ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾದ್ರ್ಯಾಬ್ ಯೆತಾತ್ ಚತ್ರಾಯ್! - ಆಸ್ಟಿನ್ ಡಿ’ಸೋಜ್ ಪ್ರಭು
ಆದಿಂ ಥಾವ್ನ್ ಆಮ್ಕಾಂ ಹಿ ಸವಯ್ - ಭಿಕ್ ಮಾಗ್ಚಿ - ದಾನ್ ಆಶೆಂವ್ಚಿ - ಮಾಗೊನ್ಂಚ್ ರಾಂವ್ಚಿ. ಹಿ ಸವಯ್ ದುರ್ಬಳ್ಯಾಂ ಪ್ರಾಸ್ ಆಮ್ಚ್ಯಾ ಯಾಜಕಾಂಕ್ ಚಡ್ ಮ್ಹಳ್ಯಾರ್ ಅತಿಶಯ್ ಜಾಂವ್ಚಿ ನಾ!
ಜೆನ್ನಾಂ ಆಮ್ಚೊ ಮಂಗ್ಳುರಿ ಲೋಕ್ ಗಲ್ಫಾಕ್ ಕಾಮಾಕ್ ವಚೊಂಕ್ ಸುರು ಜಾಲೊ, ತೆನ್ನಾಂ ಥಾವ್ನ್ ಹಿ ಪಿಡಾ ಕ್ಯಾನ್ಸರಾಪರಿಂ ವಿಪರೀತ್ ಜಾಲ್ಯಾ ಮ್ಹಳ್ಯಾರ್ ವಿಪರ್ಯಾಸ್ ಜಾಂವ್ಕ್ ಸಾಧ್ಯ್ಚ್ ನಾ.
ಪಯ್ಲೆಂ ಫಕತ್ ಘಾಂಟಿಂಚಿ ತೋರ್ ಬಾಂಧುಂಕ್ ದಾನ್ ವಿಚಾರ್ಚೆಂ ಆಸ್ಲ್ಲೆಂ. ಆತಾಂ’ತಾಂ ನವಿ ಇಗರ್ಜ್ ಬಾಂಧುಂಕ್, ಕೊಂವೆಂತ್ ಬಾಂಧುಂಕ್, ಪಾದ್ರ್ಯಾಬಾಂಕ್ ನವೆಂ ಘರ್ ಬಾಂಧುಂಕ್, ಶಾಲಾಂ ಬಾಂಧುಂಕ್, ಕೊಲೆಜಿ ಬಾಂಧುಂಕ್, ಹೊಸ್ಟೆಲಾಂ ಬಾಂಧುಂಕ್ ಆನಿ ನಿಮಾಣೆಂ ಕಾಷ್ಟಿ ಬಾಂಧುಂಕ್? ಹ್ಯಾ ಪಟ್ಟೆಕ್ ಥಳ್ಚ್ ನಾ ಜಾಲಾಂ.
ದೆವಾಚ್ಯಾ ಭಿರಾಂತಿನ್ ವ್ಹಡ್ ಜಾಲ್ಲಿಂ ಮಂಗ್ಳುರ್ಗಾರಾಂ ಪಾದ್ರ್ಯಾಬಾಂಕ್ ಭಾರಿಚ್ ಲಾಗಿಂ. ಸಭಾರಾಂಚಿಂ ಪ್ರೀತ್ಕರ್ನಾರಾಂ ಆನಿ ಭುರ್ಗಿಂ ಗಾಂವಾಂತ್ಚ್ ಆಸಾತ್ ಆಸ್ತಾಂ ತಾಂಕಾಂ ಪಾದ್ರ್ಯಾಬಾನ್ ಕಿತೆಂ ಮ್ಹಳ್ಯಾರ್ಯೀ "ಜಾಯ್ತ್ ಫಾದರ್" ಜವಾಬ್ ಸದಾಂ. ಹಾಚೊ ಮುನಾಫೊ ಘೆವ್ನ್ ಆಮ್ಚೆ ಯಾಜಕ್ ಪಯ್ಲೆಂ ಗಲ್ಫಾ ಥಾವ್ನ್ ಗಾಂವಾಕ್ ರಜೆರ್ ಯೆತಾನಾ ತಾಂಚ್ಯಾ ಪಾಂಯಾಂಕ್ ಆಡ್ಕೊಳ್ ಘಾಲ್ತಾಲೆ; ತಾಂಕಾಂ ತೋರಿ ವಯ್ರ್ ದವರ್ತಾಲೆ; ಮಾನಾಚಿ ವಾತ್ ದೀವ್ನ್ ಘಟ್ಟ್ ತಾಳ್ಯಾನ್ ತಾಂಚೆಂ ನಾಂವ್ ಮೀಸಾ ವೆಳಾರ್ ಲೋಕಾಕ್ ವಾಚುನ್ ಸಾಂಗ್ತಾಲೆ. ಆತಾಂ ಕಾಳ್ ಬದಲ್ಲಾ - ಪಾದ್ರಿಬಾಬ್ ಶೀದಾ ವಿಮಾನಾರ್ ಬಸೊನ್ ಗಲ್ಫಾಕ್ಚ್ ಯೆತಾತ್ ಆನಿ ಸರ್ವಾಂಲಾಗಿಂ ದಾನ್ ಮಾಗ್ತಾತ್. ಥೊಡ್ಯಾ ಗಲ್ಫಾಂತ್ಲ್ಯಾ ಮಂಗ್ಳುರ್ಗಾರಾಂಲಾಗಿಂ ವಿಚಾರ್ಲ್ಯಾರ್ ಸಂಕ್ಷಿಪ್ತ್ ಸಂಗತ್ ಕಳಿತ್ ಜಾತಾ.
ಸಭಾರ್ ಆಮ್ಚಿಂ ಮಂಗ್ಳುರ್ಗಾರಾಂ ದಾಕ್ಷೆಣೆಚೆ ಮುದೆ - ಇಲ್ಲೆಶೆಂ ಗೋಡ್ ಉಲೊಣೆಂ ಕೆಲೆಂ ಜಾಲ್ಯಾರ್ ಜಾತಾತ್ ಗುಮ್ಟ್ಯಾತೆದೆ! ಪಾಟಿಂ ಮುಖಾರ್ ಪಳೆನಾಸ್ತಾಂಚ್ ದೊಳೆ ಧಾಂಪುನ್ ದಿತಾತ್ ಆನಿ ಮೆಲ್ಯಾ ಉಪ್ರಾಂತ್ ತಾಂಕಾಂ ಸರ್ಗ್ ’ಗ್ಯಾರಂಟಿ’ ಮ್ಹಣ್ ಚಿಂತಾತ್! ಆಮ್ಚಿ ಸಮಾಜ್ಚ್ ಹ್ಯಾ ಚಿಂತ್ಪಾಚೆರ್ ಬಾಂಧುನ್ ಹಾಡ್ಲ್ಯಾ ಆಸ್ತಾಂ ಅಸಲ್ಯಾ ಪೊಟ್ಟು ಪಾತ್ಯೆಣೆಕ್ ಕಾಂಯ್ ಆಮ್ಚೆ ಥಂಯ್ ದುಕೊಳ್ ನಾ.
"ಕಿತೆಂ ಸಾಂಗ್ಚೆಂ ಸಾಯ್ಬಾ, ಹಫ್ತ್ಯಾಕ್ ಏಕ್ಲೊ ಯೇವ್ನ್ ದಾರ್ ಥಾಪುಡ್ನ್ಂಚ್ ಆಸ್ತಾ" ಮ್ಹಣಾಲೊ ಎಕ್ಲೊ ಗಲ್ಫಾಂತ್ಲೊ ಮ್ಹಜೊ ಮಿತ್ರ್ ಹಾಂಚೆವಿಶಿಂ ಉಲಯ್ತಾನಾ. "ಆಮಿ ಆಮ್ಚ್ಯಾ ಬಾಗ್ಲಾರ್, ’ಪಾದ್ರಿಂಕ್ ಯೆವ್ಕಾರ್ ನಾ’ ಮ್ಹಳ್ಳೊ ಬೋರ್ಡ್ ಘಾಲುಂಕ್ ಚಿಂತ್ಲಾ" ಮ್ಹಣಾಲಾಗ್ಲೊ ತೊ ಹಾಸೊನ್ಶೆಂ. ಪರ್ದೇಶಾಂನಿ ವಸ್ತಿ ಕರ್ತೆಲ್ಯಾಂಲಾಗಿಂ ಪಯ್ಶೆ ಕುಸ್ತಾತ್ ಮ್ಹಣ್ ಕೊಣೆಂಗಿ ತಾಂಕಾಂ ಸ್ವಪ್ಣಾಂತ್ ಸಾಂಗ್ಲಾಂ ಆನಿ ಸಭಾರ್ ಹೆರ್ ಸಂಗ್ತಿಂ ಪರಿಂ ಹಿ ಸಂಗತ್ಯೀ ತೆ ಸತ್ಚ್ ಮ್ಹಣ್ ಮಾಂದ್ತಾತ್ ಆನಿ ಆಯಿಲ್ಲ್ಯಾ-ಗೆಲ್ಲ್ಯಾಲಾಗಿಂ ತಸೆಂ ಮೆಳ್ಲ್ಲ್ಯಾ ಮೆಳ್ಲ್ಲ್ಯಾಗಾಗಿಂ ದಾನ್ ವಿಚಾರುನ್ಂಚ್ ಆಸ್ತಾತ್.
ಹಿ ಪಿಡಾ ಆತಾಂ ಅಮೇರಿಕಾಕ್ಯ್ ಪಾವ್ಲ್ಯಾ. ಕಿತೆಂಗಿ ಮಿಸಾಂವ್ ಮ್ಹಳ್ಳ್ಯಾ ನಾಂವಾನ್ ಬಿಸ್ಪಾಚಿ ಪರ್ವಣ್ಗಿ ಘೆವ್ನ್ ಹೆ ಪರ್ದೇಶಾಂಕ್ ಯೆತಾತ್ ಆನಿ ಹಾಂಗಾಚಾ ಕಾಡ್ದಿನಲ್-ಬಿಸ್ಪಾಂಚಿ ಪರ್ವಣ್ಗಿ ಘೆವ್ನ್ ಥೊಡ್ಯಾ ಫಿರ್ಗಜಾಂಕ್ ಆಯ್ತಾರಾಚಿ ಭೆಟ್ ದೀವ್ನ್ ಶೆರ್ಮಾಂವಾವೆಳಿಂ ನಾಕಾಜಾಲ್ಲ್ಯೊ ಕಾಣ್ಯೊಂಚ್ ಸಾಂಗ್ತಾತ್. ಭಾರತಾಂತ್ ಫಕತ್ ಭಿಕಾರಿ ಆಸಾತ್, ತಾಂಕಾಂ ಪಾಂಗ್ರುಂಕ್ ವಸ್ತುರ್ ನಾ, ಖಾಂವ್ಕ್ ಜೆವಾಣ್ ನಾ, ನ್ಹೆಸೊಂಕ್ ವಸ್ತುರ್ ನಾ, ರಾವೊಂಕ್ ಬಿಡಾರ್ ನಾ ಮ್ಹಳ್ಳೆಂ ಕೃತಕ್ ದೃಶ್ಯ್ ಲೋಕಾ ಮುಖಾರ್ ದವರ್ತಾತ್ - ಫಕತ್ತ್ ಲೋಕಾನ್ ತಾಂಕಾಂ ತಾಂಚ್ಯಾ ಮಿಸಾಂವಾಕ್ ದಾನ್ ದಿಂವ್ಚ್ಯಾ ಏಕಾಚ್ ನಿಬಾನ್. "ನಿಬಾಕ್ ಏಕ್ ನಿವ್ಣೆಂ ಆನಿ ಬಾಯ್ಲೆಕ್ ಮ್ಹಜ್ಯಾ ಮಿವ್ಣೆ" ಮ್ಹಣ್ ಆದಿಂ ಎಕ್ಲೊ ಸೊರೊ ಪಿಯೆವ್ನ್ ಮಾಟ್ವಾಂತ್ ನಾಚ್ತಾಲೊ ಖಂಯ್ ಕಾಷ್ಟಿ ದಿಸ್ತಾ ಪರ್ಯಾಂತ್ ಆಪ್ಲಿ ಲುಂಗಿ ವಯ್ರ್ ಉಕಲ್ನ್, ತಸಲಿಚ್ ಗತ್ ಹಾಂಚಿ ಥೊಡ್ಯಾಂಚಿ!
ಅಸೆಂ ಭಾರತಾಚ್ಯಾ ಘಮಂಡಾಯೆಚೊ ವಿಕ್ರೊ ಪರ್ದೇಶಾಂ ಮುಖಾರ್ ಕಿತ್ಯಾಕ್ ಕರ್ಚೊ ಆನಿ ಭಾರತೀಯ್ ತಿತ್ಲೆಯ್ ದಳಿದ್ರ್, ಚಿಲ್ಲರ್, ಭಿಕಾರಿ ಮ್ಹಣ್ ಲೇಪ್ ದಿಂವ್ಚೊ? ಕಿತ್ಯಾಕ್ ಹಿ ಫಟಿಂಚಿ ಶಿಂಖಳ್ ವ್ಹಡ್ಲ್ಯಾ ಫೆಸ್ತಾಕ್ ಮಾಲೆ ಪಟಾಕಿ ಮಾರ್ಲ್ಲ್ಯಾಪರಿಂ ಮಾರುನ್ಂಚ್ ವೆಚಿ? ಥೊಡೆ ಪಾವ್ಟಿಂ ಹಾಂಚೊ ಶೆರ್ಮಾಂವ್ ಆಯ್ಕಾತಾನಾ ಇಗರ್ಜ್ ಸೊಡ್ನ್ ಧಾಂವ್ಯಾಂಶೆಂ ಜಾತಾ. ತೆ ಆಪ್ಲ್ಯಾ ಫಟಿಂಚಿ ಕಾಷ್ಟಿ ಉಸಯ್ತಾನಾ ಭಂವ್ತಿಚೊ ಲೋಕ್ ಆಮ್ಕಾಂಚ್ ಪಳೆವ್ನ್ ರಾವ್ತಾ - ಹೆ ಭಾರತೀಯ್ ಭಿಕಾರಿ ಹಾಂಗಾ ಕಸೆ ಯೇವ್ನ್ ಪಾವ್ಲೆ ಮ್ಹಳ್ಳ್ಯಾಪರಿಂ!
ಕಾಣ್ಯೊಂ ಸಾಂಗ್ಚ್ಯಾಕ್ಯೀ ಏಕ್ ಗಡ್ ಆಸಾ. ಕೋಣ್ ಆಯ್ಕಾತಾಲಿಂ ಆಸಾತ್, ತಾಂಕಾಂ ಕಾಂಯ್ ಖರಿ ಗಜಾಲ್ ಕಳಿತ್ ನಾ ಮ್ಹಣ್ ಸಗ್ಳ್ಯಾ ಭಾರತೀಯಾಂಕ್ಚ್ ವಿಕ್ರಿತ್ ಕರ್ಚ್ಯಾಂತ್ ಕಿತೆಂಚ್ ಸಾರ್ ನಾ, ಕಿತೆಂಚ್ ಮರ್ಯಾದ್ ನಾ, ಕಿತೆಂಚ್ ಭರ್ಮ್ ನಾ!
ಮೊಗಾಚ್ಯಾಂನೊ, ಫಕತ್ ಪಯ್ಶೆ ಮೆಳ್ತಾತ್ ಮ್ಹಣ್ ಫಟಿ ಮಾರುಂಕ್ ವಚಾನಾಕಾತ್; ಖಂಚ್ಯಾ ನಮೂನ್ಯಾಚಿ ಗರೀಬಾಯ್ ಹಿ ತುಮ್ಚಿ? ವೊರೆವಿಂಗಡ್ ಸೊಡಾ ಗಲ್ಫಾಂತ್ಲ್ಯಾಂಕ್ ತೆ ಕಿತ್ಲೆ ಕಷ್ಟಾಂನಿ ಆಪ್ಲ್ಯಾ ಕುಟ್ಮಾಕ್ ವಯ್ರ್ ಹಾಡ್ತಾತ್, ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಗಾಂವಾಕ್ ಯೇವ್ನ್ ಆಪ್ಲ್ಯಾ ಬಾಯ್ಲೆಕ್ ವೆಂಗ್ತಾತ್ ತೆಂ ತುಮಿ ಭಿಲ್ಕುಲ್ ನೆಣಾಂತ್. ವಿಚಾರ್ತಾನಾ ದಾನ್ ಹಾಸೊನ್ಂಚ್ ವಿಚಾರ್ತಾತ್ ತುಮಿಂ ಉಪ್ರಾಂತ್ ಗಾಂವಾಂತ್ ಥೊಡೆ ಪಾವ್ಟಿ ತಾಂಚ್ಯಾ ಭುರ್ಗ್ಯಾಂಕ್ ಶಾಲಾಂನಿ ಪ್ರವೇಶ್ ವಿಚಾರ್ತಾನಾ ತುಮ್ಕಾಂ ತಾಂಚಿ ಸುಶೆಗಾತ್ ವಿಸರ್ ಪಡ್ತಾ! ಜರ್ ತುಮ್ಚೆಲಾಗಿಂ ಫಿರ್ಗಜ್ ಫೆಸ್ತಾಕ್ ವ ನತಾಲಾಂ ಫೆಸ್ತಾಕ್ ಸಗ್ಳಿ ಇಗರ್ಜ್ ದಿವ್ಯಾಂನಿ ಸುಂರ್ಗಾರಾವ್ನ್ ವೀಜ್ ಸಕ್ತೆಚೆಂ ಬಿಲ್ಲ್ ಭರುಂಕ್ ಪಯ್ಶೆ ಆಸಾತ್; ದಾರು ಲಾಸುಂಕ್ ಪಯ್ಶೆ ಆಸಾತ್ ತರ್ ತಸಲ್ಯಾ ತುಮ್ಕಾಂ ಹೆರಾಂಲಾಗಿಂ ದಾನ್ ವಿಚಾರುಂಕ್ ಕಸಲೆಂಚ್ ಹಕ್ಕ್ ನಾ!
ಸಮಾಜೆಕ್ ಗರ್ಜೆಚ್ಯೊ ಸಂಗ್ತಿ - ಶಾಲಾಂ, ಆಸ್ಪತ್ರ್ಯೊ, ಇಗರ್ಜೊ ಅತೀ ಗರ್ಜ್ ವ್ಹಯ್; ತರಿಪುಣ್, ಆಸ್ಲ್ಲೆಂ ಮೊಡುನ್ಂಚ್ ವೆಚೆಂ ಆನಿ ಲೋಕಾಲಾಗಿಂ ದಿಯಾ, ದಿಯಾ, ದೆವಾಕ್ ದಿಯಾ ಮ್ಹಣ್ ವಿಚಾರುನ್ಂಚ್ ವೆಚೆಂ ಭೀಲ್ಕುಲ್ ಸಾರ್ಕೆಂ ನ್ಹಂಯ್. ಪಾದ್ರ್ಯಾಬಾಕ್ ಫರ್ ಜಾಯ್ ವ್ಹಯ್, ಪುಣ್ ತಾಂಕಾಂ ಬಂಗ್ಲೆ ಬಾಂಧ್ಚೆ ನ್ಹಂಯ್. ಪ್ರಥಮತ್ ಆಮಿ ಲೋಕಾಕ್ ಹ್ಯಾ ಸಂಸಾರಾಂತ್ ಜಿಯೆಂವ್ಕ್ ಕಿತೆಂ ಅತೀ ಅವಶ್ಯ್ ತಾಚೆರ್ ಮಾತ್ರ್ ನದರ್ ಘಾಲುಂಕ್ ಜಾಯ್. ಉಪ್ರಾಂತ್ ಜಾಲ್ಯಾರ್ ವ್ಹಡ್ ವ್ಹಡ್ ಕಟ್ಟೋಣಾಂ ಬಾಂಧುನ್ ಆಮಿ ಶ್ರೇಷ್ಠ್ ಮ್ಹಣ್ ಹೆರಾಂಲಾಗಿಂ ದಾಖಂವ್ಕ್ ಪ್ರಯತ್ನ್ ಕರ್ಯೆತ್. ಕಟ್ಟೋಣಾಂ ಬಾಂಧುನ್ ಆಪ್ಲಿ ಶ್ಯಾಥಿ ದಾಖಂವ್ಕ್ ಪ್ರಯತ್ನ್ ಕರ್ಚೆ ಸಭಾರ್ ಯಾಜಕ್ ಆಮ್ಚೆ ಮಧೆಂ ಆಸೊನ್ ತೆ ಪಯ್ಶ್ಯಾಂ ಭೋಜಕ್ ಜಾವ್ನ್ ಗೆಲ್ಯಾತ್. ಅಸಲ್ಯಾಂಕ್ಚ್ ಆಮ್ಚ್ಯಾ ಬಿಸ್ಪಾಂನಿ ಮಾನ್ ದೀವ್ನ್ ಶೆರಾಂನಿಂಚ್ ತಾಂಕಾಂ ಫಿರ್ಗಜೊ ಭಾಸಾವ್ನ್ ಅನ್ಯಾಯೀ ಕೆಲ್ಲೊ ಆಸಾ. ಹ್ಯ್ಯಾಚ್ ಲಾಗೊನ್ ಕೊಣೆಂ ಕಟ್ಟೋಣಾಂ ಬಾಂಧುನ್ ದಾಖ್ಲೊ ರಚುಂಕ್ ನಾ ತಸಲೆ ಯಾಜಕ್ ಹಳ್ಳೆಂತ್ಲ್ಯಾ ಗಲ್ಲ್ಯಾಂನಿ ವಚೊನ್ ಶಿರ್ಕಾಲ್ಯಾತ್! ಯಾಜಕಾಂನಿ ವ್ಯಾಪಾರ್ ವಹಿವಾಟಾ ಥಾವ್ನ್ ಪಾಂಚ್ ಮೈಲಾಂ ಪಯ್ಸ್ ರಾವೊನ್ ಫಕತ್ತ್ ಧರ್ಮಾ ಥಂಯ್ ಆನಿ ಲೋಕಾಚ್ಯಾ ಬರ್ಯಾ-ಫಾಲ್ಯಾ ಥಂಯ್ ಆಪ್ಲೊ ವಾವ್ರ್ ಖಚಿತ್ ಕೆಲ್ಯಾರ್ ಆಮ್ಚಿ ಸಮಾಜ್ ಕಿತ್ಲಿ ವೃದ್ಧಿ ಜಾಯ್ತ್!
ಬಿಸ್ಪ್ ಆಪ್ಲ್ಯಾ ಥೊಡ್ಯಾ ಮೊಗಾಚ್ಯಾಂಕ್ ಹೆರ್ ದೇಶಾಂಕ್ ವಚೊನ್ ದಾನ್ ಜಮಂವ್ಕ್ ಪರ್ವಣ್ಗಿ ದಿತಾ ಅಸೆಂ ಕೆಲ್ಲ್ಯಾಂತ್ ಬಿಸ್ಪಾಕ್ ಆನಿ ತ್ಯಾ ಯಾಜಕಾಕ್ ಬರೊಚ್ ಫಾಯ್ದೊ ಆಸಾ ತೆಂ ಖರೆಂ. ಆದಿಂ ಎಕ್ಲೊ ಬಿಸ್ಪ್ ಅಸೆಂ ಮ್ಹಣ್ತಾಲೊ ಖಂಯ್, "ತುಂ ಖಂಯೀ ವಚಾನಾಂಯ್ ಪೆಲ್ಯಾನ್, ಪಾಟಿಂ ಯೆತಚ್ ಮ್ಹಜೊ ವಾಂಟೊ ಮ್ಹಾಕಾ ದಿಲ್ಯಾರ್ ಜಾಲೆಂ!" ಥೊಡೆ ಯಾಜಕ್ ದಾನ್ ಜಮಂವ್ಚ್ಯಾಂತ್ ಬರೆಚ್ ಹೆಳ್ಲ್ಲೆ ಆಸಾತ್ - ತೆ ಸಭಾರಾಂಕ್ ಜೀವ್ ಆಸ್ತಾನಾಂಚ್ ಸರ್ಗಾಕ್ ವ್ಹರ್ತಾತ್ ಆನಿ ಆಪ್ಲಿ ಥೈಲಿ ದಾಟ್ ಕರುನ್ ಗಾಂವಾಕ್ ಯೆತಾತ್. ಆಮ್ಚ್ಯಾ ಸಭಾರ್ ಜಣಾಂಕ್ ಹಾತಿಂ ಥೊಡೆ ಕಾಸ್ ಜಾತಚ್ ಏಕ್ಚ್ ಖಂತ್ - ಹೊ ಸಂಸಾರ್ ಸಾಂಡ್ತಚ್ ಸರ್ಗಾಕ್ ವೆಚಿ! ಯೆಮ್ಕೊಂಡ್ ಕೊಣಾಕ್ಚ್ಚ್ ನಾಕಾ!!
ಬಿಸ್ಪಾಂಕ್ ವ ಯಾಜಕಾಂಕ್ ಕೋಣೀ ಸಾಧೊ ವ್ಯಕ್ತಿ ವಚೊನ್ ಕಾಂಯ್ ಉಪ್ಕಾರ್ ಆಶೇತಾ/ಮಾಗ್ತಾ ಜಾಲ್ಯಾರ್ ತೊ ವ್ಯಕ್ತಿ ಪಡ್ಚ್ಯಾ! ತಾಚಿಂ ಖೆಳ್ಕುಳಾಂಚ್ ಜಾತಾತ್!! "ತುಕಾ ಜರ್ ಗತ್ ನಾ, ತುಕಾ ತುಜ್ಯಾ ಭುರ್ಗ್ಯಾಂಕ್ ಕೊಲೆಜಿಕ್ ಧಾಡಿಜಾಯ್ ಮ್ಹಣ್ ಕಿತ್ಯಾಚೊ ಆಂಗ್ಗಾಲಾಪ್? ತಾಂಕಾಂ ಖಂಯ್ ತರೀ ಏಕ್ ಲ್ಹಾನ್ಶೆಂ ಕಾಮ್ ಪಳೆವ್ನ್ ಖಾಮಾಂವ್ಕ್ ಕಿತೆಂ? ಮಾಂದ್ರಿ ಆಸ್ಲ್ಲ್ಯಾ ತಿತ್ಲೆಚ್ ಪಾಂಯ್ ಸೊಡುಂಕ್ ಆಮಿ ಶಿಕಾಜಾಯ್. ಹಾತಿಂ ಡೊನೇಶನ್ ದೀಂವ್ಕ್ ತಾಂಕ್ ನಾ ಜಾಲ್ಯಾರ್ ಸರ್ಕಾರಿ ಶಾಲಾಂಕ್ ಧಾಡುಂಕ್ ಜಾಯ್ನಾಯೆ?...." ಅಡ್ ಸವಾಲಾಂಚ್ ಸವಾಲಾಂ ವ್ಹಡಿಲಾಂಚಿಂ - ದುಬ್ಳೆ ಜಾವ್ನ್ ಜಲ್ಮಾಲ್ಲಿ ತಾಂಚಿ ಚೂಕ್ ಮ್ಹಳ್ಳ್ಯಾಪರಿಂ. ಪುಣ್ ಹಾಂಕಾಂ ಮಾತ್ರ್ ದೋನ್ ಮಾಂದ್ರ್ಯೊ ಜಾಯ್; ತೆ ದೆವಾಚೆ ಮನಿಸ್.
"ಅಳೆ, ಧಾಂಪ್ ಬಾಗಿಲ್; ಪಾದ್ರ್ಯಾಬ್ ಯೆತಾತ್, ಚತ್ರಾಯ್!"
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
