[ದರ್ಭಾರಾಂತ್ಲಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಮರ್ಶ್ಯಾ ಲೇಖನ್ - 4

ಬೂಕ್: ದರ್ಭಾರಾಂತ್ಲಿ ಪಿಂರ್ಗೊಣ್

ಕವಿ: ವಲ್ಲಿ ಕ್ವಾಡ್ರಸ್ ಹಾಚೊ ತಿಸ್ರೊ ಕವಿತಾಜಮೊ.

ಪ್ರಸ್ತಾವನ್: ವಲ್ಲಿ ವಗ್ಗ

ಪ್ರಕಾಶಕ್: ಆಶಾವಾದಿ ಪ್ರಕಾಶನ್

[ದರ್ಭಾರಾಂತ್ಲಿ ಪಿಂರ್ಗೊಣ್ ಬುಕಾಚೆರ್ ಕೆಲ್ಲೆಂ ಸಮೀಕ್ಶಾ ಲೇಖನ್]

ದರ್ಭಾರಾಂತ್ಲಿ ಪಿಂರ್ಗೊಣ್

ಹುಸ್ಕೊ ಆನಿ ಪಿಂರ್ಗೊಣ್!?

ಮೆಲ್ವಿನ್ ಪಿಂಟೊ, ನೀರುಡೆ

ವಲ್ಲಿ ಕ್ವಾಡ್ರಸಾಚ್ಯಾ ಆಶಾವಾದಿ ಪ್ರಕಾಶನಾಂತ್ ಆಯ್ಲೆವಾರ್ ಪರ್ಗಟ್ ಜಾಲ್ಲೊ ತಾಚೊಚ್ ’ದರ್ಭಾರಾಂತ್ಲಿ ಪಿಂರ್ಗೊಣ್’ ನಿಜಾಯ್ಕ್‌ಯೀ ಪ್ರಾಮಾಣಿಕ್ ಅಭಿವ್ಯಕ್ತಿ. ಹರ್‍ಯೆಕಾ ಕವಿತೆಂತ್ ಉಟೊನ್ ದಿಸ್ತಾ ತಾಚೊ ಹುಸ್ಕೊ. ಹಾಂಗಾಚಿಂ ಚಡ್ತಾವ್ ಕವನಾಂ ಸಾಹಿತ್ಯಾವಿಶಿಂ, ಸಾಹಿತಿವಿಶಿಂ, ವಿಶೇಸ್ ಕರ್ನ್, ಕೊಂಕ್ಣೆಚ್ಯಾ ಆಯ್ಚ್ಯಾ ಪರಿಗತೆವಿಶಿಂ, ಫುಡಾರಾವಿಶಿಂ, ಆಮ್ಚ್ಯಾ ವೊದ್ದು-ವರಾಂಟ್, ಹಿಪೊಕ್ರೆಸಿ, ಸ್ವಾಭಿಮಾನ್ ರಹಿತ್ ಸಂಸ್ಕೃತೆವಿಶಿಂಚ್ ಆಸಾತ್. ಖರೆಂಚ್ ಸ್ವಾಭಾವಿಕ್ ಕವಿಚೊ ಹುಸ್ಕೊ ಆನಿ ಎಕಾ ರಿತಿಚೊ ಶಿಣ್ (ಬಂಡಾಯ್?). ತೊ ಕಿತೆಂಚ್ ವ್ಹಡ್ ಫಾಯ್ದೊ ನಾಸ್ತಾಂ ಕೊಂಕ್ಣೆ ಖಾತಿರ್ ಅಪ್ಲೊ ವೇಳ್, ಪಯ್ಶೆ ಆನಿ ಥೊಡೆಂ ಥೊಡೆಂ ಸುಖ್‌ಯೀ ತ್ಯಾಗ್ ಕರ್ತಾ ಆಸ್ತಾಂ ಅಕೇರಿಕ್ ಹೆಂ ಸರ್ವ್ ಅಪುಣ್ ಕಿತ್ಯಾ ಖಾತಿರ್, ಕೊಣಾ ಖಾತಿರ್ ಕರುನ್ ಆಸಾಂ ಮ್ಹಳ್ಳಿಂ ಖರೋಖರ್ ವಾಜ್ಬಿ ಸವಾಲಾಂ ತಾಚೆ ಸಮೊರ್ ಉಭಿಂ ಜಾತಾತ್ ಆನಿ ತಾಕಾ ದೆದೆಸ್ಪರ್ ಕರ್ತಾತ್. ಅಶೆಂ ಥಂಯ್ ಹಾಂಗಾ ತಾಚೆ ಹೇಳ್ಕೆಭಾಯ್ರ್‌ಚ್ ತೊ ಘುಸ್ಪಡ್ತಾ ಆನಿ ನಿರಾಶಿ ಜಾತಾ:

"ಸಂಸಾರ್ ದಾಡ್ಡೊಚ್ಚ್
ಸಂಸಾರ್ ಕುತಂತ್ರಿಚ್ ದೆಖುನ್
ಕವಿ ಜಿಯೆತಾ ಹಾಂಗಾ
ಮೊರೊನ್ ಮೊರೊನ್ ಜಿಯೆತಾ.." [ಕವಿ ಜಿಯೆತಾ ಹಾಂಗಾ]

ಜೆರಾಲ್ ಥರಾನ್ ಹಿ ಕವಿತಾ ಕೊಂಕ್ಣಿ ಸಾಹಿತಿವಿಶಿಂ ತರ್‌ಯೀ, ಹಿ ಕವಿತಾ ’ಸ್ವಗತ್’ ಕಶಿ ಆಸಾ. ಕೊಂಕ್ಣೆ ಖಾತಿರ್ ನಿಸ್ವಾರ್ಥ್ ಘೊಳೊನ್ ಹಾಂಗಾಚೊ ಕವಿ ಮೊರೊನ್ ಮೊರೊನ್ ಜಿಯೆತಾ, ಪುಣ್ ಜಿಯೆತಾ ಖಂಡಿತ್!

ತರಿಕೀ ಹಾಂಗಾಚ್ಯಾ ಕವಿಕ್ ಖರೆಂಚ್ ಭಗ್ಲಾಂಕೀ ’ಕವಿ’ ಭಾಯ್ರ್ ಪಡ್ಲಾ. ’ಕವಿ ಖಂಯ್ ಜಿಯೆತಾತ್?’ ಮ್ಹಳ್ಳಿಂ ಸವಾಲಾಂ ತೊ ಕೊಂಕ್ರಿಟಿಚ್ಯಾ ಬಾಂಧ್ಪಾಂಕ್, ನಂಯಾಂಕ್, ತಾರಾಂಕ್, ಮೊರಾಂಕ್ ಘಾಲ್ತಾ. ಖಂಯ್ ಖಂಯ್ ಸೊಧ್ಲ್ಯಾರ್‌ಯೀ ಕವಿ ಮೆಳಾನಾ. ಹಾಚೊ ಅರ್ಥ್ ಕಿತೆಂ? ಆಪ್ಲ್ಯಾ ಭಂವ್ತಿಂ ಚಲ್ತಾ ತಿ ಅರಾಜಕತಾ, ಅನೀತ್, ಅತ್ತ್ಯಾಚಾರ್ ಖಂಡನ್ ಕರ್ನ್ ಠೀಕಾ, ವಿಮರ್ಸೊ ದೀಜಯ್ ಜಾಲ್ಲೆ ಕವಿ ’ರಾಜಕೀಯ್ ಕವಿ’ ಜಾಲ್ಯಾತ್‌ಗಾಯ್ ಮ್ಹಳ್ಳಿ ಭಿರಾಂತ್ ಹಾಂಗಾಚ್ಯಾ ಕವಿಚಿ. ಕವಿ ಜಾಲ್ಲ್ಯಾಕ್ ಜವಾಬ್ಧಾರಿ ಆಸಾ; ಆನಿ ಆಯ್ಚೆ ಕವಿ ತಿ ವಿಸ್ರಾಲ್ಯಾತ್ ದೆಕುನ್ ತೊ ತಾಂಕಾಂ ಸೊಧುನ್ ಆಸಾ.

ಪುಣ್ ’ಕವಿ’ ಕ್ರಮೇಣ್ ಭಾಯ್ರ್ ಪಡ್ಲಾ ತರ್ ತಾಕಾ ಕಾರಾಣ್ ಆಡೆ ಭಾಗೆಚ್ಯಾ ಮನ್ಶ್ಯಾಂಚೆಂ ’ಮ್ಹಾಕಾ ಕಿತೆಂ ಪಡೊನ್ ಗೆಲಾಂ’ ಮ್ಹಳ್ಳೆಂ ಬೇಫಿಕಿರ್ ಧೋರಣ್:

’ಜಾಂವ್ಕ್ ಆಸಾ ತೆಂ ಆತಾಂಚ್ ಜಾಂವ್ದಿ
ಎಚ್ಚೆಮ್ ಕೈದಿ ಜಾಂವ್ದಿ,
ಮೆಲ್ವಿನ್ ಕವಿತಾ ಸೊಲುಂದಿ
ಆಂಡ್ರು ಬಾಂಯ್ತ್ ಪಡೊಂದಿ..
ಮ್ಹಾಕಾ ಕಿತೆಂ ಪಡೊನ್ ಗೆಲಾಂ?" [ಮ್ಹಾಕಾ ಕಿತೆಂ ಪಡೊನ್ ಗೆಲಾಂ?]

ಆಮ್ಚ್ಯಾ ಮನ್ಶ್ಯಾಂಕ್‌ಚ್ ಆಮ್ಚೆ ಅಸ್ಮಿತಾಯೆವಿಶಿಂ, ಸಾಹಿತ್ಯಾವಿಶಿಂ, ಭಾಶೆವಿಶಿಂ ಸ್ವಾಭಿಮಾನ್ ನಾ ತರ್ ಆಮಿ ದುರ್ಸೊಂಚೆಂ ತರ್‌ಯೀ ಕೊಣಾಕ್? ’ಕಿತೆಂ ಪಡೊನ್ ಗೆಲಾಂ?’ ಮ್ಹಳ್ಳೆಂ ಉಲ್ಟೆಂ ಸವಾಲ್‌ಚ್ ಆಮ್ಚ್ಯಾ ಭಾಶೆಕ್ ಆಜ್ ಸಂಚಿಕಾರ್ ಜಾಂವ್ಕ್ ಪಾವ್ಲಾಂ ತೆಂ ಕವಿಕ್ ಗಮ್ಲಾಂ.

ಪಿಂರ್ಗೊಣ್:

ಕವಿನ್ ಖರೆಂಚ್ ಹ್ಯಾ ಸಂಗ್ರಹಾಕ್ ’ದರ್ಭಾರಾಂತ್ಲಿ ಪಿಂರ್ಗೊಣ್’ ಮ್ಹಣ್ ನಾಂವ್ ದಿಲಾಂ. ಸಗ್ಳ್ಯಾ ಸಂಗ್ರಹಾಂತ್ ಹಿ ಪಿಂರ್ಗೊಣ್ ದಿಸ್ತಾ. ಚಡ್ತಾವ್ ಕವನಾಂನಿ ಕವಿತಾ ಮೋಗಿಂಕ್ ಹಿ ಪಿಂರ್ಗೊಣ್ ಆಂವಡ್ಚ್ಯಾಕ್‌ಯೀ ಚಡ್ ಚುಕಿದಾರ್ ಕರ್ತಾ. ಹಾಂಗಾಚಿ ಪಿಂರ್ಗೊಣ್ ಘಾಯೆಲ್ಲ್ಯಾ ಕವಿಚಿ; ಹಿ ಪಿಂರ್ಗೊಣ್ ಅಸ್ಮಿತಾಯ್ ರಾಕ್ಚೆ ಖಾತಿರ್ ರಗ್ಡೊಂಚ್ಯಾ ಸೊಜೆರಾಚಿ; ಆನಿ ಹಿ ಪಿಂರ್ಗೊಣ್ ಆಧುನಿಕ್ಪಣಾಚ್ಯಾ ಮಿಂಜಾಸ್ಕೆಚೊ ವೇಸ್ ಪಾಂಗೊರ್ನ್ ಆಪ್ಲೆಂ ಅಸ್ತಿತ್ವ್ ಹೊಗ್ಡಾವ್ನ್ ಸಂಸ್ಕೃತಿ, ಖಾಶೆಲ್‌ಪಣಾವಿಶಿಂ ಕಾಂಯ್‌ಚ್ ಹುಸ್ಕೊ ನಾ ಆಸ್ಚ್ಯಾ ವೆಕ್ತಿಂವಿಶಿಂ ಚಿಂತುನ್ ಚುರ್ಚುರ್ಚ್ಯಾ ಎಕಾ ಕೊಂಕ್ಣ್ಯಾಚಿ.

’ರಾಯಾಚಿ ಪಿರ್‍ಯಾದ್’ ಕವನಾಂತ್ ಹಿ ಪಿಂರ್ಗೊಣ್ ನವೀನ್ ರಿತಿಂ ಉಚಾರ್ ಜಾಲ್ಯಾ;

’ನಾಟಕಾಂಚೊ ಸರ್ದಾರ್‌ಗಾ ಕಾಣ್ಯಾಂಚೊ ಉಸ್ತಾದ್‌ಗಾ
ಹಾಂವ್ ಲಾಖಾಂನಿ ಏಕ್
ಕೊಂಕ್ಣಿ ಮ್ಹಜಿ ಆವಯ್ ಬುಕಾಂಕ್ ಮ್ಹಜ್ಯಾ ವಾಳಯ್
ರುದಾನ್ ಕರುಂ ದೆವಾಕ್’

ಇತ್ಲಿ ಲಾಂಬ್ ಚರಿತ್ರಾ ಆಸ್ಚ್ಯಾ ಕೊಂಕ್ಣಿ ಆವಯ್ಚ್ಯಾ ಬುಕಾಂಕ್ ವಾಳಯ್ ಲಾಗೊಂಕ್ ಕಾರಾಣ್ ಕಿತೆಂ? ಕಾಂಯ್ ಹೆ ಬೂಕ್ ’ಆಧುನಿಕ್ ವಾಚ್ಪ್ಯಾಂಕ್ ಖಾಯ್ಸ್ ಜಾಂವ್ಚ್ಯಾ ಬದ್ಲಾಕ್ ಭುಕೆಲ್ಲ್ಯಾ ವಾಳಯೆಚೆಂ ಪೋಟ್ ಥಂಡ್ ಕರಿಲಾಗ್ಲೆ? ವಾಚ್ಪ್ಯಾಕ್ ಹಾಲವ್ನ್ ಸೊಡ್ತಾ ಹಿ ಕವಿತಾ.

ಆಪ್ಲ್ಯಾ ಬುಕಾಂಕ್ ವಾಳಯ್ ಲಾಗ್ಲ್ಯಾ ದೆಕುನ್ ಜಾಯ್ಜಯ್ ಕವಿ ಮ್ಹಣ್ತಾ ’ಹಾಂವ್ ಬರಂವ್ಕ್ ವಚಾನಾ’:

’ಹಾಂವ್ ಬರಂವ್ಕ್ ವಚಾನಾ
ವಾಚುನ್ ಕೊಣಾಚಿ ನೀದ್ ವಚಾತ್
ನಿದೆಂತ್ ಕೊಣ್ ದಾಂತ್ ಖಿರ್ಲಿತ್
ಕೊಣ್ ಫೆಸ್ತ್ ಮೀಸ್ ಆಂಗಯ್ತ್
ಲುಸಿಫೆರ್ ಮ್ಹಾಕಾ ಸೊಧುನ್ ಯೇತ್.." [ಹಾಂವ್ ಬರಂವ್ಕ್ ವಚಾನಾ]

ಕೊಂಕ್ಣಿ ಸಾಹಿತಿಂಕ್ ತರ್ ಲುಸಿಫೆರ್ ರಾಕೊನ್‌ಚ್ ಆಸಾ ಮ್ಹಣ್ ಜಾಲೆಂ. ಬೋವ್‌ಶ್ಯಾ ಲುಸಿಫೆರಾಕ್ ಭೆಶ್ಟಾಂವ್ಚೆ ಕೊಂಕ್ಣಿ ಸಾಹಿತಿ ಅಜೂನ್ ಉದೆಂವ್ಕ್ ನಾಂತ್!

ಅನ್ಯೇಕ್ ರಿತಿಚಿ ಪಿಂರ್ಗೊಣ್ ಪಳೆಯಾ!

’ಕೊಣ್‌ಗೀ ಥಂಯ್ ಪೊಟಾಕ್ ನಾಸ್ತಾಂ ವಳ್ವಳ್ತಾ
ಜರೂರ್ ತೊಯೀ ಕೊಂಕ್ಣಿ ಕಾಣ್ಯೊ ಬರಯ್ತಾ!’ [ಗಜಲ್ - 1]

ಹಿ ಪಿಂರ್ಗೊಣ್ ಚಡಿತ್ ದುಖಿಚಿ. ಹೆರ್ ಭಾಶೆಂನಿ ಕಾಣ್ಯೊ ಬರಯ್ಲ್ಯಾರ್ ಪೋಟ್ ಭರಾತ್, ಕೊಂಕ್ಣೆಂತ್ ಅಸಾಧ್ಯ್ ತೆಂ ಕವಿ ವಿಶಿಷ್ಟ್ ರಿತಿಂ ಸಾಂಗ್ತಾ. ಪೋಟ್ ಭರ್ತೆಲೆಂ ತರ್‌ಯೀ ಕಶೆಂ? ತಾಣೆಂ ಬರಯಿಲ್ಲ್ಯೊ ಕಾಣ್ಯೊ ವಾಚ್ಚೆ ’ಗಿರಾಯ್ಕ್‌ಯೀ ಜಾಯ್‌ಮೂ? ತಾಂಕಾಂ ಖಂಯ್ ಥಾವ್ನ್ ವ್ಹಾವವ್ನ್ ಹಾಡ್ಚೆಂ?’

ದೇವ್ ನಾತ್‌ಲ್ಲೊ ತರ್?

ದೇವ್ ನಾತ್‌ಲ್ಲೊ ತರ್ ಕವಿತಾ ಆಸ್ತಿಗಿ? ಹಾಂಗಾಚ್ಯಾ ಕವಿ ಪ್ರಕಾರ್ ದೇವ್ ನಾತ್‌ಲ್ಲೊ ತರ್ ಕೊಣ್‌ಯೀ ಕವಿತಾ ರಚ್ತೊನಾ. (ಕಿತ್ಲೆಂ ಬರೆಂ ಆಸ್‌ಲ್ಲೆಂ). ಖಂಡಿತ್ ಹಿ ಏಕ್ ಕಶ್ಟಾಂಚಿ ಗಜಾಲ್. ದೇವ್ ಆಸ್‌ಲ್ಲ್ಯಾನ್ ಮಾತ್ರ್ ಸಂಸಾರಾಂತ್ ಆಜ್ ಕವಿತಾ ಆಸಾ, ಕವಿ ಆಸಾ, ಸಾಹಿತ್ಯ್ ಆಸಾ ಮ್ಹಳ್ಳೆಂ ಧೋರಣ್ ಕವಿಚೆಂ. ಕವಿ ಕಿತ್ಯಾಕ್ ಭೆಶ್ಟೆಂಚ್ ಕವಿ ಆನಿ ಕವಿತೆಮಧೆಂ ದೆವಾಕ್ ಹಾಡ್ತಾ ತೆಂ ಸುಸ್ತಾನಾ. ಸರ್ವ್ ಸಕ್ತೆಚೆಂ (ಕವಿ ಸಕ್ತೆಚೆಂಯೀ!) ಮೂಳ್ ದೇವ್ ವ್ಹಯ್. ತರಿಕಿಯೀ ಮನ್ಶ್ಯಾಚೊ ಕ್ರಿಯಾತ್ಮಕ್ ವಾಂಟೊಯೀ ಸಮಾಸಮ್ ಅರ್ಧೊ ಅಸಾಜೆ ತೆಂ ಆಮಿ ನೆಗಾರುಂಕ್ ನ್ಹಜೊ. ಭೋವ್ಶ್ಯಾ ದೇವ್ ನಾತ್‌ಲ್ಲೊ ತರ್ ಅರ್ಧಿ ಯಾ ಅಪೂರ್ಣ್ ಕವಿತಾ ಪುಣ್‌ಯೀ ಆಸ್ತಿ.

ನವ್ಯಾ ಲ್ಹಾರಾಚಿಂ ಕವಿತಾ:

’ಏಕ್ ಥೆಂಬೊ ರಗಾತ್’, ’ಅನ್ಯೇಕ್ ಪೆಟೊ ಮೆಲಾ ಪಳೆ’, ’ರೂಕ್’, ’ಕಿಡೆರೆ ಆಮಿ’ ಅಸಲ್ಯಾ ಕವನಾಂಕ್ ಕಾಂಯ್ ನವ್ಯಾ ಲ್ಹಾರಾಚಿಂ ಕವನಾಂ ಮ್ಹಣ್ಯೆತ್ ಕೊಣ್ಣಾ! ಎಕಾ ಥೆಂಬ್ಯಾ ರಗ್ತಾಂತ್ ಕವಿ ಸರ್ವ್ ದೆಖ್ತಾ-ಪಾತಾಕ್, ಸಾಲ್ವಾಸಾಂವ್, ಬರೆಂ ಖೊಟೆಂ, ಭಲಾಯ್ಕಿ, ಪಿಡಾ!. ’ಅನ್ಯೇಕ್ ಪೆಟೊ ಮೆಲಾ ಪಳೆ’ ಕವನಾಂತ್ ಕವಿಚೊ ಶಿಣ್ ಉಗ್ತ್ಯಾನ್ ದಿಸ್ತಾ. ’ಪೆಟೊ’ ಎಕೀನ್‌ಪಣಾಚೊ ಸಂಕೇತ್. ತಶೆಂಚ್ ಹಲ್ಕ್ಯಾಪಣಾಚೊ ಸಂಕೇತ್‌ಯೀ ವ್ಹಯ್!

ಬಂಡಾಯೆಚೆಂ ಪ್ರೇತನ್?

’ಕಟ್‌ಪುತ್ಳಿ’ ಸಂಗ್ರಹಾ ಉಪ್ರಾಂತ್ ಆಪ್ಣಾಕ್ ಬಂಡಾಯ್ ಕವಿ ಮ್ಹಣ್ ವೊಲಾಯ್ಲಾಂ ತೆಂ ಕವಿ ಒಪುನ್ ಘೆತಾ. ಹ್ಯಾ ಸಂಗ್ರಹಾಂತ್‌ಯೀ ತಾಣೆಂ ಬಂಡಾಯ್ ರಿತಿಂಚ್ ಉರ್ಚೆಂ ಪ್ರೇತನ್ ಕೆಲ್ಲೆಂ ದಿಸ್ತಾ.

ಕೇವಲ್ ’ಬಂಡಾಯ್’ ಶೈಲೆಕ್ ಚಿಡ್ಕಾಲ್ಯಾರ್ ಎಕಾಚ್ ರಿತಿಚಿಂ ಕವನಾಂ ಭಾಯ್ರ್ ಪಡ್ಚೊ ಅಪಾಯ್ ನೆಗಾರುಂಕ್ ಜಾಯ್ನಾ. ತಶೆಂ ಹಿ ಶೈಲಿ ಥೊಡೆ ಪಾವ್ಟಿಂ ಕೃತಕ್ ಜಾಯ್ತ್ - ಹಾಂಗಾಚ್ಯಾ ಥೊಡ್ಯಾ ಕವನಾಂನಿ ಅಸಲೆಂ ಭಗಾಪ್ ಉದೆತಾ. ತಶೆಂ ಮ್ಹಣ್ ಕವಿಚೊ ಹುಸ್ಕೊ, ತಾಚಿ ಹಾಕ್-ಬೋಬ್ ಕೃತಕ್ ನ್ಹಂಯ್ ತೆಂ ಹರ್‍ಯೆಕಾ ಕವಿತಾ ಮೊಗಿನ್, ವಾಚ್ಪ್ಯಾನ್ ಸಮ್ಜೊನ್ ಘೆಜಾಯ್

[ಹೆಂ ವಿಮರ್ಶ್ಯಾ ಲೇಖನ್ ’ಮಿತ್ರ್’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]

ಲೇಖನಾಂಚಾ ಪಾನಾಕ್

ಆಧ್ಲೆ ವಿಮರ್ಶೆ: 1, 2, 3

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications