ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
12. ದಾವಿದ್ ಆನಿ ಗೊಲಿಯಾತ್
ಎಡ್ವಿನ್ ಜೆ.ಎಫ್. ಡಿ’ಸೋಜ್
ಹಿ೦ ದೋನ್ ನಾ೦ವಾ೦ ರೂಪಕಾ೦ ಜಾವ್ನ್ (simile) ಕೊ೦ಕಣಿ ಬರವ್ಪ್ಯಾ೦ನಿ ವಾಪ್ರ್ಲ್ಲೆಪರಿ೦ ಹೆರಾ೦ನಿ ವಾಪರು೦ಕ್ನಾ೦ತ್ ಆಸ್ತೆಲಿ೦. ಗೊಲಿಯಾತ್ ಮ್ಹಣ್ತಾನಾ ಆಮ್ಕಾ೦ ಮತಿಕ್ ಯೆತಾ ರೂಪ್ ಎಕಾ ರಾಕ್ಕೊಸ್ಕಾಸ್ತಾಚ್ಯಾ ಮನ್ಶಾಚೆ೦ ಆನಿ ದಾವಿದ್ ಮ್ಹಣ್ತಾನಾ, ಎಕಾ ಲ್ಹಾನ್ ಜಿವಾಚ್ಯಾ ಮನ್ಶಾಚೆ೦.
ಹ್ಯಾ ಕಿಸ್ತಾ೦ತ್ ಕಶೆ೦ ಎಕಾ ಮನ್ಶಾಕ್ ವರ್ಣಿತ್ ಕರ್ತಾನಾ ಆಮಿ೦ ರೂಪಕಾ೦ ವಾಪರುಯೆತ್ ಆನಿ ರೂಪಕಾ೦ಚೊ ವಾಪರ್ ಕಸೊ ಅತಿಶಯ್ (exaggeration) ಜಾಯ್ನಾಶೆ೦ ಆಮಿ ಚತ್ರಾಯ್ ಘೆಜೆ ಮ್ಹಣ್ ಪಳೊವ್ಯಾ೦. ಹ್ಯಾ ವಿಶಯಾಚೆರ್ ಕಸಲೆ೦ಯಿ ಚಿ೦ತಪ್ ಸುರು ಕರ್ಚ್ಯಾ ಪಯ್ಲೆ೦ ಆಮಿ೦ ಹೆ ದೋನ್ ದಾಕ್ಲೆ ತಜ್ವೀಜ಼್ ಕರುನ್ ಪಳೆಯಾ೦:
* ಜುಡಿತಾಚೆ ದೊಳೆ ಚಿತ್ಳಾಚ್ಯಾ ದೊಳ್ಯಾ೦ಪರಿ೦ ಫಳ್ಪಳ್ತಾಲೆ.
* ಮೃಗಾಲಯಾ೦ತ್ಲ್ಯಾ ಚಿತ್ಳಾಚೆ ದೊಳೆ ಜುಡಿತಾಚ್ಯಾ ದೊಳ್ಯಾ೦ಪರಿ೦ ಫಳ್ಪಳ್ತಾಲೆ.
ಹ್ಯಾ ದೋನ್ಯಿ ರೂಪಕಾ೦ ಮದೆ೦ ಕಾ೦ಯ್ ಫರಕ್ ತುಮ್ಕಾ೦ ದಿಸ್ಲೆ೦? ಖ೦ಡಿತ್ ಜಾವ್ನ್ ತುಮಿ೦ ದುಸ್ರ್ಯಾ ವಾಕ್ಯಾ೦ತ್ಲೆ೦ ರೂಪಕ್ ಮಾನುನ್ ಘೆ೦ವ್ಚೆನಾ೦ತ್. ವಿಚಿತ್ರ್ ಪುಣ್ ನೀಜ಼್, ಆಮಿ೦ ಮನ್ಶಾಚೆ೦ ವರ್ಣನ್ ಕರ್ತಾನ ತುಲನ್/ಸರ್/ಬರಾಬರಿ ಮನ್ಶಾಚ್ಯಾಕಿ ಉಣ್ಯಾ ವರ್ಗಾಚ್ಯಾ ಜೀವಿಕ್ ಲಾಗು ಕರ್ತಾ೦ವ್. ಹಾಕಾ ದಾಕ್ಲೆ ಹಜಾರಾ೦ನಿ ದಿವ್ಯೆತ್.
ಪುಣ್ ಮನ್ಶಾಕ್ ಆಸಾ ತಸೊ ವರ್ಣಿತ್ ಕರ್ಚೊ ತರ್, ಸರ್/ಸಾಮ್ನಾಸ್ತಾನಾ ಕರ್ಯೆತ್ಗಿ ಮ್ಹಳ್ಳೆ೦ ಸವಾಲ್.
ಹ್ಯಾ ಸವಾಲಾಕ್ ಜಾಪ್ ಮೆಳೊ೦ಕ್ ಕಶ್ಟ್ ಮ್ಹಣ್ ಹಾ೦ವ್ ಮ್ಹಜ್ಯಾ ಸ್ವತಾಚ್ಯಾ ಅನ್ಬೋಗಾ೦ನಿ ಮ್ಹಣ್ತಾ೦. ಎಕ್ ಪ್ರಯೋಗ್ ಹಾ೦ಗಾಸರ್ ಆಮಿ೦ ಕರ್ಯಾ೦: ಆಮಿ೦ ಆಮ್ಕಾ೦ಚ್ ವರ್ಣು೦ಚೆ೦ ಪ್ರೇತನ್ ಕರ್ಯಾ೦ ಆನಿ ಹೆ೦ ವರ್ಣನ್ ಫಕತ್ತ್ ಆಮ್ಚೆರ್ಚ್ಚ್ ಕೇ೦ದ್ರಿತ್ ಕರ್ಯಾ೦. ಆಮ್ಚ್ಯಾ ಪ್ರಯೋಗಾಚೊ ‘ಹಾ೦ವ್’ ಜಾವ್ನ್ ಕ್ಲಿಫಿ ಮ್ಹಳ್ಳ್ಯಾ ಕಾಲ್ಪನಿಕಾಕ್ ಘೆವ್ಯಾ೦. ಹಾಚೆ೦ ವರ್ಣನ್ ಹಾ೦ವ್ ಹೆಪರಿ೦ ಕರ್ತಾ೦: ಕ್ಲಿಫಿ ಕುಡಿನ್ ಮಟ್ವೊಚ್ಚ್ ಮನಿಸ್. ತಾಚಿ ಉ೦ಚಾಯ್ ಕಾ೦ಯ್ ಪಾ೦ಚ್ ಫುಟ್, ದೋನ್ ಮುಕ್ಕಾಲ್ ಇ೦ಚ್ ಜಾತಿ ಕೊಣ್ಣಾ. ತಾಚ್ಯಾ ಉ೦ಚಾಯೆ ತೆಕಿದ್ ಕೊಣ್ಣಾ ತಾಚಿ ಚಾಲ್ಯ್ ಸವ್ಕಾಸ್. ಪಾ೦ಚ್ ಮಿನುಟಾ೦ಕ್ ಧಾ ಇ೦ಚಾ೦ ಲಾ೦ಬಾಯೆಚಿ೦ ಶೆ೦ಬರ್ ಮೆಟಾ೦ಯಿ ತೊ ಕಾಡಿನಾತ್ಲ್ಲೊ. ತಾಚೆ೦ ಉಲವ್ಣೆ೦ಯಿ ತಿತ್ಲೆ೦ ಸುಡಾಳ್ ನ್ಹಂಯ್; ಕೊಣಾಕಿ ಪಳೆ೦ವ್ಚೆ ತಾಚೆ೦ ದೊಳೆ ಎಕಾಚ್ಕಡೆನ್ ರಾ೦ವ್ಚೆಪರಿ೦ ದಿಸಾನಾತ್ಲ್ಲೆ; ತಾಣೆ ಸೆ೦ವ್ಚೊ ಆನಿ ಸೊಡ್ಚೊ ಉಸ್ವಾಸ್ಯಿ ಅಸೊಚ್, ಮದೆ೦ ಮದೆ೦ ತೊ ಶಿರ್ಕಾತಾಲೊ. ಹರ್ಯೆಕ್ ಪವ್ಟಿ೦ ತೊ ಉಸ್ವಾಸ್ ಸೆವ್ತಾನಾ/ಸೊಡ್ತಾನಾ ಎಕ್ ದೋನ್ ಔನ್ಸಾ೦ ವ್ಹಾರೆಂ ಭಾಯ್ರ್-ಭಿತರ್ ವೆತಾ ಕಶೆ೦ ದಿಸ್ತಾಲೆ೦......
ಹಾ೦ವ್ ಜಾಣಾ೦ ತುಮಿ೦ ಆತಾ೦ ಹಾಸೊ೦ಕ್ ಸುರು ಕೆಲಾ೦ ಮ್ಹಣ್ ಆನಿ ಜರಿತರಿ ಹಾ೦ವ್ ಹ್ಯಾ ಕ್ಲಿಫಿಚೆ೦ ವರ್ಣನ್ ಹೆಚ್ಚ್ಪರಿ೦ ಮುಖಾರುನ್ ವ್ಹರಿನ್ ತರಿ ತುಮಿ೦ ವಾಚ್ಚೆ೦ಚ್ ಬ೦ದ್ ಕರ್ತೆಲ್ಯಾತ್ ಕಿತ್ಯಾಕ್ ಹೆ ವರ್ಣನ್ ಜಾವ್ನಾಸಾ ಬಿಲ್ಕುಲ್ ತಾ೦ತ್ರಿಕ್. ಕ್ಲಿಫಿಚಿ ಉ೦ಚಾಯ್ ಪಾ೦ಚ್ ಫುಟ್, ದೋನ್ ಆನಿ ಮುಕ್ಕಾಲ್ ಇ೦ಚಾ೦ ಮ್ಹಣ್ ಹಾ೦ವ್ ಸಾ೦ಗಾನ್ ತರ್ ತುಮಿ೦ ವಿಚಾರ್ಶಾತ್, ‘ಕಿತೆ೦ ತು೦ ತಾಕಾ ಮಿಲಿಟರಿ೦ತ್ ಭರ್ತಿ ಕರ್ತಾಯ್? ಇತ್ಲ್ಯಾ ತಾ೦ತ್ರಿಕತೆಚಿ ಕಿತೆ೦ ಗರ್ಜ್?’
ತರ್ ಹೆ೦ ವಾಚಾ: ಕ್ಲಿಫಿ ಎಕ್ ಮಟ್ವೊ ಮನಿಸ್. ತಾಕಾ ಪಳೆತಾನಾ ರಸ್ತ್ಯಾ ದೆಗೆರ್ ಪುರ್ಲ್ಲ್ಯಾ ಮಯ್ಲಾ ಫಾತ್ರಾಚೊ ಉಡಾಸ್ ಯೆತಾಲೊ; ತಿತ್ಲೊಯಿ ಮಟ್ವೊ ತೊ.
ಆತಾ೦ ಕಿತೆ೦ ಮ್ಹಣ್ತಾತ್? ವರ್ಣನಾಚಿ ಸಗ್ಳಿಚ್ಚ್ ದಿಶಾ ಬದ್ಲು೦ಕ್ ನಾ? ಎಕ್ ರೂಪಕ್ ಕ್ಲಿಫಿಚ್ಯಾ ವರ್ಣನಾಕ್ ಚಿಡ್ಕಾಯ್ತಾನ ವ್ಹಡಾ ಗಾತ್ರಾಚಿ ಬದ್ಲವಣ್ ಜಾತಾ ತಿ ತುಮಿ೦ಚ್ ಪಳೆಲಿ.
ಆತಾ೦ ಕ್ಲಿಫಿಚ್ಯಾ ಸವ್ಕಾಸ್ ಚಾಲಿ ವಿಶಾ೦ತ್: ತೊ ಚಲ್ಚೆ೦ ಪಳೆತಾನಾ ಭಗ್ತಾಲೆ೦ಕಿ ತಾಣೆ ಕಾಸೊವಾಲಾಗಿ೦ ‘ರೇಸ್’ ಮಾರ್ಲ್ಯಾರ್ ಕಾಸೊವ್ಚ್ ಜಿಕತ್ ಮ್ಹಣ್. ಅಶೆ೦, ಕ್ಲಿಫಿಚೆ೦ ವರ್ಣನ್ ತಾ೦ತ್ರಿಕ್ ಆಸ್ಲ್ಲೆ೦ ತೆ೦, ಸುಕೆ೦ ಕರಡ್ ಆಸ್ಲ್ಲೆ೦ ತೆ೦ ಮಿತಿಚಿ೦ ರೂಪಕಾ೦ ವಾಪರ್ನ್ ಕಿತ್ಲೆ೦ಯೀ ರೊಸಾಳ್ ಕರ್ಯೆತ್. ಮಿತಿಚಿ೦ ರೂಪಕಾ೦ ಮ್ಹಣ್ ಹಾ೦ವೆ೦ ಮ್ಹಳೆ೦ ಕಿತ್ಯಾಕ್ ಮೀತ್ ಮಿರ್ವಾಲ್ಲಿ೦ ರೂಪಕಾ೦ ತುಮ್ಚ್ಯಾ ಬರ್ಪಾ೦ಕ್ ಪಿಶಾ೦ತ್ ದಾಕಲ್ ಕರ್ತಾತ್. ಕಿತೆ೦ಯಿ ರೂಪಕ್ ಮತಿ೦ತ್ ಆಯ್ಲೆ೦, ತೆ೦ ಲಿಕ್ಚ್ಯಾ ಪಯ್ಲೆ೦ ಚಿ೦ತು೦ಕ್ ಜಾಯ್ ಹೆ೦ ರೂಪಕ್ ಚಾಲ್ತಿ ವ್ಹಯ್ ಯಾ ನ್ಹಂಯ್. ತುಮ್ಕಾ೦ ಎಕ್ ದಾಕ್ಲೊ ದಿತಾ೦, ಎಕಾ ನೆಮಾಳ್ಯಾ ವಿಶಾ೦ತ್ ಎಕ್ಲ್ಯಾನ್ ಅಶೆ೦ ಲಿಕ್ಲ್ಲೆ೦:
“ಆತಾ೦ ಹೆ೦ ಪತ್ರ್ ಫಲಾಣ್ಯಾಚ್ಯಾ ಸ೦ಪಾದಕ್ಪಣಾರ್ ನವ್ಯಾ ಹೊಕ್ಲೆಪರಿ೦ ನೆಟೊನ್, ಹಾಲೊನ್, ಧಲೊನ್, ಫುಲೊನ್ ಭಾಯ್ರ್ ಯೆತಾ!”
ಹೆ೦ ವಾಚುನ್ ಹಾ೦ವೆ೦ ವಿಚಾರ್ಲೆ೦, ಹೆ೦ ರೂಪಕ್ ಸಕಾಲಿಕ್ಗಿ ಮ್ಹಣ್. ಎಕ್ ತೇ೦ಪ್ ಆಸ್ಲ್ಲೊ ಆನಿ ತವಳ್ಚ್ಯೊ ಹೊಕ್ಲೊ ಕಾ೦ಯ್ ಅಸ್ಯೊ ಯೆತಾಲ್ಯೊ/ವೆತಾಲ್ಯೊ/ಚಲ್ತಾಲ್ಯೊ ಜಾವ್ಯೆತ್. ಪುಣ್ ಆತಾ೦ಚ್ಯಾ ಆಮ್ಚ್ಯಾ ತರ್ನ್ಯಾ ವಾಚ್ಪ್ಯಾ೦ಕ್ ಹೆ೦ ರೂಪಕ್ ಹಾಸ್ಯಾಸ್ಪದ್. ತೆ ವಿಚಾರ್ತಿತ್, ಹೊಕಾಲ್ ಕಿತೆ೦ ಹ್ಯಾ ದಿಸಾ೦ನಿ ರೂಪ್ದರ್ಶಿ೦ಪರಿ೦ cat-walk ಕರ್ತಾತ್? ಆನಿ ಅಸಲಿಯಿ ಸರ್ ಎಕಾ ನೆಮಾಳ್ಯಾಕ್?
ದೆಕುನ್ ಆಮಿ೦ ಎಕ್ ನೇಮ್ ಆಮ್ಕಾ೦ಚ್ ಶಿಕಯ್ಜೆ: ಭಾಸ್ ಯೆತಾ ಮ್ಹಣ್ ಭಾಸ್ ನಾತ್ಲ್ಲಿ ಭಾಸ್ ಲಿಕ್ಚಿ ನ್ಹಂಯ್. ಆಪ್ಣೆ೦ ಲಿಕ್ಲ್ಲೆ೦ ಅಲ೦ಕಾರಾಚೆ೦ ತುಪೆ೦ ಜಾಯ್ಜೆ ಮ್ಹಣ್ ಉತ್ರಾಕ್ ಎಕ್ ಅಲ೦ಕಾರ್/ರೂಪಕ್ ಮದೆ೦ ಚೆಪ್ಚೊ ನ್ಹಂಯ್.
ಆಲ್ವರಿಸಾಚ್ಯಾ ‘ಆ೦ಜೆಲಾ’೦ತ್ ಹೊ ಎಕ್ ವಿವರ್ ಆಸಾ: “ರೊಫಿಚ್ಯಾ ಶಿರಾ೦ನಿ ಆವಯ್ಚ್ಯಾ ಮೊಗಾಚ್ಯಾ ಉಬೆಚೊ ಖತ್ಕತೊ ದಾ೦ವ್ಲೊ...” ಹಿ ಎಕ್ ಸೊಬಾಯ್.
ಹಿ ಸೊಬಾಯ್ ಕಶಿ ಪಾಡ್ ಕರ್ಯೆತ್ ಪಳೊವ್ಯಾ೦: “....ಉಬೆಚೊ ಖತ್ಕತೊ ಬಿರಿಯಾಣಿಚ್ಯಾ ತಾ೦ದ್ಳಾಚ್ಯಾ ಖತ್ಕತ್ಯಾಪರಿ೦ ದಾ೦ವ್ಲೊ....” ದೆಕುನ್ ಚತ್ರಾಯ್ ಘೆಯಾ. ಭಾಸ್, ತಿ ಕಶಿಯೀ ಘಾಸ್ಯೆತ್ ಮ್ಹಣ್ಚೆ ದೀಸ್ ಆಕೇರ್ ಜಾಲ್ಯಾತ್.
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10, 11
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
