ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ದಾಟಾಯ್ ಆನಿ ಮೊಟಾಯ್! - ಆಸ್ಟಿನ್ ಡಿ’ಸೋಜ್ ಪ್ರಭು
ದಾಟಾಯ್ - ಮೊಟಾಯ್ ಆಮ್ಕಾಂ ಜಾಯ್?
ಹೆಂ ಸವಾಲ್ ಆಯ್ಚ್ಯಾ ಪರಿಗತಿಂತ್ ಆಮಿ ಆಮ್ಕಾಂ ವಿಚಾರುಂಕ್ ಜಾಯ್. ಆಜ್ ಆಮ್ಚ್ಯೆ ಭಂವಾರಿಂ ಪಳೆಂವ್ ಜಾಲ್ಯಾರ್ ಸಭಾರಾಂಚಿಂ ಪೊಟಾಂ ವಾಡ್ಲ್ಯಾಂತ್ ತೊಂದ್ರಾಪರಿಂ, ಕುಲೆ ದೆಂವ್ಲ್ಯಾತ್ ದುದಿಯಾಪರಿಂ, ಪೊಲೆ ದಿಸ್ತಾತ್ ಮಿರ್ಯೊ ಪಡೊನ್ ಗೊಸಾಳ್ಯಾಪರಿಂ; ಚಲೊಂಕ್ ಆಮ್ಕಾಂ ತಾಂಕಾನಾ, ಧಾಂವೊಂಕ್ ಭಿಲ್ಕುಲ್ ಜಾಯ್ನಾ, ಚಡ್ಣಿ ಚಡ್ತಾನಾ ಖರ್ಶೆತಾಂವ್ ಆನಿ ದೆಂವ್ಣಿ ದೆಂವ್ತಾನಾ ಆಂಕುಡ್ತಾಂವ್; ತರಿಪುಣ್ ಆಮಿ ಖಾಂವ್ಚಿಂ ಖಾಣಾಂ....?
ಆದಿಂ ಏಕ್ ಕಾಳ್ ಆಸ್ಲ್ಲೊ ಆನಿ ಸರ್ವಾಂಕ್ ದಾಟಿಂ ಮೊಟಿಂ ಮನ್ಶ್ಯಾಂ ಮ್ಹಳ್ಯಾರ್ ಭಾರಿಚ್ ಸಂತೊಸ್ ಜಾತಾಲೊ. ಮೊಟೊ/ಮೊಟೆಂ ಜಾಲ್ಲ್ಯಾಕ್ಷಣ್ ತಿಂ ಬರ್ಯಾ ಭಲಾಯ್ಕೆಚಿಂ ಖುಣಾಂ, ಹಾತಿಂ ಪಯ್ಶೆ ಜಾಲ್ಲ್ಯಾಚಿಂ ಲಕ್ಷಣಾಂ ಮ್ಹಣ್ ಲೋಕ್ ಚಿಂತಾಲೊ ಆನಿ ಹ್ಯಾಂ ಮೊಟ್ಯಾಂಕ್ ಪಳೆವ್ನ್ ಸಂತೊಸ್ತಾಲೊ. ಸಭಾರ್ ಮೊಟಿಂ ಮನ್ಶಾಂ ಬರೆಂಚ್ ಜೇವ್ನ್-ಪಿಯೆವ್ನ್-ರಜಾರ್ ಮ್ಹಣೊನ್ ನಿದೊಂಕ್ ವೆತಾಲಿಂ ಆನಿ ಸಕಾಳಿಂ ಉಟಾನಾಸ್ತಾಂಚ್ ಸರ್ಗಾಕ್ ವೆತಾಲಿಂ. ಕಿತ್ಲೆಂ ಬರೆಂ ಮೋರ್ನ್ ದೆವಾನ್ ಫಾವೊ ಕೆಲೆಂ ಮ್ಹಣ್ ಕುಟ್ಮಾಚಿಂ ದೆವಾಕ್ ವಾಖಣ್ತಾಲಿಂ ಆನಿ ಥೊಡಿಂ ದು:ಖಾಂ ಗಳವ್ನ್ ತಿ ಕೂಡ್ ಮಾತ್ಯೆಕ್ ಪಾಯ್ತಾಲಿಂ.
ತೆನ್ನಾಂ ಕೊಲೆಸ್ಟರೊಲ್, ರಗ್ತಾದಾಬ್ ವ ರಗ್ತಾಒತ್ತಡ್, ಮುತಾಂತ್ ಸಾಕರ್ ಮ್ಹಳ್ಳೆ ಸಬ್ದ್ ಕೊಣಾಕ್ಚ್ಚ್ ಕಳಿತ್ ನಾಸ್ಲ್ಲೆ. ಆತಾಂ ಸಂಸಾರ್ ಬದಲ್ಲಾ; ಸಂಶೋದನ್ ಆಕಾಸಾಕ್ ಚಡ್ಲಾಂ ಆನಿ ಮನ್ಶಾಕ್ ಯೆಂವ್ಚಿ ಹರ್ಯೆಕ್ ಪಿಡಾ ದಾಖ್ತೆರಾಂಕ್ ಕಳಿತ್ ಆಸಾ ಆನಿ ಹ್ಯಾ ಸರ್ವ್ ಪಿಡೆಂಕ್ ವಕ್ತಾಂ ಕಾರ್ಖಾನ್ಯಾಂನಿ ವಕ್ತಾಂ ಸೊಧುನ್ ಕಾಡ್ಲ್ಯಾಂತ್. ಹರ್ ಪಿಡೆಂಚಿ ಜಾಣ್ವಾಯ್ ಸರ್ವ್ಯೀ ಮಾಧ್ಯಮಾಂ ಮುಖಾಂತ್ರ್ ಲೋಕಾಕ್ ಕಳಿತ್ ಜಾತಾ ಆನಿ ಆಪ್ಲ್ಯಾ ಜೀವಾಕ್ ಖಂಚೆಂ ಬರೆಂ ಆನಿ ಪಾಡ್ ಮ್ಹಳ್ಳ್ಯಾಚಿ ವಿಂಚವ್ಣ್ ಕರುಂಕ್ ಹರ್ಯೇಕ್ಲ್ಯಾಕ್ ದರಬಸ್ತ್ ಅವ್ಕಾಸ್ ಆಸಾ.
ಗಜಾಲ್ ಅಸಿ ಆಸ್ಲ್ಯಾರ್ಯ್ ಲೋಕ್ ಕಿತ್ಯಾ ಫಿಕಿರ್ ಕರಿನಾಸ್ತಾಂ ಹ್ಯಾ ಪಿಡೆಂಚೊ ಚಾಕೊರ್ ಜಾತಾ? ಹ್ಯಾ ಸವಾಲಾಕ್ ಮಾತ್ರ್ ಸಮಾಕಟ್ಟ್ ಜವಾಬ್ ಮೆಳಾನಾ! ಸಭಾರಾಂಕ್ ಆಪ್ಲ್ಯಾ ಭಲಾಯ್ಕೆವಿಶಿಂ ಪಡೊನ್ಂಚ್ ಗೆಲ್ಲೆಂ ನಾ ಕಸೆಂ ದಿಸ್ತಾ. ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ಕಿತೇಂಯ್ ಪಿಯೆಂವ್ಕ್ ದಿತಾಂವ್, ಕಿತೇಂಯ್ ಖಾಂವ್ಕ್ ದಿತಾಂವ್ - ತ್ಯಾ ದುಕ್ರಾಂಕ್ ಆಸ್ಲ್ಲೆಂ ಉಶ್ಟೆಂ, ನೀಸ್, ದುಸರ್ ಮೋಯ್, ನಾರ್ಲಾಚಿ ಪೇಂಡ್, ಇತ್ಯಾದಿ ದೀವ್ನ್ ಜಾತಾ ತಿತ್ಲ್ಯೆ ವೆಗಿಂ ಮೊಟೆ ಕರುಂಕ್ ಪಳೆಲ್ಲ್ಯಾಪರಿಂ! ಮೊಟಿಂ ಭುರ್ಗಿಂ ಪಳೆಂವ್ಕ್ ಬರಿಂ ದಿಸೊಂಕ್ ಪುರೊ ಪುಣ್ ತಿಂ ತ್ಯಾ ಮೊಟಾಯೆ ಬರಾಬರ್ ತಾಂಚೊ ಫುಡಾರ್ ಧರ್ಣಿಕ್ ಶೆವ್ಟಾಂವ್ಕ್ ಪಾವ್ತಾತ್. ಹಾಕಾ ಕಾರಣ್ ಕೋಣ್? ತಿಂಚ್ ತಿಂ ತಾಂಚಿಂ ಬೇಫಿಕಿರ್ ವ್ಹಡಿಲಾಂ!
ಚರ್ಭೆಚೆಂ ಖಾಣ್, ಸಾಕ್ರಿಚೆಂ ಪೀವನ್, ಲೊಣಿ, ತೂಪ್, ದಾಟ್ ದೂಧ್ ಮನ್ಶಾ ಕೂಡ್ ಮೊಟಿ ಕರುಂಕ್ ಸಕ್ತಾ ಮಾತ್ರ್ ನ್ಹಂಯ್, ಶಿರಾಂ ಶಿರಾಂನಿ ಚರಬ್ ಮಾಂಡುಂಕ್ಯ್ ಫಾವೊ ಜಾತಾ. ಪೋಟ್ ದೆಂವ್ತಾ, ಗಾಲ್ ಫುಗ್ತಾತ್, ದೊಳೆ ಫೊಂಡಾಕ್ ವೆತಾತ್, ಆನಿ ಆಮಿ ಚೆಂಡಾಪರಿಂ ಉರುಟ್ ಉರುಟ್ ಜಾವ್ನ್ ವಾಡ್ತಾಂವ್. ಸಭಾರಾಂಕ್ ನ್ಹಾಣ್ಯೆಂತ್ ಉಭೆ ರಾವೊನ್ ಸಕ್ಲಾ ಪಳೆತಾನಾ ತಾಂಕಾಂ ತಾಂಚ್ಯೊ ವಸ್ತುಚ್ ದಿಸಾನಾಂತ್; ಧರ್ಣಿರ್ ಆರ್ಸೊ ದವರಿಜಾಯ್ ಪಡ್ತಾ! ಸುಶೆಗಾತ್ ದುಕ್ರಾ ಮಾಸ್ ಖಾಂವ್ನ್ ಆಮಿ ದುಕ್ರಾಂಪರಿಂಚ್ ವಾಡ್ತಾಂವ್. ಮೆಟಾಂ ಚಡೊಂಕ್ ಪುರಾಸಾಣ್ ಜಾತಾ ಆಮ್ಕಾಂ, ಆಮಿ ಲಿಫ್ಟಾಕ್ ರಾಕೊನ್ ರಾವ್ತಾಂವ್. ಏಕ್ ಮಯ್ಲ್ಯೀ ಚಲೊಂಕ್ ತಾಂಕ್ ನಾ ಆಮ್ಕಾಂ, ಆಮಿಂ ರಿಕ್ಷಾಕ್ ರಾಕೊನ್ ರಾವ್ತಾಂವ್; ಬಸ್ಸಾಂ ಚಡೊಂಕ್ ತ್ರಾಣ್ ನಾ ಆಮ್ಕಾಂ, ರಾಕೊನ್ ರಾಕೊನ್ ಸುಕ್ತಾಂವ್.
ಜರ್ ಆಮಿ ಭಲಾಯ್ಕೆಂತ್ ಜಿಯೆವ್ನ್ ಆಮ್ಚ್ಯಾ ಪೊಣ್ತುರಾಂಕ್ ಪಳೆಂವ್ಕ್ ಜಾಯ್, ತರ್ ಆತಾಂಚ್ ಆಮಿ ದುಕ್ರಾ ಜೀವನ್ ಬಂಧ್ ಕರುನ್ ಕಿತೇಂಯ್ ಹಾತಾಕ್ ಮೆಳ್ಲ್ಲೆಂ ಖಾಂವ್ಚೆಂ ಬಂಧ್ ಕರ್ಚೆಂ; ಹ್ಯಾಂಬರ್ಗರ್ಸ್, ಪಿಜ್ಜಾ, ಚೈನೀಸ್, ದುಕ್ರಾ ಮಾಸ್, ಗಾಯೆ ಮಾಸ್, ಬೊಕ್ಡೆ ಮಾಸ್, ಐಸ್ಕ್ರೀಮ್, ಚೊಕ್ಲೆಟಾಂ ಖಾಂವ್ಚ್ಯಾಂತ್ ಮಾತ್ಸಿ ಮೀತ್ ದವರ್ಚಿ; ಕೋಲಾ, ಇತ್ಯಾದಿ ಸಾಕ್ರೆ ಪೀವನಾಂ ಜಾತಾ ತಿತ್ಲಿಂ ಬಂಧ್ಚ್ ಕರ್ಚಿಂ; ಮಾತ್ಸೊ ವೇಳ್ ಮೆಳ್ತಾನಾ ಇಲ್ಲೊ ವ್ಯಾಯಾಮ್ ಕರುನ್, ಚಲೊನ್ ವ ಧಾಂವೊನ್ ಆಮಿ ಆಮ್ಚಿ ಕೂಡ್ ಸದಾಂಚ್ ಸುಡಾಳ್ ದವರ್ಚಿ ವಾಜ್ಬಿ ಜಾವ್ನಾಸಾ. ಹಾಚ್ಯಾ ಬದ್ಲಾಕ್ ಫಳಾಂ, ಚರಾಬ್ ನಾಸ್ಚೆಂ ದೂಧ್, ಸಾಖರ್ ನಾಸ್ಚೊ ಫಳಾಂ ರೋಸ್, ಮಾಸ್ಳಿ, ರಾಂದ್ವಯ್ ಖಾಂವ್ಕ್ ಪ್ರಯತ್ನ್ ಕರುನ್ ಆಮ್ಚ್ಯಾ ಶಿರಾಂ ಶಿರಾಂನಿ ಕಿತೆಂಚ್ ಚರಾಬ್ ರಾಜ್ ಕರಿನಾಸ್ಚ್ಯೆಪರಿಂ ಹರ್ ಪ್ರಯತ್ನ್ ಕರ್ಚೆಂ.
ರುಚ್ತಾ ಮ್ಹಣ್ ಸಕ್ಕಡ್ಯ್ ಖಾಂವ್ಕ್ ಧರ್ಲ್ಯಾರ್ ವ ಪಿಯೆವ್ನ್ ಸೊಡ್ಲ್ಯಾರ್ ಕಿತೆಂ ಉಪ್ಕಾರ್? ದೆವಾನ್ ಆಮ್ಕಾಂ ರಚ್ಲಾಂ ಹ್ಯಾ ಸಂಸಾರಿಂ ಕಿತೇಂಯ್ ಖಾಂವ್ನ್/ಪಿಯೆವ್ನ್ ಜಾತಾ ತಿತ್ಲ್ಯಾ ವೆಗಿಂ ತಾಚ್ಯಾ ರಾಜಾಕ್ - ಸರ್ಗಾರಾಜಾಕ್ ವಚೊಂಕ್ ನ್ಹಂಯ್; ಕಿತ್ಲಿಂ ವರ್ಸಾಂ ಜಾಲ್ಯಾರ್ಯ್ ಸಾಂ. ಪೆದ್ರು ಆಮ್ಕಾಂ ರಾಕೊನ್ ರಾವ್ತೊಲೊ; ತಾಕಾ ಹೆರ್ ದುಸ್ರೆಂ ಕಾಮ್ ನಾ ಸರ್ಗಾರ್! ಆಮ್ಚಿ ಭಲಾಯ್ಕಿ ಆಮಿ ಆಮ್ಚ್ಯಾ ಮೂಟಿ ಭಿತರ್ ದವರ್ಯಾಂ, ಸದಾಂನೀತ್ ವ್ಯಾಯಾಮ್ ಕರ್ಯಾಂ, ಆನಿ ವರ್ಸಾಂಚಿಂ ವರ್ಸಾ ಬರ್ಯಾ ಥರಾನ್ ಜಿಯೆವ್ಯಾಂ, ತಸೆಂಚ್ ಜಾಂವ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
