ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಜೊರ್ಜಿ ಪೀಂತ್ ಆಯ್ಕೊಳ್: ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ತಾಚಾ ಅಖ್ರೇಚಾ ಥೊಡ್ಯಾ ವರ್ಸಾಧಿಂ ತರ್ಯ್ ಹಾಂವೆಂ ಕಾಳ್ಜಾ ಮನಾನ್ ಏಕ್ ಪ್ರಾಮಾಣಿಕ್ ಸಾಹಿತಿ, ಚಿಂತ್ಪಿ ಮ್ಹಣ್ ಮಾಂಧುನ್ ಘೆತ್ಲ್ಲ್ಯಾ ಭೋವ್ ಥೊಡ್ಯಾಂ ಪಯ್ಕಿ ಹೊ ಎಕ್ಲೊ. ಆಮಿಂ ಜಾಯ್ತೆಪಾವ್ಟಿಂ ಎಕಾಮೆಕಾ ರಾಗ್ ಕೆಲಾ ತರ್ಯ್ ಎಕಾಮೆಕಾ ಥಂಯ್ ಗೌರವ್ ಆನಿ ಅಭಿಮಾನ್ ದವರ್ಲಾ. ಅಪ್ಲೆ ಜಿಣ್ಯೆ ಆವ್ದೆಂತ್ ಕಾಂಯ್ ನಾಂವಾಚೊ ಆಂಗಾಲಾಪ್ ಕರಿನಾಸ್ತಾಂ, ಆಪ್ಲ್ಯಾ ತತ್ವಾಂಖಾತಿರ್ ಕೆದಿಂಚ್, ಕೊಣಾಲಾಗಿಂಚ್ ಸಂಧಾನ್ ಕರಿನಾಸ್ತಾಂ, ಕಶ್ಟಾಂತ್ ಜಾಂವ್ ಸುಖಾಂತ್ ಜಾಂವ್ - ತಕ್ಲಿ ಉಭಾರ್ನ್ ಜಿಯೆಲ್ಲ್ಯಾ ಹಾಚ್ಯಾ ವೆಕ್ತಿತ್ವಾಚಿ ಝಳಕ್ ತಾಕಾ ಲಾಗ್ಸಿಲ್ಯಾನ್ ವಳ್ಕಲ್ಲೆ ಜರೂರ್ ಜಾಣಾಂತ್. ಕೊಂಕ್ಣೆಂತ್ ತರ್ಜಣ್ ಜಾಲ್ಲೆಂ ತತ್ವ್ಶಾಸ್ತಿರ್ ಬುಕಾರುಪಾರ್ ಪರ್ಗಟ್ಲ್ಲೆಂ ಪಯ್ಲೆಪಾವ್ಟಿಂ ಆನಿ ಹ್ಯಾ ಬುಕಾಕ್ ಎಕೆಕಾ ಆಂಕ್ಡ್ಯಾಚೆಂ ರೂಪ್ ದೀವ್ನ್ ವಾಚ್ಪ್ಯಾಂಕ್ ಪಾವಂವ್ಚೆಂ ಆಮ್ಚೆಂ ಮಿಸಾಂವ್.
ದೆ|ಜೊರ್ಜಿ ಪೀಂತ್
ತೂಂ, ಹಾಂವ್ ಆನಿ ದಾವೋ
ಮನ್ಶಾಜಿವಿತ್ಚ್ ಏಕ್ ಹುಮಿಣ್. ತೆಂ ಏಕ್ ಹುಮಿಣ್ ಮ್ಹಳ್ಳಿ ಜಾಗ್ವಣ್ ಯೆತಾ ಪರ್ಯಾಂತ್. ತ್ಯಾ ಉಪ್ರಾಂತ್ ಜಿವಿತಾಚಿ ಎಕೇಕ್ ಘುಂವ್ಡಿ, ಎಕೇಕ್ ಸಮಸ್ಯಾ, ಎಕೇಕ್ ಸಂಕೀರ್ಣತಾ, ಎಕೇಕ್ ಝಡೊನ್ ವೆಚಿ ಪಾಕ್ಳಿ ತಶೆಂ ದಿಸ್ತಾ ಆನಿಂ ಭಗ್ತಾ. ದರ್ಯಾಚಾ ಸುಕ್ತೆ-ಭರ್ತೆಬರಿಚ್ಚ್ ಜಿವಿತಾಂತೀ ಸುಕ್ತಿ ಆನಿ ಭರ್ತಿ ಯೆತಾ ಆನಿಂ ತಿ ಸುಕ್ತಿ ಭರ್ತಿ ತೆಂ ಸಮ್ಜೊಂಚಿಂ ಸಾಧನಾಂ ನಾತ್ಲ್ಲೆ ವೆಳಾರ್ ಖರೆಂಚ್ಚ್ ತ್ರಾಸ್ ಭಗ್ತಾತ್. ಥೊಡೆ ಪಾವ್ಟಿಂ ಸಾಧನಾಂ ಆಸೊನೀ ವಾಪರ್ಚೆಂ ಸಂಯಮ್ ಆಸಾನಾ, ಥೊಡೆ ಪಾವ್ಟಿಂ ಆಪ್ಣಾಲಾಗಿಂ ಆಸ್ಚಾ ಸಾಧನಾಂಚಿ ಜಾಗ್ವಣ್ ಆಸಾನಾಂ.
ಆಮ್ಕಾಂ ತತ್ವ್ ಗ್ಯಾನ್ ಮ್ಹಳ್ಯಾರ್ ಎಕಾ ಥರಾಚೊ ಭಿಜುಡ್, ಎಕಾ ರಿತಿಚಿ ಕಾವ್ಜೆಣ್. ಹಾಚೆಂ ಏಕ್ ಕಾರಣ್ ಮ್ಹಳ್ಯಾರ್ ತತ್ವ್ ಗಿನ್ಯಾನ್ ಮ್ಹಳ್ಯಾರ್ ಕಸಲೊಗೀ ಭೋವ್ ಗಂಭೀರಾಯೆಚೊ ಆನಿಂ ಗುಂಡಾಯೆಚೊ ವಿಷಯ್ ಆಸೊನ್ ಆಪ್ಲ್ಯಾ ಸಾಮರ್ಥೆ ಭಾಯ್ಲೊ ಮ್ಹಳ್ಳೆ ತಸಲೆಂ ಭಗಾಪ್ ಚಡಾವತ್ ಜಣಾಂಚ್ಯಾ ಮತಿಂನಿಂ ರೊಂಬೊನ್ ಆಸ್ಚೆಂ. ಪೂಣ್ ಸಾರ್ಕೆಂ ಪಳೆಂವ್ಕ್ ಗೆಲ್ಯಾರ್ ಹರ್ಯೇಕ್ ವ್ಯಕ್ತಿಯೀ ಆಪ್ಲ್ಯಾಚ್ಚ್ ತತ್ವಾಂ ಪ್ರಕಾರ್ ಜಿಯೆತಾ. ಜಾಯ್ತೆಪಾವ್ಟಿಂ ಆಮಿಂ ಭೋವ್ ಸಾದೊ ಮನಿಸ್ ಮ್ಹಣೊನ್ ಲೆಖ್ತೆಲ್ಯಾಂಚ್ಯಾ ತೊಂಡಾಂತ್ ಥಾವುನ್ ಮನಿಸ್ ಕಿತೆಂಚ್ಚ್ ತತ್ವಾಂ ವಿನಹ ಜಿಯೆವ್ನ್ ಆಸ್ಚೆಂ ಸಾಧ್ಯ್ ನಾಂ.
ದುಸ್ರೆಂ ಕಾರಣ್ ಆಮಿಂ ತತ್ವಾ ಗಿನ್ಯಾನಾಚ್ಯಾ ಸಾಹಿತ್ಯಾ ಥಾವುನ್ ವ ಸಂಗ್ತಿಂ ಥಾವುನ್ ಪಯ್ಸ್ ರಾಂವ್ಚೆಂ. ಆಮ್ಚಿ ಚಿಂತ್ಪಾಚಿ ಆಳ್ಸಾಯ್. ಹರ್ಯೆಕಾ ಮನ್ಶಾಥಂಯ್ ಹೆಂ ಮಾನಸಿಕ್ ಜಡತ್ವ್ ಥೊಡ್ಯಾ ಮಾಪಾನ್ ತರೀ ಆಸಾಚ್ಚ್. ಹಾಂವ್ ಕೋಣ್? ಏಕ್ ಸಾದೆಂ ಸವಾಲ್ ಪೂಣ್ ಹಾಚಿ ಜಾಪ್ ಸೊಧುಂಕ್ ಗೆಲ್ಯಾರ್ ಮತಿಕ್ ಬೆಸೊರ್. ದೆಖುನ್ ತ್ಯಾವಿಶಿಂ ಚಡ್ ಚಿಂತ್ಚೆಂ ಆಮ್ಕಾಂ ನಾಕಾ. ಆಪ್ಲ್ಯಾಚ್ಚ್ ಪಾತ್ಯೆಣೆಚೆರ್, ಆಪ್ಲ್ಯಾ ಚಾಲಿಚ್ಯಾ ನಡ್ತ್ಯಾಚಾ ಪ್ರೇರಣಾಚೆರ್ ಆಪ್ಲೆಂಚ್ ಸೊಧ್ನಾಂ ಕರ್ನ್ ಜವಾಬ್ ಸೊಧುಂಕ್ ಕಠೀಣ್ ಮಾನಸಿಕ್ ಬೆಸೊರ್ ಭೊಗ್ತಾ. ತೆಂ ಆಮ್ಕಾಂ ನಾಕಾ ದೆಖುನ್ ಆಮಿಂ ಸ್ವೀಕಾರ್ ಕರುಂಕ್ ತಯಾರ್ ಆಸಾಂವ್ ತಾಚ್ಯಾಕೀ ಚಡ್ತಿಕ್ ತತ್ವಾಂಚಿ ಆಮ್ಕಾಂ ಗರ್ಜ್ ನಾಂ.
ಪುಣ್ ಕೊಣಾಕ್ ಆಪ್ಲ್ಯಾ ಸ್ವತಾಚ್ಯಾ ವಾಡಾವಳಿಚೊ ಹುಸ್ಕೊ ಆಸಾ, ತ್ಯಾ ದಿಶೆನ್ ಥೊಡೆಂ ತರೀ ಸಾಧನ್ ಕರ್ಚಿ ಆವ್ಸ್ ಆಸಾ ತಸಲ್ಯಾಕ್ ಹೆಂ ಲಾನ್ ಪುಸ್ತಕ್ ಉಪ್ಕಾರಾಚೆಂ ಜಾತೆಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ.
ದಾವೋ ದೆ ಜಿಂಗ್ ಮ್ಹಳ್ಳ್ಯಾ ಮುಳಾವ್ಯಾ ಚೀನೀ ಪುಸ್ತಕಾಚೊ ಮೂಳ್ ಬರಯ್ಣಾರ್ ಲಾವೋ ತ್ಸು ಮ್ಹಳ್ಳೊ ಗಿನ್ಯಾನಿ ಮ್ಹಣೊನ್ ಜೆರಾಲ್ ಥರಾನ್ ಮಾನುನ್ ಘೆತ್ಲಾಂ. ತಾಚೆವಿಶಿಂ ಏಕ್ ಕಥಾ ಆಸಾ. ಕ್ರಿಸ್ತಾಪೂರ್ವಿಂ ಸಯ್ಶಿಂ ವರ್ಸಾಂ ಆದಿಂ ತೊ ಮಧ್ಲ್ಯಾ ಚೀನಾಂತ್ ಜಲ್ಮಾಲ್ಲೊ. ತಾಚಾ ತರ್ನಾಟ್ಪಣಾವಿಶಿಂ ಕಿತೆಂಚ್ ಕಳಿತ್ ನಾಂ. ಪೂಣ್ ತೊ ರಾವ್ಳೆರಾಚಾ ದಫ಼್ತರಾಂತ್ ಗುಮಾಸ್ತ್ ಜಾವ್ನ್ ಆಸ್ಲ್ಲೊ ಮ್ಹಳ್ಳೆಂ ಸಾಂಗಾಪ್ ಆಸಾ. ತಾಚಾ ಎಕ್ಶೆಂ ಸಾಟ್ ವರ್ಸಾಂಚಾ ಪ್ರಾಯೆರ್ ತೊ ಗಾಂವ್ ಸೊಡ್ನ್ ವೆಚೊ ನಿರ್ಧಾರ್ ಕರ್ತಾ ಆನಿಂ ತಶೆಂ ವೆತಾನಾಂ, ಹಾನ್ ಕು ಪ್ರದೇಶಾಚೆ ಗಡಿರ್, ಯಿನ್ ಹ್ಸೀ ಮ್ಹಳ್ಳೊ ಹಾಚೆವಿಶಿಂ ಜಾಣಾ ಆಸ್ಲ್ಲೊ ಅಧಿಕಾರಿ ತಾಕಾ ಆಡಾಯ್ತಾ ಆನಿಂ ವಿನಂತಿ ಕರ್ತಾ "ತೂಂ ಆತಾಂ ನದ್ರೆ ಥಾವುನ್ ಪಯ್ಸ್ ವೆತಾಯ್. ಹಾಂವ್ ತುಜೆಲಾಗಿಂ ಏಕ್ ಉಪ್ಕಾರ್ ಮಾಗ್ತಾಂ - ತುವೆಂ ಮ್ಹಜೆ ಖಾತಿರ್ ಏಕ್ ಬೂಕ್ ಬರಂವ್ಕ್ ಜಾಯ್" ಅಶೆಂ ತ್ಯಾ ಅಧಿಕಾರಿಚಾ ವಿನಂತೆಕ್ ಆನಿಂ ನಿರ್ಭಂದಾಕ್ ಸಾಂಪ್ಡೊನ್ ಲಾವೊ ತ್ಸು ದಾವೋ ದೆ ಜಿಂಗ್ ನಾಂವಾಚೊ ಹೊ ಬೂಕ್ ಬರಯ್ತಾ ಆನಿಂ ಉಪ್ರಾಂತ್ ಥಂಯ್ ಥಾವ್ನ್ ಪಡ್ಲಾಕುಶಿನ್ ಪಯ್ಣ್ ಕರ್ತಾ. ತೊ ಕೆದಾಳಾ, ಖಂಯ್ಸರ್ ಮೆಲೊ ತ್ಯಾ ಸಂಗ್ತಿಚಿ ಖಬಾರ್ ನಾಂ.
ದಾವೋ ದೆ ಜಿಂಗ್ ಮುಳಾವೆಂ ನಾಂವ್ ಪುಸ್ತಕಾಚೆಂ. ಹಾಚೊ ಅರ್ಥ್ ಜಾತಾ "ವಾಟ್" ಆನಿಂ ಹಾಂವೆಂ ಹಾಕಾ "ಜಿವಿತಾ ಸೊಭಾಣ್" ಮ್ಹಣೊನ್ ವೊಲಾಯ್ಲಾಂ. ಹೆಂ ಪುಸ್ತಕ್ ಗಂಭೀರಾಯೆನ್ ವಾಚ್ತೆಲ್ಯಾಂಕ್ ತೆಂ ಮಾನ್ತೆಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ.
ಲಾವೊ ತ್ಸು ಹಾಚಾ ಪ್ರಯೋಗಾತ್ಮಕ್ ತತ್ವ್ ಗಿನ್ಯಾನಾಚಿ ವಿಶಿಷ್ಟತಾ ಮ್ಹಳ್ಯಾರ್ ಹಾಂತುಂ ಹರ್ಯೇಕ್ ವ್ಯಕ್ತಿಯೀ ಆಪ್ಣಾಕ್ ಲಗ್ತಿ ಜಾಲ್ಲೆಂ ಕಿತೆಂ ತರೀ ಆಪ್ಣಾಂವ್ಕ್ ಸಕ್ತಾ. ಆಪ್ಲ್ಯಾಚ್ ವ್ಯಾಖ್ಯಾನಾನ್ ತೆಂ ವಾಪ್ರುನ್ ಘೆಂವ್ಕ್ ಸಕ್ತಾ ಆನಿಂ ಹ್ಯಾ ವರ್ವಿಂ ದಾವೋಇಸಮ್
ಮ್ಹಣ್ಚಾ ದಾವೋವಾದಾಚೆಂ ಶಿಕಾಪ್ ಆನಿಂ ಅಭ್ಯಾಸ್ ವಿವಿಧ್
ರುಪಾಂನಿಂ ಸಂಸಾರ್ಭರ್ ವಿಸ್ತಾರ್ಲಾಂ ಆನಿಂ ವ್ಯಾಖ್ಯಾನಾಚಿಂ ಪುಸ್ತಕಾಂ ಧಾರಾಳಾಯೆನ್ ಪರ್ಗಟ್ಲ್ಯಾಂತ್.
ಹೆಂ ಪುಸ್ತಕ್ ಏಕ್ ಕವಿತಾ ರುಪಾಚೆಂ ಭಾಷಾಂತರ್ ತರ್ಜಣ್. ಆಮ್ಚಾ ಭಾಶೆಂತ್ ತರ್ಜಣ್ ಸಾಹಿತ್ಯಾಕ್ ಕದ್ದಿಮ್ ಸ್ಥಾನ್ ತೆಂ ಆಮ್ಚಿ ದುರ್ಧಶಾ ಯಾ ಆಮ್ಚಾ ಭಾಶೆಚೆಂ ದುರ್ಭಾಗ್ಪಣ್ ತೆಂ ಕಳಾನಾಂ. ಹರ್ಯೆಕ್ ಭಾಸ್ ತರ್ಜಣ್ ಸಾಹಿತ್ಯಾಚಾ ಪಾಟಿಂಬ್ಯಾನ್ ಫ಼ುಲೊನ್ ಆನಿಂ ವಾಡೊನ್ ಯೆತಾನಾಂ, ಫ಼ಕತ್ತ್ ಕೊಂಕ್ಣೆಂತ್ ಮಾತ್ರ್ ತರ್ಜಣ್ ಸಾಹಿತ್ಯಾಚಿ ದುಬ್ಳಿಕಾಯ್ ಧಾರಾಳಾಯೆನ್ ದಿಸೊನ್ ಯೆತಾ. ಹಾಕಾ ಏಕ್ ಕಾರಣ್ ಆಮ್ಚೆಮಧೆಂ ಆಸ್ಚೆಂ ಧಾರಾಳ್ ತಾಲೆಂತ್ ಜಾಂವ್ಕೀ ಪುರೊ. ಕೊಂಕ್ಣೆಂತ್ ಕೊಣೀಂ ಸಾಹಿತಿ-ಬರವ್ಪಿ ಎಕಾಚ್ಚ್ ಪ್ರಕಾರಾಕ್ ಚಿಡ್ಕೊನ್ ರಾವ್ಲ್ಲೊ
ನಾಂ. ಚಡಾವತ್ ಸರ್ವ್ ಪ್ರಕಾರಾಂನಿ ಸಾಮರ್ಥಿವಂತ್ಚ್ಚ್
ಆಸಾತ್. ಹಾಚೊ ಪರಿಣಾಮ್ ಜಾವ್ನ್ ತರ್ಜಣೆಚಾ ವಾವ್ರಾಕ್ ಹಾತ್ ಘಾಲುಂಕ್ ಆಮ್ಚೆ ಮಧ್ಲ್ಯಾಂಕ್ ಉಣೆಂಪಣ್ ಭಗ್ತಾ ಜಾಂವ್ಕೀ ಪುರೊ. ಪೂಣ್ ಹಾಚೊ ಫ಼ಳ್ ಇತ್ಲೊಚ್ಚ್ ಕೀ ಹೆರ್ ಭಾಸಾಂ ಥಾವುನ್ ಕೊಂಕ್ಣೆಕ್ ವಾಳೊನ್ ಯೆವ್ಯೆತ್ ಆಸ್ಲ್ಯಾ ಉತ್ತೀಮ್ ಸಾಹಿತಾಚೊ ಫ಼ಾಯ್ದೊ ಕೊಂಕ್ಣಿ
ಲೊಕಾಂಕ್ ಜಾಲಾ.
ಹ್ಯಾ ಪುಸ್ತಕಾ ಸವೆಂ ಮ್ಹಜಾ ಸೀಮಿತ್ ಸಾಮರ್ಥೆಚೆಂ ಹೆಂ ತರ್ಜಣ್ ಸಾಹಿತ್, ಆನಿಂ ಮ್ಹಜಾ ಹೇಳ್ಕೆ ಪ್ರಕಾರ್ ಕೊಂಕ್ಣೆಂತ್ಲೆಂ ತತ್ವ್ ಗಿನ್ಯಾನಾಕ್ ಲಗ್ತಿ ಜಾಲ್ಲೆಂ ಪಯ್ಲೆಂ ಪುಸ್ತಕ್ ತುಜಾ ಹಾತಾಂತ್ ಪಾವ್ತಾನಾ, ಹ್ಯಾಚ್ ಪ್ರಕ್ರಿಯೆಂತ್ ಸಾರ್ಥಕತೆಚೆಂ ಭಗಾಪ್ ಉದೆತಾ ಆನಿಂ ಹ್ಯಾ ಖಾತಿರ್ ಹಾಂವ್ ತುಜೊ ಆಭಾರ್ ಮಾಂದ್ತಾಂ.
ಆಜ್ ಕಾಲ್ಚಾ ಸ್ಪರ್ಧಾತ್ಮಕ್ ಸಂಸಾರಾಂತ್ ಮನಿಸ್, ಹಾಂವ್-ತೂಂ, ಆಮ್ಚಾ ವಾಟೆಚೊ ಉದ್ದೇಶ್ಚ್ ವಿಸ್ರಲ್ಯಾಂವ್ ತಶೆಂ ದಿಸ್ತಾ. ಹ್ಯಾ ವರ್ವಿಂಚ್ ಜಾಂವ್ಕ್ ಪುರೊ ಸಂಸಾರಾರ್ ನಾ ಸಮಾಧಾನ್ ದಿಸಾನ್ದೀಸ್ ವಾಡೊನ್೦ಚ್ ಯೆತಾ. ಮನ್ಶಾಲಾಗಿಂ ಮಾತ್ರ್ ಹೆರ್ ಜೀವಿಂ ಥಂಯ್ ನಾ ಆಸ್ಚಿ ವಿಶೇಷ್ ಸಾಮರ್ಥಿ ಮನ್ಶಾಕುಳಾಚಾ ಸುರ್ವಾತೆ ಥಾವುನ್೦ಚ್ಚ್ ಧಾರಾಳಾಯೆನ್ ವಾಪಾರ್ನ್ ಆಯ್ಲಾ. ಆಜ್ ಎಕಾ ಗಂಡೆರ್ ತೊ ಉಭೊ ಆಸಾ. ಆನಿಂ ಆಪ್ಣಾಕ್ ಚ್ಚ್ ಸವಾಲ್ ಕರ್ತಾ - ಹೆಂಚ್ಚ್ಗೀ ಜಿವಿತ್? ಹಾಚೆ ಥಾವುನ್ ಸುಟ್ಕಾ ನಾಂಗೀ? ಹಾಂವ್ ಕಿತ್ಯಾ ಖಾತಿರ್ ಜಿಯೆವ್ನ್ ಆಸಾಂ? ಹಾಂವೆಂ ಹಕೀಗತ್ ಮ್ಹಣೊನ್ ಸಮ್ಜಾಲ್ಲ್ಯೊ ಸಂಗ್ತ್ಯೊ ಕಿತ್ಲ್ಯೊ ಸತ್ ಆನಿಂ ಕಿತ್ಲೆಂ ಭ್ರಮ್?
ಅಸಲ್ಯಾ ಸವಾಲಾಂಕ್ ಹ್ಯಾ ಪುಸ್ತಕಾಂತ್ ಜವಾಭಿ ನಾಂತ್. ಪೂಣ್ ಜವಾಬ್ ಸೊಧ್ಚೊ ವಾಟೊ ಆಸಾತ್. ತ್ಯೊ ನದ್ರೆಕ್ ಯೆತಲ್ಯೊ ಆನಿಂ ಫ಼ುಡ್ಲ್ಯಾ ಸಾಧನಾಂಕ್ ಪ್ರೇರಣ್ ದಿತೆಲ್ಯೊ ಮ್ಹಳ್ಳಿ ಪಾತ್ಯೆಣಿಂ
ಆನಿಂ ಯೇಕ್ ಗುಮಾನ್ ಕರಿಜಾಯ್ ಜಾಲ್ಲಿ ಸಂಗತ್ ಮ್ಹಳ್ಯಾರ್ ಹೆಂ ಪುಸ್ತಕ್ ಬರಯಿಲ್ಲೊ ಕಾಳ್ - ಭಾರತಾಂತ್ ಜೈನ್ ಧರ್ಮ್ ತಶೆಂ ಬೌದ್ಧ್ ಧರ್ಮ್ ಜಲ್ಮಾತಾಲೆಂ ಮಾತ್ರ್ ಆನಿಂ ಜೆಜು ಕ್ರೀಸ್ತಾಚಾ ಜಲ್ಮಾಕ್ ಆಜೂನೀಂ ಸಯ್ಶಿಂ ವರ್ಸಾಂ ಬಾಕಿ ಆಸ್ತಾನಾಂ ಹ್ಯಾ ಪುಸ್ತಕಾಂತ್ ಧರ್ಮಾಂಚೊ ಉಲ್ಲೇಖ್ ಆಸಾ ತರೀ ಧರ್ಮಾ ವಿರೋಧಿ ಠೀಕಾ ಪಳೆಂವ್ಕ್ ಮೆಳಾನಾಂ. ಹೆಂ ಪುಸ್ತಕ್ ಖಂಚಾಯ್ ಧರ್ಮಾಚಾ ವ್ಯಕ್ತಿಕ್ ಆಪ್ಲೆಂ ಧಾರ್ಮಿಕ್ ಶಿಕಾಪ್ ಚಡ್ ಉತ್ತೀಮ್ ರಿತಿನ್ ಸಮ್ಜೊಂಕ್ ಪ್ರೇರಣ್ ಜಾತಾ ಶಿವಾಯ್ ಆಡ್ಕಳ್ ಜಾಯ್ನಾಂ. ಏಕ್ ಸವಾಲ್ ಜಾಂವ್ಕ್ ಸಾಧ್ಯ್ ಆಸಾ -ಆಪ್ಲ್ಯಾಚ್ಚ್ ಉಗ್ತ್ಯಾ ಮನಾಚಿ ವಿಸ್ತಾರಾಯ್ ಕಿತ್ಲಿ ತೆಂ ವಳ್ಕೊನ್ ಘೆಂವ್ಚಾ ಖಾತಿರ್.
ದುಸ್ರ್ಯಾನ್ ದಾವೋ ಮ್ಹಳ್ಳೊ ಸಬ್ದ್ ’ದೇವ್’ ಮ್ಹಳ್ಳ್ಯಾ ಅರ್ಥಾನ್ ಸಮ್ಜೊನ್ ಘೆಂವ್ಚಿ ಸಾಧ್ಯತಾ. ಧಾವೊ ಮ್ಹಳ್ಯಾರ್ ಏಕ್ ಉತರ್, ಏಕ್ ವಾಟ್, ಏಕ್ ವಿಚಾರ್ ವ ಧ್ಯೇಯ್, ಏಕ್ ವ್ಯವಸ್ಥಾ ವ ತತ್ವ್, ಏಕ್ ಶಿಸ್ತ್, ನಹಿಂ ಆಸ್ತಾಂ ದಾವೋ ಹ್ಯಾ ಬ್ರಹ್ಮಾಂಡಾಚಿ ವಾಸ್ತವಿಕತಾಯ್ ಜಾವ್ಯೆತಾ. ದಾವೋ ಮ್ಹಳ್ಯಾರ್ ’ಚಿಂತಾಪ್’ ನಹಿಂ. ತೊ ಏಕ್ ಅನುಭವ್. ದೆಖುನ್೦ಚ್ ಉತ್ರಾಂನಿ ವಿವರಂವ್ಕ್ ಯೇನಾಂ ಪುಣ್ ಅನ್ಭೋಗ್ ಕರುಂಕ್ ಜಾತಾ. ಜಶೆಂ ಕಸಲಿಯ್ ಏಕ್ ದೂಖ್. ತಿ ಸ್ವಶ್ಟ್ ಆನಿಂ ಸಂಪೂರ್ಣ್ ಥರಾನ್ ವಿವರಾಂವ್ಕ್ ಜಾಯ್ನಾಂ. ಪೂಣ್ ಅನುಭವ್ ಜಾತಾ, ತಶೆಂಚ್ ದಾವೋ.
ನಿಮಾಣೆಂ ಹ್ಯಾ ಪುಸ್ತಕಾಚಿ ತರ್ಜಣ್ ಹಾತಿಂ ಘೆಂವ್ಚಿ ಮನೋಸ್ಥಿತಿ ಮ್ಹಜೆ ಥಂಯ್ ರೂಪಿತ್ ಜಾಂವ್ಕ್ ಮ್ಹಜೆರ್ ಬಾಳ್ಪಣಾ ಥಾವುನ್ ಆಜೂನ್ ಪರ್ಯಾಂತ್ ಪ್ರಭಾವ್ ಘಾಲ್ಲ್ಯಾ, ಮ್ಹಜಾ ಚಿಂತ್ಪಾಕ್ ನಮೂನ್ಯಾವಾರ್ ಆನಿಂ ಲೆಖಾಭಾಯ್ರ್ ಘುಂವ್ಡ್ಯೊ ದೀಂವ್ಕ್ ಕಾರಾನ್ ಜಾಲ್ಲ್ಯಾ ಹರ್ ಎಕ್ಲ್ಯಾ ಥಂಯ್ ಹಾಂವ್ ಋಣ್ಕಾರಿ ಜಾವ್ನಾಸಾಂ. ರೀಣ್ ಫ಼ಾರಿಕ್ ಕರ್ಯೆತ್ ಪುಣ್ ಋಣ್ ಫ಼ಾರಿಕ್ ಕರುಂಕ್ ಸಕಾನಾ.
ತಶೆಂಚ್ಚ್ ಹ್ಯಾ ಪುಸ್ತಕಾಚಾ ತರ್ಜಣೆವಿಶಿಂ ಹಾಂವ್ ಕಾವ್ಜೆವ್ನ್ ಆಸ್ತಾನಾ ಪಾಟ್ ಥಾಪುಡ್ನ್ ಧಯ್ರ್ ದಿಲ್ಯಾ ಮಾಂಡ್ ಸೊಭಾಣ್ ಗುರ್ಕಾರ್ ಬಾಬ್ ಎರಿಕ್ ಒಜೆರಿಯೋ ತಶೆಂ ಹೆಂ ಪುಸ್ತಕ್ ಪರ್ಗಟ್ ಕರುಂಕ್ ಧಯ್ರ್ ಘೆತ್ ಲ್ಲ್ಯಾ ’ಆಶಾವಾದಿ’ ಪ್ರಕಾಶನಾಚೊ ಬಾಬ್ ವಲ್ಲಿ ಕ್ವಾಡ್ರಸ್ ಹಾಂಚೊ ಹಾಂವ್ ಆಭಾರ್ ಮಾಂದ್ತಾಂ, ಸಾಂಗಾತಾಚ್ಚ್ ಪುಸ್ತಕಾಚಾ ಪರ್ಗಟ್ಣೆಕ್ ಮಜತ್ ದಿಲ್ಲ್ಯಾ, ಪ್ರೇರಣ್, ಪಾಟಿಂಬೊ ದಿಲ್ಲ್ಯಾ ಹರ್ ಎಕ್ಲ್ಯಾಚೊ ಉಪ್ಕಾರ್ ಆಟಯ್ತಾಂ.
ದೇವ್ ಬರೆಂ ಕರುಂ
ಜೊರ್ಜಿ ಪೀಂತ್, ಆಯ್ಕೊಳ್
[ಹೊ ಆಶಾವಾದಿ ಪ್ರಕಾಶನಾನ್ 2002 ಇಸ್ವೆಂತ್ ಪರ್ಗಟ್ಲ್ಲೊ ದುಸ್ರೊ ಬೂಕ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
