಟ್ಯಾಂತ್
ತ್ಯಾ ಗೊರ್ವಾಂಚ್ಯಾ ಎಕಾ ಗೊಟ್ಯಾಂತ್
ದುಬ್ಳ್ಯಾಂತ್ಲೊ ಕಠೀಣ್ ದುಬ್ಳೊ ಜಾವ್ನ್
ಸಮ್ಜತಾ ಹೆಂ ಕೊಣಾಚ್ಯಾ ಬೊಡಾಂತ್
ಆಮ್ಚೆ ದೊಳೆ ಕಿತ್ಯಾಕ್ ಉಘಡ್ನಾಂಯ್
ಆಮ್ಚಿಂ ಕಾಳ್ಜಾಂ ಕಿತ್ಯಾಕ್ ಮೊವಾಳ್ನಾಂಯ್
ಆಸ್ಲ್ಲ್ಯಾಂತ್ಲೆಂ ಥೊಡೆಂ ವಾಂಟುನ್ ದೀಂವ್ಕ್
ಎಕಾಮೆಕಾಕ್ ಮಾತ್ಸಿ ಕುಮೊಕ್ ಕರುಂಕ್
ಗರ್ಜೆವಂತಾಂಕ್ ಪಾಂವ್ಕ್ ಆನಿ ಆಜ್
ತುಜ್ಯಾ ಜನನಾಚ್ಯಾ ಹ್ಯಾ ಭಾಗಿ ದಿಸಾ
ಲ್ಹಾನ್ವಿಕಾಯೆ ಮುಖಾಂತ್ರ್ ಉದಾರ್ ಮನಾನ್
ಸಗ್ಳ್ಯಾ ಮನ್ಶಾಕುಳಾಕ್ ಸಮ್ಜೊಂಕ್?
ಆಸ್ಟಿನ್ ಪ್ರಭು
^ ವಯ್ರ್
ಜೆರಿ ಡಿ’ಮೆಲ್ಲೊ, ಬೆಂದುರ್
ನವೆಂ ನತಾಲ್
ಮಾಗ್ಣೆಂ ಹೆಂ ಮನ್ಶಾ ಕುಳಾಚೆಂ
ಧರ್ತೆ ವಯ್ಲ್ಯಾ ಅಸ್ಕತ್ ಜಿವಾಂಚೆಂ
ಸೊಡ್ವೊಣ್ ಕೆಲ್ಲ್ಯಾ ಮ್ಹಜೆ ತಸ್ಲ್ಯಾಂಚೆಂ
ಖಾಲ್ತೆಪಣಿಂ ಆಡ್ದೊಸ್ ಮಾಗ್ಚೆಂ
ಪರ್ತ್ಯಾನ್ ಸಂಸ್ರಾಂತ್ ಜಲ್ಮ್ ಘೆ...
ತುರಂತ್ ಯೇ.. ವೆಗ್ಗಿಂ ಯೇ..
ಮ್ಹಣ್ ತುಜ್ಯಾಲಾಗಿಂ ಪ್ರಾರ್ಥುಂಚೆಂ!
ಜೆಜು ಮೊಗಾಳಾ.. ಜೆಜು ದಯಾಳಾ
ಯೆತಾಯ್ ತರ್ ಪರತ್ ಹಾಂಗಾ
ದುರ್ಬಳೊ ಜಾವ್ನ್ ಜಲ್ಮಾನಾಕಾ
ಖಾವ್ಣೆರ್ ಭಾತೆಣಾಚೆರ್ ಪರತ್ ನಿದಾನಾಕಾ
ಹ್ಯಾ ಯುಗಾಂತ್ ಸಂಸಾರ್ ಬದಲ್ಲಾ..
ಹ್ಯಾ ನಾಡಾಂತ್.. ಆಮ್ಚ್ಯಾ ಗಾಂವಾಂತ್..
ಗೊರ್ವಾಂಚೆ ಗೊಟೆ ಮೊಡುನ್ ಕಾಡ್ಲ್ಯಾತ್..
ಭೃಹದ್ ಭಾಂದ್ಪಾಂ ಉಭಿಂ ಜಾಲ್ಯಾಂತ್..
ಗೊಟ್ಯಾಂತ್ಲಿಂ ಸಾದಿಂ ಗೊರ್ವಾಂ ಗಾಡ್ವಾಂ
ಬೊಂಟೆಗಾರಾನ್ ನಪಂಯ್ಚ್ ಕೆಲ್ಯಾಂತ್..
ಬೊಕ್ರ್ಯಾಂಕ್ ಚರಂವ್ಚೆ ಗೊವ್ಳಿ ಭೊಳೆ
ಜಾಲ್ಯಾತ್ ಮಾಸಾಂ ಖಾಂವ್ಚೆ ಹಿಜ್ಡೆ ತಸೆ..
ಉದೆಂತಿಚ್ಯಾ ತೆಗಾಂ ರಾಯಾಂಕ್
ದಿಸತ್ ಕಶೆಂ ಆತಾಂ ಶಿಮ್ಟಿ ನೆಕೆತ್ರ್?
ದಿಸ್ತೆಲಿಂ ತಾಂಕಾಂ ಖರಿಂಚ್ ಆಜ್..
ಅಂತ್ರಳಾರ್ ಉಭ್ಚಿಂ ವಿಮಾನಾಂ
ಮೊಳ್ಬಾರ್ ಧಾಂವ್ಚಿಂ ಮಿಸ್ಸಾಯ್ಲಾಂ..!
ಹೆರೊದ್ ರಾಯ್, ಆತಾಂಚೊ
ಭುರ್ಗ್ಯಾಂಕ್ ಮಾರುಂಕ್ ತಾಲ್ವಾರ್
ಸೈನಿಕಾಂಚ್ಯಾ ಹಾತಿಂ ದಿಂವ್ಚೊನಾಂ..
ಕಿತ್ಯಾಕ್ ತಾಂಚಾ ಹಾತಿಂ ದಿಲ್ಯಾಂತ್
ಫಕತ್ತ್ ಭುರ್ಗ್ಯಾಂಕ್ ಕಿತ್ಯಾ..?
ಸಗ್ಳೆಂ ಮನ್ಶಾಕುಳ್ ನಾಸ್ ಕರ್ಚಿಂ
ಬೋಂಬ್.. ಆನಿ ವಿಕಾಳ್ ಝುಜಾಂ.. ಆನಿ ವಿಕಾಳ್ ಝುಜಾ ಹಾತೆರಾಂ..
ಯೇ... ಜೆಜು.. ಯೇ..
ವೇಳ್ ಕಾಡಿನಾಸ್ತಾಂ.. ತುರ್ತಾನ್ ಯೇ...!
ದುರ್ಬಳ್ಯಾ ಗೊರ್ವಾಂಚ್ಯಾ ಖಾವ್ಣೆರ್ ನ್ಹಯ್..
ಗಿರೇಸ್ತ್ ಪಾಳ್ಣ್ಯಾಂತ್ ಜಲ್ಮೊನ್ ಯೇ..
ಯಾ ಏಕ್ ಗ್ರೇಸ್ತ್ ರಾಯ್ ಜಾವ್ನ್ ಯೇ!
ತೆದ್ನಾಂ ಸರ್ವ್ ತುಕಾ ಆಪ್ಣಾಯ್ತೆಲೆ..
ದೇವ್ ಪುತ್ ಮ್ಹಣ್ ವ್ಹಳ್ಕಾತೆಲೆ..
ಪುಣ್.. ಯೆತಾನಾಂ ಧನ್ಯಾಂ..
ರಿತ್ಯಾ ಹಾತಾಂನಿ ಯೇನಾಕಾ..
ದೊಡ್ಯಾ ಧಾರಿಚಿ ತಾಲ್ವಾರ್ ಘೆವ್ನ್ಂಚ್ ಯೇ!
ತುಜಿ ಸತಾನಿತಿಚಿ ತಾಲ್ವಾರ್!!!
ಸಂಸಾರಾಂತ್ಲೆಂ ಮ್ಹೆಳೆಂ ಕಾಡುನ್ ಉಡಂವ್ಚಿ..
ಸಮಾಜ್ ಘಾತ್ಕ್ಯಾಂಚೊ.. ಲೋಂಚ್ ಖಾತೆಲ್ಯಾಂಚೊ..
ದುಬ್ಳ್ಯಾ ಪೊಟಾರ್ ಮಾರ್ತೆಲ್ಯಾಂಚೊ..
ದೆವಾಳಾ ಭಿತರ್ ವ್ಹೆಪಾರ್ ಕರ್ತೆಲ್ಯಾಂಚೊ..
ವಿಕಾಳ್ ಡ್ರಗ್ಸಾಂ ತುಜ್ಯಾ ಭುರ್ಗ್ಯಾಂಕ್ ದಿಂವ್ಚ್ಯಾ....
ಸರ್ವ್ ಆಣ್ವ್ಯಾ.. ಕಠೋರ್ ವೆಕ್ತಿಂಚೊ..
ಸಂಹಾರ್ ಕರುಂಕ್.. ತಾಂಚೊ ನಾಸ್ ಕರುಂಕ್...
ನವೆಂ ರಾಜ್.. ತುಜೆಂ ರಾಜ್ ಹಾಡುಂಕ್...
ನಿತಳ್ ಸಂಸಾರ್ ಆಸಾ ಕರುಂಕ್..
ಧೆಸ್ವಾಟ್ ಹಾಡ್ಚಿ ಭುಂಯ್ಕಾಂಪ್ ರಾವಂವ್ಕ್
ತ್ಸುನಾಮಿ ತಸ್ಲಿಂ ವಾದಾಳಾಂ ಥಾಂಬಂವ್ಕ್
ಕಾತ್ರಿನಾ.. ವಿಮ್ಲಾ.. ಗೋಣು ತಸ್ಲೆಂ
ಮಾರೆಕಾರ್ ಝಡ್-ವಾರೆಂ ಥಂಡ್ ಕರುಂಕ್
ಯೇ ಜೆಜು.. ವೆಗ್ಗಿಂ ಯೇ..
ನವೆಂ ನವೆಂಸಾಂವಾಂಚೆಂ
ನತಾಲ್ ಹಾಡುನ್
ತುರ್ತಾನ್ ಯೇ..
^ ವಯ್ರ್
ನತಾಲಾಂಚೊ ಆಡಂಬರ್!?
ದಾಂವೊನ್ ಆಯ್ಲೆ ಪರ್ತ್ಯಾನ್ ನತಾಲಾಂ ಫೆಸ್ತ್
ಪರ್ಗಾಂವಾಂ ಥಾವ್ನ್ ಗಾಂವಾಂಕ್ ಪಾವ್ಲೆ ಸರ್ವ್ ಈಷ್ಟ್
ಸ್ತ್ರೀಯೊ ಕುಸ್ವಾರಾ ಪಾಟ್ಲ್ಯಾನ್ ಕಾಡ್ತಾತ್ ತೆ ಕಿತ್ಲೆ ಕಷ್ಟ್
ಸಂಸಾರ್ ಜಾಲಾ ಮಗ್ನ್ ಆಚರ್ಸುಂಕ್ ಜೆಜುಚೊ ಜಲ್ಮಾ ದೀಸ್
ರಂಗ್ ರಂಗಾನಿ ಸಜಯ್ಲ್ಯಾಂತ್ ಸಭಾರಾಂನಿ ಆಪ್ಲೆ ಘರ್
ವೀಜ್ ದಿವೆಂ, ಉಮ್ಕಾಳ್ತಾತ್ ನೆಕೆತ್ರಾಂ ತ್ಯಾ ಚಾಪ್ಕಾ ರುಕಾರ್
ಆಧುನಿಕ್ ರಿತಿರ್ ಗರ್ದಾನಾ ಗೊಟೆ ಜಾಲ್ಯಾತ್ ತಯಾರ್
ಕಿತ್ಲೊ ಸಂಭ್ರಮ್ ಲೊಕಾಕ್, ಜೆಜುಚೊ ಜಲ್ಮಾದೀಸ್ ಮ್ಹಳ್ಯಾರ್
ಪಾದ್ರಿ ಮಗ್ನ್ ಜಾಲ್ಯಾತ್ ಸುರ್ಗಾರಾಂವ್ಕ್ ದೇವ್ ತೆಂಪ್ಲಾಂ
ಥೊಡೆಂ ಮ್ಹಣ್ತಾತ್ ಘಾಲಿಜಾಯ್ ವಾಡ್ಯಾ ವಾಡ್ಯಾಚಿ ಬೆನಾರಾಂ
ಘರಾಂ ಘರಾಂನಿ ಪಾವೊನ್ ಕರುಂಕ್ ಲಾಗ್ಲಿ ವಂತಿಗೆ ವಸೂಲ್
ತುಂ ಕಿತ್ಲೊಯ್ ಕಷ್ಟಾಂತ್ ಪಡ್, ತುಕಾ ಮೆಳ್ಚಿನಾ ಕುಮೊಕ್ ಭಿಲ್ಕುಲ್
ಆಮ್ಚೆ ಥಂಯ್ ಆಯ್ಲ್ಯಾ ತಿ ಕಿತ್ಲಿ ಜಾಣ್ವಾಯ್
ಫೆಸ್ತಾಂ ಪರ್ಭೆಕ್ ಖರ್ಚಿತಾಂವ್ ತೊ ಹಜಾರಾಂನಿ ರುಪಯ್
ದುಬ್ಳ್ಯಾಂನಿ ಮಾಗ್ಲೆಂ ಮ್ಹಣ್ತಾನಾ ಥಂಯ್ ಥಾವ್ನ್ ಪೊಳ್ತಾಂವ್ ನ್ಹಯ್
ತುಮಿಂಚ್ಚ್ ಚಿಂತಾ ಆಸಲೆಂ ಚಿಂತಾಪ್ ದವರ್ನ್ ಕಸಲೆಂ ಫೆಸ್ತ್ಗಾಯ್
ಜೆಜು ಖರೆಂಪಣಿ ಜಲ್ಮಾತಾನಾ, ಮೆಳ್ಳಿ ಗೊರ್ವಾಂ ಖಾವ್ಣ್
ಆಜ್ ಘರಾ ಸುಂರ್ಗಾರಾಯ್ತಾಂವ್ ಆಸ್ಲ್ಲೊ ದುಡು ಖರ್ಚುನ್
ಜೆಜುನ್ ಆತಾಂ ವಿಚಾರುಂಕ್ ನಾ ಆಮ್ಚೆ ಲಾಗಿಂ ಆಸ್ರೊ ಪರ್ತ್ಯಾನ್
ಸರ್ಗಿಂ ಬಸೊನ್ ಹಾಸ್ತಾ ಕೊಣ್ಣಾ ಹೆಂ ಸರ್ವ್ ಆಡಂಬರ್ ಪಳೆವ್ನ್
ವಾಯ್ಲೆಟ್ ಜೆ. ಪಿರೇರಾ
^ ವಯ್ರ್
ನತಾಲಾಂಚೊ ಅಂಖೊ 2005
ನತಾಲಾಂಚೊ ಅಂಖೊ 2006
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.