"तुजा इसटाची वळोक सांग तुजी वळोक सांग्तां, तुवें वासचे बूक कसले कळय तुजें वेक्तित्व उचार्तां."
कोंकणी बुकांची समीक्षा
वाचाप म्हळ्यार कित्याकगी चडतावांक आमकां आळसाय, मतीक बेसोर पडता देकून वासचें म्हळ्यार आमकां अलर्जी. वाचून उद्दार जाल्ले कोण म्हळ्ळीं सवालां आमचा मतिंत. आमीं दिसाळीं घेतांव जाव्येता, पूण तांतलें कितलें वाचाप वाचतांव? आयलेवार न्यूयोर्काचा एका दिसाळ्यान पर्गटलेल्या दिसाळ्यापरकार सांगचें तर; सत्तर ठक्के शिकपी लोक मात्र दिसाळीं वाचता, ह्या सत्तर ठक्के लोकांपयकी फकत्त साठ ठक्के लोक फकत्त तकलेनांवां मात्र वाचता, आनीं धा ठक्के लोक जाहिरातां या मनरंजनाचीं बर्पां वाचता तर फकत्त तीस ठक्के वाचपी मात्र वाचपां वाचता.
भोवशा कोंकणेंत असली समीक्षा केली तर आमकां मेळचे आंकडे भोवशा पात्येवंक कसट मार्चेतसले म्हण्येता. कोंकणी वाचपाचेर तितलो तात्सार कित्याक जाव्येत? ल्हानपणा थावन भोवशा, वांजेल, रजार, मागणीं, व्होरेसांवां वाचून वाचून मत थकल्या, पिकल्या देकून? दिसाक उण्यार उणें एक पान तरयी वाचाप भलायकेक गर्जेचें म्हळ्ळें वयज सयत ओप्तात. ती भलायकी कुडिची, मतिची, चिंत्पाची आनीं काळजाची.
हेच्च काराणाक लागोन जाव्येत दिसानदीस कोंकणी वाचपी उणे जावन येतात, आनीं ह्या परिगतेंत कोंकणी बूक पर्गटचें धयर कोणाक आसत? एकाधावेळा आसल्यारयी कोणाक हांची वळोक आसा? कित्याक अशें? कोंकणी बुकांची वळोक कशी आसती? कोंकणी बुकांक वासचें सोड्यां, बुकांची सविसतार वळोक कितलेश्यांक आसा? वाचप्यांक सोडा - पत्रांक आसा?
कोंकणी बुकांची परिचय चडताव पत्रांनी येता तरय ती परचय भोवशा म्हजा आबाचा आबाचा काळाथावन आयिल्लिच्च पारंपरीक रितीन, बुकाचें मोल, बरवप्याचें, प्रकाशकाचें नांव, प्रसतावन बरयिल्ल्याचें नांव सोडल्यार त्या बुकाचें समीक्षा लेखन येंवचें भोव अपरूप. कित्याक? भोवशा कसलिगी दाक्षेण-मुलाज. बुकाविशीं कांय दोन वायट सब्ध बरयले तर मोस्रान बरयलें म्हणतात कोण्णा म्हळ्ळी दाक्षेण. अपणाचें नांव पाड जाता कोण्णा म्हळ्ळी कावजेणी.
’कोणें करिजे आसल्लें?’ म्हळ्ळें सवाल दायज विचारिना, बगार आमीं कर्तांव म्हळ्ळें चिंताप घेवन मुकार येता. आयलेवार पर्गटलेल्या बुकाचेर समीक्षा चलवंक, बुकांत आसचा साहित्याचेर विषलेषण कर्चाक, अध्ययन कर्चाक आनीं एकामेका भासाभास चलंवचाक. आमचा समीक्षाक आमचे मात्र बूक आमीं घेनांव, नवे नवे बूक घेतेल्यांव तशेंच पर्न्या बुकांचेरय समिक्षा चलयतेल्यांव.
’दायज’ पंगडान एदोळ समीक्षा चलयिल्ले बूक
०१. व्हळू व्हळू व्हाळ व्हाळ्या [आंड्रू एल. डी’कुन्हाचो फुडलद कविताजमो]
०२. कटपुतळी [वल्ली क्वाड्रसाचो दुस्रो कविताजमो]
०३. कयद्याच्यो कविता [एच्चेमाचो दुस्रो कविताजमो]
०४. परत परत [दे|जोर्जी पींत, आयकोळ हाचो फुडलद कविताजमो]
०५. मोळबाचीं देळीं [नेल्लू पेर्मन्नूर, हाचो फुडलद कविताजमो]
०६. पयलीं मेटां [जियो आग्रार, हाचो फुडलद कविताजमो]
०७. वाट [मेलवीन रोड्रिगस, हाचो तिस्रो कविताजमो]
०८. काळोकांतलीं कांतारां [मेलवीन रोड्रिगस, हाणें संपादन केल्लो ४४ कविंचा ४४ कवितांचो बूक]
०९. मोतियां आनी तारां [वल्ली क्वाड्रस, हाणें संपादन केल्लो ११ कविंचा ५४ कवितांचो बूक]
१०. कवितापाठ भाग - १ [वल्ली क्वाड्रस, हाणें संपादन केल्लो कवितांचा अध्ययनाचो बूक]
११. पिंतुरां [मा|आलवी कार्मेलीत, हाचो फुडलद कविताजमो]
१२. मंथन [फ्रान्सीस सलडाञ कामत, हाचो फुडलद कविताजमो]
१३. पणतेची पेली [चा.फ्रा दे’कोसताचा साहित्याचो जमो]
१४. बामुणांचें चेडूं [एच्चेमाचो तिस्रो कविताजमो]
१५. दर्भारांतली पिंर्गोण [वल्ली क्वाड्रसाचो तिस्रो कविताजमो]
१६. दऱ्याक उदाक [वल्ली क्वाड्रस, हाणें संपादन केल्लो कवितांचा अध्ययनाचो दुस्रो बूक]
१७. सागोराच्या वाटेच्यो झरी [वल्ली क्वाड्रस हाणें संपादन केल्लो १०० कविंचा कवितांचो बूक]
१८. काळजांतले याद.. [ग्लेडीस रेगोचो दुस्रो कविताजमो]
