ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಹ್ಯಾ ಸಂಸಾರಾಂತ್ ಸಲೀಸಾಯೆಚೆಂ ಕಾಮ್ ಹೆಂಚ್; ’ಕಿತೆಂಯ್ ಕರಿನಾಸ್ತಾಂ ಹಾತ್ ಭಾಂಧುನ್ ಬೊಸ್ಚೆಂ ಆನಿ ಕಾಂಯ್ ಕರ್ತೆಲ್ಯಾಂಕ್ ಹಲ್ಕ್ ಕರ್ಚೆಂ’
ಧಾಕ್ಡ್ಯಾಚ್ಯಾ ಸಂಭ್ರಮಾರ್ ದಾಯ್ಜಿದುಭಾಯ್
ವರಸ್ : 2008
ಅಂಕೊ : 44
ಮಯ್ನೊ : ಸಪ್ತೆಂಬರ್
ಸಂಪಾದಕೀಯ್ - 44.
ವಲ್ಲಿ ಕ್ವಾಡ್ರಸ್
ಮನಿಸ್ ಹ್ಯಾ ಸಂಸಾರಾಂತ್ ಕಿತ್ಯಾಕ್ ಪಾಸೊನ್ ಜಲ್ಮೊನ್ ಯೆತಾ? ಆಪ್ಲ್ಯೆ ಜಿಣ್ಯೆ ಆವ್ದೆಂತ್ ಹರ್ಯೆಕ್ ಮನಿಸ್ ಧಾ ಬೊಟಾಂ ಝರವ್ನ್ ಅಪ್ಲೆಂ ಪೋಟ್ ಭರ್ತಾ. ಆಪ್ಣಾಸವೆಂ ಆಪ್ಲ್ಯಾಂಚೆಂ ಪೋಟ್ ಭರಾಶೆಂ ಪಳೆತಾ. ಆಯ್ಚ್ಯಾ ದಿಸಾಪರಿಂಚ್ ಫಾಲ್ಯಾಂಕ್ ಅಪ್ಲೆಂ ತಶೆಂಚ್ ಆಪ್ಲ್ಯಾಂಚೆಂ ಪೋಟ್ ಭರ್ಚೆಖಾತಿರ್ ಮಿನತ್ ಕರ್ತಾ. ಜೊಡ್ಲ್ಲೆಂ ಇಲ್ಲೆಂ ಉರಯ್ತಾ. ಬ್ಯಾಂಕಾಂತ್ಲ್ಯಾ ಆಪ್ಲ್ಯಾ ಖಾತ್ಯಾಂತ್ ಪುಂಜಯ್ತಾ, ಕೊಣ್ ಧನ್ ದಿರ್ವೆಂ ಪುಂಜಯ್ತಾ. ಕೊಣ್ ಆಸ್ತ್ ಬದಿಕ್ ಮೊಲಾಕ್ ಘೆವ್ನ್ ಪುಂಜಾಯ್ತಾ. ಹ್ಯಾ ಸಂಸಾರಾಕ್ ಆಯಿಲ್ಲೊ ಕೊಣ್ಯೀ ಎಕ್ಲೊ ಎದೊಳ್ ಪಾಸೊನ್ ಶಾಸ್ವತ್ ಜಿಣಿ ಜಿಯೆಲ್ಲೊನಾ. ವಾ ಭೋವ್ಶಾ ಫುಡೆಂಯ್ ಜಿಯೆಂವ್ಚೆಪರಿಂ ನಾ. ಹಿ ಜಿಣ್ಯೆ ಆವ್ದಿ ಕ್ಷಣಿಕ್; ’ಖಿಣಾಂಚಿ’.
ಮನ್ಶ್ಯಾಚ್ಯಾ ಹ್ಯಾ ಜಿಣ್ಯೆ ಆವ್ದೆಂತ್ ಕೆದ್ನಾಂ ತೊ ಆಪ್ಲ್ಯಾ ಕುಡಿಚೊ ಅಖ್ರೇಚೊ ಉಸ್ವಾಸ್ ಸೆವ್ತಾಗೀ, ಉಪ್ರಾಂತ್ ತಾಚಿ ಕೂಡ್ ಜಿಯೆತೆಲ್ಯಾಂ ಮಧೆಂ ದವ್ರುನ್ ಫಾಯ್ದೊ ನಾ, ಕಿತ್ಯಾಕ್; ತಿ ಕೊಣಾಕ್ಚ್, ಕಿತ್ಯಾಕ್ಯೀ ಉಪ್ಕಾರಾಕ್ ಪಡ್ಚೆತಸ್ಲಿ ನ್ಹಯ್, ತಿ ಕುಸ್ತಾ, ಘಾಣೆತಾ ದೆಕುನ್ ಕೊಣ್ ತ್ಯಾ ಕುಡಿಕ್ ಪುರ್ತಾ, ತರ್ ಕೊಣ್ ಲಾಸ್ತಾ. ಉಪ್ರಾಂತ್ ಕಿತೆಂಯ್ ಉರ್ತಾ ತರ್ ತಾಣೆಂ ಜಿಯೆವ್ನ್ ಆಸ್ತಾನಾ ಕೆಲ್ಲೆಂ ಬರೆಂ/ವಾಯ್ಟ್ ಮಾತ್ರ್.
ಹಾಂವ್ ಕಾಂಯ್ ಸಮಾಜ್ವಾದಾವಿಶಿಂ ವಾ ಮನ್ಶ್ಯಾಜಿಣ್ಯೆವಿಶಿಂ ಪ್ರಭಂಧ್ ಬರಂವ್ಕ್ ಬೊಸೊಂಕ್ ನಾ. ಆಮಿಂ, ಮಂಗ್ಳುರಿ ಕ್ರಿಸ್ತಾಂವ್ ಮನ್ಶಾಂ ಹ್ಯಾ ಪರಿಗತೆ ಥಾವ್ನ್ ಅಥ್ವಿಂ? ವ್ಹಯ್ ತರ್ ಕಿತ್ಲಿಂ? ಆನಿ ಕಶಿಂ? ಹ್ಯಾ ಸವಾಲಾ ಭಂವ್ತೊಣಿಂ ಎಕೊಡೊ ನಿಯಾಳ್ ಕರ್ಚೆಪಾಸತ್ ದೋನ್ ಉತ್ರಾಂ ಗರ್ಜೆಚಿಂ ಮ್ಹಣ್ ಭಗ್ಲೆಂ.
ಆಮ್ಚಿಂ ಪುರ್ವಜಾಂ ಕಠೀಣ್ ಪರಿಶ್ರಮಿ, ಸ್ವಾವಲಂಭಿ, ಸೊಸ್ಣಿಕಾಯೆಚಿಂ ಮ್ಹಣ್ ಖಂಯ್ಚರ್ಗೀ, ಕೊಣೆಂಗೀ ಪುನೆಗೆಲ್ಯಾನ್ ಬರಯಿಲ್ಲೆಂ, ಕೆದಾಳಾಗೀ ವಾಚ್ಲ್ಲೊ ಗಯ್ರೊ ಉಡಾಸ್ ಮ್ಹಜೊ. ತೆದ್ನಾಂ ಆಮ್ಚಿಂ ಪುರ್ವಜಾಂ ಗಾಂವ್ಚ್ಯಾ ಭಾಟಾಂಗಾರಾಂಚಿ, ಜಮೀನ್ದಾರಾಂಚಿ, ತೊಟಾಂಗಾರಾಂಚಿ ಬುಟ್ಟಿ ಚಾಕ್ರಿ ಕರುನ್ ಅಪ್ಲೆಂ, ತಶೆಂಚ್ ಆಪ್ಲ್ಯಾಂಚೆಂ ಪೋಟ್ ಭರ್ನ್ ಆಸ್ಲಿಂ. ತಾಂಚೆಸವೆಂ ತಾಂಚೆಂ ಸಗ್ಳೆಂ ಸಂತಾನ್ ಪಾಸೊನ್ ತೊಟಾಂನಿ, ಗಾದ್ಯಾಂನಿ, ಬೆಟಾಂನಿ ಚಾಕ್ರಿ ಕರ್ನ್ ಜಿಯೆತಾಲಿಂ. ಪುಣ್ ಭುಕ್ ಏಕ್ ಅಸಲಿ ಪಿಡಾ ಜಾವ್ನಾಸಾ, ತಿ ಸಂಪ್ಚೆತಸಲಿ ಭಿಲ್ಕುಲ್ ನ್ಹಯ್. ದೆಕುನ್ ಕೊಣ್ ಆಪ್ಲೊ ಮಾಯ್ಗಾಂವ್ ಸೊಡುನ್ ಸೆಜಾರ್ಚ್ಯಾ ಗಾಂವಾಂನಿ ಗೆಲೊ, ಕಾಂಯ್ ದೋನ್ ಕಾಸ್ ಚಡಿತ್ ಜೊಡ್ಚೆಖಾತಿರ್, ಕೊಣ್ ಘಾಟಾಂನಿ ಘೊಳ್ಳೆ ತರ್ ಆನಿ ಕೊಣ್ ಬೊಟಿಂನಿ ಘೊಳೊಂಕ್ ಗೆಲೆ. ಕೊಣ್ ಬೊಂಬೊಯ್ ಪಾವ್ಲೆ ತರ್ ಆನಿ ಕೊಣ್ ಗಲ್ಫಾಕ್ ಉಭ್ಲೆ. ಕೊಣ್ ತಾರ್ವಟಿ ಜಾಲೆ ತರ್ ಆನಿ ಕೊಣ್ ಪೈಲಟ್ ಜಾಲೆ.
ಪುಣ್ ಫಕತ್ತ್ ಅಪ್ಲೆಂ ಪೋಟ್, ಆಪ್ಲೆಂ ಕುಟಾಮ್, ಆಪ್ಲ್ಯಾ ಬೆಂಕಾಚೊ ಎಕೌಂಟ್, ಆಪ್ಲಿ ಆಸ್ತ್ ಬದಿಕ್, ಆಪ್ಲೆಂ ಭಾಂಗಾರ್ ಶೃಂಗಾರ್, ಆಪ್ಲೆಂ ಘರ್-ಬದಿಕ್, ಆಪ್ಲಿ ಅಂತಸ್ಥ್ - ಹಾಚೆರ್ ಜೀಣ್ಭರ್ ತೃಪ್ತ್ ಜಾಂವ್ಚೆಚ್ ಚಡ್ತಾವ್. ಸಂಸಾರಾಮ್ತ್ ಮನಿಸ್ ಕೆದಿಂಚ್ ತೃಪ್ತ್ ಜಾಲ್ಲೊನಾ. ಜೆದ್ನಾಂ ತೊ ಆಪ್ಲ್ಯಾ ಆಶಾ ಅತ್ರೆಗಾಂಚ್ಯಾ ಶಿಖರಾಚ್ಯಾ ತುದೆಯೆಕ್ ಪಾವ್ಲ್ಯಾರ್ಯೀ ತಾಚ್ಯೊ ಆಶಾ-ಅತ್ರೆಗ್ ಮುಗ್ದಲ್ಲ್ಯೊ ಮ್ಹಣ್ ನಾಂತ್.
ಪುಣ್ ಪೊಟಾಚ್ಯಾ ಭುಕೆಸವೆಂ ಥೊಡ್ಯಾಂಕ್ ಹೆರ್ ಭುಕೊ ಆಸಾತ್. ಹಿ ಭುಕ್ ಶೈಕ್ಶಣಿಕ್ ಆಸ್ಯೆತ್, ಸಾಮಾಜಿಕ್ ಬದ್ಲಾವಣೆಚಿ ಆಸ್ಯೆತ್, ಸಾಹಿತಿಕ್ ಆಸ್ಯೆತ್ ವಾ ಹೆರ್ ರಿತಿಚ್ಯೊ ಆಸ್ಯೆತ್. ದೆಕುನ್ ಅಸಲಿಂ ಆಪ್ಲ್ಯಾ ಜಿಣ್ಯೆಂತ್ ಆಪ್ಲ್ಯಾ ಭುಕೆಚ್ಯಾಕೀ ಚಡಿತ್ ಹ್ಯಾ ಸಂಸಾರಾಂತ್ ಆಸ್ಚೆಂ ಸೊಧುನ್ ವೆತಾತ್. ಮಿನತ್ ಕರ್ತಾತ್. ಅಪ್ಣಾಖಾತಿರ್ ಜಿಯೆಂವ್ಚೊ ಮನಿಸ್ ಮಾತ್ರ್ ಕಿತ್ಯಾಕ್? ಜಾನ್ವಾರ್ ಜಾವ್ನಾಸ್ಚೊ ಪೆಟೊ ಸಯ್ತ್ ಆಪ್ಣಾಖಾತಿರ್ ಜಿಯೆತಾ. ಪುಣ್ ಮನಿಸ್ ವೆಗ್ಳೊ, ತಾಕಾ ಆಪ್ಲೆಂ ಫಾಲೆಂ, ಆಪ್ಲ್ಯಾ ಪೆಲ್ಯಾಂಚೆಂ ಫಾಲೆಂ ಪಡೊನ್ ಗೆಲಾಂ - ದೆಕುನ್ ಆಪ್ಲ್ಯಾ ಜಿಣ್ಯೆ ಆವ್ದೆಚೊ ವೇಳ್, ಮಿನತ್ ಸಾಕ್ರಿಫಿಸ್ ಕರುನ್ ಹೆರಾಂವಿಶಿಂ, ಹೆರಾಂಚೆಂ ಬರೆಂ-ಫಾಲೆಂ ಚಿಂತುಂಕ್ ಪೆಚಾಡ್ತಾ.
ಕೊಂಕ್ಣೆಂತ್ ಕಾಂಯ್ ಪಾಟ್ಲ್ಯಾ ಎಕಾ ದಾಕ್ಡ್ಯಾ ಥಾವ್ನ್ ಹೆಂ ಚಿಂತಾಪ್ ಉಟಯಿಲ್ಲ್ಯಾ ದಾಯ್ಜಿದುಭಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾನ್ ಕೆಲ್ಲೆಂ/ಕರುನ್ ಆಸ್ಚೆಂಯ್ ಹೆಂಚ್.
2003 ಇಸ್ವೆಂತ್ ಜೆದ್ನಾಂ ಹಾಂವ್ ಆಫಿಸಾಚ್ಯಾ ಕಾಮಾಕ್ ಲಾಗೊನ್ ದುಭಾಯ್ ಪಾವ್ಲ್ಲೆವೆಳಾರ್, ದಾಯ್ಜಿದುಭಾಯ್ ಎಕ್ತಾರಾಚ್ಯಾ ಮುಖೆಲಿನ್; ಡಯಾನ್ ಡಿ’ಸೋಜಾನ್ ಮ್ಹಾಕಾ ಸಂಪರ್ಕ್ ಕರುನ್, ದಾಯ್ಜಿದುಭಾಯ್ ಬರವ್ಪಿ ಎಕಾ ಅಧೇಸಾಕ್ ಮ್ಹಜೆಸವೆಂ ಖರ್ಚುಂಕ್ ಆಶೆತಾತ್ ಮ್ಹಣ್ ಸಾಂಗ್ತಾನಾ ಮ್ಹಾಕಾಯ್ ಅಜ್ಯಾಪ್ ಜಾಲೆಂ. ಸತ್ ಸಾಂಗ್ಚೆಂ ತರ್ ಹಾಂವ್ಂಚ್ ತಾಂಕಾಂ ಮೆಳೊಂಕ್ ಆತುರಿತ್ ಆಸ್ಲ್ಲೊಂ. ಅಶೆಂ ಎಕಾ ಸುಕ್ರಾರಾ ಕಾಂಯ್ ವೀಸ್-ಪಂಚ್ವೀಸ್ ಬರಯ್ಣಾರಾಂಕ್, ದುಭಾಯಾಂತ್ ಮುಕಾಮುಖಿ ಮೆಳ್ಚೆಂ ಭಾಗ್ ಮ್ಹಾಕಾ ತಾಣಿಂ ಫಾವೊ ಕೆಲೆಂ. ತಾಂತ್ಲ್ಯಾ ಚಡ್ತಾವಾಂಕ್ ಹಾಂವ್ ವೆಕ್ತಿಗತ್ ಜಾವ್ನ್ ವ್ಹಳ್ಕತಾಲೊಂ ತರ್ಯೀ, ಸರ್ವಾಂಕ್ ಎಕಾ ಸುವಾತೆರ್ ಮೆಳ್ಚೆಂ ಭಾಗ್ ನಿಜಾಯ್ಕೀ ಸದಾಂ ಉಡಾಸಾಕ್ ಉರ್ಚೆತಸ್ಲೆಂ.
ಹಾಂವೆಂ ತ್ಯೇ ವೆಳಾರ್ ಏಕ್ ಉತಾರ್ ಮ್ಹಳ್ಳೆಂ ಅಜೂನ್ ಮ್ಹಜ್ಯಾ ಮತಿಚ್ಯಾ ಪಡ್ದ್ಯಾಚೆರ್ ಆಸಾ, ಆನಿಂ ತೆಂ ಜಾವ್ನಾಸಾ; "ತುಮ್ಕಾಂಯ್ ಮೆಳ್ಚೊ ಹಾಫ್ತ್ಯಾಚೊ ಏಕ್ ರಜೆಚೊ ದೀಸ್, ತುಮೀಂಯ್ ತುಮ್ಚ್ಯಾ ಘೊವಾಕ್/ಬಾಯ್ಲೆಕ್/ಭುರ್ಗ್ಯಾಕ್ ಪೊಟ್ಲುನ್ ಧರ್ನ್ ನಿದ್ಯೆತೆಂ, ಪುಣ್ ತುಮಿಂ ಆಜ್ ಮ್ಹಜೆಸವೆಂ ಖರ್ಚುಂಕ್ ಹಾಂಗಾಸರ್ ಆಯ್ಲ್ಯಾತ್ - ತುಮ್ಕಾಂ ದೇವ್ ಬರೆಂ ಕರುಂ".
ಮ್ಹಜ್ಯಾ ಹ್ಯಾ ಉತ್ರಾಂಚೊ ಮತ್ಲಬ್ಯೀ ಹೊಚ್. ಆಮ್ಕಾಂ ಆಮ್ಚ್ಯಾ ಪೊಟಾಚ್ಯಾ ಭುಕೆಚ್ಯಾಕೀ ಚಡ್ತಿಕ್ ಚಿಂತುಂಕ್ ಸಾಧ್ಯ್ ಆಸಾ, ಆನಿ ಅಶೆಂ ಚಿಂತ್ಚೆ ಮಾತ್ರ್ ಸಮಾಜೆಂತ್ ಅಪ್ಲ್ಯಾ ಬರ್ಯಾಪಣಾಚಿ ಕುರುಃ ಸೊಡುನ್ ವೆತಾತ್ ಶಿವಾಯ್, ಹ್ಯಾ ಸಂಸಾರಾಂತ್ ಯೇವ್ನ್, ಜಿಯೆವ್ನ್, ಮೊರೊನ್ ವೆಚಿಂ ನ್ಹಯ್.
ಸಮಾಜೆಂತ್ ’ಬರಯ್ಣಾರ್’ ಮ್ಹಳ್ಳೊ ವರ್ಗ್ ವೆಗ್ಳೊ. ಖಂಡಿತ್ ವೆಗ್ಳೊ. ಜಶೆಂ ಪಳೆಂವ್ಕ್ ಮಾತ್ ಹೆರ್ ಮನ್ಶ್ಯಾಪರಿಂ ದೋನ್ ದೊಳೆ, ದೋನ್ ಕಾನ್, ಏಕ್ ನಾಕ್, ಏಕ್ ತೋಂಡ್ ಆಸ್ಚೆ ತರ್ಯೀ ಹಾಣಿಂ ಚಿಂತ್ಚಿ ರೀತ್ ವೆಗ್ಳಿ, ಹಾಣಿಂ ದೆಖ್ಚಿ ರೀತ್ ವೆಗ್ಳಿ, ಹಾಂಚೊ ಸಂಸಾರ್ ವೆಗ್ಳೊಚ್. ದೆಕುನ್ ಮ್ಹಜ್ಯಾ ಎಕಾ ಲೇಖಕ್ ಮಿತ್ರಾಚ್ಯಾ ಸಾಸು ಮಾಂಯ್ನ್ ಸಾಂಗ್ಲ್ಲೆಂ ಉತಾರ್ ಮ್ಹಜ್ಯಾ ಮತಿಕ್ ಉಡಾಸಾಕ್ ಯೆತಾ "ಬರಯ್ಣಾರ್ ಚಡ್ತಾವಾಂಕ್ ಏಕ್ ಸುತ್ತು ಸಡಿಲ್". ಸವಾಲ್ ಕೊಣಾಕ್ ಏಕ್ ಸುತ್ತು ಸಡಿಲ್ ಆನಿ ಕೊಣಾಕ್ ಏಕ್ ಸುತ್ತು ಟಾಯ್ಟ್ ಮ್ಹಳ್ಳೊ ನ್ಹಯ್. ಪುಣ್ ಬರಯ್ಣಾರ್ ಮ್ಹಳ್ಳೊ ವರ್ಗ್ ಮಾತ್ರ್ ಖಂಡಿತ್ ವೆಗ್ಳೊ ಮ್ಹಳ್ಳೆಂ ಸತ್.
"ಖಂಯ್ಚರ್ ಮ್ಹಜ್ಯಾ ನಾಂವಿಂ ದೋನ್-ತೇಗ್ ಎಕ್ಟಾಂಯ್ ಜಾತಾತ್ಗೀ, ಥಂಯ್ಚರ್ ಹಾಂವ್ ಆಸ್ತಲೊ" ಮ್ಹಳ್ಳೆಂ ಜೆಜುಚೆಂ ಉತಾರ್ ಸಯ್ತ್ ಭೋವ್ ಅರ್ಥಾಭರಿತ್ ಜಾವ್ನಾಸಾ. ಕಿತ್ಯಾಕ್ ಮ್ಹಳ್ಯಾರ್ ಮನಿಸ್ ತಿತ್ಲೆ ಸಲೀಸಾಯೆನ್ ಎಕ್ಟಾಂಯ್ ಜಾಂವ್ಕ್ ಸಕಾನಾ. ಹೆಂ ಸಾದ್ಯಾ ಮನ್ಶ್ಯಾಚೆಂ ಚಿಂತಾಪ್ ತರ್, ಬರಯ್ಣಾರಾಂಕ್ ಲಾಗಿಂ ಹಾಡ್ಚೆಂ ಕಾಮ್ ಭಿಲ್ಕುಲ್ ತಿತ್ಲೆಂ ಸಲೀಸಾಯೆಚೆಂ ನ್ಹಯ್.
ಅಜೀಕ್ ಕಾಂಯ್ ಅಟ್ರಾ ವರ್ಸಾಧಿಂ, ಮ್ಹಣ್ಜೆ ಚಡುಣೆಂ 1990-91 ಇಸ್ವೆಂತ್, ಕೊಂಕ್ಣಿ ಬರಯ್ಣಾರಾಂಚೊಚ್ ಮ್ಹಳ್ಳೊ ಏಕ್ ’ಎಕ್ತಾರ್’ ಆಸೊಂಕ್ ಜಾಯ್. ಬರಯ್ಣಾರಾಂನಿ ಆಪ್ಲ್ಯಾ ಸಾಹಿತಿಕ್ ವ್ಹಾಡಾವಳೆವಿಶಿಂ ನಿಯಾಳ್ ಕರ್ಚ್ಯೊ ವಾಟೊ ರುತಾಂ ಕರಿಜಾಯ್ ಮ್ಹಳ್ಳ್ಯಾ ಇರಾದ್ಯಾನ್, ವಿ.ಜೆ.ಪಿ.ಸಲ್ಡಾಞ್, ಎ.ಟಿ.ಲೊಬೊ, ಚಾ.ಫ್ರಾ.ದೆ’ಕೋಸ್ತಾ ಹಾಂಚ್ಯಾ ಮುಖೇಲ್ಪಣಾಖಾಲ್ ಏಕ್ ಸುರ್ವಾತ್ ಜಾಂವ್ಚೆಂ ಪ್ರೇತನ್ ಚಲ್ಲ್ಲೆಂ. ಹಾಂಚೆಸವೆಂ ಸಿಜ್ಯೆಸ್ ತಾಕೊಡೆ, ಡಾ|ಎಡ್ವರ್ಡ್ ನಜ್ರೆತ್, ಪಂಚು ಬಂಟ್ವಾಳ್, ಸಿಲ್ವೆಸ್ಟರ್ ಡಿ’ಸೋಜ್, ರಿಚ್ಚಿ ಪಿರೇರ್, ಮೌರಿಸ್ ಶಾಂತಿಪುರ್, ಟೈಟಸ್ ತಾಕೊಡೆ ಆಸ್ಲೆ, ತಾಂಚೆಸವೆಂ ಹಾಂವ್ಯೀ ಎಕ್ಲೊಂ ಜಾವ್ನಾಸ್ಲೊಂ. ಪುಣ್ ಥೊಡ್ಯಾ ಮಾಲ್ಘಡ್ಯಾ ಲೇಖಕಾಂಕ್ ಎಕಾಮೆಕಾ ಸಮಾ ಪಡಾನಾತ್ಲ್ಲೆಂ ದೆಖುನ್ ’ತೊ ಆಸ್ಲ್ಲ್ಯಾ ಮೆಳಿಂತ್ ಹಾಂವ್ ಆಸ್ಚೊಂನಾ’ ಮ್ಹಣ್ ಎಕ್ಲ್ಯಾ ಮಾಲ್ಘಡ್ಯಾನ್ ಉಚಾರ್ಲೆಂ ದೆಖುನ್ ತಾಚೆ ಅಭಿಮಾನಿ ಪಂಗಡಾಂತ್ಲೆ ಕೊಣ್ಯೀ ಹ್ಯಾ ಎಕ್ತಾರಾಕ್ ಮೆಳ್ಳೆನಾಂತ್ ಆನಿ ಕಾಂಯ್ ತೀನ್-ಚ್ಯಾರ್ ಜಮಾತ್ಯೊ ಜಾಲ್ಯೊ, ಸಭಾರ್ ತಪ್ಪಾಲ್ ಕಾಗ್ದಾಂ ಘಾಲಿಂ ತರ್ಯೀ ಲೇಖಕಾಂಚೊ ಎಕ್ತಾರ್ ಘಡ್ಲೊಚ್ ನಾ.
ಉಪ್ರಾಂತ್ ಥೊಡ್ಯಾ ವರ್ಸಾಂನಿ ಕಸೊಯ್ ಜಾಲೊ ಮ್ಹಣ್ಯಾಂ. ಪುಣ್ ಎಕಾ ಕಾರ್ಯಾಂತ್ ಕಾಂಯ್ ಚಾಳಿಸ್-ಪನ್ನಾಸ್ ಲೇಖಕಾಂಕ್ ಎಕ್ಟಾಂಯ್ ಕರ್ಚೆಂ ಕಾಮ್ ತಿತ್ಲೆಂ ಸಲೀಸ್ ನ್ಹಯ್ ಮ್ಹಳ್ಳೆಂ ಸತ್ ಸರ್ವಾಂನಿ ಜಾಣಾಂ ಆಸ್ಲ್ಲೆಂ. ದಾಯ್ಜಿದುಭಾಯ್ ಎಕ್ತಾರಾಚ್ಯಾ ಸಾಂಗೊಡ್ಯಾಂನಿ ಆಯ್ಲೆವಾರ್ ಹೆಂ ಕಾಮ್ ಭೋವ್ ಬರ್ಯಾ ರಿತಿನ್ ಕೆಲ್ಲೆಂ ಸಂತೊಸಾಚೆಂಚ್ ಮ್ಹಣ್ಯೆತಾ.
ಖಂಯ್ಚೇಂಯ್ ಕಾಮ್ ಎಕಾ ಇರಾದ್ಯಾನ್ ಸುರು ಕೆಲಾಂ ತರ್, ತೆಂ ಕಾಮ್ ಜರೂರ್ ಬಾಳ್ತಾ. ತೆಚ್ಚ್ಪರಿಂ ಸಗ್ಳಿಂ ಕರ್ತಾತ್ ದೆಕುನ್ ಅಮಿಂಯ್ ಕರ್ಯಾಂ ಮ್ಹಣ್ ಸುರ್ವಾತ್ ಕೆಲ್ಲಿಂ ಕಾಮಾ ಅರ್ಧ್ಯಾರ್ಚ್ ವೊಮ್ತಿಂ ಪಡ್ತಾತ್. ದಾಯ್ಜಿದುಭಾಯ್ ಬರಯ್ಣಾರಾಂನಿ, ದುಭಾಯ್ ಶೆರಾಂತ್ ಆಪ್ಲ್ಯಾ ಆಪ್ಲೊ ದೀಸ್ಪಡ್ತೊ ಗ್ರಾಸ್ ಜೊಡುಂಕ್ ಆಯಿಲ್ಲ್ಯಾ ಹೆರ್ ಬರಯ್ಣಾರಾಂಕ್, ಆಮಿ ಹೆರಾಂ ಪಾಸೊತ್ ಚಿಂತಿಜಾಯ್ ಮ್ಹಳ್ಳೆಂ ಚಿಂತಾಪ್ ಉಟಯ್ಲೆಂ ಅಖ್ಖ್ಯಾ ಕೊಂಕ್ಣೆಂತ್ ಜೆಮೆತೆಲ್ಯಾ ಸರ್ವಾಂಕ್ ಜಾಗಂವ್ಕ್ ಸಕ್ಲೆಂ ಮ್ಹಳ್ಳೆ ಅಪುಟ್ ಸತ್. ಹಾಚೆಪಾಟ್ಲ್ಯಾನ್ ಕಠೀಣ್ ಮಿನತ್, ಪರಿಶ್ರಮ್ ಘೆತ್ಲ್ಲ್ಯಾ ಸರ್ವಾಂಕ್ ಕಿತ್ಲಿ ವಾಖಣ್ಣಿ ದಿಲ್ಯಾರ್ಯೀ ಉಣಿಂಚ್ ಮ್ಹಣ್ಯೆತಾ.
ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಕಾಮಾಂಕ್ ವಿಶೇಸ್ ಸಯ್ರಣಾಚಿ ಗರ್ಜ್ ಆಸಾ. ಹಿಂ ಕಾಮಾಂ ಕರ್ತೆಲ್ಯಾಂಕ್ ಮಿನತ್ ಮಾತ್ರ್ ಆಸಾ ಶಿವಾಯ್ ಸಾಂಬಾಳ್ ನಾ. ಆಪ್ಲ್ಯಾಚ್ ಬೊಲ್ಸಾಂತ್ಲೊ ದುಡು ಖರ್ಚುನ್ ಹೆರಾಂ ಪಾಸತ್ ವಾವ್ರ್ ಕರುಂಕ್ ಆಸಾ, ತಿತ್ಲೆಂಚ್ ನ್ಹಯ್ ’ಕಾಮ್ ನಾತ್ಲ್ಲೆ, ನಾಂವಾಕ್ ಲಬ್ಧಾಲ್ಲೆ.......’ ಅಸಲ್ಯಾ ನಾಂನಾ ರಿತಿಚ್ಯಾ ಖೆಳ್ಕುಳ್ಯಾಂಕ್ ಆಯ್ಕೊನ್, ಸೊಸುನ್, ಜಿರವ್ ಜಿಯೆಂವ್ಕ್ ಪಡ್ತಾ. ದೆಕುನ್ಂಚ್ ಮ್ಹಳೆಂ - ಸಾದ್ಯಾ ಚಿಂತ್ಪಾಚ್ಯಾ ಮನ್ಶ್ಯಾಂಕ್ ಹೆಂ ಅಸಾಧ್ಯ್.
ಖಂಚೋಯ್ ಏಕ್ ಎಕ್ತಾರ್ ಘಡ್ತಾತ್ ತರ್, ತಾಕಾ ತಾಚೊಚ್ ಮ್ಹಳ್ಳೊ ಏಕ್ ಇರಾದೊ ಆಸ್ತಾ, ಶೆವೊಟ್ ಆಸ್ತಾ, ಇಂಗ್ಲಿಶಾಂತ್ ಹಾಕಾ ’Objectives' ಮ್ಹಣ್ತಾತ್. ಆನಿ ಹಾಚೆಪ್ರಕಾರ್, ಆಮಿ ಕೊಣ್? ಆಮಿಂ ಕಿತ್ಯಾಕ್ ಹೊ ಎಕ್ತಾರ್ ಘಡ್ಲಾ? ಹ್ಯಾ ಎಕ್ತಾರಾಚೆಂ ಪ್ರಮುಕ್ ಮಿಸಾಂವ್ ಕಸಲೆಂ? ಹಿಂ ಮುಳಾವಿಂ ಸವಾಲಾಂ ಖಂಚ್ಯಾಯ್ ಬೆಕುಫಾಕ್ ತರ್ಯೀ ಸಮ್ಜಾಜಯ್ ಜಾಲ್ಲಿಂ. ಹಾಂಗಾಸರ್ ಎಕ್ತಾರಾಚೊ ಇರಾದೊ ಏಕ್ ಆಸ್ತಾ, ತೊ ಥೊಡೆ ಪಾವ್ಟಿಂ ವೆಕ್ತಿಗತ್ ಇರಾದ್ಯಾಂಕ್ ತಾಳ್ ಪಡಾನಾ, ವಾ ತ್ಯಾ ಖಾತಿರ್ ಏಕ್ ವಾಟ್ ಕರುನ್ ದೀನಾ. ಹೆಚ್ಚ್ ಸಂಧರ್ಭಿಂ ಅಸಲ್ಯಾ ಇರಾದ್ಯಾಚೆ ಆಪ್ಲಿ ವಾಟ್ ಆಸಾ ಕರ್ತಾತ್ ಆನಿ ಆಪ್ಲ್ಯಾ ಮಿಸಾಂವಾಕ್ ಮುಖಾರುನ್ ವರ್ತಾತ್. ಹೆಂ ಭಿಲ್ಕುಲ್ ವಾಯ್ಟ್/ಚೂಕ್ ನ್ಹಯ್. ದಾಯ್ಜಿದುಭಾಯ್ ಎಕ್ತಾರಾಂತ್ಲ್ಯಾ ಸಾಂದ್ಯಾಂಚ್ಯೊ ಸಯ್ತ್ ಅಸಲ್ಯೊಚ್ ಸಭಾರ್ ವಾಟೊ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್;
1. ದಾಯ್ಜಿದುಭಾಯ್.ಕೊಮ್: ಬೆಳ್ಮಣ್ಚ್ಯಾ ವಾಲ್ಟರ್ ಸೊಜ್ ಸೊಜಾಚೆಂ ಹೆಂ ಅಂತರ್ಜಾಳ್, ಖರೆಂಚ್ ಜಾವ್ನ್ ದುಭಾಯಾಂತ್ ಮಾತ್ರ್ ನ್ಹಯ್, ಅಖ್ಖ್ಯಾ ಸಂಸಾರಾಂತ್ ಎಕಾ ರಿತಿಚೆಂ ಜಾಗರಣ್ ಹಾಡುಂಕ್ ಸಕ್ಲೆಂ ಮ್ಹಣ್ಚ್ಯಾಂತ್ ದುಭಾವ್ ನಾ. ದಿಸಾಚ್ಯೊ ಖಬ್ರೊ ಖಿಣಾನ್ ಪರ್ಗಟ್ ಜಾಂವ್ಚೆಂ ಹೆಂ ಅಂತರ್ಜಾಳ್ ಆಜ್ ದಿಸಾಕ್ ಲಾಖಾಂನಿ ಲೋಕ್ ವಾಚ್ತಾ ತರ್, ಹಾಚ್ಯಾ ಲೊಕಾಮೊಗಾಳಾಯೆಚೊ ತುಮಿ ಅಂದಾಜ್ ಕರ್ಯೆತಾ.
2. ಮಾಯ್ಭಾಸ್.ಕೊಮ್: ಬ್ರಹ್ಮಾವರಾಚ್ಯಾ ನವೀನ್ ಸಿಕ್ವೇರಾಚೆಂ ಹೆಂ ಮಿಸಾಂವ್, ಕೊಂಕ್ಣೆಂತ್ಲೆಂ ಪಯ್ಲೆಂ ಸಂಪೂರ್ಣ್ ಕೊಂಕ್ಣಿ ಅಂತರ್ಜಾಳ್ ಜಾವ್ನ್ ಉದೆಲೆಂ, ಸಾಹಿತಿಕ್ ಅಭಿರುಚ್ ಆಸ್ಚ್ಯಾ ಸರ್ವ್ ಲೊಕಾಂಕ್ ಹೆಂ ಅಂತರ್ಜಾಳ್ ಭೋವ್ ಮೊಗಾಚೆಂ ಜಾಲೆಂ.
3. ಕವಿತಾ.ಕೊಮ್: ಕವಿ ಮೆಲ್ವಿನ್ ರೊಡ್ರಿಗಸಾಚ್ಯಾ ಸಂಪಾದಕ್ಪಣಾಖಾಲ್ ಸುರ್ವಾತ್ ಜಾಲ್ಲ್ಯಾ ಹ್ಯಾ ಅಂತರ್ಜಾಳಿನ್ ಕೊಂಕ್ಣಿ ಕವಿಂ ಖಾತಿರ್ ಏಕ್ ವೆಗ್ಳೊಚ್ ಸಂಸಾರ್ ಉಗ್ತೊ ಕೆಲಾ ಮ್ಹಣ್ಚ್ಯಾಂತ್ ದುಭಾವ್ ನಾ.
4. ಬಾರ್ಕುರ್ಓನ್ಲಾಯ್ನ್.ಕೊಮ್: ಬಾರ್ಕುರ್ಚ್ಯಾ ಕಿಶೂಚ್ಯಾ ಮುಖೇಲ್ಪಣಾಖಾಲ್ ಸುರ್ವಾತ್ಲ್ಲೆಂ ಹೆಂ ಅಂತರ್ಜಾಳ್ ಜಾಂವ್ಕ್ ಪುರೊ ಬಾರ್ಕುರ್ ಗಾಂವ್ಚೆವಿಶಿಂತ್ ಸವಿಸ್ತಾರ್ ವಾಚಾಪ್ ಆಟಾಪ್ಚೆ ತಸ್ಲೆಂ. ಪುಣ್ ಹೆರ್ ಫಿರ್ಗಜ್ಯಾಂಕ್ ಏಕ್ ದೆಖಿಭರಿತ್ ಕಾಮ್ ಹೆಂ ಮ್ಹಣ್ಚ್ಯಾಂತ್ ನವಾಲ್ ನಾ.
5. ಉಜ್ವಲ್ ಪ್ರಕಾಶನ್: ಹೇಮಾಚಾರ್ಯಚ್ಯಾ ಸಂಪಾದಕ್ಪಣಾಖಾಲ್ ಕಾಂಯ್ ದೋನ್ ದಾಕ್ಡ್ಯಾಧಿಂ ನಿತ್ರಾಣಿ ಜಾಲ್ಲೆಂ ಪ್ರಕಾಶನ್ ಪರತ್ ಜಿವಾಳ್ ಜಾಲ್ಲೆಂ, ಕೊಂಕ್ಣೆಚ್ಯಾ ನದ್ರೆಂತ್ ಸಂತೊಸಾಚೆಂಚ್ ನಾಸ್ತಾಂ ಆನಿ ಕಿತೆಂ?
6. ದಾಯ್ಜಿ ಪ್ರಕಾಶನ್: ದಾಯ್ಜಿದುಭಾಯ್ ಬರಯ್ಣಾರಾಂಚ್ಯಾ ಎಕ್ತಾರಾಕ್ ಆಪ್ಲ್ಯಾ ಸಾಂದ್ಯಾಂಚೆಂ ವಿಂಚ್ಣಾರ್ ಸಾಹಿತ್ಯ್ ಎಕಾ ಬುಕಾರುಪಾರ್ ಪರ್ಗಟ್ ಕರ್ಚೆಂ ಮಿಸಾಂವ್ ಜರೂರ್ ಹೆರಾಂಕ್ ಉತ್ತೇಜಿತ್ ಕರ್ತಾ ಮ್ಹಣ್ಚ್ಯಾಂತ್ ದುಭಾವ್ ನಾ.
7. ವಿಶೇಸ್ ಅಂಖೆ: ಕೊಂಕ್ಣಿ ಪತ್ರಾಂಕ್ ಆರ್ಥಿಕ್ ರಿತಿಚೊ ಪಾಟಿಂಬೊ ದಿಂವ್ಚೆಂ ಮಿಸಾಂವ್. ಎದೊಳ್ಚ್ ದಾಯ್ಜಿದುಭಾಯ್ ಎಕ್ತಾರಾನ್ ತೀನ್ ವಿಶೇಸ್ ಅಂಖೆ ಕಾಡ್ಲ್ಯಾತ್.
8. ದಾಯ್ಜಿ ಪುರಸ್ಕಾರ್: ಎದೊಳ್ ಪಾಸೊನ್ ’ಕೊಂಕ್ಣಿ ಸಾಹಿತ್ಯ್ ರಚುನ್ ವಾಟೆರ್ ಪಡೊನ್ ಮೆಲೆ’ ಮ್ಹಳ್ಳಿ ಲದಿನ್ ಕರ್ನ್ ಆಯಿಲ್ಲ್ಯಾಂಕ್ ’ಫುಡೆಂ ಅಶೆಂ ಜಾಯ್ನಾಯೆ’ ಮ್ಹಳ್ಳೆಂ ಚಿಂತಾಪ್ ಹಾಡಯಿಲ್ಲಿ ಖ್ಯಾತಿ ಜರೂರ್ ದಾಯ್ಜಿಂಕ್ ಫಾವೊ. ಎದೊಳ್ ಪರ್ಯಾಂತ್ ಹಾಣಿಂ ಕೊಂಕ್ಣೆಂತ್ ಮೊಲಾಧಿಕ್ ವಾವ್ರ್ ಕೆಲ್ಲ್ಯಾಂಕ್, ಸಾಹಿತ್ ರಚ್ಲೆಲ್ಯಾಂಕ್, ಕಶ್ಟಾರ್-ಸಂಕಶ್ಟಾರ್ ಆಸ್ಚ್ಯಾಂಕ್ ಆರ್ಥಿಕ್ ರಿತಿನ್ ಮಜತ್ ಕೆಲ್ಯಾ ಮಾತ್ರ್ ನ್ಹಯ್, ಹೆರಾಂಕ್ ಸಯ್ತ್ ಹಾಚಿ ದೇಖ್ ದಿಲ್ಯಾ.
9. ಹೆರ್ ಎಕ್ತಾರಾಂಕ್ ಪ್ರೇರಣ್: ದುಭಾಯಾಂತ್ ಆಸ್ಚೆಪರಿಂ, ಮಸ್ಕತಾಂತ್ ’ಬರ್ಪಿ ಮಿತ್ರ್’, ಬಾಹ್ರೇಯ್ನಾಂತ್ ’ಕೊಂಕ್ಣಿ ಕುಟಾಮ್’, ಸುರ್ವಾತ್ ಕರುಂಕ್ ದಾಯ್ಜಿಚ್ ಪ್ರೇರಣ್ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿನಾ ಮ್ಹಣ್ ಲೆಖ್ತಾಂ. ಕುವೆಯ್ಟಾಂತ್ ’ಕೊಂಕ್ಣಿ ಕುಳ್ವಾರ್’ ಹೆಚ್ಚ್ ಪ್ರೇರಣಾಂತ್ ಸುರು ಕೆಲ್ಲೆಂ ಮ್ಹಣ್ ಹಾಂವ್ ಲೆಖ್ತಾಲೊಂ. ಪುಣ್ ನ್ಹಯ್ ಮ್ಹಣ್ ವೆಗಿಂಚ್ ಸುಸ್ತಾಲ್ಲ್ಯಾಂತ್ ಮ್ಹಾಕಾ ಕಿತ್ಯಾಕ್ಗೀ ಪಯ್ಸ್ ರಾವೊನ್ ಮ್ಹಜೆಂ ಕಾಮ್ ಕರ್ನ್ ವೆಚೆಂ ಬರೆಂ ಮ್ಹಣ್ ದಿಸ್ಲೆಂ. ಏಕ್ ನಿರ್ದಿಶ್ಟ್ ಥಿರಾಸಾಣೆಚೊ ಶೆವೊಟ್/ಇರಾದೊ (Objectives) ನಾಸ್ತಾಂ ಆಸ್ಚ್ಯಾಕ್ ಎಕ್ತಾರ್ ಮ್ಹಣೊಂಕ್ ಹಾಂವ್ ಕಿತ್ಯಾಕ್ಗೀ ಕಬೂಲ್ ನಾ.
ಹಾಂವೆಂ ಮ್ಹಜ್ಯಾ ಸಂಪಾದಕೀಯಾಚಿಂ ಸುರ್ವಾತ್ ಕೆಲ್ಲಿ ಹ್ಯಾಚ್ ಚಿಂತ್ಪಾನ್ ’ಎಕಾ ವಾತಿಥಾವ್ನ್ ಅನ್ಯೇಕ್ ವಾತ್ ಪೆಟಯ್ಲ್ಯಾರ್ ತ್ಯಾ ವಾತಿಚೆಂ ಆವ್ಕ್ ಕಾಂಯ್ ಉಣೆಂ ಜಾಯ್ನಾ, ಬಗಾರ್ ಉಜ್ವಾಡ್ ಚಡ್ತಾ’ ಆನಿ ಹೆಂ ಚಿಂತಾಪ್ ಕಾರ್ಯಾನ್ ಜ್ಯಾರಿಯೆಕ್ ಹಾಡ್ಲಾಂ. ವಯ್ರ್ ದಿಲ್ಲ್ಯಾ ಮಿಸಾಂವಾಕ್ ಚಲಯ್ತೆಲ್ಯಾಂಕ್ ಎಕಾಮೆಕಾ ಗಾಂಚ್ ಕರುಂಕ್ ಸಕ್ಲ್ಯಾತ್ ದೆಖುನ್ ಹೆಂ ತಾಂಕಾಂ ಮಾತ್ರ್ ನ್ಹಯ್, ಕೊಂಕ್ಣೆಕ್ ಸಯ್ತ್ ಫಾಯ್ದ್ಯಾಚೆಂ ಮ್ಹಳ್ಳ್ಯಾಂತ್ ದುಭಾವ್ ನಾ.
ಆಜ್ ಕೊಂಕ್ಣೆಕ್ ಜರ್ ಏಕ್ ನವೊ ಜೀವ್ ದಿಲಾ ತರ್ ಹಾಂತುಂ ದಾಯ್ಜಿದುಭಾಯ್ ಎಕ್ತಾರಾಚೊ ಪಾತ್ರ್ ಪ್ರಮುಖ್ ಮ್ಹಳ್ಳೆಂ ಮಾತ್ರ್ ಅಪುಟ್ ಸತ್. ಹೆಂ ದುಭಾಯಾಂತ್ ಮಾತ್ರ್ ನ್ಹಯ್ ಗಲ್ಫಾಚ್ಯಾ ಹೆರ್ ಜಾಗ್ಯಾಂನಿ ಸಯ್ತ್ ಪಾವ್ಲಾಂ. ಕುವೆಯ್ಟಾಂತ್ ಸಯ್ತ್ ಜೆದ್ನಾಂ ಕೊಂಕ್ಣೀ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕರುಂಕ್ ಆಯಿಲ್ಲ್ಯಾ ಮಾ|ಮೆಲ್ವಿನ್ ಡಿ’ಕುನ್ಹಾನ್ ಏಕ್ ಉತಾರ್ ದಿಲ್ಲೆಂ; ’ಕುವೆಯ್ಟಾಂತ್ಲ್ಯಾ ಹೆರ್ ಇಗರ್ಜ್ಯಾಂನಿ ಸಯ್ತ್ ಕೊಂಕ್ಣಿ ಮಿಸಾಚಿ ಸುರ್ವಾತ್ ಕರ್ತಾಂ’ ಮ್ಹಳ್ಳಿ ಭಾಸಾವ್ಣಿ. ಆನಿ ತಾಣೆಂ ಆಪ್ಲೆಂ ಉತಾರ್ ಪಾಳ್ಳೆಂಚ್; ತೆದೊಳ್ ಮ್ಹಣಾಸರ್ ಫಕತ್ತ್ ಆಯ್ತಾರಾಚೆಂ ಮಾತ್ರ್ ಕುವೆಯ್ಟ್ ಸಿಟಿ ಇಗರ್ಜೆಂತ್ ಕೊಂಕ್ಣಿ ಮೀಸ್ ಚಲ್ತಾಲೆಂ ತರ್, ಉಪ್ರಾಂತ್ ಸಾಲ್ಮಿಯಾಂತ್ ಸುಕ್ರಾರಾಚೆಂ ಕೊಂಕ್ಣಿ ಮೀಸ್ ಸುರು ಕೆಲೆಂ, ಮಾತ್ರ್ ನ್ಹಯ್, ಆಹ್ಮದಿಂತ್ ಸಯ್ತ್ ಕೊಂಕ್ಣಿ ಮಿಸಾಚಿ ಸುರ್ವಾತ್ ಕೆಲಿ ಆನಿ ಆಜ್ ಹರ್ಯೆಕಾ ಕೊಂಕ್ಣಿ ಮಿಸಾಂಕ್ ಲೋಕ್ ಭರೊನ್ ಯೆಂವ್ಚೆಂ ನಿಜಾಯ್ಕ್ಯೀ ಸಂತೊಸಾಚೆಂ.
ದಾಯ್ಜಿದುಭಾಯ್ ಎಕ್ತಾರಾನ್ ಇತ್ಲಿಂ ಸರ್ವ್ ಬರಿಂ ಕಾಮಾಂ ಕೆಲಿಂ ತರ್ ಕಾಂಯ್ ಥೊಡ್ಯೊ ಖೊಡಿಯೀ ಜರೂರ್ ಆಸ್ತೆಲ್ಯೊ. ಖೊಡಿ ಕಾಡ್ಚೆಂ ಮನ್ಶ್ಯಾಸಂಯ್ಬ್ ಆನಿ ಗರ್ಜೆಚ್ಯೊ ಖೊಡಿ ಬರ್ಯೊ. ಹ್ಯಾ ಸಂಸಾರಾಂತ್ ಸಲೀಸಾಯೆಚೆಂ ಕಾಮ್ ಹೆಂಚ್; ’ಕಿತೆಂಯ್ ಕರಿನಾಸ್ತಾಂ ಹಾತ್ ಭಾಂಧುನ್ ಬೊಸ್ಚೆಂ ಆನಿ ಕಾಂಯ್ ಕರ್ತೆಲ್ಯಾಂಕ್ ಹಲ್ಕ್ ಕರ್ಚೆಂ’. ಪುಣ್ ಏಕ್ ಸಂಗತ್ ಮಾತ್ರ್ ಸ್ಪಷ್ಟ್ ಜಾವ್ನಾಸಾ ’ಕೊಂಕ್ಣಿ ಭಾಸೆಖಾತಿರ್, ಕೊಂಕ್ಣಿ ಸಾಹಿತಿಂ ಖಾತಿರ್, ಕೊಂಕ್ಣಿ � ಖಾತಿರ್ ಇತ್ಲೊ ಸರ್ವ್ ವಾವ್ರ್ ಕೆಲ್ಲ್ಯಾ ದಾಯ್ಜಿದುಭಾಯ್ ಎಕ್ತಾರಾಕ್ ಜರೂರ್ ಧಿನ್ವಾಸ್ ಫಾವೊ’. ಹೊ ಕಾಂಯ್ ಸುಕೊ ಸಯ್ಲಾಪ್ ನ್ಹಯ್ - ಬಗಾರ್ ಮ್ಹಜ್ಯಾ ಕಾಳ್ಜಾ ಕೊನ್ಶ್ಯಾಂತ್ಲೆಂ ಉತಾರ್ ಹೆಂ.
ಆತಾಂ ಧಾ ವರ್ಸಾಂ ಸಂಪ್ತಚ್ಚ್, ನವ್ಯಾ ಚಿಂತ್ಪಾಕ್ ಆವ್ಕಾಲ್ ಲಾಭ್ಚಿಂ ಭಳ್ವಂತ್ ಖುಣಾಂ ದಿಸೊನ್ ಯೆತಾತ್ - ಭೋವ್ ಬರೆಂ, ನವೆ ನವೆ ಬರಯ್ಣಾರ್ ಹ್ಯಾ ಮಿಸಾಂವಾಂತ್ ಭಾಗಿದಾರ್ ಜಾಲೆ ತರ್, ಕೊಂಕ್ಣೆಂತ್ ಎದೊಳ್ ಜಾಂವ್ಕ್ ನಾತ್ಲ್ಲೆಂ ಸರ್ವ್ ಫುಡೆಂ ಜಾಂವ್ಕ್ ಪಾವ್ತೆಲೆಂ ಮ್ಹಳ್ಳೊ ಮ್ಹಜೊ ಭರ್ವಸೊ.
ಮ್ಹಜೊ ಭರ್ವಸೊ ಫಟಾನಾ ಜಾಂವ್! ದಾಯ್ಜಿದುಭಾಯ್ ಎಕ್ತಾರಾಚ್ಯಾ ಪಂಚ್ವೀಸ್ ವರ್ಸಾಂಚ್ಯಾ ಸಂಭ್ರಮಾಚೊ ದೀಸ್ ಫಾವೊ ಜಾಂವ್ ಮ್ಹಣ್ ಲಾಲೆತಾಂ,
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
