एलेकट्रोनीक माध्यमां, विवाद आनीं गुन्यांव
वरस : २००५
मयनो : एपरील
आयचो काळ एलेकट्रोनीक काळ म्हणतात जाणारी, कित्याक म्हळ्यार मनशान कर्चीं चडावत कामां मनशाचा चिंत्पाथावन उदेल्लीं यंत्रां करुंक सक्तात. आनीं आमचा जिण्येक ह्या संग्त्यांचोय परिणाम जरूर पडला. आनीं एका वाटेन हें बरेंच म्हण्येता.
आतां चिंतां हें एलेकट्रोनीक माध्यम जर नातल्लें, तर कशें जम्मू आनी काश्मिरांतल्या आतंकवादिंचा कर्नेंची वळोक कन्याकुमारिंच जियेंवचा लोकांक कळतें? अमेरिकांत जोर्ज बूश कसो उलयता म्हळ्ळें जपानांत जियेतेल्यांक कशें कळतें? आसट्रेलियांत जांवचें क्रिकेट मेच पाकिसतानांत कशें पळेवंक जातें? वीरप्पन म्हळ्यार कसो आसल्लो म्हळ्ळें आमीं कशें कळतें? न्हयगी? आतां चार ल्हान घडितांचो निहाळ करयां;
पयलें घडीत : अजीक पंद्रा वर्साधीं के.एस.आर.टी.सी. चा संस्थ्यांत वावर करून आसलेल्यांचा वावराड्यांचा भ्रश्टाचाराक नपंयच करुंक सर्कारांनी तवळ तवळ बस्सांक धाड घालुंक धरलें आनीं थोड्याच तेंपान दिसाळ्यार एक वर्दी छापली; ’के.एस.आर.टी.सी चा ड्रायवरां पयकी साठ ठक्के (६०%) भ्रषट’. तवळ एकल्या वाचप्यान उदघार सोडलो - ’कितले बुध्वंत ऊरल्ले चाळीस ठक्के ड्रायवर’ म्हण. (म्हाफ करा - म्हजा उत्रांचो मतलब हे ड्रायवर सगळे चोर म्हणचो बिल्कूल न्हय)
दुस्रें घडीत : अजीक चडुणें पांच-स वर्साधीं क्रिकेटिचें म्याच फिक्स कर्चा विवादांत जायते क्रिकेट खेळघाडी शिर्काले आनीं तांतूं आफ्रिकाचो ह्यान्सी क्रोनिये एकलो जावनासल्लो. पयलें ताणें हेरांपरीं अपलो गुन्यांव कबूल केलोच ना तरयी एका दिसा ताका रातिची नीद पडलिना देकून फांत्यार उटोन अपलो गुन्यांव कबूल केलो आनीं त्या खातीर ताका अधिकारिंनी क्रिकेट खेळोंक सासणाचो बहिश्कार घालो. पूण विज्मित्कायेची गजाल खंयचिगी म्हळ्यार हो गुन्यांव आधारूनयी निराकार्सिल्ले खेळघाडी अजून खेळोन आसात.
तिस्रें घडीत : इक्रा वर्साधीं हांव बोंबोयचा क्रैसट चर्च हैसकूलांत कंप्यूटर शिक्षक जावन काम कर्चे वेळार म्हाका सांबाळ दिंवचा मानेसतान खासगेचें एक कंप्यूटर इसकोल उग्तें केलें आनीं ताचो पार्टनर जावन म्हाका घेतलो. मिनत आनीं वांवट म्हजी तर ऊरल्लो बंडवाळ ताचो. आमचा कंप्यूटर सेंटराक एक टेलिफोन हाडवंक अर्जी घाल्ली देकून फोनाची लायन दीवंक टेलिफोन संस्थ्याचो मनीस येवन लायन दितां पूण पांयशी रुपय दी म्हणालागलो. म्हजा पार्टनरान वाजबी सवाल केलें ’एदोळच अपणान टेलिफोनाक अर्जी दिताना पोयशे भरल्यात आसतां आतां परत पांयशी रुपय अपणान कित्याक दीजय म्हण’ तवळ सभार जण कुडसाले आनीं चडावत सर्वांनी ताका बूद सांगली पांयशी रुपय दीवंक - पूण तो कबूल जालोच ना. टेलिफोन संस्थ्याचो मनीस लायन दीनासतांच पाटीं गेलो आनीं एका पाटल्यान एक दुरां दिलीं तरयी लायन दीवंक ताणीं स मयन्यांची घळाय केली मात्र न्हय हाप्त्याचा हरयेका एका दिसा टेलिफोन काम करिनातल्लेपरीं केलें.
चोवतें घडीत : आयलेवार शक्ती कपूर आनीं अमन वर्मा हांणी केल्लो विवाद. नव्यांक मुखार हाडयतां म्हळ्ळो होर्भोस दीवन निरापराध्यांक जाय तशें वापार्न उडंवची रिवाज आमचा समाजेचा हरयेका वर्गांनी आसा.
आतां ह्या चार घडितांनी आसचें सामान्य चिंताप पळेयां. बरें आधार्चेंय मनशान्ंच आनीं खोटें सयत आधार्चेंयी मनशान्ंच. तरयी तिस्रें घडीत आयचा काळाचा सताक अर्सो धर्ता. आनीं चोवतें घडितांत असलें सत उलंवचांकच नपंयच कर्ची वेवस्था दिसोन येता.
कितें जालें तेहेल्का विवादाक? ताचा सगळ्या कुटमाकच नास कर्चीं जायतीं प्रेतनां चल्लीं आनीं चलोन्ंच आसात. ताणीं केल्लो गुन्यांव? ’सत उचारल्लें’. हें एदोळ चलोन आयिल्लेपरीं आतांय चलोन आसा आनीं फुडेंय चलोन्ंच आसतेलें. ’सत उलंवचाक बिल्कूल जियेवंक सलीस ना’ पूण ’सताचो डोंग’ कर्चांक मात्र.
भोवशा हें कामयी एलेकट्रोनीक माध्यमांनिमतीं साध्य जाल्लें तर? कितेंय जांव - अजून सत मात्र जियेलां आनीं जियेता. केन्ना भुंयकाप जावन, केन्ना सुनामी जावन आनीं केन्ना....... कोण जाणा?
- वल्ली क्वाड्रस, अजेकार
